ኤደዶይታ ጴጥሮስህ መልእክት

ኤዸዾይታ ጴጥሮስ መልእክት

ሳይማ   

    ኤዸዾይታ ሐዋርያ ጰጥሮሲህ መልአክትል ትምጽሕፈ ፋሮህ አዳል "ፉጎህ ዶሪምመ ህዝበ " አይክ  ደዕምምታምከ ዕንዳ እስያል  ሰሜን ክፍለል ትምብትነህ ቲነ ክርስቲያናህ ኪኒ፣ መልእክቲ ዋና ፊረ ጉዳይ ተን እምነቲህ ምክንታል ስደትከ መከራ ተን ማደህ ቲነ አንበብቲ ያይጣናካሮከ ይጻናናዖ ኪኒ፣ ጻሓፊ ታሃም አባም ካራቢህ፣ ኡግታቶኮ፣ ጋሔህ ያምተሚህ ታስፋ ታብሥረ ኢየሱስ ክርስቶስህ በሠራታ ቃል ታይንብበም ያስሓሳሳቦና ኪኒ፤ ኢየሱስ ክርስቶስህ ሂወት ምሳለህ ዩብሊኒህ መከራ ትዕግሥቲህ ጋራዎና ኤልታነም ያይሔሰሰበ፤ ታሃምሊህ የይዸበዸበህ መከራ ኒኢምነቲህ ጽርየት ታይፍድነምከ ኢየሱስ ክርስቶስ ያምቡሉወ ለለዕ ኤዳ ስልማት ጋራያናም ተን ታይረደደኤ፡፡ ጻሐፊ መከራ ያምዓጋሶና ያደፈፈረምኮ ፈር ታይንብበም ክርስቶስ ታክትለም ያናዎና ኤዳም ታናዎ ተን ያስሔሰሰበ፡፡       =========================================                                                                              ማዕራፋ 1   

   1. ኢየሱስ ክረስቶስህ ሐዋርያ የከ ጰጥሮስኮ፣ ተመቶይቲት ተኪኒህ ጳጦስል፣ ገላቲያል፣ ቀጰዶቅያል፣ እስያል፣ ቢታኒያል፣ ተምበተተንኒህ ማራታማክ፣ 2. መዔፉጊ አባህ ቶኮሚኒህ ትምውሲነምከ ዶሪመምተምክ፣ ኢየሱስ ክርስቶሱህ ታምአዛዞናከ ካቢሎህ ትምንዚሕኒህ ታጽራዎና መንፈስ ቁዱሱህ አካህ ትምቅደሲን፣ ጸጋከ  ሳላም ሲናህ ያማንጎይ።                

                                             ታነ ታስፋ                                                     

  3. ኢየሱስ ክርስቶስህ ኡገታቶህ ምክንታል ታነቲያ ተከ ታሰፋ ዮሖወ፣ ናባ መሕረቲህ ዑሱብ ኡብካህ ዻይሎ ናበ፣ ማደሪ ኢየሱስ ክርስቶስህ አባ የከ አምላክ ያማሰጋኖይ። 4. ኡሱክ ዓራናል ያነ አለየ ዋቲያከ አምቦሎሶወ ዋቲ፣ አምዔለ ዋ ሪስተ ናውራሶ ናበ። 5. አቲን ለ ባኪቶ ለለዕ ሲናድ ያግጢመ ድኅነት ኢምነት ኡላህ መዔፉጊህ ኃይላህከ ኢምነቲህ ዻዉዹምተን። 6. ጉርሱሳቲያ የከህ ገይመምኮ ሲኒሲኒ ፋታናህ ኢንኪጉል ኡካ ትኅዚንኒሚህ ታይ ጉዳህ ኒያተ ሊቲን፡፡ 7. ታይ ፋታና ሲን ማዳም ሲኒ ኢምነቲል ሓቀ ልትኒም ያይራጋጋጾ የህ ኪኒ፣ ያለየ ዋርቂ ኡካ ጊራህ ያምዒኪነ፣ ዋርቀኮ አጋናል ይክቢረ ሲን ኢምነት ታሃም ባሊህ ያምፋታኖ ኤልያነ፣ ታይ ይምፍቲነ ሲን ኢምነት ኢየሱስ ክርስቶስ ያምቡሉወ ዋክተ ምስጋና፣ ክብረከ ሞሳ /ውዳሰ/ ሲናህ ገይሲሳ፡፡ 8. ኢየሱስ ክርስቶስ አብለ ዋይተኒሚህ ኡካ ካአክኂነ ሊቲን፣ አብለዋይተም ተክንሚህ ካተመንኒህ ቃላታህ ያምጋላጾ ዺዒመዋ ቲያከ ይክበረ ኒያታህ ሲን ኒያቲሳ። 9. አይሚህ ሲን ኢምነቲህ ዓላማ የከ ስኒ ናፍሲህ ድኅነት ገይታንጉል ኪኒ። 10. ታይ ድኅነቲህ ጉዳይ ነብያት ጥንቃቀህ ዋጊየኒህከ ይምርምሪኒህ ይኒን፣ አማይጉል ታይ ነብያት መዔፉጊ አካህ ዮሖወ ጸጋህ ዮኮሚኒህ ትንብትህ ዋንስተን። 11. ተን አዳድ ይነ ክርስቶስ መንፈስ፣ ክርስቶስ ካማዳ መከራከ ሔልዋይኮ ሣራህ ገያ ክብረ ዮኮመህ ካይስቡሉወህ ይነ፣ ኢሲን ለ ታሃም ኡምቢህ አንዳ አይናህ የህ አዒለህ ያከም ይምርምሪኒህ ይኒን። 12. ታይ ነብያት አስግልግልክ ቲነም ሲና ኪኒካህ ሲነ ኪይይ ማናዎኑም አካህ ይምቡሉወ፣ ሲን ትስግልጊለም ዓራንኮ ፋሪመ መንፈስ ቁዱስ ምክንያታል ካዶ ወንጌል ትይብሥረ ሒያው ሲናክ የኒም አሉውክ ኪኒ፣ ታይ ጉዳይ ማላይካ ኡካ ያብሎና አትሚኒይ ይኒን፡፡                             

ቅድስናህ ማራናም 

   13. አማይጉል ሲኒ አፍዓዶህ ኢንቂሓይ ሥራሓህ ኦምሶኖዶዋ፣ መጠኒህ ማራ፣ ኢየሱስ ክርስቶስ ያምቡሉወ ዋክተ ገይታን ጸጋህ ሙሉእ ታስፋ አብታ። 14. ታምኢዚዘ ዻይሎ ተክኒህ ሶዻህ ባሶህ ሊክ ትኒን ኡማ ትምኒት ማካታልና። 15. ያኮይ ኢካህ ሲን ደዔ መዔፉጊ ቁዱስ የከምባሊህ አቲን ለ ሲኒ ናብራህ ኡምቢክ ቁዱሳን ቲካ። 16. አይሚህ "አኑ ቁዱስ ኪዮጉል፣ አቲን ለ ቁዱሳን ቲካ" የህ ይምጽሕፈ። 17. ቲያ አይዶሎወካህ ኢንከከቲ አሞል ተንተን ሥራሕ ባሊህ ያፍሪደቲ መዔፉጎ "ና'ባ" ተኒህ ደዕታናም የከምኮ፣ ታይ ዓለሚል ገዺኖህ ተመቶይቲት ተኪኒህ ማርታንጉል ካማይሲታይ ማራ። 18. ታዽግኒም ባሊህ፣ አቲን ትድኅንኒም ሲን አቦብቲኮ ትውሪሲን ካንቶ ኪን ናብራህ ያለየ ጉዳህ፣ ማላህ ወይ ዋርቀህ ማኪ፡፡ 19. አቲን ትድኅንኒም ናውረ ሂን ጺሪይ ዒዶይታ የከ ክርስቶስ ኩቡር ቢሎህ ኪኒ። 20. ኡሱክ ዶሪሚመም ዓለም ያምፍጢረምኮ ባሶል አኪህ፣ ካዶ ባክቶ ዳባን ሲን ኢዻህ ይምቡሉወ። 21. ካባርካታህ ለ ካያ ራባኮ ኡጉሠህከ ክብረ አካህ ዮሖወም አሚኒክ ታኒን፣ አማይጉል ሲን ኢምነትከ ሲን ታስፋ መዔፉጎል ኪኒ፡፡ 22. ግበዚና ሂን ካሓኖህ አማንቲ ተከ ሳዖትቲሊህ ማርቶናክ ሓቀህ አምኢዚዚክ ሲኒ ናፍስት ታይፂሪይን፣ አማይጉል ሙሉእ ሲኒ አፍዓዶህ ስነስነህ ሲክ ኤያይ ቲታ ኢክሒና። 23. ማላሚህ ቶቦክኒም ያነቲያ የከቲያከ ኡማንጉሉህ ሲክ የህ ማራ መዔፉጊህ ቃላህ አለየዋ ዳራኮ ክኒካህ ያለየ ዳራኮ ማክቲን። 24. አይሚህ ማጽሐፍ ያምባሊህ"ኃዶይታ ሀይስተቲ ዓይሶ ባሊህ ኪኒ፣ ካ ክብሪ ኡምቢህ ባራኪ ዒምቦባ ባሊህ ኪኒ፣ ዓይሶ ለ ካፍታ፣ ዒምቦባ ለ ኡርጉፉምታ፣ 25. መዔፉጊህ ቃል ግን ይጽኒዔህ ማራ፣ በሠራታ የከህ ሲናህ ይምኢውዘ ቃል ለ ታይቲያ ኪኒ።                     

                                                 ማዕራፋ 2                                                                                             ያነ ዻከ ቁዱስ ህዝበ                                                1. አማይጉል ኡምነ ኡምቢህ፣ አይታላል ኡምቢህ፣ ግብዝና፣ ቅንአት፣ አኪናን ዓይነቲህ ሓሚ ሚሪሕ ኢሳ፣ 2. ዑሱቢህ ቶቦከ ሕፃናት ሓን ያትምንኒም ባሊህ፣ አቲን ለ ሲኒ ድኅነት አይነብክ ኤድታዲይን ፂሪይ መንፈሳው ትምህርቲ ኢትሚኒያ። 3. ታታማናዎና ዽዒታናም "ፉጊ መዔቲያ ኪናም ዻዓምተኒህ ተዸጊኒህ የከምኮ ኪኒ፡፡"4. አማይጉል ያነ ዻ የከ ማዳራ ኢየሱስ ኡላል ካበያ፣ ታይ ዻይ ሒያው ዻይተህ ዒደቲያ፣ መዔፉጊ ለ ዶረህከ ይስከብረቲያ ኪኒ፡፡ 5. ማዳራ ኢየሱሱል ካብታናም ለ ያነ ዻይት ተክኒህ መንፈሳው ዓረ ባሊህ ታምሃናፆ ና ኪኒ፣ ታይ ዓይነቲህ ኢየሱስ ክርስቶሲህ ኡላህ ኒያቲሳ መንፈሳው መሥዋዕቲ ፉጎህ ታስቃራቦና ቁዱሳን ካህናት አከልቲን፡፡ 6. አይሚህ ማጽሐፋል፣ "ሀይከ ዶሪምመ ቲያከ ኩቡር የከ ዒንደፍቲ ዻ ጺዮኑል ዲፈሰሊዮ፣ ካያል ያሚነቲ ማሖላስታ" ያዽሔ ቃል ይምጽሒፈህ ገይማ። 7. አማይጉል አቲን ታምነሚህ ታይ ዻይ ኩቡር ኪኒ፣ አሚነ ዋማራህ ለ፣"ነዳቆ ዻይተህ ዒደ ዻይ ዋና ዒንደፍቲ ዻ የከ፡፡ "8. ጋባዔህ ለ፣"ሀይከ! ጎንፎይሳ ዻይ፣ ሀይከ! ሒያው ይሕንክለህ  ዒዳ ዶንጎሊ"የኒም ባሊህ ኪኒ፡፡ አይሚህ ኢሲን ካቃል አሚነ ዋየንርከህ ጎንፎይተን፣ ኢሲን ይምውስኒንም ታሃማህ ኪኒ። 9. አቲን ለ ዲተኮ ያይድንቀ ኢፎል ደዕምምተም ተክኒም መዔፉጊህ ዲንቀ ኪን ሢራሕ ታአዋዞና ዶሪምተ ማባኮ፣ ኑጉሥ ካህናት፣ መዔፉጊ ኢሲም አበ ቁዱስ ህዝበ ኪቲን። 10. አቲን ባሶህ መዔፉጊህ ህዝበ ኪይክ ማናይቲን፣ ካዶ ለ ፉጊህ ህዝበ ኪቲን፡፡ ባሶህ መሕረት ገይተኒህ ማናይቲን፣ ካዶ ለ መሕረት ገይተኒህ ታኒን ና።

                                         መዔ ፉጊህ አገለገልቲ                                

   11. ይሳዖሎ! ዓለሚል ገዻከ ተመቶይቲት ኪቲንጉል ናፍሰሊህ ታምወገኤ ኃዶይታ ካኃኖኮ ሚሪሕቶና ሓዳራ ሲናክ አይክ አኒዮ። 12. ኢንኪጉል ኡካ ኡማም አብታም ኪቲን የኒህ ሲን ሓምታንጉል ለ ፉጊ ኖያ ዋርሲሞ /ማዶ/ ያምተ ለለዕ፣ አረማውያን መዔ ሲን ሢራሕ ዩብሊን ኢርከህ  ምክኒያታል ፉጎ ያይማስጋኖናክ ተን ፋናድ ማርታንጉል መዔ ሓል ኤላአ፡፡ 13. ማደራ ኢየሱሱህ ቶና ኃላፍነት ለ ሒያዋህ ኢምዚዛ፣ ናባ ሢልጣን ባዕል ኪን  ኑጉሠ ነገሥቲህ፣ ኢምኢዚዛ፡፡ 14. ባዾት አሞይቲቲህ ለ ኢምኢዚዛ፣ አይሚህ ኢሲን ኡማም አብታም ያቅፃዖና፣ መዔም አብታም ያይማስጋኖና ኑጉሠ ነገሥትኮ ፋርምተም ኪኖን።  15. መዔም አበኒህ ኡፉዋይቲህ ሶዻ ዋኒ ቲብ ኢሶና ፉጊ ዲላይ ኪኒ፡፡ 16. ፉጊ አገልገልቲ ተኪኒህ ናፃህ ማራካህ ሲኒ ናፃነት ኡምነት አልፈንታ ማቢና፡፡ 17. ሒያው ኡምቢህ ኢስክቢራ፣ ኡማንቲያ ኢክኂና፣ መዔፉጎ ማይሲታ፣ ኑጉሥ ኢስኪቢራ።            

                                           ክርስቶስ ሔልዋይህ  ምሳለ                                        18. አቲን አገልገልቲ ሲኒ ማዶር ኢስክቢራ ኢምኢዚዛ፣ ታምኢዝዚኒም ለ መዔ ማራህከ ጋርሄ ለሚህ ጥራህ አከካህ ኡማ ማራህ ለ ኪኒ። 19. አይሚህ ሒያው ታምስግነም ጊፍዔከ ጸገም ጋራየኒህ ፉጎህ የኒህ ትዕግሥት አባንጉል ኪኒ። 20. ኡማም አብተኒህ ቅጽዓት ጋራይተኒህ ትዕግሥት አብታንጉል አይሚህ ሞሳ ገይታና? ያኮይ ኢካህ መዔም አብተኒህ መከራ ጋራይተኒህ ትዕግሥት አብታንጉል ፉጎኮ ምስጋና ጋይታን። 21.ደዕምምተኒም ታሃማህ ኪኒ፣ አይሚህ ካአብነት ታካታሎና ክርስቶስ መከራ ጋራየህ አብነት ሲናህ የከ። 22. ኡሱክ ኢንኪ ኃጢአት ማቢና፣ አፋድ ቶንኮል አክ ማገይሚና። 23. አካህ ዋቲማህ ደሄየህ ማዋቲሚና፣  መከራ ጋራህ ጻድቅ ፈራዲ የከ አምላካል ተስፋ አበካህ ማይሲሶ ማቢና። 24. ናኑ ራባህ  ባዽሲምናም ኢዻ ኃጢአትኮ ባዽስምነህ ጽድቀህ ማርኖ፣ ኡሱክ ኢሲ ኃዶይታህ ኒኃጢአት ማስቃል አሞክ ይይኩዔ፣ ካ ቢያካህ አቲን ኡርተን። 25. አይሚህ አቲን ተለየ ዒዶባሊህ ተምበተተንኒህ ቲኒን፣ ካዶ ለ ሲኒ ናፍሰህ ሎይናህከ ዻዉዸናህ  ጋሕተን።                                                                               

                                              ማዕራፋ 3  

                                              ባዕላከ ኑማ                                                        1. ታማም ባሊህ አቲን አጋቦ ሲኒ ባዕሊህ ኢምኢዚዛ፣ ታይ ዓይነቲህ ገና ፉጊ ቃል አሚነ ዋይታ ባዒል ይንይኒምኮ አፍቲ ማስኪር ዲቦህ አከካህ ተን አጋቢህ ሂወቲህ ምስክሪነትህ ጋሖና ዺዓን፣ 2. ታሃሞም አባናም ፂሪይ ቲያከ ሒያው ያስክብረቲያ የከ ተን ሂወት አብልክ ኪኒ፡፡ 3. ሲን ዒዺ ዳጋር ሢራሕተኒህ፣ ዋርቂ ላኮዕ  ትይጥልጥልኒህ፣ ማንጎ ጋዳህ ክብረ ለ ሊሞ ያየዔ ሳራ ሃይሲተኒህ ኢሮኮ ገይማ ዒዸ አከዋዎይ። 4.ያኮይ ኢካህ ሲን ዒዺ መዔፉጊህ ነፊል ሊሞህ ጋዳህ ይክብረቲያ ያከ ቲያከ አለየዋ ዒዸህ ጋርሄህከ ትዕግሥቲ፣ መንፈስህ ዓዻ ያምዖይ፣ አፍዓዶድ የለየህ ገይማ፣ አዳ ሰውነት ያኮይ። 5. አይሚህ ዮኮመ ዋክተ ኢሲ ታስፋ መዔፉጊህ አሞል ዒደም፣ ትምቅድሰ ሳዮ ዓዻተምዔም ታይ ዓይነቲህ ኪይይ ይነ፣ ሲኒ ባዕሊህ አምኢዚዝይ ይኒን። 6. ያምኢዚዚኒም ሣራ አብራሃማክ"ይማደራ"አይክ አምኢዚዚክ ትነሚህ ዓይነቲህ ኪኒ፣ አቲን መዔም አኪናን ጉዳይ አብታንጉልከ ማይሲህ ተን ተገዛእቲ አከዋይተኒሚህ ተን ዻይሎ ኪቲን፡፡7. አቲን ለ ባዕሎ ሲኒ አጋቦሊህ ኢስትውዒላይ ኢንኮህ ማራ፣ ሲንኮ ጋዳህ ሩኩት ፍጥረት ኪኖንጉልከ ሲንሊህ ሂወት ጸጋ ያውሪሲንጉል ተን እስክብራ፣ ታይ  ዓይነቲህ ሲን ጻሎቱህ ጎንፎይ ያካ ጉዳይ ሚያነ፡፡                                                                        

                                መዔም አቦና  መከራ ጋራናም                              

    8. ራዕተሚህ ኡምቢክ ለ ሲነሲነህ ኤምሰመመዓይ ማራ፣ አኪ ሒያውቲህ ጸገም ሲናሞህ ቲያ ባሊህ አባይ ኢሕሲባ፣ ሳዖልቲ ካሓኖህ ኤምከሔና፣ መዔ ማራከ ትሕቲና ለም ቲካ። 9. ዳዳዓ ኢካህ ኡምነ ኡምነ ቲዻህ፣ ዋቶ ዋቶ ቲዻህ ማደሄይና፣ አይሚህ አቲን ደዕምምተኒም ታሃም አብተኒህ በረከት ታውራሶና ኪኒ፤.10. ማጽሐፍ ያም ባሊህ“ሂወት ኪሒንቲያከ መዔ ለለዕ ያብሊኒም ጉራቲ፣ ካአራብ ኡማ ጉዳይ ዋንሲተ ዋዎይ፣ ዋገበህ ተንኮል ዋንስታምኮ ኢሰ ደሶይ፡፡ 11. ኡማ ጉዳይኮ ሚሪሕ ዮዋይ፣ መዔ ጉዳይ አቦይ፣ ሳላም ዋግዮይ፣ ያካታሎይ፣ 12. አይሚህ መዔፉጊህ ኢንቲት ጻድቃን ኡላል ታብለ፣ አይቲት ተን ጻሎት ታቦ ፋኪታ፣ ኡማም አብታሚህ አሞል ለ መዔፉጊ ቁጡዓ ነፍ ያስቡሉወ፡፡"13. መዔ ጉዳይ አብቶና ትትግሂኒምኮ ቢያክ ሲን ማድሳቲ አቲያ ኪኒ? 14. መዔ ጉዳይ አብቶና መከራ ጋራይታንጉል ኡካ በረከት ገይታን፣ ሒያው ማይሲሶ ማማይሲቲና፣ ማምጻናቂና። 15. ማደራ የከ ኢየሱስ ሲኒ አፍዓዶኮ ኢስክቢራ፣ ሲናድ ታነ ታሰፋህ ምክንያታል ሲን ኤሠርታማህ ኡምቢህ መልስ ታሓዎና ቶምሶኖዶወም ቲካ፡፡ 16. ያከካህ ሲን መልሲ ጋርሄልከ ክብረህ ያኮይ፣ ክርስቶስም ኪቲኒም ኢዻህ መዔ ኃሊህ አሞል ኡማም ዋንሲታ ሒያው ሲኒ ኡማ ዋኒህ ሖላሲቶና መዔ ኅሊና ሲንሊህ ታናዎይ። 17.አይሚህ መዔፉጊህ ዲላይ የከምኮ ሲናህ ታይሰም መዔ ጉዳይ አብተኒህ መከራ ጋራይታንጉል ኪኒ ኢካህ ኡማ ጉዳይ አብተኒህ ሔልዋይ ጋራይተኒሚህ ማኪ። 18. ክርስቶስ ኢሰህ ፉጎል ካብ ኒሶ ኡሱክ ጻዲቅ ኪኒሃኒህ፣ ጽድቀ አለዋይና ኖያህ ኒ ኃጢአቲህ ሳባባል ጋባዕሲሰ ዋታ አገባብራህ፣ ኢንኪጉል መከራ ጋራየህ ራበ፣ ኡሱክ ኃዶይታህ ራበ፣ መንፈስህ ለ ያነቲ የከ፡፡ 19. ሲኦሉድ ቱምዹወሚድ ኢሲ መንፈስህ የደ፣ ታማድ ቲነ ነፍሳት በሠራታ ቃል ይብሥረ። 20. ታይ ዋክኒ ዓረድ ቲነ ነፍሳት ባሶህ ኖኅቲ ዳባን መርከብ አምሶኖዶውህ  መዔፉጊ ትዕግሥቲህ ተን ኢላላይ ያነሃኒህ ማናምኢዚዘ ተም ኪኖን። አዳድ ሳየኒህ ላየ ኩነታትኮ ትድኂነሚህ ሎይ ባሐር ታከ ዳጎ ሒያው ኪኖን። 21. ታይ ላየ ካዶ ሲና ታይድኅነ ጥምቀት ምሳለ ኪኒ። ታይ ጥምቀት ናብሲ ዑዱፍ ያለየም አከካህ መዔ ኅሊናህ መዔፉጎል ካብታ ዻዕምቶ ኪኒ፣ ሲን ያይድኅነም ለ ኢየሱስ ክርስቶስህ ኡግታቶህ ምክንያታል ኪኒ። 22. ኡሱክ ዓራናል የውዔህ መዔፉጊህ አባ ምድጋል ታነ፣ ማላይካከ ሢልጣናት ኃይሊት ለ አካህ ያምግዚኢን፡፡         

                                           ማዕራፋ 4                                                                                                ቅድስናህ ማራናም                                                      1. ክርስቶስ ኢሲ ኃዶይታህ ሲቃይ ጋራየቲያ ኪኒጉል፣ ሲና ለ ታይ ሓሳባህ ጦርቲ ኑዋይቲ ባሊህ የከህ ሲን ያይበረተዔ፣ አይሚህ ኃዶታህ መከራ ጋራቲይ ኃጢአት ሢራሓናም ሓበ። 2. ካምቦኮ ሣራህ ባዾ ናብራህ ማራቲ ኃዶይታት ኡማ ትምኒት አባናም አከካህ መዔፉጊህ ፍቃድ አፍጽሚክ ኪኒ። 3. አይሚህ አረማውያን አብታም ባሊህ ቲታ ኦርቢሳክ፣ ኃዶይታ ካሓኖህ፣ ሲክራናህ፣ ጎይላህ፣ ኤዳምኮ አጋናል አዑብከ ጎይልሳክ፣ ታይኒዊረ ጣዖት አምልኮድ ትላሰን ዳባን ዺዓ። 4. ካዶ ለ ታይ ጉዳህ ኤዳምኮ አጋናል ተንሊህ ሒንቃቀ አምሰተፈ ዋይተን ኢርከህ ታምድኒቂን፣ ሲናህ ለ ዋትማን። 5. ያከካህ ሂወቲህ ታነምከ ራብተሚህ አሞል ያፍረዶ ዮምሶኖዶወ ቲያል ካያል መልስ ኤል ያሓይን። 6. ራቦንቲቲህ ራዔካህ ወንጌል ይምስብከም ታይ ምክንያታል ኪኒ፣ ታይ ዓይነቲህ ተን ኃዶይታል ሒያውቶ ባሊህ ኤልያፍሪደ፣ ተን መንፈሲህ ለ  መዔፉጊ አካህ ማራሚህ ዓይነቲህ ሂወቲህ ማረሎን፡፡                             

                    መዔፉጊህ ሒንዳህ መዔነህ ያይመኄደሪኒም                         

 7. ኡማኒሚህ ባክቶ ካብተህ ታነ፣ ትግሃታህ ጻሎት አባናም ዺዕቶናክ ትርግኤ አእምሮ ስንሊህ ታናዎይ፣ መጠኒህ ለ ማራ። 8. ካሓኒ ማንጎ ኃጢአት ያድምስሰጉል ኡማኒሚኮ አሞል ስነስነህ ሲክ ኤያይ፣ ኤምከሔና። 9. አግራምራም ማለህ ስነስነህ መዔነህከ ገዽኖህ ቲታ ጋራ ። 10. ሲኒሲኒ መዔፉጊህ ጸጋህ ሓቶህ ኢምነቲህ አይመሔደሪክ ሲንኮ ኢንከከቶህ ተምሖወ ጸጋ ያዕድልንሚህ ዶባይቶ፣ያስጋልጋሎይ።11.ያይምሂረቲ መዔፉጊ ካሊህ ዋንሲታይ ያነምባሊህ አበህ ዋንሲቶይ፣ ያስግልግለቲ መዔፉጊ አካህ ዮሖወ ኃይላህ ያስጋልጋሎይ፣ ታይ ዓይነቲህ መዔፉጊ ኢየሱስ ክርስቶስህ ደፍራህ ኡማን ጉዳህ ያምስጊነ፣ ክበረከ ሢልጣን ኡማንጉሉህ ካቲያ ያኮይ፣ አመነ፡                                    

                                         መክራ  ዋክተ ያፅንዕኒም                                              12. ይሳዖሎ! ጊራ ባሊህ ያፍቲነ ጸገሚህ አዳል ገይምታንጉል አምገለዋየ ገዸንታ ኪን ጉዳይ ስንማደም ባሊህ አብተኒህ ማምጋራሚና፣ 13. ጋዳህ ኡሱክ ያምቡሉወ ዋክተ ጋዳህ ደስ ሲናህ ዮዋክ ክርስቶስ መከራ ሓድልታም ክትኒሚህ መጠኒል ኒያታ። 14. ክርስቶስ ምጋዒህ ዳዓባል ዋትሚምተኒምኮ ኩቡር የከ መዔፉጊህ መንፈስ ሲን አሞል ያዕሩፈም ኢዻህ ኒያታ። 15. ሲንኮ አኪናንቲ መከራ ጋራጉል ናብሰ ይግድፈቲያ ባሊህ፣ ባዸዻይቶ ባሊህ፣ ወንገል አበቲያ ባሊህ፣ ሒያው ጉዳይህ ፋንድ ሳያቲያ ባሊህ አከዋዎይ፣              16. ክርስቲያንቶ የከርከህ መከራ ካማዳቲ ይኔምኮ ለ ክርስቶስ ሚጋዓህ መዔፉጎ ያይማስጋኖይ ኢካህ ሖላሲተ ዋዎይ። 17. ፊርዲ ኤዸዻ ዋክቲ ካብየ፣ ፊርዲ ኤዸዻም መዔፉጊህ ሒያዊህ አሞል ኪኒ፣ ኢስኪ ፊርዲ ኤዸዻም ኖያል የከምኮ፣ መዔፉጊህ ወንጌሊህ አምአዚዘ ዋይታ ሒያው ተን ባክቶ አይም ታከ። 18. ማጽሐፍ ያምባሊህ፣"ጻድቅ ኡካ ያድኃኖ ዺዓም ጺንቀህ የከምኮ፣ ዓማፀይናከ ኃጢአተይና አይናህ ያኮና ኪኖኑ?" 19. አማይጉል መዔፉጊህ ፍቃድ ባሊህ መከራ ጋራይታ ሒያዋህ ተን ኡማናህ ያምኢሚነ ፈጣሪ ኃዳራህ አካህ ዮሖወ  መዔ ጉዳይ አባናምኮ ሲነ ማራዒሲና።                                            ማዕራፋ 5                                   

                  መዔፉጊህ ሕዝበ ያስሓዳሮና ቶምሔወ  መምረሕ                       

  1. አማይጉል አኑ ተንሊህ ኢንኮህ ኤከህ ሞሶዓሪ ስማግለይታ የከቲያክ፣ ክርስቶስ መከራህ ማስኪር ያከቲያከ፣ ታማም ባሊህ ባሶቱላል ያምቡሉወ ክብረ ያምከፈለቲያ የከቲያክ፣ ሲን ፋናድ ታነ ሞሶዓሪ ስማግሊት አምክሪክ አኒዮ። 2. ሓደራህ ሲናህ ቶምሖወ መዔፉጊህ ዱየ ዻዉዻ፣ ዱየ ዻዉዻናም ጊደህ አከካህ መዔፉጊ ጉራ ዓይነቲህ፣ ዲላያህ ያኮይ፣ ማላህ አምሆጎጎይክ አከካህ ታስጋልጋሎና ሊቲን መዔ ዲላያህ ያኮይ፡፡ 3. ታማም ባሊህ ሲን ኃላፊነቲህ ዳባል ታነም ቱጹኩኒንህ አይመሔደሪክ አከካህ፣ ዱየ መዔ ሚሳለ አይቡሉይክ ያኮይ። 4. ታሃም አብታንጉል ዋና ሎይኒ ያምቡሉወ ዋክተ አምቦሎሶወ ዋ ስልማት ጋራየ ሊቲን። 5. ታማም ባሊህ አቲን ናባማራክ ስማግለህ ኢምኢዚዛ፣ ኡምቢክ ትሕቲና ሣረና ሀይስታይ ቲይ ቲያ፣ ያስጋልጋሎይ፣ አይሚህ፣ "መዔፉጊ ትዕቢት ለም ያምቀወመ፣ ትሕትና ለሚህ ለ ጸጋ ያሓየ፡፡"6. አማይጉል መዔፉጊ ይውስነ ዋክተ ናው ሲን ኢሶ መዔፉጊህ ኃይላለ ጋባህ ዳባል ሲናሞ ላት ኢሳ። 7. ኡሱክ ሲናህ ያሕስበጉል ሲን ያይጽኒቀ ሓሳብ ሙሉኡክ ካያል ዒዳ። 8. መጠኒህ ማራ፣ ኢንቂሓ፣ አይሚህ ናዓብቶሊ ዲያብሎስ ያንዹዔም ጉረህ ጉንዱሳ ሉባክ ባሊህ ሲን ባሮል ዒምቢራ። 9. ዓለሚል ሙሉኡድ ታነ ሲን ሳዖል ታይ ዓይነቲህ  መከራ ጋራናም ኢዺጋይ ኢምነቲህ ሲክ ኤያይ ተን ኤምቀወማ። 10. ክርስቶስም ተኪንጉል ኡማንጉሊ ከብረህ ደዒምምተሚክ ጸጋት አምላክ ኢሰህ፣ ዳጎ ዋክተ ጸገም  ጋራይተኒምኮ ላካል ፉጹማን ሲን አባ፣ ሲን ያይሲሪየ። 11.ካያህ ኡማንጉሊህ ኃይላ፣ ያኮይ፣ አመን።                                                                                                         ባክቶ ሳላምታ  

      12. ያምኢሚነ ሳዓል ኪኒ ኤዽሔህ አሕሲበ ሲላስ ኡላህ ታይ ፋሮ  ኡዹዺህ ሲናህ ኢጽሒፈ አኒዮ፣ ሲናህ ኢጽሕፈም ለ ሲና አምካሮከ ታይ ሓቂ መዔፉጊህ ጸጋ ኪናም ሲናህ አማስካሮ ኤዽሔህ ኪዮ፣ አማይጉል ታይ ፉጊ ጸጋህ ሲክ ኤያይ ሶላ። 13. ሲና ባሊህ ዶሪምተ፣ ባቢሎኑል ታነ ሳዕላ ኪን ሞሶዓሪ ሳላምታ ካብ ሲናህ ኢሳይ ያነ፣ ይባዽ ማርቆስ ሳላምታ ካብ ሲናህ ኢሳ። 14. ክርስቲያን ካሓኖህ ሲነሲነህ ቲታ ፉጉታክ  ሳላምታ ቲታህ ኡሑዋ፡፡ክርስቶስም ተከምክ ኡምቢክ ሳላም ሲናልህ ታኮይ።