ያዕቆብ መልእክትመለክት

    ያዕቆብ መልእክት

ሳይማ  

ታይ ያዕቆብ መልአክት ለለዕቲ ናብራህ መምረሒ ታከ ሓሳባት ትሕዚለቲያ ኪኒ፤ ትምጽሒፈም "ዓለምል ሙሉኡድ ይመብቲነ ፉጊ ህዝበህ ኪኒ፤ "ጻሐፊ ቢልሓት ተግባራል አካህ አስስና ገዾከ  ክርስቲያን ጋራይሶከ አገባቢራህ መምረሒ ያከ ጉዳያት ያምቡሉወካህ ዓዶ ዋኒህ ካብ ኢሳ፣ ድኪነትከ ሀብት ዳዓባል፣ ፋታና ዳዓባል፣ መዔ ኃሊህ ዳዓባል፣ ቅንአት ዳዓባል፣ እምነትከ መዔ ሢራሕህ ዳዓባል፣ አራብ መዔነከ ኡምነህ ዳዓባል፣ ቢልሓቲህ ዳዓባል፣ ስነስነህ ያምነዔብኒሚህ ዳዓባል፣ ትዕብትከ ትሕትናህ ዳዓባል፣ አኪ ማራል ያፍርድኒሚህ ዳዓባል፣ ያምክሒኒሚህ ዳዓባል ወይም ጉራ ዳዓባል፣ ትዕግሥቲከ ጻሎቱህ ክርስቲያን ያሎና አካህ ኤዳ አምባላይህ ዝርዝሪህ ትምጽሒፈ፡፡ መልእከት ክርስቲና ሂወቲህ እምነት ተግባራህ ያምቱርጉመ ዓይነቲህ ይይፊዲነህ፣ ያይቡሉወ፡፡__________________________                    

ማአዕራፋ 1

1. ዓለምል ሙሉኡድ ትምብቲነ ላማንከ ታማን ነገድያህ፣ መዔፉጎከ ኒማደራ ኢየሱስ ክርስቶስህ አገልጋሊ የከ ያዕቆብኮ ፋርምተ መልአክቲህ፣ ሳላምታ ሲናህ ያኮይ።                                      ትዕግሥቲ፣ ኢምነት፣ /ጠበብ/ ብልሓት

     2. ይሳዖሎ! ኢሲሲ ፈተና ሲን ማዳጉል ጋዳህ ኒያታ፡፡ 3. አይሚህ ሲን ኢሚነት ያምፊትነጉል ትዕግሥቲህ ሲክ ኢየሊቲን፡፡ 4. ትዕግሥቲህ ሲክተኒምኮ፣ ኢንኪም ሲናክ አግዱለካህ ፉጹማንከ ሙሉእ ታኮና ሲን ታይብቅዔቲያ ታኮይ፡፡ 5. ሲን ፋንኮ ብልሓት አክ ዩግዱለ ሒያውቲ ይኔምኮ ፉጎ ዻዒሞይ፣ መዔፉጊ አካህ ያሓየ፣ አይሚህ ኡሱክ ኢንኪም ካ ካልተካህ ኡማንቲያህ ሒንዳህ ያሓየ ሒንዳተን አምላክ ኪኒ፡፡ 6. ያኮይ ኢካህ ሒያውቲ ኢንኪሚህ አምጠረጠረካህ ኢስ ኢምነቲህ ዻዒሞይ፣ ያምጠረጠረ ሒያውቲ ሓሓይታህ ዱፉማክ ያመነወፀ ባሕሪ ማእበሊህ ኢጊዳ፡፡ 7. ታይ ዓይነቲህ ሒያውቲ መዔፉጎኮ ኢንኪ ጉዳይ ማገያም አካለዋዎይ፡፡ 8. አይሚህ ላማ ሓሳብ ለጉልከ  አራሓል ያምጠረጠረጉል ኪኒ፡፡ 

ድካ ኪን ሒያውቶከ ሀብታም ኪን ሒያውቲህ ኒያት

 9. ናብራህ ላት የቲያ የከ ሳዓል መዔፉጊ ናው ካይሳም ኢዻህ ኒያቶይ!  10. ናብራህ ናው የዽሔ ሳዓል መዔፉጊ ናብራህ ላት ካይኢሰሚህ ኒያቶይ! አይሚህ ሒያው ሀብቲ ባራኪ ዓይሶህ ዒምቦባ ባሊህ ኡርጉፉማ፡፡ 11. አይሮይታ ኢሲ ላዕናሊህ ታውዔጉል ዓይሶ ካፍሳ፣ ዒምቦባ ኡርጉፋምታ፣ ዕዽ ያለየ፣ ታማም ባሊህ ሀብታም ኪን ሒያውቲ ኢሲ ሢራሕ ያይለየጉል ያለየ፡፡

ሒያው ማዳ ፋታ

    12. ፋታናል ትዕግሥት አበህ ሲክ የ ሒያውት የምበረከቲያ ኪኒ፣ አይሚህ መዔፉጊ ኢሲ ቃል ኪዳኒህ መሠረቲህ ኢሲ ካኃንቶልቲህ ያሓየ ሂወት አክልል ጋራ። 13. ሒያውቲ ያምፊትነ ዋክተ"ፉጊ ይይፍቲነ"ኢየ ዋዎይ፣ አይሚህ መዔፉጊ ኡማ ጉዳህ ሚያፊቲነ፣ ኤረ ኡሱክ ኢንከቶ ሚያፊ ቲነ፡፡ 14. ያከካህ ኢሲሲ ሒያውቲ ያምፊቲነም ኢሳሞህ ካሓኖህ ሂርግማጉልከ ያምተለለጉል ኪኒ፡፡ 15. ታሃምኮ ላካል ትምኒት ሶኒታህ ኃጢአት ዻልልታ፣ ያነበጉል ራባ ዻላ። 16. ኢምክሒን ይሳዖሎ! ማምታላሊና! 17. መዔ መተሖዎከ ፉጹም ኪን በረከት ኡምቢህ መዔፉጎኮ ኪኒ፣ ታሃም ለ ታምተም ጽላል ባሊህ አምፋካካን ያኮይ አምላዋዋጥ ኤዳኒየዋ ኢፊህ ኡምብሂያህ አባ ያከ መዔፉጎኮ ኪኒ፡፡ 18. መዔፉጊ ትምፍጢረም ኡምቢህ ኢያህ ኤዸዾይታ ናኮ ኢሰህ ጉረህ ሓቂ ቃላህ ኒዻላ፡፡ 

ዮብኒም ሥራሓድ አሲሳናም

  19. ኢምክሒን ይሳዖሎ! ታሃም ማብያይስቲና፣ ሒያው ኡምቢህ ሞቦህ አፊታም፣ ዋንሲቶናከ ያቃጣዖና አፊተዋይታም ያኮናይ፡፡ 20. አይሚህ ሒያው ቁጡዓ፣ መዔፉጊህ ጽድቀ ሒያው ሂወቲህ አዳል ዓዶቲያ ያኮ ማብታ። 21. አማይጉል ሩክሰትከ ኡምነ ማንጋ ኡምቢህ ሚሪሕ ኢሳ፣ መዔፉጊ ሲን አፍዓዶድ ይትክለህከ ሲን ናብሰ ያይዳኃኖ ዺዓ ቃላህ ትሕቲናህ ጋራ።  22. ካ ቃል ሥራሕ አሞል አሲሳም ቲካ ኢካህ ሲነ አይተለልክ ታበም ዲቦህ ማኪና፡፡ 23. ካ ቃል ዮበህ ሥራሕ አሞል አሲሰዋ ሒያውቲ፣ ኢሲ ተፈጥሮህ ነፍ ማራፃናል ያብለ ሒያውቶ ባሊህ ኪኒ። 24. አይሚህ ታይ ሒያውቲ ኢሲ ነፍ ማራፃናል ዩብለምኮ ሣራህ ያዴ፣ አይናህ ኪይይ ይነም አማይጉልካህ ብያይስታ፡፡ 25. ያከካህ ናፃ ያየዔ ሙሉእ ሕገ ዩብለህ ካያህ ያጽንዔቲ፣ ካያ ለ ዮበህ ብያሲቶ አከካህ ሥራሕ አሞል አሲሳ ሒያውቲ ኢሲ ሢራሓህ የምበረከቲያ ኪኒ።  26. ኢሲ አራብ አምቆጾጾረካህ ፉጎ አይምለከ ያ ሒያውቲ ኢሰ ያይተለለ፣ ካሃይማኖት ካንቶ ኪኒ፡፡ 27. መዔፉጊ አባ ነፊል ናውረ ሂን ጺሪይ ሃይማኖት"አባከ ኢና አክ ራበን ኢሮ፥ ታማም ባሊህ ባዒል አካራብተ ሳዮ ተን ፀገሚድ ጎሮኒሳናም፣ ሲነ ለ ዓለም  ሩክሰትኮ ዻዉዻናም ኪኒ፡፡ 

ማዕራፋ 2

ድካ ዻይታናም መዳ

    1. ይሳዖሎ! ክብረህ ማዳራ ኢየሱስ ክርስቶስ ታሚነም ተኪኒህ፣ ቲይ ቲያኮ ያይሰ ያናማህ ሒያው ፋናድ ዳልዋ ማቢና፡፡ 2. ምሳለህ ላማ ሒያወቲ ኤል ታከሄሊን ቦታል ያምቲን፣ ኤዸዾይታቲ ኢሲ ጋባድ ዋርቂ ላክዖ ሀየቲያከ ዓዻ መዔ ሣራ ሀይሲተ ሀብታም ኪኒ፣ ማላሚ ኢስኮክ ለ የምዔለ ሣራ ሀይሲተ ዲካ ኪኒ፡፡ 3. ሙዕሩግ ኪን ማዓሪግ ለ ሣራ ሀይሲተ ሒያውቶ አስክብሪክ ታል መዔ ቦታል ዲፈይ ታዸሕን፣ ዲካክ ለ አቱ ቶል ሶል፣ ወይ ዳባል ዲፈይ ታዽሒን፣ 4 .ይቦል ታይ ዓይነቲህ ሲን ፋናል ባዽሳ አብተኒህ አድሉዎ ፊርደ ታፍርዲኒም  ሲናህ ማታምቡሉወ? 5. ኢምክሒን ይሳዖሎ! ኦባየ፣ መዔፉጊ ኢምነቲህ ሀብታማት ታኮናከ ኢምኪሒናማህ ታስፋህ አካህ ዮሖወ ማንግሥት ያውራሶና ታይ ዓለምህ  ዲካታት ማዶሪና?  6. አቲን ለ ዲካታት ዻይታክ ታኒን፣ ሲን ታጹቁነምከ ፊርዲ ዓረህ ሲን ሂርግታም ሀብታማት ማኪ? 7. አካህ ደዒሚሚታን ኩቡር ምጋዓህ ሲናህ ዋትምታም ተና ማኪ?  8."ሒያው ኢሲ ዸግኃ ባሊህ ኢክሒን"የህ ይጽሒፈ ፉጊ ማንግሥትህ ሕገ ታፍጺምንጉል መዔም አባክ ታኒን፡፡ 9. ሒያው ፋናድ ባዽሳ አበታንጉል ለ ኃጢአት ሥራሓክ ታኒን፣ ሕገ ትላይተን ኢርከህ ታምውቅሲን፡፡ 10. ሒያውቲ ትኢዛዛትኮ ኢንከቶ ይፍረሰህ ራዕተም ኡምቢህ ይፍጺመሚህ ኡካ ኡምቢህ ይፍርሰምባሊህ ኤል ሎይማ፡፡ 11. አይሚህ" ማ አማንዛርን" ያዽሔ ማደሪ፣ ታማምባሊህ "ማግዳፍን" ያዽሔ፣ አምንዝረ ዋይተሚህ ኡካ ትግዲፈምኮ ሕገ ትይፍሪሰ፡፡ 12. ስን ዋኒል፣ ስን ሢራሓል  ናፃነቲህ ሕጊ ሲናል ያፍሪዶ ኪናም ታሕሳቦና ጉርሱሳም ያኮይ፡፡ 13. አይሚህ ፉጊ ፊርዲ መሕረት አበዋ ሒያዋቶህ መሕረት ማባ፣ ያኮይ ኢካህ መሕረት ፍርደክ ሱባ፡፡ 

ኢምነትከ ሥራሕ

    14. ይሳዖሎ! ሒያውቲ ኢምነት ሊዮ ያጉል፣ ያኮይ ኢካህ ካኢምነቲህ መዔ ሥራሕ አይምቡሉወ ዋየምኮ አይም ኦሳ? ኢምነት ካያይዳኃኖ ዺዓ? 15. ምሳለህ ሀይስታናምከ በታናም አለዋይታ ሳዖሉከ ሳዖልቲት ትኔምኮ፡፡ 16. አቲን ተን ናብራህ ተን ጉርሱሳ ጉዳይ አካህ አሓየካህ"ሳላማህ አዱዋ! ላዓ፣ ሓይታ"፣ አክታንጉል አይም ተን ያጥቂመ? 17. መዔ ሥራሕኮ ባዽሲመ ኢምነት ራቦንታ ኪኒ፡፡ 18. ያኮይ ኢካህ"አቱ ኢምነት ሊዮ ተህ ታምክሔጉል፣ አኑ ለ መዔ ሢራሕ ሊዮ"ያቲ ያኔጉል፣ ኩኢምነት ሢራሕኮ ባዽሳይ ይስቡሉወ፣ አኑ ለ ሢራሓህ ኢኒ ኢምነት ኩአቡሉወ ሊዮ አክ ኢየ ሊዮ፡፡ 19."አቱ ኢንኪ መዔፉጊ ያነ ተህ ታሚነ፣ ታሃም መዔም ኪኒ፣"ኢምነቲማ አጋኒኒቲ ለ ታሚነ፣ ማይሲህ ለ አዻዻን፡፡ 20. አቱ ሚዸማሊ! ሢራሕኮ ባዽሲመ ኢምነት ፊረ ማሊ ኪናም አብሊክ ማታነ? 21. ናባ አብራሃም ባዻ ይስሐቅ ኤልያስውኤርከህ አሞል ፉጎህ መስዋዕት ያኮ ካብ ኢሰ ዋክተ፣ ሢራሓህ ማጽዳቂና? 22. አማይጉል ኢምነት ሥራሕሊህ ኢንኮህ ይኔምከ ኢምነት ሥራሓህ ፉጹም ያከም አብሊክ ማታነ? 23. ማጸሐፋል ለ "አብራሃም ፉጎ የመነ፣ ኢምነት ጽድቀ የከህ አካህ ሎይመ"ያዽሔ ቃል ይምፊጺመ፣ ታይ ዓይነቲህ አብራሃም መዔ ፉጊህ ካኃንቶሊ ኢስመ፡፡ 24. አማይጉል ሒያውቲ ያጽድቀም ኢምነቲህ ጢራህ አከካህ ሢራሕሊህ ኪናም ለ ታብለ፡፡ 25. አመንዝራ ተከ ረዓብ እስራኤል ፋሮንቲት ኢሲ ድክድ ጋራይተ ዋክተከ አኪ አራሕ ያዳዎና አብተጉል ኢሲ ሢራሓህ ትጽድቀህ ማታነ? 26. ናፍሰኮ ባዽስምተ ኃዶይታ ራቦናታ ኪኒ፣ ታማም ባሊህ ሢራሕህኮ ባዽስመ ኢምነት ራቦንታ ኪኒ፡፡

ማዕራፋ  3

አራብ  ያምቆጾጾሪኒሚህ ዳዓባል

   1. ይሳዖሎ! ናኑ መምሂራን ኪናማክ ጊዲድ ፊርደ ጋራይናም ታዺጊንጉል ሲንኮ ማንጎ ማሪ መምሂራን አከ ዋዎናይ፡፡ 2. አይሚህ ናኑ ኡምቢክ ማንጎ ዋክተ ናምገገየ፣ ኢሲ ዋኒህ አምገገዋቲ፣ ኡሱክ ኢሲ ሰውነት ያባዾ ዺዓ ፉፁም ኪን ሒያውቶ ኪኒ፡፡ 3. ፋራስ ኖህ ያምአዛዞ አፋድ ሉጋም አክ ሃይናህ ፋራስ ለ ጉርነ ቦታል በይና /ናይምሪሔ/፡፡ 4. መርከብ ኢንኪጉል  ኡካ ናባቲያ ተክሚህ ናባ ሓሓይታህ ለ ዱፉምታ ቲያ ተከሚህ፣ መርክብ ሱፈር ዒንዳ ያምሪሔቲያህ ጉረ ቦታ ቱላል ያይፉኩነ፣ 5. ታማም ባሊህ አራብ ዒንዱ አካል ክፍለ የከሚህ ናባ ጉዳህ ያምኪሔ፣ ናባ ጋራብ ሓራራም ዒንዱ ጊራ ዒሳይቶህ ኪኒ፡፡ 6. አራብ ጊራ ባሊህ ኪኒ፣ አራብ ኒአካሊህ ክፍልህ ፋናድ ገይማ ኡማ ዓለም ኪኒ፣ ኒኃዶይታ ለ ኡምቢህ ያይረከሰ፣ ጋሃናም ጊራ ባሊህ ኒኃዶይታ ሙሉኡድ ያስቀጸለ፡፡ 7. ባዾት አራውትከ ኪምቢሮ፣ ባዾል ሂርጊምታምከ ባሕራድ ታምቀሰቀሰ ፉጡራት ሙሉኡድ ሒያዋህ ያጽራዎና ዽዕማ፣ ለል ያጽሪይን፡፡ 8. ያከካህ አራብ ያይጻራዎ ዺዓቲያህ ኢንከቲ ሚያነ፣ ያግዲፈ መርዝህ የመገቲያከ ዔረፍቲ ሂን ኡማ ጉዳይ ኪኒ፡፡ 9. ካያህ መዔፉጎ ናባ አካህ ናይምስጊነ፣ ታማም ባሊህ መዔፉጊህ አምሳላሀ ትምፍጢረ ሒያው አካህ አባርና፡፡ 10. ኢንኪ አፍኮ ምስጋናከ አባሮ ታውዔ፣ ይሳዖሎ! ታሃም ታኮ መዳ፡፡ 11. ኢንኪ ሚንጸኮ ዻዓመዔ ላየከ ሚሪሪ ላየ ታውዖ ዺዒምታ? 12. ይሳዖሎ! ባላሶ ሓዻ ኦላዕ ፊረ ፍሮይቶ ዽዒታ?  ወይ ለ ወይኒ ሓዻኮ  ባላሲ ፊረ ፍሮይቶ ዺዒታ? ታማም ባሊህ ሚሪሪ ላየኮ ዻዓመዔ ላየ አክ ገይምቶ ዺዒታ?

ዓራንከ ባዾ ጠበብ

   13. ሲን ፋንኮ ብልሓት ለቲያከ ያስትውዒለ ሒውቲ አቲያ ኪኒ? ብልሓታህከ  ትሕቲናህ ያፍጺመ ሥራሕ መዔ ናብራህ ያይባላዎይ፡፡ 14. ያኮይ ኢካህ ሚሪሪ ቅንአትከ ሲናሞህ ካሓኒ ሲን አፍዓዶድ ይኔምኮ ማታዕባቲና፣ ሓቂ አሞል ማድራቢ ቲና፡፡ 15. አይሚህ ታይ ዓይነቲህ ጠበብ ገይማም ዓለምኮ፣ ኃዶይታኮ፣ ሰጣንኮ፣ ኪኒ ኢካህ ፉጎኮ ማኪ፡፡ 16. ቅንአትከ ኩ ዸግሓህ ካሓኒ ኤድ ያነ ቦታድ፣ ሁውከትከ ኡማ ሢራሕ ኡማንጉል ማራን፡፡ 17. ያኮይ ኢካህ ፉጎኮ ገይማ ብልሓት ኤዸዾይታኮ ፂሪይቲያ ኪኒ፣ ካታየህ ሳላም ኪሕንቲያ፣ መዔቲያ፣ ታአዛዚ፣ መሕረት አባቲያ፣ መዔ ፊረህ የመገቲያ፣ ዳልዋከ ግብዚና ሂንቲያ ኪኒ፡፡ 18. ሳላም ኪሒን ሒያው ሳላም ያድሪኒህ ጽድቂ ፊረ ያስከሄሊን።

ማዕራፋ 4

ዓለም ኡምነ  አክኅነዋናም

   1. ሲን ፋናድ ታነ ዽባከ ናዓቢ አርከኮ ተመተም ኪኒ? ሲን ሰውነቲህ አዳድ ታምወገኤ ኃዶይታ ጉርታዮኮ ተመተም ማኪ? 2. ጉርታን ጉዳይ ገይቶና ታንታንጉል ሒያው ታግዲፊን፥ ጋዳህ ትቲምንይኒም ዋይታንጉል ታንገዒን፣ ቲታ ታግዲፊን፡፡ ጻሎት ማብታንጉል ጉረተን ጉዳይ ማገይታን። 3. ጻሎት አብተኒሚህ፣ ሲኒ ጻሎቲህ መልስ ገየዋይታናም፣ ዻዒምተን ጉዳይ ኃዶይታ ኒያቲህ አሞል አሲሶና ኡማ ሓሳባህ ጻሎት አብታንጉል ኪኒ፡፡ 4. አቲን ታክሒደሞ! ዓለም ኪኅንቲ መዔፉጊህ ናዓብቶሊ ኪናም ማታዽጊኒ? አማይጉል ዓለም ኪኅናም ኡምቢህ መዔፉጊህ ናዓብቶሊት ኪኒ፡፡ 5. ጋባዔህ ማጽሐፍ "መዔፉጊ ሲን አዳድ ይስሒዲረ መንፈሲህ ካያህ ጥራህ ናኮ ጋዳህ ያትሚኔ"የዽሔም ካንቶ ኪኒ? 6. ተከሚህ ማጽሐፍ "መዔፉጊ ትዕቢት ለም ያምቀወመ፣ ትሕቲና ለሚህ ለ ጸጋ ያሓየ" ያዸሔጉል፣ መዔፉጊ ያሓየ ጸጋ ኡማኒምኮ ናባ፡፡ 7. አማይጉል"መዔፉጎህ ኢምግዚአ፣ ዲያብሎስ ለ ኤምቀወማ፣ ሲንኮ ለ ኩዳ፡፡ 8. መዔፉጎል ካበያ፣ ኡሱክ ለ ሲናድ ካብያ፣ አቲን ኃጢአት ለሞ ሲኒ ጋቦብ ኢጽሪያ፣ አቲን ኮተጠራጠርቲ ሲኒ አፍዓዶ ዓዶሳ፡፡ 9. ኢምጽኒቃ፣ ኢኅዚና፣ ወዓ፣ ሲን አሳል ወዓል፣ ሲን ኒያት ኃዛናል ያምላዋጦይ፡፡ 10. ማዳሪ ነፊል ሲናሞ ላቲሳ፣ ኡሱክ ናው ሲን ኢሰ ለ።

ሒያው አሞል አፍረደዋናም

    11. ይሳዖሎ! ሲነሲነህ ቲታ ማሓምቲና፣ ሒያው ሓምታቲያ ያኮይ ሒያው አሞል ያፍሪደቲይ ሕገ ሓምታ፣ ሕጊ አሞል ሓምታቲ ያምፍሪደ፣ ሕጊ አሞል ትምፍሪደምኮ፣ ፈራዲ ኪቶካህ ሕገ ያፍጺመቲያ ማኪቶ፡፡ 12. ሕገ ያሓየቲያከ ያፍሪደቲ ኢንኪ መዔፉጎ ጥራህ ኪኒ፣ ያይዳኃኖ ያይላዮ ዺዓቲ ካያ ጥራህ ኪኒ፣ ኢሰኪ ሒያው አሞል ያፍርደቲያ አቱ አቲያ ኪቶ?

ሚኪሓ ዳዓባል ዮምሖወ  ሰሊስናን

    13. አቲን"ካፋ ያኮይ በራ አኪ ባዾል ነደሄ ታማል ኢንኪ ኢጊዳ ዲፈሊኖ፣ ኒኒ ጊደህ አክሲበ ሊኖ"ታዽሄሚክ ሰሊታ፡፡ 14. አይሚህ በራ ታከም ማታዽጊን፣ ሲን ሂወት አይምቶ ኪኒ? ኢንኪጉል ይምቡሉወህ ሣራህ ያለየ ዛብዔ ባሊህ ኪቲን ኡኮ፣ 15. ናቢህ አቲን ቶና ሲናህ ኤዳም ማለት መዔፉጊህ ፊቃድ የከምኮከ ኒኔምኮ ታሃም ታኮይ ቶሆም አበሊኖ ኪኒ፡፡ 16. አቲን ለ ታሃም ታናም ኢዻል ሲኒ ትዕቢቲህ ታምሒን፣ ታህ ኢጊድ  ሚኪሓ ሙሉኡድ  ኡማቲያ ኪኒ፡፡ 17. አማይጉል መዔ ጉዳይ አማባናም አዽጊህ አበዋ ሒያውቲ፣ አበዋየርከህ ኃጢአት አክ ያከ።

ማዕራፋ 5

ሀብታማታህ ተምሖወ ማስጠንቀቂያ

   1. ካዶ ለል አቲን ሀብተለሞ! አማ ኦኮይሲታ፣ ታይስቅቀ መከራ ሲናድ አሚተለጉል ደራክ ወዓ፡፡ 2. ሲን ሀብቲ ሙሉኡድ ይብስቢሰህ ዮምቦሎሶወ፣ ሲን ሣራ ብልዒ በተ፡፡ 3. ሲን ዋርቀከ ሲን ቡሩር ይምሪተ፣ ሚራት ማስኪር ሲናህ ያኮይ፣ ሲን ኃዶይታ ጊራ ባሊህ በታ፣ ታይ ባኪቶ ለለዒህ ማንጎ ሀብተ ተስከሄሊን፡፡ 4. ያኮይ ኢካህ ሲኒ ዓዱቱድ አዕይክ አስሰን ሠራሕተናህ ተን ሊሞ አካህ አክፊለ ዋይተኒርከህ፣ ሀይከ ተን ደሮህ ዋዕታ ታማበ፣ ዒዮህ ተሰከሄሊኒሚህ ዋዕታ ኃይላ ለ መዔፉጊ ዮበ፡፡ 5. ዱሎትከ ኒያታህ ማራክ ሲኒ ሰውነት ማርሓዳህ ዮምሶኖዶወ አዉር ባሊህ ቱስኩሉሲን፡፡ 6 ጻድቂል ዲራባህ ኤልትፍርዲን፣ ትግድፊን፣ ኡሱክ ለ ሲን ማምቃዋሚና፡

ማዳሪ ማላም ሙሙት ትዕግሥትህ ኢላላናም

7. ይሳዖሎ! አማይጉል ማደሪ ሙሙት ትዕግሥቲህ ኢላላ፣ ሓረስታይ ኤዸዾይታ ቲምከ ሣራ ሮብ ገያማም ፋናህ ትዕግሥቲ አባክ መዔ ባዾል ፍረ ኢላላ፡፡ 8. አቲን ለ ታማም ባሊህ ትዕግሥቲ አባ፣ ማደሪ ሙሙቲህ ዋከቲ ካብ የም ኢዻህ ታስፋህ ሲክ ኤያ፡፡ 9. ይሳዖሎ! ሲን አሞል ሲናክ ያምፍሪደክ ስነስነህ ማምጻቃጻቅና፣ ሀይከ ፈራዲ ያምተ ዋክቲ ማደ፡፡ 10. ኦ'ይሳዖሎ! ማዳሪ ምጋዓህ ዋንስተ ነብያት መከራ ትዕግሥቲህ ጋራየኒህ ሚሳለ ያኪኒም ኢዽጋ፡፡ 11. ጋባዔህ ለ ትዕግሥቲህ "ሲክ ተም ተምበረከም" ኪኖን ሲናክ አይክ ናነ፣ ኢዮብ አይናህ የህ ትዕግሥቲ አበም ቶቢን፣ ፉጊ ባኪቶል አካህ አበ መዔ ጉዳይ ቶቢን፣ ታሃማህ መዔፉጊ ማሓሪከ ሩኅሩኅ ኪናም ቱብሊን፡፡ 12. ኦ'ይሳዖሎ! ኡማኒሚህ ባሶል ዓራናል ያኮይ ባዾል ያኮይ አኪሚህ ኢንኪ ጉዳህ ማዽውቲና፣ ሲን ዋኒ ዮ ተከምኮ ሓቀህ ዮዎ ታኮይ፣ ማለ ተከምኮ ሓቀህ ማለ ታኮይ፣ ታሃም አከዋይተምኮ ሲናል አምፍርደለ፡፡ 13. ሲን ፋናድ መከራ ካማዳ ሒያውቲ ይኔምኮ ጻሎት አቦይ፣ ኒያተ ሒያውቲ ይኔምኮ መዔፉጎ አይምስጊኒክ ዜማ አቦይ፡፡ 14. ሲን ፋናድ ላሑተ ሒያውቲ ይኔምኮ ሞሶዓሪ ስማጊለ ኢሱላል ደዖይ፣ ኢሲን ለ ዳልኪናል ማዳሪ ምጋዓህ ዘይቲህ ያቅባኦናአይ ጻሎት አል አቦናይ፡፡ 15. ታይ ዓይነቲህ ኢምነቲህ ይምሥሪተ ጻሎት ዳላኪን ያይድኂነ፣ ማዳሪ ለ ዱረኮ ኡሩሳ፣ አበ ኃጢአት ይኔምኮ ለ ሒድጎት አካህ አባ፡፡ 16. አማይጉል ኡርቶናክ ሲኒ ኃጢአት ስነስነህ ቲታል ኤምነዘዛ፣ ቲይ ቲያህ ጻሎት አቦይ፣ ጻድቅ ኪን ሒያውቲህ ጻሎት ማንጎ ፊረ ገይሲሳ ኃይላ ለ፡፡ 17. ኤልያስ ኖያ ባሊህ ሒያውቶ ኪይይ ዪነ፣ ያከካህ ሮብ ራዳምኮ ጻሎት አበ ዋክተ አዶሓ ኢጊዳከ ዓዻ ባዾት አሞል ሮብ ኢንኪጉል ማራዲና፡፡ 18. ጋባዔህ ጻሎት አበጉል ዓራን ሮብ ዮሖወ፣ ባዾ ለ ጋባዕተህ ፍረ ቶሖወ፡፡ 19. ኦ'ይሳዖሎ! ሲንኮ ኢንከቲ ሓቂ አራሕኮ ያውዔጉልከ አከቲ ሓቂ አራሓል ካደሄያጉል፣ 20. ኃጢአተይና አክየምገገየ አራሕኮ ደሄያቲ፣ ኃጢአት ለቲህ ናፍሰ ራባኮ ይይድኂነመከ ማንጎ ኢሲ ኃጢአታህ ሕድጎት አካህ ገይስሰም ያዻጎይ፡፡