ጳውሎስ መልእክት ቲቶል
ጳውሎስ መልእክት ቲቶል
ሳይማ [ዸ ዹ ዺ ዻ ዼ ዽ ዾ]
ቲቶ አረመውነትኮ ክርስትናድ ጋሔየቲያ የከህ ጳውሎሱህ ወንጌል ፋሮህ ካብየህ ዻየርከኮ ሐቲ ሥራሒህ ታሐባባሪ ኪይይ ዪነ፣ጳውሎስ ታይ ፋሮ መልአክት ይጺሒፈም ዒድመህ ዕንዳቲያ የከህ ሥራሕ ታሓባባሪ ቲቶህ ኪይይ ይነጉል፣ቲቶ ታማይ ዋክተ ሞሶዓሪ ሥራሕ ያምቃጻጻሮ ቀርጢየስል ገይማይ ዪነ፡፡ መልእክት ታቱኩረም አዶሓ ዋና ዋና ጉዳይህ አሞል ኪኒ፡፡
ኤዸዾይታቲያ ሞሶዓሪ መራሕቲ ባዽሳህ ቀርጤስ ሒያዊህ ኃል አንጻራህ አይነህ ኢጊድ ዓይነቲህ ኃል ያሎና ኤዳም ቲቶህ መታሐሳሰቢ አካህ ቶምሖወ፣ማለሚኖህ፣ ሞሶዓሪ አዳድ ገይማታ ኢሲሲ ቡሎህ ማለት ለ ዒድመህ ዱፉይተ ላባቶ፣ ዒድመህ ዱፉይተ ሳዮ፥ ዒንዳነይትቲ አገልገልቲህ አይናህ የኒህ ያይምሂሪኒም ኤዳ ዒለህ ቲቶህ ምክረ ዮሖወ፣ ባክቶል ክርስቲያን ሥራሒህ ኃል ባዽሳህ ሳላማህ ካሓኖህ ማረኖ፣ሶዓሪ አዳድ ናዓቢ፣ ክርኪርከ ባ ዽሳ ሚሪሕ ቲቶህ ምክረከ መምረሒ ቶምሖወ፡፡
ማዕራፋ 1
1.መዔፉጊህ አገልጋሊከ ኢየሱስ ክርስቶሲህ ሐዋርያ የከህ፣ መዔፉጊህ ዶሮይቲት ኢምነቲህ ጎሮኒሶከ ሃይማኖት ሐቀ ያዻጎና አቦ ረዲሰ ጳውሎስ፥ 2.ታይ ሃይማኖት ኡማንጉሊት ሕይወቲህ ታስፋህ አሞል ትምሥሪተም ኪኒ፣ ዲራብተ ዋ አምላክ ታይ ሕይወት ያሐዎ ዳባናት ባሶል ቃል ኖህ ሳየ። ዳባን ማደ ዋክተ መዔፉጊ ኢሲ ቃል ይግልጸ፣ ታይ ቃል ዮያህ ሐደራህ ዮህ ዮምሖወጉል ኒያዲኂነ መዔፉጊህ ቲኢዛዚህ ሪምድህ አይብሢሪክ አነ። 4.ኡማኖይህቲያ የከ ኢምነቲህ ሐቂ ይባዻ የከ ቲቶህ፣ መዔፉጎ አባከ ኒያይዲኂነ ኢየሱስ ክርስቶሲህ ጸጋከ ሳላም ያኮይ፡፡
ማዕራፋ 2
ፂሪይ ሚሂሮ
1.አቱ ለ ፂሪይ ትምሂርቲሊህ ያምሰመመዔቲያ ኪን ቃል ኢሚሂር። 2.ዒድመህ ዱፉይተ ላበቶ፣ መጠኒህ ማርታም፣ ሲኒ ኪበረ ዻዉዻም፣ ሰሊታም፣ ኢምነትከ ካሓኖህ ትዕግሥቲ ለም ጥዕና ለም ያኮና ኢምኪር። 3.ታማም ባሊህ ዒድመህ ዱፉይተ ሳዮ ቲብታምከ ሲኒ ኪብረ ዻዉዻም፣ ሒያው ሚጋዕ ዓይንሰ ዋይታም ወይ ማሲተህ አምጊዲደ ዋይታም ያኮና ኢምኪር፣ ማንጊህ መዔም አኪናን ጉዳይ ታይምሂረም ያኮናይ፡፡ 4.ዒንዻ ሳዮ ለ፣ ሲኒ ባዕሊከ ዻይሎ ያክሓኖናይ፡፡ 5.ጥንቂቃምከ ፂራያም፣ ዓረድ ሥራሕታም፣ መዔማራ፣ ሲኒ ባዒሊህ ታምኢዚዘም ያኮና ኢይምሂራ።ታሃም አበኒምኮ መዔፉጊህ ቃል ያንቅፊቲ ሚያኒየ። 6.ታማም ባሊህ ናባ መሪ ሲነ አምቆጾጾሪክ ማሮናክ ኢምኪር። አቱ ለ መዔም አኪናኒም አባክ ኡማን ጉዳህ አብነት አካህ ቲክ፣ ሚሂሮህ ለ ሐቀ ኪናም፣ ቁዋ ለም፣ 8.አምንቂፈዋይታ ዓፊያት ለ ዋኒ አካህ ኢግሊጽ፣ ታይ ዓይነቲህ ታምከረከረም ናሞል ዋንሲታን ኡማ ጉዳይ ዋያንጉል ሖላሲታን፡፡ 9.ታስግልጊለም ሲኒ አሞይቲቲህ ያምአዛዞና ኡማን ዓይነቲህ ተን ኒያቲሶና፣ ኡማ ቃል ኤል ደሄያናምኮ፣ 10.ተን ማል ለ አክ ጋርዕታናምኮ ኢምኪራ።ጋዳህ ኒ አድኃኒ መዔፉጊህ ሚሂሮ ኡማን ጉዳህ ታምካባሮ ኡማን ዋክተህ ፍጹም አምአማን ኡስቡሉዋ፡፡ 11.መዔፉጊ ሒያው ኡምቢህ አካህ ያድኅኒኒ ጸጋ ይስቡሉወ።12.ታይ ጸጋ ኒ ኃጢአትከ ኃዶይታ ቲምኒት ናክሓዶከ ኒናሞ ናምቃጻጻሮ፣ ቂንዒናህ፣ መንፈሳውነቲህ ታይ ዓለሚል ማርኖ ኒ ያይምሂረ። 13.ታይ ዓይነቲህ ተምበረከ ኒኒ ታስፋ ዻዉዻክ ናነ፣ ታይ ኢላልና ታስፋህ ናባ ኒአምላክ፣ ኒ መደኃኒ ኢየሱስ ክርስቶሲህ ኪብረ ያግሊጺኒም ኪኒ፡፡ 14.ክርስቶስ ዓማፀኮ ኡምቢህ ኒያይዳኃኖ መዔ ሥራሕ ሥራሕኖ ቱጉሃትከ ካያህ ባዽሲመ ፂሪይ ሕዝበ ናኮ ኒ ያይፃራዎ ዒሎህ ኢሰ ቲላሰህ ኖህ ዮሖወ። 15.አማይጉል ታይ ጉዳይ ኢሚሂር፣ ሙሉእ ሥልጣናህ ኢምኪር፣ ኢግኒሕ፣ ኢንከቲ ኩ ዻይተ ዋዎይ፡፡
ማዕራፋ 3
ክርሰቲያን ሢራሕ
1.ሒያው ኡምቢህ፣ረዶንከ ሥልጣን አሞይቲቲህ ቲሕቲናህ ያምአዛዞናይ፣ መዔ ሥራሕ ኡምቢህ ሥራሖና ተምሶኖዶወም ያኮናይ፡፡.ኢንከቲ አሞል ኡምነህ ዋንሲታናምኮ ተን ኤስሔሰሰብ፣ ማንጊህ ሒያውሊህ አንገዔዋይታም ጋርሄንቲት፣ ፍጹም ኪን ቲሕቲና ሒያው ኡምቢህ ታይቡሉወም ያኮናይ፣ 3.አይሚህ ናኑ ለ ታሃምኮ ባሶህ አስታውዓለ ኖክ ታግዱለ ሚዸማሎሊ አምኢዚዘ ዋይታ ማዮ ታም፣ ታምገገህ ታምተለለም፣ ኢሲሲ ካሓኖህከ ኃዶይታ ኒያታህ ዻሚሚታም፣ ቶንኮልከ ሲሕደድ ማርታም፣ ታምነዔበምከ ኒነ ኒነህ ታንገዔም ኪይይክ ኒነ። 4.ያኮይ ኢካህ ኒአድኃኒ መዔፉጊህ መዔነከ ካሓኒ ይምቡሉወ ዋከተ፤ 5.ናኑ ሥራሕነ ጽድቂ ሥራሓህ አከካህ ኢሲ መሕረቲህ ኒ ይዲኂነ፣ ኒ ድኅነም ዑሱብ ልደቲህ ዓካልሶህከ መንፈስ ቁዱስ አራሓህ ገይምተ ዑሱሳበህ ኪኒ። 6.መዔፉጊ ያይዲኂነም ኢየሱስ ክርስቶሲህ አራሓህ ኢሲ መንፈሲህ ማንጋ ኖህ ሓዸ፡፡ 7.ታሃም አበም ካጸጋህ ኒጽዲቀህ ታስፋህ ኢላልና ኡማንጉሊ ሕይወት ናውራሶ ኪኒ፡፡ 8.ታይ ኮከም ሲናከም ኡምቢህ ቲም ኢሚነም ኪኒ። መዔፉጎል ታሚነ ሒያው መዔ ሥራሐህ ያትጋሆና ታይ ሲናካም ሙሉኡድ ዓዲህ ታይሳዻጎ ጉራክ አነ፣ ታይ ጉዳይ መዔቲያከ ሒያው ያጥቅመቲያ ኪኒ። 9.ያከካህ ካንቶ ኪን ኪርኪር፣ ወለዶ ሎይ፣ ጽቅጽቂህ ሙሴ ሕጊህ ምክኒያታል ኡጉታ ዺባኮ ሚሪሕ ኤያ፣ አይሚህ ታይ ጉዳያት ጥቅመ አለዋይታምከ ሊሞ ሂናም ኪኖን።10.ባዽሳ ባሃ ሒያውቶ ኢንኪጉል ያኮይ ላማጉል ቲምኪረምኮ ላካል ካኮ ሚሪሔይ።11.ታህ ኢጊድ ሒያውቲ ዮምቦሎሶወቲያከ ኃጢአት ሥራሐክ ኢሲ አሞል ይፍርደቲያ ኪናም ኢዽግ።
ባክቶ ምክረ
12.አርጤማሳ ያኮይ ቲኪቆስ ኮያ ዻጋህ ፋራ ዋክተ፣ አቱ ኒቆጵልዮኑል ዩላል ታማቶ ኢጽዒር፣ አይሚህ አኑ ካርማ ታማለ ቲላሶ ኢውሲነህ አኒዮ።13.ሕጊ ማዻጋ ዜማስከ አጵሎስ ሲኒ አራሕ ኤዸዺሶና አብሲስ፣ ተን ጉርሱሳ ጉዳአህ ሙሉኡክ ተን ጎሮኒስ። 14.ኒ ሒያው ለል ኢንኪ ፊረ ሂኒም ራዓናምኮከ ናብራ ሔልዋይ ያይሳሳኮና ዺዖና፣ መዔም ሥራሓናም ያማሃሮናይ፡፡ 15.ዮሊህ ታነም ኡምቢህ ሳላምታ ካብ ኮህ ኢሳን፣ ኢምነት ምክኒያታህ ኒ ኪኅናማህ ሳላምታ ኖህ ኢሲቂሪብ፡፡ ጸጋ ኡማን ሲናሊህ ታኮይ፡፡