ሐዋርያ ጰውሎስ መልክት ፊልሞና ቱላል
ሳይማ
ፊለሞና ያምደገ ክርስቲያንቶ የከህ፣ ቆላስይስ ሞሶዓሪህ አባል ኪይይ ይነም ያምግሚተ፣ ፊልሞና አናሲሞስ አክያን አገልጋሊ ሊይ ይነ፣ ታይ አገልጋሊ ማደራኮ ኩደህ ኤልየደ ዋክተ ማዹዋድ ይነ ጳውሎስሊህ ቲታ ገን፣ ጳውሎስ አራሓህ አናሲሞስ ክርስቲያን ኢመነት ጋራየ፣ ጳውሎስ ፊልሞና ቱላል ይጽሒፈ ፋሮ መልአክት ፊልሞና ደሄህ ካያ ዻጋህ አምትክ ያነሃኒህ አግልጋሊልህ ዋጋሮ ታስሕሰሰበም ኪኒ፣ ወሰክህ ለ ካዶ አናሲሞስ ክርስቲያንቶ ኪንጉል ካምቦኮ ሣራህ ክርስቲያን ሳዓል ባሊህ ጋራዎና ኢካህ ባሪያሊህ ካሎዋናምኮ አክ ያዽሔ። -----------------------------------------------------
ማዕራፋ 1
1. ኢየሱስ ክርስቶስህ ኢዻህ ዩምዹወቲያ የከ ጰውሎስከ ኒጢሞቲዎስ፣ ኢምክሒን ኒሳዓልከ ኒሢራሒህ ተሓባባሪ የከ ፊልሞና፣ 2. ካድኪድ ታከሄለ መእመናን፣ ኒሳዕላህ አፍብያህ፣ ታማም ባሊህ ኖሊህ ክርስቶስ ወታሃደር የከ አርኪፖስ፣ 3. ናባ መዔፉጎኮ፣ ኒ ማደራ ኢየሱስ ክርስቶስህ ጸጋከ ሳላም ሲንሊህ ያኮይ፡፡
ፊልሞና ካሓኖከ ኢመነት
4. ጻሎቱህ ኮያ አሕስብክ ኡማንጉል ኢኒ አምላክ አይምስጊነ፤ 5. አይሚህ ቁዱሳን ኪሕንቶምከ ማደራ ኢየሱስ ታምነም ኦበህ አነ፣ 6. ክርስቶስም ኪኖም ኢዻህ ሊኖ መዔ ጉዳይ ኡምቢህ ዓዲህ ያማዻጎ ኩኢምነት አኪ ማሪ ሓድልቶ ታዻጎ ጻሎት አባክ አነ፡፡ 7. ይሳዓሎ! ኩምክኒያታል ክርስቲያን አፍዓዶ ቱዕሱበጉል፣ ኩካሓኖህ ናባ ኒያትከ አምጻናናዕ ዮህ ዮሖወ።
አናሲሞስ ፊልሞና ጋሔም
8. አማይጉል ኡምቢክ ክርስቶስም ኪኖጉል አቱ አብቶ ኮህ ኤዳም አብቶ አአዛዞ ዲፍረት አለዶ ኪይይ ይነ። 9. ያኮይ ኢካህ አኢዚዘም ኢዻል ካሓኖህ ኩዻዕማክ አኒዮ፣ አይሚህ አኑ ኢየሱስ ክርስቶስህ አምባሳደርከ ካዶሊህ ካሊህ ዩምዹወቲያ ኤከ ጳውሎስ ኪዮ። 10. ዻዒማም ማዹዋድ አነሃኒህ መንፈስህ ካኪሒኒዮ ይባዻ አናሲሞስ ጉዳህ ኪኒ። 11. አናሲሞስ ታሃምኮ ባሶህ ኩአጥቅሚይ ማና፣ ካዶ ለ ኮያ ያኮይ ዮያ ያጥቅመቲያ ኪኒ። 12. ሀይከ ካያ ኩላል ደሄህ ፋረህ አኒዮ፣ ካያ ኮያል ፋራህ ኢኒ አፍዓዶ ፋረም ባሊህ አበህ ሎዋ። 13 .ወንጌል ዳዓባል ታል ኡምዹወህ አነሃኒ፣ ኩዻህ የከህ ይያስጋልጋሎ ኡሱክ ዮሊህ የከህ ያከዶ ኒያተ ዻዸ። 14. ያከካህ ኩመዔ ሥራሒህ ግዳዳህ አከካህ ካዲላህ (ወለንታህ) ያኮ ኤህ፣ ኮያ አይፍቅደካህ ኢንኪም አቦ ማጉርኒዮ። 15. አናሲሞስ ካዶ ፋናህ ዳጎ ዋክተህ ኮክ ባዽስመሚህ፣ ምናልባት ካምቦኮ ሣራህ ኡማንጉሉህ ኮሊህ ማሮ ያከ፡፡ 16. ካምቦኮ ሣራቱላል ኮሊህ ማራም ባሪያ ባሊህ አከካህ ባሪያኮ ያሰቲያ የከህ ኢምክሒን ሳዖልኮ ያሰቲያ የከህ ኢምኪሒን ሳዓል የከህ ኪኒ፣ ኡሱክ ዮያህ ኢምኪሒን ሳዓል ኪኒ፣ ያኮይ ኢካህ ኡሱክ ኢሲ አገልግሎቱህ ኩያጥቅመጉልከ ክርስቶሱህ ኩሳዓል ኪንጉል ኮያህ ያይሰ ካኃንቶሊ ኪኒ፡፡ 17. ኡማን ኖዪህ ኢምነቲህ ሳዓል ባሊህ አብተህ ዮህ ሎይተምኮ፣ ሊኪዕ ዮያ ባሊህ አብተህ ጋራይ። 18. ኩማዲሳ በደል ይኔምኮ ወይ"ዒዳ የለምኮ፣ ዒዳ ያሞል ሓብ፡፡ 19. ሀይከ አኑ ጳውሎስ ዒዳ ኮህ አክፊለ ሊዮ"ኤዽሔህ ኢኒ ጋባህ አፍሪሚክ አኒዮ፣ ያኮይ ኢካህ ክርስቶሱል ተመነም ይምክንያታል ኪቶጉል አቱ ኢሰህ ኡካ ይዒዳህ ባዕላ ኪቶም አኑ ኩአይዛካሮ ማጉርሱሳ። 20. አማይጉል ይሳዓሎ! ታይ መዔ ጉዳይ ዮህ አብቶ ማደራህ ኩ ዻዒማክ አነ፣ ያዓሳያ ይአፍዓዶ ክርስቶሱህ ዮህ ኡስዑሱብ፣ 21. ታሃም ኮህ ኢጽሕፈም ዮህ ታምኢዚዘም አምኤመመነህ ኪዮ፣ ኤረ አኑ ኩኤሠራምኮ አጋናል ኢሰህ አብታም አዽገ። 22. መዔፉጊ ሲን ጻሎት ዮበህ ሲኑላል አማቶ ናባ ታስፋ ሊዮ፣ ኤድ አዕሩፈ ቦታ ዮህ ኦይሶኖዶይ፡፡
ባክቶ ሳላምታ
23. ኢየሱስ ክርኢስቶስህ ዳዓባል ዮሊህ ዩምዹወ ኤፓፍራህ ሳላምታ ካብ ኮህ ኢሳ። 24. ታማም ባሊህ ይሢራሒህ ታኃባባርት ኪይይትነም ማርቆስ፣ አርስጥሮኮስ፣ ዴማስ፣ ሉቃስ ሳላምታ ኮህ ያስቅርቢን፡፡ 25. ማደሪ ኢየሱሰ ክርስቶስህ ጸጋ ሲንሊህ ታኮይ፡፡
