ማዳሒት ያሃንስ መልእክት

                 ማዳሒት ሐዋርያ ያሃንስ መልእክት

           

              

                     ሳይማ           [ዸ ዹ ዺ ዻ ዼ ዽ ዾ]

ማዳሒት ያሃኒስ መልእክት ትምጽሒፈም ስማጊለ ሐዋርያ ያሃኒሲህ ኪይህ፣  ተምጽሒፈም ጋዮስ አክያን ሞሶዓሪ መራሒህ ኪይይ ዪነ፡ ጻሐፊ ኢንኪ ደፍራኮ  አኪ ክርስቲያን ጎሮኒሰርከህ ጋዮስ ያይምስጊነ፣ አኪ  ደፍራህ  ዲዮጥራጢስ አክያን ተንኮለይና ኪን ሒያውቶኮ ያምጣንቃቆ ያስሔሰሰበ፡፡              ___________________________

    ማዕራፋ1

 1.ሐቀህ ኪሒኒዮ፣ ኢምኪሒን ጋይዮሶ፣ ዮያ ሲማጊለይታኮ ፋርምተ መልእክት፣ 2.ኦ'ይካኃንቶሊ! ኢሲ ናብሰህ ናጋይ ኪቶም አዽገ፣ ታማም ባሊህ ናብራ ሙሉኡክ ኮህ ታምታካካሎከ ዓፍያት ታሎ ጻሎት አባክ አኒዮ፡፡ 3.ውልውል ሳዖል ተመተህ ሐቀህ ኡሙን ኪቶም ሐቀ ቲብዸህ ማርታም አምስኪሪህ ኦበርከህ ጋዳህ ኒያታ፡፡ 4.አይሚህ ይዻይሎ ሐቀ ይብዺኒህ ማራናም  አበምኮ አጋናል፥ አኪ ማንጎ  ይኒያቲሳ  ጉዳይ ሚያነ፡፡

      ጋይዮሱህ አካህ ይምስኪረ

  5.ይሳዖሎ! ኢንኪጉል ኡካ ገዻ የኪኒሚህ ኢሲ ሳዖልቲህ ኢምነቲህ ሥራሕታ፡፡ 6.ኢሲን ለ አካህ አብተ ካሓኒ ሥራሕ ኡማን ማኅበሪህ ነፊል ይምስኪሪን፣ ካዶሊህ ፉጎ ኒያቲሳ አጋባቢራህ ተን  ጎሮኒሰምኮ መዔም ኪኒ፡፡ 7.ኢሲን ክርስቶስ ያስጋልጋሎና አውዒህ አረማውያውንኮ ኢንኪ ዲጋፍ ማገኖን፡፡ 8.ሐቂ ሥራሕ  ሓዲሊታም  ናኮ፣ ታይ ዒለህ  ታነ ሒያው ጎሮኒስኖ ኖልታነ።

 ዲዮትሬፌስ ይምውቂሰ ፣ ድመጥሮስ ይምስጊነ    

   9.ታሃምኮ ባሶህ ሞሶዓረህ ደብዳበ ኢጽሒፈህ አኒዮ፣ ያኮይ ኢካህ ሞሶዓሪ መራሒ ያኮ ጉራ  ዲዮትሬፌስ ይሐሳብ ማጋራይና ፡፡10.አማይጉል ሲና ዻጋህ አምተጉል ኡሱክ ኖህ ዋቲማከ ናይወረድክ አበ ኡማ ሥራሐህ ኡምቢህ፣ ኡማንቲያህ ዋንሲተሊዮ ፣ ኡሱክ አባም ታሃም ጥራሕ ማኪ፡፡ ኡሱክ ኢሰህ ኢሲ ሳዖል ማጋራ፡፡ አኪ ማሪ ተን ጋራያምኮ ተን ደሳ። ሞሶዓረኮ ተን ያየዔ፡፡  11.ይካሓንቶሊ! መዔቲያህ ኢምጊድ ኢካህ ኡማቲያህ ማማጋዲን፡፡ መዔ ሥራሕ ሥራሐቲ ኡምቢህ መዔፉጊህቲያ ኪኒ ፡፡ ኡማ ሥራሕ ሥራሐቲ ለ መዔፉጎ ማብሊና። 12.ድሜጥሮሱህ ሒያው ሙሉኡክ መዔነህ አካህ ታምስኪረ፡፡ ሐቂ ኢሳሞህ  ለ ያምስኪረ፡፡ ናኑ ለ ናምስኪረ፣ ኒ'ማስኪር ሐቀ ኪናም ታዽገ፡፡

             ባክቶ ሳላምታ

     13.ኮል አጽሐፎ ጉራምኮ  ማንጎ ጉዳይ ሊክ ኢነ፣ ያኮይ ኢካህ ደብዳበህ ኮል አጽሐፎ ማጉራ፡፡ 14.ዳጎ ዋክተህ  ኩአብሎ ታስፋ አባ፣ ታማይ ዋክተ ነፍ ነፊህ ዋንሲተሊኖ፡፡

15.ሳላም ኮያህ ያኮይ፡፡ ካሓንቶሊት ሳላምታ ካብ ኮህ ኢሳን። አቱ ለ ኒካሓንቶሊቲህ ቲቲያህ ሳላምታ ካብ ኖህ ኢሲ።