ጳውሎስ መልአክት ዕብራውያናል

          ሐዋርያ ጳውሎስ መልአክት ዕብራውያናል

  ሐዋርያ ጳውሎስ መልአክት ዕብራውያናል

ሳይማ       [ዸ ዹ ዺ ዻ ዼ ዽ ዾ]

     ታይ መልእክት ትምጺሒፈም ናባ ተቃውሞ ማደጉል ተን ኢምነት ራዖ ካብ አክየ ክርስቲያን ኡላል ኪይይ ዪነ፣ ይጽሒፈት ኢየሱስ ክርስቶስ፣ ፉጊ ጋባዔዋ አጋባቢራህ ኢሲ ሐቀ ለ አራሓህ ይቡሉወህ የከምኮ ያይባሎዎ፣ ታይ ክርስቲያን ሲኒ እምነቲህ ያፅናዖና ተን ያጥንክረ፣ ታሃም ለ ታከ ዋክተ አዶሐ ዓይነት ይበረረሄህ ያይቡሉወ፡፡1.ጋራየ መከራህ ዳዓባል  አባህ ሐቀህ ያምእዚዘቲያ የከ ኢየሱስ አማንጉልቲያ የከህ ፉጊ ባዻ ኪኒ፣ መዔፉጊህ ባዻ የከህ ለ አምዔለ ዋየ ኪዳኒህ ነቢያትኮ፣ መላእከትከ ኢሲ ሙሴ ሕገኮ  ኡካ ጋዳህ ናው ያቲያ ኪኒ። 2.ኢየሱስ የምዔለ /ብሉይ/ ኪዳኒህ ካህናትኮ ጋዳህ ናውየ ኡማንጉል ካህን ኪናም መዔፉጊ ኢሰህ የዸገ፡፡ 3.ኢየሱስ ደፍራኮ አማንት ኃጢአትኮ፣ ማይሲከ ራባኮ ያድኅነ፣ ኢየሱስ ካህናት አሞባዕላ  ኪናሚህ መጠንል ዕብራውያን ሃይማኖቲህ ሠርዓታትከ ሳዒ መስዋእት ጽላል ባሊህ አቡሉውይ ዪነ ድኅነት ሐቂቲያ ያኮ አበ፡፡ ይጽሕፈቲ ታማባሊህ ( እስራኤል ታሪክል ታምድገም ተከ ሒያውህ ኢምነት ምሳለ ባሊህ አምጥቅሚህ (ማዕ..11) አንበብቲ ሲኒ ኢምነቲህ ሲክ ዮና ተን ያይቡሉወ፣ታማምባሊ ማዕ፣12 አንበብቲ ተን  ኢንቲት ኢየሱስ አሞል ቲቱኩረህ ሲኒ እምነቲህ ታጽናዖናከ  አኪናን ዓይነትህ መከራከ ሥቃይ  ተን  ማዳጉል ቲዕጊሥቲ አቦና ተን ያምክረ፣ ባኪቶል ምክረከ ጥንቃቀ ቃል ዮሖወህ ባካ /ያድምድመ/።

___________ ____________________________________

ማዕራፋ 1

ፉጊ ኢሲ ባዺህ ደፍራህ ዋንስተም ባሊህ

 1.መዔፉጊ ዮኮመ ዳባናት አኪናን አራሓህ፣ ነቢያት ደፍራህ ኒ አቦቡህ ማንጎ ዋክተ ዋንሲተህ ዪነ። 2.ካዶ ለ ታይ ባክቶ ለለዓ ኡማን ጉዳይህ ወራሲ አበ ባዺ ደፍራህ ኖያህ ዋንሲተ፣ ዓለም ሙሉኡድ ይምፍጢረም ካያህ ኪኒ። 3.ኡሱክ መዔፉጊህ ኪበሪህ አይዳጋሓህ፣ ነጸብራክ/ ኪኒ፣ ኡሱክ ኢሰህ ኢሲ ባህሪህ ፉጎሊህ ፍጹሙ ትኪኪል ኪኒ። ሥልጣን ለ ኢሲ ቃላህ ዓለሚል ሙሉኡ ይድጊፈህ ይበዸ፣ ሒያው ለ ኃጢአትኮ ይይፂሬሚህ ላካል ዓራናል፣ ኢሲ ኃይላ ለ መዔፉጊህ ሚድጋል  ዲፈ፡፡

ፉጊ ባዺ ማላይካኮ /መላእክትኮ/ አጋናል ኪኒ

4.ካያህ ዮምሖወ ሚጋዕ መላእከቲ ሚጋዕኮ አጋናል ኪናም ኢዻህ ፉጊ ባዺ መላእክት አሞል ኪኒ። 5.አይሚህ መዔፉጊህ ማላይካህ ፋንኮ፣ "አቱ ይባዻ ኪቶ፣ ካፋ ኩዻለህ አኒዮ፣" ወይ "አኑ አባ አካህ አከሊዮ፣  ኡሱክ ይባዻ አከ ለ፣ "አክየ ቲያህ ኢንከቲ ሚያነ፡፡  6. መዔፉጊ ኢሲ ሪስ ባዻ ፋረህ ዓለሚል ሳይሳጉል፣ "ፉጊ መላእክት ኡምቢህ አካህ  ያስጋዶናይ" ያዽሔ። 7.ማላይካ ዳዓባል ለ፥   "ኢሲ መላእክቲክ ሓሐይ፣  አገልገልት ጊራ ሀልሀልታ ተን አባ" ያዽሔ፡፡ 8. ባዺ ዳዓባል ለ፤  "ኦ አምላኮ! ኩዙፋን ኡማንጉሉህ ማራ፣  ኢሲ  ማንጊሥቲ ጽድቀህ ታስሔደረ፣" 9.ጽድቀ ትክሒነ፣ ዓማፀ ትንዒበ፣ "ታይ ምክኒያታህ መዔፉጊ ኩ አምላክ ኩ ዶረ፣  ኩ ዶባኮ ለ ጋዳህ ኒያቲ  ዘይት ኮል ሐደ ያዽሔ። ሥራሕ ኪኒ፣"1.ኢሲን ኡምቢህ ያለዪን፣  "አቱ ለ ማራታ፣ ኢሲን ሣራ ባሊህ ያብልዪን፡፡" 12.ሲዶ ባሊህ ታምጥቅሊለ፣ "ሣረና ባሊህ ታምቅዪረ፣  አቱ ለ ኡማንጉል ኢንኪም ኪቶ /ማታምልውጠ፣/  ኢንኪጉል ማታምዔለ ያዽሔ፡፡ "13.መዔፉጊ መላእክቲ ፋንኮ፣  "ኩ ናዓብቶሊት ኩ ሥልጣኒህ ዳባል ኮህ አባም ፋናህ፣  ይምድጋል ዲፈይ" አክ የቲያህ ኢንከቲ ሚያ፡፡ 14.ኢቦል መላእክት ታድኅነም ያስጋልጋሎና ፋርምታ መዔፉጊህ አግልገልቲ የኪን  መናፍስት ማኪኖኑሆ?

ማዕራፋ 2

ድኅነት  ናብነ

1.. አማይጉል ኖበ ጉዳይኮ ኑፉቱሔህ ራድናምኮ፣ ኖበ ጉዳይህ ዳዓባል ጋዳህ ሰሊኖ ኖልታነ፡፡ 2.ማላይካ ዳዓባል ኖክ የን ቃል ሪጊጸይና የከ፣ ታይ ቃልኮ ቲላየ ቲያከ ታይ ቃላህ አምኢዚዘ ዋቲ ኤዻ ቅጽፅዓት ጋራ፡፡  3.ኢቦል ናኑ ታይ ና አባህ ድኅነትኮ ዒሲሲናም የከምኮ አይናህ ነህ አክ ናውዔ /ናምልጠ/? ታይ ድኅነት ኤዸዾይታህ ይይቢሥረቲ ማደሪ ኢሰህ ኪኒ፣ ቶበ ሒያው ታሃም ኖህ ዓዶሰን፡፡ 4.መዔፉጊ ምልእክታት፣ ደንቀ ኪን ጉዳያት፣ ኢሲሲ ታምራት አባከ ካፍቃድ ባሊህ ቲምዕዲለም መንፈስ ቁዱስ  መተሖዎህ ደፍራህ ተን ማስኪር ሲክ የዽሔህ ይጽንዔ፡፡

ድኅነት መራሒ

 5.መዔፉጊ ባሶቱላል ታሚተም፣ ታይ ኤልዋንሲና ዓለሚህ ማላይካህ አካህ ማስጋዛኢና ኡኮ፡፡ 6.ኤረ ለ ቁዱሳት ማጻሒፍቲል ኢንኪ ቦታል ታህ የን "አቱ ካያ ታሕሳቦ ሒያውቲ አይምቶ ኪኒ? ካያህ አካህ ሰሊቶ ሒያውቲ ባዺ አይምቶ ኪኒ?"  7.ዳጎ ዋክተህ ማላይካኮ ቱስዑንዹወ" ኪብረከ ሞሳ  ዘውድ አክተረህ ቱይሱኩዔ፣ [ኢሲ ጋባህ ሥራሒህ አሞል ረዲሰ፡፡]

  8.ኡማን ጉዳይ ካ ሥልጣኒህ ዳባል አካህ ሃይተ፡፡" ኡማን ጉዳይ ካ ሥልጣኒህ ዳባል አካህ አባህ፣ ካ ሥልጣኒህ ዳባል አካህ ሃየካህ ራዕሰምኮ ኢንኪ ጉዳይ  ሚያነ፡፡ ያኮይ ኢካህ  ካዶ ኡማን ነገር ካ ሥልጣኒህ ዳባል ኪናም ገናህ ማብሊኒኖ፡፡ 9.ካዶ ለ ማላይካኮ ዳጎ ዋክተህ ላታ የህ ዪነቲይ፣ ራቢ መከራ ጋራየርከህ ምክኒያታል ኪብረከ ምሥጋና ዘውድ የመረ ኢየሱስ ናብለ፣ ኡሱክ መዔፉጊህ ጸጋህ ኡማኖያህ ራበ፡፡ 10.ኡማን ጉዳይ ፉጎህከ መዔፉጎህ ቲምፍጢረም ኪኒ፣ ማንጎ ዻይሎ ኪብረል ባሆ የህ ድኅነት ኡላል ተን ያይምሪሔ ኢየሱስ ተን ሔልዋያል  ፉጹማን ተን አቦ ኤደ፡፡ 11.ሒያው ቁዱሳን አባቲያከ ካያህ ቁዱሳን ተከ ሒያው ኢንኪ አባህ ዻሎ ኪኖን፣ ታይ ምክኒያታህ ኢየሱስ ተና "ይሳዖል" የህ ደዖ ማሖላሲታ።12.አማይጉል ቁዱሳት ማጻሕፍቲል ፣ "ኩ ሚጋዓህ ኢኒ ሳዓዖል አይብሢረ፣ ማኅበር ፋናድ ለ ዜማህ አይምስጊኒክ" አኒዮ ያዽሔ። .ታማም ባሊህ ለ "ኢኒ ኢምነት ካ አሞል ዒደህ አኒዮ" ያዽሔ፣ ታማሃም ባሊህ "ሀይከ ዮከ ፉጎህ ቶምሖወ ዻይሎ" ያዽሕ፡፡

14.ማይጉል ዻይሎ / ኢሪ/ ኃዶይታከ ቢሎህ ለ ሒያው ኪኖኑም ኢዻህ ፣ ኢየሱስ ለ ተና ባሊህ ሒያውቶ የከ፣ ታሃም አበም ካ ራቢህ ምክኒያታል ካ ራቢህ አሞል ኃላፊነት ለ ዲያብሎስ ያስዓሮ ኪኒ፡፡ 15.ታማም ባሊህ ራቢ ማይሲህ ምክኒያታል ዒድመ ሊኪዕ ባርነቲህ አምግዝኢክ ቲነም ያይዳኃኖ ኪኒ ፡፡ 16.አይሚህ ኢየሱስ ጉራም ማላይካ ጎሮኒሶ አከካህ፣አብራሃም ዳራ ጎሮኒሶ ይሕሲበህ ኪኒ፡፡ 17.አማይጉል ኡማን ጉዳህ ሳዖሉህ ታማጋዶ ኤደ፣ ታይ ዓይነቲህ ሒያዋህ ኃጢአት ያዳምሳሶ የህ ፉጎ ያስጋልጋሎ ያምኢሚነቲያከ ማሐሪ ኪን ሊቀ ካህናት የከ፡፡18.ኡሱክ ኢሰህ ይምፍቲነ ዋክተ መከራ  ጋረየጉል፣ታምፍቲነም ጎሮኒሶ ዽዓ፡፡

ማዕራፋ 3

ኢየሱስ ሙሴኮ አጋነል ኪኒ

1.መዔፉጊህ ደዖ ጋራይተ ቁዱሳን ይሳዖሎ! ኒ ኢምነቲህ ሐዋርያትከ ካህናት አሞይታ የከ ኢየሱስ ኢሕሲባ፡፡ 2.ሙሴ መዔፉጊህ ዓረድ ሙሉኡክ ኡሙን የከህ ዪነም ባሊህ፣ ኢየሱስ ለ ካረዲሰ መዔፉጊህ ታአማኒ ኪይይ ዪነ። 3.ዓረ ሥራሓቲ ዓረኮ ናቢህ ያይሰ ኪብረ ለምባሊህ ኡምቢህ፣ ኢየሱስ ለ ሙሴኮ አጋናል ያይሰ ኪብረህ ኤዳቲያ የከህ ገይመ፡፡ 4ሪጊጺህ ዓሪ ሙሉኡክ አባቲያ ለ፣ ኡማን ጉዳይ አባቲይ ለ መዔፉጎ ኪኒ፡፡ 5.ባሶቱላል ዮና ኤዳ ጉዳይ ማስኪር ያኮ ሙሴ መዔፉጊህ ዓረድ ሙሉኡድ ዓስበንታ ባሊህ ያምኢሚነቲያ ኪይይ ዪነ ፡፡ 6.ክርስቶስ ለ ፉጊ ዓረድ ታአማኒ ኪን ባዻ ባሊህ የከህ ኪኒ፣ ካዓሪ ለ ኖያ ኪኒ፣ ካዓረ ናከም አካህ ናምኤመመነ ጉዳይከ አካህ ናምኪሔ ታስፋ ሲክ ኢሰነህ ኒቢዸምኮ ኪኒ፡፡

ፉጊህ ሕዝቢ ዕረፍተ ገያ

 7.አማይጉል መንፈስ ቁዱስ ያምባሊህ፣  "ካፋ  ድምፀ አክ ታቢንጉል፤  8. ባራካል ይትፍቲኒን ዋክተ ትዕምጺኒሚህ ዓይነቲህ ሲኒ አፍዓዶ ሂሊከይና ማብና፣  9.ታማል ሲን አቦብ ይይፊቲኒን የ፣ ዮድ የምወደደሪን፣  ሞሮቶም ኢጊዲያ አበም ኡቡላ" ያዽሔ መዔፈፉጊ፡፡ 10."አማጉል ቶይ ማባኮል  ኡቁቱዔ ተን አፍዓዶ ኡማንጉል ታምገገየ፣  ያራሕ ማዻጊኖን ኤዽሔ።"11.ለል ፤ "አኑ አካህ አሐየ ዔረፍቲ ቦታል ኢንኪጉል አድማሳአን፣ ኤዽሔህ ኢኒ ቁጡዓህ ዺውተህ" አኒዮ። 12.ይሳዖሎ! ሲንኮ ኢንከቲ ያነ መዔፉጎኮ ሚሪሕ ኢሳ ኡማቲያከ አምነዋታ አፍዓዶ ያለምኮ ሰሊታ፡፡ 13.ጋዳህ  ሲንኮ ኃጢአታህ የምተለለህ ሂልከና  ያከምኮ "ካፋ" ያን ዋክቲ ያነም ፋናህ ኢሲሲ ለለዕ አመከከሪክ ኤምረደደአ፡፡ 14.አይሚህ ኤዸዾይታህ ሊይክ ኒነ ኢምነቲህ አገባቢራ አይከ ባክቶ ፋናህ ሲክ ኢስነህ ኒብዸምኮ፣ ክርስቶስሊህ ወረስት አከሊኖ፡፡15."ታሃም ካፋ ዲምጸ  አክ ታብንጉል፣ታማል ቲዕምፂኒሚህ  ዓይነቲህ ሲኒ አፍዓዶህ ሂልክ ለቲያ ማብና የኒህ  አክየኒም ባሊህ" ኪኒ፡፡ 16.ኤረ ተከሚህ ቶይ አንዻሕ ቶበህ ቲዕምፀም ኢያ ኪይይ ዪኒን? ኢሲን ሙሴህ አምርሒክ ግብጸኮ ተወዔም ኡምቢህ ኪይይ ማናዎንሆ? 17.ፉጊ ሞሮቶም ኢጊዲያ ሙሉእ ካአስቁጡዒክ ማርተም ኢያ ኢያ ኪይ ዪኒን? ቶሆም ኃጢአት ሥራሕተምከ ተን ባድኒ ባራካድ ራደህ አክራዕተም ማኪኖንሆ? 18.ለል ቶሆም አምኢዚዘዋይተም አከዋይተምኮ በሒህ ይዔረፍቲል ማሳይታን የህ አካህ ዺውተም ኢያ ኪኖኑ? 19.አማይጉል ሳይቶ ታንተም አምነዋየን ኢርከህ  ምክኒያታል ኪኖኑም ናብለ፡፡

ማዕራፋ 4

 1.አማምባሊህ ኡሱክ ኖህ ዮሖወየ ዕረፍት ቦታ ናንዳቆ ጋራይነ ታስፋ ገና ጺንዕቲያ ኪንጉል፣ ሲንኮ ኢንከቲ ታይ ዔረፍቲህ ቦታል ሳይናሚህ ዒደል ገየካህ ራዓምኮ ኡምቢክ ለ ማይሲህ ናጣንቃቆይ፡፡ 2.አይሚህ መዔ ዋረ ኢሲን ዮቢኒም ባሊህ ናኑ ለ ኖበ፣ ያከካህ ኢሲን ዮቢን ቃል ኢምነቲህ ማጋራይኖንጉል ተን ማጥቃሚና፡፡3.መዔፉጊ፣"አኑ አሐየ ዔረፍቲ ቦታል ኢንኪጉል ኤድማሳያን  ኤዽሔህ ቁጡዓህ ዽውተህ" አኒዮ የምባሊህ፣ ናኑ ታሚነሚክ ቶይ ፉጊ ኖህ ያሓየ ዔረፍቲ ቦታል ሳየሊኖ፣ አማይጉል መዔፉጊህ ሥራሕ ዓለም ይምፍጢረምኮ ኤዸዺሰህ  ያምጠነቀቀ ማለት ኪኒ፡፡ 4.አይሚህ ለ ማላሓኒ ለለዒህ ዳዓባል ኢንኪ ቦታል፣ "መዔፉጊ ሥራሕኮ ሙሉኡድ ማላሓኒ ለለዕ ዩዕሩፈ" የህ ይምጺሒፈ፡፡ 5.ታማም ባሊህ ታማይ ስፍራህ አሞል ጋባዔህ፣ "አኑ አካህ አሐየ ዔረፍቲ ቦታል ኢንኪጉል ማሳያን"ያዽሔ፡፡ 6.ቶይ መዔ ዋረ ኤዸዾይታህ ቶበም አምኢዚዘ ዋንርከህ ምክኒያታል ፉጊ አካህ ዮሖወ ዔረፍቲ ቦታል ማሳይኖን፣ የከሚህ ታማድ ሳዎና አካህ ይምፊፍቂደ ጋሪጋሪ ዪኒን።  7.ታሃም ኦኮመህ ሲን ኢስጢንቂቀም ባሊህ፣ "ካፋ ካአንዻሕ  ታብንጉል፣  ሲኒ አፍዓዶ ሂልክ ለቲያ ማቢና" ኤህ፣ መዔፉጊ ማንጎ ዳባናትኮ ላካል ዳዊት አራሓህ ዋንሲተ ቃላል "ካፋ" የኒህ ደዕምማ ለለዕ ይውሲነርከህ የምረገገጸ፡፡  8.ኢያሱህ መዔፉጊ ዔረፍቲ ቦታ አካህ ዮሖወህ የከህ ያከዶ፣ መዔፉጊ ጋባዔህ "ካፋ" ያናማህ አኪ ለለዕህ ዋንሲተ ማዻዺና፡፡ 9.አማይጉል መዔፉጊህ ሕዝበህ ሳንባት ዔረፍቲህ ኢጊድ ዔረፍቲ ገናህ አክራዓ፡፡10. አይሚህ መዔፉጊ ሥራሕኮ ይዕሩፈምባሊህ፣ታማም ባሊህ መዔፉጊ አካህ ያሐየ ዔዕረፍቲ ቦታል ኤዳ ዒለህ ሥራሕኮ ያዕሩፈ፡፡ 11.አማይጉል አንኪናንቲ ቶይ ሒያዊህ አማአዛዝ ዋይቲ ይኪቲለህ ራዳምኮ፣መዔፉጊህ ዔረፍቲ ቦታል  ሳይኖ ናትጋሆይ፡፡ 12.ፉጊ ቃል ያነቲያከ ሥራሐቲያ ኪኒ፣ ላማ አፍለ ሰይፍኮ አጋናል ጋዳህ ሊልግቲያ ኪኒ፣ ናፍሰከ መንፈስ፣ ባኖይታከ ቅልጺም ባዽሲማናም ፋናህ ያገረዔቲያ ኪኒ፣ አፍዓዶክ አዳድ ሱዑተ ሐሳብከ ቲምኒት ይምርሚረህ ያፍሪደ ቲያ ኪኒ፡፡ 13.መዔፉጊህ ነፊኮ ሱዑታ ኢንኪ ፊጥረት ሚያነ፣ ካ ኢንቲህ ነፊል፣ ኡማን ጉዳይ ግልፀህከ ኦናህ /ዓሲክ/ የክህ ያምቡሉወቲያ ኪኒ፣ ናኑ መልስ ናሓዎ ኖህ ኤዳም ካነፊል ኪኒ፡፡

የሱስ ናባ ሊቀካህናት ኪኒ

14.አማይጉል ዓራናል የውዔ ናባ ሊቀ ካህናት ሊኖጉል ኒኒ ኢምነት ሲክ ኢሲነህ ናባዾይ፣ ኡሱከ ለ ፉጊ ባዻ ኢየሱስ ኪኒ፡፡ 15.አይሚህ ናኑ ሊኖ ሊቀ ካህናት ኒ ሩክታህ ኖህ ናኅሩሮ ዺዓቲያ ኪኒ፣ ኢንኪጉል ኡካ ኡሱክ ኡማን ጉዳህ ኖያ ባሊህ ይመፍቲነህ የከሚህ ኢንኪጉል ኃጢአት ማሥራ ሒና፡፡ 16.አማይጉል መሕረት ጋራይኖከ ኒ ጉርሱሳ ዋክተ ኒጎሮኒሳ ጸጋ ገይኖክ፣  ጸጋ ኤደገይምታ መዔፉጊህ ዙፋናል ናም አማማኖዋይ ካብኖዋይ፡፡

ማዕራፋ 5

1.ኢሲሲ ካህናት አሞይቲ ሒያው ፋንኮ ዶሪምመህ ኃጢአት መሐረት ገይሲሳ ማባእከ መሥዋዕት ካብ ኢሶ ፉጎ ያብለ ጉዳዪህ ዳዓባል ሒያው ይውክለህ ረዳ፡2.ኡሱክ ኢሲ ሩክታህ ይምዽብዸቲያ ኪኒጉል ዶናቁርከ ሲሕተተ ለም ሪኅራኄህ ተን ያይባላዎ ዺዓ፡፡3.ኡሱክ ኢሲ ሩክታህ ይምዽብዸቲያ ኪኒጉል ኃጢአት ኅድጎት ገይሲሳ መሥዋዕት ያስቃራቦ ኤዳም ሕዝበህ ጥራሕ አከካህ ኢሲ ዸግኃህ ለ ኪኒ።4.አሮን ባሊህ ፉጎህ ደዕምመቲያ የከህ አከ ዋየምኮ ኢንከቲ ታይ ኪብረ ኢሲ ጋባህ ማበያ፡፡  5.ታማባሊህ ክርስቶስ ሊቀ ካህናት ያኪኒሚህ ኪብረ ኢሲ ጋባህ ማበዪና፣ያኮይ ኢካህ ኡሱክ ሊቀ ካህናት ያካኒሚህ ኪብረ ገየም፣  "አቱ ይባዻ ኪቶ፣  አኑ ካፋ ኩዻለህ አኒዮ" አክየ መዔፉጎኮ ኪኒ፡፡6.አኪ ቦታል መዔፉጊ፣  "መልከ ጼዴቅ ባሊህ ክህነት ረዳህ። አቱ ኡማንጉሊ ካህን ኪቶ" አክያ ፡፡ 7.ኢየሱስ ሒያውቶ የከህ ታይ ባዾል ዪነ ዋክተ ራባኮ ካ ያይዳኆ ዺዓ አምላካድ ናባ ደሮከ ማንጎ ዺሞህ ጻሎትከ ዻዒምቶ ካብ ኢሰ፣ቲሕቲናህከ አምአዛዘህ ፉጎሎ ጻሎት አበጉል ካዮበ፡፡  8.ምንም ኡካ መዔፉጊህ ባዻ የከሚህ፣ ጋራየ መከራኮ አምአዛዘ ይምሂረ፡፡9.ፍጹም የከህ ገይመምኮ ላካል ታምእዚዘሚህ ኡምቢህ ኡማንጉሊ ድኅነቲህ ምክነያት አካህ የከ፡፡  10.ፉጊ መልከ ጼደቅ ክህነቲህ ረዳህ፣ ሊቀ ካህናት አበህ ረዲሰ፡፡         

ሒያው ምገገይምኮ ቶምሖወ ጥንቃቀ

1.ታይ ጉዳህ ዋንሲናምኮ ማንጎ ጉዳይ ያነ ፣ ያኮይ ኢካህ ሲን አስታውዓልቲ ዺዕ ዒንዻቲያ ኪናም ኢዳህ ያይራዳኦና ጸገም ኪኒ ፡፡ 12.ካዶ ፋናህ ዪነ ዋክተል አቲን መምህራን ታኮና ሲናህ ኤዳይ ዪነ ፣ ያከካህ  መዔፉጊህ ቃል  ኤዸዾይታ ትምሂርቲ  አኪ ሒያውቲ ጋባዔህ ሲን ያይማህረጉል ያይሰ፣ ሲን ጉርሱሳም ሐን ኪኒ ኢካህ ካፊን ፈሎ ማኪ ፡፡ 13.አይሚህ ሐን ዾዋቲ ኡምቢህ ሕፃን ኪንጉል ጽድቂ ሚሂሮ ማጋሊና /ማምላማማዲና/፡፡ 14.ካፍን ምግበ ጉርሱሳም ለ መዔምከ ኡማም ባዺሳናሚህ ሊምደ ለም ናባ ሒያው ኪኖን፡፡

ማዕራፋ 6

 1.አማይጉል ክርስቶስ ዳዓባል ተምሖወ ኤዸዾይታ ሚሂሮ ኃብነህ፣ ፍጹም ኪን ሚሂሮድ ቲላይኖይ፣ ራበ ሥራሕኮ ንሲሓ ሳኣናምከ ፉጎል ያሚኒኒሚህ መሠረቲል ጋሕነህ ናማሥራቶይ፡፡ 2.ታማም ባሊህ ጥምቀቲህ፣ ጋባ አሞክ ሃናም ፣ ራባኮ ኡጉታናም፣ ኡማንጉሊ ፊርዲህ ሚሂሮኮ ጋሕነህ ናማስራቶ፡፡ 3.ጋዳህ ባሶቱላል ናዳዎይ፣ መዔፉጊ ኖህ ይፍቂደምኮ ታሃም አበልኖ፡፡ 4.አራሕኮ ተውዔ ሒያው ንሲሓል ደሄዮና አይናህ የህ ዺዕማ! ታይ ሒያው ኡኮ ታሃምኮ ባሶህ ኢፊ አካህ ኢፎየህ ዪነ፣ ዓራንቲ ጉሮን ዻዓመኒህ ዪኒን፣ መንፈስ ቁዱስ ቲምሰተፈም የኪኒህ ዪኒን፡፡ 5.ፉጊ መዔ ቃልከ ያሚተ ዓለሚህ ኃይላ ዻዓመኒህ ዪኒን፡፡ 6.ታሃም ኡምቢህ ኢያኮ ላካል አራሕኮ የውዒኒምኮ፣ ተና ንሲሓ ቱላል ደሄዮና ማዽዒማ፣ አይሚህ ኢሲን መዔፉጊህ ባዻ ጋባዔኒህ ይስቅሊን፣ የይወረዲን ፡፡ 7.ማንጎ ዋክተ ተ አሞል ራዳ ሮብ ቶዖበ ባዾ ፥ ታክለ ኤልያትክለ ሒያውቶህ ጥቅመ ታሐየ ቲያ ኪናም ኢዻህ ፉጊ ተየበረከ፡፡ 8.ከናንከ ዳራንደር ቡሉሳጉል ለ ጥቅመ ሂንቲያ ታከ፣ አባሪምቶ ካብተህ ታነ፣ ተ ባኪቶ ጊራድ ቦሎላናም ኪኒ፡፡ 9.ይሳዖሎ! ኢንኪጉል  ኡካ ታሃም ዋንሲነሚህ አቲን ሲን ድኅነትኮ ገይማ ያይሰ በረከት ሊቲኒም ናዽገ፡፡ 10.መዔፉጊ ቁኑዕ ፈራዲ ኪኒ፣ ሲን ሥራሐህ ባሶህ ያኮይ ካዶ ቁዱሳን ጎሮኒሳክ ካሚጋዒህ ቱይቡሉዊን ካሓኒ ማቢያይሲማ፡፡ 11.አቲን ኡምቢክ ለ ታስፋህ ኢላላታን ጉዳይ ጋባድ ታዕኩቲኒም ፋናህ ሲኒ ትግሃት አይከ ባክቶ ፋናህ ታስባላዎና ናቲሚኔየ፡፡ 12.ናቲምኔየም ለ ኢምነትከ ትዕግሥቲህ ሲክ ተኒህ  ታስፋህ አካህ ዮምሖወ ጉዳይ ታውሪሰ ሒያዋህ ታማጋዶና ኪኒ ኢካህ ታስፋ ማሎሊ ታኮና ማኪ፡፡

ፉጊ ታስፋህ ዓዶም /ርግጽ/ ኪናም

     13.ፉጊ አብራሃማህ ታስፋ ዮሖወ ዋክተ፣ አካህ ዽዊተም ካኮ ያይሰ አኪማሪ ኢንከቲ ማናጉል ታህ የህ ኢሳሞህ ዺዊተ፡፡ 14."ዓዲህ  ኩ አበረከ ሊዮ፣ ኩዳራ አይመንገሊዮ፡፡ "15.አብራሃም ትዕግሥቲህ ኢላለህ ታስፋ አካህ የከ ጉዳይ ገየ፡፡ 16.ሒያው ዺዊታህ ተንኮ ያይሰ ሚጋዓህ ዺውታን፣ ሲኒ ዋኒህ ዺዋህ ይጢንኪሪኒህ ተን ፋናድ ያነ ኪርኪር ሙሉኡክ ያይለዪን፡፡ 17.ታይ ዓይነቲህ መዔፉጊ ካ ውሳነ ማታምሊዊጠም ያይራዳኦ ጉረህ፣ ታስፋህ ታውሪሰሚህ ታስፋ ወረስቲህ ዺዋህ አካህ ያይጽኒዔ፡፡ 18.ታይ ዓይነቲህ ፉጊ ውሳነ አምልውጠ ዋይታቲያከ ኤልዲራቢተዋን፣ ላማ ጉዳይ፣ ማለት ለ ታስፋከ ዺዋ ኖህ ዮሖወ፣ ታይ ላማ ጉዳዪህ አራሐህ ኒ ነፊል ታነ ታስፋ ሲክ ኢስነህ ናባዾ ዽዒኖ ፂግዔ /መጻጋዕታ/ ገይኖ ካኡላል ኩድነ ናኑ፣ ኃይላለ አምጻናናዕ ገይና፡፡ 19.ታይ ታስፋ ኒ ሕይወቲህ አምነቀነቀዋ ያይኤመመነ መልሕቅ /ባሕሪ ወደቢል መርከብ አካህ ሶሊሰንቲያ/ ኪኒ፣ ኡሱክ ለ ማጋረይዛኮ ቲላሃ መቅደሲል ሳ፡፡ 20.ታይ መቅደሲል ኢየሱስ መልጼዴቅ ክህነቲህ ረዳ ባሊህ ኡማንጉሊት ሊቀ ካህናት የከህ፣ ኒኖያህ ዮኮመህ ኖህ ሳየ፡፡

ማዕራፋ 7

ካህን መልከ ጼደቅ

      1.መልከጼዴቅ ሳሌም ኑጉሥከ ናባ ፉጊህ ካህን ኪኒ፣ ታይ መልከ ጼዴቅ አብራሃም ነገሥታታክ ሱበህ  ጋሓሃኒህ አራሓል ቲታገኒህ የበረከ፡፡ 2.አብራሃም ለ ይቢዸ ጉዳይኮ ኡምቢህ አሥራት የየዔህ አካህ ዮሖወ፣ [ሚጋዕ ቱርጉም ኤዸዾይታቲ "ጽድቅ ኑጉሥ" ማላሚ "ሳሌም ኑጉሥ" ወይ ሳላም ኑጉሥ ማለት ኪኒ፡፡ ] 3.መልክጼዴቅ አባከ ኢና ወይ ዻልቶይቲ ሐረግ ማለ፣ ዳባን ኤዸዾይታህ፣ ካ ሕይውቲህ ባኪቶ ማለ፣ ታይ መልክጼዴቅ መዔፉጊህ ባዺህ ምሳለ የኪህ ኡማንጉህ ካህን የከህ ማራ፡፡  4.ታይ ሒያውቲ አይናህ የህ ናበቲያ የከም ኡቡላ! ነገድ / ዘር/ አባ የከ አብራሃም ኡካ የመረከህ ገየ ጉዳይኮ አሥራት የየዔህ አካህ ዮሖወ፡ 5.ቶይ ክህነት ሥራሒህ አሞል ትምዲበም ሌዊ ዳራከ ካሕዝበኮ አሥራት ጋራዎና ሙሴ ሕገህ አካህ ይምኢዚዘ፣ ኤረ ኡኮ ታይ ሕዝቢ ለ አብራሃም ዳራከ ተን ሳዓል ኪኒ፡፡ 6.ኢንኪጉል ኡካ ቶይ መልከጼዴቅ ሌዋውያን ወገን / ዳራ/ አከ ዋይሚህ አብራሃምኮ ሥራት ጋራየ፣ ታስፋ ቃል አካህ ዮምሖወህ አብራሃም ለ የበረከ፡፡ 7.ቡራከ ጋራየቲያኮ አጋናል፣ ቡራከ ያሐየቲኮ ያይሰም ያምጠረጠሪኒም ማለ፡፡ 8.ውሊ ወገኒህ አሥራት ጋራይታም ራቦንቲት የኪን ሌዋውያን ኪኖን፣ አኪ አራሓህ  ለ አሥራት ጋራይታም ያነቲያ የከህ ማራህ አካህ ይምስኪሪንቲ መልክጼዴቅ ኪኒ፡፡ 9.አማይጉል አሥራት ጋራዎ ኤዳ ሌዊ ኢሰህ አብራሃም አራሐህ አሥራት ዮሖወ ማለት ኪኒ፡፡ 10.አይሚህ መልከጼዴቅ አብራሃምሊህ ቲታ ገየን ዋክተ ሌዊ ኢሲ አባ አብራሃምኮ ገና አቡከካህ ዪነ። 11.አማይጉል ሕዝበህ ሕጊ የምሖውም ሌዊ ኪህነቲህ ሪምዲህ ኪኒ፣ ታይ ኪህነት ፉጹም የከህ ያከዶ፣ አሮን ኪህነት ረዳ አከካህ፣ መልከጼዴቅ ኪህነት ረዳ ለቲያህ አኪ ካህን ባሃናም ጉርሱሰ ማዻዺና፡፡12.አይሚህ ካህን ያምቂይረጉል /ያምሊዊጠጉል/፣ ሕጊ ለ ያምቃያሮ ኤዳ፡፡ 13.ታሃም  ኡምቢሀ አካህ ዋንሲተን ካህን አኪ ነገድኮ ኪኒ፣ ታይ ነገድኮ ኢንከቲ መሥወዒቲ ካብ ኤልሳናል ካብየህ ይስጊልጊለቲ ሚያነ፡፡ 14.ኒ ማደሪ ይሁዳ ነገድኮ ኪናም ቲምዽገም ኪኒ፣ ያኮይ ኢካህ  ሙሴ ካህናቲህ ዳዓባል ዋንሲታህ ይሁዳ ነገድ ይስቡሉወህ ዋንሲተምኮ ኢንኪ ጉዳይ ሚያነ፡፡                             ክርስቶስ መልከጼዴቅ ባሊህ የከ ካህን ኪኒ

  15.ታይ ጉዳይ ጋዳህ ጊልጸ የከህ ገይማም መልከጼዴቅ ባሊህ ኪን አኪ ካህን የመተምኮ ኪኒ፡፡ 16.ኡሱክ ካህን የከም ኃዶይታ ሕጊህ መሠረቲህ አከካህ አምሲዒረ ዋ ሕይወቲህ ኃይላህ ኪኒ፡፡ 17.አይሚህ፣ "መልከጼዴቅ ኪህነት ረዳ ባሊህ አቱ ኡማንጉሊ ካህን ኪቶ" የኒህ አካህ ይምስኪሪን፡፡ 18.ባሶ ቲኢዛዝ ሩኩቲያከ አጥቅመዋቲያ ኪይይ ይነጉል ይምሲዒረ፡፡ 19. አይሚህ ሙሴ ሕገህ ኢንኪ ጉዳይ ዓዶቲያ  /ፍጹም/ ያኮ ማዽዒሚና፣ ካዶ ለ ፉጎድ ካብ አካህና ታይሰ ታስፋ ተመተ፡፡ 20.ታሃምኮ በሒህ ታይ ኪህነት ዺዋሂኒም ያከቲያ ማኪ ፣ ታሃምኮ ባሶህ ካህናት ተከም  ዺዋ ሂኒም ኪኒ። 21.ኡሱክ ለ ካህን የከም ዺዋህ ኪኒ፣ አይሚህ፣ "ማደሪ አቱ ኡማንጉሊ ካህን ኪቶ የዽሔ ዺውተ፥  ሚያነሰሔ" የህ ዋንሲተ፡፡  22.ታይ ዺዋህ ምክኒያታል ኢየሱስ ያይሰ ኪዳናህ ሓቢ የከ፡፡ 23.ራቢ ሳባታል ኢንኪ ካህን አምልውጠካህ ሥራሕ አሞል ኡማንጉሉህ ማሮ ማዽዓም ኢዻህ፣ ባሶ ካህናቲህ ሎይ ማንጎም ኪይይ ዪነ፡፡  24.ኡሱክ ለ ኡማንጉሉህ ማራቲያ የከጉል  ካ ካህነት አምልውጠ ዋቲያ ኪኒ፡፡ 25.አማይጉል ተናህ ዻዒሞ ኡማንጉሉህ ማራቲያ  የከህ ማራጉል፣  ካኡላል ታሚተም ኡምቢህ ዓዲህ ተን ያይዳኃኖ ዺዓ፡፡ 26.አማይጉል ኒ ጉርሱሳም ኖህ ያይሶኖዶወ ኒ ሊቀ ካህናት ኢየሱስ ኪኒ፣ ኡሱክ ቁዱስ ኪንቲያ፥ ታምኒቂፈም ሂንቲያ፥ ጽሪይቲያ የከህ፥ ኃጢአት ለምኮ  ባዽሲመህ፥ ዓራንኮ አጋናል ናው የቲያ  ኪኒ፡፡ 27.ኡሱክ ኡኮ አኪ ሊቀ ካህናት ባሊህ ኤዸዾይታህ ኢሲ ኃጢአታህ፣ ላካል ሕዝቢ ኃጢአታህ ኡማንጉል መሥዋዕት ካብ ኢሶ ካማጉርሱሳ፣ አይሚህ ኢሰ መሥዋዕቲ አበህ ካብ ኢሰ ዋክተ ታይ ጉዳይ ጋባዕሲሰዋይታ አጋባቢራህ ይፊፂመ። 28.ሙሴ ሕጊ ሊቀ ካህናት አበህ ረዲሳም ሩኩት ሒያው ኪኒ፣ ሕገኮ ላካል  ተመተ ዺዋ ቃል ግን ኡማንጉሉህ ሙሉእ ፉጹም የከ  መዔፉጊህ ባዻ ረዲሰ፡፡                                      

 ማዕራፋ 8

ኢየሱስ ዑሱብ ኪዳኒህ ሊቀ ካህናት ኪኒ

   1.አማይጉል አካህ ዋንሲና /ኤልዋንሲና/ ጉዳያትኮ ዋና ጉዳይ ታይ ቲያ ኪኒ፣ ዓራናል መዔፉጊህ ናባ ዙፋኒህ ሚድጋል ዲፈየ ታህ ኢጊዲን ሊቀ ካህናት ሊኖ፡፡ 2.ኡሱክ ያስግልጊለ ሐቂ ዱካን  የከ መቅደስ ኪኒ፣ ታይ ዱካን ይምቲኪለም ሒያው ጋባህ አከካህ መዔፉጎህ ኪኒ፡፡  3.ኢሲሲ ሊቀ ካህናት ረዳም ማባእከ መሥዋዕት ካብ ኢሶ ኪኒ፣ አማይጉል ታይ ካህን ለ ካብ ኢሳ ኢንኪ ጉዳይ ያናዎ ጉርሱሳ፡፡ 4.ኡሱክ ባዾል የከህ ያከዶ ካህን አከ ማዻዺና፣ አይሚህ ሙሴ ሕጊህ መሠረቲህ መባእ ታስቂረበ ካህናት ያኒን፡፡ 5.ኢሲን ያስጊልጊሊኒም ዓራንቲ ጉዳዪህ ምሳለከ ጽላል ተከ ጉዳያታህ ኪኒ፣ ታሃም ተከም ሙሴ ዱንካን ሥራሔ ዋክተ፣ ፉጊ "ኢምባት አሞል አካህ ይምቡሉወሚህ ዓይነቲህ ኡማን ጉዳይ ኢጢንቂቃይ አብ፥ የህ ይኢዚዘሚህ ሪሚዲህ ኪኒ፡፡ 6.ካዶ ለ ኢየሱስ ፋንቲ ባዕላ አክ የከ ኪዳን ዳዓይና ኪን ኪዳንኮ ያይሰቲያከ ታይሰ ታስፋህ አሞል ይምሥሪተ ቲያ ኪኒጉል፣ ካያህ ቶምሖወ አገልግሎት ያይሰቲያ ኪኒ፡፡ 7.ኤዸዾይታ ኪዳን ናቃፋ ሂንቲያ የከህ ገይመህ ያከዶ፣ ማላሚ ኪዳን ጉረሱሰ ማዻዺና፡፡ 8.አይሚህ መዔፉጊ ሕዝቢ አሞል ናቀፋ ታነም አይሚልኪቲህ ታህ ያ፣  "ሀይከ እስራኤል ሕዘበከ ይሁዳ ሕዝበሊህ ዑሱብ ኪዳን ሳ ዋክቲ አምተለ" ያዽሔ ማዳሪ፡፡  9.ታይ ኪዳን ተና ግብጸኮ አያዖ ተን ጋቦብ  ኢብዸ ዋክተ  ተን አቦብቲሊህ ሳየ ኪዳን ባሊህ ያነቲያ ማኪ፣  ኢሲን ይኪዳናል ማጽናዕኖንጉል፣  አኑ ለ ዕሲስ አከ ኤዸሔ ያዽሔ ማደሪ፡፡ 10.ሀይከ! ካዲ ዋክተኮ ሣራህ እስራኤል ሕዝበሊህ ሳ ኪዳን ታይቲያ ኪኒ፣ ያዸሔ ማደሪ፣  አኑ ኢኒ ሕገ ተን አፍዓዶድ ዲፈሳክ አኒዮ፣ ተን አእምሮድ አጽሒፊክ አኒዮ፣  ተን አምላክ አክክ አኒዮ፣  ኢሲን ለ ይሕዝበ ያኪን፡፡  11.መዔፉጎ ኢዽግ የህ ባዾ ሒያውቶ ለ የከ ፣  ኢሲ ሳዓል ያምሂረቲ ኢንከቲ ሚያነ፣ አይሚህ ዒንዻቲያኮ ኤዸዺሰህ አይከ ናበቲያ ፋናህ ኡምቢህ ይያዽጊን፡፡ 12.ተን በደሊህ ሕድጎት አካህ አባክ አኒዮ፣ ተን ኃጢአት ለ ካምቦኮ ሣረቱላል ኤልማዝኪረ፡፡" 13. አማይጉል"ዑሱብ ኪዳን"አይህ ባሶ ኪዳን ዳዓይና አበ ማለት ኪኒ፣ አማይጉል ኤል ሥራሒመቲያከ ዳዓይና ኪን ጉዳይ ኡምቢህ ያለየ ዋክቲ ካብየ፡፡

ማዕራፋ 9

ዓራንቲ መንፈሳዊ አግልግሎት ባዾት መንፈሳዊ አገልግሎትኮ ያሰቲያ ኪኒ

      1.ኤዸዾይታ ኪዳን መንፈሳዊ አገልጊሎቲህ ሥርዓትከ ባዾ መቅደስ ሊይይ ዪነ፡፡ 2.ላማ ኪፍለ ለ ዱካን ዮምሶኖዶወህ ዪነ፡፡ መቅረዝከ ጣወላ /ጰረጰዛ/፣ መሥዋዕቲ ኅብስቲ ኤድ ቲነ ኤዸዾይታ ኪፍለክ "ቅድስት"አካይ ዪኒን፡፡ 3.ማላሚ መጋረይዛ ቶህ ኤተህ ገይምታ አዳ ኪፍለክ "ቅድስተ ቁዱሳን"አካይ ዪኒን፡፡  4.ታይ ቲያህ ኪፍሊህ አዳድ ዋርቂ ቲካሰናከ /ማዕጠኒከ/ ዋርቂ አክ ይምጢቂዔ ኪዳን ታቦት ኤድ ዪነ፣ ታይ ቲያኮ ለ ኪዳን ታቦቲህ አዳድ መና ኤድ ታነ ዋርቂ ሞሶብ፣ አንዻዾወ አሮን ዲጊ፣ ኪዳን ኤል ይምጽሒፈ ጽላት ዪኒን፡፡  5.ታቦቲ አሞል ያነ / ስሬት/ ኅድጎት አልፈንታህ ሲኒ መንፈሪህ ደሳ  ኪብሪ ኩሩቤል ዪኒን፣ ያኮይ ኢካህ ታይ ጉዳያት ኡምቢህ ካዶ ዝርዚሪህ ዋንሲኖ ማዺዓ፡፡ 6.ኡማን ጉዳይ ታይ አጋባቢራህ ዮምሶኖዶወምኮ ላካል ካህናት ሲኒ አገልጊሎት ያሐዎና /ያፋጻሞና/ ዱካናክ ኤዶዾዾይታ ክፍለድ ኡማን ዋክተህ ሳአን፡፡ 7.ማላሚት አዳ ኪፍለድ ሳያቲ ለ ሊቀ ካህናት ዲቦህ ኪኒ ፣ ኤድሳናም ኢጊዲ አዳድ ኢንኪ ለለዕ ጥራህ ኪኒ፣ ኡሱክ ኢሲ አሞህ  ኃጢአታህከ ሕዝቢ ሶዻህ አባ ኃጢአታህ ካብ ኢሳ ቢሎ አብዸካህ ማሳ፡፡ 8.ኤዸዾይታ ዱካን ያነም ፋናህ ቅድስተ ቅዱሳን በያ አራሕ ገና አምጊሊጸ ዋቲያ ኪናማህ መንፈስ ቁዱስ ታይ ቢሶህ ያይቡሉወ፡፡  9.ታሃም ካዲ ዋክቲህ ምሳለ ኪኒ፣ ታይ ቢሶህ ካብ ኢሳን መባእከ መሥዋዕት ካብ ኢሳ ሒያውቲህ ኅሊና ዓዶቲያ ተአቦና ማዺዓን፡፡ 10.ታይ ነገራታህ ያምዑሱቢን ዋክቲ ያምተም ፋናህ ሥራሕ አሞል አሲሰኒም ዓለማዊ ሠርዓታታህ ኪኖን፣ ኢሲን ምግበከ ማስተ፣ ውልውል ዓካልሶ ሠርዓታታህ ዲቦህ  ተከም ኪኖን፡፡  11.ያከካህ ክርስቶስ ካዶ ታከሚህ፣ መዔ ጉዳህ ሊቀ ካህናት የከህ የመተ፣ ኡሱክ ኤድሳየ ዱካን ናባቲያከ ዓዶቲያ / ፍጹም/ ኪኒ፣ ታይ ዱንካን ሒያው ጋባህ ሥራሕመ ዋየቲያከ ታይ ፍጥረትኮ አከዋቲያ ኪኒ፡፡ 12.ኡሱክ ቅድስተ ቁዱሳን ጋባዕሲሰ ዋይታ አገባቢራህ  ኢሲ ቢሎ ይብዸህ ሳየ ኢካህ አላከ አዉራ ቢሎ ይቢዸህ ማሳዪና፣ ታይ አጋባቢራህ ኡማንጉሊ ድኅነት ኖህ ገይሲሰ፡፡ 13.አላከ አዉራ ቢሊ፣ መሥዋዕቲህ ሐራርተ አቦለህ ጎምቦድ ትርኪሰ ሒያዊህ አሞል ያምኒዚሔጉል ኃዶይታ ሩክሰትኮ ይይኒጺሔህ ተን ያስቅደሰህ የከምኮ፤ 14.ኡማንጉሊ/ ዘለአለማዊ/ መንፈሲህ  አራሓህ  ኢሰህ ናውረ ሂን መሥዋዕት አበህ መዔፉጎህ ካብ ኢሰ ክርስቶስ ቢሊማ ያነ መዔፉጎ ናስጋልጋሎ ኒ ኅሊናህ ራቢ ሥራሕኮ አይናህ ኢሰህ ያይሰህ ዕለህ ያይፂሪየ!  15.ደዕምምተሚህ መዔፉ ታስፋህ ዮሖወህ ኡማንጉሊ ሪስተ ያውራሶና፣ ክርሰቶስ ዑሱብ ኪዳኒህ ፋንቲ ባዕላ የከ፣ ታሃም ተከም ሒያው ኤዸዾይታ ኪዳኒህ ዳባል የከኒህ ሥራሔን ኃጢአትኮ ያይዳኃኖ የህ ኡሱክ ራበርከህ ኪኒ፡፡ 16.ኑዛዘ ታኔጉል ያምነዘዘቲህ ራባ ያይራጋጋፆና ጉርሱሳ፡፡ 17.አይሚህ ኑዛዘ ቃል ያጽንዔም ያምነዘዘቲ ራበምኮ ላካል ኪኒ፡፡ ያምነዘዘቲ ሕይወቲህ ይኔምኮ ለ ኑዛዘ ቃል ሊሞ ማለ፡፡ 18.ታይ ምክኒያታህ ኤዸዾይታ ኪዳን ኡካ ቢሎ ማለህ ያጽንዔቲያ ማኪ፡፡ 19.ኤዸዾይታህ ሙሴ ሕጊህ ቲዛዛት ሕዝበክ ሙሉኡክ አክየ፣ ታሃምኮ ላካል አዉራከ አላ ቢሎ ላየሊህ ሃየህ ሕጊ ማጽሐፍከ ሕዝበል ሙሉኡድ ሱዒዳህከ ዓሣ ዒዶይቲህ ዳጋራህ ኤልይንዝሔ፡፡ 20.ይንዚሔም መዔፉጊ ሲናህ ይሕግገ ኪዳን ታይቲያ ኪኒ፣ የህ ኪኒ፡፡ 21.ታማምባሊህ ዱንካንከ ኤድ ያምጥሚቂን ኑዋዪህ አሞል ኡምቢህ ቢሎ ይንዚሔ፡፡ 22.ዓዲህ ሙሴ ሕጊህ ሪሚዲህ ዳጎ ጉዳይኮ በሕህ ኡማን ጉዳይ ቢሎህ ያጽሪየ /ያንጽሔ/፡፡ ቢሊ ኃዺተ ዋየምኮ ኃጢአት ኅድጎት /ስሬት/ ማገይማ፡፡

ክርስቶስ መሥዋዕቲ ኃጢአት ያይለየ

    23..አማይጉል ታይ ዓራንቲ ጉዳይህ ምሳለ ኪናም ኡምቢህ ታይ ዓይነቲህ ሠርዓታህ ታጽራዎና ተን ጉርሱሳይ ዪነ፣ ዓራንቲ ጉዳህ ለ ታሃምኮ ያሰ መሥዋዕቲህ ያፀራዎና ተን ጉርሱሳ፡፡ 24.አይሚህ ክርስቶስ ሐቀህ  "ቅድስት" ምሳለ ተከቲያከ ሒያው ጋባህ ሥራሕምተ ቅድስተ ቁዱሳናል ማሳይና፣ ኡሱክ ካዾ ኖያ ዮዋ መዔፉጊህ ነፊል ያምባላዎ ዓራናል ሳየ፡፡ 25.አይሁድ ሊቀ ካህናት ካይም አከዋ ቢሎ ይብዸህ ኢጊዳ ኢጊዳ ቅድስተ ቅዱሳናል ሳይ ዪነ፣ ክርስቶስ ለ ኢሰ ማንጎ ዋክተ መሥዋዕት አበህ ካብ ዮዋ ማሳይና፡፡ 26.ታሃም ተከህ ያከዶ ዓለም ይምፍጥረ ዋክተኮ ኤዸዺሰህ ማንጎ ሲቃይ ጋራዎ ካ ጉረሱሰ ማዻዺና፣ ካዶ ለ ዳባን ባክቶል ኃጢአት ያይጋዓዾ ኢሰ መሥዋዕት አቦ ጋባዕሲሰ ዋ ዳናህ ይይቡሉወ፡፡ 27.ሒያው ኢንኪጉል ራብቶ ኤዳም ኪኒ፣ ራባኮ ሣራህ ፊርደ ገዮና ኤልታነ፡፡ 28.ታማም ባሊህ ክርስቶስ ማንጎ ማሪህ ኃጢአት ያይላዮ ኢንኪጉል ይምሲውዔ፣ ጋባዔህ ኃጢአት ያይካዖ የህ አከካህ፣ ካያ ኢላላታም ያይዳኃኖ ማላሚ ዋክተ ያምቡሉ ለ።

ማዕራፋ 10

    1.ሙሴ ሕጊ ባሶቱላል ያሚተ መዔ ጉዳዪህ ምሳለህ ኪኒ ኢካህ ሐቂ ቢሶ ሊይማና፣ አማይጉል ኢሲሲ ኢጊዳ ኡማን ዋክተ ታምሥውዔ መሥዋዕቲት ይብዺኒህ ፉጉል ካብታ ሒያው ፉጹማን ተናቦ ኢንኪጉል ማዽዒማ፡፡ 2.ሕጊ ፉጹም ተናቦ ዺዒማዶማ፣ ኢሲን መሥዋዕቲህ ካብ ኢሳናም ሐበ ዻዸን፣  አይሚህ አምልኮህ ካብታ ሒያው ጋባዕሲሰ ዋይታ አገባቢራህ ኃጢአትኮ ያንጺሒንጉል፣ ኃጢአት ማሎኑም ተን ኅሊናህ አካህ ያምዽገ፡፡ 3.ቶይ መሥዋዕቲት ለ ኢሲሲ ኢጊዳ  ኃጢአት ተን ታስሔሰሰበም ኪኖን። 4.አይሚህ አውራከ አላ ቢሊ ኃጢአት ኃብሲሶና ማዽዓን፡፡ 5.አማይጉል ክርስቶስ ዓለሚል የመተ ዋክተ ታህ የ፣ "መስዋዕትከ ማባዕ  ማጉራ፣ ሰውነት ለ ዮህ ኦይሶኖዶይ፡፡ 6.ሐራራ መሥዋዕቲከ ኃጢአት ዳዓባል ኅድጎቱህ / ስሬት/ ያምሥውዔ መሥዋዕቲህ ማኒያቲኒቶ፡፡ 7.ታማይ ዋክተ፣ "አምላኮ! ማጽሐፋል ዪ ዳዓባል ይምጺሒፈም ባሊህ ኩዲላይ አፋጻሞ ኤመተህ አኒዮ፡፡" 8.ኤዸዾይታህ ቶይ ሕጊ ሪምዲህ ካብያ መሥዋዕቲከ ማባእ፣ ያምቀጸለ መሥዋዕቲከ ኃጢአት ዳዓባል ኅድጎቱህ ያምስውዔ መሥዋዕት ማጉሪኒቶ፣ ተናህ ማኒያቲኒቶ አክየ፡፡ 9.ጋባዔህ"ሀይከ! ኩፍቃድ አፋጻሞ ኤመተህ አኒዮ አክየ፣ ታሃሚህ ቢሶህ ማላሚ ዓይነቲህ መሥዋዕቲህ ቦታድ ያምታካኦ ኤዸዾይታ ዓይነቲህ መሥዋዕቲ ይስዒረ፡፡ 10.ታሃሚህ "ፍቃዳህ" ያዽሔ ቃሊህ መሠረቲህ ኢየሱስ ክርስቶስ ኃዶይታህ ጋባዕሲሰዋ አጋባቢራህ መሥዋዕት የከህ ካብየሚህ  ምክኒያታህ  ኒ ምቅዲሰ፡፡ ኢሲሲ ካህን ኃጢአት ሐብሲሶ ዺዔዋ ቶይ መሥዋዕቲት ኡማን ዋክተ ካብ ኢሳክ ኢሲሲ ለለዕ ሶለህ ያስግልጊለ፡፡ 12.ክርስቶስ ለ ኡማንጉልቲያ ያከ ኢንኪ መሥዋዕት ካብ ኢሰምኮ ላካል መዔፉጊህ ሚድጋል ዲፈ፡፡ 13.ካምቦኮ ላካል ካናዓብቶሊት ካሥልጣኒህ ዳባል ያኪኒም ፋናህ ኢላላ፡፡ 14.አይሚህ ታይ ትምቅዲሰም ኢንኪጉል መሥዋዕት አራሓህ ኡማንጉሉህ ፉጹም ተን አባጉል ኪኒ፡፡ 15.መንፈስ ቁዱስ ለ ታይ ጉዳህ ኖህ ያምስኪረ፣ ኤዸዾይታህ፣ 16.ታይ ለለዓኮ ላካል ፣  "ተንሊህ ሳ ኪዳን ታይቲያ ኪኒ ያ ማደሪ ፣ ኢኒ ሕገ  ተን  አፍዓዶድ ድፈሳክ አነ፣ ተን አፍዓዶድ አጽሒፈሊዮ፡፡"17.ጋባዔህ፣ ተን "ኃጢአተከ  ኡማ ተን ሥራሐል ካምቦኮ ሣረቱላል ኤልማሕሲበ "ያዽሔ፡፡ 18.አማይጉል ኃጢአት ኡምቢህ ይምዲምሲሰምኮ ላካል፣ ኃጢአት ኂድጎቱህ /ስሬትህ/ ካብያ መሥዋዕቲ ካምቦኮ ላካል ሚያኔየ፡፡

ፉጉላል ካብያናም ኤዳ

   19.አማይጉል ይሳዖሎ! ኢየሱስ ቢሊህ ምክኒያታህ ቅድስተ ቁዱሳናል ሳዎና ዽዕሲሳ ያስኤመመነቲያ ገይነ፡፡ 20.ሳይናም መጋረይዛ፣ ማለት ኢሲ ሰውነቲህ ምክኒያታህ ኖህ ፋከ ዑሱብቲያከ ኡማንጉልቲያ የከ አራሓህ ኪኒ፡፡ 21.መዔፉጊህ ዓሪህ አሞል ኃላፍነት ለ ናባ ካህን ሊኖ፡፡ 22.አማይጉል ኡማ ኂሊናኮ ናጽራዎ ኒኒ አፍዓዶህ ኒምኒዚሔህ፣ ኒኒ ሰውነት ጽሪይ ላየህ ዓካሊስነህ፣ ቅንዒና ለ አፍዓዶከ ሐቂ ኢምነት ኒብዸህ ፉጎ ዻጋህ  ካብኖዋይ፡፡23.ታስፋ ቃል ኖህ ዮሖወቲ ያምኢምነቲያ ኪንጉል፣ካዶ ነመነህ አካህ ናምስኪረ ታስፋ አምጠረጠረካ ሲክ ኢሰነህ ናባዾይ፡፡ 24.ካሓኖከ መዔ ተግባራህ ኒኒቂሔህ ማርኖ ቲይ ቲያ ሑንሱሶይ /ያስሓሳሳቦይ/፡፡25.ኡማንጉል ቲታ ገያክ ኒነኒነህ ናምጣናካሮይ ኢካህ ጋሪጋሪ አባም የገለም ባሊህ ያከሄሊኒም ሐበዋይኖይ፣ ኤረ ማደሪ ያምተ ለለዕ ካብ የም አዝክሪክ ታይ ጉዳይ ያይሰ ዒለህ  አባ፡፡ 26.ሐቀ ነዸገምኮ ሣራህ ያኮይ ነህ ኃጢአት አብናጉል ካምቦኮ ሣራቱላል ኃጠአት ዳዓባል ካብ ኢሲና ኢንኪ መሥዋዕት ማና ለ፡፡ 27.ካዶ ካብታም ለ ባሶቱላል ያከ ሖላሳ ፍርደከ ታምቀወመም ሓራሪሳ ማይሲሳ ጊራ ኪኒ፡፡ 28.ሙሴ ሕገ ሓዸ  ላማይ ያኮይ አዶሓ ሒያውቲ ኤልያምስክሪኒምኮ መሕረት ማለህ ራባህ ያምቅጺዔ፡፡ 29.ኢቦል መዔፉጊህ ባዻ ዻይታቲ፣ ኤልያምቂዲሰ ኪዳን ቢሎ ያሩኩሰቲ፣ ጸጋ መንፈሲህ ዋቲማቲ፤ አይናህ ኢጊድ ጊዲድ ቅፅዓት አካህ ኤዳማህ ሲናድ ኢጊዳ! 30.አይሚህ "በቀል ይቲያ ኪኒ ፥"አኑ ሊካሕ አፍዲየ ሊዮ ያዽሔቲ አቲያ ኪናም ናዺገ፣"ታማም ባሊህ "መዔፉጊ ኢሲ ሕዝቢህ አሞል ያፍሪደ"ያዽሔ፡፡ 31.አማይጉል ያነ ፉጊህ ጋባል ራዳናም ጋዳህ ማይሲሳም ኪኒ፡፡ 32.ኢፊ ሲናህ ኢፎየምኮ ላካል ማንጎ መከራ ጋራይተኒህ አካህ ትምዕጊሢን ቶይ ባሶ ለለዓ ኢዝኪራ፡፡ 33.ውልውል ዋክተ ለ ሒያዋክ ነፊል ዋቲምምተን፣ አጋናል ጉባል ኢሲምተን፣ ውልውል ዋክተ ለ ታይ ዓይነቲህ ሥቃይ ተን ማደ ሒያውሊህ ተምሔበበሪኒህ ኢንኮህ መከራ  ጋራይተን፡፡ 34.አቲን ታይሰምከ ኡማንጉሉህ ማራ ሀብተ ዓራናል ሊቲኒም ተዸጊን ኢርከህ ቱምዹወሚህ አካህ ናኅሩርተን፣ ሲን ኒብረት ሲናክ በያህ ቲዕግሥቲ አብተኒህ ተከም ኒያታህ ጋራይተን፡፡ 35.አማይጉል ናባ ሲልማት ኤል ገይታን አካህ ታምኤመመኒኒም ማዕዲና፡፡ 36.መዔፉጊህ ፍቃድ ኢፍጺማይ፣ መዔፉጊ ሲናህ ያሐዎ ቃል ሲናህ ሳየ ጉዳይ ገይቶና ታጽናዖና ሲን ጉርሱሳ፡፡ 37.አይሚህ ታህ የህ ይምጽሒፈ፣ "ያማቶ አካህ ኤዳቲ ዳጎ ዋክተኮ ላካል አሚተ ለ፣ ማዓያ፡፡ 38.ጻድቀ ኪን ሒያውቲ ለ ኢምነቲህ ሒይወት ገያ፣  ሳራቱላል ዮምፎሖከምኮ ለ ዪ ናፍሲ ካያህ ማኒያታ፡፡" 39.ናኑ ለ ተመነህ ታድኅነሚህ ወገንኮ ኪኖ ኢካህ ሣራቱላ ል ታምፎሖከም  ታለየ ሒያዊህ     ወገን ማኪኖ።                                  

  ማዕራፋ 11

ኢምነት

       1.ኢምነት ያናም ታስፋህ ኢላልና ጉዳያት ጋይናም ኒያይሲዺገ ቲያ፣ አብለዋይና ጉዳያት ያኒኒም ያይሲዽገቲያ ኪኒ፡.ባሶ ሒያው ቲምስጊነም ኢምነት ምክኒያታህ ኪኒ፡፡ 3.ዓለማት መዔፉጊህ ቃላህ ትምፍጢረም ናዽገም ኢምነቲህ ኪኒ፣ አማይጉል ያምቡሉወ ጉዳይ ኡምቢህ አምቡሉወ ዋታምኮ ሥራሕመም ናዽገ፡፡ 4.አቤል ቃኤል መሥዋዕቲኮ ያይሰ መሥዋዕት ፉጎህ ካብ ኢሰም ኢምነቲህ ኪኒ፣ ፉጊ አቤል መሥዋዕት ኒያታህ ጋራየ ዋክተ ኤበል ኢሲ ኢምነቲህ ጻድቅ ኪናም አካህ ይምስከረ፣ አቤል ራበምኮ ላካል ኢሲ ኢምነቲህ ኡላህ  ካዶሊህ ዋንሲታክ ያነ፡፡ 5.ሄኖክ ራቢ ካ ማዳምኮ አጋናል ካ በኒም ኢምነቲህ ኪኒ፣ መዔፉጊ ካበየጉል ማገይሚና፣ አይሚህ ያቡከምኮ ባሶል መዔፉጎ ኒያቲሰህ ገይመሚህ አካህ ይምስኪረ፡፡ 6.ኢምነት ሂኒም መዔፉጎ ኒያቲሶና ማዲዒማ፣ አይሚህ መዔፉጎል ካብያ ሒያውቲ፣ መዔፉጊ ያነምከ ካያ ጉርታ ሒያዋህ ለ ሲልማት ያሔቲያ ኪናም ያማኖ ኤለታነ፡፡ 7.ገና አምቡሉወ ዋ ጉዳይ መዔፉጊ ይይጥንቂቀህ አክየ ዋክተ ኖኅ መዔፉጎ ማሲተርከህ ኢሲ በተ ሰብ ያይዳኃኖ መርከብ ሥረሔም ኢምነቲህ ኪኒ፣ ኢሲ ኢምነቲህ ዓለም ይኩኑነ ፣ ኢምነቲህ ገይማ ጽድቀ ይወርሰ፡፡ 8.አብራሃም ሪሰተ አበህ ጋራ ባዾህ ያይዳዎ ደዒምመጉል፣ ኢንኪጉል ኡካ አምጠረጠረካ ያዲየም አዽገ ዋየሚህ ያዳዎ ሜዔ የህ ይምኢዚዘም ኢምነቲህ ኪኒ፡፡ 9.ካያ ባሊህ ታስፋ ቃሊህ ወርስቲ ተከ ይሰሐቅከ ያዕቆብሊህ ታስፋ ባዾል ተመቶይታ የከህ ዱካናድ ማረም ኢምነቲህ ኪኒ፡፡ 10.አይሚህ  ጽኒዕ መሠረት ለቲያ፣ መዔፉጊ ይዕቅደቲያከ ሥራሔ ካታማ ኢላላይ ይነጉል ኪኒ፡፡ 11.ሣራ ለ ታስፋ ያሐየ  መዔፉጊ ያምኢሚነቲያ ኪናም ተዽገጉል፣ ኢንኪጉል ኡካ ዔድመህ ዱፉይተርከህ ምክኒያታል ዻልቶ ዽዔዋይታቲያ ተከሚህ ሶኒይ ኃይላ ገይተም ኢምነቲህ ኪኒ፡፡ 12.አማይጉል ራበ ሒያውቶ ባሊህ ሎይማይ ዪነ አብራሃምኮ ዓራንቲ ሑቱክ ባሊህ ማንጎምከ ባሕሪ ዳራቲህ ሖጻ ባሊህ ሎይማዋ ዳሪ ገይመ፡፡ 13.ታሃም ኡምቢህ ራብተም ኢምነቲህ የኪኒህ ኪኒ፣ ፉጊ አካህ ያሐዎ ቃል አካህ ሳየ ጉዳይ ማገይኖን፣ያከካህ ዸዽ ኢርከኮ ዩብለኒህ ሊኪዕ ገየኒም ባሊህ አበኒህ ኒያታህ ጋራየን፣ ባዾት አሞል ገዻከ ተመቶቲት ኪኖኑም ይምርዲኢን፡፡ 14.ታሃም ዋንሲታ ሒያው ተናህ ታከ ባዾ ኢላላናም ያምልክቲን፡፡ 15.ቶይ አክ የውዒን ባዾ ይዝኪሪኒህ ያከዶ ታሙላል ጋሖና ዺዔ ዻዸን፡፡ 16.ካዶ ለ ያይሰ፣ ዓራናል ያነ ሀገሪህ ሳናይ ያኒን፣ አማይጉል ፉጊ ካታማ አካህ ዮይሶኖዶወህ ያነጉል "ኒ አምላክ" የኒህ ደዓንጉል ማሖላሳ። 17.አብራሃም ይምፍቲነ ዋክተ ይስሐቅ መሥዋዕት አበህ ይስቂርበም ኢምነቲህ ኪኒ፣ ታስፋ ቃል ጋራየሚህ አብራሃም ኢንኪ ኢሲ ባዻ ያይሳዋኦ ኪይይ ዪነ፡፡ 18.ኤረ ኡኮ መዔፉጊ፥  "ይስሐቅኮ  ዳሪ  አውዔለ" አክየህ ዪነ፡፡ ባሶቱላል ያከ ጉዳይ ይሕሲበህ ያዕቆብከ ኤሳው የበረከም ኢምነቲህ ኪኒ፡፡ 21.ያዕቆብ ራባ ዋክቲ ካብ የጉል ዮሴፍ ዻሎ ቲቲያህ የበረከምከ፣ ኢሲ ድጊህ ኤዸዻህ ይሙርኩሰህ  ይስጊደም ኢምነቲህ ኪኒ፡፡ 22.ዮሴፍ ለ ራባህ ካብየ ዋከተ እስራኤላውያን ግብጸኮ ያውዖና ኪናም ዋንሲተ፣ ኢሲ ላፋህ ዳዓባል አይም አባናም ቲኢዛዝ ዮሖወም ኢምነቲህ ኪኒ፡፡ 23.ሙሴ ዻልቶዪት ሙሴ ዮቦከ ዋክተ ዓዻ መዔቲያ ኪናም ዩብልንጉል ኑጉሥ ቲኢዛዝ ማይስተካህ አዶሓ አልሳ ሱዑሰኒም ኢምነቲህ ኪኒ፡፡  ዓረምኮ ላካል  ፍርዖን ባዻ'ህ ባዻ የኒህ ደዖና ማዮ የም ኢምነቲህ ኪኒ፤ 25.አማይጉል ኃጢአታህ ገይማ ዋክቲ ኒያትኮ አጋናል ፣ መዔፉጊህ ሕዝበሊህ መከራ ጋራያናም ዶረ፡፡ 26.ባሶቱላል ገያ ሲልማት ዩብለጉል፣ ግብጺ ባዾኮ አጋናል  ክርሰቶሱህ ያምወርዲኒም ያይሰ ሀብተ ኪናም ይሕሲበ፡፡27.ኑጉሥ ቁጡዓ ማይሲተካህ ኢምነቲህ ጊብጸኮ የውዔ፣ አምቡሉወ ዋ አምላክ ዩብለቲያ ባሊህ የከህ ዓላማል ሲክ የ፡፡ 28.ሪይስ አኪናን ባዻ ያግዳፎ ይምኢዚዘ መልአክ እስራኤላውያን ሪይስ አኪናን ላብ ኢሮይቲ ራባምኮ ያናማህ ፋሲጋከ ቢሊ አንዛሔህ ሥራዓት አበም ኢምነቲህ ኪኒ፡፡  29.ኢስራኤላውያን ካፊን ባዾል ታባናምባሊህ የኪኒህ ዓሳ ባሕራል ታበኒም ኢምነቲህ ኪኒ፣ ግብጻውያን ለ ተናባሊህ አቦና ይዒኪኒን ዋክተ ሙሉኡክ ይሙንዹዒን። 30.እስራኤል ሕዝቢ ኢያሪኮ ቃጽሪቲህ ዳራታል ማልሒና ለለዕ ዮዞሪኒምኮ ላካል ቃጽሪት ዒደኒም ኢምነቲህ ኪኒ፡፡ 31.አማንዚራ ኪን ኑማ ረዓብ ቃፊር /ሰለይት/ ሳላማህ ተን ጋራይተህ አምኢዚዘ ዋይታምሊህ ራባናምኮ ራዕሰም ኢምነቲህ ኪኒ፡፡ 32.አማይጉል አክሚህ አይም ኢየ ሊዮ! ጌዴዎን ዳዓባል፣ ባራቅ ዳዓባል፣ ሳምሶን ዳዓባል፣ ዮፍታሔ ዳዓ ባል፣ ዳዊት ዳዓባል፣ ሳሙኤል ዳዓባል፣ ነቢያት ዳዓባል፣ አታራኮ ዋክቲ ዮክ ኡዹዻ፣ 33.ኢሲን ኢምነቲህ ማንጊሥታት ይስዒሪን፣ ቲክኪል ኪን ፍትሔህ የይመሔደሪን፥ አካህ ቶምሖወ ታስፋ ገን፣ ሉቦክቲ አፍ አልፈን፤ 34.ጊራ ኃይላ የይለዪን፣ አፍለ ሰይፊኮ የውዒን፣ ሩክታኮ ሲራየል ዪምልውጢን፣ ውጊህ ሲሪያም የኪን፣ ናዓብቶልቲ ወዳሃደር ሀዳነን፡፡ 35.ሳዮ ራባህ አክ ባዽሲምተ ሳዖልቲ ራባኮ ኡገተኒህ ተን ገን፣ አኪ ማሪ ለ ታይሰ ኡግታቶ ገዮና ይሕሲቢኒህ ሲኒሲኒ ሲቃይ ጋራየን፣ ማዹዋኮ ናፃ ያኪኒም ማኖ የን፡፡ 36.አኪ ማሪህ ዋኒኒ የኪኒህ ሳብዒመን፣ ጋሪ ኢባድ ብርቲቲህ ይምዹውኒህ ዋክኒ ዓረድ ራደን፡፡ 37.ዻይቲህ ሳብዒመን፣ ማጋዛህ ፈላዔን፣ ሰይፍህ ራበን፣ ዒዶከ አላት አናዳ ሀይስተኒህ ጉባል አጋናል የን፣ ዲካታትከ ሲደተይናታት የኪኒህ ጉባል አጋናል ኢሲመን፡፡ 38.ዓለም ተናህ ያምሰመመዔቲያ የከህ ገይመዋየጉል ባራካድ፣ ኮማማድ፣ ባዾክ አዳድ ታነ ቦላላድ ቦዾዾሕቲድ ዮዞሪን፡፡ ታይ ዓይነቲህ ዓለም ተናህ ኤዳ ቦታ የከህ ማገይሚና።39.ታሃሞሙህ ኡምቢህ ሲኒ ኢምነቲህ ባርካታህ ቲምስጊነም የኪኒሚህ አካህ ተምሖወ ታስፋ ገናህ ማገኖን፡፡ 40.ፉጊ ኖያህ ያይሰ ጉዳይ ኖህ ይሕሲበ፣ አማይጉል ኢሲን ኖሊህ ኢካህ ዲቦህ ፉጹማን ያኮና ማዺኖን፡፡  

ማዕራፋ 12

1.ዳሩር ባሊህ ናሞል ንትክብበህ ታነም ኡምቢህ ማስኪሪህ  ሊኖ፣ አማይጉል ናኑ ለ ዑካ ባሊህ ኖክ የምጠበቀ ጉዳይ ኡምቢህ ናሞክ ይዺቢሰ፣ ኃጢአት ሚሪሕ ኢሰነህ፣ ኒነፊል ታነ አርዳህ ቲዕግሥቲህ ሲክ ነህ ናርዶይ፡፡ 2.ናርደም ለ ኒ ኢምነቲህ ሚንጸ የከ ኢየሱስ አብሊክ ኪኒ፣ ባሶቱላል ገይማ ኒያቲ ምክኒያታል ማስቃል አሞክ ራቢ ውረደት ኢንኪምድ ሎወካህ፣ ማስቃል መከራከ ራባ ይይኩዔ፣ መዔፉጊህ ዙፋኒህ ሚድጋል ዲፈ፡፡ 3.አማይጉል ዒሲሲ ኢየካህ ሥራሕቶናክ ታስፋ ማቅራጺና፣ ታሃማህ ኡምቢህ ኃጢአት ለሚህ ኒያትከ ቲዕግሥቲ አበ ኢየሱስ ኡቡላ፡፡ 4.አቲን ኃጢአትሊህ አንዱፉሊክ ገና ቢሎ ሓዻናም ፋናህ ማንቃዋሚኒቲን፡፡ 5.መዔፉጊ ኢሲ ዻይሎ ባሊህ ሲን አበህ ታህ የህ ሲን ይምከረም ቢያይሲተን፣ "ኦ'ይባዻ! መዔፉጊህ ተግሣጻጽ  ማስቃላሊን፣ ኩ ያቅጽዔጉል ታስፋ ማቅራጺን፣  6. አይሚህ መዔፉጊ ክኅንቲያ ያጊሢጸ፣  ኢሲ ባዻ  ባሊህ ያብለቲያ ያግቅጺዔ፡፡" 7. ፉጊ ኢሲ ዻይሎ ባሊህ ሲን ሎዋጉል ቅጽዓት ትዐጊሥቲ አባ፣ አባ አቅጽዔ ዋየ ባዺ አይቲያ ኪኒ? 8. ዻይሎ ኪን ማሪ ኡምቢህ ጋራአን ቅጽዓት አቲን ገራየ ዋይተኒምኮ፣ ዲቃላ ኪቲን ኢካህ ዻይሎ ማኪቲን፡፡ 9.ታሃምኮ በሕታማህ ኖያ ሙሉኡክ ታቅጺዔ ኃዶይታት አቦብ ሊይክ ኒነ፣ ተን አስክቢሪክ ኒነ፣ ኢስቲ  ሕይወቲህ ማርኖ መንፈሳዊ ኒና አባህ ያይሰ ዒለህ ናምአዛዞ አይናህ የህ ኖህ መዳ? 10.ተናህ መዔም የከህ አካህ ያምባላዎ ዳጎ ዋክተህ ኒ ያቅጽዔ፣ ኡሱክ ለ ካቅድስና ሐዲሊታም ናኮ ኒጥቅመህ ኒ ያቅጽቅ፡፡ 11.ቅጽዓት ኡምቢህ ዋክተህ ያስኅዚነቲያህ ኢጊዳካህ ኒያቲሳቲያህ ሚጊዳ፣ ላካል ለ ተገለ ሒያዋህ፣ ሳላማህ የመገ ጽድቂ ሕይወት ገይሲሳ፡፡

ምክርከ ሰልስናን /ማስጠንቀቂያ/

  12.አማይጉል ዻማኅተ ሲን ጋቦብከ ሐዋልተ ሲኒ ጉሉባ ኢይጢንኪራ፡፡ 13.ሓንከስ ያቲ ኡሮ ኢካህ ኢሲ ቦታኮ የውዔህ ሙሉሓምኮ ሲኒ ኢባህ ሪግ የ አራሕ አባ፡፡ 14. ኡማን ሒያውሊህ ሳላማህ ማራ፣ ቅድሰናህ ማርቶና ኢትጊሃ፣ አይሚህ ቅድስና ማለህ ኢንከቲ ፉጎ ያብሎ ማዽዓ፡፡ 15.ሲንኮ ኢንከቲ መዔፉጊህ ጸጋ አክ ታግዱለምኮ ስሊታ፣ ታማምባሊህ ኢንኪ ዑርያ ሪምድ ሲን ፋናድ ቡላምኮከ ሲን ያይጺጊመምኮ፥ ማንጎ ማራ ያይሪክሰምኮ ሰሊታ፡፡ 16.ሀጉገሊት ኪናም ወይ ኢንኪ ዋዕደ ፈሎ ዮዋ ኢሰ ቦክረ የበሔ ኤሳው ባሊህ ናውረ ለ ሒያውቲ ገይማክ ሰሊታ፡፡ 17.ላካል ኤሳው በረከት ጋባዔህ ጋራዎ ጉረ ዋክተ ታይ በረከት ካልቲመም ታዽጊን፣ ወዓክ ቶይ በረከቲህ ይትጊሄህ ዋጌየሚህ ኡካ ገዮ ማዽዒና፡፡ አይሚህ ባሶ ገጋ ኢንኪ አራሓህ ያስታካከሎ ማዽዒታ። 18.አቲን ጋባህ ሀሳስ ኢሳን  ወይ ቦሎልታ ሲናይ ኢምባ ማማዲንቲን፣ ዓቦሪቱላል፣ ዲተቱላል፣ ሀቦባለቱላል፣ 19.ጡሩባት አንዻሕ ወይ ዋንሲታን ቃል ኤድ ያማበርከ ማማዲኒት፣ ቶይ ቃል ቶበ ሒያው "ካምቦኮ ላካል አኪ ቃል ኖክ ኢየዋዎናይ" ያናማህ ዻዒምቶ ፋናህ ማደን፡፡  20. አይሚህ፤  "ኢንስሳ ኡካ ኮማ ዻገምኮ፣ ዻይቲህ ሳብዒመህ ራቦይ”  ያዸሔ ቲኢዛዝ አክ ይዕሊሰጉል  ያይካዖና ማዺዒኖን፡፡ 21.ይምቡሉወ ተግባር ጋዳህ ማይሲሳቲያ ኪናምኮ ኡጉተሚህ ሙሴ ኡካ፤ "አኑ ማይሲተ፣ ሰሊታ" የዸሔ፡፡22.አቲን ግን ጺዮን ኢምባድ ካብተን፣ ኢሲ ያነ መዔፉጊህ ካታማ ተከ ዓራንቲ ኢየሩሳለም ኪኒ፣ ኒያታህ ኤድ ያከሄልኒል፣ ሚሊዮኑህ ሎይምታ መላእክቲድ ካብተን፡፡ 23.ተን ሚጎዕ ዓራናል አክ ይምጽሒፈ፣ሞሶዓሪ ሪይሲህ  ዻይሎ ተከ አማንቲ ጉባኤል፣ ኡማንቲዪህ ፈራዲ የከ አምላካህከ ፍጽምና ገይተ ጻድቃን ነፍሳታድ ካብተን፡፡ 24.ዑሱብ ኪዳኒህ ፋንቲ ባዕላ የከ ኢየሱስ ኡላል፣ አቤል ቢሎኮ ጋዳህ ያሰ ዒለህ ኤድዋንሲቶከ ያይናጻሖ ይምኒዚሔ ቢሎል ካብተን። 25.ቶሆም ዋንሲታማክ ማዮ ታናምኮ ሰሊታ፣ አይሚህ ቶይማሪ ባዾቲም አክ ያንጉል ማኖ ያናምኮ ሙሉሔ ዋየኒምኮ፣ ኢስኪ ዓራንኮ ኖክየቲያኮ ሚሪሕ ነህ አይናህ ነህ ናምልጠ! 26.ታማይጉል  ካቃል ባዾ  የይነወጸ፣ ካዶ ለ  "ባዾ ዲቦህ  አከካህ ኢንኪ ዋክተ ጋባዔህ ዓራን ለ ኦሰህ አይነወፀ ሊዮ "ያናማህ ቃል ሳየ፡ 27.ታይ "ኢንኪ ዋክተ ጋባዔህ" ያዽሔ ቃል ያይብሉወም አምነወፀ ዋ ጉዳአህ ሲክ የኒህ ማሮና፣ ታምነወፀም ያኮይ ቲምፊጢረ ጉዳያት ሚሪሕ ኢሳናም  ኪኒ፡፡ 28.አማይጉል ናኑ አምነወጸ ዋ ማንግሥት ናውርሰም ኢዻህ መዔፉጎ ናይማስጋኖይ፣ ኒያቲሳ ዒለህ  ኪብረህከ ማይሲህ ናስጋልጋሎይ፡፡29.አይሚህ ና አምላክ ሓራሪሳ  ጊራ ኪኒ፡፡

ማዕራፋ 13

ፉጎ አይናህ ኢስነህ ኒያቲስኖ  ኖህ ኤዳም

  1.ኡማንጉል ሳዖሊኒ ካሓኒ ሲንሊህ ያናዎይ፡፡ 2.ገዸንታ ጋራየኒህ ያይሰሰይኒም /ያስተነገድኒም/ ማብያይስቲና፣ አይሚህ ታይ ገዻ ጋራየኒህ አስጊልጊሊህ ውልውል ሒያው አዽገካህ ማላይካ  ጋራየኒህ የሰተነገዲን፡፡ 3.ተንሊህ ኢንኮህ ቱምዹውኒም ባሊህ ተኪኒህ ቱምዹወም ኢዝክራ፣ አቲን ለ ተና ባሊህ ሔልዋይ ጋራይተኒም ኢዻ ተኪኒህ ሔልዋይ ጋራይታም ኢሕሲባ፡፡ 4.ኃዳር ኡማንቲያል ይክበረቲያ ያኮይ፣ ባዕላከ ኑማ ኢምነት ይሰጉዱሊኒህ ኃዳር አይርክሰ ዋዎናይ፣ አይሚህ ሀጉገሊትከ አመንዘርቲል መዔፉጊ ኤልያፍሪደ፡፡ 5.ማል ካሓኖኮ ሚሪሕ ኤያ፣ ሊቲኒም ሲን ዽዕቶይ፣ አይሚህ መዔፉጊ"ኩማዒዳ፣ ኩማኃባ" ያዽሔ፡፡ 6.አማይጉል አምአማማ ናህ፣  "ፉጊ ይጎሮን  ኪኒ፣ ማማይሲታ፣ ሒያውቲ አይም ዮካቦ ዺዓ?"ናዽሔ፡፡ 7.መዔፉጊህ ቃል ኤዸዾይታህ ሲናክታ መራሕቲ ማቢያይሲቲና፣ ተን ናብራከ ሥራሕ አዝኪሪክ ተን ኢምነት ኢኪቲላ፡፡8.ኢየሱስ ክርስቶስ ኩማል ካፋ አማንጉል ኢንኪም ኪኒ፡፡ አይሚህ ሚያምልውጠ፡፡ 9.አምገለ ዋይተ ኢሲሲ ዓይነቲህ ሚሂሮ ማ'ማራኪና፣ ኒ አፍዓዶ ፈሎ ሠርዓት ዻዉዻክ አከካህ ጸጋህ ታጽኒዔጉል መዔም ኪኒ፣ አይሚህ ታይ ፈሎ ሥነ ሥርዓት ቲኪቲለ ሒያው ኢንኪም ማምጣቃሚኖን፡፡  10.ናኑ መሥወዒ ሊኖ፣ ያኮይ ኢካህ ዱካን አዳድ ታስጊልጊለ ካህናት ኤልያስውዒን ኢርከህ  አሞል ያነ ሚግበኮ በየኒህ በቶና አካህ ሚያምፍቂደ። 11.አይሁድ ሊቀ ካህናት ኃጢአት ሒድጎት ገይሲሳ ኢንስሳ ቢሎ ይብዽህ ቅዲስተ ቅዱሳናል ሳ፣ ኢንሲሳት ባድና ለ ሰፈርኮ ኢሮል የየዒኒህ ሓራሪሳን፣ 12.ታማም ባሊህ ኢየሱስ ሕዝበ ኢሲ ቢሎህ ያይጻዳቆ ካታማት ኢፈይኮ ኢሮል መከራ ጋራየ፡፡13.ናኑ ለ ሰፈርኮ ነውዔህ ካያ ዻጋህ ናዳዎይ፣ ካ ውርደት ሓዲሊታም ናኮይ፡፡14.አይሚህ ናኑ ገናህ ታሚተ ካታማ ኢላላክ ናነ ኢካህ ሳላማህ ቲጽኒዔህ ማርታ ካታማ ታይ ባዾል ማታነ፡፡ 15.አማይጉል ኢየሱስ ክርስቶሲህ አራሓህ ሞሳ መሥዋዕት ኡማን ዋክተ መዔፉጎህ ናስቃራቦይ፣ ታሃም ካሚጋዒህ ዳዓባል ታምስኪረ ዋገቢህ ካብታ ምስጋናከ መሥዋዕቲ ኪኒ፡፡ 16.መዔ ጉዳይ አባናምከ ሎን ጉዳይ አኪ ማራህ ሓዲላናም ማቢያሲቲና፣ አይሚህ ፉጎ ኒያቲሳም ታህ ኢጊድ መሥዋዕት ኪኒ፡፡

  17.ሲኒ መራሕቲህ ኢምእዚዛ፣ ተን ሥለጣኒህ ዳባል ቲካ፣ አይሚህ ኢሲን ኤል ኤሠሪማን ኃላፍነት ሎኑም ኢዻህ ሲን ናብሲህ ጉዳሃ ያንዳፋሎናይ፣ አቲን አካህ ታምኢዚዚንዶ፣ ኢሲን ሲኒ ሥራሕ ኒያታህ  አበ ዻዸን፣ አማም አከዋይተርከህ ሲኒ ሥራሕ ኃዛናህ ሥራሐን፣ ታሃም ሲና ፋይዳ ለም ማታከ፡፡ 18.ጻሎት ኖህ አባ፣ ፂርይ ኅልና ሊኖም ዓዶም ኪኒ፣ ኡማን አራሓህ መዕነል ማርኖ ናቲምኔ፣ 19. ጋዳህ ትትጊሂኒህ  ጻሎት አብቶና ጋዳህ  ሲን ዻዒማም ዸህ  ሲና ዻጋህ ጋሖ  ኪኒ፡፡

ጻሎት

    20.ኡማንጉሊት ኪዳኒህ ቢሊ ዒዶት ናባ ሎይና የከ ኒ ማዳራ ኢየሱስ ራባኮ ኡጉሠ ሳላም አምላክ፤ 21.ካፍቃድ አቦና ዺዕሲሳ መዔነ ጉዳይ ኡምቢህ ሲን ያስክቲየ፣ ኒያት ገይሲሳም ኢየሱስ ክርስቶሲህ ኡላህ  ኖህ አቦይ፣ ኢየሱስ ክርስቶሱህ ለ ኡማንጉሉህ ኪብረ ያኮይ፣አመን፡፡

ባከቶህ

   22.ይሳዖሎ! ታይ ሲናህ ኢጽሒፈ መልእክት ኡዹዽቲያ ኪኒጉል፣ ታይ ይምክሪህ ቃል ትዕግሥቲህ ጋራይቶና ሲን ዻዒማክ አነ፡፡ 23.ኒ ሳዓል ጢሞቴዎስ ማዹዊ ዓረኮ የውዔም ታዻጎና ኪሕኒዮ፣ ዸህ  ታህ የመተምኮ ካሊህ ሲንኡላል ኤመተህ ሲን አብለ ሊዮ፡፡ 24.ሲን መራሕትከ ቁዱሳናህ ኡምቢህ ሳላምታ ካብ ዮህ ኢሳ፣ ጣሊያንኮ ተመተህ ዮሊህ ታነ ክርስቲያን ሳላምታ ካብ ሲናህ ኢሳን ፡፡

25.ጸጋ ኡማን ሲናሊህ ታኮይ።