ማላሚ ቆሮንጦስ ሕያውህ ኡላል

      ማላምት ሐዋሪያ ጳውሎስ መልእክት   

   ቆሮንጦስ ሕያውህ ኡላል

     ሳይማ[ዸ ዹ ዺ ዻ ዼ ዽ ዾ]

    ጳውሎስ ቆሮንጦስ ሕያዋህ አካህ ይጽሕፈ ማላሚ መልእክት፤ ጳውሎስ ቆሮንጦሱል ይነ ዋክተ ሞሶ ዓረል ልይነ ካብካቢህ ጋደህ ጸገም ይነ ዋክተ ኪኒ፤ ውልውል ሞሶ ዓሪ አባላት ዕልሳታ ነቀፋታት ኤልዕደኒህ የከምህ ጳውሎስ ዕርቀ ያፍጣሮ ናባ ሳና ለም አይቡሉውክ፤ ታሃም ታከ ዋክተ ናባ ደስታ ኤድታማቦ ድዕማም ያግሊጸ፡፡

ካመልእክትኮ ኤድዶይታ ክፍልህ አሞል ጳውሎስ ቆሮንጦሱል ይነ ሞሶ ዓረሊህ ሊይ ይነ ርክክብ ያይራጋጋጾ ሞሶ ዓሪ አዳድ ናቃፈታከ አምቃዋም ይትሪራየህ ይነ ዋክተ አይሚህ መልስ አካህ ዮሖወም ያይርዲኤ፤ታሃምሊህ ይምዸበዸበህ ታይ ካተግሣጽ ንስሓከ ዕርቀድ ተን ያምሪሔም ክናም እዳህ ኤድ ዮሞበ ኒያት አካህ ያግሊጸ፤ ይቅጽለህ ይሁዳል ታነ ክርስቲያን ጎሮኒሶ ሓቶ ያኃዎና ተን ያስሔሰሰበ፤ ባክቶት ምዓሪፍል ጳውሎስ እስ ሐዋርያነትህ አሞል ኤልይቅርበ ክሰህ መከላከሊ ዮሖወ፤ አይምህ ቆሮንጦሱል ሞሶ ዓሪ ውልውል ሕያው ስነ ሓቀ ለም አበኒህ  ሐዋርያት አባክ ጳውሎስ ድራብት ሐዋርያ ክኒ ያናምሀ አይነኤስይ ይኒን፡፡

___-------------------------------------------------------------------------------

     ማዕራፋ 1

  1.ፉጊ ፍቃዳህ ኢየሱስ ክርስቶሱህ ሐዋሪያ የከ ጳውሎስከ ኒሳዓል ጢሞቴዎስ፤ ቆሮንጦሱል ገይምታ ፉጊ ሞሶዓረከ ታማም ባሊህ ሙሉእ አካይያል ገይማታ ሕዝበ ክርሰቲያን ኡምብህ፣  2.ናባ መዔፉጎ፣ ኒማዳራ ኢየሱስ ክርስቶሲህ ጸጋከ ሰላም ሲናህ ያኮይ፡፡

                                 ጳውሎስ መዔፉጎህ ይስቅሪበ ሚሰጋና

  3.መሕረት አባከ አምጻናናዕቲ ኡብህያህ አማላክ የከቲያከ ታማም ባሊህ ኒማደራ ኢየሱስ ክረስቶሲህ አባ የከ አምላካህ፣ ምገሰና ታኮይ፡፡  4.ናኑ ፉጎኮ ገይና አይጻናናዓህ መከራት አሞል ታነሚህ ኡምቢህ ናይጻናናዖ ዺዕኖ፣ ፉጊ ኖያህ ኒ መከራህ ዋክተ ኡማንጉል ኒያይፀነነዔ፡፡  5.ክርስቶስ መከራ ማንጋ ሓዲሊነሚህ  መጠንል፤ ታማም ባሊህ ክርስቶስ ባርካታል አምፅንናዕ ማንጎያ ገይና፡፡  6.ናኑ መከራ ጋራናጉል አቲን አምፃናናዕከ ድኅነት ገይታን፤ ናኑ ናምፀነነዔጉል ለ አቲን ናኑ ጋራይና መከራ ትዕግሥቲህ ጋራይታናህ ታምፀነነዒን፡፡ 7.ኒመከራ ታምከፈሊኒሚህ መጠንል ናምፀነናናዕ ለ ታምከፈሊንም ናዽገም እዻህ ሲን አሞል ሊኖ ተስፋ ሲክ ተቲያ ኪኒ፡፡   8.ይሳዖሎ! እስያ ክፍሊህ ሀገርል ኒነ ዋክተ ኒ ማደ መከራ ታዻጎና ጉርና፤ ታይ ኒ ማደ መከራ ናይካዖ ዽዕናምኮ አጋናል ኪይ ይነጉል ሕይወቲህ ማርኖ ሊይክ ኒነ ታስፋ ኡካ ተምቆሮጸህ ቲነ፡፡ 9.ኤረ ራቢ ኖል ይመፍርደም ባሊህ ኖድ ዮሞበህ ዪነ፡፡ ታሃም ኡምቢህ ኒ ማደም ኒትምክሕቲ ራቦንቲት ኡጉታም  ፉጎህ ኪኒካህ ኒኃይላህ ማኪም ናዻጎ ኪኒ፡፡ 10.አማይጉል ኡሱክ ራባ ማዲሳ ድንገትኮ ኒይድኂነ፤ ኒይድኅነም ለ፣ ለል ኒ ያይዳኃኖ ኒታስፋ ካያድ ኪኒ፡፡ 11.አቲን ለ ኖያ ጻሎቱህ ኒጎሮኒሶና ኤዳ፤ አይሚህ ማንጎ ጻሎቱህ ናኑ ፉጊ ጎሮን ገይናጉል፣ ማንጎ ሕያው ኒምክንያታል መዔፉጎ ያምስጊኒኒ፡፡

         ጳውሎስ አራሕ ዕቅድ

    12.አካህ ናምክሔ ነገር ታይቲያ ኪኒ፤ ታሃም ሓቀ ኪናም ኒኅሊና ታምስኪረ፤ አኪ ሕያውኮ ባዽሳህ ሲንሊህ ሊይክ ኒነ ቲቲህ ገይቶህ ፉጎኮ ገይነ ቅድስናከ ቅንዕናህ ኒምርሔህ ኪኒ፤ ታሃም ታከም መዔፉጊህ ጸጋህ ኪይኒካህ ሕያው ጠበብህ ኪይይ ማና፡፡  13.ትይንቢቢኒህ ታስታውዓሎና ዽዕታን ጉዳይኮ በሒህ አኪም እንክም ሲናህ ማናጽሕፈ፡፡ 14.ካዶ ኒዳዓባል ኒውስነም ተዸጊንምኮ ሣራህ ሙሉኡድ ታስታውዓሎና ታሰፋ አብታ፡፡ ታይ ምክንያታህ ማደራ ኢየሱስ ለለዕ ናኑ ሲናህ ናምክሔም ባሊህ፣ አቲን ለ ኖያህ አምክሔሊቲን፡፡ 15.ታይ ጉዳይ ርገጽ ኪይክ ኢነም እዻህ ላማ ዋክተ ታምጣቃሞና ኤደሔህ ሲና ኤዾዸ ይታህ ሲን ማዶ እዕቅደህ ኢነ፡፡ 16.ሲን ማዶ እሕሲበም መቄዶኒያኮ ትላህከ ታማርከኮ ጋሓ ዋክተ ኪይይ ዪነ፤ ታይ ኩነታታህ ይሁዳ ቱላል አባ አራሕ ዮህ ታምርድእን ኤህ ኢሕስበህ አነ፡፡ 17.ታሃሞም ኢቲሊሚህ /እዕቅደ/ ዋክተ አባሚህ ሶዸህ  ያምጠረጠረቲያ ኤከም ታካሊን? ወይስ ታሃም እዕቅደርከህ እንኪጉል "ዮዎከ ማለ" አይክ አምጠረጠርክ ሕያው አተሐሳብሰባህ አባም ታካሊኒ?  18.መዔፉጊ ያምእምነቲያ ኪኒጉል ናኑለ ሲናክናም "ዮዎ ማለ" ያን ያይጠረጠረ ቃል ማኪ፡፡  19.አይሚህ ዮከ ስላስ ጢሞቴዎስ ለ ፉጊ ባዺ ኢየሱስ ክርስቶስ ሲናህ ይስቢከም ዮዎ ያዽሔ ቃላህ ዲቦህ ኪኒካህ "ዮዎ ማለህ" ማኪ፣ ያዽሔ ያይጠረጣጠረ ቃላህ ክይይ ማና፡፡  20.ፉጊ ኖህ ዮሖወ ታስፋ ኡምቢህ "ዮዎ" ታከም ክርስቶሱህ ኪኒ፤ ታሃማህ ኪኒ፤ መዔፉጊህ ክብረህ ክርስቶሱህ "አመን" ናዽሔም፡፡ 21.ኖያ ያኮይ አቲን ክርስቶሱህ ናፅናዖ ናበቲ ፉጎ ኪኒ፤ ኒይቂዲሰቲ ካያ ኪኒ፡፡ 22.ካይም ኪኖም አካህ ናይሲዺገ ማኅተም ናሞል አበቲያከ ባሶድ ኖያህ ያምሓወ ሀብተ ናፍዓዶድ መንፈስ ቁዱስ  ሓቢ አበህ ኖህ ዮሐወቲ ካያ ኪኒ፡፡ 23.አኑ ቆሮንጦስ ኡላል ጋሔህ አምተዋሚህ ምክንያታል አቲን አሕስበዋይተኒም ባሊህ፣ ሲናህ ናኅሩራክ አኒዮ፣ ታሃማህ ፉጊ ይምስኪር ኪኒ፡፡ 24.አቲን ሲኒ እምነቲህ ትጽንዒኒህ ኪቲንጉል፣ አቲን ደስ ስናህ ዮዋ እንኮህ ሢራሔሊኖካ ሲን እምነቲህ ሲን ማናእዝዘ፡፡

 ማዕራፋ 2

   1.አማይጉል ሲና አስኅዚነምኮ ኢሕሲበህ ሲኑላል ጋሔህ አምተዋናሚህ ቁርጸ ኪን ውሳነ አበህ አኒዮ፡፡ 2.አኑ ሲን ኢስኅዝነህ አከ፣ እስተ አኑ ሲን እስኅዝነሚህ ኡካ ሲንኮ በሕህ አኪ ይኒያቲሳም  ኢያ ኪኒ? 3.ታሃም ሲናል እጽሕፈም ሲኑላል አምተጉል ይኒያቲሶ አካህ ኤዳ ሕያው ይያስሕዝኒኒምኮ ኤህ ኪዮ፤ አይሚህ ይ ኒያት ኡማንኖዪህ ኒያትኪኒጉል ኪናም ታዺጊን  ኤህ አሚነ፡፡  4.ናባ  ሓዛንከ አፍዓዶ ጽንቂ፣ ናባ ዺሞህ ኤከህ ሲናህ እጽሕፈም ጋዳህ ሲን ኪኅኒዮጉል ኪዮም ታዳጎና ኤዳ'ኤዸሔህ ኪዮካህ ሲን አስሓዛኖ ኤህ ማኪዮ፡፡

  ደምበይናህ ኅድጎት አባናም

  5.ሕያውቶ ይስሕዝነቲ አክናንቲ ይኔምኮ ይስሕዝነም ዮያ አከካህ በደል አይጋናን ዮክ አከዋዎይ እካህ አኪ አራሓህ፤ ሲንኮ ማንጎ ሕያው ይስሕዝነ፡፡  6.ታይ ዓይነቲህ ሕያውቲ ሲንኮ ማንጎ ማሪ ኤልያፍርደ ቅጽዓት ካዲዓ፡፡ 7.አማይጉል ታይ ሕያውቲ ጋዳህ ኃዛንጎ  ኡገተሚህ ታስፋ ያቁረጸምኮ ሕድጎት አካህ አብቶናከ ታይጻናናዖና ኤዳ፡፡ 8.ታማም ባሊህ ካያ ኪሕንቲኒም ታይራዳኦና ሓቂ ሲኒ ካኃኖ ሢራሓህ ካኡስቡሉዋ፡፡ 9.ቶይ ምልእክት ሲናህ እጽሕፈም ትንፍቲኒኒህ ኡማን ነገርህ ታምኢዚዘም፣ ኪቲኒም አይራዳኦ አህ ኪዮ፡፡ 10.አቲን ሕድጎት አካህ አብታን ሕያውቶህ፤ አኑ ለ ሕድጎት አካህ አባክ አኒዮ፤ ቢሕላ አካህ ያን በደል የለምኮ አኑ ክርስቶስ ነፊል ሕድጎት አካህ አባም ሲና ኦዋ ኤህ ኪዮ፡፡ 11.ታሃሞም ለ አካህ አበም ሰጣን ቶንኮል ሢራሕ ናዽገም ኢዻህ፤ ሰጣን ኒያይተለለምኮ ኤህ ኪዮ፡፡

                                 ዑሱብ ኪዳኒህ አገልግልቲ ሱባም

  12.ታሃምኮ ሣራህ ክርስቶስ መዔዋረ ያይባሳሮ ጢሮአዳ ቱላል ኤደ ዋክተ ማዳሪ ፍዲን አገልግሎቱህ ኢፈይ ዮህ ፋከህ ዪነ፡፡ 13.ያከካህ ይሳዓል ቲቶ ገየ ዋየርከህ ይመንፈስ ማዕራፍና፤ አማይጉል ታማል ታነ ክርስቲያንኮ ኤምሰነበተህ መቄዶኒያ ኤደየ፡፡ 14.ያኮይ ኢካህ ናኑ ኡማንጉል ክርስቶስ ሱብታም አበህ ኒታምርሔ መዔ ኡረ ለ ሲታ ክርስቶስል ሊኖ ኢዽጋህ እሲሲ ቦታል ኡምቢህ ማዲስኖ ናብሲሳ አምላካህ ሞሳ ለም ታኮይ፡፡  15.አይሚህ ናኑ ታድኅነሚህ ያኮይ ታለየሚህ መዔ ኡረ ለ ዕጣናህ ክርስቶሱህ ፉጎህ ትቅርበም ኪኖ፡፡ 16.ታለየም ያግዲፈ ኡረ ኪኖ፤ ታድኅነሚህ ለ ሕይወት ያሓየ ሕይወት ማዓዛ ኪኖ፤ አማጉል ታይ አገልግሎቱህ ኤዳቲያ ያከቲ አይቲያ ክኒ? 17.ናኑ እኮ ፉጊ ቃል ንግዲ ኑዋይ ባሊህ ታይሲሪፈ ማንጎ ማራ ባሊህ ማኪኖ፣ ያከካህ ፉጎኮ ፋርምተ ክርስቶስ አግልግልቲ ነክህ መዔፉጊህ ነፊል ቅንዕናህ ዋንሲና፡፡  

ማዕራፍ 3   

ዑሱብ ኪዳኒህ አገልገለት 

   1.ጋባዕነህ ኒናሞ ናይማሰጋኖ ኤድሳክ ና'ነ? ወይ ጋሪጋሪ አባምባሊህ ሲንኮ ወይ ተንኮ ምስጋና ደብዳበ ኒ ጉርሱሳህ ያከ? 2.ሕያው ኡምቢህ ሲን ታብለምከ ሲን ታይ ኒብበ ሞሳ መልእክታት አቲን ሲነህ ኪቲን፡፡ 3.አቲን ኒአገልግሎቱህ ተመተ ክርስቶስ ፋሮንቲት ኪቲኒም ትምዲገም ኪኒ፣ ታይ መልእክት ትምጽሕፈም ያነ መዔፉጊህ መንፈስህ ኪኒካህ ቃላማህ ማኪ፣ ታማም ባሊህ ሕያውቲ አፍዓዶ ጽላታህ ኪኒካህ ዻይ ጽላታል ትምጽህፈም ማኪ፡፡  4.ታሃም አካህ ናም ክርስቶስ ባርካታህ መዔፉጊህ እምነት ሊኖጉል ኪኒ፡፡ 5.ኒኒ አገልግሎት ናፋጻሞ ዽዕኖ ኖህ ያሓየቲይ መዔፉጎ ኪኒ ኢካህ ናኑ ኒኒዸግኃህ ኢንኪም አብኖ ዽዕ ማሊኖ። 6.ፍደል አከካህ መንፈስ ቁዱስ ኤድያነ ዑሱብ ኪዳን ናስጋልጋሎ ኒዽዕሲሳቲ መዔፉጎ ኪኒ፣ አይሚህ ፊደል ራባ ባሃ፣  መንፈስ ቁዱስ ለ ሕይወት ያሓየ፡፡

  7.ሕጊ ይምቅርፀም ዻይ ጽላታል ፊደሊህ ኪይይ ይነ፣ ሕጊ ዮምሖወ ዋክተ ፉጊ ኪብሪ የምጸበረቀህ ይምግልጸ፤ ኢንኪጉል ኡካ ሙሴ ነፍህ አሞል አይዶጎሕይ ዪነ ኢፊ  አለዪክ  የይደየሚህ እስራኤላውያን ሙሴ ነፍል ይቱኩሪኒህ ያብሎና ማዲዕኖን፣ አማይጉል ራባ ባሄ ሕጊ ታይ ዓነቲህ ኪብረህ ይምግሊጸምኮ፤ 8.እሰቲ መንፈስ ቁዱስ አራሓህ ገይማ አገልግሎት አይዻ ያይሰ ኪብረ አለለ! 9.ሕያው አካህ ቱምኩኑነ አገልግሎት ታህዻ ኪብረ የለምኮ፤ ሕያው አካህ ታጽድቀ አገልግሎት አይዻ ያሰ ኪብረ አለለ! 10.ካድት ናባ ኪብሪ ትላየ ኪብረሊህ ታመወደደረጉል፣ ለ ኪብሪ ካዲ ኪብረኮ ዩዑንዱወህ ገይማ፡ 11.ቶይ ማላያ ክይይ ይነ ጉዳይ ታህዻ ኪብረ የለምኮ፣ ኡማንጉሉህ ይጽንዔህ ማራ ጉዳይማ ያይሰ ኪብረ ለ ማለት ኪኒ፡፡ 

  12.ታይ ዓይነቲህ ታስፋ ሊኖጉል፤ ማይስሂኒም ድፍረቲህ ዋንስታክ ናነ፡፡ 13.ሙሴ፣ ነፍ ያይጸበረቂኒም ሓባ ዋክተ እስራኤላውያን ያብሊኒምኮ ሲኒ ነፍ አምስፍኒይ ይኒኒ፡፡ ናኑ ግን ተናባሊህ ማብና፡፡ 14.ተን ልቦና ርግጺህ ትደንዚዘ፣ ካፋ ፋናህ ቡሉይ ኪዳኒህ መጻሕፍት አይንቢቢህ ተን አፍዓዶ ታማይ አልፈንታህ አልፍምተህ ትመሲፍነም ባሊህ ኪኒ፡፡ አይሚህ ቶይ አልፈንቲ ናውያም ክርሰቶሱህ ጥራህ ኪኒ፡፡ 15.ካፋ ለ ኡካ የከሚህ ሙሴ ሕገ ይንቢቢኒሚህ ሎዉል ተን አእሚሮህ ኢዽጋ አልፍምታም ባሊህ ታምሲፊነ፡፡ 16.ያከካህ ሕያው ማዳሪ ኡላል ጋሕታጉል"አልፈቲ ናው አክያ፡፡" 17.ማዳሪ መንፈስ ኪኒ፤ ማደሪ መንፈስ ኤድያነድ ናፃነት ያነ፡፡ 18.አማይጉል ኡምቢክ ለ ማደሪ ኪብሪ አሊፈ ዋየ ነፊል ናይጸበረቀ፤ መንፈስ የከምኮ ማዳሪ ገያ ታይ ኪብረ፣ ኪብሪ አሞል ኪብረ ኦሳክ፤ ሊክዕ ማዳራህ ናማጋዶ ናባ፡፡

         ማዕራፍ 4

        ጳውሎስ ታአማኒነት አገልግሎት      

     1.ፉጊ መሕረቲህ ታይ አገልግሎት ኖህ ዮሖወጉል፣ ታስፋ ማናቁሩጸ፡፡ 2. ሱዉርከ ሖላ ኪን ነገር ኖህ ያይለየ፣ ቶንኮሉህ ማሢራሕና፤ ፉጊ ቃል ዲራብሊህ ማናስገለ፣ ያይሰ ሓቀ ግልፀህ ናይቡሉወ፣ ኒነህ ለ ሕያውሊህ ኡምቢህ ኒኒኅሊና ግልጸ አባክ ፉጊ ነፊል ማርና፡፡  3.ኒይብሢረ በሠራታ ቃል ምናልባት ሱዕተቲያ የከሚህ፣ ሱዑተም ታለየሚክ ኪኒ፡፡  4.ኢሲን አሚነዋየንሚህ ምክንያታል ታይ ዓለም አምላክ የከ ሰጣን ተን አፍዓዶ ዮስዖረጉል ኪኒ፣ ፉጊ ቢሶህ ይምግሊጸም ኢዻህ ክርስቶስ ክብረ ዋንስተም፣ መዔ ዋረ አካህ ባሃ ብርሃን ያብሊኒምኮ አበቲ ካያ ኪኒ፡፡  5.ናኑ ናይምሂረም ኢየሱስ ክርስቶስ ማደራ ኪናምከ ናኑ ለ ኒናሞህ ኢየሱሲህ ምክኒያታህ ተን አገልገልት ኪኖሙህ ኪኒካህ ኒኒዸግኃህ ዳዓባል ማናስቢከ፡፡ 6.አይሚህ ኢፊ ዲተክ አዳድ እፎይ! የህ ዋንስተቲ ፉጊ ክርስቶስ ምስለህ፣ ኢፎሳ መዔፉጊህ ኪብረ ያስዺገ ብርሃን ያሓዎ ኢፎ  ናፍዓዶድ ኢፎሰ፡፡

  7.ያከካህ ታይ ናባ ኃይል ፉጊቲያ ኪኒካህ ኒቲያ ማኪም ያማዻጎ፣ ታይ ኩቡር ጉዳይ ገባ ቡልኩዓ ሢራሕህ ኒዋይቲ ባሊህ ነከህ ኒብዸ፡፡ 8.ኢሲሲ ኡላኮ መከራ ኒማዳ፣ ግን ማናምሲኒፈ፣ ማንጎ ዋክተ ድንግር ነኖክያ፣ ለ ታስፋ ማናቁሩጸ፡፡ 9.ናዓብቶሊት ኒታይሰደ ደ፣ ለ ካኃንቶሊት ዋይነህ ማናድገ፣ ሳብዒምነህ ራድና፣ ለ ማራብና፡፡ 10.ኢየሱስ ሕይወት ኒሰውነትድ ያምባላዎ፣ ኡማንጉል ኢየሱስ ራባ ኒኒ ሰውነትድ ኑይኩዔህ ናዞረ፡፡ 11.ካሕይወቲህ ራባ ኒሰውነትድ ያምባላዎ ነህ፣ ናኑ ካዶ ሕይወቲህ ታነምክ ኡማንጉል ኢየሱስ ዳዓባል ራቢ ደንገቲህ አሞል ገይምና፡፡ 

   12.አማይጉል ናኑ ራቢ ደንገቲህ አሞል ገይማህ፣ አቲን ሕይወቲህ ማርታን፡፡ 13.ያኮይ እካህ "ኤመነ፣ አማይጉል ዋንሲተ" የህ ይምጸሕፈ፣ ናኑ ለ ዋንሲታክ ያው ኢንክ እምነት መንፈስ ሊኖጉል ናሚነ፤ አማይጉል ዋንስታክ ናነ፡፡  14.ማደሪ ኢየሱስ ራባኮ ኡጉሠ አምላክ ኖያ ለ ኢየሱስሊህ ኒኡጉሣምከ ሲናሊህ ለ ኢሲ ነፊል ኒያስቅርበም ናደገ፡፡ 15.ታሃም ኡምቢህ ሲን ጥቅመህ ታከ፣ ጸጋ አክራዕታም ፋናህ ማንጎ ሕያው ማዳሚህ መጠንል፤ መዔፉጊ ኪብረህ ታከ ምስጋና ያይማንጎ ኪኒ፡፡

     እምነቲህ ማራናም    

   16.አማይጉል ታስፋ አቅሩጸ ዋይኖይ፣ ምንም ኡካ ኢሮ ኒሰውነት የለየሚህ፣ አዳ ኒወሰውነት ኡማን ዻሕነ ያዑሱበ፡፡ 17.ታሃም ሲሲካምከ ዋክቲም ኪኒ፣ ኒመከራ ኤል ያምወደደሪኒም ሂን ጋዳህ ናባቲያ ኪኒ፣ ኡማንጉሊት ኪበረ ገይሲሳ፡፡ 18.ናኑ ናክቲለም አምቡሉወ ዋ ጉዳይ ኪኒካህ ያምቡሉወቲያ ማኪ፡፡ አይሚህ ያምቡሉወ ጉዳይ ዋክቲቲያ ኪኒ፣ አምቡሉወ ዋቲ ለ ኡማንጉሊቲያ  ኪኒ፡፡

                                                       ማዕራፍ 5

                                                   ዓራንቲ ኒመኖሪያ   

  1.ታሃም ዱንካን ባሊህ ጊዛዊ ኪኒ ኃዶይታ ራዳህ ሕያወቲ ጋባህ አከካህ ፉጎህ ዪምሕኒጸ ዘለለዓለማዊ መንበሪ ዓራናል ያነም ናድገ፡፡ 2. ዓራናል ያነ ኒኒ ሰፈርድ ሳይኖ አትምኒይክ ኢላላክ ናነ፡፡ 3. ቶይ ኒኒ ሞኖሪያድ ሳይና ዋክተ ዓራዳድ ማገይምና፡፡ 4. ታይ ዱካናድ ተክ ኒኃዶይታህ አዳድ ማራህ ኖክ ይዕሊሰህ ናምፂኒቃ፣ ናምፂኒቀም ራቢ ሕይወቲል ኖህ ያምላዋጦ ዓራንቲ መኖሪያድ ሳይኖ ጉርነህ ኪኒካህ ታይ ባዶህ ኃዶይታ ባዽሲህ መንፈሲህ ጥራሕ ማኪ፡፡ 5. አማይጉል ታይ ላውጠህ ኒዮይሶኖዶወቲ መዔፉጎ ኪኒ፣ ላካል ኖህ ያሓየ ጉዳይ ኡምቢህ ማባዾ ያኮ ኢሲ መንፈስ ኖህ ዮሖወቲ ካያ ኪኒ፡፡

   6. ኒመኖሪያ ተከ ኃዶይታ ሊኖም ፋናህ፣ ኒ ማዳራኮ መርሕ ነህ ማረናም ናዲገ፣ አማይጉል ኡማንጉል ማይስማለህ ነምኤመመነህ ማረሊኖ፡፡ 7. ማርናም እምነቲህ ኪኒካህ ሙቡሉህ ማኪ፡፡ 8. ታርከኮ ኒኒ መኖሪያ ባሊህ ነከምኮ ኒኃዶያታኮ ባድስምነህ ማደራሊህ ማርኖ ናትሚኔ፣ አማይጉል ማይሲ ማለህ ነምኤመመነህ ማርኖይ፡፡ 9. ታይ ኒኃዶይታሊህ ነከሚህ ወይ ተኮ ባዽስምነሚህ ኒዓላማ ማዳራ ኒያቲሳናም ኪኒ፡፡ 10. አይሚህ ኢሲሲ ኃዶይታህ አበም ኡማም ያኮይ መዔም ኢሲ ሢራሕ ባሊህ ሊካሕ ጋራዎ፣ ኡምቢክ ለ ክርስቶስ ፊርዲህ ወንበሪህ ነፊል ካብ ኖዋ ኖልታነ፡፡

ክርስቶስ ኡላህ ፉጊ ካኃንቶሊት ያክንም

   11.መዔፉጎ ማይሲታናም አይም ኪናም ማናዽገም ኢዻህ፣ ሕያው ናይርድኤ፣ ናኑ አይም ኪኖም ፉጊ ያዽገ፣ 11. አቲን ለ ሲኒ አፍዓዶድ ታሃም ኪኖም ታዺጊኒም ምናባልት ታስፋ አባክ አኒዮ፡፡ 12. አፍዓዶድ ያነ ጉዳይ አከካህ ኢሮኮ ያምቡሉወ ጉዳህ ታሚክሔሚህ መልስ አካህ ታሓዎና፣ ኖያህ ታማካሖና ሲናህ  ምክንያት አኪክ ናነካህ ጋባዕነህ ናኑ አይም ኪኖም ናይራዳኦ መዸዺሳና፡፡ 13. ዑቡዳት ነከሚሀ ፉጎህ ኖዋ ነህ ኪኖ፣ አእምሮ ለም ነከምህ ሲናህ ኖዋ ነህ ኪኖ፡፡ 14. ኢንኪ ዋዕተ ክርስቶስ ኡማንቲያህ የከህ ራበምከ ኡምቢህ ካራባ ሓዲሊታም ኪኖኑም ኒምሪድኤጉል፣ ክርስቶስ ካሓኒ ሢራሓህ ኒኡጉጉሣ፡፡ 15.ሕይውቲህ ታነም ኡምቢህ፤ ተናህ ራበምከ ራባኮ ኡጉተም ማሮና ኪኒካህ ካምቦኮ ሣራህ ሲነህ ዮና ማራናምኮ ክርስቶስ ኡማንቲያህ ራበ፡፡ 

   16. አማይጉል ካምቦኮ ሣራህ አክናንቲያ የከሚህ ኃዶይታት ሙቡሉህ ማናብለ፣ ታሃምኮ ባሶህ ክርስቶስ ኑብለም ኃዶይታት ማብሎህ የከምህ ኡካ፣ ካምቦኮ ሣራህ ናብለም ታይ ዓይነቲህ ማኪ፡፡ 17. አማይጉል አኪናንቲ ክርስቶስሊህ ያመሕበበረጉል ዑሱብ ፍጥረቲ ኪኒ፣  ዳዓይና ኪን ፍጥረት ቲላየ፣ ካቦታድ ዑሱብ ፍጥረት ይምትኪኤ፡፡18. ታሃም ኡምቢህ ተከም ናኑ ኢሰሊህ ክርስቶስ ኢሲ አባሊህ ኒዋጋሪሰህከ ዋጋሪ አገልግሎት ኖህ ዮሖወም መዔፉጎህ ኪኒ፡፡ 19. ታሃም ፉጊ ክርስቶስ ኡላህ ሕያው ኡምቢህ እሰሊህ ዋጋሪሰ ማለት ኪኒ፣ ተን በደል ለ አክ ማሎይና፣ ኖያህ ዋጋሪ ቃል ዮሖወ፡፡ 20. መዔፉጊ ሕያው ሚክኒያታል ደዓጉል ክርስቶስ ምጋዓህ አባሳደራት ኪኖ፣ አማይጉል ለ መዔፉጎሊህ ዋጋራ ነህ ክርስቶስ ምጋዓህ ሲን ዻዒማክ ናነ፡፡ 21. ናኑ ክርስቶስሊህ ነምኄበበረህ ፉጊ ጽድቀ ናከም፣ መዔፉጊ ኃጢአት አለዋ ክርስቶስ ኒ ኃጢአት ያይካዖ አበ፡፡

 ማዕራፍ 6

   1.ፉጎሊህ ኢንኮህ ሢራሕናም  ኪኖሚህ  መጠንል ጋራይነ ጸጋ ካንቶህ ማረዒሲና ነህ ተን ዳዒማክ ናነ፡፡ 2.ፉጊ፣ "'ዶረ ሳዓት ኦበ፣  ድኅነት ለለዕ ኩጎሮኒሰ፣" ያጉል፣ "ሃይክ ዶሪምመ ሳዓት ካዶ ኪኒ፣ ድኅነት ለለዕ ካዶ ኪኒ፡፡"3. ኒአገልግሎት ያምኒቂፈምኮ ኢንኪ ጉዳያህ  ኢንኪሚህ መዔንቀፊ ማናከ፣ 4. ማንግህ መከራከ ጸገሚህ ለ ቲዕጊስቲ አባክ፣ መዔፉጊህ አገልገልት ክኖም ኡማን አራሓህ ናይቡሉወ፡፡ 5. መዔፉጊህ አገልግልት ኪኖም ናግሊጸም ሳብዕማክ፣ አምዱውክ፣ አምህውክክ.፣ ሢራሓህ ሓዋላክ፣ ዽንዋከ ሉዋሊህ ኪኒ፡፡ 6. ታማም ባሊህ ኒጽሕናህ፣ እዽጋህ፣ ትዕግሥቲህ፣ መዕነህ፣ መንፈስ ቁዱሱህከ ግበዝና አለዋ ካሓኖህ፣ 7. ሓቂ ቃልከ ፉጊ ኃላህ ኒኒ አገልግሎት ናግሊጸ፣ አካህ ቢያካናም ያኮይ አካህ  ያናምከለከለ ማሣሪያ ለ ጽድቀ ኪኒ፡፡ 8. ኪብረህ ወይ ውርደቲህ ናምዋቃሶ ወይ ናማስጋኖ ቶምሶኖዶወም ኪኖ፣ ሓቀ ለም ኪህ ታይለለም ኖክየን፡፡  9. ዝና ለም ኪህ አምድገዋይታም ነከ፣ ራበን ኖካህ ታነም ነከ፤ ሳብዕምነህ ማራቢኒኖ፡፡ 10. ኃዛን ኒማደምህ ኡማንጉል ኒያትና፣ ድካታት ነከህ ናነሃኒህ፣ ማንጎማራ ሀብታማት አባክ ናነ፣ ኢንኪም ሂናም ኪህ፣ ኡማኒም  ኒም ኪኒ፡፡ 11. አቲን ቆሮንጦሱል ማርታ ሕያዎ! ሃይከ ዓዶሰህ ሲናድ ዋንስና ኒኒ አፍዓዶ ኒ ይፍድነህ ሲናህ ፋክና፡፡ 12. አቲን ሲኒ አፍዓዶ ኖክ ተስሔውን ኢካሀ ናኑ ለ ኒኒ አፍዓዶ ሲናክ ማስሓውኒኖ፡፡ 13. ኒዻሎ ኪቲኒሚህ መጠንል ናኑ ኒኒ አፍዓዶ ፍዲኒህ ፋክነህ ኒኒህ ኖድ ቶሞበ /ስሜት/ ሲናህ አግልፅክ ናነ፣ አቲን ሲኒ አፍዓዶ ፋክተኒህ ሲናድ ቶሞበም   ኖህ ኢግሊጻ ሲናካይክ አኒዮ፡፡

   አምነዋይታ ሕያውሊህ ማምሓባባርና   

  14.አምሰመመዔ ዋይታ አጋባቢራህ አምነዋይታ ሕያውሊህ ማምጣማሪና፣ ጽድቀከ ኃጢአት አይናህ የኒህ ያምሓበባሮና ዽዓና? ኢፎከ ዲተ አይናህ የኒህ አንኮህ ማሮና ዽዓና? ክርቶስከ ዲያብሎስ አይናህ የኒህ አንኮህ ማሮና ዽዓና? ያምነቲያከ አምነ ዋ ቲያ አናህ የኒህ ያምሓባባሮና ዽዓና? 16. መዔፉጊህ በተ መቅደስ ጣዖትሊህ አይሚህ ሲምምዒነት ለ? መዔፉጊ ለ፣

   "ኤልማራርከ ሕዝቢ ፋናድ አበለዮ፣

   ተንሊህ ጋሔሊዮ፣

   አኑ ተን አምላክ አከሊዮ፣

   ኢሲን ለ ይሕዝበ አከሎን፡፡"

የህ ዋንሲተም ባሊህ ናኑ ያነ መዔፉጊህ በተ መቅደስ ኪኖ፡፡ 17. ለል ፉጊ ታህ የዽሔ፣

   "ተን ፋንኮ ባዽሲማይ ኤወዓ፣

   ሩኩስ ኪን ነገር ለ ማ'ዻጊና፣

   አኑ ለ ውሳነ ጋራየ ሊዮ፣

18. አኑ ሲን አባ አከሊዮ፣

አቲን ይዻሎ አከሊቲን ያዽሔ ኃይለለ' መዔፉጊ፡፡"

ማዕራፍ 7

   1.አማይጉል ኢንሳዖሎ! ታይ ኡማን ታስፋ ቶምሖወም ኖያህ ኪኒጉል ኃዶይታከ መንፈስ ያይሪክሰ አኪናን ጉዳይኮ ኒነ ናይጻራዎይ፣ ፉጎ ማይስታክ ኒ ቅድስና ፉጹም ታኮ አብኖይ፡፡

    ጳውሎስ ኒያት 

  2.ሲኒ አፍዓዶ ኢፍዲኒክ ፋካይ ስፍራ ኖህ ኡሑዋ፣ ኢንከቶ ማባዳሊኒኖ፣ ቲያ ማቢያኪኒኖ  ቲያ ማአባዝባኒኖ፡፡ 3. ታሃሞም አዽሔም ሲና አውቃሶ ኤህ ማኪዮ፣ አይሚህ ታሃሚህ ባሶል ሲናክ ነምባሊህ ኒአፍዓዶ ፍዲኒህ ሲናህ ፋክነ፣ ሕይወቲህ ያኮይ ራባህ ኡማንጉል ሲንሊህ ኪኖ፡፡ 4. ሲን አሞል ሊዮ ኢምነት ናባቲያ ኪኒ፣ ሲን አሞል ሊዮ ትምኪሕቲ ናባቲያ ኪኒ፣ ኒኒ መከራህ ኡምቢህ ናምጸነነዔ፣ ይኒያት ዳራት ማለ፡፡                 5. መቄዶንያ ማድነ ዋክተ ኡካ ማንጎ ኡላኮ ጸገም ኒማዳካህ ኢንኪጉል ዕረፍት ማገኒኖ፣ ኢሮል ጻበ፣ አዳል ማይሲ ሊይክ ኒነ፡፡ 6. ያከካህ ኃዘን ለም ያይጸነነዔ አምላክ ቲቶ ሙሙቱህ ኒየጸነነዔ፡፡ 7. ነምጸነነዔም ኡሱክ የመተርክህ ጥራህ አከካህ፣ አቲን ካያ ታይጸናናዖና ኪናም ኖበርከህ ኦሳሊህ ኪኒ፣ ይዳዓባል ሊቲን ሳና ኃዛን ጽንቀት ኖክየን ዋዕደ ጋዳህ ኒያትነ፡፡ 8. ኢንኪጉል ኡካ ካዶኮ ባሶህ ሲናል ኢጽሕፈ መልእክት ሲን ትስሕዚነህ ተከምህ መልእክት ኢጽሕፈርከህ ማአምጻጻቲኒዮ፣ ኢምጽጽተም ኤከምኮ ኡካ፣ኢም ጽጽተም  መልእክት ዳጎ ዋክተህ ሲን ትስሕዚነርከህ ኪኒ፡፡ 9. ካዶ ግን ደስ ዮህያ፣ አካህ ኒያታም አቲን ትሕዚኒኒ እርከህ አከካህ ሲኒ ኃዛኒህ ምክኒያታል ኒሲሓ ሳይተኒህ ትምልውጢን ኢርከህ ኪኒ፣ አማይጉል ሲን ኃዛን ፉጊ ፍቃድ ባሊህ ኪንጉል ናኑ ኢንኪም  ሲን ማባዳሊኒኖ ማለት ኪኒ፡፡ 10. መዔፉጊህ ፍቃዳህ ያከ ኃዛን ድኅነት ባሃህ ኒስሓህ ገይማ ላውጠ ገይስሳም ኢዻህ ጸጸት ማለ፣ ዓለም ኃዛን ለ ራባ ባሃ፡፡ 11. ታሃም ፉጊ ፍቃድ ባሊህ ያከ ኃዛን ትግሀታህ ኤልታሕሳቦናከ በደልኮ ጺሪያም ኪቲኒም ታይራጋጋጾና ሲን አባ፣ ታማም ባሊህ ኃጢአት አሞል ስኒ ቁጡዓ ታግላጾና፣ ኃጢአት ማይስቶና፣ ዮያህ ሳንቶና፣ መንፈሳዊ ቅንአታህ ትክክል ታፍራዶናከ ይብድለቲያ ታቅጻዖና ሲን አበሊዮ፣ ኡማን ኡላኮ ታይ ጉዳይኮ ንጹሓን ኪቲኒም ሲን አይርድኤ ሊዮ፡፡ 

   12.አማይጉል አኑ ሲናህ ኢጽሕፈም ኒዳዓባል ሊቲን ትግሀት መዔፉጊህ ነፊል ሲናህ ግልጸ ያኮ ኤህ ኪዮካህ በደል ሢራሔጉልከ በደል ኤልይምፍፂመ ሕያውቶህ ኤህ ማኪዮ፡፡ 13.አምጸነነዔም ታሃሚህ ምክንያል ኪዮ፡፡  ናምጻናናዕኮ አጋናል ቲቶ ኒያተርከህ ምክንያታል ጋዳህ ኒያትነ፣ አይሚህ ኡምቢክ ቲቶ ተይጸነነዕንጉልከ መንፈስ አካህ ቱሰዑሩፊንጉል ኪኒ፡፡ 14. ሲናህ ሊይክ ኢነ ትምክሕት ቲቶክ ኤድሔህ እኒዮ፣ አቲን ለ ይማሖላስንቲን፣ ኡማንጉል  ሓቀ ሲናክ አይክ ኢነ፣ ታሃም ሲን ዳዓባል ቲቶህ ዋንሲተ ትምክሕት ሓቀ ኪናም ተምረገገጸ፡፡ 15. ኡምቢክ ታዘዝት ኪትኒምከ ማይስሂከ አዻዻዾህ ካገራይተኒም ቲቶ  ኒያዝክረጉል፣ ሲናህ ለ ካሓኒ ጋዳህ ማንጎቲያ የከ፡፡ 16. አኑ ለ ኡማን አራሓህ ሲናህ አምአማማኖ ዽዔርከህ ጋዳህ  ኒያታ ፡፡

ማዕራፍ 8

 ክርስቲያን ሕንዳ 

   1. ይሳዖሎቴ! ፉጊ መቄዶኒያል ታነ ሞሶዓረቲህ ዮሖወ ጸጋ ታዳጎና ኪሒኖ፡፡ 2. ተና ማንጎ መከራከ ፋተና ተንማደ፣ ያኮይ ኢካህ ተን ኒያት ነባቲያ ኪኒጉል ምንም ኡካ ጋዳህ ዲካታት የኪኒሚህ ናባ ሕንዳ አበን፡፡ 3. ዽዓናም ጥራሕ አከካህ ዽዓናምኮ አጋናል ሲኒ ፍቃዳ ዮሖውኒም አኑ አካህ አምስክረ፡፡ 4. ይሁዳል ታነ ክርስቲያን ጎሮን ዕድል አክ ያምንፍገምኮ ኃይላህ ኒዻዒመን፡፡ 5. ኢሲን አበንም ናኑ ኢላልነምኮ አጋናል ኪኒ፣ ኤዸዾታህ ሲኒ ማደራህ ዮሖውን፣ ይቅጽሊኒህ መዔፉጊህ ፍቃዳህ ሲነ ኖያህ ዮሖውን፡፡ 6. ታይ ሢራሕ ዮኮመህ ኤዸዺሰቲ ቲቶ ኪይይ ይነጉል ካዶ ለ ታይ ሓቶከ ሲን ሢራሕ ፍጻመ ማድሶ ካያ ዻዒምነ፡፡ 7. አቲን እምነቲህ ያኮይ፣ ዋኒህ ያኮይ፣ ኢዽጋህ ያኮይ፣ ሕያው ጎሮኑህ ሊቲን ትግሀታህ ያኮይ፣ ኖያህ ሊቲን ካሓኖህ ያኮይ፣ ኡማን ጉዳህ ታይሲን፣ ታይ ጎሮንከ ሢራሓህ ታይሰኒም ያኮይ፡፡

  8 ኢስኪ ታይ ሲናካም ትእዛዛህ ማኪ፣ ያኮይ ኢካህ አክማሪህ መተሖዎህ ትግሃት ሲን ትግሃትሊህ አይወደደሪክ ሲን ካሓኒ ሓቀ ኪናም ያዻጎና ኤህ ኪዮ፡፡  9. አቲን ማደራ ኢየሱስ ክርስቶሲህ ናባ ሕንዳ ታዻጊን፣ ኡሱክ ኢንኪጉል ኡካ ሀብታም የካሚህ፣ካያ ድካ የኪኒም አተን ሀብታማት ታኮና ሲና ዮዋ ድካ የከ፡፡ 10. ታይ ጉዳይ ሲናህ መዔም የከህ ዮህ ያምቡሉወ ምክረ ሲናህ አኃይክ አኒዮ፣ ትላየ ኢግዳ፣ አኃዎ ዲቦህ ኤህ አከካህ ታሃም አቦ ኤዸዾይታህ ጉረም ሲናህ ኪዮ፡፡ 11. አማይጉል ያሓይኒሚህ ፍቃዲ ሓሳብ ሢራሓ አሞል አሰህ ፍጻመ ማዶ ዒሎህ ሊቲኒምህ መጠንል ታይ ታሕስቢኒም ካዶ አባ፡፡ 12. መተሖዎህ መዔ ድላይ ይኔምኮ፣ ሕያው ሕንዲ ጋራሶ ገያም፣ ሊቶሚህ መጠንል ያምሓዎ እካህ አለዋይታሚህ መጠንል ማኪ፡፡ 

  13. ታሃሞም አይህ ኡምቢክ ኢንክዻ ታኮና ኪኒካህ መተሖዎህ ታምጻጋሞና አክማሪ ያዕራፎ ኤህ ማኪዮ፡፡ 14. አቲን ታምጽጊሚን ዋክተ ተን ሀብቲ ሲናህ ጸገምድ አሶ፣ ካዶ ሲን ሀብቲ ተን ጸገምድ አሶይ፣ ታይ ዓይነቲህ ሲን ፋናድ ኢንኪዳ ያኪኒም ታነ፡፡ 15. ታሃም፣

       "ማንጎም የስከሄለቲያህ አካህ ማራዒና፣

        ዳጎም የስከሄለቲያክ  አክማግዳሊና" የህ     

        ይምጽሕፈም ባልህ ክኒ፡፡  

     ቲቶከ ካዶባ

   16.አኑ ሲናህ አሕስበም ኢዻ ቲቶ ለ ሲናህ ያሕሳቦ አበ አምላክ ያማስጋኖይ፡፡ 17. ቲቶ ሲኑላል ያምተም ኢሲ ፍቃዳህ ኡጉተህ ኒያታህ ኪኒካ ናኑ ዳዕምነርከህ ጥራክ ማኪ፡፡ 18. ወንጌል ስብከቲህ ሞሶዓርቲል ኡማኒል ይምስጊነ ሳዓል ካሊህ ፋራክ ናነ፡፡ 19. ታማምኮ አጋናል ታይ ሳዓል ናኑ ታይ መዔ ሢራሕ ማዳሪ ኪብረህ ነህ ናፍጽመጉልከ ናስጋልጋላሎ ሊኖ መዔ ፍቃድ አግሊጺህ ኢንኮህ አድይክ ሢራሕ ታምሰተፈም ናኮ ሞሶዓረህ ዶሪሚመቲያህ ኪኒ፡፡ 20. ታይ ሓቶህ ያምሖወ ማል አይመሔደሪህ ኢንኪ ዓይነቲህ ጉድለት ኒማዳምኮ ኒምጥንቅቀ፡፡ 21. አይሚህ ኒዓላማ ማዳሪ ነፊል ጥራሕ አከካህ ሕያው ነፊል ለ  መዔ ጉዳይ አባናም ክኒ፡፡ 22. ማንጎ ዋክተ ማንጎ አራሓህ ይምፊቲነህ ቱጉህ የከህ ገይማ ኒሳዓል ቲቶ ማዓሊህ ፋርነም ታይ ምክንያታህ ክኒ፣ ኡሱከ ሲን አሞል ለ ኢምነት ናባቲያ ኪንጉል ካዶ ሲና ጎሮኒሶ ለ ትግሀት ኡማኒምኮ ናባቲያ ኪኒ፡፡ 23. ቲቶ ዳዓባል ኢዽጋ ጉርሱሰምኮ፣ ሲና ጎሮኒሶ ዮሊህ ኢንኮህ ሢራሕነ ይሢራሕህ ዶባይቶ ኪኒ፣ ካሊህ ታምተ አኪ ይሳዖል የኪኒምኮ፣ ሞሶዓርቲ ተወከልት፣ ክርስቶስ ኪብረ ኪኖን፡፡ 24. አማጉል ሲኒ ካሓኖ አካህ ኢግሊጻ፣ ታይ ዓይነትህ ኒካኃኖከ ሲን አሞል ሊኖ ትምክሕት ካንቶ ማኪጉል ሞሶዓሪት ኡምቢህ አስቡሉወ ሊቲን፡፡

  ማዕራፍ 9

ክርስቲያናህ ተከ ልግስና

   1. ይሁዳል ታነ ክርስቲያናህ ያከ ሲሌዒት ሲናል አጽሐፎ ማጉረሱሳ፡፡ 2. አቲን አካይያል ታነ ሕያው ጎሮኒሶና ሊቲን መዔ ዲላይ አዸገርከህ አካይያ ሕያው ቦዲፋኮ ኤዸዽሰኒህ ጎሮኒሶና ተምሶኖዶወም ኪኖን ኤዸሔህ መቄዶንያ ሕያዋሊህ ትምክሕቲህ ዋንሲተህ አኒዮ፣ ኤረ ተና ጎሮኒሶና ሊቲን ድላይ ማንጎ ማሪ ያምራዳኦና ተን አበ፡፡  3. ታይ ጉዳህ ሲን  አሞል  ሊኖ ትምክሕት ካንቶ የከህ ራዓምኮ ታይ ሳዖል ፋራክ አነ፣ አቲን ልክዕ አኑ ታሃሚህ ባሶል ሲን ፋረም ባሊህ ኦምሶኖዶይዋይ ኢላላ፡፡ 4. መቄዶንያ ሕያው ዮያሊህ ሲን ኡላል የመቲኒህ አምሶኖዶወ ዋይተም ተኪኒህ ሲንገያንጉል ሲናህ ኒምክሔርከህ ሖላሲና፣ አቲንማ ጋዳህ ሖላሲተ ሊቲን፡፡ 5. አማይጉል ታያሓዎና ቃል ሳይታናምኮ ባሶል ታምሳናዳዎና ሲን ያይዛካካሮና፣ ያናማህ ታይ ኒሳዖል ዮኮ ዮኮሚኒህ ሲን ኡላል ያማቶና አባናም ጉርሱሳም ኪናማህ ገህ አኒዮ፡፡ ታይ ዓይነቲህ ናኑ ናምተ ዋክተ ሲን ሓገዝ ዮምሶኖዶወቲያ ያከ፣ አቲን ለ ታሓይኒም ጊደህ አከካህ ሲኒ ድሌቲህ ኪቲንም ያይቡሉወ፡፡ 6. ዳጎም ይድሪየቲ፣ ዳጎ ሚህርቲ ያስከሄለ፣ ማንጎም ይድሪየቲ ማንኮ ሚህርቲ ያሰኬለ፣ ያዸሔ ቃል ኢዝክራ፡፡ 7.አማይጉል ፉጊ ኪኅናም ኒያታህ ታኄ ሕያው ኪኒጉል ኢሰኢሰህ ያሓዎ ጉራቲ ኢሲ አፍዓዶህኮ ጉረህ ኒያታህ ያሓዎይ ኢካ አነሰሕክከ ያኮይ ይምግዲደህ አኃየዋዎይ፡፡ 8. ኡማጉል ኡማን ዋክተ ሲን ዽዕታም ገይተኒህ መዔ ሢራሓድ ኡማንጉል ኢስሳናም ሲናህ ራዕቶ ፉጊ የይመብገህ ኢሲ በረከትኮ ሲናህ ያሓዎ ዽዓ፤ 9.ታሃም፣ "ድካታታህ ጎሮኑህ  ዮሖወ፣ ጽድቂ ኡማንጉሉህ ማራ" የህ ይምጽሕፈም ባሊህ ኪኒ፡፡  

    10. ዳራ ያደሪቲያህ ዳሪ፣ ሚግበህ ኢንገራ ያሓየ አምላክ ታደሪይን ዳራ የበረከህ ያሓየ፣ ሲን ሓቶህ ፊረ ሲናህ ያይመንገ፡፡ 11. ሲን ሕንዲ ኑላህ ተን ማዳ ሕያው ኡምቢህ ፉጎ ያማሰጋኖናይ፣ አማንጉል ያሓዎና መዔፉጊ ኡማን ነገርህ ሀብተ አካህ ያከ፡፡ 12. ታይ ሲን ሕንዲህ አግልግሎት ክርስቲያን ጸገምኮ ያየይየዔሚህ አሞል ሕያው ፉጎህ ማንጎ ምስጋና ያስቀራቦና ተን አባ፡፡ 13. ታይ ሲን ሓቲህ አገልግሎት፣ አቲን ክርስቲያን ወንጌል ጋራይተኒህ ታሚነም ተኪኒህከ አኪ ማራህ ለ ታስግልሊኒም ታይርድኤም ኪንጉል ኡምቢህ ለ ፉጎ ያይምስጊኒን፡፡ 14. ኢሲን ለ መዔፉጊ ተናህ ዮሖወም ጋዳህ ናባ ጸጋህ ምክንያታህ ሲን ክኅኖንጉል ጻሎት ሲናህ አባን፡፡

15. ሕያው ቃላታህ ሕንዳ ዋንሲቶና ማዺዕማም ኢዻህ፣ ፉጊ ይምስግነቲያ ያኮይ፡፡

ማዕራፍ 10

   ጳውሎስ አምካላካልት መልስ

    16 .አኑ ጳውሎስ ሲን ነፊል አነሃኒህ ኢንቲ ሖላሊ ዮክ ያነቲያክ፣ ሲንኮ ሚሪኅ አጉል ለ ሲን አሞል ደፋር ዮክ የንቲያክ፣ ክርስቶስ ጋርሄከ መዔነህ ሲን ዻዒማክ አኒዮ፡፡ 2. ሲን ዻዒማም ለ ሲኑላል አምተ ዋክተ ዲፍረቲህ ዋንሲቶ ያብሲሶና ኤህ ኪዮ፡፡ ኃዶይታት አታሐሳሲባህ ናም መለለሰም ባሊህ አበኒህ ኒታግምተ ውልውል ሕያዊህ ነፊል ለ ድፍረቲህ ዋንስቶ ዺዓ፡፡ 3. አኢንኪጉል ኡካ ዓለምል ኒኔሚህ፣ ናምወገኤም ዓለም ሕያው ባሊህ ማኪ፡፡  4.ኒዺባህ ማሳረዕያታትህ መዝገብ ዒዶ ዺዓ  መለኮታዊ ኃይላ ለም ኪኖን እካህ ዓለም ዺባ ማሳሪዔያ ማ'ሎን፡፡ 5. መዔፉጊህ አዽጋህ አሞል ትዕቢቲህ ኡጉታ ክርክርከ ካንቶ ኪን ሓሳብ ዒደሊኖ፣ አእምሮህ ኡምቢህ አመረኪክ ክርስቶሱህ ናምአዛዞ አባክ ናነ፡፡ 6. ሲን ታአዝዞ ፍጹም ኪናም ኒምሪዲኤሚህ ላካል፣ አኪናን አምአዛዝ ዋይቲ ናቅጻዖ ሱንዱዋት  አከሊኖ፡፡

  7. አቲን ታብሊኒም ኢሮ ጉዳይ ኪኒ፣ ኢንከቲ ክርስቶስቲያ ኪዮ የህ የምኤመመነምኮ ጋባዖዋይ ያሕሳቦይ፡፡ ናኑ ለ ካያ ባሊህ ክርስቶሲም ኪኖም ናምራዳኦይ፡፡ 8. ማዳሪ ዮሖወ ሢልጣኒህ ዳዓባል ጋዳህ ኢምክሔምኮ ማኆላሲታ፣ አይሚህ ታይ ሢልጣን ኖህ ዮምሖወም ሲና ናህናጾ ኪኒካህ ዕድኖ ማኪ፡፡ 9. ኢኒ መልእክቲህ ሲን ማይሲሳም ማካልና፡፡ 10.ምናልባት ጋሪጋሪ"ጳውሎስ መልእክታት ዕዒሊሳምከ ኃይላ ለም ኪኖን፣ አካል አክታብለጉል ግን ሩኩትያ ኪኒ፣ ካ ዋኒ ዻይታንቲያ ኪኒ"ያናህ ያከ፡፡ 11. ታሃም ታዽሔ ሕያው ናኑ ዸዽል ነከህ ኒኒ መልእክታታህ ናጽሕፈምከ ዻየርከኮ ሲንሊህ ነከህ ሢራሕናሚህ ፋናድ ኢንኪ ባዽሲ ሚያነም ያምራዳኦናይ። 12. ያኮይ ኢካህ ሲነ ታይሚስጊነ ውልውሊ ሕያውሊህ ኒነ ናይዋዳዳሮ ወይ ኒናሞ ናይናጻጻሮ ማናድፍረ፣ ኢሲን ለ ሲነ ሲነሊህ ያመዛዛኖናከ ሲነህ ሲኒ ደግኃ ሲነሊህ ያይወደደርን ኢርከህ ታስቲውዒለም ማኪኖን፡፡ 13. ናኑ ለ አይከ ሲና ኡካ ሲን ማድናም ፋናህ ፉጊ ኖህ ዮሖወ ሢራሒህ መደቢል ናሚኪሔካ ኢካህ  ኤዳምኮ አጋናል ታምኪሔም ማኪኖ፡፡ 14. አቲን ለ ሊቲን ሢራሕህ አከባቢህ አዳል ኪቲንጉል ክርስቶስ ሢራሕሒህ ቃል ናይባሣሮ ሲኑላል ነመተጉል ታማይ ክልልኮ ማቲላይኒኖ፡፡ 15. አማይጉል መዔፉጊ ኖያህ ይውሲነ ክልልኮ ትላይነህ አክማሪህ ሢራሓድ ኤዳምኮ አጋናል ማናምክሔ፣ ናቢህ ሲን እምነት ያናቦከ ኒሢራሕ ፉጊ ይውሲነ ክልሊህ ኒፋናድ ናቢህ ያናቦ ታስፋ አብና፡፡ 16. አማይጉል አኪ ሕያውህ ሢራሒህ ክልሊህ አዳል ሳይነህ ዮኮመህ ሢራሕመ ሢራሐህ አምክሔካህ ሲንኮ ቶህ ታነ ሀገራታል በሠራታ ቃል ናይባሣሮ ዽዕና፡፡17.ያከካ"ያምክሔቲ ፉጎህ ያማካሖይ፡፡"18.አይሚህ ሕያውቶ ያማስጋኖ ካታይብቅዔም ፉጎ ያይምስጊነጉል ኪኒካህ ኢሰህ ኢሲ ኢሳሞ ያምሰጊነርከህ ማኪ፡፡

                                                         ማዕራፋ 11

                                              ጳውሎስከ ዲራብት ሐዋርያት

   1.ዳጎሙህ ይሶዻህ ዮህ ታምዓጋሦና ጉራክ አነ፣ ዓዲህ ዮህ ትምዕግሢን፡፡ 2. ፉጊ ሲናህ አይሲናም ባሊህ፣ አኑ ለ ሲናህ አይሲና፣ ሲናህ አይሲናም ኒጽሕት ኪን ደንግል ኢንኪ ባዻህ ትይልሰጉል ኪኒ፣ ኡሱክ ለ ክርስቶስ ኪኒ፡፡ 3. ዓሮራ ሔዋን ተንኮሉህ ተ የይተለለም ባሊህ ምናልባት፣ ሲን ሓሳብ ለ ዮምቦሎሶወህ ክርስቶስሊህ ሊቲን ቅንዕናከ ኒፅኅና ኃባክ ታኒን ኤህ ማይሲታ፡፡ 4. አይሚህ ኢንኪ ሕያውቲ ሲኑላል የመተህ ናኑ ኒስቢከም አከካህ አኪ ኢየሱስ ሲናህ ያስቢከጉል፣ ጋራይተኒህ ትብተኒህ አምዕጊሥክ ታኒን፡፡ 5. ያኮይ እካህ አኑ ታይ ናባ ሐዋርያትኮ ኢኪ ጉዳህ ዕንዲዮም ማካለ፡፡ 6. መዔ ዋኒ አለዋየሚህ ኡካ እዽጋ ዮክ ማታጉዱለ፣ ታሃሞም ማንጎ ዋክተ ማንጎ አራሓህ ግልጸህ ሲን ኒርድኤህ ናኒዮ። 

  7. አኑ መዔፉጊህ ወንጌል ደሞዝ ማለህ ሲናህ ኢብከርከህ ሲና ለ ናውሶ ኢነ ኤይወረደርከህ ምናልባት ኃጢአታድ ዮክ ሎይመህ ያከ? 8. ሲና አስጋልጋሎ አኪ ሞሶራዓርትኮ ኃገዝ ጋራኤርከህ ተና ኢዝሪፈህ አኒዮ፡፡ 9. ሲንሊህ አነ ሃኒህ ጸገም ይማደ ዋክተ መቄደኒያኮ ተመተ ይሳዖል ይጉርሱሳ ጉዳህ ኡምቢህ ይጎሮንሳይ ይኒንጉል ኢንከቲ ዑካ ማኪኒዮ። 10. ክርስቶስ ሓቂ ዮያድ ያነጉል፣ አሚኪሔ ዋካህ ያባቲ አካይያ ሀገራታል ቲይ ሚያነ፡፡ 11. ሚክኒታት አይሚህ የኒህ ኪኒ? ተን ማኪኅንዮጉል ኪኒ? ተን ኪኅኒዮም መዔፉጊ ያዽገ፡፡   

   12. ቶይ አኪ ሐዋርያት ኖያ ለ ጳውሎስ ማዓል ባሊህ ሢራሔ ሊኖ አይክ ያምክሒኒሚህ  ምክንያት ዋይሲሶ ካዶ አባም ባሶቱላል ጋባዔህ አበ ሊዮ፡፡ 13. ታህ ኢጊድ ሕያው ክርስቶስ ሐዋርያታህ ያማጋዶና ሲናሞ ታይሊዊጠ ዲራብቲ ሐዋርያትከ አይታለለ ሢራሕተይና ኪኖን፡፡  14.ታሃም ያይድንቀ ጉዳይ ማኪ፣ አይሚህ ሰጣን ኡካ ብርሃን መልአካህ ያማጋዶ ኢሰ ያይለውጠ፡፡"15. አማይጉል ሰጣን አገልግሎት ጽድቅ አገልግሎቱህ ያይማጋዶና ሲነ ይይልውጢኒሚህ  ምያይድንቀ፣ ባኪቶል ሲኒ  ሢራሕህ ሊሞ ገሎን፡፡

       ጳውሎስ ማደ መከራ

   16.አኪናን ሕያውቲ አኑ ኡፈየማል ኪዮም አካለወዎይ ኤዽኄህ ጋባዔህ ዋንሰታክ አኒዮ፡፡ ሚዸ ማሊህ ሲናህ ኢምጊደሚህ ኡካ ዳጎም አማካሖ ሚዸ ማሊ ባሊህ አባይ ይሎዋ፡፡ 17. ታማምባሊህ ሚኪሓህ ዋንሲታህ፣ ዋንሲታም ማደራ ባሊህ አከካህ ሚዸ ማሊ ባሊህ ኤከህ ኪዮ። 18. ማንጎ ማሪ ኃዶይታ ጉዳህ ያሚኪሕንጉል አኑ ለ አሚኪሔ። 19. አቲን ታስትውዒለም ኪቲኒሚህ መጠኒል ሚዸ ማሎሊህ ኢንኪ በቀል ሂኒም ቲዕጊሥቲ አብታን። 20. ታማም ባሊህ አኪናንቲ ባሪያህ ሲን አባጉል፣ አክንናንቲ ሲን ያዝብዝቢዘጉል አኪናንቲ ሲን ዳራትኮ ሲናድ ቲላያጉል፣ አኪናንቲ ሲን ዻይታጉል፣ ነፍክ ዻባናል ሲናክ  ሃያንጉል  ታምዕግሥን፡፡ 21. ምንም ኡካ ይሖላሳም የከሚህ ሲና ባሊህ ትዕግሥቲህ ኃይላ ለም  ማኪኖም ሲናህ አግሊጺክ አኒዮ፡፡ ያኮይ ኢካህ ኢንከቲ ያማካሖ ይድፍረሚህ፣ አኑ ካያ ባሊህ ኢድፊረህ አምኪሔ፣ ታሃም አዽሔም ካዶሊህ ሚዸማሊ ኤከህ ኪዮ። 22. ኢሲን ኢብራውያን ኪኖኑ? አኑ ለ እብራዊ ኪዮ፡፡ ኢሲን እስራኤላውያን ኪኖኑ? አኑ ለ እሰራኤላዊ ኪዮ፣ ኢሲን ለ አብርሃም ዳራ ኪኖኑ? አኑለ አብርሃም ዳራ ኪዮ፡፡ 23. ኢሲን ክርስቶስ አገልገልቲ ኪኖኑ? አኑ ተንኮ ናቢህ ክርስቶስ ያስጊልጊለቲያ ኪዮ፣ ታሃሞም አይህ ዑቡድ ባሊህ ዋንሲታክ አኒዮ፣ ማንጎ ዋክተ ሢራሓህ ኃዋለህ አኒዮ፣ ማንጎ ጊዘ ኡምዹወህ አኒዮ፣ ማንጎጉል ሳብዒመህ አኒዮ፣ ማንጎ ጊዘ ራቢ አሞል ገይመህ አኒዮ፡፡ 24. ሦዶምከ ሳጋል፣ ሦዶምከ ሳጋል ፁርጋፍያ ኮናጉል አይሁዳውያናህ ሳብዒመህ አኒዮ፡፡ 25. አዶሐ ዋክተ ኢሎህ ኢምድብዲበ፣ ኢንኪጉል ዻይቲህ ኢምዲብዲበህ አኒዮ፣ አዶሓጉል መርከብ ዲንገት  ይማደ፣ ኢንኪ ባራከ ለለዕ ባሕር አሞል ኢነ፡፡ 26. ያአራሕ ማንጋህ ወዓከ ወዓህ፣ ሲፍታ ዲንገት ይማደ፣ አይሁድ ይወገንከ አረማውያናህ ዲንገት ይመደ፣ ከተማከ ባራካል በሕራድ ለ ዲንገት ይማደ፤ ታማም ባሊህ ዲራብቲ አማንቲኮ ዲንገት ይማደ፡፡ 27. ማንጎ ሢራሕከ ሓዋል ሊይክ ኢነ፣ ማንጎ ዋክተ ዽን ዋየህ አኒዮ፣ ራሀብክ ላየ ባካራህ ኢምጽንቀህ አኒዮ፣ ማንጎ ጊዘ ምግቢ ዋይቶ ይማደ፣ ጋላዖከ ዓራድ ይማደ፡፡ 28. አኪሚህ ኡምቢህ አስቆረጸካህ ሞሶዓሪ ዳዓባል ኡማንጉል አሕሲቢከ አምጭንቅክ ኢነ፡፡ 29. ኢንኪ ሕያውቲ ሐዋላጉል፣ አኑ ለ ኤሊህ ሐዋላክ ኢነ፣ ኢንኪ ሕያውቲ ኃጢአታህ ያምሰነከ ለጉል፣ አኑ ለ አምነደድከ እነ፡፡ 30. ያምክሕኒም ጉርሱሳም ያከዶ፣ አኑ አምክሔም ይኃዋል ታይቡሉወ ነገራትኮ ኪክ እነ፡፡ 31. ኡማንጉል ማራ ይምሰጊነ ኒማደሪ ኢየሱስ ክርስቶሲህ አባ የከ አምላክ ዲራቢተዋም ያዺገ፡፡ 32. ደማስቆ ካታማል ኢነ ዋክተ ኑጉሥ አሬታስ ዳባል ዪነ ህዝቢ ገዛኢ ዮያ ያባ ጉረህ ካታማት ኢፍያፋል ዘብዔናህ ዻዉዻይ ዪነ፡፡ '33.ያኮይካህ ሕያው ማንዳቅኮ ሞስኮቲህ ኡላኮ ዕንክቢት ይሃየኒህ ይይብዺኒህ ካ'ጋባኮ ኤወኤ፡፡

ማዕራፋ12

 ጳውሎስ ራእይ 

   1.ኢንኪጉል ኡካ ሚኪሓህ ጥቅሚ ገይመዋተሚህ፣ ሚኪሓ ጉርሱሰምኮ ማዳሪ ኖህ ዮሖወ ግልጸህ ወይ ሙቡሉህ አማክሔ፡፡  2. ክርስቶስቲያ የከ ኢንኪ ሕያውቶ አዽገ፣ ታይ ሕያውቲ አፋራምከ ታማን ኢግዲያኮ ባሶል ዓራንኮ አሞል ያነ ዓራናል የውዔ፣ የውዔም ኢሲ ኃዶታሊህ ያኮይ ወይ አከዋዎ ማዽገ፣ ፉጊ ያዽገ፡፡ 4. ያከካህ ታይ ሕያውቲ ጋናታል የውዔም አዽገ፣ ታማል ኡሱክ ሕያው ቃላህ ያምጋላጾ ሕያው ለ ዋንሲቶ ዺዔ ዋይታ ጉዳይ ዮበ፡፡  5.ታህ አክየጉል ሕያዋህ አምክሔ፣ ኢኒ ዳዓባል ለ ኢኒ ኃዋልኮ በሒህ አኪ አካህ አምክሔ ጉዳይ  ማሊዮ፡፡  6.ኢስኪ ኢኮ አኑ ሓቀህ ዋንሲተህ አማካሖ ጉራዶ ምዸማሊ አከ ማዸዺኒዮ፣ ያኮይ ኢካህ ያሞል ያብለምከ ይዳዓባል ታበምኮ አሞል ግሚት አሓየምኮ ኤድሔህ  ሚኪሓኮ ኢነ ዻዉዸ፡፡

   7.ታይ ዮህ ይምግልጸ ናባ ጉዳያኮ ኡገተሚህ አትዕቢተምኮ፣ ይኃዶይታ ኪናን ባሊህ ይሙዳ ሥቃይ ዮህ ዮምሖወ፣ ታሃም ሰጣን ፋሮይታ አከምኮ አምጽፍዕክ አምሠቀይ አትዕቢትምኮ ያባ፡፡  8.ታይ ያይሠቀየ ጉዳይ ዮኮ ዮህ ያዕዻዎ ማዳራ አዶሓ ዋክተ ዻዒመ፡፡ 9 .ያከካህ ኡሱክ"ይኃይሊ ያመቡሉወም ኩ'ኃዋላህ ኪኒጉል ይጸጋ ኩዲዕታ"ዮክየ፣ አማይጉል ክርስቶስ ኃይሊ ዮያሊህ ያኮ አኪናን ዋከተ አጋናል ኢኒ ኃዋላህ አማካሖ ኪኅኒዮ፡፡ 10.ኃይሊ ገይማም ሩኩታም ያኪን ዋክተ ኪኒጉል ክርስቶስ ዳዓባል ሓዋላጉል፤ ዋትሚማጉል፣ አምጽግመጉል፣ አምስድደጉል፣ ዓናውናው አጉል ኒያታ፡፡

ጳውሎስ ቆሮንጦስ ሕያዋህ አምጽኒቅክ አሕሲብይ ዪነ።

  11. ሚዸማሊ ባሊህ ዋንስተ፣ ይቦል ታሃም ዋንስቶ ያብተም ሲና ኪኒ፣ ዮያ ታይማስጋኖ ኤዳይቲነም ሲና ኪይክ ዪነ፣ አይሚህ ኢንኪጉል  ኡካ አኑ አይምቶ ኪዮም አምዽገ ዋየሚህ  ሕያውቶ ኤከሚህ ናባማራ አክያን ሐዋርያትኮ ኢንኪሚህ ማዕዺዮ፡፡ 12. አኑ ሓቂ ሐዋርያ ኪዮም ታይርዲኤ ጉዳያት፣ አኑ ሲን ፋናድ አነሃኒህ ትዕሥቲህ ኢፍፂመ ሢሮሕ ኪኖን፣ ታይ ምልክታትከ ድንቀ ኪን ነገራት፣ ተአምራት ለ ኪኖን፡፡ 13.ሲን አሞል ዑካ ኤከህ ራዓምኮ ፈር፣ አኪ ሞሶዓሪትኮ ሲና ኡስዑንዹወም አይሚህ ኪኒ? ታሃም ኡምነህ ሎይተኒምኮ ብሕላ ዮሃባ፡፡

    14.ሲን ኡላል አማቶ አምሶኖዶወም ካዲ ይማዳሕህ ኪኒ፣ አኑ ዑካ ሲናል አኮ ማጉራ፣ አይሚህ አኑ ጉራም ሲናካህ ሲን ማል ማኪ፡፡  ኢሲ ዻይሎህ ማል ታስካሎ ኤዳም ወለድ ኪኖን እካህ ዻይሎ ወለድህ ማል ሚያስከሄልን፡፡ 15. ሲን ዳዓባል ኡካ ኢኒ ማል፣ ኢናሞህ  ቲላሰህ አሓዎ ደስ ዮህያ፣ ኢስኪ አኑ ታህዳ ማንጎም ሲን አክሒኒህ፣ አቲን ይክሕንቲንም ታህዻ ዳጎም ኪኒ? 16. ቶሆም ተክህ ታሀም ዑካ ሲናክ ማኪኒዮ፡፡ አቲን ታናምባሊህ ቶንኮልከ አይታላላህ ሲን ኢዚዘም ታካሊን፡፡ 17. ኤል ሲን ፋረል ኢንኪ ሕያውቲ ሳባባህ  ኡካ ሲን ኢቢዝቢዘ? 18. ቲቶ ሲኑላል ያማቶ ዻዒመ፡፡ ቶይ ኒሳዓል ለ ካሊህ ፋረ፣ ይቦል ቲቶ ለ ሲን ይብዝብቢዘ? ዮከ ካያ ሲን ኒስጊልጊለም ኢንኪ መንፈሲህ ኪይይ ማና? ኒገዾ `ኢንከቶ ኪክ ማና? 19. እስክ ካዶ ታሕስቢኒም ናኑ ሲን ነፊል ሲን ዳዓባል ናምከለከለም አብተኒህ ኪኒ? ናኑ ክርስቶሲም ነከህ ዋንሲናም ፉጊ ነፊል ኪኒ፡፡ ይሳዖሎ! ናኑ ታሃም ኡምቢህ ዋንሲናም ሲና ናህናጾ ነህ ኪኖ፡፡ 20. አኑ ታማህ አምተ ዋክተ ምናልባት ታኮና ጉራም አከካህ፤ አኑ ለ አቲን ጉርታናም ባሊህ አከካሀ፣ ቲታ ገየሊኖህ ያክ ኤደሔህ ማይሲታ፣ ታማም ባሊህ ሲናድ ናዓቦ፣ ቅንአት፣ ቁጡዓ፣ አድማ፣ ሕያው ሚጋዕ ዓይኒሳናም፣ ሐሚ፣ ትዕቢት፣ ህውከት ያኔምኮ ማይሲታ፡፡ 21. ጋባዔህ ሲኑላል  አምተጉል  ይ አምላክ ምናልባት ሲን ነፊል ያይወረደ ለ ኤዽሔህ ማይሲታክ አነ፣ ታሃምኮ ባሶህ ኃጢእት ሢራሔኒ፤ ታይ ሢራሔን ሲኒ ብዕልጊናህከ ዙሙቱድ ሲነ ዕደኒህ ኢርከህ፤ አበን በደሊህ ኒስሓ ሳየ ዋይተ ሕያዊህ ኃዛኒህ አሞል ራደ ሊዮ ኤደሔህ ማይሲታ፡፡

ማዕራፋ 13

ባክቶ ምክረከ ሳላምታ

  1. አማይጉል ሲኑላል አምተም ታሃም ይማዳሐህ ኪኒ፣ አማጉል ኡማን ጉዳይ ያምረገገጸም ሳላማህ ወይ አዶሑቲ ማስኪሪህ ኪኒ፡፡ 2. ማላሚ ማስኪሪህ ዋርሲምናናል ሲንሊህ ኢነ ዋክተ አይጣንቃቆ ዋንሰተህ ኢነ፣ ካዶሊህ ለ ዸዺል ኤከህ ታሃምኮ ባሶድ ኃጢአት ሢራሕተምከ አኪ ማራሊህ ለ አይጣንቃቆ ዋንሲታክ አነ፣ ካዶ ሲኑላል ጋሔህ አምተ ዋክተ ቲያ ማማይሲታ፡፡ 3. ታይ ዓነትህ ዮያድ ዋንስታቲ ክርስቶስ ኪናም አምርድኤሊቲን፣ ሲንሊህ ያምቡሉወቲ ክርስቶስ ኃይላ ኪኒካህ ኃዋል ማኪ፡፡ 4. ኡሱከ ማስቃል አሞክ ይምሲቂለህ ራበም ሓዋል የከሚህ፣ ካዶ መዔፉጊህ ኃይላህ ሕይውቲህ ማራ፣ ናኑ ለ ካሊህ ሩኩታም ነከ፣ ሲንሊህ ሊኖ ቲቲህ ገይቶህ ለ ካሊህ ፉጊ ኃይላህ ማራክ ናነ፡፡ 5. እምነቲህ ኪቲኒም ታይራጋጋጾናክ ሲነ ኢምርምራ፣ ሲነ ኢፊቲና፣ ኢየሱስ ክርስቶስ ሲን አዳድ ኪናም ማስታውዓሊኒቲንሆ? አማም አከዋየምኮ ሲነ ኡቡላ /ኢፍትሳ/፣ ኢየሱስ ክርስቶስ ሲን አዳድ ኪናም ማስታወዓሊኒቲን? አማም አከዋይትምኮ ፋታናል ራደን ማለት ኪኒ! 6. ናኑ ፋታናል ማራድንኖም ታዻጎና ታስፋ አብክ ናነ፡፡ 7. ኢንኪጉል ኡካ ኡማ ጉዳይ አብታናምኮ ፉጎል ጻሎት አብና፣ ጻሎት አብናናህ ኢንኪጉል ኡካ ናኑ ኤዳም ነከህ አምቡሉወካህ ራዕነሚህ፣ አቲን ኡማን ዋክተ መዔም አብቶና ኪኒካህ ኒኒ ቢቅዓት ናይባላዎ ማኪ፡፡ 8. አይሚህ ናኑ ሓቂ ዳዓባል ሢራሕክ ናነካ ሓቂ ተፃይ ኪናምኮ ኢንኪ ጉዳይ ማሢራሕና፡፡ 9. ናኑ ሩኩትም አኪህ አቲን ለ ኃይለ ለም ታኪንጉል፣ ደስ ሲናህ ዮዋይ፣ ኒጻሎት አቲን ፉጾማን ታኮና ኪኒ፡፡ 10. ታይ መልእክት ሲንኮ ሚርሕ ኤህ አነሃኒህ ሲናል ኢጽሕፈም ታይ ምክንያታህ ኪዮ፣ ታይ ዓይነቲህ ሲኑላል አሚተ ዋክተ ማዳሪ ዮህ ዮሖወ ሢልጣናህ ሲን ማይጽኒቀ፣ አይሚህ ማዳሪ ሢልጣን ዮህ ዮሖወም ሲና አይሀናጾ ኪኒካህ ሲና አስዓናዎ ማኪ፡፡ 11. ራዕተሚህ ይሳዖሎ! ናጋይ ቲካ፣ ፉጹማን ታኮና ኢፅዒራ፣ ይምክረ ኦባአ፣ ሲነሲነህ ኤምሰመመዓ፣ ሳላማህ ማራ፣ ካሓኖከ ሰላም አምላክ ሲንሊህ ያኮይ፡፡ 12. ሳዖሊኒ  ሞቦህ ቲታ ፉጉታክ ሳላምታ ትታህ ኡሑዋ፡፡ 13. ክርስቲያን ሙሉኡድ ሳላምታ ካብ ሲናህ ኢሳን፡፡ 14. ማዳሪ ኢየሱስ ክርስቶሲህ ጻጋ፣ ፉጊ ካሓኒህ  መንፈስ ኅብረት ኡማን ሲናሊህ ያኮይ፡፡