ጳውሎስ መልእክት ቆላስይስል

         

ሐዋርያው ጳውሎስ መልእክት ቆላስይስ ሒያዊህ ኡላል

             ጳውሎስ መልእክት ቆላሲዩስ

                       ሳይማ 

ጳውሎስ ቆላስይስ ሒያዋል ይጽሕፈ መልእክት ትምጽሕፈም ዕንዻ እስያል ኤፈሶንኮ    አይሮማሓል ገይምታ ቆላስይስል ያነ ሞሶዓረህ ኪኒ፣ታይ ሞሶዓሪ ዮምቆቆመም ጳውሎሱህ አከዋየሚህ ሮማ ግዝአት ኪን እስያ ዋና ካታማ ተከ ኤፌሶን አገልገልቲ ኢፋሪሰህ ይነጉል ቆላስይስሱል ለ ኃላፍነት ሊይይ ይነ፣ ቆላስይስ ሞሶዓሪ ፉጎ ያዽግነሚህከ የመለኤ ድኅነት ገዮ ኢስስ ሒያውቲህ መንፈሳው ኃይሊህ ሢልጣናታህ ያስጋዶ ኤልታነ ታዽሔ ዲራብት መምሂራን ይንንጉል ጳውሎስ ዮበህ ይነ፣ ታይ መምሂራን ያናም አኪ ጉዳይ ውልውል ሒያው ግርዘቲህ ኢግድ ታነ ሠራዓታታህ ያምጋዛሆናከ ምግበህከ አኪማሪህ ደምቢት ዻዉዾናም ኤልታነ ያናም ቲነ፡፡ 

    ጳውሎስ ታይ መልእክት ይጽሕፈም ሓቂ ክርስቲና መልእክት ይስቅርበህ ተን ዲራቢህ ትምህርቲ ያምቃዋሞ የህ ኪይይ ይነ፣ ይስቅርበ መልስትክ ዋና ኢየሱስ ክርስቶስ የመለኤ ድኅነት ያሖ ዺዓ፣ ታይ አኪ እምነታቲህ ሢሮሕ ካኮ ምሪሕ ኢሶና ዺዓን ያናማህ ኪኒ፣ መዔፉጊ ኢየሱስ ክርስቶሲህ አራሓህ ዓለም ይፍጥረ፣ ካ አራሓህ ኢሲ ኡላል ደሄዔህ ባሃ፣ ዓለም ድኅነቲህ ታስፋ ታኔም ክርስቶስሊህ ተምሔበበረህ ጥራሕ ኪኒ፣ ታሃሚህ  መሠረቲህ  ጳውሎስ ታይ ናባ ምሂሮ ያምነ ሒያወቲ አይናህ  ኢሰህ ያይታርጋሞ ዺዔም ያይርዲኤ፡፡      ታይ መልአክት ጳውሎስኮ ጋራየህ ቆላስዩስ ማዲሶ ፋሪመቲ ቲኪቆስሊህ ኢንኮህ ይነ አናሲሞስ ይነም ያብልኒም ለ ጠቃሚ ኪኒ፡፡ አይሚህ ጳውሎስ አማጉል አናሲሞስ አክያን አገልጋሊ ኡጉሠህ ፊልሞናል አኪ መልእክት ይጽሕፈ፡፡

                   --------------------------------------------

ማዕራፋ 1

    1. መዔፉጊህ ፍቃዳህ ኢየሱስ ክርስቶሲህ ሐዋርያ የከ ጳውሎስከ ኒሳዓል ጢሞቴዮስ፣ 2. ቆላስዩሱል ማርታ፣ ክርስቶሱህ ቁዱሳንከ አማንቲ ተከ ሳዖልቲህ ና'ባ መዔፉጊህ ጸጋከ ሳላም ያኮይ፡፡

ጳውሎስ ምስጋና ጻሎት

   3. ሲናህ ጻሎት አብና ዋክተ ኒማዳሪ ኢየሱስ ክርስቶሲህ አባ የከ መዔፉጎ ኡማን ዋክተ ናይምስግነ፡፡ 4. አይሚህ ኢየሱስ ክርስቶስሊህ ሊቲን ኢምነትከ ቁዱሳን ዳዓባል ኡምቢክ ልቲን ካሓኖ ኖበ፣ 5. ሓቂ ቃል የከ መዔ ዋሪ ኤዸዾይታህ ሲና ማደ ዋክተ ካያድ ታነ ታስፋ ቶቢን፣ አማይጉል ሲን ኢምነትከ ካሓኒ ኤዸዸም ዓራናል ዮምሶኖዶወህ ሲናህ ሱጋም ታይ ታስፋህ አሞል ኪኒ፡፡ 6. አቲን መዔ ዋረ አክ ቶቢን ኢርከከ መዔፉጊህ ጸጋህ ሓቀ አክ ትምርድኢን ለለዕኮ ኤዸዽሰህ፣ ታይ መዔ ዋሪ ሲን ፋናድ የከሚህ ዓይነቲህ ሙሉእ ዓለምል ያይፊሪየምከ ዓሪሳሚህ አሞል ኪኒ፡፡ 7. ታሃም ለ ኖያህ ኒዻ የከህ ኢየሱስ ክርስቶሱህ ያምኢምነ አገልጋሊ የከህከ ኖሊህ ኢንኮህ ሢራሓ ኢምክሒን ኤጳፍራ አክ የዽሔ፡፡         8. መንፈስ ቁዱስኮ ሲናህ ዮምሖወ ካሓኖ ኖክ የ፡፡ 9. አማይጉል ታሃም ኖበ ለለዕኮ ኤዸዽሰነህ አቲን መንፈሳው ብልሓትከ አስታውዓለህ መዔፉጊህ ፍቃድ አካህ ታዽጊን ሙሉእ ኢዽጋ ታሎና ናኑ ጻሎት አባናምከ መዔፉጎ ዻዒማናም ማሓብኒኖ፡፡ 10. ታሃም ተከምኮ ማዳሪ ፍቃዳህ ማራናም ኡማን ጉዳህ ማዳራ ኒያቲሳ፣ መዔ ሥራሒህ ፊረ ሲናድ ገይምቶከ መዔፉጎ ተዸግኒህ ታቦና ዽዒታን። 11. ታማም ባሊህ ኡማን ጉዳህ ትዕግሥቲህ ታጽናዖና ጋዳህ ይክብረ ካ ኃይላኮ ሲራየ ገይቶና ዽዒታን። 12. ለል ኢፊ ማንግሥቲህ አዳል ቁዱሳንሊህ ሪስተ ሓድልቶና ሲን ዽዒሲሰ መዔፉጎ አባ ኒያታህ አይምስግነ ሊቲን፡፡ 13. አይሚህ ኡሱክ ዲተ ኃይላኮ ይድኅነ ኢምክሒን ባዽህ ማንግሥቲል ሳይኖ ናበ፡፡     14. ካያህ ኒድኅነህ ኒኒ ኃጢአታህ ኅድጎት ገይነ፡፡

ክርስቶስ አይምቶ ኪናምከ ካ ሢራሕ

   15. ክርስቶስ አምቡሉወ ዋ መዔፉጊህ ሓቂ ምሳለ ኪኒ፣ ኡሱክ ፍጥረት ኡምብህያህ ሪይስ ኪኒ፡፡ 16. አይሚህ ዓራንከ ባዾል ታነም፣ ታምቡሉወምከ አምቡሉወ ዋይታም፣ ዓራንቲ ኃይላከ ገዛአት፣ አሞይቲትከ ሢልጣናት አሞይቲት ሙሉኡድ ትምፍጥረም ካያህ ኪኒ፡፡ መዔፉጊ ኡማን ጉዳይ ይፍጢረም ካያከ ካያህ ኪኒ። 17. ኡሱክ ኡማን ጉዳይህ ባሶል ይነ፣ ኡማን ጉዳይ ይምዽብዸህ ሶለም ካያህ ኪኒ፡፡ 18. ኡሱክ ካ አካል የከ ሞሶዓሪህ አሞይታ ኪኒ፣ ኡማን ጉዳይህ ኤዸዾይታ ያኮ፥ ራቢ ኡገታቶህ ለ ባሶቲያከ ኤዸዾይታቲያ ኪኒ፡፡ 19. ታሃም ተከም መለኮት ሚጊ ካባዻድ ያናዎ መዔፉጊ አባህ ፍቃድ የከጉል ኪኒ፡፡ 20. ካኡላህ ዓራናል ታናም ያኮይ ባዾል ታነ ጉዳአት ኡምቢህ ኢሰሊህ ዋገሪሰ፣ ማስቃል አሞል ሐዸ ቢሎህ  ለ ሳላም አበ።

   21. ቶኮሚኒ መዔፉጎኮ ምርሕተኒህ ማራክ ትኒን፣ ሲኒ ሓሳባህከ ሲኒ ኡማ ሢራሒህ ምክንያታል ካናዓብቶልት ክይክ ትኒን። 22. ካዶ ለ ባዽ ኃዶይታህ ራበርከህ ምክንያታል መዔፉጊ ኢሰሊህ ሲን ዋጋሪሰ፣ አማይጉል ቁዱሳንከ ጺሪያም፣ ናቃፋ ሂናም አበህ ኢሲ ነፊል ካብ ሲን ኢሰ፡፡ 23. ታሃም ተከምህ መሠረቲህ ትብዽኒህከ ተምደለደልኒህ ካበሠራታ ቃላህ ገይምተ ታስፋህ አምሄወከካህ ኢምነቲህ ሲክ ተኒህ ማርተንምኮ ጥራሕ ኪኒ፣ ታይ በሠራታ ቃል አቲን ቶብንምከ ዓለም አሞል ታነ ሒያዋህ ሙሉኡድ ትምእውዘም ኪኒ፣ አኑ ጳውሎስ ለ አገልጋሊ ኤከም ታይ በሠራታ ቃላህ ኪዮ፡፡

ጳውሎስ ሐዋርያ ኪናሚህ  አገልገሎት

   24. ካዶ ሲን ዳዓባል ጋራ መክራህ ኒያታ፣ ካ አካል የከ ሞሶዓሪህ ባርካታል ክርስቶስ መከራኮ ራዕተም ኢኒ ኃዶይታህ ኤይመለኤህ ፍጹም አበ ሊዮ። 25. መዔፉጊህ በሠራታ ቃልኮ ኢንኪም አክ ራዕሰካህ ሙሉኡድ ሲን አይባሣሮ ፉጎኮ ዮህ ዮምሖወ ኃላፍነቲህ ሪሚድህ ሞሶዓሪ አገልጋሊ ኤከህ አኒዮ። 26. ታይ አይብሢረ በሠራታ ቃል ትላየ ዳባናት ምናዳም ዻይሎኮ ሱዑተህ ሱገ ቲያከ ካዶ ለ መዔፉጊ ኢሲ ቁዱሳን ይይቡሉወ ምሥጢር ኪኒ። 27. መዔፉጊህ ዓቃንታ /ዕቅድ/ ታይ ምሥጢሪህ ክበረከ ሀብተህ አረማውያን ፋናድ አይዻ ናባቲያ ኪናም ኢሲ ቁዱሳን ያይባላዎ ኪኒ፡፡ ምሥጢር ለ ታሰፋህ ኢላላና ክብሪ ኤድገይማ ክርስቶስ ሲን አዳድ ኪኒጉል ኪኒ፡፡ 28. ብልሓታህ ኡማን አክናን ሒያው አምክሪክ አይምሂሪክ ስነስነህ ክርስቶሱህ ሙሉእ ሒያው ታኮና አባክ ክርስቶስ አይስዽግክ ናነ። 29. መዔፉጊ ኢሲ ናባ ኃይላህ ያዳድ ሢራሓጉል ታይ ኃይሊህ ኡላህ ኃይላህ አንዱፉልክ  ኃዋለ  ሊዮ፡

         ማዕራፋ 2   

   1. ሲን ዳዓባል ሎዶቅያል ታነ ሒያዋህ አማም ባሊህ ይነፍ ኡካ ቱብለህ አዽገዋይታ ሒያዋህ ኡምቢህ አይዻ ናባ ዱፍላ ሊዮም ያዻጎና ኪሕኒዮ፡፡ 2. አንዱፉለም ሲን አፍዓዶ ተምጸነነዔህከ ካሓኖህ ተምዸበዸበህ ዓዶ /ፉጹም/ አስታውዓለ ገይሲሳ ሙሉእ አም አማማኒህ ሀብተ ታስካሃሎና መዔፉጊህ ምሥጢር የከ ክርስቶስ ታዻጎና ኪኒ። 3.ጠበብከ ኢዽጋ ሀብቲ ሱዑተህ ገይማም ክርስቶሱድ ኪኒ። 4. ታሃም ሲናካናም ትይ ስምግሊና ቃላህ ሲን ያይተለለምኮ ኤዸሔህ ኪዮ። 5. አንኪጉል ኡካ ኃዶይታህ ሲንኮ ምሪሕ ኤሚህ መንፈሲህ ሲንሊህ ኪዮ፣ መዔ ሥነ ሠርዓታህ ማርተን ኢርከህከ ክርስቶስ አሞል ሊቲን ጺኒዕ  ኢምነት ኡብለርከህ ኒያታ፡፡

ክርስቶስሊህ ገይማ የመለኤ ሂወት

     6. ማደሪ ኢየሱስ ክርስቶስ አካህ ጋራይተኒሚህ ዓይነቲህ ካሊህ ኢንከቶ ቲካይ ማራ፡፡ 7. ካያህ ትምስርትንህከ ምህርኒህ ኒህከ ትምንድቅኒህ ሪሚዲህ ሲኒ ኢምነቲህ ሲክ ኤያይ ማራ፣ ማንጎም ኢይምስጊና፡፡

   8. ክርስቶስ አሞል ይምሥርተ ቲያ አከካህ፣ ሒያው ጋባህከ ዓለማው ሠርዓቲህ አሞል ይምሥርተ፣ ካንቶከ አይታላላህ ተመገ ፍልስፍናህ ኢንከቲ ሲን ያጽምደክ ሰሊታ፡፡ 9. አይሚህ ሞሎኮት ፉጹም ምጊ አካላድ ይምቡሉወህ ማራም ክርስቶሱህ ኪኒ፡ 10.  አቲን  ለ ተመጊኒም አሞይታከ ሢለጣን አሞ የከ ካኮ ኪቲን፡፡

   11.ካሊህ ለ ኢንከቶ ተክኒህ ትምግርዚን፣ ታይ ለ ትምግሪዚኒም ኃጢአተና ተከ  ኃዶይታ ታስጋዓዾና ክርስቶሱህ ተከም ኪኒ ኢካህ ሒያው ጋባህ ሢራሓህ የከ አምጋራዘህ ማኪ፡፡ 12. አይሚህ ትምጥምቂን ዋክተ ክርስቶሱህ ትምጥምቂን፣ ካሊህ ራባኮ ኡጉተን፣ ራባኮ ኡጉተኒም ክርስቶስ ራባኮ ኡጉሠ መዔፉጊህ ኃይላህ ተምኤመመኒኒህ ኪኒ፡፡ 13. ሲኒ ኃጢአታህከ ኃጢአተይና ኪን ሲኒ ኃዶይታህ አምግሪዘ ዋይተን ኢርከህ ምክንያታል ራቦንቲት ክይይክ ቲኒን፣ ካዶ ለ መዔፉጊ ክርስቶስሊህ ሂወቲህ ታነም ሲን አበ፣ ኒኃጢአታህ ለ ኡምቢህ ሕደጎት ኖህ አበ፡፡ 14. ናክሲሲከ ናምቀወሚክ ይነ ዒዳ ጹሑፍ ይድምሲሰ፣ ማስቃል አሞክ ኖህ ይምስንኪረህ ኖኮ ቶህ ዒደ፡፡ 15. አኅሉቅከ ሢልጣን አሞይትትክ ኢሲ ማስቃላህ ሱበህ ተን ኪቲያ አክ ይንሑወሚህ ላካል ተመረከም የክኒህ ኢፋህ /ግልጸህ/ ያምባላዎና ተን አበ፡፡

  16. አማይጉል በቶህ ያኮይ ሙዑቡህ፣ ባዖሉህ ያኮይ አልሲ ሳይማህ፣  ሳንባት አስካባሪህ ምክኒያታል ኢንከቲ ሲናል አፍሪደዋዎይ። 17.ታሃሞም ኡምቢህ ባሶቱላል ያሚተ ጉዳያቲህ ጽላል ባሊህ ኪኖን፣ ሓቂ አካል ለ ክርስቶስ ኪኒ። 18. አጉል ኪን ትሕትናህከ አማሊክቲ ለ አይምልክክ ያምኪሔ አኪናን ሒያውቲ፣ ሊሞ ማለህ ሲን ራዕሳክ ሰሊታ፣ ታይ ዓይነቲህ ሒያውቲ ያብለ ሙቡሉህ አመበጸዒክ ካንቶ ኪን ኃዶይታ ማብሎህ ያምክሔ። 19. ታይ ዓይነቲህ ሒያውቲ፣ አሞ ኪን ክርስቶስሊህ ኢንኪ ዓይነቲህ ቲታ ገሲሳም ማሎን፣ አካል ሙሉእክ ትታገይሲሳ ዚማትሊህ ተይዸበዸበህ ታምግበቲያ ዸግኃ ኪኒ፡፡ ፉጊ አካላህ ሙሉእ ናብነ ያሓየም ታይ ዓይነቲህ  ኪኒ፡፡

ሂወቲህ ያኮይ ራባህ ክርስቶስሊህ ያኪንም

    20. ክርስቶስሊህ ራብተኒህ ታይ ዓለምህ ጉዳይኮ ባድሲምተም ተክኒምኮ፣ ኢቦል ተንኮ ባዽስመ ዋይተንሚህ ዓይነት ተክኒህ አይሚህ ታህ ኢግዲን ቲኢዛዛታህ አምግዚህክ ታኒን፡፡ 21.ቲኢዛዛት ለ"ማ'ባዺን፣ አክ ማ'ዻዓሚን፣ ማ'ዻጊን"ታም ኪኖን። 22 ታሃም ኡምቢህ ሒያው ጋባህ ሥራሒህ ትኢዛዝከ ትምሂርት አሞል ትምሥረተም  ኪኖንጉል፣ ሥራሕ አሞል አሰንምኮ ላካል ያላዮና ትምውስነም ኪኖን፡፡ 23. ታይ ቲኢዛዛት ተን ፍቃዳህ ተከህ አምሉኮከ አጉል ኪን ትሕትናህ፣ አካል ብያኪህ አሞል ያቱኩሪንጉል ብልሓት ለሚህ ያምግድኒህ ያከ፣ ያኮይ ኢካህ ኃዶይታ ካሓኒህ አምቃጻጻርቲ ደፍራህ  ሊሞ ለም ማኪኖን፡፡ 

ማዕራፋ 3

ቅደስናህ ሂወቲህ ተምሖወ መምረሒ

   1.አማይጉል ክርስቶስሊህ ራባኮ ኡጉተኒምኮ፣ ክርስቶስ መዔፉጊህ ምድጋል ድፈህ ኤልያነርከኮ አሞል ዓራናል ያነ ጉዳይ ኃይላህ ዋጊያ፡፡ 2. ኡማንጉል አጋና ዓራናል ያነ ጉዳይ ኢሕሲባካ ባዾል ታነም ማሕሳቢና፡፡ 3. አይሚህ አቲን ራባህ ባዽስምተኒም ባሊህ ታይ ዓለምኮ ባዽስምተን፣ ሲን ሂወት ለ መዔፉጎሊህ ክርስቶስሊህ የለየ፡፡ 4. ሲን ሂወት የከ ክርስቶስ ያምቡሉወጉል አቲን ለ ካሊህ አምቡሉወ ሊቲን፣ ካክብረ ሓድሊታም አከልቲን፡፡

ዳዓይናከ ዑሱብ ሂወት

  5. አማይጉል ሲናድ ገይማ ባዾ ሂወቲህ ትምኒት ኡምቢህ ኢግዲፋ፣ ኢሲን ለ "ዙሙት፣ ሩክስት፣ ኃዶይታት ካሓኖ፣ ኡማ ሓሳብ፣ ጣዖት ያይምልክኒም፣ ታከ ሲሲዕቲ" ኪኖን።         6. ታይ ጉዳይህ ምክንያታል አምኢዚዘ ዋይታ ሒያውህ አሞል መዔፉጊህ ቁጡዓ ታሚ። 7. አቲን ሲነህ ታሃምኮ ባሶህ ታይ ጉዳይ አባክ ማራክ ቲኒን። 

    8. ካዶ ለ፣ ቁጡዓ፣ ናዓቦ፣ ሚጋዕ ዓይንሳናም፣ ታሃም ሙሉኡድ ሚሪሕ ኢሳ፣ ሖላሳ ዋኒ ሲን አፍኮ አውዔ ዋየቶይ። 9. ስነስነህ ዲራባህ ማዋንሲቲና፣ አይሚህ ዳዓይና ኪን ሒያውቶ ኢሲ ሥራሕሊህ ተየዒኒህ ዒደን። 10. ዑሱብ ሒያውቶ ለ ሀይሲተን፣ ታይ ዑሱብ ሰውነት ኡሱክ ሙሉእ ኢዽጋ ኩማድሶ ዒሎህ ይፍጥረ መዔፉጎ ኢሲ ቢሲህ ሚስለህ ኡማንጉሉህ ያምዓሳቦ አብታም ኪኒ። 11. ታይ አገባቢራህ ግሪካታከ አይሁዳ፣ ይምግርዘቲያከ አምግሪዘ ዋየቲያ፣ ሡልጡን ኪን አረማውከ አስልጥነ ዋየ አረማው፣ ናፃነት አለዋ ሒያውቶከ ናፃነት ለ ሒያውቲህ ፋናድ ባዽሲ ሚያነ፣ ክርስቶስ ኡማንቲህ ቲያ ኪኒ፣ ኡማንቲያህ ለ ኪኒ።  

  12. አማይጉል መዔፉጊህ ዶሮይቲትከ ቁዱሳናህ ታምክሔም ክትኒም ኢዻህ ርኅራኄ፣ ትሕቲና፣ ጋርሄ፣ ትዕግሥቲ ሀይሲታ። 13. ስነስነህ ትዕሥቲ አባ፣ ሲንኮ ኢንከቲ አከቲ አሞል ቂር ካይሳ ጉዳይ ይኔምኮ ብሒላ ቲታህ ኤያ፣ ክርስቶስ ሲናል ሓበም ባሊህ አቲን ለ ቲታል ሓባ። 14. ታሃም ኡምቢያህ አሞል ኡማኒም ለ ይዹወህ ፉጹም ኪን ኢንኪኖ ገይሲሳ ካሓኖ ሀይሲታ። 15. ኢንኪ አካል ክፍሊት ተክኒህ ደዕምምተኒም ታይ ሳላማህ ክትንጉል፣ ክርስቶስ ሳላም ስን አፍዓዶድ ያንጋሦይ፣ ሞሳ አብታም ቲካ። 16. ክርስቶስ ቃል ሙሉኡድ ሲን አፍዓዶድ ያንጋሦይ፣ ሲንኮ ኢንከቲ ዶባይቶ ብልሓት ኡምቢህ ያይማሃሮይ፣ ያምካሮይ፣ መዝሙር ምስጋናህ መንፈሳዊ ዘማህ ለ መዔፉጎ ሲኒ አፍዓዶኮ አይምስግኒክ ዘሚሳ። 17. ኢየሱስ አራሓህ መዔፉጎ አባ አይምስግኒክ ቃላህ ያኮይ ሢራሓህ አብታናም ኡምቢህ ማዳሪ ኢየሱስ ምጋዓህ አባ።

በተሰብ አዳድ ክርስቲያን ግደታ

   18. አጋቦ! ማዳሪ ኢየሱስም ክቲንም ኢዻህ ታምአማዛዞና ኤዳጉል ሲኒ ባዕሊህ ኢምኢዚዛ፡፡ 

      19.  ባዒሎ! ሲኒ አጋቦ ኢክኂና፣ ጸካናት ኤልማኪና። 

   20. ዻይሎ! ታሃም ማዳራ ኒያቲሳም ኪንጉል፣ ኡማን ዋክተ ሲኒ ዻልቶይቲህ ኢምኢዚዛ። 

   21. ዻልቶይቶ! ታስፋ ሓባናክ ሲኒ ዻይሎ ቁጡዓህ ማይማራሪና። 

  22. አገልግልቲ! ባዾል ሲኒ ማዶሩህ ኡማን ጉዳህ ኢምኢዚዛ፣ ታምኢዚዚኒም ሒያው ኒያቲሶናከ ታምባላዎና አከካህ ማዳሪ ኢየሱስህ ማይሲህከ አፍዓዶ ቅንዕናህ ያኮይ። 23. አብታናም ኡምቢህ ሒያዋህ ተኒህ አከካህ ማደሪ ኢየሱሱህ አብታናሚህ ዓይነቲህ ትግሃትከ ኒያታህ አባ፡፡ 24. ማደሪ ሪስቲ ሊሞ አበህ ሲናህ ያሔም ታዽጊን፣ ታስግልግልኒም ማደራ የከ ኢየሱስ ኪኒ፡፡ 25. ኡማም ሥራሓቲ ኢሲ ኡማ ሢራሓህ ቅጽዓት ጋራ፣  አይሚህ ፉጎድ አድሊዎ ማታነ፡፡

ማዕራፋ 4  

 1. ማዶሮ! አቲን ለ ዓራናል ማደራ ሊትኒም ተዸጊኒህ፣ አማይጉል ሲን ታስግልግለም   ቅንዒናህከ ዳልዋ ሂኒም ለሚህ ተን ኤመሔደራ።                                         

ምክረ

   2. መዔፉጎ ትግሃታህ አይምስግንክ አስቆሮጸካህ ጻሎት አባ። 3. መዔፉጊህ በሠራታ ቃሊህ ኢፈይ ኖህ ፋክቶከ ካምክንያታል አኑ ኡምዹወህ ኤድ ገይማ ክርሰቶስ ምሥጢር ናይባሣሮ ዺዒኖክ ኖያህ ለ ጻሎት ኖህ አባ። 4. አኑ ለ ዮህ ያምርዴኤም ባሊህ ኢፋህ  ዋንሲቶክ ጻሎት ዮህ አባ። 5. አኪናን አጋጣሚህ ዋከተ አምጥቅሚክ አምነ ዋይታ ሒያውሊህ ቢልሓታህ ማራ። 6. ኢስስ ሒያወቶህ ኤዳ መልስ ያሓይኒም ታዻጎና ኡማን ዋክተ ስን ዋኒ ልሰልስቲያከ ዻዓምመዔቲያ ታኮይ፡፡   

                                        ባክቶ ሳላምታ                                                          7. ቲኪቆስ ይ ዳዓባል ኡማን ጉዳይ ሲናክ ኢየለ፣ ኡሱክ ኢምክሒን ይሳዓል፣ ያምኢምነ አገልጋሊከ ዮሊህ ለ ማዳሪ ሢራሓህ ታሓባባሪ ኪኒ። 8. ካያ ሲና ዻጋህ አካህ ፉራ ምክንያት ኒዳዓባል ና'ኒና  /ኩነታት/ ሲናክ ዮዋከ ሲን አፍዓዶ ለ ያይጻናናዖ ኪኒ። 9. ካሊህ ለ ሲን ወገን የከህ ያምኢሚነ ቲያከ ይምክሒነ ሳዓል አናሲሞስ ሲኑላል አምተለ፣ ኢሲን ታይ ቦታል ያነ ጉዳይ ሙሉኡክ ሲን አይስዽገሎን። 10. ዮሊህ ይምዹወህ ይነ አርስጥሮስ ለ ሳላምታ ካብ ሲና ኢሳ፣ ሲኑላል ያሚተ ዋክተ ካጋራይቶና ሲን አስሔሰሰበም ባርናባሳክ አባ ሳዓሊህ ባዽ ማርቆስ ለ ሳላምታ ሲና ካብ ኢሳ። 11. ኢዮስጦስ አክያንቲ ኢያሱ ለ ሳላምታ ሲና ያስቅሪበ። መዔፉጊህ ማንግሥቲህ ዳዓባል ዮሊህ ኢንኮህ ሢራሕታ ሒያው ፋንድ አይሁድ ኪናም ታሃም ጥራሕ ኪኖን፣ ዮያ ለ የይጸነነዒን። 

   12. ሲን ወገን የከ፣ ኢየሱስ ክርስቶሲህ አገልጋሊ ኢፓፍራ ለ ሳላምታ ካብ ሲናህ ኢሳ። መንፈሳው ሂወቲህ ዓራክ ትጽንዒኒህ ሶልቶናከ መዔፉጊህ ሙሉእ ፍቃድ ታፋጻሞና ኡሱክ ኡማን ዋክተ ሲን ዳዓባል ጻሎቱህ ያንዱፉለ። 13. ሲን ዳዓባል፣ ሎዶቂያልከ ሂራፖሊስ ካቶሙል ታነ ሒያውህ ዳዓባል ጋዳህ ኃዋላም አኑ ኢነህ አምስክርክ አኒዮ። 14. ኢምኪሕ ሒን ሐኪም ሉቃስከ ዴማስ ለ ሳላምታ ሲናህ ካብ ኢሳን። 

    15. ሎዶቅያል ታነ ሳዖሉከ፣ ለንምፉናከ ተዓረድ ለ ታነ ሞሶሰዓረህ ሳላምታ ካብ ኖህ ኢሳ። 16. ታይ መልእክት አቲን ትይንብብኒምኮ ላካል ሎዶቅያ ሒያው ሎን ሞሶዓረል ታምናባቦ አባ፣ አቲን ለ ሎዶቅያኮ ሲናህ ፋርምተ መልእክት ኢንብባ። 17. አርኪፖሱክ ለ"ማዳሪ አገልጊሎቱህ ኮህ ዮምሖወ ሥራሕ ጥንቃቀህ ታፋጻሞ" ኪቶ  አክ ኖሄያ፡፡ 18. ታይ ሳላምታ ኢኒ ጋባህ ኢጽሕፈቲይ ዮያ ጳውሎስ ኪዮ፣ ይማዹዋ ኢዝኪራ፡፡ ጸጋ ሲንሊህ ታኮይ።