ማላሚ ጴጥሮስ መልእክት

ማላሚ ሐዋርያ ጴጥሮስ መልእክት

ሳይማ      

       ማላሚ ሐዋሪያ ጴጥሮስሀ መልእክት ትምጽሒፈም ኢሲሲ ቦታል ገይምታ ባሶ ክረስቲያናህ ኪኒ፡፡ መልእክት ዋና ዓላማ ዲራብሊት ኪን መምህራን ኡማ ሢራሕከ ተን ትምህርቲ ይይቡሉወህ ይምፍጥረ አባዕላግቲ  ሂወት ያምቃዋሞና ኪኒ፡፡ ይምፍጥረ ጸገማቲህ   ሙኑሑይ  የከ ኢየሱስ  ሲኒ ኢንቲህ  ቱብለምከ  አይምሂሪህ አይቲህ ቶበ ሒያው ትላሰን ትምህርቲህ ኡላህ መዔፉጎከ ኢየሱስ ክርስቶስህ ዳዓባል ትምዽብዸ  ኢዽጋ  ገዎና ኪኒ፡፡ ጻሐፊ ዲቦህ ጥንቃቀ አበም "ክርስቶስ ጋሔህ ሚያምተ" ታዽሔ ዲራብቲ ሚህሮህ ኪኒ፣ ታሃም ዩብለህ ዋንስታህ "ክርስቶሰ ጋሔህ ያምተምኮ ዓያም፣ መዔፉጊ፣ ሒያው ኡምቢህ  ሲኒ ኃጢአትኮ ጋሖና ኪኒ  ኢካህ  ኢንከቲ ያላዮ ማጉራንጉል ኪኒ፡፡ "

________________________________________________

ማዕራፋ 1 

  1 ኢየሱስ ክርስቶስህ አገልጋሊከ ሐዋርያ የከ ስምዖን ጰጥሮስ፣ ኒ አምላከ ኒያይድኂነ ኢየሱስ ክርስቶስህ ጽድቂህ ዳዓባል ናኑ ገይነ ኢምነት ባሊህ የከ ኩቡር ኢምነት ገይተምክ፣ 2. መዔፉጎከ ኒማዳራ ኢየሱስህ ኢዽጋህ ጸጋከ ሳላም ሲናህ ያማንጎይ፡፡

     ፉጊ ደዖከ ዶሮ

  3. ኢሲ ዸግኃህ ክብረህ፣ ኢሲ መዔነህ ኒደዔም ነዸገርከህ ምክንያታል ሓቀከ መንፈሳውነቲህ ኒጉርሱሳ ጉዳአህ ሙሉኡክ መለኮታዊ ኃይላ ኖህ ዮሖወ፡፡ 4. ታይ ኖህ ዮምሖወ ጉዳይህ ኡላህ ኡማ ትምንቲህ ምክንያታል ዓለም አሞል ያነ ሞራሊህ ራድናንኮ ፣  መሎኮት ባህሪ ሓድሊታም ናኮ፣ ኩቡርከ ጋዳህ ናባ ታስፋ ኖህ ዮሖወ፡፡ 5. ታይ ምከክያታህ ታክቲለ ጉዳያት ሲናህ ኦሲቶክ ኢትጊሃ፣ ኢምነት አሞል መዔነ፣ መዔነት አሞል ኢዽጋ፣      6. ኢዽጋት አሞል ሲነ ያምቆጾጾሪኒም፥ ሲነ ያምቆጾጾሪኒሚህ አሞል ትዕግሥቲህ ሲክ ያናም፥ ትዕግሥቲህ ሲክ ያናሚህ አሞል መንፈሳውነት፣ 7. መንፈሳውነት አሞል ሳዖሊና፥ ሳዖሊኒ አሞል ካኃኖ ኦሳ። 8. ታይ ጉዳያት ማንጊህ ተሊኒምኮ ኒ ማደሪ ኢየሱስ ክርስቶስ ያዽጊኒም ማዳን፣ ሀካያትከ ፊረ ማሎሊ ማታኪን። 9. ታይ ጉዳይ ሂንማሪ ለ ዸዽ ኢርከህ ጉዳይ ያብሎ ታና ዑዉር ኪኒ፣ ቲላየ ካ ኃጢአያት ይምድምሲሰም ቢያይሲታ። 10. አማይጉል ይሳዖሎ! ደዕምምተኒምከ ዶሪምምተኒም ታይራጋጋፆናክ ጋዳህ ኢትጊሃ፣ ታሃም አብተኒምኮ ኢንኪጉል ማታምሰነከሊን። 11. ታይ ዓይነቲህ ኡማንጉልቲያ የከ ኒ ማዳራከ ኒ ያይድኂነ ኢየሱሱስ ክርስቶሲህ ማንግሥቲል ሳይቶና ሙሉእ መብቲ ሲናህ ያምሓወ፡፡ 

  12. አንኪጉል ኡካ ታይ ጉዳይ ተዸጊኒህከ ትብዽኒህ ሓቀል ትጽንዒኒህ ማርተኒሚህ፣ ኢሲን ሲና ያስሔሰሰቢኒምኮ ዒሲስ ሚኖን፡፡ 13. ታይ ሂወቲህ አነም ፋናህ፣ ሲና ኡማንጉሉህ አይናቃቃሖ ዮህ ኤዳም ሑንሱሱታ፡፡ 14. ኒ ማዳሪ ኢየሱስ ክርስቶስ ዮህ ይግልጸም ባሊህ  ዸህ ታይ ዓለምኮ ራባህ ባዽሲማም አዽገ፡፡ 15. አኑ ካዶ ትግሃት አባም፣ ራባህ ሲናክ ባዽሲማምኮ ላካል  ኡካ ታይ ጉዳይ ኡማንጉል ታዛካሮና  ዽዕቶና ኪኒ፡፡

ክርስቶስ ክብሪ  ኢንቲ ማሳኪር

   16. ኒ ማዳሪ ኢየሱስ ክርስቶስህ ኃይላከ ሙሙት ዳዓባል ሲናክ ነ ዋክተ ኒኒ ዸግኃህ ካግርማ ሀሲነህ ኪኖካህ ሒያው ቢልሓታህ ይምፍጢረ ታሪክ ኒ ኪቲለህ ማኪ፡፡ 17." ኡሱክ ይኒያቲሳ ይባዽ ታይ ቲያ ኪኒ"ያዽሔ አንዻሕሊህ ናባህ ክብረሊህ የመተ ዋክተ መዔፉጎ አባኮ  ምስጋናከ ክብረ ጋራየ፡፡ 18. ካሊህ ኒምቅድሰህ ኢምባት አሞል ኒነ ዋክተ ታይ ዓራንኮ የመተ አንዻሕ ናኑ ኒነህ ኖበ፡፡ 19. ታሃም ለ ጋዳህ ያይሰ ዒለህ ኒ ያይረገገጸቲያ ነብያት አፋህ ሊኖ፣ ታይ ቃል ባር ማሓም ፋናህከ፣ ማሒ ሑቱክቲ ኢፎያም ፋናህ፣ ድተድ ኢፎዋ፣ ኢፎይታ ባሊህ አብተኒህ አካህ ታምጥንቅቂንጉል መዔም ኪኒ። 20. ኡማኒሚህ ባሶል ታስታውዓሎና ሲናህ ኤዳም፣ ማጽሐፍ ቁዱሱል ገይማ ትንብት አኪናን ሒያውቲ ኢሲ ግሊህ አታሓሳሲባህ ያይታርጋሞ ማዽዒማም ኪኒ። 21. አይሚህ አኪናን ትንብት ሒያው ፍቃዳህ ኢንኪጉል ማ'ማቲና፣ ያኮይ ኢካህ ትንብት፣ መንፈስ ቁዱሱህ ትምሪሔ ሒያው መዔፉጎኮ ጋራየኒህ ዋንሲተኒም ኪኒ፡፡   

ማዕራፋ  2

ዲራብቲ  መምሂራን

   1. ያኮይ ኢካህ ባሶ ዳቦን ህዝቢ ፋናድ ዲራብቲ ነብያት ይንኒም ባሊህ፣ ታማምባሊህ ሲን ፋናድ ዲራብቲ መምሂራን አኔሎን፣ ኢሲን ሊይ ካታሳ ዲራብቲ ሚሂሮ ሱዕሶህ ሳይሳን፣ ተን ይድኅነ ማዳራ አይከ ያክሕድኒም ፋናህ ሱዉር ሊይ ኤልባሃን፡፡ 2. ታይ ዓይነቲህ ማንጎ ማሪ ተን ሖላሳ አራሓህ ያኪትሊን፣ ተን ተግባርኮ ለ ኡጉተሚህ ሓቂ አራሕ ዋትሚማ። 3 ታይ ዲራብቲ ማማሂራን ማል ሀጉገኮ ኡጉተሚህ ሲነህ ይፍጢሪን ታሪክ ዋሪሳክ ተን ያብዝብዽዚን። ማንጎ ዋከተኮ ባሶል ኤዸዽሰ ፊርዲ አካህ ዮምሶኖዶወ፣ ሊዪ ትንቂሔህ ተን ኢላልታ። 4. መዔፉጊ ኃጢአት ሢራሕተ መላአክት ዳ ዲተክ አዳድ ሰንሰሊህ ዩምዹውኒህ ፊርዲ ለለዕ ኢላሎና ጋሃናማድ ተን ዒደ ኢካህ አካህ ማናኅሩሪና፡፡ 5. ታማም ባሊህ ለ መዔፉጊ ኃጢአት ለም ኤልማርታ ዓለሚህ አሞል ሊይ ላየ ባሄህ ጽድቂ ሰባኪ ኪይይ ዪነ ኖኅ አኪ ማልሒና ሒያውቶሊህ ይይድኅነ ኢካህ ባሶ ዓለሚህ ማናኅሩሪና፡፡ 6. ለል ኃጢአት ሢራሕተም ኡምቢህ ቅጽዓት ሚሳለ ያኮ ሶዶምከ ጎሞራ ካቶም ጎምቦድ ያኪኒም ፋናህ ሓራረኒህ ያላዮና ይፍሪደ። 7. ዓማፂ ሖላሳ ተግባራህ አምስቂቅክ ማራይ ይነ ጻድቅ ሎጥ ለ ይድኅነ፤ 8. አይሚህ ቶይ ጻድቅ ኪን ሒያውቲ ተን ፋናድ ማራህ ኢሲሲ ለለዕ ያብለምከ ያበ ኡማ ተን ሢራሒህ ምክንያታል ጻድቅ ናፍሲ አምጺንቂይ ይነ፡፡ 9. አማይጉል ታሃም ኡምቢህ ታህ ታከምኮ መዔፉጊ መንፈሳውያን ኪን ሒያው ፋታናኮ ተን ያይድኅኖ፣ ኃጢአት ለም ለ አይናህ ኢሰህ ያቅፅዔምከ ፊርዲ ለለዕህ ለ አይናህ ኢሰህ ተን ሱጉሳም ያዽገ ማለት ኪኒ። 10. ባዽሳህ ቶይ ርኩስት ተከ ሲኒ ሓዶይታህ ካኃኖ ታክቲለምከ መዔፉጊህ ሢልጣን ዻይታም ፊርደህ ዻዉዻህ ሱጉሳ።  ታይ ዲራብቲ መምሂራን ደፋራትከ ትዕብት ለም ኪኖንጉል፣ ዓራነቲ ሢልጣናህ ኡካ ዋትሞና ማማይሲታን፡፡ 11. መላእክት ኡካ ተንኮ ኃይላህከ ሢልጣናህ ታይሰም የክኒሚህ፣ መዔፉጊህ ነፊል ዓራንቲ ሢልጣናታህ አምክሲሲህ ማዋቲማን።  12. ታይ ዲራብቲ መማሂራን ግን ያስታውዓሎና ታናን ጉዳህ ዋቲማን፣ ኢሲን ያባዾናከ ያይላዮና ቶቦከም ባሊህ፣ ተፈጥሮ ሲሚዒቲህ ማራናም ባሊህ፣ አእምሮ ሂን እንሲሳ ኪኖን፣ ኢንሲሳ ታላየም ባሊህ ኢሲን ለ ያለይን፡፡ 13. ተን ዓማፂህ ሊሞ  የከ ቂፅዓት ለ ጋራን፡፡ ተን ኒያቲህ ለለዕ ሙሉእድ ኃዶይታ ዲላይኮ ኃይታናም ኪኒ፣ ታይተለለ ኃዶይታህ ሲኒ ዲላያህ ኡማን ዋክተ ኒያታም የክኒህ ያኒን ሃኒህ፣ ሲንሊህ ካሓኒ ማይዲህ አሞል ገይማንጉል ናውረ ለምከ ሖላሳም ኪኖን። 14. ኃጢአት አቦትኮ ሶለ ዋይታ ሚልኪት ታሓየ ኢንቲ ሎን፣ ጽንዓት ሂን ሒያው ያይተለሊን፣ ማላህ ታምሆጎጎወ አፍዓዶ ሊማድ ሎን፣ አባሪምተ ሒያው ኪኖን! 15. ኢሲን ቁኑዕ አራሕ ሓባን። ኡማ ሢራሒህ ሊሞ ያከ ማል ይክሒነ ቦሶሪን ባዽ በልዓም አራሕ ይክትሊኒህ የምገገይን፡፡ 16. ዓለምል ለ ኃጢአት ዳዓባል ያምግስጺን፣ ዋንስቶ ዽዔዋይታ ሔራ /ኦኮሎይታ/ሒያው አፋህ ዋንሰተህ ነብይ ዒብዳኒህ ሢራሕ ተምቆወመ፡፡ 17. ታይ ሒያው ላየ አለዋይታ ሚንጺት ኪኖን፣ ማእበል ሓሓይቲ በያ ዳሩር ኪኖን፣ ዳ ዲተ ተን ኢላልታ። 18. አይሚህ ገጋድ ማራታ ሒያውህ ፋናድ የውዒኒህ የመትኒምኮ ገና ማንጎሙድ ሱገዋየተ ሒያው ካንቶ ኪን ናባ ቃላት ዋንሲታክ፣ ኃዶይታ ካኃኖህከ ካሓኒ ጉረታዮህ ዲራቢታክ ዱዱሳክ ተን ያይተለሊን፡፡ 19."ናፃ አውዔልቲን"አይክ ታስፋ አካህ ያሔን፡፡ ኢሲን ሲነህ ለ ኃጢአት ባሪያ ኪኖን፣ አይሚህ ሒያውቲ ሱቡታጉል ባሪያ የከህ ያምግዚኤ። 20. ኒማደራከ ኒ መድኃኒ ኢየሱስ ክርስቶስ የዸጊኒህ ዓለም ሩክሰትኮ የውዒኒምኮ ላካል ጋሔኒህ ታማይ ሩክሰቲህ ይምዽብዽኒህ ሱቡተኒምኮ ባሶቲያኮ አጋናል ሣራቲይ ጊዲድቲያ አክ ያከ፡፡ 21. አይሚህ ጽድቂ አራሕ የዸጊኒምኮ ላካል አካህ ዮምሖወ ቁዱስ ትኢዛዝኮ ሣራቱላል ጋኃናምኮ ጽድቂ አራሕ አዽገካህ ራዔኒህ የኪኒህ ያኪንዶ አካህ አይሰ ዻዸ፡፡ 22."ናሀሪተም ሙዹዖ ካሪ ኢሲ ናሃራድ ጋሓ፣"ታማምባሊህ"ሐሰማ ዓካልተምኮ ላካል ጋሕታህ ፂቂ አሞል ታምባኮኮለ" ያዽሒኒሚህ  ሚሳለ ሓቀ ተከህ ተን ማዳ፡፡               

                                                       ማዕራፋ 3

ማደራ የከ ኢየሱስ  ሙሙቲህ ታስፋ

    1. ይሳዖሎ! ታይ ሲናል አጽሕፍክ አነም ይማላሚት መልእክት ኪኒ፣ ላማ መልእክት ሲናል ኢጽሕፈም ታይ ጉዳይ ሲን ኤስሔሰሰቢህ ቁኑዕ ሓሳብ ታሎና ሲን ኡጉጉሶ ያናማህ ኪዮ፡፡ 2. ታሃምኮ ባሶህ ቁዱሳን ነብያት ዋንሲተን ቃልከ ሲኒ ሐዋርያቲህ አራሓህ ገይተን ኒማደራከ ኒ መድኃኒህ ትኢዛዝ ታዛካሮና ጉራክ አኒዮ። 3. ኡማኒምኮ ባሶል ታሃም ኢስውዒላ፣ ባኪቶ ለለዓድ ታይለገጸምከ ሲኒ ኡማ ትምኒት ታክቲለ ታይወናበደም አምተሎን። 4. ተናህ "ማደሪ ኢየሱስ አምተለ የኒህ ታስፋ አካህ ቶምሖወህ ማና? ኢቦል አልታነ? ባሶት ኒ አቦብቲ ራበን ዋክተኮ ኡጉተኒህ ኡማን ጉዳይ፣ ፍጥረት ኤዸዾይታኮ አዸዽሰህ ይነምባሊህ ኪኒ ያን። 5. ታይ ሒያው ማንጎ ዋክተኮ ባሶህ ዓራንከ ባዾ መዔፉጊህ ቃላህ ትምፍጢረም ኪናም ያኮይ የኒህ"ማናዺገ የን"፣ ባዾ ለ ሢራሕምተም ላየከ ላየህ ኪናም ይክኂዲን፣ 6. ታማይ ዋክተ ይነ ዓለም ላየህ ይምስፍነህ የለየ። 7. ካዶ ታነ ዓረንከ ባዾ፣ ዓማጽት ኪን ሒያው ታለየም ፋናህ አይክ ፊርዲ ለለዕ ፋናህ ታይ መዔፉጊህ ቃላህ ጊራህ ዻውዹመኒህ ሱገሎን፡፡ 8. ይሳዖሎ! አቲን ለ ማደራህ ኢንኪ ለለዕ ኢንኪ ሲሕ ቲዻ፣ ኢንኪ ሲሕ ኢንኪ ኢግዲህ ኢዻ፣ ሲሕ ኢንኪ ለለዕ ቲዻ ኪናም ታይ ጉዳይ ማቢያስትና፡፡ 9. ውልውል ሒያው ያካሊኒም ማደሪ ኢየሱስ ዋንሲተ ታስፋ ቃል ያፊጺመምኮ ማዓያ፣ ያኮይ ኢካህ ሒያው ኡምቢህ ንስሓህ ኤዳም ያኮና ኢካህ ኢንኪ ሒያውቲ ያላየምኮ የህ ተና ዮዋ ትዕግሥቲ አባ። 10. ማዳሪ ለለዕ ለ ባዸዻይቶ ባሊህ ዲንገቲህ ያሚተ፣ ታማይ ለለዕ ዓራናል ናባ ድምፀህ ቲላ፣ ፍጥረት ሙሉኡክ ጊራህ ሓራረህ ያለየ፣ ባዾከ ተ አሞል ያነ ጉዳይ ኡምቢህ ሓራራ፡፡ 11. አማይጉል ኡማን ጉዳይ ታይ ዓይነቲህ ያለየህ የከምኮ፣ ይቦል ሲኒ ቅድስናከ መንፈሳውነት ናብራህ ማራናም አይናህ የህ ሲናድ ማሳ! 12. አማይጉል መዔፉጊህ ለለዒህ ሙሙት ሳናህ ኢላልታምከ ዸህ ለ ያማቶ ሢራሕታም ቲካ። ታይ ለለዕ ዓራን ጊራህ ሓራረህ ያለየ፣ ትምፍጢረም ለ ጊራ ላዕናህ ታምኮኮመ። 13. ያካካህ ናኑ ጽድቀህ ኤድማራና ዑሱብ ዓራንከ ዑሱብ ባዾህ ታስፋ ቃሊህ ሪምድህ ኢላልና፡፡ 14. አማጉል ይሳዖሎ! ታሃም ኡምቢህ ታከ ለለዒህ ኢላሎት አሞል ትኒይኒምኮ፣ ማዳሪ ኢንኪ ናውረ ማለህ ያኮይ ናቃፋ ማለህ ሳላማህ ሲን ገዮክ ትግሃታህ ሢራሓ፣ 15. ኒማዳሪ ትዕግሥቲ አበም አቲን ታድኃኖና የህ ኪናም ማዛንጋዒና፣ ኢምክኂን ኒሳዓል ጳውሎስ ለ አካህ ዮምሖወ ቢልሓቲህ መጠኒል ሲናህ ይጽሕፈም ታሃሞም ኪኒ። 16. ኡሱክ ታጉል ታይ ጉዳህ ኢሲ ፋሮህ መልእክታት ኡምቢህ ታይ ዓይነቲህ ይጽሒፈ፣ ካ መልእክቲህ አዳል ውልውል ያምራዳኦና ዽዒመዋ ጉዳይ ያነ፡፡ ኢዽጋ አክ ዒንዻማራህከ ታምጠረጠረ አኪ ቁዱሳት ማጻሕፍቲ ታስዖጾጸም ባሊህ፣.ታይ ጉዳይ ጉዱሳን፣ ታሃሞም አበን ኢርከህ ያለይን፣ 17. አቲን ለ ካሓንቶሊቶ! ታሃም ቶኮምኒህ ተዸጊን፣ አማይጉል ዓመጽቲ ገጋህ ሂርግምታናክ ሲኒ ፁኑዕ አቅዋማህ ራዳናሞ ሰሊታ፡፡ 18. ናቢህ ኒ ማዳራከ ኒ ያይድኂነ ኢየሱስ ክርስቶስህ ጸጋከ ኢዽጋህ ዓራ፣ ካያህ ካዶከ ኡማንጉሉህ ክብሪ ያኮይ! አመን፡፡