ኤደዶይታ መልእክት ጢሞቴዎሱል

ኤዸዾይታ ሐዋርያ ጰውሎስ መልእክት     

ጢሞቴዎስ ሒያውህ ኡላል

ሳይማ  [ዸ ዹ ዺ ዻ ዼ ዽ ዾ]

   ጢሞቲዮስ አክያን ዕንዻነይቲ ክርስቲያንቲይ፣ ኡብካህ ዒንዻ እሰያህቲያ የከህ ኢናህ አይሁዳ፣ አባ ለ ግረካታ ኪይይ ይነ፣ ጳውሎስ ዶባይቶከ ወንጌል ተልአኮህ ለ ካብያ ካሓተና /ጎሮን/ ኪይይ ይነ። ጳውሎስ ጢሞቴዎሱህ ይጽሒፈ ኤዸዾይታ መልእክት አዶሓ ዋና ዋና ጉዳይህ አሞል አቱኩሪይ ቲነ። ኡማኒሚኮ ዩሱኩመ መልእክት ሞሶዓሪ አዳድ ኡገተህ ቲነ ድራብቲ ሚሂሮ ታስጥንቅቀቲያ ኪይይ ቲነ፣ ታሃም ለ ገዸንታ ኪን ሚሂሮ ክፍለህ አይሁድ፣ ውሊ ወገኒህ ለል አረማውያን ሓሳብ ትብዸቲያ ተከሚህ "ያምቡሉወም ዓለም ኃጢአታህ ይምርዘህ ይነጉል ድኅትነት ገይሞ ዺዒማም ዲቦህ ኪን ምሥጢራው ኢዽጋህከ ውልውል ምግብትከ ኃ\ሓዶርኮ ዻዉዹመኒህ ኪኒ" ያዸሔ ሓሳቢህ አሞል ይምሥርተህ ኪኒ፣ ወሰክህ ለ መልኢክት ሞሶዓሪ አማሓዲራህ ዳዓባልከ አምልኮ ሠርዓቲህ  ምሂሮህ  መምረሒ፥ ታማም ባሊህ ሞሶዓሪ መራሕትህከ ተን ሓታም  ኪናም ያሎና አካህ ኤዳ ጠባይ ታይስዽገም ትብዸቲያ ኪኒ፡፡ ባክቶህ ለ ጢሞቴዎስ፣ ኢየሱስ ክርስቶሲህ መዔ አገልጋሊ አይናህ የህ ያኮ ዺዓምከ ኢሲ ማኅበሪህ መእመናንሊህ ለ ኃላፍነቲህ ጳውሎስ ዮሖወ ምክረ ገይና፡፡

-----------------------------------------------------

 ማዕራፋ 1

   1. ኒኡሩሰና የከ መዔፉጎከ ኒታስፋ የከ ኢየሱስ ክርስቶስህ ቲኢዛዛህ ኢየሱስ ክርስቶስህ ሐዋርያ የከ ጳውሎስ፡፡ 2. ኢምነቲህ ሓቂ ይባዻ የከ ጢሞቴዎስ፣ ናባ መዔፉጎ፣ ኒማደራ ኢየሱስ  ክርስቶሲህ ጸጋህከ መሕረትህ ሳላም ያኮይ፡፡

ዲራብቲ ምሂሮኮ  ሰሊታ /እጠንቂቃ/

    3. መቄዶንያ አድክ አነሃኒ ሓደራ ኮከምባሊህ ኤፌሶኑል ዲፈይ፣ ታማል ታነ ውልውል ሒያው ዲራብቲ ሚሂሮ ያይምህሪኒምኮከ፣ 4. ተረትከ ባክቶ አላዋታ ዋላዶ ሎዉድ ጋሐናምኮ ተን ኢኢዚዝ፤ ታይ ጉዳይ ክርኪር ባሃካህ ኢምነት ያከ መዔፉጊህ ሢራሕህ ምያምጥቅመ፡፡ 5. ታይ ቲኢዛዚህ ዓላማ ለ ጺሪይ አፍዓዶህ፣ መዔ ኅልናህ፥ ሓቂ ኢምነትኮ ገይማ ካሓኖ ኪኒ፡፡ 6. ውልውል ሒያው ታይ ጉዳይኮ ባዽሲማናህ ካንቶ ኪን ክርክርድ ጋሓን፡፡ 7. ታሃሞም አብታም ለ ሙሴ ሕጊህ መምህራን ያኮና ጉርታም ኪኒ፣ ያኮይ ኢካህ ዋንስታናም ምያዽጊን ወይ ትክክል ኪኖን አክያን ጉዳል ምያስትውዒልን። 8. ሒያውቲ ኤዳ ዒለህ ኤል ሢራሔምኮ፣ ሕጊ መዔቲያ ኪናምን ናዺገ፡፡ 9. ታማምባሊህ ሕጊ ሢራሕመም መዔ ሒያዋህ ማኪም ናዺገ፥ ሕጊ ሢራሕመም ዓማፀይናህከ ወንገለይናታታህ፥ ካሓድያንከ ኃጢአት ለሚህ፣ ቅድስና አለዋይታማህከ መንፈሳው ጉዳይ ዻይታማህ፥ አባከ ኢና ታግድፈሚህከ ነብሰ ገዳያታህ፥ 10. አምንዘርቲህከ ኃዶይታ ግብረ ላበቶሊህ አብታ ላበቶህ፣ ሒያው ታቢሔ ነጋዶህከ ዲራብልቲህ፣ ዲራባህ ዺውታማህከ ሓቂ ምህሮህ ተጻይ ኪን ጉዳይ ኡማንጉል አብታማህ ኪኒ፡፡ 11. ታይ ሓቂ ሚሂሮ ገይምታም ትምስጊነ ፉጊ ክብረ ያይብሢረ ወንጌሊህ ኪኒ፣ ታይ ወንጌል ዮያህ ሓዳራህ  ዮምሖወ ቲያ ኪኒ፡፡

ጳውሎስ መዔፉጎህ ይስቅርበ ምስጋና

   12. ዮያ አገልግሎቱህ ይረድሰህ ያምእምነቲያ አኮ ይዽዕስሳ ኃይላ ዮህ ሖዮወ ማዳሪ ኢየሱስ ክርስቶስ አይምስጊነ፡፡ 13. ኢንኪጉል ኡካ ታሃምኮ ባሶህ ክርስቶሱህ ዋትመቲያከ  የይሰደደቲያ፣ የይወረደቲያ ኤከሚህ፣ ኡሱክ መሕረት ዮህ አበ፣ አይሚህ ታሃም ኡምቢህ አበም ሶዻህከ ኢምነት ዋይቲህ ክይክ ኢነ፡፡ 14. ኢየሱስ ክርስቶስሊህ ሊኖ ኢንኪኖህ /ኅበረትህ/ ምክንያታህ ገይማ ኢምነትከ ካሓኖህ መዔፉጊህ ጸጋ ጋዳህ ዮህ ተመንገ፡፡      15. ኢየሱስ ክርስቶስ ኃጢአት ለም ያይዳኃኖ ዓለም ዻጋህ የመተ ያዽሔ ቃል፣ ሓቂ ሒያው ኡምቢክ ጋራዎና ኤዳም ኪኒ፣ ኃጢአት ለምኮ ኡምቢህ ግድድ ኃጢአት ለቲይ ዮያ ኪኒ፡፡ 16. ያከካህ መሕረት ዮህ የከ፣ መሕረት ዮህ የከም፣ ኢየሱስ ክርስቶስ ዳራት አለዋታ ትዕግሥቲህ ኡማንቲያኮ ግድድ ኃጢአተይና ተከ ያሞል ይስቡሉወም ካያል ታሚነሚህከ ኡማንጉሊት ሂወቲል ገይምታማህ ምሳለ አኮ የህ ኪኒ፡፡ 17. አማይጉል ኡማንጉሊ ኑጉሥ የከ፣ አምቡሉወ ዋ ኢንኪ አምላክህ ክበረከ ምሰጋና ኡማንጉሉህ ታኮይ አመን፡፡               18. ይባዻ ጢሞቴዎሶ! ታሃምኮ ባሶህ ኩባርካታህ ትንብት ዋንስተሚህ መሠረቲህ ታይ ትኢዛዝ ሓደራህ ኮህ አሔክ አኒዮ፣"ትንብት አክትልክ መዔ ውጊእ ኤምወገእ"፡፡19. ኢመነትከ መዔ ኅሊና ኤላይ፣ ውልውል ሒያው ተን ኅልናል አክ ተመተሚህ ሲኒ ኢምነት ያይለይን፡፡ 20. ተን ፋናድ ሄሜኖዎስከ እስከንድር ገይማን፣ ኢሲን ፉጊ አሞል ዋቶ ቃል ዋንሲታናም ሓባናም ያማሃሮና ሰጣናህ ትላሰህ ኦሖወም ኪኖን፡፡

ማዕራፋ 2

ሞሶዓሪ ጻሎት

   1. አማይጉል መዔፉጎል ዻዒምቶህ፣ ጻሎቱህ፣ አማሕጻነህ ምስጋናህ ሒያዋህ ኡምቢህ ያኮ ኡማኒሚህ ባሶል አምስክሪክ አኒዮ፡፡ 2. መንፈሳውነትከ መዔ ሓላህ አምርሒክ ሳላምከ ቅንዒናህ አምሪሕክ ባዽሳህ ነገሥታትከ ሢልጣን አሞል ታነሚህ ሙሉኡድ ጻሎት አባ፡፡ 3. ታሃም ኒያይድኂነ መዔፉጊህ ነፊል መዔምከ ኒያቲሳ ጉዳይ ኪኒ፡፡ 4. አይሚህ መዔፉጊህ ዲላይ ሒያው ኡምቢህ ታድኃኖናከ ሓቀ ታዻጎ የህ ኪኒ፡፡ 5. ፉጊ ኢንከቶ ኪኒ፣ ፋንቲ ባዕላ የከህ መዔፉጎከ ሒያው ዋጋሪሳቲ ኢንኪቶ ኪኒ፣ ኡሱክ ሒያውቶ የከ ኢየሱስ ክርስቶስ ኪኒ፡፡ 6. ሒያው ሙሉኡክ ኃጢአትኮ ያይዳኃኖ ኢሲ በዻ በዳ አበህ ዮሖወቲ ካያ ኪኒ፣ ታሃም ትክኪል ኪን ዋክቲ ማዳጉል መዔፉጊ ያይዳኃኖ ጉራም ያይርድኤ ማስኪር ኪኒ፡፡ 7. አኑ ሓቀከ ኢምነት አይበሣሮ ሐዋርያከ መምሂር ኤከህ አረማውያናህ ፋርቲመም ታይ ምክንያታል ኪኒ፣ ታሃሞም አይህ ሓቀ ዋንሲታክ አኒዮካ ማደራብታ፡፡  .     8. አማይጉል ኢስስ ቦታል ታነ ላበቶ ቁጡዓከ ናዓቦ ሚሪሕ ኢሰኒህ ትምቅድሰ ሲኒ ጋቦብ አጋናል ኡገሠኒህ ጻሎት አቦና ጉራክ አኒዮ፡፡ 9. ታማም ባሊህ አጋቢ ዳጋር ሢራሕተኒህ ያኮይ ዋርቀ ያኮይ ኡንዹዽ ያኮይ ኩቡር ኪን ሣራህ ዓዻ የምዒኒህ አከካህ፣ ሖላህከ ትሕትናህ ኤዳ ሣራ ሀሲቶናይ፡፡ 10. መዔፉጎ ናይምሊከ ታዸሔ ሳዮ አቦና አካህ ኤዳ ዓይነት መዔ አራሓህ ዓዻ ያምዖናይ፡፡ 11. ሳይጉደይታ ትብያናምከ ያምእዝዝንም  ታማሃሮይ፡፡ 12. ሳይጉደይታ ባዻ ታይማሃሮ ወይ ባዽ አሞል ሢልጣን ታሎ ማፍቂደ፣ ኢሲ ቲብቶዋ ኤዳ። 13. አይሚህ ኤዸዾይታህ ይምፍጥረቲ አዳም ኪኒ፣ ላካል ሔዋን ትምፍጢረ፡፡ 14. ለል ተምተለለቲያከ መዔፉጊህ ሕገ ትፍሪሰቲያ ሳይቲያ ኪኒ ኢካህ የምተለለቲ አዳም ማኪ፡፡ 15. ያኮይ ኢካህ ሳይጉደይታ ኢምነትከ ካሓኖህ ቅድስናህከ ትሕትናህ ማርታጉል ኢሮይታ ዻልተርከህ ታድኂነ፡፡

ማዕራፋ 3

ሞሶዓሪ መራኅቲ (ኤጵስ ቆጶሳት)

    1. ኢንኪ ሒያውቲ "ሞሶዓሪ መራሒ ያኮ ጉረምኮ ኩቡር ሥራሕ ያትሚኔ" ያዽሔ ቃል ሓቀ ኪኒ፡፡ 2. አማጉል ሞሶዓሪ መራሒ ታህ ያኮ አካህ ኤዳ፣ "ናቀፋ ሂንቲያ፣ ኢንኪ ኑማ ጥራህ ኦርብሰቲያ፣ መጠኒህ ማራቲያ፣ ኢሰ ያምሪሔቲያ፣ ሠርዓታህ ሥራሓቲያ፣ ገዸንታ ጋራያቲያ፣ ያይማሃሮ ዽዕለቲያ፣ 3. አስኪረዋቲያ፣ አምጸቀጸቀ ዋቲያ፣ ጋርሄ ለቲያ፣ ሳላም ለቲያ፣ ማል አክሒነ ዋቲያ፣ 4. ኢሲ በተ ሰብ ኤዳ ዒለህ ያይማሓዳሮ ዺዓቲያ! ዻይሎ ክብረህ አካህ ታምኢዝዘቲያከ ይክብረቲያ፡፡" 5. ሒያውቲ ኢሲ በተ ሰብ ያማሓዳሮ ዽዔዋቲያ የከምኮ፣ መዔፉጊህ ሞሶዓረ አይናህ ኢሰህ ያማሓዳሮ ዺዓ! 6. ትዕብቲህ ሓፉወህ ዲያብሎሱል ይምፍርደም ባሊህ ኤል ያምፍርደምኮ፣ ዑሱብ ክርሰቲያንቲ ሞሶዓሪ መራሒ አከዋዎይ፡፡ 7. ናቃፋከ ሰጣን ማጻወድህ አዳድ ራዳክ፣ አምነዋይታ ሒያውሊህ መዔ ሚጋዕ ያሎ ጉርሱሳ፡፡                                    

                                      ዲያቆናት ዳዓባል

   8. ታማም ባሊህ ዲያቆናት ትክቢረምከ ሲኒ አፋህ ታምኢሚነም፣ ማንጎ ወይኒ መስ አዑበዋይታም፣ ማላህ አምሆጎጎወ ዋይታም ያኮና ኤለታነ፡፡ 9. ታማም ባሊህ ኢምነት ምሥጢር ጺሪይ ኅልናህ ዻዉዻም ያኮና ኤልታነ፡፡ 10. ኢሲን ለ ኤዸዾይታህ ያምፋታኖ ናይ፣ ታማምኮ ላካል ናቃፋ ሂናም የኪኒህ ገይመኒምኮ ድቁና ሥራሓህ ያስጋልጋሎናይ፡ 11. ታማም ባሊህ ተን አጋቢ መዔ ሓል ለምከ ሒያው ሓምተ ዋይታም፣ መጠኒህ ማርታም ኡማን ጉዳይኮ ታምኢሚነም ያኮና አካህ ኤዳ፡፡ 12. ዲያቆናት ሲነሲነህ ኢንኪ ኑማህ ባዒል፣ ያኮና አካህ ኤዳ፣ ሲኒ ዻይሎከ በተሰብ ለ መዔ ዺብዾህ ታይመሔደረም ያኮና ኤልታነ፡፡ 13. ድቁና ሢራሓህ መዔ አገልግሎት ታሓየም ናው የ ማዓሪግ ጋያን፣ ኢየሱስ ክርስቶሱሊህ ሎን ኢምነቲህ ዋንስቶና ዲፍረት አለሎን፡፡

ናባ ምሥጢር

  14. ታይ መልእክት ኮል አጽሕፊህ አፍተህ ኩላል ኤመተህ ኩአብለሚህ ታስፋ አባክ ኪዮ፡፡ 15. ዓየሚህ መዔፉጊህ በተሰቢህ ፋናድ፣ ሒያው አይናህ ተህ ማርቶ ዺዒታም ታዻጎ ኢጽሒፈህ አኒዮ፣ ታይ በተሰቢህ ሓቂ ዓምዳከ ሪሚድ የከህ ያነቲይ መዔፉጊህ ሞሶዓረ ኪኒ፡ 16. ኒሃይማኖቲህ ምሥጢር ታምጥርጢረም ኣለዋ ናባቲያ ኪኒ፣ ኡሱክ ለ ክርስቶስ ዳዓባል ዋነሲታ፣"ሒያውቶ ኪናማህ ዩምቡሉወ፣ ካሓቂ መንፈሲህ ይምዸገ፣  ማላይካህ ይምቡሉወ ቲይ፣ ዓለሚል ታነ ሒያው ኤልተመነ ቲይ፣ክብረህ ዓራናል የውዔ"ታም ኪኒ፡፡           

ማዕራፋ 4

ድራብቲ መምሂራን

    1. መንፈስ ቁዱስ ለ ግልጸህ ታህ ያ፣ "ሣራ ዳባን ውልውል ሒያው ታስገገየ መናፍስትከ አጋኒኒቲ ሚሂሮ አክቲልክ ሃይማኖት አክሒደሎን፡፡"2. ታይ ዓይነቲህ ትምሂርቲኮ ታፍልፊለም ግብዝናህ ዲራብ ዋንሲታህ ላዒን ብርታህ ሪየንም ባሊህ ተከህ ትድንዚዘ ተን ኅሊና ተን አውቅሰ ዋይታ ሒያው ኪኖን፡፡ 3. ታህ ኢግዲን ሒያው ሓዳር ካሊታን፣ ታምነምከ ሓቀ አዽገዋይታ ሒያው መዔፉጎ አይምስጊኒክ ያማጋቦና አካህ ይፍጥረ ምግበ "ማበቲና" አይክ ተን ደሳን። 4. ያኮይ ኢካህ መዔፉጊ ይፍጥረ ጉዳይ ኡምቢህ መዔም ኪኒ፣ ምስጋናሊህ በተንምኮ ኢንኪ ዒዳን ጉዳይ ማለ፡፡ 5. አይሚህ መዔፉጊህ ቃላህከ ጻሎቱህ ትምቅድሰም ያኪን፡፡                        

ክርስቶስ መዔ አገልጋሊ ያኪኒም

   6. ታይ ሚሂሮ አማንቲ ታይስዽገጉል፣ ኢምነት ቃልከ መዔ ትምህርቲህ አምጊቢክ ዓርተህ ኢየሱስ ክርስቶስህ መዔ አገልጋሊ ኪቶም ታይምስኪረ፡፡ 7. ማሚንቲ ተረቲህ ኢጊድ ኢንኪ ጥቅም አለዋ ዓለም ሀብቲህ ታሪኮ ሚሪሕ ኤይ፣ መንፈስ ጉዳይ ኢሳሞ ኤስገል፡፡ 8. አይሚህ አካል ያይስሪየ ትምህርቲህ ሲነ ያስገልኒሚህ ጥቅሚ ዒንዻቲያ  ኪኒ፣ ሲነ መንፈሲህ ጉዳህ ያስገሊኒም ለ ካድቲያል ያኮይ ያሚተ ሂወቲል ታስፋ ለጉል ኡማን ጉዳህ ያጥቅመ፡፡ 9. ታይ ሞዽሖ ሒያው ኡምቢህ ጋራቶ ኤዳ ሓቂ ጉዳይ ኪኒ፡፡ 10. ናኑ ለ ናንዱፉለምከ፣ ሥራሓህ ሓዋልናም ታሃማህ ኪኒ። አይሚህ ናኑ ታስፋ ኤል ዒድናም ሒያው ኡምቢህ ማንጊህ ያምንኒም ሙሉኡክ ያይድኂነ ያነ አምላካህ ኪኒ፡፡                   11. ታይ ጉዳያት እኢዚዝ፣ ኢይምሂር ለ፣ 12. ዒንዻነይታ ኪቶርከህ ኢንከቲ ኩዻይተ ዋዎይ፥ ጋዳህ ዋኒህ፣ ናብራህ፣ ካሓኖህ፣ ኢምነትከ ፂራየህ ኡማንቲያህ መዔ ምሳለ ቲክ፡፡ 13 አኑ አሚተም ፋናህ ቁዱሳት ማጻሕፍቲ ሂዝበህ አይንብብክ፣ ታስባኮከ ታይማሃሮ ኢትጊህ፡፡ 14. ትንብት ኮህ ዋንስታን ዋክተከ ሞሶዓሪ ስማጊለ ለ ጋቦብ አሞል ኮክ ሃያን ዋክተ ኮህ ቶምሖወህ ኮሊህ ታነ መንፈሳው ገጸበረከትኮ /ሂያብኮ/ ማዛንጋዒን፡፡ 15. ታይሰም  ሒያው ኡምቢህ ያብሎና፣ ታይ ጉዳያህ ኢትጊህ፣ ታይ ጉዳይ ለ ሢራሕ አሞል አሲሳክ ኢሲ ሰውነት ሙሉኡድ ተናህ ኡሑይ፡፡ 16. ኢሲ አሞህከ አይማሃርቲ ሥራሓል ሲኪ ኤይ፣ አይሚህ ታሃም አባህ  ኢሰከ ኩታበም ለ አይድኅነሊቶ፡፡                                                                 ማዕራፋ 5

    ማሚኒህ ዮምሖወ ምክሪ ዳዓባል

   1. ስማግልት ኢሳባ ባሊህ አባይ ኢምክር ኢካህ ማጋሣጽን፣ ጎምቦለ ላበቶ ኢሲ ሳዖል ባሊህ፣ 2. ዳዖን፣ ኢኖን ባሊህ አባይኪ ኡቡል፣ ታማም ባሊህ ዕንዻነትቲ ሳይዮ ኢሲ ሳዖል ባሊህ አባይክ ፉጹም ኪን ፂሬቲህ ተን ኡቡል፡፡                                                   3. ዓዲህ ማሚን ተከ ሳይዮ ኢስክብር፡፡ 4. አኪናን ማሚኖ፣ ዻይሎ ወይ ዻይሎ ዻይሎ ተለምኮ፣ ታይ ኢሮህ ኡይሱኩማይ ተን በተሰቢህ ሒያዋህ አካህ ያጥንቅቅኒም፣ ተን ዻልቶይትከ ተን ናባ ወለድህ ልካሕ ደሄዮና ኤዳ መንፈሳው ግዳድ ኪናም ያማሃሮናይ፣ አይሚህ ታሃም ፉጎ ኒያትሳ ጉዳይ ኪኒ፡፡ 5. ዓዲህ ማሚኖ ኪንቲያከ ዲቦህ ማርታ ቲያ፣ ታስፋ መዔፉጎል አብተህ ባርከ ለለዕ መዔፉጊህ ጎሮን ዻዒማክ ጻሎቱህ ሲክተህ ማረለ፡፡ 6. ታይ ዓለምል ኒያት ዲቦህ ኪሒን ማሚኖ ለ ሶሊክ ራብተ ቲያ ኪኒ፡፡ 7. ኢንኪ ጉድለትሂኒም ማሮናክ ተን ፋይስ። 8. ኢሲ ዘመድ፣ ማንጊህ ካብ የ በተሰብህ አሕስበ ዋያቲ ኢሲ ሃይማኖት ይክሒደ ቲያ ኪኒ ለ፣  ኤረ አሚነ ዋ ሒያውቶኮ ጊድድ ኡማቲያ ኪኒ፡፡ 9. ላሕታም ኢግዲያኮ ጉባል ተከ ማሚኖ ማሚንቲ መዝገቢል ማጽሐፊን፥ ለል ኢንኪ ባዒላ ዲቦህ ኦርቢሰቲያ ታኮ ጉርሱሳ፡፡ 10. ታማም ባሊህ ዻይሎ ኤዳ ዒለህ ዓርሳክ፣ ገዻ ጋራክ፣ ቁዱሳን ኢባ ዓካልሳክ፣ ትምፂግመም ጎሮኒሳከ አኪናን መዔ ሢራሕ ኡምቢህ አባክ መዔ ተ ሢራሓህ ኡማንቲይ አካህ ያምስክረቲያ ታኮ ኤልታነ፡፡                  11. ሲኒ ዒድመ ዱፈወ ዋይተ ማሚን ለ ማሚንቲ መዝገቢል ማጽሓፊን፣ አይሚህ ኢሲን ኃዶይታ ካሓኒ አክሱበህ ክርስቶስሊህ ሎን ካሓኒ ዳጎዋጉል፣ ባዕላ ኦርቢሶና ጉራን፡፡ 12. ኤዸዾይታህ ክርስቶሱህ ሳየን ቃል ሓባን ኢርከህ ኤል ያምፍርደ፡፡ 13. ታሃሚህ አሞል ሢራሕ ያንሑውኒህ ዓረዓረህ ያዞርኒም ያምሂሪን፣ ሥራሕ ያንሑውኒም ጥራሕ አከካህ ሒያው ሓምታን፣ ሒያው ጉዳአድ ሳያናምከ ዋንስቶና ኤደዋይታም ዋንሲታም ያኪን፡፡ 14. አማይጉል ሲኒ ዔድመኮ ትላየ ዋይተ ማሚን ኦርቢሶና፣ ኢሮ ዻሎና፣ ሲኒ ዲክ ኤዳ ዒለህ ያይማሐዳሮና አምኪሪክ አኒዮ፣ ታይ ዓይነቲህ ናዓብቶሊት አካህ ዋትማን ምክንያት ዋን፡፡ 15. አይሚህ ታሃምኮ ባሶህ ውልውል ማሚን ሰጣን ይክትልኒህ ኢምነት አራሓኮ የውዒን፡፡ 16. አማኒት ኪን ኑማ ኢሲ ዓረድ ማሚን ተለምኮ ሞሶዓረህ ዑካ ያክኒምኮ ተን ጎሮኒሶይ፣ ታይ ዓይነቲህ ሞሶዓሪ ሢሩህ ጎሮን ሂን ማሚን ጎሮኒሶ ዺዓ፡፡                         17. ሞሶዓረ ደምቢህ ታስሔደረም፣ ማንጊህ በሠራታ ቃል አስብክከ አይምሂሪክ ኃዋልታ ስማግለህ ዒጽፊ ክብረ አካህ ያሓዎና ኤዳ፡፡ 18. አይሚህ "ኢላው ያስክይደ አዉሩክ አፍ አክ አማዳን "ያናም ባሊህ"ሢራሓቲያህ ደመዎዝ አካህ ኤዳ" ያዽሔ፡፡ 19. ላማይ አከከ አዶሕ ኤል አምስኪረ ዋየኒምኮ ሞሶዓሪ ስማግለቲህ አሞል ካብ ያ ኪሰ ማጋራይን፡፡ 20. አኪ ማሪ ማይሲቶክ ኃጢአት አብታ ሒያው ኡማንቲህ ነፊል ኢግኒሕ።   21. አብታ ጉዳህ ኡምቢህ ቲያኮ ቲያ ባዽሰካህ ወይ ኢንከቶህ አይዶሎወካህ ታይ ይምክረ ሙሉኡድ ታፋጻሞ መዔፉጎከ ኢየሱስ ክርስቶሱህ፣ ዶሪምመተ ማላይካህ ነፊል ሃየ ኮከህ አኒዮ፡፡ 22. ጋቦብ አሞክ አክሃይተህ ኢንከቶ ዱዱሶ ማፍቲን፣ አኪ ሒያውሊህ ኃጢአታህ ማምሓባባሪን፣ ኢሰ ጽሬክ ኢብዽ፡፡ 23. ኢሲ ጋርቢህ ዱሪህ ዳዓባል ኡማንጉል ዱሪ  ምክንያታል ዳጉ ወይኒ መስ ኡዑብ ኢካህ ካምቦኮ ሣራህ ላየ ዲቦህ ማዓቢን፡፡          . 24. ውልውል ሒያውህ ኃጢአት ዓዶቲያ ኪኒ፣ አክ ዮኮመህ ፍርደህ ያዴ፣ አኪ ሒያውህ ኃጢአት ለ ሣራቱላኮ ተን ያክትለ፡፡ 25. አማይጉል መዔ ሥራሕ ዓዶቲያ ኪኒ፣ ዓዶቲያ አከዋቲ ኡካ ሑብኦህ  ማራዓ።

ማዕራፋ 6

አገልገልትቲህ ዮምሖወ ምክረ 

  1. መዔፉጊህ ምጋዓህከ ሚሂሮ ለ ዋትምማናምኮ አገልገልቲ ኡምቢህ፥ ሲኒ ማዶር ያስካባሮና ኤዳም ኪናም አበኒህ ያሕሳቦናይ፡፡ 2. ማዶር አማንት ተከ አገልገልቲ ማዳሪ ኢየሱስህ ሳዖል ኪኖንጉል ተን ማይዻይቲና፥ ናቢህ ተን አገልገልቲኮ ጥቅመ ገይታም ተን ማዶር አማንትከ ኢምንክሒን ሳዖልቲ ኪኖንጉል ባሶኮ ያይሰ ዒለህ ተን ኢስግልግላ፡፡ ታይማሃሮከ ታማካሮ ኮህ ኤዳም ታሃም ኪኒ፡፡                   

   

ድራብቲ ሚሂሮከ ሓቂ ሀብተ3. ሓቂ ሃይማኖትህ ምሂሮልህ ያምሰመመዔቲያ ያከቲ፣ ኒማደራ ኢየሱስ ክርስቶስህ ፂሪይ ቃል ሓበህ፣ ባዽሳ ለ ሚሂሮ ያይምሂረ አኪናን ሒያውቲ ይኔምኮ፣ 4. ትዕብትህ  ሐፉዋቲያከ ኢንኪም አዽገዋቲያ ኪኒ፣ ያኮይ ኢካህ ቃላት ዳዓባል ያምከረከረቲያከ ያምጸቀጸቀቲያድ ኡማ ትንሚት ኤድ ያሕዲረ፣ ታሃም ካታሳም ቅንአት፣ ዽባ፣ ዋቶ፣ ኡማ ጥርጣረ፤ 5. ተን አእምሮ ትርክሰቲያከ ሓቂ አክ የለየ ሒያዋህ አምቆሮጸ ዋ ክሪክር ኪኒ፣ ታይ ዓይነቲህ ሒያውህ ሃይማኖት ሀብተ አካህ ገያን አራሓህ ይምግደህ አካህ ያምቡሉወ፡፡ 6. ዓዲህ ሊዮም "ይዽዕታ ያዽሔ ሒያውቲ፣ ፉጹም ኪን መንፈሳውነት አክ ራዒሳም ኢዻህ ሃይማኖት ሀብቲህ ሪሚድ ኪኒ፡፡ 7. አይሚህ ታይ ዓለምል ኢንኪም ኒብዸህ ማማትኒኖ፣ ታይ ዓለምኮ ኒብዸህ ናድየምኮ ኢንኪም ማሊኖ፡፡ 8. በናምከ ሀይሲናም ገይነምኮ ኒዽዓ፡፡ 9. ሀብታማት ታኮ ጉርታም ለ ፋታናድ ራዳን፣ ሒያው ታይቦሎሶወምከ ታይለየም ካንቶከ ዲንገት ኪን ማንጎ ጉርታይህ ማፃወድህ ያምዽብዽን፡፡ 10. አይሚህ ማል ካሓኒ ኡማም ኡምቢህ ኢያህ ሚንፀ ኪኒ፣ ውልውል ሒያው ማል ገዮና አትምኒክ ኢምነትኮ ያዸዽን፣ ተን አፍዓዶ ለ ኃዛን ማሓዾህ  ሙዱምታ። 

ጳውሎስ ጢሞቴዎሱህ ዮሖወ ምክረከ ቲኢዛዝ

  11. መዔፉጊህ ሒያውቶ! አቱ ለ ታሃምኮ ኡምቢህ ኩድ። ጽድቀ፣ መንፈሳውነት፣ ኢምነት ካሓኖ፣ ትዕግሥቲህ ያጽኔዒኒም፣ ጋርሂኖ ኤምከተተል፡፡ 12. ኢምነቲህ መዔ ዺባህ ኤምወገእ፣ ማንጎ ማስኪሪህ ነፊል መዕነህ ተምኤመመነህ ትምስኪረህ አካህ ደዕሚምተ ኡማንጉሊ ሂወት ኢብዽ። 13. ኡማን ጉዳህ ሂወት ያሓየ መዔፉጎከ ጴንጤናዊ ጲላጦስ ነፊል መዔነህ ትምእምነህ ታማስካሮ ኢየሱስ ክርስቶሲህ ነፊል ኩ እኢዚዘህ አኒዮ፡፡ 14. ኒማደሪ ኢየሱስ ክርስቶስ ያምቡሉወ ለለዕ ፋናህ ታይ ትኢዛዝ ገጋ ማለህከ ናቃፋማለህ ዻዉዽ፡፡ 15. ክርስቶስ አምባላይ ለ፣ የምበረከ ቲያከ ዲቦህ ገዛኢ የከ፣ ነገሥታት ንጉሥ ማደሪ ማዳራህ ይምውሲነ ለለዕ ያከ፡፡ 16. ኡሱክ ጥራህ ራበዋቲያ ኪኒ፣ ኢንከቲ ካብ ኤድዮዋ ዽዔ ዋ ኢፎል ማራ፣ ካያ ኢንከቲ ካማብሊና፣ ኢንከቲ ካያብሎ ማዽዓ፣ ክብረከ ኃይሊ ኡማጉሉህ ካያህ ያኮይ አመን፡፡ 17. ታይ ዓለሚህ ሀብታማት ያትዕብቲኒምኮከ ተን ታስፋ ያለየ ሀብቲህ አሞል አባናምኮ እኢዚዝ፡፡ ታማም ባሊህ ተን ታስፋ ኖያህ ኒያት ተከህ ኡማን ጉዳይ ሕልፈከ ትርፈህ ኖህ ያሓየ ፉጊህ አሞል ታኮ እኢዚዝ፡፡ 18. ጋባዓይ ለ መዔ ሢራሕ ሢራሖና፣ መዔ ሢራሓህ ሀብታማት ያኮና፣ ያሓዎናከ ሎኑምኮ ለ ሓድልታም ያኮና ቶምሱኖዶወም ያኮና ተን እኢዚዝ። 19. ታይ ዓይነቲህ ሓቀ ለ ሂወት ገዮና ሪሚድ ፂንዕቲያ አክ ያከ ሀብቲ ያሚተ ዳባን ሲናሞህ አስከሄለ ሎን፡፡                     20. ጢሞቴዎሶ! ሓደራህ ኮህ ቶምሖወም ዻዉዽ፣ ኢዽጋ አከካህ "ኢዽጋህ" ኢጊድ ጉዳህ ካንቶ ኪን አላፍላፈህከ ክርክርኮ ሚሪሒ ኤይ። 21. ጋሪጋሪ ታይ ዓይነቲህ ኢዽጋ ሊኖ ያናማህ ኢምነት አራሕኮ ያውዒን፣ ጸጋ  ኮሊህ ታኮይ!