ግብረ-ሐዋርያት

                                            ሐዋሪያት ሥራሕ

                                               ሳይማ                               

   ሐዋርያት ሢራሕ ሉቃስ ወንጌልኮ ትቅጽለቲያ ኪኒ፣ ማጽሐፍ ዋና ዓላማ ኤዸዾይታት ኢየሱስ ተከተልት መንፈስ ቁዱሱህ ይምርኅኒህ ካደዓባል ዋንስታ በሠራታ ቃል ኢየሩሳለሚል፣ ይሁዳ  ባዾል ኡምቢህ፣ ሰማሪያል፣ አይከ ባዾ መሔለዲያ(1፣8) ወንጌል አይናህ የህ የምሰፈፈሔም ያታራኮ ኪኒ፣ ማጽሐፍ ክርስቲናት ኢምነት አይሁድ ፋናድ ኤዸዸህ ኡማን ዓለሚህ ሂዝቢህ ኢምነት ያከም ፋናህ አይናህ የህ የምፈደደነም ዋንሲታ ታርክ ኪኒ፡፡ ጻሐፊ፣ ክርስቲያን ሮማ ኑጉሠ ነገሥቲህ ማንግሥት ያስቃሳቃሶና አዳከ አዳህ ሠራ አብታ ሒያው ማክኖኑምከ ክርስቲናት ሃይማኖት፣ አይሁድ ሃይማኖት ፉጹም አባቲያ ኪናም ያይራዳኦና ኃይላለ ፃዕረ አበ፡፡ ሐዋሪያት ሢራሕ፣ ኢየሱስ ዳዓባል ዋንሲታ በሠራታ ቃል ማዳ ቦታል ኢሲሲ ጊዘህ አፍድኒክ የደርከህከ ሞሶዓሪ ይምሥሪተም ታስቡሉወ አዶሓ ዋና ዋና ክፍልቲህ ያማዳቦ ዲዓ፡-1. ክርስትናት ሃይማኖት ኢየሱስ ዓራናል የውዔምኮ ሣራህ ኢየሩሳለምል ኤዸዺሰም፡፡ 2. እስራኤል ባዾል ሙሉኡድ አዸዸም፡፡ 3. ሮማ ኤሰሊሄህ መዲተራኒ ባሕሪ አካበቢል ታነ ባዾል የምሰፈፈሔም፡፡ ሐዋሪያት ሢራሒህ አዳል ኢፎየህ ያምበሉወም መንፈስ ቁዱስ ሢራሕ የከጉል፣ ጳራቅሊጦስ ለለዕ ኢየሩሳለምል ቲነ አማንቲህ አሞል ኃይላህ ኦበም፣ ታማባሊህ ማጽሐፍ አዳል ተከም ሙሉኡድ ዩመቡሉወም መንፈስ ቁዱስ ሞሶዓረከ መራኅቲህ ትምሪኄም የይበረተዔም ኦሳ፡፡ ባሶ ዋክተ /ጥንቲ ዋክተህ/ ካብ አይነ ክርስትና መልእክት ኢሲኢሲ ስብከቲህ አዳል አስተዋጽኦ ቢሶህ ካብየ፣ ሐዋሪያት ሢራሒህ አዳድ ትምፊጺመ ሢራሓቲ ለ መልእክት አማኒቲ ሂወትልከ ሞሶዓሪ ኢንኪኖል ዪነ ኃይሊ አይዳ ናባቲያ ክይይ ዪነም ያርደኤ፡፡            ===================================                                                         ማዕራፋ 1                   

   1. ኦ'ተፍሎሶ! ኤዸዾይታት ይማጽሓፋል ኢየሱስ ሢራሔ ሢራሕከ ይምህረም ኡምቢህ ኢጽሕፈ አኒዮ፣ ኢጽሕፈም ኢየሱስ ሢራሕ አክ ኤዸዺሰ ዋክተኮ ኡጉተህ፣ 2. ዓራናል አይከ የውዔ ለለዕ ፋናህ ሢራሔም ኪኒ፣ ዓራናል የውዔም ዶረ ሐዋሪያታህ ትኢዛዝ መንፈስ ቁዱስ አራኃህ ዮሖወምኮ ላካል ኪኒ፡፡ 3. ማንጎ ሔልዋይ ጋራየህ ራበምኮ ሣራህ ማንጎ ግልፀ ኪን ማባዾል ያነቲያ የከህ ዩምቡሉወ፣ ሞሮቶም ለለዕቲያ ሙሉኡድ አካህ አምቡሉውክ መዔፉጊህ ማንግሥት ይምህረ፡፡ 4. ተንሊህ  አንኮህ ዪነ ዋክተ ታህ የህ ተን ይእዚዘ፣ አኑ ሲናከም አባኮ ሲናህ ቶምሖወ ታስፋ ዻዉዻ ኪኒካህ ኢየሩሳለምኮ ማውዒና፣ 5. ያሃኒስ ላየህ ይጥሚቀ፣ አቲን ለ ዳጎ ለለዕኮ ላካል መንፈስ ቁዱሱህ አምጥምቀ ሊቲን፡፡                                                   

ኢየሱስ ዓራናል የውዔ          

 6. ኢሲን ኢንኮህ የከሄልኒህ ያንንሃኒህ "ማዳሪ! ማንግሥት እስራኤልህ ደሄይተህ ታሔየ ዋክቲ ካዶ ኪኒ?"የኒህ ካኤሠረን፡፡ 7. ኢየሱስ ታህ የህ ይመልሰ፣ አባ ኢሲ ሢልጣናህ ይውሲነ ዋክተከ ዳባን አቲን ታዻጎና ማዽዕታን፡፡ 8. ያከካህ መንፈስ ቁዱስ ሲን አሞል ኦባጉል ኃይላ ጋራይተኒህ፣ ታማይ ዋክተ ኢየሩሳለምል፣ ይሁዳ ባዾል ኡምቢህ፣ ሰማሪያል፣ አይከ ባዾ መሔለዲያ ፋናህ ዮያህ ታመስክረም አከልቲን፡፡ 9. ታሃም ለ የምኮ ላካል ኢሲን አብልህ ዓራናል የወዔየ፣ ዳሩር ለ ተን ኢንትትኮ ይስውረ። 10. ኡሱክ የደየ ዋክተ ኢሲን ዓራን አይደለለዕይ ያንንሃኒህ፣ ዓዶ ሣራ ሃይስተ ላማ ሒያውቲ ተናፋል ሶለኒህ፣ 11."አቲን ገሊላ ሒያዎ አይሚህ ሶልተኒህ ዓራን ኤደለለዕክ ታኒን? ታይ ዓራናል አውዕህ ቱብሊን ኢየሱስ፣ ዓራናል አውዕህ ቱብሊኒም ባሊህ ጋሔህ አምተለ" አክየን፡፡                                                                    ይሁዳ ቲዻህ ማትያስ ዶሪመ 

  12. ታሃምኮ ላካል ደበረዘይቲ አክያን ኮማኮ ኢየሩሳለምል ጋሔን፣ ደብረዘይት ኢምባ ኢየሩሳለምኮ ዸዻም ኢንኪ ኪሎ መተር ታከም ኪኒ፤ 13. ኢየሩሳለምል የመቲኒህ ኤድማራን ሰገነቲክ አሞክ የውዕን፣ ኢሲን ለ ጰጥሮስ፣ ያሃኒስ፣ ያይዕቆብ፣ እንድያስ፣ ፊሊጶስ፣ ቶማስ፣ በርቶሎሚዎስ፣ ማትዎስ፣ እልፊዮስ ባዻ ያይዕቆብ፣ ያምነቀነቀ ስመዖን፣ ያይዕቆብ ባዽ ይሁዳ፣ ክኖን፡፡ 14. ታይ ማሪ ኡምቢህ ኡማንጉል ጻሎቱህ ኢንኪል አከሄልይ ዪኒን፣ ተንሊህ ውልውል ሳዮከ ኢየሱስ ኢና ማርያም ታማም ባልህ ኢየሱስ ሳዓዖል ይኒን፡፡ 15. ታማይጉል ጰጥሮስ ቦል ላማታና ታከ አማንቲያህ ፋናል ሶለህ ታህ የዽሔ፡፡ 16."ይሳዖሎ! ኢየሱስ ያባዾና ሒያዋህ መራሒ የከ ይሁዳ ዳዓባል፣ መንፈስ ቁዱስ ዮኮመህ ዳዊት አፋህ ዋንስተ ትንብት ቃል ያምፋጻሞ ኤልታነ፡፡ 17. ይሁዳ ኖኮ ኢንከቶ የከህ ኒሢራሕ ያምከፈለቲያ ኪይይ ዪነ፡፡ 18. ያከካህ ታይ ሒያውቲ ኡማ ሢራሕህ ሊሞህ ባዾ ዻመ፣ ዳምባራህ ጋሚመህ ፋናል ዓንዽዸ፣ ኡሉዓ አክኃዽተ፡፡ 19. ታይ ጉዳይ ኢየሩሳለሚል ማርታማህ ኡማንቲያህ ይምዽገ፣ አማይጉል ቶይ መረት ተን ዋኒህ"አኬልዳማ" የኒህ ደዓን፣ ቱርጉም ለ ቢሊ ባዾ ማለት ኪኒ፡፡ 20. ታሃም አካህ ተከ ምክንያት መዝሙር ማጽሐፋል፣"ካዲክ ዲቦ ያኮይ፣ ኢንከቲ አድማረ ዋዎይ፣"ለል ለ "ካረዳ አኪ ሒያውቲ በዮይ" ያ ጹሑፍ ይምጽሕፈህ ይነጉል ኪኒ፡፡ 

  21. አማይጉል ኢየሱስ ኒፋናድ ጋሓንጋሔጉል ኡምቢህ ኖሊህ ኢንኮህ ትነምኮ፣ 22. ታማም ባሊህ ያሃኒስ ጥምቀትኮ ኤዸዺሰህ ማዳሪ ኢየሱስ ዓራናል ያውዔ ለለዕ ፋናህ ኢንኮህ ቲነ ታይ ሒያውኮ ኢንከቲ ኖሊህ ኡጉተህ ማስኪር ያኮ ጉርሱሳ፡፡ 23. ታሃምኮ ላካል ላማ ሒያውቶ ካብ ኢሰን፣ ኢሲን ለ ባርሳባ ወይ ኢዮስጦስ አክያን ዮሴፍከ ማቲያስ ኪይይ ዪኒን፡፡ 24. ታህ የኒህ ጻሎት አበን፣"ሒያው ኡምቢህያህ አፍዓዶ ታዽገ ማዳራ! ታይ ላማይኮ አይቲያ ዶርተም ኒኡስቡሉይ፡፡"25. ጻሎት አብናም ይሁዳ ኢሲ ቦታህ  አዲህ ኃበ አገልግሎቱህከ ሐዋሪያ ያኪኒም ገራየህ ኤድ ያምቲኬኤቲያ ኖህ ታግላጾ ነህ ኪኖ፡ 26. ዒደተ ዒደንጉል ማትያስ የውዔ፣ አማጉል ኡሱክ ኢንካንከ ታማን ሐዋርያትያሊህ ሎይመ፡፡

                                               ማዕራፋ 2

                                መንፈስ ቁዱስ ተምሃርቲ አሞል ኦበ

 1. አይሁድ ፋስጊ ቲላየምኮ ኮንቶም ለለዕትያል ያክብረ ጳራቅሊጦስ ባዓላህ ተምሃሮ ሙሉኡክ ኢንኮህ ኢንኪ ቦታል የከሄልኒህ ዪኒን፡፡ 2. ድንገቲህ ኃይላለ ማእበል ሓሓይቲ አንዻሕ ዓራንኮ የመተ፣ ኤድ ይኒን ዓረ የመገ፡፡ 3. ጊራ ሃልሃልታህ ኢጊድ አሮብ አካህ ዩምቡሉውን፣ ሓሓድመህ ተንተን ዸግኃህ ኦሞክ ይዑሩፈ፡፡ 4. ኡምቢህ መንፈስ ቁዱሱል የመኒን፣ መንፈስ ቁዱስ አካህ ዋንስቶና አካህ ዮሖወ ዽዕቲ መጠኒል አኪ ዋኒህ ዋንስታናም ኤዸዽሰን፡፡ 5. ዓለምል ታነ ሀገራትኮ ሙሉኡ ተመተ መንፈሳውያን አይሁድ ኢየሩሳለምል ማራይ ዪኒን፡፡ 6. ታይ አንዻሕ ዮቢን ዋክተ ማንጎ ሒያው ተከሄለ፣ ኢሲሲሲ ዋኒህ ዋሲታህ ዮብንጉል ይምድንቂን፡፡ 7. አምጋራማህከ አምዳናቀህ ታህ የን፣ ታይ ማሪ ታሃም ዋንስታም ኡምቢህ ገሊላ ሒያው ማኪኖኑ? 8. ይቦል ናኑ ተንተን ኡብካህ ባዾህ ዋኒህ ዋንስታህ ተን ናበም አይናህ ኪኒ? 9. ናኑ ጳርቴል፣ ሜድል፣ ዔላሚል፣ መስጴጦሚያል፣ ጵንፍሊያል፣ ጳጦሱል፣ እስያል፥ 10. ፍርግያል ጵንፍሊያል፣ ግብጸል፣ ቀሬናት አፋል፣ ሊቢያት ዞባል ማርታም ኪኖ፣ ሮማኮ ለ ተመተ አይሁዳውያን አይሁዱድ ሳይተም ለ ኤድገይማን፤ 11. ታማም ባሊህ ለ ቀርጤስከ ዓራብ ሒያውኮ ኤድገይማን፣ ሃይከ ታሃም ኡምቢህ ፉጊ ናባ ሢራሓህ ተንተን አፋህ ዋንስታህ ተን ናባ!"12. አማይጉል ኡምቢህ ይምግርምኒህ ያናም ሶዸኒህ ታይ ጉዳይ አይም ኪኒ ኢሲመን፡፡

   13. ጋሪጋረ ለ "ዑሱብ ወይኒ መስ ዮዖብኒህ ይስክሪን!" አይክ ኤልየለገጺን፡፡

                                                 ጰጥሮስ ዋኒ

  14. ታማይ ዋክተ ጰጥሮስ ኢንካንከ ታማንኮ ኢንከቶሊህ ሶለህ አንዻሕ ዋዕ  ሂዝበህ ታህ የህ ዋንስተ፥ አቲን ይሁዳ ባዾህ ሒያዎ ኢየሩሳለምል ማርታማክ ኡምቢህ ታይ የከ ጉዳይ ታዻጎናክ ይዋኒ ኦኮይስታ፡፡ 15. ዳሕኒት ገና አዶሓ ሳዓት ኪንጉል አቲን ታሕስቢኒም ባሊህ ታይ ሒያው ማስካሪና፡፡ 16. ያኮይ ኢካህ ታሃም ተከም ነብይ ኢዩኤል ታህ የህ ዋንስተ ቃል ያምፋጻሞ ዒሎህ ኪኒ፡፡

     17.'መዔፉጊ ባክቶ ለለዕ ታህ አከለ ያ፣  ኢኒ መንፈስ ሒያው ኡምቢህ ኢያህ አሞል ሓዸሊዮ፣  ላበቶከ ሳዮ ዻይሎ ትንብት ዋንስተሎን ፥

          ናባማሪ  ትንቢት አብለሎን ፥

          ስማግለታት ለ ሶኖ ሶኒተሎን፡፡

    18. ታማም ባሊህ ታይ ለለዓድ ላበቶከ ሳዮት 

          አገልገልቲህ አሞል መንፈስ ሓዸሊዮ፥

          ኢሲን  ትንብት ዋንሲተሎን፡፡

    19. አጋና ዓራናል  ያስጊረመ ጉዳያት፥

          ጉባ  ባዾል ታምራት አስቡሉወ ልዮ፥

          ዳሩርከ ጊራ ቲኪህ ዓቦሪ አምብሉወ ለ፡፡

     20. ናባቲያከ ያይድንቀ ፉጊ ለለዕ ያምተሚህ ባሶል፣ 

           አይሮይታ ዲቶወ ለ፣ 

           አልሳ ቢሎህ አምጊደ ለ፡፡ 

    21. መዔፉጊህ ምጋዕ ደዓቲ ኡምቢህ አድኅነ ለ፡፡' 

   22. እስራኤል ሒያዎ! ታይ ቃል ኦኮይሲታ፣ አቲን ለ ታዽጊኒም ባሊህ ናዝሬት ኢየሱስ ፉጎኮ ሲናህ ይምግልጸ መለኮታዊ ሢልጣን ለቲያ ኪኒ፣ ታሃም ካአራሓህ መዔፉጊህ ታአምራታህ፣ ያስግረመ ጉዳይከ ናባ ምልኪታት ኡምቢህ ሲን ነፊል አበርከህ ይምዽገ፡፡ 23. ታሃም ለ ሒያው መዔፉጊ ዮኮመህ አበ ዕቅድከ ኢዽጋ ሢራሕህ ሪሚድህ ሲናህ ትላየህ ዮምሖወ፣ አቲን ለ ዓማፀይናታት ጋባህ ታካርሞከ ራቦ አብተን፡፡ 24. መዔፉጊ ለ ራቢ ኃይላ አክ የይለየህ  ራባኮ ኡጉሠ፣  አይሚህ ራቢ ይብዸህ ራዒሶ ማዽዒና፡

    25. ዳዊት ካዳዓባል ታህ የ፣

         'መዔፉጎ አማንጉል ኢኒ ነፊል አብለ፣

          ዮሊህ ኪናም ኢዻህ ማምሄወከ፡፡ 

    26. አማይጉል ኢኒ አፍዓዶኮ ኒያታ፣ 

          ይመንፈስ  ኒያታህ  ያመገ፣ 

          አማም ባሊህ ራቦንታ ኪን ይሓዶይታ ታስፋህ ማርታ፡፡

    27. አይሚህ ይናፍሰ ራቢ ዓለሚል ማኃብታ፣

          ኢሲ ቁዱስ ለ ማዓጊ አዳድ ራደህ ራዖ ማብታ፡፡

    28. ሂወት አራሕ ይትይስዽገህ፣ 

           ዮሊህ ተከርከህ ይኒያት ፉጹም ዮህ ያከ፡፡'

   29."ይሳዖሎ! ባሶት አቦብኮ ኢንከቶ የከ ዳዊት ራበምከ ይሙዑገም፣ ካማዓጊ ለ ካፋ ፋናህ ኖሊህ ያነም ዓዶም ኪናም ሲናክ ኦዋ' ዽዓ፡፡ 30. ያከካህ ዳዊት ታሃም ዋንስተም፣ ነብይ ኪይይ ይነጉልከ መዔፉጊ ኩዳራኮ ኢንከቶ ኩዙፋኒህ አሞክ ድፈሰሊዮ የህ ዽዋህ አካህ ዮሖወ ታስፋ ቃል አዽጊይ ይነጉል ኪኒ፡፡ 31. ታሃሚህ ዳዓባል መሲሕ ሲኦሉድ ማራዓምከ ካሓዶይታ ዱኮድ ራደህ ማራዕታም ባሶል ዩብለህ ኢሲ ኡግታቶህ ዳዓባል ዋኒሰ፡፡ 32. ታሃም ኢየሱስ መዔፉጊ ራባኮ ኡጉሠ፣ ናኑ ለ ኡምቢክ ታይ ጉዳህ ማስኪር ኪኖ፡፡ 33. አማይጉል ኡሱክ ፉጊ ምድጋል ክብረህ ድፈያምከ አባኮ አካህ ቶምኄወ ታስፋህ መንፈስ ቁዱስ ጋራየህ ታይ ታብልንምከ ታብንም ሓዸ፡፡ 34-35. አማይጉል ዓራናል የውዔቲ ዳዊት ማኪም ዳዊት ኢሰህ  ታህ የህ ዋንስተ፥ 

        'መዔፉጎ ይማዳራክ (መሲሕክ) 

         ኩናዓብቶልት ኩሢልጣኒህ ዳባል ኮህ አባምፋናህ 

         ይሚድጋል ድፈይ' አክየ።

  36. አማጉል ታይ አቲን ጋራይተን ኢየሱስ ፉጊ ማዳራከ መሲሕ ካአበም እስራኤል      ህዝቢ ኡምቢህ ዓዲህ ያዻጎይ፡፡ 37. ሒያው ታሃም ቶበ ዋክተ አፍዓዶ ኃዛናህ አክ ዻጊተህ ጰጥሮስከ አኪ ሐዋሪያታክ" ይሳዖሎ! አማይጉል አይም አብኖ?" አክየን፡፡

 38. ጰጥሮስ ታህ አክየ፣ "ንስሐ ሳ፣ ኃጢአት ሕድጎት ገይቶናክ ሲነሲነህ ኢየሱስ ክርስቶሲህ ምጋዓህ ኢምጢመቃ፣ መዔፉጊህ ገጸበረከት /ሰጦታ/ የከ መንፈስ ቁዱስ ለ ጋራየ ልቲን፡፡ 39. አይሚህ ታሰፋ ቃል ስንከ ሲን ዻይሎህ፣ ኒማዳሪ ናአምላክ ኢሱላል ደዓም ዸዽል ታነም  ለ ኡምቢህ ኪኒ፡፡" 

  40. አክሚህ ለ ማንጎ ቃላህ አምስክርክ፣ ታይ ሑልኩስ /ጉዳ/ ኪን ዓለሚህ ማባኮ ታሞል ያምተ ቅጸዓትኮ ሲነ ኢድኂና፣ ያናማህ ተን ይምክረ፡፡ 41. ተንኮ ማንጎ ማሪ ተን ቃል ጋራየን፣ ታማይ ለለዕ አዶሓ ሲሕ ታከም አማንቲኮ ኦሲተ፡፡ 42. ኢሲን ለ ሐዋሪያት ምህሮ ዮብኒህ፣ ሳዖልናህ ኢንኮህ ማራክ፣ ኢንገራ ኢንኪድ አቁሩስከ ጻሎቱህ አትግህይ ይኒን፡፡

                                        አማንቲ ሳዖሊናህከ ኢንኪኖህ ናብራ

   43. ታማይ ዋከተ ሐዋርያት ጋባህ ማንጎ ታአምራትከ ድንቀ ኪን ጉዳይ አኪይ ይነጉል ኡማንቲህ አሞል ማይሲ ቲኅዲረ፡፡ 44. አማንቲ ኡምቢህ ኢንኪል ኢንኮህ ማራይ ዪኒን፣ ሎን ጉዳይ ኡምቢህ ኢንኪድ ሊይ ዪኒን፡፡ 45. ሲኒ ባዾከ ኒበረት አብሒክ ማል ተንተን ጉርሱስናኒሚህ ኃድሊታይ ዪኒን፣ 46. ኢሲሲ ለለዕ በተ መቅደስድ ኢንኪድ አከሄሊይ ዪኒን፣ ሲኒ ዲክድ ኢንገራ አቅሩሲክ ኒያታከ መዔ አፍዓዶህ አምገብይ ዪኒን፡፡ 47. ፉጎ ለ አይምስጊኒይ ዪኒን፣ ሒያው ኡምቢህ ተን አስክብሪይ ቲነ፣ መዔፉጊ ለ ታድኂነ ሒያው ኢሲሲ ለለዕ ተን ማኅበርድ ኦሳይ ዪነ፡፡

                                             ማዕራፋ 3

                                      ሲባ ኡሩሰ /ይፍውሰ/

  1. ኢንኪ ለለዕ ጰጥሮስከ ያሃኒስ ጻሎት ሳዓት በተ መቅደስ ኡላል አድይ ይኒን፣ ዋክቲ ለለዕት ሳጋላ ሳዓት ኪይይ ዪነ፡፡ 2. ታማል "ዓዻ መዔ ኢፈይ" /ውብ በር/"አይክ ደዓምምታ ቦታ ቲነ፣ ዮቦከ ለለዕኮ ኤዸዺሰህ ሲባ የከ ኢንኪ ሒያወቲ ዪነ፣ ካያ ለ ሒያው ኡማን ለለዕ ባሃናህ ታማል ድፈሳይ ይኒን፣ ኡሱክ ታማል ድፈህ በተ መቅደስድ ሳይታ ሒያው ምጽዋት ዻዕማይ ይነ፡፡ 3. ታይ ሒያውቲ ጰጥሮስከ ያሃኒስ በተ መቅደስድ ሳህ ዩብለህ ምጽዋት ተን ዻዕመ፡፡ 4. ኢሲን ለ ሒያውቶ ይቱኩሪኒህ የይደለለዕኒህ ኑላል ቁሉሕ ኤይ አክ የን፡፡ 5. ኡሱክ ለ ምጽዋት አካህ ያሓኒም የከለህ ይቱኩረህ ተን የይደለለዔ፡፡ 6. ጰጥሮስ አኑ ማልከ ዋርቀ ማልዮ፣ ሊዮም ለ ኮህ አሓየ ሊዮ፣ ናዝሬት ኢየሱስ ክርስቶስህ ሚጋዓህ ኡጉታይ አዱይ አክየ፡፡ 7. ምድግ ጋባህ ይብዸህ ኡጉሠ፣ አማይጉልካህ ኢባከ ኩልሑምቲት አካህ ትሰሪየ፡፡ 8. ባድጋ የህ ሶለህ ታክሳክ ተንሊህ በተ መቅደስድ ሳየ፣ ታክሳከ ፍድታክ መዔፉጎህ ሞሳ ደሄያክ ይነ፡፡ 9. ሒያው ኡምቢህ ገዾ አባክከ መዔፉጎ አይምስግኒህ ዩብሊን፡፡ 10. ውብ በር አይክ ደዕምምታ ቦታል በተ መቅደስ ኢፈዪህ አፋል ድፈህ ምጽዋት ዻዕማይ የነቲያ ኪናም የዸጊን፣ ካአሞል የከ ጉዳህ ያምግሪሚኒምከ ያምድንቂኒም ኤዸዽሰን፡፡

                                  ጰጥሮስ በተ መቅደስድ አበ ዋኒ

  11. ኡረ ሒያውቲ ጰጥሮስከ ያሃኒስኮ ማባድስማ ያናማህ ተን ይብየዸህ ያነሃኒህ፣ ሒያው ትምድንቀህ ሰሎሞን ጋኃንጋኄና አክያን ሲፍራል ተን ኡላል የርዲኒህ የደይን፣ 12 .ጰጥሮስ ለ ሒያው ዩብለጉል ታህ አክየ፣ "እስራኤል ሒያዎ! ታይ ጉዳህ አይሚህ አምግሪምክ ታኒን? አይሚህ ዒሎህ ቱቱኩሪኒህ ናብልክ ታኒን? ናኑ ኒኒ ኃይላህ ያኮይ ኒናሞህ መዔ ሢራሓህ ታይ ሒያውቲ ያምቃሳቃሶ አብነም ታካሊኒ?"13. አብራሃም፣ ይስሐቅ፣ ያዕቆብ አምላክ፣ ናቦብቲህ አምላኪህ ባዽ ኢየሱስ ካ ይስክቢረ፣ አቲን ለ ካያ ጲላጦስ ነፊል ቲላሰኒህ ቶሖውን፣ ጲላጦስ ለ ዽዽዮ ጉረሚህ ኡካ ማጉርና አክተን፡፡ 14. አቲን ቁዱስከ ጻድቅ ማጉርና ተኒህ፣ ኢንኪ ናብሰ ገዳይ ያምናሓዎ ዻዕምተን፡፡ 15. ሂወት ያሓየ ቲያ ትግድፊን፣ መዔፉጊ ለ ራባኮ ካኡገሠ፣ ታይ ጉዳሀ ናኑ ማስኪር ኪኖ፡፡ 16. ታይ ታብልኒምከ ታዽግኒም ባሊህ ሒያውቲ ኡረህ ይብርቲዔም፣ ኢየሱስ ምጋዓህ ገይመ ኢምነቲህ ኪኒ፣ ኢየሱሱል የመነርከህ ኡማን ስኒህ ነፊል ሙሉእ ዓፍያት ገየ፡፡

  17."ካዶሊህ ለ ይሳዖሎ! ኢየሱስ አሞል አብተን ጉዳይ አቲን ለ ሲኒ አሞይቲት ባሊህ ሶዻህ አብተኒም አዽገ፡፡ 18. መዔፉጊ ለ ዮኮመህ ነብያት አፋህ መሲሕ መከራ ጋራዎ ኤለታነ ያዸኄ ቃል ያምፋጻሞ አበ፡፡ 19. አማይጉል ሲን ኃጢአት ሲናህ ያምዳምሳሶክ ንሲሓ ሳይተኒህ ፉጎል ጋሓ፡፡ 20. መዔፉጎኮ ታምዑሱቢን ዳባን ሲናህ አሚተለ፣ ፉጊ ዮኮመህ ሲናህ ዶረ መሲሕ ኢየሱስ ሲናህ ፋረ ለ፡፡ 21. ኡሱክ ለ ዓራናል ሱጋ መዔፉጊ ዮኮመህ ኢሲ ቁዱሳን ነብያቲህ አፋህ፣ ዋንስተም ባሊህ ዓለም ሙሉኡድ ያዑሱበም ፋናህ ኪኒ፡፡ 22. ሙሴ ታህ የ፣ መዔፉጊ አምላክ ዮያ ኡጉሰም ባሊህ ታማም ባሊህ ሲን ሳዖሊህ አዳኮ ነብይ ሲናህ ኡገሰ ለ፣ ኡሱክ ሲናክ ያም ኡምቢህ ኦባ፡፡ 23. ቶይ ነብይ አበዋቲ ኡምቢህ ህዝበኮ ባዽስመህ ያላዮይ፡፡ 24. ካታሰኒህ ሳሙኤልኮ ኤዸዽሰኒህ ቲነ ነብያት ሙሉኡክ ታይ ዳባናህ ታማህ የኒህ ዋንስተን፡፡ 25. አቲን ነብያት ወረስት ኪቲን፣ ታማም ባሊህ ለ ፉጊ አብራሃማክ ባዾክ አሞል ያነ ህዝቢ ሙሉኡድ ኩዳራኮ አምበረከ ሎን የህ ናቦብትሊህ ሳየ ቃል ኪዳኒህ ወረስቲ ኪቲን፡፡ 26. አማይጉል መዔፉጊ ኢሲ ባዻ ፋረም ኤዸዾይታህ ሲናህ ኪይይ ይነ፣ ታሃም ለ አበም ስነስነህ ኡማ ራሕኮ ጋሕተኒህ ሲን ያባራኮ የህ ኪኒ፡፡

  ማዕራፋ 4    

 ጰጥሮስከ ያሃኒስ አይሁድ ሰንጎህ ነፊል ካብ የን

  1. ጰጥሮስከ ያሃኒስ ህዝበሊህ ዋንስታይ ያንንሃኒህ፣ ካህናትከ በተ መቅደስ አሞይታ ታማም ባሊህ ሰዱቃውያን ዻጋህ የመትኒህ፣ 2. ሐዋርያት ላማይ ኢየሱስ ራባኮ ኡገተም ይምህርንጉልከ ታሃማህ ለ ራባኮ ኡገተ ያናም ይርድኢንጉል ይቁጡዒን፡፡ 3. አማይጉል ተን ይብዽን ዋክተ ዲተ ሳይተህ ቲነጉል አይከ ኢብዻሕነ ፋናህ ዋክኒ ዓረድ ሱጎና ተን አበን፡፡ 4. ያከካህ ተን ቃል ቶበ ሒያውኮ ማንጎ ማሪ የመነ፣ ተመነ ሒያዊህ ሎይ ኮና ሲሕድ ናዋ የን፡፡

  5. ኢብዻሒነ አይሁድ አሞይትትከ ስማግለታት፣ ሙሴ ሕጊህ መምህራን ለ ኢየሩሳለምል የከሄሊን፡፡ 6 .ተከሄለ ሒያዊህ ፋናድ ሊቀ ካህናት ሀናከ ቀያፋ፣ ያሃኒስከ እስክንድሮስ፣ ካህናት አሞይቲህ ወገን ሙሉኡድ ኤድገይማን፡፡ 7. ኢሲን ለ ሐዋሪያት ላማይ ሲኒ ፋናድ ሶለኒህ"ታሃም አብተኒም አይሚህ ኃይላህከ ኢይ ምጋዓህ ኪኒ?" የኒህ ተን ኤሠረን፡፡

  8. ታማይ ዋክተ ጰጥሮሰ መንፈስ ቁዱሱህ የመገህ ታህ የህ ኤልይምልሰ፣ "አቲን ህዝቢ አሞይትትከ ስማጊለ! 9. ናኑ ካፋ ኤል ኤሰሪምናም ኢንኪ አካለ ጎዶሎ ኪን ሒውያቶህ የከ መዔ ሢራሕከ አይሚህ ዓይነቲህ ተግባራህ ኡረም ኪኒ፡፡ 10. ታይ ሒያውቲ ኡረህ ስን ነፊል ሶለም፣ አቲን ታካርተንቲያከ መዔፉጊ ራባኮ ኡጉሰ ናዝሬት ኢየሱስ ክርስቶስህ ሚጋዓህ ኪናም ስናህ ኡማን ሲናህከ እስራኤል ህዝበህ ሙሉኡክ ታምዽገም ያኮይ፡፡ 11. አቲን ነደቅት ዻይተዐህ  ዕደን ዻይ ካያ ኪኒ፣ ያኮይ ኢካህ ኡሱክ ዕንዸፍቲት ዋና አንጎሎ ዻ የከ፡፡ 12. አማይጉል ያይድኅነ ቲይ ካኮ በሒህ አከቲ ኢንከቲ ሚያነ፣ አይናህ ናኑ አካህ ናድኃኖ ኖህ ኤዳም፣ መዔፉጊ ሒያዋህ ዮሖወ ምጋዓህ ካኮ በሒህ ሙሉእ ዓለሚል ኢንከቲ ሚያነ፡፡

 13. ጰጥሮስከ ያሃኒስ ድፍረቲህ ዋንስተኒም ባይቶት አባላት ዩብሊን ዋክተ አምሂረ ዋይተ ተራ ሒያው ኪይይ ይንኒም አዽጊይ ይኒኒጉል ይምድንቂን፣ ኢየሱስሊህ ይኒንም ለ የዸጊን፡14. ኡረ ሒያውቲ ተንሊህ ሶለህ ዩብሊን ኢርከህ ተን አሞል ያናም ዋየን፡፡ 15. አማይጉል ባይቶኮ ቶሆይታህ ኢሰኒህ ሱገኒምኮ ላካል ታህ የኒህ የመከሪን፡፡ 16. ካምቦኮ ታይ ሒያዊህ አሞል አይም አብኖ? ታይ ናባ ታምራት ተን ጋባህ የከም ኢየሩሳለም ነበርቲል ሙሉኡድ ይምዽገ፣ አማይጉል ናክሓዶ ማዽዒና፡፡ 17. ያከካህ ህዝቢ ፋናድ አፍድኒክ ያዲየምኮ ካምቦኮ ላካል ኢየሱስ ሚጋዕ ሑሳክ ቲያድ ዋንስታናምኮ ጋዳህ ተን ሰልስኖይ፡፡

 18. ታሃምኮ ላካል ደዔኒህ ኢየሱስ ምጋዕ ዳዓክ ቲያድ ዋንስታናምኮ ወይ ያይምህሪኒምኮ ጥብቀህ ተን ይእዚዚን፡፡ 19. ጰጥሮስከ ያሃኒስ ለ ታህ የኒህ ኤልደሄየን፣ መዔፉጎህ ያምእዚዚኒምኮ አጋናል ሲናህ ያምእዚዚኒም መዔፉጊህ ነፊል አዳም ኪኒ? ኢስኪ አቲን ሲነህ ኢፍሪዳየ፡፡ 20. ናኑ ኑብለምከ ኖበም ወንስታናምኮ አፍ ማናቢደ፡፡ 21. ህዝብ ኃላፍትከ ባይቶት አበላት ጰጥሮስከ ያሃኒስድ ታስቅፂዔምኮ ኢንኪ ምክንያት ኤድ ዋየንጉል፣ ህዝበ ለ ማይስተኒህ ጋባዔኒህ ሰሊሰኒ ዽዽየን፣ አይናህ ለ ብዝቢ የከ ጉዳህ መዔፉጎ አይምስግኒይ ይነጉል ኪኒ፡፡ 22. ታይ ታምራታህ ኡረ ቶይ ሒያውቲህ ዕድመህ ሞሮቶም ኢግዲያኮ አጋናል ኪይይ ቲነ፡፡

                               ሐዋርያትከ አማንቲ ስደትል አበን ጻሎት

  23. ጰጥሮስከ ያሃኒስ ይምኑሑውኒህ ሲኒ ዶባድ ጋሔን ዋክተ ካህናት አሞይትትከ አይሁድ ስማግለታት አክየኒም ኡምቢሀ አክየን፡፡ 24. ኢሲን ታሃም ዮብነጉል ሲኒ አንዻሕ እንኪድ ናውሰኒህ ፉጎል ታህ የኒህ ጻሎት አበን፣ ዓራናል፣ ባዾል፣ ባሕራል፣ ተን አዳል ማርታም ኡምቢህ ይፍጥረ ናባ መዔፉጎ አምላኮ! 25. መንፈስ ቁዱስ ኢዻህ ኩአገልጋሊህ ናባ ዳዊት አፋህ ታህ ተህ ዋንስተም ኮያ ኪኒ፣

          "አረማዊያን አይሚህ ቁጡዓህ ዩግሩምሩሚኒ?

            ህዝበ ኡምቢህ አይሚህ ካንቶህ ሙደኒ?'

     26. ባዾ ነገሥታት ይምስልፊኒህ፣ 

           ረዶን ኢንኮህ የከሄልኒህ፣ 

           ፉጎከ መሲሕ አሞል ናዓቦህ አጉተን፡፡"          

   27. ዓዲህ ለ ሄሮድስከ ጴንጠናዊ ጲላጦስ አረማውያንከ እስራኤል ህዝበሊህ ታይ ካታማል የከሄልኒህ መሲሕ ካአብተ ኩቁዱሲህ አገልጋሊ ኢየሱስ አሞል አጉተን፡፡        28. ታሃም ተከም አቱ ቶኮመህ ኢሲ ኃይላህከ ኢሲ ፍቃዳህ ትኅሊነም አብቶ ኪኒ፡፡          29. ካዶሊህ ማዳራ! ተን ማይሲሶ ኡቡል፣ ኩአገልገልቲ ኩቃል ማይስማለህ ድፍረቲህ ዋንስቶና አብ፡፡ 30. ቁዱስ ኪን ኩባዽ ኢየሱስ ሚጋዓህ ዳላክን ኡሩሳናምከ ታአምራት፥ ድንቀ ኪን ጉደያት ለ ኦቦና ኢሲ ጋባ ፋሕ ኢሳይ እዝርጊሕ።" 

  31. ጻሎት አበኒሚህ ላካል ኤል ይኒን ቦታ ተምነቀነ፣ ሙሉኡክ ለ መንፈስ ቁዱሱህ የመግኒህ መዔፉጊህ ቃል ማይስማለህ ዲፍረቲህ ዋንሲተን፡፡

                       ኤዸዾይታ ክርሰቲያን ኢንኪኖ /ኅብረት/ ናብራ

  32. አማንቲ ኡምቢህ ኢንኪ አፍዓዶከ ኢንኪ ሓሳብ ሊይ ዪኒን፣ ኢንኪ ሒያውቲ "ታሃም ይም ኪኒ" ያን ጉዳይ ማና፣ ተን ፋናድ ኡማን ጉዳይ ኢንኮህ ኢንኪም ኪይይ ዪነ፡፡ 33. ሐዋሪያት ለ ማዳሪ ኢየሱስህ ኡግታቶ ናባ ኃይላህ አምስክሪክ ይኒን፣ ኡማንቲህ አሞል ናባ መዔፉጊህ ጸጋ ቲነ፡፡ 34. መረት ያኮይ ድክ ለም ኡምቢህ አብሒክ ማል ባሃይ ይኒንጉል ተን ፋናድ ኢንኪ ጸገም ማና፡፡ 35. ማል ባሄኒህ ሐዋሪያት አይርክቢይ ዪኒን፡፡ ሲኒሲኒ ጉርታዮ ባሊህ አምዕድሊይ ዪኒን፡፡ 36. ቆጵሮስ ማባካ የከ ዮሴፍ አክያን ኢንኪ ሌዋዊ ይነ፣ ሐዋሪያት "ባርናባስ" የኒህ ደዓይ ይኒን፣ ቱርጉም "ያይጸነነዔቲህ ባዻ" ማለት ኪኒ፡፡ 37. ኡሱክ መረት የበኄህ ማል ባሄህ ሐዋሪያት  ይርኪክበ፡፡

ማዕራፋ 5 

                              ሀናኒያከ ሰጲራ                                 

  1. ሀናኒያ አክያን ኢንኪ ሒያውቲ ሰጲራ አክያን ኑማሊህ የከህ ባዾ የበኄ፡፡ 2. ካኑማ ለ አዽግህ ባዾ አካህ ትምቢሔ ልሞኮ ዊልም  አክራዕሰህ ውልም ባሄህ ሐዋሪያት ይርኪበ፡፡ 3. ጰጥሮስ ለ ታህ አክየ "ሀናኒያ! መንፈስ ቁዱስ አሞል ድራቢቶከ ባዾ ሊሞኮ ሓድልተህ ራዕሶ ኩአባ ሰጣን አይሚህ ኩአፍዓዶድ ሳየ? 4. ታብኄሚህ ባሶል መረት ኩቲያ ኪይይ ማናሆ? ተበኄምኮ ላካል ማል ኩውም ኪይማና? ኢስቲ ታይ ጉዳይ አይሚህ ዒሎህ ኢሲ አፍዓዶድ ትሕሲበ? ድራብተም መዔፉጊህ አሞል ኪኒካ ሒያው አሞል ማኪ፡፡" 5. ሀናኒያ ታይ ቃል ዮበጉል ራደህ ራበ፣ ታይ ጉዳይ ቶበ ሒያው ኡምቢህ ኤዳምኮ አጋናል ማይስተ። 6. ናባማሪ የመተህ አስካረን ይግንዚኒህ በኒህ ዮዖጊን፡፡ 7. አዶሓ ሳዓትኮ ላካል ሀናኒያ ኑማ ታማል ተመተ፣ ባዕሊ አሞል ማደ ጉዳይ አዽገካህ ቲነ፡፡  8. ጰጥሮስ ለ "ኢስኪ ዮከየ ሲን መረት ተበሕኒም ታህዳ ያከ ማላህ ኪኒ?"አክየ፡፡ ኢሲ ለ "ዮ፣ ታህዻ ያከ ማላህ ኪኒ" ተዸሔ። 9. አማይጉል ጰጥሮስ "መዔፉጊህ መንፈስ ታፋታኖና አይናህ ተኒህ ተምሰመመዒኒ? ሀይከ! ኩባዕላ ቶዖገህ ጋሕታ ሒያው ኢፈይል ያኒን፣ ኮያ ለ በየኒህ ኩአዑገሎን" አክየ፡፡ 10. ኢሲ ለ ድንገቲህ ካኢቢህ ዳባል ራደህ ራብተ፣ ናባ ማሪ ለ ሳየንጉል ራብተህ ገኒህ  በየኒህ ባዕሊ ባሮል ዮዖጊን፡፡ 11. ሞሶዓረል ኡምቢህ ታይ ጉዳይ ቶበ ሒያዊህ አሞል ሙሉኡድ ናባ ማይሲ ተከ፡፡        

          ሐዋሪያት ጋባህ የከ ታአምራትከ ድንቀ ኪን ጉዳይ          

   12. ማንጎ ታአምራትከ ድንቀ ኪን ጉዳይ ህዝቢ ፋናድ ሐዋሪያት ጋባህ አክይ ዪነ፣ ኡምቢህ ለ ኢንኪ አፍዓዶ የኪኒህ ሰሎሞን ጋሐንጋሔናል አከሄልይ ይኒን፡። 13. ተንኮ ባዕደ /ኢሮ/ ተከ ሒያውኮ ኢንከቲ ኡካ ተንሊህ ያኮ ያድፊረቲ ማና፣ ያኮይ ኢካህ ህዝቢ ተን አስክብሪይ ዪነ፡፡ 14. ማዳራል ታሚነ ላበቶከ ሳዮህ ሎይ ጋዳህ አመንጊክ አድይ ዪነ፡፡ 15. ሐዋሪያት ጋባህ አኪይ ዪነ ድንቀ ኪን ሢራሒህ ምክንያታል፣ ሒያው ማንጎ ዳላኪን አራሓል አየዒክ ዓራትከ ሲለን አሞክ ዽኒሳይ ዪኒን፣ ታሃም አበኒም ጰጥሮስ ታማይ አራሕኮ ቲላህ ካጽላል ኡካ ተንተን ኦሞል ያዕራፎ የኒህ ኪኒ፡፡ 16. ሒያው ኢየሩሳለም አቦቱል ታነ ካቶምኮ ዳላኪንከ ሩኩሳት መናፍስቲህ ታምሠቀየም ባሃይ ይኒን፣ ኡምቢህ ለ ኡራይ ይኒን።

                                       ሐዋሪያት አሞል ስደት ኡጉተ

  17. ካህናት አሞይታከ ካሊህ ቲነ ሰዱቃውያን ወገን ኪናም ኡምቢህ ናዓቦህ ኡገተን፣ ቅንአታህ የመጊን፡፡ 18. ሐዋሪያት ይብዽኒህ ዋክኒ ዓረድ ሳይሰን፡፡ 19. መዔፉጊህ መልአክ ለ ባር ዋክኒ ዓሪህ ኢፈይ ፋከህ ተን የየዔ፡፡ 20."አዱዋ በተ መቅደስል ሶላይ ታይ ሂወት ቃል ሙሉኡክ ህዝበክ ኤዸሓ" አክየ፡፡ 21. ሐዋሪያት ትኢዛዝ ጋራየኒህ ማሓል በተ መቅደስል ሳየኒህ ያምህርኒም ኤዸዽሰን፡፡ ታማይ ዋክተ ካህናት አሞይታከ ካሊህ ቲነም ተመተህ ሰንጎት አባላትከ አይሁድ ስማግለታት ኡምቢህ ኢንኪል የከሄልኒህ፣ ሐዋሪያት ለ ባሆና ሒያው ዋክኒ ዓረህ ፋረን፡፡ 22. ፋሮንቲት ለ ዋክኒ ዓረህ የደይንጉል ሐዋሪያት ታማል ማገኖን፣"ጋኄኒህ የመቲንጉል፣ 23. ዋክኒ ዓሪህ ኢፈይ መዔ ዒለህ ይምቁሉፈህ ዻዉዸኒት ለ ኢፈይ ነፊል ሶለኒህ ተንገን፣ ዋክኒ ዓሪህ ኢፈይ ፋከንጉል ለ አዳድ ኢንከቶ ማገኒኖ የኒህ ዋንስተን፡" 24. በተ መቅደስ ዋርዲያህ አዛዚከ ካህናት አሞይቲት ታሃም ዮቢን ዋክተ ታይ ጉዳይ ኤም ኪኒ?" ያናማህ ይምድንቂን ተን ዳዓባል ያናም ዋየን፡፡ 25. ታማይ ዋክተ ኢንኪ ሒያውቲ የመተህ ዋክኒ ዓረድ ሳይሰን ሒያው ሀይከ በተ መቅደስል ሶለኒህ ህዝበ አይምሂሪይ ያኒን አክየ። 26. ጉልከጉሉህ በተ መቅደስ ዋርድያህ አሞይታከ አኪ ማሪ የደኒህ ተን ባሄን፣ ባሄኒም ኃይላህ አከካህ አምራዳዳአህ ኪኒ፣ ታሃም ለ አበኒም ህዝቢ ዻይቲህ ተን ሳባዓምኮ ማይስተኒህ ኪኒ፡፡

  27. ባሄኒህ አግለ ነፊል ተን ሶሊሰን፣ ካህናት አሞይቲ ለ ታህ የህ ተን ኤሠረ፡፡

 28. ኢየሱስ ሚጋዕ ሑሰኒ ታይምሂሪኒሚኮ ጥብቀህ ሲን ኒኢዚዘህ ኒነ፣ ያከካህ ሀይከ ኢየሩሳለም ሲኒ ምህሮህ ተመጊን፣ አቲን ኡኮ ቶይ ሒያው ቢሎ ናሞል አብቶና ጉራክ ታኒን፡፡ 29. ጰጥሮስከ አኪ ሐዋሪያት ለ ታህ የኒህ ይምልሲን፣ "ሒያዋህ ያምኢዝዚኒምኮ መዔፉጎህ ያምኢዚዚኒም ኤዳ፡፡ 30. ናቦብቲህ አምላክ አቲን ጉንደክ አሞክ ታካርተኒህ ትግድፊን ኢየሱስ ራባኮ ኡጉሠ፡፡ 31. መዔፉጊ ኤስራኤል ህዝበህ ንሲሓከ ኃጢአት ሕድጎት ያሓዎ ኢየሱስ መራሒከ ያይድኅነቲያ አበህ ክብረህ ኢሲ ምድጋል ካዲፈሰ፡፡ 32. ታይ ጉዳህ ናኑ ማስኪር ኪኖ፣ መዔፉጎህ ታምኢዚዘሚህ ሙሉኡድ አካህ ዮሖወ መንፈስ ቁዱስ ለ ማስኪር ኪኒ፡፡"

  33. አግለት አባላት ታሃም ዮቢን ዋክተ ኤዳምኮ አጋናል ይቁጡዒኒህ ሐዋሪያት ያግዳፎና ጉረን፡፡ 34. ያኮይ ኢካህ ህዝበህ ይክብረ ሙሴ ሕጊህ መምሂር የከ ገማልያል አክያን ኢንኪ ፈሪሳዊ ኡጉተህ ዳጎ ዋክተህ ሐዋሪያት ኢስዕዽያ ተን ኢሶና ይኢዚዘ፡፡ 35. ታማምኮ ላካል አግለት አባላታክ ታህ አክየ፣"እስራኤል ሒያዎ! ታይ ሒያዊህ አሞል አይም አብታናም ሰልታ፡፡ 36. ታሃምኮ ባሶህ ቴዎዳስ አክያን ሒያውቲ አኑ ናባ ሒያውቶ ኪዮ የህ ኡጉተህ ዪነ፣ አፋራ ቦል ሒያውቲያ ካሊህ የምሔበበርኒህ ይኒን፡፡ ያኮይ ኢካህ ኡሱክ ራበ፣ ካታኪቲለም ለ ይምበተተኒኒህ የለይን፡፡ 37. ታማምኮ ላካል ህዝቢ ሎይ የከ ዳባን ገሊላ ይሁዳል ኡጉተህ ማንጎ ሒያው ካ ያካታሎና አበህ ይነ፣ ኡሱክ ለ ራበ፣ ኤድካታይ ቲነም ኡምቢህ ተምበተተነ፡፡ 38. አማይጉል ካዶ አኑ ሲናካም፣ ታይ ሒያውኮ ምሪሕቶናከ ተን ሓብቶና ኤህ ኪዮ፣ አይናህ ለ ታይ ሓሳብ ያኮይ ሢራሕ ሒያውኮ የመተህ የከምኮ ያለየ፡፡ 39. ፉጎኮ ተመተም የከምኮ ለ ተና ታይላዮና ማዽዕታን፣ ኤረ ለ መዔፉጎሊህ ዽባታናም አክ ታከ፡፡"ኢሲን ለ ገማሊያ ምክረ ጋራየን፡፡

  40. ታሃምኮ ላካል ሐዋሪያት ሲኑላል ደዔኒህ ሳብዒስሰን፣ ኢየሱስ፣ ምጋዕ ደዔኒህ ዋንሲታናምኮ ተን ይኢዚዚኒህ ተን ዽዽየን፡፡ 41. ሐዋሪያት ለ ኢየሱስ ሚጋዒህ ዳዓባል መከራ ጋራዎና ኤዳም ኪኖንጉል ኒያታክ አግለኮ የውዒኒህ የደይን፡፡ 42. ኢሲሲ ለለዕ ለ በተ መቅደስድከ ኢሲሲ ዓረድ መስሕ ዳዓባል ያይምህሪኒምከ በሠራታ ዋንስታናም አስቆረጸካህ  ይኒን፡፡

ማዕራፋ 6 

ማልሒና ዲያቆናት ዶሪመን

   1. ዳጎ ዋክተኮ ላካል አማንቲ ሎይ አመንጊክ የደጉል ግሪክ ዋኒህ ዋንስታ አይሁድ ይሁዳ ባዾህ ማባኪትልድከ አይሁድ አሞል ዑጉምጉም ያናም ኤዸዽሰን፣ አይሚህ ለለዕ ለለዕ አምሐዊይ ዪነ ሐቶኮ ተን ማሚን ዕሲሲ አክ ኢሰንጉል ኪኒ፡፡ 2. አማይጉል ላማምከ ታማን፣ አማንቲ ኡምቢህ የስከሄሊኒ ታህ አክየን፣ "ፈሎ ናዓዳሎ ነህ መዔፉጊህ ቃል ያይምህሪኒሚህ ኒኒ ሢራሕ ሓቦና ኖህ መዳ፡፡ 3. አማይጉል ይሳዖሎ! መዔ ሲኒ ሓላህ ታምስግነም፣ መንፈስ ቁዱስከ ብልሓታህ የመገ፣ ማልሒና ሒያውቶ ሲን ፋንኮ ዶራ፣ ተና ታይ ኃላፊነቲህ ረድሰሊኖ፡፡ 4. ናኑ ለ ጻሎትከ መዔፉጊህ ቃል ናይማሃሮ አትኪሄልኖ፡፡ 

  5. ታይ ሞዽሖ ኡማንቲያ ኒያትሰ፣ ካታየኒህ የዽሒን ሒያው ዶረን፣ ኢምነትከ መንፈስ ቁዱሱህ የመገ እስጢፋኖስ፥ ጵሮኮሮስ፥ ፊሊጶስ፥ ኒቃሮና፥ ጢሞና፥ ጰርሜና አይሁዱድ ሳየህ ዪነ አንጾኪያት ሊቆላዎስ፡፡ 6. ታይ ማራ ሐዋሪያት ነፊል ሶሊሰን፥ ሐዋሪያት ለ ጻሎት አበኒምኮ ላካል ጋቦብ አሞል አክ ሃየን ፡፡

 7. ታይ ዓይነቲህ ፉጊ ቃል አፊድኒክ የደጉል ኢየሩሳለምል አማንቲ ሎይ ጋዳህ አመንጊክ የደ፣ ካህናትኮ ለ ማንጎም ተመነ፡፡

ዲያቆን እስጢፋኖስ ይምዽብዸ

    8. እስጢፋኖስ ጸጋህከ ኃይላህ የመገህ ዲንቀ ኪን ጉዳይከ ናባ ታአምራት ህዝቢ ፋናድ አባይ ዪነ፡፡ 9. ታማይ ዋክተ"ናፃ ተውዔሚህ ሙክራብ"አክያን አይሁድ ጻሎት ዓሪህ ሒያው፣ ቀረናከ እስክንድራያ ሒያው፣ ኪልቂያከ እስያ ሒያው ኡጉተኒህ እስጢፋኖስ አምቀወምከ አምከረከሪይ ዪኒን፡፡ 10. ያከካህ እስጢፋኖስ አካህ ዋንስታ ብለሓትከ መንፈስ ደሶና ማዽዒኖን፡፡ 11. ታማይ ዋክተ ታይ ሒያውቲ ሙሴከ ፉጊ አሞል ዋቶ ቃል ዋንሲታህ ኖበ ታዽሔ ሒያው ሱዕቶህ ኤል ኡጉሠን፡፡ 12. ታይ ዓይነቲህ ሕዝበከ ስማግለ፣ ሙሴ ሕጊህ መምሂራን ለ ኡጉጉሠን፣ እስጢፋኖስ የደይኒህ ይብዽኒህ አግለ ነፊል ካብ ካኤሠን፡፡ 13. ካያል ዲራባህ ታምስከረ ውልውል ሒያው ለ ባሄን፣ ዲራብ ታሚስኪረም ለ ታህ የን "ታይ ሒያውቲ ታይ በተ መቅደስከ ሙሴ ሕጊህ አሞል ዋቶ ቃል ዋንስታናምኮ አፍ ሚያቢዸ፡፡ 14. ለል ለ 'ታይ  ናዝሬት ኢየሱስ ታይ በተ መቅደስ ዒደ ለ፣ ሙሴ ለ ኖል ቲላሰ ሠርዓት አይልውጠ ለ የህ ዋንሲታህ ካኖበ።"15. ታይ ዋከተ ባይቶል ገይምተም ሙሉኡክ እስጢፋኖስ ይቱኩሪኒህ የይደለለዒንጉል ነፍ መልአክ ነፍ የከህ አካህ ይምቡሉወ፡፡

ማዕራፋ 7

 እስጢፋኖስ ዋኒ /ንግግር/

 1. ካህናት አሞይቲ እስጢፋኖሱክ"ታይ ያን ጉዳይ ትክክል ኪኒ?" የህ ካኤሠረ፡፡ 2.እስጢፋኖስ ታህ የህ ይምሊሰ፣"ይሳዖልከ ያቦቦ! ኢስክ ዮ'ኦባየ፣ ናባ አብራሃም ካራናል ማሮ ያድየሚህ ባሶል ገና መሰጴጦምያል ያነሃኒህ አምላክ ኪብሪ አካህ ይምቡሉወ፣ 3. ኢሲ ባዾኮ ተውዔህ፣ ኢሲ ሳዖልቲኮ ባድስምተህ፣ አኑ ኩ አስቡሉወ ባዾል አዱይ አክየ፡፡ 4. ታማይ ዋክተ ከለዳውያን ባዾኮ የውዔህ ካራናል ዲፈ፣ ካ አባ ራበምኮ ላካል መዔፉጊ ካራንኮ የየዔህ ካፋ አቲን ኤልማርታን ባዾል ባሄ፡፡ 5. ያኮይ ኢካህ  ኢቢ ኤልያዕሩፈርከህ ኢዻ ታከ ኤልያዕሩፈርከ ኡካ ሪስተኮ አካህ ማምሐዊና፣ ያኮይ ኢካህ ታይ ሀገር ካከ ካዳራህ ሣራሃህ ሪስተ አበህ አካህ አሓየለም ቃል አካህ ሳየህ ዪነ፡፡ ታይ ቃል አካህ ሳየም ለ አብራሃም ገና ባዻ አለካህ ኪይይ ዪነ፡፡ 6. ካዳሪ ባዕዲ ባዾል ሲደተናታት የኪኒህ ማራናምከ ታማይ ባዾል አፋራ ቦል ኢግዲያ ባሪያ አበኒህ ጸቆናህ ተን አግዚኤ ሎኑም አክየህ ዪነ፡፡ 7. ጋባዔህ፣ ባሪያ አበህ ያግዚኤ ህዝቢህ አሞል ኤልፍሪደሊዮ፣ ታማሃምኮ ላካል ናፃ የውዒኒህ፣ ታይ ቦታል ያይሚሊከ ሎን የህ መዔፉጊ ዋንሲተ፡፡ 8. ጊዝረት ኪዳን አካህ ዮሖወ፣ አማይጉል አብራሃም ይስሐቅ ዻለ ዋከተ ማባሓሪ ለለዒል ካይግሪዘ፣ ታማምባሊህ ይስሐቅ ኢሲ ባዻ ያዕቆብ ይግሪዘ፡፡ ያይቆብ ለ ሐረግ /ነገድ/ አቦብቲ ተከ ላማምከ ታመን ዻይሎቲያ ይግርዘ፡፡

   9. ያዕቆብ ዻይሎህ ሳዓል ዮሴፍ አሞል አይሲነኒህ ግብጺ ባዾል ባሪያ ያኮ የበሒን፣ መዔፉጊ ለ ካሊህ ዪነ፡፡ 10. ሔልዋይኮ ኡምቢህ ካየየዔ፣ ግብጺ ኑጉሥ ፎርዖን ነፊል ክብረከ ብልሓት አካህ ዮሖወ፣ ኑጉሥ ለ ግብጸከ ኢሲ ዲከህ አሞል ያኢዚዘቲያ ካአበ፡፡  11 .ታማይ ዋክተ ግብጸከ ከንዓን ባዾል ኡምቢሂያህ አሞል ናባ መከራ ካታሳ ዑሉል የከ፣ ናቦብቲ ለ ፈሎ ገይቶ ማዽዒና፡፡ 12. ያዕቆብ ግብጸል ኢላው ያነም ዮበ ዋክተ ናቦብቲ ኤዸዾይታ ዋክተህ ታማህ ፋረ፡፡ 13. ማላሚህ ግብጸ ጋኄኒህ የዴን ዋክተ ዮሴፍ ኢሲ ሳዖሉህ ይምቡሉወ፣ በተሰብ ለ ፎርዖኑል ይምዽጊን፡፡ 14. ታማምኮ ላካል ዮሴፍ አባ ያዕቆብከ ሳዖል ኡምቢህ ኢሱላል ባሄ፣ ኢሲን ጠቅላላህ ማልሒን ቶሞንከ ኮዎን ሒወቲያ ኪይይ ዪኒን፡፡ 15. አማይጉል ያዕቆብ ግብጸ የደ፣ ካከ ካአቦብቲ ታማል ራበን፡፡ 16. ተን ላፎፍ ሴኬም በየኒህ አብራሃም ሴኬምል ኤሞር ዻይሎኮ ኢሲ ማላህ ዻመ ማዓጊ ቦታድ ይሙዑገ፡፡

  17. መዔፉጊ አብራሃማህ ዺዋህ ዮሖወ ታስፋ ታምፍጺመ ዋክቲ ካብየ ዋክተ ግብጸል ዪነ ኒህዝቢህ ሎይ አመንጊክ የደ፡፡ 18. ታሃም ተከም ዮሴፍ አዽገዋ አኪ ኑጉሥ ግብጸል ያንጊሠ ዋክቲ ማደጉል ኪኒ፡፡ 19. ዑሱብ ኑጉሥ ኒህዝቢህ አሞል ቶንኮሉህ ኡገተህ ተን ሕፃናት ራቦና፣ ባራካህ የየዕኒህ ዒዶና ናቦብቲ ይስግዲደ፡፡ 20. ታማይ ዋክተ ሙሴ ዮቦከ፣ ኡሱክ መዔፉጊህ ነፊል ዓዻ መዔ ሕፃን ኪይይ ዪነ፣ አዶሓ አልሳ ኢሲ አባህ ዓረድ ዓረ፡፡ 21. ኢሮህ ዒደን ዋክተ ፈርዖን ባዻ`ናውኢሰህ ኢሲ ባዻ ባሊህ አብተህ ዓሪሰ፡፡ 22. ሙሴ ለ ግብጻውያን ብልሓት ሙሉኡድ ይምህረ፣ ኢሲ ቃላህከ ሢራሓህ አጊሮ የከ፡፡ 23. ሙሴ ሞሮቶም ኢግዲያ የመገ ዋክተ ኢሲ ሳዖል እስራኤል ዻይሎ ያብሎ ይሕሲበ፡፡ 24. ካሳዖልኮ ኢንከቲ ኢንኪ ግብጻዊ ኪን ሒያውቶህ አምብዲሊህከ አምግፍዒህ ዩብለህ ጎሮኒሰ፣ ይምግፍዔቲያህ ያምባቀሎ ግብጺዊ ሳባዔህ ይግዲፈ፡፡ 25. መዔፉጊ ካአራሓህ ናፃ ተን ያየዔም ካወገን ያዽጊኒም የከለህ ዪነ፣ ኢሲን ለ ታሃም ማስታውዓልኖን፡፡ 26. ኢብዻሒነ ላማ እሰራኤላዊ ሲነሲነህ አንገዒህ ተን ገየህ ያስጋላጋሎ ጉረህ ኮሒያው፣ አቲን ሳዖል ኪቲን፣ አይሚህ አንገዕክ ታኒን? አክየ፡፡ 27. ቶይ ዶባቶ ሳባዓይ ዪነ ሒያውቶ ሙሴ ቶህ ይዉርውረ፣ ኮያ ናሞል አማሓዳሪከ ፈራዲ ኩአበቲ አይቲያ ኪኒ? 28. ኩማል ግብጻዊ ትግዲፈም ባሊህ ዮያለ ለ ታግዳፎ ጉራክ ታነ? አክየ:: 29. ሙሴ ታሃም ዮበጉል ግብጺ ባዾኮ ኩደህ ምድያም ሀገር የደህ ታማል ማረ፣ ታማል ኢሪ ላማይ ዻለ፡፡ 30. ሙሴ ታማይ ባዾል ሞሮቶም ኢግዲያ ቲላሰሚህ ላካል ደብረሲና ባራካል ቦሎልታ ቆጥቃጦ ሀልሀልታክ አዳል መዔፉጊህ ማላይካ አካህ ዩመቡሉወ፡፡ 31. ሙሴ ታሃም ዩብለ ዋክተ ይምግሪመ፣ ካባ የህ ዩብለጉል ታህ ያ መዔፉጊህ አንዻሕ ዮበ፡፡ 32. አኑ ኩ አቦብትቲህ አምላክ ኪዮ፣ አብራሃም አምላክ፣ ይሰሐቅ አምላክ፣ ያዕቆብ አምላክ ኪዮ፣ ሙሴ ለ ማይሲህ አዻዸ፣ ያብሎ ማድፋሪና፡፡ 33. መዔፉጊ ታህ አክየ፣ ኤል ሶልተ ሲፍራ ትምቅዲሰ ቦታ ኪንጉል ካበላ ኤየዕ፡፡ 34. ግብጸል ያነ ይህዝቢህ ጺኒዕ መከራ ዓዲህ ኡብለህ አነ፣ ተን ጽንቂህ ደሮ ለ ኦበህ አኒዮ፣ አማይጉል ተን አይዳኃኖ ኦበህ አኒዮ፣ ካዶሊህ አሞ፣ አኑ ኮያ ግብጸ ኩፋራክ አኒዮ፡፡

 35 .እስራኤል ሕዝቢ ሙሴክ "ናሞል ገዛኢከ ፋራዲ ታኮ ኩአበቲ አቲያ ኪኒ?"ያናማህ የምቀወሚኒህ ዪኒን፣ ያኮይ ኢካህ መዔፉጊ ሙሴህ ታሃም ቆጥቃጦክ አዳል ካይስቡሉወ መልአኪህ አራሓህ ገዛኢከ ፈራዲ አበህ ተናድ ፋረ፡፡ 36. ግብጸከ ዓሣ ባሕራል ድንቀከ  ታምራት አባክ ህዝበ የየዔህ ሞሮቶም ኢግዲቲያ ባራካል ይምሪሔቲ ታይ ሙሴ ኪኒ፡፡ 37. መዔፉጊህ ማላይካ ዮያ ኡጉሠም ባሊህ ታማም ባሊህ ሲን ሳዖልቲህ ፋንኮ ነብይ ሲናህ ኡገሠሊዮ የህ እስራኤላውያናህ ዋንሲተ ቲይ ሀይከ ሙሴ ኪይይ ዪነ፡፡ 38. ባራካል የከሄለህ ዪነ ሕዝበሊህከ ሲናይ ኢምባህ አሞል ዋንሲተ መልአክሊህ፣ ታማም ባሊህ ናቦብቲሊህ ዪነቲ ካያ ኪኒ፡፡ መዔፉጊህ  ሕይወት ቃል ኖያህ ኖህ ቲላሰቲ ለ ሀይከ ሙሴ ኪኒ፡፡

  39. ናቦብቲ ለ የምቀወሚን ኢካህ አካህ ማምአዛዚኖን፣ ሲኒ አፍዓዶድ ግብጺ ኡላል ጋኆና ይሕስቢን፡፡ 40. አሮኑክ ለ ታይ ግብጺ ባዾኮ ኒየየዔ ሙሴ አይም ካማደም ማናዲገጉል ኒ ነፍ ነፊል አዲይክ ኒያምሪሔ አምላክ ኖህ ሢራህ አክየን፡፡ 41. ታማይ ዋክተ ሩጊ ምስለህ ጣኦት ሢራሔኒህ መሥዋዕት ካብ አካህ ኢሰን፣ ሲኒ ጋባህ ሢራሓህ ኒያተን፡፡ 42. መዔፉጊ ለ አክ ባዻስመ፡፡ ዓራንቲ ሑቱክ ያይማላኮና ቲላሰህ ተን ዮሖወ፡፡ ታሃም  ነብያታህ ታህ ተህ ትምጽሒፈም ኪኒ፣ 

          "አቲን እስራኤል ሒያዎ! 

           ቱምሩሑደ እንስሳከ መሥዋዕቲህ 

     ሞሮቶም ኢግዲያ ሙሉእ ባራካት ትስቅርቢኒም ዮያህ ኪኒ? 

   43. ትብዽኒህ ተደይኒም ሞሎክ ዱካንከ 

          ሬፋን አክያን ሲኒ አምላኪህ ሑቱክቲ  ምስለ ኪይይ ዪነ፣

          ተና ለ ሲኒ ጋባህ ሢራሕተኒህ 

          አካህ አስጊዲክ ቲኒን አማላክት ኪኖን፡፡

          አኑ ለ ባቢሎንኮ ቶህ ታምሳዳዶና አበሊዮ።" 

  44. ሲን አቦብ ባራካድ መዔፉጎ ኤድ ያሚሊኪን ዱካን ሊክ ዪኒን፥ ታይ ዱካን መዔፉጊ አካህ ካ ዩስቡሉወሚህ መሠረቲህ ሢራሔቲ ሙሴ ኪይይ ዪነ፡፡ 45. ፉጊ ተን ነፍኮ አካህ የይለየህ አረማውያን ባዾ ይውርሲን ዋክተ ናቦብቲ ታይ ጋራየን ዹንካን ኢያሱሊህ ቶህ ሳይሰን፣ አይክ ዳዊት ዳባን ፋናህ ታማል ማርተ፡፡ 46. ዳዊት ለ መዔፉጊህ ነፊል ክብረ ገህ ያዕቆብ ነገዲህ ፋናድ ፉጊ ኤድማሓ ዓረ ሢራሖ ጻሎቱህ ዻዒመን፡፡ 47. ያከካህ መዔፉጎህ ዓረ ሢራሔቲ ሰሎሞን ኪኒ፡፡ 48. ያኮይ ኢካህ ናባ መዔፉጊ ሒያው ጋባህ ሢራሕመ ዲክቲ ኣዳድ ማማራ፣ ታሃም ለ ነብይህ ታህ የህ ይምጽሒፈም ባሊህ ኪኒ፣

   49.`ዓራን ይዙፋን ኪኒ፣ 

         ባዾ ለ  ይኢቢህ  ማዕራፋ  ኪኒ፣ 

         ኢቦል ዮያህ አይሚህ ዓይነቲህ ዓረ ዮህ ሢራሔሊቲን? 

         ኤድ አዕሩፈ ቦታ አይሚህ ዓይነት  ኪኒ? 

50. ታሃም ኡምቢህ አኑ ኢኒ ጋባህ ሢራሔም ማኪ? 

        ያዽኄ መዔፉጊ፡፡ '51. አቲን ሲኒ ፊላ ትግቲረህ ታነ ሂልኬናታቶ! ሲን አፍዓዶ አልፊምተ፣ ሲን አይቲት  ለ አበዋይታም! አቲን ሊኪዕ ሲኒ አቦብቲ ባሊህ ኡማኒል መንፈስ ቁዱስ አምቀወምክ ታኒን፡፡ 52. ነብያት ፋንኮ ሲን አቦብ ሃዳነ ዋይተሚህ አይቲ ያነ? ኢሲን ጻድቅ ሙሙት ቶኮመህ ዋንሲተሚህ ኩይግዲፊን፣ አቲን ለ ካዶ ታይ ጻዲቀ ቲላሰኒህ ቶስሖውኒህ ቲግዲፊን፡፡ 53. አቲን መላእክቲ ኡላኮ ሕገ ጋራተኒህ ቲኒን፣ ያከካህ ማዻዉዽኒቲን፡፡

ኢስጢፋኖስ ዻይቲህ ይሙጉረህ ራበ

  ]54. አግለት አባላት ታሃም ዮቢንጉል ኩራየን፣ እስጢፋኖስ አሞል ለ ቁጡዓህ ሲኒ ዓዽዋ አርባዔን፡፡ 55. ኡሱክ ለ መንፈስ ቁዱሱህ የመገህ ዓራናል ይቱኩረህ አይደለለዒክ መዔፉጊህ ኪብረ ዩብለ፣ ኢየሱስ ለ መዔፉጊህ ሚድጋል ሶለህ ዩብለ፣ 56. አማይጉል "ሀይከና ዓራን ፋክተህ ሒያወቲ ባዽ መዔፉጊህ ሚድጋል ሶለህ አብልክ አነ" የዸሔ፡፡

  57. ታማይ ዋክተ ኢሲን ናባ አንዻሓህ ዋዕ የኒህ፣ አይቲት አሊፈኒህ ኢንኮህ ካኡላል የርዲን፡፡ 58. ካታማኮ የየዕኒህ ዻይቲህ ሳባዔን፣ ማስክሪህ ተን ሳራ በየኒህ ሳኦል አክያን ኢንኪ ናባቲ አካህ ዻዉዾ ካኢቢህ ዳባል ዲፈሰን። 59. ዻይቲህ ሳባዓይ ያንንሃኒህ እስጢፋኖስ "ኦይማዳራ ኢየሱሶ! ይናፍሰ ጋራይ!" የህ ጻሎት አበ፡፡ 60. ይምበርክከህ "ይማዳራ! ታይ በደል አክ ማሎን" የህ ናባ አንዻሓህ  ዋዔ፡፡ ታህ አሞም  የህ ራበ፡፡

ማዕራፋ 8

ሳውል ሞሶዓረ  የሰደደ

  1. ሳውል ለ እስጢፋኖስ ራባድ የምሰመመዔህ ዪነ፣ እሰጢፋኖስ ራበ ለለዕ ኢየሩሳለምል ዪነ ሞሶዓሪህ አሞል ናባ ስደት ኡገተ፣ ሐዋሪያትኮ በሕታ አማንቲ ሙሉኡድ ሰማሪያ ሀገራታል ይምብቲኒን። 2. ውልውል መንፈሳውያን ኪን ሒያው እሰጢፋኖስ ዮዖጊን፣ ኃይላለ ደሮህ ወዓክ ዮዖጊን፡፡ 3. ሳውል ለ ሞሶዓረ ያይላዮ አጽዕሪይ ዪነ፣ ዲኮ ዲክድ ሳአክ ላበቶከ ሳዮት አማንቲያ ሂሪጋክ አየዒይ ዪነ፣ ማዹዊ ዓረድ ሳይሳይ ዪነ።

                                   ወንጌል ሳማሪያል ይምስብከ

  4. ትምብቲነ አማንቲ ኤልአድናን ቦታል ኡምቢህ መዔፉጊህ ቃል አይምሂሪይ ዪኒን፡፡ 5. ፊልጶስ ሳማሪያ ካታማ ቱላል የደህ ሒያው መሲሕ ዳዓባል ይይምሂረ፡፡ 6. ሒያው ፊልጶስ ቃል ዮቢን ዋክተ አባ ታአምራት ዩብልኒህ ኢንኮህ ይስትውዒልኒህ ካ አቢይ ዪኒን፡፡ 7. ሩኩሳት መናፈስት ናባ አንዻሓህ ደራክ ማንጎ ሒያውኮ አውዕይ ቲነ፡፡ 8. አማይጉል ታማይ ካታማል ናባ ኒያት የከ፡፡ 

    9. ታይ ካታማል ሲሞን አክያን ኢንኪ ሒያውቲ ዪነ፣ ታይ ሒያውቲ ሰማሪያክ አዳል አስማት አባክ ሳማሪያ ሒያው አይድንቂክ ሱገ፣"አኑ ናባ ሒያውቶ ኪዮ"የህ ዋይንሲታይ ዪነ፡፡ 10. ሒያው ሙሉኡድ ዒንዻቲያ ናባቲያህ "ታይ ሒያውቲ ናባቲያ ኪኒ የኒህ ደዕምማም መዔፉጊህ ኃይላህ ኪኒ!"አይክ ካ ኦቢይ ዪኒን፡፡ 11. አይሚህ ማንጎ ዋክተኮ ኤዸዽሰህ አስማታህ ተን አይድኒቂይ ይነጉል ኪን፡፡ 12. ያኮይ ኢካህ ፊልጶስ መዔፉጊህ ማንጊሥቲህ ዳዓባልከ ኢየሱስ ሚጋዓህ ዋንስታህ መዔ ዋረ ዮቢንጉል ላበቶ ያኮናይ ሳዮ የመኒኒህ 0፡፡ 13. ሲሞን ኡካ ራዔካህ የመነህ ይምጥምቀህ ፊልጶስሊህ ያምሔበበረቲያ የከ፣ አባን ዲንቀ ኪን ጉዳይከ ናባ ታምራት ዩብለርከህ አምጊሪምይ ዪነ፡፡         

   14. ኢየሩሳለምል ቲነ ሐዋሪያት ሳማሪያ ሒያው መዔፉጊህ ቃል ጋራየኒም ዮቢን ዋክተ ጰጥሮስከ ያሃኒስ ኢየሩሳለም ኡላል ተን ፋረን፡፡ 15. አማይጉል ሳማሪያ ሒያው መንፈስ ቁዱስ ጋራዎና ዒሎህ ጰጥሮስከ ያሃኒስሊህ የደይኒህ ጻሎት አልአበን፡፡ 16. አይሚህ ሳማሪያ ሒያው ተን ማዳሪ ኢየሱስ ሚጋዓህ ይምጥምቂኒህ ዪኒን ኢካህ መንፈስ ቁዱስ ገና ኢንከቲ አሞል አክ ኦበህ ማና፡፡ 17. አማይጉል ጰጥሮስከ ያሃኒስ ጋቦብ አሞል አክ ሃየን ዋክተ ሒያው መንፈስ ቁዱስ ጋራይተ፡፡ 18. ሐዋሪያት ጋቦብ አሞል አክ ሃየንጉል መንፈስ ቁዱስ ሒያዋህ ዮምሖወም ሲሞን ዮብለጉል ማል አካህ ባሄ፡፡ 19."አኑ ለ ጋባ አሞክ አክሃየህ ሒያውቲ መንፈስ ቁዱስ ጋራዎ ታይ ሢልጣን ዮህ ኡሑዋ" አክየ፡፡

   20. ጰጥሮስ ለ ታህ አክየ፣ መዔፉጊህ ገትሰበረከስ /ስጦታ/ ማላህ ገዮና ጉራናም ኮሊህ ታላዮይ! 21. ኩአፍዓዶ መዔፉጊህ ነፊል ቅንዒት ማኪጉል አቱ ታይ ጉዳይህ ክፍለ ወይ  ዒደት ማሊቶ፡፡22. አማይጉል ኢሲ ኡምነህ ተነሰሔህ ንሲሓ ሳይ፣ ምናለባት ኩአፍዓዶህ ሓሳብ ኮልሓቦክ መዔፉጎ ዻዒም፡፡ 23.አይሚህ አቱ ሚሪሪ አይሲኖህ ተመገምከ ኃጢአት ማዹዋድ ታናም ኩአብሊክ አኒዮ፡፡"24. ሲሞን ለ"ካዶ ዋንሲተኒምኮ ኢንኪም ኡካ ይማዳምኮ አቲን ሲነህ ናባ መዔፉጎል ጻሎት ዮህ አባ"አክየ፡፡" 25. ጰጥሮስከ ያሃኒስ ይምስክሪኒምኮከ ማዳሪ ቃል ዮይሶብኒምኮ ላካል ማንጎ ሳማሪያ መንደራል መዔ ዋረ አይብስርክ ኢየሩሳለም ጋኄን፡፡

                                ፊልጶስ ኢትዮጵያት ዛንደርባ ይምጥምቀ

   26. መዔፉጊህ መልአክ ፊልጶሱክ ኡጉታይ ኢየሩሳለምኮ ጋዛል በያ አራሓል ደቡቡል አዱይ አክየ፣ ታማይ አራሕ ባራኪ አራሕ ኪይይ ዪነ፡፡ 27. ኡሱክ ኡጉተህ የደ፣ ሀይከና ኢንኪ ኢትዮጵያት ዛንደርባ መዔፉጎህ ያስጋዶ ኢየሩሳለም የደህ ዪነ፣ ታይ ሒያውቲ ሕንደኬ አክያን ኢትዮጵያት ንግሥቲህ ሞያ ባዕላከ ተ ነብረት ኡምቢህ ኢያህ አዛዚ ኪይይ ዪነ፡፡ 28. ኡሱክ ኢሲ ሀገሪህ ጋሓህ፣ ሠረገላክ ዲፈህ ነብይ እሳይያስህ ማጽሐፍ አይኒብብይ ዪነ፡፡ 29. ታማይ ዋክተ መንፈስ ቁዱስ ፊልጶሱክ"አዱይ ቶህ ሠረገላድ ካበይ"አክየ፡፡ 30. አማይጉል ፊልጶስ ታሙላል የርደህ የደህ ቶይ ኢትዮጵያቲይ ነብይ ኢሳይያስ ማጽሐፍ አምኒቢቢህ ዮበህ ታይንብበሚህ ቱርጉም ኮድሳአ? አክየ፡፡31.ኢትዮጵያይቲ ለ ይያርዲኤ ሒውቶ ሂኒም አይናህ የህ ዮድሳዎ ዺዓ?"አክየ፣ ፊልጶስ "ሠረገላክ ኤወዓይ ዮሊህ ዲፈይ"አክየ፡፡ 32. ዛንደረባ አይንብብይ ዪነ ማጽሐፍ ክፍሊ ታህ ኪይይ ዪነ ፣

           "ያምራሓዶ ያድየ ዒዶይታ ባሊህ ኪይይ ዪነ፣ 

            ዳጋር አካህ አሩዲህ ቲብ ያ ሓንቲ ዾዋቶ ባሊህ ኪይይ ዪነ፣ ኡሱክ ለ ዋንሲቶ                  አፍ ማፋኪና፡፡

      33. ኡሱክ የምወረደ፣ ቅንዒና ለ  ፊርዲ አካህ 

           ማምኃውና፣ ካሂወት ባዾኮ የይለይንጉል፣                                                            ካማባኮህ ዳዓባል ኢይ ዋንሲቶ ዺዓ?"                     

  34. ዛንደርባ ለ ፊልጶሱክ"ነብይ ታሃም ዋንሲተም ኢይ ዳዓባል ኪኒ? ኢሲ አሞህ ዳዓባል ኪኒ ወይ አኪ ማራህ? ያዓሳያ ዮከይ"አክየ፡፡ 35. ፊልጶስ ለ ታይ ማጽሐፊህ ክፍለኮ ኤዸዽሰህ ኢየሱስ መዔ ዋረ ይብስረ፡፡ 36. አድህ ላየ ለ ቦታ ማደን፣ ዛንደርባ "ሀይከ ታል ላየ ታነ፣ አምጣማቆ ይደሳማህ አይምሊዮ?"አክየ፡፡

    [37.ፊሊጶስ"ሙሉእ ኢሲ አፍዓዶህ ተመነምኮ ታምጠማቆ ዽዒታ"አክየ። ዛንደርባ ለ ኢየሱስ ክርስቶስ መዔፉጊህ ባዻ ኪናም አሚነ አክየ፡፡]  

   38. ዛንደረባ ሠረገላ ሶልቶ ይኢዚዘ፣ ላሚህ ላየል ኦበኒህ ፊልጶስ ዛንደርባ ይይጥሚቀ፡፡ 39. ላየኮ የውዒኒምኮ ሣራህ መዔፉጊህ መንፈስ ፊልጶስ በየ፣ ዛንደረባ ለ ማላሚህ ካማብሊና፣ ኒያታክ ኢሳራሕ ይቅጽለ፡፡ 40. ፊልጶስ ለ አዞጦሱል ገይመ፣ ቂሳሪያ ለ ያምተም ፋናህ ኢሲሲ ካታማል አድይክ መዔ ዋረ  አይብስርይ ዪነ፡፡

ማዕራፋ 9

ሳኦል /ሳውል/ ክርስቶሱል የመነ

(ሐዋ.ሥ.22፥6-16፤ሐዋ.ሥ.26፥12-18)

  1. ታማይ ዋክተ ሳኦል ማደሪ ተምሃሮ ያግዳፎ ገና ማይሲሶ አባክ ካህናት አሞይታል  የደ፡፡ 2.ማዳሪ አራሕ ካታይታ ሒያው ላበቶ ያኮይ ሳዮ ገያጉል አዹውክ ኢየሩሳለም አካህ ባሆ ዲዓ ደብዳበ ደማሱቆ ሙክራባታል ትምጽሒፈህ አካህ ታምሓዎ ካህናት አሞይታ ኤሠረ፡፡

  3. አድህ ለ ደማሱቆህ ካብየጉል ካባሮሩል ድንገቲህ ዓራንኮ ኢፊ ዮይዶጎሔ፡፡ 4. ታማይ ዋክተ ባዾል ራደ፣"ሳኦል!ሳኦል!" አይሚህ ያይሰደዲክ ታነ?" ያ አንዻህ ዮሞበ፡፡

  5. ሳኦል"ይማዳራ አቱ አቲያ ኪቶ?"አክየ፣ ኡሱክ ለ አኑ አቱ ይታይሰደደ ኢየሱስ ኪዮ፣ 6. ካዶ ለ ኡጉት ካታማል ሳይ፣ አብቶ ኮህ ኤዳም ታማል ኮክ ኢየሎን አክየ፡፡

 7. ሳኦሊህ አድይ ቲነ ሒያው አንዻሕ አቢህ ኢንከቶ አብለዋየን ኢርከህ ዋንሲታናም ሶዸኒህ ቲባ የኒህ ሶለን፡፡ 8. ሳኦል ለ ኤልራደ ባዾኮ ኡጉተ፣ ኢንቲት ፋከ ዋክተ ኢንኪም ያብሎ ማዺዒና፣ አማይጉል ሒያው ጋባህ ይብዺኒህ አይምሪሒክ ደማሱቆ ቱላል በየን፡፡ 9. አዶሓ ለለዕ ሙሉኡክ ኢንኪም አብለህካ፣ በተካህከ አዑበካህ ሱገ፡፡

 10. ደማሱቆል ሀናኒያ አክያን ኢንኪ ተምሃራይ ይነ። ማዳሪ  ራኢህ"ሀናኒያ!"የህ ደዔ፣ ኡሱክ ለ"ሀይኪዮ ይማደራ!" አክየ፡፡ 

 11. ማደሪ ለ ታህ አክየ፣"ሪግ የቲያ /ቀጥታ/ አክያን አራሓል አዱይ፣ ታማል ይሁዳ ዓርድ ሳኦል አክያን ጠርሴስ ሒያውቶ ዋጊይ፣ ኡሱክ ካዶ ጻሎቱድ ያነ፡፡"12. ሳኦል ለ ኢንቲትኮ ጋባዔህ ያብሎ ዺዖ ዒሎህ ሀናኒያ አክያን ሒያውቲ ካያድ ሳየህ ጋባ አሞል አክሃህ ሶኖ ዮብለ፡፡ 13. ሀናኒያ ለ ታህ የህ ኤልደሄየ፣"ኦ'ይማዳራ! ታይ ሒያውቲ ኢየሩሳለምል ማርታ ቁዱሳን አሞል ማንጎ ኡማ ጉዳይ አባም ማንጎ ማራኮ ኦበህ አኒ ዮ፡፡ 14. ታማምባሊህ ኩሚጋዕ ሑሳም ኡምቢህ ያዻዎ ካህናት አሞይቲትኮ ሢልጣን ጋራየህ ያነ፡፡"15. ማዳሪ ለ ሀናኒያክ ታህ አክየ።"ኡሱክ ይሚጋዕ አረማውያንከ ነገሥታታል፣ እስራኤል ሒያው ለ ያይስዺገ ይዶሪመ መሳረሒ ኪኒጉል ካ ኡላል አዱይ፡፡" 16.ይዳዓባል አይዾለ ማንጎ መከራ ገራየለም ካኡስቡሉወህ አኒዮ፡፡ 17. አማይጉል ሀናኒያ ታማህ የደህ ካዲኪት ሳየ፣ ጋባ ሳኦል አሞል ይዝረግሔህ"ይሳዓል ሳኦሎ! ታህ አምቲክ ታነሃኒህ አራሓል ኮህ ዩምቡሉወ ማደሪ ኢየሱስ ማላሚህ ታብሎ ዺዕቶከ መንፈስ ቁዱሱህ ለ ታማጎ ኩላል ይፋረህ"ያነ አክየ፡፡ 18. አማይጉልካህ ሳዳህ /ቂራፋህ/ ኢጊድ ነገር ካ ኢንቲትኮ ኡርጉፉመህ ያብሎ ዺዔ፣ ኡጉተህ ዲፈ፡፡ 19. ፈሎ በተህ ይትሪረ ደማሱቆል ቲነ ተመሃሮሊህ ዳጎ ለለዓት ሱገ፡፡ 

                   ሳውል /ሳኦል/ ደማስቆል                   

  20. አማይጉልካህ ለ ሳኦል ደማስቆል ኢየሱስ መዔፉጊህ ባዻ ኪኒ አይክ ሙክራባድ ያምሂሪኒም ኤዸዽሰ፡፡ 21. ቶበም ኡምቢሀ ታይ ሒያውቲ ኢየሩሳለምል ታይ ካሚጋዕ ሑሳም ኡምቢህ ኃይላህ አይሰደዲይ ዪነ ቲያ ማኪሆ? ታህ የመተም ተና ይዹወህ ካህናት አሞይትቲል በዮ የህ ማኪሆ? ያናማህ አምድንቂይ ዪኒን፡፡ 22. ሳኦል ለ አስሪይክ የደ፣ ኢየሱስ መሲሕ ኪናም አይርድኢክ ደማስቆል ማራይ ቲነ አይሁድ መልሲ ደሄያናም ተን ካሊታይ ዪነ፡፡ 23. ማንጎ ለለዕኮ ሣራህ አይሁዳውያን ሳኦል ያግዳፎና የመከሪን፡፡ 24.ኡሱክ ለ ካያግዳፎና የመከሪኒም የዸገ፣ ኢሲን ለ ያግዳፎና ባርከ ለለዕ ኢፊአፋ ዻዉዻይ ዪኒን፡፡ 25. ያከካህ ባር ካተምሃሮ ሳኦል ዘምብሊድ ሃየኒህ ማንዳቅ ኦሞኮ ቲላሰኒህ ጉባል ይብዺይን፡፡       

ሳኦል ኢየሩሳለምል

    26. ኢየሩሳለም ኡላል የደሚህ ላካል ታማል ታነ ተምሃሮሊህ ያምጋላሎ ይዕኪነ፣ ኢሲን ለ ክርስቶሱል የመነም ሓቀህ ኪኒ የኒህ ካያማኖና ኡምቢህ ማይሲተን፡፡ 27. ባርናባስ ለ ሳኦል ሐዋሪያታል ካብ ኢሰህ አራሓድ ያንንሃኒህ ማዳሪ አይናህ የህ አካህ ይምቡሉወህ ካዋንሲሰም፣ ደማሱቆል ለ ኢየሱስ ሚጋዓህ ዲፍረቲህ ይምሂረም አክ የዸኄ፡፡28. አማይጉል ሳኦል ተንሊህ የከህ ኢየሩሳለምል ለ ጋሓንጋሓይ ዪነ፣ ማደሪ ሚጋዓህ ዲፍረቲህ አይምሂሪይ ዪነ። 29. ግሪክ ዋኒህ ዋንሲተኒት ኪን አይሁድሊህ ዋንሲታክ አምከረከሪይ ዪነ፡፡ ኢሲን ለ ያግዳፎና ይዕኪንኒህ ዪኒን። 30. ሳዖል ታሃም የዸግንጉል ቂሳሪያ ካበን፥ ታማርከኮ ጠርሴስ ያዴካህ አበን፡፡ 31. ይሁዳ ባዾል፥ ገሊላልከ ሳማሪያ ሀገርል ኡምቢህ ቲነ ሞሶዓሪት ሳላም ገይተህ፣ ይስሪዪን፣ ማዳራ አስክብርከ መንፈስህ አምጸነነዒክ ሎዉህ የመንጊን ፡፡  

  ጰጥሮስ ሊዳከ ኢዮጲል      

   32.ጰጥሮስ ኢሲሲ ቦታል አምቀሰቀሲክ ያነሃኒህ፣ ዻየል  ማርታ ቁዱሳን ዻገህ የደ፡፡ 33. ታማል ባሓራ ኢግዳ ሙሉእ ዓራት አሞክ ዺነ ኤኒያ አክያን ሲባ ገየ፡፡ 34. ጰጥሮስ ለ "ኤኒያ! ኢየሱስ ክርስቶስ ኩኡሩሰክ፣ ኡጉታይኪ ዓራት ሲዲስ"አክየ፣ ኡሱክ ለ ኣማይጉልካህ ኡጉተ፡፡ 35. ሊዳከ ሰሮናል ማርታም ኡምቢህ ካያዩብልኒህ ማዳራል የመኒን፡፡ 36. ኢዮጴል ጣቢታ አክያን ኢንኪ አማኒት ቲነ፣ ተ ሚጋዒህ ቱርጉም ግሪኪህ ዶርቃ ወይ ሚዳቋ ያናም  ኪኒ፣ ኢሲ መዔ ሢራሕ አባናምከ ዲካታታህ ሓቶ አባናም ታይመንገ ኑማ ኪይይ ቲነ፡፡ 37. ታማይ ዋክተ ኢሲ ላሑተህ ራብተ፣ ዓካልሰኒህ ሰገነቲድ ያነ ክፍሊህ አዳድ ዲፈሰን፡፡ 38. ሊዳ ኢዮጴህ ዻየርከል ኪይይ ቲነጉል ኢዮጴል ቲነ ተምሃሮ ጰጥሮስ ሊዳል ያነም ዮቢኒህ ዓያየካህ ዸህ ኖህ አሞ የኒህ ደዓ ላማ ሒያውቶ ኤድ ፋረን፡፡ 39. አማይጉል ጰጥሮስ ኡጉተህ ፋሮይቲትሊህ የመተ፣ ማደጉል ሰገነቲድ ያነ ክፍለድ ካበን፣ ማሚን ኡምቢህ ተያ ይስክቢቢኒህ ሶለኒህ ወዓክ ዶርቃ ተንሊህ ሂወቲህ ታነሃኒህ ሥራሕተ ቃሚሳ አስቡሉው ዪኒን፡፡ 40. ጰጥሮስ ለ ኡማንቲያ ኢሮህ የየዔህ ይምብርኪከህ ጻሎት አበ፣ አስካረን ኡላል ኡፍኩና የህ "ጣቢታ ኡጉት" አክየ፣ ኢሲ ለ ኢስ ኢንቲት ፋክተ፣ ጰጥሮስ ለ ቱብለ፥ ኡጉተህ ለ ዲፌተ፡፡ 41. ኡሱክ ጋባ ፋሕ ኢሰህ ይብደህ ኡጉሠ፣ ማሚንከ አኪ አማንቲ ደዔህ ሂወቲህ ተን ነፊል ካብ ኢሰ፡፡ 42. ታይ ጉዳይ ኢዮጴክ ኡማኒል ይምዸገ፣ ማንጎ ሒያው ማዳራል ለ ተመነ፡፡ 43. ጰጥሮስ ለ ኢንኪ አናዳ ሖሪሳቲህ /ያሊፌዔቲህ/  ዲክድ ማንጎ ለለዓ ኢዮጲል ዲፈየ፡፡

                     ማዕራፋ 10                         

                                       ጰጥሮስከ ቆርኔልዎስ                                                  1. ቂሳሪያል ማራ ቆርኔሌዎስ አክያን ኢንኪ ሒያውቲ ዪነ፣ ኡሱክ ለ"ኢጣሊያ ጓድ"አክያን ክፍሊህ ጦርቲ አዳድ ቦልቲ አሞይታ ኪይይ ዪነ፡፡ 2. ኡሱክ ኢሲ በተሰብሊህ ኡምቢህ አይሁድ ዓይዳህ /ሠርዓታህ/ መዔፉጎ ያሚነ መንፈሳዊ ኪን ሒያውቶ ኪይይ ዪነ፣ አይሁድ ህዝበህ ማንጎ መዔ ሓቶ አባይ ዪነ፡፡ 3. ኢንኪ ለለዕ ሳጋላ ሳዓቲህ አቦቱል መዔፉጊህ መልአክ ካያድ ሳየህ"ቆርኔሌዎሶ!" የህ ካደዓህ ሙቡሉህ /ራኢህ/ ዓዲህ ዩምቡሉወ፡፡ 4. ኡቱኩራ የህ መልአካድ ቁሉህ የህ ሓንካብቶህ "ኦ'ይማደራ! አይም ኪኒ?" የ፡፡ መልአክ ታህ አክየ፣ ኩጻሎትከ ዲካታታህ አቱ አብታ መዔ ጎሮን መዔፉጊህ ነፊል ኮህ ይምሕሲበህ ያነ፡፡ 5. ካዶ ለ ሒያው ኢዮጴ ፋራይ ጰጥሮስ አክያን ስምዖን ደዕሲሲ፡፡ 6. ኡሱክ ካዶ ባሕሪ አፋል ገይማ አናዳ ሖሪሳቲያሊህ ስምዖን ዓረት ገዺኖህ ዲፈህ ያነ፡፡" 7. ታሃም አክየ መልአክ ባዽሲመህ የደየጉል፣ ቆርኔሌዎስ ኢሲ አገልገልቲኮ ላማይከ ካክፍለ ኪን ወታሃደራትኮ መንፈሳዊ ኪንቲያ ኢንከቶ ደዔህ፡፡ 8. ኡማን ጉዳይ አክ የምኮ ላካል ኢዮጴ ፋረ፡፡ 9. ኢብዻሒነ ኢሲን የደይኒህ ካታማህ ካብየንጉል፣ ሊሓ ሳዓቲህ አቦቱል ጰጥሮስ ጻሎት ኤዳባይ ዪነ ሰገነትድ የውዔ፡፡ 10. ታማይ ዋክተ ሉወህ በቶ ጉረ፣ ማዎ አምሶኖዶውክ ታነሃኒ ሙቡል ዩብለ፡ 11. ዩብለ ሙቡል ዓራን ፋክተህ አፋራ ዒንደፍቲኮ ትምዽብዸ ናባ ማጋረዛ ሓላጋህ ኢግድ ጉዳይ ባዾል ኦባህ ኪኒ፡፡ 12. ታማሚህ አሞል፣ ኢሲሲ ዓይነቲህ ኢንሲሳ፣ ኢሲ አፍዓዶህ ሂርግምታ ፍጥረታትከ ዓራናል ታምፍረ ኪምበሮ ኤድይኒን፡፡13. ታማይ ዋክተ"ጴጥሮሶ! ኡጉት ኡርሑዳይኪ በት"ያ አንዻሕ ካያል የመተ፡ 14. ጰጥሮስ ለ"ኦ'ይማዳራ ታሃም ማታከ! አኑ አምቅዲሰ ዋየ የምረከሰ ጉዳይ በተህ ማዽገ" አክየ፡፡ 15. ጋባዔህ ለ"መዔፉጊ ይይጺሪየህ አበም አቱ ሩኩስ ኪኒ አክቶዋ ማዺዕታ" ያዽሔ አንዻ ማላሚህ ካኡላል የመተ፡፡ 16. ታሃም አዶሓጉል ተከምኮ ላካል ቶይ ሓላጋህ ኢግድቲያ አማይጉልካህ ዓራንቱላል በን፡፡ 17. ጰጥሮስ ሙቡል /ራኢ/ ቱርጉም"አይም ኖዋ?" የህ ሓሳባህ አምጽንቂህ፣ ቆርኔሌዎስ ፋረ ሒያው ኤሠሮህ ስምዖን ዓረ ገየኒህ ኢፈይ አፋል ሶለኒህ ዪኒን፡፡ 18. ደዔኒህ"ለ ጰጥሮስ አክያን ስምዖን ገዺኖህ ያነም ታይድ ኪኒ?"የኒህ ኤሠረን፡፡ 19. ጰጥሮስ ራኢ /ሶኖ/ ጉዳይ አሕሲቢይ ያነሃኒህ መንፈስ ቁዱስ ታህ አክየ፣ "ሀይከ አዶሓ ሒያወቲ ኩጉራይ" ያነ፡፡ 20. ኡገት ኦብ፣ ተን ፋረቲ ዮያ ኪኒጉል አምጠረጠረካህ ተንሊህ አዱይ፡፡" 21. ጰጥሮስ ለ ኦበህ ሒያውሊህ የደህ"ሀይኪዮ ጉርታን ሒያወቲ ዮያ ኪኒ፣ አካህ ተመቲን ምክንያት አይም ኪኒ?" አክየ፡፡ 22. ኢሲን ለ "ናኑ ነምተም ቦልቲ አሞይታኮ ቆርኔሌዎስኮ ኪኖ፣" ኡሱክ አይሁድ ህዝቢ ኡምቢህ ያስክበረ አይሁድ ዓይዳህ መዔፉጎል ያሚነ መዔ ሒያውቶ ኪኒ፡፡ ኮያ ኢሲ ዲኪህ ደዔህ ታዽሔም ያቦ ቁዱስ ማላይካ አካህ ዩምቡሉወ" አክየን፡፡ 23. ጰጥሮስ ለ ዲክድ ሳይሰህ ዻዒመህ ተን ማሕሲሰ፡፡ ኢብዻሒነ ኡጉተህ ተንሊህ የደየ፣ ኢዮጴል ቲነ ካሳዖልኮ ጋሪጋሪ ኤሊህ የደይን፡፡ 24. ኢብዻሒነ ቂሳሪያ ማደን፣ ቆረኔሌዎስ ለ ኢሲ ሳዖልከ /በተሰብ/ ካብታ ካኃንቶሊት ደዔህ ጰጥሮስ ለም ኢላላይ ዪነ፡፡ 25. ጰጥሮስ ዲክድ ሳየጉል ቆርኔሌዎስ ካያድ ካብ የህ ካ ነፊል ራደህ ይስግደ፡፡ 26. ጰጥሮስ "ኡገት! አኑ ኡኮ ኮያ ባሊህ ሒያውቶ ኪዮ!" አክየህ ኡጉሠ፡፡ 27. ካዋንሲሳክ ለ አዳህ ሳየንጉል ማንጎ ሒያው ተከሄለህ ገየ፡፡ 28. ታህ አክየ፣"አይሁዲ አረማዊሊህ ያምሓባባሮከ ካድክድ ሳኦ ኒ ሃይማኖቲህ ሕገህ ሚያምፍቂደም አቲን ሲነህ ታዽጊን፣ ያከካህ ኢንከቶክ አምቅዲሰ ዋየቲያ ወይ ሩኩስ ኪኒ አዽሔምኮ መዔፉጊ ዮህ ዩምቡሉወ፡፡ 29. አማይጉል ዮል ፋርተን ፋሮ ይማደጉል ኢንኪም አምጠረጠራካህ ኤመተ፣ ታጉል አይሚህ ይደዕተኒም አዻጎ ጉራ፡፡ "30. ቆርኔሌዎስ ታህ አክየ፣ ካፋኮ ማፋሪ ለለዕ ሊክዕ ታይ ዋክተህ ሳጋላ ሳዓታህ ኢኒ ዓረድ ጻሎት አባክ ኢነ፣ ሀይከ ዲንገቲህ ኢንኪ ታይዶጎሔ ሳረና ሃይሲተ ሒያውቲ ይነፊል ሶለ፣ 31. ታህ ዮክየ፣ "ቆርኔሌዎሶ! መዔፉጊ ኩጻሎት ዮበ፣ ዲካታታህ አብታ መዔ ሓቶ ኮህ ጋራየህ ያነ፡፡ 32. አማይጉል ኢዮጴል ፋሮይታ ፋራይ ጰጥሮስ አክያን ስምዖን ደዕስሲ፣ ኡሱክ ካዶ ባሕሪ አፋል ገይማ አናዳ ሖሪሳ ስምዖን ዲክድ ገዺኖህ ዲፈየህ ያነ፡፡" 33. አማይጉል ፋሮይቲት ኮያ ዻጋህ ፋረ፣ አቱ ተመተርከህ መዔም አብተ፣ ታጉል ፉጊ ዋንሲቶ ኒ ትኢዚዘም ሙሉኡድ ናቦ ናኑ ኡምቢክ መዔፉጊህ ነፊል ነከሄለ፡፡"

                                                   ጰጥሮስ ዋኒ                                            

  34. ጰጥሮስ ታህ የህ ዋንስታናም ኤዸዺሰ፣ ሓቀህ መዔፉጊ ሒያው ሒያውኮ ማዶራምከ ሚያዶሎወም ኢስትውዒለ፡፡ 35. አኪናን ባዾህ ሒያውቶ የከሚህ መዔፉጎ ማይስታቲያከ ሓቀ ኪን ጉዳይ አባቲያ የከምኮ፣ መዔፉጊ ካጋራ፡፡ 36. መዔፉጊ እስራኤል ህዝበህ ኢሲ ቃል ፋረም ትምዺገም ኪኒ፣ ሳላምከ በሠራታ ኢየሱስ ክርስቶስሊህ ተመተም ተናህ ኪኒ፣ ያኮይ ኢካህ ኢየሱስ ክርስቶስ ኡማንቲህ ማዳራ ኪኒ፡፡ 37. ያሃኒስ ጥምቀት ዳዓባል ይስቢከ ዋክተኮ ኤዸዺሰህ ገሊላኮ ኡጉተህ ይሁዳ ባዾል  ሙሉኡድ  የከ ጉዳይ ታዽጊን፡፡ 38."ጋባዔህ ለ መዔፉጊ ናዝሬት ኢየሱስ መንፈስ ቁዱሱህ ይምቅብኤምከ ኃይሊ ለ አካህ ዮሖወም ታዽጊን፣ ፉጊ ካሊህ ይነጉል ኡሱክ መዔ ጉዳይ አባክ ዓረምከ ዲያብሎሱህ ትምዺብዸም ኡምቢህ ኡሩሳክ ቦታኮ ቦታል ዮዞረ፡፡ 39. ይሁዳ ገጠርልከ ኢየሩሳለም ካታማል ኡሱክ አበ ጉዳህ ናኑ ኡምቢክ ማስኪር ኪኖ፣ ካያ ለ ሖዽቲ ማስቀላክ ታካረኒህ ይግድፊን፡፡ 40. ያከካህ መዔፉጊ ማዳሒ ለለዕል ራባኮ ኡጉሠህ ያመባላዎ አበ፡፡ 41. ይምቡለወም ቶኮመህ ፉጎህ ዶሪምምተ ማስከርቲህ ኪኒ ኢካህ ኡማን ህዝበህ ማኪ፣ ኡሱክ ራባኮ ኡጉተምኮ ላካል ናኑ ካሊህ ኢንኮህ በተምከ ተዖበሚክ ማስኪር ኪኖ፣ 42. ታይ ጉዳይ ህዝበ ናይባሣሮ ኡሱክ ታነምከ ራብተሚህ አሞል ያፍራዶ፣ መዔፉጎህ ትምውስነም ኪናም ናማስካሮ ኒይእዚዘ፡፡ 43. ካያል ታሚነም ሙሉኡክ ካሚጋዓህ ኃጢአት ሕድጎድ ገያናም ነብያት ኡምቢህ አካህ ያምስክሪን፡፡"                                

የመኒንህ መንፈስ ቁዱስ ጋረየን             

  44. ጰጥሮስ ታሃም ዋንሲተጉል ካቃል ቶበ ሒያዊህ አሞል ኡምቢህ መንፈስ ቁዱስ ኦበ፡፡ 45. ጰጥሮስሊህ ተመተ አይሁድ አማንቲህ መዔፉጊ አረማውያናህ መንፈስ ቁዱስ አካህ ዮሖወም ዩብሊንጉል ይምጊሪሚን፡፡ 46. አረማውያን ኪናማህ መንፈስ ቁዱስ አካህ ዮምሖወም የዸግኒም አረመን አኪ ዋኒህ ዋንሲታህከ ፉጎ ምስጋናህ አስክብሪህ ዮቢንጉል ኪኒ፡፡ ታይ ዋክተ ጰጥሮስ፣ 47."ታይ ሒያው ኖያ ባሊህ መንፈስ ቁዱስ ጋረየን፣ ኢቦል ላየህ ያምጣማቆና ኢይ ተን ደሳ?"የህ ዋንሲተ። 48. አማይጉል ኢየሱስ ክርስቶስህ ሚጋዓህ ያምጣማቆና ይኢዚዘ፡፡ ታሃምኮ ላካል ጰጥሮስ ተንሊህ ዳጎ ለለዕ ሱጎ ዻዒመን፡፡

ማዕራፋ 11

ጥሮስ አረመን ዓረድ አይሚህ ሳየም ይርዲኤ

   1. አረመን /አረማውያን/ መዔፉጊህ ቃል ጋራየኒም ይሁዳ ባዾል ቲነ ሐዋርያትከ ሳዖል ዮቢን፡፡ 2. ጰጥሮስ ኢየሩሳለም ኡላል የደህ ጋሓየምኮ ላካል ግርዛት ጉርሱሳም ታሚነ አይሁድ አማንቲ፣ 3."አይሚህ አምግርዘ ዋይተ ሒያዊህ ዲክድ ሳይተህ ተንሊህ በታ?"ያናማህ ካይውቅሲን፡፡ 4. ጰጥሮስ ለ ታህ የህ ኡማን ጉዳይ ተራ ተራህ ያይረዳኦ ኤዸዽሰ፡፡ 

  5. አኑ ኢዮጴ ካታማል ጻሎት አባክ አነሃኒህ ኢምሲጠህ ራኢ /ሶኖ/ ኡበለ፡፡ ኡብለም ናባ ማጋረዛ ሓላጋህ ኢግድ ጉዳይ፣ አፋራ ዒንደፍቲኮ ይምዽብዸህ ዓራንኮ ኦባህከ ዩላል አምቲህ ኪኒ፡፡ 6. ካያ ኡቱኩረህ ኤደለለዔጉል ኢሲሲ ዓይነቲህ ኢንስሳ፣ ባራኪ ኢንስሳ አፍዓዶ ናሃራህ ሂርጊምታ ፉጡራንከ ዓራናል ታንፊረ ኪምብሮ ኡብለ፡፡ 7.'ጰጥሮሶ! ኡጉታይ ኡርሑዳይ በት!'ዮክያ አንዻሕ ኦበ፡፡ 8. አኑ ለ ሚያክ 'ይማዳራ! አምቅድሰ ዋይተም ያኮይ ሩኩስ ጉዳይ ያአፋድ ሳየህ ሚያዺገ' አከ፡፡ 9. ያከካህ ማላሚ ዋክተ ፉጊ ይጽሪየህ አበም አቱ ሩኩስ ኪኒ አክቶዋ ማዺዕታ ያ መልስ ዓራንኮ የመተ፡፡ 10. ታይ ጉዳይ አዶሓ ዋክተ የከምኮ ላካል ሐላጋ ሙሉኡክ ዓራናህ በየን፡፡ 11. ሀይከ ታማይ ዋክተ ቂሳሪያኮ ዩላል ፋሪመ አዶሓ ሒያውያቲ ናኑ ኤድኒነ ዲክ ማደን፡፡ 12.ኢንኪም አምጠረጠረካህ ተንሊህ አዳዎ መንፈስ ቁዱስ ዮክየ፣ ታይ ሊሓ ይሳዓል ዮሊህ ዪኒን፣ ተንሊህ ኢንኮህ ነደህ ቆርኔሌዎስ አክያን ሒያውቲህ ዲክድ ሳይነ፡፡ 13. ኡሱክ ለ መልአክ ካዲክድ ሶለህ ዩብለህ ኢዮጴ ሒያው ፋራይ ጰጥሮስ አክያን ስምዖን ደዕሲስ፣ 14. ኡሱክ ኮከ ኩበተሰብ ኡምቢክ አካህ ታድኅኒን ቃል ኮክ ኢየለ፣ አክየም ኖክየ፡፡ 15. ኑ ለ ዋንሲቶ ኤዸዽሰጉል መንፈስ ቁዱስ ኖያክ አሞል አካህ ኦበ ዓይነቲህ ካአሞል ኦበ፡፡ 16. ታማይ ዋክተ ያሃኒስ ላየህ ይጥምቀ፣ አቲን ለ መንፈስ ቁዱሱህ አምጥምቀ ሊቲን ያዽሔ ማዳሪ ቃል ኢዝኪረ፡፡ 17. ናኑ ማደራ ኢየሱስ ክርስቶሱህ ነመነጉል መዔፉጊ ኖያህ ዮሖወ መተሖዎ ለ ተናህ ዮሖወምኮ፣ ይቦል መዔፉጎ ደሶ አኑ ዓቅመ ሊዮህ? "

  18. ኢሲን ለ ታሃም ዮቢን ዋክተ ደሄያን መልስ ዋየኒህ ቲባ የን፣ "አማይጉል መዔፉጊ አረማውያን ዑሱብ ሂወቲህ ተን ታይብቅዔ ኒሲሓ አካህ ዮሖወ" ያናማህ ፉጎ ይምስግኒን፡፡

   አማንቲ አንጾኪያል ክርስቲያን ኢስመን

  19. እስጢፋኖስ ሳብዒመህ ራበ ዋክተ ኡገተ ስደት ሳባባል ፋሕተ አማንቲ አይከ ፊንቄከ አይከ ቆጶሮስ አይከ አንጾኪያ ፋናህ ለ የደይን፣ ካቃል አይሁዱክ ዲቦህ ኢካህ አኪ ማራክ አይማናዎን፡፡ 20. ያኮይ ኢካህ ቆጶሮስኮከ ቀሬኮ ተመተ ውልውል አማንቲ አንጾኪያ የደይንጉል አረማውያን ኦሰኒህ ማዳሪ ኢየሱስ ዳዓባል መዔ ዋሪህ ቃል ይይብስሪን፡፡ 21. ማዳሪ ተን ጎሮኒሳይ ዪነ፣ ማንጎ ሒያው ለ ተመነህ ማዳራል ጋሓይ ዪኒን፡፡ 22. ኢየሩሳለምል ዪነ ሞሶዓሪ ታሃም ዮበጉል ባርናባስ አንጾኪያ ፋረን፡፡ 23. ኡሱክ ለ የደህ ፉጊ ኢሲ ጸጋ አይናህ ኢሰህ ዮሖወም ዩብለ ዋክተ ኒያተ፣ ኡምቢህ ሙሉእ አፍዓዶህ ሲክ የኒህ ማዳሪ አማንቲ የኪኒህ ማሮና ይምክረ፡፡ 24. ኡሱክ መንፈስ ቁዱሱከ ኢምነቲህ የመገ መዔ ሒያውቶ ኪይይ ዪነ፡፡ 25. ታሃምኮ ላካል ባርናባስ ሳኦል ዋጊዮ ጠርሴስ የደ፡፡ 26. ገየ ዋክተ አንጾኪያ ባሄ፣ ላሚህ ኢንኪ ኢጊዳ ኢንኮህ የኪኒህ ማንጎ ሒያው ይምሂሪን፣ አማንቲ ኤዸዾይታ ጊዘህ አንጾኪያል ክርስቲያን አክ የኒህ ደዒሚመን፡፡

  27. ታማይ ዋክተ ውልውል ነብያት ኢየሩሳለምኮ አንጾኪያ የደይን፣ 28. ተንኮ ኢንከቲ ለ አጋአቦስ አክያንቲ ኡጉተህ ዓለሚል ሙሉእ ኃይላለ ራሃብ ያኮ ኪናም መንፈስ ቁዱሱህ ኡጉጉተህ ትንቢት ዋንሲተ፣ ታሃም ተከም ሮማ ኑጉሠ ነገሥት ቀላውዴዎስ ዳባን ኪይይ ዪነ፡፡ 29. አማይጉል አማንቲ ኡምቢህ ሲኒስኒ ዽዒ ባሊህ ማል የየዒኒህ ይሁዳ ሀገርል ታነ ሳዖሉህ ጎሮኑህ ሓቶ ፋሮና ይወስኒን፡፡ 30. ያሓይኒም የስከሄሊኒህ ባርናባስከ ሳዖልቲ ጋባህ ስማጊለል ፋረን፡፡

                                          ማዕራፋ 12

                                 ሞሶዓሪ አሞል ናባ ስደት የከ

  1. ታማይ ዳባን ኑጉሥ ሄሮድስ ውልውሊ ሞሶዓሪ ሒያው ያይሰደድኒም ኤዸዺሰ፡፡ 2. ያሃኒስ ሳዓል ለ ያዕቆብ ሰይፊህ ይስጊዲፈ፡፡ 3. ታይ ጉዳይ አይሁድ ተን ኒያቲሰም ዩብሊኒጉል ጰጥሮስ ለ ሳባዔን፡፡ ታሃም ተከም አይሁድ ፋስጊህ ባዓል ኢንገራ በታን ለለዓድ ኪይይ ዪነ፡፡ 4. ጰጥሮስ ይይዽብዸሚህ ላካል ዋክኒ ዓረድ ሳይሰ፣ አይሁድ ፋስጊ ባዓልኮ ላካል ህዝበህ ካብ ኢሳም ፋናህ፣ አፋር አፋር የኪኒህ ዻዉዾና ቡዱኑህ ይብዺኒህ ዮሖዊን፡፡ 5. አማይጉል ጰጥሮስ ዋክኒ ዓረድ ይምዽብዸህ ዻወዹማይ ይነ፣ ያከካህ መሶዓሪ ካያህ ፉጎል ጋዳህ ጻሎት አባይ ይነ፡፡

                                   መልአክ ጰጥሮስ ማዱዋኮ የየዔ

    6. ሄሮድስ ጰጥሮስ ህዝበህ ያስቃራቦ ይሕሰበህ ዪነ፡፡ ጰጥሮስ ለ ታማይ ባር ላማ ሰንሰሊህ ዩምዱወህ ላማ ወታሃደርቲህ ፋናድ ዺነህ ዪነ፣ አኪ ወታሃደራት ለ ዋክኒ ዓሪህ ኢፈይ ዻዉዻይ ይኒን፡፡ 7. ታማይ ዋክተ መዔፉጊህ መልአክ ኢፋህ ዩመቡሉወ፣ ዋክኒ ዓሪህ አዳድ ለ ጰጥሮስ ኤድ ይነ ክፍለድ ኢፎይታ ኢፎሰ፣ መልአክ ጰጥሮሱክ ማሳንጋለ ሳባዔህ ይቅስቅሰህ"ጋባላዓይ ኡጉት!"አክየ፡፡ ሰናሲል ካጋባኮ ራደ፡፡ 8. ማላይካ ኢሲ ራጋድ ኢክቲይ፣ ካበላ ኢባድ ሃይ አክየ፡፡ 9. ጰጥሮስ ይምኢዚዘም አበ፣ መልአክ ናጻላ ሀይሲታይ ዮድካታይ አክየ፣ ጰጥሮስ ለ የወዔህ ኤድካታየ፣ ሶኖህ /ራእይ/ አብሊይ ያነም የከለካህ መልአክ አበ ጉዳይ ኡምቢህ ሓቀ ማካሊና፡፡ 10. ኤዸዾይታቲያከ ማላሚት ዋርዲያኮ ቲላየኒህ ካታማ ቱላል አክ ያውዒን ብርቲ ማዕዶ ማደን፣ ማዕዶ ሒያው ዻገካህ ኢሰህ አካህ ፋክተህ የውዒኒህ ኢንኪ ሓኪህ አራሓል ቲላየኒህ የደይን፣ ዲንገቲህ ለ መልአክ ጰጥሮስኮ ባዽስመኒህ የደን፡፡ 

  11. ጰጥሮስ ለ ኢሲ አፍዓዶል ጋሔህ "ፉጊ ኢሲ ማላይካ ዮህ ፋረህ ሄሮድሲ ጋባኮከ አይሁድ ህዝቢ ኢላላይ ዪነ ጉዳይኮ ኡምቢህ ይይድኅነቲያ ኪናም ካዶ ገናህ ሓቀህ ኤዸገ"  የ፡፡ 

 12. ኢሲ አፍዓዶል ጋኄምኮ ላካል ማንጎ ሒያው ኢንኪል ተከሄለህ ጻሎት ኤደ አባን ማርያም ዓረህ የደ፣ ማርያም ማርቆስ አክያን ያሃኒስ ኢና ኪይክ ቲነ፡፡ 13. ጰጥሮስ ታማርከ ማደህ ኢሮት ኢፋይ ይኩሕኩሔ ዋክተ ሮዳ አክያን ኢንኪ ዲንግል ኢያይቶ ኪናም ታብሎ ኢፈል ተመተ። 14. ጰጥሮስ ዻው ኪናም ተደገጉል ኒያቲ ማንጋኮ ኡጉተሚህ ኢፈይ ፋከካህ ተርደህ አዳህ ሳይተህ "ጰጥሮስ ኢፊ አፋል ሶለህ ያነ !"ተህ ዋንሲተ፡፡ 15. ኢሲን ለ "ትዕቢደ!"አክየን፡፡ ኢሲ ለ ሓቀህ ካያ ኪኒ አይክ ሓቀ ኪናም ተይረገገጸ፡፡ ኢሲን አማይጉል "ካማላኪያ ያከ" የን፡፡ 

 16. ጰጥሮስ ለ ኢፈይ ያኩሕኩሒኒም ጋባባዔ፣ ኢሲን ኢፈይ ፋከኒህ ዩብሊንጉል ያናም ሶዸን፡፡ 17. ኡሱክ ለ ትብዮና ጋባህ ይሚልክተህ፥ መዔፉጊ አይናህ የህ ዋክኒ ዓረኮ ካየየዔም አካህ ዋሪሰ፣"ታይ ጉዳይ ያዕቆብከ አኪ አማንቲክ ኤዸኃ"አክየ፡፡ አክ ባዽሲመህ ለ አኪ ቦታል የደየ፡፡

 18 .ኢብዻሒነ ጰጥሮስ አርከ የለየ ያናማህ ወታሃደር ኡማኑላል ተርደ፡፡ 19. ሄሮድስ ለ ጰጥሮስ ዋግሲሰህ ዋየጉል ዋርድያ ዻዉዻይ ቲነያ ይምርሚረምኮ ላካል ራቦና ይኢዚዘ፣ ታማምኮ ላካል ሄሮድስ ይሁዳኮ የደህ ቂሳሪያል የደህ ታማል ዲፈየ፡፡

                                            ሄሮድስ ራብራብ

  20. ሄሮድስ ጢሮስከ ሲዶና ሒያዊህ አሞል ጋዳህ ይቁጡዔህ ዪነ፣ ኢሲን ለ ኢንኮህ የመትኒህ፣ ኑጉሥ ጋባ ባዕላህ ጲላጦስ አካህ ያምሐባባሮ ዻዕመኒህ መዔ ካ ኢሲሰኒምኮ ላካል ኑጉሥ ዋጋረ ኤሠረን፣ ታሃሞም ለ አበኒም ተን ባዾ ምግበ ገይታም ኑጉሥ ግዝአትኮ ክይነጉል ኪኒ፡፡

  21. ደዒሚመ ለለዕ ሄሮድስ ማንግሥት ማዓሪጊህ ሣራ ሀይሲተህ ኢሲ ዙፋኒህ አሞክ ዲፈየህ ህዝበህ ዋኒ አበ፡፡ 22. ህዝቢ ለ ታሃም አምላክ አንዻሕ ኪኒካህ ሒያው አንዻሕ ማኪ የን፡፡ 23. ሄሮድስ መዔፉጎህ ክብረ አሓየካህ ራዔርከህ አማይጉልካህ መዔፉጊህ ማላይካህ ማዓታህ ይምቅዚፈህ ሪምተህ ራበ፡፡

  24 መዔፉጊህ ቃል ለ ኡማንጉል አነብክ አፈደደኒክ አድይ ዪነ፡፡ 25. ባርናባስከ ሳኦል ሲኒ አገልጉሎት ባከኒህ ኢየሩሳለምኮ አንጾኪያል ጋኄን፣ ማርቆስ አክያን ያሃኒስ ለ ስነሊህ ይብዺኒህ የመቲን፡፡

                                 ማዕራፋ 13

                 ባርናባስከ ሳኦል መንፈስ ቁዱሱህ የመጊኒህ                                                                          ያይማሃሮና  ፋሪቲመን         

   1. አንጾኪያል ያነ ሞሶዓረል ነብያትከ መምሂራን ዪኒን፣ ኢሲን ለ"ባረናባስ ዳቲያ አክያን ስምዖን፣ ቀሬና ሉክዮስ፣ ማፋሪ ባዾህ ክፍሊህ ገዛኢ ሄሮድስ አብናንከ ሓብናኒህ ዋኖን ምናሔከ ሳኦል" ኪይይ ይዪን፡፡ 2. ኢሲን መዔፉጎል ጻሎት አባከ አጾምክ ያንንሃኒህ መንፈስ ቁዱስ "አኑ አካህ ዶረ ሢራሓህ ባርናባስከ ሳኦል ዮህ ባዺሳ"አክየ፡፡ 3. ጋባዔኒህ ለ ጾምከ ጻሎት አበኒህ ጋቦቦብ አሞል አክ ዲፍሰኒምኮ ላካል ተን ፋረን። 

     ባርናባስከ ሳኦል ቆጵሮሱል   

 4. ባርናባስከ ሳኦል መንፈስ ቁዱሱህ ፋሪመኒህ ሴሌውቅያ የደይን፣ ታማርከኮ መርከብህ ቆጵሮስ ማደን፡፡ 5. ስልማና ማደንጉል አይሁድ ሙኩራባል ፉጊ ቃል ይምሂሪን፣ ያሃኒስ ለ ተንሊህ ጋሔህ ተን ጎሮንሳይ ዪነ፡፡

  6. ቆጵሮስ ደሴት ዮስቆሮጽኒህ ጳፋ ማደን ዋክተ በርየሱስ አክያን ኢንኪ አይሁድ ሒያዊህ ጦንቃሊ ገየን፣ ኡሱክ ዲራብቲ ነብይ ኪይይ ዪነ፡፡ 7. ማራም ለ ሰርግዮስ ጳውሎስ አክያን ማስታውዓላ ኪን ባዾህ ረዳንቶሊህ ኪይይ ዪነ፣ ታይ ባዾህ ረዳንቲ ባርናባስከ ሳኦል ደዕስሰህ መዔፉጊህ ቃል ያቦ ጉረ፡፡ 8. ያከካህ ግሪክ ዋኒህ "ኤሊማስ" የኒህ ደዓን ጦንቃሊ በርያሱስ ባዾህ ረዳንቲ ያማኖ ጉረህ ባርናባስከ ሳኦል ተን የምቀወመ፡፡ 9. ጳውሎስ አክያን ሳኦል ለ መንፈስ ቁዱሱህ የመገህ ሒያውቶ ዩቱኩረህ የይደለለዔህ ታህ አክየ፡፡ 10."አቱ ዲያብሎስ ባዻ፣ ኡማን ሓቂህ ናዓብቶል፣ አይታላልከ ኡሙነህ የመገቲያ፣ ሪግ የ መዔፉጊህ አራሕ ያሕንክሊኒም /ያይሰሄነከሊኒም/ ማኃብታ? 11. ካዶሊህ ሃይክ መዔፉጊህ ጋባ ኩሳባዔ ለ፣ ኢንቲማሊ አከሊቶ፣ ዳጎ ዋክተ አይሮት ኢፎ አብለማልቶ፡፡"አማይጉልካህ ኢንቲት ዓቦሪከ ዲተ አክ አሊፍተ፣ ጋባህ ይብዸህ ያይምሪኄ ሒያውቶ ባሮሩል ዋጊዮ ኤዸዽሰ፡፡ 12. ባዾ ረዳንቲ የከ ጉዳይ ዩብለጉል የመነ፣ ማዳሪ ዳዓባል ዮበ ምሂሮህ ይምድንቀ፡፡

   ባርናባስከ ጳውሎስ ጲስድያል ገይምታ አንጾኪያ የደይን

 13. ታማምኮ ላካል ጳውሎስከ ካዶባ መርከብድ ሳየኒህ ጳፋኮ ጵንፍልያል ገይምታ ጴርጎ የደይን፣ ማርቆስ አክያን ያሃኒስ ለ ተንኮ ባዽስመህ ኢየሩሳለም ጋሔህ የደ፡፡ 14. ኢሲን ለል ጴርጌኮ ኡጉተኒህ ጲስድያ አክያን አንጾኪያ የደይን፡፡ ሳንባት ለለዕ ኢንኪ ሙክራባድ ሳየኒህ ዲፈየን፡፡ 15. ሙሴከ ነብያት ማጻሒፍት ትምንቢበምኮ ላካል ሙከራብ አሞይቲት" ኒሳዖሎ!"ህዝበ ያይጸነነዔ ማስኪር ቃል ተልኒምኮ ዋንሲታ"የኒህ ጳውሎስ ማዓላድ ሒያውቶ ፋረን፡፡ 16. አማይጉል ጳውሎስ ኡጉተህ ህዘበል ጋባ ይቱኩረ፡"እስራኤል ሒያውከ አይሁድ ዓይዳህ መዔፉጎ ታይምልኪን አቲን አህዛቦ /አሚነዋይታሞ/!ኦባአ፣ 17. ታይ እስራኤል ህዝቢህ አምላክ ባሶል ናቦብ ዶረ፣ ግብጺ ባዾል ይኒን ዋክተ ናባ ህዝበ ተናአበ፣ ናባ ኃይላህ ታማይ ባዾኮ ተን የየዔ፡፡ 18. ሞሮቶም ኢጊዲያ ታከም ለ ባራካል ትዕግሥቲህ ተን ጎሮኒሰ፡፡ 19. ታሃምኮ ላካል ከነዓን ባዾል ማልሒና ማንግሥት የይለየህ፣ ተን ባዾ ተን ይውርሰ፡፡ 20. ታማምኮ ላካል አፋራ ቦል ኮንቶም ኢጊዲያ ታከም አይክ ነብይ ሳሙኤል ፋናህ መሳፍንት አካህ ዮኆወ፡፡

  21. ታሃምኮ ካታየህ  ኑጉሥ አካህ ያይናጋሦ መዔፉጎ ዻዒመን፣ መዔፉጊ ቢንያም ወገን የከ ቂሰን ባዻ ሳኦል ሞሮቶም ኢጊዲያህ አካህ ይይንጊሠ፡፡ 22. ሳኦል ለ ይስዒረሚህ ላካል ዳዊት አካህ ይይክንጊሠ፣ መዔፉጊ ዳዊት ዳዓባል አምስክሪህ ኢኒ'አፍዓዶኮ ኪሒኒዮ፣ ይፍቃድ ያፍጺመ እሴይ ባዻ ገየ' የዽሔ፡፡ 23. ታይ ሒያውቲህ ሐረግኮ ፉጊ አካህ ሳየ ታስፋ ቃሊህ ሪሚዲህ እስራኤል ያድኂነ ኢየሱስ ባሄ፡፡ 24. ኢየሱስ ያሚተምኮ ባሶል ያሃኒስ እስራኤል ሒያው ንሲሓ ሳየኒህ ያምጣማቆና ዮኮመህ ይስብከህ ዪነ፡፡ 25. ያሃኒስ ኢሲ ሥራሕ ባከ ዋክተ 'አኑ አቲያ ይታካሊኒ? አኑ ኡኮ መሲሕ ማኪዮ፣ ያኮይ ኢካህ ካኢቢህ ካበላ ኡካ አካህ አንሓዎ ኤዳቲያ ማኪዮ፣ ዮኮ ላካል አከቲ አምተለ' አይ ዪነ፡፡ 

 26. አቲን አብራሃም ዳራኮ ቶቦከ ይሳዖልከ አይሁድ ዓይዳህ መዔፉጎ ታምነ ሒያዋክ ታይ ድኅነት ቃል ፋርቲመም ኡኮ ኖያህ ኪን፡፡ 27. ያከካህ ኢየሩሳለምል ማርታ ሒያዋከ ተን ኃተን ኃለቅቶት ኢየሱስ ያይዲኅነቲያ ኪናም ማዻጊኖን፣ ኢሲሲ ሳንባታህ ለ ታምንብበ ነብያት ማጻሒፍት አስትውትለካህ ማጻሒፍት ቃል ያምፋጻሞ ኤል ይፍርዲን፡፡ 

28. ኢንኪጉል ኡካ ራባ ማዲሳ ጉዳይ ኤድገይመ ዋየሚህ አካህ ያግዳፎ ጲላጦስ ዻዒመን፡፡ 29. ካዳዓባል ትምጽሕፈም ሙሉኡድ ባከኒምኮ ላካል ለ ማስቃልኮ ይበዽይኒህ ዮዖጊን፡፡ 30. ያከ ኢካህ መዔፉጊ ራባኮ ኡጉሠ፡፡ 31. ገሊላኮ ኢየሩሳለም ካሊህ ተመተሚህ ማንጎ ለለዕ አካህ ይምቡሉወ፣ ኢሲን ለ ካዶ ህዝቢ ነፊል ማስክር ኪኖን፡፡ 

32. ናኑ ለ ንብዸህ ሲናህ ነመተም መዔፉጊ ሲን አቦቡህ ታስፋህ ዮሖወ መዔ ዋረ ኪኒ፡፡  33. አይሚህ መዔፉጊ ኢየሱስ ራባኮ ኡጉሠርከህ ታይ ታስፋ ኖያህ ካዻይሎህ ኖህ  ይፍጽመ፡፡ ታሃም ለ ማላሚ መዝሙሩል 'አቱ ይባዻ ኪቶ፣ አኑ ካፋ ኩዻለህ አኒዮ!' የህ ይጽሒፈም ባሊህ ኪኒ፡፡ 34. አባስባስ ካማዳምኮ መዔፉጊ ራባኮ ካኡጉሠም ያይራዳኦ፣

              'ቁዱስከ ያምኢሚነቲያ፣  

               ዳዊቲህ ቶምሖወ ታስፋ ስናህ  አኃይክ አኒዮ'፣ 

               የህ ዋንሲተ፡፡ 

        35. ጋባዔህ አኪ መዝሙሩል፣  

             'ቁዱስ ኩባዻ አባስባስ ካማዶ ማቢን' ያዽሔ፡፡ 

   36. ያከካህ ዳዊት ኢሲ ሂወቲህ ዳባን አገልጊሎት መዔፉጊህ ፍቃድ ባሊህ ይፍጽመምኮ ላካል ራበ፣ ኢሲ አቦብትሊህ ይሙዑገ፣ አባስባሰ ካማደ፡፡ 37. መዔፉጊ ራባኮ ኡጉሠም ለ አባስባሰ ተን ማማዲና፡፡ 38. አማይጉል ይሳዖሎ! ኃጢአት ኅድጎት ገይማም ኢየሱሱኮ ሲናህ ይምስብከም ኢዺጋ፡፡ 39. ካያል ታሚነም ኡምቢህ፣ ሙሴ ሕጊ ናፃ ተን ያያዖ ዺዔ ዋ ኃጢአትኮ ኡምቢህ ናፃ ያውዒን፡፡ 40. አማይጉል ነብያታህ ታህ የኒህ ዋንስተኒም ሲን ማዳምኮ ሰሊታ፡፡

     41."አቲን ኮማይታላሊት! 

            ኡቡላይ ኢምደኒቃ፣ ኤለያ፣  

           አይሚህ አኪናን ሒያውቲ ሲናህ ዋሪሳጉል 

           አምነዋይታን ሢራሕ ሲን ዳባናህ ሢራሓክ አኒዮ፡፡" 

   42. ጳውሎስከ ባርናባስ ሙክራብኮ አውዒህ ታይ ጉዳይ ያሚተ ሳንባታህ ጋባዔኒህ አክ ዮና ሒያው ተን ዻዒምተ፡፡ 43. ሙክራብኮ አግለ ፋሕተጉል ማንጎ አይሁድከ አይሁድ ኢምነትድ ሳይተ መንፈሳውያን ተከ ሒያው ጳውሎስከ ባራናባስድ ካታየን፣ ጳውሎስከ ባርናባስ ሒያው አይምሂሪህ መዔፉጊህ ጸጋድ ሲክ የኒህ ማሮና ተን ኡጉጉሰን፡፡

  44. ማላሚ ሳንባት ካታማል ማረታምኮ ዳጎም አክ ራዕተምኮ በሒህ፣ ራዕተም ሙሉኡክ መዔፉጊህ ቃል ያቦና የከሄሊን፡፡ 45. አይሁድ ህዝቢህ ማንጋ ዩብሊን ዋክተ ቅንአታህ የመጊን፣ ዋኒ አክ ጎንፎይሳክ ጳውሎሱህ ዋትመን፡፡ 46. ጳውሎስከ ባርናባስ ለ ታህ የኒህ ድፍረቲህ ዋንስተን፣ መዔፉጊህ ቃል ዮኮሚኒህ ሲናክ ዮና ጉርሱሳቲያ ኪኒ፣ ማኖ ተኒምኮ ኡማንጉሊ ሂወት ሲናድ ማሳም ሲነህ ቲፍሪዲንምኮ ለ፣ ሀይከ ናኑ ኡፍኩና ነህ አምነዋይታም ዻጋህ አዴሊኖ፡፡ 47. አይሚህ፣ "ማዳሪ ዓለም" ሙሉኡክ ኮያህ ያድኃኖ አረማውያን ኢፎይታ ኩአበህ አኒዮ ያናማህ ይኢዚዘጉል ኪኒ፡፡ 

  48. አረማውያን ታሃም ዮቢን ዋክተ ኒያተን፣ መዔፉጊህ ቃል ይሰክቢሪን፣ ኡማንጉሊ ህወቲህ ዶርምምተም ኡምቢህ ተመነ፡፡

 49. ማዳሪ ቃል ታማይ ባዾል ኡማን ኢርከል የምፈደደነ፡፡ 50. አይሁድ ህዝቢህ መራሕቲ ለ፣ አይሁድ ኢምነት ታኪቲለ ሀብታማት ሳዮከ ካታማ ናባ ሒያዋል አድማ አብሲሰኒህ ጳውሎስከ ባርናባስ አሞል ስደት ኡገታካህ አብሲሰን፣ ተን ባዾኮ ተን የየዒን፡፡ 51. ጳውሎስከ ባርናባስ ለ ሰሊስናን ማሰኪር አካህ ያኮ ሲኒ ኢቢህ አቦራ ኡርጉፈኒህ ኢቆኒዮን ኡላል የደይን፡፡ 52. ተምሃሮ ኒያታህከ መንፈስ ቁዱሱህ የመጊን፡፡

 ማዕራፋ 14

  ጳውሎስከ ባርናባስ ኢቆኒዮኑል

  1. ኢቆንዮኑል ጳውሎስከ ባርናባስ ኢንኮህ አይሁድ ሙከራባድ ሳየን፣ ታማል ናባ ኃይላህ ዋንሲተኒህ ማንጎ አይሁድከ ግሪካውያን ተመነ፡፡ 2. አሚነዋይተ አይሁድ ለ አረማውያን ኡጉጉሠኒህ ሳዖልቲት አሞል ናዓቢ ያሚተካህ አበን፡፡ 3. አማይጉል ጳውሎስከ ባርናባስ ማደሪ ጉዳይ ደፍረተህ ዋንሲታክ ታማል ማንጎ ዋክተ ሱገን፣ ማደሪ ታአምራትከ ደንቀ ኪን ጉዳያት ተናህ ያኮ ሢልጣን አካህ ዮሖወህ ካጸጋህ ቃል ሓቀ ኪናም አይረደደኢይ ይነ። 4. ካታማል ማረታም ለ ላማል ሓዲመኒህ አብዻ አይሁድሊህ፣ አብዻ ሐዋርያትሊህ የኪን፡፡ 

  5. አረማውያንከ አይሁድ ሲኒ አሞይቲትሊህ የኪኒህ ጳወሎስከ ባርናባስ ያይጋላታዖናከ ዻይቲህ ሰባዖና ጉረን፡፡ 6. ጳውሎስከ ባርናባስ ታሃም የዸጊን ዋክተ ልስጥራከ ደርቤ አክያን ሊቃኦንያ ካታማክ ባሮሩል ታነ ባዾል ኩደኒህ የደዪን፡፡ 7. ታማል መዔ ዋረ ይብሢሪን፡፡

                   ጳውሎስከ ባርናባስ ልስጥራከ ደርቤል              

   8.ልስጥራል ኢንኪ ኢቢ ብያክ ለ ኢንኪ ሒያውቲ ዪነ፣ ታይ ሒያውቲ ዮበከማሕኮ ኤዸዺሰህ አካል ጉድለት ሊይ ይነጉል ኢባህ የደህ አዺጊይ ማና፡፡ 9. ታይ ሒያውቲ ጳውሎስ ዋንሲታ ዋክተ ደፈየህ ኦኮይሲታይ ዪነ፣ ጳውሎስ ሒያወቶ ኡቱኩራ የህ የይደለለዔህከ አካህ ኡሮ ዺዓ ኢምነት ለም ዩብለ ዋክተ፣ 10."ሪገአይ ኢባህ ሶል! "የህ ናባ አንዻሓህ ዋንሲተ፣ ሒያውቲ ለ ቢዲጋ የህ ያዳዎ ኤዸዺሰ፡፡ 11. ሒያው ለ ጳውሎስ አበም ዩብሊንጉል ሲኒ አንዻሕ ናውሰኒህ "ማላይካ"ሒያው አምሳል የኪኒህ ኖያል ኦበን!" ያናማህ ሊቃኦንያ ዋኒህ ዋንሲተን፡፡ 12. ባርናባሳክ"ዲያ"የን፣ ዋና ዋንሲተኒ ጳውሎስ ኪይ ይነጉል ካያክ"ሄርማን"አክየን፡፡ 13. ካታማኮ ኢሮል ያነ ዲያ በተ መቅደስ ካህን፣ ሞይናይከ ዒንቦባ ጉነጉን ካታማክ ኢፈይል ባሄኒህ ሕዝበሊህ የምሔበበሪኒህ፣ ጳውሎስከ ባርናባሳህ መሥዋዕት ካብ አካህ ኢሶና ጉረን፡፡ 14. ሐዋርያት ጳውሎስከ ባርናባስ ለ ታሃም ዮብንጉል ኃዛናህ ሲኒ ሳራ ዓንዺሰን፣ ዋዕ አይክ ህዝቡላል የርዲኒህ ታህ አክየን፡፡ 15."አቲን ኮሒያው አይሚህ ታሃም አባክታኒን?" ናኑኮ ሲናባሊህ ሒያው ኪኖ፣ ናኑ ታል ነመተም ሲና ታይ አርቢሔ ዋ ጉዳይኮ ኡምቢህ ሚሪሕ ተኒህ ዓራናል፥ ባዾል፥ ባሕራከ ተን አዳል ገይምታም ኡምቢህ ይፈጠረህ ያነ አምላክ ታይማላኮና መዔ ዋረ ሲን ናይባሣሮ ነህ ኪኖ፡፡ 16. ትላየ ዻባናት ሂዝቢ ሙሉኡክ ሲኒ አራሓህ ያዳዎና መዔፉጊ ተን ሓበ፡፡ 17. ያከ ኢካህ ኡሱክ አይናህ ኢጊድ ሒንዳተን አምላክ ኪናም ያይምስኪረ መዔ ሢራሕ አባናም ማስዓራፊና፣ አይሚህ ዓራንኮ ሮብ ሲናህ ሓዻ፣ ፊረ ኤልፍሮይሳን አልስት ሲናህ ዮሖወ፣ ሚግበከ ኒያታህ ሲን አፍዓዶ የመገ፡፡ 18. ኢንኪጉል ኡካ ሐዋርያት ታሃም ዋንሲተኒሚህ ህዝቢ ተናህ መሥዋዕት ካብ ኢሳናም ሓብሲሰኒም ማንጎ  ዱፍላህ ኪኒ፡፡ 

 19. አይሁዳውያን ለ አንጾኪያከ ኢቆንዮንኮ ታማህ የመቲኒህ ህዝበል ሠራ ኤል ኡጉሰኒህ ጳውሎስ ዻይቲህ ሳባዔን፣ ራበም የከሊኒህ ሂሪገኒህ ካታማኮ የየዕን፡፡ 20. ያከካህ ተምሃሮ ተመተህ ካ አፋል ሶለንጉል ጳውሎስ ኡገተህ ካታማል ሳየ፣ ኢብዻሒነ ባርናባስሊህ ደርቤ ቱላል የደየ፡፡

                            ጳውሎስከ ባርናባስ ሶሪያል ገይምታ አንጾኪያ ጋኄን

   21. ጳውሎስከ ባርናባስ ደርቤል መዔ ዋረ ይይብሥሪኒህ ማንጎ ሒያው አማንቲ ያኮና አበን፡፡ ታሃምኮ ሳራህ ልስጥራከ ኢቆንዮኑል ቲላየኒህ ጵስድያል ገይማታ አንጾኪያ የደዪን፡፡22. ታማይ ሀገራታል ኡማን አማንቲ ሲኒ ኢምነቲል ሲክ ዮና ኃይላ አካህ አሓይከ  አምክሪክ መዔፉጊህ ማንግሥቲል ሳይቶ ማንጎ መከራ ጋራይቶ ኮል ታነ አይክ ተን ይምሂሪን፡፡ 23. ሞሶዓሪ ስማጊለ ለ አካህ ረዲሰን፣ ጾምከ ጻሎት አበኒሞኮ ላካል ተመነሚህ ማደሪ ሐደራ  አካህ ዮሖውን፡፡

  24. ጵስድያ ቲላየኒህ ጵንፍልያ ቱላል የደይን፡፡ 25. በጴርጌል ለ ካቃል ዋንስተኒሚህ ላካል ኢጣልያ ኦበን፤ 26. ታማርከኮ መርከቢድ ጋሔኒህ ሶሪያል ገይምታ አንጾኪያ ጋኄን፥ አንጾኪያል፥ አበን ሢራሓህ መዔፉጊህ ጸጋ ሓደራህ አካህ ኤልተምሖወ ካታማ ኪይይ ቲነ፡፡

 27.ታማረከ ማደንጉል ኡማንቲያ ኢንኮህ የስከሄልኒህ መዔፉጊ ተንሊህ የከህ አካህ አበም ሙሉኡድከ አረማውያን ለ ያማኖና አይናህ ኢሰህ ኢፈይ አካህ ፋከም አክየን፡፡ 28. ታማል አማንቲሊህ ማጎ ዋክተ ሱገን፡፡

ማዕራፋ 15

 ኢየሩሳለም ጉባኤ

  1. ውልውል ሒያው አንጾኪያ የደይኒህ፣ ሙሴ ሕጊህ መሠረቲህ ግዝረት ሥነ ሠርዓት አፍጽመ ዋይተኒመኮ ታድኃኖና ማዽዕታን አይክ አማንቲ ያምሂሪኒም ኤዸዺሰን፡፡ 2. ጳውሎስከ ባርናባስ ታሃሚህ ዳዓባል ሒያውሊህ ኃይላህ የምከረከሪን፣ ታሃምኮ ላካል ጳውሎስከ ባርናባስ አንጾኪያል ቲነ አኪ ዳጎ ሳዖሊህ የኪኒህ ኢየሩሳለም ያዳዎናከ ጉዳይ ሐዋርያትከ ስማግለታታል ካብ ኢሶና ይምውስነ፡፡

 3. አማይጉል ኢሲን ሞሶዓረህ ፋሪመኒህ የደዪን፣ ፊንቄያከ ሰማሪያ ቲላህ አረማውያን መዔፉጎል ጋሔኒም ዋንሲተን፡፡ 4. ኢየሩሳለም ማደንጉል ክርስቲያንከ ሐዋርያት፣ ስማግለታት ተን ጋራየን፣ ፋሮንቲት ለ ፉጊ ተንሊህ ጋኄህ አበም ሙሉኡድ አካህ ዋሪሰን፡፡ 5. ያከካህ ፈሪሳውያን ወገን ኪይይ ቲነ ውልውል አማንቲ ኡጉተኒህ"አረማውያን ያምጋራዞናከ ሙሴ ሕገ ዻዉዾና ኤዳ"የን፡፡ 6. ሐዋርያትከ ሲማግለ ታይ ጉዳይ ያማርማሮና የከሄሊን፤ 7. ማንጎ ክርክር የከምኮ ላካላ ጰጥሮስ ኡጉተህ ታህ አክየ፣" ይሳዖሎ! አረማውያን ያራሓህ በሠራታ ቃል ዮብኒህ ያማኖና ታሃምኮ ባሶህ ፉጊ ዮያ ሲን ፋናኮ ይዶረም ታዺጊን፡፡ 8. ሒያው አፍዓዶ ያዽገ አምላክ፣ መንፈስ ቁዱስ ኖያህ ዮሖወም ባሊህ ተናህ ለ ያምሓዎ አካህ ይምስኪረ፡፡ 9. ናፍዓዶ ኢምነቲህ ይይጺሬየህ ኖከ ተን ፋናድ ኢንኪ ባዽሳ ማቢና፡፡ 10. ኢስኪ ሲና አቦብ ያኮይ ናኑ ናይካዖ ዺዔዋይና አርዑት አማንቲህ ዳጋክ ዑካህ አሞክ ናሮ መዔፉጎ ካዶ አይሚህ አፍትኒክ ታኒን? 11.ናኑ ለ ንድኂነም ልኪዕ ተና ባሊህ  ንማዳሪህ ኢየሱስ ጸጋህ ኪናም ናሚነ፡፡

 12. ታይ ዋክተ ህዝቢ ቲባየህ ባርናባስከ ጳውሎስ ተን ምክንያታል መዔፉጊ አረማውያን ፋናድ አበ ታአሚራትከ ያይግሪመ ጉዳይህ ዳዓባል ኡምቢህ ዋንስታህ አምድንቂክ   ኦኮይሲተን፡፡ 13. ኢሲን ዋንስተኒህ ባከኒምኮ ላካል ያዕቆብ ታህ የህ ደሄየ፣"ይሳዖሎ! ኢስክ ዮባየ፡፡"14. ፉጊ ካሚጋዕ ደዓ ህዝበ ዶሮ ኤዸዾይታ ዋክተ አረማውያን አይናህ ኢሰህ ተን ማደም ስምዖን ንይይስዽገ፡፡ 15. ታይ ሓሳብሊህ ነብያት ቃል ያምሰመመዔ፣ ታሃም ለ ታህ ተህ ትምጽሕፈም ኪኒ፡፡ 

       16.'ታሃምኮ ላካል ጋሔሊዮ፣ 

            ራደ ዳዊት ዓረ ሥራሔልዮ፣ 

           ቶዖኖወም ሪግ ኢሰህ ጋባዔህ ሶሊሰ ሊዮ፡፡ 

     17. ታሃሞም አባም አኪ ሒያውከ 

           ይሚጋዓህ ደዒምምተ አረማውያን ሙሉኡድ 

           መዔፉጎ ዋጊዮና ኪኒ፡፡ 

     18. ባሶኮ ኤዸዽሰህ ታሃም ሙሉኡድ ይስዽገህ 

           መዔፉጊ ታህ ያ፡፡ 

 19. አማይጉል ይሓሳብ፣ መዔፉጎል ጋሕታ አረማውያን ተን ናይጽጊመምኮ ኪኒ፡፡ 

20. ያናቦይ ያዓንዻዎይ ጣኦት መሥወዕትህ ምክንያታል ትርክሰ ፈሎ ማበቲና፣ ዙሙትኮ ሚሪሕ ኤያ፣ አምሩሑደካህከ ቢሊ አክሓንተካህ ይምሕኒቀህ ባደ ኢንስሳ ማበቲና፣ ቢሎ ለ ማበቲና፤ ነዽሔህ ሲናል አጽሒፊክ ናነ፡፡ 21. አይሚህ ባሶኮ ኤዸዺሰህ ሙሴ ሕገህ ኢሲሲ ሳንባታህ ሙክራባል አምኒብብይ ዪነ፣ ካቃል ለ ኢሲሲ ካታማል ያምሲብከ፡፡

አግለ ውሳነከ አማንቲህ ትምጽሕፈ ደብዳበ

  22. ታሃምኮ ላካል ሐዋሪያትከ ስማግለ ሞሶዓሪ ሒያውሊህ ኡምቢህ የኪኒህ፣ አግለ ፋንኮ ዳጎ ሒያው ዶረኒህ፣ ጳውሎስከ ባርናባስሊህ አንጾኪያ ፋሮና ይውሲኒን፣ አማይጉል ሳዖልቲቲ አዳድ ያይማራሖና መዔ ዋረ ሊይቲነም በርስያስ አክያን አይሁዳከ ሲላስ ዶረን፡፡ 23. ቲምጽሒፈ ወረቀት ተን ጋባህ ፋረን፣ ወረቀት ታህ አይክ ቲነ፡-

    "ናኑ ሐዋርያትከ ሲማግለታት ሳዖሉክ፥ 

    አንጾኪያከ ሶሪያል፥ ኪልቂያል ለ ማርታን አረማውያን ወገን ኪን ኒሳዖሉክ ሳላምታ ካብ ሲናህ ኢሳክ ናነ፡፡ 24. ኒፋንኮ ወልውል ሒያው ተን አኢዚዘካህ ሲኑላል የመቲኒህ ሲናክ የን ቃላታህ ሲን የይሄወኪኒምከ ሲን ዮይዶኖጎሪኒም ኖበ፡፡ 25. አማይጉል ኢንኮህ ነከሄለምኮ ላካል ፋሮይቲት ዶርነህ ኢምኪኂን ባራናባስከ ጳውሎሊህ ሲን ኡላል ፋርኖ ነምሰመመዔ፡፡ 26. ባርናባስከ ጳውሎስ ማዳራ ኢየሱስ ክርስቶሱህ ሲኒ ሕይወት ተላሰኒህ ቶሖወም ኪኖን፡፡ 27. ኒውሳነህ ቃላድ ኤድ ኦሰኒህ ሲናክ ዮና ይሁዳከ ሲላስ ፋርነ፡፡  28. ታይ ያኪቲለ ጉርሱሳ ጉዳይኮ በሒህ አኪ ዒሊስ ዑካ ሲን ናይሱኩዔምኮ መንፈስ ቁዱስከ ኖያህ መዔም የከህ ገይነ፤ 29. ጣኦቱህ ቲምስውዔሚህ ምክንያታል ይርከሰ ሚግበ ማበቲና፣ አምሩሑደካህከ ቢሊ አክ ሓዲተካህ ትምኅኒቀህ ባደ ኢንሲሳ ማበቲና፣ ቢሎ ለ ማበቲና፣ ዙሙትኮ ሚሪሕ ኤያ፣ ታይ ጉዳኮ ሙሉኡድ ሲነ ዻዉዻንጉል መዔም አባክታኒን፣ ናገይ ቲካ፡፡"30. ፋሮንቲት የምሰነበቲኒህ አንጾኪያ የደዪን፣ አማንቲህ የስከሄሊ ኒህ ደብዳቤ አካህ ዮሖውን፡፡ 31. አማንቲ ወረቀት ይኒብቢን ዋክተ ደብዳበህ የምጸነነዒኒህ ጋደህ ኒያተን፡፡ 32. ይሁዳከ ሲላስ ነብያት ኪይይ ይኒኒጉል ሳዖልቲ ማንጎ ቃላታህ ይምክርኒህ የይጸነነዒን፣ ይየበረተዒን፡፡ 33. ይሁዳከ ሲላስ ዳጎ ለለዕ ታማል ሱገኒሚኮ ላካል፣ አማንቲ ሳዖልኮ የምሰነበቲኒህ ተን ፋርተ ሒያው ዻጋህ ጋሔኒህ የደዪን፡፡35. ጳውሎስከ ባርናባስ ለ አኪ ማንጎ አማንትሊህ የኪኒህ ማዳሪ ቃል አይሚሂሪከ አስብክክ ዳጎ ለለዓህ አንጾኪያል ሱገን፡፡

                                   ጳውሎስከ ባርናባስ ባዽሰና

  36. ዳጎ ለለዓኮ ላካል ጳውሎስ ባርናባሳክ"አሞ ጋሕኖዋይ ታሃምኮ ባሶህ ማዳሪ ቃል ኤልኒቢሲረ ካቶሙል ኡምቢህያል ታነ ሳዖል ማድኖይ፣ አይናህ ኪኖኑም ናዻጎይ"አክየ፡፡ 37. ባርናባስ ለ ማርቆስ አክያን ያሃኒስ ተንሊህ ኢንኮህ ያዳዎ ጉረ፡፡ 38. ጳወሎስ ለ ታይ ሒያውቲ ተንሊህ ኢንኮህ ያዳዎ ማጉሪና፣ አይሚህ ኡሱክ ጵንፍልያል ተንኮ ባዽሲመህ ራዔርከህከ ተንሊህ ሢራሓህ አዴ ዋየርከህ ኪኒ፡፡ 39. ታሃሚህ ሳባባል ተን ፋናድ ናባ ክርክር ኡጉተህ ባዽሲመን፣ አማይጉል ባርናባስ ማርቆስ ይብዸህ መርከቢህ ቆጵሮስ የደየ፡፡ 40. ጳውሎስ ለ ሲላስ ዶረ፣ ሳዖልቲ ለ ጳወሎስ ማዳሪ ጸጋ ኃደራህ አካህ ዮሖወኒምኮ ላካል የደ፡፡ 41. ኡሱክ ለ ሞሶዓሪት አይበረተዒክ ሶሪያከ ኪልቅያ ቱላኮ ቲላየ፡፡

ማዕራፋ 16

ጢሞቴዎስ ጳውሎስከ ሲላስሊህ

  1. ጳውሎስ ደርቤከ ልስጥራ ታቱላል የደ፣ ልስጥራል ጢሞቴዎስ አክያን አማኒ ዪነ፣ ኢና አይሁዳ ኪን ክርስቲያንቶ ኪይይ ቲነ፣ አባ ለ አረማዊ ግሪክ ኪይይ ዪነ፡፡ 2. ጢሞቴዎስ ልስጥራከ ኢቆንዮሉል ታነ ሳዖሉል መዔ ዋረ ሊይይ ዪነ፡፡ 3. ጳውሎስ ጢሞቴዎስ ይብዸህ ያዳዎ ጉረጉል ያምጋራዞ አብሲሰ፣ ታሃም አካህ አበም ታማይ ቦታል ቲነ አይሁዲህ ምክኒያታል ኪኒ፣ አይሚህ ለ ኢሲን ጢሞቴዎስ አባ ግሪክቲያ ኪናም አዽጊይ ይኒኒጉል ኪኒ፡፡ 4. ጳውሎስከ ሲላስ ኢሲሲ ካታማኮ ቲላህ ኢየሩሳለምል ታነ ሐዋርያትከ ስማግለታታህ ይምውሲነ ደምቢ አማንቲ አይስዽጊይ ዪኒን፣ ሢራሓድ አሲሶና ተን አይስጊድዲይ ዪኒን፡፡ 5. አማይጉል ሞሶዓሪ ኢምነቲህ ይስሪየህ፣ ተን ሎይ ለ ኢሲሲ ለለዕህ ኦሳክ አይዲይ ዪነ፡፡ 

ጳውሎስ መቄዶኒያ ያዳዎ ደዕሚመ

    6. ጳውሎስከ ሲላስ እሰያል ካቃል ዋንሲታናምኮ መንፈስ ቁዱስ ተን ደሰጉል ፍርግያከ ገላቲያ ባዾ አበኒህ ቲላየን፡፡ 7. ሚስያ ዋሳን ማደን ዋክተ ብታኒያ ያዳዎና ይሕስቢኒህ ዪኒን፣ ያከካህ ኢየሱስ መንፈስ ታሙላል ያዳዎና አካህ ማይፋቃዲና፡፡ 8. አማይጉል ሚስያ ቱላኮ ቲላየኒህ ጢሮአዳ ኦበን፡፡ 9. ታማል ባር ኢንኪ መቄዶኒያ ሒያውቲ ሶለህ መቄዶኒያ ቱላል ታባይ ኒጉሮኒስ! አይክ ዻዒማህ ጳውሎስ ሶኖህ /ራእይ/ ዩብለ፡፡ 10. ጳውሎስ ታይ ሶኖ ዩብለምኮ ላካል አማይጉልካህ መቄዶኒያ ያዳዎ ጉረ፣ አይሚህ ለ መቄዶኒያ ሒያው መዔ ዋረ ናይባሳሮ መዔፉጊ ኒደዔም ኒምርዲኤጉል ኪኒ፡፡

ልድያ ክርስቶሱል ተመነ

  11. ጢሮአዳኮ መርከቢህ ነምሰፈረህ ቀስነህ ሳሞራቄ ነደ፣ ኢብዻሕነ ናጱሌ ነደየ፡፡ 12. ታማርከኮ ኡጉነህ ፊልጵስዩስ ማደነ፣ ፊልጵስዩስ መቄዶንያል ገይማታ ናባ ካታማከ ሮማውያን ግዝአት ባዾ ኪይይ ቲነ፣ ታይ ካታማል ዳጎ ለለዕ ቲላስነ፡፡ 13. ሳንባት ለለዕ አይሁድ ጻሎቱህ ያከሄልኒም ነከለህ ካታማኮ ነውዔህ ወዒ ዳራታል ነደየ፣ ታማል ዲፈይነህ፣ ተከሄለ አጋባ ካ ቃል ተን ኒይምሂረ፡፡ 14. ና'ቢይ ቲነ አጋቦኮ ኢንከቶ ትያጥሮን ካታማት ኡብካ ላቲያ ዓሳ ሣሪህ ነጋደ፣ ልድያ አክያን ኑማ ቲነ፣ ኢሲ ፉጎል ታሚነ ኑማ ኪይይ ቲነ፣ ማዳሪ ለ አፍዓዶ አካህ ፋከጉል ጳውሎስ ዋንሲታ ቃል ኦኮየሲታይ ቲነ፡፡    15. ተከ ተ ድክድ ቲነ ሒያው ሙሉኡድ ይምጢምቅኒምኮ ላካል"ማደራል ታሚነቲያ ኪዮም ዮህ ተይረገገጺኒምኮ ይዓረህ አማይ ይድኪድ ዲፈያ ተህ ጋዻህ ዻዒመተ፡፡                                  ፊሊጵስዩስ ካታማል ጳውሎስከ ሲላስ ዩምዹዊን

  16. ኢንኪ ለለዕ ጻሎት ቦታህ ናዴሃኒህ ዮኮመህ ያኮ ኪን ጉዳይ ጦንቆላህ ዋንሲታ ሩኩስ መንፈስ ኤድይሕዲረ ኢንኪ አጋልጋሊት ድንግል አራሓል ተን ገይተ፣ ታይ ድንግል ጦንቆላህ ተ ታስሔደረሚህ ማንጎ ቲርፈ አካህ ገይስሳይ ቲነ፡፡ 17. ኢሲ ጳውሎስከ ኖያድ ካታክ "ታይ ሒያው ናባ መዔፉጊህ አገልገልቲ ኪኖን! ኢሲን ድኅነት አራሕ ሲን አይቢሢረ ሎን" ያናማህ ዋዕ አይቲነ፡፡ 18. ታሃሞም ማንጎ ለለዕ አይደገገምክ አይክ ቲነ፣ ጳወሎስ ለ ዮምቦሶጾወህ ኡፍኩና የህ ሩኩስ መንፈስክ "ኢየሱስ ክርስቶሲህ ሚጋዓህ ተኮ ታውዖ ኩኢኢዚዘህ አኒዮ!" አክየ፡፡ ሩኩስ መንፈስ አማይጉልካህ የውዔ፡፡

  19. ተ አስሔደደሪይ ቲነም ጥቅመ ኤድገያይ ይኒንጉል ታስፋ አክ ሶልተም ዩብሊን ዋክተ ጳውሎስከ ሲላስ ተን ይብዺን፣ ሂሪጋክ አግለል በየኒህ ረዶንቲ ነፊል ካብ ተኒሰን፡፡ 20. ሮማውያን ሢልጣን ባዒል ዻጋህ ተን ባሄኒህ ታህ አክየን፣"ታይ ሒያው አይሁዳውያን ኪኖን፣ ኒ ካታማል ሁውከት ኡጉሣን፡፡ 21. ናኑ ሮማ ዘጋታት ጋራይኖ ወይ አብኖ ኖህ አምፍቅደዋ ሠርዓት ያምሂሪን፡፡ "22. ህዝቢ ሙሉኡክ የምሔበበረህ ተን አሞል አጉተ፡፡ ሢልጣን ባዒል ለ ጳውሎስከ ሲላሳክ ሣራ አክ ይግፍፍኒህ ኢሎሉህ ሳብዒሞና ይኢዚዚን፡፡ 23. ማንጎም ሳብዒመኒምኮ ላካል ዋክኒ ዓረድ ሳይሰን፣ ዋክኒ ዓሪህ ዻዉዸኒት ለ ሲክ ኢሰህኒ ዻዉዾና ይኢዚዚን፡፡ 24. ዻዉዸኒት ታይ ትኢዛዝ ጋራይተምኮ ላካል ዋክኒ ዓረክ አዳ ክፍለድ ተን ሳይሰን፣ ኢባቢ ጉንደከ ጉንዲህ ፋናድ ሲክ ኢሰኒህ አክ ዩዹዊን፡፡

 25. ባርቲ ዓዺህ አክባቢ የከጉል ጳውሎስከ ሲላስ ጻሎትከ መዝሙሩህ መዔፉጎ አይምስጊኒይ ዪኒን፣ አኪ ቱምዹወህ ቲነ ሒያው ታና ኦኮይሲታይ ቲነ፡፡ 26. ዲንገቲህ ዋክኒ ዓሪህ መሠርት ያምነቀነቀም ፋናህ ናባ ኪርዲዲሞ ተከ፣ ኢፊአፋ ኡምቢህ ኢንኪጉል ፋክተ፣ ኢሲሲል ቱምዹወህ ቲነሚህ ሰንሰል አካህ ይምኑሑወ፡፡ 27. ዋርዲያ ዺንኮ ይንቂሔህ ኡጉተጉል ዋክኒ ዓሪህ ኢፋያፋ ለ ፋክተህ ዩብለ ዋክተ፣ ማዹዋድ ቲነም ይስሊምኒም የከለህ ሰይፊ ሙሉሑሰህ ኢሰ ያግዳፎ ጉረ፡፡ 28. ያኮይ ኢካህ ጳውሎስ "ኡምቢክ ታል ናነ! አማይጉል ኢሲ አሞል ብያክ ማቢን!" አይክ ኃይላለ አንዻሓህ  ዋዕየ፡፡

 29.ታማይ ዋክተ ዋርዲያ ኢፎይታ ባሄህ የርደህ አዳህ ሳየ፣ አዻዻክ ጳውሎስከ ሲላሳክ ኢቢ ዳባል ደምባራህ ራደ፡፡ 30. ኢሮህ ተን የየዔህ "ይማዶር አድኃኖ አይም አቦ ዮህ ኤዳ?" 

 31. ኢሲን ለ"ማዳራል ኢየሱሱል ኢሚን፥ አድኅነሊቶክ፥ ኩበተሰብ ለ አድኅነሎኑክ" አክየን፡፡ 32. ማደሪ ቃል ለ ካከ ካድኪድ ታነሚህ ሙሉኡድ ዋንሲተን፡፡ 33. ታማይ ሳዓት ባር ዋክኒ ዓረ ዻዉዻቲ በየህ ቢዮክ አካህ ዓካሊሰ፣ አማይጉልካህ ካከ ካሒያው ኡምቢህ ይምጥምቂን። 34. ታሃምኮ ላካል ጳውሎስከ ሲላስ ኢሲ ዓረህ በየህ ፈሎ አካህ ይስቅሪበ፤ መዔፉጎል የመነርከህ ኢሲ በተሰብሊህ ኒያተ ።   

 35. ሑገ ማሕተጉል ሢልጣን አሞይቲት "ታማይ ሒያው ያምናሓዎናይ" የኒህ ፖሊስ ፋረን፡፡ 36. ዋክኒ ዓሪህ ዋርዲያ ለ "አቲን ታምናኃዎና ሢልጣን አሞይቲት ሒያው ፋረኒህ ያኒኒክ አማይጉል ኤወዓይ ሳላማህ አዱዋ" የህ ጳውሎሱክ የዽኄ፡፡

  37. ጳውሎስ ለ"ናኑ ሮማ ዘጋ  ኪኖሃኒህ ፊርደ ማለህ አዳባባል ኒይግሪፊኒህ ዋክኒ ዓረድ ኒሳይሰን፣ ካዶ ለል ዋክኒ ዓረኮ ሱዉሩህ ናውዖ አባና! ሚያከ! "ኢሲን ሲነህ የመቲኒህ ኒ ያያዖናይ?" የህ ኤልደሄየ፡፡

   38. ፖልስ ታይ ጉዳይ ሢልጣን ባዕሊክ የን፣ ሢልጣን አሞይቲት ለ ጳውሎስከ ሲላስ ሮማ ዘጋ ኪኖኑም የዸጊንጉል ማይሲተን፡፡  39. አማይጉል የመቲኒህ ብሕላካ ኤሠረኒህ ዋክኒ ዓረኮ የየዒን፣ ካታማኮ አካህ ያዳዎና ዻዒመን፡፡  

   40. ጳውሎስከ ሲላስ ለ ዋክኒ ዓረኮ የውዒኒህ ልድያ ዓረድ ሳየን፣ ታማል ሳዖልቲ ገየኒህ ተን የጸነነዒኒህ ካታማ ሓበኒህ የደዪን፡፡

ማዕራፋ 17

አጵሎስ ማዓል ተሰሎንቄል

  1. ጳውሎስከ ሲላስ አንፊጶሊስከ አጶሎኒያ ትላየኒህ ተሰሎንቄ ደፈራል የደዪን፣ ታማል አይሁድ ሒያዊህ ሙክራብ ዪነ፡፡ 2. ጳውሎስ ኢሲ ልማድ ባሊህ ሙክራባድ ሳየ፣ አዶሓ ሳንባት ቁዱሳት መጻሐፍት አጥቅሲክ ህዝበ ይምሂረ፡፡ 3. መሲሕ መከራ ጋራየለምከ ራባኮ ኡገቶ አካህ ኤዳም ኢፋህ አይሪድእክ "ታይ አኑ ሲን አይብሢረ ኢየሱስ መሲሕ ኪኒ"አካይ ዪነ፡፡ 4 .አማይጉል ተንኮ ጋሪጋሪ ካቃል ይምርድኢኒህ ጳውሎስከ ሲላስሊህ ኢንኮህ የምገለሊን፣ ታማም ባሊህ ማንጎ ግሪካውያንከ ካታማል ትምዺገ ሳይዮ ካቃል ይምርድኢኒህ የምገለሊን፡፡ 

 5. አይሁድ ለ አይሲነኒህ ሢራሕ ሂናም ኢሲሲ አራሕኮ የስከሄልኒህ ሰበሮ አብሲሰን፡፡  ካታማ ታዳል ሰበሮ ኡጉቶ አበን፣ ጳውሎስከ ሲላስ የየዒኒህ ህዝበህ ያሓዎና ኢያሶን ዓረ ይስክብቢን፡፡ 6. ያከ ኢካህ ተና ዋየንጉል ኢያሶንከ ውልውል አማንቲ ካታማ ሢልጣን ሞይትቲል ካብ ተን ኢሶና ሂረጋክ ተን በየን፣ ታማም ባሊህ ታህ አይክ ዋዕ አይይኒን፣"ታይ ዓለም ሙሉኡድ ታስሄውከ ሒያው፣ ካዶ ለል ታህ የመቲኒ! 7. ኢያሶን ለ ተን ጋራየ፣ ኢየሱስ አክያን አኪ ኑጉሥ ያነ አይክ ሮማ ኑጉሠ ነገሥት ቄሳር ቲኢዛዝ ያምቀወሚን፡፡"8. ህዝበከ ካታማት አሞባዕል ታሃም ዮቢን ዋክተ ይምስቢሪን፡፡ 9. ኢያሶንከ አኪማራ ለ ሓቢህ ደዕሲሰኒህ ዺዽየን፡፡

ጳውሎስ ቤርያል

  10. ሳዖልቲ ዸህ ጳውሎስከ ሲላስ ባር ቤርያ ቱላል ያዳዎና አብሲሰን፣ ታማርከ ማደን ዋክተ አይሁድ ሙክራባድ ሳየን፡፡ 11. ቤርያል ቲነ አይሁዳውያን ተሰሎንቄል ታነምኮ ታይሰ ቅንዒና ለ ማብሎ ለም ኪይይ ይኒኒጉል፥ ካቃል ናባ ኒያታህ ጋራየን፣ ካቃል ለ ሓቀ ለም ያይራጋጋጾና ኡማን ለለዕ ቁዱሳት መጻሒፍቲ አሚርሚሪይ ዪኒን፡፡ 12.አማይጉል ተንኮ ማንጎ ማሪ የመነ፣ ማንጎ ግሪክ ሀብታማትከ ሳዮ ማንጎ ግሪካውያን ላበቶ ተመነ፡፡ 13. ያከካህ ተሰሎንቄል ታነ አይሁድ ጳውሎስ ቤርያል ለ መዔፉጊህ ቃል ያብሢረም የዸጊንጉል ታሙላል የመቲኒህ ህዝበ ይስኢዲምኒህ ሰበሮ ኡገሠን፡፡ 14. ታማይ ዋክተ ሳዖልቲ ጋባላዔኒህ ጳወሎስ ባሕሪ ዋሳናል ያዳዎ አበን፣ ሲላስከ ጢሞቴዎስ ለ ታማል ቤርያል ራዔን፡፡ 15. ጳውሎስ ሱኩኩይተ ሒያው አይከ አተና ፋናህ ካማዲሰን "ሲላስከ ጤሞቴዎሱክ ዸህ ጋባላዓይ ይኡላል ዮህ አማ"ያ ጳውሎስ ትኢዛዝ ይብዽኒህ ቤርያ ጋኄን፡፡

ጳውሎስ አተናል

  16. ጳውሎስ አተናል የከህ ሲላስከ ጢሞቴዎስ ኢላላይ ያነሃኒህ፣ ካታማ ጣኦታታህ ተመገም ዩብለ ዋክተ ኢሲ መንፈሲህ ዮምቦሶጾወ፡፡ 17. አማይጉል ሙክራባድ፣ ኤይሁድከ መዔፉጎ ለ አሚነዋይታ ሒያውሊህ፣ አግለል ኣኢሲሲ ለለዕ ታምከረከረ ሒያው  ሊህ ክርኪር አባይ ዪነ፡ 18. ኢፒኮሮሶችከ ኢስቶይኮች አክያነ ፍላስፋታት ካያ ዻጋህ አምቲክ አምከረከሪይ ዪኒን፡፡ ጋሪጋሪ "ታይ ለፍላፊ አይም ዮዋ ጉራይ ያነ?" አይህ፥ ጋሪ ለል ዑሱብ አምልክት ዋንስታማህ ኢጊዳ አይ ዪኒን፡፡ ታሃሞም አካህ የን ጉዳይ ጳውሎስ ኢየሱስከ ካኡግታቶህ መዔ ዋረ ይብሥረጉል ኪኒ፡፡  19. አማይጉል ጳውሎስ አርዮስፓጎስ አክያን ቦታል ተከሄለ አግለል ባሄኒህ ታህ አክየን፣ ታይ አቱ ታይምሂረ ዑሱብ ሚሂሮ አይም ኪናም ናዻጎ ዽዒና? 20. ውልውል ዑሱብ ጉዳያት ኒቶይሶበ፣ ለል"ታይ ጉዳያት አይም ኪኖኑም ናዻጎ ጉርና፡፡"21. ታሃም ተም አተናል ማርታምከ አተናል ማረዋይታም አኪ ባዾህ ሒያው ኡምቢህ ዑሱብ ጉዳይ ዋንሲታከ አቢክ ጥራሕ ሲኒ ዋክተ ቲላሳናም ኪሕኒይ ይኒኒጉል ኪኒ፡፡ 

  22. ታይ ዋክተ ጳውሎስ አሪዮስፓጎሱል ኤልየከሄሊን አግለህ ነፊል ሶለህ ታህ የ፣ "አተና ሒያዎ! ኡማን ኡላኮ ጋዳህ ሃይማኖት ለ ሒያው ኪቲኒም እምረዲኤህ አኒዮ፡፡ 23. አይሚህ ሲን ካታማል ጋሓንጋሓክ አምሉኮ ቦታታት አብለጉል አምዽገዋ አምላካህ ተኒህ ትጽሕፊን መሥዋዕት ቦታ ገየ፣ አማይጉል አኑ ካዶ ሲናካም ታይ አዽገካህ ታይምልኪን አምላክ ኪኒ፡፡ 24. ኡሱክ ዓለምከ ዓለሚል ታነም ኡምቢህ ይፍጢረቲያ ኪኒ፣ ዓረንከ ባዾህ ማዳራ ኪኒ፣ ኡሱክ ሒያው ጋባህ ሢራሒመ በተ መቅደሲድ ማማራ፡፡ 25. ሂወትከ  ሮሔህ፣ አኪ ጉዳይ ለ ሒያዋህ ኡማኒም ያሓየቲ ካያ ኪኒጉል፣ ኢንኪ ጉዳይ አክ ሚያግዱለ፣ ሒያው ሓቲ ለ ካማጉርሱሳ። 26. ኡሱክ ሒያው ዳራ ኡምቢህ ኢንኪ ሒያውቶኮ ይፍጢረ፣ ባዾክ አሞል ኡማኒል ማሮና አበ፣ ትምውሲነ ዳባናትከ ኤልማራን ቦታ አካህ ይምዲበ። 27. ታሃም ለ አበም ሒያው ፉጎ ዋጊዮናከ የመረመሪኒህ ዋጊየኒህ ካገዮና ዺዖና ኪኒ፣ ያኮይ ኢካህ ኡሱክ ኢሰህ ኖኮ ዸዺል ኪኒ ማለት ማኪ፡፡ 28. አይሚህ ሂወት ገይናምከ አምቀሰቀሲክ ማርናም ካያህ ኪኒ፣ ታይ ሲን ቅኔህ ባዒል ናኑ ኡምቢክ ካዻይሎ ኪኖ የኒም ባሊህ ኪኒ፡፡ 29. አማይጉል ናኑ ካዻይሎ ነከምኮ መዔፉጊህ ሒያዊህ ብልሓትከ ሓሳብ ዋርቀኮከ ኪብረኮ ያኮይ ዻይትኮ ሢራሕመ ቢሶህ /ቅርጸህ/ ኢጊዳ የነህ ያሕሲቢኒም መዳ፡፡ 30. አማይጉል ሒያው ሶዻህ አበኒም መዔፉጊ ዒሲሲ የህ አክ ቲላየ፣ ካዶ ለ ኢሲሲ ባዾል ታነ ሒያው ኡምቢህ ንሲሓ ሳዎና ይኢዚዘ፡፡ 31. ኡሱክ ዶረ ሒያዊህ ኢዻህ ዓለም አሞል ሙሉኡክ ሓቀ ያፍሪደ ለለዕ ይውሲነ፣ ታሃም የይረገገጸቲ ቶይ ዶረህ ሒያው ራባኮ ኡጉሰርከህ ኪኒ፡፡"

 32."ራባኮ ኡጉታናም"ያ ቃል ዮቢንጉል ጋሪጋሪ ኤልየይለገጺን፣ ጋሪ ለ"ታይ ጉዳይህ ዳዓባል ዋንሲታህ አኪ ዋክተህ አብለሊኖ"አክየን፡፡ 33. ታሃምኮ ላካል ጰውሎስ አግለኮ የውዔህ የደየ፣ 34. ውልውል ሒያው ለ ካሊህ የምሰመመዒኒህ የመኒን፣ ተመነሚህ ፋናድ አርዮስፓጎስ ሰንጎት አባል የከ ዲዮኒስዮስ አክያን ሒያውቶከ ደማሪስ አክያን ኢንኪ ኑማ፣ አኪ ማሪ ለ ኤድገይማን፡፡

ማዕራፋ18

ጳውሎስ ቆሮንጦሱል

  1. ታሃምኮ ላካል ጳወሎስ አተናኮ ኡጉተህ ቆረንጦስ ኡላል የደየ፡፡ 2. ታማል ጳንጦስ ማባካ ኪን አቂላ አክያን ኢንኪ አይሁድ ኪን  ሒያውቶ ገየ፡፡ አቂላ ኢሲ ኑማ ጵርስቅላሊህ ጣሊያንኮ ገና አምቲይ ዪነ፣ አይሚህ ሮማ ኑጉሠ ነገሥት ቀላውዴዎስ አይሁድ ሒያው ሙሉኡክ ሮማኮ ያውዖና ይኢዚዘህ ይነጉል ኪኒ፣ አማይጉል ጳውሎስ ተና ዻጋህ የደህ ኤሊህ የመዸገ፡፡ 3. ካ ሢራሕ ሊክዕ ተናባሊህ ተንዳ /ዱንካን/ ያሩፍኒም ኪይይ ዪነጉል፣ ተንሊህ ዲፈየህ ኢንኮህ ሢራሓይ ዪነ፡፡ 4. ኢሲሲ ሳንባታህ ሙክራባድ ገይማክ ዋኒ አባክ አይሁድከ  ግሪክ ሒያው  አይሪዲኢይ ዪነ፡፡

 5. ሲላስከ ጢሞቴዎስ መቆዶኒያል የመቲን ዋክተ ጳውሎስ"ኢየሱስ መሲሕ ኪኒ" ያናማህ አይሁድሊህ አምስክርከ አይምሂርክ ኢሲ ጊዘ ሙሉኡድ ታማል ቲላሳይ ዪነ፡፡   6. ያኮይ ኢካህ አይሁድ ካ የምቀወሚኒህ አካህ ዋቲመንጉል ኢሲ ሣረናህ አቦራ ኡርጉፈህ"አማይጉል ሲናል ይምፍሪደምኮ ሲኒ ሊይህ ኪቲን! አኑ ኃላፍነት ማልዮ" አክየ፡፡ ካምቦኮ ላካል አረማውያን ኡላል አድክ አኒዮ አክየ፡፡ 7. ታጉል ተንኮ ባዽሲመህ ቲቶስ ኢዮስጦስ አክያን ሒያውቲህ ዲክህ የደ፣ ታይ ሒያውቲ መዔፉጎ ያሚነቲያ ኪይይ ዪነ፣ ካዲክ ሙክራብ ዓሪህ ባሮል ኪይይ ዪነ፡፡ 8. ቀርስጶስ አክያን ሙክራብ አሞይቲ ኢሲ በተሰብሊህ ሙሉኡክ ማዳራል የመነ፣ ማንጎ ቆሮንጦስ ሒያው ለ ጳውሎስ ዋንሲታህ ዮቢኒህ የመንኒህ ይምጥምቂን፡፡

 9. ማዳሪ ለ ጳውሎሱክ ባር ሶኖህ /ራኢህ/ ታህ አክየ፣"ማማይሲቲን፣ ዋንሲት፣ ቲብ ሚን፡፡ 10. አይሚህ አኑ ኮሊህ ኪዮ፣ ታይ ካታማል መንጎ ሒያው ሊዮ ብያክ ኮልባህቶ ዽዕታምኮ ኢንከቲ ሚያነ፡፡"11. አማይጉል ጳውሎስ መዔፉጊህ ቃል ህዝበ አይምሂርክ ኢንኪ ኢጊዳከ አብዻ ታማል ሱገ፡፡

  12. ጋልዮስ አካይያት አማሓዳሪ የከህ ረደ ዋክተ አይሁድ ኢንኮህ የምኄበበርኒህ ጳውሎስ አሞል ኡጉተን፣ ፊርዲ ባይቶህ በኒህ፥ 13."ታይ ሒያውቲ ሕጊ አይፍቅደዋ አራሓህ ሒያው ፉጎል ታማኖ አባ" የን፡፡

 14. ጳውሎስ መልስ ያሓዎ የምሶኖዶወህ ያነሃኒህ፣ ጋልዮስ አይሁዱክ ታህ አክየ፣ "አቲን ኤሁዳውያኖ! በደል ያኮይ ዒሊስ ገበን ሲናል የከህ ያከዶ ሲን ኪሰ አበዻዸ፡፡ 15. ያኮይ ኢካህ ቃላትከ ሚጎዕቲ ዳዓባል፣ ሲኒ ሕጊህ ዳዓባል ታምከረከሪኒም የከምኮ ሲን ጉዳይ ኪኒ፣ አኑ ታይ ጉዳይህ አሞል አፍራዶ ማጉራ፡፡"16. ታህ የህ ፊርዲ ሰንጎኮ የየዔ፡፡ 17. ታማይ ዋክተ ኡምቢህ ለ ሙክራብ አሞይታ ሶስቴንስ ይብዽኒህ ሰንጎ ነፊል ሳባዔን፣ ታሃም ኡምቢህ አኪህ ጋልዮስ ማዓል ሊይይ ማናያ፡፡

                                       ጳውሎስ አንጾኪያ ቱላል ጋኄ

   18. ጳውሎስ ኢሲ ሳዖልቲሊህ ማንጎ ለለዕ ቆሮንጦሱል ሱገምኮ ላካል አክ የምሰነበተህ ሶሪያ የደ፣ ጵርስቅላከ አቂላ ካሊህ ዪኒን፣ ያከካህ ማብጻዓ ሊይ ይነጉል ያዴሚህ ባሶል ክርኪያ አክያን ቦታል ኢሲ ዸግኃ የለደየ፡፡ 19. ኤፌሶን ማደን ዋክተ ጵርስቂላከ አቂላ ታማል ተን ሓበ፣ ኡሱክ ለ ሙክራባድ ሳየህ አይሁድ ህዝበህ ዋኒ አባይ ዪነ፡፡ 20. ኤዸዻ ያ ዋክተ ተንሊህ ሱጎ ዻዒመንጉል መዔ አክ ሚና፡፡ 21. ያኮይ ኢካህ ፉጊ ፍቃድ የከምኮ አኪ ዋክተ ሲና ዻጋህ ጋኄህ አሚተሊዮ አክ የህ ኤፌሶንኮ መርከቢህ የምሰፈረህ የደ፡፡

 22. ቂሳሪያ ማደ ዋክተ ታማርከኮ ኢየሩሳለም የደህ ሞሶዓሪ ሒያዋህ ሳላምታ ዮኆወምኮ ላካል ጋኄህ አንጾኪያ ኦበ፡፡ 23. ታማል ዳጎ ዋክተ ሱገ፣ ታሃምኮ ሳራህ ገላቲያከ ፍርግያ ሀገራታል ቦታኮ ቦታል አምፎኮኮኒክ /ማከከኪታክ/ አማንቲ የይበረተዔ፡፡ 

አጵሎስ ኤፌሶንከ ቆሮንጦሱል

  24. እስክንድርያ ማባካ የከ አጵሎስ አክያን አይሁዲ ኤፌሶን የመተ፣ ኡሱክ ቁዱሳት ማጻሐፍት ሰለህ ይምሂረቲያከ መዔ ዋኒህ ዽዕ ለ ሒያውቶ ኪይይ ይነ፡፡ 25. ማደሪ አራሒህ ዳዓባል ይምሂረቲያከ መንፈሲህ ሐራራቲያ / ያምቀጸለቲያ/ የከህ ኢየሱስ ዳዓባል ትክክሊህ አስብክከ አይምሂሪይ ዪነ፡፡ ያኮይ ኢካህ ኡሱክ ያዽገም ያሃኒስ ጥምቀት ጥራሕህ ኪይይ ይነ፡፡ 26. ኡሱክ ዲፍረቲህ ሙክራባል ዋንሲቶ ኤዸዺሰ፣ ያከ ኢካህ ጵርስቂላከ አቂላ ዮቢንጉል፣ ሲኒ ዲክህ በየኒህ መዔፉጊህ አራሕ ባሶኮ ያይሰ ዒለህ ትክክሊህ የይበረረሂኒህ ካ ይይቡሉይን፡፡ 27. አጵሎስ አካይያ ያዳዎ ይሕሲበጉል ካሳዖል ካሓሳብ ይድግፊን፣ አካይያል ታነ ሳዖል መዔ ዒለህ ካጋራዎና ደብዳቤ አካህ ይጽሒፊን፡፡ ታማርከ ማደጉል አይርድኢክ መዔፉጊህ ጸጋህ አማንቲህ ትብቂዔም ጋዳህ ተን ጎሮኒሰ፡፡ 28.አይሚህ ኢየሱስ መሲሕ ኪናም ቁዱሳት ማጻሕፍቲህ ቃል አይርድኢክ ክርክሪህ አይሁዱክ አክ አስሉጊይ ዪነ፡፡     

ማዕራፋ 19

ጳውሎስ ኤፌሶኑል

  1. አጵሎስ ቆንሮጦሱል ዪነ ዋክተ ጳውሎስ አጋኒ ባዾኮ ቲላየህ ኤፌሶን ማደ፣ ታማል ዳጎ አማንቲ ገየህ፡፡ 2."ተመኒን ዋክተ መንፈስ ቁዱስ ጋራይተኒህ ትኒኒ?"የህ ተን ኤሠረ፡፡ ኢሲን ለ"ማጋራይኒኖ፣ መንፈስ ቁዱስ ያነም ኡካ ኖበህ ማናዽገ የኒህ ኤልምልሲን፡፡          3. ጳውሎስ ለ ይቦል አይሚህ ዓይነቲህ ጥምቀት ኪኒ ትምጥምቂኒም?" አክየ፡፡ ኢሲን ለ ያሃኒስ ጥምቀት ኪኒ አክየን፡፡

 4."ያሃኒስ ጥምቀትማ ንሲሓ ሳናሚህ ዳዓባል ያምፍጽመቲያ ኪኒ፣ ህዝበክ የም 'ዮኮ ላካል ያሚተቲያ ኢሚና' አይክ ይነ፣ ኡሱክ ለ ኢየሱስ ኪኒ" አክየ፡፡

  5. ታሃም ዮቢን ዋክተ ማዳሪ ኢየሱስህ ሚጋዓህ ይምጥምቂን፡፡ 6. ጳውሎስ ጋባ አሞል አክ ሃየጉል መንፈስ ቁዱስ ተን አሞል ኦበ፣ አኪ ዋኒህ ዋንሲተን፣ ትንብት ለ ዋንሲቶና ኤዸዺሰን፡፡ 7. ሒያው ሎይ ጠቅላላህ ላማምከ ታማን ታከም ኪይክ ዪኒን፡፡

 8. ጳውሎስ ሙክራባድ የደህ አዶሓ አልሳ ታከም ፉጊ ማንግሥቲህ ዳዓባል አምከረከሪክከ ህዝበ አይሪድኢክ ዲፍረቲህ አይምሂሪይ ዪነ፡፡ 9. ጋሪጋሪ ለ ሂልክ ለም የኪኒህ ማዳሪ አራሓህ ህዝቢ ነፊል ዋቲማክ ማናሚነ የን ዋክተ ተንኮ  ሚሪሕ የ፣ አማንቲ ዲቦህ በየህ ጢራኖስ አዳራሳድ ኡማን ለለዕ አይምሂሪይ ዪነ፡፡ 10. ጳውሎስ ታሃም አበም ላሚ ኢጊዳ ታከም ኪኒ፣ ታማይ ዋክተ እስያል ማርታ አይሁድከ አራማውያን ኡምቢህ ማደሪ ቃል ያቦና ዽዔን፡፡

 መዔፉጊ ጳውሎስ ጋባህ ይይቡለወ ታሚራት

  11. መዔፉጊ ጋዳህ ያስጊሪመ ታምራታት ጳውሎስ ጋባህ አባይ ዪነ፡፡ 12. ታሃሚህ ምክንያታህ ጳውሎስ አካል ዻግተ ሳረናከ ማሃረሚያ በያክ ዳላክን ዻግሲሳንጉል ሲኒ ዱረኮ ኡራይ ዪኒን፣ ሩኩሳት መናፍስት ለ አካውዒይ ቲነ፡፡ 13. አጋኒኒት ሒያውኮ አየዒክ ኢሲሲ ቦታል ታዞረ ውልውል አይሁድ ሒያው ጳውሎስ ያስቢከ ኢየሱሲህ ሚጋዓህ ታወዖና ሲን አኢዚዚክ ናነ ያናማህ አጋኒኒቲ ሒያውኮ ያያዖና አዒኪኒይ ዪኒን፡፡ 14. አይሁድ /ሊቀ/ ካህናቲህ አሞይታ የከ አስቄዋ ማልሒና ባዽ ለ ታማምባሊህ አባይ ዪኒን፡፡

  15.ያከካህ ሩኩስ መንፈስ"አየሱስ አዺገ! ጳውሎስ ለ አዺገ! ኤረ አቲን ኢያ ኢያ ኪቲን?" አክየ፡፡

  16. ሩኩስ መንፈስ ኤድ ይኅዲረ ሒያውቲ ፍዺተህ ይኅንቀህ ኡማንተክ ሱበ፣ ብዮከ ኦናህ ዓሲክ የኪኒህ ዓረኮ ኩደኒህ የውዒን፡፡ 17. ታይ ጉዳይ ኤፌሶኑል ማርታ አይሁድከ አረማውያናል ዮሞበጉል ኡምቢህ ማይሲተን፣ ማደሪ ኢየሱስ ሚጋዕ ለ ጋዳህ ይክብረቲያ የከ፡፡ 18. አማንቲ ለ ማንጊህ ጦንቆላ ሥራሕድ የምኄበበርኒም ኢፋህ አምነዘዚክ አምቲይ ይኒን፡፡ 19. ማንጎ አስማት ጦንቆላ ማጻሒፍት የስከሄልኒህ ኡማን ህዝቢ ነፊል ሐራሪሰን፣ ማጻሒፍት ሊሞ ታምግሚተጉል ኮንቶም ሲሕቲያ ቁርሲትኮ ተከህ ትምግሚተ፡፡ 20. ታይ ዓይነቲህ ማደሪ ቃል ጋዳህ አምፈደደኒከ ሱባክ አድይ ይነ፡፡

    ኤፌሶኑል  ሁከት ኡጉተ

  21. ታሃም ኡምቢህ ተከምኮ ላካል ጳውሎስ መቄዶኒያከ አካይያ ኦበህ ኢየሩሳለም ያዳዎ ኢሲ መንፈሲህ ይሕሲበህ፣ "ታማርከ ማደምኮ ላካል ሮማ ቱላል አዳዎ ዮልተነ" የዽሔ፡፡ 22.አማይጉል ካታስግልግለ ሒያውኮ ላማይ፣ ጢሞቴዎስከ ኤርስጦስ መቄዶንያ ፋረህ ኡሱክ ኢሰህ እስያል ዳጎ ለለዕ ሱገ፡፡ 

  23. ታማይ ዋክተ ማዳሪ አራሒህ ምክንያታል ኤፌሶኑል ናባ ሂውከት ኡገተ፡፡24. ኢንኪ ድሜጥሮስ አክያን ቡሩር ያይሚክከቲ፣ አርጤመስ በተ መቅደሲህ ሚስለ ቡሩርኮ ሢራሐክ አይምክክ ማንጎ ቲርፈ ሥራሕሲሳ ሒያዋህ ገይስሳይ ዪነ፡፡ 25. አማይጉል ታይ ዓይነቲህ ሢራሕ ለም አኪ ሒያው ለ የስከሄለህ ታህ አክየን፣"አቲን ኮ ሒያው! ናኑ ሀብተ ገይናም ታይ ሢራሓህ ኪናም ታዺጊን፡፡ 26. ታይ ጳውሎስ ሒያው ጋባህ ሢራሕምተ ሚስሊት አማልክት ማኪኖን አይክ ኤፌሶኑል ዲቦህ አከካህ፤ ዳጎ ባዾኮ በሓል ሙሉእ እስያል አይዾለ ማንጎ ህዝበ ያይረደደኤምከ ያስኢምነም አቲን ሲነህ ቱብሊኒምከ ቶቢኒም ኪኒ፡፡ 27. ታይ ዓይነቲህ ታይ ኒሢራሕ ዻይቲሞ ኪኒ፣ ታሃም ዲቦህ አከካህ እስያከ ሙሉእ ዓለሚህ ሒያው ሙሉእ ታይምልከ ናባ አምላክ አርጤሚስ በተ መቅደስ ካንቶ ተከህ ራዔ ለ፡፡ ተ ናብነ ለ ታምሳዓሮ ኪኒ፡፡

  28. ሒያው ታሃም ቶበ ዋክተ ቁጡዓህ "ኤፌሶን አርጤምስ ናባ ኢና ኪኒ! አይክ ዋዕ አይ ዪኒን፡፡"29. ካታማ ሙሉኡክ ትምሂውከ፣ ህዝበኮ ለ መቄዶኒያት ኡብካ ለ ላማይ ጳውሎስከ ዶባይቶ፣ ጋይዮስከ አርጥሮኮስ ይብዺኒህ ሂሪጋክ ህዝቢ ኤልያከሄለ ቦታህ የርዲን፡፡ 30. ጳውሎስ ሂዝበል ያዳዎ ጉረህ ዪነ፣ አማንቲ ለ ያዲየምኮ ደሰን፡፡ 31. እስያ ባዾህ ሢልጣን አሞይቲትኮ ለ ካ ካኃንቶሊት ኪን ጋሪጋሪ ጳውሎሱል ሒያው ፋረኒህ ህዝቢ ኤል ያከሄለ ቦታል ተደህ ታምቡሉወ የኒህ ዻዒመን፡፡ 32. ሂዝቢ ፋናድ ናባ ሁከት ይነጉል ማንጎ ማሪ አይሚህ የከሄሊኒም ኡካ አዽጊይ ማናዎን፣ ታይ ምክንያታል ኢከቲ ኢንኪ ጉዳህ ዋዕ ያጉል፣ አኪማሪ  ለል አኪ ጉዳይ አይክ ዋዕ አይ ዪኒን፡፡ 33. ህዝቢ ፋናድ ቲነ ወልውል አይሁድ እስክንድር አክያን ሒያውቶ ዱፉወኒህ ነፊል ካብ ኢሰን፣ ህዝቢ ፋንኮ ጋሪጋሪ ደምቢህ አካህ ያምካራካሮ ይምኪሪን፣ እስክንድር ለ ህዝቢ ቲብ ዮዋ ጋባህ አይምልከቲክ አምካላካልቲ ዋኒ ዋንሲቶ ዮምሶኖዶወ፡፡ 34. ያከካህ እስክንድር አይሁዳ ኪናም ሂዝቢ ሙሉኡክ የዽገ ዋክተ"ኤፌሶን ሒያዎ! ኤፌሶን አርጤሚስ ናባቲያ ኪኒ! አይክ ላማ ሳዓት ታከም ኡምቢህ  ኢንኪ አንዻሓህ  ዋዕ የን፡፡ 35.ባክቶል ካታማት ዋና ጻሐፊ ህዝበ ቲብ ኢሰህ ታህ የ፣ ኤፌሶን ሒያዎ! ኤፌሶን ካታማል ማርታ ናባ አርጤምስ በተ መቅደስ ዓራንኮ ኦበተሚህ ተ ሚስለ ኢላላናም ባሊህ ኪናም ኡማንቲያህ ታምዺገም ኪኒ፡፡ 36. ታሃም ታክሒደምኮ ኢንከቲ ሚያነጉል ትብቶናከ ጋባ ላዕተኒህ ኡማ ጉዳይ አብታናምኮ ሰሊቶና ኤዳ፡፡ 37. በተ መቅደስ ጋርዒተህ አዝርፈ ዋይተምከ ናምላኪህ አሞል ዋቶ ቃል ዋንሲተ ዋይተ ሒያው ታል ትብዺኒህ ተመቲን፡፡ 38. ድሜጥሮስከ ካሊህ ታነ ብልሓት ለም ታክሲሰ ሒያው ትኔምኮ፣ ፍርዲ አልያምሓወ ለለዕ ያነ፣ ሢልጣን አሞይቲት ለ ታነ፣ ታማል ኦሞጎታ፡፡ 39. አኪ ጉርታን ጉዳይ ይኔምኮ ለ ሕጊ ሰንጎህ ያምብሉወ፡፡  40. አማም አከዋይተምኮ ካፋ የከ ጉዳህ፣ ሁውከት ኡጉሠን ያናማህ ናምክሲሰምኮ ማይሲሳ፥ ታይ በጽበጻ አይሚህ ምክንያታል ኡጉተ ኢስምነህ ኤሠርምነምኮ፣ ናሓየ መልስ ማሊኖ፡፡ 41.ታሃሞም የህ ተከሄለ ሒያው ታምባታኖ አበ፡፡

 ማዕራፋ 20

  ጳውሎስ አራሕ መቄዶኒያከ ግሪክ ሀገርል

  1.ሁከት ይዕሩፈምኮ ላካል ጳውሎስ ኡማንቲያ ኢንኪል ደዔህ ሚክሪ ቃላታህ ተን የይጸነነዔ፣ አክ የምሰነበተህ መቄዶኒያ የደየ፡፡  2. ታማል ኤልቲላይናን ቦታል አማንቲህ ማንጎ ሚክረህ አይበረተዒክ ግሪክ ባዾህ ኡላል የደ፡፡ 3. ታማል አዶሓ አልሳ ሱገ፣ ታማምኮ ላካል መርከቢህ ሶሪያ ያዳዎ ይሕሲበ፣ ለል አይሁድ ካ አሞል አድማ አበኒም ዮበ ዋክተ መቄዶኒያ ቱላኮ ቲላየህ ያዳዎ ይውሲነ፡፡ 4. ጰጥሮስ ባዽ ሱሲ ጰጥሮስ ቤርያኮ፣ አርስጥሮኮስ ሲኮንዱስኮ ተሰሎኖቄ፣ ጋይዮስ ደርቤኮ፣ ቲኪቆስከ ጥሮፊሞስ እስያኮ፥ ጢሞቴዎስሊህ ኢንኮህ የደይን፡፡ 5. ኢሲን ዮኮሚኒህ የደይኒህ ጢሮአዳል ሱገን፡፡ 6. ናኑ ለ ኢንገራ /ቂጣ/ ባዓልኮ ላካል ፊሊጵሲዩሱል መርከቢህ ነምሰፈረህ ኮና ለለዒል ኢሲን ኤልያኒን ጢሮአዳ ማደነህ ታማል ማልሕና ለለዕ ትላስነ፡፡

                                     ጳውሎስ ባክቶ ጉፍናን ጢሮአዳል

 7. ለጊድናት ኤዸዾይታ ለለዕ ኢንገራ ኑቁሩሰህ በኖ ኢንኪል ነከሄለ፣ ጳውሎስ ኢብዻሒነ ያዳዎ ኪይይ ይነጉል ተከሄለ ሒያዋህ ዋንሳይ ዪነ፡፡ ዋኒ አይከ ባርቲ ዓዻ ፋናህ የይዸዸ፡፡ 8. ናኑ ኤድ ነከሄለ ፎቁድ ማንጎ ኢፊ ኤድ ይነ፡፡ 9. አውጢስኮስ አክያን ኢንኪ ዒንዻነይቲ ሞስኮት አሞክ ዲፈየህ ይነ.፣ ጳውሎስ ዋኒ የደደርከህ ዒንዻነይቲ ናባ ዑንዱጉል ካይብደህ፣ ዑንዱጉል አክሱበህ ማዳሒ ፎቅኮ ጉባል ራደ፣ ሒያው ካኡጉሰጉል ራበህ ገይመ፡፡ 10.ያከካህ ጳውሎስ ኦበህ አውካ ዔጋየህ ዩሕቁፈህ"ገና ሂውትሊህ ያነክ ማሓንካቢቲና አክየ፡፡ 11. ጳውሎስ ፎቁድ ጋኄህ የወዔህ ኢንገራ ዩቅሩሰህ አማንቲያሊህ በተ፡፡ አይክ ማሕታም ፋናህ ሒያውሊህ ዋንሲታክ ሱገሚህ ላካል የደየ፡፡ 12. ሒያው ለ ኡረ ዒንዻነይታ ሲኒ ዲክህ በየን፣ ኒያተኒህ የምጸነነዒን።

  ጳውሎስ ጢሮአዳኮ ሚሊጢ የደየ

  13. ጳውሎስ ናይሳፋሮ ንሕሲበጉል ናኑ ኖኮመህ መርከብህ አሶስ ነደየ፣ ታሃም አብነም ጳወሎስ አሶስ ፋናህ ኢባህ ያዳዎ ይውስነህከ ታሃም አብኖ ኒ ይኢዚዘጉል ኪኒ፡፡ 14. ካሊህ አሶሱል ቲታ ገይነ ዋክተ መርከቢህ ነይሰፈረህ ሚጢሊ ኢንኮህ ነደየ፡፡ 15. ኢብዻሒነ ታማርከኮ ኡጉነህ ኪዮሱክ ነፍ ነፊል ታነ ቦታ ማድነ፣ ያኪቲለ ለለዕ ሳሞስ ታብነህ ኢብዻሒነ ሚሊጢ ኢንኮህ ማደነ፡፡ 16. ጳውሎስ እሰያል ጊዘ ያይለየምኮ የህ ኤፌሶንኮ ትላየህ ያዳዎ ጉረ፣ አይሚህ ኤይሁድ ፋስጊ ባዓል ትላየምኮ ኮንቶም ያ ለለዒል ያክበረ ጳራቅሊጦስ ባዓላህ ዺዔመ መጠንል ኢየሩሳለሚል ገይሞ ይሕሲበህ ይነጉል ኪኒ፡፡

ጳውሎስ ኤፌሶኑል ስማግለህ አበ ስንቢታ ዋኒ

   17. ጳውሎስ ሚሊጢኮ ኤፌሶን ሒያው ፋረህ ሞሶዓሪ ስማግለ ደዕሲሰህ፣ 18. ካያ ዻጋህ የመቲን ዋክተ ታህ አክየ፣ እስያል ሳየ ለለዕኮ ኣኤዸዽሰህ ኡማን ዋክተ ሲንሊህ አይናህ ኤህ ማረም አቲን ታዽጊን፡፡ 19. አይሁድ ሥራሒህ ምክንያታል መከራ ይማደሚህ ኡካ ፉጹም ትሕተናከ ዺሞህ ማደራ ኢስግልጊለ፡፡ 20. አግለል ያኮይ ስኒስኒ ዲካድ ሲን አይሚሂሪህ ሲን ታጥቂመም ኡምቢህ ስናክ ኢየካህ ኢንኪ ጉዳይ ሲናክ ማራዒሲኒዮ፡፡ 21. አይሁድ ያኮናይ አረማውያን ንሲሓ ሳየኒህ ፉጎል ጋሖናከ ማዳራ ኢየሱስ ክርስቶሱል ያማኖና ተን ሰልሰህ አነ፡፡ 22. ካዶ ለ ታማርከ ማዳጉል አይም ይማደለም አዽገካህ፣ መንፈስ ቁዱሱህ ኢምኢዚዘህ ኢየሩሳለም አዳዎ ኪዮ፡፡ 23. ያኮይ ኢካህ ማዹዋከ መከራ ዮድጋራየለም ኢሲሲ ካታማል መንፈስ ቁዱስ ዮክየ፡፡ 24. አኑ ለ ኢኒ አገልግሎት አፍጺመም ፋናህከ ማዳሪ ዮህ ዮሖወ ሢራሕ ባካም ፋናህ፣ ኢኒ ሮሔ /ሂወት/ የከሚህ አክ ማራዒሳ፣ ይአገልግሎት መዔፉጊህ ጸጋህ ወንጌል ያይቢሢሪኒም ኪኒ፡፡

  25. ካዶ ፋናህ ሲን ፋናድ ኡማንጉል ማከኪታክ መዔፉጊህ ማንግሥት አስብክክ ኢነ፣ ካምቦኮ ሳራቱላል ለ ሲንኮ ኢንከቲ ለ ዓድህ ይነፍ አብለ ማለም አዽገ፡፡ 26. አማይጉል ሲንኮ ኢንከቲ ኡካ የለየምኮ ኃላፊነት ማሊዮም ካፊ ለለዕ ሲን አይስዺግክ አኒዮ፡፡ 27. አይሚህ ለ መዔፉጊህ ሓሳብ ኡምቢህ ሲናክ ኤዽሔ ኢካህ ኢንኪ ሲናክ ራዒሰ ጉዳይ ማልዮ፡፡ 28. መንፈስ ቁዱስ ሲና ዱየ ሎን አበህ ሲን ረድሰ፣ አማይጉል ሲነከ ዱየህ ሰሊታ፣ ማደሪ ኢሲ ቢሎህ ይይዲኅነ ሞሶዓረ ዻዉዻ፡፡ 29. አኑ ኤደየምኮ ላካል ዱየህ ናኅሩረ ዋይታ ቶክላ ባሊህ ፀካናት ኪን ሒያው ሲናድ ሳየሎኑም አዽገ፡፡ 30. አማም ባሊህ ለ ውልውል ሒያው ሲን ፋናድ ኡጉተኒህ አከዋይኒ ሚሂሮ አይምሂሪክ ማንጎ አማንቲ ሲኒ ኡላል ሂርገሎን፡፡ 31. አማይጉል ቲቲያህ አዶሓ ኢጊዳ ባርከ ለለዕ ዺሞ ሓዻክ ሲን ኢምክረም  ኢዚኪራይ ሰሊታ፡፡

  32."ካዶሊህ ፉጊ፣ ሲን ያይጻራዎከ /ያናጻሖከ/ ቁዱሳን ፋናድ ሪስተ ሲናህ ታሓዎ ዽዕታ ካጸጋህ ቃላህ ለ ሓደረ ሲናህ ኦሖወህ አኒዮ፡፡ 33. አኑ ኢንከቲ ማል ወይ ሣረና ማታማናይኒዮ፡፡ 34 .ኢኒ ጋባህ ሢራሓክ ኢነህ ያኮይ ኢኒ ዶባ ጎሮኒሳክ ኢነም አቲን ሲነህ ታዽጊን፡፡ 35.'ጋራቲያኮ አጋናል ያሓየቲ የምበረከቲያ ኪኒ' ያዽሔ ማደሪ ቃል አዚኪሪክ፣ ሲኒ ጋባህ ሢራሓኮ ዓቅመ ሂናም ጎሮኒሳናም ኤዳም ኪናም ማንጎ አራሓህ ሲን ኡስቡሉወ፡፡"

 36. ታሃምኮ ላካል ጳወሎስ ኡማንቲያሊህ ይምብርክከህ ጻሎት አበ፡፡ 37. ኡምቢህ ለ ወዓክ ጳውሎስ ዩሕቁፊኒህ ፉጉተን፡፡ 38. መጠንኮ አጋናል ይኅዝንኒም "ካምቦኮ ላካል ይነፍ ማታብሊን" አክየህ ይነጉል ኪኒ፡፡  መርከብ ፋናህ ካ ሱኩኩወን፡፡

ማዕራፋ 21 

ጳውሎስ ኢየሩሰሌም የደየ

    1. ተንኮ ባድስምነምኮ ላካል መርከብህ ነምሰፈረህ ሪጋ ነህ ቆስ አክያን ደሴት ነደየ፣ ኢብዻሒነ ሩድ ደሴት ማደነ፣ ታሃምኮ ላካል ጳጥራ ካታማህ ኡላል ነደየ፡፡ 2. ታማርከኮ ፊንቄ ባዾ ታዲየ መርክብ ገይነህ ተያድ ነምሰፈረህ አራሕ ንቅጽለ፡፡ 3. ቆጵሮስ ደሴት ጉራል ኀብነህ ሶሪያ ሀገር ሓብነህ ጢሮስ ወደብል ነደየ፣ አይሚህ ለ መርከብ ዑካ ታማል ታይራጋፎ ኪይይክ ቲነ፡፡ 4. ታማል አማንቲ ዋጊዪነህ ገይነህ ተንሊህ ማልሒና ለለዕ ሱግነ፡፡ ኢሲን ለ መንፈስ ቁዱሱህ ይምርሒኒህ ጳውሎሱክ ኢየሩሳለም ኡላል ማዳይን አክየን፡፡ 5. ታማል ሱግነ ዋክቲ ባክተጉል አክ ባዽስምነህ ኒናራሕ ኒቅጺለ፣ ኡምቢህ ሲኒ አጋቦከ ሲኒ ዻይሎሊህ የኪኒህ አይከ ካታማኮ ኢሮህ ናውዔም ፋናህ ኒሱኩኩወን፣ ባሕሪ ዳራታል ንምቢኪከህ ጻሎት አብነምኮ ላካል ነምሰነበተ፡፡ 6. ታሃምኮ ሳራህ ናኑ መርከቢድ ነምሰፈረጉል ኢሲን ሲኒ ዲክህ ጋኄን፡፡

  7. ጢሮስኮ ኡጉነህ ባሕሪ አራሕ ባክነምኮ ላካል ጴጤሌማይስ ማድነ፣ ታማል አማንቲያሊህ ቲታ ገይነህ ሳላምታ ቲታህ ኖሖውምኮ ላካል ተንሊህ ኢንኪ ለለዕ ቲላስነ፡፡ 8. ኢብዻሒነ ታማርከኮ ነውዔህ ቂሳርያ ነደየ፣ ታማል ማልሒና ዲያቆናትኮ ኢንከቶ የከ ወንጌላዊ ፊልጶስ ዓረድ ሳይነህ ካሊህ ዲፈይነ፡፡ 9. ኡሱክ ትንብት ዋንስቶና ተውህቦ ለ አፋራ ሓዳር አካዋይተ ሳየቶ ዻይሎ ሊይ ዪነ፡፡ 10. ማንጎ ለለዕ ታማል ዲፈየነ ዋክተ አጋቦስ አክያን ነብይ ይሁዳ ባዾኮ የመተ፡፡ 11. ታይ ነብይ ኖያድ ካብየህ፣ ጳውሎስ ጋምባለ በየህ ኢሲ ኢባቢ ይዹወህ መንፈስ ቁዱስ ታይ ጋምባለህ ባዕላ ኢየሩሳለሚል ታነ አይሁድ ታህ ኢሰኒህ ዩዹውኒህ አረማውያናህ ቲላሰኒህ አሓየሎን አክየ፡፡

  12. ታሃም ኖበጉል ናኑ ለ ታማል ቲነ ሒያዋክ ለ ጳውሎስ ኢየሩሳለም ኡላል ያዴምኮ ዻዒመነ፡፡ 13. ጳውሎስ ለል ታህ ተኒህ ወዓክ አይሚህ ኃዛናህ ይአፍዓዶ አግድሊክ ታኒኒ? አኑ ማደሪ ኢየሱስ ሚጋዓህ ኢየሩሳለሚል አምዻዎ ጥራሕ አከካህ ራባህ ለ ዮምሶኖደወቲያ ኪዮ የህ ኤልደሄየ፡፡

  14.  ሲን ምክረ ማጋራ ኖክየ ዋክተ "አማይጉል መዔፉጊህ ፍቃድ ያኮይ ነህ" ሓብነ፡፡ 

 15. ታማል ዳጎ ለለዕ ሱግነምኮ ላካል ኒኒ ኑዋይ ኖይሶኖዶወህ ኢየሩሳለም ነደየ፡፡ 16. ቂሳሪያል ቲነ ውልውል አማንቲ ኖሊህ ኢንኮህ የመቲን፣ ኢሲን መናሶን ድክድ ዲፈይኖ መናሶን ዻጋህ ኒበየን፡፡ ታይ ሒያውቲ ኡኩማ የህ የመነ ቆጵሮስ ማባኮ ለቲያ ኪይይ ዪነ፡፡

       ጳውሎስ ኢየሩሳለምል ያዕቆብ ማደ       

 17. ኢየሩሳለም ማድነ ዋክተ አማንቲ ኒያታህ ኒገራየን፡፡ 18. ኢብዻሒነ ጳውሎስ ኖሊህ ያዕቆብ ዻጋህ የደ፣ ሞሶዓሪ ስማግለ ታማል ዪኒን፡፡ 19. ጳውሎስ ኡማንቲያህ ሳላምታ ዮሖወምኮ ላካል አራሓል መዔፉጊ አረማውያን ፋናድ አበም ቲቲያህ አካህ ዋሪሰ፡፡       20. ታሃም ዮቢን ዋክተ ኡምቢህ ፉጎህ ሞሳ ዮሖዊን፣ ጳውሎሱክ ለ ታህ አክየን፣"ኒሳዓሎ! ማንጎ አስያሓታህ ሎይምታ አማንቲ አይሁድ ፋናድ ያኒኒምከ ኡምቢህ ለ ሙሴ ሕገህ አይሲንታም ኪኖኑም ታዺገ፡፡ 21. አቱ አረማውያን ፋናድ ማርታ አይሁድ ኡምቢህ ሲኒ ዻይሎ ማግራዚና ወይ ሠርዓት ማፋጻሚና አይክ አይምህሪክ ሙሴ ሕገ ያስዓሮና አብሲሳክ ያነ የኒህ ወሪሳናም ዮቢን፣ 22. አማይጉል አይም አባናም ታይሰ? ተመተም ዓዲህ ዮቢኒህ አኒየሎን። 23. አማይጉል ናኑ ኮክናም አብ፣ ኒፋናድ ማብፃዓ ለ አፋራ ሒያውቲ ያኒን።  24. ተና በያይ ተንሊህ ጋኅተህ ኢሲ አሞ እይጺሪይ፣ ሲኒ ዳጋር ያላዳዎናክ በተ መቅደሲህ ያምሓወ ማባእ ማል አካህ ኢክፊል፣ ታሃም አብታጉል ኩአሞል ዋረሳናም  ካንቶ ኪናም አቱ ለ ኢሰህ ሙሴ ሕገ አባቲያ ኪቶም ሙሉኡክ አዽገ ሎን፡፡ 25. አማንቲ ኪን አረማውያን ለል ጣዖቱህ ትምሥውዔሚህ ምክንያታል ይርኪሰ ምግበ ማበቲና፣ ቢሎ ለ ማበቲና፣ አምሩሑደካህከ ቢሊ አክ ሓዲተካህ ይምሕኒቀህ ባደ ኢንስሳ ማበቲና፣ ዙሙትኮ ሚሪሕ ኤያ ታዽሔ ውሳነ ወረቀት ኒጽሒፈህ ሲናህ ፋርነ፡፡

  26. ታሃምኮ ላካል ጳውሎስ ሒያው ተን በየህ ኢብዻሒነ ተንሊህ ኢሲ ናብሰ ይጽሪየ፣ ኤልያጽሪይን ለለዓ አይዻ ኪኖኑምከ ቲቲያህ ያምሓወ ማባእ ማል ያሓይን ዋክቲ አንዳ ኪናም ያይሳዻጎ በተ መቅደሲድ ሳየ፡፡

                                 ጳውሎስ በተ መቅደሲድ ይምዽብዸ 

  27. ማልሒና ለለዒህ ባኪቶ ካብተጉል እስያኮ ተመተ አይሁድ ጳውሎስ በተ መቅደሲድ ዩብሊን ኢርከህ ህዝበ ሙሉኡድ ይስኢሚኒኒህ ካይብዽን፡፡ 28. እስራኤል ሒያዎ! ኒጎሮኒሳ፣ ኒህዝበከ ኒሕገህ፣ ታይ ሲፍራል ለ ዋቲማክ ኢሲሲ ባዾል ያነ ህዝበ ሙሉኡድ ያይምሂረቲ ታይ ሒያውቶ ኪኒ፣ ታሃም ማዽዒታ የህ አረማውያን በተ መቅደሲድ ሳይሳክ ታይ ትምቅዲሰ ሲፍራ ያይርኪሰ አይክ ዋዕየን፡፡ 29. ታሃም አካህ የን ምክምኒያት ታሃምኮ ባሶህ ኤፌሶን ማባካ ጥሮፊሞስ ካሊህ ካታማል ዩብሊኒህ ይኒኒጉል ካያ ጳውሎስ በተ መቅደሲድ ይብዸህ ሳየም የከሊኒህ ይኒን፡፡ 30. ካታማ ሙሉኡድ ትምህውከ፣ ህዝቢ ለ ኡምቢህ አርዲክ ኢንኮህ የመቲኒህ ጳውሎስ ይብዽኒህ ሂርጋክ በተ መቅደስኮ የየዒን፣ በተ መቅደስ ኢፍአፋ አማይጉልካህ አልፍምተ፡፡ 31. ሒያው ጳውሎስ ያግዳፎና ጉረን ዋክተ "ኢየሩሳለም ካታማ ሙሉኡክ ትምህውከ"ታዽሔ ፋሮ ሮማውያን ወታሃደር አዛዚ ማደ፡፡   32. አማይጉል ኡሱክ ወታሃደርከ ቦልቲ አሞይቲት ይቢዸህ ጋባላዔህ አርዲክ ሒያው ዻጋህ የደ፡፡ ሒያው አሞ ባዕላከ ወታሃደር ዩብሊኒ ዋክተ ጳውሎስ ሳባዓናም በሓን፡፡  33. አዘዚ ለ ካብ የህ ጳውሎስ ይብዸህ ላማ ሰንሰሊህ ያምዻዎ ይኢዚዘ፡፡ ታሃምኮ ላካል አቲያ ኪናምከ አይም አበም ያዻጎ ጉረህ ካኤሠረ፡፡ 34. ህዝቢ ለ ጋሪጋሪ ኢንኪ ጉዳይ ያጉል፣ ውልውል ማሪ አኪ ጉዳይ አይ ይኒን፣ አዛዚ ህዝቢ ዋዕታኮ ኡጉተማህ ሓቀ ኪን ጉዳይ ያዻጎ ታንጉል ጳውሎስ ወታሃደር ሰፈሪህ በዮና ይእዚዘ፡፡ 35. ጳውሎስ ደረያ ማደ ዋክተ ህዝቢ ሙሉኡክ ኃይላለ ቁጡዓህ ኡጉጉተህ ዲንገት ካማድሶና ጉረንጉል ወታሃደራት ይይኩዒኒህ በየን፡፡ 36. ህዝቢ ለ"ኢግዲፋ"አይክ ዋዕ  አይክ ካ አክቲሊይ ዪነ፡፡

ጳውሎስ አካህ ያምከለከለ ዋኒ አበ

 37. ወታሃደር ሲኒ ሰፈሪድ ሳይሶና ካብየን ዋክተ ጳውሎስ ወታሃደር ያኢዚዘቲኣክ "ኢንኪ ጉዳይ ኮኮዋ ዮህ ታይፍቅደ?"አክየ፡፡ አዛዚ ለ"ግሪከ ዋኒ ታዽገ?"38. ይቦል ካዶ ዻየ ዋክተ ሂውከት ኡጉሰህከ አፋራሲሕ ናብሲያ ይግድፈህ ባራካህ ኩደ ግብጻዊ ኮያ ማኪሆ? አክየ፡፡ 39. ጳውሎስ ለ አኑ ኪልቅያል ገይምታ ዋረይሲታ ጠርሴስ ከታማል ዮቦከ አይሁዳ ኪዮ፣ ያዓሳያ ህዝበህ ዋንሲቶክ ዮህ ኢፍቅድ አክየ፡፡

 40. ዋንሲቶ አካህ ይፍቅደጉል ጳውሎስ ደረያት አሞክ ሶለህ ህዝቢ ቲብ ዮዋ ጋባህ ይምልከተ፣ ህዝቢ ቲባ የ ዋክተ ኢብራይስጥ ዋኒህ  ዋንሲቶ ኤዸዽሰ፣

                                         ማዕራፋ 22

  1."ይሳዖልከ ያቦቦቲ ሀይከ ካዶ ካብ ሲናል ኢሳክ አካህ አምከለከለሚህ ዮባ፡፡" 2. እብራይስጥ ዋኒህ ዋንሲታህ ዮቢን ዋክተ ኤዳ ዒለህ ቲብ የን፣ ጳውሎስ ኢሲ ዋኒ ካታታሳክ ታህ የ፡፡ 3. አኑ ኪልቂያል ገይምታ ጠርሴስ ካታማል ዮቡከ አይሁዳ ኪዮ፣ ዓረም ለ ታይ ኢየሩሳለም ካታማል ኪኒ፡፡ ይ መምሂር ለ ገማልያል ኪይይ ይነ፣ ናቦብቲህ ሕገ ሰለህ ይምሂረቲያከ ሊክዕ ካፋ አቲን አብታናም ባሊህ ፉጎ መንፈሳዊ ቅንአታህ ያስግልግለቲያ ኪይክ ኢነ፡፡ 4. ታሃሚህ አራሕ ታክቲለም ሙሉኡድ አይከ ራባ ፋናህ ያይሰደደ ሒያውቶ ኪይክ ኢነ፣ ላበቶከ ሳይዮ አዹውክ ዋክኒ ዓረህ ሳዎና ባሃቲያ ኪይክ ኢነ፡፡ 5. ታሃም ሓቀ ኪናም ካህናት አሞባዕልከ ባይቶ ስማጊለ ሙሉኡድ ዮህ ታምስኪሪን፡፡ ኤረ ደማስቆል ታነ ቶይ ሒያው ኡዹወህ ኢየሩሳለም ባሆከ አስቃጻዖ ይዽዕሲሳ ደማስቆል ገይምታ ተን ወገናትኮ ይጽሕፊን ወረቀት ጋራየም ተንኮ ኪክ ኢነ፡፡ 

ጳውሎስ ክርስቶሱል አይናህ የህ ጋሔም ዋንሲተ 

 (ሐ.ሥ 9፣1-19፤26፣12-18)

   6. አኑ ደማሱቆ ቱላል አድህከ ካታማ ደፍራል ካብ አይህ ለለዕ ታብዻህ ሀንደበቲህ ናባ ኢፎይቲ ዓራንኮ ይባሮል ኢፎ ዮል ዮዶጎሔ፡፡ 7. ታማይ ዋክተ ባዾል ራደ፣ "ሳውል! ሳውል! አይሚህ ያይሰደድክ ታነ? ያድሔ አንዻሕ"ኦበ፡፡ 8. አኑ ለ ይማዳራ ኡቱ አቲያ ኪቶ? አክኤዸሔ፣ ኡሱክ ለ አኑ አቱ ይታይሰደደ ናዝሬት ኢየሱስ ኪዮ ዮክ የ፡፡ 9. ዮሊህ ቲነ ሒያው ኢፎ ቱብለካ ኡሱክ ይዋንሲሳህ አንዻሕ አክ ማ'ቢኖን፡፡ 10. አኑ ለ"ይማደራ! አይም አቦ?"አከ፡፡ ማዳሪ ለ ኡጉታይ ደማስቆ አዱይ፣ አብቶ ኮህ ኤዳ ጉዳይ ኡምቢህ ታማል ኮክ ኢየሎን ዮክየ፡፡ 11. ኢፎይቲ አምዳጋሕኮ ኡጉተሚህ አብሎ ማዽዕኒዮ፣ ዮሊህ ቲነ ሒያው ጋባህ ይብዽኒህ አይምርሕክ ደማሱቆ ይማዲሰን፡፡ 12. ታማል ሀናኒያ አክያን ኢንኪ ሒያውቲ ዪነ፣ ታይ ሒያውቲ ደማስቆል ማርታ አይሁድ ሙሉኡክ ታይምስግነቲያ፣ ሕገ ያስክብረቲያከ መንፈሳዊ ኪን ሒያውቶ ኪይይ ዪነ። 13. ኡሱክ ዮያል የመተህ ያፋል ሶለህ፣ 'ይሳዓል ሳውሎ! ኩኢንቲ ጋባዕተህ ኮህ ታብሎይ'ዮክየ፣ ታማይጉል ሀንደበቲህ ዮህ ቱብለ፣ ካያ ለ ኡብለ፡፡ 14. ኡሱክ ለ ታህ ዮክየ፣ ሲን አቦቢህ አምላኪህ ፍቃድ ታዻጎከ፣ ካጽድቀ ታብሎከ ካ አንዻሕ ለ ታቦ ዮኮመህ ኩዶረ፡፡ 15. ታሃም ለ አካህ አበም ቱብለምከ ቶበ ሒያዊህ ነፊል ኡምቢህ ካማስኪር ታኮ ኪኒ፡፡ 16. ይቦል ካዶ አይሚህ ዓያክ ታነ? ኡጉታይኪ ካሚጋዕ ደዓክ ኢምጥሚቅ፣ ኢሲ ኃጢአትኮ ለ ዓካል፡፡'

  17. ታሃምኮ ላካል ኢየሩሳለምል ጋሔህ መቅደስ ዓረድ ጻሎት አበ ዋክተ ኢምሲጠህ ራኢ ኡብለ፡፡ 18. ይማዳሪ ዮህ ዩመቡሉወህ አቱ ይዳዓባል ታሓየ ማስኪር ማጋራንጉል ዓያየካህ ጋባላዓይ ኢየሩሳለም ኤወዕ!'ዮክየ፤ 19. አኑ ለ ታህ ኤዽሄ፣ ይማዳራ! ኢሲሲ ሙክራባል አዲይክ ኮያል ታሚነም ሙሉኡክ ኡዹወምከ ሳባዔም ኢሲን ሲነህ ይያዺጊን፡፡ 20. ኩማስኪር ኪይይ ይነ ኢስጢፋኖስ ይግዲፊን ዋክተ፣ አኑ ኢነህ ታግድፈሚህ ባሮል ሶለህ ተንሊህ ትነምሊህ ኤምሰመመዔህ ኢነ፣ ተን ሣራ ዻዉዻክ ኢነ፣ 21. ማዳሪ ዸዽል ታነ አረማውያናህ ኩፋረ ሊዮክ  ኡጉታይ አዱይ ዮክየ፡፡

ጳውሎስ ሮማ ዘጋ ኪናም ይስዽገ

  22. ታርከ ፋናህ ህዝቢ ሙሉኡክ ጳውሎስ ዋኒ ኦኮይሲታይ ዪነ፣ ታሃምኮ ላካል ሲኒ አንዻሕ ዋዕሰኒህ "ታይ ዓይነቲህ ሒያውቲ ባዾት አሞኮ ያላዮይ! ታይ ዓይነቲህ ሒያውቲ ያናዎ መዳ!"አይክ ዓዋየን፡፡ 23. ኢሲን ዋዕ አይክ ሲኒ ሣራ ኡርጉፋክ ቡልኩዓ ዓራናል አብትኒይ ዪኒን፡፡ 24. አሞ ባዕሊ ታሃም ዩብለ ዋክተ ጳውሎስ ወታሃደር ሰፈሪል ሳይሶና ይኢዚዘ፣ ህዝቢ ካ አሞል አይሚህ ታህዻ ዋዕ አካህያናም ያዻጎ ሳብዒማክ ያማርማሮ ይኢዚዘ፡፡ 25. ያከካህ ዓርሞህ ሲኪ ኢሰኒህ ዩዹዊኒህ ሳባዖና አምሶኖዶዊህ፣ ጳውሎስ አፋል ሶለህ ይነ ቦልቲ አሞባዕሊ"ሮማ ዘግነት ለ ሒያውቶ ፊርደ ማለህ ታግራፎና ሲናህ ያምፍቂደ? አክየ፡፡" 

  26. ቦልቲ አሞይቲ ታሃም ዮበ ዋክተ ያኢዚዘቲያ ዻጋህ የደህ አይናህ ካኢሶ ኪቶ? ታይ ሒያውቲ ኡኮ ሮማ ዘጋ ኪኒ አክየ፡፡ 27.አማይጉል አዛዚ ጳውሎሱድ ካብ ኤድየህ "ኢስክ  ዮከየ፣ አቱ ሮማ ዘጋ ኪቶ?"አክየ፡፡ ኡሱክ ለ"ዮ ኪዮ" አክየ፡፡

  28. አዛዚ ለ አኑ ታይ ዘግነት ዻመም ማንጎ ማላህ ኪኒ አክየ፣ ጳውሎስ ለ አኑ ለል ሮማ ባዾህ ዘጋኮ ኦቦከህ አኒዮ አክየ፡፡

 29. አማይጉል ታይ ታማርማሮ ተምሶኖዶወህ ቲነ ሒያው አማይጉልካህ ካኮ ሚሪሓ የን፣ አዛዚ ሮማ ዘጋ ኪን ሒያውቲ ሰንሰሊህ ዩምዹወም የዸገ ዋክተ ማይሲተ፡፡

                           አይሁድ ሰንጎህ ነፊል ካብየ /ይቅሪበ/

 30. ኢብዻሒነ አዛዚ፣ አይሁድ ጳውሎስ አካህ ይክሲሲኒም ትክኪል ኪን ምክኒያት አይምቶ ኪናም ያዻጎ ጉረህ፣ ካህናት አሞባዒልከ ሰንጎት አባላት ሙሉኡድ ያካሃሎና ይኢዚዘ፣ ጳውሎስ ለ ማዹዋኮ ይንሑወህ በየህ ተን ነፊል ካብኢሰ፡፡

ማዕራፋ 23

  1. ጳውሎስ ለ አግለ ይቱኩረየህ የደለለዔህ ይሳዖሎ! ካፋ ፋናህ ኡማን ዋክተ መዔፉጊህ ነፊል ማረም መዔ ኅሊናህ ኪዮ የ፡፡ 2. ሊቀ ካህናት ሀናኒያ ለ ጳውሎስ አፍ ሳባዖና ጳውሎስ አፋል ሶልታ ሒያው ይኢዚዘ፡፡ 3. ታማይ ዋክተ ጳውሎስ ሀናንያክ አቱ ኖራህ ይምልምጸ ማንዳቅ! ኮያ ለ መዔፉጊ ኩሳባዔ ለ! ሕጊ መሠረቲህ ታፍራዶ ዲፈይተህ ታነሃኒህ ሕገኮ ኢሮህ /ወጻኢህ/ ይሳባዖና ታኢዚዘ?"          

    4. ታማል ቲነ ሒያው ጳውሎሱክ መዔፉጊህ ሊቀ ካህናታህ ዋቲማክ ታነ?  አክ የን፡፡ 

  5. ጳውሎስ ለ"ይሳዖሎ! ሊቀ ካህናት ኪናም ማዻጊኒዮ፣ አይሚህ ህዝቢ አሞይቲህ አሞል ኡማ ቃል ማዋንሲቲን ያዽሔ ጹሑፍ ይምጽሒፈህ ያነ" የዽሔ፡፡

  6. ጳውሎስ .ታማል ቲነ ሒያውኮ፣ አብዻ ፈሪሳውያን ኪኖኑም የዸገህ ያሳዖሎ አኑ ፈሪሳውያንኮ ዮቦከ ፈሪሳዊ ኪዮ፣ ሀይከ ካዶ ፍርዲ ነፊል ካብኤም ራቦንትቲ ኡጉታቶህ ታስፋ አበርከህ ኪኒ"የህ አንዻሕ ናውሰህ አግለ ፋናል ዋንሲተ፡፡

 7.ጳውሎስ ታሃም ዋንሲተ ዋክተ ፈሪሳውያንከ ሰዱቃውያን ፋናድ ናዓቢ ኡጉተህ አግለ ላማል ሓዲምተ፡፡ 8. አይሚህ ሰዱቃውያን ኡግታቶ ማታነ፣ መላእክት ሚያኒን፣ መንፈስ ለ ሚያነ ያንጉል፣ ፈሪሳውያውን ለል ታሃም ኡምቢህ ታነ የኒህ አሚኒይ ዪኒን፡፡ 9. ታይ ዋክተ ናባ ሁውከት የከ፣ ፈሪሳውያውን ወገንኮ ኪን ውልውል ሙሴ ሕጊህ መምሂራን ለ ኡጉተኒህ"ናኑ ታይ ሒያውቲህ አሞል ኢንኪ ኡማ ጉዳይ ማገኒኖ፣ መንፈስ ያኮ ማላይካ አክየህ ያኮ፣ ናኑ አይም ናዽገ"ያናማህ የምከረከሪን፡፡

  10. ናዓቢ አነቢክ የደጉል ሒያው ጳውሎስ ካ ያገረዒኒምኮ ማይሲተህ አዛዚ"ኦባይ ጳውሎስ ሒያው ፋንኮ ቡኩሳይ ባሃይ፣ ጦርቲ ሰፈርህ በያ!"ያናማህ ወታሃደር ይኢዚዘ፡፡

   11. ኢብዻሒኒ ባር ማደሪ ጳውሎስ አፋል ሶለህ አይዱኩመይ! ኢየሩሳለሚል፣ ዮህ ትምስኪረም ባሊህ ታማም ባሊህ ሮማል ዮህ ታማስካሮ  ኮህ ኤዳ አክየ።

                   ጳውሎስ ያግዳፎና ተከ ሠራ                   

 12. ሑገ ማሕተጉል አይሁድ የከሄሊኒህ ጳውሎስ አግድፈካህ ኢላው ማበና፣ ላየ ማናዑበ፣ የኒህ ዺዊተን፡፡ 13. ታይ ኣድማል ተምሰመመዔ ሒያዊህ ሎይ ሞሮቶምኮ አጋናል ኪይይ ዪኒን፡፡ 14. ኢሲን ካህናት አሞይቲትከ ስማጊለታታል የደይኒህ ታህ የኒህ አይክ የን፣ ጳውሎስ አግድፋካህ ኢላው ዻዓማናምኮ ጥብቀ ኪን ናባ ዺዋ አበነ፡፡ 15. አማይጉል አቲን ባይቶል ተምሰመመዒኒህ፣ ጋዳህ ታምርሚሪን ጉዳይ ያነሚህ ትይምግዲኒህ፣ ጳውሎስ ሲናህ ባሆና አዛዚ ኤሠራ፣ ናኑ ለ ታርከ ማዳሚህ ባሶል ናግዳፎ ኖምሶኖዶወህ ናነ፡፡"

 16. ያኮይ ኢካህ ጳውሎስ ሳዕላህ ባዽ ታይ አድማ ሠራ ዮበጉል፣ ወታሃደር ሰፈሪህ የደህ ሳየህ ጳውሎሱክ የዽሔ፡፡ 17 ጳውሎስ ለ ቦልቲ አሞይቲትኮ ቲያ ደዔህ"ታይ አውኪ ጦርቲ አሞይታክ ያዽሔ ጉዳይ ለጉል ካያ ዻጋህ ካብ ካኢስ"አክየ፡፡ 18. ቦልቲ አሞይቲ ለ አውካ አሞባዕላ ዻጋህ ይብዸህ ሳየህ ማዹዋድ ያነ ጳውሎስ ይደዔህ፣ ታይ አውኪ ኮያክ ያዽሔ ጉዳይ ለጉል ኮያል ካብሶ ይዻዒመ አክየ፡፡

   19. አሞባዕሊ ለ አወካ ጋባህ ይብዸህ ኢስዕዽይ ይሰህ"ዮክታ ጉዳይ አይምቶ ኪኒ የህ ዲቦህ" ካኤሠረ፡፡

  20. አውኪ ለ ታህ አክየ፣"አይሁድ ሒያው ጳውሎስ ጉዳይ ጥብቀህ ያምርምሪኒሚህ ይምግዲኒህ በራ አግለል ካብ አካህ ኢሶ ኮኤሠሮና የምሰመመዒኒህ ያኒን፡፡ 21. ተከሚህ መዔ አክሚን፣ አይሚህ ካያ አግድፈካህ ኢላው ማበና፣ ላየ ማናዑበ፣ ያናማህ ዽዊተምኮ ሞሮቶምኮ አጋናል ሒያውቲያ ካያ ያግዳፎና መዝገብ ይብዽኒህ ያኒን፣ ካዶ ኢላላናም ኩመልስ ጥራሕ ኪኒ፡፡ 22. አሞባዕሊ ለ ታይ ጉዳይ ዮያክ ተም ቲያክ ሚን የህ አውካ የይሰነበተ፡፡

ጳውሎስ ሀገር ረዳንቶል ፊልክስ ነፊል ካብየ

  23. ታሃምኮ ላካል ጦርቲ አሞባዕሊ ቦልቲ አሞይቲትኮ ላማይ ደዔህ"ካሲት አዶሓ ሳዓት ያከጉል ቂሳሪያ ቱላል ታዴ ላማ ቦል ወታሃደራቲያከ ማልሕንቶሞን ፋሪሳለኮ፣ ላማ ቦል ጦር ዒዳምኮ ለ ዮይሶኖዶወ፡፡ 24. ጳውሎሱህ ለ ፋራስ አካህ ዮይሶኖዶዊኒህ ባዾ ረዳንቶል ፊልክስ ናጋድ ማዶ አብሲሳ"አክየ፡፡ 25. ታህ ታዽሔ ደብዳበ ለ ይጽሒፈ፡-

  26."ኩቡር ባዾ ረዳንቶ ፊልክስ፣ ቀላውዴዎስ ሉስዮስኮ፣ ሳላም ሲናህ ያኮይ፡፡ 27. ታይ ሒያውቶ አይሁድ ይብዽኒህ ያግዳፎና ኪይ ዪኒን፣ አኑ ለ ሮማ ዘጋ ኪናም ኤዸገ ዋከተ ወታሃደርሊህ ማደህ ካ ኢይዲኅነ፡፡ 28. አይሚህ ዳዓባል ካ ይክሲሲኒም አዻጎ ጉረህ ባይቶል ካብ ኢሰህ ኢነ፡፡ 29. ይክሲሲኒም ተን ሕገ ያብለ ጉዳህ ኪናም ኢምሪዲኤ፣ ያኮይ ኢካህ ራባ ያኮይ ማዹዋ ማዲሳ ጉዳይ ማለ፡፡ 30. ታይ ሒያውቶ ያግዳፎና አድማ ተከም ኦበ ዋክተ አማይጉልካህ ኩላል ካፋረ፣ ከሰስቲ ኩነፊል ሲኒ ኪሰ ያስቃራቦናይ አከህ አኒዮ፡፡"

  31 አማይጉል ወታሃደራት ይምኢዚዚኒሚህ ሪሚዲህ ጳውሎስ ባር በየኒህ አንቲጳጥሪስ ማዲሰን፡፡ 32. ኢብዻሒነ ፋሪስለ ጳውሎስሊህ ሲኒ አራሕ ያቃጻሎና አበኒህ ሲኒ ሰፈሪህ ጋሔን፡፡ 33.ፋሪስለ ቂሳሪያ ማደንጉል ደብዳበ ሀገር ገዛኢህ ዮሖውኒህ ጳውሎስ ካናፊል ካብ ኢሰን፡፡ 34. ባዾ ረዳንቲ ወረቀት ይኒቢበምኮ ላካል ጳውሎሱክ አይ ክፍሊህ ሀገርኮ ኪቶ?"የህ ካኤሠረ፡፡ ቂልቂያ ሒያውቶ ኪናም የዸገጉል፣ 35."ኩ'ከሰስቲ ያምቲንጉል ኩጉዳይ"አበሊዮ አክየ፡፡ ሄሮድስ ጊቢ አዳድ ዻውዹሞ ይኢዚዘ፡፡"

ማዕራፋ 24

 ጳውሎስ አይሁዱህ ይምክሲሰ 

  1. ኮና ለለዕኮ ላካል ሊቀ ካህን ሀናኒያ ውልውል ስማግለታትከ ጠርጠሉስ አክያን ጣባቃሊህ ቂሳሪያ የደየ፣ ኢሲን ባዾት አማሓዳሪ ፊልክስል የደይኒህ ጳውሎስ ይክሲሲን፡፡ 2. ጳውሎስ ደዕሚመህ የመተ ዋክተ ጠርጠሉስ ታህ የህ ኪሰ ኤዸዺሰ፣ ኩቡር ፊልክስ! ኩዳዓባህ ማንጎ ሳላም ገይነ፣ ኩመዔ አማሓዲራህ ኒሂዝቢ ታይሰም ገየ፡፡ 3. ታይ መዔ ኩሢራሕ ኢሲኢሲ ቦታልከ ኢሲኢሲ ዋክተህ ጋራይናም ናባ ሞሳህሊህ ኪኒ፡፡ 4. ካዶ ለ ኩዋክተ ባከካህከ ኩኃዋሊሰካህ ኡዹዺህ ኮካም ኢሲ መዕነህ ኒታቦ ኩዻዒማ፡፡ 5. ታይ ሒያውቲ ኡማ ዱረ ኖድየከ፣ ዓለምል ታነ አይሁድ አሞል ሙሉኡድ ሁከት አጉሳ፣ ናዝራውያን አክያን መናፍቃን መራሒ ኪኒ፡፡ 6. በተ መቅደስ ዓረ ያይራካሶ አዕኪኒህ ኒብዸ፣ [ኒሕጊህ ዓይዳህ ኤልናፍራዶ ኒሕሲበህ ኒነ፡፡ 7. ያከ ኢካህ ጦርቲ አዛዚ ሉሲዮስ የመተህ ናባ ኃይላህ ኒጋባኮ ቡኩሰህ በየ፡፡ 8. ከሰስቲ ኮያ ዻጋህ ያማቶና ይኢዚዘ፤] ታይ ካ አሞል ካብ ኢስና ክሲ ኡምቢህ ሓቀ ኪናም አቱ ኢሰህ ካያ ትምርሚረህ ታምራዳኦ ዺዕታ፡፡ 9. አይሁዳውያን ታይ ኡማን ጉዳይ ሓቀ ኪኒ አይክ ካኪሰህ ያምሰመመዒን፡፡

                      ጳውሎስ ፊልክስ ነፊል አካህ ያምከለከሊን ዋኒ አበ

 10. ሀገር አማኃዳሪ ፊልክስ ኢስ ጋባህ ይምልክተህ ጳውሎስ ዋንሲቶ አካህ ይፍቂደ፣ ጳውሎስ ታህ የህ ይምሊሰ፥ ማንጎ ኢጊዲት ታይ ባዾህ ረዳንቶ ኪቶም አዺገጉል ካብ ዮልየ ኪሰህ ኢነህ አምካላካሎ ኩነፊል ካብ ኤርከህ ጋዳህ ኒያታክ ኪዮ፡፡ 11. አስጋዶ ኢየሩሳለም ኤደም ላማምከ ታማን ለለዕቲያኮ ማፈራም አቱ ኢሰህ ታዻጎ ዽዕታ፡፡ 12. በተ መቅደሲድ ያኮይ ሙክራብኮ ወይ ካታማት አዳኮ ለ ኢንኪቶሊህ አምከረከርህ ወይ ህዝበ ሂውከቲህ ኡጉጉሳህ ይማገይኖን። 13. ካዶ ካብ ዮሊሳን ክሰድ ኡምቢህ ኢንኪ ሓቂ መረዳአታ ካብ ዮሊሳኒያ ማሎን። 14. ያኮይ ኢካህ ታሃም ኩአይሳዻጎ ኪሕኒዮ፣ ኢሲን መናፍቅነት አክያን ማዳሪ አራሐህ ናቦብትቲህ አምላክ አይምልከ፣ ሙሴ ሕገከ ነብያት ማጻሒፍቲል ትምጺሒፈም ኡምቢህ አሚነ፡፡ 15. ኢሲን ተስፋ አባናም ባሊህ አኑ ለ ጻድቃንከ ኃጢአተይናታት ራባኮ ኡገተሎኑሙል መዔፉጎል ታስፋ አባ፡፡ 16. አማይጉል ፉጎከ ሒያው ነፊል ጺሪይ ኅሊና አሎ ኡማንጉል አጽዒረ፡፡

  17. ኢየሩሳለምኮ አውዔምኮ ላካል ማንጎ ኢጊዲት ትላይተምኮ ላካል ይወገኒህ ያከ ሓቶ ማልያከ ፉጎህ ያምኃወ መባእ ኢብዸህ ኤመተ፡፡ 18. በተ መቅደስ ዓረድ ለ ይገየኒም ታሃሞም አባህ ኪኒ፣ ታማይ ዋክተ ጽሬት ሠርዓት አበህ ኢነ፣ ዮሊህ መንጎ ሒያው ማና፣ ሂውከት ለ ሙጉቲና፡፡ 19. ያከ ኢካህ እስያኮ ተመተ ውልውል አይሁድ ታማል ዪኒን፡፡ ኢሲን ያአሞል ኪሲ ምክኒያት የልኒምኮ ኩነፊል ካብየነህ ዋንሲቶናይ፡፡  20. ታሃምኮ ላካል ፊርዲ ነፊል ካብ ኤህ አበ በደል ይኔምኮ ታማይ ሒያው ዋንሲቶይ፡፡  21. ዓዲህ ተን ፋናድ ሶለህ ራባኮ ኡጉታናም ታነ የዽኄ ያናማህ ካፋ ፊርዲ ነፊል ካብ ኤህ አኒዮ፥ ኤዽሔህ ናባ አንዻሓሕ ዋንሲተህ አኒዮ፣ ታሃምኮ በሒህ አበ ጉዳይ ማሊዮ፡፡ 22. ፊሊክስ ለ ማዳሪ አራሒህ ደንቢ አዽጊይ ይነጉል ጦርቲ አሞይቲ ሉስዮስ ያሚተ ዋክተ ሲን ጉዳይህ ዳዓባል ውሳኔ ሲናህ አሓየ ሊዮ አክየህ ተን የይሰነበተ፡፡"23. ጳውሎስ ዻዉዻይ ይነ ቦልቲ አሞይቲ ጋዳህ ናፃነት ካ ካሊተካህ ኢጢንቂቃይ ካ ዻዉዽ፣ ካ ካሓንቶሊት ለ ካጉርሱሳም ሙሉኡድ  ይብዽኒህ ያምትንጉል አክ ማደሲን አክየ፡፡

                               ጳውሎስ ፊልስክከ ድሩሲላ ነፊል ካብየ

  24. ዳጎ ለለዒህ ላካል ፊልክስ ድሩሲላ አክያን አይሁዳ ኪን ኢሲ ኑማሊህ የመተ፣ ጳውሎስ ለ ደዕሲሰህ ኢየሱስ ክርስቶስህ ዳዓባል ያሚነም ዮበ፡፡ 25. ጳውሎስ ጽደቂ ዳዓባልከ ሲኒ አሞክ ሱባናም ያሚተ ፊርዲህ ዳዓባል ለ ዋንሲተ ዋክተ ፊልክስ ማይሲተህ ካዶ አዱይ፣ ዮህ ያምሰመመዔ ዋክተ ኩደዔሊዮክ አክየ፡፡ 26. ፊልክስ ጳውሎስኮ ጉቦ ጋራዎ ተስፋ አባይ ዪነ፣ አማይጉል ማንጎጉል ጳውሎስ ደዕሲሳክ ዋንሲሳይ ዪነ፡፡ 27. ላሚ ኢጊዳኮ ላካል ጶርቅዮስ ፊስጦስ ፊልክስ ቦታድ የከ፣ አይሁድ ሒያው ኒያቲሶ ጉረህ ጳውሎስ አካህ ዩምዹወካህ ሓበ፡፡

ማዕራፋ 25

ጳውሎስ ሮማ ኑጉሠ ነግሥቲል ይግባይ የ

  1. ፊስጦስ ኢሲ ግዝአታል ቂሳርያል ሳየህ አዶሓ ለለዕ ሱገምኮ ላካል ታማርከኮ ኢየሩሳለም የደ፡፡ 2-3. ታማል ካህናት አሞባዕልከ ውልውል ናባ አይሁድ ጳውሎስ አሞል ሲኒ ኪሰ ካብ ኢሰን፣"ጳውሎስ ኢየሩሳለም ኖህ ባሃይ ኖያህ መዔ ጉዳይ ኖህ አብ"የኒህ ዻዒመን፣ ታሃም አካህ የን ምክንያት ጳውሎስ አራሓል ኢላለኒህ ያግዳፎና ጉረንጉል ኪኒ፡፡ 4. ፊስጦስ ለ ጳውሎስ ቂሳሪያል ማዹዊ ዓረድ ዻውዹማይ ያነ፣ አኑ ለ ካዶ ዸህ ጋኄህ ታማህ አዲየ ሊዮ፡፡ 5. ሲን ሢልጣን አሞይቲት ዮሊህ ቂሳሪያ ያዳዎናይ፣ ጳውሎስ አበ በደል ይኔምኮ ታማል ያክሳሶናይ አክየ፡፡

  6. ፊስጦስ ባሓር አከከ ታማና ለለዕኮ በየ ዋይታ ጊዘ ተንሊህ ትላሰምኮ ላካል ቂሳሪያ የደየ፣ ታማምኮ ኢብዻሒነ ፊርዲ ወምበሪህ  አሞክ ዲፈየህ ጳውሎስ ካብ ኢሶና ይኢዚዘ፡፡ 7. ጳወሎስ ካብ የጉል ኢየሩሳለምኮ ተማተ አይሁድ ይስክብቢኒህ ሶለኒህ በደል ኤድ ገዮና ዺዔዋን ማንጎ ዒሊስ ኪሰ ኤልይስቅሪቢን፡፡ 8. ጳውሎስ ለ አኑ አይሁድ ሕጊህ አሞል ያኮይ በተ መቅደስ ዓረድ ወይ ሮማ ኑጉሠ ነገሥቲህ አሞል አበ በደል ሚያነ የዽሔህ አካህ ያምከለከለ መልስ ዮሖወ፡፡

 9. ፊስጦስ ለ አይሁድ ሒያው ኒያቲሶ ጉረህ ጳውሎሱክ ኢየሩሳለምል ተደየህ ታይ ጉዳይህ ዳዓባል ታማል ይነፊል ታምፋራዶ ጉራክ ታነ? አክየ። 10. ጳውሎስ ለ ታህ የህ መልስ ዮሖወ፣ ሀይከ አኑ ኤል አምፋራዶ ዮህ ኤዳ ቄሳር ፍርዲ ወመበርክ ነፊል ሶለህ አኒዮ፣ አቱ ለ ደምቢህ ታዽገምባል አይሁድ አሞል ኢንኪ ጉዳይ በደለኮ አበያ ሚያነ፡፡ 11. ኢብድለህ ኤከምኮ ወይ ራባህ ያስቅጺዔ በደል ኤለምኮ ራባኮ ራዖይ ማዸሔ፣ ያኮይ ኢካህ ተን ኪሲ ካንቶህ የከምኮ ቲይ ቲላሰህ ተናህ ይያሓዎ ማዽዓ፣ አኑ ቄሳራል ይግባይ ኤህ አኒዮ፡፡

 12. ታማይ ዋክተ ፊስጦስ ኢሲ አማካርትሊህ ዋንሲተህ"ቄሳራል ይግባይ ተምኮ ቄሳር ዻጋህ ታዳዎ ኪቶ"አክየ፡፡

                               ጳውሎስ አግሪጳከ በርነቄል ነፊል ካብ የ 

  13. ዳጎ ለለዕኮ ላካል ኑጉሥ አግሪጳከ ፊስጦስ"ኡንቃዕ ናጋድ ተመተ"ያናማህ ቄሳራል የመቲን፡፡ 14. ታማል ማንጎ ለለዕ ዲፈኒህ ፊስጦስ ጳውሎስ ጉዳይ ታህ ኪኒ አይክ ኑጉሥ አግሪጳህ ይግሊጸ፣ ፊልክስ ዩዹወህ ሓበ ኢንኪ ሒያውቲ ያነ፡፡ 15. አኑ ኢየሩሳለምል ኢነ ዋክተ ካህናት አሞባዕልከ አይሁድ ስማግለታት ታይ ሒያውቲህ ጉዳይ ዮል ይምልክቲኒምኮ ላካል ኤልአፍራዶ የሠረን፡፡ 16. አኑ ለ ይክስሰቲ ትክስሰሚህ ነፊል ሶለህ አካህ ይምክሲሰ ጉዳህ መከላከሊ መልስ አካህ አምሓወካህ ትላሰኒህ ያሓይኒም ሮማውያን ዓይዳ ማኪ ኤዸኄህ ኤልደሄየ፡፡ 17. አማይጉል ከሰስቲ የከሄሊኒህ ታህ የመቲን ዋክተ ዓያየካህ ኢብዻሒነ ፍርዲ መንበርክ ዲፈየህ ጳውሎስ ተን ነፊል ካብ ኢሶና ኢኢዚዘ፡፡   18. ከሰስቲ ከባሮል ሶለን ዋክተ አኑ ኡማ ጉዳይ ሢራሔ ኤዽሔህ ኢግምተም ኢዻ ኪሰህ ማዲሳ ኢንኪ ጉዳይ አልማስቃራቢኖን፡፡ 19. ያከካህ ካሊህ አምከረከሪይ ይኒኒም ሲኒ ሃይማኖቱህከ ራበህ ዪነ፣ ጳውሎስ ለ ያነ ቲያ ኪኒ ኢየሱስ የዽሔርከህ ኪኒ። 20. አኑ ለ ታይ ዓይነቲህ ጉዳይ አማርማሮ ይ'ይጽግመጉል ጳውሎስ ኢየሩሳለምል ተደህ ታማል ታይ ጉዳህ ታምፋራዶ ኪሒንቶ? አከ፡፡ 21. ኡሱክ ለ ሮማ ኑጉሠ ነገሥቲል አካህ ያምባላዎ ጉረህ ቄሳራል ይግባይ የዽሔርከህ ቄሳራል ፋራም ፋናህ ማዹዋድ ሱጎ ኢኢዚዘ፡፡"

  22. አግሪጳ ፊስጦስ"አኑ ለ ታይ ሒያውቲ ዋንሲታህ አቦ ጉራክ አኒዮ"አክየ፡፡ ፊስጦስ ለ"በራ አበሊቶ"አክየ፡፡

  23. አማይጉል ኢብዻሒነ አግሪጳከ በርኒቄ ናባ ግርማሊህ የኪኒህ ጦርቲ አሞባዕልከ ካታማ ናባ ሒያዋህ ይምዕዝቢኒህ የመቲኒህ ፊርዲ አዳራሳድ ሳየን፣ ታሃምኮ ላካል ፊስጦስ ጳውሎስ ደዕሲሰ፡፡ 24. ታህ አክየ፣"ኦ ኑጉሥ አግሪጳ! አቲን ለ ኖሊህ ታነ ሒያዎ ኡምቢክ፣ አይሁድ"ታይ ሒያውቲ ካምቦኮ ሣራ ቱላል ሂወቲህ ማሮ መዳ ያናማህ ዋዕ አይክ ኢየሩሳለምል፣ ታሃማህ ኤልያምፋራዶ የሠረኒም ታይ ታብሊን ሒያውቶል ኪኒ፡፡ 25. አኑ ለ ራባህ ያይፊሪደ ገበንኮ ኢንኪም ኤድማገኒዮ፣ ኡሱክ ሮማ ኑጉሠ ነገሥቲል ይግባይ የዽሔርከህ ታማህ ፋሮ ኢውስነ፡፡ 26. ያኮይ ኢካህ ካዳዓባል ይማዳራል አጽሒፈ ያምዺገ ጉዳይ ሚያነ፣ አማይጉል ኢምርሚረምኮ ላካል ያምጽሕፈ ጉዳይ ገዮ ኤዸሔህ ሲን ነፊል፣ ጋዳህ ለ ኦ ኑጉሥ አግሪጳ! ኩነፊል ካብ ኢሳክ አኒዮ፡፡ 27. ለል ለ ዩምዹወቲያ አሞቲያል ቲላሳህ አካህ ይምክሲሰሚህ ምክኒያት አካህ አግሊጸዋናም ዱዲኖ የከህ ዮህ ያምቡሉወ፡፡

 ማዕራፋ 26

                    ጳውሎስ አግሪጳ ነፊል አበ ዋኒ                   

  1 .አግሪጳ ጳውሎሱክ ኢሲ ዸግሓህ ዳዓባል ዋንሲቶ ኮህ ይምፍቂደ አክየ፣ ጳውሎስ ለ ጋባ ፋሕ ኢሰህ ታህ የህ አካህ ያምከለከለ መልስ ዮሖወ፡፡

 2. ኑጉሥ አግሪጳ! አይሁድ ሒያው አካህ ይትክሲሰ ጉዳህ ኡምቢህ ካፋ ኩነፊል አካህ አምከለከለ መልስ አሓይህ ጋደህ ኒያታ፡፡ 3. አይሚህ አቱ አይሁድ ህዝቢህ ዓይዳከ ክርክር ሙሉኡድ ትስቲውዒለህ ታዺገ፣ አማይጉል ትዕግሥቲህ ይታቦ ኩዻዒማክ አነ፡፡

 4. ዒንዻነኮ ኤዸዺሰህ አይናህ ኤህ ማራም አይሁድ ህዝቢ ያዽጊን፣ ኤዸዾይታኮ ኡጉተህ ህዝቢ ፋናድከ ኢየሩሳለምል አካህ ማራ ሂወት ያዺጊን፡፡ 5. ለል ለ ያማስካሮና ጉራንዶ ንሃይማኖትኮ ጋዳህ ሠርዓት ዻዉዻቲህ ክፍለኮ ኪን ፈሪሳዊ ኤከህ ማራም ኤዸዾይታኮ ኤዸዺሰኒህ ያዺጊን፡፡ 6. ካዶ ለ ፍርደህ ታል ሶለም መዔፉጊ ናቦብቲህ ዮሖወ ቃል ኪዳኒህ ታስፋህ ኪኒ፡፡ 7. ታይ ታስፋ ማዶና ላማምከ ታማን ነገድያ መዔፉጎ ለለዕከ ባር አይምልክክ ኢላላክ ይኒን፣ ኦ'ኑጉሦ! አኑ ለ አይሁዱህ ኢምክሲሰም ታይ ታስፋህ ምክንያታል ኪኒ፡፡ 8. መዔፉጊ ራቦንቲት ኡጉሣም ኪናም አይሚህ ሲናል አይሁዱህ ታምአማኖ ዽዕሚመ ዋይታም ተከ?

  9. አኑ ለ ኢኒ ዸግኃህ ናዝሬት ኢየሱስ ሚጋዓህ ዺዔ ዓቅመል አምካላካሎ ዮልታነ ኤዸሔህ ኢሕሲበህ ኢነ፡፡ 10. ኢየሩሳለምል አበም ታሃሞም ኪይይ ቲነ፣ ካህናት አሞባዒልኮ ጋራየ ሢልጣናህ አማንቲኮ ማንጎም ዋክኒ ዓረድ ሳዎና አብሲሰህ አኒዮ፣ ተን አግዳፎ ተን ጉዳያድ ኤምሰመመዔህ አኒዮ፡፡ 11. ማንጎ ዋክተ ኢሲሲ ሙክራባል ያምቃጻዖናከ ኢምነት ያክሐዶና አብሲሰህ አኒዮ፣ ተን አሞል ጋዳህ ኩራየህ አኪ ካቶሙል ኡካ አድይክ አይሰደዲክ ኢነ፡፣

                           ጳውሎስ አይናህ የህ ኢየሱሱል ጋሔም ይቲረከ                                    (ሐ.ሥ. 9፣1-19፤22፣6-16፡፡)

   12. ታይ ጉዳህ ካህናት አሞይቲትኮ ሙሉእ ሢልጣንከ ቲኢዛዝ ጋራየህ ደማሱቆ አዲክ ኢነ፡፡ 13. ኦ'ኑጉሦ! አራሓድ አኒዮሃኒህ ሊክዕ ለለዕ ታብዻ አኪህ አይሮይታት ኢፎኮ በያ ኢፎ ኡብለ፣ ታይ ኢፊ ዮከ ዮሊህ አዲክቲነ ሒያዊህ ባሮሩል ዓራንኮ ኢፎየ፡፡ 14. ኡምቢክ ባዾት አሞል ራድነህ ናነሃኒህ አይሁድ አፋህ፣"ሳውል! ሳውል! አይሚህ ይያይሰደዲክ ታነ?"ያ አንዻሕ ኦበ። 15. አኑ ለል"ማዳራ! አቱ አቲያ ኪቶ?"ኤዽሔ፣ ማደሪ ታህ ዮክየ፣ አኑ አቱ ይታሰደደ ኢየሱስ ኪዮ፡፡ 16. ካዶ ለ ኡጉታይኪ ኢባህ ሶል፣ አኑ ኮህ ኡምቡሉወም፣ ካዶ ዮያ አካህ ይቱብለካህከ ባሶቱላል አኑ ኮያህ አካህ አምቡሉወ ጉዳህ አገልጋሊከ ማስኪር ዮህ ታኮ ኩረዲሶ ጉረህ ኪዮ፡፡ 17. እስራኤል ህዝበልከ ተና ዻጋህ ኩፋራማህ አረማውያን ጋባኮ ኩአይድኂነ ሊዮ፡፡ 18. ኢንቲት አካህ ፋክቶከ ዲተኮ ኢፎል ተን ታያዖ ሰጣን ግዝአትኮ መዔፉጎ ዻጋህ ተን ደሄቶ ኩ አበህ አኒዮ፣ ኢሲን ለ ዮያል የመኒን ኢርከህ ምክኒያታል ሲኒ ኃጢአቲህ ሕድጎት ገሎን፣ ዶሪምምተሚህ ፋናድ ሪስተ ሓድሊተ ሎን፡፡

ጳውሎስ ሢራሕ ኩነቲህ ዳዓባል ይስዽገ

   19. አማይጉል ኑጉሥ አግሪጳ! ዓራንኮ ዮህ ዮመሖወ ሙቡሉህ /ራእህ/ ታአዛዚ ኤከህ አኒዮ፡፡' 20. ያከካህ ኦኮመህ ደማሱቆል ታነ ሒያዋህ፣ ጋባዔህ ኢየሩሳለምከ ይሁዳ ባዾል ሙሉኡድ ታነሚህ ታማምባሊህ አረማውያን ኦሳክ ንስሓ ሳየኒህ ፉጎል ጋሖና ተን እይምሂር፣ ንስሓ ሳየኒም ያይቡሉወ ጉዳይ አቦናክ አከይ፡፡ 21. ታይ ምክኒያታል አይሁድ በተ መቅደሲል አነሃኒህ ይያባዾናከ ይያግዳፎና ጉረን፡፡ 22. ካፋ ፋናህ መዔፉጊህ ጎሮን ዮክማ ባዽስሚና፣ አማይጉል ዒንዻቲያከ ናባቲያ አይምስጊኒክ ታል ሶለህ አኒዮ፣ ነብያትከ ሙሴ ዮኮሚኒህ ታሃም አከለ የኒህ ዋንሲተኒምኮ ፈር አኪም ኢንኪም ማዋንስቲኒዮ፡፡   23. ኢሲን ዋንስተኒም መሲሕ መከራ ጋራየ ለ፣ ራባኮ ኡጉታናማህ ኤዸዾይታ የከህ ድኅነት ኢፎይታህ እሥራኤል ህዝበህከ አራማውያናህ ያምባላዎ  ለ  የህ ኪኒ፡፡

  24. ጳውሎስ ታሃም ዋንሲታይ ያነሃኒህ ፊስጦስ"ኦ'ጳውሎሶ!"ካዶ ትዕቢደ፣ ማንጎም ትምሂረህ ዒብደ ኩማዲሰ!"የህ ዋዓ የህ ዋንሲተ፡፡

  25. ጳውሎስ ለ ታህ የህ ኤልደሄየ፣"ኩቡር ፊስጦሶ! ሓቀከ ትክኪል ኪን ጉዳይ ዋንሲታክ አነካህ ማዕባዲኒዮ፡፡ 26. ካነፊል ኢፋህ ዋንሲተም ጉዳይ ኑጉሥ ያዺገ፡፡ ታሃም ሱዉሩህ ተከም ማኪጉል ንጉሥ ያምሪዲኤም ዓዲህ ኪዮ። 27. ኑጉሥ አግሪጳ! ነብያት አሚኒክ ማታነሆ? ታሚነም አዺገ፡፡" 

 28. አግሪጳ ለ ጳውሎሱክ"አቱ ኡኮ ታይ ዳጎ ዋክቲህ አዳል ክርስቲያንቶ ያብቶ ኪቶ!" አክየ፡፡ 29. ጳውሎስ ለ"ኡዹዽ ዋክተ ያኮይ ዸዽ ዋክተል ኮያ ዲቦህ አከካህ ካፋ ይዋኒ ቶበም ኡምቢህ ታይ ይማዹዋኮ በሒህ ዮያ ባሊህ ያኮና መዔፉጎ ዻዒማክ"አኒዮ የ።

 30. ታሃምኮ ላካል ኑጉሥ፣ ረዳንቶከ በርኒቄል፣ ተንሊህ ዲፈይተህ ቲነ ሒያው ሙሉኡክ ኡጉተን፡፡ 31. ታማርከኮ የውዒኒህ አዲህ"ታይ ሒያውቲ ራባህ ያኮይ ማዹዋ ማድሲሳ ጉዳይ ማቢና"ኢስሲመን፡፡ 32. አግሪጳ ለ ፊስጦሱክ ታይ ሒያውቲ ቂሳሪያል ይግባይ ኢየዋዶ ናፃህ ያዳዎ ኪይይ ዪነ  የዽሔ፡፡

 ማዕራፋ 27

 ጳውሎስ አራሕ ሮማ ቱላል

  1. ጣሊያን መርከቢህ ያዳዎ ይምውሲነ ዋክተ ጳውሎስከ አኪ ቱምዹወም ኑጉሠ ነገሥቲ አውጉስጦስ ክፍሊህ ጦር አዳድ ይነ ዩልዮስ አክያን ቦልቲ አሞታል ዮሖዊን፡፡ 2. እስያ ባሕሪህ ዳራታል ታነ ወደባታል ታዲየ አድራሚጥዮን መርከብድ ነምሰፈረህ ነደየ፣ ተሰሎንቄል ማራ መቄዶኒያ ሒያውቲ አርስጥሮኮስ ለ ኖሊህ ይነ፡፡ 3. ኢብዻሒነ ሲዶና ማድነ፣ ዩልዮስ ጳውሎሱህ መዔቲያ ኪይነጉል ኢሲ ካኃንቶሊትድ የደየህ ካጉርሱሳ ሓቶ አካህ አቦና አካህ ይይፍቅደ፡፡ 4. ታማርከኮ ኡጉነህ ሓሓይቲ ነፍነፊል ኒሳባዓይ ይነጉል፣ ቆጵሮስ ደሴል ንጺጊዔህ መርከቢህ ኒኒ አራሕ ንቅጺለ፡፡ 5. ቂልቂያከ ጵንፍልያ ታፋል ያነ ባሕራል ታብነምኮ ላካል ሊቂያ ባዾል ታነ ሙራ ካታማ ማድነ፡፡ 6. ታማል ቦልቲ አሞይቲ ጣሊያን ደፍራል ታዴ እስክንድሪያ መርከብ ገየህ ተያድ ናምሳፋሮ አበ፡፡

  7. ማንጎ ለለዕ ቀስነህ ነደየ፣ ማንጎ መከራህ ቀኒዮስ ካታማ ታፍ ማድነ፣ ሓሓይቲ ነፍቱላል ናዲየምኮ ንደሰጉል ስልሞና ዳራቲህ ባሮኮ ትላይነህ ቀርጤስ ደሴት ጺግዔህ አብነህ ነደየ፡፡ 8. ማንጎ ጸገሚህ ጽግዔ ጽግዔህ ቲላይነምኮ ላካል ላሲያ ካታማህ ባሮል ገይምታ"መዔ ወደብ"አክያን ቦታ ማድነ፡፡

 9. ኒኒ አራሒህ አሞል ማንጎ ዋክተ ነይለየጉልከ ጾምቲ ዋክቲ ትላየሚህ ምክኒያታል ታይ ዋክተህ ባሕሪ አሞል ያዳዎና ዲንገት ኪይይ ይነጉል ጳውሎስ ሒያው ታህ የህ ተን ይሰጥንቅቀ፡፡ 10."ኮ'ሒያው! ካምቦኮ ላካል ያነ ናራሕ ዲንገት ለሚህ ዮህ ያምቡሉወ፣ ተመረምከ መርከብ አሞክ ታነም ዲቦህ አከካህ ሒያው ሂወቲህ አሞል ለ ናባ ቢያክከ ሊይ ማዳ፡፡"11. ቦልቲ አሞባዕሊ ለ ጳውሎስ ምክረኮ አጋናል መርከብ አዛዚከ መርከብ ዋና ያዽሒኒም አቢይ ዪነ፡፡ 12. ታማይ ወደብል ካርማ ኤልቲላሶና ያምሰመመዔቲያ ኪይይ ማናጉል ማንጎ ሒያው ሲኒ"አራሕ ይቅጽልኒህ ዽዒማህ የከምኮ ሰሜን አይሮዹማከ ደቡብ አይሮዹማ አይሮማሓት ኢፈይ ኤልያነ ፊንቄ አክያን ቀርጤስ ወደብ ማድነህ ካርማ ታማል ትላስኖይ"የኒህ ሓሳብ ካብ ኢሰን ፡፡             

  ባሕሪ አሞል ሀቦባለ /ማእበል/ ኡጉተ

  13. ዳጉ ደቡብ ሓሓይቲ ሳባዓህ ዩብሊን ዋክተ ይሕቢኒም ባሊህ አካህ ያከም የከሊኒህ ሲኒ አራሕ ያቃጻሎና ኡጉተን፡፡ ወደብኮ ኡጉተኒህ ቀርጤስ አፍኮ ጽግዔ ጽግዔ ትላየን፡፡ 14. ያከካህ ዳጎ ዋክተኮ ላካል"ሰሜን አይሮማሓ ሀቦባለ ሓሓይታ"አክያን ኃይላለ ማእበል ሓሓይቲ ደሴትኮ ኡጉተህ ባሕሪ ኡላኮ ኤድየመተ፡፡ 15. መርከብ ለ ዱፉምተጉልከ ሓሓይታ ታምካላካሎ ታንተጉል ቲባነህ ሓሓይታህ ዱፉማክ ነደየ፡፡ 16.ቄዳ አክያን ደሲየት ማካታህ አብነህ አዲህ ናባ ሔልዋያህ መርከብ ዛልባ ኒብዸህ ኒኒ ዓቅሚህ ዳባል ሃይኖ ዺዒነ። 17. መርከብ ባዒል ዛልባ መርከብ ኡላል ሂሪገኒህ የየዕኑምኮ ላካል መርከቢል ገመድ ይጥምጥሚን፣ መርከብ ሱርቲስ አክያን ሖፃ ለ ቦታል ራዳምኮ ማሲተኒህ ተንዳ አክ ይብዽይኒህ ሓሓይታህ ዱፉማክ የደይን፡፡ 18. ሀቦባለ ሓሓይቲ ኃይላህ ኖክ አስርክ የደጉል ኢብዻሒነ መርከብ አሞክ የመረህ ዪነ ኑዋይ ኢንከከቶህ ባሕራድ ዒዳናም ኤዸዺስነ፡፡ 19. ማዳሒ ለለዕ መርከቢህ ኤድ ያምጥቅሚን ኑዋይ ሲኒ ጋባህ አውርውርክ ዒደን፡፡ 20. ማንጎ ለለዕ ለ አይሮ ታኮይ፣ ሑቱክ አምቡሉወ ዋየንጉልከ ሓሓይቲ ኃይላህ ኖክ አቢታክ የደየጉል ካምቦኮ ላካል ናድኃኖ ማዽዕና ነህ ታስፋ ኑቁሩጸ፡፡

   21. ሒያው ኢንኪ ፈሎ ዻዓመካህ ማንጎ ለለዕ ሱገን፣ አማይጉል ጳውሎስ ተን ፋናድ ሶለህ ታህ አክየ፣"ኮሒያው! አኑ ሲናከም ቶቢኒህ ቄርጠስኮ ኡጉተኒህ ታኪንዶ ታሃም ኡምቢህያ ብያክ ልዪ ሲንማደ ማዻዺና፡፡ 22. ካዶሊህ መርክብ ዲቦህ ብያክተለካህ ሲን አሞል ኢንኪ ቢያክ ሲን ማደ ማለ፣ አማይጉል አይዱኩመያ፣ ማማይሲቲና፣ ኤዸሔህ ሲን አምክርክ አኒዮ፡፡ 23. ቲላየ ባር ካቲያ ኤከ አኑ፣ አይምልከ አምላክ ፋረ መልአክ ያፋል ሶለህ፣ 24."ጳውሎሶ! ማማይሲቲን ቄሳር ነፊል ሶልቶ ኮህ ኤዳ፣ ሀይከ ኮሊህ ታዲየም ኡምቢህ መዔፉጊ ኮያ ዮዋ የህ ራባኮ ተን አይድኅነ ለ የህ ዮድ ዋንሲተ፡፡ 25. አማይጉል ኮሒያው አይዱኩምኤያ፣ መዔፉጊ ታይ ዮክየ ጉዳይ ያይፍጽመም ካአሚነ፡፡ 26. ያኮይ ኢካህ ሓሓይቲ ኢንኪ ደሴቲህ ዳራታል በየህ ኒዒደ ለ፡፡" 

 27. አፋራምከ ታማን ባርቲያል መዲተራኒ ባሕሪህ ፋናል ሓሓይታህ አምጎጾውክ አድይክ ባርቲ ዓዻክ አሞል መራክብ ለ ባዾ ቱላል ካብ የኒም የከሊን፡፡ 28. አማይጉል ባሕሪ ኣዳ አካህ ያልክዒን ገመድ ዒደንጉል፣ ባሕሪ አዳ ሞሮቶም ሜትሮቲያ ተከህ ገይምተ፣ ዳጎም ሱገኒህ አካህ ያሊክዕንቲያ ጋባዔኒህ ዒደን ዋክተ ሦዶም ሜትሮቲያ አዳህ የከህ ገን፡፡     29. ኒመርከብ ባሕሪ ዳራታል ያነ ዻይትሊህ ታምጎጾወምኮ ማይሲተኒህ መርከብኮ ሣራቱላል አፋራ መልሕቅ ባሕራድ ይብዽይን፣ ታሃምኮ ላካል ባር ቲላየህ ለለዕ አካህ ያማቶ ጻሎት አቦና ኤዸዺሰን፡፡ 30. ማራክብቲ ባዒል መርክብኮ የውዒኒህ ኩዶና ጉረኒህ ይኒኒጉል መርከብ ነፍኮ መልሕቅ ዒዳማራህ ይሚግዲኒህ መርከብ አሞክ ቲነ ዛልባ ባሕራድ ዒደን። 31. ታማይ ዋከተ ጳውሎስ ቦልቲ ኃላቃከ ወታሀደሪክ"ታይ መርከብ ባዒል መርክቢድ ዩዕሩፊኒህ ዲፈየ ዋየኒመኮ አቲን ታድኃኖና ማድዒታን"አክየ።          32. አማይጉል ወተሀደር ዛልባ ይቢዸህ ዪነ ገመድ ይግሪዒኒህ ጸለል ቶዋ ሐበን።  33. ሑገ ማሕቶ ተጉል ኡምቢህ ሚግበ በቶና ጳውሎስ ተንዳዒመ፣ ታሃም አክየ፣ ኢንኪም ሚግበኮ በተካህ ኢላሎድ ሱግተኒምኮ ታህ ካፊ አፋራምከ ታማን ሲን ለለዕቲያ ኪኒ፡፡ 34. አማይጉል ኢላው በቶና ሲን ዻዒማክ አኒዮ፡፡ ታሃም ኃይላ ሲናህ አሓየ ለ፣ ያኮይ ኢካህ ኢንኪ ዓይነቲህ ቢያክ ሲን ማደ ማለ፡፡ 35. ታሃም አክየምኮ ላካል ኢንገራ ይይኩዔህ ኡማንቲ ነፊል መዔፉጎ ይምስጊነህ፣ ዩቅሩሰህ በታናም ኤዸዺሰ፡፡ 36. ታማይ ዋክተ ኡምቢህ የምጸነነዒኒህ ፈሎ በተን፡፡37.መርከብ አዳድ ጠቅላላህ ላማ ቦል ማልሕንቶሞንከ ሊሕ ሒያውቲያ ይኒን፡፡ 38. ኡምቢህ በተኒህ ሓይተኒምኮ ላካል የመረህ ዪነ ሲራይ ባሕራድ ዒደኒህ መርከብ ዒልሳ ይይሲስኪን፡

                                                     መርከብ ትግዲለ

  39. ማሒ የከ ዋክተ ማደን ቦታ ማዻጊኖን፣ ያከካህ ሖጻ ዳራታል ለ ባሕሪ ዋሳን ዩብሊን፣ ዺዒማም የከኮምኮ መርከብ ታማህ ዱፉዎና ይሕሲቢን፡፡ 40. መልሕቅ ዩንሑውኒህ ባሕሪ አዳድ ዺዺየን፣ ታማይ ዋክተ ለ አካህ ያቅዝፊን ገመዳ ዩንሑዊኒህ፣ ታውላኮ ታነ ተንዳ ሓሓይቱላል ናውሰኒህ ባሕሪ ዳራል ያውዖና የደዪን፡፡ 41.ያከካህ መርከብ ሖጻ ኩልሳስሊህ ቶምጎጾወህ ኡሎል አፋህ ጋሚመተ፣ ነፊህ ጉባል ትምትክለህ አምነቀነቀ ሒንተ፣ ሳራቱላኮ ለ ሓሓይቲ ማእበሊህ ዱፉዮኮ ኡጉተምህ ታጋዳሎ ኤዸዺሰ፡፡

   42. ቱምዹወምኮ  ኢንከቲ ኡካ ጊሪሰህ ያሳላሞ የቲያ ወታሀደር ያግዳፎና ይሕሲቢን፡፡ 43. ቦልቲ አሞይቲ ጳውሎስ ያይዳኃኖ ጉረጉል ተን ሓሳብ ማጋራይና፣ ኤረ ጊሪሶ ዽዕታም ዮኮሚኒህ መርከብኮ ባሕራድ ፍዺታክ ባዾል ያውዖና ይኢዚዘ፡፡

   44. ራዕተም ለል ሳንቃከ መርከብኮ ቲግድለሚህ አሞል የኪኒህ ያውዖና ይኢዚዘ፣ ታይ ኩነታታህ  ሙሉኡድ ናጋድ ባዾ ማደን፡፡

ማዕራፋ 28

ጳውሎስ ማልታ ደሴትል

  1 .ባዾ ናጋድ ማድነምኮ ላካል ማድነ ደሴት ማልታ አክያንቲያ ኪናም ነዸገ፡፡ 2. ታይ ደሴቲል ማርታም ታምድንቀ መዕነ ኖህ አበን፣ ታማይ ዋክተ ለ ሮብ ራደጉልከ ጋላዖ ቲነጉል ጊራ ቦሎሊሰኒህ ኖህ ጋራየን፡፡ 3. ጳውሎስ ቃሳም የስከሄለህ ጊራድ ዒዳህ ላዕናኮ ኡገተሚህ ኢንኪ ዓሮራ ተውዔህ ጋባክ አሞል ትዺቢሰህ ጠልጠል አከተ፡፡ 4. ማልታ ሒያው ዓሮራ ጳውሎስ ጋባህ አሞል ጠልጠል ተህ ዩብሊን ዋክተ"ታይ ሒያውቲ ዓዲህ ናብሰ ገዳይ ኪኒ! አይሚህ ባሕሪ ማእበልኮ ናጋድ የውዔሚህ ፊርዲ አምላኮ የወዔህ ሂወቲህ ማሮ ማዽዒና"ኢሲሲመን፡፡ 5. ጳውሎስ ለ ዓሮራ ጊራድ ዒደህ ኢንኪ ብያክ ካ ማደካህ ራዔ፡፡  6 .ሒያው"ካዶኮ ካዶል ሰውነት አክ ዱዱበ ለ ወይ ዲንገቲህ ራበህ ራደ ለ"ያናማህ ኢላላይ ዪኒን፡፡ ያኮይ ኢካህ ማንጎ ዋክተ ኢላለኒህ ኢንኪ ብያክ ካማማድናም ዩብሊንጉል ሓሳብ ይልውጢኒህ "ታይቲ አምላክ ኪኒ!"የን፡፡

  7. ታማል ኤድይነ ቦታህ ባሮል፣ ደሴትድ አማሓዳሪ ፑፕልዮስ ባዾ ቲነ፣ ታይ ሒያውቲ ኢሲ ድኪድ ኒጋራየህ አዶሓ ለለዕ መዔ ዒለህ ንየስተነገደ፡፡ 8. ታማይ ዋክተ ፑፕልዮስ አባ ቱከሳትከ ጋርቢ ጋሕናን ካይብዸህ ላሑተ ዺነህ ዪነ፣ ጳውሎስ ካያድ ሳየህ ጻሎት አበ፣ ጋባ አሞክ አክሃየህ ኡሩሰ፡፡ 9. ታሃም ተከምኮ ላካል ደሴትል ማርታ አኪ ዳላክን የመቲኒህ ኡረን፡፡ 10. ሒያው ማንጎ ገጸበረከት አካህ ባሄኒህ ማንኮ ሲኒ ክብረ ኖህ ይግሊጺን፣ መርከብህ ናዳዎ ኡጉነጉል ኒጉርሱሳም ኡምቢህ መርከብ አሞክ ኖህ የሪን፡፡

     ጳውሎስ አራሕ ማልታኮ ሮማ     

   11. አዶሓ አልሳ ማልታል ሱግነምኮ ላካል ካርማ ደሴቲል ቲላሰ እስክንድሪያ መርከቢህ ነምሰፈረህ ኡገነ፣ መርከብ ዲዮስቆሮስ አክያን ጋንጋ አማልክቲ አርማ ልይቲነ፡፡ 12. ስራኩስ ካታማ ማድነ ዋክተ ታማል አዶሓ ለለዕ ዲፈይነ፡፡ 13. ታማርከኮ ባሕራል ነደህ ሬጊዩም ማድነ፣ ታማል ኢንኪ ለለዕ ቲላስነምኮ ሳራህ ደቡብ ሓሓይቲ ዮቶከጉል ማላሚ ለለዕ ፑቲዮሉስ ነደየ፡፡ 14. ታማል አማንቲ ገይነህ ተንሊህ ማልሕና ለለዕ ድፈይኖ ኒዻዒመን፣ ታሃምኮ ላካል ሮማቱላል ነደየ፡፡ 15. ሮማል ታነ አማንቲ ኒዳዓባል ዮቢንጉል አይከ አፍዮስ ዓዳጋከ"አዶሕቲ ማሔና"አክያን ቦታ ፋናህ ኒጋራዎና የመቲን፣ ጳውሎስ ተና ዩብለ ዋክተ መዔፉጎ አይምስግኒክ ይመጸነነዔ፡፡

                                            ጳውሎስ ሮማል

  16. ሮማል ሳይነጉል ጳውሎሱህ ኢንኪ ዻዉዻ ወታሃደርቲ አካህ ዮምሖወህ ዲቦህ ያኮ አካህ ይምፍቂደ፡፡

 17. አዶሓ ለለዕኮ ላካል ጳውሎስ ሮማል ማርታ አይሁድ ናባ ሒያው ደዕሲሰ፣ የከሄልንጉል ታህ አክየ፣"ይሳዖሎ! እስራኤል ትዝቢህ አሞልከ አቦብቲቲህ ዓይዳህ አሞል አበ ኢንኪ በደል ሚያነ፣ ያኮይ ኢካህ ኢየሩሳለሚል ኡምዹወህ ሮማውያናህ ኦምሖወ፡፡ 18. ሮማውያን ይምርምሪኒምኮ ላካል ራባህ ያስቅፂዔ ምክኒያት ዮድ ዋየንጉል ናፃህ ይዽዺዮና ይሕስቢኒህ ዪኒን፡፡ 19. አይሁድ ለ አኑ ናፃህ አድየምኮ ይየምቀወሚን ዋክተ ቄሳራል ይግባይ ኦዋ ኢምግዲደ፣ ያኮይ ኢካህ ኢኒ ህዝበ አካህ አክሲሰ ጉዳይ ሊክ ማናዮ፡፡ 20. ካዶሊህ ሲን ደዕሲሰም ታብሊኒም ባሊህከ ታሃሞም ለ ሲናክ ኦዋ ኪኒ፣ አኑ ታይ ሰንሰሊህ ኡምዹወም ኤስራኤሊህ ቶምሖወ ታስፋህ ምክንያታል ኪኒ፡፡

 21. ኢሲን ታህ የኒህ ኤልደሄየን፣ ይሁዳ ባዾኮ ኩዳዓባል ትምጽሕፈ ደብዳበ ኒማማዲና፣ ታህ ተመተ ሒያውኮ ኢንከቲ ኩዳዓባል ኡማም ዋሪሳ ቲያ ያኮይ ዋንሲታ ቲይ ሚያነ፡፡ 22. ታይ አቱ ታክቲለ ሃይማኖት ክፍሊ ኢሲሲ ቦታል ሒያው ታምቆወመም ናዽገ፣ አማይጉል ኩሓሳብ አይም ኪናም ናቦ ጉርና፡፡

 23. ለለዕ አካህ ሎወኒምኮ ላካል ማንጎም የኪኒህ ካድኪህ የመቲን፣ ኡሱክ ለ ዻሒነኮ ካሶ ፋናህ መዔፉጊህ ማንግሥቲህ ዳዓባል አምስክሪክ ኢሲ ሓሳብ አካህ ዮሖወ፣ ሙሴ ሕገከ ነብያት ማጻሒፍቲኮ አጥቅሲክ ኢየሱስ ዳዓባል ይሪዲኤ፡፡ 24. ጋሪጋሪ ኡሱክ ዋንሲተ ቃል የመኒን፣ ጋሪ ለ ማማኒኖን፡፡ 25. ኢሲን ለ ሲነሲነህ አምሰመመዔካህ ባዽሲመን፡፡ ጳውሎስ ባክቶል ዋንስታህ ታህ የ፣"መንፈስ ቁዱስ ነብይ ኢሳይያስህ ዳዓባል ሲና አቦቡህ ዋንስተም ትክክል ኪይይ ቲነ፡፡ 

        26. ዋንስተ ቃል ታይቲያ ኪኒ፣

            'ታይ ህዝበድ አዱዋይኪ ሞቦ አብክ ታኒን፣ 

              ለ ማታስትውዒሊን፣ 

              ሙቡል አብልክ ታኒን ለ አፍዓዶ ማብታን አክየ፡፡ 

       27. አይሚህ ለ ታይ ሒያዊህ አፍዓዶ ትድንዲነ፣ 

            ተን አይቲት ቲምዲፊነ ፣ 

            ተን ኢንቲት አልፍምተ፣

            ታሃም አከዋይታዶ፣

            ሲኒ ኢንቲህ ዩብሊኒህ፣ 

            ሲኒ አይቲት ዮቢኒህ፣

            ሲኒ አፍዓዶህ ይስትውዒሊኒህ፣

            ዩላል ጋሔኒህ ተን ኡሩሶ ኪይክ ኢነ፡፡' 

    28. አማይጉል መዔፉጊህ ድኅነት ፋሮህ አረማውያናህ ፋሪመም ኢዺጋ፣ ኢሲን ለ መዔ የኒህ ጋራያን፡፡ [29."ጳውሎስ ታሃም ዋንስተምኮ ላካል አይሁድሊህ ኃይላህ አምከርከሪክ ታማርከኮ የውዒኒህ የደይን፡፡"] 

   30. ጳውሎስ ኤድ የምከረየ ዓረድ ላማ ኢጊዳ ሙሉእ ድፈየ፣ ካኡላል ታሚተ ሒያው ሙሉኡክ ጋራይ ዪነ፡፡ 31. መዔፉጊህ ማንግሥት አስብኪከ ማዳራ ኢየሱስ ክርስቶሲህ ዳዓባል ኢንከቲ ካ አይሰነከለካህ ዲፍረቲህ አይሚሂሪህይ ዪነ፡፡