ጳውሎስ መልእከት ኤፌሶንል

                                   ሐዋርያ ጳውሎስ  መልእከት ኤፌሶን ሒያውህ ኡላል

                              ጳውሎስ መልእክት ኤፌሶኑል                                   

                                      ሳይማ  

    ጳውሎስ ኤፈሶን ሒያዋል ይጽሒፈ መልእክቲል ኡማናሚህ ባሶል ያቱኩረም "ፉጊ ዕቅድህ ሥራሕህ አሞል አሳ ዓራናልከ  ባዾል ታነ ጉዳያት ሙሉኡድ ያይጠቀለለ ኢንኪ ክርስቶስ ሢልጣኒህ ዳባል ያከ ዋክቲ ማዳጉል ኪኒ" ያዽሔህ ሓሳቢህ አሞል ኪኒ (1፣10)፡፡ ኦሰህ ለ ኢየሱስ ክርስቶስሊህ ተምሔበበረህ ሒያውህ ዳሪ ኡምቢህ ኢንከቶ ያከጉል ታይ ናባ ዕቅድ ሢራሕድ አሲሶና ፉጊ ህዝበ ታስሔበበረም ኪኒ፡፡

     ኤፌሶን መልእክቲክ ኤዸዾይታ ክፍሊህ ጻሓፊ ኢንክኖህ ኤዸዺሰህ አሞድ ያይፋዳዳኖና መዔፉጊ አባ ኢሲ ህዝበ አይናህ ኢሰህ ዶረም፣ ባዻ ኢየሱስ ክርስቶሱህ ሲኒ ኃጢአቲህ ሕደጎት ገኒህ አይናህ የኒህ ናፃ ያክንምከ ፉጊ ናባ ታስፋህ ቃል መንፈስ ቁዱስ አራሓህ አይናህ ኢሰነህ ሓቢና ገየኒም ያይርድኤ፣ ማላም ክፍለል ለል ጻሐፊ አንበብቲ ኢንኮሀ ሲኒ ሂወት ክርስቶሱል ሎን ኢንክኖ ሓቀ ታኮ አይናህ የኒህ ማሮና አካህ ኤዳም ተን ያስሔሰሰበ፡፡

     ሒያው ክርስቶስሊህ ሎን ኅበረቲህ አይናህ የኒህ ኢንኮህ ማሮና ዺዓናም ኢሲሲ  ኢዽጋህ ዋኒህ  ያግልጸ፣ ሞሶዓሪ ኢሲ አካል ባሊህ የከህ፣ ክርስቶስ ኢንኪ ኢሲ አካሊህ አሞ  ኪኒ፣ ሞሶዓሪ ሕንፃ ያከጉል፣ ክርስቶስ ዒንደፍቲ ዻ ኪኒ፣ ሞሶዓሪ  ኑማ ባሊህ አክህ፣ ክርስቶስ ባዕላ ባሊህ ኪኒ፣ ጻሓፊ ክርስቶስ ኡላኮ ዩመቡሉወጉል ፉጊ ጸጋህ ጋዳህ አድናቆቱህ ዋንሲተ ዋክተ አዳለ አገላሊጻህ ካብ ኢሳ፣ ኡምቢህ ያምልክተም ክርስቶስ ካሓኖ፣ መሥዋዕት፣ ኅደጎት፣ ጸጋከ ንጽሕና አካህ ታከካህ ኪኒ።

               ______________________________

                                                  ማዕራፋ 1   

 1. መዔፉጊህ ፈቃዳህ ኢየሱስ ክርስቶስህ ሐዋርያ የከ ጳውሎስሊህ፣ ኢየሱስ ክርስቶስህ አማንት የኪኒህ ኤፌሶኑል ገይምታ ቁዱሳን፡፡   

   2. ኒማዳሪ ኢየሱስ ክርስቶስህ ጸጋከ ሳላም ስንሊህ ያኮይ፡፡

                           ክርስቶሱህ ገይማ መንፈስ በረከት

   3. ዓራናል፣ መንፈሳው በረከት ዮሖወ ክርስቶስ ኒየበረከ፣ ማደራ ኢየሱስ  ክርስቶስህ አባ የከ አምላክ ያማስጋኖይ፡፡ 4. ቁዱሳንከ ናቃፋ አለዋይታም ነከህ ካነፊል ገይምኖ፣ ዓለም አምፍጥረካህ ክርስቶስ ኒዶረ፡፡

    5. ኢሲ ካሓኖህ፣ መዔፉጊህ መዔ ፍቃድ የከህ ኢየሱስ ክርስቶስህ ኡላህ ካዻይሎ ናኮ ዮኮመህ ኒይውሲነ፡፡ 6. ታሃሞም አበም ኢምኪሒን ባዽህ ደፍራህ ናጻህ ኖህ ዮሖወ ክብረ ለ ጸጋህ ናይማስጋኖ የህ ኪኒ፡፡ 7. መዔፉጊህ ጸጋህ ምገኮ ኡጉተ ባዽ ቢሎህ ኒድኂነህ ኃጢአት ሕድጎት ገይነ፡፡ 8. ኢሲ ጸጋ ለ ብልሓትከ ኢዽጋህ የይመንገህ ኖህ ሓዸ፡፡ 9. መዔፉጊ ኢሲ መዔነህ ክርስቶስ ኡላኮ ዮኮመህ ይሕስበሚህ መሠረቲህ ኢሲ ፍቃዳህ ምሥጢር ናዻጎ አበ፡፡ 10. ታይ ዕቅድ ሢራሕ አሞል አሳም ዓራንከ ባዾል ታነ ጉዳያት ኡምቢህ የከሄሊኒህ ኢንኪ ክርስቶስህ ሢልጣኒህ ዳባል ያከን ዋክቲ ማዳጉል ኪኒ፡፡

  11. ኡማን ጉዳይ ኢሲ ዲላህ ሢራሔ መዔፉጊህ ዕቅዲህ ሪምዲህ ኖኮመህ ኒምውሲነርከህ፣ ካዶሊህ ክርስቶስ ኡላህ ዶሪምምነ። 12. ታሃም ተከም ኤዸዾይታህ ክርስቶሱል ታስፋ አብነ ኖዪህ  ምክንያታህ ፉጊ ክብረከ ምስጋና ያኮ የህ ኪኒ፡፡    

   13. አቲን ለ ሲን ድኅነቲህ መዔ ዋረ የከ ሓቂ ቃል ቶቢን ዋክተ ክርስቶሱል ተመንኒህ ታስፋህ ኢላሊማ መንፈስ ቁዱሱህ ትምህትሚን፡፡ 14. ካክብረህ ክብረ ያኮ መዔፉጊ ካይም ኪናም ሙሉኡድ ያእውዘም ፋናህ ታይ መንፈስ ኒሪስቲህ ማባዾ  ኪኒ፡፡

ጳውሎስ ኤፌሶን ሒያዋህ ጻሎት አበ

   15. አማይጉል ማዳሪ ኢየሱስሊህ ኢምነትከ ቅድስናህ ኡምቢህ ሊቲን ካሓኖ ኦበህ፤ 16. ሲና ጻሎቱህ አዝክሪክ ስን ምክንያታል ፉጎል ምስጋና ካብ ኢሳናም ማይባካርኒዮ። 17. ኪብሪ አካህ ኤዳም ኒማዳራ ኢየሱስ ክርስቶስህ አባ የከ መዔፉጎ ያይሰ ዒለህ ታዻጎና ቢልሓታከ ሙቡል መንፈስ ሲናህ ያሓዎ ጻሎት አባክ አነ፡፡ 18. አይሚህ ዓይነቲህ ታስፋህ ደዕምምተነምከ ቁዱሳን ታውርሰ ኩቡር ሪስቲ አይዻ ማንጎም ኪናም ታዻጎና ዒሎህ ሲን አፍዓዶህ ኢንቲት ኢፎይቶ ጻሎት አባክ አኒዮ፡፡ 19. ታማም ባሊህ ናኑ ናምነሚህ ዮምሶኖዶወ ኃይሊ አይዻ ናባቲያ ኪናም ታዻጎና ጻሎት አባክ አነ፣ ታሃም ለ ኖያህ ሢራሕማ ናባ ኃይላህ፣ 20. ክርስቶስ ራባኮ ኡጉሠህከ ዓራናል ኢሲ ሚድጋል ድፈሰ መዔፉጊ አባ ክርስቶሱህ ይግልጸ፡፡ 21. መዔፉጊ አባ ክርስቶስ ዓራናል ኢስ ሚድጋል ድፈሰም አኪናን ግዝአትከ ሢልጣን፣ ኃይላከ ማዳራ ያክንሚህ አሞል፣ ታማም ባሊህ ታይ ዓለምል ጥራሕ አከካህ ያምተ ዓለምል ሚጋዕኮ ኡማንሚህ አሞል ያከ ኩቡር ሚጋዕ ያሓይንሚህ ኪኒ። 22. ኡማን ጉዳይ ክርስቶስ ኢሲ ሢልጣኒህ ዳባል አበህ አካህ ይግዚኤ፥ ሞሶዓረድ ለ ኡማኒምኮ አሞ ያኮ አበ፡፡ 23. ሞሶዓሪ፥ ካ አካልከ ካያህ የመገቲያ ኪኒ፥ ኡሱክ ለ ኡማኒሚህ ኡማናማህ የመገቲያ ኪኒ፡፡

          ማዕራፋ 2                  

 ክርሰቶሱህ ራባኮ ሂወቲል ታብታም

   1. አቲን ሲኒ በደልከ ሲኒ ኃጢአቲህ ምክንያታል ራብተም ክይይክ ቲኒን፡ 2. ታማይ ዋክተ ታይ ዓለምል ኡማ ጉዳይ አክትልክ በደልከ ኃጢአታድ ማራክ ቲኒን፣ ታማም ባሊህ አየርል ታነ መናፍስቲ ኃይልቲህ ያግዚኤቲያ አክትልክ ቲኒን፣ ኡሱክ አምኢዚዘ ዋይታ ሒያውሊህ ካዶ ሢራሓቲ ሩኩስ መንፈስ ኪኒ፡፡ 3. ናኑ ለ ኡምቢክ ተን ፋናድ ኒኒ ኃዶይታህ ዲላይ አፍጽምክከ ኒኒ አእምሮህ ሓሳብ አክትሊክ ታሃምኮ ባሶህ ኒኒ ኃዶይታህ ዲላህ ማራክ ኒነ፣ አኪማራ ባሊህ ኒኒ ተፍጥሮህ ኃጢአቲህ  ቁጡዓህ ዳባል ኒነ።            

  4. ያከካህ መዔፉጊህ መሕረት ማንጎቲያ ኪናም ኢዻህከ ኖያህ ለ ካሓኒ ናባቲያ ኪናምኮ ኡጉተሚህ፣ 5. ኢንኪጉል ኡካ ኒኒ በደሊህ ራብተም ነከሚህ፣ መዔፉጊ ክርስቶሱህ ሂወት ኖህ ዮሖወ፣ አቲን ለ ትድኅንኒም ካጸጋህ ኪቲን፡፡ 6. ኢየሱስ ክርስቶስሊህ ነምሔበበረርከህ ካሊህ ራባኮ ኒኡጉሠ፣ ክርስቶስሊህ ዓራናል ኒዲፈሰ፡፡ 7. ታሃሞም አበም፣ ያሚተ ዳባናት ኢየሱስ ክርስቶስ ኢሲ ጸጋህ ማንጋህ መሕረት ኒያይባላዎ ጉረጉል ኪኒ፡፡ 8. አይሚህ አቲን ትደኅንኒም ኢምነት ምክንያታል ካጸጋህ ኪኒ፣ ታሃም ፉጊ ዮሖወም ኪኒ ኢካህ ስን ሢራሓህ ገይምተም ማኪ፡፡ 9. አኪናን ሒያውቲ ያምክሔምኮ ታይ ድኅነት ጸጋ ገይምተም ሢራሕኮ ማኪ፡፡ 10. አይሚህ ናኑ፥ ፉጊ ዮኮመህ ዮይሶኖዶወ መዔ ሢራሕ ሢራሕኖ ኢየሱስ ክርስቶሲህ ደፍራህ ማላሚህ ትምፍጥረ መዔፉጊህ ፍጥረት ኪኖ፡፡

  ክርስቶሱህ ገይምታ ኢንኪኖ

     11. አማይጉል አቲን ባሶል ሲኒ ኡብካህ አረማውያን ክይይክ ትነሚክ፣ አይሁድ ሒያውህ ጋባህ ትምግርዚን ኢርከህ አምክሒክ፣ አቲን "አምግሪዘ ዋይተም"አይክ ሲናህ ዋትማይ ይንኒም ኢዝኪራ፡፡ 12. እስራኤል ዘግነት ዋይተኒህ፣ ታስፋ ቃልኮ ገዻ ተኪን፣ ታይ ዓለምል ለ ታስፋ ዋይተኒህከ ፉጎኮ ባዽስምተኒህ ክርስቶስ ሂኒም ቲኒን፡፡ 13. ካዶ ለ፣ አቲን ታሃምኮ ባሶህ ምሪሕ ተኒህ ትነሚክ፣ ኢየሱስ ክርስቶስሊህ ተኪኒህ ካቢሎህ ካብተን፡፡ 14. ኒባዽሰህ ይነ ናዓቢ ማንዳቅ ዒደቲያከ አይሁድከ አረማውያን ኢንከቶ አበ ኒሳላም ክርስቶስ ኪኒ፡፡ 15. ሳላም አበህ ላማ ህዝቢኮ ካሊህ ያሕብረ ኢንኪ ዑሱብ ህዝበ ያፍጣሮ ሕጊ ትኢዛዛትከ ደምቢት ኢሲ ኃዶይታህ ይሰዒረ፡፡ 16. ማስቃል አሞክ ራበህ ናዓቦ የይለየ፣ ላማ አካል ለ ኢንከቶ አበህ ፉጎሊህ   ኒዋጋሪሰ፡፡ 17. የመተህ ለ ሲንኮ ሚሪሕህ ተህ ትነሚህከ ካብተህ ትነሚህ ተናህ ሳላም በሠራታ ቃል ይሰብከ፡፡ 18. አይሚህ ካ ኡላህ ኡምቢክ ኢንኪ መንፈሲህ ኒምሪሔህ አባቱላል ካብ ኢየልኖ፡፡

   19. አማይጉል አቲን ቁዱሳንሊህ ኢንኪ ባዾል ማርታምከ መዔፉጊህ በተሰብ ኪቲን ኢካህ ካምቦኮ ላካል ገዻከ ተመቶይቲት ማኪቲን፡፡ 20. ሐዋርያትከ ነብያት መሠረት አሞል ትምንድቂን፣ ዕንደፍቲ ዋና ዻይ ኢየሱስ ክርስቶስ ኪኒ፡፡ 21. ማንዳቅ ሙሉኡድ ካያህ የምዸበዸበህ ማደሪ ቁዱስ በተ መቅደስ የከህ ዓረ ለ። 22. አቲን ለ መዔፉጊህ መንፈስ ኤድ ያሕድረ ሕንፃ ታኮና ዒንደፍቲ ዋና ዻ የከ ክርስቶሲህ ኦሞል አምህኒጸ  ሊቲን፡፡

    ማዕራፋ 3

      ጳውሎስ ሢራሕ አረማውያናህ

   1. አማይጉል ሲናህ አረማውያን ምክኒያታል ኢየሱስ ክርስቶሲህ ኡሱር ኤከ አኑ ጳውሎስ፥ መዔፉጊህ ነፊል ኢምብርክከህ ጻሎት አባክ አነ።  2. ሲን ጥቅመህ መዔፉጎ አስጋልግሎ ጸጋ ዮህ ቶምሖወም ዓዲህ ቶቢን፡፡ 3. ኦኮመህ ኡዹዺህ ሲናል ኢጽሒፈም ባሊህ መዔፉጊ ሱዑተ ምሥጢር ዓዶሰህ ይይቡሉወ፡፡ 4. ሲናል ኒጽሒፈም ታይንብብንዶ ክርስቶስ ዳዓባል ምሥጢሪህ አኑ ሊዮ አታሐሳሲባ ታምራዳኦና ዺዔ ዻዸን፡፡ 5. ታይ ምሥጢር መዔፉጊህ መንፈስህ አራሓህ ቁዱሳን ሐዋርያታህከ ነብያታህ ካዶ ይምቡሉወሚህ ዓይነቲህ ትላየ ደባናታህ ቲነ ሒያዋህ ማምባላይና፡፡ 6. ታሃም ለ ወንጌል ደፍራህ አራማውያን አይሁድሊህ መዔፉጊህ በረከት ሓድሊታም ኪኖኑምከ ኢንኪ አካሊህ ክፍሊት ኪኖኑም፣ መዔፉጊ ኢየሱስ ክርስቶሱህ ዮሖወ ታስፋ ቃል ሓድሊታም ኪኖም ማምባላይና  ማለት ኪኒ፡፡ 7. መዔፉጊ ኢሲ ኃይሊህ አሣራሪሓህ ዮህ ዮሖወ ጸጋ ሓቶህ ታይ ወንጌሊህ አገልጋሊ ኤክህ አኒዮ። 8. ኢንኪጉል ኡካ አኑ ቁዱሳንኮ ኡማኒምኮ ዒንዻቲያ ኤከሚህ ዳራት ሂን ክርስቶስ ጸጋህ ሀብተህ አረማውያን አይባሳሮ ታይ ጸጋ ዮህ ቶምሖወ፡፡ 9. ታማሃም ባሊህ ትላይተ ዳባናት ኡማን ጉዳይህ ፈጣሪ ፉጊ ሚህዞ /ዕቅድ/ አይም ኪናም ኡማንቲያ አይባላዎ ጸጋ ዮህ ቶምሖወ፡፡ 10. ታሃም ተከም ካዲ ዳባናህ ሞሶዓሪ ደፍራህ፣ ዓራናል ታነ አሞይቲትከ ሢልጣን አሞይትቲህ መዔፉጊህ ብልሓት ኢሲሲ ቢሶህ ያዻጎና ኪኒ፡፡ 11. መዔፉጊ ኒማዳራ ኢየሱስ ክርስቶሱህ ታሃም አበም፣ ጥንተኮ ይኂልነሚህ መሠረቲህ ኪኒ፡፡ 12. ክርስቶሱል ነመነርከህ ምክኒያታል መዔፉጊህ ነፊል ዲፍረቲህከ አምአማማ ናህ ካብ ኖዋ ዽዔሊኖ፡፡ 13. አማይጉል ታሃም ሲን ዳዓባል ጋራ  መከራ ሲን ክብረ ኪኒጉል ታስፋ ማቅራፂና ኤዽሔህ ሲን ዻዒማክ አኒዮ።

                                       ክርስቶስ ካሓኖ   

   14. አማይጉል መዔፉጊ ናባህ ነፊል ኢኒ ጉሉቡህ ኢምብርክከህ ጻሎት አባም ታይ ምክንያታህ ኪዮ፡፡ 15. ዓራንከ ባዾል ታነ በተሰብ ኡምቢህ ሓቂ ምጋዕ ገይታም ፉጎኮ ኪኒ፡፡ 16. አዳ ስን ሰውነት ያይሲሪየ ኃይላ ለ መንፈስ ቁዱስ አራሓህ መዔፉጊ ኢሲ ክብሪህ ሀብተኮ ሲናህ ያሓዎ ጻሎት አበሊዮ፡፡ 17. ታማም ባሊህ ክርስቶስ ኢስ ኢምነት ሲን አፍዓዶድ ማሪሶከ አቲን ሪሚድከ መሠረትህ ካሓኒ ጸጋ ሲናህ ታኮ ጻሎት አባ፡፡ 18. ጋባዔህ ለ ክርስቶስ ካሓኒህ ዋርደከ ዸዻን፣ ዸዻንከ አዳ፣ አይዻ ኪናም ቁዱሳንሊህ ሙሉኡክ ታስትውዕልኒም ዽዕቶናከ፣ 19. ታሃም ታዻጎና ታነዋ ክርስቶስ ካሓኖ ታዻጎና፣ ፉጊ  ፉጹም  ሚገህ ታማጎና ታብቃዖና ጻሎት አባክ አነ፡፡

   20. አማይጉል ናዳድ ሢራሓ ኃይሊህ ኡላህ ዻዒምናምከ ናሕሲበምኮ አጋናል የሰሰህ አቦ ዺዓ አምላክ፣ 21. ካ ሞሶዓረከ ኢየሱስ ክርሰቶሲህ ዳባናታህ ኡምቢህ ኡማንጉሊ ክብረ ያኮይ፤ አመን፡፡ 

                                           ማዕራፋ 4                                       

   አካል ኅብረት /ኢንኪኖ/

  1. አማይጉል ማዳሪ ካሓኒህ ዳዓባል ዩምዹወቲያ ኤከ አኑ፣ አካህ ደዕምምተን ዳዖህ  ያምስግነ ሂወት ሲንሊህ ያናዎይ ኤዽሔህ ሲን ዻዒማክ አኒዮ፡፡ 2. ካሓኖህ ስነስነህ ቲታ ሓታክ ኡማን ዋክተ ትሕቲናህ፣ ጋርሂኖህከ ትዕግሥቲህ ማራ፡፡ 3. ሳላማህ ትታሊህ ኤምዸበዸባይ መንፈስ ቁዱሱህ ገይምታ ኢንኪኖ ዻዉዾና ኢትክሃ፡፡ 4. ደዕሚሚተን ዋክተ ኢንኪ ታስፋህ ደዕምምተሚህ ሙሉእ ኢንኪ አካልከ ኢንኪ መንፈስ ያነ፡፡ 5. ታማም ባሊህ ኢንኪ ማዳሪ፣ ኢምነትከ ኢንኪ ጥምቀት ያነ፡፡ 6. ለል ኡማኒምኮ አሞ የከ፣ ኡማንቲያድ ለ ሢራሓ፣ ኡማኒል ማራህ፣ ኡማንቲያሊህ ማራ፣ ኡማንቲህ አባ የከ ኢንኪ አምላክ ያነ፡፡ 7. ያኮይ ኢካህ ክርስቶስ ኖህ ያሓዎ ይውስነሚህ መጠኒል ኒኒ ጸጋ ኖህ ቶምሖወ ፡፡ 8. ታሃም፣

            "አጋናል የውዔ ዋክተ ማንጎ ተመረከም  ይብዸህ የደየ፣

              ሒያዋህ ገፀበረከት ዮሖወ" የም ባሊህ ኪኒ፡፡

    9. ይቦል ታይ"አጋናል የወዔ"ያን ቃል ባዾ ቱላል ኦበ ያናምኮ ፈር አኪም አይም ያይቡሉወ? 10. ታይ ጉባል ኦበቲ ኡማን ቦታል ገይመህ ኡማንቲያህ ያማጎ ዓረናል ኡማኒሚህ አሞል የውዔቲያ ኪኒ፡፡ 11. ኡሱክ ጋሮጋሮ ሐዋርያት፣ ጋሮጋሮ ነብያት፣ ጋሮጋሮ ወንጌል ሰብክትማ፣ ጋሮጋሮ መእመናን ሎን፣ ጋሮጋሮ  መምሂራን ያኮና ዺዒ አካህ ዮሖወ፡፡ 12. ታሃም ለ አበም ክርስቶስ አካል የከ ሞሶዓረ ያህናፆ መእመናን ክርስቲያን አገልግሎቱህ ያይሳናዳዎ የህ ኪኒ፡፡ 13. ታማም ባሊህ መዔፉጊህ ባዻ ያዻጎና ኢምነቲህ ገይማ ኅብረት ማድነህ፣ ክርስቶስ ፉጹምከ ሙሉእ ኪናም ኢዻህ ናኑ ለ ሙሉእ ሒያው ናኮ ኪኒ፡፡ 14. ካምቦኮ ሣራህ ሒያው አይሳንጋላህከ አይታላላህ ቶንኮሉህ ቶምሶኖዶወ ታስገገየ ሚሂሮህ ሓሓይቲ ቶከ ታህ በያ ሕፃናት ማናከ፡፡ 15. ማንጊህ ሓቂ ካሓኖ ዋንሲታክ አሞ የከ ክርስቶሱህ ኒምጊደህ ኡማን ጉዳህ አነበሊኖ፡፡ 16. ኢሲሲ ሰውነት ክፍሊት ያምዸበዸበም ክርስቶሱህ ኪኒ፣ አካል ሙሉእድ የምዽብዸም ማንፋላላይቲህ ኪኒ፣ አማይጉል ኢሲሲ አካል አካህ ያምዲበ ሢራሕ አባ፣ አካል ሙሉኡድ ያነበ፣ ካሓኖህ ለ ያምሂኒፀ፡፡

                                       ክርስቶሱህ ገይማ ዑሱብ ሂወት

   17. ካምቦኮ ላካል ተን ማብሎ ካንቶ አክተከ አረማውያን ባሊህ ተኪኒህ ማይማራሪና ኤዽሔህ ማደሪ ሚጋዓህ ሲን ሰሊሰህ አኒዮ፡፡ 18. ተን አእምሮ ዲቶይተ፣ ተን ኢዽጋህ ዋይቲህከ ማዮ ያናሚህ ሰባባል መዔፉጊህ ሂወትኮ ሚሪሒ የን፡፡ 19. ሖላ ስምዕት የይለይንጉል ሲኒ ኡማ ልማድ ዻመን፣ አማይጉል ኢሲሲ ሩክሰት አምቆረጸካህ አቦና ጋዳህ  ያትምኒን፡፡

  20. አቲን ለ ክርስቶስ ዳዓባል ትምህርኒም ታሃም ማኪ፡፡ 21. ዓዲህ ካዳዓባል ቶቢን፣ ካይም ክትኒም ታሃም ቶብኒህ የከምኮ ኢየሱስድ ያነ ሓቀ ትምሂሪን፡፡ 22. አማይጉል የይተለለህ ኃጢአታድ ያይሚርሔ ዮምቦሎሶወ፣  ዕለህ ኤድ ማራክ  ትኒን፣ ዳዓይና ኪን ሰውነት ሚሪሕ ኢሳ፡፡ 23. ሲን አእምሮ መንፈስህ ታዓሳቦይ፡፡ 24. ሓቀ ለ ጽድቀህከ ቅደስናህ ፉጎህ ታማዻጎና ይምፍጥረ ዑሱብ ሰውነት ሀይሲታ፡፡ 25. አማይጉል ዲራብ ማዋንስቲና!ኡምቢክ ኢንኪ አካሊህ ክፈለ ኪኖጉል ኒነኒነህ ሓቀ ዋንሲኖይ፡፡ 26. ኢንኪጉል ኡካ አቁጡዒክ አሰንሚህ ኃጢአት ማሢራሒና፣ ሲኒ ቁጡዓ አለየካህ አሮይታ ሲናክ ዹመ ዋይቶይ፡፡ 27. ዲያብሎሱህ ቦታ አካህ ማሓይና፡፡ 28. ባዸዺታይ ይነቲ ካምቦኮ ላካል ባዸዺተ ዋዎይ፣ ጋዳህ ጹጉማታህ ኃዲላ ማል ያሎክ ኢሲ ጋቦቡህ መዔ ሢራሒህ ጉዳይ ሢራሖይ፡፡ 29. ኢንኪጉል ሲን አፍኮ ኡማ ቃል አውዔ ዋዎይ፣ ያኮይ ኢካህ ታበሚህ ጸጋ ያሓየቲያከ አብነቲህ ያኅናጾ ያጥቅመ ቲያ፣ ሒያዋህ ለ ጉርሱሳ ዋኒ ዋንሲታ፡፡ 30. እካህ ታድኅኒኒ ለለዒህ ዓርቡዉን ሲናህ ያኮክ አካህ ትምሂቲሚን ቁዱስ መዔፉጊህ መንፈስ ማስኃዛኒና፡፡ 31. አይማራር፣ ንደት፣ ቁጡዓ፣ ዋዕታ፣ ዋቶከ አኪናን ዓይነቲህ ኡምነ ኡምቢህ ሲንኮ ቶህ ምሪሕ ቶዋይ፡፡ 32. ማንጊህ ስነስነህ ቲታህ መዔምከ ቲታህ ታኅዚነም ቲካ፣ መዔፉጊ ክርስቶሱህ ኅድጎት ሲናህ አቦክ፣ አቲን ለ ስነስነህ ብሒላ ቲታህ ኤያ፡፡

        ማዕራፋ 5

          ኢፎል ማራ

  1. አማይጉል መዔፉጊህ ዻይሎ ኪትኒሚህ መጠኒል ካያህ ኢምጊዳ፡፡ 2. ክርስቶስ ኒይክሒነም ባሊህከ መዔፉጎ ኒያቲሳ መዔ ኡረ ለ መባእከ መሥዋዕት አበህ ኢሲ ሂወት ኖያህ ቲላሰህ ዮሖወም ባሊህ አቲን ለ ካሓኖህ ማራ፡፡ 

  3. ታይ ዓይነቲህ ጉዳይ ቁዱሳንሊህ ምያምሰመመዔጉል፣ ዙሙት ያኮይ አኪናን ዓይነቲህ ሩክሰተ ወይ አምሀጋጋይ አባናም ራዕቶዋይኪ ዋሪ ኡካ ሲናድ ያማቦ መዳ፡፡ 4. ጋዳህ መዔፉጎህ ሞሳ ካብ ኢሳ ኢካህ ሖላሳምከ አርቢሔ ዋይታም ያኮይ ናውረለ ጉዳይ ዋንስታናም ሲናህ መዳ፣ አይሚህ ታህ ኢጊድን ጉዳይ ሲናድ ያምሰመመዔቲያ ማኪ፡፡ 5. ዙሙት አባቲያ ያኮይ፣ አኪናን ብዕልጊና ሢራሕ ሢራሓቲያ የከምኮ፣ ወይ ለ ጣዖት ያምልከቲያ የከምኮ፣ ሀጉገሊ የከምኮ፣ ክርስቶሱከ መዔፉጊህ ማንግሥቲህ ሪስተ ሚያውሪሰም ኢዽጋ፡፡

  6. ታይ ጉዳይህ ምክንያታል አምዚዘ ዋይታ ሒያውህ አሞል መዔፉጊህ ቁጠዓ ታሚተህ ክንጉል አኪናንቲ ካንቶ ኪን ዋኒህ አምተለለ ዋዎይ7. አማይጉል ታይ አምኢዚዘ ዋታ ሒያውሊህ ማምሓባባርና፣ 8. አቲን ሲነህ ቶኮምኒህ ዲተ ታዳድ ማራክ ቲኒን፣ ካዶ ለ ማዳሪ ኢፊህ አዳል ኪትንጉል ኢፎል ማርታ ሒያውሊህ ማራ፡፡ 9. አይሚህ መዔነህ ሙሉኡድ፣ ጽድቀከ ሓቂ ፍረ ገይምታም ኢፎኮ ኪኒ፡፡ 10. አማይጉል ማዳራ ኒያቲሳ ጉዳይ አይም ኪናም ኢምርሚራ፡፡ 11. ኢፎል ኤየዓይ ኢቡላ ኢካህ ዋጋ ሂን ዲተ ሢራሓድ ማምሐባባሪና፡፡ 12. ኢሲን ሱዕቶህ አባን ጉዳይ ዋንሲቶና ኡካ ሖላሳ፡፡ 13. ኡማን ጉዳይ ኢፎል ያውዔጉል ሓቂ ቢሲ ዓዶቲያ የከህ ያምቡሉወ፡፡          14. አይሚህ ለ ዓዲህ ታምቡሉወም ኡምቢህ ኢፎል  ኪኒ፣ አማይጉል፣                      "አቱ ዑነዱጉላቲያ ኢንቂህ! ራባኮ ኡጉት!" 

                    ክርስቶስ ለ ኮህ ኢፎሰ ለ" የዽኂን፡፡

   15. አማይጉል አይናህ ተኒህ ማርታናም ሰሊታይ ኢስትውዕላይ ጠበብ ለም ባሊህ ቲካ ኢካህ ዱዲት ባሊህ ተኪኒህ ማማሪና፡፡ 16. ታይ ዳባን ኡማቲህ ቲያህ ኪንጉል አኪናን አጋጣሚ ዋክተህ ኢምጥቂማ፡፡ 17. አማይጉል ማዳሪ ፍቃድ አይም ኪና ኢስትውዒላ ኢካህ ሚዸ ማሎሊ ማኪና፡፡ 18. ሊይድ ሲን ያይምሪኄቲያ ኪንጉል ወይኒ ሜሲህ ማስካሪና፣ ጋዳህ  መንፈስ ቅድሲናህ ኤመጋ፡፡ 19. መዝሙርከ ውዳሴህ፥ መንፈሳዊ ዜማህ ሲነሲነህ ዋንሲታ፥ ውዳሴከ መዝሙሩህ ሲኒ አፍዓዶህ ማደራ ኢምስጊና፡፡ 20. ኒማዳሪህ ኢየሱስ ክርስቶሲህ ምጋዕ ኡማንቲህ ዳዓባል ፉጎ ኪን አባ ለ ኡማንጉሉህ ኢይምስጊና፡፡

                               ባዕላከ ኑማህ ዳዓባል               

    21. ክርስቶስ ክብረህ ተኒህ፣ አቲን ሲንኮ ኢንከከቲ አከቶህ ያምአዛዞይ፡፡ 22. አጋቦ! ኒማዳራ ኢየሱሱህ ታምዝዚኒም ባሊህ ሲኒ ባዒሊህ ኢምኢዚዛ፡፡ 23. አይሚህ ክርስቶስ ሞሶዓሪ አሞይታ ኪናምባሊህ ባዕሊ ኑማት አሞታ ኪኒ፣ ለል ክርስቶስ ካአካል የከ ሞሶዓረ ያይድኅነቲያ ኪኒ፡፡ 24. ሞሶዓሪ ክርስቶሱህ ያምእዚዘም ባሊህ አጋቢ ኡማን ጉዳህ ሲኒ ባዒሊህ ያምአዘዞናይ፡፡  

   25. ላበቶ! ክርስቶስ ሞሶዓረ ይክኅነም ባሊህከ ኢሰ ካያህ ቲላሰህ ዮሖወም ባሊህ አቲን ለ ሲኒ አጋቦ ኢክሒና፡፡ 26. ክርስቶስ ታሃም አበም ሞሶዓረ ያስቃዳሶ ጉረጉል ኪኒ፣ ይስቅዲሰም ኢሲ ቃሊህ አራሓህ ላየህ ዓካሊሰህ ኪኒ። 27. ታይ ዓይነቲህ ዑዱፍ ያኮይ ነፍቲ አምጻዋግ ያኮይ ለ ታህ ኢጊድ አኪ ኡማ ጉዳይ ኤድገይመካህ በደል አለዋይታ ጽሪቲያከ ዓዻ መዔቲያ አበህ ኢሲ ነፊል ካብ ኢሳ፡፡ 28. ታማም ባሊህ ባዒል ሲናሞ ኪኅኖኑም ባሊህ ሲኒ አጋቦ ያክሓኖና ኤዳ፣ ኑማ ክሒንቲ፣ ኢሰ ኪሒና፡፡ 29. አይሚህ ኢሰ ኒዒብቲያህ ኢንከቲ ሚያነ፣ ጋዳህ ክርስቶስ ሞሶዓረህ አባሚህ ዓይነቲህ ኢሰ ያምግበህ፣ አኖኒታ፡፡ 30. ናኑ ለ ክርስቶስ አካል ክፍልት ኪኖ፡፡ 31. ታይ ምክንያታል "ሒያውቲ አባከ ኢና ሓባህ ኑማሊህ ያምሔበበረ፣ ላሚህ ኢንኪ አካል" ያኪን፣ ያዸሔ፡፡ 32. ታይ ምሥጢር ናባቲያ ኪኒ፣ ታሃሞም ያዽሔም ክርስቶስከ ሞሶዓሪ ዳዓባል ምሳለ አበህ ኪኒ፡፡ 33. ያኮይ ኢካህ ታይ ጉዳይ ሲና ለ ያብለ፣ አማይጉል ባዕሊ ኑማ ኢሲ ዸግኃ ባሊህ አቦአይ ያክሓኖይ፣ ኑማ ለ ኢሲ ባዕላ ታስካባሮይ፡፡

                                                   ማዕራፋ 6

         ወለድከ ዻይሎ ዳዓባል

    1. ኢሮ! ማዳሪ ኢየሱስም ኪቲንም ኢዻህ ሲኒ ዻልቶይቲህ ኢምኢዚዛ፣ አይሚህ ታይ ጉዳይ ኤዳቲያ ኪኒ። 2. ኢሲ አባከ ኢሲ ኢና ኢስክብር ያዸሔ ትኢዛዝ፥ ታስፋ ቃል ኤድያነ ኤዸዾይታት ትኢዛዝ ኪኒ፣ 3. ታሃሞም አብታጉል ኡማን ጉዳይ ኮህ ያስልተ፣ ዒድመ ለ ኮህ ታዸዸ፡፡

   4. አቲን ወለድ! ማዳሪ ኢየሱስ ሥነ ሠርዓትከ ፋዎህ ዓሪሳካህ ሲኒ ዻይሎ አስቁጡዒክ  ማስማራሪና፡፡

      ማዳራከ አገልገልት ዳዓባል

     5. አገልግለቲ! ኃዶይታህ ሲን ማዶር ኪናማህ ማይስህከ አዻዾህ እምኢዚዛ፣ 6.ታምኢዚዚኒም መዔፉጊህ ፍቃዳህ ሲኒ አፍዓዶኮ ታፍጽምኒም ባሊህ ክርስቶስ አገልግሎቱህ ተኒህ ኢካህ ሒያው ታስካሓኖና ተኒህከ ታምባላዎና ተኒህ ማቢና። 7. ሒያው አከካህ ኒማዳራ ኢየሱስ ታስግልግሊኒም ባሊህ አብተኒህ መዔ ዲላህ ኢስግልጊላ፡፡ 8. አይሚህ አገልጋሊ ያኮይ ማደሪ፣ ኢሲሲ ሢራሒህ መዔ ሢራሓህ ማደሪ ኢየሱስኮ ሊካሕ ጋራቲያ ኪናም ታዺጊን፡፡

   9. አቲን ለ ማዶሮ! ሒያውቲ ነፊል አይዶሎወ ዋ ስንቲያከ ተን ማዳሪ ዓራናል ያነም ኢዝኪራይኪ፥ ማይሲሶ ኃብተኒ ሲኒ አገልገልቲህ መዔም አካህ አባ፡፡

መዔፉጊህ ጦርቲ ኑዋይ /መሣረዒያ/

       10. ራዕተሚህ ይሳዖሎ! ማዳራ ኢየሱስከ ካባህ ኃይላህ ኢስሪያ፡፡        11. ዲያብሎስ ቶንኮል ሥራሕኮ ታምካላካሎና ዺዕቶናክ መዔፉጊህ ጦርቲ ማሣረዕያ ሙሉኡድ ኢክቲያ፡፡ 12. አይሚህ ንውጊእ ሒያውሊህ አከካህ ታይ ዲተ ዳባን ሢራሕታ ገዛእት፣ ሢልጣን ባዕልከ፣ ዓለም ኃይሊት ዓራናል ታነ ሩኩሳት መናፍቲህ ሠራውትሊህ ኪኒ፡፡ 13. አማጉል መዔፉጊህ ጦርቲ መሣረዒያ ሙሉኡክ አጉሣ! ታይ አጋባቢራህ ኡማ ለለዕ ሲናድ ጋራጉል ናዓብቶሊቲ ኃይላ አምከለከሊክ  ባክቶ  ፋናህ ዺባተኒምኮ  ላካል ሲክ ተኒህ  ሶልቶና ዺዔ ሊቲነ፡፡

   14. አማይጉል ሓቀ ዚናር ባሊህ ኢክቲያ፣ ጽድቀ መዔ ሲኒ ሣራ ባሊህ ሀይስታ፣ 15. ሳላም በሠራታ ቃል ካበላ ባሊህ ሲኒ ኢባቢድ ሳይሳይ ኦምሶኖዶዋይ ሶላ፡፡ 16. ታሃም ኡምቢህያህ አሞል ጊራ ባሊህ ሀልሀል ታ ዲያብሎስ አፋላጸ ኡምብህ ታይላዮና አካህ ዺዓታን ኢምነት ጎቦ ባሊህ ኡጉሣ፡፡ 17. ታማም ባሊህ ድኅነት ባርነጣ ሲኒ ዸግኃህ አሞል ጋማ፣ መዔፉጊህ ቃል መንፈስ ቁዱስ ሰይፊ ባሊህ ኢብዻ፡፡ 18. ሲን ጉርሱሳም ኡምቢህ ዻዒማክ መንፈስ ቁዱሱህ አምርሕክ ኡማንጉል ጻሎት አባ፣ ታይ ዓይነቲህ ኢንቅሓይ ኢትጊሃ፣ መእመናናህ ኡምቢህ አስቆሮጸካህ ጻሎት አባ። 19. ወንጌል ምሥጢር ማይሲማለህ ያምጋላጾ፣ ዋንሲታንጉል ጉረሱሳ ቃል ዮህ ያሓዎ ዮያህ ለ ጻሎት አባ፡፡ 20. ካዶ ኡካ ኡምዹወህ አኒዮሃኒህ ታይ ወንጌሊህ አምባሳደር ኪዮ፡፡ አማይጉል ዮህ ያምሪዲኤም ባሊህ ኢንኪ ማይሲማለህ ዋንስቶክ ጻሎት ዮህ አባ፡፡

                                          ባክቶ ሳላምታ      

     21. ኢምክሒን ኒሳዓልከ ኒማደሪህ ኢየሱስ ሢራሓህ ያምእምነ አገልጋሊ የከ ቲኪቆስ አኑ አካህ አነም ታዻጎና ይዳዓባል ኡማን ጉዳይ ሲናክ ኢየለ፡፡ 22. አማይጉል ናኑ አይናህ ኪኖም ታዻጎናከ ሲን ያይባራታዖ ለ ያናማህ ካያ ሲና ዻጋህ  ፋረህ አኒዮ፡፡

    23. መዔፉጎ አባከ ማዳራ ኢየሱስ ክርስቶሲህ ሳላምከ ካሓኒ ኢምነትሊህ ይሳዖሉህ ያኮይ፡፡ 24. አስቆረጸ ዋ ካሓኒ ኒማዳራ ኢየሱስ ክርስቶስ ኪኂናማህ ኡማንቲያሊህ ጸጋ ታኮይ፡፡