ማላሚ መልአክት ተሰሎኖቄል

   ማላሚ ጳውሎስ መልእክት ተስሎንቄል         

                        ሳይማ      [ዸ ዹ ዺ ዻ ዼ ዽ ዾ] 

    ክርስቶስ ማላሚ ሙሙቲህ ዳዓባል ኡገተ ኤሠሮ ሁከት ኡጉሳክ ተደም ተሰሎንቄ ሞሶዓረል ይነ ጸገም ትስግደ፣ ጳውሎስ ተሰሎንቄ ሒያዋህ ይጽሒፈ ማላሚ ፋሮ መልእክት ማደሪ ሙሙቲህ ለለዕ ካብየ፣ ያዽሔ እምነት አሞል ታብለቲያ /ታቱኩረቲያ/ ኪይይ ቲነ፣ ጳውሎስ ለ "ክርስቶስ ሙሙቲህ  ቦሶል'ዓመጺ ሒያውቶ'አክያን ክርስቶስ ታምቀወመሚህ  መራሒህ ዓለም አሞል ኡምነከ ዓመፂ አመንግክ ያዲየ" ያናማህ ተን እምነት ያአራሞ ያዕኪነ፡፡

   ሐዋርያ አንበብቲ "መከራከ ሥቃይ አክ የመንገሚህ ኡካ ሲኒ ኢምነቲህ ያፅናዖና፣ ካከ አኪ ማሪህ ሥራሕህ ተሓባባርት አባናም ባሊህ ሲኒ ናብራህ ተን ጉርሱሳም ገዎና ይትግሂኒህ ሥራሖናከ፣ ታማም ባሊህ መዔ ሢራሕ አባናምኮ ዕስስ ያናምኮ" ይይጥቢቀህ ተን ይምክረ።

_________________________________

                                           ማዕራፋ 1 

    1. ና'ባ የከ መዔፉጎከ ኒማደራ ኢየሱስ ክርስቶሱህ የከ ተሰሎንቄ ሒያውህ ሞሶዓረል ጳውሎስ ሲላስከ ጢሞቴዎስኮ ፋሪምተ ፋሮ፥ 2. ፉጊ አባከ ማደራ ኢየሱስ ክረስቶስህ ጸጋከ ሳላም ሲናሊህ ያኮይ፡፡

                          ክርስቶስ ሙሙቲህ ለለዕ ያከ ፍርደ

   3. ይሳዖሎ! ሲን ምክንያታህ መዔፉጎ ኡማን ዋክተ ናይምስግነ፥ ናይማስጋኖ ለ ኒጉቡእ ኪኒ፣ ናይምስጊነም ሲን ኢምነት የሰሰህ ጋባዔህ አነብክ ኢሲሲ አሞህ ካሓኖ ኦሳክ የደርክሀ ኪኒ፡፡ 4. ሲን ማደ ስደትከ መከራህ ኡምቢክ ትፅኒዒንጉልከ ሲኒ ኢምነቲል ገይመተኒህ፥ መዔፉጊህ ሞሶዓሪት ተክንጉል  ሲናህ ናምኪሔ፡፡

   5. ታሃም ታይቡሉወም መዔፉጊህ ፊርዲ ቅንዕቲያ ኪናም ኪኒ፣ ታይ ዓይነቲህ ጋራይተን መከራህ ምክንያታል መዔፉጊህ ማንግሥቲህ ኤዳም አከልቲን፡፡ 6. መዔፉጊ ቅንዒና ለ ፈራዲ ኪናማህ ሲቃይ ሲናል ባህታሚህ አሞል መከራ ኤል ባሄ ለ፡፡ 7. ካዶ ሔልዋይ ጋራይታማክ ኖሊህ ዔረፍቲ ሲናህ አሓየ ለ፡፡ ታሃም ታከም ማደሪ ኢየሱስ ኃይላለ ማላይካሊህ ዓራንኮ ኦባ ዋክተህ ኪኒ፤ 8. ዓራንኮ ኦባም ሀልሀልታ ጊራሊህ ኪኒ፥ ታማይጉል መዔፉጎ አዽገ ዋይታምከ ኒማዳሪህ ኢየሱስ ወንጌሊህ አምኢዚዘ ዋይታማል ኤልያምብቂለ፡፡ 9. ኢሲን ማደሪ ፋታናከ ኃይላለ ካ ክብረኮ ባደስመኒህ ኡማንጉሊ ሊይህ ያምቅፅዒን፡፡ 10. ያምቅጺዒኒም ለ ኢስ ቁዱሳናህ ያክባሮ፥ አምነዋይታም ለ ሙሉእ ኒምስክሪነት ጋራይተህ ተመነምሊህ ኢሲንሊህ ያምዳናቆ  ያምተ ዋክተ ኪኒ፡፡

  11. ታሃም ኒሕስበርከህ ሲናህ አስቆሮጸካህ ጻሎት አብናም፥ መዔፉጊህ ደዖህ  ኤዳም ሲን አቦከ መዔም አብቶና ልትን ዲላይከ ኢምነቲህ ሲን ሥራሕ ሙሉኡክ ኢሲ ኃይላህ ሲናህ ያፋፃሞ ኪኒ፡፡ 12. ታማም ባሊህ ኒማዳሪ ኢየሱስ ምጋዕ ሲናህ ያክባሮከ አቲን ኒአምላከ ኒማዳራ ኢየሱስ ክርስቶሲህ ጸጋህ መሠረቲህ ካያህ ታክባሮና ጻሎት አብና፡፡ 

                                      ማዕራፋ 2

                                 ዓማጺ ሒያውቶ

   1. ይሳዖሎ! ኒ ማደሪ ኢየሱስ ክርስቶሲህ ሙሙትከ ናኑ ለ ካያሊህ ነከሄለርከህ ጉዳህ ሲን ዻዒምናም ታሃም ኪኒ፡፡ 2. ትንብቲህ ያኮይ ስብከቲህ ዋንስተኒም ባሊህ፣ ወይ ኖኮ ፋሮ መልእክቲል ትምይጽሕፈም ባሊህ፣ አብተኒህ ማደሪ ለለዕ ማደ ተኒህ ዸህ ሲኒ አእምሮህ ማምሃዋኪና፥ ማሓንካቢቲና፣ 3. አኪናን ሒያውቲ ኢንኪ ጉዳህ ሲን አይተለለ ዋዎይ፣ አይሚህ ዮኮመህ ባክቶ ኪሕደት አከካህከ ጋሃናማህ ኤዳ ዓማጺ ሒያውቶ የከቲ አምዽገካህ፥ ቶይ ለለዕ ምያሚተ፡፡ 4. ታይ ዓማፂ ሒያውቲ፥ አምላክ አክ ያንቲያከ ታይሚልከምኮ ኡምቢህያህ አሞል ኢሳሞ ናው ኢሳናማህ ያምቀወመ ቲያ ኪኒ፥"መዔፉጎ ኪዮ" አይክ መዔፉጊህ በተ መቅደሲል ኡካ ድፈዎ ያድፍረ፡፡

    5. ሲናሊህ ኢነ ዋክተ ታይ ጉዳይ ሲናክ ኤህ ኢነም ማታዝክሪኒ?    6.አካህ ይምውሲነ ዋክቲ ያምዽገም ፋናህ ካዶ ያምዺገምኮ ደሳም አይሚህ ኪናም ታዽጊን፡፡ 7. አይሚህ ሱዉሩህ ያኮይ ኢካህ ዓማፂ ኃይላህ ካዶሊህ ሢራሕ አሞል ኪኒ፣ ታሃም ታከም ካዶ ካደሳ አራሕ አካህ ያዕዼም ፋናህ ኪኒ፡፡ 8. ታማይ ዋክተ ማዳሪ ኢየሱስ ኢሲ አፊህ ኡፉወህ ያይለየቲያከ፣ ሙዕሩግ ኪን ሙሙቱህ ያይምድምሲሰ ዓማፂ ሒያውቲ አምቡሉወ ለ፡፡        9. ዓማፂ ሒያውቲ ያሚተም ሰጣን ኃይላህ ያስገገ ታአምራታህከ ምልክቲህ፣ ያይድንቀ ጉዳይ ለ አባናማህ ኪኒ፡፡ 10. ታማም ባሊህ ታለየ ሒያውህ አሞል ውልውል ኡማ አይታላል አባናማህ ኪኒ፣ ታይ ሒያው ታለየም ያዳኃኖና ተን ዽዕሲሳ ሓቀ አክሒነ ዋይታም የኪንጉል ኪኒ፡፡ 11. ታይ ምክንያታህ ዲራባል ያማኖና መዔፉጊ ገጋ ኃይላ ኤድፋራ፡፡ 12. ታሃም ታካም ሓቀል ማናሚነ የኒህ ኃጢአታህ ኒያታማል ኡምቢህ ኤልያምፋራዶና ኪኒ፡፡

                                 ድኅነቲህ ዶሪምምተ ሒያው

   13. ማደራህ ኢምክሒን ይሳዖሎ! ናኑ ለ ሲን ባርካታህ መዔፉጎ ኡማንጉል ናይማስጋኖ ኖህ ኤዳ፣ ናይምስግነም አቲን መንፈስ ቁዱሱህ ትመቅድሲን ኢርከህከ ሓቀል ተመኒን ኢርክህ ምክንያታል ታድኃኖና መዔፉጊ ኤዸዾይታ ማራ አበህ ሲን ዶረጉል ኪኒ፡፡ 14. መዔፉጊ ናኑ ሲን ኒብሢረ በሠራታ ቃሊህ አራሓህ፣ ታሃማህ ደዕምምተኒም ኒማደሪህ ኢየሱስ ክርስቶሲህ ክብረ ታምካፋሎና ኪኒ፡፡ 15. አማይጉል ይሳዖሎ! ሲክ ኤያይ  ሶላ፣ ኒቃላህ ያኮይ ኒፋሮህ /መልእክቲህ/ ሲናህ ኖሖወ ሚሂሮ ኢብዻ፡፡         16. ኢሰህ ማዳሪ ኢየሱስ ክርስቶስ ኒይክሒነህ፣ ካ ጸጋህ ኡማንጉሉህ ናምጻናናዖ፣ መዔ ታስፋ ለ ኖህ ዮሖወ ናባ መዔፉጊ፣ 17. መዔም አኪናኒም ኡምቢህ አብቶናከ ዋንሲቶና ሲን አፍዓዶ ያይጻናናዖዋይ፣ ኃይላ ለ ሲናህ ያሓዎይ፡፡

                                      ማዕራፋ 3

                      ጳውሎስ "ኖያህ ጻሎት ኖህ አባ" አክየ

  1. ራዕተሚህ ይሳዖሎ! ሲን ፋናድ ተከም ባሊህ ኡምቢህ ማደሪ ቃል ያምፋዳዳኖከ ያክባሮ ኖያህ ጻሎት አባ፡፡ 2. ታማም ባሊህ ካቃል ጋራይተህ ታሚነም ሙሉኡድ ማኪኖንጉል ዓማፀየናታትከ ኡማ ሒያውኮ ናድኃኖ ጻሎት ኖህ አባ፡፡ 

   3. ማደሪ ለ ኡሙን ኪኒ፣ ኡሱክ ሲክ ሲኒሳ፣ ሰጣንኮ ለ ሲን ዻዉዻ፡፡   

4. ሲን ናኢዚዘም ካዶ ያኮይ ባሶቱላል ታፍጽሚኒም ማደራህ ሲናል ናምኤመመነ፡፡ 5. ማደሪ ሲን አፍዓዶ መዔፉጊህ ካሓኖህከ ክርስቶስ ትዕግሥት ቱላል ያይማራሖይ፡፡

                                        ሥራሕ ግደታ

    6. ይሳዖሎ! ሢራሔዋ ሀካይ ኪንቲያኮከ ኖኮ ጋራይተን ምሂሮህ ሪሚዲህ ማረ ዋ ክርስቲያንቶኮ ሙሉኡክ ባዽስምቶና ኒማዳራህ ኢየሱስ ክርስቶስህ ሚጋዓህ ሲን አኢዚዚክ ናነ፡፡ 7. አይሚህ ኒምሳለ ታካታሎና ሲናህ ኤዳም አቲን ሲነህ ታዽጊን፣ ናኑ ሲንሊህ ኒነ ዋክተ ሢራሕ ሂኒም ማድፈይኒኖ፤     8. ኢንከቲ ኢንገራ ካንቶህ ማበትኒኖ፣ ናቢህ ሲንኮ ኢንከቲ አሞል ዑካ ሲናክ ናከምኮ ያናማህ ባርከ ለለዕ ሓዋልከ ፃዕረህ ሢራሓክ ኒነ፡፡ 9. ታሃም ለ አብነም አቲን ኒ አብነት ሓድሊቶና ነህ ኪኒካህ ሲንኮ ሓገዝ ገይኖ ሢልጣን አለካ ራዕነህ ማኪ። 10. አይሚህ ሲንሊህ ኒነ ዋክተ"ሢራሖ ጉረዋቲ በተዋዎይ"ያዽሔ ደንቢ ሲናህ ኖሖወ፡፡

   11. ታሃም አካህ ነ ምክንያት ሲን ፋናድ ጋሪጋሪ ሢራሔ ዋይታም ታነም ኖበጉል ኪኒ፣ ታይ ሒያው ኤድተንሃየ ዋ ጉዳአድ ሳክ አክማራ ያህውኪኒምኮ በሒህ ኢንኪም ሢራሔካህ ማርታም ኪኖን። 12. ታህ ኢግድን ሒያው ሠርዓታህ ማሮና ሢራሔኒህ ሲኒ ምግበ በቶና ማዳሪ ኢየሱስ ክርስቶሲህ ሚጋዓህ ተን አኢዚዚክ ናነ፣ ተን አይጥንቅቅክ  ናነ።

   13. አቲን ለ ኒሳዖሎ! ሐዋልነ ተኒህ መዔም ሢራሓናምኮ ማምሀካይና። 14. ታይ መልእክትል ሲናህ ቲላስነ ምክረ ጋራየ ዋ ሒያውቲ ይኔምኮ፣ ታህ ኢግድ ሒያውቶኮ አፍዓዶ አቢታ፣ ሖላይሲቶ ዒሎህ ካሊህ ማምሐባባሪና። 15. ያኮይ ኢካህ ሳዓል ባሊህ ኢምኪራ ኢካህ ናዐብቶሊ ባሊህ  ማሎይና።

                                        ባኪቶ ሳላምታ

  16. ሳላም ማዳሪ ኢሰህ ኡማን ዋክተከ ኡማን ጉዳህ ሳላም ሲናህ    ያሓዎይ፣ ማዳሪ ኡማን ሲናሊህ  ያኮይ ። 

  17. ታይ ሳላምታ ኢኒ ጋባህ ይጽሕፈቲይ ዮያ ጳውሎስ ኪኒ፣ ይ መልእክትል ኡምቢህ ገይማ ምልክት ታሃም ኪኒ። ኢጽሒፈም ታህ ኪኒ፣ 18. ኒማዳሪህ ኢየሱስ ክርስቶሲህ ጸጋ ኡማን ሲናሊህ ታኮይ። 

Email This 

BlogThis!

Share to Twitter

Share to Facebook

Share to Pinterest