ይሁዳ መልእክት

ሳይማ   [ዸ ዹ ዺ ዻ ዼ ዽ ዾ]

  ይሁዳ መልእክት ትምጺሒፈም፣ አማናንቲህ አከካህ አማንቲህ ይምግድኒህ ዲራብቲ ትምሂርት ታዚርግሔ ሒያውኮ ክርስቲያን ያይጣንቃቆ ኪኒ፣ ማባዾህ /ትሕዝቶህ/ ማላሚ ጰጥሮሱህ ኢግዳማህ ታይ ኡዹዽ መልእከቲህ ጻሐፊ ጋባዕሲሰ ዋ ዓይነቲህ ቁዱሳናህ ኢንክጉል ዮምሖወ ኢምነቲህ ኃይላህ ያንዳፋሎና አንባብቲ ጋዳህ ያስሔሰሰበ፡፡

  --------------------------------------------------------------------

ማዕራፋ 1

  1. ኢየሱስ ክርስቶሲህ አገልጋሊከ ያዕቆብ ሳዓል የከ ይሁዳህ፣ ደዕምምተሚክ፣ መዔፉጎ አባህ ትምክሒነሚክ፣ ኢየሱስ ክርስቶሱህ ዻዉዹምተሚክ ኡምቢህ፣ 2. መሕረትከ ሳላም ካሓኒ ለ ሲናህ ያማንጎይ። 

ዲራብት መምህራን

  3. ይካሓንቶሊቶ! ኡማን ኖዪህ ድኅነቲህ ዳዓባል ሲናል አጽሐፎ ጋዳህ ጉረህ ኢነ፣ ካዶሊህ ጋባዕሲሰ ዋይታ አገባቢራህ ቁዱሳናህ ኢንኪ ዋክተ አካህ ዮምሖወ ኢምነቲህ ኃይላህ ያንዳፋሎና አምካሮ ሲናል አጽሐፎ ጊደ ዮክ የከ፡፡ 4. ኤልያምፋራዶ ኪናም ማንጎ ዋክተኮ በሶል ኤል ይምጽሒፈ ውልውል ሒያው ሙሉሔኒህ ሲን ኡላል ሳየኒህ ያኒን፣ ኢሲን ኒ አምላኪህ ጸጋ ኢሲሰኒህ ያይሊውጠ ኃጢአት ለም ኪኖን፡፡ ኡሱክ ዲቦህ ኒ ገዛኢከ ማደራ የከ  ኢየሱስ ክርስቶስ ለ ያክሒዲን፡፡

  5 .ኢንኪጉል ኡካ ታሃም ኡምቢህ ቶኮሚኒህ ታዽጊኒህ ተኪኒሚህ መዔፉጊ ኢሲ ህዝበ ግብጺ ባዾኮ የየዔህ ይድኅነምከ አምነዋይታም ላካል የይለየም ሲን ሑንሱሶ ኪሒኒዮ። 6. ታማም ባሊህ ሲኒ ማዓሪግ ዻዉዸ ሒነን ኢርከህ ሲፍራ ሓብተ መላኢክት ኢዝኪራ፣ ኢሲን መዔፉጊ ኢሲ ናባ ፍርዲህ ለለዕ ፋናህ ኡማንጉሊ ማዹዋህ፣ ጡንቁሪ ኪን ዲተህ አዳድ ዲፈሰህ ሱገ፡፡ 7. ታይ ዓይነቲህ ሶዶምከ ጎሞራ ባሮሩል ታነ ካቶሙል ዙሙት ኃጢአት ይፍጽሚን፣ አካህ ይምፍጢሪን ሠርዓት ይይብድሊኒህ ኃዶይታ ግብረህ ቲታ ገን፡፡ አማይጉል ኢሲን ኡማንጉሊት ጊራህ ታምቅጽዔሚህ አቢነት የኪን። 8. ታማም ባሊህ ታይ ሒያው ሶኖህ አምርሒክ ሲኒ ኃዶይታ ያይረከሲን፣ መዔፉጊህ ሢልጣን ለ ዻይታን፣ ዓራናል ክበረ ለም ያንቂፊን፡፡ 9. ማላይካት አሞይቲ ሚካኤል ኡካ ሙሴት አስካረኒህ ዳዓባል ዲያብሎስሊህ ኃይላህ የምከረከረ ዋክተ"መዔፉጊ ኩያጋሳጾይ!" የዸሔ'ካህ ዋቶ ቃል ዋንስተርከህ ኤልማፍራዲና፡፡ 10. ታይ ሒያው ለ ያስታውዓሎና ታናን ጉዳህ ኡምቢህ ዋቲማን፣ አእምሮ ሂን ኢንሲሳ ኢሲ ተፈጥሮ ሲምዒቲህ ታዽገ ጉዳይ ይኔምኮ ኡካ ካያ ኪህ ያለይን፡፡ 11. ቃየል አራሓህ የደይንጉል፣ ማላህ የኒህ በልዓም ገጋድ ራደን ዋክተ፣ ቆራሕ ተን የምቀወመም የዸጊኒህ የለዪን ኢርክህ ሲነህ ኢየ ዋዎናይ! 12. ታይ ሒያው ሖላማለህ ቲታህ ኦሮባክ ካሓኒ ግብዛህ አሞል ገይመንጉል ዒንቂፋት አክ የከ፣ ኢሲን ያሕስቢኒም ሲነህ ጥራሕ ኪኒ፣ ሓሓይታህ ዱፉማ፣ ሮብ ሂን ዳሩር ኪኖን፡፡ ፊረ ዋክተ ፊረ ኡካ ኤድ ገይመዋይታ፣ ሪምድኮ ቡኩሱምተህከ ላማ ዋክተ ራብተ ሓዻ ኪኖ። 13. ሖላሳ ሲኒ ተግባራህ ዓፎ ዓፍ ኢሳን፣ ይቁጡዔ ባሕሪ ባሊህ ኪኖን፣ ጡንቁሪ ኪን ዲተ  ኡማንጉሉህ ተን ኢላልታ፣ ከርተት ያ ሑቱክ ኪኖን፡፡  

   14. አዳምኮ ኤዺሰህ ማልሒና ዋላዶ የከ ሔኖክ ታይ ሒያውህ ዳዓባል ታህ የህ ትንብት ዋንሲተ፣ ሀይከ ማደሪ ማንጎ ሲሕ ቁዱሳን ኢያሊህ አሚተ ለ፡፡ 15. ያሚተም ሒያው ኡምቢያህ አሞል ያፍራዶ ዓመፀ ለምከ ኃጢአት ለም ኡምቢህ ሲኒ ዓማፂህ ሢራሓህ ሙሉኡክ ፉጊ አሞል ዋንስተን ዋቶ ቃላህ ኡማንቲይ ያምዋቃሶ ኪኒ፡፡ 16. ታይ ሒያው ኡማን ዋክተ ዑሙም ታምከ ኢንኪ ጉዳህ ኒያተ ዋይታም ኪኖን፣ ሲኒ ኡማ ኡምነ ታክትለም ኪኖን፣ ሲኒ አፊህ ትዕቢት ቃላህ ተመገም ኪኖን፣ ሲኒ ዸግኃህ ጥቅመ ዋጊያክ ሒያውሊህ ታድውሰም  ኪኖን፡፡

ሰልስናንከ  ፋዎ

   17 አቲን ለ ይካሓንቶሊቶ! ኒማዳራ ኢየሱስ ክርስቶስህ ሐዋሪያት ታሃምኮ ባሶህ ዋንስተን ቃል ኢዚክራ፡፡ 18. ኢሲን"ባክቶ ዳባን ሲናሞህ ኡማ ቲምኒት አክትሊክ ታስገገም አምተለ"ሲናክ የኒህ ይኒን፡፡ 19. ኢሲን ሒያው ባዺሳም፣ ኃዶይታ ጉርታም ታክትለም፣ መንፈስ ቁዱስ ሂን ሒያው ኪኖን። 20. አቲን ለ ይካሓንቶሊቶ! ኡማኒሚህ አሞል ይምቅድሰ ሲኒ ኢምነቲህ ሲነ ታህናፆና ኢትጊሃ፡፡ መንፈስ ቁዱስ ሚጋዓህ ኃይላህ ጻሎት አባ፡፡ 21. ኒማዳሪ ኢየሱስ ክርስቶስ ለ ኢሲ መሕረቲህ ኡማንጉሊ ሂወት ሲናህ ያሓዎ ኢላላክ ሲናሞህ መዔፉጊህ ካሓኒህ አዳል ኢላላ፡፡ 22. ታምጠረጠረ ሒያዋህ ናኅሩር አካህ አባ፤ 23. ጋሮጋሮ ጊራኮ ኤየዓይ ኢይድኅና፣ አኪማራህ ማይሲህ አካህ ኢርኅርኃ፣ ያኮይ ኢካህ ኃጢአታህ ትርኪሰ ተን ሰውነት ዻግተ ሳረና ኡካ ራዔካ ዒዳ። 

      ምስጋና ጻሎት         

   24. ራዳናምኮ ሲን አቦከ ናቃፋ ማለህ ኒያታህ ኢሲ ክብሪህ ነፊል ካብ ሲን ኢሶ ዺዓቲ፣ 25. ኡሱክ ጢራህ ኒ ያይዲኂነ ቲያ የከ አምላክ፣ ኒማደራ ኢየሱስ ክርስቶሲህ ኡላህ ባሶኮ ኤዸዺሰህ፣ ካዶሊህ፣ ኡማንጉሉህ ለ ኪብረከ ግርማህ፣ ኃይላከ ሢልጣን ለ ያኮይ! አመን፡፡