ማላሚ ጴጥሮስ መልእክት

ማላሚ ሐዋርያ ጴጥሮስ መልእክት

ሳይማ      [ዸ ዹ ዺ ዻ ዼ ዽ ዾ]

  

    ማላሚ ሐዋሪያ ጴጥሮስሀ መልእክት ትምጺሒፈም ኢሲሲ ቦታል ገይምታ ባሶ ክረስቲያናህ ኪኒ፡፡ መልእክት ዋና ዓላማ ዲራብሊት ኪን መምህራን ኡማ ሢራሕከ ተን ትምህርቲ ይይቡሉወህ ይምፍጥረ አባዕላግቲ  ሕይውት ያምቃዋሞና ኪኒ፡፡ ይምፍጥረ ጸገማቲህ   ሙኑሑይ  ያከ ኢየሱስ  ሲኒ ኢንቲህ  ቱብለምከ  አይምሂሪህ አይቲህ ቶበ ሒያው ትላሰን ትምህርቲህ ኡላህ መዔፉጎከ ኢየሱስ ክርስቶሲህ ዳዓባል ትምዽብዸ  ኢዽጋ  ገዎና ኪኒ፡፡ ጻሐፊ ዲቦህ ጥንቃቀ አበም "ክርስቶስ ጋሔህ ሚያምተ" ታዽሔ ዲራብቲ ሚህሮህ ኪኒ፣ ታሃም ዩብለህ ዋንስታህ "ክርስቶሰ ጋሔህ ያምተምኮ ዓያም፣ መዔፉጊ፣ ሒያው ኡምቢህ  ሲኒ ኃጢአትኮ ጋሖና ኪኒ  ኢካህ  ኢንከቲ ያላዮ ማጉራጉል ኪኒ፡፡ "

________________________________________________

ማዕራፋ 1 

  1.ኢየሱስ ክርስቶሲህ አገልጋሊከ ሐዋርያ የከ ስምዖን ጰጥሮስ፣ ኒ አምላከ  ኒያይድኂነ ኢየሱስ ክርስቶሲህ ጽድቂህ ዳዓባል ናኑ ገይነ ኢምነት ባሊህ የከ ኩቡር ኢምነት ገይተምክ፣ 2.መዔፉጎከ ኒማዳራ ኢየሱሲህ ኢዽጋህ ጸጋከ ሳላም ሲናህ ያማንጎይ፡፡

ፉጊ ደዖከ ዶሮ

  3.ኢሲ ዸግኃህ ኪብረህ፣ ኢሲ መዔነህ ኒደዔም ነዸገርከህ ምክኒያታል ሓቀከ መንፈሳዊነቲህ ኒጉርሱሳ ጉዳአህ ሙሉኡክ መለኮታዊ ኃይላ ኖህ ዮሖወ፡፡ 4.ታይ ኖህ ዮምሖወ ጉዳዪህ ኡላህ ኡማ ቲምኒቲህ ምክኒያታል ዓለም አሞል ያነ ሞራሊህ ራድናንኮ ቲምሊጢን፣  መሎኮት ባህሪ ሓዲሊታም ናኮ፣ ኩቡርከ ጋዳህ ናባ ታስፋ ኖህ ዮሖወ፡፡ 5.ታይ ምከኒያታህ ታክቲለ ጉዳያት ሲናህ ኦሲቶክ ኢትጊሃ፣ ኢምነት አሞል መዔነ፣ መዔነት አሞል ኢዽጋ፣ 6.ኢዽጋት አሞል ሲነ ያምቆጾጾሪኒም፥ ሲነ ያምቆጾጾሪኒሚህ አሞል ቲዕግሥቲህ ሲክ ያናም፥ ቲዕግሥቲህ ሲክ ያናሚህ አሞል መንፈሳውነት፥ 7.መንፈሳውነት አሞል ሳዖሊና፥ ሳዖሊኒ አሞል ካኃኖ ኦሳ። 8.ታይ ጉዳያት ማንጊህ ተሊኒምኮ ኒ ማደሪ ኢየሱስ ክርስቶስ ያዺጊኒም ማዳን፥ ሀካያትከ ፊረ ማሎሊ ማታኪን። 9.ታይ ጉዳይ ሂንማሪ ለ ዸዽ ኢርከህ ጉዳይ ያብሎ ታና ዑዉር ኪኒ፣ ቲላየ ካ ኃጢአያት .ይምዲምሲሰም ቢያይሲተ።10.አማይጉል ይሳዖሎ! ደዕሚሚተኒምከ ዶሪሚሚተኒም ታይራጋጋፆናክ  ጋዳህ ኢትጊሃ፣ ታሃም አብተኒምኮ ኢንኪጉል ማታምሰነከሊን። 11.ታይ ዓይነቲህ ኡማንጉልቲያ የከ ኒ ማዳራከ ኒ ያይድኂነ ኢየሱሱስ ክርስቶሲህ ማንግሥቲል ሳይቶና ሙሉእ መብቲ ሲናህ ያምሓወ፡፡ 

  12.አንኪጉል ኡካ ታይ ጉዳይ ተዸጊኒህከ ቲብዺኒህ ሓቀል ቲጽኒዒኒህ ማርተኒሚህ፣ ኢሲን ሲና ያስሔሰሰቢኒምኮ ዒሲስ ሚኖን፡፡ 13.ታይ ሕወቲህ አነም ፋናህ፣ ሲና ኡማንጉሉህ አይናቃቃሖ ዮህ ኤዳም ሑንሱሱታ፡፡ 14.ኒ ማዳሪ ኢየሱስ ክርስቶስ ዮህ ይግሊጸም ባሊህ  ዸህ ታይ ዓለምኮ ራባህ ባዽሲማም አዽገ፡፡ 15.አኑ ካዶ ቲግሃት አባም፣ ራባህ ሲናክ ባዽሲመምኮ ላካል  ኡካ ታይ ጉዳይ ኡማንጉል ታዛካሮና  ዺዕቶና ኪኒ፡፡

ክርስቶስ ኪብሪ  ኢንቲ ማሳኪር

   16.ኒ ማዳራ ኢየሱስ ክርስቶሲህ ኃይላከ ሙሙት ዳዓባል ሲናክ ነ ዋክተ ኒኒ ዸግኃህ ካግርማ ሀሲነህ  ኪኖካህ ሒያው ቢልሓታህ ይምፍጢረ ታሪክ ኒ ኪቲለህ ማኪ፡፡ 17." ኡሱክ ይኒያቲሳ ይባዺ ታይ ቲያ ኪኒ"ያዽሔ አንዻሓህ ና'ባ ኪብረሊህ የመተ ዋክተ መዔፉጎ አባኮ  ምስጋናከ  ኪብረ ጋራየ፡፡ 18.ካሊህ ኒምቂዲሰህ ኢምባት አሞል ኒነ ዋክተ ታይ ዓራንኮ የመተ አንዻሕ ናኑ ኒነህ ኖበ፡፡ 19.ታሃም ለ ጋዳህ ያይሰ ዒለህ ኒ ያይረገገጸቲያ ነቢያት አፋህ ሊኖ፣ ታይ ቃል ባር ማሓም ፋናህከ፣ ማሒ ሑቱክቲ ኢፎያም ፋናህ፣ ዲተድ ኢፎዋ፣ ኢፎይታ ባሊህ አብተኒህ አካህ ታምጥንቅቂንጉል መዔም ኪኒ። 20.ኡማኒሚህ ባሶል ታስታውዓሎና ሲናህ ኤዳም፣ ማጽሐፍ ቁዱሱል ገይማ ትንቢት አኪናን ሒያውቲ ኢሲ ጊሊህ አታሓሳሲባህ ያይታርጋሞ ማዺዒማም ኪኒ። 21.አይሚህ አኪናን ትንቢት ሒያው ፍቃዳህ  ኢንኪጉል ማ'ማቲና፣ ያኮይ ኢካህ  ትንቢት፣ መንፈስ ቁዱሱህ ቲምሪሔ ሒያው መዔፉጎኮ ጋራየኒህ ዋንሲተኒም ኪኒ፡፡   

ማዕራፋ  2

ዲራብቲ  መምሂራን

   1.ያኮይ ኢካህ ባሶ ዳቦን ሕዝቢ ፋናድ ዲራብቲ ነቢያት ዪኒኒም ባሊህ፣ ታማምባሊህ ሲን ፋናድ ዲራብቲ መምሂራን አኔሎን፣ ኢሲን ሊይ ካታሳ ዲራብቲ ሚሂሮ ሱዕሶህ ሳይሳን፣ ተን ይዲኅነ ማዳራ አይከ ያክሕዲኒም ፋናህ ማዲሳ ሱዉር  ሊይ ኤልባሃን፡፡ 2.ታይ ዓይነቲህ ማንጎ ማሪ ተን ሖላሳ አራሓህ ያኪቲሊን፣ ተን ተግባርኮ ለ ኡጉተሚህ ሓቂ አራሕ ዋቲሚማ። 3.ታይ ዲራብቲ ማማሂራን ማልቲ  ሀጉገኮ  ኡጉተሚህ ሲነህ ይፍጢሪን ታሪክ ዋሪሳክ ተን ያብዝቢዚን። ማንጎ ዋከተኮ ባሶል ኤዸዺሰ ፊርዲ አካህ ዮምሶኖዶወ፣ ሊዪ ትንቂሔህ ተን ኢላልታ። 4.መዔፉጊ ኃጢአት ሢራሕተ መላአክት ዳ ዲተክ አዳድ ሰንሰሊህ ዩምዹውኒህ ፊርዲ ለለዕ ኢላሎና ጋሃናማድ ተን ዒደ ኢካህ አካህ ማናኅሩሪና፡፡ 5.ታማም ባሊህ ለ መዔፉጊ ኃጢአት ለም ኤልማርታ ዓለሚህ አሞል ሊይ ላየ ባሄህ ጽድቂ ሰባኪ ኪይይ ዪነ ኖኅ አኪ ማልሒና ሒያውቶሊህ ይይዲኅነ ኢካህ ባሶ ዓለሚህ ማናኅሩሪና፡፡ 6.ለል ኃጢአት ሢራሕተም ኡምቢህ ቅጽዓት ሚሳለ ያኮ ሶዶምከ ጎሞራ ካቶም ጎምቦድ ያኪኒም ፋናህ ሓራረኒህ ያላዮና ይፍሪደ። 7.ዓማፂ ሖላሳ ተግባራህ አምስቂቂክ ማራይ ዪነ ጻድቅ ሎጥ ለ ይድኅነ፤ 8.አይሚህ ቶይ ጻድቅ ኪን ሒያውቲ ተን ፋናድ ማራህ ኢሲሲ ለለዕ ያብለምከ ያበ ኡማ ተን ሢራሒህ ምክኒታል ጻድቅ ናፍሲ አምጺንቂይ ዪነ፡፡ 9.አማይጉል ታሃም ኡምቢህ ታህ ተከምኮ መዔፉጊ መንፈሳውያን ኪን ሒያው ፋታናኮ ተን ያይድኅኖ፣ ኃጢአት ለም ለ አይናህ ኢሰህ ያቅፅዔምከ ፊርዲ ለለዕህ ለ አይናህ ኢሰህ ተን ሱጉሳም ያዺገ ማለት ኪኒ። 10.ባዽሳህ ቶይ ሪኪስቲ ተከ ሲኒ ሓዶይታህ ካኃኖ ታኪቲለምከ መዔፉጊህ ሢልጣን ዻይታም ፊርደህ ዻዉዻህ ሱጉሳ።  ታይ  ዲራብቲ መምሂራን ደፋራትከ ትዕቢት ለም ኪኖንጉል፣ ዓራነቲ ሢልጣናህ ኡካ ዋቲሞና ማማይሲታን፡፡ 11.መላእክት ኡካ ተንኮ ኃይላህከ ሢልጣናህ ታይሰም የኪኒሚህ፣ መዔፉጊህ ነፊል ዓራንቲ ሢልጣናታህ አምኪሲሲህ ማዋቲማን። 12.ታይ ዲራብቲ መማሂራን ግን  ያስታውዓሎና ታናን ጉዳህ ዋቲማን፣ ኢሲን ያባዾናከ ያይላዮና ቶቦከም ባሊህ፣ ተፈጥሮ ሲምዒቲህ ማራናም ባሊህ፣ አእምሮ ሂን እንሲሳ ኪኖን፣ ኢንሲሳ ታላየም ባሊህ ኢሲን ለ ያለዪን፡፡ 13.ተን ዓማፂህ ሊሞ  የከ ቂፅዓት ለ ጋራን፡፡ ተን ኒያቲህ ለለዕ ሙሉእድ ኃዶይታ ዲላይኮ ኃይታናም ኪኒ፣ ታይተለለ ኃዶይታህ ሲኒ ዲላያህ ኡማን ዋክተ ኒያታም የኪኒህ ያኒን ሃኒህ፣ ሲንሊህ ካሓኒ ማይዲህ አሞል ገይማንጉል ናውረ ለምከ ሖላሳም ኪኖን። 14.ኃጢአት አቦትኮ ሶለ ዋይታ ሚልኪት ታሓየ ኢንቲ ሎን፣ ጽንዓት ሂን ሒያው ያይተለሊን፣ ማላህ ታምሆጎጎወ አፍዓዶ ሊማድ ሎን፣ አባሪምተ ሒያው ኪኖን! 15.ኢሲን ቁኑዕ አራሕ ሓባን። ኡማ ሢራሒህ ሊሞ ያከ ማል ይክሒነ ቦሶሪን ባዺ በልዓም አራሕ ይኪቲሊኒህ የምገገይን፡፡ 16.ዓለምል ለ ኃጢአት ዳዓባል ይምግሲጺን፣ ዋንስቶ ዺዔዋይታ ሔራ /ኦኮሎይታ/ሒያው አፋህ ዋንሰተህ ነቢይ ዒብዳኒህ ሢራሕ ተምቆወመ፡፡ 17.ታይ ሒያው ላየ አለዋይታ ሚንጺት ኪኖን፥ ማእበል ሓሓይቲ በያ ዳሩር ኪኖን፣ ዳ ዲተ ተን ኢላልታ። 18.አይሚህ ገጋድ ማራታ ሒያዊህ ፋናድ የውዒኒህ የመቲኒምኮ ገና ማንጎሙድ ሱገዋየተ ሒያው ካንቶ ኪን ናባ ቃላት ዋንሲታክ፣ ኃዶይታ ካኃኖህከ ካሓኒ ጉረታዮህ ዲራቢታክ ዱዱሳክ ተን ያይተለሊን፡፡ 19."ናፃ አውዔልቲን" አይክ ታስፋ አካህ ያሔን፡፡ ኢሲን ሲነህ ለ ኃጢአት ባሪያ ኪኖን፣ አይሚህ ሒያውቲ ሱቡታጉል ባሪያ የከህ ያምግዚኤ። 20.ኒ ማደራከ ኒ መድኃኒ ኢየሱስ ክርስቶስ የዸጊኒህ ዓለም ሩክሰትኮ የውዒኒምኮ ላካል ጋሔኒህ ታማይ ሩክሰቲህ ይምዽብዺኒህ ሱቡተኒምኮ ባሶቲያኮ አጋናል ሣራቲይ ጊዲድቲያ አክ ያከ፡፡ 21.አይሚህ ጽድቂ አራሕ የዸጊኒምኮ ላካል አካህ ዮምሖወ ቁዱስ ቲኢዛዝኮ ሣራቱላል ጋኃኒምኮ ጽድቂ አራሕ አዺገካህ ራዔኒህ የኪኒህ ያኪንዶ አካህ አይሰ ዻዸ፡፡ 22."ናሀሪተም ሙዹዖ ካሪ ኢሲ ናሃራድ ጋኃ፣" ታማምባሊህ "ሐሰማ ዓካልተምኮ ላካል ጋሕታህ ፂቂ አሞል ታምባኮኮለ" ያዽሔሚህ  ሚሳለ ሓቀ ተከህ ተን ማዳ፡፡                          

                                                    ማዕራፋ 3

ማደራ የከ ኢየሱስ  ሙሙቲህ ታስፋ

    1.ይሳዖሎ! ታይ ሲናል አጽሒፍክ አነም ይማላሚት መልእክት ኪኒ፣ ላማ መልእክት ሲናል እጽሒፈም ታይ ጉዳይ ሲን ኤስሔሰሰቢህ ቁኑዕ ሓሳብ ታሎና ሲን ኡጉጉሶ  ያናማህ ኪዮ፡፡ 2.ታሃምኮ ባሶህ ቁዱሳን ነቢያት ዋንሲተን ቃልከ ሲኒ ሐዋርያቲህ አራሓህ ገይተን ኒማደራከ ኒ መድኃኒህ ቲኢዛዝ ታዛካሮና ጉራክ አኒዮ። 3.ኡማኒምኮ ባሶል ታሃም ኢስውዒላ፣ ባኪቶ ለለዓድ ታይለገጸምከ ሲኒ ኡማ ቲምኒት ታክቲለ ታይወናበደም  አምተሎን። 4.ተናህ "ማደሪ ኢየሱስ አምተለ የኒህ ታስፋ አካህ ቶምሖወህ ማና? ኢቦል አልታነ? ባሶት ኒ አቦብቲ ራበን ዋክተኮ ኡጉተኒህ ኡማን ጉዳይ፣ ፍጥረት ኤዸዾይታኮ አዸዺሰህ ይነምባሊህ ኪኒ ያን። 5.ታይ ሒያው ማንጎ ዋክተኮ ባሶህ ዓራንከ ባዾ መዔፉጊህ ቃላህ ትምፍጢረም ኪናም ያኮይ የኒህ "ማናዺገ የን"፣ ባዾ ለ ሢራሕምተም ላየከ ላየህ ኪናም ይክኂዲን፣ 6.ታማይ ዋክተ ዪነ ዓለም ላየህ ይምሲፍነህ የለየ። 7.ካዶ ታነ  ዓረንከ ባዾ፣ ዓማጽት ኪን ሒያው ታለየም ፋናህ አይክ ፊርዲ ለለዕ ፋናህ ታይ መዔፉጊህ ቃላህ ጊራህ ዻውዹመኒህ ሱገሎን፡፡ 8.ይሳዖሎ! አቲን ለ ማደራህ ኢንኪ ለለዕ ኢንኪ ሲሕ ቲዻ፣ ኢንኪ ሲሕ ኢንኪ ኢጊዲህ ኢዻ፣ ሲሕ ኢንኪ ለለዕ ቲዻ ኪናም ታይ ጉዳይ ማቢያስትና፡፡ 9.ውልውል ሒያው ያካሊኒም ማደሪ ኢየሱስ ዋንሲተ ታስፋ ቃል ያፊጥጺመምኮ  ማዓያ፣ ያኮይ ኢካህ ሒያው ኡምቢህ ንስሓህ ኤዳም ያኮና ኢካህ ኢንኪ ሒያውቲ ያላየምኮ የህ  ተና ዮዋ  ቲዕግሥቲ አባ። 10.ማዳሪ ለለዕ ለ ባዸዻይቶ ባሊህ ዲንገቲህ ያሚተ፣ ታማይ ለለዕ ዓራናል ናባ ድምፀህ ቲላ፣ ፍጥረት ሙሉኡክ ጊራህ ሓራረህ ያለየ፣ ባዾከ ተ አሞል ያነ ጉዳይ ኡምቢህ ሓራራ፡፡ 11.አማይጉል ኡማን ጉዳይ ታይ ዓይነቲህ ያለየህ የከምኮ፣ ይቦል ሲኒ ቅድስናከ መንፈሳውነት ናብራህ ማራናም አይናህ የህ ሲናድ ማሳ! 12.አማይጉል መዔፉጊህ ለለዒህ ሙሙት ሳናህ ኢላልታምከ ዸህ  ለ ያማቶ ሢራሕታም ቲካ። ታይ ለለዕ ዓራን ጊራህ ሓራረህ ያለየ፣ ትምፍጢረም ለ ጊራ ላዕናህ ታምኮኮመ። 13.ያካካህ ናኑ ጽድቀህ ኤድማራና ዑሱብ ዓራንከ ዑሱብ ባዾህ ታስፋ ቃሊህ ሪምድህ ኢላልና፡፡ 14.አማጉል ይሳዖሎ! ታሃም ኡምቢህ ታከ ለለዒህ ኢላሎት አሞል ቲኒዪኒምኮ፣ ማዳሪ ኢንኪ ናውረ ማለህ ያኮይ ናቃፋ ማለህ ሳላማህ ሲን ገዮክ ቲግሃታህ ሢራሓ፣ 15.ኒማዳሪ ቲዕግሥቲ አበም አቲን ታድኃኖና የህ ኪናም ማዛንጋዒና፣ ኢምክኂን ኒሳዓል ጳውሎስ ለ አካህ ዮምሖወ ቢልሓቲህ መጠኒል ሲናህ ይጽሒፈም ታሃሞም ኪኒ። 16.ኡሱክ ታጉል ታይ ጉዳህ ኢሲ ፋሮህ መልእክታት ኡምቢህ ታይ ዓይነቲህ ይጽሒፈ፣ ካ መልእክቲህ አዳል ውልውል ያምራዳኦና ዽዒመዋ ጉዳይ ያነ፡፡ ኢዽጋ አክ ዒንዻማራህከ ታምጠረጠረ አኪ ቁዱሳት ማጻሕፍቲ ታስዖጾጸም ባሊህ፣.ታይ ጉዳይ ጉዱሳን፣ ታሃሞም አበኒርከህ ያለዪን፣ 17.አቲን ለ ካሓንቶሊቶ! ታሃም ቶኮምኒህ ተዸጊን፣ አማይጉል ዓመጽቲ ገጋህ ሂርጊምታናክ ሲኒ ፁኑዕ አቅዋማህ ራዳናሞ ሰሊታ፡፡ 18.ናቢህ ኒ ማዳራከ ኒ ያይዲኂነ ኢየሱስ ክርስቶሲህ ጸጋከ ኢዽጋህ ዓራ፣ ካያህ ካዶከ ኡማንጉሉህ ኪብሪ ያኮይ! አመን፡፡