ኤዸዾይታ ቆሮንጦስ

                ኤዸዾይታ ሐዋርያ ጳውሎስህ መልእከት ቆሮንጦስ ሕያዋል                 

                                            ሳይማ       

   ጳውሎስ ቆሮንጦስ ሒያዋህ ኤዸዾይታ መልእክት ይጽሒፈም ጰውሎስ ቆሮንጦሱል ዮስቆቆመ ሞሶዓሪ አዳል ክርስቲና ሒያውከ ኢምነት ታብለምኮ ኡጉተህ ይነ ጸገም ያንሑወ ሓሳብ ገዮ የህ ኪኒ፡፡ ታማይ ዋክተ ቆሮንጦሱል ዓለም አቀፋዊት ኪን ግርክ ካታማ ተካምኮ አሞል አካይያ አክያን ሮማ ግዝአቲህ ዋና ካታማ ኪይይ ቲነ፡፡ ታይ ካታማ ናባ ንግዲህ እንቅስቃሴህ፣ ዮምዶሮጀወ ባህለህ፣ ጋዳህ ተምፈደደነሚህ አሞል ይነ ስደትከ ወይ ሞራል ራድናንከ ሃይማኖታት ማንጋህ ትምዽገቲያ ኪይይ ቲነ፡፡         

ሐዋርያ ባዽሳህ ቱክረት አልአበም ሞሶዓሪ አዳል ይነ ባዽሳህከ ስድነት ሂወት፤ ታማምባሊህ ኃዶይታ ጉርታዮከ ሓዳር ዳዓባል፣ ኅልናት ኤሰሮህ  ዳዓባል፣ ሞሶዓሪ ሠርዓቲህ ዳዓባል፣ መንፍስ ቁዱስ መተሖዎከ ኡግታቶ ዳዓባል ኪይይ ይነ፣ በሠራታ ቃል ታሃሞሚህ ኤሠሮ ዋንስታም ጥንቃቀህ ካብሳ፡፡ ካኃኖህ ፉጊ ህዝበህ ዮሖወ መተሖዎኮ ታይሰም ኪናም ያግልጸም( ምዕራፍ 13) ታይ ማጽሐፍኮ ጋዳህ ይምድገ ክፍለ ኪናም ያምግምተ፡፡

   ---------------------------------------------------------

  ማዕራፋ1  

1. ፉጊ ፍቃዳህ ኢየሱስ ክርስቶስህ ሐዋርያ ያኮ ደዕምመ ጳውሎስከ ኒሳዓል ሶስቴንስ፣ 2. ክርስቶስ ኢየሱስሊህ ሊይይ ይኒን ኢንኪኖህ /ኅበረቲህ/ ተን ቲያከ ኒ ማዳራ የከ ንማዳሪ ኢየሱስ ክርስቶስህ ምጋዓህ ኢሲ ቦታል ደዕምምታ ክርስቲያን ፉጊ ቁዱስ ህዝበ ያኮና ደዕምምተ ቆሮንጦስ ክርስቲያን ሙሉኡድ፣ 3. ናባ መዔፉጎከ ማደሪ ኢየሱስ ክርስቶስህ ጸጋከ ሳላም ሲናህ ያኮይ፡፡                                                   

  ምስጋና መዔፉጎህ

4. ኢየሱስ ክርስቶስህ ኡላህ መዒፉጊ ጸጋ ሲናህ ዮሖወጉል ሲን ምክንያታል ኡማንጉል አይምስግኒክ አኒዮ፡፡ 5. ኡማን ጉዳይህ ቃላህ ያኮይ ኢዽጋህ፣ ክርስቶሱህ ትህብትሚን፡፡ 6. ክርስቶስ ዳዓባል ሲናክነ ምስክርነት ሲናህ ይጽንዔ፡፡ 7. አማይጉል ማዳሪ ኢየሱስ ክርስቶስህ ሙምቡሉይህ ኢላሎድ ማርታንጉል ኢንኪ ዓይነቲህ መንፈሳው ጎሮን ስናክ ምያግዱለ፡፡ 8. ኒማዳሪ ኢየሱስ ክርስቶስ ጋሓ ለለዕ ኢንኪ ናቃፋ ሂኒም ገይምቶና፣ ኡሱክ ባክቶ ፋናህ ስክተኒህ ማርቶና ሲን አበለ፡፡ 9. ካባዽህ ማደሪ ኢየሱስ ክርስቶስሊህ ኅብረት  ታሎና ስን ደዔ መዔፉጊ ይምእምነቲያ ኪኒ፡፡          

ክርስቲያን ፋናድ ባዽስ አኔዋዮይ

10. ይሳዖሎ!"ባዽሲ ሲን ፋናድ አኔዋዎይ፣ ኡምቢክ ለ ኤምሰመመዓይ ኢንኪ ሓሳብከ ኢንኪ ዓላማህ ሲክ ኤያይ ማራ፣ ኤዽሔህ ኒማዳራ የከ "ኢየሱስ ክርስቶስህ ምጋዓህ ስን ዻዒማክ አኒዮ፡፡ 11. ይሳዖሎ! ሲን ፋናድ ክርኪሪከ ባዽሲ ያነም ቀሎዔ በተ ሰብኮ ኦበህ አነ፡፡ 12. ታሃም አቲን ሲነሲነህ"አኑ ጳውሎስቲያ ኪዮ፣ አኑ አጵሎስቲያ ኪዮ፣ አኑ ጴጥሮስቲያ ኪዮ፣ አኑ ክርስቶስቲያ ኪዮ"አይክ ታኒን፡፡ 13. አማይጉል ክርስቶስ ኃድመ? ጳውሎስ ሲናህ ይምስቂለ? ወይ ትምጥምቅኒም ጳውሎስ ምገዓህ ኪቲኒ? 14. አኑ ቀርስጶስከ ጋይዮስ ሂኒም ሲንኮ ቲያ ማይጣማቅኒዮ መዔፉጎ አይምስጊነ፡፡ 15. አማይጉል ጳውሎስ ምጋዓህ ኢምጥምቀህ አኒዮ የህ ዋንስቶ ዺዓቲ ሚያነ፡፡ [16. ዓዶም ኪኒ፣ እስጢፋኖስ በተ ሰብ ኢይጥምቀህ አኒዮ፣ ታሃምኮ በሕታም አኑ ኢይጥመቀ ሒያው ታነም ማዺገ፤] 17. አይሚህ ክርስቶስ ይፋረም በሠራታ ቃል አይባሣሮ ኪኒ ኢካህ አይጣማቆ ማኪ፣ ክርስቶስ ማስቀል አሞክ ይምስቂለህ ራበም ካንቶ ተከህ ራዕታምኮ፣ በሠራታ ቃል አይብሥረም ሒያው ቢልሓትኮ ገይምተ ዋኒህ ማኪ፡፡

 ክርስቶስ ፉጊ ብልሓትከ  ኃይላ ኪኒ

18. ክርሰቶስ ማስቃል አሞክ ታካሪመህ ራበ፣ ያዽኄ ቃል ታይለየ ሒያዋህ ምዽዋይቲድ ሎይማ፣ ናዽኄ ኖያህ ለ መዔፉጊህ ኃይላ ኪኒ፡፡19. አይሚህ፣ "ብልሓት ለሚክ  ብልሓት አይለየ ሊዮ፣

         ሊቃውንቲ ኢዽጋ ሓብሲሰ ሊዮ፣"የህ ይምጽሒፈ፡፡

20. ኢስኪ ብልሓት ለቲ አልያነ? ማዻጊ አልያነ? ያመረመረቲ አልያነ? መዔፉጊ ታይ ዓለሚህ ብልሓት ሚዸዋይቲ አበህ ሚያነ? 21. ታይ ዓለሚህ ሒያው ሲኒ ብልሓታህ መዔፉጎ ያዻጎና ዽዓናምኮ፣ ፉጊ ኢሲ ብልሓታህ ተን አሊፈ፣ ያከካህ ዓለሚህ ዱዲኖህ ሎይምታ ወንጌል ፋሮ /መልእክት/ አምነዋይታም ያይዳኃኖ ፉጊ ዲላይ የከ፡፡ 22. ምናልባት  አይሁድ ታምራት ያብሎና ጉራን፣ ግርካውያን ለ ብልሓት ያብሎና ጉራን፡፡ 23. ናኑ ግን ክርስቶስ ኖያ ዮዋ ይምስቅለም ናምስክረ፣ ታይ ምስክሪነት አይሁዱህ ዒንቅፋት ኪኒ፣ ግርካውያናህ ዱዲኖ ኪኒ፡፡ 24. ደዕምምተሚህ ለ አይሁዱህ ያኮይ ግሪኪህ ክርስቶስ መዔፉጊህ ኃይላከ ፉጊ ብልሓት አካህ ኪኒ፡፡ 25. አይሚህ መዔፉጎል ዱዲኖ ኪኒ ያናህ ያምሕስብ ጉዳይ ሒያው ብልሓታኮ ናባ፣ ፉጎል ሩክታ ኪኒ የኒህ ያምሕሰበ ጉዳይ ሒያው ኃይላኮ አጋናል ኪኒ፡፡ 26. ይሳዖሎ! መዔፉጊ ሲን ደዔ ዋክቲህ ዓይነቲህ ሒያው ክይክ ትንኒም ኢዝክራ፣ ሒያው አተሓሳሲባህ ሲን ፋንኮ ማንጎ ብልሓት ለም ያኮይ ኃይላ ለም ያኮይ ናባ ሒያው ማና፡፡ 27. መዔፉጊ ብልሓት ለም  ሖላሶ ዓለሚል ዱዲት ባሊህ ሎይምታ ሒያው ዶረ፣ ኃይላለም ሖላሶ ዓለምል ሩኩታም ባሊህ ታምቡሉወም ዶረ፣ 28. ዓለምል ሒያዋህ ክብረ ለቲያ የከህ ያመቡሉወ ጉዳይ ያይላዮ፣ ዓለምል ዋራዳከረደቲያከ ዻይትመቲያህ ይሚግደህ ያምቡሉወቲህ ጉዳይ ዶረ፡፡ 29. ታሃሞም አበም አኪናን ሒያውቲ ፉጊ ነፊል የከህ ያምክኄምኮ ኪኒ፡፡ 30. አቲን ለ ፉጊ ኢየሱስ ክርስቶስሊህ ኅብረት ታሎና አበ፣ አማይጉል መዔፉጊ ኢየሱስ ክርስቶሱህ ኒብልሓት፣ ኒጽደቀ፣ ኒቅድስና፣ ኒበዳ ያኮ አበ፡፡ 31. አማይጉል ማጽሐፍ ያም" ያምኪሔ ቲይ መዔፉጎህ ያማካሖይ፡፡"                           

ማዕራፋ 2  

 ክርስቶስ ስቅለት

1. ይሳዖሎ! አኑ ሲን ኡላል ኤመተጉል፣ መዔፉጊህ ምሥጢር ሲን ኢምሂረካህ ዋኒ ዽዒከ ፍልስፍና ብልሓት ሲን ማይባላይኒዮ፡፡ 2. አይሚህ ሲንሊህ ኢነ ዋክተ ኢየሱስ ክርስቶስኮ በሕህ ባዽሳህ ለ ማስቀል አሞክ ታካሪመህ አካህ ራበሚህ ጉዳይኮ ፈር ኢንኪ ጉዳይ አዽገምኮ ኢወሲነህ ኢኒዮ፡፡ 3. አማይጉል ስንሊህ ኢነ ዋክተ ሩኩቲያ ኤከህ ማይስህከ ማንጎ አዻዾህ አሞል ኢነ፡፡ 4. ዋንስተም ያኮይ ኢምሂረ ቃል፣ መዔፉጊህ መንፈስህ ኃይላህ ይምድግፈህ ይነ ኢካህ ሒያው ጠበብከ ፍሎዞፊት አሞል ይምስሪተህ ሒያው ኢሲሳ ቃል ኪይይ ማና፣ 5. ታሃሞም ለ አበም ሲን ኢምነት ሒያው ብልሓቲህ አሞል ይምስርተቲያ አከካህ መዔፉጊህ ኃይላህ ይምድግፈቲያ  ያኮ ኪኒ።          

                             መዔፉጊህ ብልሓት                                 

6. ያከካህ መንፈስ ሂወቲህ አላይተም ሚብልሓት ቃላህ ዋንሲታክ ናነ፣ ዋንሲናም ታይ ዓለሚህ ብልሓት ያኮይ ባክቶል ሊይ ያከ ታይ ዓለምህ ገዛእቲህ ብልሓት ማኪ፡፡ 7. ናኑ ዋንሲናም ለ መዔፉጊ ዮኮመ ዳባናትኮ ባሶል ኒኪብረህ ዮይሶኖዶወህከ ሱዑተህ ይነ መዔፉጊህ ምሥጢሪህ ብልሓታህ ኪኒ፡፡ 8. ታይ ዓለምህ ገዛእቲህ ፋናድ ታይ ብልሓት ያዸገ ቲይ ኢንከቲ ሚያነ፣ ኢዽጋህ የከህ ያከዶማ ታይ ክብሪህ ማደራ ይስቅልኒህ አግዲፈ ማዻዺኖን፣ 9. ያኮይ ኢካህ ማጽሐፍ፣ 

          "ሒያው ኢንቲ አብለዋይተም፣ 

           ሒያው አይቲ አበ ዋይተም፣ 

           ሒያው አፍዓዶ አሕሲበ ዋይተም፣ 

           መዔፉጊ ኪኅንማራህ ዮይሶኖዶወ"ያዽሔ፡፡

10. ኖያህ ለ ፉጊ ኢሲ መንፈስህ ባርካታህ ኢሲ ምሥጢር ኖህ ዓዶሰ፣ አይሚህ መኤፉጊህ መንፈስህ አዳል መዔፉጊህ ማበሎ /ዕቅድ/ኡካ ራዔካህ ኡማን ጉዳይ ያምርሚረ፡፡ 11. ሒያው ዳዓባል ተከም የከምኮ፣ ኢሲ ዸግኃህ መንፈስኮ በሕህ ካያድ ያነ ሓሳብ ያዺገቲ አከቲ ኢንከቲ ሚያነ፣ ታማባሊህ መዔፉጊህ መንፈስኮ በሕህ ፉጊ ሐሳብ ያዺገቲ ቲይ ሚያነ፡፡ 12. ናኑ ታይ ዓለምህ መንፈስ ማጋራይኒኖ፣ ናኑ ጋራይነም መዔፉጊ ኖህ ዮሖወ፣ ኡማኒም ናዻጎ ኒዽዕሲሳ መዔፉጊህ መንፈስ ኪኒ፡፡

13. አማይጉል ናኑ መንፈሳውያን ጉዳይ መንፈሳውያን ኪን ሒያውኮ ገይመ ብልሓታህ አከካህ መዔፉጊህ መንፈስኮ ጋይማ ብልሓታህ ኪኒ፡፡ 14. መዔፉጊህ መንፈስ አለዋይታ ኃዶይታ ለ ሒያውቲ መዔፉጊህ መንፈስኮ ያምኃወ ሕንዳኮ ጋራዎ ማዺዓ፣ አይሚህ ሕንዲ ናብነ ታምርምረም መዔፉጊህ መንፈሲህ ኡላኮ ኪንጉል ያስታውዓሎ ማዺዓ፣ ኤረ ካያህ ዱዲኖ የከህ አካህ ያምቡሉወ፡፡ 15. መዔፉጊህ መንፈስ ለቲይ ለ ኡማን ጉዳይ ያማርማሮ ዺዓ፣ ኡሱክ ኢሲ አሞህ ለ ኢንከቶህ ምያምርሚረ፡፡ 16. ታሃም፣ "ፉጊ አፍዓዶ ኢይ ያዻጎ ዺዓ? 

     ካያምካሮ ዺዓቲ አቲያ ኪኒ?" 

     የህ ይምጽሒፈም ባሊህ ኪኒ፡፡ 

    ናኑ ለ ክርስቶስ አፍዓዶ ሊኖ፡፡

ማዕራፋ 3

መዔፉጊህ አገልገለትህ ሢራሕ

1. ይሳዖሎ! ሓቀ ባሊህ የከምኮ፣ አኑ ሲን ኢምሂረም ኃዶይታትምከ ገና አጥንኪረ ዋይተ ሕፃናት ኪቲንጉል ክኒካህ መንፈሳውያን ክትኒሚህ ሲን  አይማሃሮ ማዽዒዕኒዮ፡፡ 2. ካፊን ፈሎ በቶ ዺዕታም ማክትንጉል አኑ ሲን ኢምግበም ሓን ኪኒካህ ካፊን ምግበ ማኪ፣ ካዶሊህ የከምኮ ካፊን ምግበ ታማጋቦና ገና ዺዔዋይታም ኪቲን፡፡ 3. አይሚህ ካዶሊህ ኃዶይታቲም ኪቲን፣ ሲነሲነህ ቲታል አይስንታናምከ ታምከረከሪኒም ኃዶይታቲም ተኪንጉል ማኪ? መዔፉጊህ ሒያው ያክኒም ራዕተህ ዓለም ሒያው ተኪንጉል ማኪ? 4. ቲይ"ጳውሎስ ቲያ ኪዮ"አከቲ ለ"አኑ አጵሎስ ቲያ ኪዮ"አይክ ፉጊ ሒያው ክትኒም ራዕተህ ዓለም ሒያው ተክንጉል ማኪ? 5. ኢስኪ አጵሎስ አይምቶ ኪኒ? ጳውሎስ ለ አይምቶ ኪኒ? ኢሲን ኡኮ አቲን ታማኖና ሲናህ አበን አገልገልት ኪኖን፣ ሲነሲነህ ያስግልግልኒም፣ ማዳሪ ተን ተናህ አካህ ይምዲበ ሢራሓህ ኪኒ፣ 6. አኑ ኢትክለ፣ ጳውሎስ ላየ የፈዔ፣ ዓሪሰቲ ለ ፉጎ ኪኒ፡፡ 7. አማይጉል ሢራሕ ዋና የከህ ታክለ ዓሪሰቲ መዔፉጎ ኪኒ ኢካህ ይትክለ ቲያ ያኮይ ላየ የፈዔቲይ ኢንኪም ማኪኖን፡፡ 8. ይትክለ ቲያ ያኮይ ላየ የፈዔቲ ኢንኪዳ ኪኖን፣ ሲነሲነህ ሲኒ ሢራሕ ባሊህ ሲኒ ዶሞዝ ጋራያን፡፡ 9. አይሚህ ናኑ ፉጉሊህ ኢንኮህ ሢራሕታም ኪኖ፣ አቲን ለ መዔፉጊህ ማሕራስከ ፉጊ ሕንፃ ኪቲን፡፡ 10. ፉጊ አካህ ዮሖወ ጸጋህ መጠኒል አጊሮ ኪን ነዳቀይ ሠረት ዒዳ፣ አከቲ ለ አኑ ዒደ ሠረቲህ አሞል ያንድቀ፣ ያከካህ ሲነሲነህ ታይ መሠረቲህ አሞል አይናህ ኢሰኒህ  ያምንድቀም ሰሊቶና ኤልታነ፡፡ 11. አይሚህ ኢንኪ ዋክተ ይምሥርተ መሠረትኮ በሒህ ኢንኪ አኪ ሠረት ያማሥራቶ ማዺዓ፣ ታይ ሠረት ኢየሱስ ክርስቶስ ኪኒ፡፡ 12. ታይ ሠረትህ አሞል ዋርቀህ ያኮይ ቡሩሩህ ኩቡር ኪን ዻህ ያኮይ ቦሖህ፣ ዓይሶህ ያኮይ ሐሣራህ ያንድቀ ቲይ ዪኔምኮ፣ 13. ቲቲያል አይሚህ ሢራሕመም አካህ ያምዽገ ፊርዲ ለለዕ አምተለ፣ ታማይ ለለዕ ኢሲሲ ሒያውቲህ ሢራሕ አይሚህ ሢራሕመም ጊራህ ይምፍቲነህ ያምቡሉወ፡፡ 14. ነዳቃይ ሢራሕ ጊራህ አምድምስሰካህ ይጽንዔህ ሶለምኮ፣ ነዳቃይ ሲልማት ገያ፡፡ 15. ሢራሕ ጊራህ የምቀጸለህ አክይምድምሲሰ ነዳቃያክ ለ ሲልማት አክራዓ፣ ያከካህ ኡሱክ ኢሲ ዸግኃህ፣ ጊራት አዳኮ ትላየህ ሓራረካህ ራዓ ሒያውቶባሊህ ያድኅነ፡፡

16. መዔፉጊህ በተ መቅደስ ክትኒምከ መዔፉጊህ መንፈስ ሲን አዳድ ያነም አዽግክ ማታኒንሆ? 17. አማይጉል ሒያውቲ መዔፉጊህ በተ መቅደስ ዒዳጉል መዔፉጊ ካያ ለ ዒዳ፣ አይሚህ ፉጊ በተ መቅደስ ቁዱስ ኪኒ፣ ታይ በተ መቅደስ አቲን ኪቲን፡፡

18. ኢንከቲ ኢሰ አይተለለ ዋዎይ፣ ታይ ዓለምል ብልሓት ደረያህ ብልሓት ለቲያህ ያምግደቲያ የከምኮ፣ መዔፉጊህ ሓቂ ብልሓት ገዮ ኢሲ ዸግኃ ዱዳህ ሎዎይ፡፡ 19. አይሚህ ታይ ዓለምህ ጥበብ ፉጊ ነፊል ዱዲኖ ኪኒ፣  

   ታሃም ለ፣

     "መዔፉጊ ብልሓት ለም ተን ቶንኮሉህ ተን ያጽሚደ፣"

       የምባሊሀ ኪኒ።

20. ታማም ባሊህ፣ 

      "ፉጊ ብለሓት ለሚህ ሓሳብ ካንቶ 

        ኪናም ያዽገ" ታም ትምጽሕፈ፡፡

21. አማይጉል ኡማን ጉዳይ ስንቲያ ክንጉል ኢንኪ ሒያውቲ አምክሔ ዋዎይ፡፡ 22. ጳውሎስ ለ የከሚህ፣ አጵሎስ የከሚህ፣ ዓለም የከሚህ፣ ሂወት የከሚህ፣ ራባ የከሚህ፣ ካዶ ያነቲያ የከሚህ፣ ሣራህ ያምተቲያ የከሚህ፣ ኡምቢህ ስንም ኪኖን፡፡ 23. አቲን ለ ክርስቶሲም ኪቲን፣ ክርስቶስ ለ ፉጊቲያ ኪኒ፡፡

ማዕራፋ 4

 ክርስቶስ አገልገልቲ

 1. አማይጉል ሒያው ኡምቢህ ናኑ፣ ክርስቶስ አገልገልቲ ናኮ፣ መዔፉጊህ ምሥጢር ናይሳዻጎ ኃላፍነት ኖህ ዮምሖወህ ኃዳራ ባዒል ናበህ ኒሎዎ ኤዳ፡፡ 2. ኃዳራ ባዒል ታምኢምነም የኪኒህ ገይሞና ኤዳ፣ 3. ይዳዓባል የከህ የከምኮ አቲን ዮል ትፍርድንሚህ ያኮይ አኪ ሒያውቲ ዮል ይፍርደሚህ ኢንኪ ጊደ ማሊዮ፣ ሓቀህ አኑ ኢኒ ዸግኃህ አሞል የከሚህ አፍራዶ ማዺዓ፡፡ 4. አኑ አዽገም ባሊህ የከምኮ ይኅሊና ይማታውቂሰ፣ ታሃም ለ ዮያ ንጹሕ ኪዮም ማታይርድኤ፣ ያከካህ ያሞል ያፍርደቲ ማደሪ ኢየሱስ ጢራሕ ኪኒ፡፡ 5. አማይጉል ማዳሪ ኢየሱስ ፍርደህ ያምተሚህ ባሶል ኢንከቲ አሞል ማፍራዲና፣ ኡሱክ ያሚተ ዋክተ ድተድ ሱዑተ ምሥጢር ኢፎል ያየዔ፣ ሒያው ሲኒ አፍዓዶድ ሱዑሰን ሓሳብ ዓዶሳ፣ ታማይ ዋክተ ኢሲሲ ዸገኃህ ፉጎኮ ኤዳ ምስጋና ገያ፡፡

6. ይሳዖሎ! ሲና አጥቃሞ ኤዸሔህ ታይ ጉዳህ ዮከ አጵሎስ ምሳለህ አበህ ዋንሲተህ አኒዮ፣ ታሃም ለ አካህ አበም"ትምሕግገም ማሓዺና"ያዸሔ ምክረ ኖኮ ታማሃሮና ኤህ ኪዮ፡፡ አማይጉል ኢንኪ ሒያውቶ ያምስግኒንም፣ አኪቶ ለ አይሪሳና መዳ፡፡ 7. አቱ አኪ ማራኮ አይሚህ ታይሰ? ኡማን ጉዳይ ጋራይተም አኪ ማራኮ ኪቶ፣ ኢሲ ዸግኃሂምኮ ኢንኪም ማሊቶ፣ ኢስኪ ኡማን ጉዳይ ጋራይተም አኪማራኮ ተከም ሣራህ ጋራየ ዋየ ሒያውቶ ባሊህ አይሚህ አምክሒክ ታነ?

8. ካዶማ ስን ጉርሱሳ ጉዳይ ሙሉኡድ ገይተን! ካዶማ ሀብታማት ተኪን! ኖኮ ባዽስምተኒህ ትንግሢን! ዓዲህ ትንግሢኒህ ታኪንዶ፣ ናኑ ለ ስንሊህ ኢንኮህ ናንግሠም ኢዻህ ታንግሢንዶ መዔም አከ ዻዸ። 9. አይሚህ ለ ፉጊ ኖያ ኢሲ ሐዋርያት፣ ራቢ ኤል ይምፍሪደህ ኤደራባን ቦታል በይታ ሒያውህ ፋናድ ባክቶቲም ናበም ዮድ ዻዓማ፣ ታሃምኮ ኡጉተሚህ ዓለምል ሙሉኡድ መላእክት ያኮይ ሒያው ነፊል ድግርከ አሳል ነከህ አምቡሉወ ሊኖ፣ 10. ናኑ ክርስቶሱህ ነህ ሚዸማሎሊ ነከ፣ አቲን ለ ክርስቶሱህ ብልሓት ለም ተኪን፣ አማም ባሊህ አቲን ኃይለ ለም ተኪን፣ አቲን ትክብረም ተኪን፣ ናኑ ለ ተምወረደም ነከ፡፡ 11.ካዶ ለ የከሚህ ታይ ሳዓት ፋናህ ሉወ ሊኖ፣ ባካረ ሊኖ፣ ዓራደ ሊኖ፣ ሳብዒመ ሊኖ፣ ኤል አስናርከ ዋይነህ አሕሲረ ሊኖ፤ 12. ኒኒ ናብራህ ንጉርሱሳ ጉዳይ ገይኖ ኒኒ ጋባህ ሢራሓክ ኃዋለ ሊኖ፣        ናባራንጉል ዳዳዔ ሊኖ፣ ኖል ያርዲንጉል ትዕግሥቲ አበሊኖ፤ 13. ኖህ ዋትማንጉልከ ምጋዕ ኖክ ዓይኒሳንጉል መዔ ቃለህ  ኤልደሄ ሊኖ፣ ካፋ ፋናህ ታይ ዓለምል ራደምከ ባዾኮ ፍይመ ዑዱፍ ነከ፡፡

14. አኑ ታሃም ሲናህ ኢጽሕፈም ኢምክሒን ኢኒ ዻይሎ አበህ ሲን አምካሮ ኢሕስበህ ኪዮካህ ሲና ሖላሶ ኤዸሔህ ማኪዮ፡፡ 15. ኢንኪጉል ኡካ ሲሐሕ /አስያሐታህ/ ሎይምታ አገልገልቲት ክርስቶሱህ ተልኒሚህ፣ ማንጎ አቦብቲ ማልቲን፣ መዔ ዋረ አይብሢርክ ክረስቶስ ኢየሱሱህ ሲን ዻለቲ ዮያ ጥራህ ኪኒ፡፡ 16. አማይጉል ይምሳለ ታካታሎና ሲን ዻዒማክ አኒዮ፡፡ 17. ታሃሚህ ዳዓባህ ይምክሕነቲያከ ይምኢምነቲያ፣ ማዳራህ ይባዻ የከ ጢሞቲዎስ ሲናህ ፋረህ አኒዮ፣ አኑ ኢሲሲ ሲፍራል ሞሶዓሪቲል ሙሉኡክ ኢይምሂረምከ ክርስቶስ ኢየሱሱህ ገየ ዑሱብ ሂወቲህ መምረሒ ኡሱክ ሲን አስሔሰሰበ ለ።

18. ያከካህ ሲንኮ ጋሪጋሪ አኑ ሲን ዋርሲሞ ማምተም የከልኒህ ትዕብቲህ የመጊን፣ 19. ያከካህ ማዳሪ ዲላይ የከምኮ ዳጎ ዋክቲህ አዳል ሲኑላል አምተሊዮ፣ ታማይ ዋክተ ታይ ትዕቢት ለሚህ ዋኒ ጢራህ አከካህ ተን ኃይላ አዻጎ ጉራ፡፡ 20. አይሚህ መዔፉጊህ ማንሥግቲህ ዋሪህ ጉዳይ አከካህ ፉጊ ኃይላ ኪኒ፡፡ 21. ጉርታናም አይም ኪኒ? ቅጻዓቲ ኢሎ ኢብዸህ ሲና ዻጋህ አማቶ ጉራክ ታኒን? ወይ ካሓኖከ መዔነ መንፈስሊህ አማቶ ጉራክ ታኒን?

 ማዕራፋ 5

   መእመናን ፋናድ የከ ሖላሳ ጉዳይ   

1. ሲን ፋናድ ሖላሳ ዙሙት ሥራሕ ያነም ዋረይታ፣ ታይ ዓይነቲህ  ዙሙት ሥራሕ አረማውያን አዳድ ኡካ አከዋይታም ኪኒ፣ ሀይከ አባ ኖማ ኢሲ ኑማ ባሊህ አብተህ ማርታም ታነ ያን፡፡ 2. ኢስክ ታጊድ ሖላሳ ጉዳይ ሲን ፋናድ ያነሃኒህ አይሚህ አትዕብትክ ታኒን? ናቢህ ታይ ጉዳህ ታኅዛኖናከ ታይ ዓይነቲህ ሢራሕ ያፍጽመ ሒያወቶ ሲኒ ፋንኮ ሃዳንቶና ሲናህ ኤዳይ ይነ፡፡ 3. ኢንኪጉል ኡካ አኑ ኃዶይታህ ስንሊህ አኔዋየሚህ መንፈስህ ሲንሊህ ኪዮ፣ ሊኪዕ ስንሊህ አነምባሊህ ኤከህ ታይ ዓይነቲህ ሩክሰት ሥራሕ ይፍጽመ ሒያውቲህ አሞል፣ ማዳሪ ኢየሱስህ ምጋዓህ ኤል ኢፍሪደህ አኒዮ፡፡ 4. ታከሄሊን ዋክተ አኑ ለ ማዳሪ ኢየሱሲህ ኃይላህ ሲን ፋናድ መንፈስህ ገይማም ኢዻህ፤ 5. ኃጢአታህ ተመገ ታይ ሒያውቲህ ኃዶይታ ታምቃጻዖ ሰጣናህ ትላሰኒህ ታሓዎና ኤዳ፡፡ ታሃም አብታም ማዳሪ ፍርደህ ያሚተ ለለዕ ታይ ሒያውቲህ ናፍሲ ያድኃኖ ዒሎህ ኪኒ፡፡          

 6. አማይጉል ታትዕብትኒም ካንቶህ ኪኒ፣ ዳጉ መብኮዒ ቡኩዕ ሙሉኡድ ያይቡኩዔም አዽጊክ ማታኒኒ? 7. ካዶ ተክኒም ባሊህ ኡማ ሞብኮዒ ሂን ዑሱብ ቡኩዕ ታኮና፣ የምዔለ መብኮዒ ኤይለያ፣ አይሚህ ኒ ፋስጊህ ባዓሊህ ዒዶይታ የከ ክርስቶስ ኒዻህ ይምሥውዔ። 8. አማይጉል ዓማጸከ ኡምነህ የመገ ዳዓይና ኪን መብኮዒ አከካህ፣ መብኮዒ ኤድ አኔዋይታ ቅንዕናከ ሓቂ ኤድ የመገ ኢንራህ ኒኒ ባዓል ናስካባሮይ።

9. ታሃምኮ ባሶህ ሲናህ ኢጽሕፈ መልእክቲል ታምንዚረምሊህ ማምሓባባሪና ሲናከህ ኢኒዮ፡፡ 10. ታሃም ሲናካይህ ዓለም አመንዘርት ያኮይ ኢሳሞህ ታምሆጎጎወ ሒያውኮ ያኮይ ባዸዻሊህ ያኮይ ጣዖት ታይምሊከም ሊህ ማምሓባባርና ያናማህ ማኪዮ፣ ታሃም ተከምኮማ ዓለምኮ ታውዖና ሲን ጉርሱሳይ ይነ ማለት ኪኒ፡፡ 11. አኑ ለ ሲናህ ኢጽሕፈም ክርስቲያን ኢስመኒህ ታምንዚረምሊህ ያኮይ፣ ታምሆጎጎየምሊህ ያኮይ፣ ጣዖት ታይምልከምሊህ ያኮይ፣ ሒያው ምጋዕ ዓይንሳምሊህ ያኮይ፣ ታስክረምሊህ ያኮይ፣ ጋርዕታምሊህ ማምሓባባርና ያናምህ ኤዸሔህ ኪዮ፡፡ ታጊዲን ሒያውሊህ ፈሎ ኢንኮህ ማበቲና፡፡ 12. ክርስቲያን ማኅበርኮ ኢሮል ታነ ሒያውህ አሞል ያፍሪዲኒም ይጉዳይ ማኪ፣ ክርስቲያን ማኅበሪህ አዳድ ታነ ሒያውህ ጉዳይ አቲን ታፍራዶና ዽዒታናህ ማኪሆ? 13. ኢሮል ታነ ሒያውህ ጉዳል ያፍርደቲ ፉጎ ኪኒ፣ አማይጉል ማጽሐፍ ያም ባሊህ "ኡማ ሒያው ሲኒ ፋንኮ ምሪሕ ኢሳ፡፡"

ማዕራፋ 6

 ክርስቲያን ፋናድ ታነ አምሰማማዕቲ ዋይቲ አይናህ ኢሰኒ ያይላዮና  ኤዳም

1. ስንኮ ኢንከቲ ክርስቲያንቶ የከህ ኢሲ ሳዓሊህ ያንገዔጉል፣ ጉዳይ መዔፉጊህ ሒያው ፍርደህ አካህ ያባምላዎ አባም ኢዻል ኪሰህ አረማውያን ፍርዲህ ባይቶህ ያዳዎ አይናህ የህ ያምድፍረ? 2. ፉጊ ሒያው ዓለም አሞል ያፍሪዲኒም ማታዽጊኒ? ኢስክ ዓለም አሞል ታፍሪደም ተኪኒህ ታይ ዒንዻ  ጉዳይህ አሞል ታፍራዶና አይናህ ተኒህ ታንታና? 3. መላእክት አሞል ኡካ ናፍርደም ማታዽጊኒ? ኢቦል ታይ ዓለምህ ጉዳይህ አሞል ያይሰ ዒለህ ናፍራዶ አይናህ ነህ ማዽዒና? 4. አማይጉል ሲነሲነህ ተን ገዒኒሚህ ክርስቲያን ማኅበርኮ ኢሮ ኪን ዻይታን ሒያውህ ነፊል ካብተኒህ አይናህ ተኒህ ታምከሰሲኒ? 5. ታሃም አዽሔም ሖላስቶና ኤህ ኪዮ፣ ኤረ ተከሚህ ሲን ፋናድ ዋጋረህ ኤዳ ስማግለይቲ ማገይማ? 6. ኢንኪ ክርስቲያንቲ አኪ ክርስቲያንቶ ይክስሰህ አረማውያን ፍርዲህ ዓረህ በያም ታይ ምክንያታል ማኪ?

7. ኤረ ሲነሲነህ ታሞጎትኒም ኢሰህ ሲናህ ውርደት ኪኒ፣ የመንገሚህ አቲን ታምብድልኒም ማታይሰ? ታማም ባሊህ አቲን ታምጹቁንኒም ማታይሰ? 8. አቲን ለ ሳዖል ኪን ክርስቲያኒህ አሞል ኡካ በደል አባክ ታኒን፡፡9. ዓመጽቲ መዔፉጊህ ማንግሥቲ ሚያውሪስኒም አዽጊክ ማታኒንሆ?  ታይ ጉዳህ ማንጋጋይና፣ ሱስ ለም ያኮይ፣ ጣዖቱህ ታስጊደም  ያኮናይ፣ ታምንዚረም ያኮናይ፣ ላብቲያሊህ ዙሙት አብታ ላበቶ ያኮይ፣ 10. ወይ ባዸዻ ያኮናይ፣ ሀጉገሊት ያኮናይ፣ ታስክረም ያኮናይ፣ ሒያው ምጋዕ ዓይኒሳም ያኮይ፣ ዘረፍት መዔፉጊህ ማንግሥት ምያውርሲን፡፡ 11. አቲን ጋሪጋሮክ ታሃም ባሊህ ክይይክ ቲኒን፣ ካዶ ለ ማዳሪ ኢየሱስ ክርስቶስህ ምጋዕከ ኒ አምላኪህ መንፈስህ ኃጢአትኮ ዓካልተን፣ ፉጎህ ባዽስመ ቁዱስ ህዝበ ተኪኒህ፣ ትጽድቂን፡፡

                     ሲኒ ሰውነት መዔፉጊህ ክብረድ አሲሳ

12. ኡማን ጉዳይ ዮህ ይምፍቅደ፣ ለ ኡማን ጉዳይ ይያጥቅመ ማለት ማኪ፣ ኡማን ጉዳይ ዮህ ይምፍቅደ፣ ያኮይ ኢካህ አኪናን ጉዳይህ ባሪያ ኤክህ ማምግዚኤ፣ 13. ምግቢ ጋርባህ፣ ጋርቢ ለ ምግበህ ኪኒ፣ ይቦል ኡኮ ፉጊ ምግበ ያኮይ ጋርባ ያይለየ፣ ያኮይ ኢካህ ኒ ስውነት ኒ ማዳራ ኢየሱሱህ፣ ማዳሪ ኢየሱስ ኒ ሰውነቲህ ኪኖንጉል፣ ናካል ዝሙት አሰና ያኮ መዳ፡፡ 14. መዔፉጊ ማዳራ ኢየሱስ ራባኮ ኡጉሠ፣ ኖያ ለ ኢሲ ኃይላህ ራባኮ ኒኡጉሣ፡፡15. ሲን ሰውነት ክርስቶስ አካል ክፍለ ኪናም አዽጊክ ማታኒኒሆ? አማይጉል ኢየሱስ አካል ክፍለ በየህ አመንዝራ ኑማህ አካል ክፍለ ያኮ አቦ ዮህ ኤዳ? ኢንኪጉል መዳ! 16. አመንዝራ ኪን ኑማሊህ ኃዶይታ ጉርታዮህ ያምሔበበረ ሒያውቲ ተያሊህ ኢንኪ አካል ኪናም አዽጊክ ማታኒኒሆ? አይሚህ"ላሚህ ኢንኪ አካል ያኪን"የህ ይምጽሕፈህ ያነ፡፡ 17. ማደሪ ኢየሱስሊህ ያምሔበበረ ሒያውቲ ለ ካሊህ መንፈስህ ኢንከቶ ያከ፡፡ 18. አማይጉል ዙሙትኮ ምሪሕ ኤያ፣ ሒያው አብታ ኃጢአት ኡምቢህ ሰውነትኮ ኢሮል ያከ ቲያ ኪኒ፣ ዙሙት ለ ያፍጽመ ሒያውቲ ለ ኢሲ ሰውነቲህ አሞል ኃጢአት አባ፤ 19. ሲን ሰውነት ፉጎኮ ጋራይተንቲያከ ሲን አዳድ ማራ መንፈስ ቁዱስ በተ መቅደስ ኪናም አዽጊክ ማታኒኒሆ? አማይጉል አቲን ፉጊም ኪቲን ኢካህ ሲኒ ዸግኃሂም ማክቲን፡፡ 20. አይሚህ ኡሱክ ሊሞህ ሲን ዻመ፣ አማይጉል ሲኒ አካላህ መዔፉጎ ኢስክቢራ፡፡

ማዕራፋ 7

 ኪዳናህ ካብተ ኤሠሮከ ዮምሖወ መልስ

1. ዮል ትጽሒፊን ኤሠሮህ ሒያውቲ ኑማሊህ ኃዶይታ ጊብረህ ቲታ ገየ ዋናም ያኮይ፣ ኑማ ኦርቢሰ ዋያናም መዔም ኪኒ፡፡ 2. ያከካህ ዙሙት ኃጢአታድ ራዳናምኮ፣ ኢሲሲ ባዽ ኢሲ ኖማ ያሎይ፣ ኢሲሲ ኑማ ኢሲ ባዕላ ታሎይ። 3. ባዕሊ ኑማህ ታኮ ኤዳ ኪዳን መብት ተካልተ ዋዎይ፣ አማም ባሊህ ኑማ ኢሲ ባዕላህ አብቶ አካህ ኤዳ ተክልል መብት ካ'ካልተ ዋይቶይ፡፡ 4. ኑማ ኢሲ አካሊህ አሞል ሢልጣን ማል፣ ተ አካሊህ አሞል ሢልጣን ለቲይ ተባዕላ ኪኒ፡፡ ታማም ባሊህ ባዕሊ ኢሲ አካሊህ  አሞል ሢልጣታን ማል፣  ካ አካሊህ አሞል ሢልጣን ለቲያ ካ ኑማ ኪኒ፡፡ 5. ጻሎቱህ ያትጋሆና ላሚማክ የምሰመመዒኒህ ትምውሲነ ጊዘህ አከዋየምኮ ባዽስመኒህ ቲይ ቲያ ተክልል መብት ካልተ ዋዎይ። ሲነ ታምቃጻጻሮና ታንተኒህ ሰጣን ሲን ያፊቲነክ ጋባላዓይ ኢንኮህ ቲካ፡፡ 6. ታሃም ለ ሲናካም ምክረህ ኪኒ ኢካህ ትኢዛዛህ ማኪ፡፡ 7. ሒያው ኡምቢህ ዮያ ባሊህ ኑማ ኦርቢሰካህ ማራንዶ አክኂነ ዻዸ፣ አይሚህ ኢሲሲ ቲያህ ፉጊ ተንተን ዒዲል አካህ ዮሖወ፣ ቲይ ኢንኪ ዓይነቲህ ዒዲል፣ አከቲ ለ አኪ ዓይነቲህ ዒዲል ለ፡፡ 8. ኦርብሰምከ አማም ባሊህ ባዒል አክ ራብተ ሳዮክ አዽሔም ታህ ኪኒ፣ ኦርብሰካህ ዮያ ባሊህ ማራናም መዔም ኪኒ፡፡ 9. ያኮይ ኢካህ ስነ ያምቃጻጻሮና ታነኒምኮ ኦርቢሶናይ፣ አይሚህ ኃዶይታ ጉርታዮህ ሓራራናምኮ ኦርቢሳናም ታይሰም ኪኒ፡። 10. ኦርብሰሚህ አሓየ ትእዛዝ ታይቲያ ኪኒ፣ ታይ ትኢዛዝ ማዳሪቲያ ኪኒካህ ይቲያ ማኪ፣ ኦርበሰ ኖማ ኢሲ ባዕላኮ ባዽሲመ ዋይቶይ፣ 11. ባዽስምተምኮ ለ ኦርቢሰካህ ዲቦህ ማርቶይ ወይ ኢሲ ባዕላሊህ ዋጋርቶይ፣ ታማሃም ባሊህ ባዕሊ ኢሲ ኑማ አፍቲሔ ዋዎይ፡፡

12. አኪ ማራክ ለ ማዳሪ አከካህ አኑ ኢነህ አዽኄም ታሃም ኪኒ፣ ኢንኪ ክርስቲያንቶ ኪን ሒያውቲ ክርስቲያንቶ አከዋይታ ኖማ ያለጉልከ ኢንኮህ ማሮና ጉርታም የክኒምኮ አፍቲሔ ዋዎይ፡፡ 13. ክርስቲያንቶ ኪን ሳይጉደይታ፣ ክርስቲያንቶ አከዋ ባዕላ ታለጉል ተሊህ ማሮ ጉረምኮ አፍትሔ ዋይቶይ፡፡ 14. አይሚህ ክርስቲያንቶ አከዋ ባዕላ፣ ክርሰቲያንቶ ኪን ኑማህ ምክንያታል ፉጊ ካጋራ፣ ክርስርትያንቶ አከዋይታ ኑማ ለ፣ ክርስቲያንቶ ኪን ባዕሊህ ምክንያታል መዔፉጊ ተጋራ፡፡ ታሃም አከዋይተምኮማ ተን ዻይሎ መዔፉጊህ ሒያው ያኮና ማዽዓን፣ ታይ ዓይነቲህ ዓይዳህ ማርተንምኮ ለ ሲን ዻይሎ መዔፉጊህ ሒያው ኪኖን፡፡ 15. ክርስትያንቶ አከዋ ወገን ባዽሲሞ ጉረምኮ ባዽስሞይ፣ ታይ ዋክተ ለ ክረስቲያን ኪን ወገኒህ ባዕላ ያኮይ ኑማ፣ ኢንኪ ዓይነቲህ ጊደታ ተን ምያታብዸ፡፡ አይሚህ ፉጊ ኒደዔም ኡኮ ሳላማህ ማርኖ ኪኒ፡፡ 16. አቱ ክርስቲያንቶ ኪን ኑማ፣ ክርስቲያንቶ አከዋ ኩባዕላ ምናልባት ካ ታይዳኃኖ ታኮ አይም ታዽገ? አቱ ክርስቲያን ባዻ፣ ክርስቲያንቶ አከዋ ኩባዕላ ምናልባት ታይዳኃኖ ታኮ አይም ታዽገ?   

 መዔፉጊ ሲን ደዓጉል አካህ ሱግተን ሱግሳህ ሱጋ

17. ኢሲኢሲ ቲይ መዔፉጊ ዮሖወ መቶሖዎከ ፉጊ ኒደዓ ዋክተ አካህ ሱግና ሱግሲ ያናዎይ፣ ሞሶዓሪትህ ኡምቢህ ኦሖወ ደምቢት ታሃሞም ኪኒ፡፡ 18. አኪናን ሒያውቲ ይምግሪዘምኮ ሳራህ ደዕምመም የከምኮ አምግሪዘ ዋየቲያ ባሊሀ ኪናም አሕሲበ ዋዎይ፣ አምግሪዘካህ ደዕምመ ቲያ የከምኮ ለ ያምጋራዞ ጊዳድ ማለ፡፡ 19. ምጋራዝ ያኮይ አምጋራዝ ዋይቲ ሊሞ ማለ፣ ዋና ጉዳይ ፉጊ ትኢዛዝ ያፍጽሚኒም ኪኒ፡፡ 20. አማይጉል ኢስኢስ ሒያውቲ መዔፉጊ ካደዓ ዋክተ አካህ ሱገ ዒለህ ያኮይ፡፡ 21. ፉጊ ኩደዔ ዋክተ ባሪያ ክክ ቲነ? ባሪያ ታከዶማ ጊደ ሊይ ማና፣ ኤል ማምፃናቂን፣ ናፃ ተከህ ተውዔህ ዒዲል ገይተምኮ ለ፣ ታይ ዒዲል ኮክ ትላየ ዋዎይ፤ 22. አይሚህ ባሪያ የከህ ያነሃኒ ደዕሚመ ሒያውቲ ማዳራህ ኢየሱሱህ ነፃነት ገያ፣ አማም ባሊህ ናፃህ ያነሃኒህ ማዳራህ ደዕምማ ሒያውቲ ክርስቶስ ባሪያ ኪኒ፡፡ 23. መዔፉጊ ሊሞህ ሲን ዻመህ ያነጉል ሒያው ባሮት ማኪና፡፡ 24. አማይጉል ይሳዖሎ! ኢሲኢሲ ሒያውቲ ደዕምማ ዋክተ አካህ ሱገ ዒለህ መዔፉጊህ ነፊል ማሮይ፡፡

               ኦርቢሰ ዋይተ  ማሚኒህ  ዳዓባል ካብተ  ኤሠሮ                    25. ኦርብሰ ዋይተ ሒያዋህ ማደሪ ኢየሱስኮ ጋራየ ትኢዛዝ ማሊዮ፣ ያኮይ ኢካህ ፉጊ መሕረቲህ ኢሚነት ዮልዒደን ቲያ ኪዮሚህ መጠኒል     ይሓሳብ ታርከኮ ያክቲለ ቲያ ኪኒ፣       

26. ካዶ ኤል ናነ ዋክቲ ጸገም ዋክተ ኪናም ኢዻህ ኦርቢሰካህ ዲቦህ ማራናም መዔምህ ዮድ ኢግዳ፡፡ 27.ያከጉል ኑማ ኦርብሰህ ተከምኮ ታፍታሖ ማጉርን፤ 28. ያኮይ ኢካህ አቱ ኑማ ኦርብሳጉል ኃጢአት ኮክ ያከ ማለት ማኪ፣ ታማም ባሊህ ኢንኪ ዲንግል ባዕላ ኦርቢሳጉል ኃጢአት አክ ያከ ማለት ማኪ፣ ያኮይ ኢካህ ኦርብሳ ሒያዋል ማንጎ መከራ ኤድታግጢመ፣ ይትምኒት ታይ መከራኮ ያድኃኖና ኪኒ፡፡ 29. ይሳዖሎ! አኑ ሲናክ ካም ታሃም ኪኒ፣ ዳባን ይዉዹዸ ካማቦኮ ላካል ኑማ ለቲ፣ ኑማ አለዋ ቲያ ባሊህ የከህ ማሮይ፡፡ 30. ያኅዚነቲ አኅዚነ ዋቲያ፣ ኒያታቲ ኒያተ ዋቲያ የከህ ማሮይ፣ ኑዋይ ዻማቲ፣ ኑዋይ ካይም አከዋይታም ባሊህ አበህ ሎዎይ፡፡ 31. ዓለም ሀብተህ ያምጥቅመቲ፣ ሙሉኡድ ኤል አምጥቅመዋም ባሊህ የከህ ማሮይ፣ አይሚህ ካዲት ዓለምህ ኩነታት ቲላየና ኪኒ፡፡ 32. አማይጉል ኢንኪ ሓሳባህ አምጽኒቀካህ ማረቶና ኪሕኒዮ፣ ኑማ ኦርቢሰ ዋየ ሒያውቲ ማዳራ ኢየሱስ ኒያቲሳ ጉዳይ ጉራም ኢዻህ፣ ካሐሳብ ያቱኩረም ማዳራ ኢየሱስ ያብለ ሢራሓል ኪኒ፤ 33. ኑማ ኦርብሰ ሒያውቲ ለ ያሕሲበም ታይ ዓለምህ ጉዳይከ ኑማ አካህ ያስሔደረ ናብራህ ኪኒ፡፡ 34. ታይ አጋባቢራህ ታይ ሓሳብ ላማል ሓድሊማ ማለት ኪኒ፡፡ ታማም ባሊህ ባዕላ ኦርቢሰ ኑማ ያኮይ ድንግል ኢሲ ኃዶይታከ ናብሰህ፣ ትምቅድሰህ መዔፉጊህ ቲያ ታኮ ጉርታም ኢዻህ ታይ ሓሳብ ያቱኩረም ማደራ ኢየሱስ ያብለ ሢራሓል ኪኒ፡፡ ኦርብሰ ኑማ ለ ኢሲ ባዕላ ኒያቲሶ ጉርታም ኢዻህ ታሕስበም ዓለም ጉዳይ ኪኒ፡፡ 35. አኑ ታሃም ሲናካም ማጻወድ አዳድ ሳይተኒህ ታምጻጋሞና ኤህ አከካህ ታምጣቃሞና ኤህ ኪዮ፣ ይትምኒት አቲን ኤዳ ዒለህ ማርቶናከ ሲን ሓሳብ አምብትነካህ ሙሉእ ሲኒ አፍዓዶህ ማዳራ ኢየሱስ ታስጋልጋሎና ኪኒ፡፡ 

36. ኢንኪ ሒይውቲ ኦርቢሳምኮ ይውሲነህ ያነሃኒህ ሊሶ ተክልል ማደቲያ ታከጉልከ ኃዶይታ ካኃኖህ ኢሰ ያምቃጻጻሮ ዺዔ ዋየም የከምኮ  ኦርቢሶ ያሕሲበጉል፣ ኦረቢሶይ፣ ኦርቢሳጉል ኢንኪ ኃጢአት ማለ፡፡ 37. ያኮይ ኢካህ ኦርቢሶ ካያስግዲደ ጉዳይ አለዋየምኮ ኦርቢሰ ዋዎይ፣ ኦርቢሰ ዋናሚህ ዽዕ የለምኮከ ኦርቢሰ ሒኖ ትምውሲነ ውሳኔ አበምኮ፣ ኦርቢሰዋም መዔም ኪኒ፡፡ 38. አማይጉል ኑማ ኦርቢሳቲ መዔም አባ፣ ኦርቢሰ ዋያቲ ለ ታይሰም አባ፡፡ 39. ኑማ ተባዕሊ ሂወቲህ ያነም ፋናህ ቃልኪዳን ሕገህ ቱምዹወ ቲያ ኪኒ፣ ባዕሊ አክራበምኮ ለ ጉርተ ቲያ ኦርቢሶ ዺዒታ፣ ያከካህ ኦርብሳ ሒያወቲ ክርስቲያንቶ ያኮ ኤልታነ፡፡ 40. ይ ማብሎህ ለ ባዕላ ኡርብሳምኮ ዲቦህ ታከጉል ያይሰ ዒለህ ኒያተህ ማረ ለ፣ አኑ ለ ኡኮ መዔፉጊህ  መንፈስ ሊዮም ዮዻዓማ፡፡  

  ማዕራፋ 8   

ጣዖቱህ ትምሥውዔ ኃዶ

1. ጣዖቱህ ትምሥውዔ ኃዶ የከህ የከምኮ፣ ሪጊጽ ኪኒ"ኡምቢክ ለ ኢዽጋ ሊኖ፣"ያከካህ ኢዽጋ ኩ ታይትዕብተ፣ ካሓኒ ለ ኩያይጺሪየ፡፡ 2. ኢዽጋ ሊዮ የህ ያሕሲበቲ ዪኔምኮ አካህ ኤዳም ገና ማዻጊና፡፡ 3. ፉጎ ኪሒን ሒያውቲ ለ መዔፉጎል ያምዽገቲያ ያከ፡፡ 4. አማይጉል ጣዖቱህ ትምሥውዔ ኃዶ በታናሚህ ዳዓባል የከህ የከምኮ፣ ጣዖት ታይ ዓለምል ኢንኪሚድ ማሎይማም ናዺገ፣ ታማም ባሊህ ኢንኪ ፉጎኮ በሒህ አኪ አምላክ ምያነም ናዺገ፡፡ 5. ኢንኪጉል ኡካ አምላክ አከካህ አምላክ የኒህ ደዕምምታ ማንጎ አማልክትከ ማንጎ ማዶር ዓራናል ያኮይ ባዾል ያኒን የኒሚህ፤ 6. ኒ አምላክ ለ ኡማን ጉዳይህ ፈጣሪ የከ ቲያከ ናኑ ለ ካይም ተከሚክ ኢንኪ መዔፉጊ አባ ጥራሕ ኪኒ፡፡ ታማም ባሊህ፣ ኡማን ጉዳይ ካያህ ይምፍጥረምከ ናኑ ለ ካያድ ማርናም ኢንኪ ማዳሪ ኢየሱስ ክርስቶሱህ ጥራሕ ኪኒ፡፡ 7. ያከካህ ታሃም ታዽገም፣ ኡምቢክ ማኪኖን፣ ጋሪጋሪ ካዶ ፋናህ ጣዖት ያይምልክኒም ኪሕኖንጉል ኃዶ በታናም ጣዖቱህ ትምሥውዔም ባሊህ አበኒህ ኪኒ፣ አማይጉል ተን ኅሊና ሩኩቲያ ኪኒጉል ያርክሲን፡፡ 8. ያኮይ ኢካህ መዔፉጎል ካብ ኒሳቲ ምግበ ማኪ፣ በተዋይነሚህ ኖክ ያግዱለ ጉዳይ ሚያነ፣ በነሚህ ራዒስና ጉዳይ ማሊኖ፡፡ 9. ያኮይ ኢካህ ታይ ኢሲ ናፃነቲህ ኢምነቲህ አብርቲዔ ዋይታማህ ዒንቅፋት አክ ያከምኮ ሰሊታ፡፡ 10."አይሚህ ኢዽጋ ሊዮ" ጣዖቱህ ትምሥውዔም ጣዖት ዓረድ በታጉል ኢምነቲህ አጥንኪረ ዋየ ሒያውቲ ኩያብለጉል፣ ታይ ሢራሕህ ሒያውቶ ጣዖቱህ ትምሥውዔም በቶ ካ አይደፈፈሪይ ሚያነ? 11. አማይጉል ኮያህ"ማዻጋ ኪዮ ያናማህ" ክርስቶስ አካህ ራበ ቲያከ ኢሲ ኢምነቲህ አብርትዔ ዋየ ክርስቲያንቶ ያይለየ ማለት ኪኒ፡፡ 12. ታይ ዓይነቲህ ክርስቲያን ሲኒ ሳዖል አብድሊከ ሩኩት ተን ኅልና ለ ብያክ አባናማህ ክርስቶስ አብድልክ ታነ። 13. አማይጉል ፈሎ ክርስቲያን ይሳዓል ታይሰነከለቲያ ተከምኮ፣ ያምሰነከለምኮ ኤህ ኢንኪጉል ኃዶ ማበታ።

ማዕራፋ 9

 ሐዋርያ መብትከ ግደታ

1. አኑ ናፃነት ለ ሒያውቶ ማኪዮ? ሐዋርያ ማኪዮ? አኑ ማዳራ ኢየሱስ ኡብለህ ማነ?  አቲን ማደሪ ኢየሱስ ሢራሕ ውጤት ማክቲኒ? 2. ማዳራህ ዪ ሐዋርያነቲህ ይምዺገ ማኅተም አቲን ክትንጉል፣ አኪማራክ ኡካ ሐዋርያ አከዋይተን ሲናህ ለ ዓዲህ ሐዋርያ ኪዮ፡፡ 3."ሐዋርያ መብት ማሊቶ የኒህ"  ይሑሳም ትኔምኮ አካህ አሓየ መልስ ታይቲያ ኪኒ፤ 4. አኑ ምግበከ ታሙዑበም ገዮ መብት ማሊዮ? 5. አኪ ሐዋርያትከ ማዳራ ኢየሱስ ሳዖል ባሊህ ጰጥሮስ ባሊህ ለ ክርስቲያን ኑማ ኢስክቲለህ አዛሮ መብት አለዋት ዮያ ዲቦህ ኪኒ? 6. ወይ ሢራሓህ አጽዕሪክ ማርኖ ኖህ ኤዳም ባርናባስከ ዮያ ዲቦህ ኪኒ? 7. ደሞዝ ሂኒም ኢሲ ማላህ ወታሃደር ያስግልግለቲ አቲያ ኪኒ? ወይ ይትክለምኮ ፍረ አክ በተዋቲ አይቲያ ኪኒ? ዱየ ዱዋህ ዱየኮ ሓን አክ አዑበዋቲ ኢያይቶ ኪኒ?

8. ታሃም ዋንሲታም ሒያው አተሐሳስባህ ዲቦህ ኪኒ? ሕጊ ታህ አይይ ሚያነ? 9. አይሚህ ያስክይደ አዉሩክ አፍ አክማዻይን የህ ሙሴ ሕገህ ይምጽሒፈ፣ ይቦል  ፉጊ ታሃም የም አዉራህ ይሕስበህ ኪኒ? 10. መዔፉጊ ታህ የም ኖያህ ይሕስበሚህ ማኪ? ያሕሩሰቲ ታስፋህ ያሕራሶ፣ ያስክይደቲ ታስፋህ ያስካያዶ፣ ታይ ዓይነቲህ ኡማንቲ ኢሲ ጊደ ገዮ ታይ ትምጽሕፈም ዓዲህ ኒዳዓባል ኪኒ፡፡ 11. ናኑ መንፈሳውያን ጉዳይ ሲናህ ኒድሪየም የከምኮ፣ ሲን ኃዶይታህ በረከት ናዕየጉል ናባ ጉዳይ ኪናም ኪኒ? 12. አኪማሪ ታይ ጉዳይ ሲንኮ ሓድሊቶ መብት ሎኑህ የከምኮ ኢስኪ ናኑ ታሃምኮ ያይሰ መብቲ አይናህ ነህ አለዋይናም? ናኑ ለ ታይ መብቲል ኤል ማምጣቃምኒኖ፣ ታሃም አብነም ለ ክርስቶስ መዔ ዋረ ናይፋዳዳኖ ኒያዕግተምኮ ኒሕሲበህ ኡማን ጉዳይ ትዕሥቲህ ዽዒኖይ ነህ ኪኖ፡፡ 13. በተ መቅደስድ ታስግልጊለም ሲኒ ምግበ በተ መቅደስኮ ገያናምከ መሥዋዕት ኤል ያስቅርቢንርከህ አሞል መሥዋዕቲ ካብ ኢሳናምከ ታስግልጊለም መሥዋዕቲኮ ሓድለኒህ በታናም አዺጊክ ማታኒንሆ? 14. ታማሃም ባሊህ ለ መዔ ዋረ ታይብሥረም ሲኒ ቀለብ ታይ ሢራሕኮ ገዮና ማዳሪ ኢየሱስ ይውሲነ፡፡

15. አኑ ለ ታይ መብቲል ኤልማምጣቃምኒዮ፣ ታሃሞም ኢጽሕፈሚህ " ይመብት ዮህ አክብረካህ አይሚህ ራዔ?"ያናማህ ማኪዮ፡፡ ሒያውቲ አካህ አሚኪሔም ካንቶ ዮካባምኮ ራባም ዮህ ታይሰ፡፡ 16. በሠራታ ቃል ያይብሥሪኒም ይግዳድ ኪንጉል ኤል አምክኄ ጉዳይ ማኪ፣ ኤረ በሠራታ ቃል አብሢረካህ ራዔም ኤከምኮ ወዮ ኪኒ! 17. በሠራታ ቃል ጊዳድ ማለህ ኢነህ ጉረህ ኢብሢረምኮ ኢኒ ኃዋሊህ ሊሞ አለሊዮ፣ ኢምግዲደህ አበምኮ ለ ኃደራህ ዮህ ዮምሖወ ኃላፍነት ኢፍጽመካህ አኪ አበ ጉዳይ ያነ ማለት ማኪ፡፡ 18. ይቦል ይኃዋሊህ ሊሞ አይም ኪኒ? አማይጉል ይኃዋሊህ ሊሞ፣ በሠራታ ቃል ኢብስረርከህ ሊዮ መብትል ኤድ አምጥቃመካህ፣ በሠራታ ቃል አይብሢረም ኢኒ ሢራሕ ደሞዝ ማለህ ያፍጽምኒም ኪኒ፡፡ 19. አኑኮ ኢንከቲ ባሪያ አከካህ ናፃ ኪን ሒያውቶ ኪዮ፣ ያከካህ ዽዔሚህ መጠንል ማንጎ ማራ ኢድኅነህ አጥቃሞ ኤዽሔህ ኡማንቲህ ባሪያ ኤከህ አኒዮ፡፡ 20. አይሁድሊህ አከጉል አይሁድ አይዳኃኖ አይሁዳ ባሊህ ኤከ፣ ኢንኪጉል ኡካ አኑ ሙሴ ሕገክ ዳባል አከዋየምህ፣ ሙሴ ሕጊህ ዳባል ታነም አይዳኃኖ ኤህ ሙሴ ሕጊህ ዳባል ታነ ሒያው ባሊህ ኤከ፡፡ 21. ኢንኪጉል ኡካ አኑ መዔፉጊህ ሕገ ለቲያከ ክርስቶስ ሕጊህ ዳባል ኤከሚህ ሕገ ሂን አረማውያን አይዳኃኖ ኤህ ሕገ አለዋ ሒያውቶ ኤከ፡፡ 22. ኢምነቲህ ሩኩታም ተከም አይዳኃኖ ኤህ ሩኩታም ባሊህ ሩኩቲያ ኤከ፣ ዽዔሚህ መጠኒል ጋሮጋሮ አይዳኃኖ ኡማንትያሊህ ኡማን ጉዳይ ኤከ፡፡

23. ታሃም ኡምቢህ አበርከህ በሠራታ ቃሊህ በረከት ሓድሊቶ፣ በሠራታ ቃሊህ ዳዓባል ኤዽሔህ ኪዮ፡፡ 24. አርዳህ ሱቦና የኒህ ኡምቢህ ያምወደደሪኒም ባሊህከ ተንኮ ለ ኢንከቲ ዲቦህ ስልማት ጋራም ማታዽጊንሆ?  አማይጉል አቲን ለ ስልማት ጋራይቶናክ ኤረዳ፡፡ 25. አርዳህ ታምወደደረም ኡምቢህ ኃዋሊሳ ዱፍላ አባን፣ ኢሲን ታህ የኒህ ኃዋላናም ያለየ ዋከቲቲያ ኪን ሲሊማት ገዮና ኪኒ፣ ለል ናኑ ለ ኃዋልናም ያለየ ዋቲያትከ ኡማንጉሊቲያ ያከ አክልል ለ ገይኖ ኪኒ፡፡ 26. አኑ ለ ዓላማ አለዋ ሒያውቶ ባሊህ ካንቶህ ማርደ፣ ሓሓይታሊህ ያንዱፉለ ቲያ ባሊህ ካንቶህ ያንዱፉለ ሒያውቶ ማኪዮ፡፡ 27.  አማይጉል አኪማራ ዱፍላህ ደዔምኮ ላካል አኑ ኢኒ ዸግኃህ ዱፍላኮ ኢሮል ኤከህ ገይማምኮ፣ ኢኒ ናብሰ አምቆጾጾሪክ ዮህ ያምኢዚዘካህ አበሊዮ፡፡

 ማዕራፋ 10    

ማይሳዻግቲ   ምሳለ

1. ይሳዖሎ! ናቦብ ዳሩር ተን አሞል የከህ ተን አይምርኂይ ይነምባሊህከ ኡምቢህ ዓሳ ባሕራ ታበኒም ሲን አይዛካሮ ኪሕኒዮ፡፡ 2. ሙሴ ተኃባባርቲ ያኮና ታይ ዳሩሩድከ ታይ ባሕራል ይምጥምቂን፡፡ 3. ኡምቢህ ለ ኢንኪ ዓይነቲህ መንፈሳው ምግበ ይምግቢን፡፡ 4. ሙሉኡድ ኢንኪ ዓይነቲህ ታሙዑበም ዮዖቢን፣ ዮዖቢኒም ለ ተን ካታአይ ይነ ታማይ መንፈሳው ኮክሔኮ ኪይይ ይነ፣ ታማይ ኮክሒ ኢሰህ ክርስቶስ ኪይይ ይነ፡፡ 5. ታሃም ታኮ ፉጊ ማንጎ ማራህ ማኒያቲና፣ አይሚህ ተን ረሣ ባራካል ራደህ ራዕተ፡፡  6. ኢሲን ኡማ ጉዳይ ይትምንይንጉል፣ ኖያህ ለ ኡማ ጉዳይ ናትምኔምኮ ታሃም ኡምቢህ ኖኑ አካህ ሰሊሳን አብነት ኖህ የከ፡፡ 7."ሒያው በቶከ ታዓቦ ድፈይተ፣" ጎይሊሶና ለ ኡገተን"የህ ተን ዳዓባል ትምጽሕፈም ባሊህ፣ ኢሲን ጣዖት ይምልክኒም ባሊህ አቲን ለ ጣዖት ማይማላኪና፡፡ 8. ተንኮ ጋሪጋሪ ዙሙት ኃጢአት አበኒም ባሊህ፣ ናኑ ለ ዝኡሙት ኃጢአት አበዋይኖይ፣ አይሚህ ኢሲን ታሃም አበን ኢርከህ ተንኮ ላማታናከ አዶሕ ሒያውቲያ ኢንኪ ለለዕ አክ ራበን፡፡ 9. ተንኮ ጋሪጋሪ ማዳራ መዔፉጎ የፈተተኒንጉል ዓሮሩህ አሪተኒህ ራበኒም ባሊህ፣ ናኑ ለ ማዳራ መዔፉጎ አፍቲነዋይኖይ፡፡ 10. ተንኮ ጋሪጋሪ አግሩምሩምከ ሊይህ የለይኒም ባሊህ፣ አቲን ለ ማግራምራሚና።

11. ታይ ኡማን ጉዳይ ተን ማደም ኖያህ አካህ ናጢንቂቀ አብነት ኖህ ያኮ ኪኒ፣ ይምጽሕፈም ለ ዳባናት ባክቶት አሞል ገይምና ኖያህ ሚሂሮ ኖህ ያኮ የህ ኪኒ፡፡ 12. አማይጉል ሶለቲያህ ኢጊድ ሒያውቲ፣ ራዳምኮ ሰሊቶይ፡፡    13. ሒያው ማዳ ፋታናኮ በሒህ አኪ ፋታና ተን ማማዲና፣ ፉጊ ኡሙን ኪኒ፣ አይሚህ ሲኒ ዓቅመኮ አጋናል ኪን ፋታና ሲን ማዶ ሚያፍቂደ፣ ታምፍትኒን ዋክተ ትዕግሥቲ አካህ አብታን ኃይላ ዮሖወህ ፋታናኮ አካህ ታወዒን አራሕ ሲናህ ያይሶኖዶወ፡፡ 14. አማይጉል ይሳዖሎ! ጣዖት አምሉኮኮ ሚሪሕ ኤያ፡፡ 15. ታሃም ሲናካም ታስትውዒለም ተኪንጉል ኪዮ፣ አማይጉል አኑ ዋንሳም አቲን ሲነህ ኢፍሪዳ፡፡ 16. መዔፉጎ ኒምስግነህ ሓዲሊና በረከት ጽዋዕ ክርስቶስ ቢሊህ ኢንኪኖ ለቲያ ማኪሆ? ኢንኮህ ንቁሩሰ ኅብስቲ ክርስቶስ ኃዶይታልህ ኅብረት ለቲያ ማኪ? 17. ካኅብስቲ ኢንከቶ ክኒጉል፣ ናኑ ለ ታይ ኢንኪ ኅብስቲኮ ሓድሊታም ኪኖጉል፣ ኢንኪጉል ኡካ ማንጎም ነከሚህ ኢንኪ አካል ኪኖ፡፡ 

18. ኢስኪ እስራኤል ህዝቢ አበም ኡቡላ፣ መሥዋዕት በታም መሥወዕት አሞል ኅብረት ሊይይ ማናዎንሆ? 19. አማይጉል ታሃም አይህ ጣዖቱህ ትምሥውዔ ኃዶ ያርቢሔ ጉዳይ ኪኒ ማለቲህ ኪዮ? ወይ ጣዖት ያርቢሔ ጉዳይ ኪኒ ያናማህ ኪዮ? 20. ማለ! አረማውያን መሥዋዕት መዔፉጊህ አራሕህ አከካህ አጋኒንቲህ ኪኒ፣ አይሚህ አቲን አጋኒኒቲሊህ ኅብረት ታሎና ማጉራ፤ 21. ማደሪ ጽዋዕ አዑብክ ለል አጋኒኒቲ ጹዋ ታዓቦና ማዺዕታን፣ ማደሪ ማይድ ሓድሊታም ተኪኒህ፣ ለል አጋኒኒቲ ማይድ ሓድሊታም ታኮና ማዺዕታን፤ 22. ይቦል ታሃም አብነህ ማዳራ አይስኒሲኖ?  ናኑ ካኮ  ነይሰህ  አስሪየ ሊኖ? 

23. ኡማን ጉዳይ ይምፍቂደ፣ ያኮይ ኢካህ ኡማን ጉዳይ ያጥቅመቲያ ማኪ፣ ኡማን ጉዳይ ይምፍቅደ፣ ያኮይ ኢካህ ኡማን ጉዳይ ሃናፃይ ማኪ። 24. ኢሲሲ ሒያውቲ ዶባይቲ ጥቅመህ ለ ያሕሳቦይ ኢካህ ኢሲ ዸግኃህ ጥቅመ ዲቦህ  አብለ ዋዎይ፡፡ 25. ሲን ኅልናኮ ኡጉታ ጥርጣረ ሚሪሕ ኢሳይ ዓዳጋል ታምቢሔ ኃዶ አምጠረጠረካህ በታ። 26. አይሚህ"ባዾከ ተያል ታነም ኡምቢህ ፉጊም ኪኒ፣"27. ክርስቲያንቶ አከዋ ሒያውቲህ ግብዛህ ሲን ያዒድመጉልከ ግብዛ ጋራይታንጉል፥ ሲናህ ያስቅሪበ ምግበ ሲን ኅሊናኮ ኡጉታ ጥርጣረ ሚሪሕ ኢሳይ አምጠረጠረካህ በታ፡፡ 28. ያከካህ ኢንኪ ሒያውቲ"ታይ ኃዶ ጣዖቱህ ትምሥውዔም ኪኒ"ሲናክያጉል፣ ታሃም ሲናክየ ሒያውቲህ ምክንያታልከ ኅሊና ምክንያታል ኃዶ ማበቲና፡፡ 29. ኅሊና ለ ልትንጉል ሒያውት ኅሊና ማሊ ኪኒ ኢካህ አቲን ኅሊና ማልቲን ያናማህ ማኪዮ፣ አማጉል አኪ ሒያውትህ ኅሊናህ ምክንያታል ይነፃነቲህ አሞል ያፍርደም አይሚህ ኪኒ? 30. አኑ መዔፉጎ አይምስግኒክ በታጉል፣ ፉጎ ኤል አይምስግነ ጉዳል አይሚህ አምውቅሲክ አኒዮ?

31. አማይጉል በታህ ያኮይ፣ አዑቢህ  አኪናን ጉዳይ አብታንጉል፣ ኡማን ጉዳይ መዔፉጊህ ክብረህ አባ፡፡ 32. አይሁዳ ያኮይ፣ ግሪክታ ያኮይ፣  መዔፉጊህ ሞሶዓረ ያኮይ፣ ኢንከቶ ማይሳናካሊና፡፡ 33. አኑ ኡማንቲ ለ ያድኃኖ አኪ ማሪህ ጥቅመህ ኢካህ ኢኒ አሞህ  ጥቅመ ጉረህ ኡማን ሒያውቶ ኡማን ጉዳህ ኒያቲሳም  ባሊህ ታማም ባሊህ አቲን ለ  አባ፡፡                     

ማእራፋ 11         

ኢንኮህ  ጻሎት አባን ዋክተ ያናዎ ኤዳ ሥነ ሥርዓት.

   1. አኑ ክርስቶሱህ ኢግዲዮም ባሊህ አቲን ለ ዮያህ ኢምጊዳ፡፡             2. ይታዝክርንጉልከ ሲናህ ቶምሖወ ትምሂርቲ ሲክ ኢሰኒህ ኡማንጉል ትብዸንጉል  ሲን አይምስግኒክ አኒዮ፡፡ 3. ያከካህ ላብቲህ አሞል ኡምቢህ  ሢልጣን ለቲይ ክርስቶስ ክናምባሊህ፣ ኑማት አሞል ሢልጣን ለቲ ባዕላ ክናምባሊህከ ክርስቶስ አሞል ለ ሢልጣን ለቲ ፉጎ አባ ኪናም ታዻጎና ኪኅኒዮ፡፡ 4. ኢሲ ደግኃ ዩቡዱደህ ጻሎት አባቲ ወይ ትንብት ቃል ዋንሲታ ባዽ ኡምቢህ ባዽ አሞል ሢልጣን ለ ክርስቶስ ያይወረደ፡፡ 5. ታማምባሊህ ኢሲ አሞ አቡዱደካህ ጻሎት አብታቲያ ወይ ትንብት ቃል ዋንሲታ ሳይጉደይታ ተለደቲያህ ሎይምታ፡፡ 6. ሳይጉደይታ ኢሲ አሞ አቡዱደ ዋይታቲያ ተከምኮ ጋዓስ ታግራዖይ፣ ያከካህ ጋዓስ ጊርዒ ወይ ለዲዮ ተ ያይወረደ ጉዳይ የከምኮ ኢሲ አሞ ታባዳዶይ፡፡ 7. ባዽ መዔፉጊህ ክብረ ያግልጸቲያ ኪናም ኢዻህ ኢሰ ዸግኃ ያባዳዶ መዳ፣ ኑማ ለ ባዽ ክብረ ኪኒ፡፡ 8. አይሚህ ሳይቲያ`ላብቲያኮ ገይምተቲያ ኪኒ ኢካህ ላብቲይ ሳይቲያኮ  ማገይምና፡፡ 9. ታማም ባሊሀ ሳይቲያ ላብቲያህ ትምፍጥረካህ ላብቲይ  ሳይቲያህ ማምፋጣሪና፣ 10. ታሃሚህ ምክንያታልከ መላእክት ምክንያታል ሳይቲያ ላብቲህ ሢልጣኒህ ዳባል ኪናም ታስባላዎ ኢሲ አሞ ታባዳዶ ኤልታነ። 11. ማዳሪ ኢየሱሱድ ሊኖ ሂወቲህ ኑማ ላብቲያ ሂኒም ማማርታ፣ ላብቲይ ኑማሂኒም ማማራ፡፡ 12. አይሚህ ኑማ ባዻኮ ገይምተምባሊ ባዽ ያቡከም ባዻ`ኪኒ፣ ያኮይ ኢካህ ባዽ ያኮይ ባዻ`አኪ ጉዳይ ለ ኡምቢህ ገይማም መዔፉጎኮ ኪኒ፡፡

13. ኢስኪ ሲነህ ኢፍሪዳየ፣ ሳይቲያ`ኢሲ ዸግኃ አቡዱደካህ ፉጎል ጻሎት አብቶ ኤዳም ኪኒ? 14. ባዽ ዳጋር ያይዸዸጉል ናውረ አክ ያከም ተፍጥሮህ ኢሳሞህ ተን አይምሂሪክ ማታነ? 15. ሳይጉደይታህ ለ ዳጋር አካህ ዮምሖወም ኢሲ ዸግኃ አካህ ታምሳፋኖ ክኒጉል ዳጋር ታይዸዸም ተያህ ክብረ ኪኒ፡፡ 16. ታይ ጉዳህ ያምካራካሮ ጉራ ሒያውቲ ይኔምኮ፣ ኖያሊህ ያኮይ ወይ አኪ ማራሊህ መዔፉጊህ ሞሶዓሪት ታሃምኮ ባዽስመ ሊምድ ማሎን፡፡   

(ቁዱስ ቁርባን ሠርዓት ( ማዳሪ ዲራር)

( ማቴ.26፣26-29፤ማር.14፤22-25፤ሉቃ.22፣14-20)   

17. ታከሄሊን ዋክተ አብታናም፣ ሲን ብያክታም ኢካህ ሲን ያጥቅመ ጉዳይ ማኪጉል፣ ካዶ ስናህ አሓየ ትኢዛዛህ ሲን ማይምስጊነ፡፡ 18. ኡማኒሚህ ባሶል፣ ሲኒ ማኅበሪል ታከሄሊን ዋክተ ሲን ፋናድ ባዽሲ ያነም ኦበህ አኒዮ፣ ኦበ ጉዳይ ሙሉእ አከዋየሚህ ባዽሲ ሓቀ ኪናም አሚነ፡፡ 19. ቲክኪል ኪናም ኢያ ኢያ ኪናም ባዽሳህ ያማዻጎና ሲን ፋናድ ባዽሲ ያናዎ ጊደ ኪኒ፡፡ 20 .ኢንኮህ ታከሄሊን ዋክተ በታናም ማዳሪ ዲራር ማኪ? 21 አይሚህ በታህ፣ ቲይ ቲያ ኢላለካህ አሞኮምቲናህ ዲቦህ በታን፣ ታይ አገባቢራህ ቲይ ሉዋህ ቲይ ያሰኪረ። 22. ኢቦል ኤድበታን ኢርከከ ኤድታዑቢን ዓረ ማልቲንሆ? ወይ መፉጊህ ሞሶዓረ ዻይታክ ታንኒ? ወይ ኢንኪም አለዋይታ ጹጉማት ሖላሳክ ታኒን? አማይጉል አይም ሲናኮዋ?  ታሃሚህ ዳዓባል  ሲን አይማስጋኖ?  ሱሩህ  ሲን ማይሚስጊነ፡፡

23 .ማደሪ ኢየሱሱኮ ገራየመከ ሲናህ ትላሳ ሚሂሮ ታሃም ኪኒ፣ ኢየሱስ ትላሰኒህ ዮሖውን ባር፣ ኅብሰቲ ናውሰህ፣ 24. ምስጋና ጻሎት አበህ ይቁሩሰህ፣ "ሂና በታ፣ ታሃም ሲናህ ታከ ይ ኃዶይታ ኪኒ፣ ታሃም ይ መዘከርታህ አባ፣"አክየ፡፡ 25. ታማምባሊህ ዲራርኮ ላካል ጽዋዕ ናው ኢሰህ "ታይ ጽዋዕ ይቢሎህ ያከ ዑሱብ ኪዳን"ኪኒ፣ ታዑቢን ዋክተ ኡማንጉል  ታሃም ይ መዘከርታ አባ አክየ፡፡

26. አይሚህ ታይ ኅብሰቲ በታን ዋክተከ ታይ ጽዋዕኮ ታዑቢን ዋክተ ኡማንጉል ማደሪ ኢየሱስ ያምተም ፋናህ ካራባ ዋንሲታክ ታኒን፡፡ 27. አኪናን ሒያውቲ ኤዳቲያ አከካህ ማደሪ ኢንገራ በታጉልከ ማደሪ ጽዋዕኮ ያዑበጉል፣ ማደሪ ኃዶይታከ ቢሎ ይስዑንዹወርከህ ዒዳ ባዕላ ያከ፡፡ 28. አማይጉል አኪናን ሒያውቲ ታይ ኅቢስቲ በታሚህ ባሶልከ ታይ ጽዋዕኮ ለ ያዑበሚህ ባሶል ኢሰ ያማርማሮ ኤዳ፡፡ 29. ኢንኪ ሒያውቲ ማዳሪ ኃዶ አይም ኪናም ባዽሰህ አዺገካህ ማደሪ ኢንገራ በታጉልከ ማዳሪ ጽዋዕኮ ያዑበጉል ኢሲ አሞል ፊርደ ባሃ፡፡ 30. ሲን ፋንኮ ማንጎም ሐዋልተምከ ላሑተም፣ ጋሪጋሪ ለ ኤድራበም ታሃሚህ ምክንያታል ኪኒ፡፡ 31. ኒናሞ ኒምርምረህ ናከዶ ታህ የህ ኖል አምፍሪደ ማዻዽና፤ 32. ያከካህ ላካል ዓለምልህ ኒያፍርደምኮ ማዳሪ ኢየሱስ ካዶ ይፍረደህ ኒያቅጽዔ፡፡

33. አማይጉል ይሳዖሎ! ማዳሪ ድራራል ታከሄሊን ዋክተ፣ ሲነሲነህ ቲታ ኢላላ፡፡ 34. ኢንኮህ ታከሄሊን ዋክተ ስናል ያምፍርደምኮ፣ ሲን ፋንኮ ሉወ ሒያውቲ ይኔምኮ ኢሲ ዓረድ በቶይ፡፡ ራዔ ጉዳህ አኑ ታማል አምተጉል ኦሰህ  መምረሒ ሲናህ አሓየ ሊዮ፡፡

ማዕራፋ 12

 መንፈስ ቁዱስ መተሖዎ 

 1. ይሳዖሎ! ካዶ ለ መንፈስ ቁዱስ ባርካታህ ሓቶህ ሓቀ የከ ጉዳይ ታዻጎና ጉራ፡፡ 2. አረማውያን ክይክ ትኒን ዋከተ አዽገዋታን ጉዳህ ትምርሒኒህ፣ ዋንስቶ ዽዔዋይታ ጣዖት በያክ ትንኒም ታዽጊን፡፡ 3. አማይ ጉል መንፈስ ቁዱሱህ ይምርሔህ ኢየሱስ አባራ ቲያህ ኢንከቲ ሚያነ፣ ታማምባሊህ መንፈስ ቁዱሱህ ይምርሔህ አከዋየምኮ"ኢየሱስ ማዳራ ኪኒ!" ያቲ ኢንከቲ ሚያነ ሲናክ አይክ አኒዮ፡፡ 4. ኢሲሲ መንፈስ ቁዱስ መተሖዎ ታነ፣ መንፈስ ቁዱስ ለ ኢንከቶ ኪኒ፣ 5. ኢሲሲ አገልግሎት ያነ፣ ማደሪ ለ ኢንከቶ ኪኒ፣ 6. ኢሲሲ ሢራሕህ ዓይነት ያነ፣ ያኮይ ኢካህ ኡምቢህ ለ ኡማንቲያህ ታከም ኢንኪ መዔፉጎኮ ኪኒ፡፡ 7. ኢሲሲ መንፈስ ቁዱስ አምባላውቲ መተሖዎ ኡማንቲህ ጥቅመህ ኪኒ፡፡ 8. መንፈስ ቁዱስ ኢንኪ ሒያውቶህ ጠበቢህ አካህ ዋንሲታ ዽዕ  ያሓየ፣ አኪ ሒያውቶህ ለ  ኢንኪ ኢዽጋህ ዋንሲታናሚህ ዽዕ አካህ ያሓየ፣ 9. ለል ቶይ ኢንኪ መንፈስ ኢንከቶህ ኢምነት አካህ ያሓየ፣ አከቶህ ለ ኡሩስናን ተውሂቦህ መንፈስ ያሓይኒሚህ ኃይላ አካህ ያሓየ፣ 10. ታማምባሊህ አከቶህ ታምራት አባናምህ ኃይላ አካህ ያሓየ፣ ኢንከቶህ ትንብት ቃል ዋሲታናሚህ ዽዕ አካህ ያሓየ፣ አከቶህ ለ ጎሮን  መንፈስ ቁዱስኮ ኪናምከ ወይ ሩኩሳት መናፍስትኮ ኪናም ባዽሰህ አካህ ያዽግኒሚህ ዽዕ ያሓየ፣ አማም ባሊህ ኢንከቶህ ዑሱብ (አምገለ ዋይተ) ዋኒህ ዋንሲታናሚህ ዽዕ ያሓየ፣ አኪማራህ ለ አምገለ ዋይተ ዋኒህ ዋንሲታናሚህ አይታርጋምቲ ዽዕ ያሓየ፤ 11. ያኮይ ኢካህ ታሃም ኡምቢህ አባም ቶይ ኢንኪ መንፈስህ ኪኒ፣ መንፈስ ቁዱስ ጉርሱሲናኒም ባሊህ ኢሲሲ ሒያውቶህ ባዽሳህ ለ ዽዕ  ያሓየ፡፡

ኢንኪ አካላድ ኢሲሲ አካል ክፍሊ ያነ

12. አካላድ ማንጎ አካል ክፍልት ታነ፣ አካል ክፍልት ማንጎም ኪኖንሃኒህ ገይማናም ታማይ ኢንኪ አካል ክፍለድ ኪኒ፡፡ ታማምባሊህ ክርስቶሱድ ማንጎ አካል ክፍሊት ታነምባሊህ ኢንኪ አካል ባሊህ ኪኒ፡፡ 13. አይሚህ አይሁዳውያን ነከሚህ፣ ግርካውያን ነከሚህ፣ ባሮት ነከሚህ፣ ናፃ ኪን ሒያው ነከሚህ፣ ኢንኪ አካል ናኮ መንፈስ ቁዱሱህ ኒምጥሚቀ፣ ኡምቢክ ታይ ኢንኪ መንፈስኮ ኖዖበ /ነውዔ/፡፡

14. አካል ሢራሒመም ማንጎ አካል ክፍልትኮ ክኒካህ ኢንኪ አካል ክፍለኮ ጥራሕ ማኪ፡፡ 15. ኢቢ"አኑ ጋባ ማኪዮጉል አካል ክፍለ ማኪዮ"ያጉል፣ ኢስቲ ታህ የሚህ አካል ክፍለ ያክኒም አክ ራዕታ? 16 አይቲ አኑ ኢንቲ ማክዮጉል አካል ክፍለ ማኪዮ ታጉል፣ ኢቦል ታሃም ተሚህ አካል ክፍለ ያኪኒም አክ ራዕሰታ? 17. አካል ሙሉኡድ ኢንቲ ጥራህ የከህ ያከዶ፣ ሞቦ ሕዋሰ አድ አከዻዸ! ኢንቲ ጥራሕ ተከህ ያከዶ ሞቦ ሒዋስ አል አከዻዸ! 18. ካዶ ለ ፉጊ ጉረምባሊህ ኢሲሲ አካል ክፍሊ አካል አዳድ ኤዳ ሢራሕ ይብዸህ ገይሞ አበ፡፡ 19. አካል ሥራሕመም ኢንኪ አካል ክፍለኮ ዲቦህ የከህ ያከዶ ሙሉእ አካል አል ገይመ ዻዸ! 20. ካዶ ለ ማንጎ አካል ክፍሊት ይንይኒሚህ፣ አካል ለ ኢንኪቶ ጥራህ ኪኒ፡፡

21. ኢንቲ ጋባክ አቱ ይማጉርሱሳ! ቶዋ ማዺታ፣ ዸግኃ ኢባክ አቱ ይማጉርሱሳ! ቶዋ ማዽዕታ፤ 22. ኤረ ለ ሩኩታማህ ኢግዲክ ታምቡሉወ አካል ክፍሊት ያይሰ ዒለህ ጉርሱሳም ኪኖን፡፡ 23. ዒንዻ ክብረ ለሚህ ኢግድክ ታምቡሉወ አካል ክፍሊት ያይሰ ዒለህ ክብረ አካህ ናሓየ፣ ሖላሳማህ ኢግድክ ታምቡሉወ አካል ክፍሊት፣ ያይሰ ክብረ አካህ ኖሖወህ አካህ ናጣንቃቆይ፡፡ 24. ክብረ ለ አካል ክፍሊት ለ ታሃም ኡምቢህ ተን ማጉርስሳ፣ ፉጊ ለ ሖላሳማህ ኢግድክ ታምቡሉወ አካል ክፍሊት ያይሰ ክብረህ ያምዻባዾና አካል ክፍለህ ቲታክ ሃየ /የስገጠጠመ/፡፡ 25. ታሃሞም አካህ አበም አካል ክፍልትህ ፋናድ ባዽሲ አኒየካህ ሲነሲነሀ ትታህ ያሕሳቦና የህ ኪኒ፡፡ 26. ኢንኪ አካል ክፍሊ ያምሠቀየጉል፣ አኪ አካል ክፍሊት ሙሉኡድ ኢንኮህ ታምሠቀየ፣ ኢንኪ አካል ክፍሊ ያክብረጉል አኪ አካል ክፍሊት ካሊህ ኢንኮህ ኒያታን፡፡

27. አቲን ኡኮ ክርስቶስ አካል ኪቲን፣ ሲነሲነህ አካል ክፍሊት ኪቲን፡፡28. አማይጉል መዔፉጊ ኢሲሲ ሒያውቶህ ሞሶዓረድ ኢሲሲ አገልጊሎት ያሎ አበ፡፡ ታሃሚህ ሪሚዲህ ኤዸዾይታህ ሐዋርያት፣ ማላምኖህ ነብያት፣ ማዳሒኖህ መምሂራን ረዲሰ፡፡ ካታሰህ ታአምራት አብታም፣ ይቅጽለህ ኡሩስናን ኃይላ ለም፣ ሒያው ጎሮኒሶ ዽዕ ለም፣ ካታሰህ ታይማሃሮ ዽዕ ለም፣ ባክቶል ለ አምዽገ ዋይታ ዋኒህ ዋንሲታ ሒያው ይምድበ፡፡ 29. ያኮይ ኢካህ ኡምቢህ ሐዋርያት ማኪኖን፣ ኡምቢህ ነብያት ማኪኖን፣ ኡምቢህ መምሂራን ማኪኖን፣ ኡምቢህ ታአምራት አብታም ማኪኖን፤ 30. ኡምቢህ ኡሩስናን ዽዕ ለም ማኪኖን፣ ኡምቢህ ዑሱብ ዋኒህ ዋንሲታናሚህ ዽዕ ማሎን፣ ኡምቢህ ዑሱብ ዋኒህ አይታርጋምቲ ዽዕ ማሎን፡፡ 31.አማይጉል ኡማኒምኮ ያይሰ ዽዕ ገዮና ጉረን፡፡ ካዶ ለል ኡማኒምኮ ያይሰ አራሕ ተን ይይቡሉወ፡፡

     ማዕራፋ 13

     ሓቂ ካኃኖ

1. ሒያው ያኮይ ማላኢክቲ አፋህ ዋንሲታናሚህ ዽዕ ኤለሚህ ኡካ ካሓኖ አለዋየምኮ ያምድውለ ነሐስከ ሳሳህ ያ ጸናጽል አከም ኪኒ፡፡ 2. ትንብት ዋንሳናሚህ ዺዕ ኤለሚህከ ምሥጢር ሙሉኡድ ኢምርድኤሚህ፣ ኢዽጋ ለ ሙሉኡድ ኤለሚህ ኢምባ ኢንኪ ቦታኮ አኪ ቦታል ባያ ኢምነት ሙሉኡድ ኤለሚህ፣ ካሓኖ አለ ዋየምኮ ካንቶ ኪኒ፡፡ 3. ሊዮም ሙሉኡክ ድካታታህ ሓዲለሚህ፣ ኢኒ ኃዶይታህ ኡካ ራዔካህ ጊራህ ታምቃጻሎ ቲላሰህ ኦሖወሚህ፣ ካሐኒ አኔ ዋየምኮ ኢንኪሚህ  ይምያጥቅመ።           

4. ካሓኒ ትዕግሰቲ ያከ፣ ካሓኒ መዔቲያ ኪኒ፣ ካሓኒ ቶንኮል ማል፣ ካሓኒ ሚያ ይትዕቢተ፣ ካሓኒ ሚያኩሩዔ፣ 5. ካሓኒ ሠርዓት ማሊ ማኪ፣ ካሓኒ ኢሲ ዸግኃህ ጥቅመ ዲቦህ ጉራቲያ ማኪ፣ ካሓኒ ሚያምቦሦዖወ፣ ካሓኒ ይምብዲለሚህ በደል በደልድ ማሎዋ፡፡ 6. ካሓኒ ሓቀ ኪን ጉዳህ ኒያታካህ ኡማም ኪን ጉዳህ ማኒያታ፡፡ 7. ካሓኒ ኡማኒም ዽዔህ ያምዕግሠ፣ ካሓኒ ኡማን ጉዳይህ አሞል ኢሲ ኢምነት ዒዳ፣ ካሓኒ ኡማኒሚህ አሞል ታስፋ አባ፣ ካሓኒ ኡማን ጉዳል ያጽንዔ፡፡

  8. ካሓኒ ኡማንጉል ማራካህ ምያለየ፣ ትንብት ዋንስታናሚህ ዽዕ        /ተውሂቦ/ የከሚህ ዋክትቲያ ክንጉል ታለየ፣ ዑሱሰብ ዋኒህ ዋንሲታናሚህ ዽዕ ዋክቲቲያ ኪንጉል ያምሥዒረ፣ ኢዽጋ ተከሚህ ታለየ፡፡ 9. አይሚህ ናዽገምከ ትንብትህ ዋንሲናም ዳጎም ኪኒ፡፡ 10. ያኮይ ኢካህ ፉጹም ኪን ጉዳይ ያምተጉል ፉጹም አከዋ ጉዳይ ያምስዒረ፡፡ 11. ሕፃን ክይክ ኢነ ዋክተ ሕፃን ባሊህ ዋንሳክ ኢነ፣ ሕፃን ባሊህ አሕሲቢክ ኢነ፣ ሕፃን ባሊህ አመረመሪክ ኢነ፣ ሙሉእ ሒያውቶ ኤከጉል ለ ኢኒ ሕፃኒህ ጠባይ ኃባ።   12. ካዶ ማራጻናህ ናብለሚህ ዓይነቲህ ድብስብሲህ አብሊክ ናነ፡፡ ታማይ ዋክተ ግን ግልጸህ አብለሊኖ፣ ካዶ አዽገም ውሊም ኪኒ፣ ታማይ ዋክተ ለ ፉጊ ዮያ ያዽገም ባሊህ  ሙሉእ ኢዽጋ አለሊዮ፡፡ 

13. አማይጉል ኢምነት፣ ታስፋ፣ ካሓኖ፣ ታሃም አዶሒህ ሲክ የኒህ /ይጽንዕኒ/ ማረሎን፣ ያኮይ ኢካህ ታሃሚህ ፋንኮ ሙዽ ለቲ ካሓኖ  ኪኒ፡፡

  ማዕራፋ 14

 መንፈስ ቁዱስ መተሖዎከ  ፋይዳ / ጥቅመ/

1. አማይጉል ካሓኖ ኢክቲላ፣ መንፈስ ቁዱስ መተሖዎህ ማንጋህ ትንብት ዋንስታነሚህ ዽዒህ ኃይላ ዋጊያ፡፡ 2. ዑሱብ ዋኒህ ዋንሲታቲ መዔፉጎህ ኢካህ ሒያዋህ ማዋንስታ፣ አይሚህ ምሥጢር ኪን ጉዳይ መንፈስ ቁዱስ ኃይላህ ዋንሲታ፣ ዋንሳ ቃል ያዽገቲ ሚያነ፡፡ 3. ትንቢት ዋነሳቲ ለ አከቶ ያህናጾ፣ ያይባራታዖ፣ ያይጻናናዖ፣ ሒያዋህ ዋንሲታ፡፡ 4. ዑሱብ ዋኒህ  ዋንሲታ ሒያውቲ ኢሰ ዲቦህ ያግልጸ፣ ትንብት ዋንስታ ሒያውቲ ለ ማኅብሪህ  (ክርስቲያናህ) መዔ አብነት ያካ፡፡

5. ኡምቢክ ለ ዑሱብ ዋኒህ  ዋንስታንዶ ኒያተ ዻዸ፡፡ ናቢህ ኪኅኒዮም ለ ትንብትህ ዋንሲተኒምኮ ኪኒ፡፡ አይሚህ ማኅበር /ክርስቲያን ኡምቢህ/ ያምሃናጾና፣ ዑሱብ አፋህ ዋንስተኒም ታይቱርጉመም አኔዋይተምኮ፣ ዑሱብ አፋህ ዋንሲታ ሒያውቶኮ አጋናል ትንብትህ ዋንሲታ ሒያወቲ ያይሰ፡፡ 6. አማይጉል ይሳዖሎ! ሲን ኡላል አሚተ ዋክተ ዑሱብ ዋኒህ ሲናድ ዋንስታጉል አይሚህ ሲን አጥቅሚክ አኒዮ? ጋዳህ ሲን ታጥቅመም መዔፉጊህ ምሥጢር ያግልጺኒም፣ ኢዽጋ፣ ትንብትህ ዋንሲታናሚህ ሚሂሮ ኢብዸህ ኤመተምኮ ኪኒ፡፡ 7. ሳምባቆከ  ኪራር ባሊህ ታነ ሂወት አለዋይታ ሙዚቃ መሣረዕያ ኡካ ባዽስማ ዲምጺ ኢንከቶ የክህ አማበ ዋየምኮ፣ ያሓይን አንዻህ አይም ኪናም አይናህ የህ ያምዽገ? 8. ጡሩምባ ዑሱብ ዲምጸህ ያቱክንጉል፣ ውጊህ ኢይ ያምሶኖዶወ? 9. ታማም ባሊህ አቲን አምዸገዋይታ ዋኒህ ዋንሲታንጉል፣ ዋንሲታናም ኢይ ያዻጎ ዽዓ? ሓሓይታህ ዋንሲታናም ባሊሀ ያኪን፡፡ 10. ዓለም አሞል ማንጎ ዋኒ ታነ፣ ትርጉም አለዋየታ ዋኒ ማታነ፡፡ 11. አማይጉል አኑ ዋንሲታ ዋኒህ ቱርጉም አዽገዋየም ኤከምኮ አካህ ዋንሲታ ሒያውቶክ ገዸንታ አክ ታከ፣ ኡሱክ ለ ዮያል ገዸንታ ያከ፡፡ 12. አቲን ለ መንፈስ ቁዱስ መተሖዎ ጋዳህ ጉርሱሳም ኡማኒሚህ አሞል ክርስቲያን አካህ ታህንጺን ዺዕ ሲናህ ያይማንጎ  ኪኒ፡፡ 

13. አማይጉል ዑሱብ ዋኒህ ዋንሲታ ሒያውቲ አይታረጋምቲ ዺዕ ያሎ ጻሎት አቦይ፡፡ 14. አይሚህ ዑሱብ አፋህ ጻሎት አበሚህ ይመንፈስ ጻሎት አባ ኢካህ ይአእምሮ ሊሞ ማለ ኪኒ፡፡ 15. ኢቦል  አይም አቦ ዮህ ኤዳ? ኢኒ መንፈስህ ጻሎት አባህ፣ ኢኒ አእምሮህ ለል ጻሎት አባክ አኒዮ፣ ኢኒ መንፈሲህ አዝሚሪህ፣ ኢኒ አእምሮህ ለል ዘማ አባ፡፡ 16. ታማም አከዋይተምኮማ፣ አቱ መዔፉጊህ መንፈሲህ አይምስግኒህ፣ አቱ ታም አዽገዋ ገዸንታ ኪን ሒያውቲ ኩምስጋናህ ጻሎቱህ "አመን" ዮዋ አይናህ የህ ዺዓ? 17. ዓዲህ አቱ ካብ ኢሳ ሞሳ ጻሎት መዔ ዒለህ ኪኒ፣ ያኮይ ኢካህ አኪ ሐያወቲ ኤድ ምያመህኒጸ፡፡

18. አኑ ኡማንቲያኮ ያይሰ ዒለህ ዑሱብ ዋኒህ ዋንሲታም ኢዻህ መዔፉጎ አይመስጊነ፡፡ 19. ያኮይ ኢካህ ዑሱብ ዋኒህ ታማና ሲሕ ቃለቲያ አዋንሲታምኮ አጋናል አኪማራ አይማሃሮ ኤህ ክርስቲያን ፋናድ ኮና ቃል ታሚዽገ ዋኒህ  ኢኒ አእሚሮህ ዋንሳታም ኪሕኒዮ፡፡

20. ይሳዖሎ! ኡማ ጉዳህ ሕፃናት ቲካ ኢካህ ሲኒ ታሐሳሲባህ ሕፃናት ባሊህ ማኪና፣  ያይሰ  ዒለህ  ሲነህ ሲናሞህ ትብሲለም ቲካ፡፡ 

21. ታሃም፡-

       " 'ዑሱበ ዋኒህ ዋንሲታ ሒያዋህከ 

           ባዕደ ኪን ሒያውህ  ዋኒህ  ታይ ህዝበህ ዋንሲታክ አኒዮ፣

           ታሃም ተከሚህ ይሚያቢን' 

           ያዽሔ ማደሪ መዔፉጊ" የህ ሙሴህ ሕገህ ይምጽሕፈ፡፡ 

22. አማይጉል ዑሱብ ዋኒህ ዋንሲታህ ምልክት ያከም አሚነዋይታ ሒያዋህ ኪኒ ኢካህ ታሚነ ሒያዋህ ማኪ፣ ትንብት ቃል ዋንሲታናም ለ ምልክትህ የከም ታሚነ ሒያዋህ ኪኒ ኢካህ አምነዋይታ ሒያዋህ ማኪ፡፡ 23. ክርስቲያን ታከሄለ ዋክተ ውልውል ክርስቲያን ዑሱብ ዋኒህ ዋንስታጉልከ አዽገ ዋይታም ያኮይ አምነዋይታ ሒያው ታምተጉል ዋንሲታማክ"ታይ ሒያው ትዕብደ!"ሚያና? 24. ያኮይ ኢካህ ጋሪጋሪ ትንቢት ቃል ዋንሰታንጉልከ አምነዋቲያ ያኮይ አዽገ ዋ ሒያውቲ የመተምኮ ያበ ቃላህ ኡምቢህ ያውቅሰ፣ ታማም ባሊህ ለ ያበ ቃላህ ኡምቢህ ኤልያፍሪደ፡፡ 25. ኢሲ አፍዓዶድ ሱዕሱመ ጉዳይ ያይቡሉወ፣ ዳምባራህ ጋምመህ የከመኮ"ሪጊጺህ ፉጊ ተን ፋናድ ኪኒ!"ያናማህ መዔፉጎህ ያስጊዲን፡፡

ማኅበር ጻሎት ዋክተ  ያናዎ ኤዳ ሥነ ሥርዓት

26. ይሳዖሎ! አማይጉል አይም አብኖ ኤዳ? ጻሎቱህ ታከሄሊን ዋክተ ሲንኮ ኢንከቲ ዘማ ተውሂቦ ለ፣ አከቲ አይማሃርቲ ተውሂቦ ለ፣ ቲይ ሱዉር ኪን ጉዳይ ያይቡሉውኒሚህ ኃይላ ለ፣ ቲይ ዋኒህ ዋንሲታናሚህ ኃይላ ለ፣ አከቲ ያስቱርጉሚኒሚህ ዺዕ ለ፡፡ አማይጉል ታይ ኡምቢያህ መቶሖዎ ክርርስቲያን ታህኒጸቲያ ታኮ ኤልታነ፡፡ 27. ዑሱብ ዋኒህ ዋንሲታም ቲኔምኮ ላማይ ወይ የመንግንምኮ አዶሕ የኪኒህ ተራ ተራህ ዋንሶናይ፣ ኢሲን ዋንሲታናም አኪ ሒያውቲ ያይታርጋሞይ፡፡ 28. ያስቱርጉመ ሒያውቲ  አኔዋየምኮ ለ ዑሱብ ዋኒህ ዋሲታናም አከባት ታዳል ቲብ ዮናይ፡፡ ሲነሊህከ ፉጎሊህ ጥራህ ዋንሲቶናይ፡፡ 29. ትንብት ዋንሲታም ላማይ ወይ አዶሕ የክኒህ ዋሲቶናይ፣ አኪማሪ ለ ዋንስተኒም ኦኮይስተኒህ ይስትወዒሊኒህ ያይማዛዛኖናይ፡፡ 30. አግለ ታሞል ገይማ አኪ ሒያውቶህ ኢንኪ ጉዳይ አካህ ይምቡሉወምኮ፣ ባሶድ ዋንሳይነቲ ቲብ ዮዋይ፡፡ 31. ሲነሲነህ ያማሃሮናከ ያምጻናናዖክ ኡምቢህ ሲኒሲኒ ተራህ ፉጊ ቃል ዋንሲቶና ዽዓን፡ 32. ነብያቲም ትንብት መንፈሲህ ነብያታህ ያምኢዚዚን፡፡ 33. አይሚህ ለ መዔፉጊ ሳላም አምላክ ኪኒካህ ሁውከት አምላክ ማኪ፡፡ መዔፉጊህ ህዝቢህ ሞሶዓሪቲል ኡምቢህ ታከም ባሊህ፣ 34. ሳይጉደ  ጻሎቱህ ያከሄሊን  ዋክተ ቲብ ዮናይ፣ አይሚህ ሙሴ ሕጊ ያኢዚዘም ባሊህ ያምአዛዞና ክኒካህ ዋንሲቶና አካህ ማምአዛዚና፡፡ 35. ውልውሊ ጉዳይ ያዻጎና ጉረኒምኮ፣ ሲኒሲኒ ባዒል ድክድ ኤሠሮናይ፣ አይሚህ ጻሎቱህ ያከሄሊን ዋክተ ሳይጉደይታ ዋነሲቶ ጉቡእ ማኪ፡፡ 36. መዔፉጊህ ቃል የመተም ሲንኮ ኪኒ? ወይ መዔፉጊህ ቃል ማደም ሲና ጥራህ ኪኒ? 37."አኑ ነብይ ኪዮ ወይ መንፈሳዊ ኃይላ ሊዮ ያ ሒያውቲ ይኔምኮ፥ ታይ ሲናል ኢጽሕፈም ማዳሪ ትኢዛዝ ኪናም ያዻጎይ፡፡ 38. ታሃም አዽገ ዋያቲ ይኔምኮ፣ ኡሱክ አምዸገ ዋዎይ፡፡ 39. አማይጉል ይሳዖሎ! ትንብት ዋንሶና ጋዳህ ጉራ፡፡ አምዽገ ዋይታ ዋኒህ ዋንሲታናም ማደሲና፡፡ 40. ያኮይ ኢካህ  ኡማን ጉዳይ አገባባህከ ሥነ ሠርዓታህ ያኮይ፡፡ 

 ማዕራፋ 15

 ክርስቶስ ራባኮ ኡገትናን

1 .ካዶ ሊህ ይሳዖሎ! ሲን አይብሢረ በሠራታ ቃል ሲን አይዛካሮ ጉራ፣ ታይ በሠራታ ቃል አቲን ጋራይተንቲያከ ሲክ ተኒህ  አካህ ሶልተን ቲያ ኪኒ፡፡ 2 .አኑ ሲን ኢብሥረ በሠራታ ቃል ሲክ ኢሰኒህ ትብዺኒምኮ፣ ታይ በሠራታ ቃላህ ታድኅኒን፣ አማም አከዋይተምኮ ለ ተመንኒም ካንቶህ ኪኒ፡፡ 3. አኑ ጋራየም፣ ኤዸዾይታ ደረያህ ያነ ጉዳይ ስናህ ትላሰህ አኒዮ፣ ስናህ ትላሰ ጉዳይ"ቁዱሳት ማጻሕፍትል ይምጽሕፈም ባሊህ ክርስቶስ ኒኃጢአቲህ ዳዓባል ራበ፡፡ 4. ዩሙዑገ፣ ቁዱሳት ማጻሕፍትል ትምጽሒፈም ባሊህ ማዳሒ ዻሒነ ራባኮ ኡጉተ"ታም ኪኒ፡፡ 5. ታማም ባሊህ ጰጥሮሱህ ዩምቡሉወ፣ ላካል ላማምከ ታማናህ ዩምቡሉወ፡፡ 6. ኮና ቦልኮ አጋናል ካ ካታይታማህ ኢንኪጉል ዩምቡለወ፣ ተንኮ ማንጎ ማሪ ካዶፋናህ ሂውቲህ ያኒን፣ ጋሪጋሪ ለ ራበን፡፡ 7. ታሃምኮ ላካል ያዕቆቡህ ይመቡሉወ፣ ሐዋርያታህ ሙሉኡድ ይመቡለወ፡፡

8. ባኪቶል ሓለ ባሊህ ኪዮ ዮያህ ለ ይምቡሉወ፡፡ 9. አኑ ሐዋሪያትኮ ኡማኒምኮ ዒንዻቲያከ ሐዋርያ ለ ኤከህ ደዕምሞ ዮህ ኤደ ዋ ቲያ ኪዮ፣ አይሚህ አኑ ፉጊ ሞሶዓረ ኤሰደደ ቲያ ኪዮ፡፡ 10. ያኮይ ኢካህ ካዶ ኤከም አካህ ኤከም፣ መዔፉጊህ ጸጋህ ኪኒ፣ ዮህ ቶምሖወ ጸጋ ፍረ ሂኒም ማራዒና፣ ኤረ አኪማራኮ ያይሰ ሢራሓህ ኃዋለህ አኒዮ፣ ያከካህ ታሃም አበም ዮሊህ ታነ መዔፉጊህ ጸጋህ ክኒካህ ኢነህ ማኪ፡፡ 11. አማይጉል አኑ ለ አኮይ ኢሲን  ናይምሂረም  ታሃሞም ኪኒ፣ አቲን ለ ተመኒንም ታሃሞም ኪኒ፡፡

ሒያው ራባኮ ኡጉትናን

12. ያከካህ ክርስቶስ ራባኮ ኡጉተም ናይምሂረም የከምኮ፣ ሲንኮ ጋሪጋሪ "ራባኮ ኡጉትናን ሚያነ አይናህ የኒህ"ያና? 13. ራባኮ ኡጉትናን አኔ ዋየምኮማ ክርስቶስ ራባኮ ሙጉቲና ማለት ኪኒአ! 14. ክርስቶስ ራባኮ ኡጉተ ዋየም የከምኮ ኒሚሂሮ ያኮይ ሲን ኢምነት ካንቶ ኪኒአ! 15. ለል ፉጊ ክርስቶስ ራባኮ ኡጉሠ ነህ ኒምሂረርከህ ዲራብሊት ተከ መዔፉጊ መስከርቲ ነከ ማለት ኪኖአ! አማይጉል ራብተ ሒያው ራባኮ ኡጉተ ዋይተምኮ መዔፉጊ ክርስቶስ ራባኮ ሙጉሳ ማለት ኪኒ፡፡ 16. አይሚህ ራብተ ሒያው ራባኮ ኡጉተ ዋይተምኮ፣ ክርስቶስ ለ ራባኮ ሙጉቲና ማለት ኪኒ፡፡ 17. ክርስቶስ ራባኮ ኡጉተዋምኮ ሲን ኢምነት ካንቶ ኪኒአ! ገና ሲኒ ኃጢአታሊህ ተለይኒካህ ኪቲን ማለት ኪኒአ! 18. ክርስቶሱል የመኒንህ ራባህ ዑንዱጉልተም ተለየ ማለት ኪኒአ! 19. ክርስቶሱል ታሰፋ አብናም ታይ ዓለሚህ ሂወቲል ጥራህ የከምኮ ሒያው ሙሉኡድ ጋዳህ ኖህ ታኅዚነ ማራ ኪኖአ! 

20. ያከ ኢካህ ክርስቶስ፣ ራብተም ራባኮ ኡጉሠህ ኤዸዾይታ ምሳለ የከህ ዓዲህ ራባኮ ኡጉተ፡፡ 21. ራቢ የመተም ኢንኪ ሒያውቶህ ኣዳም ምክንያታል ኪናምባሊህ፣ ራባኮ ኡጉትናን ለ የመተም ኢንኪ ሒያውቶህ ክርስቶስ ምክንያታል ኪኒ፡፡ 22. አዳም ምክንያታል ሒያው ኡምቢህ ራብተም ባሊህ፣ ታማም ባሊህ ክርስቶስ ምክንያታህ ሒያው ኡምቢህ ሂወት ገሎን፡፡ 23. ታሃም አከለም ተራ ታራህ ኪኒ፣ ክርስቶስ ራባኮ ኡጉትናናህ ኤዸዾይታ ምሳለ ኪኒ፣ ላካል ክርስቶስ ራባኮ ኡጉታ ዋክተ፣ ካይም ኪናም ራባኮ ኡጉተ ሎን፡፡ 24. ካታይተህ ኡሱክ ግዝአትከ ሢልጣን ኃይላ ለ ሙሉኡድ የይለየህ ማንግሥት መዔፉጎ አባህ ያይሪኪበ ዋክተ ዓለም ባከቶ አከለ፡፡ 25. አይሚህ ናዓብቶሊት ኡምቢህ ካሢልጣኒህ ዳባል አካህ አባም ፋናህ ክርስቶስ ያንጋሦ አካህ ኤዳ፡፡ 26. ባክቶል ያለየ ናዓብቶሊ ራባ ኪኒ፡፡ 27. አይሚህ"መዔፉጊ ኡማን ጉዳይ ኢሲ ሢልጣኒህ ዳባል አካህ ሃየ፣" ያከካ"ኡማን ጉዳይ ካሢልጣኒህ ዳባል የከ፣"አይህ፣ ኡማን ጉዳይ ካሢልጣኒህ ዳባል አካህ አበ መዔፉጎ አባ ኤድሞሳ፡፡ 28. ኡማን ጉዳይ ክርስቶስ ሢልጣኒህ ዳባል የከምኮ ላካል፣ መዔፉጊ አባ ኡማኒሚህ አሞል ሢልጣን ያሎ፣ ባዽ ኢሰህ፣ ኡማን ጉዳይ ካሢልጣኒህ ዳባል አካህ አበ ፉጊ አባህ ሢልጣኒህ ዳባል ያከ፡፡

29. አማይጉል ራባተ ሒያው ኡጉተ ዋይታም የከምኮማ፣ ራብተ ሒያውህ ዳዓባል ትምጢምቀም ሙሉኡክ ተን ሳሮሪም /ባኪቶ/ አይምቶ ኪኒ? 30. ናኑ ነከምኮ ኢሲሲ ሳዓት ድንገቲህ አምቀለዒክ ማርናም አይሚህ ኪኒ? 31. ይሳዖሎ! ዮያድ ኡማን ለለዕ ራቢ ዮድ ጋራአ፣ ታሃሞም ሲናክ አይህ ማዳሪ ኢየሱስ ክርስቶሱህ ሲን አሞል ሊዮ ሚኪሓ ዓዶቲያ ተከጉል ኪኒ፡፡ 32. ኤፌሶኑል አራዊት ባሊህ ኪን ሒያውሊህ ኡንዱፉለም ኃዶይታ ምክንያታል የከምኮ ይኪስባን አይምቶ ኪኒ? ራብተ ሒያው ራባኮ ኡጉተዋይታም የከምኮ"በራ ራበሊኖጉል፣ በኖይ፣ ናዓቦይ"ያናም ባሊህ ኪኒአ! 33. ማምጋጋይና"ኡማ ዶባይቲ መዔ ጠባይ ለም ዓይኒሳ፡፡" 34. ጽድቂ ሂወቲል ጋሐ፣ ኃጢአት ለ ማቢና፣ ሲን ፋናድ መዔፉጎ አዺገ ዋ ጋሪጋሪ ያነ፣ ታሃም  አዽሔም ሖላሲቶና ኤህ ኪዮ፡፡

                        ራባኮ ኡጉተ አካሊህ ኩነታት                             

35. ኢንኪ ሒያውቲ"ራብተ ሒያው ኡገታም አይናህ ተህ ኪኒ? ራባኮ ኡጉታንጉል ያሊን አካል ለ አይሚህ ዓይነት ኪኒ?"የህ ኤሠራህ ያከ፡፡ 36. ኮ ዱዲት! ታድሪየ ኢላውቲ ራበ ዋየምኮ ሂውት ሚያለ፡፡ 37. አድሪህ ለ ሲራይ ያኮይ አኪ ኢላው ዲቦህ ታድሬካህ ላካል ቡላ ታክለ ማኪ፡፡ 38. ፉጊ ለ ዳራህ ጉረ አካል አካህ ያሓየ፣ አንኪ ኢንኪ ዳራህ ኢሲሲ አካል አካህ ያሓየ፡፡  39.ኃዶይታ ሙሉኡድ ኢንኪ ዓይነት ማኪ፣ ሒያውቲ ኃዶይታ ኢንኪ ዓይነት ኪኒ፣ እንስሳ ኃዶ አኪ ዓይነት ኪኒ፣ ኪምቢሮ ኃዶ አኪ ዓይነት ኪኒ፣ ዓሣ ኃዶ አኪ ዓይነት ኪኒ፡፡

40. ታማም ባሊህ ዓራንቲ አካል ያነ፣ ባዾት አካል ለ ያነ፣ ያከካህ ዓራንቲ አካሊህ ክብሪ ኢንኪ ዓይነት ኪኒ፣ ባዾት አካሊህ ክብሪ አኪ ዓይነት ኪኒ፡፡ 41. አይሮ ክብሪ ኢንኪ ዓይነት ኪኒ፣ አልሳ ክብሪ አኪቶ ኪኒ፣ ሑቱክቲ ኪብሪ አኪ ዓይነት ኪኒ፣ አይሚህ ኢንኪ ሑቱክቲ አኪ ሑቱክታኮ ባዽሲመ ክብረ ለ፡፡

42. ራባኮ ኡጉታ ሒያውህ ኩነታት ታሃማህ ኢግዳ፣ ያለየ ራቦንታ ኪን አካል የከህ ይምድሬቲ፣ አለየ ዋ ያነ አካል የከህ ኡጉታ፡፡ 43. ሑሱሩህ  ይምድሬቲ ክብረ የከህ ኡገታ፣ ሩኩቲያ የከህ ይምዲሬቲ ሲሪቲያ የከህ ኡጉታ። 44. ኃዶይታ የከህ ይምድሬቲ መንፈስ አካል የከህ ኡገታ፡፡ ኃዶይታት አካል ይኔምኮ፣ መንፈስ አካል ለ ያነ፡፡ 45. አማይጉል ኤዾዾይታ ሒያውቲ አዳም ያነ ፉጡር የከ የህ ይምጽሒፈ፣ ባኪቶት አዳም ክርስቶስ ለ ሂወት ያሓየ መንፈስ የከ፡፡ 46. ያከካህ ባሶል የመተቲ ኃዶይታ ቲያ ኪኒ ኢካህ መንፈስ ማኪ፣ መንፈስ የመተም ኃዶይታቲያኮ ላካል ኪኒ፡፡ 47. ኤዸዾይታ ሒያውቲ አዳም ይምፍጥረም ቡልኩዓኮ ኪንጉል ቡልኩዓ ኪኒ፣ ማላሚ ሒያውቲ ክርስቶስ የመተም ዓራንኮ ኪኒ፡፡ 48. ባዾኮ ኪናም ባዾኮ ትምፍጥረም ኪኒ፣ ዓራንቲም ኪናም ዓራንኮ ተመተም ኪኖን፡፡ 49. ባዾል ሒያውቶህ ኒሚግደም ባሊህ፣ ዓራንንቲ ሒያውቲህ ቢሶህ  አምግደ ሊኖ።

50. ይሳዖሎ! ሲናካም ታሃም ኪኒ፣ ኃዶይታከ ቢሎህ መዔፉጊህ ማንግሥት ምያውሪሲን፣ ታማም ባሊህ ያለየ ራቦንታ ኪን አካል፣ አለየ ዋ ያነ አካል ምያውርሰ፡፡             

51 ሀይከ ኢንኪ ምሥጢር ሲናክ አይክ አኒዮ፡፡ ኡምቢክ ማራብና፣ ያከያ ኢካህ ኡምቢክ አምልውጠ ሊኖ፡፡ 52. ናምልውጠም ባክቶል ጡሩምባ ታሙቱከ ዋክተ ሀንደበት ባሊህ ኢንኪጉል ኪኒ፡፡ ጡሩምባ ታሙቱከጉል፣ ራብተ ሒያው አለየ ዋይታ ታነም የክኒህ ኡጉተሎን፣ ናኑ ለ አምልውጠሊኖ፡፡ 53. አይሚህ ታይ ያለየቲይ አለየ ዋቲያ፣ ታይ ራባቲ ራበዋቲያ ሀይስቶ ኤልታነ፡፡ 54. ታይ ያለየቲ አለየዋቲያ፣ ታይ ራባቲ ረበዋቲያ ሀይሲታን  ዋክተ፣

       "ራቢ ሱባህ ይኡሙንዹዔ"  የኒህ ትምጽሒፈም ታምፍጺመ፡፡

 55. ታማሃምህ ባሊህ ፣

      "ኦ ራባ! ሱብተም አል ኪኒ? 

        ኦ ራባ!  ሒያው  አካህ ብያክታ ኃይሊ አል ኪኒ?" የን

56. ራቢ አካህ ይምሥሪተ ኃይሊ ኃጢአት ኪኒ፣ ኃጢአት ኃይሊ ሕገ ኪኒ፡፡ 57. ያከካህ ማዳራ ኢየሱስ ክርስቶስህ ምክንያታል ሱባ ኖህ ያሓየ መዔፉጎህ ምስጋና ታኮይ፡፡

58. አማይጉል ኢምክሒን ይሳዖሎ! ሲክ ኤያይ ሶላ፣ ኢንኪ ጉዳህ ማምሀዋክና ማዳሪ ሢራሓህ ሓዋልታናም ካንቶህ ማኪም ኢዺጋይ፣ አስቆሮጸካህ ኡማንጉል ማደሪ ሢራሕ ሢራሕቶና ትግሃት አባ፡፡                  ማዕራፋ 16

ኢየሩሳሌም መእመናናህ የከሄለ ገንዘብ ሓቶ

1. መእመናናህ ያከ ማል ሓቶ ገላትያ ሞሶዓርቲህ ዮሖይን መምረኂ መሠረቲህ አቲን ለ ታሃም አባ፡፡ 2. አኑ አሚተ ዋክተ ማል ስልዒት አከዋዎይ፣ ሲኒሲኒ ለግዲና ሳምባታህ ሲንኮ ጋሪጋሪ ኦርቢሳናሚህ መጠኒል አስከሄልኪ ባዽሳይ ዲፈሳ፡፡ 3. አኑ ሲናል አምተ ዋክተ አቲን ዶርተን ሒያው፣ የስከሄሊን ማል ይብዽኒህ ኢየሩሳሌም ኡላል ያዳዎና ሱኩኩይታ   ደብዳበሊህ ሲናህ ፋራክ አኒዮ፡፡ 4. አኑ ለ አዳዎ ጉርሱሳህ የከምኮ፣ ኢንኮህ አዴሊኖ፡፡             

 ጳውሎስ ዓቃንታ /ዕቅድ /  

5. መቅዶኒያ ቱላኮ አዳዎ ኢሕሲበ አነጉል፣ ታማርከኮ ኢኒ አራሓል ሲና ዻጋህ አምተ ሊዮ፡፡ 6. ኤል አዲናን ኢርከል አኪናን ሲፍራል አራሓህ ያከ ሓቶ፣ ዮህ አብቶና ምናልባት ሲንሊህ ሱጎ አከ፣ ምናልባት ካርማ ሲንሊህ ትላሶ አከሊዮ፡፡ 7. ካዶ ቲላህ ኢኒ አራሓል ሲንማዶ ማጉራ፣ ማዳሪ ፍቃድ የከምኮ ዳጎ ለለዒህ ኤዽዻ ያ ዋክተ ሲንሊህ ሱጎ ታስፋ ሊዮ፡፡

8. ያከካህ አይከ ጳራቅሊጶስ ባዓል ፋናህ ኤፌሶኑል ሱገሊዮ፡፡ 9. አይሚህ ማንጎ ሢራሕ ኤድያነ ፊዲን ኢፈይ ፋክተ፣ ታምከለከለም ለ ማንጎም ኪኖን፡፡

10. ጢሞቴዎስ ያሚተ ዋክተ ማይስሂኒም ሲንሊህ ዲፈዮ ኃታ፣ አይሚህ ኡሱክ ለ ዮያ ባሊህ ማዳሪ ኢየሱስ ሢራሕ ሢራሓ፡፡ 11. አማይጉል ኢንከቲ ካ'ዻይተ ዋዎይ፣ ኡሱክ ኢሲ ሳዖሊህ ዩላል ያመቶ ኢላላም ኢዻህ፣ ይኡላል ሳላማህ ጋሔህ ያማቶ አራሓህ ካጉርሱሳም ሓቲማይ ካኒያቲሳይ ሱኩኩዋ፡፡        12. ኒሳዓል አጵሎስ አኪ ሳዖልትሊህ ሲና ዻጋህ ያዳዎ ጋዳህ ዻዒመህ ኢነ፣ ያከካህ ካዶ ሲን ኡላል ያማቶ ማጉሪና፣ አካህ ያምሰመመዔጉል ለ አሚተለ። 

 ባክቶ ምክሪህ ሳላምታ

13. ኢንቂሓ፣ ኢምነቲህ ሲክ ኤያይ ሶላ፣ ኢብርቲዓ፣ ኢጥንኪራ፡፡ 14. አብታናማህ ኃይላ አቢታክ ኡምቢክ ካሓኖ አቢታ፡፡ 

15. ይሳዖሎ! እስጢፋኖስ በተሰብ ሒያው አካይያ ባዾል ኤዸዾይታት አማንቲ ኪኖኑምከ መዔፉጊህ ሒያው ያስጋልጋሎና ሲነ ትላሰኒህ ዮሖወይኒ ም ታዺጊን፡፡ 16. ታህ ኢጊድ ሒያውከ ተንሊህ ሢራሓህ ሓዋልታማህ ኡምቢህ አካህ ታምአዛዞና ሲን አስሔሰሰበ፡፡

17. እስጢፋኖስከ ፈርዶናጥስ አካይቆስ ለ ይኡላል ያምቲን ኢርከህ ኒያታ፣ አይሚህ አቲን ዮያሊህ ገይመ ዋይተኒሚህ ኢሲን ሲን ኢዻ ዮህ የክኒህ ቱግዱለም ዮህ ያምልኢን፡፡ 18. ኢሲን ይመንፈስከ ሲን መንፈስ ለ ያስዑሩፊን፣ አማይጉል ታጊዲን ሒያው ያማዻጎና ኤዳ፡፡

19. እሰያል ታነ ሞሶዓሪት ሳላምታ ካብ ሲናህ ኢሳን፣ አቂላከ ጵርስቂላ፣ ተን ዲኪድ ተከሄለ ክርስቲያን ለ ሙሉኡክ ናባ ሳላምታ ማደራህ ኢየሱሱህ ሲናህ ያስቅርቢን፡፡ 20. ታል ታነ ክርስቲያን ለ ኡምቢህ ሳላምታ ካብ ሲናህ  ኢሳን፣ ሳዖልትቲ ካሓኖህ ቲታ ፉጉታክ ሳላምታ ቲታህ ኡሑዋ፡፡ 21. አኑ ጳውሎስ ታይ ሳላምታ ኢኒጋባህ ሲና ኢጽሕፈህ አኒዮ፡፡ 

22. ማደራ ኢየሱስ ለ አክሒነዋቲ ይኔምኮ አባሪመቲያ ያኮይ!       "ማራ ናታ!" [ኒማዳራ አሞ!] 

23. ማዳሪ ኢየሱስ ጸጋ ሲንሊህ ታኮይ፣ 24. ይኒያት ኢየሱስ ክርስቶሱህ ኡማን ሲናሊህ ያኮይ፣ አመን፡፡