ሐዋርያ ጳውሎስህ መልእክት ገላትያ
ሒያው ኡላል
ጳውሎስ መልእክት ገላቲያል
ሳይማ ኢየሱስ አይዳኃኒህ ዳዓባል ዋንሲታ በሠራታ ቃል ኢሲ ቦታል ኒይብሥርህከ አይሁድ አከዋይታ ሒያው ጋራአክ የደይንሚህ መጠንል ክርሰቲያን ያኮና ሙሴ ሕገ ያፋጻሞና ጉርሱሳ ወይ ማጉርሱሳ? ታዽኄ ኤሰሮ ኢንኮህ ኡጉተ፣ ታማይ ዋይከተ ጳውሎስ ክርስቲያን ያኮና ሙሴ ሕገ ያፋጻሞና ማጉርሱሳ፣ ኤረ ክርሰቶሱድ ዑሱብ ሂወት ገዎና መሠረት ኢምነት ኪኒ፣ ሒያው ፉጊ ነፊል ያጽዳቆና ዺዓናም ኢምነቲህ ጥራሕ ኪኒናም ያይራዳኦ ኤዸዽሰ፣ ያኮይ አካህ ዒንዻ እስያል ሮማ ገዝአት ተከ ገላቲያል ታነ ሞሶዓሪቲህ ፋናድ ሖያው መዔፉጊህ ነፊል ያጽዳቆና ኢየሱሱል ያምንኒም ዲቦህ አከካህ ሙሴ ሕጊ ያምፋጻሞ ኤልታነ ያናማህ ጳውሎስ ታምቀወመ ሒያው ቲነ፡፡ ጳውሎስ ታይ ገላቲያ መልእክት ይጽሕፈም ታይ ገጋ ሚህሮህ ተምወነበደ ሒያው ሓቂ እምነትልከ ክርስቲና ሂውቲል ያይማራሖ ኪኒ፣ ጳውሎስ ኢየሱስ ክርስቶስህ ሐዋርያ የከም ያይረገገጽኒምኮ ኤዸዺሳ፣ ሐዋሪያህ ካደዔቲ መዔፉጎ ኪኒካህ ሒያውቶ ማኪምከ ካፋሮ አይሁድ አከዋይታ ሒያዋህ ኪናም ይዝርዚረህ ያይርዲኤ፣ ታሃምሊህ የይዸበዸበህ፣ ሒያው ታጽዳቆ ዽዕታም ኢምነቲህ ጥራሕ ኪናም ያግሊጸ፣ ባክቶ ማዐሪፊህ አዳል ክርስቲና ጠባይ ኢየሱስ አሞል ታከ እምነትኮ ያውዔ ካሓኖ የየዔቲያ ኪናም ያይርድኤ፡፡ ____________________
ማዕራፋ 1
1. ሒያዋህ ያኮይ ሒያው ዳዓባል አከካህ ኢየሱስ ክርስቶስከ ካያ ለ ራባኮ ኡገሠ ፉጊ አባህ ሐዋርያ ያኮ ዶረምመ ጳውሎስኮ፡፡ 2. ካሊህ ለ ታና ሳዖል ሙሉኡክ ጋላቲያ ሞሶዓረቲህ ፋሪመቲያ፡፡
3. ናባ መዔፉጎኮ፣ ኒማደራ ኢየሱስ ክርስቶስህ ጸጋከ ሳላም ሲንሊህ ያኮይ፡፡
4. ታይ ኡማ ዓለምኮ ኒያዳኃኖ ዒሎህ ናባ የከ መዔፉጊህ ፍቃዳህ፣ ክርስቶስ ኒኃጢአት ዮዋ ኢሰ ትላሰህ ዮሖወ። 5. ኡማንጉልኮ ኡማንጉሉህ መዔፉጎህ ክብሪ ያኮይ አመን ፡፡
ወንጌል ሓቂ ኢንከቶ ጥራሕ ኪኒ
6. ክርስቶስ ጸጋህ አካህ ደዕመምተን አምላኮ ታህዻ አፍተኒህ ባዽስምተንምከ አኪ ወንጌሊህ ተደይንርከህ ይያስግሪመ፡፡ 7. ታሃም ለ ሲናካም ሲን ተይዳነገረህ ክርስቶስ ወንጌል ታይላዋጦ ጉርታ ውልውል ሒያው ያንንጉል ኪኒካህ ወንጌልማ መሠረትኮ ኢንከቶ ዲቦህ ኪኒ፡፡ 8. ያኮይ ኢካህ ኖያ ያኮይ ወይ ዓራንቲ ማላይካ ኡካ የክንሚህ ናኑ ሲናህ ኒስብከምኮ ባዽሲመ ወንጌል ሲናህ ይስብክንምኮ አባሪምተም ያኮናይ፡፡ 9. ታሃምኮ ባሶህ ኤዽሔም ባሊህ ካዶሊህ ጋባዔህ አይክ አኒዮ፣ አቲን ጋራይተኒምኮ ባዽስመ አኪ ወንጌል ኢንከቲ ሲናህ ይሰብከምኮ አባርመቲያ ያኮይ፡፡ 10. ኤረ አኑ ጉራ ሒያውቲ ይያይማስጋኖ ኪኒ? ወይ ፉጊ ይያይማስጋኖ? ወይ ሒያው ኒያትሶ ጉረህ ተከሊኒህ ያከ? ሒያው ኒያቲሶ ጉራቲያ ኤከምኮማ ክርስቶስ አገልጋሊ አከ ማዻዽኒዮ፡፡
ጳውሎሰ ሐዋርያ
11 .ይሳዖሎ! አኑ ሲናህ ኢስብከ ወንጌል ሒያው ጋባህ ሢራሕ ማኪም ሲን አይስዽጊክ አነ፡፡ 12. አይሚህ ለ ዮያህ ቶምሖወም ኢየሱስ ክርስቶስኮ ኪኒ ኢካህ ኢንኪ ሒያውቶኮ ማጋራይኒዮ፣ ወይ ኢንኪ ሒያውቲ ይማይማሃሪና፡፡13.ባሶት አይሁዲህ ኢምነት ያክትለቲያ ኪይክ ኢነ ዋከተ አይናህ ኤህ ማራክ ኢነም ቶቢን፣ መዔፉጊህ ሞሶዓረ ኢንኪ ርኅራኄ ሂኒም አይሰደድክ አይላዮ አጽዕሪክ ኢነ፡፡ 14. አይሁድ ኢምነት ዻዉዻክ ይዳባናህ ቲነ ይወገንኮ ኡምቢህ አይስክ ኢነ፣ አቦብቲ ዝናህ ናባ ቅንአት ሊክ ኢነ፡፡
15. ያከካህ አቡከምኮ ባሶል መዔፉጊ ይዶረ፣ ኢሲ ጸጋህ ይዶረ፡፡ 16. አረማውያናህ በሠራታ ቃል ባዽ ምክንያታል አይባሣሮ መዔፉጊ ኢሲ ባዻ ዮህ ያግላጾ ይክኅነ ዋክተ አኑ ኢንከቶሊህ ማማካሪኒዮ። 17. ወይ ዮኮ ባሶል ሐዋርያት ክይክ ትነምሊህ ቲታ ገይኖ ኢየሩሳለም ማዳይኒዮ፣ ያከካህ ኦኮመህ ዓራብ ባዾ ኤደየ፣ ጋባዔህ ደማስቆ ጋሔ።18. ካታይህ አዶሓ ኢጊዳኮ ላካል ጰጥሮስ አብሎ ኢየሩሳለም ኤደየ፣ ታማል ካሊህ ኮናምከ ታማነ ለለዕቲያ ሱገ፡፡ 19. ማደሪ ሳዓል ያዕቆብ ኡብለካህ አኪ ሐዋርያትኮ ቲያ ማብሊኒዮ፡፡ 20. ታይ ሲናህ አጽሕፍክ አነም ዲራብ ማኪም መዔፉጊህ ነፊል ሲናህ ዓዶሳክ አኒዮ፡፡
21. ታሃምኮ ላካል ሶሪያከ ኪልቅያ ባዾል ኤደየ፡፡ 22. ይሁዳ ባዾል ታነ ክርስቶስ ሞሶዓረት ዮያ ነፍ ነፊህ ዩብልኒህ ገና ያዽገካህ ይኒን፡፡ 23. ኢሲን ዮብኒም ቶይ ባሶህ አይሰደዲይ ይነ ሒያውቲ፣ ቶይ ያይላዮ ጉራይ ይነ ኢምነት ካዶ ያስቢከ ያዸሔ ቃል ይነ፡፡ 24. ይምክንያታል መዔፉጎ አይምስግንይ ይኒን፡፡
ማዕራፋ 2
ጳውሎስ ሐዋርያ ኪናም አኪ ሐዋርያታህ ይምዽገ
1. አፋራምከ ታማን ኢግዲያኮ ላካል ባርናባስሊህ ኢየሩሳለም ጋሔህ ኤደየ፣ ቲቶ ለ ኢነሊህ ኢብዸህ ኤዴህ ኢነ። 2. ኤደየም መዔፉጊ ዮህ ይግልጸሚህ ሪሚዲህ ኪኒ፣ ታሃምኮ ባሶል ሢራሔሚህ ያኮይ ካዶ ሢራሓክ አነም ካንቶ ተከህ ራዕታምኮ ያናማህ፣ አረማውያናህ ያምስብከ ወንጌል ናባ ማራ ኪን ማራህ ዲቦህ ተን ኢስዺገ፡፡ 3. ዮሊህ ይነ ቲቶ ኢንኪጉል ኡካ ግሪክታ የከሚህ ያምጋራዞ ማምጋዳዲና። 4. ያኮይ ኢካህ ኒፋንኮ ሙሉሔኒህ ሱዕቶህ ሳይተ ውልውል ዲራብቲ ሳዖል ያምጋራዞና ጉረኒህ ይኒን፣ ታይ ሒያው ኒፋናል ሙሉሔኒህ ሳየኒም ኢየሱስ ክርስቶስልህ ሊኖ ናፃነት ይይሲልልኒህ ባሮት ናቦና ይሕስቢኒ ኪኒ፡፡ 5. ናኑ ለ ወንጌል ሓቂ ተንሊህ ሲክ የህ ማሮ ያናመህ ዳጎ ዋክተህ ኡካ አካህ ማሱቡቲኒኖ ፡፡
6. ታይ መራኅቲህ ይሚግድኒህ ታምቡሉወም ለ መዔፉጊ ሒያው ነፍ ዩብለህ ምያይዶሎወጉል፣ ኢሲን አይም ኪኖኑም ጊደ ማሊዮ፣ ታይ መራኅቲ አክያን ማሪ አኑ አይብሢረ በሠራታ ቃሊህ አሞል ኢንኪ ዑሱብ ጉዳይ ኤድሞሲኖን፡፡ 7. ኤረ መዔፉጊ ጰጥሮስ አይሁድ በሠራታ ቃል ያይባሣሮ አበ ዓይነቲህ አኑ ለ በሠራታ ቃል አራማውያናህ አይባሣሮ ያበም የዸጊን፡፡ 8. አማይጉል ጰጥሮስ አይሁዳውያን ሐዋርያ የከህ ያስጋልጋሎ አበ አምላክ፣ ዮያ ለ አረማውያውን ሐዋርያ ኤከህ አስጋልጋሎ ያበ፡፡ 9. ዋኖኑህ ይምግድኒህ ታምቡሉወ መራሕቲ ያዕቆብከ ጰጥሮስ፣ ያሃኒስ ለ መዔፉጊ ታይ ዲቦህ ኪን አገልግሎት ዮህ ዮሖወም ይምርድኢንጉል ዮከ ባርናባሳሊህ የምሔበበርኒሚህ ምልክቲህ ምድጊ ጋባ ዮህ ዮሖውን፣ ናኑ አረማውያን ዻጋህ ናዳዎ፣ ኢሲን አይሁዳውያን ኡላል ያዳዎና፣ ኡምቢክ ነምሰመመዔ፡፡ 10. ዲቦህ ፋናድ ታነ ዲካታት ናዛካሮ ሓዳራ ኖክየን፣ ታሃም አኑ ትግሃታህ አበ ጉዳይ ኪኒ፡፡
ጳውሎስ አንጾኪያል ጰጥሮስ የምቀወመም
11. ጰጥሮስ አንጾኪያ የመተ ዋክተ ዓዲህ የምገገህ ይነጉል፣ ነፍ ነፊህ ካኤምቀወመ። 12. ያዕቆብ ፋረ ውልውል ሒያው አንጾኪያ ቱላል ያመትኒሚህ ባሶል አረማውያንሊህ ኢንኮህ በታይ ይኒን፣ ኢሲን የመትኒምኮ ላካል ለ አረማውያን ያምጋራዞና ኤልታነ ታዽሔ አይሁድ ማይሲተኒህ ሣራቱላል ዮምፎሖኪን አረማንዊያንኮ ባዽስመን፡፡
13. ውልውል ክርስቲያን ለ ጰጥሮስ ስንፊና ይክትሊን፣ ባርናባስ ኡካ ራዔካህ ተን ስንፊናድ ካታየን፡፡ 14. ተን ተግባር ወንጌል ሓቀሊህ አምሳማማዕቲ ዋይቲ ኤድ ኡብለ ዋክተ ጰጥሮሱክ"አቱ አይሁዳ ኪቶሃኒህ፣ አይሁድ ሠርዓታህ አከ ካህ አረማውያን ሠርዓታህ ማራክ ታነ፡፡ 14. ኢስኪ አረማውያን አይሁድ ሠርዓታል ማሮና አይሚህ አስግዲድክ ታነ? ኤህ ኡማንቲህ ነፊል ካኤምቀወመ።
አይሁድ ያኮይ አረማውያን ያድኅኒንም ኢምነቲህ ኪኒ
15. ዓዲህ ናኑ ኒኒ ማባኮህ አይሁድ ኪኖ፣ ኃጢአተናታት ኪን አረማውያን ማኪኖ፡፡ 16. ያከካህ ሒያው ታደኅነም ኢየሱስ ክርስቶሱል የመንኒህ ኪኒካህ ሙሴ ሕገ ንፍጽመሚህ ማክም አብልክ ናነ፣ ናኑ ለ ሕገ ኒፍጽመህ አከካህ ክርስቶሱል ነመነህ ናጽዳቆ ኢየሱስ ክርስቶሱል ነመነ፣ አይሚህ አኪናን ሒያውቲ ሙሴ ሕገ ይፍጺመሚህ ምያጽድቀ፡፡ 17. ክርስቶስሊህ ሊኖ ኢንኪኖህ ናጽዳቆ ጉርናጉል ናኑ ኒነህ ኃጢአት ለም ነከህ ገይምነምኮ፣ ኢስኪ ኃጢአት አብኖ ናብሲሳቲይ ክርስቶስ ኪኒ ማለት ኪኒ? ኢንኪጉል ማኪ፡፡ 18. ያኮይ ኢካህ ይፍሪሰ ሕጊህ ሠርዓት ደሄህ ሢራሓቲይ ዮያ የከምኮ አኑ ኢነህ ሕገ ያፍረሰቲያ ኪዮም አይስዺግክ አነ ማለት ኪኒ፡፡ 19. አይሚህ አኑ መዔፉጎህ ማሮ ኤህ ሕጊ ኡላኮ ራባህ ባዽስማናም ኢዻ ሕገኮ ባዽስመህ አኒዮ፡፡ 20. አኑ ክረስቶስ ማስቃልህ አሞክ ራበህ አነሚህ ሎዪማም ኢዻህ ካምቦኮ ሣራህ ክርስቶስ ዮያድ ማራካህ አኑ ኢኒ ሂወቲህ ማራቲያ ማኪዮ፣ ክርስቶስ ሂወቲህ ኢዻህ ኪኒካህ ኢኒ ሂወቲህ ማኪዮ፣ ካዶሊህ ለ ሓዶይታህ ኤድማራ ሂወትህ፣ ይክሕንቲያከ ዮያህ ኢሲ ሂወት ትላሰህ ዮህ ዮሖወ መዔፉጊህ ባዻል ኤመነህ ገይ ሂወቲህ ኪኒ። 21. መዔፉጊህ ጸጋ ካንቶህ ማራዕሳ፣ ሒያውቲ ያድኅነም ሙሴ ሕገ ይፊጽመርከህ የከምኮማ፣ ክርስቶስ ራበም ካንቶህ ኪነ ማለት ኪኒ፡፡
ማዕራፋ 3
ጽድቂ ገይማም ክርስቶሱል የመኒኒህ ኪንካህ ሕገ ያፍጽምኒሚህ ማኪ 1. አቲን ምዸማሎሊ ገላቲያ ሒያዎ! አስማት ኤልአበን ሒያው ባሊህ አይሚህ ትፍዝዚኒ? ኢየሱስ ክርስቶስ ኢሲ ማስቃሊህ አሞክ ታካሪመህ ስዕለ ባሊህ ነፍ ነፊል ዓዲክ አምቡሉውይ ማና? 2. አዻጎ ጉራም ታሃም ጥርሕ ኪኒ፣ ኢቦል አቲን መንፈስ ቁዱስ ጋራይተኒም ሕገ ትፍጽሚን ኢርከህ ኪኒ፣ ወይ በሠራታ ቃል ቶቢኒህ ተመኒን ኢርከህ ኪኒ? 3.አቲን ፉጊ መንፈስህ ኤዸዽሰኒህ ኃዶይታት ፃዕረ ታፋጻሞና ጉራክ ታኒን፣ ለካ ታህዻ ምዸማሎሊ እኪቲኒ! 4. ወንጌል ምክንያታል ጋራይተን መከራህ ሙሉኡድ ካንቶ ተኪኒህ ራዕተን ማለት ኪኒ? ታሃም አብተኒህ የከምኮ ዓዲህ ካንቶ ተኪኒህ ራዕተን፡፡ 5. መዔፉጊህ መንፈስ ሲናህ ዮሖወምከ ሲነህ ታምራት አብሲሳ ሕገ ትፍጽምኒሚህ ኪኒ፣ ወይ ለ በሠራታ ቃል ቶቢኒህ ተመንንጉል ኪኒ?
6. ታሃም "አብራሃም ፉጎል የመነ፣ ኢምነት ጽድቀ የከህ አካህ ሎይመ" የህ ይምጽሕፈም ባሊህ ኪኒ፡፡ 7. አማይጉል ታምነም ኡምቢህ አብራሃም ዻይሎ ኪኖኑም ኢዽጋ፡፡ 8. መዔፉጊ አረማውያን ኢምነቲህ ተን ያይጽድቀም ማጽሐፍ ዮኮምህ ዩብለህ"ህዝቢ ኡምቢህ ኮያህ አምበረከሎን" ያናማህ ዮኮመህ አብራሃም በሠረታ ቃል ካ ይብሢረ፡፡ 9. አማይጉል ታሚነም ሙሉኡክ የመነ አብራሃምሊህ አምበረከ ሎን።
10."ሕገ ኒፍጺመህ አጽድቀ ሊኖ"ታም ሙሉኡክ አባርምተም ኪኖን፣ አይሚህ "ሙሴ ሕጊህ ማጽሐፋል ይምጽሒፈ ትኢዛዛታል ኡምቢህ ይጽንዔህ ማረዋያቲያከ አፍጽመዋያቲ ኡምቢህ አባሪመቲያ ኪኒ" የህ ይምጽሒፈ፡፡ 11"ጻድቅ ኪን ሒያወቲ ለ ኢምነቲህ ሂወት ገያ"የህ ይምጽሕፈጉል ሕገ ይፍጽመርከህ ኢንኪ ሒያውቲ መዔፉጊህ ነፊል አጽድቀ ማለም ዓዶም ኪኒ፡፡ 12. ሕጊ ኢምነት አሞል ይምሥርተቲያ ማኪ፣ ኤረ "ሒያውቲ ሕገህ ማሮ ዽዕስሳም፣ ሕጊ ትኢዛዝ ሙሉኡክ ያፍጽመጉል ኪኒ" የህ ይምጽሕፈ፡፡
13."ጉንዲ አሞክ ታካሪመህ ራባቲ ኡምቢህ አባሪመቲያ ኪኒ"የህ ይምጽሕፈጉል ክርስቶስ ኒዳዓባል አባሮ ባሊህ የከህ ሕጊ አባሮኮ ኒ ይድኅነ፡፡ 14. ታሃም ተከም ፉጊ አብራሃማህ ዮሖወ በረከት ኢየሱስ ክርስቶስህ አራሓህ አረማውያን ማዲሶ መዔፉጎህ ሲናህ አሓይክ አኒዮ የዽሔም መንፈስ ቁዱስ ኢምነት ጋራይኖ የህ ኪኒ፡፡
ሕጊ ታስፋ ቃል ምያስዒረ
15. ይሳዖሎ! ኢስኪ ታይ ጉዳይ ሒያውሊህ የምገለ ጉዳይሊህ ኤይነጸጸራ፣ ኢንኪ ሒያውቲ ሳየ ቃል ኪዳናህ ኡካ ይጽድቀምኮ ላካል፣ አኪናን ሒያውቲ ያስዓሮ ያኮይ ኤዶሶ ማዽዓ፡፡ 16. መዔፉጊ ለ አብራሃምከ ካዳራህ ዮሖወ ታስፋ ቃል ዮሖወም ታይ ዓይነቲህ ኪኒ፣ ማጽሐፍ ታስፋ ቃል ዮሖወም ማንጎ ማራህ ኪናም አበህ "ኩዳሪቲህ" ሚያ፣ ታሃም ኢንከቶ ኪናማህ "ኩዳራህ" ያዽሔ፣ ታይ "ኩዳሪ" አክየም ከርስቶስ ኪኒ። 17. አማይጉል አኑ አዽሔም ታሃም ኪኒ፣ አፋራ ቦል ሦዶም ኢግዲያኮ ሣራህ ዮምሖወ ሕጊ መዔፉጎህ የምረገገጸህ ይምዺገህ ይጽድቀ ቃል ኪዳን ይስዒረህ ታስፋ ቃል ያይላዮ ማዽዓ፡፡ 18. ኢንኪ ጉዳይ ያምውርሰም ሕጊ አራሓህ የከህ ያከዶ፣ መዔፉጊ ዮሖወ ታስፋ ቃሊህ ምክኒያታል ኪናም ራዔ ዻዸ፣ ያኮይ ኢካህ መዔፉጊ ውርሰህ አብራሃማህ ዮሖወ ታስፋ ቃሊህ ኡላህ ኪኒ፡፡
19. ይቦል ሕጊ ዮምሖወም አይሚህ ኪኒ? ሕጊ ኦሲተም አብራሃማህ ታስፋህ ዮምሖወም ዳሪ ያምተም ፋናህ፣ ኡማ ሢራሕ አይምቶ ኪናም ያይባላዎ ኪኒ፣ ሕጊ የመተም መላእክት ኡላኮከ ፋሪመቲያ የከ ኢንኪ ሒያውቲህ ኡላህ ኪኒ፡፡ 20. ያኮይ ኢካህ ኢንኪ ሒያውቶህ ዲቦህ ፋንትቲያ ያከ ሒያውቶ ማጉርሱሳ፣ ፉጊ ኢንኪቶ ኪኒ፡፡
ሕግ ዓላማ
21. አማይጉል ሕጊ ፉጊ ታስፋህ ቃል ያምቆወመ? ኢንኪጉል ምያምቆወመ! አይሚህ ሂወት ኤድገይማ ሕጊ ያምሓወም የከህ ያከዶ፣ ጽድቂ ሕጊ ኡላህ ገይመ ዻዸ፡፡ 22. ያከካህ ኢየሱስ ክርስቶሱል የመኒንህ ገይማ ታስፋ ቃላል፣ ታምነሚህ ያምሓዎ፣ ማጽሐፍ ያምባሊህ ዓለም ሙሉኡድ ኃጢአታህ ይምግዚኤህ ኃጢአታህ ይምዹወቲያ የከ፡፡
23. ኢላሊማ ኢምነት አይከ ያምቡሉወጉል ፋናህ፣ ታይ ኢምነት ያምተምኮ ባሶል ሕገህ ቱምዹውም ነከህ ኖክ አልፍመህ ይነ፡፡ 24. ታይ ዓይነቲህ ኢምነቲህ ናጽዳቆ ክርስቶስ ያምተም ፋናህ ሕጊ ኒሞግዚት የከህ ይነ፡፡ 25. ካዶ ለ ኢምነት የመተጉል ሕጊ ሞግዚቲህ ዳባል ኪኖም ራዕተ፡፡
26. ኢየሱስ ክርስቶስሊህ ሊቲን ኅብረቲህ ኢምነት ባርካታህ ኡምቢክ መዔፉጊህ ዻይሎ ኪቲን፡፡ 27. አይሚህ ጥምቀትህ ኢየሱስሊህ ኢንኪቶ ተከምክ ኡምቢክ ክርስቶስ ሀይሲ ተን፡፡ 28. ኡምቢክ ኢየሱስ ክርስቶሱህ ኢንከቶ ተክንጉል አይሁድከ ግርካውያን፣ ጊለዋይቶከ ማዳራ ላብቲያከ ሳይቲያህ ፋናድ ኢንኪ ባዽሲ ሚያነ፡፡ 29. አማይጉል ክርስቶስም ተክኒምኮ፣ አብራሃም ዳራ ኪቲን፣ ታስፋ ቃሊህ መሠረቲህ ወረስቲ ኪቲን፡፡
ማዕራፋ 4
መዔፉጊህ ዻሎ ከኖም ኢዻህ
1. ካዶሊህ አዽሔም ታሃም ኪኒ፣ ውርሰ ያውሪሰቲ ሕፃን የከህ ገይማ ዋክተ ኢንኪጉል ኡካ ኒብረት ሙሉእ ኢያህ ዋና የከሚህ ባሪያቶኮ ኢንኪሚህ ማባዽሲማ፡፡ 2. ያኮይ ኢካህ ካአባ አካህ ይውሲነ ዋክቲ ማዳም ፋናህ ሞግዚቲከ ታምግበሚህ ዳባል ኪኒ፡፡ 3. ታማም ባሊህ ናኑ ሕፃናት ክይይክ ኒነ ዋክተ ታይ ዓለምህ ሠርዓታህ ታምግዜኤም ነከህ ባሮት ክይይክ ኒነ፡፡ 4. ያኮይ ኢካህ ይምውስነ ዳባን ማድነ ዋክተ መዔፉጊ ኢሲ ባዻ ኖህ ፋረ፣ ኡሱክ ሳይጉደይታኮ ዮቦከህ፣ ሕገህ ያምኢዚዘ ቲያ የከ፡፡ 5. ታሃም አበም ሕጊ ዳባል ታናም ያይዳኃኖከ ኖያ ለ መዔፉጊህ ጸጋህ ዻይሎ ናኮ ናቦ የህ ኪኒ፡፡ 6. መዔፉጊህ ዻይሎ ኪኖሙህ ለ፣ መዔፉጎ "አባ አባ" አይክ ዋዕ ያ መንፈስ ናፍዓዶድ ፋረ፡፡ 7. አማይጉል ካማቦኮ ሣራህ መዔፉጊህ ባዻ ኪቶካህ ባሪያ ማኪቶ፣ ፉጊ ባዻ ተከምኮ መዔፉጊህ ወራሲ ኪቶ፡፡
ጳውሎስ ገላትያ ሒያዋህ ሊይ ይነ ጸንቀት
8. ታሃሚህ ባሶል ፉጎ አዽገ ዋይተን ኢርከህ ምክንያታል ሲኒ ተፈጥሮህ አማሊክቲ አከዋይታማህ ባሮት ተክኒህ አምገዚኢክ ቲኒን፡፡ 9. ካዶ ለ ፉጎ ተዸጊን፣ ናቢህ መዔፉጎ አቲን ለ ተዸጊን፣ ኢቦል ታይ ሩኩት አርብሔዋ ዓለምህ ሠርዓታል አይናህ ተኒህ ጋሕተኒ? አይናህ ተኒህ ጋባዕተኒህ ተን ባሪያ ታኮና ጉራክ ታኒን? 10. ኢሲሲ ለለዕከ አልሲት፣ ይምውሲነ ኢጊዲ ክፍሊትከ ኢግዲት፣ ጥንቃቀ አባክ ባዽሳ ክብረ ታሓይን፡፡ 11. ሲናህ ኤድ ሓዋለ ሢራሕ ምናልባት ካንቶ የከህ ራዔለ ኤህ ማይሲታ፡፡
12. ይሳዖሎ! አኑ ሲና ባሊህ ክዮጉል፣ አቲን ለ ዮያ ባሊህ ቲካ ኤህ ሲን ዻዒማክ አነ፣ አቲን ኡኮ ኢንኪም ይማባዳልንቲን፡፡ 13. ኤዸዾይታ ወንጌል ሲናህ ኢስብከ ዋክተ ዱሪ አሞል ኢነም ታዽጊን፡፡ 14. ኢንኪጉል ኡካ ይዱሪ ፋታና ሲናክ የከሚህ፣ ይማዻይትኒቲን ወይ ይማምጻያፊኒቲን፣ ኤረ ለ መዔፉህጊህ መልአክ ጋራይታናም ባሊህ አብተኒህ ይጋራይ ተን፡፡ 15. ታሃሚህ ባሶድ ሊይክ ቲኒን ኒያት ኡምቢህ አርከ የደየ? ዽዒማም ያከዶ ሲኒ ኢንቲት ኡካ ተየዕኒህ ዮህ አሓየ ዻዸኒም አኑ ኢነህ ሲናህ አምስኪረ፡፡ 16. ኢቦል ካዶ ሓቀ ሲናክ ኤዽሔርከህ፣ ሲን ናዓብቶሊ ኤከህ ገይመ? 17. አኪ ሒያው ሲን ዳዓባል አምጽንቂክ ያሕስቢኒህ ያከ፣ ያኮይ ኢካህ ታሃም አብታም መዕነህ ማኪ፣ ተን ድላይ አቲን ኖኮ ባዽስምተኒህ ተናህ ትግሃታህ ታሕሳቦና የኒህ ኪኒ፡፡ 18.ዓላማ መዔቲያ ተከምኮ ያትግህኒም ኡማንጉል መዔም ኪኒ፣ ያኮይ ኢካህ ታይ ሲን ትግሃት አኑ ሲንሊህ አነ ዋክተ ጥራሕ አከዋዎይ፡፡ 19. ይዻሎ! ክርስቶስ ባህሪ ሲናህ ታምቡሉወም ፋናህ ጋባዔህ ስን ዳዓባል ኡላሎ ጽንቂህ አሞል ገይማ፡፡ 20. ባሶትምኮ ባዽሳ ለ አጋባቢራ ይትስቡሉውኒም ባሊህ ካዶሊህ ሲንሊህ አኮ ጉረ ዻዸ፣ ያከካህ አይም አቦ ጉርሱሳም አዽገ ዋየርከህ ድንግርግር ዮክየህ ኢምጽንቀህ አኒዮ።
አጋርከ ሣራ ምሳለ
21. አቲን ሕጊ ታዘዝት ተኪኒህ ማርቶና ጉርታማክ ኢስኪ ዮከያየ። ሕጊ ያም ማታቢኒ? 22. ሕጊ ማጽሐፋል አብራሃም ላማ ባዻ ሊይይ ይነ፣ ባሶቲ ዮቦከም አግለጋሊት ኪን ኑማኮ ኪይይ ይነ፣ ማላሚ ዮቦከም ናፃ ኪን ኑማኮ ኪይይ ይነ የህ ይምጽሒፈ፡፡ 23. አግልጋሊትኮ ዮቦከ ባዽ ኃዶይታ ልምደኮ የከጉል፣ ናፃ ኪን ቲያኮ ዮቦከ ባዽ ለ ታስፋ ቃሊህ መሠረቲህ ኪይይ ይነ፡፡ 24. ታሃም ምሳለ ኪይክ ቲነ፣ ታይ ላማ ኑማ ላማ ኪዳኒህ ምሳለ ኪይይ ይኒን፣ ኤዸዾይታ ቲያህ ኪዳን ሲናት ኢምባኮ ተከቲያ አጋር ኪኒ፣ ኢሲ ኢሮ ዻልተም ባርነቲህ ኪይይ ቲነ፡፡ 25. አጋር ዓራብ ባዾል ገይምታ ሲናት ኢምባህ ምሳለ ኪይክ ቲነ፣ አማይጉል ካዲት ኢየሩሳለምሊህ ታመሰሰለ፣ ኢስ ኢሲ ዻይሎሊህ ባርነቲድ ገይምታ ቲያ ኪኒ፡፡ 26. አጋናኮ ዓራንኮ ተከ ኢየሩሳለም ለ ናፃ ኪኒ፣ ኢስ ኒና ኪኒ፡፡ 27. አይሚህ ለ፣
"አቱ ዻይሎ ዻለዋይታ ገድመ ኒያት፣
ኡላሊተህ አዽገዋይታ ቲያ ዕልል ኤዸህ!
ባዕላ ለ ኑማኮ አጋናል ባዕሊ ተሐበ ኑማ ማንጎ ኢሮ ለ፣" የህ ይምጽሒፈ፡፡ 28 .ይሳዖሎ! አቲን ለ ይስሐቅ ባሊህ ታስፋ ቃሊህ ዻይሎ ኪቲን፡፡ 29. ያከካህ ታማይ ዋክተ ኃዶይታህ ዮቦከቲ መንፈስህ ዮቦከቲያ የይሰደደም ባሊህ፣ ካፋ ለ ታማም ባሊህ ኪኒ፡፡ 30. ያኮይ ኢካህ ማጽሓፍ ያም አይም ኪኒ? ማጽሓፍ"አገልጋሊት ኪን ኑማ ዻልተ ባዻ ናፃ ኪን ኑማ ዻልተ ባዻሊህ ኢንኮህ ምያውርሲንጉል አገልጋሊት ኢሲ ባዻ አማይጉልካህ ተየዔ" ያዽሔ፡፡ 31. አማይጉል ይሳዖሎ! ናኑ ናፃ ኪን ቲያህ ዻይሎ ኪኖ ኢካህ አገልጋሊት ዻይሎ ማኪኖ፡፡
ማዕራፋ 5
ክርስቶሱህ ገይማ ናፃነት
1. ክርስቶስ ናፃ ኒየየዔም ናፃነቲህ ማርኖ የህ ኪኒ፡፡ አማይጉል ሲክ ኤያይ ሶላ፣ ጋኅተኒህ ባርነት አርዑቱድ ማምፃማዲና። 2. ሀይከ! አኑ ጳውሎስ ሲናካም ታሃም ኪኒ፣ አምጋራዝ ኒጉርሱሳ ሲናከሚህ ታምግሪዚንጉል ክርስቶስ ኢንኪሚህ ሲን ሚያጥቅመ፡፡ 3. አምጋራዘ ይጉርሱሳ የህ ያምግሪዘቲ ኡምቢህ ሕገ ሙሉኡድ ያፍጽመሚህ ጊዳድ አለ ለ" ኤህ ጋባዔህ ኢይጥንቅቀህ አኒዮ፡፡ 4. አቲን ሕጊ አራሓህ ታጽዳቆና ጉርታማክ ኡምቢህ፣ ክርስቶስኮ ባዽሲምተን፣ ካጸጋኮ ተውዒን፡፡ 5. ናኑ ለ ጽድቀ ታስፋህ ኢላልናም፣ ፉጊ መንፈሲህ አራሓህ ኢምነቲህ ኪኒ፡፡ 6. አይሚህ ኒታጥቅመም ኢየሱስ ክርስቶስሊህ ነምሔበበረህ ካሓኒ አራሓህ ሢራሕ አሞል አሳ ኢምነቲህ ኪኒ ኢካህ ኒምግሪዘህ ያኮይ አምጋራዘ ዋይነሚህ ኒሚያጥቅመ፡፡
7. ካዶ ፋናህ መዔ አርዳህ አርድክ ቲኒን፣ ይቦል ካዶ ሓቀህ ታምአዛዞና ሲን ደሳቲ አቲያ ኪኒ? 8. ታይ ዓይነቲህ ምክሪ ፉጎኮ ያምተቲያ ማኪ። 9. ታይ"ዳጉ መብኮዒ ቡኩዕ ሙሉኡድ ታይቡኩዔ፣"ያናም ባሊህ ኪኒ፡፡ 10. ያከካህ ኢንክጉል አኪ ሓሳብ ማልትኒም ርጊጽ ኤከህ ማዳራህ አምኤመመነ፣ ሲን ያይደነገረቲ አኪናንቲ ይኔምኮ ኢሲ ቅጽዓት ጋራየ ለ፡፡ 11. ይሳዖሎ! አኑ ካዶ ፋናህ አስብከም ታድኃኖና ታምጋራዞና ጉርሱሳ ኤዽሔህ አከዶ፣ ካዶ ፋናህ አይሚህ አምሰደድክ ኢነ? 12. አማይጉል ታይ ሲን ታይደነገረ ሒያው ጉረንምኮ ያምጋራዞና ጥራሕ አከካህ ያጋራዖናይ፡፡
13. ይሳዖሎ! አቲን ናፃነቲህ ደዕምምተን፣ ያከካህ ኢንከቲ ዶባይቶ ካሓኖህ ያስጋልጋሎይ ኢካህ፣ ታይ ሲን ናፃነት ኃዶይታት ጉርታዪህ አቦቲህ ምክንያታል አከዋዎይ፡፡ 14. አይሚህ ሕጊ ኡምቢህ ሒያው ኢሲ ዸግኃ ባሊህ አባይ ኢክሒን ያዽሔ ኢንኪ ቃላህ ያምፈጽመ፡፡ 15. ያኮይ ኢካህ ስነስነህ ቲታድ አራከ ቲታ በታክ ስነስነህ ቲታ ታይለይንምኮ ሰሊታ፡፡
መንፈስከ ኃዶይታ
16. አማይጉል መንፈስህ ማራ፣ ኃዶይታ ዲላይ ማፋጻምና ሲናክ አይክ አኒዮ፡፡ 17. አይሚህ ኃዶይታ ጉርታዪ መንፈስ ጉርታዮሊህ ተፃይ ኪኒ፣ መንፈስከ ኃዶይታ ስነስነህ ተፃይ ያኪን፣ አማይጉል አቲን ጉርተኒም አብቶና ማዽዕታን፣ 18. መንፈስህ ታምርሒንጉል ለ ሕጊ ተገዛእት ማታኪን።
19. ኃዶይታት ሢሮሕ ታምዺገም ኪኖን፣ ዙሙት፣ ሩክሰት፣ ኃዶይታ ጎረታዮ፣ 20. ጣዖት ያይምልክነም፣ ናዓቦ፣ ያምጸቀጸቅኒም፣ ቅንአት፣ ቁጡዓ፣ ሲነ ያክኅንኒም፣ ባዽሳ፣ አድማ፣ 21. ተንኮል፣ ሲክራን፣ ጎይላ ታሃሞሙህ ኢግዳም ኪኖን፣ ታሃምኮ ባሶህ ሲን ኢይጥንቅቀም ባሊህ ካዶሊህ ጋባዔህ ሲን አይጥንቅቂክ አኒዮ፣ ታህ ኢግድ ጉዳይ አብታ ሒያው፣ መዔፉጊህ ማንግሥት ምያውርስን፡፡
22. መነፈስ ቁዱስ ፊረ ለ ካሓኖ፣ ኒያት፣ ሳላም፣ ትዕግሥቲ፣ መዕነ፣ መዔቲያ ያኪኒም፥ ያምእምንኒም፣ 23. ጋርሂኖ፣ ሲነ ያምቆጾጾሪኒም ኪኒ፡፡ .ታህ ኢግዲን ጉዳያክ ተፃይ ያከ ሕጊ ሚያነ፤ 24. ኢየሱስ ክርስቶሲሂም ተከ ሒያው፣ ኃዶታ ተ ጉርታዮከ ተ ትምንትሊህ ታካራን፡፡ 25. መንፈስህ ማርታም ነከምኮ፣ መንፈስህ ናማራሖይ፡፡ 26. ቲይ ቲያል ናዓቦህ ኡጉታክ ኒነ ኒነህ ቲታል አይሲናክ ካንቶህ አምክሔ ዋይኖይ፡፡
ማዕራፋ 6
ሲነሲነህ ቲታ ኃታናም
1. ይሳዖሎ! ሒያውቲ አኪናን ገጋ አበህ ገይመምኮ መንፈሳውያን ኪናማክ አቲን ታይ ዓይነቲህ ሒያውቶ ጋርሄል ሪጊሳ፣ ያኮይ ኢካህ አቱ ለ ታይ ዓይነቲህ ፋታናድ ራዳምኮ ሰሊት፡፡ 2. ሲነሲነህ ቲታ ሓታክ ሲንኮ ኢንከቲ ዶባይቲ ዒሊስ ዑካ ያይካዖይ፣ ታይ ዓይነቲህ ክርስቶስ ሕገ አፍጽምክ ታኒን፡፡ 3. አኪናን ሒያውቲ አኪማራኮ ያይሰ ጉዳይ አለካህ "አኑ አኪ ማራኮ አይሰ" የህ ይሕስበምኮ ኢሰ ያይተለለ። 4. ኢሲሲ ሒያውቲ ኢሲ ሢራሕ ይምርምረህ ያጋምጋሞይ፣ ታሃሚህ ላካል ኢሰ አኪ ማራሊህ አይወደደሪክ አከካህ ኢሰል ጥራሕ አካህ ያምክሔ ጉዳይ ገያ፡፡ 5. አይሚህ ኢሲሲ አሞህ ዑካ ያይካዖ ኤልታነ፡፡
6. ካቃልኮ ያምሂረ ሒያውቲ ኢሲ መምሂርኮ መዔ ጉዳይ ሓዲሊታ ቲያ ያኮይ፡፡
7. ሲነ ማይታላሊና፣ ፉጊ አሞል ያይላጋጾና ማዽዒማ፣ አይሚህ ሒያውቲ ያዕዪየም ይድሪየምኮ ኪኒ፡፡ 8. ኃዶይታ ኒያቲሶ ያድሪየ ቲይ፣ ኃዶይታኮ ራባ ያዒይየ፣ መንፈስ ኒያቲሶ ያድሪየቲ መንፈስኮ ኡማንጉሊ ሂወት ያዒይየ፡፡ 9. ታስፋ አቅሩጸካህ ትዕግሥቲህ ሲክ ናጉል ዋክተህ ናዒዪየ መዔ ሢራሕ ሢራሕኖክ አስኒፈ ዋይኖይ። 10. ያግጥመ /ኖድ ጋራ/ ዋክተ ገይነምኮ ሒያዋህ ኡምቢህ ጋዳህ ታሚነ በተሰቢህ መዔ ጉዳይ አብኖይ፡፡
ባክቶ ምክረከ ሳላምታ
11. አይናህ ኢግዲን ናባባ ፊደላት ታይ ይጋባህ ሲናህ ኢጽሕፈም ኡቡላ፡፡ 12. ታምጋራዞና ሲን ታስግድደም ኢሮቲያ ተከ ኃዶይታህ ጉዳህ ታምኪሔም ኪኖን፣ ታሃም አብታም ለ ክርስቶስ ማስቃሊህ ምክኒያታል ሲደት ተን ማዳምኮ የኒህ ኪኒ፡፡ 13. ኢሲን ሲኒ ኃዶይታህ ያማካሖና የኒህ ያምጋራዞና ጉራናም ኢካህ ይምግርዝንሚህ ሲኒ ሕገ ምያፍጽሚን፡፡ 14. አኑ ለ ዓለም ዮያህ አካህ ራበርከኮ፣ አኑ ለ ዓለምህ አካህ ራበርከህ ይማደራ ኢየሱስ ክርስቶስህ ማስቀልኮ በሒህ አኪ አካህ አምክሔ ጉዳይ ማሊዮ፡፡ 15. አይሚህ አምጋራዘ ያኮይ አምጋራዘ ዋይቲ ኢንኪም ማታጥቂመ፣ ታጥቅመም ዑሱብ ፍጥረት ያክኒም ኪኒ፡፡ 16. ታይ መምረሒ ታክትለሚህ ኡምቢከ መዔፉጊህ ወገን የከ እስራኤል ህዝበህ ሳላምከ መሕረት ያኮይ፡፡ 17. ይሰውነቲህ አሞል ታነ ሙግራከ ሲሮብ ኢየሱስ አገልጋሊ ኪዮም ታይምልክተጉል፣ ካማቦኮ ላካል ኢንከቲ ምያምጽጊመ፡፡
18 .ይሳዖሎ! ኒማደሪ ኢየሱስ ክርስቶሲህ ጸጋ ሲን መንፈስሊህ ታኮይ፣ አመን፡፡
No comments:
Post a Comment
Note: Only a member of this blog may post a comment.