ማዳሒት ያሃንስ መልእክት

 ማዳሒት ሐዋርያ ያሃንስ መልእክት

                                         

ሳይማ   [ዸ ዹ ዺ ዻ ዼ ዽ ዾ]

  ማዳሒት ያሃኒስ መልእክት ትምጽሕፈም ስማጊለ ሐዋርያ ያሃኒሲህ ኪይህ፣  ተምጽሕፈም ጋዮስ አክያን ሞሶዓሪ መራሒህ ኪይይ ቲነ፡ ጻሐፊ ኢንኪ ደፍራኮ አኪ ክርስቲያን ጎሮኒሰርከህ ጋዮስ ያይምስጊነ፣ አኪ  ደፍራህ  ዲዮጥራጢስ አክያን ተንኮለይና ኪን ሒያውቶኮ ያምጣንቃቆ ያስሔሰሰበ፡፡                                                                                               ___________________

                                                                           ማዕራፋ1

  1.ሓቀህ ኪሒኒዮ፣ ኢምኪሒን ጋይዮሶ፣ ዮያ ስማግለይታኮ ፋርምተ መልእክት፣ 2. ኦ'ይካኃንቶሊ! ኢሲ ናብሰህ ናጋይ ኪቶም አዽገ፣ ታማም ባሊህ ናብራ ሙሉኡክ ኮህ ታምታካካሎከ ዓፍያት ታሎ ጻሎት አባክ አኒዮ፡፡ 3 ውልውል ሳዖል ተመተህ ሓቀህ ኡሙን ኪቶም ሓቀ ትብዸህ ማርታም አምስክሪህ ኦበርከህ ጋዳህ ኒያታ፡፡ 4. አይሚህ ይዻይሎ ሓቀ ይብዽኒህ ማራናም አበምኮ አጋናል፣ አኪ ማንጎ  ይኒያቲሳ  ጉዳይ ሚያነ፡፡

      ጋይዮሱህ አካህ ይምስኪረ

   5. ኦ'ይክሓንቶሊ! ኢንኪጉል ኡካ ገዻ የክኒሚህ ኢሲ ሳዖልቲህ ኢምነቲህ ሢራሕታ፡፡ 6. ኢሲን ለ አካህ አብተ ካሓኒ ሢራሕ አማንቲ ማኅበሪህ ነፊል ያምስክሪን፣ ካዶሊህ ፉጎ ኒያቲሳ አጋባቢራህ ተን ጎሮኒሰምኮ መዔም ኪኒ፡፡ 7. ኢሲን ክርስቶስ ያስጋልጋሎና አውዒህ አረማውያውንኮ ኢንኪ ዲጋፍ ማገኖን፡፡ 8.ሓቂ ሢራሕ ሓድድልታም  ናኮ፣ ታይ ዒለህ  ታነ ሒያው ጎሮኒስኖ ኖልታነ።

 ዲዮትሬፌስ ይምውቂሰ፣ ድመጥሮስ ይምስጊነ    

   9. ታሃምኮ ባሶህ ሞሶዓረህ ደብዳበ ኢጽሒፈህ አኒዮ፣ ያኮይ ኢካህ ሞሶዓሪ መራሒ ያኮ ጉራ ዲዮትሬፌስ ይሓሳብ ማጋራይና። 10. አማይጉል ሲና ዻጋህ አምተጉል ኡሱክ ኖህ ዋትማከ ናይወረድክ አበ ኡማ ሢራሓህ ኡምቢህ፣ ኡማንቲያህ ዋንስተ ሊዮ፣  ኡሱክ አባም ታሃም ጥራሕ ማኪ፡፡ ኡሱክ ኢሰህ ኢሲ ሳዖል ማጋራ፡፡ አኪ ማሪ ተን ጋራያምኮ ተን ደሳ። ሞሶዓረኮ ተን ያየዔ፡፡ 11. ይካሓንቶሊ! መዔቲያህ ኢምጊድ ኢካህ ኡማቲያህ ማማጋዲን፡፡ መዔ ሢራሕ ሢራሓቲ ኡምቢህ መዔፉጊህቲያ ኪኒ፡፡ ኡማ ሢራሕ ሢራሓቲ ለ መዔፉጎ ማብሊና። 12. ድሜጥሮሱህ ሒያው ሙሉኡክ መዔነህ አካህ ታምስኪረ፡፡ ሓቂ ኢሳሞህ  ለ ያምስኪረ፡፡ ናኑ ለ ናምስኪረ፣ ኒ'ማስኪር ሓቀ ኪናም ታዽገ፡:

             ባክቶ ሳላምታ

   13. ኮል አጽሓፎ ጉራምኮ  ማንጎ ጉዳይ ሊክ ኢነ፣ ያኮይ ኢካህ ደብዳበህ ኮል አጽሐፎ ማጉራ፡፡ 14. ዳጎ ዋክተህ ኩአብሎ ታስፋ አባ፣ ታማይ ዋክተ ነፍ ነፊህ ዋንስተሊኖ፡፡15. ሳላም ኮያህ ያኮይ፡፡ ካሓንቶሊት ሳላምታ ካብ ኮህ ኢሳን። አቱ ለ ኒካሓንቶሊቲህ ቲቲያህ ሳላምታ ካብ ኖህ ኢሲ።