ያሃንስ ሙቡል (ራዕይ)

         ያሃንስ ሙቡል (ራዕይ)                 

ሳይማ            

ያሃኒስ ሙቡል ይምጽሒፈም ክርስትያን ኢየሱስ ክርስቶስ ተን ማደራ አበኒህ ቅድስናህ ማረኒሚህ ምክንያታል ስደትከ መከራ ተን ማዳይ ቲነ ጊዘህ ኪኒ፣ ጻሓፊት ዋና ቱክረት ታይኒቢበም ተን  ታስፋ ሙሉኡድ ታኮ ያይባራታዖናከ  ተን ማዳ  ስደትከ መከራት አዳድ ሲኒ  ኢምነቲህ ያፅናዖና ያይዳፋፋሮና ኪኒ፡፡  ማጽሐፍኮ ማንኮ ክፍሊ ማንጊህ ለምከ ያምከተተለም ለ ትንብት ይብዸቲያ የከህ፣ ትንብታት ታማይ ዳባን ቲነ መእመናን ታምራዳኦ ዺዕታም፣አኪ ማራህ ለ  ሚሥጢር የከህ ሱጎ ስዕለ ለ ዋኒህ

ካብተም ኪኖን፣መዝሙር መራሒ ያይደገገመሚህ ዓይነቲህ ታይ ማጽሐፊህ አሞ/ አራኢስቲ/  ኢሲሲ ሙቡልህ ዳዓባል ኢሲሲ ዓይነቲህ የምደገገመህ ካብያ፣ ማጽሐፍ ዳዓባል ትርጉም ኢሲሲ ማብሎ ለቲያ የከሚህ ፋንቲ ሓሳብ ዓዶቲያ ኪኒ፣ ታሃም ፉጊ፣ ማዳራ የከ ክርስቶስ ጋባዕሲሰ ዋ ዓይነቲህ ኢንኪጉልከ ባክቶ ዋክተህ ሰጣን ኦሰህ  ናዓብቶልትክ ኡምብህ ሱበ፣  ታይ ሱባ ባኪተ ዋክተ ታምኢሚነም ተከ ወገናታህ  ዑሱብ  ዓራንከ ዑሱብ ባዾህ በረከት  ተን ያይውሪሰ፣"ያዽሔ ሒያውቶ ኪኒ።

  ===============================

  ማዕራፋ  1

   1. ታይ ሙቡል /ራኢ/ዻየ ዋክቲህ አዳል ያከ ጉዳይ አገልገልቲ ያይባሎዎ ፉጊ ኢየሱስ ክርስቶሱህ ዮሖወ ቲያ ኪኒ፣ ኢየሱስ ክርስቶስ ለ ኢሲ መልአክ ፋረህ ኢሲ አገልጋሊህ ያሃኒሲህ ይሙቡሉወህ አካህ ይግልፀ፡፡ 2. ያሃኒስ ለ ዩብለም ባሊህ ኡምቢህ መዔፉጊህ ቃላህከ አየሱስ ክርስቶስህ ምስክርነቲህ ዋንሲተ፡፡ 3. ታሃም ኡምቢህ ታምፊጺመ ዋክቲ ካብየህ ኪንጉል ታይ ትንብት ማጽሐፍ ያይንብበቲ የምበረከቲያ ኪኒ፣ ታማም ባሊህ ትንቢት ቃል ታበምከ ማጽሐፍ አዳል ትምጽሕፈም ታፍጺመም ተምበረከም ኪኖን፡፡

ማልሒና እስያ ሞሶዓሪቲል ፋርምተ ሳላምታ

    4-5. ያሃኒስኮ፣ ማልሒና እስያህ ሞሶዓሪቲህ ፋሪምተ ሳላምታ፣ ለምኮ፣ ሊይይ ይነምኮ፣ ያሚተ መዔፉጎኮ፣ ካዙፋኒህ ነፊል ታነ ማልሒና መናፍትኮ፣ ኡሙን ማስኪር ኪኒ፣ ራቢ ኡግታቶህ ሪይስ የከ፣ ባዾ ነገሥታቲህ ማዳራ የከ ኢየሱስ ክርስቶስ፣ ጸጋከ ሳላም ሲናሊህ ያኮይ፡፡ ኒ ይክሒነህ፣ ኢሲ ቢሎህ ለ ኃጢአትኮ ኒ ይይድኂነ፣ 6. ካ አባ የከ አምላክ ናስጋልጋሎ ካህናት ማንግሥቲህ ነምበረከህ፣ ኢየሱስ ክርስቶሲህ ክበረከ ኃይሊ ኡማንጉሉህ  ያኮይ፣ አመን፡፡ 

  7. ሀይከ ዳሩሩታህ ያሚተ፣ ካሙደ ሒያው ኡካ ራዔካህ ሒያው ኡምቢህ ታብለ፣ ባዾ ሒያው ኡምቢህ ካ ምክንያታል  ወዓን፣ ዮ! ታይ ጉዳይ ሓቀ ኪኒ፣ አመን፡፡ 8. ያነቲ፣ ይነቲ፣ ያምተቲ፣ ኡማኒም ዺዓ መዔፉጊ ናምላክ"አልፋከ ኦመጋ፣ ኤዸዾይታከ ባክቶ ዮያ ኪኒ ያዽሔ፡፡"

ክርስቶስ ሙቡል ይምግልጸም

  9. ኢየሱስ ክርሰቶስልህ ሊኖ ኢንኪኖህ፣ ካ ማንግሥቲህ ወረስት ተክኒምኮ ሲንሊህ መከራከ ትዕግሥት ሓድሊታ፣ አኑ ሲን ሳዓል ያሃኒስ፣ መዔፉጊህ ቃላህ ኢየሱስ ምስክርነቲህ ፍጥሞ አክያን ደሴቲል ኢነ፡፡ 10. ማዳሪ ለለዕ መንፈሲህ ኤውዔህ አነሃኒህ ጡሩምባት አንዻሓህ ኢግድ ናባ አንዻሕ ሳራቱላኮ ታህ አይህ ኦበ፡፡ 11."ታብለም ማጽሐፋል ኢጽሕፋይ ማልሒና ሞሶዓሪቲል፣ ማለት ለ ኤፌሶኑል፣ ሰምርኔስል፣ ጴርጋሞኑል፣ ትያጥሮኑል፣ ሰርዴሲል፣ ፊላደልፍያከ ሎዶቅያ ቱላል ፋር፡፡ 

  12. ኢይ ዮድ ዋንስተም አዻጎ ሣራቱላል ኡፍኩነጉል ማልሒና ዋርቂ መቅረዝ ኡብለ፡፡ 13. መቅረዝ ፋናል ሒያውቲ ባዻህ ኢግቲያ ኡብለ፣ ኡሱክ አይከ ኢባ ፋናህ ማዳ ዸዽ ሣረና ሀይሲተህ፣ ኢሲ አፍዓዶል ዋርቀ ይክቲየ ቲያ ኪይይ ይነ፡፡ 14. ካከ ካ ዸግኃህ ዳጋር ዓዶ ዒዶቲህ ዳጋርከ ባራድ ባሊህ ዓዶቲያ ኪይይ ይነ፣ ካ ኢንቲት ጊራ ሀልሀልታህ ይምክከ ቡሩሩህ ኢጊይ ቲነ፡፡ 15. ኢባቢ ጊራህ ይምክከህ ሓዺታ ቡሩሩህ ኢጊዲይ ቲነ፣ አንዻሕ ናባ ፊዽታ ቦዾዾሓ ላየህ አንዻሕ ሊይይ ይነ፡፡ 16. ሚድጊ ጋባክ ማልሒና ሑቱክታ ይብዸህ ይነ፣ ላሙላኮ ልልግ ሰይፊ አፍኮ አካውዒይ ይነ፣ ነፍ ለ ሙሉኡድ ጋዳህ ኢፎሳ አይሮይታህ ኢጊዲይ ይነ፡፡ 17. ኡብለ ዋክተ ራበ ሒያውቶ ባሊህ ኤከህ ካ ኢቢህ ዳባል ራደ፣ ኡሱክ ለ ሚድጊ ጋባ ያሞል ዮክ ሃየህ ታህ ዮክየ፣"ማማይትን፣ ኢዸዾይታከ ባኪቶ ዮያ ኪኒ፣ 18. ያነቲያ ኪዮ፣ ራበህ ኢነ፣ ያኮይ ኢካህ ሀይከ ኡማንጉሉህ ያነቲያ ኪዮ፣ ራባከ ሲኦል አሞል ሢልጣን ሊዮ። 19. አማይጉል ቱብለም፣ ካዶ ያነቲያከ ላካል ያሚተ ቲያ ኢጽሒፍ። 20. ይ ሚድጊ ጋባክ ታብለ ማልሒና ሑቱክታከ ማልሒና ዋርቂ መቅረዚህ ምሥጢር ታሃም ኪኒ፣ ማልሒና ሑቱክቲ ማልሒና ሞሶዓሪቲህ ማላይካ ኪኖን፣ ማልሒና መቅረዝ ማልሒና ሞሳዓሪት ኪኖን።

     ማዕራፋ 2 

           (1) ኤፌሶን ሞሶዓሪ  

    1. ኤፌሶን ሞሶዓሪህ መልአካል ታህ ኤያይ ኢጽሒፍ ታሃም ለ ማልሒና ሑቱክታ ሚድጊ ጋባህ ይብዸህከ ማልሒና ዋርቂ መቅረዚህ ፋናድ ጋሓንጋሓ ቲይ ዋንስተም ኪኒ። 2. ኩሥሕከ ኩጻዕረ፣ ኩትዕግሥቲ አዽገ፣ ኡማ ማራህ ትዕግሥቲ አብተህ አካህ ማይፋቃድኒቶ፥ ሐዋርያ አከካህ ሐዋርያ ኪኖ ታዽሔ መምሂራን ዲራብሊት የኪኒህ ተን ገይተም አዽገ፡፡ 3. ትዕሥቲህ ሲክ ተምከ ይሚጋዓል ታሰፋ አቅሩጸካ መከራ ጋራይተም አዽገ፣ 4. ያኮይ ኢካህ ኢንኪ አካህ ኩአንቅፈ ጉዳይ ሊዮ፣ ታሃም ኢሲ ባሶህ ካሓኖ ሓብተ፡፡ 5. ራዳምኮ ባሶህ አልቲነም ኢዝኪር፣ ንስሓ ለ ሳይ፣ ባሶህ አባክቲነ ኢሲ ሢራሕ አብ፣ ታሃም ኡምቢህ አበዋይተምኮ ለ ኩላል አምተልዮ፣ ንስሓ ለ ሳየ ዋይተምኮ ኩመቅረዝ ቦታኮ ኡገሠ ሊዮ፡፡ 6. ያኮይ ኢካህ ኩ አይምስግነርከህ ኢንኪ ጉዳይ ያነ፣ ታሃም ለ አኑ ኒዕቢዮ ኒቆላውያን ሢራሕ ትንዒበርከህ ኪኒ፡፡ 7."መንፈስ ሞሶዓሪቲክ ያዽሔም አይቲ ለቲይ ያቦይ፣ ሱበቲ መዔፉጊህ ጋናት አዳል ታነ ሂወት ሓዻኮ ፍረ በቶ"አበህ አኒዮ፡፡

           (2) ሰምርኔስ ሞሶዓሪ

     8. ሰምርኔስ ሞሶዓሪህ ማላይካህ ታህ ኤያይ ኢጽሒፍ፣"ታሃም፣ ኤዸዾይታከ ባክቶ ተከ፣ ራበህ ይነቲያከ ያነቲይ ዋኒሰም ኪኒ፡፡ 9. ኩ ጸገምከ ኩ ድኪነት አዽገ፣ ያኮይ ኢካህ ሀብታም ኪቶ፣ አይሁድ አከካህ አይሁድ ኪኖ ታም፣ ሰጣን ማኅበር ኪናም፣ ኩሚጋዕ የይለይኒም አዽገ፡፡ 10. ባሶቱላል ኩማዳ መከራህ ማማይሲቲን፣  ሀይከ ታምፋታኖና ሲንኮ ጋሪጋሮ ዲያብሎስ ማዹው ዓረድ ተን ሳይሰ ለ፣ ታማና ለለዕ መከራ ጋረየልቲን፣ ራባ ፋናህ ኡሙን ቲኪ፣ ሂወት አክልል ኮህ አሓየ ሊዮ፡፡ 11."መንፈስ ሞሶዓሪቲያክ ያዽሔም አይቲ ለቲይ ያቦይ፣" "ይስዕረቲይ ማላሚ ራባህ  ማብያኪታ"፡፡

(3) ጰርጋሞን ሞሶዓሪ

    12. ጰርጋሞን ሞሶዓሪህ መልአካህ ታህ ኤያይ ኢጽሒፍ፣

"ታሃም፣ ላሙላኮ አፍ ሊሊግ ሰይፍ ይብዸቲይ ዋነሲተም ኪኒ፡፡ 13. አቱ፣ ሰጣን ዙፋን ኤድያነ ስፍራድ ማርታም አዽገ፣ ያከካህ ይሚጋዕ ሲክ ኢሰህ ትብዸ፣ ኢሰ ማክሓድኒቶ፣ ኡሙን ይማስኪር ኪይይ ይነ አንቲጳስ ሰጣን  ኤድማራ  ሲን ካታማል ራበ ዋክተ ኡካ ዮያል ያምንኒም ማሓብኒቶ፡፡ 14. ያከካህ ኩ አንቂፈሚህ ውልውል ጉዳይ ሊዮ፣ ታሃም በለዓም ሚሂሮ ቲብዸ ውልውል ሒያው ሲን ፋናድ ያኒን፣ ታይ በለዓም እስራኤል ህዝቢ ጣዖቱህ ትምሥውዔም በታከ ዙሙት አባክ ያምሳናካሎና ባላቅን ይምክረም ኪኒ፡፡ 15. ታማም ባሊህ ኒቆላውያን ትምሂርት ትበዸ ሒያው ለ ሲን ፋናድ ያኒን፡፡ 16. አማይጉል ንሲሓ ሳይ! አከዋየምኮ ዸህ ኩላል ኤመተህ ያአፍኮ ያወዔ ሰፊህ ኩሙደ ሊዮ፡፡ 17. መንፈሲህ ሞሶዓረቲክ አዽሔም ታበ አይቲ ለቲ ያቦይ፣ ሱበቲያህ ሱዑተ መና አካህ አኃሊዮ፣ ሱባ ሚጋዕ ኤል ይምጽሕፈ ዓዶ ዻ አካህ አኃሊዮ፣  ጋራየ ቲያኮ በሒህ ታሃም አኪ ማራኮ  ኢንከቲ ሚያድገ፡፡"

(4) ትያጥሮን ሞሶዓሪ

       18. ትያጥሮን ሞሶዓሪህ መልአካህ ታህ ኤያይ  ኢጽሒፍ፣ 

  "ታይ ጊራ ሀልሀታህ ኢጊድ ኢንቲት ለምከ ጊራህ ሓራረህ ይምክከ ቡሩሩህ ኢጊድ ኢባቢ ለሚህ መዔፉጊህ ባዽ ዋንሲተም ኪኒ፡፡ 19. ኢሲ ሢራሕከ ካሓኖህ፣ ኢሲ ኢምነትከ አገልግሎቱህ ትዕግሥቲህ ሲክ ተም አዽገ፣ ሳራ ኩሢራሕ ባሶቲያኮ ያይሰም አዽገ፡፡ 20. ያኮይ ኢካህ ኢንኪ አካህ ኩአንቂፈ ጉዳይ ሊዮ፣ ታሃም"ነብይት"ኪዮ ታዽሔ ኑማ፣ ኤልሣቤጥክ ዒሲሲ ተህ ትዕግሥት አካህ አበተ፣ ኢሲ ያገልገልት ያመንግኒምኮከ ጣዖቱህ ይምሥወዔ ምግበ በቶና አይምሂሪክ ተስገገየህ ታነ፡፡ 21. ንሲሓ ሳይቶ ጊዘ አካህ ኦሖወ፣ ኢሲ ለ ኢሲ ዙሙቱህ ንሲሓ ሰይቶ ማጉርና፡፡ 22. አማጉል ሢቃይ ዓራቲህ አሞል ተዒደ ሊዮ፣ ተሊህ ሥራሔን ኡማ ሢራሓህ ንሲሓ ሳየኒህ ጋሔዋየኒምኮ ተሊህ ትምንዚረሚል ኡምቢህ ኃይለ ለ ሢቃይ ኤልባሄ ሊዮ፡፡ 23. ተ ዻይሎ ራባህ አቅፂዔ ሊዮ፣ ሞሶዓሪት ለ ኡምቢህ ሒያው ሓሳባህ ጉርታም ታምርሚረም ዮያ ኪናም አዽገሎን፣ ሲነሲነህ ተንተን ሢራሕ ባሊህ አካህ አሓየ ሊዮ፡፡ 24. ትያጥሮኑል ታነምከ ታይ ኡማ ሚሂሮ ጋራየ ዋይተምክ ኡምቢህ፣ ታማም ባሊህ ጋሪጋሪ"ሰጣን አዳለ ምሥጢር ኪኒ"ተዽሔህ አኪቲለ ዋይታማክ አኪ ዑካ ሲናል ማአረ፡፡ 25. ያከካህ አኑ አምተም ፋናህ ልቲኒም ሲክ ኢሳይ ኢብዻ፡፡ 26. ሱበህ፣ ይሢራሒህ አሞል አይከ ባክቶ ፋናህ ሲክ የቲያህ ህዝቢ አሞል ሢልጣን አካህ አሓየ ሊዮ፡፡ 27. ቢርቲ ኢሎህ ተን ዱወለ፣ ካላ ኑዋይ ባሊህ ሳባዓክ አዱግዱጊክ አይሩኩተ ለ፣ ታይ ሢልጣን አኑ ኢናባኮ ጋራየሚህ ዓይነት ኪኒ፡፡ 28. ዻሕኒት ሑቱክታ አካህ አሓየ ልዮ። 29."መንፈስ ሞሶዓሪቲክ ያም ታበ አይቲ ለቲ ያቦይ፡፡                                         ማዕራፋ 3

(5) ስርዴስ ሞሶዓሪ

   1. ሰርዴስ ሞሶዓሪህ መልአካህ ታህ ኤያይ ኢጽሒፍ፣ ታሃም፣ ማልሒና ፉጊ መናፍሰቲከ ማልሒና ሑቱክታ ይብዸቲይ ዋንሲተም ኪኒ፣ ኩሢራሕ አዽገ፣ ሚጋዓህ ያነቲያ ኪቶ፣ ያከካህ ራብተ፡፡ 2. አማይጉል ኢንቂህ! ኩሢራሕ ኢኒ መልአኪህ ነፊል ፍጹም የከህ ገየጉል ራባህ ካብየህ ራዓ ጉዳህ ሲኪ ኤይ፡፡ 3. አማይጉል አይሚህ ዓይነቲህ ሚሂሮ ጋራይተምከ ቶበም ኢዝኪር፣ ዻዉዽ፣ ንስሓ ሳይተህ፣ አንቂሔ ዋይተምኮ ባዸዻይቶ ባሊህ ዲንገቲህ ኮድ አምተ ሊዮ፣ አዒለህ ኮድ አምተም ማታዽገ፡፡ 4.ያከካህ ሲኒ ሣራ አይሪክሰ ዋይተ ሰርዴስ ዳጉ ሒያው ኮሊህ ያኒን፣ ዮሊህ ያዳዎና አካህ ኤዳም ኪኖንጉል ዓዶ ሣረና ሀይሲተኒህ ዮሊህ አዴሎን፡፡ 5. ሱበቲ ተናባሊህ ዓዶ ሣረና ሀይሲተ ለ፣ ካሚጋዕ ካአባህከ ካማላይካህ ነፊል አካህ አይስዽገሊዮ፣ ታነሚህ ሚጋዕ ኤድ ያሚዝግበ ሂወት ማጽሐፍኮ ማይድምሲሰ፡፡ 6."መንፈስ ሞሶዓረክ ያም ታበ አይቲ ለቲ ያቦይ፡፡" 

(6) ፊላደልፍያ ሞሶዓሪ

    7. ፊላደልፍያ ሞሶዓሪህ ማላይካህ ታህ ኤያይ ኢጽሒፍ፣  ቁዱስከ ሓቀ የከ፣ ዳዊት አካህ ፋካ ቁልፈ ይብዸቲይ ዋንስተም ኪኒ፣ ኡሱክ ፋከም ኢንከቲ ማሊፋ፣ ኡሱክ አልፈም ኢንከቲ ማፋካ። 8. ኩሢራሕ አዽገ፣ ሀይከ! ኢንከቲ አሊፎ ዺዔዋ ፋክተ ኢፈይ ኩነፊል አበህ አኒዮ፣ ኩኃይሊ ዒንዻቲያ ኪናም አዽገ፣ ያኮይ ኢካህ ይቃል ዻዉዸ፣ ይሚጋዕ ማክኃድኒቶ፡፡ 9. አማይጉል አይሁድ አከካህ አይሁድ ኪኖ ታዸሔም ቶሆም ሰጣን ማኅበር ተከ ዲራብሊት የመትኒህ ኩኢቢህ ዳባል ራዶና አበህ አኒዮ፣ አኑ ኩኪሒኒዮም ያዻጎና ተን አበ ሊዮ፡፡ 10. ትዕግሥቲ ለቲያ ቲኪ ኮካም ይቃል ዻዉዸርከህ፣ አኑ ለ ባዾት አሞል ማርታም ተን አፋታኖ ዓለም ኡምብሂያህ አሞል ታሚተ መከራህ ሳዓትኮ ኩአይድኅነ ሊዮ፡፡ 11.ሀይክ ዸህ አምተሊዮ! ኩአክልል ኢንከቲ ኮክ በያምኮ ሊቶም ሲክ ኢሳይ ኢብዽ፡፡ 12. ሱበቲያ ይማላይካህ በተ መቅደሲህ ዓሚዳ አበልዮ፣ ታማርከኮ ኢንኪጉል ሚያውዔ፣ ኢኒ ማላይካህ ሚጋዓህከ ኢኒ ማላይካህ ካታማህ ሚጋዕ ካአሞል አጽሐፈ ሊዮ፣ ታይ ካታማ ዓራንኮ ይአምላኮ ኦብተ ዑሱብ ኢየሩሳለም ኪኒ፣ ኢኒ ዑሱብ ሚጋዕ ተያል አጽሒፈ ሊዮ፡፡ 13."መንፈስ ሞሶዓረክ ያም ታበ አይቲ ለቲ ያቦይ፡፡"

(7) ሎዶቂያ ሞሶዓሪ

      14. ሎዶቅያ ሞሶዓሪህ መልአኮ ታህ ኤያይ ኢጽሒፍ ፥

 "ታሃም አመን ተከምኮ፣ ያምኢምነት ቲያከ ሓቂ ማስኪር ተከ፣ መዔፉጊህ ፍጥረት ሙሉኡድ ገይሲሳ ቲያኮ ገይመህ ኤልዋኒሰነ ቲያ ኪኒ፡፡ 15. ኩሢራሕ አዽገ፣ ዻምኅንቲያ ወይ ላዕንቲያ ማኪቶ፣ ዻምሕነቲያ ወይ ለዒንቲያ ታከዶማ መዔም አከዻዸ፡፡ 16. ዻምኅን ቲያ ያኮይ ላዕነቲያ አከካህ ላ'ዓ ያቲያ ኪቶጉል፣ ኢኒ አፍኮ ኤየዔህ ቱፍ ኮዋ ኪዮ፤ 17. አኑ ሀብታም ኪዮ፣ ማንጎ ሀብተ ሊዮ፣ ዮክ ታጉዱለሚህ ኢንኪም ማሊዮ ታዸሔ፣ ያከካህ ፁጉም፣ ዲካ፣ ዑዉር፣ ኦና ኪንቲያ፣ ፎያ ኪንቲያ ኪቶም ማታዺገ፡፡ 18. ሀብታም ታኮ ጊራህ ይምፍቲነ ዋርቀ ዮኮ ዻሚቶ፣ ኢሲ ዓርሰህ ሖላሳ ቱማ አልፍታ ዓዶ ሣረና ሀይሲቶ፣ ታብሎ ኢሲ ኢንቲ ታካኃሎ ኩአምክረ፡፡ 19. አኑ ኪሒኒዮ ማራ ሙሉኡክ አግኒሔ፣ ተን አቅፂዔ፣ አማይጉል እትግሃይ፣ ንስሓ ሳይ፡፡ 20. ሀይከ አኑ ማዕዶክ ሶለህ አኩሕኩሒክ አኒዮ፣ አኪናንቲ ይአንዻሕህ ዻው ዮበህ ማዕዶ ዮህ ፋከምኮ ካያድ ሳየህ ካሊህ በተ ሊዮ፣ ኡሱክ ዮሊህ በተለ፡፡ 21. አኑ ሱባ ሱባህ ኢኒ አባሊህ ኢኒ አባህ ዙፋኒህ አሞክ ዲፈያም ባሊህ፥ ሱበቲ ዮሊህ ይዙፋናል ዲፈዮ አበሊዮ፡፡22."መንፈስ ሞሶዓሪቲክ ያም አይቲ ለቲ ያቦይ::"

ማዕራፋ 4

መዔፉጊህ ዙፋንከ ዓራንቲ ጻሎቲህ ሥነ ሠርዓት

   1. ታሃምኮ ላካል ሆይከ ፋክተ ማዕዶ ዓራናል ኡብለ፣ ጡሩምባት አንዻሕ ባሊህ የከህ ዋንሲታህ ኦበ ኤዸዾይታት አንዻሕ"አሞ ታህ ኤወዕ! ባሶቱላል ያኮ ኤዳ ጉዳይ ኩአይቡሉወ ሊዮክ"ዮክየ። 2. አማይጉልካህ መንፈሲህ እምሲጠ፣ ሆይከ ዓራንት ዙፋን ይምዝርጊሔህ ኡብለ፤ 3. አሞል ዪነ ቢሲ ኢያሰጲድንከ ሰርዲኖን ኡንዹዹህ ኢጊድቲያ ኪይይ ይነ፣ ዙፋናል ለ ዮዞረ መርጊድ ኡንዹዹህ ኢጊድ ሮበላ ቲነ፣ 4. ታማም ባሊህ ዙፋን ባሮል ቶዞረ ላማታናከ አፋር ዙፋናት ኢያ ይኒን፣ ዙፋናት አሞል ዓዶ ሣራ ሀይሲተምከ ሲናሞክ ዋርቂ አክልል ድፈሰ ላማታናከ አፋር ስማግለቲያ ዲፌኒህ ይኒን። 5. ዙፋንኮ ሓንካዻከ አንጉድ አንዻሕ አካውዒይ ይነ፣ ዙፋን ነፊል ኢፊሳ ማልሒና ሲግቲ ይኒን፡፡ ኢሲን ማልሒና ፉጊ መናፍስት ኪኖን፡፡ 6. ካዙፋኒህ ነፊል ፂሪይ ያይዶጎሔ ማራፃን ባሕሪ ይነ፡፡ ፋናድ፣ ዙፋን ባሮሩልከ ነፊል ሣራቱላኮ ማንጎ ኢንቲት ለ አፋራ እንሲሳይቲ ይኒን፡፡ 

    7. ኤዸዾይታት ኢንሲሳይቲ ሉባካህ ኢጊዲይ ይነ፣ ማላሚ አዉሩህ ኢጊዲይ ይነ፣ ማዳሒ ሒያውቶህ ኢጊዲይ ይነ፣ ማፋሪ ያንፊረ ጉማይቶህ ኢጊዲይ ይነ፡፡ 8. አፋራ እንስሳይቲ ሲነሲነ  ሊሓ መንፈር ሊይይ ይኒን፣ ተን ዙፋናከ ተን አዳድ ለ ኢንቲትህ አክተመገ፣ ባርከ ለለዕ፣ "ቁዱስ ቁዱስ ቁዱስ ኡማኒም ዽዕታ ማዳራ አምላኮ፣ ይነቲያከ ያነቲያ" ያናም አስቆረጺይ ማናዎን፡፡

   9. እንሲሳ ኩዙፋኒህ አሞል ዲፈተህ ኡማንጉሉህ ማራ ክብረ፣ ውዳሰ፣ ምስጋና ካብሳን ዋክተ ኡምቢህ፣ 10. ላማታናከ አፋር ስማግለቲያ ኡማንጉሉህ ማራን፣ ኢሲ ዙፋኒህ አሞክ ዲፈየቲይህ ነፊል ዳምባራህ ጋሚመኒህ አካህ አስግድክ፣ ሰኒ አክልላት ለ ዙፋን ነፊል ዲፈሰኒህ፣ 11."ኒማደራከ ኒአምላኮ! ኡማን ጉዳይ ትፍጢረጉል፣ ኡማን ጉዳይ ይምፍጥረምከ የከህ ገይነም ኩዲላህ ኪኒጉል ክብረከ ምስጋና ኃይላ ጋራይቶ ኮህ ኤዳቲያ ኪቶ"አይይ ይኒን፡፡

ማዕራፋ 5

ማጽሐፍከ ዒዶታ

  1. ካዙፋኒህ አሞል ዲፈየቲህ ሚድጊ ጋባክ፣ ኢሮልከ አዳል አክ ይምጽሒፈ ማልሒና ማኅተሚህ አልፊመ /ይምእሲገ/ ማጽሐፍ ኡብለ፡፡ 2. ኢንኪ ኃይለ ለ ማላይካህ ናባ አንዻሓህ"ማኃተም ታንሓዎከ ማጽሐፍ ፋክቶ ኤዳም አቲያ ኪኒ?"የህ ዋንሲታህ ኡብለ፡፡  3. ያከካህ ዓራናል የከህ ባዾል ያኮይ ባዾክ ዳባል ማጽሐፍ ፋኮከ አዳ አክ ያብሎ ዺዔቲ ኢንከቲ ማና፡፡ 4. ማጽሐፍ ፋከኒህ አዳ ታብሎ ኤዳም ገይመ ዋይተርከህ ማንጎም ወዔ፡፡  5. ታማይ ዋክተ ስማግለኮ ኢንከቲ፣"ማወዒን፣"ሀይከ ይሁዳ ነገድኮ የከ ሉባክ፣ ዳዊት ዳባል ሱባህ ሱበ፣ ኡሱክ ማጽሐፍከ ማልሒና ማኃቲም ፋኮ ዺዓ ዮክየ፡፡

   6. ታሃምኮ ላካል ካዙፋንከ አፋራ እንስሳይቲህ ፋናድ፣ ስማግለ ፋናድ ዩምሩሑደቲያህ ኢጊድ ዒዶይቲ ሶለህ ኡብለ፣ ታይ ዒዶይቲ ማልሒና ጋይሳከ ማልሒና ኢንቲ ሊይ ይነ፣ ኢሲን ዓለሚል ሙሉእ ፋርምተ ማልሒና መዔፉጊህ መናፍስት ኪኖን፡፡ 7. ዒዶይቲ የመተህ ዙፋን አሞል ኤልድፈየርከክ ሚድጋል ማጽሐፍ በየ፡፡ 8. ማጽሐፍ በየ ዋክተ አፋራ እንስሳይቶከ ላማታናከ አፋር ስማግለቲያ ዒዶይቲ ነፊል ሲኒ ዳምባራህ ጋምመኒህ፣ ቲ'ቲያህ በገና ይብዽኒህ ይኒን፣ ታማምባሊህ ቁዱሳን ጻሎት የከ ዒጣናህ የመገ ዋርቂ ሙዳይ ይብዽኒህ ይኒን፡፡ 9. ዑሱብ መዝሙር ታህ አይክ ይዝምሪን፣ "ማጽሐፍ በዮከ ማኀተም ፋኮ ኤዳቲያ ተከ፣ አይሚህ አቱ ቱምሩሑደ፣ ኢሲ ቢሎህ ኢሲሲ ነገደኮ፣ ኢሲሲ ቆንቃህ፣ ኢስሲ ወገንኮ፣ ኢሲሲ ህዝበኮ ኡምቢህ ኡማን ሚናዳማህ መዔፉጎህ ትዲኅነ፤" 10.ናምላካህ ለ ካህናት ማንጊሥት" ያኮና ተን አብተ፣ ባዾት አሞል አንግሠሎን።"11. ኤይደለለዔጉል ለ ዙፋንከ ኢንሲሳ፣ ስማግለ ባሮሩል ማንጎ መላእክትህ አንዻሕ ኦበ፣ ተን ማንጋ አስያሓታህከ ማንጎ ሚሊዮናህ ሎይምታም ኪይይ ይኒን፣ 12. ናባ አንዻሓህ" ዩምሩሑደ ዒዶይቲህ ኃይላህ፣ ሀብተህ፣ ብልሓታህ፣ ሲራየህ፣ ክብረህ፣ ውዳሰህ፣ ሚስጋና ጋራዎ አካህ ኤዳቲያ ኪኒ"የን፡፡"                 

  13. ዓራንከ ባዾል፣ ባዾኮ ጉባከ ባሕሪ አዳል ታነ ፍጥረት ኡምቢህ፣"ዙፋን አሞል ዲፈየኒህ ዒዶይታህ ምስጋና፣ ክብረ፣ ውዳሰ፣ ኃይሊ ኡማንጉሉህ ያኮይ! አይህ ኦበ፡፡" 14. አፋራ እንስሳይቲ ለ "አመን" የን፣ ስማግለ ሲኒ ዳምባራህ ጋምመኒህ ይስግዲን፡፡

ማዕራፋ 6

ማኅተምቲ  ፋክምናን

 1.ታሃምኮ ላካል ዒዶይቲ ማልሒና ማኃተምኮ ኤዸዾይታቲያ ፋካህ ኡብለ፡፡ አፋራ እንስሳይቶኮ ኢንከቲ አንጉድ ኢዻ ያምግሚተ አንዻሓህ "አሞ" አህ ኦበ፡፡ 2. ሀይከ ዓዶ ፋራስ ኡብለ፣ ፋራስ አሞክ ድፈየቲይ ጦር ይብዸህ ይነ፣ አክልል ለ አካህ ዮመሖወ፣ ሱባቲያ የከህ ሱባኮ ሱባል ያዳዎ የውዔ፡፡ 3 .ዒዶይቲ ማላሚ ማኅተም ፋከ ዋክተ፣ ማላሚት እንስሳ "አሞ"አይህ ኦበ፡፡ 4. አኪ ዱሙቅ ዓሳ ፋራስ የውዔ፣ ፋራስ አሞክ ዲፈየቲ ሳላም ባዾኮ ያይላዮከ ሒያው ኢሰኢሰህ ቲታ ባክቶ አቦ ሢልጣን አካህ ዮምሖወ፣ ናባ ሰይፊ ለ አካህ ዮምሖወ፡፡ 5. ማዳሕ ማኅተም ለ ፋከ ዋክተ፣ ማዳሒት እንስሳ "አሞ" አይህ ኦበ፣ ሀይከ ዳ ፋራስ ኡብለ፣ ፋራስ አሞክ ድፈየቲ ሚዛን ጋባክ ይብዸህ ይነ፡፡ 6. አንዻሕ አፋራ እንስሳህ ፋንኮ የመተም ኤከለ፣ ታይ አንዻሕ"ኢንኪ ሚሰ ሲራይ ኢያ ኢንኪ ለለዕት ደመዎዝ፣ አዶሓ ሚሰ /ማስፋሪያ/ ሲገም ኢያ ኢንኪ ለለዒህ፣ ዘይትከ ወይኒ ለ ማብያኪን"አይህ ኦበ፡፡

   7. ማፋሪ ማኅተም ፋከ ዋክተ ማፋሪት እንስሳህ አንዻሕ"አሞ"አይህ ኦበ፣ 8. ሀይከ ቢሊን ፋራስ ኡብለ፣ ፋራስ አሞክ ዲፈየህ ይነ ቲያክ ሚጋዓህ ራባ አካይ ይኒን፣ ሲኦል ለ ኤድካታይ ይነ፣ ረባከ ሲኦሉድ ባዾክ ኢንኪ ማፋሪ ጋባ ውጊኢህ፣ ዑሉሉህ፣ ኃይላለ ዱረህ፣ ባዾት አራዊቲህ ራቦና ሢልጣን አካህ ዮምሖወ፡፡

  9. ማካዋኒ ማኅተም ዩንሑወ ዋክተ፣ መዔፉጊህ ቃልከ ዮሖውን ማስክሪህ ዳዓባል ይግድፊን ሒያውህ ናፍሲቲህ መሥዋዕቲ ኤልአባን ኢርከህ ዳባል ኡብለ። 10. ኢሲን ናባ አንዻሓህ"ቁዱስከ ሓቀህ፣ ኡማኒሚህ አሞ ተከ ኦ'ማደራ! ባዾል ታነ ሒያውህ አሞል አፍርደ ዋይታመከ ተን ቢሎህ አምብቅለ ዋይታም አንዳ ፋናህ ኪኒ!"አይክ ወዔን፡፡ 11.ናብሲወክፊል ዓዶ ሣረና አካህ ቶምሖወ፣ ተናባሊህ ገና ራብተም፣ ተናባሊህ አገልገልቲ ተከም፣ ተን ዶባከ ተን ሳዖልህ ሎይ ያመገም ፋናህ ዳጎ ዋክተ ይዕሩፊኒህ ሱጎናይ አክ የዽሔ፡፡

  12. ታሃምኮ ላካል ዒዶይቲ ልሕ ያ ማኅተም ፋከ ዋክተ ታሃም ኡብለ፣ ሀይከ ናባ ባዾ ኪርዲዲሞ ተከ፣ አይሮይታ ዳሳረና ባሊህ ዳቶይተ፣ አልሳ ሙሉኡድ ቢሎ ባሊህ ዓሶይተ፡፡ 13. ኃይላ ለ ሓሓይቲ ባላሶ ሓዻ ያይነቀነቀጉል አላየዋይተ ፊረ ሓዻትህ አሞኮ ኡርጉፋምታም ባሊህ፣ ዓራንቲ ሑቱክ ኡርጉፉመ፡፡ 

  14. ዓራን ሲዲ ዋለት ባሊህ ይምጥቅልለህ ራደ፣ ኮማምከ ደሴታት ለ ኡምቢህ  ሲኒሲኒ ሲፍራኮ የውዒን። 15. ባዾ ነገሥታት፣ ገዛእት፣ ዺባት አሞባዒል፣ ሀብታማት፥ ኃይለለም፣ ጊለዋይቲትከ ማዶር ለ፣ ኡምቢህ ቦላላድከ ኢምቦብቲ ዶንጎሉቲህ አዶዱድ ሱዑተን፡፡ 16. ኢምቦብከ ዶንጎል ተን "አሞል ራደ! ኢሲ ዙፋኒህ አሞክ ዲፈየቲህ ነፊል፣ ዒዶይቲ ቁጡዓህ ኒሱዑሰን! 17. አይሚህ ናባ  ቁጡዓህ ለለዕ የመተ! ኢዪ ሶሎ ዺዓ? አክየ፡፡

ማዕአፋ 7

ቦል መሮቶምከ አፋር ሲሕ እስራኤል ሒያውኮ

   1. ታሃምኮ ላካል  አፋራ መልአክ አፋራ ባዾክ ዒንደፍቲክ ሶላኒህ ኡብለ፣ ኢሲን ባዾል ያኮይ ባሕራል ወይ ሓዻት አሞክ ኢንኪ ሓሓይቲ ያቱከምኮ አፋራ ወገንኮ ታሚተ ባዾ ሓሓቲት ይብዺን፡፡ 2. ታነሚህ አምላክ ማኅተም ይብዸህ አኪ መልአክ ለ አይሮማሓኮ አምቲህ ኡብለ፣ ባዾከ ባሕራ ቢያኮና ሢልጣን አካህ ዮምሖወ አፋራ መልአክ አንዻሕ ናው ኢሰኒህ፣ 3."ኒምላኪህ አገልገልቲህ ነፊቲ አሞል ማኅተም አክ ናኅቲመም ፋናህ፣ ባዾል ያኮይ፣ ባሕራል ያኮይ፣ ሖዽ ማብያኪና"የህ ደረ። 4. ትምኅትመ ሒያውህ ሎይ ኦበ፣ እስራኤል ነገደኮ ሙሉኡድ ትምኅትመ ሒያውህ ሎይ ቦል ሞሮቶምከ አፋር ስሕቲያ፣       5. ይሁዳ ነገድኮ ትምኅትመ ሒያውህ ሎይ ላማምከ ታማን ስሕቲያ፣ 6. አሴር ነገድኮ ላማምከ ታማን ስሕቲያ፣ 7. ስምዖን ነገድኮ ላማምከ ታማን ስሕቲያ፣ ሌዊ ነገድኮ ላማምከ ታማን ስሕቲያ፣ ይሳኮር ነገድኮ ላማምከ ታማን ሲሕቲያ፣ 8. ዛብሎን ነገድኮ ላማምከ ታማን ሲሕቲያ፣ ዮሴፍ ነገድኮ ላማምከ ታማን ስሕቲያ፣ ብኒያም ነገድኮ ላማምከ ታማን ስሕቲያ ኪይይ ይኒን፡፡

ዓዶ ሣራ ሀይሲተ ማንጎ ሒያው

   9. ታሃምኮ ላካል  ሀይከ ኢንከቲ ሎዎ ዺዔዋ ጋዳህ ማንጎ ሒያው ኡብለ፣ ኢሲን ህዝበከ ነገድኮ፣ ወገንከ ቆንቃኮ ኡምቢህ ተከሄለም ኪይይ ይኒን፣ ዓዶ ሳሣራ ሀይሲተም ሆሣዕና ዻዻይ ይብዽኒህ ዙፋንከ ዒዶይቲህ ነፊል ሶለኒህ ይኒን፣ 10. ናባ አንዻሕህ ዋዕ  አይክ፣"ያድኃኖና ዙፋን አሞክ ድፈይተም ኒ አምላክህምከ ዒዶቲም ኪኖን፣" አይ ይኒን፡፡ 

  11. ካመላእክት ኡምቢህ ካዙፋናከ ካስማግለህ አፋራ እንስሳቲህ ባሮሩል ሶለኒህ ይኒን፣ ካዙፋኒህ ነፊል ዳምባራህ ጋምመኒህ ፉጎህ ይስግድን፣ 12. ታህ የን፣"አመን፣ ውዳሰ፣ ምስጋና፣ ቢልሓት፣ ሞሳ፣ ክብሪ፣ ኃይሊ፣ ስራየ፣ ኒአምላካህ ኡማንጉሉህ ታኮይ፣ አመን"፡፡

  13. ስማግለኮ ኢንከቲ ዩላል ኡፍኩና የህ ታይ ዓዶ ሣረና ሀይሲተም ኢያ  ኪኖኑ? አርከኮ የመቲኒ? ዮክየ፡፡ 14. አኑ ለ"ይማዳራ! አቱ ታዽገ"አከ። ኡሱክ ታህ ዮክየ፣ ታሃም ታይ ናባ መከራ ትላየኒ ተመተም ኪኖን፣ ሲኒ ሣራ ዒዶይቲ ቢሎህ ዓካልሰኒህ ዓዶሰም ኪኖን፣ 15. አማይጉል መዔፉጊ ዙፋኒህ ነፊል የክኒህ ባርከ ለለዕ ካ መቅደሲል ካ ያስግልግሊን። ካዙፋነህ አሞል ዲፈየኒህ ለ ተን ጺላል ያከ፡፡ 16. ካምቦኮ ሣራቱላል ማሉዋን፣ ማባካራን፣ አይሮይታ ተን ማሳባዕታ፣ ሀሩርር ተን ማገያ፡፡17. አይሚህ ካዙፋኒህ ፋናድ ያነ ዒዶቲ ተን ሎይና ያከ፣ ሂወት ላየህ ቱላል ተን ያምሪሔ፣  መዔፉጊ ዺሞ ኢንትትኮ አካህ ያጽሪገ፡፡

ማዕራፋ 8

ማላሓኒ ማኅተም ፋክትናን

   1. ዒዶይቲ ማላሓኒ ማኅተም ፋከጉል፣ ሳዓትከ ዓዻ ታከም ዓራን ቲባ የ፡፡ 2. መዔፉጊህ ነፊል ሶልተህ ማልሒና ማላይካ ኡብለ፣ ተናህ ማልሒና ጡሩምባ  ቶምሖወ፡፡ 

  3. ዋርቂ ዹዋዕ ይብዸ አኪ መልአክ የመተህ መሥዋዕት ኤል ያስውዒን ኢርከክ ሶለ፡፡ ዙፋን ነፊል ያነ ዋርቂ መስዋዕቲህ አሞል ቁዱሳንሊህ ጻሎት ካብ ኢሳ ማንጎ ዒጣን አካህ ዮምሖወ። 4. ዕጣን ቲኪ ቁዱሳን ጻሎትሊህ ማላይካ ጋባኮ መዔፉጊህ ነፊል የውዔ። 5. ታሃምኮ ላካል መልአክ ጽንሀ ይብዸህ መስዋዕት ጊራህ የመገህ ባዾል ዒደ፡፡ አንጉድ፣ አንዻሕ፣ ሓንካዻ፣ ኪርዲዲሞ ተከ፡፡

           ጡሩምባታት  ሙትካ 

    6. ማልሒና ጡሩምባ የብዸ ማልሕና መልአክ ሲኒ ጡሩምባ ያታኮና ዮምሶኖዶውን፡፡ 7. ኤዸዾይታ ማላይካ ጡሩምባ ዮቶከ፣ ቢሊ ኤድ የምገለለ ጊራከ ባራድ ባዾል ዒደ፣ ባዾ ማዳሕና  ሓራርተ፣ ሖዽቲ ማዳሕና ሓራርተ፣ አንዻዽ ዓይሶ ሓራርተ።

   8. ማላሚ መልአክ ጡሩምባ ዮቶከ፣ ቦሎልታ ናባ ኢምባህ ኢጊድ ጉዳይ ባሕራድ ራደ፣ ባሕሪ ማዳሕና ቢሎ ተከ፡፡ 9. ባሕሪ አዳድ ማርታ ሮሔ ለ ፍጥረትኮ ማዳሕና ባዸ፣ መራክብቲ ማዳሕና ባክተ። 

    10. ማዳሒ መልአክ ጡሩምባ ዮቶከ፣ ቦሎላ ሲግታ ባሊህ ሐራራ ናባ ሑቱክቲ ዓራንኮ ራደ፣ ራደም ወዒ ማዳሕናከ ላየ ሚንፂህ ማዳሕና ታሞል ኪኒ፡፡ 11. ሑቱክቲ ምጋዕክ ሬቶ አክያን፣ ላየክ ማዳሕና ዑረ  ተከ፣ ላየ ሳባታል ማንጎ ሒያው ራብተ፡፡

  12. ማፋሪ ማላይካ ጡሩምባ ዮቶከ፣ አይሮክ ማዳሕና፣ አልሳክ ማዳሕና፣ ሑቱኩኮ ማዳሕና ሳብዒምተ፣ አማይጉል ተን ማዳሕና ዲቶይተ፣ ታይ ዓይነቲህ ለለዓቲ ማዳሕናከ ባርቲ ማዳሕና ኢፎ ዋይተ፡፡

   13. ታሃምኮ ላካል ኢንኪ ጉማይቲ ዓራንቲ ፋናል አንፊሪህ ኡብለ፣ ናባ ዲምጸህ ፃው አክ ይነ፣ ራዕተ አዶሓ መላእክቲ ጡሩምባ አቱኪክ ታሚተ ጡሩምባት አንዻሕህ ባዾክ አሞል ማርታ ሒያዋክ ሲነህ ሚና! ሲነህ ሚና! አይህ ኦበ። 

                                                  ማዕራፋ 9

   1. ማካዋኒ መልአክ ጡሩምባ ዮቶከ፣ ሀይከ ዓራንኮ ባዾል ራደ ኢንኪ ሑቱክታ ኡብለ፣ አዳለ ዱኮህ ቁልፊ አካህ ዮምሖወ፡፡ 2. ኡሱክ ዱኮ ፋከ፣ ቲኪ ለ ናባ ምንዳድኮ ቲካ የከህ ዱኮኮ የውዔ፣ ዱኮኮ የውዔ ቲኪህ ምክንያታል አይሮይታከ አየር ዲቶየን፡፡ 3. ቲኪ አዳኮ ዓዋኒ ባዾት ታሞል የውዔ፣ ባዾት ኢጊዻህ ኃይላህ ኢጊድ ኃይሊ አካህ ዮምሖወ፡፡ 4. ባዾ ዓይሶ ያኮይ አኪናን አንዻዽ ጉዳይ ያኮይ አኪናን ሖዽ ቢያካናምኮ አክየን፣ ቢያኮና ኤልታነም ለ ሲኒ ዳምባሪህ አሞል መዔፉጊህ ማኅተም አለዋይታ ሒያው ጥራሕ ኪይይ ይኒን፡፡ 5. ኢሲን ለ የክኒምኮ ኮናልሳ ያይሳቃዎና ኪኒ ኢካህ ያግዳፎና ኃይሊ አካህ ማምሓውና፣ ተን ማዳ ሢቃይ ኢጊዽ ሒያዋድ አራጉል ያማበ ስቃይህ ዓይነት ኪኒ፡፡ 6. ታይ ለለዓታል ሒያው ራቦና ጉራን፣ ያከካህ ማገያን፣ ራቦና ያትሚኒይን፣ ያከካህ ራቢ ተንኮ ኩዳ፡፡

   7. ዓዋኒ ውግኢህ ቶምሶኖዶወ ፋሪሲህ ኢግዲይ ይነ፣ ተን ዸጎሑክ ዋርቂ አክልልህ ኢጊድ ጉዳይ ይነ፣  ተን ነፍ ሒያው ነፊህ ኢግዲይ ይነ፤ 8. ተን ዳጋር አጋቢ ዳጋራህ ኢግዲይ ይነ፣ ተን ኢኮክ ሉቦክቲ ኢኮኩህ ኢግዲይ ቲነ፡፡ 9. ተን ናሀር ቢርቲት ሀይስተሚህ ኢግዲይ ዪነ፣ ተን አፊህ አንዻሕ ውግኢህ ታዲየ ማንጎ ፋሪስከ ሠረጋላታትኮ ያማበ አንዻሓህ ኢግዲይ ይነ፡፡ 10. ኢግዽ ባሊህ ፀራክ ሙደና ልይ ቲነ፣ ሒያው ኮና አልሳ አካህ ቢያካን ኃይላ ሊይይ ይንኒም ሲኒ ፀራድ ኪይይ ይነ፡፡ 11. ኑጉሥ ልይ ይኒን፣ ኡሱክ አዳለ ዱኮህ  መልአክ ኪኒ፣ ምጋዕ እብራይስጥህ አብዶን አክያን፣ ግሪክህ አጶልዮን አክያን፣ ቱርጉም ያድምሲሰቲያ /ደምሳሲ/ ማለት ኪኒ፡፡

    12. ኤዸዾይታ ዎዮ ትላይተ፣ ሀይከ ታሃምኮ ሣራህ ማላሚ ዎዮ ገናህ አምተለ፡፡ 

  13. ልሕ ያ መልአክ ጡሩምባ ዮቶከ፣ ሀይከ መዔፉጊህ ነፊል ያነ ዋርቀህ ሢራሕመ መሥዋዕቲ ካብ ኤልኢሳናል አፋራ ጋይሳህ ድምጺ አውዕህ ኦበ፡፡ 

  14. ጡሩምባ ይብዸ ልሕ ያ መልአክ፣"ናባ ወዓል ኤፍራጥስል ቱምዹወ መላእክት ኡንሑይ!"አክየ፡፡ 15. ታይ ሳዓትከ ታይ ለለዓህ፣ ታይ አልሳከ ታይ ኢግዳህ፣ ቶምሶኖዶወ አፋራ መላእክቲህ ሒያውኮ ማዳሕና ያገዳፎና ይምኑሑውን። 16. ፋሪስለ ሠራውቲህ ማንጋ፣ ላማ ሚሊዮን ኪይይ ይኒን፣ ተን ሎይ ኦበ፡፡ 17. ፋሪስከ ፋሪስክ ዲፈይተ ሒያው ሶኖህ ኡብለም ታይ ቢሶህ ክይይ ይነ፣ ተን አፍዓዶክ አሞል ቲነም ቢርቲ ፁሩር ጊራባሊህ ዓሳቲያ፥ ያትኪን ባሊህ ዓራናህ ኢግድቲያ፣ ዲኒህ ኢግድ ዓጉዉንቲያ ክይይ ይነ፣ ፋርስቲ ዸግኃ ሉባክ ዸግኃህ ኢግዲይ ቲነ፣ ተን አፍኮ ጊራከ ቲኪ ዲን ለ አካውዒይ ይነ፡፡ 18. ሲኒ አፍኮ የየዕን ጊራህ፣ ቲካህ፣ ዲኒህ፣ ታይ አዶሓ መቅሰፈቲህ ሒያውኮ ማዳሕና ራብተ፡፡ 19. ፋርስቲ ኃይሊ አፎፍከ ፀሮሩድ አክ ክይይ ይነ፣ ፀሮር ዓሮራህ አክ ኢግዲይ ቲነ፣ ዓሮራ ዸግኃ ልይ ቲነ፣ ሒያው ቢያካናም ታማማህ ክይይ ይኒን፡፡         

  20. ታይ መቅሰፍቲህ ራባኮ ራዕተ ሒያው ሲኒ ጋባህ ሢራሓህ ጋሔኒህ ኒስሓ ማሳይኖን፣ አይሚህ አጋኒንቲከ ዋርቀኮ፣ ቡሩሩኮ፣ ነሐሳኮ፣ ዻይትኮ፣ ሖዽትኮ ሢራሕምተም ያብሊኒም ያኮይ፣ ያቢኒም ያኮይ፣ ገዾ ዺዔዋይታ ጣዖት ያይምልክኒም ማሓቢኖን፡፡ 21. ታማም ባሊህ ሲኒ ናብሲህ ጊዲፎኮ፣ ሲኒ ሞራሊህ ራድናንከ ካሓኖኮ፣ ባዸዺናኮ ኒስሓ ማሳይኖን፡፡

ማዕራፋ 10

መልአከ ዒንዳ ማጽሐፍ

   1. ታሃምኮ ላካል ዳሩርታ ሀይስተ አኪ ኃይላ ለ መአልክ ዓራንኮ ኦባህ ኡብለ፣ ካዸግኃል ትክቢበ ሮብላያ ቲነ፣ ካ ነፊል አይሮይታ ባሊህ፣ ካኢባቢ ጊራ ዓሚዳ ባሊህ ኪይይ ቲነ፡፡  2. ፋክተ ዒንዻ ማጽሐፍ ጋባክ ይብዸህ ይነ፣ ሚድጊ ኢባ ባሕሪ አሞል፣ ጉሪ ኢባ ለ ባዾት አሞል ድፈሰ፤ 3. ሉባክ ዻዋህ ኢግድ ናባ አንዻሓህ ጉንዹሰ፣ ዓው የ ዋክተ ማልሕና አንጉድ ሲኒ ዻዋህ ዋንሲተን፡፡ 4. ማልሒና አንጉድ ሲኒሲኒ ዻዋህ ዋንሲተን ዋክተ አኑ አጽሐፎ ኢሕሲበ፣ ያኮይ ኢካህ"ማልሒና አንጉድ ዋንሲተኒም አልፋይ ምሥጢሪህ ኢብዽ ኢካህ ማጽሐፊን"ያዽሔ አንዻሕ ዓራንኮ ኦበ፡፡

  5. ታሃምኮ ላካል ባሕራከ ባዾት ታሞል ሶለህ ኡብለ መልአክ ሚድጊ ጋባ ዓራንኮ ኡገሠህ፣ 6. ኡማንጉሉህ ማራ ዓራንከ ካያል ታነሚህ፣ ባዾከ ተያል ታነሚህ፣ ባሕራከ ካያል ለ ታነም ይፍጢረ አምላኪህ ሚጋዓህ ዽዊተ፣ ታህ የዽሔ፣"ካምቦኮ ሣራቱላል ማዓያ!7. ያኮይ ኢካህ ማላሓኒ መልአክ ጡሩምባ ዮሶበ ለለዓት ታስግልጊለ ነብያት ይስዽገሚህ ሪሚዲህ መዔፉጊህ ምሥጢር ያምፍፂመ፡፡"8. ዓራንኮ ኦበ አንዻሕ"ባሕራከ ባዾት አሞል ሶለ መልአክ ኢሲ ጋባህ ይብዸህ ዩምኑሑወህ ይነ ማጽሐፍ ኡዹዋይ በይ" የህ ጋባዔህ ዮድ ዋንሲተ፡፡ 9. መልአካድ ኤደህ"ዒንዻ ማጽሐፍ ዮህ ኡሑይ"አከ፣ ኡሱክ ለ በአይ በት፣ ኩጋርባድ ሚሪሪቲያ አከለ፣ ኩአፍድ ለ ባስካ ባሊህ ዻዓም ኮድ አምዔለ ዮክየ፡፡       

  10. አኑ ለ ዒንዻ ማጽሐፍ መልአክ ጋባኮ በየህ በተ፣ ያአፋድ ባስካ ባሊህ ባሳክ ዮድየ፡፡ ታሃምኮ ላካል ለ ይጋርባድ ምሪሪቲያ የከ፡፡ 11. ታሃምኮ ላካል"ማንጎ ወገናትሊህ፣ ህዝበሊህ ኢሲሲ አፋህ ዋንሲታ ሒያውከ ነገሥታትሊህ ትንብት ዋንሲቶ ኮልታነ" የህ ዮድ ዋንሰ፡፡

           ማዕራፋ 11

           ላማ ማስኪር

   1. ታሃምኮ ላካል አካህ ያላካዖና ያስግልግለ ኢንኪ ዸዽ ሳንባቆ ዮህ ቶምሖወ፣ ታሃም ለ ዮክ የን፣ "ኡጉት፣ ፉጊ በተ መቅደስከ መሠዋዕት ካብ ኤልያ ቦታ ኢልኪዕ፣ ታማል ታሚነም ሎይ፡፡ 2. በተ መቅደስኮ ኢሮል ታነ ፋክተ ቦታ ለ ሓብ፣ ታማርከ አረማውያናህ ቶምሖወህ ታነጉል ማላካዒን፣ አረማውያን ትምቅድሰ ካታማል ሞሮቶምከ ላማይ አልሲትያ ኤድ ያዒቲን፡፡ 3. ላማ ይማስኪር ኃዛን ሣረና ሀይሲተኒህ ኢንኪ ሲሕ ላማ ቦል ላሕታም ለለዕቲያ ዋንሲቶና ኃይላ አካህ አሓየሊዮ፡፡"

    4. ኢሲን ባዾል ማዳሪ ነፊል ሶልታ ላማ ኦላዕቶ ሓዻከ ላማ መቅረዝ ኪኖን፡፡ 5. አኪናንቲ ተና ቢያኮ ጉረመኮ ጊራ ተን አፍኮ ተውዔህ ናዓብቶሊት ታስቀጸለ፣ ተና ቢያኮ ጉራቲ ኡምቢህ ራባም ታይ ዓይነቲህ ኪኒ፡፡ 6. ኢሲን ትንብት ዋንሲተኒህ ታይ ለለዕ ሮብ ራዳምኮ ዓራን አልፎና ሢልጣን አለሎን፣ ታማም ባሊህ ላየ ቢሎል ያይላዋጦናከ ጉራንጉል ኡምቢህ አኪናን ቢሶህ መቅሰፍቲህ ባዾ ሳባዖና ሢልጣን ሎን፡፡

  7. ሲኒ ማስኪር ባከኒምኮ ላካል ናባ አዳ ለ ዱኮኮ የወዔ አራውት ተንሊህ ዺባተህ አክ ሱበ ለ፣ ተን አግዲፈለ ለ፤ 8. ተን ረሳ ለ ምስሊ ደዕናናህ ሶዶም ወይ ግብጸ አክያን ናባ ካታማት አዳባባአል ታው ያ፣ ታይ ካታማ ተን ማዳሪ ኤልታካሪመ ቲያ ኪኒ፡፡ 9. ኢሲሲ ወገንከ ነገድ፣ ኢሲሲ ኣፋህ  ህዝበ ተከ ሚናዳም አዶሓ ለለዕከ ዓዻ ስኒ ባዲን ያይደለለዒን፣ ተን ባዲን ታሙዑገምኮ ደሲማን፡፡ 10. ታይ ላማ ነብይ ባዾል ሚናዳም ይይጽንቂንጉል፣ ባዾል ማርታ ሒያው ነብያት ራባህ ኒያታን፣ ኒያቲ ባዓል አባን፣ ገጸበረከት ቲታል ቲላሳን፤ 11. ያካካህ አዶሓ ለለዕከ አብዳ ትላይተምኮ ላካል ሂወት ያሓየ መዔፉጊህ መንፈስ የመተህ ባድኒድ ሳየ፣ ሲኒ ኢባህ ሶለን፣ ቱብለ ሒያው ጋዳህ ማይሲተ፡፡ 12. ታሃምኮ ላካል ላማ ነቢይ"ታውላል ኤወዓ!"ያዽሔ ናባ አንዻሕ ዓራንኮ ዮቢን፣ ተን ናዓብቶሊት አብሊህ ለ ዳሩሩል ዓራናል የውዒን፡፡ 13. ታማይ ሳዓት ናባ ባዾ ናውፂ የከ፣ ካታማክ ኢንኪ ማታማና ቶዖኖወ፣ ባዾት ክርዲዲሞ ምክንያታል ማልሒና ሲሕ ሒያውኮ ራበ፣ ራባኮ ራዕተም ጋዳህ ማይሲተ፣ ዓራንቲ መላእክት ይስክብሪን፡፡ 14. ማላሚ ዎዮ ትላይተ፣ ሀይከ ማዳሒ ዎዮ ዸህ አምተለ፡፡

       ማላሓኒ ጡሩምባ

  15.ማላሓኒ ማላይካ ጡሩምባ ዮቶከ፣ ዓራናል ለ"ዓለም ማንግሥት ኒማደራህ ኒአምላካህከ መሲሒህ ተከህ ታነ፣ ኡሱክ ኡማንጉሉህ ያንግሠ! ያዽሔ ናባ አንዻሕ ኦበ፡፡   16. መዔፉጊህ ነፊል ካዙፋኒህ አሞክ ድፈይተ ላማታናከ አፋር ስማግለቲያ ዳምባራህ ጋሚመኒህ መዔፉጎህ ይስግድኒህ፣ 17. ታህ የን፣

          "ያነቲያከ ይነቲያ፣ 

           ኡማኒም ዺዓ ማደራ ኦ'መዔፉጎ!

          ናባ ሢልጣን ኢሲ ጋባህ አብተጉልከ ትንግሠጉል ኩናይምስጊነ፡፡  

    18. አረማውያን ህዝቢ ይቁጡዔ፣ 

          ኩቁጡዓ ተመተ፣ 

          ራቦንትቲል ታፍሪደ ዋክቲ ማደ፣

           ኢሲ አገልገቲህ ነብያትከ

          ቁዱሳን ኩሚጋዕ ታስክቢረም

         ዒንዻምከ ናባማህ፣ 

          ስልማት ታሓየ ለለዕ ማደ፣ 

          ባዾ ተለየም ታይለየ  ዋክቲ ማደ፡፡"     

  19. ዓራንል ያነ መዔፉጊህ በተ መቅደስ ፋክተ፣ ካ ኪዳን ታቦት በተ መቅደስ አዳል ዩምቡሉወ፡፡ ሓንካዺ፣ አንዻህ፣ አንጉድ፣ ባዾ ክርዲዲሞከ ናባ ባራድ የከ፡፡

ማዕራፋ 12

ኑማከ ጋባይ

    1. ታሃምኮ ላካል ናባቲያከ ያይዲንቀ ሚልኪት ዓራናል ይምቡሉወ፣ አይሮይታ ሀይሲተ፣ አልሳ ኢሲ ኢቢህ ዳባል አብተቲያ፣ ላማምከ ታማን ሑቱክቲያ አክልል ባሊህ ኢሳሞል ጋምተ ኢንኪ ኑማ ቱምቡሉወ፡፡ 2. ኢሲ ሶኒያ ኪይይ ቲነ፣ ኡላሎ ተ ትብዸህ ትምጽንቀህ ደራክ  ቲነ። 3. ታማም ባሊህ አኪ ምልኪት ዓራናል ዩምቡሉወ፣ ማልሒና ዸግኃከ ታማና ጋይሳ ለ ናባ ዓሳ ጋባይ ዩምቡሉወ፣ ኢሲ ዸግኃህ አሞክ ማልሒና ዘውድ ጋመህ ዪነ፡፡        4. ኢሲ ጸራህ ሑቱኮ ማዳሕና ዓራንኮ ሂሪገህ በዾል ዒደ፣ ኑማ ዻልተ ዋክተ ባዻ አክ ያንዻዖ ይሕሲበህ ጋባይ ኡላሊቶ ካብተ ኑማድ የደህ ተን ነፊል ሶለ፡፡ 5. ኑማ ሚናዳም ኡምቢህ ብርቲ ዲጋህ ዻዉዻ ላብ ባዻ ዻልተ፣ ተ ባዻ ለ መዔፉጎህከ ካዙፋናህ በየን። 6. ኑማ ለ ባራካህ ኩደህ ተደየ፣ ታማል ኢንኪ ሲሕ ላማ ቦል ላሕታም ለለዕቲያ መዔዒለህ ትምዽብዸህ ኤልዲፈይታ ሲፍራ መዔፉጊ አካህ ዮይሶኖዶወህ ዪነ፡፡ 7. ዓራናል ዺባ ኡጉተ፣ ሚካኤልከ ካመላኢክት ጋባይከ ካ መላእክትሊህ የኪኒህ ዺባተን፣ 8. ያኮይ ኢካህ ጋባይከ ካመላእክት ሱቡተን፣ ታሃምኮ ላካል ዓራናል ቦታ አካህ ማገይሚና፡፡ 9. ናባ ጋባይ ጉባል ራደ፣ ኡሱክ ሒያው ሙሉኡክ ያስገገየ ዲያብሎስ ወይ ሰጣን የኒህ ደዕምማ ባሶ ዓሮራ ኪኒ፡፡ ኡሱክ ባዾል ራደ፣ ካመላእክት ካሊህ ባዾል ራደን፡፡

   10. ታሃምኮ ላካል ኢንኪ ናባ አንዻሓህ ዓራንል ታህ አይህ ኦበ፣ "ሀይከ ድኅነትከ ኃይሊ ማንግሥት ለ ናአምላካህ የከ፣ ሢልጣን ለ መሲሒቲያ የከ! አይሚህ ኒሳዖልቲ ኒ አምላኪህ ነፊል ለለዕከ ባር ተን ዋይሲሰህ ይነ ኒሳዖልቲህ ከሳሲ ራደ፤ 11. ኢሲን ዒዶይቲ ቢሎህከ ዋንስተን ማስኪሪህ ቃላህ ሱባህ ሱበን፣ ሲኒ ሮሔህ ኢየካህ ሲነ ራባህ ቲላሰኒህ ዮሖውን፡፡ 12. አማይጉል ዓራንከ ተን አዳል ማርታማክ ኡምቢክ ደስ ሲናህ ዮዋይ! ባዾከ ባሕራ ለ ሲነህ ኢየ ዋዎናይ! አይሚህ ዳጎ ዋክቲ አክራዔም ዩብለጉል ዲያብሎስ ናባ ቁጡዓህ ሲኑላል ኦበ፡፡"

   13. ጋባይ ባዾል ራደም ዩብለ ዋክተ ባዻ ዻልተ ኑማ ተይሰደደ፡፡ 14. ኑማ ባራካል አካህ ቶምሶኖዶወ ቦታል ቲንፊረህ ታዳዎ ናባ ጉማይቲህ መንፈሪህ ኢጊዳምኮ ላማ መንፈር አካህ ዮምሖወ፣ ታማል ዓሮራክ ነፊል ሚሪሐተህ አዶሓ ግጊዳከ ዓዻ ተ አንከበከቢክ ትምዺብዸህ ዻውዹምተህ ቲነ፡፡ 15. ኑማ ወዒ ተበዮ ተህ ጋባይ ወዒ ላየ ቲዻ ታከ ላየ አፈኮ ናሃሪተህ ሳራቱላኮ ኤልሓዸ፡፡ 16. ያኮይ ኢካህ ባዾ ኑማ ጎሮኒሰ፣ አፍ ፋክተህ ጋባይ አፍኮ ናሃሪተህ ኃዸተ ላየ ቱንዹዔ፡፡ 17. ጋባይ ኑማት ታሞል ቱቁጡዔህ ተ ዳራኮ ራዕተምሊህ ታንዳፋሎ ተደየ። ኢሲን መዔፉጊህ ትእዛዛት ዻዉዻምከ ኢየሱስ ኢምነቲህ ታምስኪረም ኪይይ ይኒን፡፡ 18. ጋባይ ለ ባሕሪ ዳራታል ሖፃል ሶልተ።    

ማዕራፋ 13

ላማ አራዊት

    1. ታሃምኮ ላካል ኢንኪ አራዊት ባሕራኮ አውዒህ ኡብለ፣ ታማና ጋይሳከ ማልሒና ዸግኃ ሊይይ የነ፣ ጋዎስቲ አሞክ ታማና ዘውደ ሊይይ የነ፣ ተን አሞሙክ ዋቶ ሚጎዕ ቲነ፡፡ 2. ኡብለ አራዊት ካብዕታህ ኢግዲይ ዪነ፣ ኢባቢ ዲቢት ኢባቢህ፣ አፍ ሉባክ አፋህ አክ ኢጊዲይ ይነ፣ ጋባይ ኢሲ ኃይላከ ኢሲ ዙፋኒህ ናባ ሢልጣን እንስሳይቶህ ቶሖወ፡፡ 3. ዸጎሕኮ ኢንከቲ ራባ ማዲሳ ቢያክ ሊይይ ይነም የከህ ኡብለ፣ ያኮይ ኢካህ ራባ ማዲሳ ቢያክ ኡረ፣ ዓለም ሙሉኡድ ይምገርመህ እንስሳይቶድ ካታየ፡፡ 4. አራዊቶህ ሢልጣን አካህ የምሖወርከህ ሚናዳም /ሒያው/ ኡምቢህ ጋባህ አካህ ትስጊደ፣ አራዊታህ ኢጊድቲይ አቲያ ኪኒ? ካሊህ አይቲ ያምዋጋኦ ዺዓ? አይክ ካያህ ለ ይስግድን።

  5. ትዕቢትከ ዋቶ ቃል አካህ ዋንሳን አፍ አራዊታህ ዮምሖወ፣ ሞሮቶምከ ላማይ አልስቲያ ሢልጣናህ ሢራሖ አካህ የምፍቅደ፡፡ 6. መዔፉጎህከ ፉጊ ሚጋዓህ፥ ኤል ማራርከህከ ዓራናህ ዋትማናም ኤዸዺሰ፡፡ 7. ቁዱሳን ሙዶከ ያስዓሮ ሢልጣን አካህ ዮምሖወ፣ ነገድከ ወገንል፣ ቆንቃከ ህዝቢህ ኡምቢሂያህ አሞል ሢልጣን አካህ ዮምሖወ፡፡ 8. ዓለም ይምፍጢረምኮ ኤዸዺሰህ ተን ሚጎዑህ ዩምሩሑደ ዒዶይቲህ ሂወት ማጽሐፋል አምጽሕፈ ዋይተም ዓለም አሞል ማርታ ሒያው ሙሉኡክ አራዊታህ አስጊደሎን፡፡ 

   9. ታበ አይቲ ለቲ ይኔምኮ ያቦይ፡፡ 10."ያማራኮ ይምዽብዸቲ ይኔምኮ ያማራኮይ፣ ሰይፊህ ራቦ ይምዽብዸቲ ይኔምኮ ሰይፊህ ራቦይ፣"አማይጉል ቁዱሳን ትዕግሥትከ ኢምነት ያምቡሉወም ታይ ዋክተህ ኪኒ፡፡

   11 .አኪ አራዊት ለል ባዾኮ አውዒህ ኡብለ፣ ዒዶይቲ ጋዎሱህ ኢጊድ ላማ ጋይሳ ሊይ ይነ፣ ዋኒንኮ ጋባይ ባሊህ ኪይይ ይነ፡፡ 12. ኤዸዾይታት አራዊት ሢልጣን ሙሉኡድ፣ ኤዸዾይታት አራዊቲህ ነፊል የከህ ኤል ሢራሓይ ይነ፣ ባዾከ ተ አሞል ማራታም ኡምቢህ አራዊታህ አካህ ያስጋዶና አባ፣ ታይ አራዊት ቶይ ራባ ማድሳ ቢያክ አካህ ኡረ ኤዸዾይታት አራዊት ኪኒ፡፡ 13. ታይ ማላሚት አራዊት ሒያው ነፊል ጊራ ዓራንኮ ያብዽየም ፋናህ ለ ሢልጣናህ ናባ ታዓምራት አባይ ይነ፡፡ 14. ኤዸዾይታት አራውቲህ ነፊል አቦ አካህ ይምፍቅደ ታአምራቲህ ምክንያታል ባዾት አሞል ታነ ሒያው አስገገይይ ይነ፣ ሰይፊህ ቢያኪተህ ኡረ አራውቲህ ሚስለ ሢራሖና ባዾት አሞል ማራታ ሒያው ያኢዚዘ፡፡15. ማላሚት አራዊት ኤዸዾይታት አራዊቲህ ሚስለህ ሮሒ ኡፉወ ያሓዎ ሢልጣን አካህ ዮመሖወ፣ ሂወት እስትንፋስ ያሓዎ፣ ሢልጣን አካህ ዮምሖወ ዒለህ ዋንሲቶ ዲዖከ ካያህ ታስግደም ኡምቢህ ራቦና አብሲሶ ዒሎህ ኪኒ፡፡ 16. ማላሚት አራዊት ዒንዻም ያኮይ ናባም፣ ሀብታማት ያኮይ ድካታት፣ ማዶር ያኮናይ ጊለዋይቲት ኡምቢህ ምድጊ ጋባክ ወይ ተን ዳምባሪህ አሞክ ምልከት አቦና ተን ይስግዲደ፡፡ 17. ታይ ዓይነቲህ አራውቲ ሚጋዓህ የከ ቱማር ወይ ሚጋዕ ቁጽረ አለዋቲ አኪናን ሒያውቲ ዻሞ ያኮይ ያባሖ ማዲዓ፡፡

  18. ቢልሓት ያነም አማይጉል ታሃሚህ አሞል ኪኒ፣ አእምሮ ለቲ አራዊት ሎይ ሎይሲሶይ፣ ሎይ ያይቡሉወም ሒያው ኪኒ፣ ሎይ ለ ሊሓ ቦል ላሕታምከ ሊሕ ኪኒ፡፡

ማዕራፋ 14

ዒዶይታከ ቦል ሞሮቶምከ አፋር  ሒያው ኢያ

    1. ታሃምኮ ላካል ዒዶይቲ ጺዮን ኮማት አሞል ሶለህ ኡብለ፣ ካሊህ ካሚጋዕከ አባ ሚጋዕ ተን ዳምባሪህ አሞል አክ ይምጽሒፈህ ቦል ሞሮቶም ሲሕቲያ ሒያውኮ ቲነ፡ 2. ዓራንኮ ማንጎኮ ናባ ፍዲታ ላየህ አንዻሕከ ናባ አንጉዱህ ኢግድ አንዻሕ ኦበ፣ ኦበ አንዻሕ በገና ታድርድረም በገና አድርድሪህ ያማበ አንዻህ ኢጊዲይ ዪነ፡፡ 3. ካዙፋንከ አፋራ እንሲሳይቲ ስማግለ ነፊል ቦል ሞሮቶምከ አፋር ሲሕ ሒያውቲያ ዑሱብ መዝሙር ይዝሚሪን፣ ታይ መዝሙር ባዾል ትድኅነምኮ ቦል ሞሮቶምከ አፋር ስሕትያ ሒያውቲያኮ በሒሕ ኢንክቲ ያማሓሮ ማዽዕና፡፡ 4. ኢሲን ደናግል ኪኖንጉል አጋቦሊህ ኃዶይታ ካሓኖህ ቲታ ገተህ አርኪሰ ዋይተም ኪኖን፣ ኢሲን ዒዶይቲ ኤድ ያዴርከድ ሙሉኡክ ካታይተም ኪኖን፣ ኢሲን ፉጎህከ ዒዶይታህ ቡኩራት የኪኒህ ሒያው ፋንኮ ትድኅነም ኪኖን፡፡ 5. ኢሲን ዲራብ ዋንስተኒህ ሚያዽጊን፣ ናቃፋ ሂናም ኪኖን።

     ፉጊ ፍርደ ያይሲዺገ አዶሓ መልአክ

   6. ታሃምኮ ላካል ባዾት አሞል ማርታም ህዝበከ ነገዲህ ቆንቃህከ ወገን ኡምቢህ ያይባሣሮ ኡማንጉሊት በሠራታ ቃል ይብዸ አኪ መልአክ ዓራንቲ ፋንኮ አንፍሪህ ኡብለ፡፡  7. ናባ አንዻሓህ "መዔፉጎ ማይሲታ፣ ኢስክቢራ፣ አይሚህ ካፍርዲህ ሳዓት ማደ፣ ዓራንከ ባዾ ባሕራከ ላየ ሚንጺት ይፍጥረ አምላካህ ኢስግዳ!" የዽሔ፡፡

    8. አኪ ማላሚ መልአክ ዙሙት ካኃኖ ያከ ያይስክረ ወይኒ መስ ሚናዳም  ሙሉኡድ ተፈዔቲያ፣ ናባ ባቢሎን ራደ! አይክ ኤዸዾይታ መልአክ ይክቲለ።

  9. አኪ ማዳሒ መልአክ ናባ አንዻሓህ ታህ አይክ ኤድካታየ፣"አራዊታህከ ሚስለህ ታስግደሞ፣ ሚልክት ዳምባራክ ያኮይ ጋባክ አብተም ሙሉኡክ፤ 10. መዔፉጊህ ቁጡዓህ ወይኒ መስ ያዑቢን፣ ለ ታይ ወይኒ መስ አምብጽብጸካህ /አምብሪዘካህ/ ቁጡዓ ጹዋአህ ተምሰኖዶወም ኪኒ፣ ታማም ባሊህ ቁዱሳን መላአክቲህ ነፊልከ ዒዶይቲ ነፊል ጊራከ ዲኒህ ሓራረ ሎን፡፡ 11. ተና ታይሰቀየ ጊራኮ ያውዔ ቲኪ ኡማንጉል አጋናል ያውዔ፣ አራዊትከ ካሚስለህ ታስጊደም ካ ሚጋዓህ ሚልክት አብተም ኡምቢህ ለለዕከ ባር ዕረፍት ማሎን። 12. መዔፉጊህ ትኢዛዝ ዻዉዻምከ ኢየሱስ ለ ተመነህ ሲክታ ቁዱሳን፣ ተን ትዕግሥቲ ታምቡሉወም ታሃሚህ አሞል ኪኒ፡፡ 13. ዓራንኮ ታህ ያ አንዻሕ ኦበ፣ ታሃም ኢጽሒፍ፣ "ካምቦኮ ላካል ማደሪ ኢየሱስም የኪኒህ ራብተም ዒድል ለም ኪኖን፣"መንፈስ ቁዱስ ለ "ዮ!" ሲኒ ኃዋልኮ ያዕራፎና ተን ሢራሓህ ተን ያክቲለ"ያዽሔ፡፡

ዓዱት ዋክተ

   14. ታሃምኮ ላካል ሆይከ ዓዶ ዳሩርታ ኡብለ፣ ዳሩርታ ታሞል ሒያውቲ ባዻህ ኢጊድቲይ ዲፈየህ ያነ፣ ኢሳሞክ ዋርቂ አክልል አበህ፣ ኢሲ ጋባክ ሊሊግ ማዕደት ይብደህ ዪነ፡፡ 15. አኪ መልአክ መቅደስኮ የውዔህ ዳሩርታክ ሞል ዲፈየህ ናባ አንዻሕህ"ባዾ ዓዱቲህ ዋክቲ ማደ! ዓዱት ሳዓት ለ ካብ የ! አማይጉል ማዕደት ፋራይ ኢዒይይ"የዸሔ፡፡ 16. ዳሩርታት አሞል ዲፈየቲ ማዕደት ባዾቱላል ፋረህ፣ ባዾ ትምዕዬ፡፡ 17. አኪ መልአክ ዓራናል ያነ መቅደስኮ የውዔ፣ ኡሱክ ሊሊግ ማዕደት ይብዸህ ይነ፡፡  

  18. ጊራት አሞል ሢልጣን ለ አኪ መልአክ መሥዋዕቲ ካብ ኤልሳን ኢርከህ ባሮኮ የውዔህከ ሊሊግ ማዕደት ይብዸ መልአክ"ወይኒ ዘለላህ ፍረ አላይተህ ታነጉል ወይኒ ዘለላ ኡምቢህ ባዾ ወይኒኮ ኢግሪዓ!"ያናማህ ናባ አንዻሓህ አንዻሔ፡፡ 19. መልአክ ማዕደት ባዾት ኡቱላል ፋረ፣ ባዾኮ ወይኒ ዘለላ ይግሪዔ፣ መዔፉጊህ ቁጡዓ ታይሚልኪተ ናባ ኤድ ያጽሙቂን ኢርከህ አዳድ ዒደ፡፡ 20. ካታማኮ ኢሮል ታነ ወይን ኤድያጽሙቂን ኢርከድ ይምጹሙቀ፣ ኤድያጽሙቂን ዓረኮ አይከ ፋራስ ሉጋምኮ አጋናል ናው የህከ አዶሓ ቦል  መትሮቲያ ማዳም ፋናህ ሚሪሕ የህ ቢሊ የውዔህ ሓዽተ፡፡

ማዕራፋ 15

ባክቶ መቅሰፍት ይብዸ መልአክ

   1. አኪ ናባ ድንቀ ኪን ምልክት ዓራናል ኡብለ፣ መዔፉጊህ ቁጡዓ ኤድ ታምፍጺመ  ባክቶ የከ ማልሒና መቅሰፍት ትብዸ ማልሒና ማላይካ ኡብለ፡፡ 

  2. ታሃምኮ ላካል ጊራ ኤድ ተምገለሚህ ኢጊድ ማራፃን ባሕራ ኡብለ፣ አራውትከ አራውት ቢሶህ ካ ሚጋዒህ ሎዉህ ሱብተም ኡብለ፣ ፉጊ አካህ ዮሖወ በገና ይብዽኒህ ባሕሪ አፋል ሶለኒህ ይኒን፡፡ 3. መዔፉጊህ አገልጋሊ ሙሴ መዝሙርከ በገና መዝሙር ታህ የህ ዜሚሳይ ይነ፡፡

            "ኡማኒም ዺዕታ ማዳራ አምላኮ!

             ኩሢራሕ ናባቲያከ ያይድንቀቲያ ኪኒ፣ 

             ህዝቢ ኑጉሦ! ኩአራሕ ትክክልከ ሓቀ ኪኒ፡፡" 

        4.  ኦ'ይማደራ ኮያ ማይስተ ዋ'ቲያከ 

             ኩሚጋዕ አስክብረዋቲይ አቲያ ኪኒ? 

            አይሚህ ቁዱስ አቱ ዲቦህ ኪቶ፣ 

           ሓቂ ፊርዲ ይምቡሉወ ርከህ፣

          ሚናዳም ሙሉኡክ ተመተህ ኩነፊል አስግደሎን፡፡" 

    5. ታሃምኮ ላካል ጋባዔህ ኡብለ፣ ሀይከ ማስክር ዱካን የከ በተ መቅደስ ዓራናል ፋክተ፤ 6. ማልሕና መቅሰፍት ትብዸ ማልሒና ማላይካ በተ መቅደስኮ የውዒን፣ ታይዶጎሔ ዓዶ ሣረና ሀይስተኒህ ይኒን፣ ሲኒ አፍዓዶል ወርቂ ማዕጥቆህ ይክትይኒህ ይኒን፡፡ 7. አፋራ እንስሳይቶኮ ኢንከቲ ኡማንጉልት አምላክህ ቁጡዓህ ተመገ ማልሒና ወርቂ ጽዋዕ ማልሒና መልአካህ ዮሖወ፤ 8. በተ መቅደስ ለ መዔፉጊህ ክብረከ ኃይላኮ ኡገተ ቲካህ የመገ፣ ማልሒና መልአክ ይብዽኒህ ማልሒና መቅሰፍቲት አይከ ያፍጽሚኒም ፋናህ ኢንከቲ በተ መቅደስድ ሳዎ ማዽዒና፡፡

ማዕራፋ 16

ፉጊ ቁጡዓህ ጻማ

   1. ታሃምኮ ላካል ማልሒና መላእክት"አዱዋ! ማልሒና መዔፉጊህ ቁጡዓ ጻማ ባዾት አሞል ሓዻ!"ያዽሔ ናባ አንዻሕ መቅደስ ዓረኮ አውዒህ ኦበ፡፡ 2. ኤዸዾይታ ማላይካ የደህ ጽዋዕ ባዾት አሞል ሓዸ፣ አራዊት ቢሶ ለምከ አራዊት ምስለህ ታስግደ ሒያውህ አሞል ኡማ ዋሔሊሳ ቢያክ አክ የውዔ፡፡ 3. ማላሚ ማላይካ ጽዋዕ  ባሕሪ አሞል ሓዸ፣ ባሕሪ ለ ራበ ሒያውቲህ ቢሎ ባሊ የከ፣ ባሕራድ ማራይቲነ  ሂወት ለ ነገራት ኡምቢህ ባደ፡፡ 

  4. ማዳሒ መልአክ ጽዋዕ ወዓከ ላየ ሚንፂህ አሞል ሓዸ፣ ኢሲን ቢሎ የኪን፡፡ 5. ላየት አሞል ሢልጣን ለ ማላይካ ታህ አይህ ኦበ፣"ያነቲያከ ይነቲያ ቁዱስ ማዳራ! ታሃም ትፍቅደጉል ሓቀ ለቲያ ኪቶ፤ 6. ሚናዳም ቁዱሳንከ ነብያት ቢሎ ሓዸንጉል፣ ቢሎ ተን ተፈዔ፣ ታሃም አካህ ኤዳም ኪኒ፤"7. ኤል ያሥውዕኒል ለ"ዮዎ፣ ኡማኒም ዺዓ ማዳራ አምላኮ! ኩፍርዲ ሓቀከ ትክኪል ኪኒ"ያዽሔ አንዻሕ ኦበ፡፡ 8. ማፋሪ ማላይካ ጹዋዕ አይሮይታት አሞል ሓዸ፣ አይሮይታ ሒያው ላዕናህ ሓራሪሳ ኃይሊ አካህ ዮምሖወ፤ 9. ሒያው ናባ ላዕናህ ሓራረን፣ ታሃሚህ አሞል ሢልጣን ለም መዔፉጊህ ምጋዒህ አሞል ዋቲመን፣ ንስሓ ሳናምከ ካያ ያስኪብሪኒም ማኖ የን። 10. ማካዋኒ መልአክ ጽዋዕ አራዊት ዙፋኒህ አሞል ሓዸ፣ አራዊት ማንግሥት ለ ዲተ የከ፣ ሒያው ሥቃይኮ ኡጉተሚህ አራብ አሔቲክ ይኒን፡፡ 11. ተን ሢቃይኮከ ቢያኮ ኡገተሚህ ዓራንቲ አምላክ አባረን፣ ሲኒ ሪሚድኮ ንስሓ ማሳይኖን፡፡

  12.ሊሕያ መልአክ ጽዋዕ ናባ ወዓድ ኤፍራጥስ አሞል ሓዸ፣ አይሮማሐኮ ታሚተ ነገሥታት አራሕ ያይሳናዳዎና ወዒ ላየ ካፍተ፡፡ 13. ጋባይቲ አፍከ አራዊት አፍ፣ ዲራብቲ ነቢይህ አፍኮ፥ አዖኑህ ኢግዳምኮ አዶሓ ሩኩሳት መናፍት አካውዒህ ኡብለ፡፡ 14. ኢሲን ታአምራት አብታ አጋኒኒቲ መናፍስት ኪኖን፣ ታይ አዶሓ መናፍስት ኡማኒም ዺዓ አምላክ ናባ ለለዕህ ታከ ዺባህ ሒያው ያስካሃሎና ኡማን ዓለሚህ ነገሥታታል ኡማኒል አዴሎን፡፡

     15. ሀይከ አኑ ባዸዻይቶ ባሊህ ዲንገቲህ አምተሊዮ፣ ኦናህ የከህ ሖላሳ ቦታ ሒያው አክ ታብለምኮ ይንቅሔህ ኢሰ ሃይሲሰህ ዻዉዻ ሒያውቲ ይምሥግነቲያ ኪኒ፡፡ 16 .መናፍስት ነገሥታት ተስከሄለህ ኢብራይስጥህ አርማጌዶን አክያን ቦታል ዺባህ ተን ይስክትቲን፡፡

  17. ማላሓኒ ማላይካ ጽዋዕ አየር አሞል ሓዸ፣ በተ መቅደስ አዳል ያነ ዙፋናህ" ይምፍጽመ!"ያድሔ ናባ አንዻሕ የውዔ፡፡ 18. ሓንካዺ፣ አንዻሕ አንጉድከ ናባ አንዻሕ፣ አንጉድከ ባዾ ክርዲዲሞ ተከ፡፡ ታህ ኢጊድ ናባ ባዾ ክርዲዲሞ ሒያው ባዾል ትምፍጢረምኮ ኤዸዽሰህ ተከህ ማታዽገ፡፡ 19. ናባ ካታማ አዶሓል ሓድምተ፣ ህዝቢ ካቶም ትምድምሲሰ፣ ፉጊ ናባ ባቢሎን ይይዝኪረ፣ ኃይለለ ቁጡዓህ ወይን መሲህ ተመገ ጽዋዕ ታዓቦ አበ፡፡ 20. ደሴታት ሙሉኡድ ተለየ፣ ኢምባታት ኤልቲነ ቦታል ማገይሚኖን፡፡ 21. ቲቲያህ ሞሮቶም ኪሎ ግራም የከህ ያምልኪዔ ባራድ ሒያው አሞል ዓራንኮ ኦበ፣ መቅሠፍት ጋዳህ ናባ ዒለህ ያስክሕክሔቲያ ኪይይ ይነጉል ሒያው ባራድ መቅሰፍቲህ ምክንያታል  መዔፉጎ አባረን።                                                               

                                                       ማዕራፋ 17

                                                     ናባ ታምንዚረ ኑማ

   1. ማልሕና ጹዋዕ ትብዸህ ቲነ ማልሕና መላእክትኮ ኢንከቲ ዩላል የመተህ ታህ ዮክየ፣" አሞ ማንጎ ላየህ አሞል ዲፈይተ ናባ አመንዝራ ኪን ኑማህ ቅጽዓት ፊርደ ኩአይቡሉወ ሊዮክ፡፡ 2. ባዾ ነገሥታት ተሊህ ይመንዝሪን፣ ባዾል ማርታም ለ ዙሙቱህ ወይኒ መሲህ ይስኪሪን፡፡"3. ታሃምኮ ላካል መልአክ ኢሲ መንፈሲህ ባራካህ ይበየ፣ ማላሚኖህ ዋቶ ሚጎዕ ኤልይምጽሕፈ፣ ማልሒና ዸግኃከ ታማና ጋይሳ ለ ዓሳ አራውቲህ አሞክ ዲፈይተ ኢንኪ ኑማ ኡብለ፡፡ 4. ኑማ ኢሲሲ ቢሶ ለ ዖሮዖሮ ኪን ዓሳ ሣረና ሀይሲተህ ቲነ፣ ዋርቀከ ይክቢረ ዻይቲ ኡንዹዹህ ለ ዓዻ ተምዔህ ቲነ፣ ኢሲ ጋባድ ያይዶጎሔ ጉዳይከ ዙሙት ሩክሰት ኤድ የመገ ዋርቂ ጽዋዕ ትብዸህ ቲነ። 5. ኢሲ ዳምባራክ ለ አመንዘርቲከ ባዾት ሩክሰቲህ ኢና፣ ናባ ባቢሎን"አክያን ምሥጢራዊ ጉዳይ ኤልያነ ሚጋዓህ ይምጽሕፈህ ዪነ። 6. ቶይ ኑማ ቁዱሳን ቢሎህከ ኢየሱስ ማስክሪህ ቢሎህ ትስኪረህ ኡብለ፣ ኡብለ ዋክተ ጋዳህ ማንጎም ኢምድንቀ፡፡ 7. መልአክ ለ ታህ ዮክየ፣ አይሚህ አምድንቅክ ታነ? ኑማ ምሥጢርከ ኢሲ አክ ድፈይተርከ፣ ማልሒና ዸግኃከ ታማና ጋይሳ ሎን፣ አራዊት ምሥጢር ኩአስቡሉወ ሊዮ፡፡ 8. ቱብለ አራዊት ሚስሊ ይነ፣ ካዶ ሚያነ፣ ሣራህ አዳ ለ ዱኮኮ አውዔለ፣ ሊዪድ ያዴ፣ ዓለም ይምፍጥረምኮ ኤዸዽሰህ ተን ሚጎዕ ሂወት ማጽሐፋል አካህ አምጽሕፈ ዋይተ ባዾል ማርታም፣ አራዊት ባሶህ ኪይይ ይነ፣ ካዶ አኔዋቲ፣ ላካል ያምተቲያ  ኪናም ያብልንጉል አምድንቀሎን፡፡

   9. ቢልሓት ለ አእምሮ ጉሩቱምታም ታሃሚህ አሞል ኪኒ፣ ማላሕና ዸግኃ ሳይጉደይታ አክ ዲፈይተ ማልሕና ኢምባታት ኪኖን፣ ታማም ባሊህ ማልሒና ነገሥታት ኪኖን፡፡ 10. ኮን ለ አክራደ፣ ቲይ ካዶ ያነ፣ ማላሚ ገናህ ማማቲና፣ ኡሱክ ያምተጉል ዳጎ ዋክተህ ጥራህ ሱገ ለ፡፡ 11. ማባሓሪ ኑጉሥ ባሶድ ይነቲያከ ካዶ አኔየ ዋ አራውት ኪኒ፣ ኡሱክ ማልሕንኮ ኢንከቶ ኪኒ፣ ሊይድ ለ ያድየ፡፡

   12.ቱብለ ታማና ጋይሳ ታማና ገና አንግሠ ዋይተ ነገሥታት ኪኖን፣ ያካከህ ኢንኪ ሳዓታህ አራውትሊህ ረዶና አካህ ረዳን ሢልጣን ገየ ሎን፡፡ 13. ታይ ታማና ነገሥታት ኢንኮህ ኢጊድ ሓሳብ ሎን፣ ኢሲን ሲኒ ኃይላከ ሢልጣናህ አራውታ ይዽብዽን፣ 14. ኢሲን ዒዶይታሊህ ዺባ አበሎን፣ ያከ ኢካህ ዒዶይቲ ማዳሪ ማደራከ ነገሥታት ንጉሥ ኪኒጉል ሱበ ለ፣ ካሊህ ታነም ደዕምምተምከ ዶሪምተም ትምኢሚነም  ኢንኮህ ሱባህ ሱበ ሎን፡፡"

ጻባራቅ

ማዕራፋ 18

ባብሎን ራድናን

   1.ታሃምኮ ላካል ናባ ሢልጣን ለ አኪ መልአክ ዓራንኮ ኦባህ ኡብለ፣ ካክብሪህ አይዳጋሕኮ ኡገተሚህ ባዾ ኢፎይተ፡፡ 2. ናባ ደሮህ ታህ የህ ደረ፣"ናባ ባቢሎን ራደ! ራደ! አጋኒኒቲ ማረና ተከ! ሩኩሳት አጋኒኒቲህ ማረና ተከ! ታይፂይፈምከ ታይኒዒበሚህ ጽላል ተከ! 3. አይሚህ ያይስክረ ዙሙት ወይኒ መስ ህዝበ ሙሉኡድ ተፈዔህ ታነ፣ ባዾ ነገሥታት ተሊህ ይምንዝሪን፣ ባዾ ነጋዶ ማጎ ፊጊዓኮ ኡጉተሚህ ሀብታማት የኪን፡፡"4. አኪ አንዻሓህ ዓራንኮ ታህ አይህ ኦበ፣"ኦ'ህዝበ! ተ ኃጢአትሊህ ማምሳማዒና መቅሰፍቲ ለ ሓዲሊታም ታክኒክ፣ ተኮ ኤወዓ፣ 5. አይሚህ ተ ኃጢአቲህ ኩልሳስ ዓራን ፋናህ ማደ፣ መዔፉጊ ተዓማፀ ይዝኪረ፡፡ 6. ቶሖወሚህ መጠኒል አካህ ኡሑዋ፣ አብተ ሢራሒህ ዒጽፈ አካህ ኢክፊላ፣ ኢሲ ኤድ ተስገለ ጹዋዕ አዳል ዒጽፊ ኃይላ አባይ ኤድ ኤንገላ፡፡ 7. ኢሲ ዸግኃህ ክብረህከ ፊጊዓህ ቶሖወም ኢዻህ፣ ሢቃይከ ኃዘን አካህ ኡሑዋ፣ ኢስ ኢሲ አፍዓዶድ ንግሥቲ ባሊህ ዲፈየህ አንዮ፣ ማሚኖ ለ ማኪዮ፣ ኃዛን ኢንኪጉል ኡካ ይማማዳ፣ ያናማህ ታምክሔ፡፡ 8. አማይጉል ተ መቅሰፍት ኡምቢህ ኢንኪ ለለዒል ተ ማደ ለ፣ ራባከ ኃዛን ራሃብሊህ ለ ኤድአምተ ለ፣ ጊራህ ለ ሓራረ ለ፣ አይሚህ ተ አሞል ያፍሪደ ማዳሪ አምላክ ኃይላ ለቲያ ኪኒ፡፡" 

    9. ተሊህ ዙሙት አብተምከ ፊጊዓህ ዱሎቱህ ማርተ ባዾ ነገሠታት፣ ኢሲ ሓራራህ ያውዔ ቲካ ያብልንጉል ተያህ ደራክ ወዔሎን፡፡ 10. ተ ሢቃዪህ ማይሲህ! ዸዺል ሶለኒህ"አቱ ናባ ካታማ፥ አቱ ኃይላ ለ ካታማ አቱ ኃይላ ለ ካታማ ባ'ቢሎኖ! ኩፍርድ ኢንኪ ሰዓቲህ አዳል የመተክ፥  ኢሰህ ሚን! ኢሰህ  ሚን!" ኢየሎን ፡፡

  11. ተን መርከቢህ ዑካ ካምቦኮ ሣራህ ዻማቲ ሚያንጉል ባዾ ነጋዶ ለ አካህ ወዓን፣ አካህ ያኅዚኒን፣ 12. ተን መርከቢህ የመረ ዋርቂ፣ ቡሩር፣ ቁርስት፣ ኩቡር ኪን ዻይ፣ ኡንዹዽ፣ ሲሲሕ ሣራ፣ ሐሪ ሣራ፣ ዓሣ ሣራ፣ መዔ ኡረለ ሖዽ ሙሉኡድ፣ ዳካኒ ኢኮክ፣ ኩቡር ኪን ኑዋይ፣ ነሐስ፣ ከርበ፣ እምነበርድ ዻይት፣ ካላ ኑዋይ  ኡምቢህ፣ 13. ቀረፋ፣ ቀመም፣ ከርበ፣ ዒጣን፣ ወይኒ መስ፣ ኦላዕ ዘይት፣ ሓሪድ፣ ሲራይ፥ ሳዓ፣ ዒዶ፣ ፋሪስ፣ ሠረገላ፣ ባሮት፣ ተመረከም" ኪኒ፡፡ 14. ነጋዶ ለ ኩናብሲ ይትምኔ መዔ ጉዳይኮ ኡምቢህ ኮኮ ሚሪሕ የኒህ የደይን፣ ኩሀብተከ ኩክብሪህ ዒዺ ሙሉኡክ የለየ፣ ካምቦኮ ሣራህ ታሃም ኡምቢህ ኢንኪጉል ገየ ማልቶ አክያን። 15. ታይ ጉዳይ ኡምቢህ ዻማክ ሀብታማት ተከ ነጋዶ ተ ሢቃይህ ማይሲህ ዸዺል ሶለ ሎን፣ ወዓከ አኅዝንክ፣ 16."ሲሲሕ ሣራከ ሑቱኩህ ሣራ ዓሳሚል ለ ሳሪታይ ቲነቲያ፣ ዋርቀከ ኩቡር ኪን ዻይቲ ኡንዹዹህ ኢፎሳክ ትነቲያ፣ ናባ ካታማ ኢሰህ ኢየ ዋይቶይ! ኢሰህ ኢየ ዋይቶይ! ኮህ ኢየ ሎን፡፡ 17. ታሂዶለ ሀብቲ ኢንኪ ሳዓታል የለየ"ኢየ ሎን፣ መርክብ አዘዝቲ ኡምቢህ፣ መርከቢህ ታዲየ ሒያው ኡምቢህ፣ መርከብድ ሢራሕታም ኡምቢህ፣ ባሕሪ አሞል ታዲየም ኡምቢህ ዸዺል ሶለ ሎን፡፡ 18. ኢሲ ሓራራህ ቲካ ያብሊን ዋክተ "ታይ ናባ ካታማህ ኢጊድቲያ ለካ አኪ ካታማ ሊይክ ኒነ?"አይክ ወዔኒህ ደረን፡፡

  19. ሲኒ ዸጎሑል ቡልኩዓ አንስንሲክ፣ ወዓከ ኃዛናህ ታህ አይክ ደራይ ይኒን፣"ባሕሪ አሞል መራክብ ለም ኡምቢህ ተ ሀብተህ ሀብታማት ተከም፣ ታይ ናባ ካታማ ኢንኪ ሳዓቲህ አዳል ቶዖኖወክ ኢሰህ ኢየ ዋይቶይ! ኢሰህ ኢየ ዋይቶይ!" 

   20. ኦ ዓራኖ! ተያህ ኒያት! አቲን ቁዱሳንከ ሐዋርያት፣ ነብያቶ ለ ኒያታ! አይሚህ መዔፉጊ ሲን ምክንያታል ተ አሞል ይፍረደ፡፡"  

  21.ታሃምኮ ላካል ኢንኪ ኃይለ ለ መልአክ ናባ ማዽሓን ዻዪህ ኢዻ ያከ ኢንኪ ዻ ናው ኢሰህ ታህ የህ ባሕራድ ይውርውረ፣"ናባ ካታማ ባቢሎኖ ታህ ተህ ኃይላህ ዱፉምተህ ራደሊቶ፣ ካምቦኮ ሣራህ ኢንኪጉል ማገይምታ፡፡ 22. በገና ታድርዲረምከ ሙዚቃት አንዻሕ፣ ሳምባቆ ታቱከምከ ጡሩመባ ታቱከሚህ አንዻሕ፣ ጋባዒመህ ኮያል ሚያማበ፣ አኪናን ዓይነቲህ ጋባ ቢልሓቲህ ሢራሕከ ቢልሓትለ ሒያውቲ፣ ካምቦኮ ሣራህ ኮያል ማገይማ፣ ማዽሓን አንዻሕ ካምቦኮ ላካል ኮያል ሚያማበ፡፡ 23. ኢፎይቲ ኢፊ ካምቦኮ ላካል ኮያል ሚፎዋ፣ ማርዓውቲከ ዒቦንቲ አንዻሕ ካምቦኮ ሣራህ ኮያል ሚያማበ፣ ኩ ነጋዶ ዓለም ናባ ሒያው ኪይይ ይኒን፣ ኢሲ ጦንቆላህ ሚናዳም ኡምቢህ ተስገገየ፡፡ 24. ተ አዳል ነብያትከ ቁዱሳን ባዾት አሞል ይግዲፊን ሒያዋል ኡምቢህ ቢሊ ገይመ፡፡"     

      ማዕራፋ 19

  1. ካምቦኮ ላካል ታህ ታ ማንጎ ሒያውህ አንዻሓህ ኢጊድ ናባ አንዻሕ ዓራናል ኦበ፣"ሃሌ ሉያ! ኣድኃነከ ከ ክብረ ለ ኃይላ ለ ናምላክህ ቲያ ኪኒ፡፡ 2. አይሚህ ፍርዲ ሓቀከ ትክኪል ኪኒ፣ ባዾ ኢሲ ዙሙቱህ ትይርኪሰ፣ ናባ አመንዝራ ፍርደህ ተ ይቅጽዔ፣ ተያ ይቅጽዔርከህ ለ አገልገልቲ ቢሎህ ይምብቂለ፡፡ 3. ጋባዔህ፣ ሃሌ ሉያ! ቲኪ ኡማንጉል አጋናል ያውዔ!" አይክ ደረን፡፡ 4.ሃሌ ሉያ አፋራ ስማግለታከ አፋራ ኢንሲሳይቶ ካዙፋኒህ አሞክ ዲፈየ አምላካህ ሲኒ ዳምባራህ ጋሚመኒህ "አመን፣ ሃሌ ሉያ!"አይክ ይስግድን፡፡፣

ዒዶይቲ ማርዓህ ዲጊስ

    5. ታሃምኮ ላካል፣ ካያ ማይስታ አገልገልቲ ሙሉኡክ፣ ዒንዳምከ ናባማክ፣ ሲኒ አምላክ ኢይምስግና፣ ያ አንዻሕ ዙፋንኮ የውዔ፡፡ 6. ማንጎ ሒያውህ አንዻሕ፣ ኦብታ ላየህ አንዻሕ፣ ኃይላለ አንጉዲህ  አንዻሐህ ኢጊድ አንዻሕህ ታህ አይህ ኦበ፣"ኡማኒም ዺዓ ማደሪ ናአምላክ ይንግሠርከህ ሃሌ ሉያ! 7. ዒዶይቲ ማርዓ ማደጉልከ ዒብና ቶምሶኖዶወርከህ ኒያታ፣ ኒያትኖ ዋይ ለ ናስካባሮይ፡፡ 8. ታይዶጎሔ ቲያ ፂሪይ ሲሲሕ ሣራና ሀይሲቶ አካህ ቶምሖወ፣ ሲሲሕ ሣሪ ቁዱሳን ጽድቂ ሢራሕ ኪኒ። 9. ታሃምኮ ላካል መልአክ"ዒዶይቲ ማርዓህ ግብዛህ ደዕምምተሚክ ዒድል ለም ኪቲን ኤዸሓይ ኢጽሒፍ ዮክየ፣ ካታየህ ታሃም መዔፉጊህ ሓቂ ቃል ኪኒ"የዸሔ፡፡ 10. አኑ ለ መልአካህ አስጋዶ ካኢቢህ ዳባል ዳምባራህ ጋሚመ፣ ኡሱክ ለ"ሓብ! ታሃም ማቢን! አኑኮ ኮከ ኢየሱስህ ምስክርነት ትብዸ ኩሳዖልትሊህ አገልጋሊ ኪዮ፣ መዔፉጎህ ኢስግድ፣ አይሚህ ኢየሱሱህ ያምስክርኒም  ትንቢት መንፈስ ኪኒ" ዮክየ፡፡

ዓዶ ፋራሲህ አሞክ ዲፈየ ፋራስሊል

    11. ታሃምኮ ላካለ ዓራን ፋክተህ ኡብለ፣ ሆይከ ዓዶ ፋራስ ኡብለ፣ ፋራስ አሞክ ዲፈቲይ ኡሙንከ ሓቀ ለ አክያንቲያ ኪኒ፣ ኡሱክ ትክክሊህ ያፍሪደህ ያምወገኤ፡፡ 12. ካኢንቲት ጊራ ሀልሀልታህ ኢጊዳ፣ ካ አሞክ ማንጎ ዘውዲት ታነ፣ ካኮ በሒህ አኪማሪ ኢንከቲ አዽገዋ ካአሞል ይምጽሒፈ ሚጋዕ ዪነ፣ ኡሱክ ቢሎድ ትምኢሊከ ሣራና ሀይሲተህ ይነ፡፡ 13. ካ ሚጋዕ ለ"መዔፉጊህ ቃል"ያቲያ ኪይይ ይነ፡፡ 14. ዓዶ ፋሪስክ አሞክ ዲፈተም፣ ዓዶምከ ፂሪያም ተከ ሲሲሕ ሣራ ሀይሲተ ዓራንቲ ሠራዊት ኤድ ካታይተ፡፡ 15. ህዝበ አካህ ሳባዓን ልሊግ አፍ ለ ሰይፍ ካአፍኮ የውዔ፣ ብርቲ ዲጋህ ተን ይግዚኤ፣ ኡሱክ ኡማኒም ዺዓ መዔፉጊህ ኃይላለ ቁጡዓ ያይቡሉወ ቲያ የከ ወይን መስ ኤድ ያጽሙቂኒድ ያዒተ። 16. ካሣራከ ካዸግኃህ አሞክ"ነገሥታት ኑጉሥ ማደሪ ማደራ ያ ጹሑፍ ይምጽሒፈ፡፡" 

     17. ላካል አይሮት አሞል ሶለ ኢንኪ መልአክ ኡብለ፣ ኡሱክ ዓራናል ታንፊረ ኪምብሮ ድ ታህ የህ ናባ አንዻሓህ ዋዕየ፣"ናባ መዔፉጊህ ዲጊሲህ አማ ኤከሄላ፣ 18. ነገሥታት ኃዶ፣ ውጊእ   አዛዝቲህ ኃዶ፣ ኃይላ ለ ታምወገኤሚህ ኃዶ፣ ፋሪስከ ፋሪስለ ኃዶ፣ ማዶርከ ጊለዋይቲቲህ ኃዶ፣ ዒንዻምከ ናባሚህ ኃዶ፣ አኪናን ሒያውቲህ ዶኃ ኡምቢክ ለ አማ በታ፡፡" 19. ታማም ባሊህ ለ አራዊታከ ባዾ ነገሥታት ሲኒ ወተሃደራት ዓዶ ፋራሲክ አሞክ ዲፈኒህከ ካወተሀደርሊህ ዺባቶና የከሄልኒህ ኡብለ፡፡ 20. ያከካህ አራዊቲ ይምዽቢ ዸ፣ ካሊህ ካነፊል ማንጎ ታአምራት አባይ ይነ ዲራብቲ ነቢይ ይምዽቢዸ፣ አሱክ አራዊት ምልኪት ሊይክ ቲነምከ አራዊት ሚስሊህ ቢሶህ አስግድክ ታምራት አባክ ቲነም አስገገይ ይነ፣ ታይ ላማይ ዲኒህ ቦሎልታ ጊራህ ባሕራድ ሲኒ ሮሔሊህ ራደን፡፡ 21. ራዕተም ለል ዓዶ ፋራሲህ አሞክ ዲፈየቲህ አፍኮ ያውዔ ሰይፊህ ራበን፣ ክምቢሮ ኡምቢህ ተን ኃዶ  በተህ ሓይተ፡፡

ማዕራፋ 20

ሲሕ ኢጊዲያህ ማንግሥት

   1. ታሃምኮ ላካል አዳለ ዱኮህ ቁልፈከ ናባ ሰንሰል ጋባድ ይብዸ መልአክ ዓራንኮ ኦባህ ኡብለ፡፡ 2. ጋባይ ይብዸህ ሲሕ ኢግድያ ዩዹወ፣ ታይ ጋባይ ዲያብሎስ ወይ ሰጣን አክያን ባሶት ዓሮራ ኪኒ፡፡ 3. ሲሕ ኢጊድቲያ ታከም ፋናህ ካምቦኮ ሣራህ ህዝበ ያስገገየምኮ መልአክ ጋባይ አዳለ ጉድጋዳድ ዒደ፣ አሊፈህ ማኅተሚህ ይኢስገ፣ ታሃምኮ ላካል ዳጎ ዋክተ ያምናሓዎ አካህ ኤዳ። 4. ታሃሚህ ላካል ዙፎን ኡብለ፣ ዙፎናክ አሞል ፊርዲ ሢልጣን አካህ ዮምሖወም ዲፈየኒህ ኡቢለ፣ ኢየሱሱህ ያማስካሮናከ መዔፉጊህ ቃል ዮና ሲኒ ዸጎሕኮ ትግሪዔ ሒያውህ ናፍስት ኡብለ፣ ኢሲን አራውታህከ ካምስለህ አስግደዋተም፣ ምልኪት ዳምባራክ ያኮይ ሲኒ ጋባህ አሞል አበዋይተም ኪይይ ይኒን፣ ኢሲን ራባኮ ኡጉተኒህ ክርስቶስሊህ ሲሕ ኢግዲያ ረደን፡፡ 5. ራዕተ ራቦንቲት ለ ሲሕ ኢግዲያ ታከም ፋናህ ራባኮ ሙጉቲኖን፣ ታሃም ኤዸዾይታት ኡግታቶ ኪኒ። 6. ኤዸዾይታት ኡግታቶ ሓድሊታም ተከም ትምስግነምከ ቁዱሳን ኪኖን፣ ማላሚህ ራቢ ተን አሞል ሢልጣን ማለ፣ ኢሲን ፉጎከ ክርስቶስ ካህናት አከሎን፣ ክርስቶስሊህ ሲሕ ኢግዲያ ረደሎን፡፡

ሰጣን ሱቡትናን

 7. ሲሕ ኢግዲያ አበምኮ ላካል ሰጣን ማዹዋኮ ያምኑሑወ፥ 8. ዓለሚል ሙሉኡድ ገይምታም፣ ጎግከ ማጎግ የከ ሒዝበ ያስጋጋዎከ ውጊህ ያስካታቶ አውዔለ፣ ተን ሎይ ባሕሪ ዳራታል ታነ ሖጻባሊህ ኪኒ፡፡ 9. ኢሲን ባዾል ሙሉኡድ ይምብትንኒህ ቁዱሳን ሰፈርከ ኢምክሒን ካታማ ይክብቢን፣ ያኮይ ኢካህ ጊራ ዓራንኮ ኦብተህ ተን ሓራሪሰህ ትድምሲሰ፡፡ 10. ተን የስገገየ ዲያብሎስ፣ አራውትከ ዲራብቲ ነቢይ ኤድያኒን ዲኒህ ቦሎልታ ጊራህ ባሕሪ አዳድ ራደን፣ ባርከ ለለዕ ኡማንጉሉህ አምሠቀየ ሎን ።

ባክቶ ፍርደ

      11. ታሃምኮ ላካል ናባ ዓዶ ዙፋንከ ዙፋን አሞል ድፈየ ቲያ ኡብለ፣ ባዾከ ዓራን ካነፊኮ ኩደን፣ ቦታ ለ አካህ ማገይሚና።12. ዒንዻምከ  ናባም ራቦንቲት ካዙፋኒህ ነፊል ሶለኒህ ኡብለ፣ ማጻሒፍቲ ለ ፋኪተ፣  ሂወት ማጻሐፍ የከ አኪ ማጻሐፍ ለ ፋክተ፣ ራቦንቲቲ  ማጻሕፍትል ይምጺሕፈህ  ገይማ ተን ሢራሒህ መሠረቲህ ፊርደ ጋራየን፡፡ 13. ባሕሪ ለ ካአዳድ ቲነ ራቦንቲት ዮሖወ፣  ራባከ ሲኦል ተን አዳድ ቲነ ራቦንቲቲህ ዮሖይን፣  ኢሲሲ ሚናዳምቲ  ኢሲ ሢራሒህ ሪሚዲህ ፊርደ ጋራየ፡፡ 14. ራባከ ሲኦል ለ ጊራ ባሕራድ ራደን፣ ታይ ጊራከ ባሕራ ማላሚት ራባ ኪኖን፣ 15. ካሚጋዕ ሂወት ማጽሐፋል  ይምጽሒፈህ  አክ ገይመዋየቲ ኡምቢህ ጊራ ባሕራድ ራደ፡፡

ማዕራፋ 21

ዑሱብ ዓራንከ ዑሰብ ባዾ

  1. ታሃምኮ ላካል ዑሱብ ዓራንከ ዑሱብ ባዾ አቡለ፣ አይሚህ ለ ኤዸዾይታ ዓራንከ ኤዸዾይታ ባዾኮ ትላየኒህ ይኒን፣ ባሕሪ ለ ካምቦኮ ላካል ማረ ማለ፡፡ 2. ቅድስቲ ካታማ፣ ዑሱብ ኢየሩሳለም፣ ኢሲ ባዕላህ ዓዻተምዔ ዒብና ቶምሶኖዶወህ ዓራንኮ ፉጎኮ ኦባህ ኡብለ፡፡ 3. ታህ ያ ናባ አንዻሕ ዙፋንኮ አውዒህ ኦበ፣ ሀይከ ፉጊ ማሓም ሒያውሊህ ኪኒ፣ ተንሊህ ማራ፣ ኢሲን ካህዝበ ያኪን፣ መዔፉጊ ኢሰህ ተንሊህ ያከ፣ ተን አምላክ ያከ፣ 4. ዺሞ ኡምቢህ ተን ኢንትቲህ አሞኮ ያፅሪገ፣ ራቢ ያኮይ ኃዛን ወይ ወዒ ያኮይ ሢቃይ ካምቦኮ ሣራህ ሚያኔ፣ አይሚህ ባሶማሪህ ጉዳይህ ዓይዳ ቲላይተ፡፡" 

  5. ካዙፋኒህ አሞል ዲፈይተም ለ"ሀይከ አኑ ኡማን ጉዳይ ዑሱባም አባክ አነ"የዸሔ፣ ካታየህ ታይ ቃል ይምእምነቲያከ ሓቀ ኪኒጉል ኢጽሒፍ ዮክየ፡፡ 6. ታሃምኮ ላካል ታህ ዮክየ፣"ይምፍጺመ አልፋከ ኦሜጋ፣ ኤዸዾይታከ ባክቶ አኑ ኪዮ፣ ባካርተሚህ ሂወት ላየህ ሚንጸኮ ኢንኪ ሊሞ ሂኒም ናፃህ አሓየ ሊዮ፡፡ 7. ሱበቲ ታሃም ያውርሰ፣ አኑ አምላክ አካህ አከሊዮ፣ ኡሱክ ባዻ ዮህ አከለ፡፡ 8. ያኮይ ኢካህ ማይሰን ኢምነት አለዋይታም፣ ሩኩሳናህ፣ ናብሰ ታግዲፈም አመንዘርቲ፣ ጦንቃሎ፣ ጣዖት ታይምሊከም፣ ዲራብሊቲ ኡምቢህ ተን ዒደቲህ ክፍሊ ዲኒህ ሓራሪሳ ጊራህ ባሕሪህ አዳድ ያከ፣ ታሃም ማላሚ ራባ ኪኒ፡፡"

ዑሱብ ኢየሩሳለም

   9. ባኪቶት ማልሕና መቅሰፍቲህ ተመገ ማልሕና ጽዋዕ ትብዸ ማልሕና ማላይካኮ ኢንከቲ የመተህ"አሞ ዒዶይቲ ኑማ ተከ ዒብና ኩአስቡሉወ ሊዮክ"ዮክየ፡፡ 10. መንፈሲህ ለ ኢንኪ ናባ ዸዽ ኢምባህ ይበህከ ቅድስት ካታማ ኢየሩሳለም፣ መዔፉጎኮ ዓራንኮ ኦባህ ይይስቡሉወ፡፡" 11. መዔፉጊህ ክብረህ ኢፎሳይ ቲነ፣ ተ ኢፊህ ድምቀት ጋዳህ ይክብረ ዻ ባሊህ፣ እያስጲድ ኡንዹዽከ ኢፎሳ ማራፃን ፂሪኢያ ኪይይ ቲነ፡፡ 12. ላማምከ ታማን ኢፈያ ለ ናባቲያከ ዸዽ ማንዳቂህ ማካባቢያ ሊይ ቲነ፣ ላማምከ ታማን ኢፈይ ኢያል ላማምከ ታማን መላእክቲያ ሶለኒህ ይኒን፣ ኢአፋል ላማምከ ታማን ኤስራኤል ነገድ ኢያህ ሚጎዕ ትምጽሕፈህ ቲነ፡፡ 13. አይሮማሓ ቱላኮ አዶሓ ኢፈይ፣ ሰሜን ኡላኮ አዶሓ ኢፊአፍ፣ ደቡብ ኡላኮ አዶሓ ኢፈይ፣ አይሮዱማቱላኮ አዶሓ ኢፈይ ይነ፡፡ 14. ካታማ ማንዳቂህ ማካባቢያ ላማምከ ታማን መሠረቲያ ሊይ ቲነ፣ መሠረት አሞል ላማምከ ታማን ዒዶይቲ ሐዋርያቲያህ ሚጎዕ ትምጽሕፈህ ቲነ፡፡ 15. ዮሊህ ዋንሲተ መልአክ ካታማከ ኢፊአፋል፣ ማንዳቅ አካህ ያምልኪዔ ዋርቂ ድጋ ሊይይ ይነ፡፡ 16 .ካታማ ዸዻንከ ፍዳነ ኢንኪዻ ኪን አፋራ ዒንደፍቲህ ቅርጸ ሊይ ቲነ፣ መልአክ፣ ካታማ አካህ ያልክዒን ዲጋህ ይልክዔህከ ዸዻን ላማ ሲሕ አፋራ ቦል ኪሎ መተሪያ ቲዻ ተከ፣ ዋርደከ አጋናል ዸዻን ታሚዻ ዻርጋ የከ፣ 17. ማላይካ ማንዳቅ ማካባቢያ ይልክዔ፣ ማላይካ አካህ ያልክዔ ትምዽገ መልከዒህ ትክክል ማልሕንቶሞንከ ላማይ መትሮቲያ ታከም የከ፤ 18. ማንዳቅ ሢራሕመም ኢያስጲድህ ኪይይ ይነ፣ ካታማ ማራፃን ባሊህ ፂሪይ ዓዶ ዋርቀኮ ሢራሕምተህ ቲነ፡፡ 19. ካታማ ማንዳቂህ መሠረት ኢስስ ኩቡር ኪን ዻይቲህ ዓዻ ተምዔህ ቲነ፥ ኤዸዾይታ መሠረት ኢያስጲድ ኪይ ይነ፣ ማላም ሰንፔር፣ ማዳሕ ኬልቄዶን፣ ማፋሪ መረግድ፡፡ 20. ማካዋኒ ሰርዶንክስ፣ ሊሕ ያቲ ሰርድዮን፣ ማላሓኒ ክርስቲሎቤ፣ ማባሓሪ ቢረሌ፣ ማሳጋሊ ወራወሬ፣ ማታማኒ ክርስጵራስስ፣ እንካንከ ታማን ያቲ ያክንት፣ ላማምከ ታማን ያቲ አሜቴስቲኖስ ኪይይ ይነ፡፡ 21. ላማምከ ታማን ኢፈኢያ፣ ላማምከ ታማን ኡንዹዽቲያህ ኪይይ ይኒን፣ ኢሲሲ ኢፈይ ኢንኪ ኡንዹዹኮ ሢራሕመህ ዪነ፣ ካታማት አራሖ ማራፃን ባሊህ ኢፎ ትላሳ ጺሪይ  ዋርቀ ኪይይ ይነ፡፡

  22. ኡማኒም ዺዓ ማዳራከ አምላክ ዒዶይቲ ተ መቅደስ ኪይይ ይነጉል ካታማል መቅደስ ማባሊዮ፡፡ 23. መዔፉጊህ ክብሪ አካህ ኢፎሳጉልከ ዒዶይቲ ተ ኢፎይታ ኪይይ ይነጉል ካታማ አይሮ ታኮይ አልሳ አካህ ኢፎሶና ተ ጉርሱሳይ ማና፡፡ 24. ህዝቢ ተ ኢፎል ጋሓንጋሓን፣ ባዾ ነገሥታት ለ ሲኒ ክብረ ተኡላል ባሃን፣ 25. ታማል ባር ሚያነጉል ኢፊአፋያ አኪናን ለለዕ ማልፍምታ፡፡ 26. ማንግሥቲ ዒዸከ ክብሪ ተያድ ሳን፣ 27. ያይጽዪፈ /ያይኒዊረ/ ጉዳይ ኢንኪጉል ተያድ ማሳ፣ ሩክሰት አባቲያከ ዲራብ ዋንሲታ ቲይ ኢንኪጉል ተያድ ማሳ፣ ተያድ ሳይታም፣ ተን ሚጎዕ ዒዶይቲ ሂወቲህ ማጽሐፋል አካህ ትምጺሒፈም ጥራህ ኪኖን፡፡

ማዕራፋ 22

   1. ታሃምኮ ላካል መልአክ ፉጎከ ዒዶይቲ ዙፋንኮ ያውዔህ ኢፎዋ  ማራፃን ባሊህ ፂሪይ ሂወት ላየህ ወዓ ይስቡሉወ፡፡ 2. ታይ ወዒ ካታማክ ዋና አሮሕክ ፋናል የፀደደህ ቲላ፣ ወዒ ጉራልከ ሚድጋል ኢሲሲ አልሳል ፍሮይታ፣ ኢጊዳል ላማምከ ታማን ዋክቲያ ፊረ ታሓየ ሂወት ሓዻ ቲነ፣ ሓዻ ዻዻይ ሒያው ኡሩሳይ ይነ። 3. ካምቦኮ ሣራቱላል ኢንኪ ዓይነቲህ አባሮ አኒየ ማለ፣ ፉጎቲከ ዒዶይቲ ዙፋን ካታማክ አዳል ያኪን፣ አገልገልቲ ያሚሊኪን፣ 4. ካ ነፍ ያብሊን፣ ተን ሚጋዕ ተን ዳምባሪህ አሞል ያከ፡፡ 5. ካምቦኮ ላካል ባር ሚያኔ፣ ማደሪ አምላክ አካህ ኢፎሳጉል ኢፎይታ ያኮይ ኢፊ ኢፎይቲ ተን ማጉርሱሳ፣ ኡማንጉል ያንግሢን፡፡

ኢየሱስ ሙሙት

   6. ታሃምኮ ላካል መልአክ ታህ ዮክየ፣ ታይ"ቃላት ታምኢምነምከ  ሓቀ ለም  ኪኖን፣ ኢሲ መንፈስ ነብያታህ ያሓየ ማደሪ ኢየሱስ ዳጎ ዋክቲህ ላካል ያከ ጉዳይ አገልገልቲ ያይባላዎ ማላይካ ፋረ፡፡"

  7. ኢየሱስ ለ"ሀይክዮ አኑ ዸህ አምቲክ አኒዮ፣ ታይ ማጽሐፊህ ትንቢት ቃል ያፍጽመቲ ይምስግነቲያ ኪኒ"የ፡፡ 8. ታይ ጉዳይ ዮበቲያከ ዩብለቲ ዮያ ያሃኒስ ኪኒ፣ ታይ ጉዳይ  ኦበጉልከ ኡብለ ለለዕ፣ ታይ ጉዶይ ይይስቡሉወ መልአካህ አካህ አስጋዶ ካኢቢህ ዳባል ራደ። 9. መልአክ  ለ"ሓብ ታሃም ማቢን! አኑ ሲንከ ሲን ሳዖል ነብያትሊህ፣ ታይ ማጽሐፊህ ቃል ታጽሕፈ ሒያውሊህ አገልጋሊ ኪዮ፣ መዔፉጎህ ኢስጊድ!"ዮክየ፡፡ 10. ካታሰህ ታህ ዮክየ፣"ዋክቲ ኡዹዽቲያ ኪኒኪ ታይ ትንቢት ማጽሐፍ ቃል ማኅተሚህ ማሊፊን፡፡ 11.ካምቦኮ ላካል ዓማፂ ያዕሚፂኒም ያቃጻሎይ፣ ሩኩስ ኪንቲ ያርካሶይ፣ ጻድቅ ኪንቲ ያጽዳቆይ፣ ቁዱስ ለ ያምቃዳሶይ፡፡"

  12."ሀይኪዮ አኑ ዸህ አምትክ አኒዮ፣ ተንተን ሢራሓህ አሓየ ሊሞ ኢብዸህ አኒዮ፡፡ 13. አልፋከ ኦመጋ ባሶቲያከ ሣራቲይ፣ ኤዸዾይታከ ባክቶ ዮያ ኪኒ፡፡"14. ሂወት ሓዻኮ ፊረ በቶናከ ኢፈይኮ ለ ካታማድ ሳዎና መብት ያሎና ሲኒ ሣራ ዓካልሰም ዒዲል ለም ኪኖን፡፡ 15. ናውረ ለም፣ አስማት ለም፣ አመንዘርት፣ ናብሰ ታግዲፈም፣ ጣዖት ታይምሊከም፣ ዲራብ ኪሕናምከ ዋንሲታም ኡምቢህ ካታማኮ ኢሮል ያኪን፡፡ 16. አኑ ኢየሱስ ታይ ምስክሪነት አካህ አሓዎ ኢኒ መልአክ ሞሶዓርቲህ ፋረህ አኒዮ፣ አኑ ዳዊት ሪምድከ ዳራ ኪዮ፣ ኢፎአ ዻሕኒት ሑቱክታ ኪዮ፡፡ 17. መንፈስ ቁዱስከ ዒብና"አሞ"ያን፣ ያ'በቲ"አሞ" ዮዋይ፣ ባካረቲ ያማቶይ፣ ጉረቲ ሂወት ላየ ኢንኪ ሊሞሂኒም ናፃህ በዎይ፡፡  

 18. ሀይክ ታይ ማጽሐፋል ይምጽሕፈ ትንብድ ቃል ያበቲይ ኡምቢህ ሰሊቶይ አይክ  አኒዮ፣ ኢንከቲ ታይ ቃሊህ አሞል ኢንኪ ጉዳይ ኦሰምኮ፣ ታይ ማጽሐፋል ትምጽሒፈ መቅጽሰፍቲል መዔፉጊ ኤድ ኦሳ። 

  19. አኪናንቲ ታይ ትንብቲህ ማጽሐፋል ትምጽሐፈ ቃላትኮ ኢንኪ ጉዳይ ይስጉዱለምኮ፣ ታይ ማጽሐፋል ዋንስተኒም ሂወት ሓዻህ ፊረከ ቅድስቲ ካታማኮ መዔፉጊ ካጊደ አክ ያስጉዱለ፡፡

  20. ታይ ጉዳህ  ማስኪር የከቲ "ዮ! ዸህ አሚተ'ሊዮ" ያዽሔ፡፡ አመን፣ ማዳራ ኢየሱሶ አሞ !

 21. ይማዳሪህ ኢየሱስ ጸጋ ኡማን ሲንሊህ ታኮይ፣ አመን፡፡

_