ሉቃስ ወንጌል

                 ሉቃስ ይጽሕፈም ንማዳሪህ ኢየሱስ ክርስቶስ ወንጌል

 ሉቃስ ወንጌል

ሉቃስ ይጽሕፈ ንማዳሪህ ኢየሱስ ክርስቶስ ወንጌል

ሳይማ          [ዸ ዹ ዺ ዻ ዼ ዽ ዾ]

    ሉቃስ ወንጌል ኢየሱስ ኢሰህ ካብ ኢሳም ዮኮመህ ያመተህ እሥራኤል ያይድኅነቲ፣ አማምሊህ ሒያው ዻይሎ ኡምቢህ ያይድኅነቲያ ኪናም አበህ ኪኒ፣ ኢየሱስ ለ ፉጊ  መንፈስ"ድካታታህ ወንጌል ያስባኮ" ኪናምከ ታይ ወንጌል ሒያው ሎን  ኢሲሲ ጸገም አካህ ታንሑወም ይብደቲያ ኪናም ያትሪከ፤ ሉቃስ ወንገሊህ አዳል ባዽሳህ ኢየሱስ ሙሙቲህ ዳዓብል ታይብሥረ ኤዸዾዶታ ማዓራፍልከ ጋባዔህ ለል ኢየሱስ  ዓራናል ያውዔም ዋንስታ ባኪቶ ማዕራፋል ዓዶሰህ ዋነስታም  ኒያቲ  ዳዓባል ኪኒ፣ ኢየሱስ ዓራናል የውዔሚህ ላካል ክርስትናት እምነት አይናህ የህ የምፈደደነም ያርድኤ ታሪክ ሐዋርያት ሢራሕህ መጽሐፊህ አዳል ታይ ጻሐፊህ ዋንስተ፡፡ ማላይካ ዳዓባል ዘማ፣/መላእክት/ ዝማሬ፣ ኢየሱስ ዮቦከ ዋክተ ሎን ጉርተም ባሊህ ዋንስታ ታሪክ፣ ኢየሱስ ዒንዳነል መቅደስ ዓረድ የደየም፣ ሩኅሩኅ ሳምራዊህከ የለየህ ገይመ ባዽህ ታሪክ ሉቃስ ወንጌሊል ዲቦህ ጢራህ ገይምታም ኪኖን፣ ወንጌል አዳል ዳራትኮ ዳራታል ናባ ቱክረት ኤልዮምሖወም ጻሎት ዳዓባል ኪኒ፣  ቁዱስ መንፈሲህ ዳባል፣ አጋቢ ኢየሱስ አገልግሎቲህ አዳል ሎን ቦታከ ፉጊ ኃጢአት ኅድጎቱህ አበም ኪኒ፡፡                         

        ---------------------------------------------------

ማዕራፋ 1

 1. ኩቡር ቴፍሎሶ! ንፋናድ ይምፍጺመ ጉዳይ ያግልጸ ታሪክ ታሃሚህ ባሶል ማንጎ ማሪ ይጽሕፈ፡፡ 2. ታይ /መልእክት/ ፋሮ ኖያህ ቲላሰም ኤዸዾታኮ ኤዸዽሰኒህ ኢንቲ መስካሮከ በሠራታ ቃሊህ አገልገልቲ ኪይይ ቲነም ኪኖን፡፡ 3. ታማም ባሊህ ኤዸዾታኮ ኡጉተህ ኡማን ጉዳይ ጥንቃቀህ ኢምርሚረምኮ ላካል ታሪክ መደብ መደቢህ ኢክቲለህ አጽሐፎ መዔም የከህ ዮህ ዩመቡሉወ፡፡ 4. ታሃም ለ አበርከ ትሚሂረ ሚሂሮ ሓቀህ መደብህ ታምራዳኦ ኤህ ኪዮ፡፡

ያጥሚቀ ያሃኒስ ኡብካ ማላይካ ገብርኤል ዮኮመህ ዋንሲተ

   5. ሄሮድስ ይሁዳ ሀገርል ኑጉሥ ኪይይ ይነ ዳባን አብያ ክህነቲህ ወገንኮ ዘካርያስ አክያን ካህን ይነ፡፡ ኡሱክ አሮን ወገኒህ ዳራኮ ታቡከ ኤልሣቤጥ አክያን ኑማ ሊይይ ይነ፡፡ 6. ላሚህ መዔፉጊህ ነፊል ጻድቃን ኪይይ ይኒን፡፡ ማዳሪ ቲኢዛዝከ ሕገ ኢንኪ ናቃፋሂኒም ዻዉዻይ ይኒን፡፡ 7. ኤልሣቤጥ ገደመ ክክ ቲነጉል ዻላይ ሊይይ ማና፣ ለል ላሚህ  ጋዳህ የምዔልኒህ ይኒን፡፡

   8. ታማይ ዋክተ ዘካሪያስ ክህነት ሢራሒህ ቡሎሊህ መቅደስ ዓረ ያስጋልጋሎ  ተራ ባዓላ ኪይይ ይነ፣ አማይጉል ኡሱክ ፉጊ ነፊል ኢሲ ክህነቲህ አገልግሎት አፍጽሚይ ይነ፡፡ 9. ካህናት ሢራሕህ ደምቢህ መዔፉጊህ ዓሪህ መቅደስድ ሳየህ ዒጣን ያዕጣኖ ተራ ካማደ፡፡ 10. መቅደስ ዓሪህ አዳድ ዒጣን ያዕጥኒን ዋክተ ህዝቢ ሙሉኡድ ኢሮል ሶለኒህ ጻሎት አባይ ዪኒን፡፡ 11. መዔፉጊህ መልአክ ዒጣን ኤልቲካሳን ኢርከኮ ምድግ ኡላኮ ሶለህ ዘካሪያሳህ ዩምቡሉወ፡፡ 12. ዘካሪያስ ማላይካ ዩብለ ዋክተ ሓንካብተህ ማይሲህ ዩሙንዹዔ፡፡ 13. መልአክ ለ ታህ አክየ፣ ዘካሪያሶ! ማማይስቲን፣ ኩጻሎት ዮሞበህ ያነ፣ ኩኑማ ኤልሣቤጥ ባዻ ኮህ ዻለ ለ፣ ሚጋዓህ ያሃኒስ አክተህ ደዔሊቶ፡፡ 14. ካ'ኡብካ ኮያህ ንያትከ ታሕጓስ ኮህ አከለ፣ ማንጎ ማሪ ለ ዮቢን እርከህ ንያተ ሎን፡፡ 15. አይሚህ ኡሱክ መዔፉጊህ ነፊል ናባቲያ አከ ለ፣ ወይኒከ ታይስኪረ አኪ ማስተ አዑበ ማለ፣ ገና ኢሲናህ ማህፀንድ ያነሃኒህ መንፈስ ቅዱሱህ የመገቲያ አከ ለ፡፡ 16. ኡሱክ እስራኤል ሂዝበኮ ማንጎ ማራ ፉጎል ተን አምላካል ደሄለ፡፡ 17. መንፈስከ ኃላህ ነብይ ኤልያስ ባሊህ የከህ ህዝበ ኢሲ ማዳራህ አይሶኖዶወ ለ፣ ኡሱክ አቦብቲት አፍዓዶ ዻይሎህ፣ አምኢዚዘ ዋይታ ሒያዊህ አፍዓዶ ጻድቃን ብልሓታል ደሄ ለ፡፡ 

 18. ዘካሪያስ ለ ማላይካክ"ታይ ጉዳይ ሪጊጽ ኪናም አይሚህ አዽገልዮ? አኑ ኤምዔለህ አኒዮ ይኑማ ዒድመህ ዱፈይተህ ታነ አክየ፡፡ 

 19. ማላይካ ታህ የህ ኤል ይምሊሰ፣"አኑ ፉጊ ነፊል ሶላ ገብርኤል ኪዮ፣ ታሃም ኩአይበሳሮ መዔፉጎኮ ፋሪመህ ኤመተህ አኒዮ፡፡ 20. አቱ ለ ዋክቲ ማዳጉል ያምፊጺመ ይቃል ማ'ማንኒቶ፣ አማይጉል ታይ ጉዳይ ኡምቢህ ዋክተህ ያምፍፊጽመም ፋናህ ዓባስ አከሊቶ ዋነስቶ ማዽዕታ፡፡" 

  21. ታማይ ዋክተ ሒያው ዘካሪያስ ካኢላላይ ዪኒን፣ መቅደስ ዓሪህ አዳድ አክ ዓያየጉል ጉድ አካህ የከ፡፡ 22. ዘካሪያስ በተ መቅደስ ዓረኮ የውዔጉል ሒያውሊህ ዋንስቶ ማዺዕና፣ አማይጉል በተ መቅደስ አዳድ ዊሊ ጉዳይ አካህ ዩመቡሉወህ ክናም የዸጊን፣ ኡሱክ ዋንስቶ ታነጉል ጋባህ አጥቅሲክ ተን አይርድኢይ ይነ፡፡ ታይ  ዒለህ ዓባስ የከህ ሱገ፡፡

  23. አገልግሎት ዋክቲ ይምፍጽመምኮ ላካል ኢሲ ዲክህ የደ፡፡ 24. ዳጎ ዋክተኮ ላካል ካኑማ ኤልሣቤጥ ሶኒተ፣ ኮና አልሳ ሙሉእ ሒያዋህ አምቡሉወካህ ዓሪ አዳድ ሱዑተህ ሱግተ፡፡ 25. ኢሲ"መዔፉጊ ኢሲ መሕረቲህ ይጉፈህ ታይ መዔ ጉዳይ ዮህ አበ፣ ሒያው ነፊል ሊኪ ኢነ ይናቀፋ /ይውርደት/ ዮህ የለየ"ተዽሔ፡፡ 

  ኢየሱስ ኡብካ ገብረኤል መልአክ ዮኮመህ ይብሥረ

  26. ኤልሣቤጥ ሶኒተምኮ ሊሓ አልሳል ገብርኤል መልአክ መዔፉጊህ ኡላኮ ናዝሬት ፋሪቲመ፡፡ ናዝሬት ገሊላ ክፍሊህ ባዾል ገይምታ ካታማ ኪኒ፡፡ 27. ማላይካ ፋሪቲመም ማሪያም አክያን ኢንኪ ድንግሊል ኪኒ፡፡ ኢሲ ዳዊት ዳራ ኪን ዮሴፍ አክያን ሒያውቶህ ትምሊሰህ ቲነ፡፡ 28. ማላይካ ተያድ የመተህ"አቱ ጸጋህ ተመገ ቲያ፣ ሳላም ኮሊህ ያኮይ፣ ፉጊ ኮሊህ ኪኒ፣ (አቱ ሳዮ ፋናድ ተምበረከ ቲያ ኪቶ)"አክየ፡፡ 

  29. ኢሲ መልአክ ዋኒህ ጋዳህ ሓንካቢተህ "ታሃም አይሚህ ዓይነቲህ ሳላምታ ኖዋ" ተህ ትሕሲበ፡፡ 30. መልአክ ታህ አክየ፣"ማርያሞ! መዔፉጊህ ነፊል ክብረ ገይተህ ታነክ ማማይሲቲን፡፡ 31. ሀይከ ሶኒተ ሊቶ፣ ባዻ ዻለሊቶ፣ ምጋዓህ ኢየሱስ አክ ኢየሊቶ፡፡ 32. ኡሱክ ናባቲያ አከለ፣ ናባ ፉጊህ ባዻ አክ ኢየ ሎን፣ ማዳሪ አምላክ ካአባህ ዳዊት ዙፋን አካህ አሓየ ለ፡፡ 33. እስራኤል አሞል ኡማንጉሉህ አንጊሠ ለ፣ ካማንግሥት ባክቶ ማለ፡፡"34. ማርያም ማላይካክ"አኑ ድንከገል ኪዮ፣ ታጉል ታይ ጉዳይ አይናህ የህ ያኮ ዽዓ?" አክተ፡፡       

   35. ማላይካ ታህ የህ ኤልይምልሰ፣"ቁዱስ መንፈስ ኩአሞል አምተ ለ፣ ናባ  ፉጊህ ኃይሊህ ጺላል ኩአሞል አከለ፣ አማይጉል ኮኮ ያቡከ ቁዱስ ኪን ሕፃን መዔፉጊህ ባዻ አክ ኢየ ሎን፡፡ 36. ኩዘመድ ኤልሣቤጥ ኡካ ገድመ አካይ ይንኒምኮ ካዶ ኤምዔሊል ሶንተህ ታነ፣ ሶንተምኮ ታህ ሃይከ ሊሓ አልሳ ኪኒ፡፡ 37. መዔፉጊ ኡኮ ታና ጉዳይ ማለ፡፡" 

 38. ታማምኮ ላከል ማርያም"ሀይኪዮ አኑ መዓፉጊህ አገልጋሊት ኪዮ፣ አቱ ታምባሊህ ዮህ ያኮይ"ተዽሔ፡፡ አማይጉል ማላይካ  አክ ባዽሲመህ የደ፡፡

ማርያም ኤልሣቤጥ ዋርስምተ

   39. ታማይ ዋክተ ማርያም ኤልሣቤጥ ዋርሲምቶ ኢምባል ታነ ይሁዳ ባዾል ታነ ካታማህ አፍተህ ኡጉተህ ተደየ፡፡ 40. ዘካሪየስ ድክድ ሳይተህ ኤልሣቤጥህ ሳላምታ ቶሖወ፡፡ 41. ኤልሣቤጥ ማርያም ሳላምታ ቃል ቶበ ዋክተ ተማሕፀንድ ዪነ ሕፃን ፍደተ፡፡ ኤልሣቤጥ መንፈስ ቁዱሱህ ተመገ፡፡ 42. አንዻህ ናውሰህ ታህ ተ"አቱ አጋቦኮ ኡምቢህ ተምበረከቲያ ኪቶ፣ ኮኮ ያቡከ አውኪ የምበረከቲያ ኪኒ፡፡ 43. ይማዳሪህ ኢና ይማዶ ተመተም ዮያህ አይዻ ናባ ክብረ ኪኒ! 44. ኩሳላምታህ አንዻሕ ኦበጉል ገና ይማሕፀኒድ ዪነ ሕፃን ንያታህ ፍዽተ፡፡ 45. አቱ ፉጊ ዋንሲተም ኡምቢህ ታምፍጽመም ክናም ተመነርከህ አይዻ ትምዕዲለ ቲያ ኪቶ፡፡

ማርያም ምጋና ጻሎት

         46.  ማርያም ታህ ተ፣ "ይናፍሲ መዔፉጎ ያስክቢረ፣

         47.  ይመንፈስ ያ አምላካህ  ይመድኃኒህ ኒያታ፣ 

         48. ፉጊ ዮያ ላተ አገልጋሊት ይየደለለዕጉል፣ 

                ካፋኮ ኤዸዽሰህ ማባኮ /ዋለዶ/ ሙሉኡክ  ትምስግነ ቲያ ኪቶ ዮክ ያን፣ 

        49. አይሚህ ኃይላለ ፉጊ ናባ ጉዳይ ዮህ አበም ኢዻህ  ኪኒ፣ 

               ካሚጋዕ ለ ቁዱስ ኪኒ።

       50. መዔፉጎ ማይሲታ ሒያዋህ ኡምቢህ 

              ዻላይ ዻላይኮ  /ዉሉድ ዋለዶኮ/ አኪናን ዋክተ የከሚህ

              ኢሲ መሕረት አባ፡፡

       51. ኢሲ ኃይላለ ሑሉፉህ ኢሲ ኃይላ ይስቡሉወ፣

             ትዕቢት ለም  ለ ተን ሓሳብሊህ ተን ይብተነ፣

       52. ናባ ረዶን ተን ዙፋንኮ ተን ይብዽየ፣ 

              ላተም ለ ክብረህ ናዋ ተን ኢሰ፡፡ 

      53.  ሉይተም መዔ ነገሪህ ኃይሰ፣ 

              ሀብተ ለም ለ ፎያ ኪን ጋባሊህ ተን ዽዽየ፡፡   

     54-55.አብራሃምከ ካዳራ ኡማንጉሉህ ይይቡሉወ  

              መሕረቲህ አዝክሪክ ኢሲ አገልጋሊ እስራኤል ጎሮኒሰ፡፡

             ታሃሞም አበም ባሶት ናቦቡህ ዮሖወ ታስፋ ቃል ያፋጻሞ የህ ኪኒ።" 

     56.  ማሪያም ኤልሣቤጥልህ አዶሓ አልሳ ታከም                                                      ሱግተሚህ ላካል ኢሲ ድክ ጋኅቶ ተደየ፡፡ 

   ያጥምቀ ያሃኒስ ኡብካ

   57. ኤልሣቤጥ ዻላይ ዋክቲ ማደህ ባዻ ዻልተ፡፡ 58. ተ ሑጋከ ተ አህሊ ኡምቢህ ፉጊ ኢሲ መሕረት አካህ አበም ዮበኒህ ተሊህ ኒያተን፡፡ 59. ሕፃን ዮቦከሚክ ማባሐሪ ለለዕ ካግዝረቲህ ሠርዓታል ገይሞና ሑጋከ ሳዖልቲ የከሄልኒህ የመቲን፣ አባ ምጋዓህ ዘካሪያስ የኒህ ደዖና ጉረኒህ ዪኒን፡፡ 60. ኢና ግን"ታሃም ማታከ፣ ካሚጋዕ ያሃኒስ ኪኒ"አክተ፡፡ 61. ኢሲን"ኩቤተሰብድ ታይ ሚጋዓህ ደዒምማቲ ኢንከቲ ሚያነ ኡኮ"አክየን፡፡ 62. ታማሚህ ላካል ካ'አባክ"ኩባዽክ አቲያ አክየኒህ ደዒምሞ ጉርታ?" የኒህ ምልክቲህ ካ'ኤሠረን፡፡ 63. ዘካሪያስ አካህ ያጽሕፊንቲያ ኤሠረህ"ምጋዕ ያሃኒስ ኪኒ"የህ ይጽሕፈ፣ ኡምቢህ ታይ ጉዳህ ይምግርሚን፡፡ 64. ታመይ ዋክተ ዘካሪያሳህ አራብ አካህ ይምኑሑወህ ዋንሲቶ ዺዔ፣ መዔፉጎ ያምስግንኒም ኤዸዽሰ፡፡ 65. ታሃምኮ ኡጉተሚህ ተን ሑጋድ ኡምቢህ ማይሲ ኤድትሕድረ፣ ዋሪ ለ ኢምባታት ይሁዳ ሀገሪህ ኢያል ሙሉኡድ ዮሞበ። 66. ታይ ጉዳይ ቶበም ሙሉኡክ"ታይ ሕፃን አይምቶ ያኮ ኖዋ?"አይክ ቲታ ኤሠራይ ዪኒን፡፡ አይሚህ ፉጊ ጋባ ዓድህ  ካሊህ ትነጉል ኪኒ፡፡

                           ዘካሪያስ ዋንሰተ ትንብት

     67. ሕፃን አባ ዘካሪያስ ቁዱስ መንፈሲህ የመገህ ታህ የህ                 

           ትንብያ  ዋንሲተ፣

    68. ሕዝበ መሕረቲህ ጉፈጉልከ ይይድኅነጉል እሥራኤል  

           አምላክ የከ መዔፉጊ ያማስጋኖይ፣ 

   69. አገልጋሊ የከ ዳዊት ዳራኮ ናባ ያይድኅነቲያ ኖህ ኡጉሠ፣

   70. ዮኮመህ ቁዱሳንከ ነብያት አፋህ ዋኒሰኒም ባሊህ፣

   71.  ኒናዓብቶልትከ ኒከሰሰቲህ ጋባኮ ኒይድኅነ፣

   72. ታሃሞም አበም ናአቦብቲህ መሕረት አካህ አባምከ 

          ዋንሲተ ቁዱስ ካቃል ኪዳን ያምፍጺመም ይሕስበርከህ ኪኒ፣

  73.  ታይ ቃል ኪዳን ዽዋህ ኦሖወም ናባህ አብራሃማህ ኪይይ ይነ፣

 74.  ታስፋ ቃል ናዓብቶሊቲ ጋባኮ ናፃህ ነውዔህ ማይሲማለህ ካናስጋልጋሎ ኪኒ፣

 75. ታማሃም ባሊህ ኒሕይወቲህ ዳባን ሙሉኡድ መዔፉጊህ ነፊል ቅደስናከ  

        ኒፅሕናህ ማርኖ ዺዒኖ ኪኒ፡፡

 76. ለል አቱ ሕፃኖ ናባ ፉጊህ ነቢይ ኮክ ኢየሎን፣ አራሕ ታይሳናዳዎ                             ቶኮመህ  ማዳሪ ባሶድ አዴሊቶ፡፡   

  77. ሲኒ ኃጢአቲህ ኅደጎት ኤድገያን ዲኅነት ኢዽጋ ሕዝበህ አኃየልቶ፡፡ 

 78. ታሃም ታኮ አካህ ዽዒምተም ኒአምላኪህ ኅድጎትከ        

        መሕረቲህ ርኅራኄህ  ኪኒ፣  አማይጉል ድኅነት አይሮይታ       

        ዓራንኮ ኖህ ታውዖ ኪኒ፡፡ 

 79. ኡሱክ ድተከ ራቢ ጽላሊህ ዳባል ታነሚህ ኡምቢህ                 

        ኢፍሰ ለ፣ ኒታኮ ሳላም አራሓል አይምርኄ ለ፡፡"               

80. ሕፃን ዓረህ፣ መንፈስህ ለ ይጥንክረ፣ እስራኤል                     

       ሂዝበህ ያምቡሉወም ፋናህ ባራካድ ማረ።

ማዕራፋ 2

ኢየሱሰ ኡብካ

(ማቲ.1፣18-25)

   1. ታማይ ዋክተ ሮማ ኑጉሢህ ግዝአታል ቲነ ሒያው ኡምቢህ ህዝቢ ሎዉህ ያማዝጋቦና ሮማ ቄሣር አውግስጦስ ይኢዚዘ፡፡ 2. ታይ ኤዸዾይታ ህዝቢ ሎይም የከ ዋክተ ቄሬኔዎስ ሶሪያ ባዾህ ረዳንቶ ኪይይ ይነ፡፡ 3. አማይጉል ኢሲሲ ሒያውቲ ኢሲ ምጋዕ ያይማዝጋቦ ኤልዮቦከ ባዾ አድይ ይነ፡፡ 

   4. ዮሴፍ ኤልዮቦከም ገሊላት ዞባል ገይመታ ናዝሬት ካታማኮ ኡጉተህ ይሁዳ  ባዾል ገይምታ ዳዊት ካታማህ በተ ልሄም የደ፣ አይሚህ ኡሱክ ኡብካህ ዳዊት ዳራኮ  ክይነጉል ኪኒ፡፡ 5. ያምጻሐፎ የደም ሶኒተህ ቲነ ካሊሶ ማሪያምሊህ ኪይይ ይነ። 6. ላሚህ በተ ሊሄም ካታማል ያንንሃኒህ ማርያም ኡላሎ ዋክቲ ማደ፡፡ 7. ታማል ኢሲ ቦክሪ ባዻ ዻልተ፣ አካህ ያሕቁፊን ሐላጋህ ትጥቅልለ፣ ገዽ ዓረድ ሲፍራ ዋየንጉል ሳዒ በተናህ አዳል ዽንሰ፡፡                                    

                                                ሎንከ መላእክት

   8. ታማይ ባዾህ ካታማል ኢሮል ማይዳል ባር ሳዓ ዻዉዻክ ማኅታ ሎን ቲነ፡፡     9. ሀይከ ተናህ ፉጊ መልአክ አካህ ዩምቡሉወ፣ መዔፉጊህ ኪብሪ ኢፎይቲ ተን አሞል ኢፎየ፣ አማይጉል ጋዳህ ማይስተን፡፡ 10. መልአክ ታህ አክየ፣"አይዱኩመያ ማማይሲ ቲና፣ ህዝበህ ሙሉኡድ ናባ ኒያት ያከ መዔ ዋረ ሲናህ ኢብዸህ ኤመተህ አኒዮ፡፡ 11. ሃይከ ካፋ ዳዊት ካታማል ያይድኅነቲ ሲናህ ዮቦከህ ያነ፣ ኡሱክ ለ ማዳራ የከ ክርስቶስ ኪኒ፡፡ 12. ምልክት ታይቲያ ኪኒ፣ አካህ ያሕቁፍን ሓላጋህ ይምጥቅልለ ሕፃን ዳገድ፣ ሳዒ በተናህ አዳል ዽነህ ገልቲን፡፡"13. ድንገቲህ ማንጎ መላእክት መልአክሊህ ኢንኮህ ይምቡሉውኒህ፣ መዔፉጎ ኣይምስግኒህ፣ 14"ዓራናል ፉጎህ ክብሪ ያኮይ፣ ባዾል ፉጊ ኪኅን ሒያዋህ ሙሉኡድ ሳላም ያኮይ አይ ዪኒን፡፡"15. መላእክት አክ ባዽሲመኒህ ዓራንል የውዒን ዋክተ ሎን ሲነሲነህ"አማይጉል በተ ሊሄም ኡላል ናዳዎይ፣ መዔፉጊ ኖህ ይግሊጸ ጉዳይ ናብሎይ ኢሲመን፡፡ 16. አፍተኒህ የደይኒህ ማርያምከ ዮሴፍ ገን፣ ሕፃን ለል ዳገል ሳዒ በተናህ አዳል፣ ዽነህ ዩብሊን፡፡ 17. ሕፃን ዩብንኒሚህ ላካል መልአክ ካዳዓባል አክየም ዋሪሰን፡፡ 18. ታሃሞም ቶበም ኡምቢህ ሎን አካህ ዋሪሰን ጉዳህ ይምድንቅን፡፡ 19. ማርያም ለ ታይ ኡማን ጉዳይ ኢሲ ፍዓዶድ /አይሰለሰልክ/ ጉባል አጋናል ኢሳይ ቲነ፡፡ 20. ሎን፣ ኡማን ጉዳይ ማላይካ አክ የምባሊህ የከህ ዩብሊንጉልከ ዮቢንጉል ፉጎ አይምስግኒክ ሲኒ ሲፍራህ ጋኄን፡፡ 

  ሕፃን ኢየሱስ ቤተ መቅደሲህ ካበን

   21. ባሐራ ለለዕኮ ላካል ሕፃን ግዝረት ሥነ ሠርዓቲህ አሞል፣ ምጋዓህ "ኢየሱስ" የኒህ ደዔን፡፡ ታሃም ገናህ ጋርባድ ያሙኩዔምኮ ባሶል ማላይካ አካህ የየዔ ምጋዕ ኪኒ፡፡ 22. ሙሴ ሕጊህ መሠረቲህ አይጻራይቲ ሠርዓት ያምፊጺመ ዋክቲ ማደ፣ አማይጉል ሕፃን መዔፉጎህ ያስቃራቦና ኢየሩሳሌም ይብዽኒህ የደይን። 23. ታሃም አካህ አበን ምክንያት መዔፉጊህ ሕገህ"ባዻ አክናን ሪይስ ባዽ ኡምቢህ ፉጎህ ዮምሖወህ ይምቅድሰቲያ ያከ"ያን ትኢዛዝ ይምጽሕፈህ ይነጉል ኪኒ፡፡ 24. ታማም ባሊህ መዔፉጊህ ሕገህ"ላማ ዱጉጉለይታ ጻጹት መስዋዕቲህ ካብኢሶና ኤዳ"ያን ትኢዛዝ ይነ፡፡ 25. ታማይጉል ኢየሩሳለምል ስምዖን አክያን ኢንኪ ሒያውቲ ዪነ፡፡ ኡሱክ ለ ኢሲ ሂወት ፉጎህ ዮሖወ ጻድቅ ኪን ሒያውቶ ኪይይ ይነ፣ እስራኤል ድኅነቲህ ታስፋ ኢላላይ ይነ፣ መንፈስ ቁዱስ ካአሞል ይነ፡፡ 26. ኡሱክ መዔፉጊህ መሲሕ አብለካህ ማራባም መንፈስ ቁዱስ ካይስቡሉውህ ይነ፡፡ 27. ታማይ ለለዕ ቁዱስ መንፈስ ኡጉጉሰህ በተ መቅደስ ዓረህ የደ፣ ዮሴፍከ ማርያም ሕጊ ሥነ ሠርዓት ያፈጻሞና ሕፃን ይብዽኒህ በተ መቅደሲድ ሳየን፡፡ 28. ታማይ ዋክተ ስምዖን ሕፃን ይሕቁፈህ ፉጎ አይምስግኒክ ታህ የ፡፡ 

29. "ኦ'ይማዳራ! ሃይከ ዮህ ቶሖወ ታስፋ ቃል ይምፍጽመ፣

        አማይጉል ካምቦህ ዮያ አገልጋሊ ሳላማህ የይሰነበት፣

30. አይሚህ ድኅነት ኢኒ ኢንቲህ ኡብለህ አኒዮ፣ 

31. ኡሱክ ለ ኡማን ህዝቢህ ነፊል ቶይሶኖዶወቲያ ኪኒ፡፡ 32. ኡሱክ አረማውያናህ         ሓቀ ያግልፀ ኢፎይታ አከለ፣ ኩህዝበህ ለ እስራኤሊህ ክብረ ኪኒ፡፡"          

    33. ዮሴፍከ ማርያም ሕፃን ዳዓባል የዽሒን ጉዳህ ኡምቢህ አምድንቅይ ይኒን፡፡     34. ስምዖን የበረከምኮ ሣራህ፣ ባዽሳህ ሕፃን ኢናክ ማርያማክ ታህ አክየ፣ ሀይከ ታይ ሕፃን እስራኤል አዳል ማንጎ ማራህ ልይ፣ ማንጎ ማራህ ለ ድኅነት ምክንያት አከለ፣ ኡሱክ ለ ማንጎ ማራህ ጋራየ ዋናሚህ ምልክት አከለ፡፡ 35. ታሃማህ ማንጎ ማሪህ አፍዓዶድ ያነ ሱዑተ ሓሳብ  አግልጸ ለ።"  

  36. ታማም ባሊህ ታማይ ዋክተ አሴር ወገንኮ ኪን ፋኖኤል ባዻ`ሀና አክያን ኢንኪ ታምንቤቲያ ቲነ፡፡ ኢሲ ዒደመ ጋዳህ ዱፉይተ ኑማ ክይይ ቲነ፣ ኢሲ ባዕላሊህ ማልሒና ኢግዳ ድፈተሚህ ላካል ባዕሊ አክራበ፡፡ 37. ታሃምኮ ላካል ዒድመህ ቦሖርቶሞንከ አፋር ኢግድቲያ አብታም ፋናህ መቅደስ ዓረኮ ባዽሲመካ ጾምከ ጻሎቱድ ለለዕከ ባር መዔፉጎ ለ አስግልግሊይ ቲነ፡፡ 38. ታማይጉል ኢሲ ተመተህ መዔፉጎ ታይማስጋኖ ኤዸዽሰ፡፡ ሕፃን ዳዓባል ኢየሩሳለም ድኅነት ታስፋ ኢላልታማህ ሙሉኡድ ዋንሲታይ ቲነ።                      

ናዝሬት ጋሓናን

 39. መዔፉጊህ ሕገህ ይምኢዚዘ ሠርዓት ሙሉኡድ ይፍጽምኒምኮ ሣራህ ገሊላል ገይምታ ሲነህ ኤል ማራን ካታማህ ናዝሬት ጋኄን፡፡ 40. ሕፃን ለ አነብከ አጥንክርክ የደ፣ ቢልሓታህ  ለ የመገቲያ የከ፣ መዔፉጊህ ጸጋ ለል ካሊህ ቲነ፡

ኢየሱስ መቅደስ ዓረድ 

  41. ዮሴፍከ ማርያም ኢግዳ ኢግዳ ፋሲጊ ባዓላህ ኢየሩሳለም አድይ ዪኒን፡፡ 42. ኢየሱስ ላማምከ ታማን ኢግድያ ማደ ዋክተ ተምገለም ባሊህ ባዓል ያስካባሮና የደን፡፡ 43. ባዓል ይሰክብርንሚህ ላካል ኢሲን ሲኒ ድክ ጋሐንሃኒህ ኢየሱስ ኢየሩሳለምል ራዔ፣ ዮሴፍከ ማርያም ለ ታማል ራዔም ማዻግኖን፡፡ 44. አራሓድ ታነምልህ ኢንኮህ አድይ ያነም የከልኒህ ኢንኪ ለለዒ ገዾ አድይክ አሰን፣ ተማምኮ ላካል ተን በተሰብከ ተን ዶባልህ ዋግዮና ኤዸዽሰን፡፡ 45. ያከካህ ገዮና ማዽዒኖንጉል ዋግያክ ኢየሩሳለም ኡላል ጋኄን፡፡ 46. ማዳሒ ለለዕኮ ሣራህ በተ መቅደስ ዓረድ ገን፣ ታማል ሊቃውንቲ ፋናድ ድፈየህ ኦኮይስታከ ጥያቀ አካህ አሓይክ ዪነ፡፡ 47. ታበም ኡምቢህ ካስታውዕልከ ካመልሲህ አምድንቅይ ይኒን፡፡ 48. ዮሴፍከ ማርያም በተ መቅደስ ዓረድ ዩብልንጉል ይምግርሚን፣ ታማይ ዋክተ ኢና"ይባዽ አይሚህ ታሃም ኖክአብተም? ኩአባከ ዮያ ንምጽንቀህ ኩዋጊያክ ንነኮ!"አክተ፡ 

  49. ኢየሱስ ለ "አይሚህ ይዋግተን? አኑ ኢናባህ ዓረድ አኮ ዮህ ኤዳም አዽግክ ማናይቲንሆ?" አክየ፡፡ 50. ኢሲን ለ ኡሱክ ዋንስተም ማስታውዓሊኖን፡፡ 

   51. ታሃምኮ ላካል ኢየሱስ ተንሊህ ናዝሬት የደየ፣ አካህ አምኢዚዚይ ዪነ፣ ኢና ታይ ኡማን ጉዳይ ኢሲ አፍዓዶድ አብዽይ ቲነ፡፡ 52. ኢየሱስ ፉጎከ ሚናዳም ነፊል ኢምክኂንቲያ የከህ  ብልሓትከ  ዸዻናህ አነቢክ አድይ ይነ።  

ማዕራፋ  3

ያይጥምቀ ያሃኒሲ ቲምህርት

(ማቴ. 3፣1-12፤ ማር. 1፣1-8፤ ዮሐ. 1፣19-28)

  1. ሮማ ቄሳር ጢባርዮስ ይንግሠምኮ ኮናምከ ታማን ኢግድያህ፣ ጴንጤናዊ ጲላጦስ ይሁዳ ባዾህ ረዳንቶ ክይይ ይነ፡፡ ሄሮድስ ገሊላ ባዾህ አማኃዳሪ ክይይ ዪነ፣ አማምባሊህ ካሳዓል ፊሊጶስ ኢጡርያስከ ጥያራኮኒዶስ ረዳንቶ ክይይ ዪነ፣ ሊሳኒዮስ ለ አቢላኒስ አማሓዳርቲ ኪይይ ይኒን። 2. ሀናከ ቀያፋ ካህናት አኅሉቅ ክይይ ይኒን፣ ታማይ ዋክተ ዘካሪያስ ባዽ ያሃኒስ ባራካል ያነሃኒህ መዔፉጊህ ቃል ካያል የመተ። 3. አማይጉል ያሃኒስ ዮርዳኖስ ወዒህ ባሮሩል ታነ ሀገራታል ኡምቢህ አምዘወወርክ "ሲኒ ኃጢአታህ ሕድጎድ ገይቶናክ ኒስሓ ሳአይክ ኢምጥምቃ"አክየህ አይምሂሪይ ዪነ፡፡         4. ታሃም ተከም ነብይ ኢሳይያስ ያሃኒስ ዳዓባል ዮኮመህ ታህ የህ ይጽሕፈሚህ መሠረቲህ ኪኒ። 

            "ሀይከና ታይ ባራካድ ታህ አይክ ዋዕ ያ 

             ሒያውቲ አንዻ ኪኒ፣ 

             ማዳራህ አራሕ ኦይሶኖዶዋ፣   

             ጽርጋከ አራሕ ሪግ ኢሳ፡፡ 

         5. አዳ ለ ቦታ ኡምቢህ ኢድልድላ፣ 

             ኢምባታትከ ሪሮዋ ኡምቢህ ላት ቶዋይ፣     

             ጉዳ ለ አራሕ ሪግ ዮዋይ፣    

             ሖርፋፍ ለ አራሕ ያላስላሶይ፣   

        6. ሒያው ኡምቢህ መዔፉጊህ ድኅነት ያብሎናይ፡፡" 

      7. ያምጣማቆና ካኡላል ተመተ ሒያዋክ ያሃኒስ ታህ አካይ ይነ፣"አቲን ኮፍዖት ዻይሎ፣ ታምተ መዔፉጊህ ቁጡዓኮ ታውዖና ዽዕታናም ኢዪ ሲናክየ? 8. ይቦል ኒስሓ ሳይተኒም ያይቡሉወ ሢራሕ ሢራሓካህ ናኑ አብርሃም ዻሎ ኪኖ ተኒህ ሲኒ አፍዓዶድ ማማካሕና፡፡ መዔፉጊ ታይ ዻይትኮ አብራሃማህ ዻይሎ አካህ ኡጉሶ ዽዓም ሲናክ አይክ አኒዮ፡፡ 9. ካዶ ለ ሓዾዽ ሪሚዳኮ ይግርዔህ ዒዶ ሚሳር ዮይሶኖደወህ ያነ፣ አማይጉል መዔ ፍረ ፍሮሰ ዋይታ ሓዻ ሙሉኡድ ትግሪዔህ ጊራድ ራዳ፡፡"10. ህዝቢ ለ"ይቦል አይም አብኖ?" የኒህ ያሃኒስ ኤሠረን፡፡ 11. ኡሱክ"ላማ ሣረና ለቲ ኢንከቶ አለዋቲያህ ያሓዎይ፣ ፈሎ ለቲ አለዋቲያህ ኃዲሎይ፣"አክየ፡፡ 12. ግብረ ታስክፊለም ያምጣማቆና ካኡላል የመትኒህ"መምህሮ! ናኑ አይም አብኖ?" የኒህ ካኤሠረን፡፡ 13. ኡሱክ "ሕገህ ትምዚዘምኮ ተሰሲኒህ መሰሪና"አክየ፡፡ 14. ወታሃደር ለ ተመተህ"ናኑ አይም አብኖ?"አክየን፣ ኡሱክ ሒያው ማል ጊፍዔህ ትዕምፂኒህ ማበይና ኢንከቶ ዲራባህ ማክሳሲና፣ ሲን ደሞዎዝ ሲን ዽዖይ"አክየ፡፡ 15. ታማይ ዳባን ህዝቢ ኡምቢህ መሲሒ ያምተም ታስፋህ ኢላላይ ዪነ፣ አማይጉል ያሃኒስክ"ታይ ሒያውቲ ምናልባት መሲሒ ያከሆ?"የኒህ ሲኒ አፍዓዶድ ይሕስቢን፡፡ 16. ያሃኒስ ለል ታህ አክየ፣"አኑ ላየህ ሲን አይጥምቂክ አንዮ፣ ያከካህ አከቲ ዮኮ ያሰቲ አምተለ፣ አኑ ካ ካበላህ ማዹዋ አንሓዎ ኡካ ኤዳቲያ ማክዮ፣ ኡሱክ መንፈስ ቁዱሱህከ ጊራህ ሲን አይጥምቀ ለ፡፡ 17. ኡሱክ ዓውዲ አሞል ኢላው ሓሣርኮ ባዽሳናም ባሊህ አካህ ባዽሶ ማስኤ ጋባህ ይብዸህ ያነ፣ ይጽሬምኮ ላካል መዔ ኢላው ማዕካናድ ሳይሰ ለ፣ ሓሳር ለል ባደዋይታ ጊራህ አስቀጸለ።"18. ታማም ባሊህ ያሃኒስ ኢሲሲ አራሓህ ሂዝበ አምክሪክ መዔ ዋረ ተን አይብሢሪይ ዪነ፡፡ 19. ገሊላ ረዳንቶክ ሄሮድስክ ለል ኢሲ ሳዓሊህ ፊሊጶስ ኑማ ሄሮድያዳ ኦርቢሰጉልከ አኪ ማንጎ ኡማ ጉዳይ አበርከህ ካ'ይግስጸ፡፡ 20. ሄሮድስ ታሃም ኡምቢህ ካ ዽዕታምኮ ኡምነ ታሞል ኡምነ ኦሰህ ያሃኒስ ዋክኒ ዓረድ ሳይሰ፡፡ 

ኢየሱስ ይምጥሚቀም

(ማቴ. 3፤13-17፣ ማር. 1፤9-11)

  21. ህዝቢ ኡምቢህ ይምጥምቀሚህ ላካል ኢየሱስ ለ ይምጥምቀ፣ ጻሎት አባይ ያነሃኒህ ዓራን ፋክተ፡፡ 22. መንፈስ ቁዱስ ዱጉጉለይታ ሚስለህ የከህ ካዸግኃል ኦበ፣ ታማይ ዋክተ "አቱ ኢምክሒን ይባዻ ኪቶ፣ ኮያህ ኒያታ"ያ አንዻ  ዓራንኮ የመተ፡፡

ኢየሱስ ዋላዶ ሓረግ

(ማቴ.1፣1-17)

   23. ኢየሱስ አይማሃርቲ ሢራሕ ኤዸዽሳህ ዒድመህ ሦዶም ኢግድያ ኪይይ ዪነ፣ ህዝቢ ኢየሱስ ዮሴፍ ባዻ ካ አካልይ ዪነ፣ ሀይከ ለ ዮሴፍ ኤሊ ባዻ፣ 24. ኤሊ ማቲ ባዻ፣ ማቲ ሌዊ ባዻ፣ ሌዊ ሚልኪ ባዻ፣ ሚልኪ ዮና ባዻ  ዮና ዮሴፍ ባዻ፣ 25. ዮሴፍ ማታቲዩ ባዻ፣ ማታቲዩ አሞጽ ባዻ፣ አሞጽ ናሆም ባዻ፣ ናሆም ኤስሊም ባዻ፣ ኤስሊም ናጌ ባዻ፣ 26. ናጌ ማአት ባዻ፣ ማአት ማታቲዩ ባዻ፣ ማታቲዩ ሴሜይ ባዻ፣ ሴሜይ ዮሴፍ ባዻ፣ ዮሴፍ  ዮዳ  ባዻ፣ 27. ዮዳ ዮናን ባዻ፣ ዮናን ሬስ  ባዻ፣ ሬስ ዘሩበባል ባዻ፣ ዘሩባቤል ሰላቲያ ባዻ፣ ሰላቲያ ኔሪ ባዻ፣ 28. ኔሪ ሚልኪ ባዻ፣ ሚልኪ ሐዲ ባዻ፣ ሐዲ ቆሳም ባዻ፣ ቆሳም ኤልሞዳም ባዻ፣ ኤልሞዳም ዔር ባዻ፣ 29. ዔር ዮሴዕ ባዻ፣ ዮሴዕ አልአዛር ባዻ፣ አልአዛር ዮራም ባዻ፣ ዮራም ማጣት ባዻ፣ ማጣት ሌዊ ባዻ፣ 30. ሌዊ ስምዖን ባዻ፣ ስምዖን፣ ይሁዳ ባዻ፣ ይሁዳ ዮሴፍ ባዻ፣ ዮሴፍ ዮናን ባዻ፣ ዮናን ኤልያቄም ባዻ፣ 31. ኤልያቄም ሜልያ ባዻ፣ ሜልያ ማይናን ባዻ፣ ማይናን ማጣት ባዻ፣ ማጣት ናታን ባዻ፣ ናታን ዳዊት ባዻ፡፡ 32. ዳዊት እሴይ ባዻ፣ እሴይ ኢዩቤድ ባዻ፣ ኢዩቤድ ቦዔዝ ባዻ፣ ቦዔዝ ሳላሞን ባዻ፣ ሳላሞን ናአሶን ባዻ፡፡ 33. ናአሶን አሚናዳብ ባዻ፣ አሚናዳብ አራም ባዻ፣ አራም አሮን ባዻ፣ አሮን ኤስሮም ባዻ፣ ኤስሮም ፋሬስ ባዻ፣ ፋሬስ ይሁዳ ባዻ፣ ይሁዳ ያዕቆብ ባዻ፣ 34. ያዕቆብ ይስሐቅ ባዻ፣ ይስሐቅ አብራሃም ባዻ፣ አብራሃም ታራ ባዻ፣ ታራ ናኮር ባዻ፣35. ናኮር ሰሩግ ባዻ፣ ሰሩግ ረዑ ባዻ፣ ረዑ ፋሌቅ ባዻ፣ ፋሌቅ ዔቤር ባዻ፣ ዔቤር ሸላሕ ባዻ፣ 36. ሸላሕ ቃይንም ባዻ፣ ቃይንም አርፋክሳድ ባዻ፣ አርፋክሳድ ሴም ባዻ፣ ሴም ኖህ ባዻ፣ ኖህ ላሜሕ ባዻ፣ 37. ላሜሕ ማቱሳላ ባዻ፣ ማቱሳላ ሄኖክ ባዻ፣ ሄኖክ ያሬድ ባዻ፣ ያሬድ መላልኤል ባዻ፣ መላኤል ቃይናን ባዻ፣ 38. ቃይናን ሄኖስ ባዻ፣ ሄኖስ ሤት ባዻ፣ ሤት አዳም ባዻ፣ ኣዳም  ፉጊ ባዻ ኪኒ አይ ይኒን ። 

ማዕራፋ 4

ኢየሱስ ይምፍቲነም

(ማቴ. 4፣1-11፣ ማር. 1፣12-13)

   1. ኢየሱስ መንፈስ ቁዱሱህ የመገህ ዮርዳኖስ ወዓኮ ጋሔ፣ ታማርከኮ ባራካህ ያዳዎ መንፈስ ቁዱስ ካኡጉጉሰ፡፡ 

  2. ባራካድ ሞሮቶም ለለዕቲያ ዲያብሎሱህ ይምፍቲነ፣ ታማይ ለለዓድ ኢንኪም ማበትናጉል ባክቶል ሉወ፡፡ 3. ዲያብሎስ ለ ኢየሱሱክ ፉጊ ባዻ ተከምኮ ኢስኪ ታይ ዻይ ኢንጌራ ያኮ እኢዚዝ"አክየ፡፡ 

  4. ኢየሱስ ለ"ሒያው ኢንጌራህ ጢራህ ማማርታ"የህ ይምጽሕፈህ ያነ የህ መልሲ ኤልድሄየ፡፡  

  5. ታሃምኮ ላካል ዲያብሎስ ኢየሱስ ኢንኪ ናባ ናውታ ቦታህ አሞክ የየዔህ ዓለም ማንግሥታት ኡምቢህ ሀንደበቲህ ይቡሉወህ ታህ አክየ፡፡ 6."ታይ ኡምብሂያህ ሢልጣንከ ክብረ ኮያህ አኃልዮ፣ ታሃም ሙሉኡክ ዮያህ ተምሖወም ኪኒጉል ጉረቲያህ አሓዎ ዺዓ፡፡ 7. አማይጉል አቱ ዮያህ ትስግደምኮ ታሃም ኡምቢህ ኩም አከለ፡፡”

   8. ኢየሱስ "መዔፉጎህ ኢሲ አምላካህ ዲቦህ ኢስጊድ፣ ካያ ዲቦሀ ኢስግልጊል"የህ ይምጽሕፈህ ያነ የህ ኤል ደሄየ፡፡ 

  9. ታሃሚህ ላካል ዲያብሎስ ኢየሱስ ኢሩሳለም ኡላል ካበ፣ በተ መቅደስ ዓሪህ ናሕሳክ ኤዸዻክ አሞክ ሶሎ አበህ ታህ አክየ፣"አቱ ፉጊ ባዻ ተከምኮ ኢስኪ ታርከኮ ፍዽታይ ጉባል ኢምውርዊር፡፡ 10. አይሚህ ኮያ ዻዉዾና መዔፉጊ ማላይካ ኮህ አኢዚዘ ለ፣ 11. ኩኢቢ ለ ዻይቲህ ጎንፎይታምኮ ሲኒ ጋባህ ይድግፊኒህ ኩአብዸሎን የህ ይምጽሕፈህ"ያነ አክየ፡፡ 

  12. ኢየሱስ ለ"መዔፉጎ ኢሲ አምላክ ማይፋታኒን የህ ይምጽሕፈህ ያነ የህ ኤልይምልሰ።

  13.  ዲያብሎስ ኢየሱስ ለ መንጎ አራሓህ  ይፊቲነምኮ ላካል ዋክተህ ሓበህ የደ፡፡ 

ኢየሱስ ያይምሂርንሚህ ሢራሕ ገሊላል ኤዸዺሰ

(ማቴ. 13፣12-17፤ ማር. 1፣14-15)

  14. ኢየሱስ ለ ቁዱስ መንፈሲህ ኃይላህ የመገህ ገሊላ ቱላል ጋሔ፣ ካ ታሪክ ኡማን ባዾል ዮሞበ፡፡ 15. ተን ሙክራባል አይምህሪይ ዪነ፣ ኡምቢህ ካሚህሮህ ካይምስግኒን፡፡

ኢየሱስ ናዝሬቲል ዕንቅፋት ካማደ

(ማቴ. 13፣53-58፤ ማር. 6፣1-6)

   16. ታሃምኮ ላካል ኢየሱስ ኤል ዓረ ባዾ ናዝሬት የደ፣ ኢሲ ልማድባሊህ ሳንባት ለለዕ ሙክራባድ ሳየ፣ ያይናባቦ ኡጉተ፡፡ 17. ነብይ እሳያሲህ ማጽሐፍ አካህ ዮምሖወ፣ ማጽሐፍ ለ ፋከጉል ታህ ተህ ትምጽሕፈ ቦታ ገየ፣ 

  18."መዔፉጊህ መንፈስ ያሞል ኪኒ፣ መዔ ዋረ ድካታታህ አይባሳሮ ኪኒ ይረድሰም፣ ቱምዹወም አንሐዎ፣ ቶዖረም ያብሎና አአዋዞከ፣ ትምጽግመም ናፃ አያዖ ይፋረ፣ 

   19. ታማም ባሊህ ፉጊ ህዝበ  አካህ ኣይድኂነ ጸጋት ኢግዳ አይሳዻጎ ይፋረ፡፡"       20. ኢየሱስ ማጽሐፍ አልፈህ ያዕድለቲያህ ዮሖወህ ድፈ፣ ሙክራባድ ቲነም ኡምቢህ ዩቱኩሪኒህ ካያ ያይደለለዒኒም ኤዸዽሰን፡፡ 21 .ኡሱክ ለ"ሃይከ ታይ ማጽሐፍ ካዶ አምንብብህ ቶቢን መጽሐፊህ ቃል ካፋ ይምፍጺመ አክየ፡፡   

  22. ካዳዓባል ኡምቢህ መዔም ዋንስታይ ይኒን፣ ዋንስታህ ካ ዻዓመዔ ቃላህ ይምድንቅኒህ "ታይቲ ዮሴፍ ባዻ ማኪሆ?" የን፡፡ 

  23. ኢየሱስ ታህ አክየ፣"ኮ ሓኪም፣ ኢስኪ ኢሲ ዸግኃ ኢይድኂን ታዽሔ ምሳለ ዮል ታምጥቅምኒም አሚነ፣ ታማምባሊህ ቅፍርህናሆሙል አብተ አይህ ኖበም ኡምቢህ ታል ኢሲ ባዾል አብ"ዮክ ኢየልቲን፡፡ 24. ሓቀህ ሲናካይክ አኒዮ ነብይ ኢሲ ባዾህ ሒያዋህ ምያክብረ፡፡ 

  25. ዮባ ሓቀ ሲናክ ኦዋክ፣ ነብይ ኤልያስ ዳባን አዶሓ ኢግዳከ ሊሐ አልሳ ሮብ ራደ ዋየርከህ ባዾል ሙሉኡድ ኃይላለ ራሀብ የከህ ይነ። ታማይ ዋክተ እስራኤል ባዾል መንጎ ማማን ቲነ፡፡ 26.ያከካህ ኤልያስ ሲዶና ባዾል ስራጵታ አክያን ቁሰትል ገይምታ ኢንኪ ማሚኖል ዲቦህ ፋሪትመካህ አኪ ማራኮ ቲያል ማፋርትሚና፡፡ 27. ታማም ባሊህ ነብይ ኤልሳዕህ ዋክተ ማንጎ ለምፃማት እስራኤል ባዾል ዪኒን፣ ያከካህ ሶሪያል ንዕማርኮ በሒህ ተንኮ ኢንከቲ ኡካ ማድኃኒና፡፡"

  28. ሙክራብድ ቲነም ሙሉኡድ ታሃም ዮቢን ዋክተ ጋዳህ ይቁጡዒን፡፡ 29. ኡጉተኒህ ኢየሱስ ሂርገኒህ ካታማኮ ኢሮህ የየዒን፣ ቦሉድ ዱፉወኒህ ዒዶና ጉረኒህ ተን ካታማ ኤልሢራሒምተ ሪይቲ ገምገሚክ አሞክ በየን፡፡ 30. ኡሱክ ለ ተን ፋንኮ ቲላየህ የደየ፡፡

ሩኩስ መንፈስ ኤድየኅድረ ሒያወቲ

(ማር. 1፣21-28)

  31. ታሃምኮ ላካል ኢየሱስ ገሊላ ክፍሊህ ባዾል ገይምታ ካታማል ቅፍርናሆም ኡላል የደ፣ ታማል ሂዝበ ሳንባት ለለዕ አይምህሪይ ይነ፡፡ 32. ሢልጣን ቃላህ ዋንስታይ ይነጉል ሙሉኡክ ካምሂሮህ አምድንቂይ ይኒን፡፡ 33. ታማል ሙክራባድ ሩኩስ መንፈስ ኤድይኅድረ ሒያውቲ ይነ፣ ኡሱክ ናባ አንዻሓህ ታህ አይክ ደረ፣ "ናዝሬት ኢየሱሶ! ኖሊህ አቱ አይሚህ ጉዳይ ሊቶ? 34. ኒ ታይላዮ ተመተ? አቱ አቲያ ኪቶም አኑ አዽገ፣ አቱ ኡኮ ፉጊ ቁዱስ ኪቶ!" 

   35. ኢየሱስ ለ ሩኩስ መንፈስክ"ቲብኤያ ካኮ ኤወዕ!"የህ ይግሲጸ፣ ሩኩስ መንፈስ ሒያውቶ ህዝቢ ነፊል ዒደህ ኢንክሚህ ካቢያከካህ የውዔ፡፡ 

 36. ኡምቢህ ለ አምግሪሚክ ሲነሲነህ"ታሃም አይሚህ ዓይነቲህ ጉዳይ ኪኒ? ሢልጣናህከ ኃይላህ ሩኩሳት መናፍስት ያኢዚዘ፣ ኢሲን ይምኢዚዚኒህ ያውዒን፣ ኢሲመን፡፡ 37. ኢየሱስ ዋሪ ታማይ ባዾህ ባሮሩል ሙሉኡድ የሞበ፡፡                    

                                   ኢየሱስ ማንጎ  ዳላክን ኡሩሰ

(ማቴ. 8፣14-17፤ ማር. 1፣29-34)

  38. ኢየሱስ ሙክራብኮ ኡጉተህ ስምዖን ዓረህ የደ፣ ታማል ስምዖን ባሎ ጋዳህ ራስነህ ላሑተህ ዽንተህ ቲነ፣ አማይጉል ተ ኡሩሶ ኢየሱስ ዻዒመን፡፡ 39. ኢየሱስ ለ ተያድ ካ ባ የህ ተ አፋል አክ ሶለህ ራስኒ ተሐቦ ይኢዚዘ፣ ራስኒ ተሓበ፣ ጉልከ ጉሉህ ኡጉተህ ተን ታይሳሳዎ ኤዸዽሰ፡፡ 

  40. አይሮይታ ዹመተጉል ሒያው ኢሲሲ ዱረህ ትምዽብዸ ዳላኪን ኡምቢህ ኢየሱስ ዻጋህ ባሄን፣ ኡሱክ ተንተን ዸግኃህ አሞል ጋባ ድፈሳክ ተን ኡሩሰ፡፡ 41. አጋኒኒቲ"አቱኮ መዔፉጊህ ባዻ ኪቶ"አይክ ደራክ ማንጎ ሒያውኮ አውዒይ ይኒን፣ ኡሱክ ክርሰቶስ ኪናም የዸግኒህ ይኒን፣ ኢየሱስ ለ ካዳዓባል ኢንኪም ዋንሲታናምኮ አግሲትስክ ተን ደሳይ ይነ።

ኢየሱስ ገሊላል ያይምሂሪኒም  ይቅጽለ

(ማቴ. 4፣23-25፤ ማር. 1፣35-39)

   42. ሑገ ማሕተጉል ኢየሱስ ታማርከኮ የውዔህ ሒያው ኤድ አኔየዋይታ ዲቦ ኪን ቦታል የደ፣ ሒያው ካዋጊያይ ይኒን፣ ገየንጉል"ኖክ ባዽስምተህ ኖክ ማአዳይን"የኒህ ዻዒመን፡፡ 43. ኡሱክ ለ"አኑ ፋሪቲመም ታሃማህ ኪኒጉል አኪ ካቶሙል ኤደህ ፉጊ ማንግሥትህ በሠራታ ቃል አይባሳሮ"ዮህ ኤዳ፡፡ 44. አማይጉል ይሁዳ ሙክራባታል ኡምቢህ ቶከታህ አይክ  አይምሂሪይ ይነ፡፡

ማዕራፋ 5

ኢየሱሰ ኤዸዾይታ ተምሃሮ ደዔ

(ማቴ.4፣18-22፤ማር.1፣16-20)

  1. ኢንኪ ለለዕ ኢየሱስ ጌንሳሬጥ ባሕሪህ ዳራታል ሶለህ ያነሃኒህ ማንጎ ሒያው ካኡላል ካብየኒህ መዔፉጊህ ቃል ያቦና ቲታ ዱፉዋይ ይኒን፡፡ 2 ኡሱክ ባሕሪ ዳራታክ ትጽግዔህ ሶልተህ ቲነ ዛልባ ዩብለ፣ ዓሣ ታጽምደም ለ ዛልባኮ ኦበኒህ ሲኒ መርበብ ዓካልሳይ ይኒን፡፡ 3. ኢየሱስ ዛልባኮ ኢንከቶድ ስምዖንቲያድ ሳየ፡፡ ስምዖኑክ ለ"ታይ ዛልባ ባዾኮ ባሕሩላል ኢስኪ ዳጉሁም ሚርሓ ዮህ ኢስ"አክየ፡፡ ታሃሚህ ላካል ዛልባክ አሞክ ዲፈየህ ህዝበ ያምህሪኒም ኤዸዽሰ ፡፡ 

  4. ዋኒ ባከምኮ ላካል ስምዖኑክ"ዛልባ ባሕራክ አዳቱላል ሚሪሒ ኢሳይ ኮከ ኩዶባ ዓሣ ታጽማዶናክ ስኒ መረብ ዒዳ፣"አክየ፡፡ 

  5. ስምዖን ለ"መምሂሮ! ባር ሙሉኡድ ኃዋላክ ማሕነህ ኢንኪም ማባዽኒኖ፣ አቱ ተምኮ ለ ሃይክኖ መርበብ ዒዳልኖ"አክየ፡፡ 6. መርበብ ዒደን ዋክተ መርበብ ዓንዽዻም ፋናህ ጋዳህ ማንጎ ዓሣ ይብዽን፡፡ 7. አማይጉል አኪ ዛልባህ አሞክ ዪነ ዶቢ የመትኒህ ተን ሓቶና ምልክቲህ አበኒህ ደዔን፣ ኢሲን የመትኒህ ላማ ዛልባ ታማንዻዖ ዳጉሁም አክ ራዕታም ፋናህ ዓሣህ የመጊን፡፡ 8 .ስምዖን ጰጥሮስ ታሃም ዩብለጉል ኢየሱሱክ ነፊል ይምብርክከህ"ይማዳራ! አኑ ኃጢአት ለቲያ ኪዮጉል ዮያድ ካብሚን"አክየ፡፡ 

   9. ታሃም አካህ የ ምክንያት ካከ ካሊህ ዪነ ዶቢ ሙሉእድ ይብዽን ዓሣህ ማንጋኮ ኡጉተሚህ ጋዳህ ይምግርሚኒህ ይንንጉል ኪኒ፡፡ 10. ታማሃም ባሊህ ስምዖን ዶባ ተከ ዘብዴዎስ ዻይሎ ያዕቆብከ ያሃኒስ ይምድንቅኒህ ይኒን፡፡ ኢየሱስ ስምዖኑክ" አይዱኩመይ፣ ማማይስቲን፣ ካምቦኮ ሣራህ ሒያው ያጽምደ ቲያ አከልቶክ"አክየ፡፡       11. ኢሲን ለ ዛልባ ባዾል ይጽግዒኒሚህ ላካል ኡማን ጉዳይ ኃበኒህ ኢየሱስ ታክቲለም የኪን።

ኢየሱስ ለምፃም ኪን ሒያውቶ ኡሩሰ

(ማቴ .8፣1-4፤ማር.1፣40-45)

   12. ኢንኪ ለለዕ ኢየሱስ ኢንኪ ካታማህ አዳል ያነሃኒህ ላምፂ ካይውሪሰ ኢንኪ ሒያውቲ ካኡላል የመተ፣ ኢየሱስ ዩብለጉል ዳምባራህ ጋምመህ"ጉርታዶ ይኡሩሰ ዻዸ"የህ ካዻዒመ፡፡

  13. ኢየሱስ ጋባ ፋሕ ኢሰህ ሀሳስ ኢሰህ"ጉረህ አኒዮክ ኡር"አክየ፡፡ አማይጉልካህ ላምፀኮ ኡረ፡፡ 14. ይቅጽለህ ኢየሱስ ታህ የህ ካ'ይኢዚዘ"ታይ ጉዳይ ቲያክ ሚን፣ ያካካህ ሪግተህ አዱዋይ ኢሲ ዸግኃ ካህን ኡይቡሉይ፣ ህዝበህ ማስኪር ያኮክ ትንጽሔም ኢዻህ ሙሴ ይኢዚዘ መስዋዕቲ ካብኢስ፡፡   

   15. ኢየሱስ ዋሪ ለ  ኡማን ዋክተኮ አጋናል ዮሞበ፣ ማንጎ ሒያው ካያ ያቦናከ ዱረኮ ኡሮና ጉረኒህ ኤል አከሄሊይ ይኒን፡፡ 16. ኡሱክ ለ ኡማን ዋክተ ዲቦህ ባራካህ አድይክ ጻሎት አባይ ይነ፡፡

ኢየሱስ ስባ ኪን ሒያውቶ ኡሩሰ

(ማቴ. 9፣1-8፤ ማር. 2፣1-12)

  17. ኢንኪ ለለዕ ኢየሱስ አይምሂሪይ ያነሃኒህ ፈሪሳውያንከ ሙሴ ሕጊህ መምሂራን ካባሮል ድፈኒህ ይኒን፣ ኢሲን ገሊላከ ይሁዳ መንደራኮ ኡምቢህ ታማምባሊህ ኢየሩሳለም ካታማኮ ተመተም ቲነ፡፡ ኢየሱስ ላሑተም አካህ ኡሩሳ መዔፉጊህ ኃይላ ሊይ ይነ፡፡ 18. ሀይከ ኢንኪ ሲባ ኪን ሒያውቶ ዓራታክ ይይኩዕኒህ ሒያው ኢየሱሱል ባሄኒህ፣  ኢየሱስ ኤድ ያነ ዓረድ ሳይሰኒህ ካነፊል ድፈሶና ጉረኒህ ይኒን፡፡ 19. ያከካህ ህዝቢ ማንጋኮ ኡጉተምህ ሲባ ዓረድ ሳይሶና ታነን፣ አማይጉል ናሕሳክ ይብዽኒህ የውዒን፣ ናሕሳ ይብንቅርኒህ ሲባ ዓራትሊህ ኢየሱስ ነፊል ይብዽይን፡፡ 20. ኢየሱስ ተን ኢምነት ዩብለህ ሲባክ"ኮሕያውቶ! ኩኃጢአት ኮህ ይምድምሲሰህ ያነ" አክየ፡፡ 

  21. ሙሴ ሕጊህ መምሂራንከ ፈሪሳውያን"ፉጊ አሞል ዋቶ ቃል ዋንስታቲ አይቲያ ኪኒ? ኃጢአት ያድምሲሰቲ መዔፉጎ ጥራሕ ኪኒካህ አከቲ አይቲያ ኪነ?"አይክ አሕስቢይ ዪኒን፡፡ 

 22. ኢየሱስ ለ ተን ሓሳብ የደገህ ታህ አክየ፣"ሲኒ አፍዓዶድ አይሚህ ታሃም አሕስቢክ ታኒኒ? 23. ኢስኪ ኃጢአት ኮህ ራዔህ ያነ ያናምከ ኡጉታይ አዱይ ያነማኮ አይቲ ሲሲካ? 24. ያከካህ ሒያውቲ ባዽ ባዾ ታሞል ኃጢአት ያዳምሳሶ ሢልጣን ለም ታዻጎና ሲናል ያነ"የህ ሲባ ኪን ሒያውቶክ"ኮሒያውቶ ኡጉት፣ ኢሲ ዓራት ኡይኩዓይ ኢሲ ዲክ አዱይ"አክየ፡፡

   25. ሲባ ለ ሒያው ነፊል ኡጉተህ ዓራት ይትኩዔህ ፉጎ አይምስግኒክ ኢሲ ድኪህ የደ፡፡ 26. ታማል ቲነ ሒያው ሙሉኡክ ጋዳህ ይምግርሚኒህ"ካፋ ዲንቀ ኪን ጉዳይ ኑብለ፣ አይክ መዔፉጎ ይምስግኒን። 

ኢየሱስ ማትዎስ አክያን ሌዊ ደዔ

(ማቴ. 9፣9-13፤ ማር. 2፣13-17)

   27. ኢየሱስ የወዔህ ያዴሃኒህ ሌዊ አክያን ቀራጺ ቀረጽ ኤልጋራያን ቦታል ድፈህ ዩብለህ"ይክቲል"አክየ፡፡  28.  ሌዊ ለ ኡጉተህ ኡማን ጉዳይ ሓበህ ኤድካታየ።

  29. ታሃሚህ ላካል ሌዊ ኢሲ ድክድ ኢየሱስ ክብረህ ናባ ድጊስ አበ፣ ድጊስ አሞል ማንጎ ቀረጽቲከ አኪ ማንጎ ሒያው ገይመኒህ ይኒን፡፡ 30. ፈሪሳውያን ወገን ተከ ሙሴ ሕጊ መምሂራን"ቀረጽትከ ኃጢአት ለምሊህ በታናምከ ታዑቢን አይሚህ ኪቲኒ?  የኒህ ኢየሱስ ተምሃርቲህ አሞል ዩግሩምሩምን፡፡ 

  31. ኢየሱስ ለ ታህ የህ ኤልይምልሰ፣"ዳላኪን ኢካህ ዓፍያት ለም ሓኪም ተን ማጉርሱሳ፡፡"32. አኑ ኤመተም ኃጢአት ለም ንስሓህ ደዖ ኤህ ኢካህ ጻድቃን ንስሓህ ደዖ ኤህ ማኪዮ።

ጾምቲ ዳዓባል ካብተ ኤሰሮ

(ማቴ. 9፣14-17፤ ማር. 2፣18-22)

 33. ታሃሚህ ላካል ኢየሱስ"ያሃኒስከ ፈሪሳውያን ተምሃሮ ጾምከ ጻሎት ያይመንጊን፣ ኩተምሃሮ ለል ኡማን ዋክተ በተናምከ ያዑብኒም አይሚህ ኪኖኑ?"ያናማህ ካኤሠረን፡፡ 

  34. ኢየሱስ ለ ታህ የህ ኤይምልሰ፣"ማርዓየ ተንሊህ ያነሃኒህ ዓራካ ያጻሞና ኤዳ ተኒህ ታሕሲቢኒ? 35. ያኮይ ኢካህ ማርዔ ተንኮ ባዽስማ ዋክቲ አምተለ፣ ታማይ ዋክተ አጾመሎን፡፡

 36. ካታሰህ ኢየሱሰ ታህ የህ ኢንኪ ምስላቶ አክየ፣"ዑሱብ ሣረናኮ ታካባ ዓንዽሰህ ተምዔለ ሣረናህ አሞል ያትክበቲይ ሚያነ፣ ታሃም አባቲ ይኔምኮ ለል ዑሱብ ሣረና ካንቶህ ዓንዽሳ፣ ዑሱብ ታካባ ለ ተምዔለ ሣረናሊህ ማታምሰመመዔ፡፡ 37. ታማም ባሊህ የምዔለ ወይኒ  መስቲህ ሲባዻድ ዑሱብ ወይኒ መስ ሃያቲይ ሚያነ፣ ታሃም አባቲ ይኔምኮ ለ ዑሱብ ወይኒ መስ ሲባዽ ቦትዒሳ፣ ወይኒ መስ ለ ሐዽታ፣ ሲባዽ ለ ጥቅመኮ ኢሮ ያከ፡፡ 38. አማይጉል ዑሱብ ወይኒ መስ ዑሰብ ሲባዻድ ሀዎና ኤዳ።  39. ማንጎ ዋክተ ሱገ ጋዳህ ጉፈ ወይኒ መስ ያዖበቲ ዑሱብ ጉሙዓይ ኪን ወይኒ መስ ያዑቦ ማጉራ፣ አይሚህ  ሱገ ጉፈ ወይኒ መስ' ያይሰቲያ  ኪኒ  ያ።" 

ማዕራፋ 6

ሳምባት ዳዓባል ካብተ ኤሰሮ

(ማቴ. 12፣1-8፤ ማር. 2፣23-28)

  1. ሳምባት ለለዕ ኢየሱስ ኢላው ፋንኮ ቲላክ ያነሃኒህ ካተምሃሮ ሲራይ ሱዋይ አቅጹይከ ሲኒ ጋባህ ሒሲየኒህ በታናም ኤዸዽሰን፡፡ 2. ፈሪሳውያንኮ ጋሪጋሪ ተምሃሮክ "ሳንባት ለለዕህ ያኮ ኤዳዋ ጉዳይ አይሚህ አባክታኒን?"አክየን፡፡ 

  3. ኢየሱስ ታህ የህ ኤል ደሄየ፣"ካከ ካልህ ቲነ ሒያው ሉወንጉል ዳዊት አበም ማይናባብኒቲንሆ? 4. ኡሱክ መዔፉጊህ ዓረድ ሳየህ ካህናትኮ በሓማሪ በቶና አምፍቅደ ዋይታ ኢንገራ በተ፣ ካሊህ ቲነ ሒያዋህ ዮሖወ፡፡"

   5. ካታሰህ ኢየሱስ"ሒያወቲ ባዽ ሳንባት ማዳራ ኪኒ"አክየ፡፡

ኢየሱስ ሲባ ኪን ሕያውቶ ኡሩሰ

(ማቴ. 12፣1-8፤ ማር.2፣23-28)

   6. አኪ ሳንባት ለለዕ ኢየሱስ ሙክራባድ ሳየህ አይምህሪይ ይነ፣ ታማል ምድግ ጋባ አክ ትስምሂለ ኢንኪ ሒያውቲ ዪነ፡፡ 7. ሙሴ ሕጊህ መምሂራንከ ፈሪሳውያን ኢየሱስ አካህ ያክስሲን ገበን ገዮና ጉረኒህ"ኢስኪ ሳንባት ለለዕ ኡረሳም የከምኮ ናብሎይ የኒህ" ኢላላይ  ይኒን፡፡ 8. ኢየሱስ ለ ተን ሓሳብ የዸገህ ጋባ ሱምሁሉክ"ኡጉታይ ፋናል ሶል" አክየ፣ ሱምሁል ኡጉተህ ፋናል ሶለ፡፡ 9. ተማይ ዋክተ ኢየሱስ"ኢስኪ ሲን ኤሠሮክ ኦባየ ሳንባት ለለዕ አቦና ትምፊቅደም መዔም አባናም ኪኒ? ወይ ኡማም፣ ናብሰ ያይድኅንኒም ኪኒ ወይ ያይለይኒም?"አክየ፡፡ 10. ኢየሱስ ባሮሩል ቲነ ሒያው ኡምቢህ የይደለለዔሚህ ላካል ጋባ ሱምሁሉክ"ጋባ ኢዝርጊክህ"አክየ፡፡ ኡሱክ ጋባ ይዝርግሔጉል አካህ ኡርተህ አኪ ጋባ ባሊህ ናጋይ አካህ ተከ፡፡ 

  11. ሙሴ ሕጊህ መምሂራንከ ፈሪሳውያን ለ ጋዳህ ይቁጡዒኒህ"ታጉል ኢየሱስ አይናህ ኢስናም ኖህ ታይሰ?"ያናማህ ሲነሲነህ የመከከሪን ፡፡

ኢየሱስ ላማምከ ታማን ሐዋርያቲያ ዶረ

(ማቴ. 10፣1-4፤ ማር. 3፣13-19)

  12. ታሃምኮ ላካል ኢንኪ ለለዕ ኢየሱስ ጻሎት አቦ ኮማል የውዔ፣ ታማል ባር ሙሉእ ኢሲ ፉጎል ጻሎት አባክ ማሔ፡፡ 13. ሑገ ማተጉል ኢሲ ተምሃሮ ኢሱላል ደዔ፣ ተን ፋንኮ ላማምከ ታማናክ"ሐዋርያት"የህ ይስዪመ፡፡ 14. ኢሲን ካታይተህ ገይምታም ኪኖን፣ ጰጥሮስ የህ ይስይመ ስምዖንከ ሳዓል እንድርያስ፣ ያዕቆብከ ያሃኒስ፣ ፊልጶስከ በርተሎሜዎስ፣ 15. ማትዎስከ ቶማስ፣ እልፍዮስ ባዻ ያዕቆብከ" ያምኤረኤረ"ቲያ ኢሲመህ ደዕምማ ስምዖን፣ 16. ያዕቆብ ባዽ ይሁዳከ ኢየሱስ ቲላሰህ ዮሖወ አስቆሮታዊ ይሁዳ፡፡

ኢየሱስ ማንጎ ሒያው ይምሂ]ህረህ፣ ኡሩሰም

(ማቴ.4፣23-25)

   17. ኢየሱስ ኢሲ ሐዋርያትሊህ ኢምባኮ ኦበህ ማይዳል ሶለ፣ ካተምሃሮኮ ማንጎማሪ ታማል ዪኒን፣ ታማም ባሊህ ካ'ያቦናከ ዱረኮ ኡርቶ ጉርታምሊህ ተመተም ጋዳህ ማንጎ ሒያው ቲነ፡፡ ኢሲን የመቲኒም ይሁዳ ክፍሊህ ባዾኮ፣ ኢየሩሳለም ካታማኮ ባሕሪ ዳራታል ገይምታ ጢሮስከ ሲዶና ካቶምኮ ኪይይ ይኒን፡፡ 18. ሩኩሳት መናፍስቲህ ትምዽብዸ ሒያው የመቲኒህ ኡራይ ዪኒን፡፡ 19. ኡርናን ኃይሊ ካኮ አውዕክ ኡማንቲያ ኡሩሳይ ይነጉል ሒያው ኡምቢህ ኢየሱስ ዻጎና ጉራይ ይኒን፡፡

ኒያትከ  ኃዛን ምክንያት

(ማቴ. 5፣1-12)

  20. ኢየሱስ ኡፍኩና የህ ኢሲ ተምሃሪህ ኡላል አይደለለዕክ ታህ አክየ፣"መዔፉጊህ ማንግሥት ሲናህ ኪኒጉል አቲን ድካታቶ ኒያታ! 

  21. አቲን ካዶ ሉይታማክ ሣራህ ሓይተ ልቲኒክ ኒያታ! አቲን ካዶ ወዔታማክ ሣራህ አሱለ ልቲኒክ ደስ ሲናህ ዮዋይ!  

  22."ይ ተከተልቲ ተክኒሚህ ምክንያታል ሒያው ሲን ታንዕበጉልከ ሲን ማጋራይና የኒህ ሲን ባዽሳንጉል፣ ሲን ሳባዓንጉልከ ምጋዕ ሲናክ ዓይንሳንጉል ኒያታ! 23. ማንግሥተ ሰማያል ሲን ሊሞ ናባቲያ ኪኒጉል ታሃም ኡምብሂያ ሲን ማዳጉል ኒያታ፣ ኒያታህ ኢዕንድራ፣ ሲን አቦብቲከ ነብያት አሞል ታህ ኢግድን ኡምነ አካበኒህ ዪኒን፡፡ 

   24."አቲን ሀበታማቶ ለል ጉርተኒም ኡምቢህ ካዶ ታይ ባዾል ገይተኒህ ታኒኒጉል በራ ሲነህ ሚና!"

 25."አቲን ካዶ ሓይታማክ ሳራህ ሉወልቲንጉል ሲነህ ሚና! አቲን ካዶ ታሱለሚክ ሳራህ ቲሕዚኒኒህ ወዔሊቲንጉል ሲነህ ሚና! 26. ሒያው ኡምቢህ ሲን ታይሚስግነጉልከ ሲን ዳዓባል መዔም ዋንሲታንጉል ሲነህ ሚና! ተን አቦብቲክ ለ ዲራብቲ ነብያት ታማምባሊህ አካበኒህ ይኒን፡፡

ናዓብቶሊት ያክሕኒኒም

(ማቴ. 5፣38-48፤ ማቴ. 7፣12)

  27."አቲን ይታበሚክ ለ ታህ ሲናክ አይክ አኒዮ፣ ሲኒ ናዓብቶልት ኢክሒና፣ ሲን ኒዒባማህ መዔ ጉዳይ አካህ አባ፣ 28. ሲን አባርታም ዳዳዓ፣ ሲን ትብዲለሚህ ጻሎት አካህ አባ፣  29. ኢንኪ ዑዸክ ዻባን ኮክ ሳበዔቲያህ፣ አኪ ዑዸ ሣባዖክ ማክሳይ አካህ ኡሑይ፣ ናጻላ ኮክ በየቲያህ ቃሚስ ኤዶሳይ አካህ ኡሑይ፣ 30. ኩዻዒመቲያህ ኡምቢህ አካህ ኡሑይ፣ ማል ኮክ በየ ሒያውቶህ ኮህ ደሄዮ ካመሰሪን፡፡ 31. ሒያው ሲናህ አብቶ ጉርታናም ባሊህ አቲን ለ ታማምባሊህ ተናህ አባ፡፡ 

  32. ሲን ኪሒን ማራ ታክሕንኒም አይሚህ ሊሞ ለ? ኃጢአተይናታት ኡኮ ተን ኪሒን ማራ ኪሒኖን! 33. መዔ ጉዳይ ሲናህ አባቲያህ መዔም አብተንሚህ አይሚህ ሊሞ ሊቲኒ? ኃጢአት ለም ኡኮ ታማምባሊህ አባን! 34. ኖህ ደሄሎን ተኒህ ታሕስቢን ሒያዋህ ታይልክሒንጉል አይሚህ ፋይዳ ለ ሊሞ ገይታና? ይልክሒኒም አካህ ደሄዎና ኃጢአተይና ለ ኃጢአት ለቲያ ያይልኪሔ፡፡  35. አቲን ለ ሲኒ ናበቶሊት ኢክሒና፣ አምዒናኒም አካህ አባ፣ ንልካሕ ኖህ አፍዴ ለ ተኒህ ታስፋ አበካህ ኢሊኪሐ፣ ታሃም አብታንጉል ሲን ሊሞ ናባቲያ አከለ፣ ናባ ፉጊህ ዻይሎ አከልቲን፣ ኡሱክ አካህ አበንሚህ ሞያ አዽገ ዋይታማህከ ኡማ ማራህ ኡካ ራዔካህ መዔቲያ ኪኒ፡፡ 36. ዓራንቲ ሲናባ መሐሪ የከምባሊህ አቲን ለ ማሓርቲ ቲካ፡፡                                     

አኪማሪህ አሞል ያፍራዶና መዳም

(ማቴ. 7፣1-5)

  37. ኢንከቲ አሞል ማፍራድና፣ ሲን አሞል ሲናክ ያምፍርደክ፣ አኪማራ ማንቃፊና፣ ታምንቅፊኒክ፣ ሕድጎት አባ ሕድጎት ገይቶናክ፡፡ 38. ኡሑዋ ሲናህ ለ ያምሓወለክ፣ አካህ ቱስፉሪን ሚሰህ ሲናህ አምሱፉረ ለ፣ ኤረ መዔ ሚሰህ ትዒመህ ሐዽታም ፋናህ ሲናህ ይምሱፉረህ አምሓወለ፡፡

  39. ጋባዔህ ኢየሱስ ታይ ምሲላይቶ አክየ፣"ኢንቲማሊ ኢንቲማል ያምራሖ ዺዓ? ታሃም ተከምኮማ ቲታ ይቢዽኒህ ላሚህ ሁጉም" አዳድ ራዳን፡፡ 40. ተምሃራይ መምሂርኮ ሚያሰ፣ ያከካህ ተምሃራይ ምሂሮ ኤዳ ዒለህ ይምሂረምኮ ኢሲ መምህር ባሊህ ያከ፡፡ 

  41. ኩንቲድ ያነ ጉንደ አብላካህ፣ ኩዶባይቲህ ኢንቲድ ያነ ሓሳርቶ አይናህ ተህ አብልክ ታነ? 42. ለል ኩኢንቲህ አዳድ ያነ ዑዱፍ አብለካህ አኪ ሒያውቶክ 'ይሳዓሎ'ኩኢንቲድ ያን ዑዱፍ ኮህ አያዖ ያናም አይናህ ተህ ዺዕታ? ኮጉቡዝ ባሶል ኩኢንቲድ ያነ ጉንደ ኤየዕ፣ ታማሚህ ላካል ኩዶባይቲህ ኢንቲድ ያነ ሓሳርቶ ታያዖ ትይጽሬህ ታብሎ ዽዔሊቶ፡፡

ሓዻ ኢሲ ፍረህ ታምዽገ

(ማቴ. 7፣16-20፣12፣33-35)

   43. መዔ ሓዻ ኡማ ፍረ ማፍሮሳ፣ ታማም ባሊህ ኡማ ሓዻ መዔ ፍረ ማፍሮሳ፡፡ 44. ሖዽ ኡምቢህ ኢሲ ፍረህ ያምዽገ፣ ቆጥቃጢ ከናናንኮ ባለሲ ፍረ ማታምሱኩ ቱወ፡፡ አማምባሊህ ዓራኖኮ ወይኒ ፍረ ማታምሱኩቱወ፡፡ 45. አማይጉል መዔ ሒያወቲ ኢሲ መዔ አፍዓዶኮ መዔ ጉዳይ ያየዔ፣ ኡማ ሒያውቲ ኢሲ ኡማ አፍዓዶኮ ኡማ ጉዳይ ያየዔ፡፡ ሒያውቲ ኢሳፍኮ ዋንስታም አፍዓዶኮ ተመገህ ራዕተም ኪኒ፡፡   

ላማ ዓይነቲህ ዓረ ሢራሕታም

(ማቴ. 7፣24-27)

   46. አኑ ሲናካም ማታፍጽሚን፣ ኢስቲ አይሚህ ማዳራ! ማዳራ! አይክ ይደዓክ ታኒኒ? 47. ዩላል ያምተቲያከ ይቃል ዮበህ ያፍጽመቲይ ኢያህ ኢግዳም ሲናክ ኦዋ፣ 48. ኡሱክ አዳ ለ ጉድጋድ ፎተህ ኢሲ ዓረ ጺኒዕ ዺዻዒህ አሞክ ይምሥሪተ ሒውቶህ ኢጊዳ፣ ወዒ የመተህ ታማይ ዲክ ዱፉወ ያከካህ ጺኒዕ መሠረቲህ አሞል ሢራሒመም ኢዻህ ያይናቃናቆ ማዽዒና፡፡ 49. ይቃል ዮበህ አፍጽመዋየቲ ለ መሠረትሂኒም ሖፃ ኪን መረቲህ አሞል ዓረ ሠራሔ ሒያውቶህ ኢጊዳ፣ ወዒ የመተህ ታማይ ዲክ ዱፉወጉል አማይጉልካህ ራደ፣ ራድራድ ጋዳህ ናበቲያ የከ፡፡

ማዕራፋ 7

ኢየሱስ ቦልቲህ ሓለቃህ ባዻ ኡሩሰ

(ማቴ. 8፤5-13)

   1. ኢየሱስ ታሃም ኡምቢህ ህዝበህ ዋንሲተህ ባከሚህ ላካል ቅፍርናሆም የደየ፡፡ 2. ታማል ኢንኪ ሮማት ቦልቲ ኃለቃ ይነ፡፡ ኡሱክ ኪሒን አገልጋሊ ጋዳህ አክ ላሑተህ ራባህ የምደረገህ ይነ፡፡ 3. ቦልቲ ኃለቃ ኢየሱስ ዳዓባል ዮበ ዋክተ አይሁድ ስማግሊት ኢኒ"ሳዖል ኢየሱስ የመተህ ይ አገልጋሊ ዮህ ኡሩሶክ አዱዋይ ዮህ ዻዒማ"የህ ተን ፋረ። 4. ኢሲን ኢየሱሱድ የደይኒህ ታሃም አካህ አብቶ አካህ አዳ ሒያውቶ ኪኒ፣ 5. ኡሱክ ኒህዝበ ኪሒና፣ ሙክራብ ለ ኖህ ሢራሔ፣ የኒህ ዱፉወኒህ ካዻዒመን፡፡

 6. አማይጉል ኢየሱስ ተንሊህ ኢንኮህ የደ፣ ካድክህ ካብየንጉል ቦልቲ አሞይቲ ኢሲ ካኃንቶሊት ታህ የህ ኢየሱሱድ ፋረ፣" ይማዳራ አቱ ይድክድ ሳይቶ ዮህ ኤዳቲያ ማክዮ ዩላል ታማቶ ተህ ማኃዋሊን፡፡ 7. ኢኒ አሞህ ኩላላል አማቶ ዮህ ኤዳ ሒይውቶ ማኪዮ፡፡ አማይጉል አቱ ታማል ጋኅተህ ትኢዚዘምኮ ይ ጊለዋይቲ ኡረ ለ፡፡ 8. አኑ ኢኒ ዸግኃህ ሢልጣን ባዕሊህ ያምዝዘቲያ ክይህ ኢኒዳባል አኢዚዘ ወተሃደር ሊዮ፡፡ አማይጉል ኢንከቶክ"አዱይ"አከምኮ ያዴ፣ አከቶክ አሞ አከምኮ ያምተ፣ ይጊለዋይቶ ታሃም አብ አካጉል አባ፡፡ 

 9. ኢየሱስ ታሃም ዮበጉል ይምድንቀ፣ ካ አክትሊይ ቲነ ሒያዋድ ኡፍኩና የህ "እስራኤል አዳል ኡካ ታህ ኢጊዲን ኢምነት ሱሩህ ማገይኒዮ አክየ፡፡"10. ፋርምተ ሒያው ቦልቲ አሞባዕሊህ  ድክህ ጋኄኒህ የመትንጉል አገልጋሊ ኡረህ ገን፡፡

ኢየሱስ ኢንኪ ማሚኖ ባዻ' ራባኮ ኡጉሰ

  11. ኢብዻሒነ ኢየሱስ ናይን አክያን ኢንኪ ካታማል የደየ፣ ካ ተምሃሮከ ማንጎ ሒያው ካሊህ ኢንኮህ የደይን፡፡ 12. ኢየሱስ ካታማት ኢፈይህ አፍ ማዳህ ሀይከ ሒያው ረሳ ዩይኩዒኒህ ካታማኮ አውዒይ ዪኒን፡፡ ራበ ሒያውቲ ኢሲናህ ኢንከቶ ኪይይ ዪነ፡፡ ኢና ባዕሊ አክራበ ማሚኖ ኪይይ ቲነ፣ ካታማኮ ማንጎ ሒያው ተን አክቲሊይ ዪኒን፡፡ 13. ማዳሪ ተ ዩብለጉል አካህ ናኅሩረህ"አይዱኩመይ ማወዒን አክየ፡፡"14. ታሃሚህ ላካል ኢየሱስ ነፍቱላል ታክሲሰህ ቃረዛ ዻገ፣ ቃረዛ ቱይኩዔህ ቲነ ሒያው ሶልተ፣ ኢየሱስ ለል"አቱ ኮጎምቦ ኡጉት ኮካይክ አነ!"አክየ፡፡ 15. ራበቲ ሪጋየህ ዲፈየህ ዋንሲታናም ኤዸዺሰ፣ ታማሃምኮ ላካል ኢየሱስ ካ ኢናክ"ሃይከና ኩባዽ"የህ አካህ ዮሖወ፡፡

  16. ኡምቢህ ማይሲ ተን ትብዸህ"ናባ ነብይ ኒፋናድ ኡጉተ፣ መዔፉጊ ሂዝበ ያይዳኃኖ የመተ"አይክ ፉጎ ለ ይምስግኒን፡፡ 17. ኢየሱስ ዋሪ ይሁዳ ክፍሊህ ባዾል ሙሉኡድከ  አካባቢል ታነ ሀገራታል ኡምቢህ ዮሞበ፡፡

አጥማቂ ያሃኒስኮ ኢየሱሱድ ፋርምተ ፋሮፋይቲት

(ማቴ. 11፣2-19)

   18. ያሃኒስ ተምሃሮ ታሃም ሙሉኡድ ያሃኒስህ ዋሪሰን፣ ኡሱክ ካተምሃሮኮ ላማይ ደዔህ፣ 19. ያምተ አክያን መሲሕ ኮያ ኪኒ አከቶ ኢላልኖ? የህ ማዳራል ኢየሱስ ዻጋህ ተን ፋረ፡፡ 20. ኢሲን ኢየሱስል የደይኒህ ያመተ አክያን መሲሕ ኮያ ኪኒ? አካቶ አላልኖ? ኤዸሓይ ኤሠራ የህ አጥማቂ ያሃኒስ ኮያ ዻጋህ ኒፋረ አክየን፡፡ 21. ኢየሱስ ታማይ ሳዓታህ ሒያው ኢሲሲ ዱረከ ደዌኮ ኡሩሰ፣ ሩኩሳት መናፍስቲ የየዔ፣ ማንጎ ዑዉራናህ ኢንትት ኢፎሰ፡፡ 22. ኢየሱስ ፋሮንትቲክ ታህ አክየ፣"ጋሓይ አዱዋይ ያሃኒስክ ቱብልኒምከ ቶብኒም አከያ፣ ሀይከ ኢንቲማሎሊ አብልታነ፣ ሓንከስታም ሪጋየኒህ አድይይ ያኒን፣ ላምፀ ለም አንጽሕይ ታነ፣ ራብተም ኡጉታይ ታነ፣ አይቲ ሂናም አቢይ ታነ፣ ድካታታህ ወንጌል በሠራታ ቃል አካህ ዋንሲታይ ያነ፡፡ 23. ዮያህ አምጠረጠረ ዋየቲያከ አምሰነከለ ዋየቲ ይመስግነቲያ ኪኒ።"24. ያሃኒስ ፋሮንቲት የደይኒሚህ ላካል ኢየሱስ ያሃኒስ ዳዓባል ህዝበህ ታህ የህ ዋንሲታናም ኤዽዽሰ፣" አይም ታብሎና ባራካህ ተውዒኒ?"ሳሳሕታ ታምወዘወዘ ሳምባቆ ታብሎን ኪኒ? 25. ለል አይም ታብሎና ተውዒኒ? ሲሲሕ ሀሪ ሣራ ሀይስተ ሒያው ታብሎና ኪኒ? ሲሲሕ ሀሪ ሣራ ሀይስታምከ ዱሎቱህ ማርታም ነገሥታት ዓርዋድ ማራን፣ 26. ኢቦል አይም ቡሳ ታብሎና ተውዒኒ? ነብይ ታብሎና ተኒህ ኪኒ? ዮዎ ሲናክ አይክ አኒዮ፣ ኤረ ነብይኮ ያሰቲያ ታብሎና ኪኒ፡፡ 27. ኡሱክ ሀይከ ነፍከ ነፊል አድይክ ኩአራሕ ያይሶኖዶወ ይፋሮይታ ኮህ ፋረህ አኒዮ የህ አካህ ይምጽሕፈ ቲያ ኪኒ፡፡ 28. ባዾት አሞል ቶቦከ ሒያውኮ ኡምቢህ ያሃኒስኮ ያሰቲ ሡሩህ ኢንከቲ ሚያነ፣ መዔፉጊህ ማንግሥትል ለ ኡማኒምኮ ዒንዳቲይ አክ ናባ፡፡ 29. ታሃም ዮቢን ዋክተ ህዝቢ ኡምቢህ ቀረጽቲ ራዔካህ ያሃኒስ ጋባህ ይምጥምቅኒህ ይኒኒጉል መዔፉጊህ ሢራሕ ትክኪል ኪናም የዸጊን፡፡ 30. ፈሪሳውያንከ ሙሴ ሕጊህ መምሂራን ለ ያሃኒስ ጋባህ ማናምጥምቀ ያናማህ መዔፉጊህ ፍቃድ የምቀወምኒህ ዪኒን፡፡ 31. ካታሰህ ኢየሱስ ታህ የ፣ ለል ታይ ዳባኒ ሒያው አይሚህ ኤድ አሚግድክ አኒዮ? አይሚህ ኢግዶኒ? 32. አዳባባያል ድፈኒህ ድግራ ኢሮህ ኢጊዶን፣ ኢሲን ሲነሲነህ ቲታ ደዓክ ኒያቲ ሙዚቃ ሲን ዮይሶቢን፣ አቲን ለ ማርጋድንቲን፣ ኃዛን ቁዙምታ ሲን ኖይሶበ፣ አቲን ለ ማወዒኒቲን ያናም ኪኒ፡፡ 33. ታማም ባሊህ ያጥምቀ ያሃኒስ ኢላው በተካህከ ወይኒ መስ አዑበካህ የመተህ ጋኔን ለ አክተን፡፡ 34. ሒያውቲ ባዽ ለል በታከ አዑብክ የመተጉል ሃይከ ታይቲ ፈሎከ ሙዑብ ክሕንቲያ ኪኒ፣ ቀረጽቲከ ኃጢአት ለምህ ካኃንቶሊ ኪኒ አክተን፡፡ 35. ያኮይ ኢካህ መዔፉጊህ ብልሓት ያምዽገም ብልሓት ለምህ ዲቦ ኪኒ፡፡

ኢንኪ ኑማ ኢየሱስ ኢባ ሱቱህ ቱስኩተ

  36. ኢንኪ ፈሪሳዊ ኢየሱስ ማዎህ ይዕዲመ፣ ኢየሱስ ለ ፈሪሳዊ ዲኪድ ሳየህ ማዎ በቶ ማይድል ዲፈየ፡፡ 37. ታማይ ካታማል ኢንኪ ኃጢአተይና ኪን ኑማ ቲነ፣ ኢሲ ኢየሱስ ፈሪሳዊ ኪን ስምዖን ድክድ ማዎህ ይምዕዲመም ቶበ ዋክተ ሱቱህ የመገ አልባስጢሮስ ምልቃጥ ትብዸህ ተመተ፡፡ 38. ኢየሱሱክ ሳራቱላኮ ካባሮል ሶልተህ ወዓክ ካኢባቢ ዺሞህ አእልክክ ኢሲ ዳጋራህ አውልወሊይ ቲነ፣ ካኢባቢ ፉጉታክ ሱቱህ አስኩቲክ ቲነ፡፡ 39. ማዎህ ይዕዲመ ፈሪሳዊ ታሃም ዩብለ ዋክተ"ታይ ሒያውቲ ነብይ ያከዶ ታይ ካታድህሲሰ ኑማ አይምቶ ክናምከ አይዓይነቲህ ኃጢአተይና ኪናም አዽገ ዻዽ"አይክ ሲኒ አፍዓዶድ ይሕሲቢን፡፡ 40. ኢየሱስ ለ 'ስምዖኖ! ኢንኪ ኮካ ጉዳይ ሊዮ"አክየ፡፡ ኡሱክ"መምሂሮ! መዔ ዮከይ"አክየ፡፡ 41. ኢየሱስ ለ ታህ  የህ ኢስ ዋኒ ካታሰ፣"ኢንኪ ማይላካሓኮ ማል ይልኪሔ ላማ ሒያውቲ ዪኒን፣ ኢንከቲ ኮና ቦል ቁርሲያ ማላሚ ለል ኮንቶም ቁርሲያ ይልክሕን፡፡ 42. ላሚህ ለ ሊካሕ ያፍዳዎና ታነንጉል ይይልኪሔቲ ዒዳ አልሐበ፣ አማይጉል ላማ ዒዳ ባዕላኮ ይይሊክሔቲያ የሰሰህ ያክሒነቲ አይቲያ ኪናም ታካለ?"አክየ፡፡ 43. ስምዖን ለ "ማንጎ ዒዳ አካህ ራዕተ ሒያውቲ የሰሰህ ያክሒነሚህ ዮድኢግዳ"የህ ኤልይምልሰ፡፡ ኢየሱስ"ኩመልሲ ትክክል ኪኒ"አክየ፡፡ 44. ታሃሚህ ላካል ኢየሱስ ኑማቱላል ኡፍኩና የህ ስምዖኑክ ታህ አክየ፣ ታይ ሳይጉደይታ አብልክ ታነ? አኑ ኩዓረድ ሳህ አቱ ላየ ኡካ ይባህ ዮህ ማስቃራቢኒቶ፣ ኢሲ ይባ ኢሲ ዽሞህ ዓካሊሳከ ኢሲ ዳጋራህ አውልውሊይ ታነ፡፡ 45. አቱ ይጋራህ ይማፉጉትኒቶ፣ ኢሲ ለል አኑ ኩዓረድ ሳየጉልኮ ኤዸዽሰህ ይቢህ ፉጉትናን ማስቃራፂና፡፡ 46. አቱ ይዸግኃ ዘይቲህ ኡካ ዮህ ማሰካትኒቶ፣ ኢሲ ለ ይኢባቢ ሱቱህ ቱስኩተ፡፡ 47. አማጉል ማንጎም ትክሒነም ኢዻህ፣ ማንጎ ኃጢአት አካህ ራዔህ ያነ ኮካይክ አኒዮ፡፡ ካኃጢአት ዳጎሙህ ኤልራዓቲ ለ ይክሒነም ዳጎም ኪኒ፡፡"48. ታሃምኮ ላካል ኢየሱስ ኑማክ"ኩኃጢአት ኮህ ራዔህ ያነ"አክየ፡፡ 49. ካሊህ ማይድል በታይ ቲነም ኃጢአት ኡካ ራዒሲሶ ዺዓቲ ታይቲ አይቲያ ኪኒ አይክ ሲኒ አፍዓዶድ ያኅሳቦና ኤዸዽሰን፡፡ 50. ኢየሱስ ለ ኑማክ ኩኢምነት ኩኡሩሰክ፣ ሳላማህ አዱይ አክየ፡፡  

ማዕራፋ 8

ኢየሱስ  አክትሊክ ይስግልግለ  አጋቢ

  1. ታሃምኮ ላካል ኢየሱስ ኢሲሲ ካቶምከ መንደርል  አዞሪክ መዔፉጊህ ማንግሥቲህ በሠራታ አኢውዝክ ቲላይ ይነ፣ ላማምከ ታምን ካሊህ ይኒን፡፡ 2. አማም ባሊህ ሩካሳት መናፊቲህ ዱረኮ ኡርተ አጋባ ኢየሱስ አክቲሊይ ይኒን፣ ኢሲን ማልሒና ጋነን አክየውዔ መግደላዊት አክያን ማርያም፣ 3. ሄሮድስ ድክህ አዛዚ ኪይይ ቲነ ኩዛ ኑማ ዮሀና፣ ሶስናከ አኪ ማንጎም ቲነ፣ ታይ አጋቢ ኢየሱስከ ካተምሃሮ ሲኒ ማላህ አስግልግሊይ ይኒን፡፡

ዳሪ ምሳለ

(ማቴ.13፣1-9፤ማር 4፣1-9)

   4. ማንጎ ህዝቢ ኢሲሲ ካቶምኮ ካኡላል የመትኒህ ኢንኪል የከሄሊን ዋክተ ኢየሱስ ታይ ሚሳለ አክየ፡፡ 5. ኢንኪ ሐረስታይ ዳራ ያድራዎ የውዔ፣ አድሪህ ኢንኪ ኢንኪ ዳሪ አራሕ ዳራታል ራደህ ይምዒተ፣ ኪምቢሮ ለ በተ፡፡ 6. ውልውል ዳሪ ጽንጻማ ኪን መረቲል ራደህ፣ ቡለ ዋክተ መረት ጣለ ሊይክ ማናጉል ቡል ካፈ፡፡ 7.ውል ዳሪ ከናንቲ አዳድ ራደ፣ ከናን ኤሊህ ዓረህ ይሕንቀህ ራዒሰ፡፡ 8. ውል ዳሪ ለ መዔ መረቲል ራደህ ቡለ፣ ቡል ዓረህ ኢሰኢሰህ ቦል ዕጽፊያ ይፍሬየ፡፡ ይቅጽለህ ኢየሱስ"ታበ አይቲ ለቲይ ያቦይ" የ።

ኢየሱስ ሚሳለህ አካህ ዋንሲተ ምክንያት

(ማቴ. 13፣10-17፤ ማር. 4፣10-12)

  9. ካተምሃሮ ኢየሱሱክ"ታይ ሚሳለህ ቱርጉም አይም ኪኒ?"የኒህ ካኤሠረን፡፡ 10. ኢየሱስ ለ ታህ አይክ የህ ኤልይምልሰ፣ ሲናህ መዔፉጊህ ማንግሥቲህ ሚሥጢር ታዻጎና ሲናህ ዮመሖወ፣ አኪማራህ ለ ኡማን ጉዳይ ሚሳለህ አካህ ያምሓወም፣ ማለት ኢሲን አብሊህ አፍዓዶ አብተዋናምኮ፣ አቢህ አስቲውዒለ ዋናምኮ ኪኒ፡፡

ኢየሱስ ዳሪ ሚሳለ ይርድኤ

  11. ሚሳለ ቱርጉም ታሃም ኪኒ፣ ዳሪ መዔፉጊህ ቃል ኪኒ፡፡ 12. አራሕ ዳራታል ራደ ዳሪ ያይቡሉወም ካቃል ጊዘህ ታበ ሒያው ኪኒ፣ ያኮይ ኢካህ ኢሲን የመኒኒህ ያድኅንኒምኮ ዲያብሎስ የመተህ ካቃል ተን አፍዓዶኮ አክበያ፡፡ 13. ጽንጻ ኪን መረቲህ አሞል ራደ ዳሪ ያይቡሉወም ካቃል ዮቢኒህ ኒያታህ ጋራይታ ሒያው ኪኒ፣ ያከ ኢካህ ኢሲን ያምኒኒም ዋከተህ ኪኒ፣ ሪሚድ ማሎንጉል ፋታና ዋክተ አማይጉልካህ ያክሕዲን፡፡ 14. ከናንለ ቆጥቃጢህ ፋናድ ራደ ዳሪ ያምልክተም ካቃል ዋክተህ ታበ ሒያው ኪኒ፣ ያከካህ ታይ ዓለሚህ ሓሳብከ ሀብተህ፣ ባዾ ናብራህ ዱሎቱህ ያምሕንቅኒህ ፍረ ማለህ ተን ራዒሳ፡፡ 15. መዔ መረቲህ አሞል ራደ ዳሪ ያምልኪተም ለ መዔቲያከ ቅንዕቲ ኪን አፍዓዶህ ካቃል ዮቢኒህ ዻዉዻ ሒያው ኪኒ፣ ኢስን ካቃላል ይጽንዒኒህ ፊረ ፍሮሳም  ኪኖን፡፡

ሱዉር ኢፎታ

(ማቴ. 4፣21-25 )

  16. ካታሰህ ኢየሱስ ታህ የ፣ ኢፎይታ ኢፎሰህ ዒንኪብ አሞድ አክ ጋማቲ ወይ ዓራት ዳባድ ዲፈሳቲይ ኢንከቲ ሚያነ፡፡ ናቢህ ዓረድ ሳይታም ኡምቢህ ኢፎ ያብሎና ናውተ ቦታክ ዲፈሳን። 

  17. ታማምባሊህ ኢፋህ አምግልጸካህ ሱዉር የከህ ሱዑተህ ራዓ ኢንኪ ጉዳይ ሚያነ፡፡ 

   18. አማይጉል ካቃል አይናህ ተኒህ ታቢኒም ኢምጥንቅቃ፣ አይሚህ ለ ሒያውቶህ ኦሲተህ አካህ ያምሓወ፣ ሂንቲያክ ለ ሊዮ የህ ያሕስበ ዳጉሁም ኡካ ራዔካህ አክበያን፡፡

ኢየሱስ ኢናከ ሳዖል

(ማቴ. 12፣46-50፤ማር 3፣31-35)

  19. ኢየሱስ ኢናከ ሳዖል ካኡላል የመቲን፣ ያከካህ ህዝቢ ማንጋኮ ኡጉተሚህ ካገዮና ማዽዒኖን፡፡ 20. አማይጉል ሀይከ ኩ ኢናከ ኩሳዖል ኢሮል ሶለኒህ ኩያብሎና ጉራይ ያኒን የኒህ ሒያው አክተ። 21. ኢየሱስ ለ"መዔፉጊህ ቃል ቶበህ ታፍጺመም ኡምቢህ ኢሲን ይኢናከ ይሳዖል ኪኖን"አክየ፡፡

ኢየሱስ ማእበል ጸጥ ኢሰ

(ማቴ. 8፣23-27፤ ማር. 4፣35-41)

  22. ኢንኪ ለለዕ ኢየሱስ ኢሲ ተምሃሮሊህ ዛልባህ የምሰፈረህ ባሕራኮ ታብሶል  ታብኖይ አክየ፡፡ ኢሲን ለ ያዳዎና ኡጉተን፡፡ 23. ባሕራክ አሞል አቅዝፍክ ያዲይንሃኒህ ኢየሱስ ዺነ፣ ታማይ ዋክተ ኃይለለ ማእበል ሓሓይቲ ባሕሪ አሞል ኡጉተ፡፡ ላየ ለ ዛልባክ አዳድ ታማጎ ኤዸዽሰጉል ኡምቢህ ይምጽንቂን፡፡ 24. አማይጉል ካተምሃሮ "መምሂሮ! መምሂሮ! ኤረ ባኪኖ ሊኖ!" የኒህ ኢየሱስ ይቅስቅሲን፡፡ ኡሱክ ይንቅሔህ ሓሓይታከ ማዕበል ይግኒሔ፣ ሓሓይታከ ማእበል ጉልከጉሉህ ቀጥ የን፣ ናባ ጸጥታ ተከ፡፡ 25. ታሃምኮ ላካል ኢየሱስ ኢሲ ተምሃሮክ"ሲን ኢምነት አልያነ?"አክየ፡፡ ኢሲን ለ ጋዳህ ይምድንቅኒህከ ማሲተኒህ ሲነሲነህ ሓሓይታከ ማእበል ያኢዚዘ፣ ኢሲን ለ አካህ ያምኢዚዚን፣ ኤረ ጉድኪኒ ታይ ቲይ ኢያይቶ ኪኒ? ቲታክ የን።  

ኢየሱስ አጋኒኒቲ ኤድ ትኅድረ ሒያውቶ ኡሩሰ

(ማቴ. 8፣28-34፤ ማር. 5፣1-20)

  26. ባሕራኮ ታበኒሀ ገሊላ ታብሶል ገይምታ ጌራሴኖን ባዾ ማደን፣  27. ኢየሱስ ዛልባኮ ባዾል ኦበ ዋክተ አጋኒኒት ኤድ ትሕዲረ ኢንኪ ሒያውቲ ካታማኮ የውዔህ ኤድጋራየ፣ ታይ ሒያውቲ ሳራ ዒዳምኮ ታህ ማንጎ ዋክተ ኪይይ ይነ፣ ማራም፣ ማዓጊ ቦታድ ኪኒ ኢካህ ድክቲ አዳድ ኪይይ ማና፡፡ 28. ኢየሱስ ዩብለ ዋክተ ደረ፣ ኢየሱሱክ ነፊል ራደህ አንዻህ ናውሰህ"አቱ ናባ መዔፉጊ ባዻ ኢየሱሶ! ዮሊህ አይሚህ አንጎሎሊያ ሊቶ? ያዓሳያ ይማይሳቃይን!"አክየ፡፡ 29. ታሃም ለ አካህ የ ምክኒያት ኢየሱስ ሩኩስ መንፈስ ሒያውቶኮ ያውዖ ይኢዚዘህ ይነጉል ኪኒ፡፡ ታሃምኮ ባሶህ ሩኩስ መንፈስ ሒያውቲ አሞል ማንጎ ዋክተ ኡጉታይ ይነጉል ኪኒ፣ ሰንሰሊህ ኢባድ ቢርታክ አምዹውክ ዻውዹማይ ይነ፣ ያኮይ ኢካህ ሰንሰል አገረዒክ፣ ኢቢ ቢርታ ለ አግዲሊክ ይነ፡፡ ጋነን አይምሪሕክ ባራካህ ካበያይ ይነ፡፡' 

 30.ኢየሱስ ለ"ኩሚጋዕ አቲያ ኪኒ"የህ ካኤሠረ? ኡሱክ ለ ማንጎ አጋኒኒቲ ኤድትኅዲረህ ቲነጉል"ይሚጋዕ ሠራዊት ኪኒ"የህ ኤል ኤልደሄየ፡፡ 31.አጋኒኒት ለ "ያዓሳያ ሚናልሃዋ ኪን ቦሉድ ኒማፋሪን"የኒህ ካዻዒመን፡፡

  32. ታማይ ቦታል ሪይቲ ጋለል ኢፋርተ ማንጎ ሐሰማ ዱየ ኢፋርተህ ቲነ፣ አጋኒኒት ሐሰማድ ሳይኖክ ኖህ ኢይፍቅድ የኒህ ኢየሱስ ዻዒመን፣ ኡሱክ አካህ ይፍቀደ፡፡ 33. አማይጉል አጋኒኒቲ ሒያውቶኮ ተውዔህ ሐሰማድ ሳይተ፣ ሐሰማ ቦላሊኮ አምቦኮኮልክ ኦብተህ፣ ባሕራድ ሳይተህ ቱሙንዹዔ፡፡ 

  34. ሐሰማ ሎን የከ ጉዳይ ዩብልንጉል ኩደኒህ የደይኒህ፣ ካታማከ ገጠርል ለ ዋረ ይንዚሒን። 35. ሒያው የከ ጉዳይ ያብሎና ሲኒ ዲካኮ የውዕኒህ ኢየሱስ ዻጋህ የመቲን፣ አጋኒኒቲ አካህ ተውዔ ሒያውቲ ካአፍዓዶ ኤልጋሕተህ ኢሲ ሣረና ለ ሀይሲተህ፣ ኢየሱስ ኢቢህ ዳባል ዲፈሄ ዩብሊንጉል ማይሲተን፡፡ 36. ኢንቲ ማስኪር ኪይይ ቲነ ሒያው ለ አጋኒኒት ኤድ ትኅዲረህ ቲነ ሒያውቲ አይናህ የህ ኡረም አካህ ዋሪሰን፡፡ 37. ታማምኮ ላካል ጌራሴኖን ሒያው ሙሉኡድ ኢየሱስ ተን ባዾኮ ቶህ አካህ ያዳዎ ዻዒመን፡፡ ታሃም አካህ የን ምክንያት ጋዳህ ማይሲተኒህ ይንንጉል ኪኒ፡፡ አማይጉል ኢየሱስ ዛልባህ የምሰፈረህ አክ የመተ ቦታህ ጋኄህ  የደ፡፡ 38. አጋኒኒቲ አካህ ተውዔ ሒያውቲ ኢየሱሱክ"ያዓሳያ ኩ አካታሎ"የህ ዻዒመ፡፡ 39. ኢየሱስ ለ ኢሲ ዲኪህ አዱዋይ መዔፉጊ ኮህ አበም ኡማንቲያክ ኤዸሕ የህ የይሰነበተ፡፡ ሒያውቲ ለ ኢየሱስ አካህ አበ ናባ ጉዳይ ካታማል ኡማንቲያህ ዋረሳክ የደ። 

ኢያኢሮስ ባዻ'ከ ኢየሱስ ሳረና ዻግተ ኑማ

(ማቴ. 9፣18-26፤ ማር. 5፣21-43)

 40. ህዝቢ ካኢላላይ ይነጉል፣ ኢየሱስ ጋኄህ የመተ ዋክተ ኡምቢህ ኒያታህ ካገራየን፡፡ 41. ታማይ ዋክተ ኢንኪ ሙክራብ ኃለቃ የከ ኢያኢሮስ አክያን ሒያውቲ የመተ፣ ኢየሱስ ኢቢህ ዳባል ራደህ"ያዓሳያ ይድኪህ ዮህ አሞ"የህ ዻዒመ፡፡ 42. አይሚህ ዒድመህ ላማምከ ታማን ተከ ኢንኪ ካባዻ`ላሑተህ ራቢ አፋክ ቲነጉል ኪኒ፡፡

  ኢየሱስ ለ ካሊህ ኢንኮህ አዲይክ ያንንሃኒህ ትኪቲለህ ቲነ ማንጎ ሒያው ዱፉማክ ካአይጸነነቂክ ዪኒን፡፡ 43. ላማምከ ታማን ኢግድያ ሙሉእ ቢሊ ኤልሐዺታክ ታምሰቀየ ኢንኪ ኑማ ቲነ፣ ኢሲ ለ ማል ሙሉኡድ ሓካይሚህ ቶሖወህ ባክተህ ቲነ። ኢንከቲ ኡሩሶ ማዽዒና፡፡ 44. ኢሲ ኢየሱሱል ተመተህ ሣራቱላኮ ካብተህ ካሣረናህ ሓለ ዻግተ፣ አማይጉልካህ ሓዽታይ ይነ ቢሊ አካህ ዮቆመ፡፡ 45. ኢየሱስ ለ "ኢያ ኪኒ ይዻግተም?"የህ ኤሠረ፡፡ ኡምቢህ"ናኑ ኩምዻግኒኖ"የን፣ ጰጥሮስ ለ "መምሂሮ! ህዝቢ ቲታ ዱፉዋክ ኩአክትል ያነም አብሊክ ታነሃኒህ አቲያ ኪኒ ይዻግተም አይክታነ?" አክየ፡፡     

   46. ኢየሱስ ለ"ኃይሊ ዮኮ የውዔም አዽገ ሪግጽህ ኢንኪ ሒያውቲ ይዻገ"አክየ፡፡ 47. ሳይጉደይታ ማሱዑቲናም ተዸገጉል አዻዻክ ኢየሱሱል ተመተህ ካኢቢህ ዳባል ራደ፣ ታማሚህ ላካል አይሚህ ካዻግተምከ አይናህ ተህ አማይጉልካህ ኡርተም ኡማን ሂዝቢህ ነፊል ትግልጸ፡፡ 48. ኢየሱስ ለ"ይባዻ'! ኩኢምነት ኩይድኅነክ፣ ሳላማህ አዱይ"አክየ፡፡

  49. ኢየሱስ ገናህ ታሃመ ዋንስታይ ያነሃኒህ ኢንኪ ሒያውቲ ሙክራብ ኃለቃ ኢያኢሮስ ዲኮ የመተህ ኢያሮሱክ"ኩባዻ`ራብተህ ታነክ መምሂር ካንቶህ ማኃዋልሲን" አክየ፡፡

  50. ኢየሱስ ለ ታሃም ዮበህ ኢያኢሮሱክ"አይዱኩመይ ማማይስቲን፣ ጢራህ ኢሚን፡፡ ኩባዻ' ኡረለ"አክየ፡፡ 51. ኢየሱስ ኢያኢሮስ ድክ ማደጉል ጰጥሮስ፣ ያሃኒስ፣ ያዕቆብከ አውካት አባከ ኢናኮ በሒህ አኪ ማራኮ አንከቲ ካሊህ አዳህ ሳዎና ማፍቃዲና፡፡ 52. ታማል ቲነ ሒያው ኡምቢህ አውካህ ሓዛናህ ወዓክ ዪኒን፡፡ ኢየሱስ ለ"ማወዒና፣ አውካ ዕንዱጉልተህ ታነካህ ማራቢናክ"አክየ፡፡      

   53. ኢሲን ለ አውካ ራብተህ ታነም የዸጊንጉል ኡምቢህ ለ ላግጻህ ኤል ዮሶሊን፡፡ 54. ኢየሱስ አውካክ ጋባህ ይብዸህ"ተ ኣውካ ኡጉት"አክየ፡፡ 55. ተያል ለ ናብስ ኤልጋኄህ አማይጉልካህ ብዲጋ ተዽሔ፣ ኢየሱስ ለ"በታም አካህ ኡሁዋ"የህ ይኢዚዘ፡፡ 56. አውካት ዻልቶዪት ትምግሪመ፣ ኡሱክ ለ ታይ ጉዳይ ቲያክ ሚና የህ ተን ይኢዚዘ፡፡

ማዕራፋ  9

ኢየሱስ ላማምከ ታማን ሐዋርያቲያ ወንጌል አገልግሎቱህ ፋረ

(ማቴ. 10፣5-15፤ ማር. 6፣7-13)

  1. ኢየሱስ ላማንከ ታማን ኢሱላል ደዔህ አጋኒኒት ያየዒኒምከ ዱረ ለ አምቢህ  ኡሩሳናሚህ ኃይላከ ሢልጣን ሒያዋህ ሙሉኡድ ዮሖወ፡፡ 2. መዔፉጊህ ማንጊሥቲህ ሙሙዉት ሒያዋክ ኡማንቲያክ ዮና፣ ላሑተም ኡሩሶና ተን ፋረ፡፡  3. ታሃም አክየ፣ "ሲኒ አራሓህ ታከምኮ ኢንኪም ማባዺና፣ ኢሎ ያኮይ፣ ዓሲናቶ ያኮይ፣ ሳካየ ያኮይ፣ ማል ያኮይ፣ ሳሪ ቂያር ኡካ የከሚህ ማባዺና፡፡ 4. ገዺኖህ ኤድ ሳይናን ዲኪድ ኡምቢህ ታማይ መንደርኮ ተውዒኒህ ታድይኒም ፋናህ ታማድ ሱጋ፡፡ 5. ሒያው ሲን ጋራየ ዋይተምኮ ለ ታማይ መንደር ኃብተኒህ አውዒህ ሲኒ ኢቢህ አቦራ ኡርጉፋይኪ አካዱዋ፣ ታሃም ሰሊስናን /ማስጠንቀቂያ/ ማስኪር አካህ አከለ፡፡"6. አማይጉል ካ ሐዋረያት ታማርከኮ የውዒኒህ ወንጌል አይምሂሪከ ዳላኪን አሩሳክ ኢሲሲ መንደርል ሙሉኡድ አዞርይ  ዪኒን፡፡ 

ሄሮድስ ኢየሱስ ዳዓባል ዋረ ዮበ

  (ማቴ. 14፣1-12፤ ማር.6፣14-29)

  7. ገሊላ ባዾህ ገዛኢ ኪይይ ዪነ ሄሮድስ፣ ኢየሱስ አበም ኡምቢህ ዮበጉል ድንግርግር አክየ፣ አይሚህ ውልውል ሒያው ያይጥምቀ ያሃኒስ ራባኮ አጉተ አይክ ዋሪሳይ ይኒኒጉል ኪኒ፡፡ 8. ታማሃም ባሊህ ውልውል ማሪ"ነብይ ኤልያስ ጋኄህ የመተ"አይህ፣ ጋሪ ለ"ባሶ ነብያትኮ ኢንከቲ ራባኮ ኡጉተ"አይ ዪኒን፡፡ 9. ሄሮድስ ለ ኢሱላኮ አኑ ያሃኒስ ዸግኃ ኢስጊሪዔህ ኢነ፣ ኢቦል ታይ ኡምብሂያህ ጉዳይ አባ አይክ አካህ ዋንሳንቲ፣ ኡሱክ አቲያ ኪኒ? አይ ይነ። ካያብሎ ለ ጉራይ ይነ።                     

ኢየሱስ  ኮና ሲሕ ሒያውቲያ ይምጊበ

(ማቴ. 14፣13-21፤ ማር. 6፣30-44፤ ዮሐ. 6፣1-14)

  10. ሐዋርያት ኤል ፋሪቲመንርከኮ ጋኄኒህ የመቲኒህ አበኒም ሙሉኡክ ኢየሱሱክ የን፡፡ ኡሱክ ለ በተ ሳይዳ ካታማህ አፋል ጋይምታ ዲቦ ኪን ቦታህ ዲቦህ ተን ይብዸህ የደ፡፡ 11. ሒያው ኢየሱስ አውላል የደም የዸጊንጉል ኤድካታየን፣ ኡሱክ ለ ተን ጋራየህ መዔፉጊህ ማንጊሥቲህ ዳዓባል ተን ይምሂረ፡፡ ዱረኮ ኡሮና ተን ጉርሱሳ ዳላኪን ለ ኡምቢህ ኡረሰ፡፡ 

  12.ዲተ ሳይቶ ተጉል ላማምከ ታማን ካኡላል ካብየኒህ ታህ አክየን፣"ታል ኤልናነ ቦታ ባራካ ኪኒ፣ አማይጉል ሒያው አካባቢል ታነ ካቶምከ ገጸሪል የደይኒህ ሚግበከ ኤደማኃን ሲፍራ ገዮናክ ተን ኤይሰነበት።"   

  13. ኢየሱስ ለ"አቲን ሲነህ በትምታም አካህ ኡሑዋ"አክየ፡፡ ኢሲን  ለ ናኑ ሊኖም ኮና ኢንገራከ ላማ ዓሣይቶ ጢራኅ ኪኒ አክ የን፣ አማይጉል ነደህ ምግበ ዻመዋይነምኮ ታይ ሙሉእ ህዝበ ማዽዓ አክየን፡፡ 14. ሒያው ማንጋህ ኮና ሲሕ ታከም ኪይይ ይኒን፡፡ 

  ኢየሱስ ተምሃሮክ"ሒያው ኮኮንቶሙህ፣ ባዽሲመኒህ ዲፈያናካ አባ"አክ የ፡፡ 15. ካተምሃሮ ሊኪዕ ኡሱክ ይኢዚዘም ባሊህ ሒያው ዲፈሰን፡፡ 16. ታሃምኮ ሣራህ ኢየሱስ ኮና ኢንጌራከ ላማ ዓሣ ይብዸህ ዓራንቱላል አብልከ ፉጎ ይምስጊነ፣ ዩቅሩሰህ ሒያዋህ ያዓዳሎና ሐዋርያታህ ዮሖወ፡፡ 17. ኡምቢህ በተኒህ ሓይተን፣ ተምሃሮ ሂዝበኮ ራዔ ተረፍኮ  ላማምከ ታማን ሙሉእ ሞሶብያ አክ ኡጉሠን፡፡

ጰጥሮስ ኢምነትከ ኪሕደት

(ማቴ. 16፣13-19፤ ማር. 8፣27-29)

   18. ኢንኪ ለለዕ ኢየሱስ ዲቦህ ጻሎት አባይ ዪነ፣ ካተምሃሮ ባሮል አክ ይኒኒጉል "ሒያው ዮያክ አቲያ ዮክያና?"የህ ተነሠረ፡ 19. ኢሲን ለ"ጋሪ አጥማቂ ያሃኒስ ኪኒ፣ ውልውል ማሪ ኤልያስ ኪኒ"ኮክያን፡፡ ባሶ ነብያትኮ ኢንከቲ ራባኮ ኡጉተ ታም'ለ ታነ" የኒህ ኤልደሄን፡፡ 20."አቲን ዮያክ አቲያ ኪኒ ዮክታና? የህ ተነሠረ፣ ጰጥሮስ"አቱ መዔፉጊህ መሲሕ ኪቶ"የህ ኤልይምሊሰ፡፡ 21. ኢየሱስ ታሃም ኢንከቶክ ያ ናምኮ ጢብቀህ ተን ይጥንቂቀ፡፡                        

ኢየሱስ ያክትልኒሚህ አግባቢራ

(ማቴ.10፣38-39፤16፣24-28፤ማር.8፣34-38፤ ሉቃ.14፣26-27)

   22. ካታሰህ ኢየሱስ ኢሲ ተምሃሮክ ታህ አክየ፣ ሒያውቲ ባዺ ማንጎ መከራ ጋራዎ አካህ ኤዳ፣ ስማግለከ ካህናት አኅሉቁህ፣ ሙሴ ሕጊህ መምሂራኒህ ወገኒህ ዻይቲመ ለ፣ ራበ ለ፣ ያከካህ ማዳሕ ለለዕል ራባኮ ኡጉተ ለ፡፡

  23. ኡማንቲያክ ለ ታህ አክየ፣ ይያካታሎ ጉራቲ ይኔምኮ ኢሰ ያክሐዶይ፣ ኢሲሲ ለለዕ ኢሲ ማስቃል ያይካዖዋይ ዮድካታዎይ፤ 24. ዮኮ አጋናል ኢሲ ሂወቲህ ያምሆጎጎወቲ ኡምቢህ ያለየ፣ ይዳዓባል ኢሲ ሮሔ ቲላሰህ ያሓየቲ ለ ያድኂነ፡፡ 25. ሒያወቲ ዓለም ሀብተ ሙሉኡክ ገህ ኢሲ ናፍስ ለ ያለየጉልከ ቢያካጉል አይሚህ ፋይዳ ለ /ካ'ያጥቅመ/? 26. ዮከ  ይቃላህ ኆላስታ ቲይ ኡምቢህ ሒያውቲ ባዽ ለ ኢሲ ክብረከ ኢሲ አባህ ክብረህ፣ ታማሃማም ባሊህ ቁዱሳን ማላይካህ ክብረህ ያምተ ዋክተ ካያህ ኆላስተ ለ፡፡ 27. ሓቀህ ሲናክ አይክ አኒዮ፣ ካዶ ታል ታነሚህ ፋናድ መዔፉጊህ ማንግሥት አምቲህ ያብልኒም ፋናህ ራቢ ተን ዻገዋ ማሪ ጋሪጋሪ ያኒን።                                                            ኢየሱስ ቢሲህ አምቃያር 

(ማቴ.17፣1-8፤ማር.9፣2,8)

  28. ኢየሱስ ታሃም ወንስተምኮ ለግድናኮ ላካል ጰጥሮስ፣ ያሃኒስከ ያያዕቆብ ላካክ ሀየህ ጻሎት አቦ ኢንኪ ኢምባህ አሞል የውዔ። 29. ጻሎት አባይ ያነሃኒህ ካብሲ ይምልውጠ፣ ካሳሪ ዓዶቲያ የከህ ዮይዶጎሔ፡፡ 30. ሃይከ ድንገቲህ ላማ ሒያውቲ የመትኒህ ካሊህ ዋንስታይ ይኒን። ኢሲን ለ ሙሴከ ኤልያስ ኪይይ ይኒን፡፡ 31. ክብረህ አካህ ይምቡሉወህ ዋንስታይ ይንንም፣ ኢየሱስ ኢየሩሳለሚል መከራ ጋራየ ለምከ ራበ ለም ኪይይ ይነ፡፡ 32. ታማይ ዋክተ ጰጥሮስከ ካዶባ ዕንዱጉል አክ ሱበህ ዺነኒህ ይኒን፡፡ ኡጉተንጉል ለ ኢየሱስ ክብረ ዩብሊን፣ ታማሃም ባሊህ ካሊህ ይኒን ላማ ሒያውቶ ዩብሊን፡፡ 33. ላማ ሒያውቲ ኢየሱስኮ ባዽሲመኒህ የደይንጉል ጰጥሮስ ኢየሱሱክ"መምሂሮ! ታል ናከም ኖያህ መዔም ኪኒ፣ አማይጉል ኢንከቶ ኮያህ፣ ኢንከቶ ሙሴህ፣ ኢንከቶ ኤልያሳህ ያኪን አዶሓ ዳስ ሢራሕኖይ"አክየ፡፡ ጰጥሮስ ታሃም ዋንሲታህ ያም አዽጊይ ማና፡፡ 34. ጰጥሮስ ታሃም ዋንስታህ ዳሩርታ ተመተህ ተን አልፍተ፣ ዳሩር ተን ይሰፊነ ዋክተ ማይሲተን፡፡ 35"ዳሩር አዳኮ ዶረ ይባዺ ታይቲያ ኪኒ፣ ካያ ኦባ"ያ አንዻሕ የመተ፡፡ 36. አንዻሕ ዮሞበምኮ ላካል ኢየሱስ ዲቦህ የከህ ገይመ፣ ተምሃሮ ለ ዩብሊኒም  ኡምቢህ ታማይጉል ቲያክ ኢየካህ ቲብ የን፡፡

ኢየሱስ ሩኩስ መንፈስ ኤድ ይኅድረ አውካ ኡሩሰ

(ማቴ.17፣14-18፤ማር.9፣14-27)

  37. ኢብዻ ሒነ ኢየሱስከ አዶሓ ተምሃራይ ኮማኮ ኦበን ዋክተ ማንጎ ሒያው ኢየሱሱድ ጋራይተ፡፡ 38. ሒያው ፋንኮ ኢንኪ ሒያውቲ ታህ የህ ደረ፣"መምሂሮ! ታይ አውኪ ዮያህ ኢንከቶ ጥራህ ኪኒክ ያዓሳያ ዮህ ኡቡል፡፡ 39. ሀይከ ሩኩስ መንፈስ ድንገቲህ ይበዸህ ካደሪሳ፣ ባዾል ዒደህ ዓፎ ዓፍ ኢሳክ ፍርግሪግ ካይሳ፣ ሰውነት ቢያክ አካባህ አይዾለ መከራኮ ላካል ካዽዽያ፡፡ 40. ሩኩስ መንፈስ አካህ ያያዖና ኩተምሃሮ ኤሠረህ"ኢነ፣ ያከካህ ማዽዒኖን፡፡ 

 41. ኢየሱስ ታህ አክየ፣"አቲን ኢምነት አለዋይታ ጉዶሎ ለ ማባኮ፣ አንዳ ፋናህ ሲንሊህ ማረሊዮ? አንዳ ፋናህ ሲናህ አምዕጊሰሊዮ? ኢስክ አውካ ታህ ባሃየህ?" 42. አውካ ለ ኢየሱስ ዳጋህ ካብሰንጉል ጋኔን ባዾል ዒደህ ፍሪግሪግ ኢሰ፣ ኢየሱስ ሩኩስ መንፈስ ይግንሔህ አውካ ኡሩሰህ አባህ ዮሖወ፡፡ 43. ህዝቢ ኡምቢህ መዔፉጊህ ናባ ኃይላ ዩብሊን ኢርከህ ይምግርሚን፡፡

ኢየሱስ ኢሲ ራቢህ ዳዓባል ማላሚ ዋክተ ዋንስተ

(ማቴ.17፣22-23፤ማር.9፣30-32)

  44. ኡምቢህ የከ ጉዳህ አምድንቅይ ያንንሃኒህ ኢየሱስ ተምሃሮክ ታህ አክየ፣ ታይ ሲናካ ቃላህ ሲኒ አፍዓዶ አቢታይ እስቲውዒላ፣ ሃይከ ሒያውቲ ባዺ ሒያው ጋባህ ትላሰኒህ አምሐወ ለ፡፡ 45. ኢሲን ለ ታማይ ጉዳይ ማስታውዓሊኖን፣ ዋኒ ሚሥጢር አክ ይምሲውረህ ይነ፣ ኤሠሮና ለ ማይስተን።

ኡማኒምኮ ናባቲ አይቲያ ኪኒ?

(ማቴ.18፣1-5፡፡ማር.9፣33-37)

  46. ካተምሃሮ"ኖኮ ኡማኒምኮ ያሰቲ፣ አይቲያ ኪኒ?"ያናማህ ክርክር ኡጉሰኒህ ይኒን፡፡ 47. ኢየሱስ ለ ተን አፋዓዶህ ሓሳብ የደገህ፣ ኢንኪ ሕፃን አውካ ባሄህ ኢሲ ባሮል ሶሊሰ፡፡ 48. ታህ አክየ፣"ታይ ሕፃን ይምጋዓህ ጋራቲ ኡምቢህ ዮያ ጋራ፣ ዮያ ለ ጋራቲ ይፋረቲያ ጋራ፡፡ ሲን ፋንኮ ኡማን ሲናኮ ዒንዳቲ ኡሱክ ኡማንቲያኮ ናባቲያ አከለ፡፡"

ሲን አምቀወመ ዋቲ ኡምቢህ ሲንሊህ ኪኒ

(ማር.9፣38-40)

 49. ታሃምኮ ላካል ያሃኒስ ኢየሱሱክ"መምሂሮ! ኢንኪ ሒያውቲ ኩሚዓጋህ አጋኒኒት አየዒህ ኑብለ፣ ያኮይ ኢካህ ኖሊህ ኮያ ሚያኪቲለጉል ካካሊነ"አክየን፡፡ 50. ኢየሱስ ለ ሲን አምቀወመዋቲ ኡምቢህ ሲንሊህ ኪንጉል፣ ማደሲና አክየ፡፡

    ሳማሪያ ሒያው ኢየሱስ ጋራዎና ማጉርኖን

  51. ኢየሱስ ሳማሪያ ቱላል ያውዖ የ ለለዕ ካብ የ ዋክተ፣ ኢየሩሳለም ያዳዎ ይውስነህ ኡጉተ፡፡ 52. ካባሶድ ቶኮመህ ታዴ ፋሮይቲት ፋረ፣ ኢሲን ኡማን ጉዳይ ያይሳናዳዎና ሳማሪያል ገይማ ኢንኪ መንደርል የደይን፡፡ 53. ያካካህ ታማይ መነደሪህ ሒያው ካጋራዮና ማጉሪኖን፣ አይሚህ ኡሱክ ታማርከኮ ቲላየህ ኢየሩሳለም ያዳዎ ኪናም የዸግኒህ ይኒኒጉል ኪኒ፡፡ 54. ካተምሃሮ ያቆብከ ያሃኒስ ታሃም ዩብሊንጉል"ኒማደራ! ዓራንኮ ጊራ ኦብተህ ታይ ሒያው ተን ታስቃጻሎ ዒሎህ ናአዛዞ ታይፍቅደ?"አክየን፡፡ 

  55. ኢየሱስ ለ ተን ኡላል አፍኩና የህ ተን ይግኒሔ፡፡ [አቲን አይሚህ ዓይነቲህ መንፈስ ኪትኒም ማታዽጊን፣ ሒያውቲ ባዺ የመተም ሒያው ሂወት ያይዳኃኖ የህ ኪኒካህ ያይላዮ የህ ማኪ፡፡] 56. ታማርከኮ ኡጉተኒህ አኪ መንደርል የደይን፡፡   

ኢየሱሱድ ካታይታማድ ጋራይታ ፋታና

(ማቴ. 8፣19-22)

  57. ኢየሱስከ ካተምሃሮ አራሕ አቅጽሊክ አራሓል ያኒንሃኒህ፣ ኢንኪ ሒያውቲ ኢየሱስክ"አኑ ኤልታዴ ቱማል ኡምቢህ ኮድካታዎ ጉራክ አነ"አክየ፡፡ 58. ኢየሱስ ለ ሒያውቶክ"ዋከር ሁጉማ ሎን፣ ኪንቢሮ ኪንቢሮ ዓረ ለ፣ ሒያውቲ ባዽ ለ ኢሳሞ ኡካ ይይጽጊዔህ ኤድያዑሩፈ ሲፍራ ማለ"የህ ኤልደሄየ፡፡ 59. አኪ ሒያውቶክ ለ "ዮድካታይ"አክየ፡፡ ሒያውቲ ለ"ኦ ይማዳራ! ባሶል ኤደህ ኢናባ ኦጦረህ አዓጎክ ዮህ ኢፍቅድ"አክየ፡፡ 60. ኢየሱስ ለ"ራብተም ሓብ፣ ሲኒ ራቦንቲት ያዓጎናይ፣ አቱ ለ አዱዋይ መዔፉጊህ ማንግሥቲ ኢይምሂር፣"የህ ኤል ይምሊሰ፡፡ 

  61. ኢንኪ አኪ ሒያውቲ ለ"ይማዳራ! አኑ ኩአካታሎ ጉራክ አነ፣ ያኮይ ኢካህ ባሶል ኤደህ ኢኒ በተ ሰብኮ አምሳናባቶክ ዮህ ኢፍቅድ"አክየ፡፡ 62. ኢየሱስ"ያሕራሶ ኢሲ ጋባድ ዔርፈ ይብዸህ ሳራቱላል ያይደለለዔ ሒያውቲ መዔፉጊህ ማንግሥቲህ ኤዳቲያ ማኪ"የህ ኤልደሄየ፡፡

ማዕራፋ 10

ኢየሱስ ወንጌል ያማሃሮና ማልሕንቶሞንከ ላማይ ተምሃሮኮ ፋረ

  1. ታሃሚህ ላካል ማዳሪ አኪ ማልሕንቶምንከ ላማይ ዶረ፣ ኡሱክ ኤል ያዳዎ  ይሕሰበ ካቶምቲ ቦታል ሙሉኡድ ዮኮምኒህ ያዳዎና ላማይ ላማይ አበህ ተን ፋረ፡፡    . 2. ታህ አክየ፣ ሃይከ ሢራሕ ማንጎቲያ ኪኒ፣ ሠራሕተና ለ ዳጎም ኪኖን፣ አማይጉል ሢራሓህ ማዳሪ ሠራሕተና ኦሰህ ፋሮ ዒሎህ ዻዒማ፡፡ 3. አማይጉል አዱዋ፣ ሃይከ ቶክላት አዳድ ሲን ፋራክ አኒዮ፡፡ 4. ሲኒ አራሓህ ኢንኪ ጉዳይ ማባዽዽና፣ ማል ቦርሳ ያኮይ፣ ዓሲናይቶ ያኮይ፣ ካበላ ያኮይ፣ ማባዽና፣ ሒያውሊህ ሳላምታ ቲታህ አሓይክ ሶልተኒህ ጊዘ ማይላይና፡፡ 5. ኤድሳይናን ዓረድ ኡምቢህ ሳላም ታይ ዲኪህ ያኮይ ኤዸኃ፡፡ 6. ሳላም ካኃንቶሊ ኪን ሒያውቲ ታማይ ድኪድ ይኔምኮ ሲን ሳላም ኤድአኅድረ ለ፣ አማም አከዋይተምኮ ለ ሲን ሰላም ሲናህ ጋሔለ፡፡ 7. ሢራሓቲይ ደሞዝ ገዮ ኤዳ፣ አማይጉል ኤድሳይናን ዓረድ ሲናህ አስቅርቢናኒም በታከ አዑብክ ሱጋ፣ ዲኮ ድኪድ ማዳይና፡፡ 8. አኪናን ካታማል ሳይተኒህ ሒያው ሲን ጋራይታጉል ሲናህ ይስቅርቢናኒም በታ፡፡ 9. ታማይ ካታማል ታነ ዳላክን ኡረሳ፣ ሂዝበክ ለ መዔፉጊህ ማንግሥት ሲናህ ካብተህ ታነ፣ አይክ ዋንስታ፡፡ 10. ያከካህ አኪናን ካታማል ሳይታንጉል ሒያው ሲን ጋራየ ዋይተምኮ ካታማት አዳባባያል ኤወዓይኪ ታህ አከያ፡፡ 

  11. ሃይከ ንኢቢህ አሞክ ታነ ሲን ካታማህ አቦራ ኡካ ሲናህ ኡርጉፋክ ናነ፣ ያከካህ ፉጊ ማንግሥት ሲናድ ካብተም ኢዽጋ፡፡ 12. ፍርድ ለለዕ ታይ ካታማኮ አጋናል ሶዶምከ ጎሞራ ካታማህ ቅጽዓት አሲሲከለ ሲናክ አይክ አኒዮ፡፡

ኢምነት ዋይቲህ ትምውቅሰ ካቶም

(ማቴ. 11፣20-24)

   13. ጋባዔህ ኢየሱስ ታህ የ፣ ኢሰህ ሚን ኮራዚኖ፣ ያብለሊቶ በተ ሳይዳ፣ ሲናል የከ ታሚራት ጢሮስከ ሲዶናል የከህ ያከዶ ታማል ማራይ ቲነ ሒያው ኃዛን ሳራ ሃይሲተኒህ ጎምቦዱል ድፈኒህ ንሲሓ ሳየ ዻዸን፡፡ 14. አማይጉል ፍርዲ ለለዕ ሲንኮ አጋንል ጢሮስከ ሲዶናህ ቅጽዓት አሲሲከ ለ፡፡ 15. አቱ ቅፍርናሆሙ፣ አይከ ዓራን ፋናህ ናውቶዋ ጉርተ? አይከ ሲኦል ፋናህ ኡኮ ኦበሊቶ፡፡ 

  16. ጋባዔህ ኢየሱስ ተምሃሮክ" ሲና ያበቲ ዮያ ያበ፣ ሲና ጋራየ ዋቲ ዮያለ ማጋራ፣ ዮያ ጋራየ ዋየቲ ይፋረቲያለ ማጋራያ"አክየ፡፡

ማልሕንቶሞንከ ላማይ ኤልፋርቲመን ኢርከኮ  ጋሔን

   17. ማልሕንቶሞንከ ላማይ ተምሃርቲያ ኤል ፋሪመን ኢርከኮ ጋደህ ኒያተኒህ ጋኄን፣ ኢየሱሱል ካብየኒህ"ማዳራ! ኩምጋዓህ አጋኒኒቲ ኡካ ኖህ ትምኢዚዘ"አክየን፡፡

18. ኢየሱስ ለ ታህ አክየ፣"ሰጣን ሓንካዻ ባሊህ የከህ ዓራንኮ ይምውርውረህ ኦባህ ኡብለ፡፡ 19. ሀይከ ዐሮራከ ኢግዻድ ታዓቶና፣ ናዓብቶሊቲ ኃይላ ታምቃቃሞና ሢልጣን ሲናህ ኦሖወህ አኒዮ፣ ሲን ቢያካ ጉዳይ ሚያነ፡፡ 20. ያከካህ ሲን ሚጋዕ ዓራንቲ መዝገቢል ሲናህ ይምጽሕፈርከህ ኒያታ ኢካህ አጋኒኒቲ ሲናህ ይምኢዚዚን ኢርከህ ማኒያቲና፡፡"

ኢየሱስ ኢሲ ኒያት ይግልጸ

(ማቴ.11፣25-27፤23፣16-17)

  21. ታማይ ዋክተ ኢየሱስ መንፈስ ቁዱሱህ ኒያተህ ታህ አክየ፣"ዓራንከ ባዾህ ማዳራ ተከ ኦ'ያባ! ታይ ጉዳይ ጠበበይናታትከ ማዻግትኮ ሱዑሰህ ሕፃናታህ ትግልጸርከህ ኩአይምስግኒክ አኒዮ! ዮ አባ! ታሃም አብኖ ኩመዔ ፍቃድ የከ፡፡                22."ኡማን ጉዳይ ያባኮ ዮህ ዮምኆወ፣ ባዺ አይቲያ ኪናም አባኮ በሒህ ቲይ ያዽገቲ ሚያነ፣ አማም ባሊህ አባ አቲያ ኪናም ባዻኮ በሒህ ኢንከቲ ምያዽገ፣ ወይ ባዺ አካህ ያማዻጎ አካህ ይምፍቅደ ሒያውቶኮ በሒህ ኢንከቲ  ምያዽገ፡፡" 

  23. ካታሰህ ኢየሱስ ኢሲ ተምሃሮድ ኡፍኩና የህ ዲቦህ ታህ አክየ፣"አቲን ታብሊኒም ቱብለም ትምዕዲለም ኪኖን፡፡ 24. ሓቀህ ማንጎ ነብያትከ ነገሥታት አቲን ታብልኒም ያብሎና አትምኒይ ይኒን፣ ያኮይ ኢካህ ማብሊኖን፣ አቲን ታቢኒም ያቦና ይትምንይኒህ ዪኒን፣ ያከካህ  ማቢኖን፡፡                           

ሩኅሩኅ ሳምራዊ

   25. ኢንኪ ለለዕ ኢንኪ ሙሴ ሕጊ መምሂር ኢየሱሱል የመተህ፣ ካያፋታኖ ጉረህ መምሂሮ! ኡማንጉሊህ ሂወት ገዮ አይም አቦ ዮህ ኤዳ? የህ ካኤሠረ፡፡ 26. ኢየሱስ ለ"ሙሴ ሕገል አይም ትምጽሕፈህ ታነ? ትይንብበህ አይናህ ተህ ታምሪዲኤ?"አክየ፡፡

  27. ሒያውቲ ለ"ሕጉ'ማ ፉጎ ኢሲ አምላክ ኢስ ፍፁም ኪን አፍዓዶህ፣ ፍፁም ኪን ናፍሰህ፣ ፍፁም ኪን ኃላህ፣ ፍፁም ኪን ሓሳባህ ኢክኂን፣ ታማም ባሊህ ኢሲ ዶባይቶ ኢሲ ዸግኃ ባሊህ አባይ ኢክኂን" ያዽኄ"አክየ፡፡

  28. ኢየሱስ ትክክልህ ደሄይተ አክየ፣ አማይጉል አቱ ለ ታሃም አብ፣ ኡማንጉሊህ ሂወት ለ ገሊቶክ አክየ፡፡  

  29. ሕጊ መምሂር ለ ኢሲ ዸግኃ ጻድቅ አቦ ጉረህ፣"ይቦል ይዶባይቲ አይቲያ ኪኒ አክየ የህ"ኤሠረ፡፡ 

  30. ኢየሱስ ለ ታህ የህ ኤልይምሊሰ፣ ኢንኪ ሒያውቲ ኢየሩሳለምኮ ኢያርኮ ኦባይ ያነሃኒህ አራሓድ ሲፍታ ካገይተህ ሳራ አክ ይግፍፊኒህ፣ ሳባዔኒምኮ ላካል ራባህ ያምጸዔረሃኒ ዒደኒህ አክየደይን፡፡ 31. አጋጣሚህ ኢንኪ ካህን ታማይ አራሓል አድይ ዪነ፣ ሳብዒመ ሒያውቶ ዩብለጉል ኢንኪም አካህ አበካህ አኪ ደፍራኮ ቲለየህ አክ የደ፡፡ 32. ታማምባሊህ ካህናት ወገንኮ ኪኒ ኢንኪ ሌዋዊ ታማይ አራሓል አድይክ ይነ፣ ኡሱክ ለ ሒያውቶ ዩብለጉል ኢንኪም አካህ አበካህ አክ ደፍራኮ ቲላየህ የደ፡፡ 33. ኢንኪ ሳማሪያቲ ለ ታማይ አራሕኮ ቲላህ ሒያውቶል የመተ፣ ዩብለጉል አካህ ናኅሩረ፡፡ 34. ካብ ኤደየህ ዘይትከ ወይን ቢዮኩል አካህ ሓዸህ፣ ኃላጋህ አካህ ይጥምጢመህ ዩዹወ፣ ታሃሚህ ላካል ኢሲ ኦኮሎይቲህ አሞክ ሃየህ ገዽ ኤደማኃ ድክህ ካበየ፣ ታማል ፉሉይ ኪን ጥንቃቀህ ካ የምከነከነ፡፡ 35. ኢብዻሒነ ላማ ቁርስ የየዔህ ገዽ ኤድማሓ ዓሪህ ባዕላህ ዮኆወህ ታይ ሒያውቶ መዔ ዒለህ ዮህ ኤለዔል፣ ኦሲታ ማል ያውዔያ ይኔምኮ ጋኃጉል ኮህ አክፈለ ሊዮክ አክየ፡፡ 

   36. ታጉል ታይ አዶሓ ሒያውቶኮ ስፍታህ ሳብዒመህ ራደ ህሂያውቶህ ዶባይቶ አካህ የከቲ አይቲያ ታከለ?     

  37. ሕጊ መምሂር"ቶይ አካህ ናኅሩረቲያከ ጎሮንሰቲያ ኪኒአ!"የህ ኤልደሄየ፣ አማይጉል ኢየሱስ ለ አዱይ፣ አቱ ለ ታማህ አብ አክየ፡፡                         

                                  ኢየሱስ ማርታከ ማርያም ዓረድ

  38. ኢየሱስ ኢሲ ተምሃሮሊህ አራሕ ይቅጽለህ ኢንኪ መንደር ማደ፣ ታማል ማርታ አክያን ሳይጉደይታ ኢስ ዓረድ ካጋረይተ፡፡  39. ኢስ ማርያም አክያን ሳዕላ ልይቲነ፣ ታይ ማርያም ኢየሱስ ኢቢህ ዳባል ዲፈይተህ ካዋኒ ኦኮይስታይ ቲነ፡፡ 40. ማርታ ለ ፈሎ ታይሳናዳዎ ጋዳህ ኃዋላይ ቲነ፣ አማይጉል ኢየሱሱድ ካብተህ ታይ ይሳዕላ "ኦ'ይማዳራ! ሢራሕ ሙሉኡድ ዮያል ኃብተህ ዲቦህ ኃዋላህ አብሊህ ቲብታ? ያዓሳያ ይኃቶክ አከይ"አክተ፡፡ 

  41. ማዳሪ ኢየሱስ ለ ታህ የህ ኤልደሄየ፣"ማርታ! ማርታ! አቱ ማንጎ ጉዳህ አምፂንቅክ ታነ፣ አምሂውክክ ለ ታነ፣  42. ያኮይ ኢካህ ጉርሱሳቲ ኢንኪ ጉዳይ ዲቦህ ኪኒ፣ ማርያም ያሰ ጉዳይ  ዶርተህ ታነ፣ ታሃም ተኮ በያቲ ኢንከቲ ምያነ።"

ማዕራፋ 11

ኢየሱስ ጻሎት ዳዓባል ይምህረ

(ማቴ. 6፣9-13፣7፤7-11)

  1. ኢንኪ ለለዕ ኢየሱስ ኢንኪ ቦታል ጻሎት አባይ ይነ፣ ጻሎት ለ ባከ ዋክተ ካ ተምሃሮኮ ኢንከቲ"ኦ'ይማዳራ! ያሃኒስ ኢሲ ተምሃሮ ጻሎት ተን ይምሂረም ባሊህ አቱ ለ ኖያ ጻሎት አባናም ኒይምሂር"አክየ፡፡ 

     2. ኢየሱስ"ጻሎት አብታንሃኒህ ታህ ኤዸኃ አክየ፣

       ['ዓራናል ማራ] ኦ ናባ! 

         ኩሚጋዕ ያምቃዳሶይ፣

        ኩማንግሥት ያማቶይ፡፡ 

    3. ለለዕትት ኢንገራ ኢሲሲ ለለዕህ ኖሑይ፣

   4. ናኑ ንትድለሚል ኃብናምባሊህ፣

        ኒበደልህ  ኖልኃብ፣ 

       ፋታናድ ለ ኒማሳይሲን፡፡' "  

   5. ኢየሱስ ጋባዔህ ኢሲ ተምሃሮክ ታህ አክ፣"ምሳለህ ሲንኮ ኢንከቲ ካኃንቶሊ ያለ፣ ኡሱክ ለ ባርቲ ዓዻ ኢሲ ካኃንቶሊህ ዓረድ የደህ ይካኃንቶሊ! ያዓሳያ አዶሐ ኢንጌራ ይልኪኅ፡፡ 6. ይካኃንቶሊ ኢንኪ ሒያውቲ ዸዽ አራሕኮ ዮድ የመተህ አካህ አስቅርበ ፈሎኮ ኢንኪም ማሊዮ አክ ያጉል፡፡ 7. አማይጉል ቶይ ካኃንቶሊ አዳድ የከህ፣ ያዓሳያ ይማይፃጋምን፣ ኢፈይ ይምቁሉፈህ ኪኒ፣ ይዻይሎ ዮሊህ ዓራታክ ዽነኒህ ኪኖን፣ አማይጉል ኡጉተህ ጉርታ ኢንገራ ኮህ አሓዎ ማዽዓ፣ አክያ? 8. ኢንኪጉል ኡካ ኢሲ ካኃኖህ ኡጉተህ ያሓዎ ጉረሒነሚህ፣ ካ ያጡጡቀጉል ኡጉተህ ካ ጉርሱሳም ኡምቢህ አካህ ያሓየ ሲናክ አክ አኒዮ፡፡ 9. አማይጉል አኑ ለ ሲናካም ታሃም ኪኒ፣ ዻዒማ ሲናህ አምሐወለክ፣ ዋጊያ ገልትኒክ፣ ኡኩሕኩሓ ሲናህ ፋክተለክ፡፡ 10. አይሚህ ዻዒመቲ ኡምቢህ ጋራ፣ ጉረም ገያ፣ ማዕዶ ያኩሕኩሔቲያህ አካህ ፋክታ፡፡ [11. ሲንኮ አባ የከህ ባዽ ባኒ ዻዒማጉል ዻ አካህ ያሓየ ቲይ አይቲያ ኪኒ?] ዓሣ ዻዒማጉል ዓሮራ አካህ ያሓየ? 12. ለል ኢንቆቆሖ ዻዒማጉል ኢግዽ አካህ ያሓየ? 13. አቲን ኡማማራ ኪይህ ሲኒ ዻይሎህ መዔ ጉዳይ ያሓይኒም ተዸግኒምኮ ዓራናል ማራ ሲን አባ ካዻዒማ ማራህ መንፈሰ ቁዱስ ለ አይናህ የህ የይመንገህ አካህ አሓየዋም።" 

ኢየሱስከ (ብልዘቡል)ዲያብሎስ

(ማቴ. 12፣2-30፤ማር.3፣20-27)

  14. ኢንኪ ለለዕ ኢየሱስ ዋንሲሰዋ ጋነን ኢንኪ ሒያውቶኮ አየዒይ ይነ፣ ጋነን አክ የውዔ ዋክተ ዓባስ ኪይ ይነ ሒያውቲ ዋንስታናም ኤዸዽሰ፣ ህዝቢ ታይ ጉዳህ ጋዳህ ይምድንቀ፡፡ 15.ጋሪጋሪ አጋኒኒት ያየዔም"አጋኒኒቲ ኃለቃ የከ ቤልዘቡሉህ ኪኒ" የን።    16. ጋሪ ለ ካ ያፋታኖና ጉረኒህ ዓራንኮ ኢንኪ ቱማር /ምልክት/ ተን ያይባላዎ ኤሠረን፡፡ 17. ኢየሱስ ለ ተን ሓሳብ የዸገህ ታህ አክየ፣ ኢንኪ ማንግሥት ሓዲመህ ኢሰኢሰል ባዽስማቲያከ ያምጎጾወቲያ የከምኮ ቶይ ማንግሥት ያለየ፣ አማም ባሊህ ኢንኪ ድክ ኢሰኢሰህ ባዽስመምኮ ራዳ። 18. አማይጉል ሰጣን ማንግሥቲ ኢሰኢሰህ ባዽስማቲያከ ያምጎፆወቲያ የከምኮ አይናህ የህ ሲክ የህ ሶሎ ዺዓ? አቲን ለ ኡሱክ አጋኒኒት ያየዔም ቤልዜቡሉህ ኪኒ ዮካይክ ታኒን፡፡ 19. ኢስኪ አኑ አጋኒኒት በዔልዜቡሉህ አየዔህ ኤከምኮ ስን ዻይሎ ኢያህ ያ የዖና ኪኒ? አማይጉል ስን ዻሎ ኡካ ሲናል አፍርደ ሎን፡፡ 20. አማይጉል አኑ አጋኒኒቲ ለ መዔፉጊህ ኃይላህ አየዔህ ኤከምኮ፣ ፉጊ ማንግሥት ሲኑላል ተመተም ኢዽጋ፡፡ 

   21. ኢንኪ ኃይላለ ሒያውቲ ዺባህ መሳረዒያ ይብዸህ ኢሲድክ ዻዉዻህ የከምኮ ካንብረት ምያምውሪረ። 22. ያከካህ ካኮ ኃይላለ ሒያውቲ የመተህ አክሱበምኮ አካህ አምኤመመኒይ ይነ ዺባ ኑዋይ አክበያን፣ ንብረት ሙሉኡክ አክበኒሀ ሓድሊታን፡፡            23. ዮሊህ አከዋቲ ኡምቢህ ዮያ ያምቀወመ፣ ዮሊህ አከሄለዋየቲ ፋሕ ያ፡፡

ሩኩስ መንፈስ ሒያዋድ ጋሔህ ሳም

(ማቴ.12፣43-45)

  24."ሩኩስ መንፈስ ሒያውኮ ያውዔጉል ኤድ ያዕሩፈ ቦታህ ዋግዮህ ላየ ኤድአኔ ዋይታ ካፊን ቦታል ኡምቢህ ያዞረ፣ ኤድ ያዕሩፈ ቦታ ዋጉል ለ ኤድ ኢነ ኢኒ ድኪድ ጋሔህ አዳዎይ ያዽሔ፡፡ 25. አማይጉል ጋሓጉል ይጽርየህ ዮምሶኖዶወህ ገያ፡፡      26. ታሃምኮ ላካል ታማሃምኮ ጊድድ ኡማ አኪ ማልሒና አጋኒኒት ይብዸህ ያምተ፣ ባሶህ ኤድ ይነ ዓረድ ሳየህ ታማድ ማራ፣ ታማይ ሒያውቲህ ባክቶህ ሳሮሪም ባሶቲያኮ ጋደህ ጊድድቲያ ያከ፡፡                                          

ሓቂ  ኒያት

   27. ኢየሱስ ታሃም ዋንስተጉል ኢንኪ ኑማ ህዝቢ አዳኮ ኢሲ አንዻሕ ናው ኢሰህ ኮያ ዻልተህ ዾይሰ ኢና አይዻ ተምበረከቲያ ኪኒ ተዽሔ፡፡ 28. ኢየሱስ ለ ተምበረከም መዔፉጊህ ቃል ቶበህ ሢራሓድ አሲሳም ኪኒ አክየ፡፡

ዮናስ ምልክት  

(ማቴ.12፣38-42)

   29. ማንጎ ሒያው ካኡላል ተመተህ ተከሄለ ዋከተ ኢየሱስ ታህ አክየ፣ "ታይ ዳባኒ ሒያው አይዻ ኡማም ኪኖኑ፣ ምልኪት ያብሎና ጉራን፣ ያከ ኢካህ ነብይ ዮናስ ምልክትኮ በሓህ አኪ ምልኪት አካህ ምያምሖወ፡፡ 30. ነብይ ዮናስ ነነዌ ካታማህ ምልክት ኪይይ ይነምባሊህ፣ ታማም ባሊህ ሒያውቲ ባዽ ታይ ዳባኒ ሒያዋህ ምልኪት ያከ፡፡ 31. ደቡብ ንግሥቲ ፍርዲ ለለዕ ታይ ዳባኒህ ሒያውሊህ ኡገተህ ተን አሞል አፍሪደ ለ፣ አይሚህ ኢሲ ሰለሞን ብልሓተ ታቦ ዓለም መሔለዲያኮ ተመተህ ታነ፣ ያከካህ ሀይከ ሰለሞንኮ ያሰቲ ታል ያነ!  32. ታማም ባሊህ ነነዌ ካታማህ ሒያው ፍርዲ ለለዕ ታይ ዳባኒ ሒያውሊህ ኡጉተኒህ ተን አሞል አፍርደ ሎን፣ አይሚህ ነነዌ ሒያው ዮናስ ሲብከት ዮቢንጉል ሲኒ ኃጢአታህ የምጸጸቲኒህ ኒሲሐ ሳየን፣ ያኮይ ኢካህ ሀይከ ዮናስኮ ያሰቲ ታል ያነ !" 

ኢየሱሰ ብርሃን  /ኢፎይቲ/ ዳዓባል ይምሂረ

  33. ኢየሱስ ይቅጽለህ ታህ የ፣ ኢፎይታ ኢፎሰህ ኤድ' አመቡሉወ ዋ ቦታል ድፈሳቲ ሚያን፣ ወይ ዒንኪብ ኤድጋማ ቲይ ሚያነ፣ ጋዳህ ሒያው አዳህ ሳአህ አካህ ያምባላዎ ናውሰኒህ መቅረዝክ አሞክ ድፈሳን፡፡ 34. ኢፎይቲ ኢንቲ ኪኒ፣ ኩኢንቲ ዓፍያት ለቲያ ተከምኮ ኩሱውነት ሙሉእ ኢፎህ የመገቲያ ያከ፣ ኩኢንቲ ለ ዳልኪና ተከምኮ ኩሰውነት ሙሉኡድ ዲተ ያከ፡፡ 35. አማይጉል ኮያድ ያነ ኢፎቲ ዲተ ያከምኮ ሰሊት፡፡ 36. አማይጉል ኩሰውነት ሙሉኡክ ኢንኪ ዲተ አለካህ ኢፎህ የመገቲያ የከምኮ ኩኡማና ዱሙቅ ኪኒ ኢፎህ ኮህ ያይዶጎሔሚህ ዓይነት ያከ፡፡                  

                         ፊሳውያንከ ሙሴ ሕጊህ መማህራን ትምወቅሰ

(ማቴ.23፣1-36፣ማር.12፣38-40)

  37. ኢየሱስ ታሃም ዋንስተ ዋክተ ኢንኪ ፈሪሳዊ ማዎህ ካይዕዲመ፣ ፈሪሳዊ ድኪድ ሳየህ ማዎ በቶ ማይዲል ዲፈ፡፡ 38. ኢየሱስ ማዎ በታሚህ ባሶል ጋባ ዓካለ ዋየርከህ ፈሪሳዊ ይምግሪመ፡፡ 39. አማይጉል ማዳሪ ኢየሱስ ታህ አክየ፣"አቲን ፈሪሳውያኖ ብርጺቆከ ሣሓናክ ኢሮጋዳ ትይጽርይኒህ አክ ዓካልሳን፣ ሲናዳ ለ ቂያመከ ኡምነህ ተመገህ ታነ፡፡ 40. ኮ ምዸማሎሊ ኢሮቲም ይፍጥረ አምላክ አዳቲም ማፍጣሪና? 41. ሲን ብርጽቆከ ስን ሳሓናል ታነም ድካታታህ ኡሑዋ፣ ታማሚህ ላካል ኡማን ጉዳይ ጺሪይቲያ ሲናህ አከለ። 

  42. አቲን ፈሪሳውያኖ ስነህ ሚና! አይሚህ ኢንኩላኮ አዝሙድከ ጸናአዳምኮ፣ ኢሲሲ ዒንዻዻ ታኪልኮ አሥራት አየዕክ ታኒን፣ አኪ ደፍራህ ለ ሓቂ ፍርደከ መዔፉጎ ያክኅኒኒም ሓባክ ታኒን፣ ቶሆም አባህ፣ ታሃም ሓብቶና ሲናህ ኤዳይማና፡፡

   43. አቲን ፈሪሳውያኖ ስነህ ሚና፣ አይሚህ ሙክራባድ ክብረ ለ መንበሪህ አሞክ ዲፈይቶና ክሕንቲን፣ አማም ባሊህ አዳባባይከ ዓዳጋ ቦታል ሒያው ኡምቢህ ጋባህ ስናህ በቶና ጉርታን፡፡ 44. ሒያው አዽገካህ አሞል አክያዲይን ምልክት አለዋ ማዓጋህ ኢግድቲንጉል ሲነህ ሚና! 

  45. ሕጊ መምሂራንኮ ኢንከቲ ኢየሱስክ"ኦ'መምሂሮ! ታሃም አይህ ኖያህ ለ ዋቲማክ ኡኮ"ታኒቶ አክየ፡፡

   46. ኢየሱስ ታህ አክየ፣"አቲን ሕጊ መምሂራኖ ስነህ ሚና! ሒያው አሞክ ዒሊስ ዑካ ሃይታን፣ አቲን ለ ዑካድ ልፊዒህ ኡካ ኤድማዻግታን፡፡ 47. ታማም ባሊህ ስናቦብ ትግዲፈ ነብያቲህ ማዖግ ዓዻ ታስማዖና ሢራሕታም ክቲንጉል ስነህ ሚና ስናክ አይክ አኒዮ፡፡ 48. አማይጉል ስን አቦብ ትግድፈ ነብያቲህ ማዖግ ሢራሕተኒሚህ አቲን ኡማ ሢራሓህ ተን ተሓባበርቲከ መስከርቲ ኪቲን። 49. ታይ ምክንያታል መዔፉጊህ ብልሓት ታህ ያዽሔ፣ ነብያትከ ሐዋርያት ተናድ ፋራክ አኒዮ፣ ጋሪጋሪ ራበለ፣ ራዕተም አይሰደደ ሎን፡፡ 50. ዓለም ይምፍጥረምኮ ኤዸዽሰህ ሓዽተ ነብያት ቢሊህ ዳዓባል ታይ ዳባኒ ሒያው ፍርደህ ኤል ኤሠሪመ ሎን፡፡ 51. ዓዲህ ሲናክ አይክ አኒዮ፣ አቤልኮ ኤዸዽሰህ መስዋዕቲ ቦታከ በተ መቀደስ ፋናድ ራብተም ዘካርያስ ፋነህ ሓዽተ ነብያት ቢሎህ ታይ ዳባኒ ሒያው ፊርደህ ኤልኤሠሪመ ሎን፡፡ 

   52. አቲን ሕጊ መምሂራኖ ስነህ ሚና! ኢዽጋት አይፈይ ያከ ቁልፈ ትብዺን፣ ሓቂ ቁልፈ ትብዺኒህ፣ ሲኒ ዸግኃህ ኤድማሳይኒቲን፣ ኤድ ሳይቶ ጉርታም ኤድሳያናምኮ ደሳክ ታኒን፡፡ 

  53. ኢየሱስ ታማይ ቦታኮ ያዳዎ ኡጉተ ዋክተ ሙሴ ሕጊህ መምሂራንከ ፈሪሳውያን የምቀወምኒህ ማንጎ ኤሠሮ ካብ ኤልኢሳናም ኤዸዽሰን፡፡ 54. ታሃም ለ አበኒም ዋኒህ ካያጽማዶና ጉረንጉል  ኪኒ።   

ማዕራፋ 12

ኢየሱስ ፈሪሳውያን ግብዝነትኮ አጥንቅቃ የ

(ማቴ. 10፣26-27)

  1. ታማይ ዋክተ አይዾለ አስያሓታህ ሎይምታ ሒያው የከሄሊን፣ ማንጋኮ ኡገተሚህ ሲነሲነህ ቲታ ዱፈዋክ ቲታድ አዕቲይ ይኒን፣ ኢየሱስ ለ ባሶቱላል ኢሲ ተምሃሮክ ታሃም ያናም ኤዸዽሰ፣ ፈሪሳውያን አራስኮ ሰሊታ፣ ታይ ተን ግብዚነትኮ ሚሪሕ ኤያ ያናማህ ኪዮ፡፡ 2. አልፍምተም ፋክተካህ ማራዕታ፣ ሱዑተም አምዽገካህ ማራዕታ፡፡ 3. አማይጉል ዲተድ ወንስተኒም ኡምቢህ ኢፎል ታማበ፣ አልፍመ ዓረክ አዳድ ሑሱክታህ አይቲድ ዋንስተኒም ናሕሲ አሞክ ዋዕ የኒህ ዋንስተኒም ባሊህ የከህ ያማበ፡፡

ኢያ ማይሲቶና ኤዳም

(ማቴ.10፤28-31)

  4."ሲናክ ኢኒ ሓንቶሊቶ ታህ ስናክ አይክ አኒዮ፣ ኃዶይታ ያግድፊኒምኮ ፈር አኪም ኢንኪም አብቶ ዽዔዋይታም ማማይሲቲና፡፡ 5. ያከ ኢካህ ኢያ ማይሲቶና ኤዳም ስናክ አይክ አኒዮ፣ ታሃም ለ ይግድፈምኮ ላካል ጋሃናማድ ዒዶ ዺዓ ፉጎ ኪኒ፣ ዮ! ካያ ዲቦህ ማይሲታ ስናክ አይክ አኒዮ።"

  6."ኮና ኪምብርቶ ታማና ሳንቲሚህ አምብሒይ ማታነ? ተንኮ ኢንከቶ ኡካ መዔፉጊህ ነፊል ብያይስምታቲያ ማታነ፡፡ 7. አቲን ስን ዸግኃህ ባቡድ ሙሉኡክ ኪህ ሎይመህ ኪኒ፣ አማይጉል ማማይስቲና፣ አቲን ኡኮ ማንጎ ኪምቢሮኮ ታይሲን፡፡"

ክርስቶስ ዳዓባል ያማስካሮና ኤዳ

     (ማቴ.10፣32-33፤12፣32፤10፣19-20)

  8. ኢየሱስ ካታሰህ ታህ የ፣ አዕሩፈካህ ሒያው ነፊል ዮህ ያምስኪረቲያህ አኑ ለ መዔፉጊህ መላእክቲህ ነፊል አካህ አምስክረ ሊዮ ስናክ አይክ አኒዮ፡፡ 9. ሒያው ነፊል ይያክኅደቲያ ኡኑለ ለ መዔፉጊህ ማላይካህ ነፊል ካ'አክኂደ ሊዮ፡፡ 

  10. ሒያውቲ ባዽህ አሞል ዋቶ ቃል ዋንስታቲይ ይኔምኮ ካበደል ኤልሓባን፣ መንፈስ ቁዱስ አሞል ዋቶ ቃል ዋንስታቲ ይኔምኮ ለ ካበደል ኤል ማራዓ፡፡

  11."ሒያው ኢሲሲ ሙክራባል ሲን በያንጉል፣ ረዶንከ ሢልጣን ባዕልቲ ነፊል ፍርደህ ካብ ስን ኢሳንጉል"አይም አይምልሰሊኖ? አይናህ ነህ ዋንሲተሊኖ?"ተኒህ ማምጻናቂና፡፡ 12. አይሚህ ዋንሲቶና ስናህ አዳም ታማይ ሳዓታህ መንፈስ ቁዱስ  ሲናክ ኢየ ለ።                                                      

                                 ሀብታም ኪን ሒያውቲህ ኡፈዋይቲ                   

  13.ህዝቢ ፋንኮ ኢንኪ ሒያውቲ"ኦ'መምሂሮ! ና'ባ ኒያውሪሰ ሪስተ ዮህ ኃድሎክ ያዓሳያ ይ'ሳዓላክ ዮህ ኤይ"አክየ፡፡ 14. ኢየሱስ ለ"ኮ'ሒያውቶ፣ ሲን ፋናድ ፈራዲ ኤክህ ሪሰተ ኃድሎ ኢዪ ይረድሰ?"የህ ኤልደሄ፡፡ 15. ካታሰህ ኡማንቲያክ ታህ አክየ፣"ሒያውቲ ሂወት ሀብቲ ማንጋህ ማኪ፣ አማይጉል ቡኩሶከ አምሀጋጋይኮ ዻዉዹማይ  ሰሊታ፡፡

  16. ታሃሚህ ላካል ኢየሱስ ታይ ሚሲላይቶ ታህ የህ አክ የዽኄ፣ ማሐራሳህ ማንጎ ኢላው አካህ ኦሮበ ኢንኪ ሀብታም ኪን ሒያውቲ ዪነ፡፡ 17. ኡሱክ ሓሳባህ፣ ታሂዾለ ኢላው ኤድ አስከሄለ ቦታ ማልዮጉል አይም አቦ? የህ አሕሲቢይ ዪነ፡፡ 18. ታህ የ፣ አባም ታሃም ኪኒ፣ ኢኒ ማካዝኒት ኡምቢህ ዒደህ አኪ ናባ ማካዚኖ ሢራሔ ሊዮ፣ ታማድ ኢኒ ኢላውከ ኢኒ ኒብረት ሙሉኡክ አሰከሄለ ሊዮ፡፡ 19. ታማምኮ ላካል ኢነክ፣ ሀይከ ማንጎ ኢግድቲህ ኩዽዓ ማንጎ ሀብተ ሊቶ፣ አማጉል ዔረፍቲ አብታይ ኤምዘነገዕ፣  በት፣ ኡዑብ፣ ኒያት! አክ ኢየ ሊዮ የ፡፡ 20. መዔፉጊ ለ ኮምዸማሊ! ካባር ታይ ኩ ናፍሰ ኮኮ በየ ሎን፣ አማይጉል ታይ ተስከሄለ ሀብቲ ሙሉኡክ ኢያህ አከ ለ? አክየ፡፡ 21. ኢሳሞህ ባዾት አሞል ሀብተ ያስከሄለቲ፣ መዔፉጊህ ነፊል ለ ዲካ የከ  ሒያውቲ ታማም ባሊህ ያከ፡፡

ኢምነት መዔፉጊህ አሞል አባናም

(ማቴ. 6፣25-34)

   22. ታሃምኮ ላካል ኢየሱስ ኢስ ተምሃሮክ ታህ አክየ፣ አይም በተልኖ? አይም ሳሪተልኖ? አይክ ናብራ ዳዓባል ማምጻናቂና ስናክ አይክ አኒዮ። 23. አይሚህ ምግበኮ ሂወት፣ ሳረናኮ ሰውነት ያይሰ፡፡ 24. ኢስቲ ካኮ ኡቡላየ፣ ኢስን ሚያድርዪን፣ ወይ ሚያዕዪን፣ ኢላው ኤድያስከሄሊን ቦታ ወይ ማዕካን ማሎን፣ ያኮይ ኢካህ መዔፉጊ ተን ያምጊበ፣ አቲንማ ኪምቢሮኮ ታይሰም ኡኮ ኪቲን፡፡ 25. ኢስክ ሲንኮ ይሕስበህከ ይምጽንቀህ ዒድመድ ኢንኪ ለለዕ ኦሶ ዽዓቲ አቲያ ኪኒ? 26. አማይጉል ታይ ዒንዻ ጉዳይ ኡካ አብቶ ዽዔ ዋይታም ኪቲንሃኒህ አይሚህ አኪ ጉዳህ አምጽንቂክ ታኒን? 27. ባራኪ ዒንቦባ አይናህ ተህ ዓርታም ኢስኪ ኡቡላየ፣ ኢስን ሢራሓህ ማኃዋላን፣ ምያፍትሊን፣ ያኮይ ኢካህ ሰለሞን ኡካ ታይ ኡምቢሂያህ ክብረኮ ተንኮ ኢንከቲዻ ታህዻ ዓዻመዔ ሳረና ማሳርቲና፡፡ 28. ኢቦል  መዔፉጊ ካፋ ቱምቡሉወህ በራ ጊራክ አዳድ ራዳ ባራኪ ሐሳር ታህ ኢሰህ ዓዻ ያስመዔህ ሳሪሳም የከምኮ፣ አቲን ኢምነት አይሚህ ታስጉዱልኒም፣ ስናማ አይናህ የህ ያይሰ ዒለህ ሲን ማሀይሲሳ? 

  29. አማይጉል አይም በተልኖ? አይም አዑበሊኖ? አይክ ሓሳባህ ማምጻናቂና፡፡ 30. ታሃም ገዮና ታይ ዓለሚህ ሒያው ኤልያምጽንቂን፣ ሲና ለ ታሃም ኡምቢህ ስን ጉርሱሳም ኪናም ዓራንቲ ሲን አባ ያዽገ፡፡ 31. ያይሰ ፉጊ ማንግሥቲ ዋግያ፡፡ ስን ጉርሱሳ ጉዳያት ኡምቢህ ስናህ ኦሰለ፡፡

ባዾል ሀብተ ያስካሀሎና መዳም

(ማቴ. 6፣19-21)

  32. አቲን ዒንዻ ዱየ ተከ ይወገኖ ማማይስቲና፣ አይሚህ ዓራንቲ ሲን አባ ማንግሥቲ ስናህ ያኃዎ ይፍቅደ፡፡ 33. ልትኒም ሙሉኡክ ኢብሓይ ማል ድካታታህ ኡሑዋ፣ አምዔለዋታ ማል ቦርሳ ኦይሶኖዶዋይ ስን ማል ባዸዻይቲ ኤድማታረዋል፣ ብልዒ ለ ኤድበተዋርከል፣ ኢንኪጉል ኤድባክተዋ ቦታል፣ ማንግሥተ ሰማያል ድፈሳ፡፡ 34. አይሚህ ስን ማል ኤድያነ ቦታድ ስን አፍዓዶ ታማድ ታነ፡፡  

አገልገልቲ ትግሃት

  35. ጋባዔህ ኢየሱስ ታህ የ፣ ኡዹዺህ ኢክቲያይ ኡማንጉል ሢራሓህ ኦምሶኖዶዋ፣ ስን ኢፎይቲ አፎዋቲያ ያኮይ፡፡ 36. ታይ ዓይነቲህ ተን ማዳሪ ማርዓ ዲኮ ጋኃም ኢላልታ አገልገልቲህ ኢምጊዳ፣ ኢሲን ተን ማዳሪ ዲንገቲህ የመተህ ማዕዶ ያኩኅኩኄ ዋክተ አፍተኒህ ፋኮና ተምሶኖዶወም ኪኖን፡፡ 37. ቶይ ማዳሪ ዲንገቲህ ያመተ ዋክተ ትንቅሔህ ዻዉዻክ ገይምታ አገልገልቲ አይዻ ትመስጊነም ኪኖኑ! ሓቀህ ሲናክ አይክ አኒዮ፣ ኡሱክ ኡዹዽህ ይክቴህ ማይድል ተን ድፈሳ፣ አይሰሰይክ ተን ያስግልጊለ፡፡ 38. ተን ማዳሪ ባር ያኮይ ባርቲዓዻኮ ላከል ያምተ ዋክተ ትንቅኄህ ኢላላክ ጋያ አገልገልቲ ትምስግነም ኪኖን! 39. ለል ታሃም ኢዽጋ፣ ሒያውቲ ባዸዻይቲ ያምተ ሳዓት ባዽሰህ ያዽገም ያከዶ ባዸዻይቲ ካዲኪድ ፎተህ ሳዎ ሓበ ማዻዺና፡፡ 40. ሒያወቲ ባዺ አሕሰበ ዋይተን ሳዓት ዲንገቲህ አምተለ፣ አማይጉል አቲን ኦምሶኖዶዋይ ኢላላ፡፡   

መዔቲያከ ኡማ አገልጋሊህ ሚሳለ

(ማቴ. 24፣45-51)

   41. ጰጥሮስ ለ ኦ'ይማዳራ! ታይ ሚሲላህ ዋንሲታም ኖያህ ኪኒ? ወይ ኡማንቲያህ ኪኒ?  የህ ኢየሱስ ኤሠረ፡፡

 42. ማዳሪ ኢየሱስ ለ ታህ የህ ደሄ፣ ኢስኪ ካበተሰብ ደምቢህ ኣካህ ያስኃዳሮከ ካ አገልገልቲህ ሚግበ ዋክተህ አካህ ያሓዎ ማዳሪ ረድሰ ኡሙን ብልኄ ኪን መጋቢ አይቲያ ኪኒ? 43. ማዳሪ ኤልየደርከኮ ጋሓጉል ሊኪዕ ይምኢዚዘም ባሊህ አፍጽምክ ገይማ አገልጋሊ አይዻ ይምስግነቲያ ኪኒ! 44. በኡነት ስናክ አይክ አኒዮ፣ ማዳሪ ታማይ አገልጋሊ ኢስ ኒብረቲህ አሞል ኡምቢህ ኃላፊ አባህ ካረዲሳ፡፡ 45. ያከካህ ቶይ አገልጋሊ ይማዳሪ ዸህ ሚያሚተ፣ ዓያየ ለ ያን ሓሳባህ በታክ፣ አዑብክ፣ አስክሪከ፣ ላበቶከ ሳዮት አገልገለቲ ሳባዓናም ኤዸዽሳ፡፡ 46. ያኮይ ኢካህ ማዳሪ አምሕሲበዋየ ለለዕከ ሳዓታህ ዲንገቲህ ያሚተ፣ አገልጋሊ ለ ኃይላህ ያቅጺዔ፣ ካዒዲል ለ ታይተለለምሊህ /ወስለቲሊህ/ ያከካህ አባ፡፡ 47."ማዳሪ ፍቃዳህ አዽጊህ አምሶኖዶወ ዋየቲ፣ ወይ ማዳሪ ትኢዛዝ አፍጺመ ዋየ ዓስበንቲ ጋዳህ ያምቅጺዔ፡፡ 48. ያከካህ ማደሪ ፍቃድ ሶዻህ ቅጽዓት ባህሲሳ ጉዳይ አበህ ገይማጉል ቅጽዓት አካህ ያስሲከ፣ አይሚህ ማንጎም አካህ ቶምኆወ ሒያውቶኮ፣ ማንጎም አክ ጉሩቱምታ፣ ማንጎ ኃደራ አካህ ተምኄወ ሒያውቶኮ ማንጎም አክ ኢላላምታ"

ኡማን ጉዳይ ሓበኒህ ኢየሱስድ ካታናም 

(ማቴ. 10፣34-36)

   49. ካታየህ ኢየሱስ ታህ የ፣"ሃይክዮ አኑ ባዾት አሞል ጊራ ባሄህ አኒዮ፣ ዸህ ዮህ ታምቀጸጸለዶ አክኅነ ዻዸ! 50. ያከ ኢካህ ኡኑ አካህ አምጥምቀ መከራ ጥምቀት ሊዮ፣ ታማም ታምፍጺመም ፋናህ ዕረፍት ማሊዮ፡፡ 51. ኡኑ ባዾ ታሞል ሳላም ባሄም ታካሊን? አኑ ባሃም ባዽሳ ኪኒካህ ሳላም ማኪ፣ ስናክ አይክ አኒዮ፡፡ 52. ካዶኮ ኤዸዽሰኒህ ኢንኪ በተሰቢህ ፋናድ ያኒን ኮና ሒያውቲ ባዽሲመ ሎን፣ አዶሕ ላማይቲ አሞል፣ ላማይ አዶሕት አሞል ኡጉተኒህ አንገዔ ሎን፡፡ 53. አባ ባዽ አሞል፣ ባዻ' አባ ታሞል፣ ኢና ባዻ' ታሞል፣ ባዻ' ኢና ታሞል፣ ባሎ ዒብናት አሞል፣ ዒብና ባሎት አሞል ናዓቦህ ኡጉተኒህ ባዽስመ ሎን፡፡ 

ዋክቲ ኩነተታት ያዽጊኒም

(ማቴ.16፣2-3)

  54. ለል ኢየሱስ ሂዝበክ ታህ አክየ፣"ዳሩር አይሮዹማ ቱላኮ አውዒህ ታብልንጉል አማይጉልካህ 'ሀይከ ካፋ ሮብ ራደለ'!ታዽሒን፣ ርጊጺህ ለ ራዳ፡፡ 55. ታማምባሊህ ሓሓይቲ ደቡብ ኡላኮ ሳባዓጉል ካፋ ላዕና አከለ፣ ታዽሒን፣ ርጊጺህ ታከ፡፡  56. አቲን ኮጉቡዛት ባዾከ ዓረንቲ ቢሶ ታብሊኒህ ታኮኪናም ታዸጊን፣ ታጉል ታል ካዲ ዳባን ታከም አይሚህ አዽገ ዋይታናም? 

 ጉዳይ ባዕላሊህ  ያምሰመመዒኒሚህ ዳዓባል

(ማቴ. 5፣25- 26)

  57. ኢየሱስ ካታሰህ ታህ የ፣ አማይጉል አይሚህ አቲን ስነህ ትክኪል ኪን ሓቂ ጉዳይ ተዸጊኒህ ማታፍርዲኒም? 58. ኩጉዳይህ ባዕሊ ይክሲሰህ ፍርዲ ዓረህ ኩበያ ዋክተ ገና አራሓል ታነሃኒህ ኢሲ ጉዳይህ ባዕላሊህ ታምሳማማዖ ኢጽዒር፣ አማም አከዋይተምኮ ኡሱክ ዳኒያ ዻጋህ ሂርገህ ኩበያ፣ ዳኒያ ለ ፖሊሲህ ቲላሰህ ኩያኀየ፣ ፖሊስ ለ ማዹዋድ ኩሳይሳ፡፡ 59. ኢሲ ሞቆይጾ ሙሉአድ ባክተህ አውዔካህ ማዹዋኮ ታውዖ ማዽዕታም ኮካይክ አኒዮ።  

ማዕራፋ 13

ኒሲሐ ሳየ ዋየቲ ኡምቢህ ያለየ

   1. ታማይ ዋክተ ሒያው ኢየሱሱል የመቲኒህ ገሊላ ሒያው መዔፉጊህ መሥዋዕት አስቅርቢህ ጵላጦስ ተን ይግደፈ፣ ተን ቢሎ ተን መሥዋዕትሊህ የምደበለቀ የኒህ አካህ ዋሪሰን፡፡ 2. ኢየሱስ ታህ የህ ኤልደሄየ፣ ኢቦል ታይ ገሊላ ሒያው ታይ ኡምብሂያህ ሊዪ ተን ማደም፣ አኪ ገሊላ ሒያው ኡምቢሃኢያኮ ጋዳህ ለ ኃጢአተይናታት ኪይይ ይንንጉል ታካሊን? 3. ማለ፣ ሲኒ ኃጢአታህ ተነሰሒኒህ ንሲሓ ሳየ ዋይተኒምኮ አቲን ለ ተና  ባሊህ አለየ ሊቲን ሲናክ አይክ አኒዮ፡፡ 4. ሰሊሆሙል ማንዳቅ ኤል ራደህ ራበ ባሐራምከ ታማን ሒያውቲያህ ዳዓባል አይም ታሕስቢኒ? ኢሲን ኢየሩሳለምል ማራይ ቲነ ሒያው ኡምቢህ ኢያኮ ግድድ ኃጢአት ለም የኪንጉል ታካሊን? 5. ማለ፣ ሲኒ ኃጢአታህ ተምጸጸትኒህ ኒሲሓ ሳየ ዋይተኒምኮ ተናባሊህ ለ አለየ ሊቲን ስናክ ኣይክ አኒዮ።  

                             ፊሮወ ዋይታ  ባላሶ  ሓዻህ ሚሳለ

   6. ታሃምኮ ላካል ኢየሱስ ታይ ሚሳለ አክየ፣ ኢንኪ ሒያውቲ ካታክሊህ አዳድ ትምቲክለ ኢንኪ ባላሶ ሓዻ ቲነ፣ ተኮ ባላሲ ፍረ ገየሊዮ የህ የደጉል ኢንኪም ኤድ ገየካህ ራዔ፡፡ 7. አማይጉል ታክል ዋና ሃይከ ታይ ባላሶ ሓዻኮ ፍረ ገልዮ ኤዽሔህ አዶሕ ኢጊዳ ሙሉእ ጋኃንጋሔ፣ ግን ኢንኪ ፊረይታ ኤድማገኒዮ፣ ካምቦኮ ሳራህ ኢግሪዕ፣ አይሚህ ታክሊ ቦታ ካንቶህ ቲብዸህ ባዾ አይቦሎሶዊይ ታነ? አክየ፡፡ 8.ታክሊ ሠራሕተይና ለ ታህ የህ ኤልደሄየ፣ ይማዳራ! ኢስኪ ታይ ኢጊዳህ ለ ሓብ፣ አካባቢ ኡኩትኩተህ ማዳበሪያ ኤድሃየሊዮ፣ 9. ያሚተ ኢጊዳ ፊረ ቶኆወምኮ መዔም ኪኒ፣ አማም አከዋይተምኮ ለ አጊርዔ ለ፡፡"              

                     ኢየሱስ ኢንኪ ቱሑጉበ ኑማ ሳንባት ለለዕ ኡሩሰ

  10. ኢየሱስ ሳንባት ለለዕ ሙክራባድ አይምሂሪይ ዪነ፡፡ 11. ታማል ባሐራምከ ታማንኮ ኤዸዽሰህ ሩኩስ መንፈሲ ቱጉቡጠ ኢንኪ ኑማ ቲነ፣ ኢስ ዽዾዽ አክ ጉዱተህ ሪግ ቶዋ ሡሩህ ዺዓይ ማና፡፡ 12. ኢየሱስ ዩብለጉል ተደዔ"ተኑማ ኢሲ ዱረኮ ኡር" አክየ፡፡ 13. ኢሲ ጋባህ ሀሳስ አልሊሰ፣ አማይጉልካህ ቀጥ ተህ ሶልተ፣ ፉጎ ለ ተመነ፡፡ 

  14. ኢየሱስ ሳንባት ለለዕ ኡሩሰርከህ ሙክራብ አሞይቲ ዩቁጡዔህ ለግዲና ታዳድ ሢራሕ ኤልሢራሓን ሊሓ ለለዕ ያነ፣ ታይ ለለዓህ አምትክ  ኡራ፣ ሳንባት ለለዕ ለ ሚያከ የህ ዋንሲተ፡፡

  15. ማዳሪ ኢየሱስ ለ ታህ የህ ኤልደሄየ፣"ኮ'ጉቡዛት! ሲንኮ ጋሪጋሪ ሳንባት ለለዕ አዉር ኤድ አልፊመርከኮ የየዔህ ወይ አኮሎይቲ አክ ዩምዱወርከኮ ዩንኁወህ ላየ ኤድያዑበ ቦታህ በያይ ሚያነ? 16. ሀይከ አብራሃም ዳራ ኪን ታይ ሳይጉደይታ ባሓራምከ ታማን ኢግዲቲያ ሙሉእ ሰጣናህ ቱምዹወህ አምሰቀክ ማርተህ ታነ፣ ይቦል ኢሲ አካህ ቱምዹወህ አካህ ታምሰቀየ ዱረኮ ሳንባት ለለዕ ያንሑዊኒም አካህ መዳ?" 17. ታይ ዋኒህ ኢየሱስ ተምቀወመም ኡምቢህ ተን ሖላሰ፣ ህዝቢ ለ ኢየሱስ አበ ዲንቀ ኪን ጉዳህ ኡምቢህ ኒያተን፡፡

ሰናፍጭ ዳሪህ ሚሳለ

(ማቴ. 13፣31-32፣ማር.4፣30-32)

   18. ኢየሱስ ታህ የ፣"መዔፉጊህ ማንግሥት አይሚህ ሚሳለህ ታምቡሉወ? ለል አይምሊህ ታመዘዘነ? 19. ኢንኪ ሒያውቲ ኢሲ ታክሊህ አዳድ ይድሬየ ሳናፍጽ ዳራህ ኢጊዳ፣ ኢሲ ታነበህ ሓዻ ቲዻ ታከ፣ ኪምቢሮ ኃኮኩክ አሞክ ዓረ አክ ሥራሕታ።         

 መብኮዕ ሚሳለ

(ማቴ.13፤33)

  20. ኢየሱስ ጋባዔህ ታህ አክየ፣"መዔፉጊህ ማንግሥቲ አይሚህ ሚሳለሊህ አይወደደረ?  21. መዔፉጊህ ማንግሥቲ ኢንኪ ኑማ ቡኩዕ ሙሉኡክ ያብካዖ አዶሓ ሚሰ ኃርዲያህ አዳድ ሃይተ መብኮዒህ  ኢጊዳ፡፡"

ሔዊን አራሕ ዳዓባል

(ማቴ. 7፣3-14፣21-23)

  22. ታሃምኮ ላካል ኢየሱስ ኢየሩሳለም አድይ ያነሃኒህ፣ ካታማከ ገጠርል አይምሂሪክ ቲላይ ይነ፡፡ 23. ታማይ ዋክተ ኢንኪ ሒያውቲ"ኦ'ይማዳራ! ታድኅነም ዳጎ ሒያው ኪኖኑ?"የህ ካኤሠረ፡፡ ኢየሱስ ታህ የህ ኤልደሄየ፡፡ 24. ሔዊን ኢፈይኮ ሳይቶና ኢፅዒራ፣ ታማይ ኢፈይኮ ሳይቶ ጉርታም ማንጎም ኪኖን፣ ያከካህ ሳዎና ማዽዓን ሲናክ አይክ አኒዮ፡፡ 25. ዓሪ ባዕሊ ኡጉተህ ኢፈይ አልፋ፣ አቲን ኢሮል ሶልተኒህ አኩሕኩሒክ ኦ'ኒማዳራ! ያዓሳያ ኖህ ፋክ! ያናም አዸዺሰ ሊቲን፣ ኡሱክ ለ አርከኮ ተመቲኒም ሲን ማዽገ! አይክ የህ ኤልደሄ ለ፡፡ 26. ታማይ ዋክተ አቲን ኮሊህ ኢንኮህ ጋሕነህ በነ፣ ኢንኮህ ኖዖበ፣ ኒ አዳባባል ቲይምሂረኮ! አክ ኢየ ሊቲን፡፡ 27.ኡሱክ ለ ጋባዔህ አርከኮ ተመቲኒም ማዲገ? አቲን ዓመፀናታቶ ኡምቢክ ዮኮ ሚርሕ ኤያ! ሲናክ ኢየ ለ።  28. አብራሃም፣ ይስሐቅ፣ ያዕቆብ ነብያት ኡምቢህ ፉጊ ማንግሥቲህ ነፊል አብለሊቲን፣ አቲን ለ ኢሮል ራደኒህ ራዕታንጉል ደሮከ ኢኮክቲ አርባዖ ስናክ አከለ፡፡ 29. ማንጎ ሒያው አይሮማሓከ አይሮዹማኮ አምተሎን፣ መዔፉጊህ ማንግሥቲህ ማይዲል  ዲፈሎን፡፡ 30. አማይጉል ሳራማሪ ቦሶቲም አከሎን ባሶቲም ለ ሳራቲም አከሎን፡፡

ኢየሱስ ኢየሩሳለም ይውቂሰ

(ማቴ. 23፣37-39)

  31. ታማይ ዋክተ ውልውል ፈሪሳውያን ኢየሱሱድ ካብ የኒህ"ሄሮድስ ኩ'ያግዳፎ ጉራክ ያነክ ታርከኮ ኤወዓይ አኪ ቦታህ አዱይ"አክየን፡፡ 32. ኢየሱስ ለ ታህ አክየ፣ አዱዋይ ቶይ ዋካሪክ'ካፋከ በራ አጋኒኒቲ አየዔ ሊዮ፣ ዳላኪን ኡረሰ ሊዮ፣ ማዳሕ ለለዕ ኢኒ ሢራሕ ባከልዮ'የዸሔ አከያ፡፡ 33. ያኮይ ኢካህ ካፋከ በራ፣ በሐ ለ ኢየሩሳለም ኡላል አቃጻሎ ዮልታነ፣ አይሚህ ነብይ ኢየሩሳለምኮ በኃል አኪ ቦታል ራቦ መዳ፡፡  34."ኢየሩሳለሞ! ኢየሩሳለሞ! አቱ ነብያት ታግዲፈ፣ ኮያድ ፋሪምተ ፋርይቲት ዻይቲህ ታድብዲበ፣ ዾርሆ ጻጹት ጋለድ ታስከሄለም ባሊህ፣ አኑ ለ አይዾለ ዋክተ ኩዻይሎ አስካሃሎ ጉረ፣ አቲን ለ ማኖ ዮክተን፡፡ 35. አማይጉል ሲን ዲክ ዖና የከህ ራዔለ፣ አቲን መዔፉጊህ ሚጋዓህ ያምተቲ የመበረከቲያ ኪኒ ታናም ፋናህ ኢንኪጉል ያብለ ማልቲን ሲናክ አይክ አኒዮ፡፡

ማዕራፋ 14

ኢየሱስ ጋባዔህ ኢንኪ ዳልኪና ሳንባት ለለዕ ኡሩሰ

  1. ሳንባት ለለዕ ኢየሱስ ፈሪሳውያንኮ ኢንከቲ ዲኪድ ማዎ በቶ ሳየ፣ ፈሪሳውያን ኡሱክ አባም ያብሎና ይቱኩሪኒህ አይደለለዒ ይኒን፡፡ 2. ታማይ ዋክተ  ሙሉእ አካል  አክ ዱዱበ ኢንኪ ሒያውቲ ኢየሱስ ነፊል ዪነ፡፡ 3. ኢየሱስ ለ ሙሴ ሕጊህ መማሂራንከ ፈሪሳውያናክ"ሳንባት ለለዕ ኡሩሳናም ሕገህ ትምፍቅደ፣ ማምፋቃድና?" የህ ተን ኤሠረ፡፡ 4. ኢሲን ለ ኢንኪ መልስ ኤልደሄካህ ቲባ የን፣ ኢየሱስ ላሑተ ሒያውቶ ይብዸህ ኡረሰህ ዽዽየ፡፡ 5. ጋባዔህ ኢየሱስ ሲንኮ ሳንባት ለለዕ ባዽ አከከ አዉር ጉድጋድ አዳድ አክ ራዳጉል አማይጉል አየዔ ዋቲይ አይቲያ ኪኒ? የህ ተን ኤሠረ፡፡ 6. ኢሲን ኢንኪ መልስ ያሓዎና መዽዒኖን::                   

                         ትኅትናከ  አይሳሳይቲ /አስታናጋድቲ/ ዳዓባል

 7. ኢየሱስ ግብዛህ ደዕምምተ ሒያው ናውተ ቦታ ያባዾና አሞኮሚህ ዩብለ፣ አማይጉል ታይ ሚሳለ አክየ፡፡ 8. ኢንኪ ሒያውቲ ማርዓ ዲግሲህ ኩደዓጉል ቶሞኮመህ ናወተ ቦታክ ማድፈይን፣ ምናልባት ኮኮ ክብረ ለ ሒያውቲ ደዕሚመህ ያኮ ዽዕማ፣   9. አማይጉል ላምሲና ይዒዲመ ሒያውቲ፣ ኮያድ የመተህ ታይ ቦታ ታይ ሒያውቶህ ሓብ ኮክ ያ፡፡ ታማይ ዋክተ ናባ ሖላህ ላተ ቦታል ኡብተህ ውርደቲህ ዲፋይታ፡፡ 10. አማይጉል ዲጊሲህ ደዕምምታጉል ላተ ቦታል ድፈይ፣ ታማይ ዋክተ ኩደዔ ሒያውቲ፣ የመተህ ይካኃንቶሊ! ናውተ ቦታል ኤወዓይ ዲፈይ ኮክ ያ፣ ታማይጉል አኪ ዑዱማቲህ ነፊል ክብረ ገየሊቶ፡፡ 11. አይሚህ ኢሲ ዸግኃ ናውሳቲ ኡምቢህ ላት ያ፣ ኢሳሞ  ላት ኢሳቲ ለ ናውያ፡፡ 12. ኢየሱስ ይዕዲመ ሒያውቶክ ለ ታህ አክየ፣ ማዎህ አከከ ዲራራህ ዲጊስ አብታ ዋክተ ሲኒ ሊካሕ ሲኒ ተራህ ዮህ ደሄሎን ተዸሔህ ተስፋ አብተህ ኢሲ ካኃንቶሊት፣ ኢሲ ሳዖል፣ ኢሲ በተሰብ፣ ሀብታማት፣ ሑጋ፣ ማደዒን፡፡ 13.ያከካህ ድጊስ አብታጉል፣ ዲካታት፣ አካል ብያክለም ስባ ኪናም፣ ኢንቲትኮ አብለ ዋይታም፣ ጥራህ ደዕ፡፡ 14. ታሃም አብታጉል ኢሲን ሲኒ ሊሞ ያክፋሎና ማዽዓንጉል አምስጊነ ሊቶ፡፡ ጻድቃን ኡግታቶህ ዋክተ መዔፉጊ ኮህ አክፈለ ለ፡፡"

ናባ ግብዛህ ሚሳለ

(ማቴ. 22፣1-10)

  15. ማይድል ድፈይተህ ትነምኮ ኢንከቲ ኢየሱስ ዋንሲተም ዮበህ፣ ፉጊ ማንግሥቲህ ማይዲል ዲፈዮ ዺዓቲ አይዻ ይምዕድለቲያ ኪኒ!"የዽሔ፡፡ 16. ኢየሱስ ለ ታህ አክየ፣ "ኢንኪ ሒያውቲ ናባ ግብዛህ ዲራራህ ዮይምሶኖዶወህ ማንጎ ሒያው ደዔ፡፡ 17. ግብዛ ሳዓት ማደ ዋክተ ሃይከ ኡማን ጉዳይ ዮምሶኖዶወክ ግብዛህ አማ! የዽሔ አክዮዋ ዓዳሚ አገልገልቲኮ ደዖ ሒያዋድ ፋረ፡፡ 18. ያኮይ ኢካህ ሲነሲነህ ዑዱማት ዒድመኮ ራዖና ምክንያት ያፍጣሮና ኤዸዽሰን፣ ኢንከቲ ባዾ ዻመህ አነጉል ኤደህ አብሎ ዮልታነ፣ አማይጉል አማቶ ማዽዓክ ዮል ማባዽን፡፡ 19. ማላሚ ኮና ጽምደ፣ አዉራኮ ዻመህ አነጉል ተና አዓካኖ ዮልታነ፣ አማይጉል አማቶ ማዽዓክ ቢሕላ ዮሃብ አክየ፡፡ 20. ለል አከቲ ኑማ ኦርብሰህ ማርዓየ ኪዮጉል አማቶ ማዽዓ አክየ፡፡ 21. ግለዋይቲ ዲኪህ ጋህህ ታሃም ኡምቢህ ማዳራክ የዸሔ፣ ዲክቲ ባዕሊ ይቁጡዔህ ጋባላዓይ ካታማት አራሑከ ሓኮክቲ አሮኁል አዱይ፣ ድካታት፣ ዕዉራት፣ አካጎዶሎ ኪናም፣ ሓንካሳት ደዓይ ታህ ዮህ ባህ አክየ፡፡ 22. አገልጋሊ ጋኄህ የመተህ ማደራክ ኦ'ይማደራ! ሃይከ ይትኢዚዘም ሙሉኡድ ኢፍጽመህ አኒዮ፣ ያኮይ ኢካህ ፎያ ኪን ቦታ ታነ አክየ፡፡ 23. አማይጉል ዓሪባዕሊ አገልጋሊክ ታህ አክየ፣ ይስክ ያማጎክ ገጠር ኡላል በይታ ጎደናታትከ ኡማን አሮሕል አዱዋይ አኪ ማሪ ያማቶ አብ፡፡ 24. ደዒምምተ ሒያውኮ ኢንከቲ ኡካ ይድጊሥኮ ማዻዓማ ስናካይክ አኒዮ።                

 ኢየሱስ ያካታሎና መሥዋዕቲነት ጉርሱሳ

(ማቴ. 10፣37-38)

   25. ማንጎ ሒያው ኢየሱስሊህ ኢንኮህ አድይ ይኒን፣ ኡሱከ ተናድ ኡፍኩና የህ ታህ አክየ፡፡ 26.ዩላል የሚተቲ ኡምቢህ አባከ ኢና፣ ኑማከ ባዻ፣ ሳዖልከልቲት፣ ኢሲ አሞህ ሂወት ኡካ ዮያኮ አጋናል ኪኅንቲያ የከምኮ ይተምሃራይ ያኮ ማዽዓ፡፡ 27. ኢሲ  ማስቃል ይይኩዔህ ያክቲለ ዋየቲ ይተምሃራይ ያኮ ማዽዓ፡፡ 28. ሲንኮ ኢንከቲ ሕንፃ ሢራሖ ጉራጉል፣ ሢራሕ አካህ ያፋፃሞ ማልኮ አይዽ ካጉርሱሳም ባሶል ዲፈህ ያኅሲበ፡፡ 29. መሠረት ይሥሪተህ ያፋፃሞ ታነም የከምኮ ለ ሠረቲል ራዔ ዲክ ታብለም ኡምቢህ ኤዸዽሰህ ያፈጻሞ ታነ ያናህ ኤድዋንሲታን፡፡ 30. ሃይከ ታይ ሒያውቲ ዲክ ሢራሖ ኤዸዽሰህ ባኮ ማዽዕና አይክ ኤል ያለገፂን። 31. ለል ታማና ሲሕ ወደተሀደርኮ ለ ኢንኪ ኑጉሥ ላማታና ሲሕ ወተሀደርኮ ይስክቲተህ ኤድያምተ አኪ ኑጉሥሊህ ያምዋጋኦ ጉራጉል፣ ባሶል ናዓብቶሊት ያምካላካሎ ዽዓም ማዺዓም ድፈህ ያምኪረ፡፡ 32. ዺዔዋም የከምኮ ለ ካሙዶ ያምተ ኑጉሥል ገና ዸዽል ያነሃኒህ ታይ ኑጉሡል ሳላም ፋሮይቲት ፋራህ ዋጋረ ኤሠራ፡፡ 33. ታማሃም ባሊህ ሲንኮ ለም ኡምቢህ ሓበዋ አኪናን ሒያውቲ ይተምሃራይ ያኮ ማዽዓ፡፡

አጥቂመ ዋይታ ሙልሑ

(ማቴ.5፣13፤ማር.9፣50)

  34. ካታሰህ ኢየሱስ ታህ የ፣ ሙልሑ መዔቲያ ኪኒ፣ ሙልሑ ኢሲ ዻዓሞ ሓብታጉል ለ አይም ዻዓም ተታሰማዖ ዽዒታ? 35. ታይ ዓይነቲህ ሙልሑ ማሕራስ ባዾህ ያኮይ ዱክዔህ ማታጥቅመጉል ቶህ የየዕኒህ ዒዳን; አማይጉል ታበ አይቲ ለቲ ያቦይ፡፡

ማዕራፋ15

ተለየህ ገይምተ ዒዶይታ

(ማቴ.18፣12-14)

  1. ግብረ ታግርዔምከ ኃጢአተናታት ኡምቢህ ካሚሂሮ ያቦና የከሄልኒህ ኢየሱስ ኡላል የመቲኒህ ዪኒን፡፡ 2. ፈሪሳውያንከ ሙሴ ሕጊህ መምሂራን ለ ታሃም ዩብልኒህ "ታይቲ ኃጢአት ለም ጋራ፣ ተንሊህ ኢንኮህ በታ"አይክ ኢየሱስ አሞል ዑጉምጉም ያናም ኤዸዽሰን፡፡ 3. አማይጉል ኢየሱስ ታይ ሚሲላቶ ታህ የህ አክ የዽሔ፡፡ 4."ሲንኮ ቦል ዒዶቲያ ለ ሒያውቲ ኢንኪ ኢዳ አክ ታለየጉል አይም  አባም ታካሊን? ቦልሳግላከ ሳጋል ጋራባድ ኃባህ ተለየቲያ ገያምፋናህ ዋጊዮህ ሚያዲየ? 5. ገያጉል ኒያታህ ዳጋክ ያይኩዔህ ባሃ፡፡ 6. ኢሲ ድክ ማዳጉል ኢሲ ካኃንቶልትከ ሑጋ ኢንኮህ ደዓህ ዮክ ተለየህ ቲነ ዕዶይታ ገህ ኒያተክ ኒያታ! አክያ፡፡'7. ንሲሓ ሳዎና ተን ጉርሱሰ ዋይታ ቦልሳግላከ ሳጋል መዔ ሒያውያኮ አጋናል፣ ንሲሓ ሳ ኢንኪ ኃጢአተይናህ ምክንያታል ማንግሥተ ሰማያል ታማም ባሊህ ኒያት ያከ ሲናክ አይክ አንዮ።   

ተለየህ ቲነምኮ ገይምተ ዋርቂ ላክዖ

  8. ኢየሱስ ካታሰህ ታህ የዽሔ፣"ታማና ወርቂ ላክዖ ለ ኢንኪ ኑማ ላክዖ አክታለየጉል አይም አብታም ታካሊኒ? ኢፎይታ ኢፍሳህ፣ ኢሲ ዓረ ፍይታህ ገይታምፋናህ ኡማንርከህ ዳባድ ፋሓርተህ ማዋጊታ? 9. ገይታጉል ኢሲ ካኃንቶልትከ ሑጋ ኢንኮህ ደዕታህ ዮክተ ተለየ ኢኒ ላክዖ ገህ ኒያተክ ኒያታ! አክ ታዽሔ፡፡ 10. ንሲሓ ሳየ ኢንኪ ኃጢአተናህ ምክንያታል ዓራንቲ መላክእቲል ታማሃም ባሊህ ኒያት  ያከ ሲናክ አይክ አኒዮ፡፡        

የለየህ ገይመ  ባዻ

   11  ካታሰህ ኢየሱስ ታሀ የ፣"ኢንኪ ሒያወቲ ዻይሎ ላማይ ሊይ ይነ፡፡ 12. ዒንዳቲ ኢሳባክ ኣባ! ኢሲ ሀብተኮ ኃዲላይ ካዶ ይጊደህ ይማዳም ዮሑይ አክየ፡፡ አማይጉል ካአባ ኢሲ ሀብተ ዻይሎ ላማህ ኃዲለ፡፡ 13. ዳጎ ለለዕኮ ላካል ዒንዳቲ ካጉፍተም የበኄከ ይልውጠህ ማል ይብዸህ ዸዽ ባዾ የደ፣ ታማይ ባዾል ማል ኡምቢህ ካንቶህ የይለየ፡፡ 14. ማል ሙሉኡክ ባከምኮ ላካል ታማይ ባዾል ኃይላ ለ ራሀብ ሳየጉል ፀገሚድ ራደ፡፡ 15. ሔልዋይኮ ኡገተሚህ ታማይ ባዾህ ሒያውኮ ኢንከቶድ ይጽግዔ፣ ሒያውቲ ሓሰማ ሎይና ካአበ፡፡ 16. አውኪ ለ ራሀብ ኤል ይብርትዔጉል ሓሰማ በታምኮ ጋርባ ያማጎ አትሚኒይ ይነ፣ ያከካህ አማም አካህ ታየም ኡካ ማገና፡፡ 17.ታማይ ዋክተ አውኪ ኢሲ ገጋ የዸገህ ታህ የህ ይሕሲበ፣ 'ያባህ ዲኪል ዓሰበህ ሎይመኒህ ኢንገራ በተኒህ ኤልኃባን፣ ኡኑ ለ ታል ሉዋህ ራቦ ኪዮ፡፡ 18. ኡጉተህ ኢናባ ዻጋህ አዳዎይ፣ አባ! ፉጎከ ኩንፊል ኢብድለህ አነ፡፡ 19. ካምቦኮ ሣራህ ኩባዻ ዮክ ዮና መዳ፣ ያከካህ ኢሲ ዓስበንቲትኮ ኢንከቶ ባሊህ ያብ አኮዋይ፡፡' 20. አማህ የህ ኡጉተህ ኢሳ አባ ዻጋህ የደ፡፡ ካ አባ ገና ዸዽዽል ያነሃኒህ አውካ ዩብለ፣ አካህ ናኅሩረህ ካኡላል የርደ፣ ይሕቁፍህ ፉጉተ፡፡ 21. ባዽ ለ አባ፣ ፉጎከ ኩነፊል ኢብዲለህ አነ፣ ካማቦኮ ሣራህ ኩባዻ ዮክ ዮና መዳ አክየ፡፡ 22. አባ ለ አገልገለቲ ደዔህ ታህ አክየ፣ ጋባላዓይ ሳራ ባሃይ ሃይሲሳ፣ ፈራድ ላክዖ፣ ኢባድ ካበላ አካህ ሃ፡፡ 23. ኩሉስ አዉር ባሃይኪ ኡርሑዳ፣ በኖይ፣ ኒያትኖይ፡፡ 24. አይሚህ ታይ ይባዺ ራበህ ይነ፣ ሃይከ ካዶ ሂወቲህ ያነ፣ የለየህ ዪነ፣ ገይመ፣ ኒያቶና ለ ኤዸዽሰን፡፡

  25. ታማይ ዋክተ ናባ ካሳዓል ሢራሓህ ማሕራስ ባዾህ ቱላል የውዔህ ዪነ፣ ጋኄህ የመተህ ዲክህ ካብየጉል ሙዚቃከ ጎይላት አንዻሕ ዮበ፡፡ 26. አገልገልቲኮ ኢንከቶ ደዔህ አይሚህ ጉዳይ ኪኒ? የህ ኤሠረ፡፡ 27. አገልጋሊ ኩሳዓል ጋኄህ የመተጉል ኪኒ፣ ኩአባ ናጋድ ጋኄጉል ኩሉስ አዉር አካህ ዩርኁደ አክየ፡፡ 

   28. ናባ ሳዓል ጋዳህ ይቁጡዔህ ድክህ ማሳ የ፣ አማይጉል አባ ኢሮህ የውዔህ ሳዎ ዻዒመ፡፡ 9. ባዽ ለ ኢሲ አባል ታህ የህ ኤልደሄየ፣ ሃይከ ታሂዾለ ኢጊዲት ኩኢስግልጊለ፣ ኢንኪጉል ኩፊቃድኮ ሑሙየህ ማዽገ፣ ኢስኪ አኑ ዶባሊህ ኤል ኒያታ ኢንኪ ሓን ዾዋይቶ ኡካ ዮህ ቶሖወህ ማታዽገ። 30. ታይ አውኪ ለ ኩሀብተ ዘማዎ ኪኒ ሳዮሊህ የይለየህ ጋሔጉል ኩሉስ አዉር አካህ ቱርሑደ፡፡ 31. ካአባ ለ ታህ አክየ፣ ኦ ይባዺ! አቱ ኡማንጉል ዮሊህ ኪቶ፣ ይምኪናም ኡምቢህ ኩም ኪኒ፡፡ 32. ታይ ኩሳዓል ለ ራበህ ይነ ካዶ ሂወቲህ ያነ፣ የለየህ ይነ፣ ካዶ ገይመ፣ አማይጉል ጋዳህ ኒያትኖ ኖህ ኤዳ፡፡"

ማዕራፋ 16

ብልኄ ኪኒ መጋቢ

   1. ጋባዔህ ኢየሱስ ኢሲ ተምሃሮክ ታህ አክየ፣ ኢንኪ ሀብታም ኪን ሒውቲ ዲክ አካህ ያስኄደረ መጋቢ ሊይ ይነ፣ ሒያው ታይ መጋቢ ኩንብረት ያይለየ የየኒህ ሀብታም ኪን ሒያውቶክ የን፡፡  2. ሀብታም ኪን ሒያውቲ ለ መጋቢ ደዔህ ታይ ኮድ አብክ አነ ጉዳይ አይም ኪኒ? ካምቦኮ ላካል ይመጋቢ ታኮ ማዽዕታጉል መጋቢ ተከህ ኤልሢራሕተ ኒብረት ሒሳብ ካብ ዮኢስ አክየ። 3. መጋቢ ኢሲ አፍዓዶድ ታህ የህ ይሕሲበ፣ አማይጉል ይማዳሪ መጋብነት ሢራሕኮ ይያይሳናባቶ ኪኒ፣ ታጉል አይም አባዶ ዮህ አይስ ዪነ? ማሕራስ ያከዶ ማዽዓ፣ ዻዒምቶ ይኆላሳ፡፡ 4. ሱግ፣ አባም ኤዸገ፣ መጋብነት ሢራሕኮ አምሰነበተጉል ይጋራይታ ካኃንቶሊት ያናዎና አበልዮ፡፡ 

   5."አማይጉል ማዳሪ ዒዳባዕል ኡምቢህ ትቲያህ ደዔህ፣ ኤዸዾይታቲያክ ማዳራህ ታክፍለ ዒዳኮ አይዻ ሊቶ? የህ ካኤሠረ፡፡ 6. ኡሱክ ቦል ማድገቲያ ዘይትኮ ዒዳህ ሊዮ አክየ፡፡ መጋቢ ታሃም ኢምዝጊብ፣ ዸህ ዲፈይ ኮንቶም ማድጋቲያ ተህ ኢጽሒፍ አክየ፡፡ 7. ማላማ ለ ደዔህ ኩዒዳ አይዻ ኪን? አክየ። ኡሱክ ቦል ጊርቦቲያ ሲራይኮ ዒዳህ ሊዮ የህ ኤል ይምልሰ፡፡ መጋቢ ታሃም ኢምዝጊባይ! ቦሖርቶሞን ጊርቦቲያ ኤዸኃይ ኢጽሒፍ አክየ፡፡ 8. ሀብታም ኪን ሒያውቶ ኢምነት ይስጉዱለ መጋቢህ ብልኃት ካይይድንቀ፣ ታሃም ፉጊ ሒያውኮ አጋናል ዓለም ሒያው ዓለማዊ ናብራህ ብልኄት ኪኖኑም ያይቡለወ፡፡"

ማል ኤዳማድ  አሲሶና ኤዳም

   9. ካታሰህ ኢየሱስ ታህ የ፣ አማይጉል ታይ ዓለሚል ሀብተ ለ ካኃንቶሊት አቢታ ስናካይከ አንዮ፣ ታሃም አብታንጉል ማል ስናክ ባክተህ ፎያ ኪን ጋባሊህ ራዕታንጉል ሲን ካኃንቶሊት ኡማን ጉሉህ ኤድ ማራን ድኪድ ሲናህ ጋራሰሎን፡፡ 10. ዒንዻ ጉዳህ ኡሙን የከ ሒያውቲ ናባ ጉዳህ ለ ያምኢምነቲያ ያከ፣ ዳጎ ጉዳህ አምኢምነዋ ሒያውቲ ማንጎጉዳህ ለ ምያምኢሚነ፡፡ 11. ኢስኪ ዓለም ሀብተ ያስኃዳዳሮና አምኢሚነዋ ማራ የኪኒምኮ፣ ሓቂ ሀብተ ኢይ የመነህ አካህ ያኃየ? 12. ለል አኪማሪህ ሀብተህ አምኢሚነዋይታም ተኪኒምኮ፣ ሲናህ ያከ ሀብተ ኢዪ ሲናህ ያኃየ? 

  13. ኢንኪ ሒያወቲ ኢንኪጉል ላማ ማዳራ ያስጋልጋሎ ማዽዓ፣ ታሃም የከምኮ ቲያ ያንዒበ አከቶ ያክኅነ፣ ቲያ ያስክበረ ቲያ ዻይታ፣ አማምባሊህ ማላህ ያምጊዚኤ ሒያውቲ መዔፉጊህ አገልጋሊ ያኮ ኢንኪጉል ማዽዓ፡፡ 

  14. ፈሪሳውያን ማል ካሓንቶሊት ኪይኒንጉል ኢየሱስ ዋንሲተም ኡምቢህ ዮብኒህ ኤል የይለገፂን፡፡ 15. ኡሱክ ለ ታህ አክየ፣"አቲን ሲነ ሒያውህ ነፊል ጻድቃናህ ታይምጊዲን፣ ፉጊ ለ ሲን አፍዓዶ ያዽገ፣ አይሚህ ሒያው ነፊል ይክብረቲያህ ይምግደህ ያምቡሉወቲ ኡምቢህ፣ መዔፉጊህ ነፊል የምወረደቲያከ ዻይትመቲያ ኪኒ፡፡"             

                                   ሙሴ ሕገከ ኃዳር ዳዓባል

(ማቴ.11፣12-13፤ 5፣31-32፤ማር.10፣11-12)

 16. ኢየሱስ ኢሲ ዋኒ ካታሳክ ታህ የ፣"ሙሴ ሕገከ ነብያት ማጻሕፍት አይከ ያይጥመቀ ያሃኒስ ፋናህ ዋንሲታክ ሱገኒህ ይኒን፣ ታሃምኮ ታህ ዋንሲታናም ፉጊ ማንግሥቲህ በሠራታ ቃል ኪኒ፣ አኪናን ሒያውቲ ታማይ ማንግሥቲል ሳዎ ኃይላለ ፃዕረ አባ፡፡ 17. ያኮይ ኢካህ ሕገኮ ኢንኪ ነጥብ ኡካ ያለየምኮ አጋናል ዓራንከ ባዾ ቲላይቶ ቅልላ። 

  18. ኑማ ይፍቲሔህ አኪ ኑማ ኦርብሳቲ ኡምቢህ ያመንዚረ፣ ታማምባሊህ ኢሲ ባዕላኮ ትምፍትሔ ኑማ ኦርብሳቲይ ያምንዚረ።"

ሀብታም ኪን ሒያውቶከ ድካ ኪን አልአዛር

  19. ጋባዔህ  ኢየሱስ ታህ የ፣ ዓሣ ከፈይከ ሲሲሕ ሣራ ሀይስታ ኢንኪ ሒያውቲ ዪነ፣ ኡሱክ ኢሲሲ ለለዕ ደሎትከ ኒያት አባክ ቅብቶቱህ ማራይ ዪነ፡፡ 20. ሙሉእ አካል ብዮኩህ አክ አልፈ አልዓዛር አክያን ኢንኪ ዲካ ለል፣ ሀብታም ኪን ሒያውቲህ ድክክ ኢፈዪል ዽነህ ይነ፡፡ 21. ታይ ዲካ ሀብታምኮ ራዳ ርፍራፍ ያማጋቦ አትምኒይ ዪነ፣ ካርዋ ታሚተህ ብዮክ አክሙዹዓይ ቲነ፡፡ 

  22."ታሃምኮ ላካል ዲካ ኪን ሒያውቲ ራበህ መላእክት አብራሃም ባሮል በን፣ ታማምባሊህ ሀብታም ኪን ሒያውቲ ራበህ ይሙዑገ፡፡ 23. ሲኦሉድ ሢቃያድ ያነሃኒህ፣ ሪጋየ ዋክተ አብራሃም ባሮል ዪነ አልዓዛር ዸዽርከኮ ዩብለ፡፡ 24. አንዻህ ዋዕሰህ ታህ የ፣ 'አብራሃም አባ! ያዓሳያ ዮህ ኢርኅርኅ፣ ታል ጊራ ታዳል ኃይላህ አምሠቀይክ አነጉል ፈራት ኤዸዻህ ያራብ ዮህ ያይታርካሶክ አልዓዛር ዮህ ፋር፡፡' 25."አብራሃም ለ ታህ አክየ፣ ይባዺ! አቱ ባዾ ሂወቲህ ዳባን ማንጎ መዔ ጉዳይ ገይተህ ኒያተም ኢዝኪር፣ አልዓዛር ለ ሔልዋይ አሞል ይነ፣ አማይጉል ካዶ ኡሱክ ታል ኒያታህ አቱ አምሠቀይክ ታነ፡፡

  26. ታሃሚህ አሞል ኖከ ሲኒህ ፋናድ ናባ ቦል ያነ፣ ታጉል ኖኮ ሲኑላል፣ ሲንኮ ኑላል ታቦ ዽዓቲ ኢንከቲይ ሚያነ፡፡ 27. ሀብታም ታህ አክየ፣ ኦ'ያባ! አማይጉል ያዓሳያ አልዓዛር ያባህ ዲክህ ኡላል ፋር፣ 28. ታማል ኮና ሳዓል ሊዮጉል፣ ኢሲን ለ ታይ ሲቃዪህ ቦታል ያምቲኒክ የደህ አልዓዛር ተን ሰሊሶይ፡፡       

   29."አብራሃም ለ ተናህ ሙሴከ ነብያት ማጻሒፍት አካህ ታነ፣ ተና ያቦናይ አክየ፡፡ 30. ሀብታም ኪን ሒያውቲ አብራሃም አባ! ታሃም ማዽዕታ፣ አይሚህ ኢንኪ ሒያውቲ ራባኮ ኡጉተህ የደህ አክያጉል የነሰሒኒህ ኒሲሓ ሳየ ሎን፡፡ 31. አብራሃም ለ ሙሴከ ነብያት ማጻሒፍት ያናም አበዋየኒምኮማ፣ ኢንኪ ሒያውቲ ራባኮ ኡጉተህ አክየሚህ ሚያሚኒን" አክየ፡፡

ማዕራፋ 17

ዕንቅፋት፣ ኅደጎት፣ ኢምነት ዳዓባል

(ማቴ. 18፣6-7፤21-22፤ ማር. 9፣42)

  1. ኢየሱስ ኢሲ ተምሃሮክ ታህ አክየ፣ ሒያው የይሰነከለህ ኃጢአታድ ዒዳ ጉዳይ አምተካህ ኢንኪጉል ማራዓ፣ ያኮይ ኢካህ ኃጢአት አምሳናካል ባሃቲ ኢሰህ ኢየ ዋዎይ! 2. ኢንኪ ሒያውቲ ታይ ዒንዳነይቲትኮ ኢንከቶ የይሰነከለህ ኃጢአት አብሲሳምኮ፣ ናባ ማዽሓን ዶንጎላ፣ ፊላክ አክ ዩዹውኒህ ባርሕሪ አዳድ ራዳም አክታይሰም ኪኒ፡፡ 3.አማይጉል ሲኒ አሞህ ሰሊታ፣ ኩሳዓል ኩያብደለጉል ካ እግኒሕ፣ ኢሲ በደሊህ የነሰሔምኮ ኤልኃብ፡፡ 4. ለለዕል ማልሕናጉል ኩይብዲለህከ ለለዒል ማልሕና ዋክተ ለ ኮድ አምቲክ ኢኒ በደሊህ ኤነሰሔህ አነ የምኮ በሕላ አካህ ኤይ፡፡"

   5. ሐዋርያት ለ ማደራ ኢየሱሱክ"ያዓሳያ ኢምነት ኤድኖኦስ አክየን፡፡ 6. ማዳሪ ኢየሱስ"ሰናፍጽ ኢዻ ያከ ኢምነት ተልኒምኮ፣ ታይ ካዶይታ ኃዻክ ታርከኮ ኡጉታይ ባሕራክ አዳድ እምትኪል! አክ ታንጉል ሲናህ አምኢዚዘ ለ አክየ፡፡

አገልጋሊ ግዳድ

  7. ኢየሱስ ካታሰህ ታህ የ፣"ሲንኮ ኢንከቲ ግብርና ማሕራሳህ ኢፋረቲያ ያኮይ ዒዶ ሎይኒ ይኔምኮ፣ ዓስበንቲ ሢራሕኮ ጋሓ ዋዕደ አሞ ዲፈያይ ኢሲ ዲራር በት አከያ? 8.ናቢህ ኤረ ይድራር ዮህ ኦ'ይሶኖዶይ፣ በተህ አዑበም ፋናህ ሶላይ ይስግልጊል፣ ታማሚህ ላካል አቱ ለ አምግበሊቶ አክሚያ? 9. ኢስኪ አገልጋሊ ይምኢዚዘህ ይፍጽመርከህ ማዳሪ ካ'ያምስጊነም ታካሊኒ? 10. አቲን ለ ታማም ባሊህ ትምኢዝዚ ኒም ሙሉኡድ ትፍፅምኒሚህ ላካል፣ አርብኄዋይታም ኪኖ፣ ኒፍጽመም ንኒጊዳድ ጥራሕ  ኪን  አዸሓ፡፡"       

ኢየሱስ ታማና  ለምፃም ኡሩሰ

  11. ኢየሱስ ኢየሩሳለም አድህ ሰማርያከ ገሊላ ፋናኮ ቲላይ ይነ፡፡ 12. ኢንኪ መንደርል ሳየ ዋክተ ታማና ለምፃም ካኡላል የመትኒህ ዸዽል ሶለን፡፡  13. ሲኒ አንዻሕ ናው ኢሰኒህ"ኢየሱሶ! መምሂሮ! ያዓሳያ ኖህ ናኅሩር"አይክ ዋዕየነ፡፡ 

  14. ኢየሱስ ዩብለህ "አዱዋይ ሲኒ ሰውነት ካህናት ኢስቡሉዋ"አክየ፡፡ ኢሲን አድይ ያንሃኒህ ሲኒ ላምፅኮ ይንፅኂን፡፡ 15. ተንኮ ኢንከቲ ላምፀኮ ይንፅኄም ዩብለጉል ናባ ድምፀህ ፉጎ አይምስግኒክ ጋሔ፡፡ 16. ኢየሱሱክ ለ አይምስጊኒክ ኢቢ ዳባል ዳምባራህ ጋሚመ፣ ኡሱክ ሳማሪያ ሒያውቶ ኪይይ ይነ፡፡ 17. ኢየሱስ ለ ታህ አክየ፣ ላምፀኮ ቲንፂኄም ታማና ሒያውቶ ኪይይ ማናዎንሆ? ኢቦል ሳጋል አል ያነ? 18 .መዔፉጎ ያይማስጋኖ ጋሔህ የመተቲ ታይ ባዕደ ኪን ሒያውቶኮ በሒህ አኪ ማሪ ሚያነ?"19. ታሃምኮ ላካል ኢየሱስ ታማይ ሒያውቶክ" ኡጉታይ አዱይ፣ ኩኢምነት ኩይድኅነክ" አክየ፡፡  

መዔፉጊህ  ማንግሥቲህ ሙሙት

    20. ፈርሳውያን ኢየሱስ"ፉጊ ማንግሥት አንዳ አምተለ?"የኒህ ካኤሠረን፣ ኡሱክ ታህ የህ ኤልደሄየ፣"መዔፉጊህ ማንግሥት ታሚተም ሒያው አካህ ኢላልታ ዓይነቲህ ማኪ፡፡ 21. ታማምባሊህ 'ሀይከ ታል ኪኒ ቶል ኪኒ' አክያንቲያ ማኪ፣ አይሚህ ፉጊ ማንግሥት ሲን ፋናድ ከንጉል ኪኒ፡፡"

  22. ካታየሀ ኢየሱስ ኢሲ ተምሃሮክ ታህ አክየ፣ ሒያውቲ ባዺህ ለለዓኮ ኢንከቶ ኡካ አይሚህ ኑብለህ ናክዶ ታዽኅን ለለዕ አምተለ፣ ያከካህ ማታብሊን፡፡ 23. ሒያው ሀይከ ክርስቶስ ታል ኪኒ! ወይ ቶል ኪኒ! ሲናክ ኢየሎን፣ ያኮይ ኢካህ ሲናክ ያናም ማማኒና፣ ተን ማካታሊና፡፡ 24. ሓንካዽ ዓራናል ሓንካዻጉል ዳራትኮ ዳራታል ኢፎሳም ባሊህ ሒያውቲ ባዽ ያሚተ ለለዕ ታማሃም ባሊህ ያከ። 25. ያከካህ ሒያውቲ ባዽ ዮኮመህ ማንጎ መከራ ጋራዎ፣ ታይ ዳባኒ ሒያዋህ ዻይትሞከ ያምናቃፎ ጊደ ኪኒ፡፡ 26. ኖኅት ዳባን ተከም ባሊህ ሒያውቲ ባዽ ያምተ ዋክተ ታማም ባሊህ ያከ፡፡ 27.ኖኅ መርከብድ ሳ ለለዕ ፋናህ ሒያው በታከ አዑብክ፣ ቲታ ኡርብሳክ ዪኒን፣ ታማይ ዋክተ ልዪ ላየ ተመተህ ትልቅልቀህ ኡምቢህ ተይለየ። 28. አማም ባሊህ ለ ሎጥት ዳባን ታማይ ዓይነት የከ፣ ታማይ ዋክተ ሒያው በታከ አዑብክ፣ አብሕከ ዻማክ፣ ታክል አትክልከ ዲካ ሢራሓክ ዪኒን፡፡ 29.ያከካህ  ለ ሎጥ ሰዶምኮ የውዔ ለለዕ ጊራከ ዲን ዓራንኮ ኃዽተህ ኡማኒም የይለየ፡፡ 30. ሒያውቲ ባዽ ያምቡሉወ ለለዕ ታማም ባሊህ አከለ፡፡ 

  31. ታማይ ለለዕ ዓሪ ናሕሳክ ያነ ሒያውቲ ዓረድ ያነ ኑዋይቲ በዮ ኦበ ዋዎይ፣ ማሕራስ ቦታል ያነ ሒያውቲ ኢስድኪህ ጋኄ ዋዎይ፡፡ 32. ሎጥቲ ኑማ ኢዝክራ፡፡ 33. ኢሲ ሂወት ያይዳኃኖ ጉራቲ ኡምቢህ ዋ፣ ኢሲ ሮሔ ቲላሰህ ያሓየ ቲይ ኡምቢህ ያድኅነ፡፡ 34. ታማይ ባር ላማ ሒያውቲ ኢንኪ ዓራታክ ዽነሎን፣ ቲይ ያዲየ፣ ቲይ ራዓዔ ለ ሲናክ አይክ አኒዮ፡፡ 35. አጋቢ ላማይ ኢንኪ ቦታል ኢንኮህ አዽኂነ ሎን፣ ቲያ በያን ማላማ ራዕታ፡፡ [36. ላማ ሒያውቲ ኢንኪ ማሕራስ ቦታል ሢራሔ ሎን፣ ቲዪ ያዴ ማላሚ ራዓ፡፡]    

  37. ካተምሃሮ ኢየሱሱክ"ኦ'ማዳራ! አርከ ኪኒ በያናም"የኒህ ካኤሠረን። ኡሱክ "ባድኒ ኤል ያነል ሳቢ ጉማ ኤልታከሄል"የህ ኤልይምልሰ።  

ማዕራፋ 18

ዲካ ኪን ማምኖከ ዓማጸይና ኪን ዳኒያ

   1. ታሃምኮ ሳራህ ኢየሱስ ሀኬት ማለህ ኡማንጉል ጻሎት አቦና ኤዳም ያይማሃሮ ታይ ሚሳለ አክየ፡፡"2. ኢንኪ ካታማል ፉጎ ማይስተዋ፣ ሚናዳም ለ ሖላይስተዋ ኢንኪ ዳኒያ ዪነ፡፡ 3. ኢንኪ ማሚኖ ታማይ ካታማል ማራይ ቲነ፣ ኢስ ዳንያል አምትክ ፊርደ ዮሑይ አካይ ቲነ፡፡ 4. ኡሱክ ፊርደ አካህ አኃየካህ ማንጎ ዋክተ ሱገ፣ ላካል ለ ታህ የህ ይሕሲበ፣ ኢንኪጉል ኡካ መዔፉጎ ማይስተ ዋየሚህ፣ ሚናዳም ለ ሖላስተ ዋየሚህ፣ 5.ታይ ማሚኖ ይትጽቅጽቀጉል አካህ አፍርደ ሊዮ፡፡ አማም አከዋይተምኮ ኡማንጉል ጋኃንጋኃክ ይአይሰልኬ ለ፡፡"

   6. ጋባዔህ ኢየሱስ ታህ የ፣"ዓማጸይና ዳኒያ ዋንስተም ኢስትውዒላ፣ 7. መዔፉጊ ኢስኪ ለለዕከ ባር ደራክ ካዻዒማ ሂዝበህ አካህ ሚያፍርደ? ዒሲስታህ ጉሮን አክዓያሳ? 8. ዓያየካህ ዸህ አካህ ያፍርደ ሲናክ አይክ አኒዮ፡፡ ያከካህ ሒያውቲ ባዽ ያምተ ዋክተ ባዾት ታዳል ኢምነት ገዮ ያከ?  

ትዕቢተና ፈሪሳውከ ቱሑት ቀራጺ

   9.  ካታየህ ኢየሱስ ጻድቃን ኪኖ አይክ ታምኪኄምከ አኪማራ ዻይታ ሒያዋህ ታይ ሚሲላ ዋንሲተ፡፡ 10. ላማ ሒያውቲ ጻሎት አቦና በተ መቅደስ ዓረህ የደይይን፣ ቲይ ፈሪሳዊ ማላም ቀራጺ ኪይይ ዪንን፡፡

   11. ፈሪሳዊ ሶለህ ታይ የህ ኢሲ አፍዓዶድ ጻሎት አበ፣ 'መዓፉጎ! አኑ አኪ ሒያው ባሊህ ዛራፊ፣ ዓማጺ፣ አመንዝራ፣ አከ ዋየርክህ ኩአይምስግኒክ አንዮ፣ ባዽሳህ ታይ ቀራጺባሊህ አከ ዋርከህ ኩአይምስግኒክ አነ፡፡ 12. አኑ ለግዲናል ላማጉል አጾመ፣ ገያምኮ ኡምቢህ አሥራት አየዕክ አሓየ፡፡ 

  13."ቀራጺ ለ ዸዽል ሶለህ፣ ሪጋየህ ዓራን ያዳላላዖ ኡካ ማድፋሪና፣ ያከካህ ጋባህ ኢሲ አፍዓዶ ሳባዓክ 'ኦ'አምላኮ! ዮያ ኃጢአተይና ይምኅር!' አይ ዪነ፡፡ 14. ጽድቀ ገየህ ኢሲ ድኪህ ጋሔ ቲይ ታይ ቀራጺ ኪኒ ኢካህ ፈሪሳዊ ማኪ ሲናክ አይክ አኒዮ፡፡ አይሚህ ኢሳሞ ናውሳቲ ላታ ያ፣ ኢሲ አሞ  ላትሳቲ ለ ናው ያ፡፡"

ኢየሱስ ሕፃናት የበረከ

  15. ኢየሱስ ተን ያዳህሳሶ ሒያው ሕፃናት ካያ ዻጋህ ባሄን፣ ካተምሃሮ ለ ታሃም ዩብሊንጉል ሒያዋል ኤል ይቁጡዔን፡፡ 16. ኢየሱስ ለ ሕፃናት ኢሱላል ደዔህ ታህ አክየ፣"መዔፉጊህ ማንግሥት ታግዲን ማራህ ኪኒጉል ሕፃናት ዩላል ያማቶናይ፣ ተን ማደሲና፡፡ 17. ሓቀ ሲናክ አይክ አነ፣ መዔፉጊህ ማንግሥት ሕፃን ባሊህ ጋርሄል ጋራየ ዋ ሒያውቲ ኢንኪጉል ኤድማሳ፡፡    

ሀብተ ለ ሒያውቲህ ኤሠሮ

(ማቴ. 19፣16-30፤ማር.10፣17-31)

  18. አይሁድ አኅሉቅኮ ኢንከቲ ኢየሱሱክ፣"መዔ መምሂሮ! ኡማንጉሊ ሂወት ገዮ አይም አቦ ዮህ ኤዳ!"የህ ካኤሠረ፡፡ 19. ኢየሱስ ለ ታህ የህ ኤልደሄየ፣ አይሚህ መዔቲያ ዮካይክ ታነ? ኢንኪ መዔፉጎኮ በሕህ ኢንከቲ መዔቲ ሚያነ። 20. ካቲኢዛዛት ታዽገ፣ ኢሲን 'ማማንዛሪን፣ ማግዳፊን፣ ማጋርዕቲን፣ ዲራባህ ማማስካሪን፣ አባከ ኢና ኢስክቢር' አክ ያናም ኪኖን፡፡ 21. ሒያውቲ"ታይ ቲኢዛዛትማ ኢኒ ዒንዻነኮ ኤዸዽሰህ ዻዉዸህ አንዮ"አክየ፡፡ 

  22.ኢየሱስ ታሃም ዮበ ዋከተ ሒያውቶክ ታህ አክየ፣"አማይጉል ገናህ ኢንኪ ጉዳይ አብታያ ኮክራዔ፣ ሊቶም ኡምቢህ ኢቢሓይ፣ ማል ዲካህ ኡሑይ፣ ማንግሥተ ሰማያል ሀብቲ መዝገብ ገየሊቶ፣ ታሃምኮ ላካል አሞአይ ዮድካታይ፡፡ 23. ሒያወቲ ለል ጋዳህ ሀብታም ኪይይ ይነጉል ታሃም ዮበ ዋክተ ጋዳህ ይኅዚነ፡፡ 24. ኢየሱስ ሒያውቲ ይኅዚነም ዩብለጉል ታህ የ፣ ሀብታማት መዔፉጊህ ማንግሥቲል ሳዎና አይዻ ጸገም ኪኒ! 25. ኤረ ሀብተ ለ ሒያውቲ ፉጊ ማንግሥቲል ሳአምኮ አጋናል ጋሊ ኢብራት ኢንቲኮ ቲላዎ ሲሲካ፡፡ 26. ታሃም ቶበ"ሒያው ይቦል ታይ ዒለህ ኢያ ኪኒ ታድኃኖ ዽዕታም?"የን፡፡ 27. ኢየሱስ ለ"ሒያዋህ ዽዕመዋ ጉዳይ፣ መዕፉጎህ ዽዕማ"አክየ፡፡ 28. ጰጥሮስ ለ "ሀይክ ናኑ ሊኖም ኡምቢህ ኃብነህ ኩንክቲለ"አክየ፡፡

  29. ኢየሱስ ለ ታህ አክየ፣"ሓቀ ሲናክ አይክ አንዮ መዔፉጊህ ማንግሥቲ ዮዋ ኢሲ ዲክ፣ ኢሲ ዓሪባዕላ፣ ኢሲ ሳዖል፣ ኢሲ ዻልቶይት፣ ኢሲ ዻይሎ ሓባ ሒያውቲ ታይሰም ገያ፡፡ 30. ሀይከ ካዶ ታይ ዓለምኮ ማንጎ ዒጽፈ ጋራ፣ ያምተ ዓለሚል ኡማንጉሊ ሒወት ገያ ማለት ኪኒ፡፡"

ኢየሱስ ኢሲ ራቢህ ዳዓባል አዶሓ ዋክተ ዋንሲተ

(ማቴ. 20፣7-19፤ ማር. 10፣32-34)

  31. ኢየሱስ ላማምከ ታማን ኢሱላል ካብሰህ ታህ አክየ፣"ሀይክ ኢየሩሳለም ናዳዎ ኪኖ ሒያውቲ ባዽህ ዳዓባል ነብያታህ ትምጽሕፈም ኡምቢህ ታማል አምፍጽመ ለ፡፡ 32. ካያ አረማውያናህ ቲላሰኒህ አሓየ ሎን፣ ኢሲን ኤል አይለገጸሎን፣ አካህ ዋቲመሎን፣ ቱፍ ኤል ኢየሎን፡፡ 33. ሳባዔኒሚህ ላካል አግዲፈሎን፣ ያከካህ ማዳሕ ለለዕ ራባኮ ኡጉተ ለ፡፡" 

  34. ካተምሃሮ ለ ታሃም ኡምቢህያህ ጉዳይኮ ኢንኪም ማምራዳኢኖን፣ ዋኒ ሚሥጢር አክ ይምስዊረህ ይነጉል አይሚህ ኪናም ማዻጊኖን፡፡

ኢየሱስ ኢያርኮል ኢንኪ ኢንቲማሊ ኡሩሰ

(ማቴ. 20፣29-34፤ ማር. 10፣46-52)

  35. ኢየሱስ ኢያርኮህ ካብየጉል ኢንኪ ኢንቲማሊ ምጽዋት ዻዒማክ አራሕ ዳራታል ዲፈህ ዪነ፡፡ 36. ባሮኮ አክትላታ ማንጎ ሒያዊህ አንዻሕ ዮበ ዋክተ ኢንቲማሊ"ታሃም አይም ኪኒ?" የህ ኤሠረ፡፡ 

  37. ሒያው"ሀይከ ናዝሬት ኢየሱስ ታርከኮ ቲላይ ያነ የኒህ"አክ የዽኅን፡፡              38. ታማይ ዋክተ ኢንትማሊ"ዳዊት ባዻ ኢየሱሶ! ያዓሳያ! ይምሒር"አይክ ዋዕ የ፡፡

 39. ባሶድ ነፍ ነፊል አይድክ ቲነ ሒያው"ቲበይ! የኒህ ካ ይግንሒን፡፡ ኡሱክ ለ አንዻሕ ኦሰህ ናውሰህ ዳዊት ባዻ! ያዓሳያ ዮህ ኢርኅርኅ! አይ ዪነ፡፡         

  40. አማይጉል ኢየሱስ ሶለህ ዩላል ባሃ! የህ ይኢዚዘ፡፡ ዑዉር ካኡላል የመተ ዋክተ፣ ኢየሱስ ታህ የህ ካኤሠረ፡፡ 41."አይም ኮህ አቦ ጉርታ? "ዑዉር ለ ይማዳራ! አብሎ ጉራክ አነ" አክየ፡፡ 

  42. ኢየሱስ ለ"ኡቡል! ኩኢምነት ኩኡሩሰ" አከየ፡፡           

 43. ኢንቲማሊ አማይጉልካህ ያብሎ ዺዔ፣ ፉጎ አይምስግኒክ ኢየሱስ ያክትልኒም ኤዸዽሰ፣ ህዝቢ ሙሉኡክ ታሃም ዩብልንጉል መዔፉጎ ይምስጊኒን፡፡ 

ማዕራፋ 19

ኢየሱስከ ዘኬዎስ

  1. ኢየሱስ ኢሳራሕ አቅጽልክ ኢያርኮ ካታማል ሳየ፣ ካታማ ፋንኮ ትላየህ የደ፡፡ 2. ታማል ዘኬዎስ አክያን ሒያውቲ ዪነ፣ ኡሱክ ቀረጽቲ አሞባዕላከ ሀብታም ኪን ሒያውቶ ኪይይ ዪነ፡፡ 3. ኡሱክ ኢየሱስ አይቲያ ኪናም ያብሎ ጉራይ ይነ፣ ያከካህ ኡዹዽቲያ ኪይ ይነጉል ሂዝቢ ማንጋኮ ኡጉተሚህ ያብሎ ማዽዒና፡፡ 4. ኢየሱስ ታማርከኮ ቲላይ ያነሃኒህ ዘኬዎስ ኢየሱስ ያብሎ የህ ህዝበክ ባሶድ ዮኮመህ ኢንኪ ካዶይታ ሓዻክ አሞክ የውዔ፡፡ 5. ኢየሱስ ለ ቦታ ማደጉል ሪጋየህ የይደለለዔህ "ዘኬዎሶ! ካፋ ኩድኪድ አሶ ዮህ ኤዳክ ጋባላዓይ ሓዻኮ ኡብ"አክየ፡፡ 6. ዘኬዎስ ጋባላዔህ ኦበህ ኒያታህ ኢየሱስ ኢሲ ድኪድ ጋራየ። 7. ታሃም ቱብለ ሒያው ኡምቢህ "ታይ ሒያውቲ ኃጢአተይና ድኪድ ይምዕዲመህ ሳየ!"የኒህ ኢየሱስ አሞል ይግሩምሩሚን፡፡ 

  8. ዘኬዎስ ለ ሶለህ ማዳራ ኢየሱሱክ ታህ አክየ፣"ይማዳራ ኢየሱሶ! ሀይከ ኢኒ ሀብተኮ ሙሉእ አብዻ ድካታታህ አኄሊዮ፣ ኤይተለለህ ሒያውኮ በየ ማል ይኔምኮ  አፋራ ዒፅፈ አበህ ደሄልዮ፡፡"9. ኢየሱስ ለ ታህ አክየ፣ ታይ ሒያውቲ ለ አብራሃም ዳራ ኪኒጉል ካፋ ድኅነት ታይ ዲክህ የከ፣ 10. አይሚህ ሒያውቲ ባዽ የለየቲያ ዋጊዮከ ያይዳኃኖ የመተ፡፡

ታማና አገልገልቲህ ሚሳለ

(ማቴ. 25፣14-30)

   11. ሒያው ታሃም አቢይ ያኒኒሃኒህ ኢየሱስ ኢንኪ ሚሲላይቶ ለል አክየ፣ አይሚህ ኡሱክ ኢየሩሳለሚል ካብየጉል ሒያው መዔፉጊህ ማንግሥት ጉልከጉሉህ ታምግልፀም የከልኒህ ዪኒን፡፡ 12. አማይጉል ኢየሱስ ታህ አክየ፣ ኑጉሥ ሢልጣን ጋራየህ ጋሖ ዸዽ ባዾ የደ ኢንኪ ኩቡር ኪን ሒያውቲ ይነ፡፡ 13. ኡሱክ ያዴሚህ ባሶል አገልገልቲኮ አዶሕ ደዔህ ትቲያህ ቦቦል ቁርስያ ዮኆወህ ጋሐምፋናህ ታይ ማላህ ኢንጊዳ አክየ፡፡ 14. ባዾ ሒያው ለ ካንዒቢይ ይንንጉል ታይ ሒያውቲ ናሞል ያንጋሶ ማጉርና የኒህ ኡሱክ የደሚህ ላካል ፋሮይቲት ኤደፋረን፡፡ 

   15. ታማይ ሒያውቲ ንጉሥ የከህ የመተ ዋክተ አካህ ዮምሖወ ማላህ ይንግድኒህ አይዻ ራዕሰኒም ያዻጎ አገልገልቲህ ደዕሲሰ፡፡ 16. ኤዸዾይታት አገልጋ ካብ የህ ይማዳራ! ዮህ ቶሖወ ማላህ ኢንግደህ ሃይከ ታማና ዒጽፈ ኢንግደህ አነ፣ አክየ፡፡     17. ማዳሪ አቱ ኡሙን የከ ጊለዋይቶ! መዔም አብተ! ዳጎ ጉዳህ ኡሙን ተከም ኢዻህ አኑ ለ ታማና ካታማህ አሞል ኩረዲሰህ አነ አክየ፡፡ 18. ማላምት አገልጋሊ ካብ የህ ይማደራ! ዮህ ቶሖወ ማላህ ኢንጊደህ ሀይከ ኮና ዒጽፈ ራዕሰህ አንዮ አክየ፡፡  19. ማደሪ! ኮያለ  ኮና ካታማህ አሞል ኩረዲሰህ አነ አክየ፡፡ 

  20"አኪ አገልጋሊ ታህ የ፣ ማደራ! ዮህ ቶሖወ ማል ሃይከና፣ ኃላጋህ ኢጥቅልለህ ኡዹወህ ዲፈሰህ አንዮ፡፡ 21. አይሚህ አቱ ድፈሰዋይተምከ ኩም አከዋይታም በያቲያ ኪቶ፣ አድሬ ዋይተም ያሰከሄለቲያ፣ ጸካን ኪን ሒያውቶ ኪቶም ኩ ኤዸገጉል ማይሲተህ ኪዮ፡፡ 22. ማዳሪ ታህ አክየ፣ ኮ ኡማ አገልጋሊ! ኩዋኒህ ኩአፍሪደ ሊዮ፣ አኑ ዪም አከዋይታም በያቲያ አድሬዋየም ያስከሄለቲያ ፀካን ኪን ሒያውቶ ኪዮም አዽገ ተህ ማታነ? 23. ኢስኪ ይማል ትርፈ ኤደ ገይስሳ ባንካድ አይሚህ ዲፈሰዋይተም? አኑ ጋኃጉል ኢሲ ትርፈሊህ በየ ዻዸ፡፡ 24. ታሃምኮ ላካል ማዳሪ ታማል ሶልተህ ትነሚክ ታይ ሒያውቲህ ማል በአይ ታማናጉል ዒጽፈ ራዕሰ አገልጋሊህ ኡሑዋ አክየ። 25.ኢሲን ማዳራክ! ኡሱክ ኡኮ ታማና ዋክተህ ዒጽፈ ቲርፈህ ማልኮ ለ አክየን፡፡ 26.ማዳሪ! ታህ አክየ፣ ለቲያህ ኡምቢህ ኦሲታህ ያምሓወ፣ አለዋ ሒያውቶክ ለ ቶይ ለም ኡካ አክበያን ሲናክ አየክ አነ፡፡ 27. አንጋሦ ጉረ ዋይተም ቶይ'ናዓብቶሊት ለ ታል ባሃይ ይነፊል ኢግዲፋ፡፡"28. ኢየሱስ ታይ ሚሳለ ዋንሲተሚህ ላካል ኢሲ አራሕ ኢየሩሳለም ኡላል ይቅጺለህ ኢሲ ተምሃሮክ ባሶድ ባሶድ አድይ ዪነ፡፡

ኢየሱስ ናባ ክብረህ ኢየሩሳለም ሳየ

(ማቴ. 21፣1-11፤ ማር. 11፣1-11፤ ዮሐ. 12፣12-19)

  29. ኢየሱስ ደብረዘይት ኢምባህ ባሮል ገይምታ በተ ፋጊከ ቢታንያህ ካብየ ዋክተ ኢሲ ተምሃሮኮ ላማይ ታህ የህ ተን ፋረ፡፡ 30. ሲን ነፊል ሲናህ ሱጋ መንደርል አዱዋ፣ ታማርከ ማዳንጉል ገና ኢንኪ ሒያውቲ አክ ዲፈህ አዽገዋየ ሔራ ፃዕበታ ቱምዹወህ ገልቲን፣ ኡንሑዋይ ታህ ባሃ፡፡ 31. አኪናን ሒያውቲ አይሚህ አንሑውክ ታኒን? የህ ሲን ኤሠረምኮ ማዳሪ ጉረህ ኪኒ ኤዸሓይ ኤልኢምሊሳ፡፡ 

  32. ፋርምተህ ተደም ኡምቢህ ኡማን ጉዳይ ልኪዕ ኢየሱስ አክ የምባሊህ የከህ ገን፡፡ 33. ፃዕበይታ ያንሑዊን ዋክተ ዋኖን"አይሚህ አንሑውክ ታኒን?"አክየን፡፡ 34. ኢሲን ለ"ማዳሪ ጉረጉረህ ኪኒ"አክየን፡፡ 35. ፃዕበይታ ኢየሱስ ዻጋህ ባሄን፣ ሲኒ ሳራ ፃዕበይታ ዓዳክ አሞክ ሒላልቶ ጉዝጉዙህ ሃየኒህ ኢየሱስ አክ ዲፈዎ አበን፡፡   36.  ኢየሱስ አድይ ያነሃኒህ፣ ሒያው ሲኒ ናጾል አራሓል አካህ ሲዲሳይ ይኒን፡፡ 

   37. ኢየሱስ ኢየሩሳለም ካታማ ማዶ ካብየ ዋክተ ደብረዘይት ኢምባህ ኡሎ ኦባክ ይነ፣ ታማይ ዋክተ ኢየሱስ አክትሊይ ቲነ ሒያው ኡምቢህ ዩብሊን ታአምራታህ ኒያታህ የመጊኒህ ይንንጉል ሲኒ አንዻሕ ናው ኢሰኒህ ፉጎ ያይምስኝኒም ኤዸዽሰን፡፡ 38. ታህ አይ ይኒን፣"መዔፉጊህ ሚጋዓህ ያምተ ንጉሥ የምበረከቲያ ኪኒ! ሳላም ዓራናል፣ ክብሪ ፉጎህ ባዾል ያኮይ!"39. ህዝቢ ፋናድ ቲነ ፈሪሳውያን ለ ኢየሱሶ "መምሂሮ! ኢሲ ተምሃሮ ቲብ ኢሲ"አክየን፡፡ 40. ኢየሱስ ለ ኢሲን ቲብ የኒሚህ ዻይት ኡካ ዋዕ ኢየለ፣ ሲናክ አይክ አንዮ የህ ኤልይምሊሰ፡፡

ኢየሱስ ኢየሩሳለም ካታማህ ዳዓባል  ወዔ

  41. ኢየሱስ ኢየሩሳለም ካታማህ ካብየህ ካታማ ዩብለ ዋክተ አካህ ወዔ፡፡ 42. ታህ የ፣ “አቱ ኡኮ ኩሳላማህ ጉርሱሳ ጉዳይ ካፋ አይሚህ ተዸገህ ተከህ ታከዶ! ካዶ ለ ታይ ጉዳይ ኩ ኢንቲኮ ኮክ ሱዑተ፡፡ 43. ኩናዓብቶሊት ኩማክሰኒ ካየህ የከይኒህከ ይክብብኒህ ታርከከ ቶርከል ኮያ ያጽንቂን ለለዕ አምተለ፡፡ 44. ኮከ ኩ አዳል ታነ ኩይዻሎ ባዾት አሞል ዒደኒህ አስዖኖወ ሎን፣ ራደካህ ራዓ ኢንኪ ዻይ ኡካ ቦታል ኮህ ሐበ ማሎን፣ አይሚህ ፉጊ ኮያ ኩጉፎከ ኩያ ያዳኃኖ ያምተ ዋክተ ሶዸጉል ኪኒ።”        

                       ኢየሱስ በተ መቅደሲድ ታምዔደደገ ሒያው ሀዳነ

(ማቴ. 24፣12-17፤ ማር. 11፣15-19፤ የሐ. 2፣13-22)

   45. ኢየሱስ በተ መቅደሲድ ሳየህ ታማድ ዓዳጋ አብታ ሒያው ያይባራሮ ኤዸዽሰ፣ 46.ታህ አክየ፣"ይድክ ጻሎት ዲክ ያከ የህ ይምጺሕፈ፣ አቲን ለ ባዸዻ ቦሎ አብተን፡፡" 

 47. ኢየሱስ ኡማን ለለዕ በተ መቅደስድ አይምሂሪይ ዪነ፣ ካህናት አሞይቲትከ ሙሴ ሕጊህ መምሂራን አኪ ህዝቢህ መራሕት ለ ካያግዳፎና ጉራይ ይኒን፡፡ 48. ያከካህ ታሃም ያፋጻሞና አይም አቦና አካህ ኤዳም ማዻጊኖን፣ አይሚህ ሒያው ሙሉኡክ ኢየሱስ ያቦና ጉረኒህ ተን አፍዓዶ ሶኦልተህ ትነጉል ኪኒ፡፡

ማዕራፋ 20

ኢየሱስ ሢልጣኒህ ዳዓባል ካብተ ኤሠሮ

(ማቴ. 21፣23-27፣ ማር. 11፣27-33)

   1. ኢንኪ ለለዕ ኢየሱስ በተ መቅደሲል ገይመህ ህዝበ አምሂርከ ወንጌል አይብሥር ይነ፣ ታማይጉል ካህናት አኅሉቅከ ሙሴ ሕጊህ መምሂራን ስማጊለ ካኡላል የመቲን፡፡ 2. ታህ የኒህ ካኤሠረን፣"ኢስኪ ኖከይ! ታይ ጉዳይ አብታም አይሚ ሢልጣናህ ኪኒ? ኮህ ዮሖወቲ አቲያ ኪኒ? ወይ ታይ ጉዳያት አብታም አይሚህ ሢልጣናህ ኪኒ?     .  3. ኢየሱስ ለ ታህ አክየ፣"አኑ ኢንኪ ኤሠሮ ሲን ኤሠራክ አኒዮ፣ ኢስኪ ኤዸሓይ ዮልኢምልሳ፣ 4. ያሃኒስ ጥምቀት ፉጎኮ ወይ ሒያውኮ ኪይይ ዪነ?" 

  5. ኢሲን ታህ የኒህ ሲነሲነህ ዋንስተን፣"ፉጎኮ ኪኒ ናጎል አይሚህ ቡሳ አምነ ዋይተኒም? ኖክ ኢየ ለ። 6. ሒያውኮ ናጉል ለ ህዝቢ ዻይቲህ ናድብዲበሎን፣ አይሚህ ህዝቢ ኡምቢህ ያሃኒስ ነብይ ኪናም ያምኒን፡፡ 7. አማይጉል አርከኮ ኪናም ማናዽገ የኒህ ኤልይምልሲን፡፡ 8. ኢየሱስ ለ"አማይጉል አኑ ለ አይሚህ ሢልጣናህ ታይ ጉዳይ  አባም  ሲናክ ኢየ ማልዮ"አክየ፡፡ 

ወይኒ ታክሊህ ሠራሕተይናህ ሚሳለ

(ማቴ. 21፣33-46፤ ማር. 12፣1-12)

  9. ካታሰህ ኢየሱስ ታይ ሚሳለ ሂዝበክ የዽኄ፣ ኢንኪ ሒያውቲ ወይኒ ታክለ ይትክለ፣ ጋባራህ የይከረየህ ዸዽ አኪ ባዾ የደ፣ ጋኄካህ ማንጎም ሱገ፡፡ 10. ወይን ፍረ ማዳ ዋክተ ወይኒ ታክሊህ ባዕሊ ፍረኮ ካጉፍታም አካህ ጋራዎ ኢንኪ አገልጋሊ ጋባራድ ፋረ፣ ጋባር ለ አገልጋሊ ይድብድቢኒህ ፎያ ኪን ጋባሊህ ዽዽየን፡፡ 11. ታማም ባሊህ አኪ አገልጋሊ ፋረጉል ካያለ ሳባዔኒህ፣ የይወረድኒህ ፎያ ኪን ጋባሊህ ዽዽየን፡፡ 12.ጋባዔህ ለ ማዳሒት አገልጋሊ ፋረጉል ካየለ ሳባዔኒህከ ካቢያከኒህ የየዒኒህ ዒደን፡፡ 13. ታማምኮ ላካል ታክሊ ባዕሊ ካምቦ አይም አቦ? ኪኄኒዮ ኢንኪ ኢኒ ባዻ ፋሮይ! ካያ ምናልባት ዓስቦና ያከክ የ፡፡ 14. ያከካህ ጋባር ዩብሊን ዋክተ ስነስነህ ታህ ኢሲመን፣ ታይቲማ ካወራሲ ኪኒ፣ አማ ናግዳፎይ፣ ሪስቲ ለ ኖያህ አክለ፡፡15. አማይጉል ባዻ ወይኒ ታክለኮ ኢሮል የየዒኒሀ ይግድፊን፡፡ ታሃምኮ ላከል ወይኒ ታክሊህ ባዕሊ ታይ ጋባሪህ አሞል አይም አባም ታካሊኒ? 16. ወይን ታክሊህ ዋና ኢሰህ ያሚተ፣ ጋባር ያግዲፈ፣ ወይኒ ታክለ አኪ ጋባራህ ያሓየ፡፡"ሒያው ታሃም ዮቢን ዋክተ "ታሃም ሡሩህ አከዋይቶይ"የን፡፡

      17.ኢየሱስ ለ ተናድ ቁሉሐ የህ ታህ አክየ፣ 

          "ይቦል ነደቅት ዻይተ ዻይ አንጎሎ ዻይህ አሞይታ 

          የከህ ተህ ትምጽሕፈም አይም  ታምልክተ? 

18. ታማይ ዻይህ አሞል ራዳማሪ ኡምቢህ አግድለ ሎን፣ ዻይ አሞል አክ ራዳ ሒያውቲ ለ አምጽፍሊቀ ለ፡፡"

ግብሪ አከፋፍላህ  ዳዓባል ካብተ ኤሠሮ

(ማቴ.22፣15-22፤ማር.12፣13-17)

   19. ሙሴ ሕጊህ መምሂራንከ ካህናት አኅሉቅ ታይ ምሳለ ተን አሞል ተከም የዸጊኒህ ታማይ ሳዓት ያባዾና ጉረኒህ ይኒን፡፡ ያከካህ ህዝበ ማይሲተን፡፡ 20. አማይጉል ኢየሱስ ያባዾና ያሰ ዋክተ ኢላላይ ይኒን፡፡ ረዳንቶል ሢልጣናህከ ፍርደህ ቲላሰኒህ ያሓዎና ዽዕሲሳ ቃል ካኮ ገዮና ጉራይ ዪኒን፣ አማይጉል መዔማራህ ይምግድኒህ ካዋኒህ ያጽማደና አስሑዋይቲት አድፋረን፡፡ 21. አስሕዋይቲት ኢየሱስድ ካብየኒህ ታህ የኒህ ካኤሠረን፣ "መምህሮ! አቱ ዋንስታምከ ታይምሂረም ሓቀ ኪናም ናዽገ፣ ፉጊ አራሕ ሓቀህ ታይምሂረካህ ኢንከቶ ማታዶሎወ፡ 22. ኢስኪ ኖከየ! ኒሕጊህ መሠረቲህ ሮማ ቀሳራህ ግብረ ያክፋሎና ይምፍቅደ ማምፋቃዲና?"

   23. ኢየሱስ ለ ተን ቶንኮል የዸገህ፣ ታህ አክየ፡፡ 24."ኢስኪ ማል ይይቡሉዋየ፣ ታይ ማላል ይምቅርጸ ምስለከ ጹሑፉል ያነ ምጋዕ ኢይቲያ ኪኒ?"ኢሲን ቄሳርቲያ ኪኒ አክየን፡፡

  25. ኢየሱስ ለ አማይጉል ቄሳርም ቄሳራህ ኡሑዋ፣ መዔፉጊህም መዔፉጎህ ኡሑዋ አክየ፡፡ 26. ኢስን ህዝቢ ነፊል ዋኒህ ካያጽማዶና ማዽዒኖን፣ አማይጉል ለ ካመልሲህ ይምድንቅኒህ ቲብ የን፡፡       

ራብተሚህ  ኡግታቶህ ዳዓባል ኡጉተ ኤሠሮ

(ማቴ.22፣23-33፤ማር.12፣18-27)

 27."ራብተም ሙጉታ"ታዽኄ ሰዱቃውያን ኢየሱሱድ ካብ የኒህ ታህ የኒህ ካኤሠረን፣ 28."ኦ'መምሂሮ!"ሙሴ ታህ የህ ኖህ ይጽሒፈ፣ ኢንኪ ሒያውቲ ባዻ ዻለካህ ኑማኮ ራባህ ባዽስማጉል ሳዓል ተ ኦርቢሰህ ራቦንታህ ሐድገ አካህ ራዕሶይ፡፡ 29. ማልሕና ሳዓል ይኒን፣ ኡማንቲህ ማናቦይቲ ኑማ ኦርብሰህ ባዻ ዻለካህ ራበ፡፡ 30. ካታቲይ ታማይ ኑማ ኦርብሰ፣  31. ማዳሕ ለ ኦርብሰ፣ ታይ ዓይነቲህ ማልሕኒክ ኦርብሰኒህ ኢሮ ዻለካህ ራበን፡፡ 32. ኡማንቲህ ላካል ኑማ ራብተ፡፡ 33. ማልሕክ ስንስን ታራህ ኦርብሰን፣ አማይጉል ራቦንቲት ኡጉታ ዋክተ አይቲህ ኑማ አከለ?" 

   34. ኢየሱስ ታህ የህ ኤልይምልሰ፣"ታይ ዓለምል ሒያው ኦርቢሳን አሮባን፣ 35. ራባኮ ኡገተኒህ ኤል ያምቲን ዓለሚል ማሮና አካህ ኤዳ ሒያው ለ ሞርብሳ፡፡ 36.አይሚህ ማላይካ ባሊህ ያኪኒምዻህ ማራባን፣ ራባኮ ኡጉተን ኢርከህ ለ መዔፉጊህ ዻይሎ ኪኖን፡፡ 37. ራባኮ ኡጉተሚህ ዳዓባል ለ ሙሴ ቆጥቃጥ ጊራህ ዳዓባል ዋንሲተ ታሪክህ አዳል ይግልጸ፣ ታማይ ታሪክህ አዳል ሙሴ ፉጎክ አብራሃም አምላክ፣ ይሰሐቅ አምላክ፣ ያዕቆብ አምላክ፣ የህ ደዔ፡፡ 38. አማይጉል መዔፉጊ ታነሚህ አምላክ ኪኒ ኢካህ ራቦንትቲ አምላክ ማኪ፣ አይሚህ ኡምቢህ ካሂወቲህ ማራን፡፡"

   39. ሙሴ ሕጊህ መምሂራንኮ ጋሪጋሪ መምሂሮ! መዔም ዋንሲተ! አክየን፡፡ 40. ታሃምኮ ሳራቱላል ኤሠሮ ካብ ኤልሶ ይድፍረቲ ኢንከቲ ማና፡፡                    

ኢየሱስ ኢስ ዳዓባል  ካብሰ ኤሠሮ

(ማቴ. 22፣41-46፤ ማር. 12፣35-37)

  41. ታሃምኮ ሳራህ ኢየሱስ ታህ አክየ፣"አይናህ የኒህ መሲሕክ ዳዊት ባዻ" ኪኒ ያና? 42-43. ዳዊት ኡኮ ኢስ ዸግኃህ መዝሙር ማጽሐፊህ አዳል ፉጊ ይማደሪ (መሲሕክ)  ኩናዓብቶሊት ኩሢልጣኒህ ዳባል ኮህ አባም ፋናህ ይምድጋል ዲፈይ አክየ የዽሔ'፡፡ 44. አማይጉል ዳዊት ኢሳሞህ ማዳራ የህ ካደዔሚህ ላካል መሲሕ አይናህ የህ ባዻ ያኮ ዺዓ?"

ኢየሱስ  ሙሴ ሕጊህ መምህራንኮ ሰልታ አክየ

(ማቴ. 23፣1-36፤ ማር. 12፣38-40)

  45. ካህዝቢ ኡምቢህ ካአቢይ ያንንሃኒህ ኢየሱስ ኢሲ ተምሃሮክ ታህ አክየ፡፡ 46."ዸዽ ሣራ ሀይስተኒህ ቶከ ታህ ታዞረም፣ ዓዳጋል ክብሪ ሳላምታ ጋራዎና፣ ሙክራባድ ክብሪ መንበር፣ ድጊሲል ክብሪ ቦታ ኪኂን ሙሴ ሕጊህ መምሂራንኮ ሰልታ፡፡ 47. ኢሲን ለ ያምባላዎና ካብ ኢሳን  ዸዽ ጻሎት አይምከኒይክ ማሚንቲ ዓረ ያብዝብዚን፣ አማይጉል ተና ጊድድ ፍርዲ ተን ገየለ።"

ማዕራፋ 21

ማሚኖት ሞቶሖዎ /ገጸበረከት/

(ማር.12፣41-44)

  1.ኢየሱስ ሪጋየህ የደለለዔጉል ሀብታማት ሲኒ መባዕ ምጽዋት ኤድጋራን ሣጹኒህ አዳድ ሳይሳህ ዩብለ፡፡ 2. ታማም ባሊህ ኢንኪ ዲካ ኪን ማሚኖ ላማ ሳንቲም ያከ ናሓስ ማል ሣጹን አዳድ ዒዳህ ተ ዩብለ፡፡ 3. ታህ ለ አክየ፣ ሓቀ ስናካይክ አነ፣ ታይ ዲካ ኪን ማሚኖ ኡማንቲያኮ አጋናል ተሰሰህ ቶኆወህ ታነ፡፡ 4. አይሚህ ኢሲን ዮሖውኒም ተን ሀብተኮ ራዕተም ኪኒ፣ ኢሲ ለ ድካ  ኪኒሃኒህ ኢንኪም አክ ራዒሰካህ ሊይ ቲነም ሙሉድ ቶኆወ፡፡"  

መቅደስ ዓሪህ ራድናኒህ ዳዓባል ኢየሱስ ትንብት

(ማቴ.24፣1-2፤ማር.13፣1-2)

    5. ውልውል ሒያው"ታይ በተ መቀደስ ዓሪ አይዻ ዓዻ መዔቲያ ኪኒ፣ ኩቡር ኪን ዻይትኮ ፉጎህ ካብየ ገጸበረከቲህ ዓዻ የመዔ"አይክ አልዋንስታይ ይኒን፡፡ 6. ኢየሱስ ለ ታይ ታብልኒም  ኡምቢህ፣ ዻይ ዻይ አሞል ዮምዶሮሮበህ ኤል ራዔ ዋ ዋክቲ አምተ ለ፣ ታይ ዻይት ሙሉኡክ ኢንኪ ለለዕ ራደ ለ።  7. ኢሲን"መምሂሮ! ታሃም አከለም አንዳ ኪኒ? ታሃም ያከ ዋክቲ ካብየም አካህ ናዽገ ምሊክት አይምቶ ኪኒ?"የኒህ ካኤሠረን ።

ኢየሱስ መከራከ ኒያቲ ዋክቲ አምተለም ዋንሲተ

(ማቴ.24፣3-14፤ማር.13፣3-13)

   8. ኢየሱስ ታህ የህ ኤልደሄየ፣"ታንገገይኒክ ሰሊታ፣"ማንጎ ማሪ አኑ ክርስቶስ ኪዮ! ሃይከ ዋክቲ ካብየህ ያነ!' አይክ ይምጋዓህ አምተ ሎን፣ ተና ማካታሊና፡፡ 9. ጦርነትከ ኅውከት ዳዓባል ታቢን ዋክተ ለ ማሓንካብቲና፣ ባሶል ታሃም ታኮ ኤዳ፣ ያከካህ ባክቶ አማይጉልካህ አከ ማለ፡፡"

  10 .ካታሰህ ኢየሱስ ታህ የ፣ ሂዝቢ ህዝቢ አሞል፣ ማንግሥት ማንጊሥቲ አሞል ኡጉተሎን፡፡ 11. ኡማን ቦታል ኃይላለ ባዾት አምናዋጽ፣ ራኀብከ ዱሪ አከለ፡፡ ማይሲሳ ጉዳያትከ ናባ ምልክት ዓራናል አምቡሉወ ለ፡፡ 12. ያከካህ ታሃም ኡምቢህ ታከሚህ ባሶል ሒያው ሲን አብዸ ሎን፣ ሲን አይሰደደ ሎን፣ ሙክራብከ ዋክኒ ዓረህ ለ ቲላሰኒህ ሲን አሓየ ሎን፣ ይምጋዒህ ዳዓባል ነገሥታትከ ገዛእቲል ሲን በሎን፡፡ 13. ታሃም ይ ዳዓባል ታማስካሮና መዔ አጋጣሚ ሲናህ አከለ፡፡ 14. አማይጉል ሲናል ካብሳን ኪሰህ ታሓይን መልስህ ታምፃናቆና መዳም ኡኩማይ አፍዓዶ አብታ፡፡ 15. አይሚህ ሲን ናዓብቶሊትኮ ኢንከቲ ደሶከ ያምካላካሎ አካህ ዽዔዋ ቃልከ ብልሓት አኑ ሲና አሓየ ሊዮ፡፡ 16. ዻልቶይትከ ሳዖል፣ በተሰብከ ካኃንቶሊት ራዔካህ ቲላሰኒህ ሲን አሓየ ሎን፣ ሲንኮ ጋሪጋሮ አግደፈ ሎን፡፡ 17. ይምጋዒህ ዳዓባል ቲምንዒበም አከልቲን፡፡ 18. ያኮይ ኢካህ ሲን ዸግኃህ ዳገርኮ ኢንከቲ ኡካ ምያለየ፡፡ 19. ሲኒ ትዕግሥቲህ ሲኒ ናፍሰ አይደኅነ  ሊቲን፡፡"                           

ኢየሱስ ኢየሩሳለም ሊይህ ዳዓባል ዋንሲተ

(ማቴ. 24፣15-21፤ማር.13፤14-19)

  20. ጋባዔህ ኢየሱስ ታህ የ፣"ኢየሩሳለም ወተሃደር ናዓብቶሊቲህ ትንክብበህ ታብሊን ዋክተ ታላዮ ካብተም ኢዽጋ፡፡ 21. ታማይ ዋክተ ይሁዳ ባዾል ታነም ኢምቦብቲ ቱላል ኩዶናይ፣ ካታማት አዳል ታነም ታማርከኮ ያወዖናይ፣ ካታማኮ ኢሮል ታናም ካታማል ሳየ ዋየ ዋዎናይ፡፡ 22. አይሚህ ለ ታይ ሊዪህ ዳዓባል ትንብት ያምፋጻሞ ታይ በቀልከ ቅጽዓት ዋክተ ኪኒ፡፡ 23. ታማይ ዋክተ ሶኒይትከ ዾይሳ ኡሎል ሲነህ ኢየ ዋዎናይ ኪኖን! አይሚህ ባዾት አሞል ናባ መከራ አከለ፣ ታይ ህዝቢህ አሞል መዔፉጊህ ቁጡዓ አምተለ፡፡ 24. ተንኮ ማንጎ ማሪ ሰይፊህ ራበሎን፣ ጋሪ የመረክኒህ ኢስስ ባዾል ተን በሎን፡፡ አረማውያን ዳባን ያምፍጺመም ፋናህ ኢየሩሳለም አረማውያናህ ትምዒተቲያ አከለ።                             

ክርስቶስ ማላሚ ሙሙት

(ማቴ. 24፣29-1፤ ማር. 13፣24-27)

  25. ጋባዔህ ኢየሱስ ታህ የ፣"አይሮይታከ አልሳል፣ ሑቱክት አሞል ለ ምልክት አምቡሉወ ለ፣ ባዾት አሞል ለ ህዝቢ ኡምቢህ ባሕራከ ማእበል ሓንካቢሳ አንዻሓህኮ ኡጉተሚህ ማይሰተኒህ አምጽንቀሎን፡፡ 26. ዓለም አሞል ያምተ ጉዳይ ኢላላክ ሒያው ማይሲህ አምስብረሎን፣ አይሚህ ታማይ ዋክተ ዓራንቲ ኃይሊት አምነወፀሎን፡፡ 27. ታማምኮ ሳራህ ሒያውቲ ባዽ ናባ ኃይላከ ኪብረህ ዳሩር አሞል የከህ አምቲህ አምቡሉወ ለ፡፡ 28. ታሃም ኡምቢህ ታከም ኤዸዽሳ ዋክተ ሲን ድኅነት ካብ የህ ያነጉል ሪገአያይ አጋናል ኤደለለዓ።                                 

ባላሶ  ሓዻህ ሚሳለ

(ማቴ. 24፣32-35፤ማር.13፣28-3)

  29. ካታሰህ ኢየሱስ ታይ ምሳለ አክ የዸሔ፣ ባላሶ ሓዻከ አኪ ሖዽቲ ዓይነት አፍዓዶ አባይ ኡቡላ፡፡ 30. ዻዻይ አቁጥቁጥህ ታባሊንጉል ሱጉም ካብየም ታዽጊን፡፡ 31. ታይ ዓይነቲህ ታይ ኡማን ጉዳይ ያከም ኤዸዺሳህ ታብልንጉል ፉጊ ማንጊሥቲ ያማቶ ካብየም ኢዽጋ፡፡ 

   32."በኡነት ሲናክ አይክ አንዮ፣ ታሃም ሙሉኡድ ታምፍጽመም ፋናህ ታይ ማባኮ ማትላይታ፡፡ 33. ዓራንከ  ባዾ ቲላይታ፣ ይቃል ለ  ኡማንጉሉህ ሲክ የህ  ማራ፡፡" 

ቲግሃታህ ኢላላናም

  34. ኢየሱስ ጋባዔህ ታህ አክየ፣"ፈሎከ ማስተ ማንጋህ ሲክራናህ አይለይክ ዓለም ፋይዳህ አምፅንቂክ አፍዓዶ ሲናክ ዻማኅታክ ሰልታ፡፡ አማም አከዋይተምኮ ታማይ ለለዕ ማጻወድባሊህ ዲንገቲህ ስናድ አምተለ፡፡ 35. አማይጉል ታማይ ለለዕ ባዾት አሞል ገይምታ ሒያው ሙሉኡድ ዲንገቲህ አምጽሚደሎን፡፡ 36. ታጉል ያሚተ ኡማ ጉዳይኮ ኡምቢህ ታውዖናከ ኃይላ ገይቶናከ ሒያውቲ ባዽህ ነፊል ሶልቶና ዺዕቶናክ ጻሎት አባክ ኡማንጉል ኢትጊሃ፡፡

  37. ኢየሱስ ኡማን ለለዕ በተ መቅደሲድ አይምሂሪይ ዪነ፣ ዲተ ሳይታጉል ለ ደብርረዘይቲ አክያን ኢምባህ አሞል የውዔህ ማሓይ ዪነ፡፡ 38. ሒያው ኡምቢህ ኢየሱስ ያቦና ዻሒነ ማሓል በተ መቅደስ ኡላል አድይ ዪኒን፡፡

ማዕራፋ  22

ክርስቶስ አሞል ተከ አድማ /ሠራ/

(ማቴ  .26፣1-5፤ ማር.14፤1-2፤ ዮሐ. 11፣45-53)

  1. ፋስካ አክያን ኢንገራ ባዓል ያክብረ ለለዕ ካብ የህ ይነ፡፡ 2. ካህናት አሞይቲትከ ሙሴ ሕጊህ መምሂራን ህዝበ ማይስተንጉል ኢየሱስ ይብዽኒህ አካህ ያግድፊን አራሕ ሱዉሩህ ዋጊያይ ዪኒን፡፡

ይሁዳ ኢየሱስ ትላሰህ ያሓዎ የምሰመመዔ

(ማቴ.2 6፣14-16፤ማር.14፣10-11)

  3. ታማይ ዋክተ ላማምከ ታማንኮ ኢንከቲ አስቆሮታዊ ይሁዳድ ሰጣን ኤድሳየ፡፡ 4.አማይጉል ይሁዳ ካህናት አሞይትቲህ ኡላል በተ መቅደስ ዋርድያህ አዛዞድ የደህ ኢየሱስ አይናህ ኢሰህ ተላሰህ አካህ ያሓየም ተንሊህ ዋንሲተ፡፡ 5. ኢሲን ጉዳህ ኒያተኒህ ማል አካህ ያሓዎና የምወዔዔሊን፡፡ 6. ውዕለህ የምሰመመዔህ ህዝቢ አዽገካህ ኢየሱስ ቲላሰህ ያሓዎ ያይሰ ዋክተ ዋጊያይ ዪነ፡፡

ኢየሱስ አይሁድ ፋሲጊህ ዲራር በቶ የምሶኖዶወ

(ማቴ.26፣17-25፤ማር.14፣12-21፤ዮሐ.13፣21-30)

  7. ታሃምኮ ላካል ፋሲጊ ዒዶይቲ ያምሩሑደ ኢንገራ /ቂጣ/ ባዓል ማደ፡፡ 8.ኢየሱስ ፋስጊ ዒዶይታ በኖክ አዱዋይ ኦይሶኖዶዋ የህ ጰጥሮስከ ያሃኒስ ፋረ፡፡

  9. ኢሲን ለ ፋስጊ ዲራር አል ኮህናሳናዳዎ ጉርታ?  የኒህ ኤሠረን፡፡ 10. ኡሱክ ለ ታህ አክየ፣ ሲን ነፊል ታነ ካታማል ሳይታንጉል ሃይከ ላየ ዒድሮ ይይኩዔ ሒያውቶ ገልቲን፣ ካያ ኢክትላይ ኤድሳ ዓረድ አዱዋ፡፡ 11. ድክቲ ባዕላክ ኒመምሂር ኢሲ ተምሃሮሊህ ፋሲጊ ዒዶይታ ኤድ በታ ዓሪ አል ኪኒ? ኮክያ አከያ፡፡ 12. ኡሱክ ዳብራክ አሞክ ያነ ስድሲመህ ዮምሶኖዶወ ፍድን አዳራስ ሲን አስቡሉወ ለ፣ ታማል ኦይሶኖዶዋ፡፡ 

  13. ካ ተምሃሪቲ ላማይ የደይኒህ ኡማን ጉዳይ ሊክዕ ኢየሱስ አክ የምባሊህ የከህ ገን፣  ፋስጊ ዲራር ታማል ዮይሶኖዶዊን፡፡

ቁዱስ ቁርባን ሠርዓት (ማዳሪ ድራር)

(ማቴ.26፣26-30፤ማር.14፣22-26፤1ቆሮ.11፣23-25)

  14. ድራር ሳዓት ማደ ዋክተ ኢየሱስ ሐዋርያትልህ ማይደል ዲፈ፡፡ 15. ታህ አክየ፣ "መከራ ይማዳሚህ ባሶል ስንሊህ ታይ ፋስጊ ድራር በቶ ጋዳህ አትምኒክ ኢነ፡፡ 16.ታይ ጉዳህ ሓቂ ሚሥጢር መዔፉጊህ ማንግሥቲል ፍጹም የከህ አይከ ያምቡሉወም ፋናህ ካምቦኮ ሣራህ ታይ ፋስጊ ዲራር ኢንኪጉል በተ ማልዮ ሲናክ አይክ አንዮ፡፡"

  17. ታሃምኮ ላካል ኢየሱስ ጽዋእ ናው ኢሰህ ምስጋና ጻሎት አበህ፣ ታህ የ፣"ሂና ታሃም ኤምከፈላ፡፡ 18. በኡነት ሲናክ አይክ አኒዮ፣ ካዶኮ ኤዸዽሰህ መዔፉጊህ ማንግሥት ታምተም ፋናህ ታይ ወይኒ ፍረህ ጽማቂ ማዑበ፡፡" 

  19. ካታሰህ ኢየሱስ"ኢንገራ ናው ኢሰህ ምሥጋና ጻሎት አበ፣"ዩቁሩሰህ ኢሲ ተምሃሮክ ሂና፣"ታሃም ስናህ ታምሓወ ይ ሐዶይታ ኪኒ፣ ታሃም ይመዘከርታ አባ"የህ አካህ ዮሖወ፡፡  20. ታማሃም ባሊህ ድራርኮ ላካል ጽዋዕ  ናወሰህ አካህ ዮሖወህ ታህ አክየ፣ "ታይ ጽዋዕ ሲናህ ሓዽታ ይብሎህ ያምፍጽመ ዑሱብ ኪዳን ኪኒ፡፡ 

 21."ያኮይ ኢካህ ትላሰህ ይያሓየ ሒያውቲህ ጋባ ሃይከ ዮሊህ ማይድል ኪኒ። 22. ሒያውቲ ባዻህ ካዳዓባል ቶኮመህ አካህ ትምውስነሚህ ሪሚዲህ ራባህ ያዴም አክ ማራዕታ፣ ያከካህ ሒያውቲ ባዻ ቲላሰህ ያሓየቲ ቶይ ሒያውቲ ኢሰህ ኢየዋዎይ!" 23.ኢሲን ኒፋንኮ ታሃም አባቲ አይቲያ ኪኒ! ያናማህ  ሲነሲነህ ቲታ ኤሠረን።          

ኡማን ኖያኮ ናባቲ ኢያቶ ኪኒ?

  24. ካታሰኒህ ኢሲን ኡማኖያኮ ናብቲ አይቲያ ኪኒ? አይክ ሲነሲነህ ያምከረከሪኒም ኤዸዽሰን፡፡ 25. ኢየሱስ ለ ታህ አክየ፣ ታይ ዓለሚህ ነገሥታት ሂዝቢ አሞል ሢልጣን ሎን፣ ረዶን  ለ ሂዝቢ መዔ ሢራሕ አብታም ኪኖን አክያን። 26. አቲን ለ ተናባሊህ ታኮና መዳ፣ ኤረ ሲን ፋንኮ ናባቲያ ኪንቲ ዒንዳትያ ባሊህ ያኮይ፣ አሞባዕላ ኪንቲይ አገልጋሊ ባሊህ ያኮይ፡፡ 27. ማይድል ድፈህ ያምግበቲያከ ሶለህ ያስግልግለቲያኮ አይቲያ ኪኒ ናባቲ? ናባቲያ አክያናም ማይድል ድፈቲያ ማኪ? አኑ ለ ሲን ፋናድ አገልጋሊ ባሊህ ኪዮ፡፡ 28. አቲን ይሔልዋዪህ ዋክተ ኡምቢክ ዮሊህ ሲክ ተኒህ ሱግተን፡፡ 29. አማይጉል ያባ ዮያ ረድሰም ባሊህ አኑ ለ ሲና ረድሰ ሊዮ፡፡ 30. ይ ማንግሥቲህ ማይድል ድፈይተኒህ በተልቲን፣ አዑበልቲን፣ ዙፋን አሞክ ድፈልቲን፣ ላማምከ ታማን ኢስራኤል ነገድ ቲያህ አሞል ረደኒህ አፍርደልቲን፡፡        

ኢየሱስ ጰጥሮስ ኪሕደት ዮኮመህ ዋንሲተ

(ማቴ. 26፣31-35፤ ማር.14፣27-31፤ ዮሐ.13፣36-38)

   31. ካታሰህ ለ ኢየሱስ ታህ የ፥"ስምዖኖ! ስምዖኖ! ሀይከ ሓረስታይ ሲራይ ሐሳርኮ ይምሲኤ ባዽሳም ባሊህ ታማህ ኢሰህ ሰጣን ሲና ያይማሳኦ ወይ ሲን ያፋታኖ ይቲምኔ፡፡ 32. ያከካህ ሲን ኢምነት ያለየምኮ አኑ ጻሎት አባ፣ አቱ ተነሰሔህ ዩኡላል ጋሕታጉል ኢሲ ሳዖል ሲኪ ኢስ።"  

 33. ጰጥሮስ ለ ይማዳራ! ማዹዋህ ያኮይ ራባህ ኮሊህ ኢንኮህ አዳዎ ዮምሶኖዶወቲያ ኪዮ"አክየ፡፡ 

  34. ኢየሱስ ለ"ጰጥሮሶ! ካፋ ዶርሆይቲ ወዶኮ ባሶል ካማዽገ ተህ አዶሐጉል ያክሕደ ሊቶ ኮካይክ አንዮ፡፡" 

  35. ታሃምኮ ላካል ኢየሱስ ኢሲ ተምሃሮክ"ማል ቦርሳ ቀረጢት፣ ካበላ አብዸካህ ሲን ፋረ ዋክተ ሲናክ ዩግዱለ ጉዳይ ዪነ?"አክ የዽሔ፡፡ ኢሲን ለ ኢንኪም ኖክ ዩግዱለ ጉዳይ ማና" የኒህ ኤልይምልሲን፡፡ 

 36. ኢየሱስ ታህ አክየ፣"ካዶ ለ ማል ቦርሳ የከህ ከረጢት ለቲይ ያባዾይ፣ ሰይፍ  አለዋቲ ኢሲ ሳራ ያባሖአይ ሰይፊ ዻሞይ፡፡ 37.'ዓመጸናታትሊህ ሎይመ!' ያዽሔ ማጽሐፍ ቃል ያሞል ያምፋጻሞ ኤልታነ፣ ሲናክ አይክ አነ፣ አይሚህ ይዳዓባል ቶኮመህ ትምጺሒፈም ኡምቢህ ታምፋጻሞ ኤዳም ኪኒ፡፡"38. ካተምሃሮ"ማዳራ ሀይከ ታል ላማ ሰይፊ ያነ!"አክየን። ኡሱክ  ለ "ዺዓ" አክየ፡፡

ኢየሱስ ደብረ ዘይትል ጻሎት አበ

(ማቴ. 26፣36-46፤ ማር. 14፣32-42)

  39. ኢየሱስ ካታማኮ የውዔህ ኢሲ ሊማድባሊህ ደብረ ዘይት የደ፣ ካተምሃሮ ኤሊህ የደዪን፡፡ 40. ታማርከ ማደንጉል ኢየሱስ ፋታናድ ሳይታናክ ጻሎት አባ አክየ፡፡           41. ታማምኮ ሳራህ ዻ ዒደኒህ ማድሳን ኢርከህ ኢዻ ታከም ተንኮ ሚሪሕ የህ የደ፣ ይምብርኪከህ ታህ የህ ጻሎት አበ፡፡ 42."አባ! ኩፍቃድ የከምኮ ታይ መከራ ጽወዕ ዮኮ መርኅ ኢሲ፣ ለ ኩፍቃድ ያኮይ ኢካህ ይፍቃድ አከዋዎይ፡፡"43. ታማይ ዋክተ ካያ ያይብርተዔ መልአክ ዓራንኮ የመተህ አካህ ዩመቡሉወ፡፡ 44. አፍዓዶኮ ጋዳህ ይምጽኒቀህ ኃይላህ ጻሎት አባይ ይነ፣ ዲምቢ ቢሎ ባሊህ ተከህ ባዾል አክ ዽምያክ ቲነ፡፡

  45. ጻሎትኮ ኡጉተህ ኢሲ ተምሃሮ ዻጋህ የመተ፣ ኃዛን ማንጋኮ ኡጉተሚህ ዽነኒህ ተንገህ ታህ አክየ፡፡ 46."አይሚህ ዽናክ ታኒን? ናቢህ ፋታናድ ሳይታናክ አጉታይ ጻሎት አባ፡፡"   

ኢየሱስ ናዓብቶሊቲ ጋባህ ይምዽቢዸ

(ማቴ. 26፣57-58፣69፣75፤ ማር. 14፣43-54፣66-72፤  ዮሐ. 18፣12-18፤25-27)

  47. ኢየሱስ ታሃም ዋንሲታይ ያነሃኒ ማንጎ ሒያው ተመተ፣ ተን መራኂ ላማምከ ታማንኮ ኢንከቶ የከ ይሁዳ ኪይይ ይነ፣ ይሁዳ ካፉጉቶ ኢየሱሱድ ካብየ። 48. ኢየሱስ ለ"ኦ'ይሁዳ! ሚናዳምቲ ባዻ ፉግቶህ ቲላሰህ አኃይክ ታነ?"አክየ፡፡ 49. ኢየሱስሊህ ቲነ ተምሃሮ ጉዳይ አገባቢራ ዩብሊን ዋክተ ማዳራክ! ሰይፊህ ሳባዕኖ?"አክየን፡፡  50.  ተንኮ ቲይ ሊቀ ካህናት አገልጋሊ ሰይፊህ ሳባዔህ ሚድጊ አይቲ አክ ይግሪዔ፡፡       51. ኢየሱስ ለ ታሃም ማጉርሱሳ! ሓባ! የ፣ ሒያውቲ አይቲ ለ ይድህሲሰህ ኡሩሰ፡፡   52. ታሃምኮ ላካል ኢየሱስ ታባዾ ተመተ ካህናት አሞይቲትከ በተ መቅደስ አዘዝቲከ ሕዝቢ ሲማጊለክ ለ ታህ አክየ፣"ዮያ ወምበደ ባሊህ ታባዾና ሰይፈከ ኢሎል ትብዽኒህ ተመቲኒ? 53. ኡማን ለለዕ በተ መቅደሲድ ሲንሊህ ገይማህ ይማባዽኒቲን ካዲ ለ ሲን ዋክተከ ዲተ ሢልጣኒህ ዋክተ  ኪኒ፡፡"                          

    ጰጥሮስ ኢየሱስ ይክሕደ

(ማቴ. 26፣57-58፤69-75፤ ማር. 14፣53-54፤66-72፣  ዮሐ.18፣12-18፤25-27)

  54. ታሃምኮ ላካል ሒያው ኢየሱስ ይብዽኒህ በየኒህ ሊቀ ካህናት ዲኪህ በየን፣ ጰጥሮስ ሚሪኃ የህ አክቲሊይ ይነ፡፡ 55. ሒያው ጊቢ አዳድ ጊራ የይሰወወሪኒህ   ኢንኪል ዲፈኒህ ይኒን፡፡ ጰጥሮስ የመተህ ተንሊህ ዲፈ፡፡ 56. ጰጥሮስ ጊራ ባሮል ዲፈህ ያነሃኒህ ኢንኪ ድንግል ካቱብለህ፣ ካያድ ቱቱኩረህ ቁሉሕ ኤተህ ታይቲ ኡኮ ኢየሱስሊህ ዪነ! ተዽሄ። 57. ጰጥሮስ"ተአውካ አኑ አቱታም ማዽገ!"አክየ፡፡ 58. ዳጎ ዋክተኮ ላካል ኢንኪ አኪ ሒያውቲ ጰጥሮስ ካዩብለህ ለ አቱኮ ካሊህ ቲነምኮ ቲያ ኪቶ አክየ፡፡ ጰጥሮስ ለ "ኮሕያውቶ ማኪዮ!"አክየ፡፡  

  59. ኢንኪ ሳዓት ሱገህ አኪ ኢንኪ ሒያውቲ ጰጥሮሱክ ታይ ሒያውቲ ገሊላቲያ ኪኒጉል ዓዲህ ካሊህ ዪነ! ያናማህ ይይቲሪረህ ዋንሲተ፡፡ 

  60. ጰጥሮስ ለ "ኮሕያቶ  ታዽሔም አኑ ማዽገ!" ታሃም ዋንሲታይ ያነሃኒህ አማይጉል ዶርሆይቲ ወደ፡፡ 61. ታማይ ዋክተ ማዳሪ ኢየሱስ ኡፍኩና የህ ጰጥሮስ ዩብለ፣ ጰጥሮስ ለ"ካፋ ዶርሆቲ ዋዳም ፋናህ አዶሓጉል ያክሕደ ሊቶ"ያናማህ ማዳሪ ኢየሱስ ዋንሲተ ቃል ይዝኪረ። 62. ኢሮህ የውዔህ ኢምርሪሰህ ወዔ፡፡

  63. ታማይ ዋክተ ኢየሱስ ቲብዸህ ቲነ ሒያው ኢየሱስ አሞል አይለገፅከ ሳባዓይ ይኒን፡፡ 64. ነፍ አክ አይቡዱዲክ"አቲያ ኪኒ ኩሳባዔተም? ነቢይ ተከምኮ ኢስኪ ኢዽገ አካይ"ይኒን፡፡ 65. ማንጎ ጉዳይ ዋንሲታክ አካህ ዋቲማይ ይኒን:: 

ኢየሱሰ ፍርዲ ሰንጎል ካብየ

ማቴ. 26፣59-66፤ ማር. 14፣55-64፤ ዮሐ. 18፣19-24)

  66. ሑገ ማሕተጉል ለ ሕዝቢ ሲማጊለከ ካህናት አሞይቲት፣ ሙሴ ሕጊህ መምሂራን ኢንኮህ የከሄሊኒህ፣ ኢየሱስ ሲኒ ሰንጎህ ባሄን፡፡ 67. ታህ አክየን፣"ኢስኪ ኖከየ! አቱ መሲሕ ኪቶ?"

   ኡሱክ ለ ታህ አክየ፣ ሲናክ ኤሚህ ይማታሚኒን። 68. ኤሠሮ ሲን ኤሠራጉል ዮህ ማታይሚሊሲን፣ 69. ያከካህ ካዶኮ ኤዸዺሰህ ሒያውቲ ባዺ ኃይላለ ፉጊህ ሚድጋል ዲፈለ፡፡ 

  70. ኡምቢህ ኢንኮህ ይቦል"አቱ መዔፉጊህ ባዻ ኪቶ?" የኒህ ኤልደሄየን፡፡ ኡሱክ "ዮ አቲን ተኒምባሊህ ኪዮ"አክየ፡፡ 

  71. ኢሲን ለ አማይጉል"አይሚህ ማስኪር ኒጉርሱሳ? ሀይከ ካአፍኮ የውዔ ቃል ናኑ ኒኒአሞህ ኖበ!" የዽሒን፡፡ 

ማዕራፋ 23

ኢየሱስ ጲላጦስ ነፊል ካቢየ

(ማቴ. 27፣1-2፤11-14፤ ማር. 15፣1-5፤ ዮሐ. 18፣28-38)

   1. ሰንጎት አባላት ሙሉኡክ ኡገተኒህ ኢየሱስ በኒህ ጵላጦስ ነፊል ካብ ኢሰን፡፡ 2. ታህ  የኒህ ያክሲሲኒም ኤዸዺሰን፣ ታይ ሒያውቲ ኒሕዝበ አስገገይህ ካገይነ፣ ሮማ ኑጉሠ ነገሥቲ ቀሳራህ ጊብሪ ያምኃወምኮ ደሳ፡፡ ጋባዔህ አኑ ኑጉሥ መሲሕ ኪዮ የህ  ዋንሲታ፡፡ 

  3 ጵላጦስ ለ"አቱ አይሁድ ኑጉሥ ኪቶ?"የህ ኢየሱስ ኤሠረ፡፡ ኢየሱስ"ዮ አቱ ታምባሊህ ኪዮ"አክየ፡፡ 4. ታማይ ዋክተ ጵላጦስ ካህናት አሞይቲትከ ሕዝበክ ለ "ታይ ሒውቶድ ኢንኪ በደል ታከም ኤደማገኒዮ!"አክየ፡፡

 5. ኢሲን ለ ታይ ሒያውቲ ገሊላኮ ኤዸዺሰህ ታርከ ፋናህ ይሁዳ ባዾልከ ኡማንቱማል አይምሂሪክ ሕዝበ ሂውከት ኡጉጉሳ የኒህ ኃይላህ ይክሲሲን።

ኢየሱስ ሄሮድስ ነፊል ካብየ

  6. ጲላጦስ ገሊላ ያን ቃል ዮበ ዋክተ፣"ታይቲ ገሊላ ሒያውቶ ኪኒሆ?" የህ ኤሠረ፡፡ 7. ኢየሱስ የመተም ሄሮድስ ግዝአትኮ ኪናም ጲላጦስ የዸገጉል ሄሮድሱላል ፋረ፣ ሄሮድስ ለ ታማይ ዋክተ ኢየሩሳለምል ዪነ፡፡ 8. ሄሮድስ ኢየሱስ ዩብለጉል ጋደህ ኒያተ፣ አይሚህ ኢየሱስ ዳዓባል አቢይነጉል ካያብሎ ማንጎ ዋክተ አትሚኒይ ዪነ፣ ታማም ባሊህ ኢየሱስ ታአምራት አባህ ያብሎ ታስፋ አባይ ዪነ፡፡ 9. አማይጉል ሄሮድስ ኢየሱስ ማንጎ አሠሮ ካኤሠረ፣ ኢየሱስ ለ ኢንኪም ኤልማደሄይና፡፡ 10. ካህናት አሞባዒልከ ሙሴ ሕጊህ መምሂራን ታማል ሶለኒህ ኃላህ ካ አክሲሲይ ይኒን፡፡ 11.ሄሮድስ ለ ኢሲ ጽፍራሊህ ጋኄህ ዻይህ ኤል የይለገፀ፣ ዓዻመዔ ሣረና  ሀይሲሰህ ለ ጲላጦስ ዻጋ ደሄ ፋረ፡፡ 12. ታማይ ለለዕ ሄሮድስከ ጲላጦስ ካሐንቶሊት የኪን፣ ታማምኮ ባሶህ ለ  ናዓብቶሊት ኪይ ዪኒን።                   

ኢየሱሱል ራቢ ፊርዲ ኤልይምፍደ

(16 ማቴ.27፣15-26፤ማር.15፣6-15፤ዮሐ.18፤39-40፤ 19፤ 1-16)

  13. ታሃምኮ ላካል ጲላጦስ ካህናት አሞይቲት፣ ሕዝቢ መራሕትከ ሕዝበ ለ ኤድ ኦሰህ ኢንኮህ ደዔ፡፡ 14. ታህ አክየ፣"ሕዝበ ሂውከቲህ ኡጉጉሳ! ተኒህ ታይ ሒያውቶ ዩላል ባህተን፣ አኑ ለ ሀይከ ሲን ነፊል ኢምርሚረህ አካህ ታክሲሲን ኪሰህ ኡምቢህ ታይ ሒያውቲህ አሞል ኢንኪ በደል ኤድማገይኒዮ፡፡ 15. ታማም ባሊህ ሄሮድስ ኢንኪ በደል ኤድማገይናጉል ደሄየህ ኑላል ፋረ፣ ታይ ሒያውቲ ራባ ካማዲሳምኮ ኢንኪ ጉዳይ ማ'ቢና፡፡ 16. አማይጉል ሳብዖህ ኢቅጽዔ ዺዼ ሊዮ"አክየ፡፡ [17. ኢሲሲ ኢጊዳ ፋሲጊ ባዓላህ ጲላጦስ ኢንኪ ዩምዹወቲያ ሒያዋህ ያንኁይኒሚህ ልማድ ሊይ ዪነ፡፡] 18. አማይጉል ሒያው ኡምቢህ"ታይ ሒያውቶ ሚሪሕ ኖህ ኢስ! በርባን ለ ኖህ ኡንሑይ"አይክ ዋዕ የን፡፡ 19. በርባን ሂውከት ኡጉሳናማህከ ሒያው ያግዲፊኒሚህ ምክኒያታል ዋክኒ ዓረድ ዩምዹወህ ይነ ሒያውቶ ኪይይ ዪነ፡፡ 20. ጲላጦስ ኢየሱስ ይንኁወህ ዺዽዮ ጉረህ ጋባዔህ ሕዝበሊህ ዋንሲተ፡፡ 21. ሕዝቢ ለ ታካር! ታካር! የኒህ  ዋዕየን፡፡ 22. ጲላጦስ ለ ማዳሒ ዋክተ ታህ አክየ፣"ታይ ሒያውቲ አበ በደል አይም ኪኒ? አኑ ራባ ማደሳ በደል ኤድማገይኒዮ፣ አማይጉል ሳብዖህ ኢቅጺዔህ ዺዼ ሊዮ። 23. ኢሲን ለ አንዻሕ ናውሰኒህ ታካር! አይክ ዋዕ የን፣ ተን ዋዕታ ተመንገ፡፡ 24. ታሃሚህ ምክኒያታል ኤሠረኒም አካህ ታኮ ጲላጦስ ኢየሱሱል ይፍሪደ፡፡ 25. ባጽባጻ ኡጉሳከ ሒያው ጊዲፎህ ይምዹወህ ዪነ በርባን ተን ኤሠሮህ መሠረቲህ ይንሑወ፣ ኢየሱስ ጉረኒምባሊህ ቲላሰህ አካህ ዮሖወ። 

ኢየሱስ ይምስቂለ

(ማቴ. 27፣32-44፤ ማር. 15፣21-32፤ ዮሐ. 19፣17-27)

  26. አማይጉል ኢየሱስ በን፣ ይብዽኒህ አድይ ያንንሃኒህ ቀሬና ሒያውቶ የከ ስምዖን ገጠርኮ ካታማል ሳህ ገን፣ ካያ ይብዽኒህ ኢየሱስ ማስቀል ካይሱኩዒኒህ ኢየሱስ ያካታሎ አበን፡፡ 27. ማንጎ ሒያው ኢየሱስ አክትልይ ቲነ፣ ተን ፋናድ ማንጎም ይኅዝነህ ወዓ አጋቢ ይነ፡፡ 28. ኢየሱስ ለ ተኑላል ኡፍኩና የህ ታህ አክየ፣"አቲን ኢየሩሳለም አጋቦ! አቲን ሲነህከ ሲኒ ዻይሎህ ወዓ ኢካህ ዮያህ ማወዒና!"29. አይሚህ ገዳም ኪን ሳዮ፣ ዻለዋየ መሕፀንከ ዾውሰ ዋይታ አንጉግ አይዻ ትምዕዲለም ኪኖኑ!' ያዽሒን ለለዕ አምተለ፡፡ 30. ታማይ ዋክተ፣ ሒያው ኢምቦቦ፣ ናሞል ራዳ! ሪሮዎ ለ፣"ንሱዑሳ!'ያናም ኤዸዽሰሎን፡፡ 31.አማይጉል ታሃም ኡምቢህያህ ጉዳይ፣ ዊዪን ሓዻህ አሞል ያከም የከምኮ ሣራህ ካፊን ሓዻህ አሞልማ አይም አከለ ማለት ኪኒ?"32. ታማሃም ባሊህ ኢየሱስልህ ራባ ላማ ገበነይና ይብዽኒህ የደይን፡፡ 33. ቀራንዮል ወይ ዸግኃ ሐምሐም አክያን ሲፍራ ማደንጉ ታማል ኢየሱስ ታካረን፣ ታማሃም ባሊህ ላማ ወንገለና ኢየሱሱክ ጉራልከ ሚድጋል ታካረን፡፡ 34. ታሃምኮ ላካል ኢየሱስ"አባ! አባናም ምያዽጊንጉል ኤልሓብ!" የዽሔ፡፡

  ወተሀደር ለ ዒደት ዒደኒህ ኢየሱስ ሳራ ሓድሊተን፡፡ 35. ሒያው ሶልተህ አብልይ ቲነ፣ አይሁድ አሞይቲት ለ "አኪማራ ያይድኂነ፣ አማይጉል አሱክ ፉጎህ ዶሪምመ መሲሕ የከምኮ ኢስኪ ኢሰ ያይዳኃኖይ! አይክ ኤልአይለገጽ"ዪኒን፡፡

  36. ወተሀደር ታማም ባሊህ ኤልየይለገጺን፣ ካያድ ካብ የኒህ ሚሪራም አካህ ዮሖይን፡፡ 37. ታማምባሊህ"አቱ አሁድ ኑጉሥ ተከምኮ ኢስኪ ኢሰ ኢይድኅን" አካይ ይኒን፡፡ 38."ታይቲ አይሁድ ኑጉሥ ኪኒ!"ያ ጹሑፍ ለ ኢየሱስ ማስቃሊህ አሞክ ድፈሰን፡፡

ኢየሱስሊህ ታካሪመን  ላማ ወንገለየና

(ማቴ. 27፣38-44፤ ማር. 15፣27-32)

  39. ኢየሱስልህ ታካሪምተ ወንገለናታትኮ ኢንከቲ ኢየሱሱክ"አቱ መሲሕ ማኪቶሆ? ኢስኪ ኢሰከ ኖያ ኢድኂን!"አይክ አካህ ዋትማይ ዪነ፡፡ 40. ማላም ገበነይና ለ ታህ የህ ካይግሲጸ፣ አቱ ራቢ ፍርደል ታነሃኒህ ኡካ ፉጎ ማማይስታ? 41. ናኑ አብነ በደሊህ ምክንያታል ቅጽዓት ጋራይነረከ ኤዳ ፍርደ ኪኒ፣ ታይ ሒያውቲ ለ በደል ማቢና፡፡ 42. ካታሰህ ኢየሱሱክ"ኦ'ይማዳራ! ኢሲ ማንጊቲል ሳይታጉል ይዝኪር አክየ፡፡ 43. ኢየሱስ"ሓቀህ ኮካይክ አኒዮ፣ ካፋ ዮሊህ ጋናታል ሳየሊቶ!" አክየ፡፡    

ኢየሱስ ራበ

(ማቴ. 27፣45-56፤ማር.15፣33-41፤ዮሐ.19፣28-30)

  44. ሃይከና ታሃም ተከም ለለዕቲት ሊሓ ሳዓቲህ አካባቢል ኪይ ይነ፣ ታማይ ዋክተኮ ኤዸዽሰህ አይከ ሳጋላ ሳዓት ፋናህ አይሮት ኢፎ ደሰህ ባዾክ ኡማንቱማህ አሞል ድተ ተከ፡፡ 45. በተ መቅደስ ማጋረይዛ ለ ፋንኮ ዓንዽዸህ ላማል ባዽስምተ። 46.ኢየሱስ ለ ዋዓ የህ "ኦ'ያባ! ሃይከ ይናፍስ ኩጋባል ኮህ ሓይክ! አክ ኣነ፣ ታሃም የሚህ ላካል ናፍሲ ሓዶይታኮ ባዸሲመ፡፡ 47. ታማል ዪነ ቦልቲ ኃለቃ የከ ጉዳይ ዩብለጉል"ዓዲህ ታይ ሒያውቲ ጻድቅ ኪይይ ይነ!"የህ መዔፉጎ ይስክብረ፡፡ 48. ጉዳያት ያብሎና ታማል ተከሄለህ ቲነ ሒያው ኡምቢህ የከ ጉዳይ ዩብልንጉል ኃዛናህ ሲኒ አፍዓዶ ሳባዓክ ሲኒሲኒ ዲክ ጋኄን፡፡ 49. ኢየሱሱልህ ካብካበ ሊይቲነ ሒያው ኡምቢህከ ገሊላኮ ኤዸዽሰኒህ ኤድካታይ ይነ አጋቢ ለ ዸዺል ሶለኒህ ታይ ጉዳይ አይደለለዕይ  ዪኒን፡፡

ኢየሱስ ዩሙዑገ

(ማቴ. 27፣57-61፤ ማር. 15፣42-47፤ ዮሐ. 19፣38-42)

  50. አይሁድ ካታማ ተከ አርማቲያሳል ማራ ዮሴፍ አክያን ሒያውቲ ዪነ፣ ኡሱክ ጻድቅከ መዔ ሒያውቶ ኪይይ ይነ፣ አይሁድ ሰንጎህ አባል ኪይይ ይነ። 51. ያከካህ አይሁድ ምክረከ ሠራድ ማምሐባባሪና፣ መዔፉጊህ ማንግሥቲህ ታስፋ ኢላላ ሒያውቶ ኪይይ ይነ፡፡ 52. ታይ ሒያውቲ ጲላጦሱክ ነፊል ካብየህ ኢየሱስ ረሣ አካህ ያሓዎ ኤሠረ፡፡ 53. አሰካረን ለ ይብዽየህ ቁንጹይ ሐሪ ሳረናህ ይክንደህ ኢንከቲ ኤድሳየ ዋየ ዱኮህ አዳድ ዮዖገ፣ 54. ታሃም ለ አበም ዓርቢ ካሶ ሳንባት አምሳናዳው ያከ ዋክተ ኪይይ ይነ፡፡ 55. ገሊላኮ ኢየሱስ ትክቲለህ ተመተ አጋባ ዮሴፍልህ የደይኒህ ማዓጋ ዩብልን፡፡ አስካረን አይናህ የህ ዩሙዑገም ዩብሊን፡፡ 56. ሲኒ ድኪህ ጋኄኒህ አስካረኒህ ታከ ሱቱከ ከርቤ ዮይሶኖዶዊን፣ ሙሴ ሕጊህ መሠረቲህ ሳንባት ለለዕ ዩዕሩፍኒህ አሠን፡፡

ማዕራፋ 24

ኢየሱስ ራባኮ ኡጉተ

(ማቴ. 27፣1-10፤ ማር. 16፣1-6፤ ዮሐ. 20፣1-10)

   1. አጋቢ ዮይሶኖዶውን ሱቱ ይብዽኒህ ሳምባት ዻሕነ ማሓል ማዓጉላል የደይን፡፡ 2.ማዓጊ አካህ አልፍመህ ይነ መልጊብ ዻይ ራደህ የምቦኮኮለህ ገን፡፡ 3. አዳድ አክሳየንጉል ለ ማዳሪ ኢየሱስ አስካረን ማገኖን፡፡ 4. ታማሚህ ዳዓባል አምጋራምቲ አሞል ያንንሃኒህ ሃይከ ታፀበረቀ ኢፎሳ ሣረና ሀይሲተን ላማ ሒያውቲ ዲንገቲህ የመትኒህ ተን አፋል ሶለን፡፡ 5. አጋብ ለ ጋዳህ ማይሲተኒህ ባዾል ጋሚመኒህ ያንንሃኒህ ሒያው ታህ አክተ፣"ያነ ኢየሱስ ራቦንትቲ ፋናድ አይሚህ ዋጊያክ ታኒን?  6. ኡሱክ ታል ሚያነ፣ ኡጉተ፣ ገሊላል ይነ ዋክተ ሲናክ የም ኢዝክራ፡፡ 7. ሒያውቲ ባዽ ኃጢአተናታት አስሑዋህ ተላሰኒህ ዮምሖወህ ታካሪሞከ ማዳሕ ለለዕ ራባኮ አጉቶ ኤዳም ሲናክ የህ ዪነ፡፡

   8. አጋቢ ኢየሱስ ቃል ይዝክሪን፡፡ 9. ማዓጋኮ ጋኄኒህ ታሃም ኡምቢህ ኢንካንከ ታማንከ ራዕተምክ የዽኂን፡፡ 10. ታሃም ሐዋርያታክ ተም መግደላዊት ማርያምከ፣ ዮሐናከ ያዕቆብ ኢና ማርያም፣ ታማም ባሊህ አኪ አጋቦ ኪይይ  ይኒን፡፡  11. ኢሲን ለ ታይ ጉዳይ ዓንሳራር /ሱኖ/ የከልን ኢካህ ማማኒኖን፡፡ 12. ያከካህ ጰጥሮስ ኡጉተህ ማዓጉላል የርደ፣ ታማርከ ማደጉል ዔጋ የህ የደለለዔ ዋክተ አስካረን አካህ ይምግኒዘህ ዪነ ሲሲሕ  ሀሪህ ሳራና ዲቦህ ዩብለ፣ የከ ጉዳህ አምድንቅክ ዲክህ ጋኄ፡፡ 

ኢየሱስ ላማ ተምሃራህ ዩመቡለወ

(ማር. 16፣12-13)

   13. ታማይ ለለዕ ኢየሱስ ተመሃሮኮ ላማይ ኤማሁስ አድይ ይኒን፣ ኤማሁስ ኢየሩሳለምኮ ኢንካንከ ታማን ኪሎመትሪያ ታከም ሚሪሕየህ ገይማ መንደር ኪኒ፡፡ 14. ኢሲን ለ ታይ የከ ጉዳይ ሙሉኡክ ኡጉሠኒህ ሲነሲነህ ዋሪሳይ ይኒን፡፡ 15. ታሃም ለ ዋሪሳህከ ዋንሲታንሃኒ ኢየሱስ ኢሰህ ተናድ ካብየህ ኢንኮህ ያድይኒም ኤዸዽሰ፡፡ 16. ያኮይ ኢካህ ሲኒ ኢንቲህ አብሊህ አቲያ ኪናም ያዻጎና ማዽዒኖን፡፡ 17. አሱክ ለ"አራሓል አድክ ታንንሃኒህ ዋንሲታክ ቲኒኒም አይም ኪኒ?"አክየ፡፡ ኢሲን ለ አኅዝንክ ቀጣ የኒህ ሶለን፡፡ 18. ተንኮ ኢንከቲ ቀሌዮጳ አክያንቲ"ኢየሩሳለም ካታማል ተከህ ታይ ለለዓድ ይምፍጺመ ጉዳይ ኡምቢህ አድገዋቲ ኮያ ጥራሕ ኪኒ?"አክየ፡፡ 

   19. ኢየሱስ"አይም ኪኒ ኡሱክ?"አክየ፡፡ ኢሲን ታህ የኒህ ኤልይምልሲን፣ ናዝሬ ኢየሱሲህ አሞል የከ ጉዳይ ኪኒአ! ኡሱክ ፉጎከ ሒያዊህ ነፊል ቃልከ ሢራሓህ ኃይለለ ነብይ ኪይይ ይነ፡፡ 20. ካህናት አሞይቲትከ መራኅቲ ራቢ ፊርደህ ቲላሰኒህ ዮሖይኒምኮ ላካል ታካረን፡፡ 21. ናኑ ለ እስራኤል ያይድኅነቲ ካያ ኪኒ ነህ ታስፋ አብነህ ኒነ፣ ያካከህ ታሃም ኡምቢህ ኢያህ ጉዳይ ይምፍጺመምኮ ካፊ ማዳሒ ለለዕ ኪኒ፡፡ 22. ኤረ ኒፋናድ ታነ ውልውል ሳዮ ኒይስግሪሚን፣ ኢሲን ካፋ ጊሞህ ማዓጋል የደይኒህ ይኒን፤ 23. ያከ ኢካህ ካአስካረን ማገኖን፣ ያነቲያ የከ! ታ መላእልክት ቢሶ ኑብለ አይክ ጋኄኒህ የመቲን፡፡ 24. ኖኮ ጋሪጋሪ ማዓጊ ኡላል የደይኒህ ሊኪዕ አጋቢ የምባል የከህ ገን፣ ኢየሱስ ለ ማብልኖን፡፡" 

  25. ኢየሱስ ታህ አክየ፣"አቲን አስትውዒለ ዋይታምከ ነብያት ዋንሲተም ኡምቢህ  ያምንኒምኮ ዓያይታም፡፡ 26. መሲሕ ታህ ሂዾለ መከራ ጋራዎከ ኢሲ ክብረል ሳዎ አካህ ኤዳይ ማናሆ?"27. ታሃምኮ ሳራህ ሙሴ ማጻሒፍቲኮ ኤዸዽሰህ ቁዱሳት ማጻሕፍት ሙሉኡድ ካዳዓባል ዋንስተኒም አጥቅስክ ተን ይርድኤ፡፡ 

  28. ኢሲን ኤልያድን መንደርል ካብየ ዋክተ ኢየሱስ ቲላየህ ያዴቲያህ ይምጊደ፡፡ 29. ኢሲን ለ ዲተሳይተህ አይሮይታ ታንታቦ ተህ ኪኒ፣ አማይጉል ኖሊህ ታል ማሕ የኒህ ጋዳህ ካዻዒመን፣ ታይ ምክንያታህ ተንሊህ ማሖ ድክድ ሳየ፡፡ 30. ተንሊህ ማይደል ድፈህ፣ ኢንገራ ናው ኢሰህ ሞሳ ጻሎት አበሚህ ላካል ዩቅሩሰህ አካህ ዮሖወ፡፡ 31. ታማይጉል ተን ኢንቲት ፋክተህ ኢየሱስ ኪናም የዸጊን፣ ኡሱክ ለ ዸህ ተን ነፍኮ ይምሱዉረ፡፡ 32. ኢሲን ሲነሲነህ አራሓል ያንንሃኒህ ዋንስታህከ ቁዱሳት ማጻሒፍት ለ አጥቅስህከ አይርድህ ናፍዓዶ ጊራባሊህ አምቀጸሊይ ማና?" ኢሲመን።

   33. ኢሲን ታማይ ሳዓት ኡጉተኒህ ኢየሩሳለም ጋኄኒህ የደይን፥ ታማል ኢንካንከ ታማን ሲኒ ዶባሊህ ኢንኮህ የከሄልኒህ ተን  ገየን፡፡ 34. ታማይ ዋክተ ኢንካንከ ታማን "ማዳሪ ኢየሱስ ዓድህ ኡገተ! ስምዖኑህ ዩቡሉወ!"አይ ዪኒን፡፡ 

  35. ላማ ተምሃራይ ሲኒ ደፍራህ አራሓል የከ ጉዳይከ ማዳራ ኢየሱስ ኢንገራ ዩቅሩሰ ጊዘ  አይናህ ኢሰኒህ የዸጊኒም አካህ ዋርሰን፡፡

ኢየሱስ ኢሲ ተምሃሮህ ዩመቡሉወ

(ማቴ. 28፣16-20፤ ማር. 16፣14-18፤ ዮሐ. 20፣19-23፤ሐ.ሥ.1፣6-8)

   36. ኢሲን  ለ ታሀም ዋንስታይ ያንንሃኒህ ኢየሱስ ኢሰህ ተን ፋናል ሶለህ "ሳላም ሲናህ ያኮይ!"አክየ፡፡ 

   37. ኢሲን ለ መንፈስ አብልያኒንም የከልኒህ ሓንካብተኒህ ማይሲህ ይሙዹዒን፡፡ 38. ኢየሱስ ለ ታህ አክየ፣"አይሚህ ሲኒ አፍዓዶድ አምጠረጠርክ ታኒን? 39. ይጋቦብከ ኢባብ ኡቡላይ ዮያ ኪናም ኢዽጋ፣ ሀሳስ ኢሳይ ይቡላ፣ ዮያድ ታብሊን መንፈስ ሓዶይታከ ላፋ ማለ፡፡"         

  40. ታሃም አክ የህ ኢሲ ጋቦብከ ኢሲ ኢባቢ ተን ይስቡሉወ፤ 41. ኢሲን ኒያትከ አድናቆት ማንጋኮ ኡጉተሚህ ገና አሚነካህ ዪኒን፡፡ ኢየሱስ ለ ኢንኪ በቲማ ጉዳይ ልትንሆ! የህ ተነሠረ፡፡ 42. ኢሲን ለ ዒንዳ ሶሊምተ ዓሣ አካ ዮሖይን፡፡ 43. ኡሱክ ጋራየህ ተን ነፊል በተ፡፡

   44. ታህ አክየ፣"ሲንሊህ ኢነ ዋክተ ሙሴ ሕገህ፣ ነብያትከ መዝሙር ማጻሕፍቲል ይዳዓባል ትምጽሕፈም ኡምቢህ ታምፋጻሞ ኤልታነ ኤዽኄህ ዋንሲተ ቃል ታይቲያ ኪኒ፡፡"

  45. ታሃምኮ ሳራህ ቁዱሳት ማጻሕፍት ያስታውዓሎና ዽዖና አእምሮ አካህ ፋከ፡፡ 46.ታሃም አክየ፣ "መሲሕ መከራ ጋራየለምከ ማዳሕ ለለዕ ራባኮ ኡጉተ ለም  ቶኮመህ ትምጽሒፈ፣ 47. ታማሃም ባሊህ ካሚጋዓህ፣ ንሲሓከ ኃጢአት ሕድጎት ወንጌል ኢየሩሳለምኮ ኤዸዽሰህ ኢሲሲ ባዾል ህዝበህ ሙሉኡድ አምስብከለም ዋንሲተ፡፡ 48. አቲን ለ ታይ ኡምቢህያህ ጉዳህ ማስኪር ኪቲን፡፡ 49. ሀይኪዮ አኑ ያ አባህ ታስፋህ መተሖዎ ሲናህ ፋራክ አኒዮ፣ አቲን ኃይሊ አጋናኮ ሲናህ ያምሓወም  ፋናህ ኢየሩሳለም ካታማል ሱጋ፡፡

ኢየሱስ ዓራናል የውዔ

(ማር. 16፣19-20፤ ሐ. ሥ 1፣9-11)

   50. ታሃምኮ ላካል ኢየሱስ ተና ኢየሩሳለም ካታማኮ የየዔህ አይከ ቢታኒያ ፋናህ ተን በየ፣ ታማል ጋቦብ ፋሕ ኢሰህ ተን የበረከ፡፡ 51. ተን አበረኪይ ያነሃኒህ ተንኮ ባዽሲመህ ዓራናል የውዔ፡፡ 52. ኢሲን ለ አካህ ይስግድኒህ ናባ ኒያታል ኢየሩሳለም ጋኄን፡፡ 53. ፉጎ ለ አይምስግኒክ ኡማንጉል በተ መቅደስኮ ባዽስማይ ማናዎን።