ሐዋሪያው ጳውሎስ መልእክት ሮማ ሒያዋል
ሳይማ [ዸ ዹ ዺ ዻ ዼ ዽ ዾ]
ሳይማ [ዸ ዹ ዺ ዻ ዼ ዽ ዾ]
ሐዋርያ መልእክት ሮማ ሒያው ዻጋህ ጳውሎስ ሮማል ገይማ ሞሶዓረ ማዶ ዓላማ ልይነጉል ዮምሶናዶውኒህ ካ'ኢላሎና አባናም ኪኒ፡፡ ጳውሎስ ዓላማ ሮማል ገይምታ መእመናንሊህ ዳጎ ዋክተ ሥራሔምኮ ሣራህ ተን ጎሮኑህ ኤስፐይን ኡላል ያዳዎ የህ ኪይይ ይነ፣ ክርስቲያን ኢምነቲህ ዳዓባል ያይርዲኤም ክርስቲያን ሲኒ ሂወቲህ ተግባራል አካህ አሲሳናሚህ ዝርዝርህ ይጽሒፊን፣ ጳውሎስ መልእክት ተመለኤ አገባብራህ ገይምታም ታይ ፋሮህ ኪኒ። ጳውሎስ ሮማል ገይምታማህ ሳላምታ ትላሰምኮ ላካል ኤል ያጽሐፎ ታስፋ አካህ ዮሖወምኮ ሣራህ ፋሮት ፋንቲ ሓሳብ ወንገል ቃል ፉጊ ሒያው ያጽድቀሚህ ባኪቶት ኢምነትህ ኪናም ያይስዽገ (1፣17) ያዽሔ ቃል ኪናም ያይቡሉወ ታሃሚህ ላካል ታይ ሐሳብ አይፈደደኒክ ይጽሒፈ አይሁድ ያኮይ አረማውያን ሒያው ኡምቢህ ኃጢአት ተገዛእት ኪኖንጉል ፉጎሊህ ዋጋሮና ኤልታነ፣ ሒያው ፉጎሊህ ዋጋሮና ዺዓናም ለ ክርስቶሱል የመንኒህ ኪኒ፣ ታሃማህ መዔፉጎሊህ ያይምስርቲን ዑሱብ ኢንኪኖህ ውጤት ዑሱብ ሂወት ኪናም ኢዳህ ጳውሎስ ፍድኒህ ያይርዲኤ፡፡ አማኒ ፉጎሊህ ሳላም አለለ፣ መዔፉጊህ ኃይላህ ኃጢአትከ ራቢ ኃይላኮ ናፃ የውዔም፣ (ምዕራፍ 5-8) ጳውሎስ ፉጎከ አማንቲ ሂወቲህ ሢራሓቲ መዔፉጊህ መንፈስህ ኃይሊ ዓላማ አይም ኪናም ያይቡሉወ፣ ታርከኮ ይቅፅለህ ጳውሎስ መዔፉጊህ ሒያውቲህ ዳሪ ለ ዕቅድ አዳል አይሁዳውያንከ አረማውያን አይናህ የኒህ ያማቶና ዺዓና? ታይ ኤሠሮህ አሞል አንዱፉልክ ገይማን፡፡ ለል አይሁድ ኢየሱስ ክርስቶስ ለ ጋራየካህ ራዔን ኢርከህ ፉጊ ዕቅድ ኪናም ያይቡሉወ፤ አይሚህ ታይ ዓይዳህ ሒያው ዳሪ ኡምቢህ መዔፉጊ ኢየሱስ ክርስቶሱህ ይይቡሉወ ጸጋህ አዳድ ያምሐቃፎ ዺዓህ ያከ ኢካህ አይሁዳውያን ኢየሱስ ጋራያን ዋክቲ አምተለም ጳውሎስ ያሚነ፣ ባክቶል ጳውሎስ ክርስቲያን ሂወት አይናህ የህ ማሮ ኤዳም፤ \ፍላህ ለ መእመናን ስነሰነህ ሎን ቲቲህ ገይቶህ ካኃኒህ አራሓህ ያካታሎና ኤዳም ያይርዲኤ፣ መዔፉጎ ያስግልግልኒም፣ ክርስቲያን ሲኒ ሀገርል ሲነሲነህ ሎን ኃላፍነትከ፣ ኅሊናህ ምክንያታል ኡጉታናም ኢዻህ ኤሰሮ አዝርዝርክ፣ያርዲኤ፡፡________________________________________________ ማዕራፋ 1 1. ኢየሱስ ክርስቶስህ አገልጋሊ የከህ፣ ሐዋርያ ያኮ ደዕሚመህ፣ በሠራታ ቃል ያባሣሮ ዶሪሚመ ጳውሎስኮ ፋሪምተም። 2. ታይ በሠራታ ቃል መዔፉጊህ ነብያትህ አራሓህ ቁዱሳት ማጻሕፍቲል ቶኮመህ አካህ ቶምሖወ ታስፋ ቃል ኪኒ፡፡ 3. በሠራታ ቃል ለ መዔፉጊህ ባዽ ሒያውቶ ኪናሚህ ኡላኮ፣ ዳዊት ዳራኮ ዮቦከም ታይብስረም ኪኒ። 4. ታማም ባሊህ ማደሪ ኢየሱስ ክርስቶስ ኢሲ ጽድቂህ መንፈስህ አራሓህ ናባ ኃይላህ ራባኮ ኡጉተርከህ ፉጊ ባዻ ኪናም ታይብስረም ኪኒ፡፡ 5. ካባርካታህ ሐዋርያ ያኮ ታይብቂዔ ጸጋ ገራየህ አኒዮ፣ አማይጉል ካምጋዓል አረማውያን ኡምቢህ ያማኖናከ አካህ ያምአዛዞና አበሊዮ፡፡ 6. አቲን ለ ኢየሱስ ክርሰቶስልህ ታኮና መዔፉጊ ደዔም ኪቲን። 7. አማይጉል ሮማል ማርታማክ፣ መዔፉጎ ትክሕነምከ ካወገን ታኮና ደዒምምተሚክ ኡምቢህ፡፡ ናባ መዔፉጎከ ማደራ ኢየሱስ ክረስቶስህ ጸጋከ ሳላም ሲንሊህ ያኮይ፡፡ምስጋና ጻሎት 8. ሲን ኢምነቲህ ዝና ዓለሚል ሙሉኡድ ቶሞበጉል፣ ኡማኒምኮ ኡይሱኩመህ ኢየሱስ ክርስቶስህ ዳዓባህ ኡማን ሲኒህ ባርካታህ ኢኒ ማላይካ አይምስጊነ፡፡ 9. ኡማን ዋክተ ጻሎቱህ ሲን አሕስበ፣ ባዽ በሰራታ ቃል አብስርክ ሙሉእ ኢኒፍዓዶህ አስግልጊለ መዔፉጊ ይማስኪር ኪኒ፡፡ 10. ጋባዔህ ካዶ ባክቶል ሲኑላል አማቶ መዔፉጊህ ፍቃድ የከህ ያራሕ ዮህ ያቅናዖ ኡማንጉል ጻሎት አባክ አኒዮ፡፡ 11. አይሚህ ለ ኢምነቲህ ታጽናዖና ሲን አብሲሳ መንፈሳዊ ሓቶ ሲን አስካፋሎ ጉራም ኢዻህ ሲናብሎ አትምኔየ፡፡ 12. ታሃሞም ለ አካህ ኤም አኑ ሲን ኢምነቲል፣ አቲን ለ ይኢምነቲል ኒነ ኒነህ ናምጻናናዖ ኪኒ፡፡ 13. ይሳዖሎ! አኪ አረማውያን ፋናድ ኢይምሂረህ ማንጎ አማንቲ ገየህ አኒዮ፣ ታማም ባሊህ ሲን ፋናድ አይምሂረህ አማንቲ ገዎ ጉረህ ኢነ፣ ያኮይ ኢካህ ሲና ዻጋህ አማቶ ማንጎ ዋክተ ኢሕሲበሚህ ካዶ ፋናህ ዮህ ማስላቲናም ታዳጎና ጉራ፡፡ 14. አይሚህ ለ ትሥልጥነም ያኮይ አሥልጥነ ዋይተም፣ ቲምሂረም ያኮይ አሚሂረ ዋየ ህዝበ ያይምሂርኒሚህ ጊደ ሊዮ፡፡ 15. አማይጉል ሲና ሮማል ማርታማክ በሠራታ ቃል ሲን አይባሣሮ አትሚኔ፡፡ወንጌል ቃል መዔፉጊህ ኃይላ ኪኒ 16. አኑ ወንጌል ቃላህ ማሖላይሲታ፣ አይሚህ ለ ወንጌል ቃል ባሶል አይሁዱህ፣ ላካል አረማውያናህ፣ ኢምነት አለዋይታ ሒያው ኡምቢህ ያድኃኖና ዺዓናም መዔፉጊህ ኃይላህ ኪኒ፡፡ 17. ታይ ወንጌል ቃላህ ፉጊ ሒያው ታጽድቀም ኤዸዾይታኮ አይከ ባክቶ ፋናህ ኢምነቲህ ኪናም ያይቡሉወ፣ አይሚህ ያጽድቀ ሒያውቲህ ኢምነት ሂወት ገያ የህ ይምጽሕፈ ። ሒያው ኡምነ 18. ሒያው ሲኒ ኡምነህ ሓቂ አክ ያምዽገምኮ አባክ ስኒ ኃጢአትከ ስኒ ኡምነህ ምክንያታል መዔፉጊህ ቁጡዓ ዓራንኮ ኤልታምግሊጸ፡፡ 19. ተን ያቅጽዔም መዔፉጊህ ዳዓባል ያዻጎና አካህ ኤዳም ኡምቢህ ያዻጎና መዔፉጊ ኢሰህ ተን ይቡሉወም አዽጊይ ይንንጉል ኪኒ፡፡ 20. ዓለም ይምፍጥረምኮ ኤዸዺሰህ ሒያዋህ አምቡሉወ ዋይታ መዔፉጊህ ባህሪ፣ ታሃም ለ ኡማንጉሊት ኃይላህከ አምላካህ፣ ኢሰህ ይፍጥረ ጉዳይ ጊልጸ አበህ ይምቡሉወ፣ አማይጉል ታህ ኢጊድ አዺጊህ ታይላየም ያይምክንይኒም ማሎን፡፡ 21. አይሚህ ኢሲን መዔፉጎ የዸጊኒህ ያንንሃኒህ ካያህ ኤዳ ክብረከ ሞሳ አካህ ማሓይኖን፣ ሲኒ ሓሳባህ ለ ካንቶ የኪን፣ አስትውዕለ ዋታ ተን አፍዓዶ ዲቶይተ፡፡ 22. ብልሐት ለም ኪኖ አይህ ኣለዋይታም የኪን፡፡ 23. ኡማንጉልቲያ የከ መዔፉጎ ያይምልኪኒም ኢዻህ ቲላይታምከ ታለየም ኪን ሒያዋል፣ ኪምብሮል፣ እንስሳል፣ ባዾት አሞል ሂርግምታ ፉጡራትህ ቢሶህ ሢራሕምተ ምስልታታል ያይምልኪኒም ኤዸዺሰን፡፡ 24. አማይጉል ሲነሲነህ ሖላሳ ጉዳይ አቦና፣ መዔፉጊ ኡምነህ የመገ ሲኒ ጉርታዮህ ተመገም ያኮና ተንሓበ፡፡ 25. ታሃም ተከም ፉጊ ሓቀ ዲራባል ይልውጥንጉል፣ ይፍጥረቲህ ኢዻህ ፍጡር ይምልኪንጉልከ ይስግልግልንጉል ኪኒ፣ መዔፉጊ ለ ኡማንጉል ይምስግነቲያ ኪኒ፣ አመን። 26. ሒያው ታሃም አብተርከህ ምክንያታል ፉጊ ኤደዋ ያይኒውረ ጉርታዮህ ቲላሰህ ተን ዮሖወ፣ ተን ሳዮ ኡካ ተምገለ ኃዶይታ ሥራሓህ ቲታ ገያናም አምገለ ዋይተ ኃዶይታት አራሓህ ቲታ ገያናማል ይልውጢን፡፡ 27. ታማም ባሊህ ላባቶ ተምገለ ኃዶይተ ግብረህ ቲታ ገያናም፣ ሳይጉደሊህ አባናም ሓበኒህ ሲነሲነህ ሓዶይታ ግብረህ ቲታ ገዮና ጋደህ ይትምኒን፣ አማይጉል ላባቶ ላበቶሊህ ሖላሳ ጉዳይ አበን፣ ሲኒ ገጋህ ምክንያታል አካህ ኤዳ ቅጽዓት ሲኒ ኃዶይታህ ጋራየሎን፡፡ 28. ሒያው ፉጎ ያዻጎና ጉረዋየንጉል፣ ናውረ ኪን ጉዳይ አቦና መዔፉጊ አርብሔ ዋይታ አእምሮ ቲላሰህ አካህ ዮሖወ፡፡ 29. አማይጉል ጊፍዔህ፣ ኡምነህ፣ አምሀጋጋህ፣ ቂሚህ፣ ተንኮሉህ፣ ናብሲግድፎህ፣ ናዓቦህ፣ አይታላላህ፣ ኡማ ሓላህ ታሃማህ ኡምቢህያህ ኃጢአታህ ተመገምከ ሓምታም ኪኖን፤ 30. ታማም ባሊህ ምናዳምቲ ሚጋዕ ታይለየም፥ ፉጊ ኒዒባም፣ ምናዳምቶ ታይወረደም፥ ትዕቢተናታት፣ ታሚኪሔም ኡምነ አብቶ አራሕ ዋግታም፣ ሲኒ ዻልቶይቲህ አምእዚዘ ዋይታም፣ 31. አስትውዒለ ዋይታም፣ ካሖኖ ሂናም፥ ጸከንቲ ኪኖን፡፡" 32. ታይ ጉዳያት አብታም ኡምቢህ ራቢ አካህ ኤዳ" ያናም መዔፉጊህ ሕገ አዽጊህ ታሃም ኡምቢህ አባን፣ አብናን ዲቦህ አከካህ ታሃም አብታ ሒያው አይዱኩም ኢሳን ፡፡ ማዕራፋ 2 መዔፉጊህ ፍርደ 1. አኪ ሒያውቲህ አሞል ያፍርደቲያ አቱ፣ ኢሳሞህ ለ ታይምክኔም ማልቶ፣ አይሚህ አኪ ሒያውቶል አፍርዲህ ኢሲ ዸግኃህ አሞል አፍሪዲክ ታነ፣ አቱ ሒያውቲ አሞል አፍሪዲህ ቶይ ኤልታፍሪደ ሒያውቲ አባም አባክ ታነ፡፡ 2. ታሃም አብታ ሒያውህ አሞል መዔፉጊ ኤዳዒለህ ኤልያፍሪደም ናዺገ፡፡ 3. ኮ ሒውቶ! ታሃም አብታ ሒያውህ አሞል አፍሪዲህ፥ ኢሲን አባናም አባህ መዔፉጊህ ፍርደኮ ሙሉሕታም ታካለ? 4. ወይ መዔፉጊህ መዕነከ ዺዕ፣ ካትዕግሥትህ ማንጋ ዻይታክ ታነ? መዔፉጊ ኢሲ መዕነ ኮህ የይመንገም ኮያ ንሲሓህ ደዖ የህ ኪናም ማታዺገ? 5. አማይጉል አቱ ንስሓ ሳየ ዋይተርከህከ ያምሄለለከ ቲያ ኪቶርከህ መዔፉጊ ቁጡዓከ ትክኪል ኪን ፍርደ ያቡሉወ ለለዕ ኩቅጽዓት ያመንገካህ አባክ ታነ፡፡ 6. አይሚህ ፉጊ ኡማንቲያህ ተንተን ሢራሕ ባሊህ አካህ ያሓየ፡፡ 7. መዔ ሢራሓል ሲክ የኒህ ምስጋናከ ኪብረ አይለየ ዋ ሂወት ለ ዋጊይታማህ፣ መዔፉጊ ኡማንጉሊ ሂወት አካህ ያሓየ፡፡ 8. ያከካህ ኢሲ ዸግኃህ ጥቅመ ዋጊታ፣ ዓመፀናታት ኪን ማራህ ትክኪል ኪን መዔ ጉዳይ ሓበኒህ ኡማም ታክትለሚህ አሞል መዔፉጊህ ቁጡዓከ መቅስፍት ኤልአምተ ለ፡፡ 9. ኤዸዾይታህ አይሁዱል፣ ጋባዔህ አረማውያናል፣ ኡማም አብታ ሒያውህ አሞል መከራከ ጽንቀት ኤልአምተ ለ፡፡ 10. ያኮይ ኢካህ አይሁድ ያኮይ አረማውያን፣ መዔም አብተ ሒያው ኡምቢህ ምስጋናከ ክብረ ሳላም ለ አካህ አምኃወ ለ፡፡ 11. አይሚህ ፉጊ ሒያው ፋናድ ምያይዶሎወ፡፡ 12. ሙሴ ሕገ ሂኒም ኃጢአት ሢራሕታም ኡምቢህ ሕገ አለዋየኒሚህ አለየ ሎን፣ ሙሴ ሕገ ሊህ ኃጢአት አባታም ኡምቢህ ለ ሕገ ይፍርሲን ኢርከህ ኤልያምፍረደ፡፡ 13. አይሚህ መዔፉጊህ ነፊል ታጽድቀም ሕገ ዮብኒህ ሢራሓድ አሲሳም ኪኒካህ ሕገ ዮቢኒህ ሢራሓድ አስሰዋይታም ማኪ፡፡ 14. ሙሴ ሕገ አለዋይታ አረማውያን ተን ተፍጥሮህ ሕጊ ያኢዚዘ ጉዳይ ያፍጽሚን፣ ታይ ምክንያታል ሙሴ ሕጊ አኔዋየሚህ ሲኒ ዸግኃህ ተፈጥሮ ሕገ ሎንጉል አቦና ኤዳም ያዽጊን፡፡ 15. ታይ ዓይነቲህ ሙሴ ሕጊ ያኢዚዘ ጉዳይ ሙሉኡድ ተን አፍዓዶድ ይምጽሕፈህ ያነም ያይቡሉወ፣ ጋባዔህ ለ ተን ኅልና ኤልታምስክረ፣ አይሚህ ተን ኅልና ውልውልጉል ተን ታውቂሰ፣ ውልውልጉል ለ ተን ታድግፈ፡፡ 16. ታሃም ለ ታከም አኑ አይብሥረ ወንጌል ቃሊህ ሪሚዲህ መዔፉጊ ኢየሱስ ክርስቶስህ አራሓህ፣ ሒያው ሢራሕተ ሱዑተ ጉዳይህ አሞል ያፍርደ ለለዕ ኪኒ፡፡ አይሁዳውያንከ ሙሴ ሕገ 17."ሀይከ አቱ አይሁዳ ኪዮ"አይክ ታነ፣ ሙሴ ሕገ አድግፊክ ታነ፣ መዔፉጊህ ቲያ ኪቶሙህ አምክሕክ ታነ፣ 18. አቱ ፉጊ ፍቃድ ታዽገ፣ ሙሴ ሕገ ትምሂረጉል መዔም አባናም ታዺገ፡፡ 9. አቱ"ኢንቲ ማሎሊ መራሒ ኪዮ፣ ዲተድ ታነሚህ ኢፎይታ ኪዮ" አይክ ታነ፡፡ 20. አቱ"አምሂረ ዋተይም አይሥልጥነ፣ ሕፃናት አይምሂረ አይክ ታነ፣ "አማም ባሊህ ሕጊ፣ ኢዽጋከ ሓቀህ የመገቲያ ኪኒ አይክ ታነ፡፡ 21. አኪ ማራ ያይምህረቲያ ኪይህ አይሚህ ቡሳ ኢሰ አይምሂረዋታም?"ማጋርዕቲና አይክታነ፣ አቱ ለ ጋርዕታ፡፡ 22. ማአማንዛሪን አይክ ታነ፣ አቱ ለ ታምንዝረ፣ አቱ ጣኦት ታፊንፊነ (ታምፅይፈ)፣ ተን በተ መቅደሳ ዓረ ለ ታዝሪፈ፡፡ 23. አቱ መዔፉጊህ ሕገህ ታምክሔ፣ ያከካህ ሕገ አይፍርሲክ መዔፉጎ ዻይታክ ታነ፡፡ 24. ታሃም፣ "ሲናህ አይሁዳውያን ሳባባል፣ መዔፉጊህ ሚጋዕ አረማውያናህ ዋቲሚማ" የህ የምጽሕፈም ባሊህ ኪኒ፡፡ 25. ጊሪዛት ኩያጥቂመም ሕገ ትፍጽመምኮ ኪኒ፣ ሕገ ታይፍሪሰህ ተከምኮ ለ ግርዛት አምግሪዘ ዋይተም ባሊህ ሎይማ፡፡ 26. አማይጉል አምግሪዘ ዋየ አረመንቲ ሕጊ ትኢዛዝ ያፍጽመቲያ የከምኮ አምግርዘ ዋየሚህ ይምግርዘቲያ ባሊህ አካህ ሎይማይ ሚያነ? 27. አቱ ሕገ ልቶሃኒህከ ይምግርዘቲያ ለ ተከህ ሕገ ታይፍርሰጉል፣ ኃዶይታህ አምግርዘ ዋየቲያ ተከሚህ፣ ሕገ ያፍጺመ አረማንቲ ኮልያፍርደ፡፡ 28. አማይጉል ሚጋዓህ ጥራሕ አይሁዳ ኪንቲይ፣ ሓቂ አይሁዳ ማኪ፣ አማም ባሊህ ኢሮኮ ያምቡሉወ ኃዶይታ ግረዘት ሓቂ ግርዛት ማኪ፡፡ 29. ሓቂ አይሁዲ፣ አዳኮ አይሁዳ ኪንቲያ ኪኒ፣ ሓቂ ግርዛት መዔፉጊህ መንፈስህ ያከ አፍዓዶት ግርዛት ኪኒካህ ሙሴ ሕገ ይጽሕፈሚህ ሪሚዲህ ኃዶይታ ግሪዛት ማኪ፡፡ ታይ ቢሶህ ሒያውቲ ሞሳ ጋራም መዔፉጎኮ ኪኒካህ ሒያውኮ ማኪ፡፡ማዕራፋ 3 አይሁዳውያን አምነዋይተርከህ ይብድሊን 1. አማይጉል አይሁዲ አረማዊኮ አካህ ያይሰም አይሚህ ኪኒ? አምጋራዝቲ ጥቅሚ አይምቶ ኪኒ? 2. ዓዲህ አይሁዳ ያኪኒም ማንጎ አራሓህ ፋይዳ ለ፣ ዋና ጉዳይ፣ መዔፉጊህ ቃል አይሁዱህ ሐደራህ ዮሖወርከህ ኪኒ። 3. ይቦል አይሁዱኮ ጋሪጋሪ ታምኢምነም የኪኒህ ሱገዋንዶ፣ ተን አማንቲ አከዋየናማህ መዔፉጊህ አምአማማን አክ ራዒሳ? 4. ኢንኪጉል ማራዕሳ!" ኢሲ ቃልኮ ኡጉተሚህ ሓቀለቲያ ታከ፣ ኢስ ጉዳይህ ባዕላክ ለ ፊርደህ አክታስሉገ"የህ ይምጽሕፈም ባሊህ፣ ሒያው ኡምቢህ ዲራብሊት ተከሚህ መዔፉጊ ሓቀይና ኪኒ፡፡ 5. ያኮይ ኢካህ ኒኃጢአት መዔፉጊህ ጽድቀ ያይቡሉወቲያ የከምኮ አማይጉል አይም ና? መዔፉጊ ኒኃጢአቲህ ዳዓባል ኒያቅጺዔጉል ሓቀ ለ ፈራዲ ማኪ? ታሃም ዋንሲናም ምናዳም አታሓሳሲባህ ኪኖ፡፡ 6."መዔፉጊ ሓቀ ለ ፈራዲ ማኪ" ያናም ኢንኪጉል ማዺዒማታ፣ ታሃም ተከምኮማ መዔፉጊ ዓለም አሞል አይናህ የህ ያፍርደ? 7. ያከካህ ይድራብ ፉጊ ሓቀ አግላጾ ካ ኪብሪህ ማንጋ ያስቡሉወቲያ የከምኮ፣ አይምቡሳ አኑ ኃጢአተይና ባሊህ ዮልያምፍርደም፣ አይሚህ ምክንያታል ኪኒ? 8. ውልውል ሒያው መዔ ጉዳይ ገይኖክ ኡማ ጉዳይ አብኖይ አይክ ያይምህርኒሚህ ይምግድኒህ ይያክሲሲን፣ አማይጉል ተን አሞል አፍርደ ፍርዲ ትክክል ኪኒ፡፡ ሒያው ኡምቢህ ኃጢአተይናታት ኪኖን 9. ይቦል ናኑ አይሁዳውያንከ አረማውያንኮ ናይሰ ማለት ኪኒ? ኢኪጉል ማናይሰ! አይሁድ ያኮናይ አረማውያን፣ ሒያው ኡምቢህ ኃጢአተይናታት ኪኖኑም ኦኮመህ ኢይርዲኤህ አኒዮ፡፡ 10. አይሚህ ታህ የህ ይምጽሕፈ፣ "ኢንከቲ ኡካ ጻድቅ ኪን ሒያውቲ ሚያነ፣ 11. ያስትውዒለቲ ሚያነ፣ መዔፉጎ ጉራቲ ሚያነ፣ 12. ኡምቢህ ሓቂ አራሕኮ የውዒኒህ የምገገይን፣ መዔ ሢራሕ ሢራሓ ኢንኪ ሒያውቲ ኡካ ሚያነ፣ 13. ሒያው ቢያካ ኡማ ቃል ዋንስቶና ተን አፍ ዱኮ ባሊህ ፋኪታቲያ ኪኒ፣ ተን አራብ ያይተለለ፣ ተን ዋገቢህ ዋኒ ዓሮራ መርዝ ባሊህ ብያካቲያ ኪኒ፣ 14. ተን አፊህ ዋኒ ሚሪር አባሮህ ተመገቲያ ኪኒ፣ 15. ተን ኢቢ ሒያው ጊድፎህ አፍተና ኪኒ፣ 16. ተን አራሓል ገይምታም ሊይከ መከራ ኪኒ፣ 17. ሳላም አራሕ ሚያዽጊን፣ 18. ፉጎ ኢንኪጉል ማማይሲታን።" 19. ሕጊ ትኢዛዝ ያይቡሉወምከ፣ ሕጊ ዳባል ታነም ኪኖም ናዺገም፣ ታይ ምክንያታል ሒያው ታይምክንየም ዋይታህ ሲኒ አፍ ያብዺን፣ ዓለም ሙሉኡድ መዔፉጊህ ፍርዲ ዳባል ያከ፡፡ 20. አማይጉል አኪናን ሒያውቲ ፉጊ ነፊል ሙሴ ሕገ ይፍጽመሚህ ሚያጽድቀ፣ አይሚህ ሕጊ ያይቡሉወም ሒያው ኡምቢህ ኃጢአት ለም ኪኖኑም ኪኒ፡፡ሒያው ኡምቢህ ታጽዲቀም ኢምነቲህ ኪኒ 21. ካዶ ለ መዔፉጊ ሒያው አካህ ታጽድቀ አራሕ ሕገኮ ናፃ የከህ ይምቡሉወ፣ ታሃም ሙሴ ሕገከ ነብያታህ ይምስኪረ፡፡ 22. አማይጉል መዔፉጊ ኢንኪ ባዽሳ ሂኒም ኢየሱስ ክርስቶሱል ታምነሚህ ኡምቢህ ጽድቀ ያሓየ፡፡ 23. አይሚህ ሒያው ኡምቢህ ኃጢአት ሢራሕተ፣ ፉጊ አካህ ዮሖወ ኪብረ ዋየን፡፡ 24. አማይጉል ሒያው ኢየሱስ ክርስቶስ ይፍጺመ ድኅነት ሥራሓህ፣ መዔፉጊህ ጸጋህ ዲቦህ ያጽድቂን፡፡ 25. ፉጊ ኢየሱስ ክርስቶስ መሥዋዕት አበህ ካብ ኢሰም፣ ካያህ ታምነም ኡምብክ ካቢሎህ ሲኒ ኃጢአታህ ሕድጎት ገዮና የህ ኪኒ፣ መዔፉጊ ታሃም አበም ባሶል ኃጢአት አኔየዋ ቲያ ባሊህ ሎወህ ኢሲ አሞህ ጽድቂ አራሓ ያይባላዎ ኪኒ፡፡ 26. ካዲ ዳባናህ መዔፉጊ ኢሰ ጻዲቅ ኪናም ያይቡሉወም ኢየሱሱህ ታሚነም ኡምቢህ ያይጻዳቆና ኪኒ፡፡ 27. አማይጉል አካህ ናምኪሔ ምክንያት አይምቶ ኪኒ? ሕገ ናፍጺመሚህ ኪኒ? ማለ፥ ያኮይ ኢካህ ኢምነቲህ ጥራሕ ኪኒ፡፡ 28. አማይጉል መዔፉጊ ሒያው ያይጽድቀም፣ ሒያው ሕጊ ሢራሕ ትፍጽመሚህ አከካህ፣ ኢምነቲህ ኪናም ናስትውዒለ፡፡ 29. ወይ መዔፉጊ አይሁድ አምላክ ዲቦህ ኪኒ? አረማውያን ቲያ ማኪ? ዓዲህ አረማውያን አምላክ ለ ኪኒ፡፡ 30. መዔፉጊ ኢንከቶ ኪኒ፣ አይሁዳ ያኮይ አረመንታ፥ ኢምነቲህ ያይጽደቀቲ ካያ ኪኒ። 31. ይቦል ኢምነት ምከንያታል ሕገ ናስዒረ ማለት ኪኒ? ማለ! ናቢህ ሕገ ሲክ ኢሲነህ አብዽክ ናነ፡፡ ማዕራፋ 4 አብራሃም ኢምነቲህ ይጽድቀ 1. አማይጉል ባሶ ና አባ አብራሃም ገየ ናዽሔም አይም ኪኒ? 2. አብራሃም ይጽድቀም ሢራሓህ የከህ ያከዶ አካህ ያምኪሔ ጉዳይ ገየ ዻዸ፣ ያኮይ ኢካህ ፉጊ ነፊል ያማካሖና ማዽዒማ፡፡ 3. አይሚህ"አብራሃም መዔፉጎል የመነጉል ካኢምነት ጽድቀ የከህ አካህ ሎይመ" የህ ይምጽሕፈ፡፡ 4. ሢራሓ ሒያውቲ ገያ ደሞዝ፣ ኤዳ ካኃሊህ ጉልበቲህ ሊሞ ኪንካህ ሒንዳህ ማኪ፡፡ 5. ሒይውቲ መዔ ሢራሕ አለዋየምህ ኡካ ኃጢአት ለም ያይጽድቀ አምላካል የመነምኮ፣ ኢምነት ጽድቀ የከህ አካህ ሎይማ፡፡ 6. ዳዊት ለ ኢሲ ደፍራህ ፉጊ መዔ ሢራሕ ማለህ ያጽድቀ ሒያውቲ አይዻ የምበረከቲያ ኪናም ዓዶሰህ ታህ የዸሔ። 7."ተን በደል ኤልራዔ ማራከ ተን ኃጢአት አካህ ይምድምሲሰ ሒያው ተምበረከም ኪኖን፣ 8. መዔፉጊ ካኃጢአት ኤል ሎወ ዋ ሒያውቲ የምበረከቲያ ኪኒ፡፡"9. ኢስኪ ዳዊት ዋንሲተም ታይ በረከቲህ ትምግሪዘሚህ ጥራሕ ኪኒ ወይ አምግሪዘዋተሚህ ለ ኪኒ? አምግርዘ ዋይተሚህ ለ ኪኒ፣ አይሚህ "አብራሃም መዔፉጎል የመነጉል ካ ኢሚነት ጽድቀ የከህ አካህ ሎይመ" ነዽሔ፡፡ 10. ይቦል አብራሃማህ ካ ኢሚነት ጽድቀ የከህ አካህ ሎይመም አንዳ ኪን? ይምግርዘምኮ ባሶል ኪኒ ወይስ ይምግሪዘምኮ ላካል ኪኒ? ይምግርዘምኮ ባሶል ኪኒ ኢካህ ይምግርዘምኮ ላካል ማኪ፡፡ 11. አብራሃም ገናህ ያምግሪዘምኮ ባሶል ኢሚነት ጽድቀ የከህ አካህ ሎይመም ዓዶሶ ምልክት አካህ ያኮ ይምግርዘ፡፡ አማይጉል አብራሃም፣ አምግርዘካህ ታምነምህ ተን ኢሚነት ጽድቀ የከህ አካህ ሎይማ ማራህ ኡምቢህ አባ ኪኒ፡፡ 12. ታማም ባሊህ አብራሃም ትምግርዘሚህ አባ ኪኒ፣ ትምግርዘሚህ አባ አካህ የከ ምክንያት ይምግርዚን ኢርከህ ጥራህ አከካህ፣ ኡሱክ ያምግርዘምኮ ባሶል ሊይይ ይነ ኢሚነት ይክትልን ኢርከህ ኪኒ ። ኢሚነት ዳዓባል ቶምሖወ ታስፋ 13. አብራሃም ኢሲ ሐረግሊህ (ዘርእሊህ) ዓለም ያውርሶ ኪናማህ መዔፉጊ ታሰፋ አካህ ዮሖወ፣ ታይ ታሰፋ ገይምተም አብራሃም ሕገ ይፍጽመርከህ አከካህ የመነርከህከ ካ ኢሚነት ጽድቀ የከህ አካህ ሎይመርከህ ኪኒ፡፡ 14. ታስፋህ ታውሪሰም ሕገ ታፍጽመ ሒያው የክኒምኮማ ኢምነት ሊሞ አለ ማለ፣ ታስፋ ለ ካንቶ ኪኒ፡፡ 15. ሕጊ ባሃም መዔፉጊህ ቁጡዓ ኪኒ፣ ሕጊ አኔዋየምኮ ለ ሕገ ቲላየኒሚህ በደል ሚያኔ፡፡ 16. ታስፋ ትምሥርተም ኢምነት አሞል ኪይይ ቲነ፣ አማይጉል አብራሃም ዳሪ ኡምቢህ ታይ ታስፋህ ጸጋ ያውርሲን፣ ታሃም ለ ማለት ሕገህ ያጽድቅኒም ዲቦህ አከካህ አብራሃም ባሊህ ኢምነቲህ ትጽድቀም ታነ፣ አይሚህ ለ አብራሃም ኢሚነት ባርካታህ ኡማንቲህ አባ ኪኒ፡፡ 17. ታሃም አካህ ተከም ማንጎ ሒያውህ አባ ኩአቦ ኪዮ የዸሕህ ይምጽሕፈሚህ ሪሚዲህ ኪኒ፡፡ አማይጉል አብራሃም የመነርከህ፣ ራብተም ኡጉሳቲያከ አኔዋይ ይነቲ ማሮ አባ አምላኪህ ነፊል አኔዋቲ ያናዎ አባ ኢንኪ አምላኪህ ነፊል ታስፋ ትጽኒዔቲያ ኪኒ፡፡አብራሃም ኢምነቲህ ምሳለ 18. አብራሃም የመነምከ ተሰፋ አበም ኢንኪ ታሰፋ አለዋይ ይነ ዋክተ ኪኒ፣ አማይጉል "ኩዳሪ ታህዻ ፋናህ አመንገለ"የህ ይምጽሕፈሚህ መሠረቲህ ማንጎ ሒያውህ አባ የከ፡፡ 19. ዕደመህ ቦል ኢግዲያ ታከም ኪይይ ይነጉል ኃዶይታ ኃዋሊህ ምክንያታል ዻሎ ማዽዓምከ፣ ሣራ ገድመከ ተምዔለ ቲያ ኪናም ኢዻህ ዻልቶ ማዽዕታም የዸገሚህ፣ ኢሲ ኢምነቲህ ሩኩቲያ ማኪና፡፡ 20. ኢሲ ኢምነቲህ ኃይላለቲያ የከህ መዔፉጎህ ክበረ ዮሖወካህ መዔፉጊ አካህ ዮሖወ ታሰፋህ ኢንኪጉል ማምጣራጣሪና፡፡ 21. አይሚህ ለ መዔፉጊ ዮሖወ ታሰፋ ያፊጽመ ቲያ ኪናም የዸገጉል ኪኒ፡፡ 22. አማይጉል አብራሃምማ ካ ኢምነት ጽድቀ የከህ አካህ ሎይመም ታሃማህ ኪኒ፡፡ 23. ያከካህ"ጽድቀ የከህ አካህ ሎይመ"ያዽኄ ቃል ይምፍጽመም አብራሃማህ ጥራሕ አከካህ፡፡ 24. ኖያ ለ ኤድ ኦሰህ ኪኒ፣ ንማዳራ ኢየሱስ ራባኮ ኡጉሠ አምላክ ናምነጉል ኖያህ ለ፣ ኒኢምነት ጽድቀ የከህ ኖህ ሎይማ፡፡ 25. ታይ ኢየሱስ ለ ኒኃጢአቲህ ዳዓባል ራባህ ቲላየህ ዮምሖወቲያከ ኖያ ለ ያይጻዳቆ ራባኮ ኡጉተቲያ ኪኒ፡፡ማዕራፋ 5ኢምነቲህ ገይማ ሳላምከ ዋጋረ /ዕርቀ/ 1. አማይጉል ናኑ ጽድቀ ገይነም ኢምነቲህ ኪኒጉል፣ ኒማዳራ ኢየሱስ ክርስቶሱህ መዔፉጎሊህ ሳላም ሊኖ፡፡ 2 .ታይ ካዶ ኒጽንዔህ ኤድገይማና ጸጋድ ኢምነቲህ ኤድሳይነም ካያህ ኪኖ፣ ታስፋህ መዔፉጊህ ክብረ ታምከፈለም ኪኖም ኢዻህ ኒያታከ ሚኪሐ ሊኖ፡፡ 3. ታሃማህ ጥራህ አከካህ ኒኒ ሔልዋህ ለ ኒያትና፣ ናምኪሔ፣ ማለት ሔልዋይኮ ትዕግሥቲ ገይምታም ናዺገ፡፡ 4. ትዕግሥትኮ አምጻናናዕ፣ አምጻናናዕኮ ለ ታሰፋ ገይምታ፡፡ 5. ኖህ ዮምሖወ መንፈስ ቁዱስ አራሓህ መዔፉጊህ ካሓኒ ናፍዓዶድ የመገም ኢዻህ ታስፋ ማሖላሳ፡፡ 6. ገና ሩኩታም ነከህ ናነሃኒህ፣ መዔፉጊ ይውሲነ ዋክተ ክርስቶስ ኒኃጢአቲህ ኢዻህ ራበ፡፡ 7. ጻድቅ ኢዻህ የከህ ራባ ሒያውቶ ገያናም ጋዳህ ጸገም ኪኒ፡፡ ያከካህ መዔ ሒያውቲህ ኢዻህ የከህ ራባቲ ምናልባቲ ገይማህ ያከ፡፡ 8 ያኮይ ኢካህ ናኑ ኃጢአተይናታት ነከህ ናነሃኒህ ክርስቶስ ኒዻህ የከህ ራበ፣ ታሃም ለ ፉጊ ኖያህ ለ ካሓኒ አይዻ ናባቲያ ኪናም ያይርድኤ፡፡ 9. አማይጉል ኒጽድቀም ኢየሱስ ክርስቶስህ ቢሎህ የከምኮ፣ ናቢህ ለ መዔፉጊህ ቁጡዓኮ ናድኅነም ካአራሓህ ኪኒ፡፡ 10. አይሚህ ለ ናኑ መዔፉጊህ ናዓብቶሊት ነከህ ናነሃኒል ባዽ ራባህ መዔፉጎሊህ ዋጋርነ፣ ካዶ ፉጎሊህ ዋጋርነምኮ ላካል ያነ ባዽህ ምክንያታህ ያይሰ ዒለህ አድኅነሊኖ፡፡ 11. ታሃም ቡሳ አከካህ ዋጋረ አካህ ገይነ ኒማደራ ኢየሱስ ክርስቶስህ ምክንያታል መዔፉጎህ ናምኪሔ፡፡ራቢ አዳምኮ፥ ሂወት ክርስቶሱህ 12 ኢንኪ ሒያውቲህ ምክንያታል ኃጢአት ዓለምል ሳየ፣ ኃጢአት ሳባታል ራቢ የመተ፣ ታሃም ሒያው ኡምቢህ ኃጢአት አብተጉል ራቢ ሒያው አሞል የመተ፡ 13. አይሚህ ለ ሙሴ ሕጊ ያምሐወምኮ ባሶል ኃጢአት ዓለምል ይነ፣ ያኮይ ኢካህ ሕጊ ኤድ አኔዋርከድ፣ ኃጢአት ኢሰህ ኃጢአታድ ማሎይማ፡፡ 14. ያኮይ ኢካህ አዳም ባሊህ ሕጊ ቲላይመጉል ኃጢአት ሢራሔ ዋይተሚህ አሞል ኡካ ራዔካህ፣ ራቢ አዳምኮ ኤዸዺሰህ ሙሴ ፋናህ ኡማን ሒያውቲ አሞል ሢልጣን ገየ። ታይ አዳም ባሶል ያሚተ ክርስቶስ ምሳለ ኪይይ ይነ፡፡ 15. ያኮይ ኢካህ መዔፉጊህ ጸጋ ሒያው ኃጢአትኮ በይታ፣ ኢንኪ ሒያውቲህ ኃጢአቲህ ምክንያታል ማንጎ ማሪ ራበምባሊ፣ ታማም ባሊህ መዔፉጊህ ጸጋህከ ኢንኪ ኢየሱስ ክርስቶስህ ባርካታህ ገይመ ሕንዳህ ማንጎ ማራህ ያይሰ ዒለህ ዮምሖወ፡፡ 16. ታማም ባሊህ ለ መዔፉጊህ ጸጋህ ፍረ ሒያውቲ ኃጢአት ፍረኮ ታይሰ፣ ኢንኪ ኃጢአቲህ ምክንያታል ዮምሖወ ፍርዲ ቅጽዓት ባሄ፣ ማንጎ ኃጢአቲህ ምክንያታል ቶምሖወ ጸጋ ጽድቀ ባህተ፡፡ 17. ኢንኪ ሒያውቲ ኃጢአቲህ ሳባባል ራቢ ሒያው አሞል ሢልጣን ገየ፣ ኢንኪ ኢየሱስ ክርስቶስህ አራሓህ መዔፉጎህ ማንጎ ጸጋ ጋራየኒህ ትጽድቀም ሙሉኡክ፣ ሱባህ ሂወቲህ ማራን፡፡ 18. አማይጉል ኢንኪ አዳም ኃጢአት ቅጽዓት ፊርደ ሒያው ኡምቢሂያህ አሞል ባሄምባሊህ፣ ታማምባሊህ ኢንኪ ክርስቶስ ጽድቂ ሢራሓህ ማንጎማራ ቅጽዓትኮ ናፃ አበህ ሂወት ያሓየ፡፡ 19. አዳም አምኢዚዘ ዋየርከህ ምንያታል ማንጎ ማሪ ኃጢአተይናታት የኪኒምባሊህ፣ ታማምባሊህ ክርስቶስ አማዛዘህ ምክንያታህ ማንጎ ማሪ አጽድቀ ሎን፡፡ 20. ኃጢአት ያማንጎ ዒሎህ ሕጊ የመተ፣ ያከካህ ኃጢአት የመንገሚህ መጠኒል መዔፉጊህ ጸጋ ታይሰ ዒለህ ተመንገ፡፡ 21. ታሃም ተከም ራቢ ሳባታል ኃጢአት ይንጊሠም ባሊህ ኡምቢህ፣ ታማም ባሊህ ፉጊ ጸጋህ ኢየሱስ ክርሰቶስህ ኡላህ ገይማ ኡማንጉሊ ሂወቲህ ጽድቀ አሐይክ ያንግሠ።ማዕራፋ 6 ኃጢአትኮ ባዽስምተህ ክርስቶህ ማራናም 1. አማይጉል አይም ና? መዔፉጊህ ጸጋ ታማጎ ኃጢአታድ ኒጽንዔህ ማርኖ? 2. ማለ! ናኑ ራባህ ባዽስማናም ባሊህ ኃጢአትኮ ባዽስምተም ነከህ ናነሃኒህ አይናህ ነህ ኃጢአታድ ኒጽንዔህ ማራክ ናነ! 3. ኢየሱስ ክርስቶስልህ ኢንከቶ ናኮ ትምጥምቀምክ ኡምቢህ፣ ካራቢህ ተሳተፍቲ ናኮ ንምጥምቀም ማታዽግኒ? 4. ጥምቀቲህ ካሊህ ኑሙዑገ ዋክተ ካራባ ሓድሊታም ነከ፣ አማይጉል ክርስቶስ አባ ክብረህ ራባኮ ኡጉተርከህ፣ ናኑ ለ ዑሱብ ሂወቲህ ማራክ ናነ፡፡ 5. ራባህ ካያህ ንምጊደህ ነምሔበበረምኮ፣ ኡግታቶል ለ ካያህ ናምጊደም ትምዽገም ኪኒ፡፡ 6. ኃጢአተይና ኒሰውነት ነይገዔዽህ ኃጢአት ባሪያ ኪኖም ኖህ ራዕቶ፣ የመዔለ ኒሰውነት ታካሪመም አዽግክ ናነ፡፡ 7. አይሚህ ራበ ሒያውቲ ኃጢአታህ ያምግዚኢኒምኮ ናፃ ኪኒ፡፡ 8. አማይጉል ክርስቶስሊህ ራብነምኮ፣ ካሊህ ሂወቲህ ማርናም ናሚነ፡፡ 9. ክርስቶስ ራባኮ ኡጉተርከህ ባርካታህ ምክንያታህ ማላሚህ ማራባምከ ራቢ ለ ካአሞል ሢልጣን ማለም ናዺገ፡፡ 10. ኡሱክ ራበ ዋከተ፥ ኃጢአት ካአሞል ሢልጣን ያለምኮ ጋባዕሲሰ ዋታ አጋባቢራህ ኢንኪጉል ራበ፣ ካዶሊህ ለ ሂወቲህ ማራህ መዔፉጎህ ማራ፡፡ 11. አማይጉል ሲን አሞል ለ ኃጢአት ሢልጣን ማለምከ ኢየሱስ ክርስቶስህ አራሓህ መዔፉጊህ ሂወቲል ማርታናም ኢሕሲባ። 12. አማይጉል፣ ኃጢአታህ ራበ ሲን ሰውነቲህ አሞል ሢልጣን ያሎከ ኃዶይታ ካሓኖህ ታምግዚኤም ሲናቦ አካህ ማይፋቃድና፡፡ 13. ታማም ባሊህ፣ ሲኒ ሰውነቲህ ክፍልት ዓማጺ መሣረዒያ አብተኒህ ኃጢአታህ ማምጋዛእና፣ ያኮይ ኢካህ ራባኮ አካህ ኡጉተኒካህ ሲናሞ መዔፉጎህ ካብኢሳ፣ ሲን ሰውነቲህ ክፍሊት ሙሉኡድ ጽድቂ መሣረዒያ አባይ መዔፉጎህ ኢስግዚአ፡፡ 14. አይሚህ ካዶ አቲን ኤድ ማርታናም ጸጋ ዳባል ኪኒ ኢካህ ሕጊኮ ዳባል ማኪትንጉል ኃጢአት ሲን ያግዛኦ ማዽዓ፡፡ ጽድቂ አገልግለቲ ያኪኒም 15. አማይጉል አይም ና? ሕገኮ ዳባል ኪኖም ራዕተህ ጸጋ ዳባል ኪኖጉል ኃጢአት ሢራሕኖይ ማለት ኪኒ? ኢንኪጉል ማኪ! 16. ኢንኪ ሒያውቶ ታስግልጊለም ተኪኒህ ታምአዛዞና ሲኒ ዸግኃ ካብ ሳንጉል፥ ቶይ አካህ ታምኢዚዚን ሒያውቲህ አገልገልቲ ኪቲኒም አዽጊክ ታኒን፣ ታማም ባሊህ ኃጢአታህ ታምኢዚዚንጉል፣ ራባ ሲናል ባሃ ኃጢአት ታስግልግለም አኪክ ታኒን፣ መዔፉጎህ ታምኢዚዚንጉል ለ ጽድቀ ገያክ ታኒን፡፡ 17. አቲን ቶኮሚኒህ ኃጢአት ባሪያ ክይክ ቲኒን፣ ካዶ ለ ጋራይተን ትምሂርቲህ አፍዓዶኮ አካህ ትምኢዚዚን ኢርከህ መዔፉጎህ ምስጋና ለም ታኮይ። 18. ኃጢአት ባርነትኮ ናፃ ተውዒኒህ ጽድቂ አገልገልቲ ተኪን፡፡ 19. አኑ ሒያዋህ ኤዳ አፋህ ዋንሲታም ተን አተሐሳስባህ ሩክታኮ ኡጉተሚህ ኪኒ፡፡ ቶኮሚኒህ ሲኒ ሰውነቲህ ክፍሊት ርኩሰቲያከ ዓማፂ አገልገልቲ አብተኒህ ካብ ኢሰኒም ባሊህ ኡምቢህ፣ ታማም ባሊህ ካዶ ሲን ሰውነቲህ ክፍሊት ያምቃዳሶና ጽድቂ አገልገልቲ አባይ ካብ ኢሳ፡፡ 20. ኃጢአት ባሪያ ክይክ ቲኒን ዋክተ ጽድቂ ጊዳድ ሲናድ አማቢይ ማና፡፡ 21. ይቦል ታማይ ዋክተ አይሚህ ፋይዳ ገይተኒ? ካዶ ሲን ማይሲሳ ጉዳይ ኮፈር ኢንኪ ፋይዳ ማገይኒቲን፣ ታይ ጉዳይህ ባክቶ ራባ ኪኒ፡፡ 22. ካዶ ለ ኃጢአት ባርነትኮ ናፃ ተውዒኒህ ፉጊ አገልገልቲ ተክንሚህ ቅድስና ገያክ ታኒን፣ ቅድሳና ባክቶ ኡማንጉሊህ ሂወት ገያናም ኪኒ፡፡ 23. አይሚህ ኃጢአትኮ ገይምታ ሊሞ ራባ ኪኒ፣ መዔፈጎኮ ገይማ ጎሮን ለ ማደራ ኢየሱስ ክርስቶስህ ባርካታህ ገይማ ኡማንጉሊት ሂወት ኪኒ፡፡ማዕራፋ 7 ሙሴ ሕገኮ ናፃ ያኪኒም 1.'ይሳዖሎ! ኡምቢክ ለ ሕገ ታዽግንጉል፣ ሕጊ ሒያው አሞል ሢልጣን ለም ሒያው ሂወቲህ ታነም ፋናህ ጥራህ ኪናም ታዽጊን፡፡ 2. ምሳለህ ኦርቢሰ ኑማ ባዕሊ ሂወቲህ ያነም ፋናህ ሕገህ ቱምዹወቲያ ኪኒ፣ ባዕሊ ራበምኮ ለ አካህ ቱምዹወህ ቲነ ሕገኮ ናፃ ኪኒ፡፡ 3. አማይጉል ባዕሊ ሂወቲህ ያነሃኒህ አኪ ባዻሊህ ኃዶይታ ጊብረህ ቲታ ገያንጉል አመንዛሪት አክያን፡፡ ባዕሊ ራበምኮ ለ ካሊህ ኤድ ቱምዹህ ቲነ ሕገኮ ናፃ ታውዔ፣ አኪ ባዻ ሕገህ ኦርብሰምኮ ለ አመንዝራ ማኪ፡፡ 4. ይሳዖሎ! ሲን ኩነታት ታህ ኪኒ፣ አቲን ክርስቶስ አካሊህ ክፍለ ኪቲንጉል ራባህ ባዽስማናም ባሊህ ሙሴ ሕገኮ ባዽስመተን፡፡ አማይጉል መዔፉጊህ አገልግሎቱህ ፍረ ናይፋራዎ ራባኮ ኡጉተ ክርስቶስ ወገን ነከ፡፡ 5. አይሚህ ኃዶይታ ፍቃዳህ ጋሓንጋሓክ ኒነ ዋክተ ሕጊ ኡጉጉሰ ኡማ ትምኒት ራባ ናይፋራዎ ኒሰውነቲህ ክፍለድ ሢራሓይ ይነ፡፡ 6. ካዶ ለ ኒዩዹወህ ይነ ሕገኮ ራባህ ባዽስማናም ኢዻህ ባዽስምነህ፣ ሕጊ ማዹዋኮ ናፃ ነውዔ፡፡ አማይጉል ካምቦኮ ሣረቱላል ናስግልግለም ዑሱብ መንፈሳዊ መምረሒ ኪኒ ኢካህ ባሶህ ይምጽፈ የምዔለ ሕጊህ መምረሒህ ማኪ።ሕገከ ኃጢአት 7. አማይጉል አይም አይክ ናነ? ሕጊ ኢሰህ ኃጢአት ኪኒ? ማለ! ያኮይ ኢካህ ኃጢአት አይምቶ ኪናም ናዻጎ ናበቲ ሕገ ኪኒ፡፡ አይሚህ ሕጊ"ማታማናይን"ኢየዋዶ ትምኒት አይም ኪናም አምዺገ ማዻዺኒዮ፡፡ 8. ኃጢአት ጉርታዪ ኡምቢህ ያዳድ ያምቃሳቃሶ አበቲ ሕገኮ ያምተ ትኢዛዝ አጋጣሚህ ገየጉል ኪኒ፣ ሕጊ አኔዋየምኮ ለ ኃጢአት ጉዳይ ራበቲያ ኪኒ፡፡ 9. ሕጊ ይ'ሂወቲህ አሞል ገና ሢልጣን አለዋይ ይነ ዋክቲ ዪነ፡፡ ሕጊ ትኢዛዝ ኤድ ገየጉል ለ ኃጢአት ሂወት ገየ፡፡ 10. አኑ ለ ራበ፣ ሂወቲህ ዮምሖወ ሕጊ ትኢዛዝ ያሞል ራባ ባሄ፡፡ 11. አይሚህ ለ ኃጢአት ሕጊ ትኢዛዝ ሳባብ አበህ ይየተለለ፣ ትኢዛዝ አራሓህ ይይግድፈ፡፡ 12 .አማይጉል ሕጊ ቁዱስ ኪኒ፣ ትኢዛዝ ለ ቁዱስከ ሓቂ መዔቲያ ኪኒ፡፡ 13. ይቦል ታይ መዔቲያ የከ ጉዳይ ዮያል ራባ ባሄ ማለት ኪኒ? ማለ! ራባ ዮልባሄቲ ኃጢአት ኪኒ፡፡ ኃጢአት አይምቶ ኪናም ያማዻጎ፣ መዔም አኪናን ጉዳይ ይይምክኒየህ፣ ያሞል ራባ ዮክባሄ፡፡ አማይጉል ኃጢአት ኡምነ ታመዽገም ሕጊ ትኢዛዛቲህ ምክንያታል ኪኒ፡፡ሒያው ሂወቲህ አዻል ታነ ዱፍላ 14. አማይጉል ሕጊ መንፈሳዊ ኪናም ናዽገ፣ አኑ ለ ኃጢአት ባሪያ አኮ ትምቢሔ ኃዶይታ ኪዮ፡፡ 15. አኑ አባም ማዺገ፣ አይሚህ ኪኅኒዮ ጉዳይ አባናም ሓባህ፣ ኒዒቢዮ ጉዳይ አባክ አኒዮ፡፡ 16. አማይጉል አኑ አባም አቦ ጉረዋ ጉዳይ አባም ኤከምኮ፣ ሕጊ መዔቲያ ኪናም ዓዶሳ፡፡ 17. አማይጉል አቦ ጉረዋ ጉዳይ አባም፣ ያዳድ ያነ ኃጢአት ኪኒካ ዮያ ማኪ፡፡ 18. ያዳድ ወይ ይ'ኃዶይታህ ባህሪ ኢንኪ መዔ ጉዳይ ማለም አዽገ፣ አይሚህ ለ ኢንኪጉል ኡካ መዔ ጉዳይ አባናሚህ ዲላይ ኤለሚህ ቶይ መዔ ጉዳይ አባናሚህ ዽዕ ማሊዮ፡፡ 19. አቦ ጉራ መዔ ጉዳይ ማባ፣ ያከካህ ጉረዋ ኡማ ጉዳይ አባክ አኒዮ፡፡ 20. ታጉል አቦ ጉረዋ ኡማ ጉዳይ አባም ኤይከምኮ፣ ታይ አባም፣ ያዳድ ያነ ኃጢአት ኪኒካ ዮያ ማኪ ማለት ኪኒ፡፡ 21. አማይጉል መሠረታዊ ሓሳብ ሢራሕ አሞል ኪናም አብሊክ አኒዮ፣ አይሚህ መዔ ጉዳይ አቦ ጉራህ፣ ኡማ ጉዳይ አቦ አምግድድክ አኒዮ። 22. ያዳህ ይ ሰውነት መዔፉጊህ ሕገህ ኒያታ፡፡ 23. ያኮይ ኢካህ ያእሞሮህ ሕገኮ ተጻይ አኪክ ይሰውነቲህ ክፍሊህ አዳድ ሢራሓ ኃጢአት ሕገህ ዩምዹወቲያ ያባ አኪ ሕጊ ይሰውነቲህ ክፍሊህ አዳድ ያነም አብልክ አነ፡፡ 24. አኑ አይዻ ዮምቦሎሶወህ ይምንሚነህ ሒያወቶ ኪዮ! ራቡላል ይበያ ታይ ሰውነትኮ ኢይ ይያድኅነ ለ? 25. ማደራ ኢየሱስ ክርስቶሱህ መዔፉጎህ ምስጋና ታኮይ፡፡ አማይጉል አኑ ኢኒ አእሚሮህ መዔፉጊህ ሕገህ ያምግዚኤቲያ ኪይህ፣ ኢኒ ኃዶይታህ ባህሪህ፣ ኃጢአታህ ይምግዚኤቲያ ኤከህ አኒዮ፡፡ማዕራፋ 8ሂወት መንፈስ ቁዱሱህ 1. አማይጉል ኢየሱስ ክርስቶስልህ ኅብረት ለም ካዶ ኩነኔ ማሎን፡፡ 2. አይሚህ ኢየሱስ ክርስቶሱህ ሂወት ያሓየ መንፈስ ቁዱስ ሕጊ ኃጢአትከ ራቢ ሕገኮ ናፃ ይ'የየዔ፡፡ 3. ሒያውቲ ባህሪህ ኃዋልኮ ኡጉተሚህ ሕጊ አቦ ዺዔዋየም መዔፉጊ አባ፣ ፉጊ ኢሲ ባዻ ኃጢአተይና ተከ ኃዶይታህ ምሳለህ ፋረ፣ ኃጢአታህ መሥዋዕት አበዋየሚህ ታይ ባዽ ኃዶይታህ ሒያው ኃጢአት ፊርደ የይለየ፡፡ 4. ታሃሞም ለ አበም ኃዶይታ ፍቃዳህ አከካህ መንፈስ ፍቃዱሱህ ጋኃንጋኅና ኖያድ ሕጊ ትኢዛዝ ያምፋጻሞ ኪኒ፡፡ 5. ኃዶይታ ፍቃዳህ ማርታም ኃዶይታ ጉዳህ፣ መንፈስ ፍቃዳህ ማርታም ለ መንፈሳዊ ጉዳይ ያሕስቢን፡፡ 6. ኃዶይታ ጉዳይ ያሕስቢኒም ራባ ባህታ፣ መንፈሳዊ ጉዳህ ያሕስቢኒም ለ ሂወትከ ሳላም ባህታ። 7. አይሚህ ኃዶይታ ጉዳይ ያሕስበ ሒያውቲ ፉጊ ሕገህ ምያምኢዝዘጉልከ ያምአዛዞ ማዺዓጉል መዔፉጊህ ናዓብቶሊ ያከ፡፡ 8. ኃዶይታ ጉዳህ ያምግዚኤ ማሪ ፉጎ ኒያቲሶና ማዺዓን፡፡ 9. አቲን ለ መዔፉጊህ መንፈስ ሲን አዳድ ይኔምኮ መንፈስ ዲላህ ኢካህ ኃዶይታ ፍቃዳህ ማማርታን፣ ክርስቶስ መንፈስ አለዋ ሒያውቲ ክርስቶስ ወገን ማኪ፡፡ 10. ክርስቶስ ሲን አዳድ የከምኮ ኢንኪጉል ኡካ ሲን ኃዶይታ ኃጢአት ምክኒያታል ራቦንታ ተከሚህ መዔፉጊ ሲን ያይጽድቀም ኢዻህ ሲን መንፈስ ያነቲያ ኪኒ፡፡ 11. ኢየሱስ ራባኮ ኡጉሠ መዔፉጊህ መንፈስ ሲን አዳድ ይኔምኮ፣ ኢየሱስ ክርስቶስ ራባኮ ኡጉሠ አምላክ ሲን አዳድ ማራ መንፈስህ አራሓህ ራቦንታ ኪን ሲን ኃዶይታህ ሂወት ሲናህ ያሓየ፡፡ 12. አማይጉል ኢኒ ሳዖሎ! ኒኒ ሂወቲህ ግዳድ ሊኖ፣ ያኮይ ኢካህ ታይ ጊዳድ ኃዶይታ ፍቃዳህ ማራናም ማኪ፡፡ 13. ኃዶይታ ፍቃዳህ ማርተኒምኮ ራበልቲን፣ ያከካህ መንፈስ ድጋፋህ፣ ኃዶይታ ሢራሕ ትግድፊኒምኮ ሂወቲህ ማረሊቲን፡፡14 .መዔፉጊህ መንፈስህ ታምሪሔም ኡምቢህ ፉጊ ዻይሎ ኪኖን፡፡ 15. አማይጉል"አባ አባ”ተኒህ ደዕታን ዒንዻነይቲ መንፈስ ጋራይተን ኢካህ ባርነት መንፈሲህ ማጋራይንቲን፡፡ 16. መዔፉጊህ መንፈስ ኒመንፈስሊህ የከህ ፉጊ ዻይሎ ኪኖም ያምስክረ። 17. አማይጉል መዔፉጊህ ዻይሎ ነከምኮ፣ ካወረስቲ ኪኖ፣ ክርስቶስሊህ አውርሰሊኖ፣ ካዶ ክርስቶስ መከራ ሓድሊታም ነከምኮ ሣራህ ካ ክብረ ሓድሊታም አከሊኖ ፡፡ ያሚተ ክብረ 18. ካዲ ዋክቲህ መከራ ባሶቱላል ኖያህ ይምግልጸ ክብረሊህ ያይመዘዘኒንጉል ኢንኪምሊህ ታምታካካሎ ማዽዓማም አበህ ሎወሊዮ፡፡19. ፍጥረት ሙሉኡድ መዔፉጊህ ዻይሎህ አምባላይ ናባ ሳናህ ኢላላን፡፡ 20. ፍጡር ኡምቢህ ሊሞ ማሊ ያኮ ኤልይምፍርደ፣ ታሃም ለ ኢሲ ዸግኃህ ፍቃዳህ አከካህ ፉጊ ፍቃዳህ ኪኒ፣ ያኮይ ኢካህ ታይ ታስፋ ታነ፣ 21. ታስፋ ለ ትምፊጢረም ሲኒ ተፈጥሮህ ሊዪ ባርነትኮ ናፃ ተውዒኒህ መዔፉጊህ ዻይሎሊህ ናፃነትከ ክብረ ሓድሊታም ያክኒም ኪኒ፡፡ 22. ፍጥረት ኡምቢህ ካፋ ፋናህ ኡላሎ ጽንቀህ ትምዽብዸህ ጽንቂ አሞል አምጽንቅክ ታነም ናዽገ፡፡ 23. ያኮይ ኢካህ ጽንቀክ አሞል ታነም ፍጥረት ዲቦህ ማኪ፣ ኤዸዾይታ ገጸበረከት መንፈስ ቁዱሱህ ጋራይተሚክ ናኑ ለ፣ መዔፉጊህ ዻይሎ ናኮከ ኡማን አፋህ ናፃ ናኮ ታስፋህ ኢላላክ አዳ ኒሰውነቲህ ሢቃይህ አሞል ገይማክ ናነ፡፡ 24. አይሚህ ናኑ ኒድኅነም ታይ ታስፋህ ኪኖ፡፡ ያከካህ ታስፋ ኤድአብና ጉዳይ ያምቡሉወቲያ የከምኮ ታሰፋ ታከም ራዕታ፣ ታምቡሉወሚድ ኢማ አይቲ ታስፋ ኤድአባ? 25. አብለዋና ጉዳአድ ታስፋ አብናጉል ለ ትዕግሥቲህ ኢላልና፡፡ 26. ታማም ባሊህ አይናህ ነህ ጻሎት አብናም ማናዽገጉል መንፈስ ቁዱስ ኒ ሐዋሊህ ዋክተ ኒጎሮኒሳ፣ ቃላህ ያምጋላጾ ዽዕመዋ ጻዕረህ ኒዳዓባል ጻሎት አባ፡፡ 27. ሒያው አፍዓዶ ያምርሚረ አምላክ መንፈስ ቁዱስ ሓሳብ አይምቶ ኪናም ያዺገ፣ አይሚህ መንፈስ ቁዱስ ቁዱሳን ዳዓባል ጻሎት አባም ፉጊ ፍቃዳህ ኪኒ፡፡ 28. መዔፉጎ ኪሕናምከ ካፍቃድ ባሊህ ደዕምምተ ሒያው፣ መዔፉጊ ኡማን ጉዳይ ተን ጥቅመህ አካህ አባም ናዽገ፡፡ 29. አይሚህ ለ መዔፉጊህ ባዽ ማንጎ ሳዖልትቲ ፋናድ ሪይስ ያኮ፣ መዔፉጊ ዮኮመህ ዶረ ባዽህ ቢሶህ ያማጋዶና ይውስነጉል ኪኒ፣ 30. ዮኮመህ ይውስነም ደዔ፣ ደዔም ተን ይጽድቀ፣ ይጽድቀም ይስክቢረ፡፡መዔፉጊህ ካሓኖ 31. አማይጉል ታይ ጉዳክ አይም አይክ ናነ? መዔፉጊ ኖሊህ የከምኮ ኢይ ኒያምቃዋሞ ዲዓ? 32. ፉጊ ኢንኪ ኢሲ ባዻህ አካህ ናኅሩረካህ ኖያህ ቲላሰህ ዮሖወምኮ፣ ባዻሊህ ኡማን ጉዳይ ኖህ ያምሓወም ርግጸይናታት ኪኖ፡፡ መዔፉጊ ዶረም ኢንከቲ ያክሳሶ ማዽዓ፣ አይሚህ ተን ይጽድቀቲ ካያ ኪኒ፡፡ 34. ኤል ያፍራዶ ዺዓቲ አይቲያ ኪኒ? ኢየሱስ ክርስቶስ ኤልያፍሪደ? ኢየሱስ ኤልምያፍሪደ፣ አይሚህ ኡሱክ ኖያህ ራበህ፣ ራባኮ ኡጉተህ መዔፉጊ አባህ ሚድጋል ድፈየ፣ ኒዳዓባል ለ ኖያህ ዻዒማቲያ ኪኒ፡፡ 35. አማይጉል ክርስቶስ ካሓኖኮ ኒባዺሶ ዺዓቲ ኢንከቲ ሚያነ፣ ጸገም ያኮይ መከራ፣ ስደት ያኮይ ራሃብ፣ ዓራድ ያኮይ ድንገት፣ ሰይፍ ያኮይ፣ ክርስቶስ ካሓኖኮ ኒባዺሶ ማዽዓ፡፡ 36. ታሃም፤ "ኩ ካሓኒህ ዳዓባል ኢሲሲ ለለዕ ራባክ ናነ፣ ታምሩሑደ ዒዶ ባሊህ ኒጊሪዔ" የዽሔህ ይምጽሕፈም ባሊህ ኪኒ፡፡ 37. አማይጉል ኒይክኅነ ክርስቶሱህ፣ ታይ ጉዳያታህ ኡምቢክ ሱባህ ሱብነምኮ ሱብተምኮ አይሰሊኖ፡፡ 38. አማይጉል ራባ ያኮይ፣ ሂወት ያኮይ፣ መላእክት ያኮይ፣ ሢልጣን ባዕል ያኮይ፣ ካዶ ታነም ያኮይ፣ ላካል ታምተም ያኮይ፣ ዓራንቲ ኃይሊት ያኮይ፡፡39. ናውታም ያኮይ፣ ላተም አኪናን ፍጥረት የከሚህ፣ ማደሪ ኢየሱስ ክርስቶስኮ ኖህ ዩምቡሉወ ፉጊ ካሓኖኮ ኒባዽሶ ዺዓቲ ኢንኪ ጉዳይ ምያነም ዓዶም ኪኒ፡፡ ማዕራፋ 9 መዔፉጊ ዶረህ ዪነ እስራኤል ህዝበ 1. ክርስቶስቲያ ኤከም ኢዻህ ሓቀ ዋንስታካህ ማድራቢታ፣ መንፈስ ቅዱሱህ ታምሪኄ ይሂሊና ማድራቢታም ዮህ ታምስኪረ፡፡ 2. ናባ ኃዛንከ ባክተዋ ጽንቂ ያፍዓዶድ ያነ፡፡ 3. ኃዶይታህ ይበተሰብ የኪን ይወገንኮ ክርስቶሱህ ባዽሲመህ መዔፉጊህ አባሮ ይማዳዶ አክኅነ ዻዸ፡፡ 4. እስራኤላውያን ፉጎህ ዶሪምመ ህዝበ ኪኖን፣ መዔፉጊ ተና ኢሲ ዻይሎ ተን አበ፣ ኢሲ ክብረ ተን ይይቡሉወ፣ ቃልኪዳን ኤሊህ ሳየ፣ ሕገ አካህ ዮሖወ፣ ሓቂ አምልኮ ተን ይስቡሉወ፣ ታሰፋ ቃል ለ አካህ ዮሖወ፡፡ 5. ኢሲን ሲኒ ማባኮህ ኢንኪ ነገዲህ አቦብኮ ተመተም ኪኖን፣ ክርስቶስ ኃዶይታህ የመተም ተንኮ ኪኒ፣ ኡሱክ ኡማኒሚህ አሞ ኪንቲያከ የምበረከቲያ ኪኒ፡፡ አመን፡፡ 6. ያኮይ ኢካህ መዔፉጊህ ቃል ይምስዒረ ማለት ማኪ፣ አይሚህ እስራኤል ዻሪ ሙሉኡድ ሓቂ እስራኤላውያን ማኪኖን፡፡ 7. ታማም ባሊህ አብራሃም ዳሪ ሙሉኡክ መዔፉጊህ ዻይሎ ኪኖን ማለት ማኪ፣ አይሚህ መዔፉጊ አብራሃማህ ዳሪ ያውዔም ይስሐቅኮ ኪኒ አክየህ ይነጉል ኪኒ፡፡ 8. አማይጉል ኃዶይታኮ ቶቦከም መዔፉጊህ ዻይሎ ማኪኖን፣ ያከካህ ዳራ የኪኒህ ሎይማናም ታሰፋ ቃላህ ጢራህ ኪኒ፡፡ 9. ታይ ለ መዔፉጊ ዮሖወ ታሰፋ ቃል"ያሚተ ኢጊዳ ታይ ዋክተህ አምተሊዮ፣ ሣራ ለ ባዻ ዻለ ለ ያነም ኪኒ፡፡" 10. ታሃም ዲቦህ አከካህ ርብቃ ነገድ ናባ የከ ይሰሐቅኮ ጋንጋ ሶኒተ ዋክተ፣ 11. መዔፉጊህ ዶሮህ ሢራሓህ አከካህ ደዖህ ኪናም ያይሳዻጎ፣ ኢሪ ላማይ ያቡኪኒምከ ኡማምከ መዔም አባናሚህ ባሶል፣ 12. መዔፉጊ ርብቃክ"ናባቲይ ዒንዻቲያህ ያምገዚኤቲያ አከለ"አክየ፡፡ 13. ታሃማህ"ያዕቆብ ኢክኅነ፣ ኤሳው ለ ኢንዒበ"የህ ይምጽሒፈም ባሊህ ኪኒ፡፡ 14. አማይጉል አይም ና? "ፉጊ ያይዶሎወ ኖዋ ዺዒና? መዔፉጊ ያይዶሎወ ኖዋ ኢንኪጉል ማዽዕና! 15. አይሚህ ለ"ፉጊ ሙሴክ አምሓሮ ጉረምኮ አምሒረሊዮ፣ አካህ ናኅሩሮ ጉራማህ አካህ ናኅሩሮ"ኪዮ የዽሔ፡፡ 16. አማይጉል መዔፉጊህ ዶሮህ ገይምታም ሒያው ፍቃድከ ሒያው ሢራሓህ አከካህ መዔፉጊህ መሕረቲህ ኪኒ፡፡ 17. ታይ ምክኒያታል ፈርዖን ዳዓባል"ኮያል ኢኒ ኃይላ አስባላዎከ ይሚጋዕ ዓለምል ሙሉእ ኢያል ያማዻጎ አቦ ኩ ኢኒጊሠህ አኒዮ ያ ቃላህ ይምጽሕፈ፡፡ 18. አማይጉል መዔፉጊ ጉረቲያ ያምሒረ፣ ጉረቲያ ለ ሂሊከይና አባ፡፡መዔፉጊህ ቁጡዓከ መሕረት 19. አማይጉል"ፉጊ ፍቃድ ያምካላካሎና ዺዒማህ የከምኮ፣ አይሚህ ቡሳ መዔፉጊ ሒያው ኡማ ሢራሓህ ተን ያውቂሰ?"ያቲ ያነዎ ያከ፡፡ 20. አቱ ኮ ሒያወቶ! መዔፉጎሊህ ታምካራካሮ አይመብቲ ሊቶ? ካላ ኑዋይ ሢራሓቲ"አይሚህ ታህ ኢሰህ ይሠራሕተ አክ ዮዋ ዺዓ?"21. ካላ ኑዋይ አባቲ /ሢራሓቲ/፣ ኢንኪ ዓይነቲህ ካላ ጺቃኮ ኢንኪ ኑዋይቶ ክብረህ፣ አንኪ ኑዋይቶ ሑሱሩህ የበሔህ ሢራሖ መብቲ ማለ? 22. ፉጊ ቁጡዓ ያይባላዎከ ኢሲ ኃይላ ለ ያይባላዎ ጉረህ፣ ሊዪህ ተምሶኖዶወ ቁጡዓ ኑዋይኮ ማንጎም አክ ይምዒጊሠ፡፡ 23. ታሃሞም አበም ዮኮመህ ክብረ አካህ ዮይሶኖዶወ መሕረት ኑዋህ ኢሲ ክብሪህ ማንጋ ያይባላዎ ኪኒ፡፡ 24. መሕረት ኑዋይ አይሁድኮ ዲቦህ አከካህ አረማውያንኮ ለ ደዕምምተም ኖያ ኪኒ፡፡ 25. ታሃም ነቢይ ሆሴዕ የም ባሊህ ኪኒ፡- "ይህዝበ አከዋይተንሚህ 'ይህዝበ'! ኤዽሔህ ደዔሊዮ፣ አምኪኂነ ዋ ህዝበክ ለ፣ 'ይምክኂነ' ኤዽሔህ ደዔሊዮ፡፡ 26. ኢሲን 'ይህዝበ ማኪቲን' ለ ኤል አክየን ቦታል ያነ መዔፉጊህ ዻሎ አክ የኒህ ደዕሚመ ሎን፡፡" 27. ኢሳይያስ ለ እስራኤል ዳዓባል ታህ የህ አንዻሕ ናውሰህ ዋንስተ፣"እስራኤል ዻይሎህ ሎይ ባሕሪ ሖፃ ቲዳ የመንንሚህ፣ ተንኮ ታድኅነም ዳጎም ጢራህ ኪኖን፡፡ 28. አይሚህ መዔፉጊ ዓያየካህ ጋባላዔህ ዓለም አሞል ኢሲ ፊርደ ያኃየ"፡፡ 29. አማም ባሊህ ኢሳይያስ"ኃይላለ መዔፉጊ ዳራ ኖህ ራዕሰ ዋዶ፣ ሰዶምከ ጎሞራ ካቶም ተለየም ባሊህ አለየ ዻዽነ" የህ ዮኮመህ ዋንሲተ፡፡ 30. አማይጉል አይም ና? ጽድቀ አኪቲለ ዋይተ አረማውያን ጽድቀ ገየን፣ ታይ ጽድቀ ኢምነትኮ ገይማቲያ ኪኒ፡፡ 31.ያኮይ ኢካህ ሕገኮ ገይማ ጽድቀ አክትሊክ ቲነ እስራኤላውያን ሕገ ያፋጻሞና ታነነጉል ጽድቀ ማማዲኖን፡፡ 32"አይሚህ ጽድቀ ማማዲኖን"ያንጉል፣ ኢሲን ጽድቀ ገዮና ጉረኒም ኢምነቲህ አከካህ ሢራሓህ ኪይይ ነጉል ኪኒ፣ አማይጉል ጎንፎይሳ ዻህ ጎንፎይተን፡፡33. ታሃም፣ "ሀይከ ሒያው ጎንፎይሳ ዻ ጺዮኑል ዲፈሳክ አነ፣ ታይ ዻይ ሒያው ጎንፎይሳክ ዒዳ ዶንጎላ ኪኒ፣ ካያል ያምነቲ ለ ማሖላሲታ"የህ ይመጽሒፈም ባሊህ ኪኒ፡፡ማዕራፋ 10እስራኤላውያን መዔፉጊህ አራሕ ማካታልኖን 1. ይሳዖሎ! ያፍዓዶድ ያነ ናባ ትምንቲህከ መዔፉጎህ ካብ ኢሳ ጻሎት እስራኤላውያን ያድኃኖና ኪኒ፡፡ 2. ትክኪል ኪን ኢዽጋ ማኪጉል ክኒካ ኢሲን መዔፉጊህ መንፈሳው ቅንአት ሎኑሙ አኑ ኢነህ አካህ አምስክርክ አኒዮ፡፡ 3. መዔፉጊህ ሒያው ያይጽድቀ አራሕ አዽገዋየኒም ኢዻህ ሲኒ አሞህ ጽድቂ አራሕ ካታየን ኢካህ ፉጊ ጽድቀ ማካታሊኖን፡፡ 4. ሒያው ኡምቢህ ኢምነቲህ ታጽዳቆ፣ ሙሴ ሕጊ ክርስቶሱህ ይክቲመ። ድኅነት ኡማንቲያህ ኪኒ 5. ሕገ ይክትልኒህ ገይማ ጽድቀ፣ ሙሴ ይጽሕፈህ ሕገ ያፍጺመቲ ኡምቢህ ሂወቲህ ማራ ያናም ኪኒ፡፡ 6. መዔፉጊህ ሒያው ኢምነቲህ ታድጽድቀሚህ ለ ታህ የህ ይምጽሕፈ፣ "ኢሲ አፍዓዶህ ዓራናል ኢይ ያውዔ?" ሚን፣ ታሃም ለ ክርስቶስ ያይዋራዶ የህ ኪኒ፡፡ 7. ወይ ኢሲ አፍዓዶህ"ሲኦሉድ ኢይ ኦባ?" ሚን፣ ታሃም ለ ክርስቶስ ራባኮ ኡጉሦና ኪኒ፡፡ 8. ጋባዔህ ታህ የህ ይምጽሕፈ፣ "ፉጊ ቃል ኩባሮል ኪኒ፣ ኤረ ኩአፍከ ኩአፍዓዶድ ኪኒ፣" "ታይ ቃል ናኑ ናይብሥረ ኢምነት ቃል ኪኒ፡፡ 9. ኢየሱስ ማደራ ኪናም አፋህ ታይምስክረጉልከ"ፉጊ ራባኮ ኡጉሠም ኢሲ አፍዓዶህ ታምነጉል ታድኅነ፡፡" 10. አይሚህ ሒያው ኢሲ አፍዓዶህ ታሚነጉል ታጽድቀ፣ አፋህ ለ ያምስኪሪንጉል ያድኅኒን፡፡ 11. ታሃማህ ካያል ያሚነቲ ኡምቢህ ማሖላስታ፣ የህ ይመጽሕፈም ባሊህ ኪኒ፡፡ 12. አማይጉል ኢንኪ ፉጊ ኡማንቲህ ማዳራ ኪናም ኢዻህ፣ አይሁዳ ያኮይ አራማዊ ፋናድ ኢንኪ ባዽሲ ሚያነ፣ ኡሱክ ለ ጸጋ ባዕላ ኪኒጉል፣ ዻዒምተሚህ ሙሉኡድ በረከት የይመገህ አካህ ያሓየ፡፡ 13. አይሚህ"ማዳሪ ምጋዕ ደዕታም ኡምቢህ ያድኅኒን" ያ፡፡ 14. ያከካህ አሚነካህ አይናህ የኒህ ዻዒሞና ዺዒማ? ካ ዳዓባል አበካህ አይናህ የኒህ ያምንኒ? 15. በሠራታ ቃል ታይብሥረም አበካህ አይናህ የኒህ ያይባሣሮና ዺዓና፣ ታይ መዔ ዋረ ያብሥርቲህ ሙሙት አይዻ ኒያቲሳ! የህ ይምጽሕፈም ባሊህ ኪኒ፡፡ 16. ያከካህ ኢሳይያስ"ኦ'ማዳራ!"ዋንሰ ቃል ኢንከቲ ማጋራይና የህ ዋንስተም ባሊህ ኡምቢህ ለ በሠራታ ቃል ማጋራይኖን፡፡ 17. አማይጉል ኢሚነት ገይማም በሠራታ ቃል ዮብኒምኮ ኪኒ፣ በሠራታ ቃል ክርስቶስ ዳዓባህ ዋኒሳን ትመህርቲ ኪኒ፡፡ 18. ኢስክ ኩኤሠሮ፣ ይቦል ካቃል ማቢኖን ማለት ኪኒ? ማጽሐፋል፣ "ተን አንዻሕ ዓለሚል ሙሉኡድ ዮሞበ፣ ተን ቃል አይከ ባዾ መሔለዲያ ፋናህ" የህ ይምጽሕፈም ሪግጺህ ዮቢን፡፡ 19. ጋባዔህ፣ ኤስራኤላውያን ካቃል ማዻጊኖን ማለት ኪኒ? ታሃም ያናምኮ ኢማ ሙሴ ዮኮመህ፣ "ዻይቲመ ህዝበ አይስኒሰህ ተን አይነሰሔ ሊዮ፣ አስቲውዒለ ዋ ህዝበ ለ ተን አይቁጡዔ ሊዮ" የዽሔ፡፡ 20. ኢሳይያስ ለ፣ "ይጉረ ዋ ማራህ ገይመ፣' መዔፉጊ አል ኪኒ?' የኒህ የሠረዋይተሚህ ኡምቡሉወ"ያናም ይድፍረህ ዋንስተ፡፡ 21. እስራኤላውያን ዳዓባል ለ"አምእዚዘዋ ዓምፀይና ኪን ህዝቢ ዩላል ያመቶና ለለዕ ሙሉኡድ ኢኒ ጋቦብ ፋሕ ኢሰ /እዝርጊሔ/" ያ፡፡ ማዕራፋ 11ፉጊ እስራኤላውያን ኢንኪጉል ማንዓቢና 1. ኢቦል ለ ኮኤሠሮ፣ መዔፉጊ ኢሲ ህዝበ ዒደ? ኢንኪጉል ማዒዲና! አኑኮ ኢነህ እስራኤልታ ኪዮ፣ አብራሃም ዳራኮ የከ ቢኒያም ነገድ /ሐረግ/ ኪዮ፡፡ 2. አማይጉል ፉጊ ዮኮመህ ዶረ ህዝበ ማዒዲና፣ ማጽሓፍ ኤልያስ ዳዓባል አይም የም ማታስትውዒሊኒ? ለል ኤልያስ እስራኤል ህዝቢ መዔፉጊህ ነፊል አይም የህ ይክሲሰም ማታዽጊኒ? 3. ታማይ ዋክተ ኤልያስ"ማደራ! ኩነብያት ይግድፊን፣ ኩመሥዋዕቲህ ቦታ ዮስዖኖውን፣ አኑ ዲቦህ ራዔ፣ ዮያ ለ ያግዳፎና ጉራይ ያኒን"የህ ይነ፡፡ 4. ያኮይ ኢካህ መዔፉጊ አይም የህ ኤልይምሊሰ? ዲራብቲ አምላካህ ባዓላህ አስግደዋየ ማልሕና ሲሕህ ሒያውቲያ ኢነህ ራዕሰህ አኒዮ የዽሔ፡፡ 5. ካዲ ዳባን የከምኮ ጸጋህ ዶሪምመኒህ ራዕተ ዳጉ እስራኤላውያን ያኒን፡፡ 6. ዶሮ ጸጋህ የከምኮ ሢራሓህ ማኪ ማለት ኪኒ፣ ሢራሓህ ያከዶማ ጸጋ ሊሞ ሂንቲያ አከ ዻዸ፡፡ 7. ይቦል ውጤት አይም ያከ? እስራኤላውያን ጉረኒም ማገኖን፣ ዶሪምተም ለ ጉረኒም ገየን፣ ራዕተም ሓቀ ያብሎና ታኒን፡፡ 8. ታሃማህ"መዔፉጊ ተን አፍዓዶ ይድንዚዘ፣ አማይጉል ካፋ ፋናህ ሲኒ ኢንቲህ ሚያብሊን፣ ሲኒ አይቲቲህ ሚያቢን፣ የህ ይምጽሕፈም ባሊህ ኪኒ፡፡ 9. ዳዊት ለ"ተን ማይዲ ያብዸ ማጻወድ፣ ዒዳ ሁጉም የከህ ተን ያይሳቃዎይ፡፡ 10. ተን ኢንቲት ታብለምኮ ዲቶይቶይ፣ ተን ዺዾዽ ጸገሚህ ኡማንጉል ጉዱቶይ" የዽሔ፡፡ 11. ኢስኪ ጋባዔህ ኩኤሠሮ፣ አይሁድ የምሰነከሊኒም ኡማንጉሉህ ያለይኒም ፋናህ ኪኒ? ማለ! አይሁድ በደልህ ምክንያታል አረማውያን ድኅነት ገየን፣ ታሃም ተከም፣ ኢሲን አረማውያናል አይሲኖና አቦና ኪኒ። 12. አይሁድ በደል ዓለሚል ማንጎ በረከት ገይሲሰ፣ ተን ራዲ ለ አረማውያናህ በረከት አካህ የከ፣ አይሁድ ሙሉኡድ ይድኂንኒህ ያከዶማ በረከት አይዻ ማንጎም አከ ዻዽ።አረማውያን ድኅነት 13. ካዶ አማይጉል ዋንስታም ሲናህ አረማውያናህ ኪዮ፣ አረማውያን ሐዋሪያ ኪዮሚህ መጠኒል ኢኒ አገልግሎቱህ ክብሪ ዮድ ያማበ፡፡ 14. ታሃም አበርከህ ይወገን ተከ አይሁድ አይሲኒሶ ኪኒ፣ ታይ አገባቢራህ ምናልባት ተንኮ ጋሮጋሮ አይዳኃኖ አከልዮ፡፡ 15. መዔፉጊ ተና ዒዳ ዋክተ አኪ ዓለሚህ ህዝቢ ፉጎሊህ ዋጋረኒምኮ፣ መዔፉጊ ተን ጋራ ዋከተ አይም ታከም ታካሊን? ታሃም ኢማ ራባኮ ኡጉተኒም ኢዻ ኪኒ! 16. ኢንኪ ዓይነቲህ ሊጥኮ ኤዸዾይታ ክፍሊ ይምቅድሰቲያ የከምኮ፣ ቡኩዕ ሙሉኡድ ይምቅድሰቲያ ኪኒ፣ ታማም ባሊህ ኢንኪ ሓዻክ ሪምድ ይምቅድሰቲያ የከምኮ ሓኮክ አክ ትምቅዲሰም ኪኖን። 17. ዓዳድ /ውሳጠድ/ ታነ ኦላዕቶ ሓዻህ ሓኮኮ ባሊህ ተከ አይሁድ ይግሪዒኒህ ራዳንጉል፣ ጋራብ ኦላዕቶ ሓዻህ ሓኮክ ባሊህ ተከ አረማውያን ተን ቦታድ ይምትክኢኒህ ተን ሀብተከ በረከት ሓድሊታም ያኪን፡፡ 18. አማይጉል አቲን አረማውያን ሓኮክ ባሊህ ቲግሪዔህ ራደ አይሁድ አሞል ማታዕባቲና፣ አይሚህ አቲን ሓኮኮ ጥራህ ኪቲንጉል ሪሚድ ሲን ያይኩዔ ኢካህ አቲን ሪምድ ማታይኩዒንጉል ታማካሖና ሲናህ መዳ፡፡ 19. ያከካህ"ሓኮክ ትግዲለህ ራደም ናኑ ተን ቦታድ ናምታካኦ ኪኒ"ታናህ ታኪን፡፡ 20. ሲን ሞዽሖ ትክኪል ኪኒ፣ ያኮይ ኢካህ ኢሲን ይግሪዒኒህ ራደኒም አሚነ ዋየንርከህ ኪኒጉል፣ አቲን ሲክ ተኒህ ሶልተኒም ተመኒን ኢርከህ ኪኒ፣ ኢቦል ኡኮ ማይሲቶና ኢካህ ታታዕባቶና ሲናህ መዳ፡፡ 21. አይሚህ መዔፉጊህ ተፈጥሮ ሓኮክ ኪን አይሁዱህ አካህ ናኅሩረ ዋየምኮ፣ ሲናህ ለ ኡኮ ማናኅሩራ፡፡ 22. አማይጉል መዔፉጊህ ናኅሩርከ ጽካነ ኡቡላ፣ ጺካነ ያይቡሉወም ራደሚህ አሞል ያከጉል፣ ናኅሩር ያይቡሉወም ለ ሲናል ኪኒ፣ ታሃም አባም ካያ ተመንኒህ ሲክ ተኒህ ማርቶና ኪኒ፣ ሲክ ኢየዋይተኒምኮ ለ አቲን ለ ትግርዒኒህ ራደሊቲን፣ 23. አይሁድ ኢምነትዋይቲ የለይኒምኮ ሲኒ ባሶ ቦታል ጋኄ ሎን፣ አይሚህ ለ ፉጊ ተን ባሶ ቦታል ተን ደሄዎ ዺዓ፡፡ 24. አቲን አረማውያኖ ተፈጥሮህ ባራኪ ኦላዕቶ ሓዻ ሓኮክ ተኪኒህ ታንንሃኒህ ሲኒ ቦታኮ በሓል ዓሪ ዓዳህ /ውሳጠድ/ ኦላዕቶ ሓዻህ አሞል ታምታካሎና ዽዕተኒምኮ፣ ውሳጠት ኦላዕቶ ሓዻ ሓኮክ ተከ አይሁድ ሲኒ ባሶ ቦታል ጋኄኒህ ያምታካሎና አይናህ የኒህ ዺዔዋናም ! መዔፉጊህ መሕረት ኡማንቲያህ ኪኒ 25. ይሳዖሎ! ማዻጊት ኪኖ ተኒህ ማማካኅና፣ ሲናካ ኢንኪ ምሥጢር ያነ፣ ታሃም ለ እስራኤላውያን ማዮ ያናም ኡማንጉሉህ አከካህ ደዕምምተ አረማውያን ኡምቢህ ፉጎ ዻጋህ ያምትኒም ፋናህ ኪኒ፡፡ 26. አማይጉል እስራኤላውያን ሙሉኡክ ያድኅኒንም ታይ ዓይነቲህ አጋባቢራህ ኪኒ፡፡ አማይጉል ታህ የህ ይምጽሕፈ፣ "ያይዲኅነቲ ጽዮንኮ ያሚተ፣ ያዕቆብ ዳራኮ ኡምቢህ ኃጢአት ያይለየ፡፡ 27. ተን ኃጢአት ለ አካህ ያድምሲሰ ዋክተ ተንሊህ ሳይ ቃልኪዳን ታይቲያ ኪኒ፡፡" "28. እስራኤላውያን በሠራታ ቃል ጋራየ ሒነንጉል አቲን አረማውያን ጥቅመህ መዔፉጊህ ናዓብቶሊት ተኪን፣ ያከካህ ዶሮቱላኮ ነገድ አቦብቲህ ምክንያታል መዔፉጊህ ካኃንቶሊት ኪኖን፡፡ 29. አይሚህ ለ ፉጊ ዶረህ ኢሲ ጸጋ አካህ ዮሖወሚህ ላካል አበ ጉዳህ ምያነሰሔ፡፡ 30. አቲን ኡኮ አራማውያን ባሶል መዔፉጎህ አምኢዚዘ ዋይታም ክይክ ቲኒን፣ ካዶ ለ አይሁድ አምኢዚዘ ዋየንርከህ ምክንያታል አቲን ፉጊ መሕረት ገይተን፡፡ 31. አቲን መሕረት አካህ ገይተንሚህ ዓይነቲህ ኢሲን ለ መሕረት ገዮና ኢሲን ለ ካዶ መዔፉጎህ አምኢዚዘ ዋይታም የኪን፡፡ 32. አይሚህ ፉጊ ኢሲ መሕረት ሒያው ኡምብህ ያይባሎዎ ዮዋ ሒያው ሙሉኡድ ሲኒ ማዮህ ቱምዹወም ያኮና ተንአበ፡፡ መዔፉጎህ ካብተ ምስጋና 33. መዔፉጊህ ሀብተከ ጠበብከ ኢዽጋ ለ አይዻ አዳለቲያ ኪኒ! ካፊርዲ አክ ሚያምርምረ፣ አራሕ ለ አክ አምዺገ ዋያቲያ ኪኒ፡፡ 34."መዔፉጊህ ሓሳብ ያዽገቲ ኢንከቲ ሚያነ፣ ካአማካሪ ያከቲ ሚያነ፡፡ 35. ፉጎ ያይልክኄ ቲያከ ይልክኄም አክ በያቲ ቲይ ሚያነ፡፡" 36. አይሚህ ኡማን ጉዳይ ገይማም ካኮ፣ ካከ ካያህ ኪኒ፣ ኡማንጉሊ ክብሪ ካያህ ያኮይ አመን።" ማዕራፋ 12 ፉጎ ያስጋልጋሎና አይናህ የኒህ ማሮና ኤዳም 1. አማይጉል ይሳዖሎ! ኡማናህ መዔፉጎ ኒያቲሶና፣ ያነቲያከ ይምቅድሰ መሥዋዕት አብተኒህ ታስቃራቦና ፉጊ ርኅራኄህ ሲን ዻዒማክ አኒዮ፣ ታይ ታስቃራቦና ሲናህ ኤዳም ቅንዒና ለ ሐቂ አገልጊሎቱህ ኪኒ፡፡ 2. መዕነህከ ኒያታህ ፍጹም የከ መዔፉጊህ ፍቃድ ታዻጎና ዽዕቶና፣ ሲኒ አእሚሮህ ቱስዑሱቢኒህ ሲን ሂወት ያምላዋጦይ ኢካህ ታይ ዓለሚህ ሒያውህ ኡማ ጠባይ ማካታሊና፡፡ 3. ለል ሲነሲነህ መዔፉጊ ሲናህ ዮሖወ ኢምነቲህ መጠኒል ትሕቲናህ ኢሕሲባካህ ኤዳምኮ አጋናል ሲኒ ዸግኃህ ዳዓባል ትዕብትህ ማሕሳብና ኤዽሔህ መዔፉጊ ዮህ ዮሖወ ጸጋህ ሲን አምክሪክ አኒዮ፡፡ 4. ኢንኪ ናካላድ ማንጎ ክፍልት ያነ፣ ኢሲሲ አካል ክፍል ባዽሳ ለ ሢራሕ ለ፡፡ 5. ታማም ባሊህ ናኑ ማንኮም ኪኖሃኒህ ክርስቶሱህ ኢንኪ አካል ኪኖ፣ ኢንኪ አካሊህ ክፍለድ ነከሚህ መጠኒል ኒነኒነህ ነምገጠጠመ፡፡ 6. አማይጉል ፉጊ ኢሲ ጸጋ ኖህ ዮሖወህ ኒኒኒኒ ዺዒ ሢራሓ አሞል አስስኖይ፣ ኒተውሂቦ መዔፉጊህ ቃል ዋንሲታናም የከምኮ፣ ኒኒ ኢምነቲህ መጠኒል መዔፉጊህ ቃል ዋንሲኖይ፡፡ 7. ኒዺዕ አኪማራ ያስግልግልኒም የከምኮ፣ ትግሃታህ ናስጋልጋሎይ፣ ኒዺዕ ያይምህሪኒም የከምኮ፣ ትግሃታህ ናይማሃሮይ፣ 8. ኒዽዕ ያምክርኒም የከምኮ፣ ናመካሮይ፣ ኒዽዕ ያኃይኒም የከከምኮ፣ አፍዓዶኮ ናኃዎይ፣ ኒዽዕ ያስሔደሪንም የከምኮ፣ ትግሃታህ ናይ ናስሓዳሮይ፣ ኒዺዕ መሕረት አባናም የከምኮ፣ ኒክኂነህ መሕረት አብኖይ፡፡ 9. ማዓልዋይ ሂን ሓቂ ካሓኒ ሲንሊህ ያናዎይ፣ ኡማ ጉዳይ ኢንዒባ፣ መዔ ጉዳይ ኢክቲላ፡፡ 10. ክርስቶሱህ ሳዖል ክቲንጉል ሲነሲነህ አፋዓዶኮ ቲታ ኢክኂና፣ ሲነሲነህ ቲታ ታስካባሮና ኦሞኮማ፡፡ 11. ሲንፊና ኤለያይክ ትግሃታህ ሙሉእ ኪን አፍዓዶህ ማደራ ኢየሱስ ኢስግልጊላ፡፡ 12. ታስፋህ ደስ ሲናህ ዮዋይ፡፡ መከራ ዋክተ ትዕግሥቲ አባ፣ ኡማንጉል ጻሎት አባ፡፡ 13. አማንቲ ኪን ሳዖል ተን ጸገሚድ ተን ጎሮኒሳ፣ ገዺኖህ ታምተም ጋራ፡፡ 14. ሲን ታይሰደደም ዳዳዓ፣ ዳዳዓ ኢካህ ተን ማአባሪና፡፡ 15. ኒያታምሊህ ኒያታ፣ ወዕታምሊህ ወዓ፡፡ 16. ሲነሲነህ ኢንኪ ሓሳባህ ኤምሰመመዓይ ማራ፣ ሲናሞ ትዕብቲህ ሲናሞ ናውኢሳናም ሓባይ ድካታትሊህ ኤምሔበበራ፣ "ዮያ ሂን ማዻጊ ሚያነ" ሚና፡፡ 17. ሒያዋህ ኡማንቲህ ነፊል አምዒናን ጉዳይ አባካህ፣ ሒያው ኡማ ጉዳይ ሲናክ አብታጉል አቲን ለ ደሄይተኒህ ኡመም አክ ማባቢና፡፡ 18. ሲናካም ቲኔምኮ፣ ሒያውሊህ ኡምቢህ ሳላማህ ማርቶናክ ሲኑላኮ ጉርሱሳም ኡምቢህ አባ፡፡ 19. ይሳዖሎ! ቁጡዓ መዔፉጎል ሓባካህ ሲነህ ማምባቃሊና፣ አይሚህ ያምብቅለቲያል በቀል ሊካሐሕ ደሄያናም ያክፍለቲ ዮያ ኪኒ ያድሔ መዔፉጊ የህ ይምጽሕፈህ ያነ፡፡ 20. አማይጉል ታምብቂለምኮ አጋናል ናዓብቶሊ ሉወምኮ በቲስ፣ ባካረምኮ ለ ኤፈዕ፣ ታሃም አብታጉል ሖላህ ጊራህ ካሓራሪሳ፡፡ 21. አማይጉል ኡማ ጉዳይኮ መዔ ጉዳህ ሱብ ኢካህ ኡማ ጉዳክ ኡምነህ አክ ማሱቢን ፡፡ማዕራፋ 13ማንግሥት ሢልጣን አሞይትቲህ ያምአዛዞና ኤዳም 1. አኪናን ሢልጣን ገይማም መዔፉጊህ ፍቃዳህ ኪናም ኢዻህ ካዶ ታነ ሢልጣናት አሞይቲት ሢልጣናህ ረዳናም መዔፉጎህ ኪኒጉል፣ ሒያው ኡምቢህ ማንግሥት ሢልጣን ባዒሊህ ያማአዛዞና ኤዳ፡፡ 2. አማይጉል ሢልጣን ባዕላ ያምቀወመቲ ኡምቢህ መዔፉጊህ ትኢዛዝ ያምቀወመ፣ አምኢዚዘ ዋቲ ኡምቢህ ኢሲ አሞል ቅጽዓት ፊርደ ባሃ፡፡ 3. አይሚህ ገዛአት ማይሲሳም ኡማ ተግባር ለም ኪኒ ኢካህ መዔ ተግባር ለም ማኪ፣ ሢልጣን ባዕላ ማይሲተ ሒንቶ ጉርታ? አማይጉል መዔ ጉዳይ አብ፣ ካኮ ለ ምስጋና ገይታ፡፡ 4. አይሚህ ሢልጣን ባዕሊ ኮያህ መዔም አቦ ረደ መዔፉጊህ አገልጋሊ ኪኒ፣ ሢልጣን ባዕሊ ሰይፍ ይክትየም ካንቶህ ማኪጉል ኡማም አባቲያ ተከምኮ ሢልጣን ባዕላ ማይሲት፣ ኡሱክ ኡማም አብታም አቅጽዕክከ መዔፉጊህ በቀል አይቡሉውክ መዔፉጎ ያስግልጊለ፡፡ 5. አማይጉል ማንግሥት ሢልጣን አሞይትቲህ ያምአዘዞና አካህ ኤዻ፣ ያምኢዚዚኒም መዔፉጊህ ቁጡዓ ማይስተኒህ ጥራሕ አከካህ፣ ሲን ኅልና ለ ሲን ታውቅሰም ኢዻል ያኮ ኤልታነ፡፡ 6. ግብረ ታክፍልኒም ለ ታሃማህ ኪኒ፣ አይሚህ ሢልጣን ባዕሊ ታይ ሢራሒህ አሞል ሢራሐህ ኢፋራናም መዔፉጎ ያስጋልጋሎና ኪኒ፡፡ 7. አማይጉል ማንግሥት ሢልጣን አሞይቲት ወገንኮ ልቲን ግዳድ ኢፍጽማ፣ ግብሪ አካህ ኤዳቲያህ ግብረ፣ ቀረጽ አካህ ኤዳቲያህ ቀረጽ ኢክፍላ፣ ማይስቶና ኤዳም ማይሲታ፣ ክብሪ አካህ ኤዳቲያህ ክብረ ኡሑዋ፡፡ ሲነሲነህ ቲታ ኢክኅና 8. ኢንከቲ ዒዳህ ባዒል ማኪና፣ ታሎና ኤዳ ዒዳ ሲነሲነህ ቲታ ታክሒኒኒም ጥራህ ኪኒ፣ አይሚህ ሒያው ኪሕንቲ ሕገ ያፍጺመ፡፡ 9. ማአማንዛሪን፣ ማግዳፍን፣ ማገርዒቲን፣ አኪ ማሪሂም አኪናኒም ማታማናይን፣ ታዽሔ ትኢዛዛትከ አኪ ትኢዛዛት ኡምቢህ ሒያው ኢሲ ዸግኃህ ባሊህ አባይ ኢክሒን ያዽኄ ኢንኪ ትእዛዛድ የምጥቅልሊኒህ ገይማን፡ 10. ሒያው ኪሕንቲ ኡምቢህ ኡማ ጉዳይ ማባ፣ አማይጉል ሒያው ኪሕንቲ ሕገ ሙሉኡድ ያፍጽመ ማለት ኪኒ፡፡ 11 .አማይጉል ዺንኮ ታንቂሒን ዋክቲ ማደም ኢዺጋይ ታሃም ኡምቢህ አባ፣ አይሚህ ባሶህ ነመነ ዋክተኮ አጋናል ካዶ ኒያይድኅነቲ ያሚተ ለለዕ ጋዳህ ኑኡላል ካብየ፡፡ 12. ባር ቲላዎ ኪኒ፣ ለለዕ ለ ካብየ፣ አማይጉል ዲተ ሢራሕ ነየዔህ ዒድነህ ኢፊ ጦርቲ ማሠሪዕያ ሀይሲኖይ፡፡ 13. ለለዕቲ ኢፎል ማርታ ሒያው ባሊህ፣ ኤዳ ዓይነቲህ ጋሓንጋሓኖይ፣ ጎይላከ ሲክራን፣ ዙሙትከ ታማህ ኢጊድ ሥራሒህ ሓዶር አባናም፣ ጽቅጽቅከ ቶንኮል ሠራሓናም ሚሪሕ ኢሲኖይ፡ 14. አማይጉል ማዳራ ኢየሱስ ክርስቶስ ሀይሲታካህ ሲኒ ሓዶይታህ ጉርታናምኮ ታዕጋቦና ማሕሳብና፡፡ ማዕራፋ 14 ሒያው አሞል አፍርደዋናም 1. ሲን ፋናድ ኢሲ ኢምነቲህ አጽንዔ ዋ ሩክት ሒያውቲ ይኔምኮ ኒያታህ ካጋራካህ አታሐሳሲባል አክ ማፍራዲና፡፡ 2. አብነቲህ ኢንኪ ሒያውቲ አኪናን ጉዳይ በቶ ዽዕሲሳ ኢምነት ያለ፣ ኢሲ ኢምነቲህ አጽንዔ ዋ ሰነፍ ኪን ሒያውቲ ለ ኃምላ ዲቦህ በታ፡፡ 3. አማይጉል አኪናን ጉዳይ በታ ሒያውቲ በተዋ ሒያውቶ ዻይተ ዋዎይ፣ ኃምላ ጥራሕ በታቲ አኪናን ጉዳይ በታ ሒያውቲህ አሞል አፍርደ ዋዎይ፣ አይሚህ ካያ ለ ፉጊ ካጋራ፡፡ 4. አማይጉል አቱ አኪ ጋልጋሊህ አሞል ታፍራዶ ኮህ መኤዳ፣ አይሚህ ኡሱክ ሶሎይ ወይ ራዶይ ማደሪ ጉዳይ ኪኒካህ ኩጉዳይ ማኪ፣ ኤረ ለ ማዳሪ ካ'ሶልሶ ዺዓጉል ሲክ የህ ሶላ፡፡ 5. ታማም ባሊህ "ኢንኪ ለለዕ አኪ ለለዕኮ ጋዳህ ኩቡር ኪኒ"የህ ያሕሲበቲ ያናዎ ያከ፣ አከቲ ለ ለለዓ ኡምቢህ ኢንኪዻ ያከ ክብረ ሎን ኢካህ ለለዓ ፋናድ ባዽሲ ሚያነ ያህ ያሕሲበ፡፡ አማይጉል ታህ ኢግድናማል ኢሲሲ አሞህ ሓሳብ ያናዎ ዽዓ፡፡ 6. ኢንኪ ለለዕ አኪ ለለዕኮ የሰሰህ ያስክብረቲይ ይኔምኮ፣ ታሃም አበም ማዳራ ያስካባሮ የህ ኪኒ፣ አኪናን ፈሎ በታቲ ማዳሪ ክብረህ የህ በቶይ፣ በታ ፈሎህ ዳዓባል መዔፉጎ ያይምስግነ፡፡ አኪናን ፈሎ በተዋቲ መዔፉጊህ ክብረህ የህ ማበታ፣ በተዋየርከህ መዔፉጎ ለ ያይምስግነ፡፡ 7. ኖኮ ጋሪጋሪ ሂወት ያኮይ ራቢ ካቲያ ማኪ፡፡ 8. ማርነምኮ ኒኒ ማዳራህ ኢየሱሱህ ማረ ሊኖ፣ ራብነምኮ ኒኒ ማዳራህ ኢየሱሱህ ራብኖ ኪኖ፣ አማይጉል ማርነህ፣ ራብነሚህ ኒኔሚህ ማዳራህ ኢየሱሱህ ኪኖ፡፡ 9. አይሚህ ክርስቶስ ራበህ ራባኮ ኡጉተም ታነሚህከ ራብተሚህ ማዳራ ያኮ የህ ኪኒ፡፡ 10. ኢስኪ ኢንኪ ሒያውቲ አከቲ አሞል አይሚህ ያፍሪደ? ቲይ ዶባይቶ አይሚህ ዻይታ? ኡምቢክ ኢንኮህ ኡኮ መዔፉጊህ ፍርድህ መንበሪህ ነፊል ካብ ኢየሊኖ፡፡ 11. አይሚህ፣ "አኑ ያነቲያ ኪዮ ያ ፉጊ፣ ሒያው ኡምቢህ ሲኒ ጉሉቡህ ይነፊል ያንብርክኪን፣ ሲኒ አራባህ አኑ መዔፉጎ ኪዮም ያምስክረ"የህ ይጽሒፈህ ያነ፡፡ 12. አማይጉል ኒኒ ኒኒ አሞህ ሢራሓህ ፉጊ ነፊል ካብነህ መልስ አሓየልኖ፡፡ ኃጢአት ምክንያት ማኪና 13. አማይጉል ኖኮ ኢንከቲ ዶባይቲ አሞል ያፍሪዲኒም ኃቦይ፣ ጋዳህ ሒያው ኃጢአታድ የይሰነከለህ ዒዳ ጉዳይ አባምኮ ያዋሳኖይ፡፡ 14. ማዳራ ኢየሱስድ ካታቲያ ኪዮሚህ መጠኒል ሩኩስ ምግቢ ሚያነም ዓዲህ አዽገ፣ ያከካህ ኢንኪ ሒያውቲ ኢንኪ ጉዳይ "ሩኩስ ኪኒ"የህ ያሕሲበም የከምኮ፣ ቶይ ጉዳይ ካያል ሩኩስ ኪኒ፡፡ 15. ፈሎ ዳዓባል ሒያው ታይሠቀየህ ተከምኮ ኒያታህ ማራቲያ ማኪቶ፣ አማይጉል ክርስቶስ አካህ ራበ ሒያው በታ ፈሎህ ዳዓባል ያላዮና ተን ማቢን፡፡ 16. አማይጉል ሲናድ መዔም የከ ጉዳህ አኪ ማሪ ያምናቃፎ ማቢና፡፡ 17. አይሚህ መዔፉጊህ ማንግሥት መንፈስ ቁዱሱህ ገይማ ጽድቀ፣ ሳላም፣ ኒያት ኪኒ ኢካህ በቶከ ሙዑብ ጉዳይ ማኪ፡፡ 18. ታይ ዓይነቲህ ክርስቶስ ያስግልጊለ ሒያውቲ ፉጎ ኒያቲሳ፣ ሒያው አዳል ይምስግነቲያ ኪኒ፡፡ 19. አማይጉል ሳላም አካህ ገይማ አራሕከ ኒነኒነህ አካህ ናምሂኒፀ ጉዳይ ናካታሎይ፡፡ 20. ፈሎ ኖዋ መዔፉጊህ ሢራሕ አስዖኖወ ዋይኖይ፡፡ ምግቢ ሙሉኡድ ጺሪይቲያ ኪኒ፣ 21. አማይጉል ሓዶ በተዋናም ወይን መስ ኡዑበዋናም፣ አኪ ሒያው አስዕንቂፈ ዋያናም አኪናን ጉዳይ አበዋናም መዔም ኪኒ፡፡ 22. አማጉል ታይ ኩዲቢህ /ኩግሊህ/ ኢምነት ኮከ ፉጊህ ፋናድ ያኮይ፣ አይሚህ ትክኪል ኪኒ የህ የመነ ጉዳይ አባጉል ኅሊና ካበተዋይታ ሒያውቲ ይምስግነቲያ ኪኒ፡፡ 23. አምጠረጠርክ በታ ሒያውቲ ለ፣ ካተግባር ኢምነት አሞል ይምሥርተቲያ ማኪጉል ኤል ሚያምፍርደ፣ አይሚህ ኢምነቲህ አምድጊፈ ዋየ ጉዳይ ኡምቢህ ኃጢአት ኪኒ፡፡ ማዕራፋ 15 ሒያው ኒያቲሶና ኤዳም 1. ናኑ ኢምነቲህ ኃይላለም ነከምኮ፣ ሩኩታምህ ሐዋል ናይላዮ ኖህ ኤዳካህ ኒነኒነህ ዲቦህ ኒያታም ናኮ ኖልማታነ፡፡ 2. ኒነኒነህ አኪ ሒያውቲ ኢሲ ኢምነቲህ ኃይላ ለቲያ ያኮ፣ ካያ ያጥቅመቲያከ ኒያቲሳ ጉዳይ አብኖይ፡፡ 3. አይሚህ ክርስቶስ ኢሰ ማኒያትሲና፣ ናቢህ ለ "ዋተኒት ኮያህ ዋትመኒም ባሊህ! ዮያህ ለ ዋትመን"የህ ይምጽሕፈም ባሊህ አክ የከ፡፡ 4. ቁዱሳት ማጻሕፍቲኮ ገይና ትዕግሥትህከ አምጻናናዕቲ ታስፋ ናሎ ቶኮመህ ትምጽሕፈምል ሙሉእ ሚሂሮ ኤድገይኖ ትምጽሒፈ፡፡ 5. አቲን ኢየሱስ ክርስቶሱድ ካታይታን ኢርከህ፣ ኒትዕግሥትህከ ናምጻናናዒህ አምላክ ኢንኪኖ መንፈስ ሲናህ ያሐዎይ፡፡ 6. ታማም ባሊህ ኒማዳሪ ኢየሱስ አምላከ አባ የከ መዔፉጊ ኢንኪ አፍዓዶህከ ኢንኪ ቃላህ ታስካባሮና፣ ሲን አቦይ፡፡ ጰውሎስ አገልግሎትከ አራማውያውን ማደ በሠራታ ቃል 7. አማይጉል ሒያው መዔፉጎ ያስካባሮና ክርስቶስ አቲን ጋራይተኒም ባሊህ ሲነሲነህ ቲታ ጋራ፡፡ 8. ታሃም ለ ዋንሲታህ፣ ፉጊ ነገድቲ አቦቡህ ዮሖወ ታስፋ ታምፋፃሞከ መዔፉጊህ አምአማማን ያማዻጎ፣ ክርስቶስ አይሁድ አግልጋሊ የከ ማለቲህ ኪዮ፡፡ 9. ክርስቶስ አይሁድ አገልጋሊ አካህ የከ አኪ ምክንያት አረማውያውን መዔፉጎ ካ መሕረቲህ ባርካታል ካ ያይማስጋኖና ኪኒ፣ ታሃም፣ "አረማውያውን ፋናድ ኩ አይምስግነ፣ ኩሚጋዓህ ለ ዘማ ሞሳህ ካብ ኢሳክ አነ" ተህ ትምጽሕፈም ባሊህ ኪኒ፡፡10. ለል ለ አቲን አረማውያኖ፣ " መዔፉጊ ዶረ ህዝበሊህ ኒያታ፣ የህ ይምጽሒፈ ባሊህ ኪኒ፡፡11. ጋባዔህ ለ፣ " አቲን አራማውያውኖ ኡምቢክ ፉጎ ኢይምስጊና፣ ህዝበ ኡምቢክ ኢይምስጊና፣" የህ ይምጽሒፈ፣ 12. አማም ባሊህ ኢሳይያስ፣ "ኢሴይ ዳራኮ ያቡከቲ ያሚተ፣ አረማውያውን መራሒ ያኮ ኡገታ፣ ኢሲን ለ ሲኒ ታስፋ ካያል አባን ያዽሔ ፡፡"13. ሲን ተስፋ መንፈስ ቁዱስ ኃይላህ አነብክ ታዳዎ ታስፋት አምላክ ካያህ ተኤመመኒንህ ኒያቲከ ሳላም ሚገድ ሲናህ ያሓዎይ። ጳውሎስ ዲፍረቲህ አካህ ይጽሒፈ ምክኒያት 14. ይሳዖሎ! መዕነህ ተመገሚክ፣ ኢዽጋህ ትህብትመሚከ ሲነሲነህ ለ አከቶ ታምካሮና ዽዕታም ኪትኒም ማምጠረጠጠረ፡፡ 15. ውልውል ጉዳይ ሲን አይዛካሮ ጉረህ ታይ መልእክት ዲፍረቲህ ሲናህ እጽሕፈ፣ ዲፍረቲህ ሲናህ ኢጽሒፈም ፉጊ ዮህ ዮሖወ ጸጋህ መሠረት ኪኒ፡፡ 16. ታይ ጸጋ ዮህ ቶምሖወም ፉጊ በሠራታ ቃል አረማውያን አይብሥርክ ካህን ባሊህ ኤከህ ኢየሱስ ክርስቶስ አስጋልጋሎ ኪኒ፣ አማይጉል አረማውያን መንፈስ ቁዱሱህ ይምቅድስኒህ መዔፉጎ ለ ኒያቲሶና መሥዋዕት የኪኒህ ያቅራቦና አስግልግሊክ አነ፡፡ 17.ታይ ምክንያታህ ኢየሱስ ክርስቶስ ቲያ ኤከህ መዔፉጎ አስጋልጋሎ ዽዔርከህ አምክሔ፡፡ 18. አምኪሔም፣ ክርስቶስ ይቃላህከ ይሢራሒህ አራሓህ፣ አረማውያን መዔፉጎህ ያምዛዞና አበርከህ ኪኒ፡፡ 19. አማይጉል ናባ ታአምራትከ ዲንቀ ኪን ሢረሓህ መንፈስ ቁዱስ ኃይላህ አረማውያን ያምአዛዞና አበርከህ አምክሔ፡፡ ታይ አጋባቢራህ ኢየሩሳለምኮ እልዋሪቆን ፋናህ አዞርክ ክርስቶስ መዔ ዋረ ሙሉኡድ ኢይብሢረህ አኒዮ፡፡ 20. ኡማንጉልት ይትምኒት፣ አኪ ሒያውቲ ዒደ መሠረቲህ አሞል ያንድቅኒም አከካህ፣ ክርስቶስ ሚጋዕ ኤል አማበ ዋየ ቦታል ሙሉኡድ መዔ ዋረ ያብሥሪኒም ኪኒ፡፡21. ታሃም፣ " ካ ዳዓባል ዋንሲተ ዋየንም ያብሊን፣ ካ ዳዓባል አበ ዋይተም ያስትውዒሊን" የህ ይምጽሕፈም ባሊህ ኪኒ፡፡ ጰውሎስ ሮማ ያዳዎ ይሒሊነ /ይዕቅደ/ 22. ካዶ ፋናህ ሲና ዻጋህ አማቶ ዺዔ ዋየም፣ ኦኮመህ አካህ ዋንሲተሚህ ምክንያታል ኪኒ፡፡ 23. ካዶ ለ ታይ አካባቢል ታነ ሀገራታል ልይክ ኢነ ሢራሕ ባከካህከ ማንጎ ኢግዲትኮ ኤዸዺሰህ ሲና ማዶ ናባ ድላይ ልዮጉል፣ 24. እስፔን ኡላል አዲየ ዋክተ፣ ኢኒ አራሓል፣ ሲን ማዶ ኢሕሲበህ አኒዮ፡፡ ዳጎ ዋክተ ሲንሊህ ሱገምኮ ላካል፣ ኢናራሕህ አቃጻሎ ይዽዕስሳ ሓቶ ዮህ አብቶና ታስፋ ሊዮ፡፡ 25. ካዶ ለ አማንትህ አሓየ ማል ሓቶ ኢብዸህ ኢየሩሳለም አድክ አኒዮ፡፡ 26. አይሚህ ለ መቄዶንከ አካይያት አማንት ኢየሩሳለም አማንትህ ፋናድ ታነ ዲካታታህ ማል ሓቶ ፋሮና ይውስንንጉል ኪኒ። 27. ታይ ሓቶ ለ ስኒድላህ ዮሖይን ሓቲ ተን ግዳድ የከጉል ኪኒ። አይሚህ አረማውያን አይሁድሊህ መንፈስ በረከት ሓድሊታም የክኒምኮ፣ አረማዊያን ሓዶይታ በረከትኮ አይሁድ ሓታናሚህ ጊደ ሎን። 28. አማይጉል ታይ የከሄለ ማል ሓቶ ኢየሩሳለም በየህ ያሪክብኒሚህ ሢሕራህ ባከምኮ ላካል፣ ኢስፐይን ኡላል አድየሊዮ፣ ኢናራሓል ለ ሲና ማደሊዮ። 29. ሲኑላል አሚተ ዋክተ ለ ክርስቶስ በረከት ሚገ ኢብዸህ አሚተም አዺገ። 30. ይሳዖሎ! ይዳዓባል መዔፉጎል ጻሎት ዮህ አባክ ይዱፍላህ ይጎሮኒሶና፣ ኒማዳራ ኢየሱስ ከርስቶከ መንፈስ ቁዱስ ካኃኖህ ሲን ዻዒማክ አነ። ጻሎት ዮህ አብታናም ለ ይሁዳል ታና አሚነ ዋይታ ሒያውህ ጋባኮ አውዖከ ኢየሩሳለምል ሊዮ አገልግሎቱህ ለ አማንቲ ኒያቲሳቲያ ያኮ ኪኒ። 32. ታሃም ተከምኮ ሣራህ መዔፉጊህ ፍቃድ የከምኮ ሲኑላል ኒያታህ ኤመተህ ሲንሊህ አዕራፎ ኪሒኒዮ። 33. ሳላም ያሓየ ፉጊ ኡማን ሲናሊህ ያኮይ፣ አመን።" ማዕርፋ 16 ሳላምታ 1. ፌቤ ክንክሪያ ካታምል፣ ክርስቲያን ታስግልጊለ ታምኢሚነ ኒሳዕላ ኪናም ታዻጎና ኪሒኒዮ። 2. ኢሲ ዮከ ይዶባ ለ ማንጎ ሒያው ጎሮኒሰ ቲያ ኪኒጉል፣ መዔፉጊህ ሒያው ገዻ ጋራናም አካህ ኤዳሚህ ዓይነቲህ ማዳሪ ሚጋዓህ ጋራይተኒህ ተን ጉርሱሳ ጉዳህ ኡምቢህ ተን ሮኒሶና ሐደራ ሲናክ አይክ አነ። 3. ኢየሱስ ክርስቶስህ ሢራሓህ ይጎሮን ኪይይ ይይኒን ጵሲቂላከ አቂላህ ሳላምታ ዮህ ኢስቅሪባ፣ 4. ኢሲን ይዻህ ራባህ ኡካ ተምሶኖዶወም ኪይይ ይኒን፣ ታሃማህ ኡማንጉል ተን አምስግንክ አኒዮ፣ አኑ ዲቦህ አከካህ አረማውያን ሞሶዒሪቲ ክርስቲያን ለ ራዔካህ ተን ያሚስግኒን፣ እሲያ ኪፍልህ ባዾል ኤዸዾይታህ ክርስቶሱል የመነቲያከ ኪኂኒዮ ኤፓኔቶስ ሳላምታ ዮህ ኢስቅሪባ። 6. ሲናህ ማንጎም ኃዋልተ ማሪያማህ ሳላምታ ዮህ ኢስቅሪባ። 7. ዮሊህ ቱምዹወህ ትነምከ ሐዋሪያት ፋናድ ትምዺገም ክይክ ቲነ አይሁድ ይበተሰብ ድሮኒቆስከ ዩኒያሳህ ላሳምታ ካብ ዮህ ኢሳ፣ ኢሲን ክርስቶሱል ያምንኒሚህ ዮክ ያኩሚን። 8. ማዳራህ ኪሒኒዮ አምፕሊያቶሱህ ሳላምታ ዮህ ኢስቅሪባ፣ 9. ኪርስቶስ ሢራሓህ ኒጎሮን ኪይይ ቲነ ዑርባኖስከ ኪኂኒዮ እስጣኩሱህ ሳላምታ ዮህ ኡሑዋ። 10. ክርስቶስ ቲያ የከህ ይምፊትነ ቲያ የከ አፔሊሱህ ሳላምታ ካብ ዮህ ኢሳ፣ .አርስጦቡሎስ በተ ሰብ ክናማህ ለ ሳላምታ ካብ ዮህ ኢሳ፣ 11. አይሁዲ ይዘመዲህ ሄሮድዮኑህ ሳላምታ ዮህ ኢስቂሪባ፣ ከናርሲስ በተ ሰቢህ ማዳራል ተመነሚህ ሳላምታ ዮህ ኡሑዋ። 12. ማዳሪ አገልጉሎቱህ ኃዋልታማህ ትሩፋይናከ ትሩፎሳህ ሳላምታ ዮህ ኢስቅሪባ። 13.ማዳሪ አገልግሎቱህ ጋዳህ ኃዋልታ ክርስቶሱህ ኪኂኒዮ ፔርሲስ ሳላምታ ካብ ዮህ ኢሳ። ማዳሪ አገልግሎቱህ ጋዳህ ትሚዺገ ሩፎስ ሳላምታ ካብ ዮህ ኢሳ፣ ዮያ ኢሲ ባዻ ባሊህ ይኪኂኒይ ቲነ ይናህ ለ ሳላምታ ዮህ ኢስቅሪባ። 14. አስንክርስቶስከ ፍሎጎኑ፣ ሄርሜስህ ፓትሮባሳህ ሄርማሳህ ተንሊህ ታነ አማንቲ ይሳዖሉህ ሳላምታ ካብ ዮህ ኢሳ። 15. ፊሎሎጎሱ፣ ዩሊያህ፣ ኔሪያከ ካሳዕላህ ሳላምታ ካብ ዮህ ኢሳ፣ ታማም ባሊህ ኦሎምፓስከ ካሊህ ታነ አማንቲህ ኡምቢህ ሳላምታ ዮህ ኢስቅሪባ። 16. ሳዖሊኒ ስምዒቲህ ቲታ ፉጉታክ ሳላምታ ቲቲታህ ኡሑዋ። ክርስቶስ ሞሶዓሪት ኡምቢህ ሳላምታ ካብ ሲናህ ኢሳን። ባኪቶ ሳላምታ 17. ይሳዖሎ! ሲን ፋናዳ ባዽሳ ታፍጥረምከ ሲኒ ኢምነቲህ ሲክ ታናምኮ አብታ ሒያውኮ ሰሊታ፣ ጋራይተን ሚሂሮ ለ ታምቀወመም ለ ኪኖንጉል ተንኮ ሚሪሕ ኤያ። 18. ታይ ዓይነቲህ ሒያው ሲኒ ዸግኃህ ኡማ ትምኒት ታክትለም ኪኖን ኢካህ ኒማዳራ ኢየሱስ ክርስቶስ ታስግልግለም ማኪኖን፣ መዔ ቃላህ ይምግድኒህከ ባሳክታ ዋኒህ ቶንኮል ሂን ለዋኀት ያይተለሊን። 19. በሠራታ ቃላህ ታአዘዝቲ ክትኒሚህ ኡማን ሒያዋል ትምዺግንጉል ደስ ሲናህ ዮዋይ። ያኮይ ኢካህ መዔ ጉዳህ ብልሓት ለም፣ ኡማጉዳህ ለ ለዋሃት ታኮና ጉራክ አነ። 20. ታሃም አብታንጉል ሳላም ያሓየ ፉጊ ሰጣን ሲን ኢቢህ ዳባል ሲናህ ያቅጥቂጠ። ኒማዳሪ ኢይሱስ ክርስቶስህ ጸጋ ሲንሊህ ታኮይ። 21. ይሢራሒህ ታሕባባሪ ጢሞቴዎስ ሳላምታ ካብ ሲናህ ኢሳ፣ ታማም ባሊህ አይሁድ ኒዘመድ ተከ ሉቂዮስከ ኢያሶን ሶሲ ጴጥሮስ ለ ሳላምታ ካብ ሲናህ ኢሳን። 22. ታይ መልኢክት ይጽሒፈቲ ዮያ ጠርጥዮስ ማዳራህ ሳላምታ ሲናህ አስቂሪቢክ አኒዮ። 23. ዮያ ካዶ ይሓታ ቲያከ ታል ታነ መእመናን ኢሲ ዲኪድ ጻሎቱህ ያካሃሎና አባቲ ጋይዮስ ሳላምታ ካብ ሲናህ ኢሳ። ካታማት ቢጅር ሮንዲ የከ ኤራስጦስ፣ ኒሳዓል ለ ቃራጦስ ሳላማታ ሲናህ ያስቅሪቢን። 24. ኒማዳሪ ኢይሱስ ክርስቶሲህ ጸጋ ኡማን ሲናሊህ ታኮይ። ሚስጋና ጻልት 25. አማይጉል መዔፉጎህ ምስጋና ታኮይ፣ አኑ ኢየሱስ ክርስቶስህ ዳዓባል አይብሢረ በሠራታ ቃልከ ማንጎ ዳባናታህ ሱዑተህ ካዶ ዩምቡሉወ ሓቀ፣ መኤፉጊ ሲኒ ኢምነቲህ ሲክ ተኒህ ሶልቶና ሲን አቦ ዺዓ። 26. ታይ ሓቂ ካዶ ነብያት ማጻሕፍቲህ ኡላህ ዓዲህ ይምቡሉወ፣ ኡምቢህ የመኒንህ ያምአዛዞና ያነ /ሒያው/ አምላኪህ ትኢዛዛህ ምናዳም ኡምቢህ ያዻጎና የከ። 27. ኡሱክ ጥራሕ ቢልሓተና የከ አንኪ አምላክ፣ ኢየሱስ ክርስቶሱህ ኡማንጉሊ ምስጋና ታኮይ፣ አመን።
ሐዋርያ መልእክት ሮማ ሒያው ዻጋህ ጳውሎስ ሮማል ገይማ ሞሶዓረ ማዶ ዓላማ ልይነጉል ዮምሶናዶውኒህ ካ'ኢላሎና አባናም ኪኒ፡፡ ጳውሎስ ዓላማ ሮማል ገይምታ መእመናንሊህ ዳጎ ዋክተ ሥራሔምኮ ሣራህ ተን ጎሮኑህ ኤስፐይን ኡላል ያዳዎ የህ ኪይይ ይነ፣ ክርስቲያን ኢምነቲህ ዳዓባል ያይርዲኤም ክርስቲያን ሲኒ ሂወቲህ ተግባራል አካህ አሲሳናሚህ ዝርዝርህ ይጽሒፊን፣ ጳውሎስ መልእክት ተመለኤ አገባብራህ ገይምታም ታይ ፋሮህ ኪኒ። ጳውሎስ ሮማል ገይምታማህ ሳላምታ ትላሰምኮ ላካል ኤል ያጽሐፎ ታስፋ አካህ ዮሖወምኮ ሣራህ ፋሮት ፋንቲ ሓሳብ ወንገል ቃል ፉጊ ሒያው ያጽድቀሚህ ባኪቶት ኢምነትህ ኪናም ያይስዽገ (1፣17) ያዽሔ ቃል ኪናም ያይቡሉወ ታሃሚህ ላካል ታይ ሐሳብ አይፈደደኒክ ይጽሒፈ አይሁድ ያኮይ አረማውያን ሒያው ኡምቢህ ኃጢአት ተገዛእት ኪኖንጉል ፉጎሊህ ዋጋሮና ኤልታነ፣ ሒያው ፉጎሊህ ዋጋሮና ዺዓናም ለ ክርስቶሱል የመንኒህ ኪኒ፣ ታሃማህ መዔፉጎሊህ ያይምስርቲን ዑሱብ ኢንኪኖህ ውጤት ዑሱብ ሂወት ኪናም ኢዳህ ጳውሎስ ፍድኒህ ያይርዲኤ፡፡ አማኒ ፉጎሊህ ሳላም አለለ፣ መዔፉጊህ ኃይላህ ኃጢአትከ ራቢ ኃይላኮ ናፃ የውዔም፣ (ምዕራፍ 5-8) ጳውሎስ ፉጎከ አማንቲ ሂወቲህ ሢራሓቲ መዔፉጊህ መንፈስህ ኃይሊ ዓላማ አይም ኪናም ያይቡሉወ፣ ታርከኮ ይቅፅለህ ጳውሎስ መዔፉጊህ ሒያውቲህ ዳሪ ለ ዕቅድ አዳል አይሁዳውያንከ አረማውያን አይናህ የኒህ ያማቶና ዺዓና?
ታይ ኤሠሮህ አሞል አንዱፉልክ ገይማን፡፡ ለል አይሁድ ኢየሱስ ክርስቶስ ለ ጋራየካህ ራዔን ኢርከህ ፉጊ ዕቅድ ኪናም ያይቡሉወ፤ አይሚህ ታይ ዓይዳህ ሒያው ዳሪ ኡምቢህ መዔፉጊ ኢየሱስ ክርስቶሱህ ይይቡሉወ ጸጋህ አዳድ ያምሐቃፎ ዺዓህ ያከ ኢካህ አይሁዳውያን ኢየሱስ ጋራያን ዋክቲ አምተለም ጳውሎስ ያሚነ፣ ባክቶል ጳውሎስ ክርስቲያን ሂወት አይናህ የህ ማሮ ኤዳም፤ \ፍላህ ለ መእመናን ስነሰነህ ሎን ቲቲህ ገይቶህ ካኃኒህ አራሓህ ያካታሎና ኤዳም ያይርዲኤ፣ መዔፉጎ ያስግልግልኒም፣ ክርስቲያን ሲኒ ሀገርል ሲነሲነህ ሎን ኃላፍነትከ፣ ኅሊናህ ምክንያታል ኡጉታናም ኢዻህ ኤሰሮ አዝርዝርክ፣ያርዲኤ፡፡________________________________________________
ማዕራፋ 1
1. ኢየሱስ ክርስቶስህ አገልጋሊ የከህ፣ ሐዋርያ ያኮ ደዕሚመህ፣ በሠራታ ቃል ያባሣሮ ዶሪሚመ ጳውሎስኮ ፋሪምተም። 2. ታይ በሠራታ ቃል መዔፉጊህ ነብያትህ አራሓህ ቁዱሳት ማጻሕፍቲል ቶኮመህ አካህ ቶምሖወ ታስፋ ቃል ኪኒ፡፡ 3. በሠራታ ቃል ለ መዔፉጊህ ባዽ ሒያውቶ ኪናሚህ ኡላኮ፣ ዳዊት ዳራኮ ዮቦከም ታይብስረም ኪኒ። 4. ታማም ባሊህ ማደሪ ኢየሱስ ክርስቶስ ኢሲ ጽድቂህ መንፈስህ አራሓህ ናባ ኃይላህ ራባኮ ኡጉተርከህ ፉጊ ባዻ ኪናም ታይብስረም ኪኒ፡፡ 5. ካባርካታህ ሐዋርያ ያኮ ታይብቂዔ ጸጋ ገራየህ አኒዮ፣ አማይጉል ካምጋዓል አረማውያን ኡምቢህ ያማኖናከ አካህ ያምአዛዞና አበሊዮ፡፡ 6. አቲን ለ ኢየሱስ ክርሰቶስልህ ታኮና መዔፉጊ ደዔም ኪቲን። 7. አማይጉል ሮማል ማርታማክ፣ መዔፉጎ ትክሕነምከ ካወገን ታኮና ደዒምምተሚክ ኡምቢህ፡፡ ናባ መዔፉጎከ ማደራ ኢየሱስ ክረስቶስህ ጸጋከ ሳላም ሲንሊህ ያኮይ፡፡
ምስጋና ጻሎት
8. ሲን ኢምነቲህ ዝና ዓለሚል ሙሉኡድ ቶሞበጉል፣ ኡማኒምኮ ኡይሱኩመህ ኢየሱስ ክርስቶስህ ዳዓባህ ኡማን ሲኒህ ባርካታህ ኢኒ ማላይካ አይምስጊነ፡፡ 9. ኡማን ዋክተ ጻሎቱህ ሲን አሕስበ፣ ባዽ በሰራታ ቃል አብስርክ ሙሉእ ኢኒፍዓዶህ አስግልጊለ መዔፉጊ ይማስኪር ኪኒ፡፡ 10. ጋባዔህ ካዶ ባክቶል ሲኑላል አማቶ መዔፉጊህ ፍቃድ የከህ ያራሕ ዮህ ያቅናዖ ኡማንጉል ጻሎት አባክ አኒዮ፡፡ 11. አይሚህ ለ ኢምነቲህ ታጽናዖና ሲን አብሲሳ መንፈሳዊ ሓቶ ሲን አስካፋሎ ጉራም ኢዻህ ሲናብሎ አትምኔየ፡፡ 12. ታሃሞም ለ አካህ ኤም አኑ ሲን ኢምነቲል፣ አቲን ለ ይኢምነቲል ኒነ ኒነህ ናምጻናናዖ ኪኒ፡፡
13. ይሳዖሎ! አኪ አረማውያን ፋናድ ኢይምሂረህ ማንጎ አማንቲ ገየህ አኒዮ፣ ታማም ባሊህ ሲን ፋናድ አይምሂረህ አማንቲ ገዎ ጉረህ ኢነ፣ ያኮይ ኢካህ ሲና ዻጋህ አማቶ ማንጎ ዋክተ ኢሕሲበሚህ ካዶ ፋናህ ዮህ ማስላቲናም ታዳጎና ጉራ፡፡ 14. አይሚህ ለ ትሥልጥነም ያኮይ አሥልጥነ ዋይተም፣ ቲምሂረም ያኮይ አሚሂረ ዋየ ህዝበ ያይምሂርኒሚህ ጊደ ሊዮ፡፡ 15. አማይጉል ሲና ሮማል ማርታማክ በሠራታ ቃል ሲን አይባሣሮ አትሚኔ፡፡
ወንጌል ቃል መዔፉጊህ ኃይላ ኪኒ
16. አኑ ወንጌል ቃላህ ማሖላይሲታ፣ አይሚህ ለ ወንጌል ቃል ባሶል አይሁዱህ፣ ላካል አረማውያናህ፣ ኢምነት አለዋይታ ሒያው ኡምቢህ ያድኃኖና ዺዓናም መዔፉጊህ ኃይላህ ኪኒ፡፡ 17. ታይ ወንጌል ቃላህ ፉጊ ሒያው ታጽድቀም ኤዸዾይታኮ አይከ ባክቶ ፋናህ ኢምነቲህ ኪናም ያይቡሉወ፣ አይሚህ ያጽድቀ ሒያውቲህ ኢምነት ሂወት ገያ የህ ይምጽሕፈ ።
ሒያው ኡምነ
18. ሒያው ሲኒ ኡምነህ ሓቂ አክ ያምዽገምኮ አባክ ስኒ ኃጢአትከ ስኒ ኡምነህ ምክንያታል መዔፉጊህ ቁጡዓ ዓራንኮ ኤልታምግሊጸ፡፡ 19. ተን ያቅጽዔም መዔፉጊህ ዳዓባል ያዻጎና አካህ ኤዳም ኡምቢህ ያዻጎና መዔፉጊ ኢሰህ ተን ይቡሉወም አዽጊይ ይንንጉል ኪኒ፡፡ 20. ዓለም ይምፍጥረምኮ ኤዸዺሰህ ሒያዋህ አምቡሉወ ዋይታ መዔፉጊህ ባህሪ፣ ታሃም ለ ኡማንጉሊት ኃይላህከ አምላካህ፣ ኢሰህ ይፍጥረ ጉዳይ ጊልጸ አበህ ይምቡሉወ፣ አማይጉል ታህ ኢጊድ አዺጊህ ታይላየም ያይምክንይኒም ማሎን፡፡ 21. አይሚህ ኢሲን መዔፉጎ የዸጊኒህ ያንንሃኒህ ካያህ ኤዳ ክብረከ ሞሳ አካህ ማሓይኖን፣ ሲኒ ሓሳባህ ለ ካንቶ የኪን፣ አስትውዕለ ዋታ ተን አፍዓዶ ዲቶይተ፡፡ 22. ብልሐት ለም ኪኖ አይህ ኣለዋይታም የኪን፡፡ 23. ኡማንጉልቲያ የከ መዔፉጎ ያይምልኪኒም ኢዻህ ቲላይታምከ ታለየም ኪን ሒያዋል፣ ኪምብሮል፣ እንስሳል፣ ባዾት አሞል ሂርግምታ ፉጡራትህ ቢሶህ ሢራሕምተ ምስልታታል ያይምልኪኒም ኤዸዺሰን፡፡
24. አማይጉል ሲነሲነህ ሖላሳ ጉዳይ አቦና፣ መዔፉጊ ኡምነህ የመገ ሲኒ ጉርታዮህ ተመገም ያኮና ተንሓበ፡፡ 25. ታሃም ተከም ፉጊ ሓቀ ዲራባል ይልውጥንጉል፣ ይፍጥረቲህ ኢዻህ ፍጡር ይምልኪንጉልከ ይስግልግልንጉል ኪኒ፣ መዔፉጊ ለ ኡማንጉል ይምስግነቲያ ኪኒ፣ አመን።
26. ሒያው ታሃም አብተርከህ ምክንያታል ፉጊ ኤደዋ ያይኒውረ ጉርታዮህ ቲላሰህ ተን ዮሖወ፣ ተን ሳዮ ኡካ ተምገለ ኃዶይታ ሥራሓህ ቲታ ገያናም አምገለ ዋይተ ኃዶይታት አራሓህ ቲታ ገያናማል ይልውጢን፡፡ 27. ታማም ባሊህ ላባቶ ተምገለ ኃዶይተ ግብረህ ቲታ ገያናም፣ ሳይጉደሊህ አባናም ሓበኒህ ሲነሲነህ ሓዶይታ ግብረህ ቲታ ገዮና ጋደህ ይትምኒን፣ አማይጉል ላባቶ ላበቶሊህ ሖላሳ ጉዳይ አበን፣ ሲኒ ገጋህ ምክንያታል አካህ ኤዳ ቅጽዓት ሲኒ ኃዶይታህ ጋራየሎን፡፡
28. ሒያው ፉጎ ያዻጎና ጉረዋየንጉል፣ ናውረ ኪን ጉዳይ አቦና መዔፉጊ አርብሔ ዋይታ አእምሮ ቲላሰህ አካህ ዮሖወ፡፡ 29. አማይጉል ጊፍዔህ፣ ኡምነህ፣ አምሀጋጋህ፣ ቂሚህ፣ ተንኮሉህ፣ ናብሲግድፎህ፣ ናዓቦህ፣ አይታላላህ፣ ኡማ ሓላህ ታሃማህ ኡምቢህያህ ኃጢአታህ ተመገምከ ሓምታም ኪኖን፤ 30. ታማም ባሊህ ምናዳምቲ ሚጋዕ ታይለየም፥ ፉጊ ኒዒባም፣ ምናዳምቶ ታይወረደም፥ ትዕቢተናታት፣ ታሚኪሔም ኡምነ አብቶ አራሕ ዋግታም፣ ሲኒ ዻልቶይቲህ አምእዚዘ ዋይታም፣ 31. አስትውዒለ ዋይታም፣ ካሖኖ ሂናም፥ ጸከንቲ ኪኖን፡፡" 32. ታይ ጉዳያት አብታም ኡምቢህ ራቢ አካህ ኤዳ" ያናም መዔፉጊህ ሕገ አዽጊህ ታሃም ኡምቢህ አባን፣ አብናን ዲቦህ አከካህ ታሃም አብታ ሒያው አይዱኩም ኢሳን ፡፡
ማዕራፋ 2
መዔፉጊህ ፍርደ
1. አኪ ሒያውቲህ አሞል ያፍርደቲያ አቱ፣ ኢሳሞህ ለ ታይምክኔም ማልቶ፣ አይሚህ አኪ ሒያውቶል አፍርዲህ ኢሲ ዸግኃህ አሞል አፍሪዲክ ታነ፣ አቱ ሒያውቲ አሞል አፍሪዲህ ቶይ ኤልታፍሪደ ሒያውቲ አባም አባክ ታነ፡፡ 2. ታሃም አብታ ሒያውህ አሞል መዔፉጊ ኤዳዒለህ ኤልያፍሪደም ናዺገ፡፡ 3. ኮ ሒውቶ! ታሃም አብታ ሒያውህ አሞል አፍሪዲህ፥ ኢሲን አባናም አባህ መዔፉጊህ ፍርደኮ ሙሉሕታም ታካለ? 4. ወይ መዔፉጊህ መዕነከ ዺዕ፣ ካትዕግሥትህ ማንጋ ዻይታክ ታነ? መዔፉጊ ኢሲ መዕነ ኮህ የይመንገም ኮያ ንሲሓህ ደዖ የህ ኪናም ማታዺገ? 5. አማይጉል አቱ ንስሓ ሳየ ዋይተርከህከ ያምሄለለከ ቲያ ኪቶርከህ መዔፉጊ ቁጡዓከ ትክኪል ኪን ፍርደ ያቡሉወ ለለዕ ኩቅጽዓት ያመንገካህ አባክ ታነ፡፡ 6. አይሚህ ፉጊ ኡማንቲያህ ተንተን ሢራሕ ባሊህ አካህ ያሓየ፡፡ 7. መዔ ሢራሓል ሲክ የኒህ ምስጋናከ ኪብረ አይለየ ዋ ሂወት ለ ዋጊይታማህ፣ መዔፉጊ ኡማንጉሊ ሂወት አካህ ያሓየ፡፡ 8. ያከካህ ኢሲ ዸግኃህ ጥቅመ ዋጊታ፣ ዓመፀናታት ኪን ማራህ ትክኪል ኪን መዔ ጉዳይ ሓበኒህ ኡማም ታክትለሚህ አሞል መዔፉጊህ ቁጡዓከ መቅስፍት ኤልአምተ ለ፡፡ 9. ኤዸዾይታህ አይሁዱል፣ ጋባዔህ አረማውያናል፣ ኡማም አብታ ሒያውህ አሞል መከራከ ጽንቀት ኤልአምተ ለ፡፡ 10. ያኮይ ኢካህ አይሁድ ያኮይ አረማውያን፣ መዔም አብተ ሒያው ኡምቢህ ምስጋናከ ክብረ ሳላም ለ አካህ አምኃወ ለ፡፡ 11. አይሚህ ፉጊ ሒያው ፋናድ ምያይዶሎወ፡፡
12. ሙሴ ሕገ ሂኒም ኃጢአት ሢራሕታም ኡምቢህ ሕገ አለዋየኒሚህ አለየ ሎን፣ ሙሴ ሕገ ሊህ ኃጢአት አባታም ኡምቢህ ለ ሕገ ይፍርሲን ኢርከህ ኤልያምፍረደ፡፡ 13. አይሚህ መዔፉጊህ ነፊል ታጽድቀም ሕገ ዮብኒህ ሢራሓድ አሲሳም ኪኒካህ ሕገ ዮቢኒህ ሢራሓድ አስሰዋይታም ማኪ፡፡ 14. ሙሴ ሕገ አለዋይታ አረማውያን ተን ተፍጥሮህ ሕጊ ያኢዚዘ ጉዳይ ያፍጽሚን፣ ታይ ምክንያታል ሙሴ ሕጊ አኔዋየሚህ ሲኒ ዸግኃህ ተፈጥሮ ሕገ ሎንጉል አቦና ኤዳም ያዽጊን፡፡ 15. ታይ ዓይነቲህ ሙሴ ሕጊ ያኢዚዘ ጉዳይ ሙሉኡድ ተን አፍዓዶድ ይምጽሕፈህ ያነም ያይቡሉወ፣ ጋባዔህ ለ ተን ኅልና ኤልታምስክረ፣ አይሚህ ተን ኅልና ውልውልጉል ተን ታውቂሰ፣ ውልውልጉል ለ ተን ታድግፈ፡፡ 16. ታሃም ለ ታከም አኑ አይብሥረ ወንጌል ቃሊህ ሪሚዲህ መዔፉጊ ኢየሱስ ክርስቶስህ አራሓህ፣ ሒያው ሢራሕተ ሱዑተ ጉዳይህ አሞል ያፍርደ ለለዕ ኪኒ፡፡
አይሁዳውያንከ ሙሴ ሕገ
17."ሀይከ አቱ አይሁዳ ኪዮ"አይክ ታነ፣ ሙሴ ሕገ አድግፊክ ታነ፣ መዔፉጊህ ቲያ ኪቶሙህ አምክሕክ ታነ፣ 18. አቱ ፉጊ ፍቃድ ታዽገ፣ ሙሴ ሕገ ትምሂረጉል መዔም አባናም ታዺገ፡፡ 9. አቱ"ኢንቲ ማሎሊ መራሒ ኪዮ፣ ዲተድ ታነሚህ ኢፎይታ ኪዮ" አይክ ታነ፡፡ 20. አቱ"አምሂረ ዋተይም አይሥልጥነ፣ ሕፃናት አይምሂረ አይክ ታነ፣ "አማም ባሊህ ሕጊ፣ ኢዽጋከ ሓቀህ የመገቲያ ኪኒ አይክ ታነ፡፡ 21. አኪ ማራ ያይምህረቲያ ኪይህ አይሚህ ቡሳ ኢሰ አይምሂረዋታም?"ማጋርዕቲና አይክታነ፣ አቱ ለ ጋርዕታ፡፡ 22. ማአማንዛሪን አይክ ታነ፣ አቱ ለ ታምንዝረ፣ አቱ ጣኦት ታፊንፊነ (ታምፅይፈ)፣ ተን በተ መቅደሳ ዓረ ለ ታዝሪፈ፡፡ 23. አቱ መዔፉጊህ ሕገህ ታምክሔ፣ ያከካህ ሕገ አይፍርሲክ መዔፉጎ ዻይታክ ታነ፡፡ 24. ታሃም፣
"ሲናህ አይሁዳውያን ሳባባል፣
መዔፉጊህ ሚጋዕ አረማውያናህ ዋቲሚማ"
የህ የምጽሕፈም ባሊህ ኪኒ፡፡
25. ጊሪዛት ኩያጥቂመም ሕገ ትፍጽመምኮ ኪኒ፣ ሕገ ታይፍሪሰህ ተከምኮ ለ ግርዛት አምግሪዘ ዋይተም ባሊህ ሎይማ፡፡ 26. አማይጉል አምግሪዘ ዋየ አረመንቲ ሕጊ ትኢዛዝ ያፍጽመቲያ የከምኮ አምግርዘ ዋየሚህ ይምግርዘቲያ ባሊህ አካህ ሎይማይ ሚያነ? 27. አቱ ሕገ ልቶሃኒህከ ይምግርዘቲያ ለ ተከህ ሕገ ታይፍርሰጉል፣ ኃዶይታህ አምግርዘ ዋየቲያ ተከሚህ፣ ሕገ ያፍጺመ አረማንቲ ኮልያፍርደ፡፡ 28. አማይጉል ሚጋዓህ ጥራሕ አይሁዳ ኪንቲይ፣ ሓቂ አይሁዳ ማኪ፣ አማም ባሊህ ኢሮኮ ያምቡሉወ ኃዶይታ ግረዘት ሓቂ ግርዛት ማኪ፡፡ 29. ሓቂ አይሁዲ፣ አዳኮ አይሁዳ ኪንቲያ ኪኒ፣ ሓቂ ግርዛት መዔፉጊህ መንፈስህ ያከ አፍዓዶት ግርዛት ኪኒካህ ሙሴ ሕገ ይጽሕፈሚህ ሪሚዲህ ኃዶይታ ግሪዛት ማኪ፡፡ ታይ ቢሶህ ሒያውቲ ሞሳ ጋራም መዔፉጎኮ ኪኒካህ ሒያውኮ ማኪ፡፡
ማዕራፋ 3
አይሁዳውያን አምነዋይተርከህ ይብድሊን
1. አማይጉል አይሁዲ አረማዊኮ አካህ ያይሰም አይሚህ ኪኒ? አምጋራዝቲ ጥቅሚ አይምቶ ኪኒ? 2. ዓዲህ አይሁዳ ያኪኒም ማንጎ አራሓህ ፋይዳ ለ፣ ዋና ጉዳይ፣ መዔፉጊህ ቃል አይሁዱህ ሐደራህ ዮሖወርከህ ኪኒ። 3. ይቦል አይሁዱኮ ጋሪጋሪ ታምኢምነም የኪኒህ ሱገዋንዶ፣ ተን አማንቲ አከዋየናማህ መዔፉጊህ አምአማማን አክ ራዒሳ?
4. ኢንኪጉል ማራዕሳ!"
ኢሲ ቃልኮ ኡጉተሚህ ሓቀለቲያ ታከ፣
ኢስ ጉዳይህ ባዕላክ ለ ፊርደህ አክታስሉገ"የህ ይምጽሕፈም ባሊህ፣ ሒያው ኡምቢህ ዲራብሊት ተከሚህ መዔፉጊ ሓቀይና ኪኒ፡፡
5. ያኮይ ኢካህ ኒኃጢአት መዔፉጊህ ጽድቀ ያይቡሉወቲያ የከምኮ አማይጉል አይም ና? መዔፉጊ ኒኃጢአቲህ ዳዓባል ኒያቅጺዔጉል ሓቀ ለ ፈራዲ ማኪ? ታሃም ዋንሲናም ምናዳም አታሓሳሲባህ ኪኖ፡፡ 6."መዔፉጊ ሓቀ ለ ፈራዲ ማኪ" ያናም ኢንኪጉል ማዺዒማታ፣ ታሃም ተከምኮማ መዔፉጊ ዓለም አሞል አይናህ የህ ያፍርደ? 7. ያከካህ ይድራብ ፉጊ ሓቀ አግላጾ ካ ኪብሪህ ማንጋ ያስቡሉወቲያ የከምኮ፣ አይምቡሳ አኑ ኃጢአተይና ባሊህ ዮልያምፍርደም፣ አይሚህ ምክንያታል ኪኒ? 8. ውልውል ሒያው መዔ ጉዳይ ገይኖክ ኡማ ጉዳይ አብኖይ አይክ ያይምህርኒሚህ ይምግድኒህ ይያክሲሲን፣ አማይጉል ተን አሞል አፍርደ ፍርዲ ትክክል ኪኒ፡፡
ሒያው ኡምቢህ ኃጢአተይናታት ኪኖን
9. ይቦል ናኑ አይሁዳውያንከ አረማውያንኮ ናይሰ ማለት ኪኒ? ኢኪጉል ማናይሰ! አይሁድ ያኮናይ አረማውያን፣ ሒያው ኡምቢህ ኃጢአተይናታት ኪኖኑም ኦኮመህ ኢይርዲኤህ አኒዮ፡፡ 10. አይሚህ ታህ የህ ይምጽሕፈ፣ "ኢንከቲ ኡካ ጻድቅ ኪን ሒያውቲ ሚያነ፣
11. ያስትውዒለቲ ሚያነ፣
መዔፉጎ ጉራቲ ሚያነ፣
12. ኡምቢህ ሓቂ አራሕኮ የውዒኒህ የምገገይን፣
መዔ ሢራሕ ሢራሓ ኢንኪ ሒያውቲ ኡካ ሚያነ፣
13. ሒያው ቢያካ ኡማ ቃል ዋንስቶና ተን አፍ
ዱኮ ባሊህ ፋኪታቲያ ኪኒ፣
ተን አራብ ያይተለለ፣
ተን ዋገቢህ ዋኒ ዓሮራ መርዝ ባሊህ ብያካቲያ ኪኒ፣
14. ተን አፊህ ዋኒ ሚሪር አባሮህ ተመገቲያ ኪኒ፣
15. ተን ኢቢ ሒያው ጊድፎህ አፍተና ኪኒ፣
16. ተን አራሓል ገይምታም ሊይከ መከራ ኪኒ፣
17. ሳላም አራሕ ሚያዽጊን፣
18. ፉጎ ኢንኪጉል ማማይሲታን።"
19. ሕጊ ትኢዛዝ ያይቡሉወምከ፣ ሕጊ ዳባል ታነም ኪኖም ናዺገም፣ ታይ ምክንያታል ሒያው ታይምክንየም ዋይታህ ሲኒ አፍ ያብዺን፣ ዓለም ሙሉኡድ መዔፉጊህ ፍርዲ ዳባል ያከ፡፡ 20. አማይጉል አኪናን ሒያውቲ ፉጊ ነፊል ሙሴ ሕገ ይፍጽመሚህ ሚያጽድቀ፣ አይሚህ ሕጊ ያይቡሉወም ሒያው ኡምቢህ ኃጢአት ለም ኪኖኑም ኪኒ፡፡
ሒያው ኡምቢህ ታጽዲቀም ኢምነቲህ ኪኒ
21. ካዶ ለ መዔፉጊ ሒያው አካህ ታጽድቀ አራሕ ሕገኮ ናፃ የከህ ይምቡሉወ፣ ታሃም ሙሴ ሕገከ ነብያታህ ይምስኪረ፡፡ 22. አማይጉል መዔፉጊ ኢንኪ ባዽሳ ሂኒም ኢየሱስ ክርስቶሱል ታምነሚህ ኡምቢህ ጽድቀ ያሓየ፡፡ 23. አይሚህ ሒያው ኡምቢህ ኃጢአት ሢራሕተ፣ ፉጊ አካህ ዮሖወ ኪብረ ዋየን፡፡ 24. አማይጉል ሒያው ኢየሱስ ክርስቶስ ይፍጺመ ድኅነት ሥራሓህ፣ መዔፉጊህ ጸጋህ ዲቦህ ያጽድቂን፡፡ 25. ፉጊ ኢየሱስ ክርስቶስ መሥዋዕት አበህ ካብ ኢሰም፣ ካያህ ታምነም ኡምብክ ካቢሎህ ሲኒ ኃጢአታህ ሕድጎት ገዮና የህ ኪኒ፣ መዔፉጊ ታሃም አበም ባሶል ኃጢአት አኔየዋ ቲያ ባሊህ ሎወህ ኢሲ አሞህ ጽድቂ አራሓ ያይባላዎ ኪኒ፡፡ 26. ካዲ ዳባናህ መዔፉጊ ኢሰ ጻዲቅ ኪናም ያይቡሉወም ኢየሱሱህ ታሚነም ኡምቢህ ያይጻዳቆና ኪኒ፡፡ 27. አማይጉል አካህ ናምኪሔ ምክንያት አይምቶ ኪኒ? ሕገ ናፍጺመሚህ ኪኒ? ማለ፥ ያኮይ ኢካህ ኢምነቲህ ጥራሕ ኪኒ፡፡ 28. አማይጉል መዔፉጊ ሒያው ያይጽድቀም፣ ሒያው ሕጊ ሢራሕ ትፍጽመሚህ አከካህ፣ ኢምነቲህ ኪናም ናስትውዒለ፡፡ 29. ወይ መዔፉጊ አይሁድ አምላክ ዲቦህ ኪኒ? አረማውያን ቲያ ማኪ? ዓዲህ አረማውያን አምላክ ለ ኪኒ፡፡ 30. መዔፉጊ ኢንከቶ ኪኒ፣ አይሁዳ ያኮይ አረመንታ፥ ኢምነቲህ ያይጽደቀቲ ካያ ኪኒ። 31. ይቦል ኢምነት ምከንያታል ሕገ ናስዒረ ማለት ኪኒ? ማለ! ናቢህ ሕገ ሲክ ኢሲነህ አብዽክ ናነ፡፡
ማዕራፋ 4
አብራሃም ኢምነቲህ ይጽድቀ
1. አማይጉል ባሶ ና አባ አብራሃም ገየ ናዽሔም አይም ኪኒ? 2. አብራሃም ይጽድቀም ሢራሓህ የከህ ያከዶ አካህ ያምኪሔ ጉዳይ ገየ ዻዸ፣ ያኮይ ኢካህ ፉጊ ነፊል ያማካሖና ማዽዒማ፡፡ 3. አይሚህ"አብራሃም መዔፉጎል የመነጉል ካኢምነት ጽድቀ የከህ አካህ ሎይመ" የህ ይምጽሕፈ፡፡ 4. ሢራሓ ሒያውቲ ገያ ደሞዝ፣ ኤዳ ካኃሊህ ጉልበቲህ ሊሞ ኪንካህ ሒንዳህ ማኪ፡፡ 5. ሒይውቲ መዔ ሢራሕ አለዋየምህ ኡካ ኃጢአት ለም ያይጽድቀ አምላካል የመነምኮ፣ ኢምነት ጽድቀ የከህ አካህ ሎይማ፡፡ 6. ዳዊት ለ ኢሲ ደፍራህ ፉጊ መዔ ሢራሕ ማለህ ያጽድቀ ሒያውቲ አይዻ የምበረከቲያ ኪናም ዓዶሰህ ታህ የዸሔ።
7."ተን በደል ኤልራዔ ማራከ
ተን ኃጢአት አካህ ይምድምሲሰ ሒያው
ተምበረከም ኪኖን፣
8. መዔፉጊ ካኃጢአት ኤል ሎወ ዋ ሒያውቲ የምበረከቲያ ኪኒ፡፡"9. ኢስኪ ዳዊት ዋንሲተም ታይ በረከቲህ ትምግሪዘሚህ ጥራሕ ኪኒ ወይ አምግሪዘዋተሚህ ለ ኪኒ? አምግርዘ ዋይተሚህ ለ ኪኒ፣ አይሚህ "አብራሃም መዔፉጎል የመነጉል ካ ኢሚነት ጽድቀ የከህ አካህ ሎይመ" ነዽሔ፡፡
10. ይቦል አብራሃማህ ካ ኢሚነት ጽድቀ የከህ አካህ ሎይመም አንዳ ኪን? ይምግርዘምኮ ባሶል ኪኒ ወይስ ይምግሪዘምኮ ላካል ኪኒ? ይምግርዘምኮ ባሶል ኪኒ ኢካህ ይምግርዘምኮ ላካል ማኪ፡፡ 11. አብራሃም ገናህ ያምግሪዘምኮ ባሶል ኢሚነት ጽድቀ የከህ አካህ ሎይመም ዓዶሶ ምልክት አካህ ያኮ ይምግርዘ፡፡ አማይጉል አብራሃም፣ አምግርዘካህ ታምነምህ ተን ኢሚነት ጽድቀ የከህ አካህ ሎይማ ማራህ ኡምቢህ አባ ኪኒ፡፡ 12. ታማም ባሊህ አብራሃም ትምግርዘሚህ አባ ኪኒ፣ ትምግርዘሚህ አባ አካህ የከ ምክንያት ይምግርዚን ኢርከህ ጥራህ አከካህ፣ ኡሱክ ያምግርዘምኮ ባሶል ሊይይ ይነ ኢሚነት ይክትልን ኢርከህ ኪኒ ።
ኢሚነት ዳዓባል ቶምሖወ ታስፋ
13. አብራሃም ኢሲ ሐረግሊህ (ዘርእሊህ) ዓለም ያውርሶ ኪናማህ መዔፉጊ ታሰፋ አካህ ዮሖወ፣ ታይ ታሰፋ ገይምተም አብራሃም ሕገ ይፍጽመርከህ አከካህ የመነርከህከ ካ ኢሚነት ጽድቀ የከህ አካህ ሎይመርከህ ኪኒ፡፡ 14. ታስፋህ ታውሪሰም ሕገ ታፍጽመ ሒያው የክኒምኮማ ኢምነት ሊሞ አለ ማለ፣ ታስፋ ለ ካንቶ ኪኒ፡፡ 15. ሕጊ ባሃም መዔፉጊህ ቁጡዓ ኪኒ፣ ሕጊ አኔዋየምኮ ለ ሕገ ቲላየኒሚህ በደል ሚያኔ፡፡
16. ታስፋ ትምሥርተም ኢምነት አሞል ኪይይ ቲነ፣ አማይጉል አብራሃም ዳሪ ኡምቢህ ታይ ታስፋህ ጸጋ ያውርሲን፣ ታሃም ለ ማለት ሕገህ ያጽድቅኒም ዲቦህ አከካህ አብራሃም ባሊህ ኢምነቲህ ትጽድቀም ታነ፣ አይሚህ ለ አብራሃም ኢሚነት ባርካታህ ኡማንቲህ አባ ኪኒ፡፡ 17. ታሃም አካህ ተከም ማንጎ ሒያውህ አባ ኩአቦ ኪዮ የዸሕህ ይምጽሕፈሚህ ሪሚዲህ ኪኒ፡፡ አማይጉል አብራሃም የመነርከህ፣ ራብተም ኡጉሳቲያከ አኔዋይ ይነቲ ማሮ አባ አምላኪህ ነፊል አኔዋቲ ያናዎ አባ ኢንኪ አምላኪህ ነፊል ታስፋ ትጽኒዔቲያ ኪኒ፡፡
አብራሃም ኢምነቲህ ምሳለ
18. አብራሃም የመነምከ ተሰፋ አበም ኢንኪ ታሰፋ አለዋይ ይነ ዋክተ ኪኒ፣ አማይጉል "ኩዳሪ ታህዻ ፋናህ አመንገለ"የህ ይምጽሕፈሚህ መሠረቲህ ማንጎ ሒያውህ አባ የከ፡፡ 19. ዕደመህ ቦል ኢግዲያ ታከም ኪይይ ይነጉል ኃዶይታ ኃዋሊህ ምክንያታል ዻሎ ማዽዓምከ፣ ሣራ ገድመከ ተምዔለ ቲያ ኪናም ኢዻህ ዻልቶ ማዽዕታም የዸገሚህ፣ ኢሲ ኢምነቲህ ሩኩቲያ ማኪና፡፡ 20. ኢሲ ኢምነቲህ ኃይላለቲያ የከህ መዔፉጎህ ክበረ ዮሖወካህ መዔፉጊ አካህ ዮሖወ ታሰፋህ ኢንኪጉል ማምጣራጣሪና፡፡ 21. አይሚህ ለ መዔፉጊ ዮሖወ ታሰፋ ያፊጽመ ቲያ ኪናም የዸገጉል ኪኒ፡፡ 22. አማይጉል አብራሃምማ ካ ኢምነት ጽድቀ የከህ አካህ ሎይመም ታሃማህ ኪኒ፡፡ 23. ያከካህ"ጽድቀ የከህ አካህ ሎይመ"ያዽኄ ቃል ይምፍጽመም አብራሃማህ ጥራሕ አከካህ፡፡ 24. ኖያ ለ ኤድ ኦሰህ ኪኒ፣ ንማዳራ ኢየሱስ ራባኮ ኡጉሠ አምላክ ናምነጉል ኖያህ ለ፣ ኒኢምነት ጽድቀ የከህ ኖህ ሎይማ፡፡ 25. ታይ ኢየሱስ ለ ኒኃጢአቲህ ዳዓባል ራባህ ቲላየህ ዮምሖወቲያከ ኖያ ለ ያይጻዳቆ ራባኮ ኡጉተቲያ ኪኒ፡፡
ማዕራፋ 5
ኢምነቲህ ገይማ ሳላምከ ዋጋረ /ዕርቀ/
1. አማይጉል ናኑ ጽድቀ ገይነም ኢምነቲህ ኪኒጉል፣ ኒማዳራ ኢየሱስ ክርስቶሱህ መዔፉጎሊህ ሳላም ሊኖ፡፡ 2 .ታይ ካዶ ኒጽንዔህ ኤድገይማና ጸጋድ ኢምነቲህ ኤድሳይነም ካያህ ኪኖ፣ ታስፋህ መዔፉጊህ ክብረ ታምከፈለም ኪኖም ኢዻህ ኒያታከ ሚኪሐ ሊኖ፡፡ 3. ታሃማህ ጥራህ አከካህ ኒኒ ሔልዋህ ለ ኒያትና፣ ናምኪሔ፣ ማለት ሔልዋይኮ ትዕግሥቲ ገይምታም ናዺገ፡፡ 4. ትዕግሥትኮ አምጻናናዕ፣ አምጻናናዕኮ ለ ታሰፋ ገይምታ፡፡ 5. ኖህ ዮምሖወ መንፈስ ቁዱስ አራሓህ መዔፉጊህ ካሓኒ ናፍዓዶድ የመገም ኢዻህ ታስፋ ማሖላሳ፡፡ 6. ገና ሩኩታም ነከህ ናነሃኒህ፣ መዔፉጊ ይውሲነ ዋክተ ክርስቶስ ኒኃጢአቲህ ኢዻህ ራበ፡፡ 7. ጻድቅ ኢዻህ የከህ ራባ ሒያውቶ ገያናም ጋዳህ ጸገም ኪኒ፡፡ ያከካህ መዔ ሒያውቲህ ኢዻህ የከህ ራባቲ ምናልባቲ ገይማህ ያከ፡፡ 8 ያኮይ ኢካህ ናኑ ኃጢአተይናታት ነከህ ናነሃኒህ ክርስቶስ ኒዻህ የከህ ራበ፣ ታሃም ለ ፉጊ ኖያህ ለ ካሓኒ አይዻ ናባቲያ ኪናም ያይርድኤ፡፡ 9. አማይጉል ኒጽድቀም ኢየሱስ ክርስቶስህ ቢሎህ የከምኮ፣ ናቢህ ለ መዔፉጊህ ቁጡዓኮ ናድኅነም ካአራሓህ ኪኒ፡፡ 10. አይሚህ ለ ናኑ መዔፉጊህ ናዓብቶሊት ነከህ ናነሃኒል ባዽ ራባህ መዔፉጎሊህ ዋጋርነ፣ ካዶ ፉጎሊህ ዋጋርነምኮ ላካል ያነ ባዽህ ምክንያታህ ያይሰ ዒለህ አድኅነሊኖ፡፡ 11. ታሃም ቡሳ አከካህ ዋጋረ አካህ ገይነ ኒማደራ ኢየሱስ ክርስቶስህ ምክንያታል መዔፉጎህ ናምኪሔ፡፡
ራቢ አዳምኮ፥ ሂወት ክርስቶሱህ
12 ኢንኪ ሒያውቲህ ምክንያታል ኃጢአት ዓለምል ሳየ፣ ኃጢአት ሳባታል ራቢ የመተ፣ ታሃም ሒያው ኡምቢህ ኃጢአት አብተጉል ራቢ ሒያው አሞል የመተ፡ 13. አይሚህ ለ ሙሴ ሕጊ ያምሐወምኮ ባሶል ኃጢአት ዓለምል ይነ፣ ያኮይ ኢካህ ሕጊ ኤድ አኔዋርከድ፣ ኃጢአት ኢሰህ ኃጢአታድ ማሎይማ፡፡ 14. ያኮይ ኢካህ አዳም ባሊህ ሕጊ ቲላይመጉል ኃጢአት ሢራሔ ዋይተሚህ አሞል ኡካ ራዔካህ፣ ራቢ አዳምኮ ኤዸዺሰህ ሙሴ ፋናህ ኡማን ሒያውቲ አሞል ሢልጣን ገየ። ታይ አዳም ባሶል ያሚተ ክርስቶስ ምሳለ ኪይይ ይነ፡፡ 15. ያኮይ ኢካህ መዔፉጊህ ጸጋ ሒያው ኃጢአትኮ በይታ፣ ኢንኪ ሒያውቲህ ኃጢአቲህ ምክንያታል ማንጎ ማሪ ራበምባሊ፣ ታማም ባሊህ መዔፉጊህ ጸጋህከ ኢንኪ ኢየሱስ ክርስቶስህ ባርካታህ ገይመ ሕንዳህ ማንጎ ማራህ ያይሰ ዒለህ ዮምሖወ፡፡ 16. ታማም ባሊህ ለ መዔፉጊህ ጸጋህ ፍረ ሒያውቲ ኃጢአት ፍረኮ ታይሰ፣ ኢንኪ ኃጢአቲህ ምክንያታል ዮምሖወ ፍርዲ ቅጽዓት ባሄ፣ ማንጎ ኃጢአቲህ ምክንያታል ቶምሖወ ጸጋ ጽድቀ ባህተ፡፡ 17. ኢንኪ ሒያውቲ ኃጢአቲህ ሳባባል ራቢ ሒያው አሞል ሢልጣን ገየ፣ ኢንኪ ኢየሱስ ክርስቶስህ አራሓህ መዔፉጎህ ማንጎ ጸጋ ጋራየኒህ ትጽድቀም ሙሉኡክ፣ ሱባህ ሂወቲህ ማራን፡፡
18. አማይጉል ኢንኪ አዳም ኃጢአት ቅጽዓት ፊርደ ሒያው ኡምቢሂያህ አሞል ባሄምባሊህ፣ ታማምባሊህ ኢንኪ ክርስቶስ ጽድቂ ሢራሓህ ማንጎማራ ቅጽዓትኮ ናፃ አበህ ሂወት ያሓየ፡፡ 19. አዳም አምኢዚዘ ዋየርከህ ምንያታል ማንጎ ማሪ ኃጢአተይናታት የኪኒምባሊህ፣ ታማምባሊህ ክርስቶስ አማዛዘህ ምክንያታህ ማንጎ ማሪ አጽድቀ ሎን፡፡ 20. ኃጢአት ያማንጎ ዒሎህ ሕጊ የመተ፣ ያከካህ ኃጢአት የመንገሚህ መጠኒል መዔፉጊህ ጸጋ ታይሰ ዒለህ ተመንገ፡፡ 21. ታሃም ተከም ራቢ ሳባታል ኃጢአት ይንጊሠም ባሊህ ኡምቢህ፣ ታማም ባሊህ ፉጊ ጸጋህ ኢየሱስ ክርሰቶስህ ኡላህ ገይማ ኡማንጉሊ ሂወቲህ ጽድቀ አሐይክ ያንግሠ።
ማዕራፋ 6
ኃጢአትኮ ባዽስምተህ ክርስቶህ ማራናም
1. አማይጉል አይም ና? መዔፉጊህ ጸጋ ታማጎ ኃጢአታድ ኒጽንዔህ ማርኖ? 2. ማለ! ናኑ ራባህ ባዽስማናም ባሊህ ኃጢአትኮ ባዽስምተም ነከህ ናነሃኒህ አይናህ ነህ ኃጢአታድ ኒጽንዔህ ማራክ ናነ! 3. ኢየሱስ ክርስቶስልህ ኢንከቶ ናኮ ትምጥምቀምክ ኡምቢህ፣ ካራቢህ ተሳተፍቲ ናኮ ንምጥምቀም ማታዽግኒ? 4. ጥምቀቲህ ካሊህ ኑሙዑገ ዋክተ ካራባ ሓድሊታም ነከ፣ አማይጉል ክርስቶስ አባ ክብረህ ራባኮ ኡጉተርከህ፣ ናኑ ለ ዑሱብ ሂወቲህ ማራክ ናነ፡፡
5. ራባህ ካያህ ንምጊደህ ነምሔበበረምኮ፣ ኡግታቶል ለ ካያህ ናምጊደም ትምዽገም ኪኒ፡፡ 6. ኃጢአተይና ኒሰውነት ነይገዔዽህ ኃጢአት ባሪያ ኪኖም ኖህ ራዕቶ፣ የመዔለ ኒሰውነት ታካሪመም አዽግክ ናነ፡፡ 7. አይሚህ ራበ ሒያውቲ ኃጢአታህ ያምግዚኢኒምኮ ናፃ ኪኒ፡፡ 8. አማይጉል ክርስቶስሊህ ራብነምኮ፣ ካሊህ ሂወቲህ ማርናም ናሚነ፡፡ 9. ክርስቶስ ራባኮ ኡጉተርከህ ባርካታህ ምክንያታህ ማላሚህ ማራባምከ ራቢ ለ ካአሞል ሢልጣን ማለም ናዺገ፡፡ 10. ኡሱክ ራበ ዋከተ፥ ኃጢአት ካአሞል ሢልጣን ያለምኮ ጋባዕሲሰ ዋታ አጋባቢራህ ኢንኪጉል ራበ፣ ካዶሊህ ለ ሂወቲህ ማራህ መዔፉጎህ ማራ፡፡ 11. አማይጉል ሲን አሞል ለ ኃጢአት ሢልጣን ማለምከ ኢየሱስ ክርስቶስህ አራሓህ መዔፉጊህ ሂወቲል ማርታናም ኢሕሲባ።
12. አማይጉል፣ ኃጢአታህ ራበ ሲን ሰውነቲህ አሞል ሢልጣን ያሎከ ኃዶይታ ካሓኖህ ታምግዚኤም ሲናቦ አካህ ማይፋቃድና፡፡ 13. ታማም ባሊህ፣ ሲኒ ሰውነቲህ ክፍልት ዓማጺ መሣረዒያ አብተኒህ ኃጢአታህ ማምጋዛእና፣ ያኮይ ኢካህ ራባኮ አካህ ኡጉተኒካህ ሲናሞ መዔፉጎህ ካብኢሳ፣ ሲን ሰውነቲህ ክፍሊት ሙሉኡድ ጽድቂ መሣረዒያ አባይ መዔፉጎህ ኢስግዚአ፡፡ 14. አይሚህ ካዶ አቲን ኤድ ማርታናም ጸጋ ዳባል ኪኒ ኢካህ ሕጊኮ ዳባል ማኪትንጉል ኃጢአት ሲን ያግዛኦ ማዽዓ፡፡
ጽድቂ አገልግለቲ ያኪኒም
15. አማይጉል አይም ና? ሕገኮ ዳባል ኪኖም ራዕተህ ጸጋ ዳባል ኪኖጉል ኃጢአት ሢራሕኖይ ማለት ኪኒ? ኢንኪጉል ማኪ! 16. ኢንኪ ሒያውቶ ታስግልጊለም ተኪኒህ ታምአዛዞና ሲኒ ዸግኃ ካብ ሳንጉል፥ ቶይ አካህ ታምኢዚዚን ሒያውቲህ አገልገልቲ ኪቲኒም አዽጊክ ታኒን፣ ታማም ባሊህ ኃጢአታህ ታምኢዚዚንጉል፣ ራባ ሲናል ባሃ ኃጢአት ታስግልግለም አኪክ ታኒን፣ መዔፉጎህ ታምኢዚዚንጉል ለ ጽድቀ ገያክ ታኒን፡፡ 17. አቲን ቶኮሚኒህ ኃጢአት ባሪያ ክይክ ቲኒን፣ ካዶ ለ ጋራይተን ትምሂርቲህ አፍዓዶኮ አካህ ትምኢዚዚን ኢርከህ መዔፉጎህ ምስጋና ለም ታኮይ። 18. ኃጢአት ባርነትኮ ናፃ ተውዒኒህ ጽድቂ አገልገልቲ ተኪን፡፡ 19. አኑ ሒያዋህ ኤዳ አፋህ ዋንሲታም ተን አተሐሳስባህ ሩክታኮ ኡጉተሚህ ኪኒ፡፡ ቶኮሚኒህ ሲኒ ሰውነቲህ ክፍሊት ርኩሰቲያከ ዓማፂ አገልገልቲ አብተኒህ ካብ ኢሰኒም ባሊህ ኡምቢህ፣ ታማም ባሊህ ካዶ ሲን ሰውነቲህ ክፍሊት ያምቃዳሶና ጽድቂ አገልገልቲ አባይ ካብ ኢሳ፡፡
20. ኃጢአት ባሪያ ክይክ ቲኒን ዋክተ ጽድቂ ጊዳድ ሲናድ አማቢይ ማና፡፡ 21. ይቦል ታማይ ዋክተ አይሚህ ፋይዳ ገይተኒ? ካዶ ሲን ማይሲሳ ጉዳይ ኮፈር ኢንኪ ፋይዳ ማገይኒቲን፣ ታይ ጉዳይህ ባክቶ ራባ ኪኒ፡፡ 22. ካዶ ለ ኃጢአት ባርነትኮ ናፃ ተውዒኒህ ፉጊ አገልገልቲ ተክንሚህ ቅድስና ገያክ ታኒን፣ ቅድሳና ባክቶ ኡማንጉሊህ ሂወት ገያናም ኪኒ፡፡ 23. አይሚህ ኃጢአትኮ ገይምታ ሊሞ ራባ ኪኒ፣ መዔፈጎኮ ገይማ ጎሮን ለ ማደራ ኢየሱስ ክርስቶስህ ባርካታህ ገይማ ኡማንጉሊት ሂወት ኪኒ፡፡
ማዕራፋ 7
ሙሴ ሕገኮ ናፃ ያኪኒም
1.'ይሳዖሎ! ኡምቢክ ለ ሕገ ታዽግንጉል፣ ሕጊ ሒያው አሞል ሢልጣን ለም ሒያው ሂወቲህ ታነም ፋናህ ጥራህ ኪናም ታዽጊን፡፡ 2. ምሳለህ ኦርቢሰ ኑማ ባዕሊ ሂወቲህ ያነም ፋናህ ሕገህ ቱምዹወቲያ ኪኒ፣ ባዕሊ ራበምኮ ለ አካህ ቱምዹወህ ቲነ ሕገኮ ናፃ ኪኒ፡፡ 3. አማይጉል ባዕሊ ሂወቲህ ያነሃኒህ አኪ ባዻሊህ ኃዶይታ ጊብረህ ቲታ ገያንጉል አመንዛሪት አክያን፡፡ ባዕሊ ራበምኮ ለ ካሊህ ኤድ ቱምዹህ ቲነ ሕገኮ ናፃ ታውዔ፣ አኪ ባዻ ሕገህ ኦርብሰምኮ ለ አመንዝራ ማኪ፡፡ 4. ይሳዖሎ! ሲን ኩነታት ታህ ኪኒ፣ አቲን ክርስቶስ አካሊህ ክፍለ ኪቲንጉል ራባህ ባዽስማናም ባሊህ ሙሴ ሕገኮ ባዽስመተን፡፡ አማይጉል መዔፉጊህ አገልግሎቱህ ፍረ ናይፋራዎ ራባኮ ኡጉተ ክርስቶስ ወገን ነከ፡፡ 5. አይሚህ ኃዶይታ ፍቃዳህ ጋሓንጋሓክ ኒነ ዋክተ ሕጊ ኡጉጉሰ ኡማ ትምኒት ራባ ናይፋራዎ ኒሰውነቲህ ክፍለድ ሢራሓይ ይነ፡፡ 6. ካዶ ለ ኒዩዹወህ ይነ ሕገኮ ራባህ ባዽስማናም ኢዻህ ባዽስምነህ፣ ሕጊ ማዹዋኮ ናፃ ነውዔ፡፡ አማይጉል ካምቦኮ ሣረቱላል ናስግልግለም ዑሱብ መንፈሳዊ መምረሒ ኪኒ ኢካህ ባሶህ ይምጽፈ የምዔለ ሕጊህ መምረሒህ ማኪ።
ሕገከ ኃጢአት
7. አማይጉል አይም አይክ ናነ? ሕጊ ኢሰህ ኃጢአት ኪኒ? ማለ! ያኮይ ኢካህ ኃጢአት አይምቶ ኪናም ናዻጎ ናበቲ ሕገ ኪኒ፡፡ አይሚህ ሕጊ"ማታማናይን"ኢየዋዶ ትምኒት አይም ኪናም አምዺገ ማዻዺኒዮ፡፡ 8. ኃጢአት ጉርታዪ ኡምቢህ ያዳድ ያምቃሳቃሶ አበቲ ሕገኮ ያምተ ትኢዛዝ አጋጣሚህ ገየጉል ኪኒ፣ ሕጊ አኔዋየምኮ ለ ኃጢአት ጉዳይ ራበቲያ ኪኒ፡፡ 9. ሕጊ ይ'ሂወቲህ አሞል ገና ሢልጣን አለዋይ ይነ ዋክቲ ዪነ፡፡ ሕጊ ትኢዛዝ ኤድ ገየጉል ለ ኃጢአት ሂወት ገየ፡፡ 10. አኑ ለ ራበ፣ ሂወቲህ ዮምሖወ ሕጊ ትኢዛዝ ያሞል ራባ ባሄ፡፡ 11. አይሚህ ለ ኃጢአት ሕጊ ትኢዛዝ ሳባብ አበህ ይየተለለ፣ ትኢዛዝ አራሓህ ይይግድፈ፡፡
12 .አማይጉል ሕጊ ቁዱስ ኪኒ፣ ትኢዛዝ ለ ቁዱስከ ሓቂ መዔቲያ ኪኒ፡፡ 13. ይቦል ታይ መዔቲያ የከ ጉዳይ ዮያል ራባ ባሄ ማለት ኪኒ? ማለ! ራባ ዮልባሄቲ ኃጢአት ኪኒ፡፡ ኃጢአት አይምቶ ኪናም ያማዻጎ፣ መዔም አኪናን ጉዳይ ይይምክኒየህ፣ ያሞል ራባ ዮክባሄ፡፡ አማይጉል ኃጢአት ኡምነ ታመዽገም ሕጊ ትኢዛዛቲህ ምክንያታል ኪኒ፡፡
ሒያው ሂወቲህ አዻል ታነ ዱፍላ
14. አማይጉል ሕጊ መንፈሳዊ ኪናም ናዽገ፣ አኑ ለ ኃጢአት ባሪያ አኮ ትምቢሔ ኃዶይታ ኪዮ፡፡ 15. አኑ አባም ማዺገ፣ አይሚህ ኪኅኒዮ ጉዳይ አባናም ሓባህ፣ ኒዒቢዮ ጉዳይ አባክ አኒዮ፡፡ 16. አማይጉል አኑ አባም አቦ ጉረዋ ጉዳይ አባም ኤከምኮ፣ ሕጊ መዔቲያ ኪናም ዓዶሳ፡፡ 17. አማይጉል አቦ ጉረዋ ጉዳይ አባም፣ ያዳድ ያነ ኃጢአት ኪኒካ ዮያ ማኪ፡፡ 18. ያዳድ ወይ ይ'ኃዶይታህ ባህሪ ኢንኪ መዔ ጉዳይ ማለም አዽገ፣ አይሚህ ለ ኢንኪጉል ኡካ መዔ ጉዳይ አባናሚህ ዲላይ ኤለሚህ ቶይ መዔ ጉዳይ አባናሚህ ዽዕ ማሊዮ፡፡ 19. አቦ ጉራ መዔ ጉዳይ ማባ፣ ያከካህ ጉረዋ ኡማ ጉዳይ አባክ አኒዮ፡፡ 20. ታጉል አቦ ጉረዋ ኡማ ጉዳይ አባም ኤይከምኮ፣ ታይ አባም፣ ያዳድ ያነ ኃጢአት ኪኒካ ዮያ ማኪ ማለት ኪኒ፡፡
21. አማይጉል መሠረታዊ ሓሳብ ሢራሕ አሞል ኪናም አብሊክ አኒዮ፣ አይሚህ መዔ ጉዳይ አቦ ጉራህ፣ ኡማ ጉዳይ አቦ አምግድድክ አኒዮ። 22. ያዳህ ይ ሰውነት መዔፉጊህ ሕገህ ኒያታ፡፡ 23. ያኮይ ኢካህ ያእሞሮህ ሕገኮ ተጻይ አኪክ ይሰውነቲህ ክፍሊህ አዳድ ሢራሓ ኃጢአት ሕገህ ዩምዹወቲያ ያባ አኪ ሕጊ ይሰውነቲህ ክፍሊህ አዳድ ያነም አብልክ አነ፡፡ 24. አኑ አይዻ ዮምቦሎሶወህ ይምንሚነህ ሒያወቶ ኪዮ! ራቡላል ይበያ ታይ ሰውነትኮ ኢይ ይያድኅነ ለ? 25. ማደራ ኢየሱስ ክርስቶሱህ መዔፉጎህ ምስጋና ታኮይ፡፡ አማይጉል አኑ ኢኒ አእሚሮህ መዔፉጊህ ሕገህ ያምግዚኤቲያ ኪይህ፣ ኢኒ ኃዶይታህ ባህሪህ፣ ኃጢአታህ ይምግዚኤቲያ ኤከህ አኒዮ፡፡
ማዕራፋ 8
ሂወት መንፈስ ቁዱሱህ
1. አማይጉል ኢየሱስ ክርስቶስልህ ኅብረት ለም ካዶ ኩነኔ ማሎን፡፡ 2. አይሚህ ኢየሱስ ክርስቶሱህ ሂወት ያሓየ መንፈስ ቁዱስ ሕጊ ኃጢአትከ ራቢ ሕገኮ ናፃ ይ'የየዔ፡፡ 3. ሒያውቲ ባህሪህ ኃዋልኮ ኡጉተሚህ ሕጊ አቦ ዺዔዋየም መዔፉጊ አባ፣ ፉጊ ኢሲ ባዻ ኃጢአተይና ተከ ኃዶይታህ ምሳለህ ፋረ፣ ኃጢአታህ መሥዋዕት አበዋየሚህ ታይ ባዽ ኃዶይታህ ሒያው ኃጢአት ፊርደ የይለየ፡፡ 4. ታሃሞም ለ አበም ኃዶይታ ፍቃዳህ አከካህ መንፈስ ፍቃዱሱህ ጋኃንጋኅና ኖያድ ሕጊ ትኢዛዝ ያምፋጻሞ ኪኒ፡፡ 5. ኃዶይታ ፍቃዳህ ማርታም ኃዶይታ ጉዳህ፣ መንፈስ ፍቃዳህ ማርታም ለ መንፈሳዊ ጉዳይ ያሕስቢን፡፡ 6. ኃዶይታ ጉዳይ ያሕስቢኒም ራባ ባህታ፣ መንፈሳዊ ጉዳህ ያሕስቢኒም ለ ሂወትከ ሳላም ባህታ። 7. አይሚህ ኃዶይታ ጉዳይ ያሕስበ ሒያውቲ ፉጊ ሕገህ ምያምኢዝዘጉልከ ያምአዛዞ ማዺዓጉል መዔፉጊህ ናዓብቶሊ ያከ፡፡ 8. ኃዶይታ ጉዳህ ያምግዚኤ ማሪ ፉጎ ኒያቲሶና ማዺዓን፡፡
9. አቲን ለ መዔፉጊህ መንፈስ ሲን አዳድ ይኔምኮ መንፈስ ዲላህ ኢካህ ኃዶይታ ፍቃዳህ ማማርታን፣ ክርስቶስ መንፈስ አለዋ ሒያውቲ ክርስቶስ ወገን ማኪ፡፡ 10. ክርስቶስ ሲን አዳድ የከምኮ ኢንኪጉል ኡካ ሲን ኃዶይታ ኃጢአት ምክኒያታል ራቦንታ ተከሚህ መዔፉጊ ሲን ያይጽድቀም ኢዻህ ሲን መንፈስ ያነቲያ ኪኒ፡፡ 11. ኢየሱስ ራባኮ ኡጉሠ መዔፉጊህ መንፈስ ሲን አዳድ ይኔምኮ፣ ኢየሱስ ክርስቶስ ራባኮ ኡጉሠ አምላክ ሲን አዳድ ማራ መንፈስህ አራሓህ ራቦንታ ኪን ሲን ኃዶይታህ ሂወት ሲናህ ያሓየ፡፡
12. አማይጉል ኢኒ ሳዖሎ! ኒኒ ሂወቲህ ግዳድ ሊኖ፣ ያኮይ ኢካህ ታይ ጊዳድ ኃዶይታ ፍቃዳህ ማራናም ማኪ፡፡ 13. ኃዶይታ ፍቃዳህ ማርተኒምኮ ራበልቲን፣ ያከካህ መንፈስ ድጋፋህ፣ ኃዶይታ ሢራሕ ትግድፊኒምኮ ሂወቲህ ማረሊቲን፡፡14 .መዔፉጊህ መንፈስህ ታምሪሔም ኡምቢህ ፉጊ ዻይሎ ኪኖን፡፡ 15. አማይጉል"አባ አባ”ተኒህ ደዕታን ዒንዻነይቲ መንፈስ ጋራይተን ኢካህ ባርነት መንፈሲህ ማጋራይንቲን፡፡ 16. መዔፉጊህ መንፈስ ኒመንፈስሊህ የከህ ፉጊ ዻይሎ ኪኖም ያምስክረ። 17. አማይጉል መዔፉጊህ ዻይሎ ነከምኮ፣ ካወረስቲ ኪኖ፣ ክርስቶስሊህ አውርሰሊኖ፣ ካዶ ክርስቶስ መከራ ሓድሊታም ነከምኮ ሣራህ ካ ክብረ ሓድሊታም አከሊኖ ፡፡
ያሚተ ክብረ
18. ካዲ ዋክቲህ መከራ ባሶቱላል ኖያህ ይምግልጸ ክብረሊህ ያይመዘዘኒንጉል ኢንኪምሊህ ታምታካካሎ ማዽዓማም አበህ ሎወሊዮ፡፡19. ፍጥረት ሙሉኡድ መዔፉጊህ ዻይሎህ አምባላይ ናባ ሳናህ ኢላላን፡፡ 20. ፍጡር ኡምቢህ ሊሞ ማሊ ያኮ ኤልይምፍርደ፣ ታሃም ለ ኢሲ ዸግኃህ ፍቃዳህ አከካህ ፉጊ ፍቃዳህ ኪኒ፣ ያኮይ ኢካህ ታይ ታስፋ ታነ፣ 21. ታስፋ ለ ትምፊጢረም ሲኒ ተፈጥሮህ ሊዪ ባርነትኮ ናፃ ተውዒኒህ መዔፉጊህ ዻይሎሊህ ናፃነትከ ክብረ ሓድሊታም ያክኒም ኪኒ፡፡ 22. ፍጥረት ኡምቢህ ካፋ ፋናህ ኡላሎ ጽንቀህ ትምዽብዸህ ጽንቂ አሞል አምጽንቅክ ታነም ናዽገ፡፡ 23. ያኮይ ኢካህ ጽንቀክ አሞል ታነም ፍጥረት ዲቦህ ማኪ፣ ኤዸዾይታ ገጸበረከት መንፈስ ቁዱሱህ ጋራይተሚክ ናኑ ለ፣ መዔፉጊህ ዻይሎ ናኮከ ኡማን አፋህ ናፃ ናኮ ታስፋህ ኢላላክ አዳ ኒሰውነቲህ ሢቃይህ አሞል ገይማክ ናነ፡፡ 24. አይሚህ ናኑ ኒድኅነም ታይ ታስፋህ ኪኖ፡፡ ያከካህ ታስፋ ኤድአብና ጉዳይ ያምቡሉወቲያ የከምኮ ታሰፋ ታከም ራዕታ፣ ታምቡሉወሚድ ኢማ አይቲ ታስፋ ኤድአባ? 25. አብለዋና ጉዳአድ ታስፋ አብናጉል ለ ትዕግሥቲህ ኢላልና፡፡
26. ታማም ባሊህ አይናህ ነህ ጻሎት አብናም ማናዽገጉል መንፈስ ቁዱስ ኒ ሐዋሊህ ዋክተ ኒጎሮኒሳ፣ ቃላህ ያምጋላጾ ዽዕመዋ ጻዕረህ ኒዳዓባል ጻሎት አባ፡፡ 27. ሒያው አፍዓዶ ያምርሚረ አምላክ መንፈስ ቁዱስ ሓሳብ አይምቶ ኪናም ያዺገ፣ አይሚህ መንፈስ ቁዱስ ቁዱሳን ዳዓባል ጻሎት አባም ፉጊ ፍቃዳህ ኪኒ፡፡
28. መዔፉጎ ኪሕናምከ ካፍቃድ ባሊህ ደዕምምተ ሒያው፣ መዔፉጊ ኡማን ጉዳይ ተን ጥቅመህ አካህ አባም ናዽገ፡፡ 29. አይሚህ ለ መዔፉጊህ ባዽ ማንጎ ሳዖልትቲ ፋናድ ሪይስ ያኮ፣ መዔፉጊ ዮኮመህ ዶረ ባዽህ ቢሶህ ያማጋዶና ይውስነጉል ኪኒ፣ 30. ዮኮመህ ይውስነም ደዔ፣ ደዔም ተን ይጽድቀ፣ ይጽድቀም ይስክቢረ፡፡
መዔፉጊህ ካሓኖ
31. አማይጉል ታይ ጉዳክ አይም አይክ ናነ? መዔፉጊ ኖሊህ የከምኮ ኢይ ኒያምቃዋሞ ዲዓ? 32. ፉጊ ኢንኪ ኢሲ ባዻህ አካህ ናኅሩረካህ ኖያህ ቲላሰህ ዮሖወምኮ፣ ባዻሊህ ኡማን ጉዳይ ኖህ ያምሓወም ርግጸይናታት ኪኖ፡፡ መዔፉጊ ዶረም ኢንከቲ ያክሳሶ ማዽዓ፣ አይሚህ ተን ይጽድቀቲ ካያ ኪኒ፡፡ 34. ኤል ያፍራዶ ዺዓቲ አይቲያ ኪኒ? ኢየሱስ ክርስቶስ ኤልያፍሪደ? ኢየሱስ ኤልምያፍሪደ፣ አይሚህ ኡሱክ ኖያህ ራበህ፣ ራባኮ ኡጉተህ መዔፉጊ አባህ ሚድጋል ድፈየ፣ ኒዳዓባል ለ ኖያህ ዻዒማቲያ ኪኒ፡፡ 35. አማይጉል ክርስቶስ ካሓኖኮ ኒባዺሶ ዺዓቲ ኢንከቲ ሚያነ፣ ጸገም ያኮይ መከራ፣ ስደት ያኮይ ራሃብ፣ ዓራድ ያኮይ ድንገት፣ ሰይፍ ያኮይ፣ ክርስቶስ ካሓኖኮ ኒባዺሶ ማዽዓ፡፡
36. ታሃም፤
"ኩ ካሓኒህ ዳዓባል ኢሲሲ ለለዕ ራባክ ናነ፣
ታምሩሑደ ዒዶ ባሊህ ኒጊሪዔ"
የዽሔህ ይምጽሕፈም ባሊህ ኪኒ፡፡
37. አማይጉል ኒይክኅነ ክርስቶሱህ፣ ታይ ጉዳያታህ ኡምቢክ ሱባህ ሱብነምኮ ሱብተምኮ አይሰሊኖ፡፡ 38. አማይጉል ራባ ያኮይ፣ ሂወት ያኮይ፣ መላእክት ያኮይ፣ ሢልጣን ባዕል ያኮይ፣ ካዶ ታነም ያኮይ፣ ላካል ታምተም ያኮይ፣ ዓራንቲ ኃይሊት ያኮይ፡፡39. ናውታም ያኮይ፣ ላተም አኪናን ፍጥረት የከሚህ፣ ማደሪ ኢየሱስ ክርስቶስኮ ኖህ ዩምቡሉወ ፉጊ ካሓኖኮ ኒባዽሶ ዺዓቲ ኢንኪ ጉዳይ ምያነም ዓዶም ኪኒ፡፡
ማዕራፋ 9
መዔፉጊ ዶረህ ዪነ እስራኤል ህዝበ
1. ክርስቶስቲያ ኤከም ኢዻህ ሓቀ ዋንስታካህ ማድራቢታ፣ መንፈስ ቅዱሱህ ታምሪኄ ይሂሊና ማድራቢታም ዮህ ታምስኪረ፡፡ 2. ናባ ኃዛንከ ባክተዋ ጽንቂ ያፍዓዶድ ያነ፡፡ 3. ኃዶይታህ ይበተሰብ የኪን ይወገንኮ ክርስቶሱህ ባዽሲመህ መዔፉጊህ አባሮ ይማዳዶ አክኅነ ዻዸ፡፡ 4. እስራኤላውያን ፉጎህ ዶሪምመ ህዝበ ኪኖን፣ መዔፉጊ ተና ኢሲ ዻይሎ ተን አበ፣ ኢሲ ክብረ ተን ይይቡሉወ፣ ቃልኪዳን ኤሊህ ሳየ፣ ሕገ አካህ ዮሖወ፣ ሓቂ አምልኮ ተን ይስቡሉወ፣ ታሰፋ ቃል ለ አካህ ዮሖወ፡፡ 5. ኢሲን ሲኒ ማባኮህ ኢንኪ ነገዲህ አቦብኮ ተመተም ኪኖን፣ ክርስቶስ ኃዶይታህ የመተም ተንኮ ኪኒ፣ ኡሱክ ኡማኒሚህ አሞ ኪንቲያከ የምበረከቲያ ኪኒ፡፡ አመን፡፡
6. ያኮይ ኢካህ መዔፉጊህ ቃል ይምስዒረ ማለት ማኪ፣ አይሚህ እስራኤል ዻሪ ሙሉኡድ ሓቂ እስራኤላውያን ማኪኖን፡፡ 7. ታማም ባሊህ አብራሃም ዳሪ ሙሉኡክ መዔፉጊህ ዻይሎ ኪኖን ማለት ማኪ፣ አይሚህ መዔፉጊ አብራሃማህ ዳሪ ያውዔም ይስሐቅኮ ኪኒ አክየህ ይነጉል ኪኒ፡፡ 8. አማይጉል ኃዶይታኮ ቶቦከም መዔፉጊህ ዻይሎ ማኪኖን፣ ያከካህ ዳራ የኪኒህ ሎይማናም ታሰፋ ቃላህ ጢራህ ኪኒ፡፡ 9. ታይ ለ መዔፉጊ ዮሖወ ታሰፋ ቃል"ያሚተ ኢጊዳ ታይ ዋክተህ አምተሊዮ፣ ሣራ ለ ባዻ ዻለ ለ ያነም ኪኒ፡፡"
10. ታሃም ዲቦህ አከካህ ርብቃ ነገድ ናባ የከ ይሰሐቅኮ ጋንጋ ሶኒተ ዋክተ፣ 11. መዔፉጊህ ዶሮህ ሢራሓህ አከካህ ደዖህ ኪናም ያይሳዻጎ፣ ኢሪ ላማይ ያቡኪኒምከ ኡማምከ መዔም አባናሚህ ባሶል፣ 12. መዔፉጊ ርብቃክ"ናባቲይ ዒንዻቲያህ ያምገዚኤቲያ አከለ"አክየ፡፡ 13. ታሃማህ"ያዕቆብ ኢክኅነ፣ ኤሳው ለ ኢንዒበ"የህ ይምጽሒፈም ባሊህ ኪኒ፡፡ 14. አማይጉል አይም ና? "ፉጊ ያይዶሎወ ኖዋ ዺዒና? መዔፉጊ ያይዶሎወ ኖዋ ኢንኪጉል ማዽዕና! 15. አይሚህ ለ"ፉጊ ሙሴክ አምሓሮ ጉረምኮ አምሒረሊዮ፣ አካህ ናኅሩሮ ጉራማህ አካህ ናኅሩሮ"ኪዮ የዽሔ፡፡ 16. አማይጉል መዔፉጊህ ዶሮህ ገይምታም ሒያው ፍቃድከ ሒያው ሢራሓህ አከካህ መዔፉጊህ መሕረቲህ ኪኒ፡፡ 17. ታይ ምክኒያታል ፈርዖን ዳዓባል"ኮያል ኢኒ ኃይላ አስባላዎከ ይሚጋዕ ዓለምል ሙሉእ ኢያል ያማዻጎ አቦ ኩ ኢኒጊሠህ አኒዮ ያ ቃላህ ይምጽሕፈ፡፡ 18. አማይጉል መዔፉጊ ጉረቲያ ያምሒረ፣ ጉረቲያ ለ ሂሊከይና አባ፡፡
መዔፉጊህ ቁጡዓከ መሕረት
19. አማይጉል"ፉጊ ፍቃድ ያምካላካሎና ዺዒማህ የከምኮ፣ አይሚህ ቡሳ መዔፉጊ ሒያው ኡማ ሢራሓህ ተን ያውቂሰ?"ያቲ ያነዎ ያከ፡፡ 20. አቱ ኮ ሒያወቶ! መዔፉጎሊህ ታምካራካሮ አይመብቲ ሊቶ? ካላ ኑዋይ ሢራሓቲ"አይሚህ ታህ ኢሰህ ይሠራሕተ አክ ዮዋ ዺዓ?"21. ካላ ኑዋይ አባቲ /ሢራሓቲ/፣ ኢንኪ ዓይነቲህ ካላ ጺቃኮ ኢንኪ ኑዋይቶ ክብረህ፣ አንኪ ኑዋይቶ ሑሱሩህ የበሔህ ሢራሖ መብቲ ማለ?
22. ፉጊ ቁጡዓ ያይባላዎከ ኢሲ ኃይላ ለ ያይባላዎ ጉረህ፣ ሊዪህ ተምሶኖዶወ ቁጡዓ ኑዋይኮ ማንጎም አክ ይምዒጊሠ፡፡ 23. ታሃሞም አበም ዮኮመህ ክብረ አካህ ዮይሶኖዶወ መሕረት ኑዋህ ኢሲ ክብሪህ ማንጋ ያይባላዎ ኪኒ፡፡ 24. መሕረት ኑዋይ አይሁድኮ ዲቦህ አከካህ አረማውያንኮ ለ ደዕምምተም ኖያ ኪኒ፡፡ 25. ታሃም ነቢይ ሆሴዕ የም ባሊህ ኪኒ፡-
"ይህዝበ አከዋይተንሚህ 'ይህዝበ'! ኤዽሔህ ደዔሊዮ፣
አምኪኂነ ዋ ህዝበክ ለ፣ 'ይምክኂነ' ኤዽሔህ ደዔሊዮ፡፡
26. ኢሲን 'ይህዝበ ማኪቲን' ለ ኤል አክየን ቦታል
ያነ መዔፉጊህ ዻሎ አክ የኒህ ደዕሚመ ሎን፡፡"
27. ኢሳይያስ ለ እስራኤል ዳዓባል ታህ የህ አንዻሕ ናውሰህ ዋንስተ፣"እስራኤል ዻይሎህ ሎይ ባሕሪ ሖፃ ቲዳ የመንንሚህ፣ ተንኮ ታድኅነም ዳጎም ጢራህ ኪኖን፡፡ 28. አይሚህ መዔፉጊ ዓያየካህ ጋባላዔህ ዓለም አሞል ኢሲ ፊርደ ያኃየ"፡፡ 29. አማም ባሊህ ኢሳይያስ"ኃይላለ መዔፉጊ ዳራ ኖህ ራዕሰ ዋዶ፣ ሰዶምከ ጎሞራ ካቶም ተለየም ባሊህ አለየ ዻዽነ" የህ ዮኮመህ ዋንሲተ፡፡
30. አማይጉል አይም ና? ጽድቀ አኪቲለ ዋይተ አረማውያን ጽድቀ ገየን፣ ታይ ጽድቀ ኢምነትኮ ገይማቲያ ኪኒ፡፡ 31.ያኮይ ኢካህ ሕገኮ ገይማ ጽድቀ አክትሊክ ቲነ እስራኤላውያን ሕገ ያፋጻሞና ታነነጉል ጽድቀ ማማዲኖን፡፡ 32"አይሚህ ጽድቀ ማማዲኖን"ያንጉል፣ ኢሲን ጽድቀ ገዮና ጉረኒም ኢምነቲህ አከካህ ሢራሓህ ኪይይ ነጉል ኪኒ፣ አማይጉል ጎንፎይሳ ዻህ ጎንፎይተን፡፡
33. ታሃም፣
"ሀይከ ሒያው ጎንፎይሳ ዻ ጺዮኑል ዲፈሳክ አነ፣
ታይ ዻይ ሒያው ጎንፎይሳክ ዒዳ ዶንጎላ ኪኒ፣
ካያል ያምነቲ ለ ማሖላሲታ"የህ ይመጽሒፈም ባሊህ ኪኒ፡፡
ማዕራፋ 10
እስራኤላውያን መዔፉጊህ አራሕ ማካታልኖን
1. ይሳዖሎ! ያፍዓዶድ ያነ ናባ ትምንቲህከ መዔፉጎህ ካብ ኢሳ ጻሎት እስራኤላውያን ያድኃኖና ኪኒ፡፡ 2. ትክኪል ኪን ኢዽጋ ማኪጉል ክኒካ ኢሲን መዔፉጊህ መንፈሳው ቅንአት ሎኑሙ አኑ ኢነህ አካህ አምስክርክ አኒዮ፡፡ 3. መዔፉጊህ ሒያው ያይጽድቀ አራሕ አዽገዋየኒም ኢዻህ ሲኒ አሞህ ጽድቂ አራሕ ካታየን ኢካህ ፉጊ ጽድቀ ማካታሊኖን፡፡ 4. ሒያው ኡምቢህ ኢምነቲህ ታጽዳቆ፣ ሙሴ ሕጊ ክርስቶሱህ ይክቲመ።
ድኅነት ኡማንቲያህ ኪኒ
5. ሕገ ይክትልኒህ ገይማ ጽድቀ፣ ሙሴ ይጽሕፈህ ሕገ ያፍጺመቲ ኡምቢህ ሂወቲህ ማራ ያናም ኪኒ፡፡ 6. መዔፉጊህ ሒያው ኢምነቲህ ታድጽድቀሚህ ለ ታህ የህ ይምጽሕፈ፣
"ኢሲ አፍዓዶህ ዓራናል ኢይ ያውዔ?" ሚን፣
ታሃም ለ ክርስቶስ ያይዋራዶ የህ ኪኒ፡፡
7. ወይ ኢሲ አፍዓዶህ"ሲኦሉድ ኢይ ኦባ?" ሚን፣
ታሃም ለ ክርስቶስ ራባኮ ኡጉሦና ኪኒ፡፡
8. ጋባዔህ ታህ የህ ይምጽሕፈ፣
"ፉጊ ቃል ኩባሮል ኪኒ፣
ኤረ ኩአፍከ ኩአፍዓዶድ ኪኒ፣"
"ታይ ቃል ናኑ ናይብሥረ ኢምነት ቃል ኪኒ፡፡
9. ኢየሱስ ማደራ ኪናም አፋህ ታይምስክረጉልከ"ፉጊ ራባኮ ኡጉሠም ኢሲ አፍዓዶህ ታምነጉል ታድኅነ፡፡" 10. አይሚህ ሒያው ኢሲ አፍዓዶህ ታሚነጉል ታጽድቀ፣ አፋህ ለ ያምስኪሪንጉል ያድኅኒን፡፡ 11. ታሃማህ ካያል ያሚነቲ ኡምቢህ ማሖላስታ፣ የህ ይመጽሕፈም ባሊህ ኪኒ፡፡ 12. አማይጉል ኢንኪ ፉጊ ኡማንቲህ ማዳራ ኪናም ኢዻህ፣ አይሁዳ ያኮይ አራማዊ ፋናድ ኢንኪ ባዽሲ ሚያነ፣ ኡሱክ ለ ጸጋ ባዕላ ኪኒጉል፣ ዻዒምተሚህ ሙሉኡድ በረከት የይመገህ አካህ ያሓየ፡፡ 13. አይሚህ"ማዳሪ ምጋዕ ደዕታም ኡምቢህ ያድኅኒን" ያ፡፡
14. ያከካህ አሚነካህ አይናህ የኒህ ዻዒሞና ዺዒማ? ካ ዳዓባል አበካህ አይናህ የኒህ ያምንኒ? 15. በሠራታ ቃል ታይብሥረም አበካህ አይናህ የኒህ ያይባሣሮና ዺዓና፣ ታይ መዔ ዋረ ያብሥርቲህ ሙሙት አይዻ ኒያቲሳ! የህ ይምጽሕፈም ባሊህ ኪኒ፡፡ 16. ያከካህ ኢሳይያስ"ኦ'ማዳራ!"ዋንሰ ቃል ኢንከቲ ማጋራይና የህ ዋንስተም ባሊህ ኡምቢህ ለ በሠራታ ቃል ማጋራይኖን፡፡ 17. አማይጉል ኢሚነት ገይማም በሠራታ ቃል ዮብኒምኮ ኪኒ፣ በሠራታ ቃል ክርስቶስ ዳዓባህ ዋኒሳን ትመህርቲ ኪኒ፡፡ 18. ኢስክ ኩኤሠሮ፣ ይቦል ካቃል ማቢኖን ማለት ኪኒ? ማጽሐፋል፣
"ተን አንዻሕ ዓለሚል ሙሉኡድ ዮሞበ፣
ተን ቃል አይከ ባዾ መሔለዲያ ፋናህ" የህ
ይምጽሕፈም ሪግጺህ ዮቢን፡፡
19. ጋባዔህ፣ ኤስራኤላውያን ካቃል ማዻጊኖን ማለት ኪኒ?
ታሃም ያናምኮ ኢማ ሙሴ ዮኮመህ፣
"ዻይቲመ ህዝበ አይስኒሰህ ተን አይነሰሔ ሊዮ፣
አስቲውዒለ ዋ ህዝበ ለ ተን አይቁጡዔ ሊዮ" የዽሔ፡፡
20. ኢሳይያስ ለ፣
"ይጉረ ዋ ማራህ ገይመ፣'
መዔፉጊ አል ኪኒ?' የኒህ የሠረዋይተሚህ ኡምቡሉወ"ያናም ይድፍረህ ዋንስተ፡፡
21. እስራኤላውያን ዳዓባል ለ"አምእዚዘዋ ዓምፀይና ኪን ህዝቢ ዩላል ያመቶና ለለዕ ሙሉኡድ ኢኒ ጋቦብ ፋሕ ኢሰ /እዝርጊሔ/" ያ፡፡
ማዕራፋ 11
ፉጊ እስራኤላውያን ኢንኪጉል ማንዓቢና
1. ኢቦል ለ ኮኤሠሮ፣ መዔፉጊ ኢሲ ህዝበ ዒደ? ኢንኪጉል ማዒዲና! አኑኮ ኢነህ እስራኤልታ ኪዮ፣ አብራሃም ዳራኮ የከ ቢኒያም ነገድ /ሐረግ/ ኪዮ፡፡ 2. አማይጉል ፉጊ ዮኮመህ ዶረ ህዝበ ማዒዲና፣ ማጽሓፍ ኤልያስ ዳዓባል አይም የም ማታስትውዒሊኒ? ለል ኤልያስ እስራኤል ህዝቢ መዔፉጊህ ነፊል አይም የህ ይክሲሰም ማታዽጊኒ? 3. ታማይ ዋክተ ኤልያስ"ማደራ! ኩነብያት ይግድፊን፣ ኩመሥዋዕቲህ ቦታ ዮስዖኖውን፣ አኑ ዲቦህ ራዔ፣ ዮያ ለ ያግዳፎና ጉራይ ያኒን"የህ ይነ፡፡ 4. ያኮይ ኢካህ መዔፉጊ አይም የህ ኤልይምሊሰ? ዲራብቲ አምላካህ ባዓላህ አስግደዋየ ማልሕና ሲሕህ ሒያውቲያ ኢነህ ራዕሰህ አኒዮ የዽሔ፡፡ 5. ካዲ ዳባን የከምኮ ጸጋህ ዶሪምመኒህ ራዕተ ዳጉ እስራኤላውያን ያኒን፡፡ 6. ዶሮ ጸጋህ የከምኮ ሢራሓህ ማኪ ማለት ኪኒ፣ ሢራሓህ ያከዶማ ጸጋ ሊሞ ሂንቲያ አከ ዻዸ፡፡
7. ይቦል ውጤት አይም ያከ? እስራኤላውያን ጉረኒም ማገኖን፣ ዶሪምተም ለ ጉረኒም ገየን፣ ራዕተም ሓቀ ያብሎና ታኒን፡፡ 8. ታሃማህ"መዔፉጊ ተን አፍዓዶ ይድንዚዘ፣ አማይጉል ካፋ ፋናህ ሲኒ ኢንቲህ ሚያብሊን፣ ሲኒ አይቲቲህ ሚያቢን፣ የህ ይምጽሕፈም ባሊህ ኪኒ፡፡
9. ዳዊት ለ"ተን ማይዲ ያብዸ ማጻወድ፣
ዒዳ ሁጉም የከህ ተን ያይሳቃዎይ፡፡
10. ተን ኢንቲት ታብለምኮ ዲቶይቶይ፣
ተን ዺዾዽ ጸገሚህ ኡማንጉል ጉዱቶይ" የዽሔ፡፡
11. ኢስኪ ጋባዔህ ኩኤሠሮ፣ አይሁድ የምሰነከሊኒም ኡማንጉሉህ ያለይኒም ፋናህ ኪኒ? ማለ! አይሁድ በደልህ ምክንያታል አረማውያን ድኅነት ገየን፣ ታሃም ተከም፣ ኢሲን አረማውያናል አይሲኖና አቦና ኪኒ። 12. አይሁድ በደል ዓለሚል ማንጎ በረከት ገይሲሰ፣ ተን ራዲ ለ አረማውያናህ በረከት አካህ የከ፣ አይሁድ ሙሉኡድ ይድኂንኒህ ያከዶማ በረከት አይዻ ማንጎም አከ ዻዽ።
አረማውያን ድኅነት
13. ካዶ አማይጉል ዋንስታም ሲናህ አረማውያናህ ኪዮ፣ አረማውያን ሐዋሪያ ኪዮሚህ መጠኒል ኢኒ አገልግሎቱህ ክብሪ ዮድ ያማበ፡፡ 14. ታሃም አበርከህ ይወገን ተከ አይሁድ አይሲኒሶ ኪኒ፣ ታይ አገባቢራህ ምናልባት ተንኮ ጋሮጋሮ አይዳኃኖ አከልዮ፡፡ 15. መዔፉጊ ተና ዒዳ ዋክተ አኪ ዓለሚህ ህዝቢ ፉጎሊህ ዋጋረኒምኮ፣ መዔፉጊ ተን ጋራ ዋከተ አይም ታከም ታካሊን? ታሃም ኢማ ራባኮ ኡጉተኒም ኢዻ ኪኒ!
16. ኢንኪ ዓይነቲህ ሊጥኮ ኤዸዾይታ ክፍሊ ይምቅድሰቲያ የከምኮ፣ ቡኩዕ ሙሉኡድ ይምቅድሰቲያ ኪኒ፣ ታማም ባሊህ ኢንኪ ሓዻክ ሪምድ ይምቅድሰቲያ የከምኮ ሓኮክ አክ ትምቅዲሰም ኪኖን። 17. ዓዳድ /ውሳጠድ/ ታነ ኦላዕቶ ሓዻህ ሓኮኮ ባሊህ ተከ አይሁድ ይግሪዒኒህ ራዳንጉል፣ ጋራብ ኦላዕቶ ሓዻህ ሓኮክ ባሊህ ተከ አረማውያን ተን ቦታድ ይምትክኢኒህ ተን ሀብተከ በረከት ሓድሊታም ያኪን፡፡ 18. አማይጉል አቲን አረማውያን ሓኮክ ባሊህ ቲግሪዔህ ራደ አይሁድ አሞል ማታዕባቲና፣ አይሚህ አቲን ሓኮኮ ጥራህ ኪቲንጉል ሪሚድ ሲን ያይኩዔ ኢካህ አቲን ሪምድ ማታይኩዒንጉል ታማካሖና ሲናህ መዳ፡፡
19. ያከካህ"ሓኮክ ትግዲለህ ራደም ናኑ ተን ቦታድ ናምታካኦ ኪኒ"ታናህ ታኪን፡፡ 20. ሲን ሞዽሖ ትክኪል ኪኒ፣ ያኮይ ኢካህ ኢሲን ይግሪዒኒህ ራደኒም አሚነ ዋየንርከህ ኪኒጉል፣ አቲን ሲክ ተኒህ ሶልተኒም ተመኒን ኢርከህ ኪኒ፣ ኢቦል ኡኮ ማይሲቶና ኢካህ ታታዕባቶና ሲናህ መዳ፡፡ 21. አይሚህ መዔፉጊህ ተፈጥሮ ሓኮክ ኪን አይሁዱህ አካህ ናኅሩረ ዋየምኮ፣ ሲናህ ለ ኡኮ ማናኅሩራ፡፡ 22. አማይጉል መዔፉጊህ ናኅሩርከ ጽካነ ኡቡላ፣ ጺካነ ያይቡሉወም ራደሚህ አሞል ያከጉል፣ ናኅሩር ያይቡሉወም ለ ሲናል ኪኒ፣ ታሃም አባም ካያ ተመንኒህ ሲክ ተኒህ ማርቶና ኪኒ፣ ሲክ ኢየዋይተኒምኮ ለ አቲን ለ ትግርዒኒህ ራደሊቲን፣ 23. አይሁድ ኢምነትዋይቲ የለይኒምኮ ሲኒ ባሶ ቦታል ጋኄ ሎን፣ አይሚህ ለ ፉጊ ተን ባሶ ቦታል ተን ደሄዎ ዺዓ፡፡ 24. አቲን አረማውያኖ ተፈጥሮህ ባራኪ ኦላዕቶ ሓዻ ሓኮክ ተኪኒህ ታንንሃኒህ ሲኒ ቦታኮ በሓል ዓሪ ዓዳህ /ውሳጠድ/ ኦላዕቶ ሓዻህ አሞል ታምታካሎና ዽዕተኒምኮ፣ ውሳጠት ኦላዕቶ ሓዻ ሓኮክ ተከ አይሁድ ሲኒ ባሶ ቦታል ጋኄኒህ ያምታካሎና አይናህ የኒህ ዺዔዋናም !
መዔፉጊህ መሕረት ኡማንቲያህ ኪኒ
25. ይሳዖሎ! ማዻጊት ኪኖ ተኒህ ማማካኅና፣ ሲናካ ኢንኪ ምሥጢር ያነ፣ ታሃም ለ እስራኤላውያን ማዮ ያናም ኡማንጉሉህ አከካህ ደዕምምተ አረማውያን ኡምቢህ ፉጎ ዻጋህ ያምትኒም ፋናህ ኪኒ፡፡ 26. አማይጉል እስራኤላውያን ሙሉኡክ ያድኅኒንም ታይ ዓይነቲህ አጋባቢራህ ኪኒ፡፡ አማይጉል ታህ የህ ይምጽሕፈ፣
"ያይዲኅነቲ ጽዮንኮ ያሚተ፣
ያዕቆብ ዳራኮ ኡምቢህ ኃጢአት ያይለየ፡፡
27. ተን ኃጢአት ለ አካህ ያድምሲሰ ዋክተ
ተንሊህ ሳይ ቃልኪዳን ታይቲያ ኪኒ፡፡"
"28. እስራኤላውያን በሠራታ ቃል ጋራየ ሒነንጉል አቲን አረማውያን ጥቅመህ መዔፉጊህ ናዓብቶሊት ተኪን፣ ያከካህ ዶሮቱላኮ ነገድ አቦብቲህ ምክንያታል መዔፉጊህ ካኃንቶሊት ኪኖን፡፡ 29. አይሚህ ለ ፉጊ ዶረህ ኢሲ ጸጋ አካህ ዮሖወሚህ ላካል አበ ጉዳህ ምያነሰሔ፡፡ 30. አቲን ኡኮ አራማውያን ባሶል መዔፉጎህ አምኢዚዘ ዋይታም ክይክ ቲኒን፣ ካዶ ለ አይሁድ አምኢዚዘ ዋየንርከህ ምክንያታል አቲን ፉጊ መሕረት ገይተን፡፡ 31. አቲን መሕረት አካህ ገይተንሚህ ዓይነቲህ ኢሲን ለ መሕረት ገዮና ኢሲን ለ ካዶ መዔፉጎህ አምኢዚዘ ዋይታም የኪን፡፡ 32. አይሚህ ፉጊ ኢሲ መሕረት ሒያው ኡምብህ ያይባሎዎ ዮዋ ሒያው ሙሉኡድ ሲኒ ማዮህ ቱምዹወም ያኮና ተንአበ፡፡
መዔፉጎህ ካብተ ምስጋና
33. መዔፉጊህ ሀብተከ ጠበብከ ኢዽጋ ለ አይዻ አዳለቲያ ኪኒ! ካፊርዲ አክ ሚያምርምረ፣ አራሕ ለ አክ አምዺገ ዋያቲያ ኪኒ፡፡
34."መዔፉጊህ ሓሳብ ያዽገቲ ኢንከቲ ሚያነ፣
ካአማካሪ ያከቲ ሚያነ፡፡
35. ፉጎ ያይልክኄ ቲያከ ይልክኄም
አክ በያቲ ቲይ ሚያነ፡፡"
36. አይሚህ ኡማን ጉዳይ ገይማም ካኮ፣ ካከ ካያህ ኪኒ፣ ኡማንጉሊ ክብሪ ካያህ ያኮይ አመን።"
ማዕራፋ 12
ፉጎ ያስጋልጋሎና አይናህ የኒህ ማሮና ኤዳም
1. አማይጉል ይሳዖሎ! ኡማናህ መዔፉጎ ኒያቲሶና፣ ያነቲያከ ይምቅድሰ መሥዋዕት አብተኒህ ታስቃራቦና ፉጊ ርኅራኄህ ሲን ዻዒማክ አኒዮ፣ ታይ ታስቃራቦና ሲናህ ኤዳም ቅንዒና ለ ሐቂ አገልጊሎቱህ ኪኒ፡፡ 2. መዕነህከ ኒያታህ ፍጹም የከ መዔፉጊህ ፍቃድ ታዻጎና ዽዕቶና፣ ሲኒ አእሚሮህ ቱስዑሱቢኒህ ሲን ሂወት ያምላዋጦይ ኢካህ ታይ ዓለሚህ ሒያውህ ኡማ ጠባይ ማካታሊና፡፡
3. ለል ሲነሲነህ መዔፉጊ ሲናህ ዮሖወ ኢምነቲህ መጠኒል ትሕቲናህ ኢሕሲባካህ ኤዳምኮ አጋናል ሲኒ ዸግኃህ ዳዓባል ትዕብትህ ማሕሳብና ኤዽሔህ መዔፉጊ ዮህ ዮሖወ ጸጋህ ሲን አምክሪክ አኒዮ፡፡ 4. ኢንኪ ናካላድ ማንጎ ክፍልት ያነ፣ ኢሲሲ አካል ክፍል ባዽሳ ለ ሢራሕ ለ፡፡ 5. ታማም ባሊህ ናኑ ማንኮም ኪኖሃኒህ ክርስቶሱህ ኢንኪ አካል ኪኖ፣ ኢንኪ አካሊህ ክፍለድ ነከሚህ መጠኒል ኒነኒነህ ነምገጠጠመ፡፡ 6. አማይጉል ፉጊ ኢሲ ጸጋ ኖህ ዮሖወህ ኒኒኒኒ ዺዒ ሢራሓ አሞል አስስኖይ፣ ኒተውሂቦ መዔፉጊህ ቃል ዋንሲታናም የከምኮ፣ ኒኒ ኢምነቲህ መጠኒል መዔፉጊህ ቃል ዋንሲኖይ፡፡ 7. ኒዺዕ አኪማራ ያስግልግልኒም የከምኮ፣ ትግሃታህ ናስጋልጋሎይ፣ ኒዺዕ ያይምህሪኒም የከምኮ፣ ትግሃታህ ናይማሃሮይ፣ 8. ኒዽዕ ያምክርኒም የከምኮ፣ ናመካሮይ፣ ኒዽዕ ያኃይኒም የከከምኮ፣ አፍዓዶኮ ናኃዎይ፣ ኒዽዕ ያስሔደሪንም የከምኮ፣ ትግሃታህ ናይ ናስሓዳሮይ፣ ኒዺዕ መሕረት አባናም የከምኮ፣ ኒክኂነህ መሕረት አብኖይ፡፡
9. ማዓልዋይ ሂን ሓቂ ካሓኒ ሲንሊህ ያናዎይ፣ ኡማ ጉዳይ ኢንዒባ፣ መዔ ጉዳይ ኢክቲላ፡፡ 10. ክርስቶሱህ ሳዖል ክቲንጉል ሲነሲነህ አፋዓዶኮ ቲታ ኢክኂና፣ ሲነሲነህ ቲታ ታስካባሮና ኦሞኮማ፡፡ 11. ሲንፊና ኤለያይክ ትግሃታህ ሙሉእ ኪን አፍዓዶህ ማደራ ኢየሱስ ኢስግልጊላ፡፡ 12. ታስፋህ ደስ ሲናህ ዮዋይ፡፡ መከራ ዋክተ ትዕግሥቲ አባ፣ ኡማንጉል ጻሎት አባ፡፡ 13. አማንቲ ኪን ሳዖል ተን ጸገሚድ ተን ጎሮኒሳ፣ ገዺኖህ ታምተም ጋራ፡፡
14. ሲን ታይሰደደም ዳዳዓ፣ ዳዳዓ ኢካህ ተን ማአባሪና፡፡ 15. ኒያታምሊህ ኒያታ፣ ወዕታምሊህ ወዓ፡፡ 16. ሲነሲነህ ኢንኪ ሓሳባህ ኤምሰመመዓይ ማራ፣ ሲናሞ ትዕብቲህ ሲናሞ ናውኢሳናም ሓባይ ድካታትሊህ ኤምሔበበራ፣ "ዮያ ሂን ማዻጊ ሚያነ" ሚና፡፡
17. ሒያዋህ ኡማንቲህ ነፊል አምዒናን ጉዳይ አባካህ፣ ሒያው ኡማ ጉዳይ ሲናክ አብታጉል አቲን ለ ደሄይተኒህ ኡመም አክ ማባቢና፡፡
18. ሲናካም ቲኔምኮ፣ ሒያውሊህ ኡምቢህ ሳላማህ ማርቶናክ ሲኑላኮ ጉርሱሳም ኡምቢህ አባ፡፡ 19. ይሳዖሎ! ቁጡዓ መዔፉጎል ሓባካህ ሲነህ ማምባቃሊና፣ አይሚህ ያምብቅለቲያል በቀል ሊካሐሕ ደሄያናም ያክፍለቲ ዮያ ኪኒ ያድሔ መዔፉጊ የህ ይምጽሕፈህ ያነ፡፡ 20. አማይጉል ታምብቂለምኮ አጋናል ናዓብቶሊ ሉወምኮ በቲስ፣ ባካረምኮ ለ ኤፈዕ፣ ታሃም አብታጉል ሖላህ ጊራህ ካሓራሪሳ፡፡ 21. አማይጉል ኡማ ጉዳይኮ መዔ ጉዳህ ሱብ ኢካህ ኡማ ጉዳክ ኡምነህ አክ ማሱቢን ፡፡
ማዕራፋ 13
ማንግሥት ሢልጣን አሞይትቲህ ያምአዛዞና ኤዳም
1. አኪናን ሢልጣን ገይማም መዔፉጊህ ፍቃዳህ ኪናም ኢዻህ ካዶ ታነ ሢልጣናት አሞይቲት ሢልጣናህ ረዳናም መዔፉጎህ ኪኒጉል፣ ሒያው ኡምቢህ ማንግሥት ሢልጣን ባዒሊህ ያማአዛዞና ኤዳ፡፡ 2. አማይጉል ሢልጣን ባዕላ ያምቀወመቲ ኡምቢህ መዔፉጊህ ትኢዛዝ ያምቀወመ፣ አምኢዚዘ ዋቲ ኡምቢህ ኢሲ አሞል ቅጽዓት ፊርደ ባሃ፡፡ 3. አይሚህ ገዛአት ማይሲሳም ኡማ ተግባር ለም ኪኒ ኢካህ መዔ ተግባር ለም ማኪ፣ ሢልጣን ባዕላ ማይሲተ ሒንቶ ጉርታ? አማይጉል መዔ ጉዳይ አብ፣ ካኮ ለ ምስጋና ገይታ፡፡ 4. አይሚህ ሢልጣን ባዕሊ ኮያህ መዔም አቦ ረደ መዔፉጊህ አገልጋሊ ኪኒ፣ ሢልጣን ባዕሊ ሰይፍ ይክትየም ካንቶህ ማኪጉል ኡማም አባቲያ ተከምኮ ሢልጣን ባዕላ ማይሲት፣ ኡሱክ ኡማም አብታም አቅጽዕክከ መዔፉጊህ በቀል አይቡሉውክ መዔፉጎ ያስግልጊለ፡፡ 5. አማይጉል ማንግሥት ሢልጣን አሞይትቲህ ያምአዘዞና አካህ ኤዻ፣ ያምኢዚዚኒም መዔፉጊህ ቁጡዓ ማይስተኒህ ጥራሕ አከካህ፣ ሲን ኅልና ለ ሲን ታውቅሰም ኢዻል ያኮ ኤልታነ፡፡
6. ግብረ ታክፍልኒም ለ ታሃማህ ኪኒ፣ አይሚህ ሢልጣን ባዕሊ ታይ ሢራሒህ አሞል ሢራሐህ ኢፋራናም መዔፉጎ ያስጋልጋሎና ኪኒ፡፡ 7. አማይጉል ማንግሥት ሢልጣን አሞይቲት ወገንኮ ልቲን ግዳድ ኢፍጽማ፣ ግብሪ አካህ ኤዳቲያህ ግብረ፣ ቀረጽ አካህ ኤዳቲያህ ቀረጽ ኢክፍላ፣ ማይስቶና ኤዳም ማይሲታ፣ ክብሪ አካህ ኤዳቲያህ ክብረ ኡሑዋ፡፡
ሲነሲነህ ቲታ ኢክኅና
8. ኢንከቲ ዒዳህ ባዒል ማኪና፣ ታሎና ኤዳ ዒዳ ሲነሲነህ ቲታ ታክሒኒኒም ጥራህ ኪኒ፣ አይሚህ ሒያው ኪሕንቲ ሕገ ያፍጺመ፡፡ 9. ማአማንዛሪን፣ ማግዳፍን፣ ማገርዒቲን፣ አኪ ማሪሂም አኪናኒም ማታማናይን፣ ታዽሔ ትኢዛዛትከ አኪ ትኢዛዛት ኡምቢህ ሒያው ኢሲ ዸግኃህ ባሊህ አባይ ኢክሒን ያዽኄ ኢንኪ ትእዛዛድ የምጥቅልሊኒህ ገይማን፡ 10. ሒያው ኪሕንቲ ኡምቢህ ኡማ ጉዳይ ማባ፣ አማይጉል ሒያው ኪሕንቲ ሕገ ሙሉኡድ ያፍጽመ ማለት ኪኒ፡፡
11 .አማይጉል ዺንኮ ታንቂሒን ዋክቲ ማደም ኢዺጋይ ታሃም ኡምቢህ አባ፣ አይሚህ ባሶህ ነመነ ዋክተኮ አጋናል ካዶ ኒያይድኅነቲ ያሚተ ለለዕ ጋዳህ ኑኡላል ካብየ፡፡ 12. ባር ቲላዎ ኪኒ፣ ለለዕ ለ ካብየ፣ አማይጉል ዲተ ሢራሕ ነየዔህ ዒድነህ ኢፊ ጦርቲ ማሠሪዕያ ሀይሲኖይ፡፡ 13. ለለዕቲ ኢፎል ማርታ ሒያው ባሊህ፣ ኤዳ ዓይነቲህ ጋሓንጋሓኖይ፣ ጎይላከ ሲክራን፣ ዙሙትከ ታማህ ኢጊድ ሥራሒህ ሓዶር አባናም፣ ጽቅጽቅከ ቶንኮል ሠራሓናም ሚሪሕ ኢሲኖይ፡ 14. አማይጉል ማዳራ ኢየሱስ ክርስቶስ ሀይሲታካህ ሲኒ ሓዶይታህ ጉርታናምኮ ታዕጋቦና ማሕሳብና፡፡
ማዕራፋ 14
ሒያው አሞል አፍርደዋናም
1. ሲን ፋናድ ኢሲ ኢምነቲህ አጽንዔ ዋ ሩክት ሒያውቲ ይኔምኮ ኒያታህ ካጋራካህ አታሐሳሲባል አክ ማፍራዲና፡፡ 2. አብነቲህ ኢንኪ ሒያውቲ አኪናን ጉዳይ በቶ ዽዕሲሳ ኢምነት ያለ፣ ኢሲ ኢምነቲህ አጽንዔ ዋ ሰነፍ ኪን ሒያውቲ ለ ኃምላ ዲቦህ በታ፡፡ 3. አማይጉል አኪናን ጉዳይ በታ ሒያውቲ በተዋ ሒያውቶ ዻይተ ዋዎይ፣ ኃምላ ጥራሕ በታቲ አኪናን ጉዳይ በታ ሒያውቲህ አሞል አፍርደ ዋዎይ፣ አይሚህ ካያ ለ ፉጊ ካጋራ፡፡ 4. አማይጉል አቱ አኪ ጋልጋሊህ አሞል ታፍራዶ ኮህ መኤዳ፣ አይሚህ ኡሱክ ሶሎይ ወይ ራዶይ ማደሪ ጉዳይ ኪኒካህ ኩጉዳይ ማኪ፣ ኤረ ለ ማዳሪ ካ'ሶልሶ ዺዓጉል ሲክ የህ ሶላ፡፡
5. ታማም ባሊህ "ኢንኪ ለለዕ አኪ ለለዕኮ ጋዳህ ኩቡር ኪኒ"የህ ያሕሲበቲ ያናዎ ያከ፣ አከቲ ለ ለለዓ ኡምቢህ ኢንኪዻ ያከ ክብረ ሎን ኢካህ ለለዓ ፋናድ ባዽሲ ሚያነ ያህ ያሕሲበ፡፡ አማይጉል ታህ ኢግድናማል ኢሲሲ አሞህ ሓሳብ ያናዎ ዽዓ፡፡ 6. ኢንኪ ለለዕ አኪ ለለዕኮ የሰሰህ ያስክብረቲይ ይኔምኮ፣ ታሃም አበም ማዳራ ያስካባሮ የህ ኪኒ፣ አኪናን ፈሎ በታቲ ማዳሪ ክብረህ የህ በቶይ፣ በታ ፈሎህ ዳዓባል መዔፉጎ ያይምስግነ፡፡ አኪናን ፈሎ በተዋቲ መዔፉጊህ ክብረህ የህ ማበታ፣ በተዋየርከህ መዔፉጎ ለ ያይምስግነ፡፡ 7. ኖኮ ጋሪጋሪ ሂወት ያኮይ ራቢ ካቲያ ማኪ፡፡ 8. ማርነምኮ ኒኒ ማዳራህ ኢየሱሱህ ማረ ሊኖ፣ ራብነምኮ ኒኒ ማዳራህ ኢየሱሱህ ራብኖ ኪኖ፣ አማይጉል ማርነህ፣ ራብነሚህ ኒኔሚህ ማዳራህ ኢየሱሱህ ኪኖ፡፡ 9. አይሚህ ክርስቶስ ራበህ ራባኮ ኡጉተም ታነሚህከ ራብተሚህ ማዳራ ያኮ የህ ኪኒ፡፡ 10. ኢስኪ ኢንኪ ሒያውቲ አከቲ አሞል አይሚህ ያፍሪደ? ቲይ ዶባይቶ አይሚህ ዻይታ? ኡምቢክ ኢንኮህ ኡኮ መዔፉጊህ ፍርድህ መንበሪህ ነፊል ካብ ኢየሊኖ፡፡ 11. አይሚህ፣
"አኑ ያነቲያ ኪዮ ያ ፉጊ፣
ሒያው ኡምቢህ ሲኒ ጉሉቡህ ይነፊል ያንብርክኪን፣
ሲኒ አራባህ አኑ መዔፉጎ ኪዮም ያምስክረ"የህ ይጽሒፈህ ያነ፡፡ 12. አማይጉል ኒኒ ኒኒ አሞህ ሢራሓህ ፉጊ ነፊል ካብነህ መልስ አሓየልኖ፡፡
ኃጢአት ምክንያት ማኪና
13. አማይጉል ኖኮ ኢንከቲ ዶባይቲ አሞል ያፍሪዲኒም ኃቦይ፣ ጋዳህ ሒያው ኃጢአታድ የይሰነከለህ ዒዳ ጉዳይ አባምኮ ያዋሳኖይ፡፡ 14. ማዳራ ኢየሱስድ ካታቲያ ኪዮሚህ መጠኒል ሩኩስ ምግቢ ሚያነም ዓዲህ አዽገ፣ ያከካህ ኢንኪ ሒያውቲ ኢንኪ ጉዳይ "ሩኩስ ኪኒ"የህ ያሕሲበም የከምኮ፣ ቶይ ጉዳይ ካያል ሩኩስ ኪኒ፡፡ 15. ፈሎ ዳዓባል ሒያው ታይሠቀየህ ተከምኮ ኒያታህ ማራቲያ ማኪቶ፣ አማይጉል ክርስቶስ አካህ ራበ ሒያው በታ ፈሎህ ዳዓባል ያላዮና ተን ማቢን፡፡ 16. አማይጉል ሲናድ መዔም የከ ጉዳህ አኪ ማሪ ያምናቃፎ ማቢና፡፡ 17. አይሚህ መዔፉጊህ ማንግሥት መንፈስ ቁዱሱህ ገይማ ጽድቀ፣ ሳላም፣ ኒያት ኪኒ ኢካህ በቶከ ሙዑብ ጉዳይ ማኪ፡፡ 18. ታይ ዓይነቲህ ክርስቶስ ያስግልጊለ ሒያውቲ ፉጎ ኒያቲሳ፣ ሒያው አዳል ይምስግነቲያ ኪኒ፡፡
19. አማይጉል ሳላም አካህ ገይማ አራሕከ ኒነኒነህ አካህ ናምሂኒፀ ጉዳይ ናካታሎይ፡፡ 20. ፈሎ ኖዋ መዔፉጊህ ሢራሕ አስዖኖወ ዋይኖይ፡፡ ምግቢ ሙሉኡድ ጺሪይቲያ ኪኒ፣ 21. አማይጉል ሓዶ በተዋናም ወይን መስ ኡዑበዋናም፣ አኪ ሒያው አስዕንቂፈ ዋያናም አኪናን ጉዳይ አበዋናም መዔም ኪኒ፡፡ 22. አማጉል ታይ ኩዲቢህ /ኩግሊህ/ ኢምነት ኮከ ፉጊህ ፋናድ ያኮይ፣ አይሚህ ትክኪል ኪኒ የህ የመነ ጉዳይ አባጉል ኅሊና ካበተዋይታ ሒያውቲ ይምስግነቲያ ኪኒ፡፡ 23. አምጠረጠርክ በታ ሒያውቲ ለ፣ ካተግባር ኢምነት አሞል ይምሥርተቲያ ማኪጉል ኤል ሚያምፍርደ፣ አይሚህ ኢምነቲህ አምድጊፈ ዋየ ጉዳይ ኡምቢህ ኃጢአት ኪኒ፡፡
ማዕራፋ 15
ሒያው ኒያቲሶና ኤዳም
1. ናኑ ኢምነቲህ ኃይላለም ነከምኮ፣ ሩኩታምህ ሐዋል ናይላዮ ኖህ ኤዳካህ ኒነኒነህ ዲቦህ ኒያታም ናኮ ኖልማታነ፡፡ 2. ኒነኒነህ አኪ ሒያውቲ ኢሲ ኢምነቲህ ኃይላ ለቲያ ያኮ፣ ካያ ያጥቅመቲያከ ኒያቲሳ ጉዳይ አብኖይ፡፡ 3. አይሚህ ክርስቶስ ኢሰ ማኒያትሲና፣ ናቢህ ለ "ዋተኒት ኮያህ ዋትመኒም ባሊህ! ዮያህ ለ ዋትመን"የህ ይምጽሕፈም ባሊህ አክ የከ፡፡ 4. ቁዱሳት ማጻሕፍቲኮ ገይና ትዕግሥትህከ አምጻናናዕቲ ታስፋ ናሎ ቶኮመህ ትምጽሕፈምል ሙሉእ ሚሂሮ ኤድገይኖ ትምጽሒፈ፡፡ 5. አቲን ኢየሱስ ክርስቶሱድ ካታይታን ኢርከህ፣ ኒትዕግሥትህከ ናምጻናናዒህ አምላክ ኢንኪኖ መንፈስ ሲናህ ያሐዎይ፡፡ 6. ታማም ባሊህ ኒማዳሪ ኢየሱስ አምላከ አባ የከ መዔፉጊ ኢንኪ አፍዓዶህከ ኢንኪ ቃላህ ታስካባሮና፣ ሲን አቦይ፡፡
ጰውሎስ አገልግሎትከ አራማውያውን ማደ በሠራታ ቃል
7. አማይጉል ሒያው መዔፉጎ ያስካባሮና ክርስቶስ አቲን ጋራይተኒም ባሊህ ሲነሲነህ ቲታ ጋራ፡፡ 8. ታሃም ለ ዋንሲታህ፣ ፉጊ ነገድቲ አቦቡህ ዮሖወ ታስፋ ታምፋፃሞከ መዔፉጊህ አምአማማን ያማዻጎ፣ ክርስቶስ አይሁድ አግልጋሊ የከ ማለቲህ ኪዮ፡፡ 9. ክርስቶስ አይሁድ አገልጋሊ አካህ የከ አኪ ምክንያት አረማውያውን መዔፉጎ ካ መሕረቲህ ባርካታል ካ ያይማስጋኖና ኪኒ፣
ታሃም፣
"አረማውያውን ፋናድ ኩ አይምስግነ፣
ኩሚጋዓህ ለ ዘማ ሞሳህ ካብ ኢሳክ አነ"
ተህ ትምጽሕፈም ባሊህ ኪኒ፡፡
10. ለል ለ አቲን አረማውያኖ፣
" መዔፉጊ ዶረ ህዝበሊህ ኒያታ፣
የህ ይምጽሒፈ ባሊህ ኪኒ፡፡
11. ጋባዔህ ለ፣
" አቲን አራማውያውኖ ኡምቢክ ፉጎ ኢይምስጊና፣
ህዝበ ኡምቢክ ኢይምስጊና፣"
የህ ይምጽሒፈ፣
12. አማም ባሊህ ኢሳይያስ፣
"ኢሴይ ዳራኮ ያቡከቲ ያሚተ፣
አረማውያውን መራሒ ያኮ ኡገታ፣
ኢሲን ለ ሲኒ ታስፋ ካያል አባን ያዽሔ ፡፡"
13. ሲን ተስፋ መንፈስ ቁዱስ ኃይላህ አነብክ ታዳዎ ታስፋት አምላክ ካያህ ተኤመመኒንህ ኒያቲከ ሳላም ሚገድ ሲናህ ያሓዎይ።
ጳውሎስ ዲፍረቲህ አካህ ይጽሒፈ ምክኒያት
14. ይሳዖሎ! መዕነህ ተመገሚክ፣ ኢዽጋህ ትህብትመሚከ ሲነሲነህ ለ አከቶ ታምካሮና ዽዕታም ኪትኒም ማምጠረጠጠረ፡፡ 15. ውልውል ጉዳይ ሲን አይዛካሮ ጉረህ ታይ መልእክት ዲፍረቲህ ሲናህ እጽሕፈ፣ ዲፍረቲህ ሲናህ ኢጽሒፈም ፉጊ ዮህ ዮሖወ ጸጋህ መሠረት ኪኒ፡፡ 16. ታይ ጸጋ ዮህ ቶምሖወም ፉጊ በሠራታ ቃል አረማውያን አይብሥርክ ካህን ባሊህ ኤከህ ኢየሱስ ክርስቶስ አስጋልጋሎ ኪኒ፣ አማይጉል አረማውያን መንፈስ ቁዱሱህ ይምቅድስኒህ መዔፉጎ ለ ኒያቲሶና መሥዋዕት የኪኒህ ያቅራቦና አስግልግሊክ አነ፡፡ 17.ታይ ምክንያታህ ኢየሱስ ክርስቶስ ቲያ ኤከህ መዔፉጎ አስጋልጋሎ ዽዔርከህ አምክሔ፡፡ 18. አምኪሔም፣ ክርስቶስ ይቃላህከ ይሢራሒህ አራሓህ፣ አረማውያን መዔፉጎህ ያምዛዞና አበርከህ ኪኒ፡፡ 19. አማይጉል ናባ ታአምራትከ ዲንቀ ኪን ሢረሓህ መንፈስ ቁዱስ ኃይላህ አረማውያን ያምአዛዞና አበርከህ አምክሔ፡፡ ታይ አጋባቢራህ ኢየሩሳለምኮ እልዋሪቆን ፋናህ አዞርክ ክርስቶስ መዔ ዋረ ሙሉኡድ ኢይብሢረህ አኒዮ፡፡ 20. ኡማንጉልት ይትምኒት፣ አኪ ሒያውቲ ዒደ መሠረቲህ አሞል ያንድቅኒም አከካህ፣ ክርስቶስ ሚጋዕ ኤል አማበ ዋየ ቦታል ሙሉኡድ መዔ ዋረ ያብሥሪኒም ኪኒ፡፡21. ታሃም፣
" ካ ዳዓባል ዋንሲተ ዋየንም ያብሊን፣
ካ ዳዓባል አበ ዋይተም ያስትውዒሊን"
የህ ይምጽሕፈም ባሊህ ኪኒ፡፡
ጰውሎስ ሮማ ያዳዎ ይሒሊነ /ይዕቅደ/
22. ካዶ ፋናህ ሲና ዻጋህ አማቶ ዺዔ ዋየም፣ ኦኮመህ አካህ ዋንሲተሚህ ምክንያታል ኪኒ፡፡ 23. ካዶ ለ ታይ አካባቢል ታነ ሀገራታል ልይክ ኢነ ሢራሕ ባከካህከ ማንጎ ኢግዲትኮ ኤዸዺሰህ ሲና ማዶ ናባ ድላይ ልዮጉል፣ 24. እስፔን ኡላል አዲየ ዋክተ፣ ኢኒ አራሓል፣ ሲን ማዶ ኢሕሲበህ አኒዮ፡፡ ዳጎ ዋክተ ሲንሊህ ሱገምኮ ላካል፣ ኢናራሕህ አቃጻሎ ይዽዕስሳ ሓቶ ዮህ አብቶና ታስፋ ሊዮ፡፡ 25. ካዶ ለ አማንትህ አሓየ ማል ሓቶ ኢብዸህ ኢየሩሳለም አድክ አኒዮ፡፡ 26. አይሚህ ለ መቄዶንከ አካይያት አማንት ኢየሩሳለም አማንትህ ፋናድ ታነ ዲካታታህ ማል ሓቶ ፋሮና ይውስንንጉል ኪኒ። 27. ታይ ሓቶ ለ ስኒድላህ ዮሖይን ሓቲ ተን ግዳድ የከጉል ኪኒ። አይሚህ አረማውያን አይሁድሊህ መንፈስ በረከት ሓድሊታም የክኒምኮ፣ አረማዊያን ሓዶይታ በረከትኮ አይሁድ ሓታናሚህ ጊደ ሎን። 28. አማይጉል ታይ የከሄለ ማል ሓቶ ኢየሩሳለም በየህ ያሪክብኒሚህ ሢሕራህ ባከምኮ ላካል፣ ኢስፐይን ኡላል አድየሊዮ፣ ኢናራሓል ለ ሲና ማደሊዮ። 29. ሲኑላል አሚተ ዋክተ ለ ክርስቶስ በረከት ሚገ ኢብዸህ አሚተም አዺገ።
30. ይሳዖሎ! ይዳዓባል መዔፉጎል ጻሎት ዮህ አባክ ይዱፍላህ ይጎሮኒሶና፣ ኒማዳራ ኢየሱስ ከርስቶከ መንፈስ ቁዱስ ካኃኖህ ሲን ዻዒማክ አነ። ጻሎት ዮህ አብታናም ለ ይሁዳል ታና አሚነ ዋይታ ሒያውህ ጋባኮ አውዖከ ኢየሩሳለምል ሊዮ አገልግሎቱህ ለ አማንቲ ኒያቲሳቲያ ያኮ ኪኒ። 32. ታሃም ተከምኮ ሣራህ መዔፉጊህ ፍቃድ የከምኮ ሲኑላል ኒያታህ ኤመተህ ሲንሊህ አዕራፎ ኪሒኒዮ። 33. ሳላም ያሓየ ፉጊ ኡማን ሲናሊህ ያኮይ፣ አመን።"
ማዕርፋ 16
ሳላምታ
1. ፌቤ ክንክሪያ ካታምል፣ ክርስቲያን ታስግልጊለ ታምኢሚነ ኒሳዕላ ኪናም ታዻጎና ኪሒኒዮ። 2. ኢሲ ዮከ ይዶባ ለ ማንጎ ሒያው ጎሮኒሰ ቲያ ኪኒጉል፣ መዔፉጊህ ሒያው ገዻ ጋራናም አካህ ኤዳሚህ ዓይነቲህ ማዳሪ ሚጋዓህ ጋራይተኒህ ተን ጉርሱሳ ጉዳህ ኡምቢህ ተን ሮኒሶና ሐደራ ሲናክ አይክ አነ።
3. ኢየሱስ ክርስቶስህ ሢራሓህ ይጎሮን ኪይይ ይይኒን ጵሲቂላከ አቂላህ ሳላምታ ዮህ ኢስቅሪባ፣ 4. ኢሲን ይዻህ ራባህ ኡካ ተምሶኖዶወም ኪይይ ይኒን፣ ታሃማህ ኡማንጉል ተን አምስግንክ አኒዮ፣ አኑ ዲቦህ አከካህ አረማውያን ሞሶዒሪቲ ክርስቲያን ለ ራዔካህ ተን ያሚስግኒን፣ እሲያ ኪፍልህ ባዾል ኤዸዾይታህ ክርስቶሱል የመነቲያከ ኪኂኒዮ ኤፓኔቶስ ሳላምታ ዮህ ኢስቅሪባ። 6. ሲናህ ማንጎም ኃዋልተ ማሪያማህ ሳላምታ ዮህ ኢስቅሪባ። 7. ዮሊህ ቱምዹወህ ትነምከ ሐዋሪያት ፋናድ ትምዺገም ክይክ ቲነ አይሁድ ይበተሰብ ድሮኒቆስከ ዩኒያሳህ ላሳምታ ካብ ዮህ ኢሳ፣ ኢሲን ክርስቶሱል ያምንኒሚህ ዮክ ያኩሚን።
8. ማዳራህ ኪሒኒዮ አምፕሊያቶሱህ ሳላምታ ዮህ ኢስቅሪባ፣ 9. ኪርስቶስ ሢራሓህ ኒጎሮን ኪይይ ቲነ ዑርባኖስከ ኪኂኒዮ እስጣኩሱህ ሳላምታ ዮህ ኡሑዋ። 10. ክርስቶስ ቲያ የከህ ይምፊትነ ቲያ የከ አፔሊሱህ ሳላምታ ካብ ዮህ ኢሳ፣ .አርስጦቡሎስ በተ ሰብ ክናማህ ለ ሳላምታ ካብ ዮህ ኢሳ፣ 11. አይሁዲ ይዘመዲህ ሄሮድዮኑህ ሳላምታ ዮህ ኢስቂሪባ፣ ከናርሲስ በተ ሰቢህ ማዳራል ተመነሚህ ሳላምታ ዮህ ኡሑዋ። 12. ማዳሪ አገልጉሎቱህ ኃዋልታማህ ትሩፋይናከ ትሩፎሳህ ሳላምታ ዮህ ኢስቅሪባ። 13.ማዳሪ አገልግሎቱህ ጋዳህ ኃዋልታ ክርስቶሱህ ኪኂኒዮ ፔርሲስ ሳላምታ ካብ ዮህ ኢሳ። ማዳሪ አገልግሎቱህ ጋዳህ ትሚዺገ ሩፎስ ሳላምታ ካብ ዮህ ኢሳ፣ ዮያ ኢሲ ባዻ ባሊህ ይኪኂኒይ ቲነ ይናህ ለ ሳላምታ ዮህ ኢስቅሪባ። 14. አስንክርስቶስከ ፍሎጎኑ፣ ሄርሜስህ ፓትሮባሳህ ሄርማሳህ ተንሊህ ታነ አማንቲ ይሳዖሉህ ሳላምታ ካብ ዮህ ኢሳ። 15. ፊሎሎጎሱ፣ ዩሊያህ፣ ኔሪያከ ካሳዕላህ ሳላምታ ካብ ዮህ ኢሳ፣ ታማም ባሊህ ኦሎምፓስከ ካሊህ ታነ አማንቲህ ኡምቢህ ሳላምታ ዮህ ኢስቅሪባ። 16. ሳዖሊኒ ስምዒቲህ ቲታ ፉጉታክ ሳላምታ ቲቲታህ ኡሑዋ። ክርስቶስ ሞሶዓሪት ኡምቢህ ሳላምታ ካብ ሲናህ ኢሳን።
ባኪቶ ሳላምታ
17. ይሳዖሎ! ሲን ፋናዳ ባዽሳ ታፍጥረምከ ሲኒ ኢምነቲህ ሲክ ታናምኮ አብታ ሒያውኮ ሰሊታ፣ ጋራይተን ሚሂሮ ለ ታምቀወመም ለ ኪኖንጉል ተንኮ ሚሪሕ ኤያ። 18. ታይ ዓይነቲህ ሒያው ሲኒ ዸግኃህ ኡማ ትምኒት ታክትለም ኪኖን ኢካህ ኒማዳራ ኢየሱስ ክርስቶስ ታስግልግለም ማኪኖን፣ መዔ ቃላህ ይምግድኒህከ ባሳክታ ዋኒህ ቶንኮል ሂን ለዋኀት ያይተለሊን።
19. በሠራታ ቃላህ ታአዘዝቲ ክትኒሚህ ኡማን ሒያዋል ትምዺግንጉል ደስ ሲናህ ዮዋይ። ያኮይ ኢካህ መዔ ጉዳህ ብልሓት ለም፣ ኡማጉዳህ ለ ለዋሃት ታኮና ጉራክ አነ። 20. ታሃም አብታንጉል ሳላም ያሓየ ፉጊ ሰጣን ሲን ኢቢህ ዳባል ሲናህ ያቅጥቂጠ። ኒማዳሪ ኢይሱስ ክርስቶስህ ጸጋ ሲንሊህ ታኮይ።
21. ይሢራሒህ ታሕባባሪ ጢሞቴዎስ ሳላምታ ካብ ሲናህ ኢሳ፣ ታማም ባሊህ አይሁድ ኒዘመድ ተከ ሉቂዮስከ ኢያሶን ሶሲ ጴጥሮስ ለ ሳላምታ ካብ ሲናህ ኢሳን።
22. ታይ መልኢክት ይጽሒፈቲ ዮያ ጠርጥዮስ ማዳራህ ሳላምታ ሲናህ አስቂሪቢክ አኒዮ።
23. ዮያ ካዶ ይሓታ ቲያከ ታል ታነ መእመናን ኢሲ ዲኪድ ጻሎቱህ ያካሃሎና አባቲ ጋይዮስ ሳላምታ ካብ ሲናህ ኢሳ። ካታማት ቢጅር ሮንዲ የከ ኤራስጦስ፣ ኒሳዓል ለ ቃራጦስ ሳላማታ ሲናህ ያስቅሪቢን። 24. ኒማዳሪ ኢይሱስ ክርስቶሲህ ጸጋ ኡማን ሲናሊህ ታኮይ።
ሚስጋና ጻልት
25. አማይጉል መዔፉጎህ ምስጋና ታኮይ፣ አኑ ኢየሱስ ክርስቶስህ ዳዓባል አይብሢረ በሠራታ ቃልከ ማንጎ ዳባናታህ ሱዑተህ ካዶ ዩምቡሉወ ሓቀ፣ መኤፉጊ ሲኒ ኢምነቲህ ሲክ ተኒህ ሶልቶና ሲን አቦ ዺዓ። 26. ታይ ሓቂ ካዶ ነብያት ማጻሕፍቲህ ኡላህ ዓዲህ ይምቡሉወ፣ ኡምቢህ የመኒንህ ያምአዛዞና ያነ /ሒያው/ አምላኪህ ትኢዛዛህ ምናዳም ኡምቢህ ያዻጎና የከ። 27. ኡሱክ ጥራሕ ቢልሓተና የከ አንኪ አምላክ፣ ኢየሱስ ክርስቶሱህ ኡማንጉሊ ምስጋና ታኮይ፣ አመን።
No comments:
Post a Comment
Note: Only a member of this blog may post a comment.