ኤደዶይታ መልአክት ተሰሎኖቄል

ኤዸዾይታ ጳውሎስ መልእክት ተሰሎኖቄል

ኤዸዾይታ ጳውሎስ መልእክት ተሰሎኖቄል

ሳይማ       [ዸ ዹ ዺ ዻ ዼ ዽ ዾ]

    ተሰሎንቄ መቅዶንያ አክያን ሮማ ግዝአቲህ ዋና ካታማ ኪይይ ቲነ፣ ጳውሎስ ተሰሎንቄ ሞሶ ዓረ ዮስቆቆመም ፊልጵስዩስ ሓበህ የደምኮ ሣራህ ኪኒ፡፡ ያኮይ ኢካህ አይሁድ ሃይማኖት ጋራዮና ካብተህ ቲነ አረማውያን ጳውሎስ ካብ ኢሳ ክርስትና መልእክቲህ ሂርገኒህ በኒህ ይንንጉል አይሁዳውያን አይሲነኒህ ጳውሎስ አሞል ተቃውሞ ኡጉሠኒህ ይኒን፣ አማይጉል ጳውሎስ ተሰሎንቄ ሓበህ ድርቤ ቱላል ያዳዎ ይምግዲደ፣ ሳሮያ  የህ  /ዓያያ የህ/ ለ ቆሮንጦስ ማደጉል ካያህ ዻየ ጎሮን ኪይይ ዪነ ጢሞቴዎስ ተሰሎንቄ ሞሶዓረድ ቲነ ኩነታቲህ ዝርዝር ኤልይጽሒፈ ጳውሎስ ኤዸዾይታ መልእከት ተሰሎንቄ ሒያዋል ይጽሒፈም ክርስቲያን ያይጣናካሮከ ያይጻናናዖ ኪይይ ዪነ፣ ተን ኢምነቲህ ዳዓባልከ ተን ካሓኒህ ዳዓባል መዔ ዋረ ዮበርከህ ተን ያይምስግነ፣ ኡሱክ ተን ፋናድ ገይመ ዋክተ አይሚህ ዓይነቲህ ሂወቲህ ማራም ተን ያስሔሰሰበ፣ ታማርከኮ  ለ ክርስቶስ ማላሚ ሙሙት ትምልኪተህ ኡጉተ ኤሰሮህ መልስ  ያሓየ፣ ታይ ኤሠሮኮ ዳጎም፣ "ክርስቶስ ጋሓምኮ ባሶል ራበ አማኒ፣ ክርስቶስ ጋሕናን ገይስሳ ኡማንጉለት ሂወት ሓዲሊታቲያ ያከ?" ክርስቶስ ጋሔህ ያምተም አንዳ ኪኒ?" ታም ኪኖን፣ ጳውሎስ ለ ታይ አጋጣሚህ ይምጥቂመህ  ክርስቶስ ማላሚ ሙሙት ታስፋህ ኢላላክ ታማም ፋናህ ቲበኤያይ ሲኒ ሢራሕ ሢራሓ የህ ተን ያምኪረ።                

          ============================================================================

ማዕራፋ 1

ተሰሎንቄ ሂውትከ ኢምነት

   1. ንመዔፉጎ አባከ ማዳራ ኢየሱስ ክርስህቶሲህ ወገን ተከም፣ ተሰሎንቄ ሒያዊህ ሞሶዓረህ፣ ጳውሎስ፣ ሲላስከ ጢሞቴዎስኮ ፋርምተ፣ ጸጋከ ሳላም ሲናህ ያኮይ። 2 .ኡማን ዋክተ ኒኒ ጻሎቱህ ሲን አዝክሪክ ሲን ምክንያታል ኡማን ዋክተ ፉጎ ናይምስጊነ። 3. ሲኒ ኢምነቲህ ባርካታህ አይናህ ተኒህ ሢራሕታናም፣ ሲኒ ካሓኒህ ምክንያታል አይናህ ተኒህ ኃዋልታናምከ ኒማዳራ ኢየሱስ ክርስቶስሊህ ሊቲን ታስፋህ አይናህ ተኒህ ሲክ ተኒህ ታኒኒም፣ ኒአማላክ ናባህ ነፊል አስቆሮጸካህ ናዝኪረ። 4. ፉጎህ ኢምክሒን ይሳዖሎ! መዔፉጊ ሲን ዶረም ናዽገ። 5. አይሚህ ኒኒ ወንጌል ሲናህ ኒብሥረም ዓዲህ ጥራሕ አከካህ ኃይላህከ መንፈስ ቁዱሱህ፣ ወንጌል ዳዓባል ለ ሓቀል ርጊጽ ኪኖሙህ ኪኒ፣ ሲንሊህ ኒነ ዋክተ ሲን ጥቅመህ አይናህ ነህ ማርነም ታዽጊን። 6. ኢንኪጉል ኡካ ማንጎ ሔልዋይ ሲን ማደሚህ መንፈስ ቁዱስኮ ገይመ ኒያቲ ቃል ጋራይተኒህ ኖከ ማዳራ ኢየሱሱህ ኢግዳም ተኪን። 7. አማይጉል መቄዶንያልከ አካይያል ገይምታ መእመናን ኡምቢህ መዔ ምሳለ ተኪን። 8. መዔፉጊህ ቃል ሲንኮ የውዔህ ዮሞበም መቄዶንያከ አካይያል ዲቦህ አከካህ መዔፉጎል ሊቲን ኢምነት ኡማን ቦታል ይምዽገህ ዪነ፣ ታይ ምክንያታህ ናኑ ታይ ጉዳይህ ዳዓባል ኢንኪም ዋንሲኖ ኒማጉርሱሳ። 9. ሲን ኡላል ነመተ ዋክተ አይናህ ተኒህ ኒጋራይተኒም፣ ያነቲያከ ሓቀ ኪን አምላክ ናስጋልጋሎ ጣዖትኮ መዔፉጎል አይናህ ተኒህ ጋሕተኒም ኢሲን ሲነህ ያምስኪሪን። 10. ታማም ባሊህ መዔፉጊ ራባኮ ኡገሠም፣ ታሚተ ቁጡዓኮ ኒያይድኅነቲ፥ ባዽ ኢየሱስ ዓራንኮ የመተም አይናህ ተኒህ  ኢላልታናም  ያምስክሪን ።                                         
                                                ማዕራፋ 2       
                                 ጳውሎስ ሐዋርያ ሢራሕ ተሰሎንቄል
  

    1. ይሳዖሎ ናኑ ሲኑላል ናሚተም ፍረ ማሊ ማኪም አቲን ሲነህ ታዺጊን። 2. አቲን ታዽጊኒም ባሊህ ታሃምኮ ባሶህ ፊልጵስዩስል ናይባሣሮ አምላክ ዲፍረት ኖህ ዮሖወ። 3. አይሚህ ናኑ ሲን ፋይሰነም ገጋህ ያኮይ ሩኩስ ዓላማህ ኒምርሔህ ማኪ፣ ሲና ናይታላሎ ነህ አብነ ጉዳይኮ ኢንኪም ማታነ። 4. ናቢህ መዔፉጊህ በሠራታ ቃል ኖያህ ኃደራህ ኖህ ዮምሖወም፣ ኖያል የምኤመመነህ ኪንጉል ዋንሲታክ ናነ፣ ታሃም ለ አብነም ናፍዓዶ ያምርሚረ ፉጎ ኒያቲስኖ ነህ ኪኒ ኢካህ ሒያው ኒያቲስኖ ነህ ማኪ። 5. ነስሔበበለህ ያኮይ ማል ዲላይ ነለህ ኢንኪጉል ማዋንሲቲኒኖም አቲን ሲነህ ታዺጊን፣ መኤፉጊ ለ ኒማስኪር ኪኒ። 6. ክርስቶስ ሐዋሪያት ኪኖሙህ መጠኒል ኒኒ ሢልጣናህ ሲናል ናሮ ዺዓህ፣ ሲንኮ ያኮይ አኪማራኮ ኢንከቶኮ ኪብረ ማጉርኒኖ። 7. ያኮይ ኢካህ ኢሲ ዻይሎህ ሰሊታ ዓሰበንታ ባሊህ ጋርሄለም ሲናህ ነከ። 8. ታማም ባሊህ ጋዳህ ሲን ኒክሒነጉል ናባህ ካሓኖኮ ኡጉተሚህ ፉጊ በሠራታ ቃል ሲን አይብሥርክ ዲቦህ አከካህ፥ ኒኒ ሕይወት ለ ኡካ ሲናህ ናሓዎ ቶምሶኖዶወም ኪክ ኒነ። 9. ይሳዕሎ! አይናህ ነህ ሢራሕነምከ ሐዋልነም ታዺጊን፣ መዔፉጊህ በሠራታ ቃል ሲን አይቢሢሪህ፥ ሲንኮ ኢንከቲ አሞል ዑካ አክ ያከምኮ ባርከ ለለዕ ሢራሓህ ኃዋላክ ኒነ። 10. ሲንሊህ አማንቲ ፋናድ ኒነ ዋክተ አይናህ ኢግድ ቅድስናከ ጽድቀህ፥ ናቃፋ ሂን ሂወቲህ ማርነም አቲን ማስኪር ኪቲን፥ መዔፉጊ ለ ማስኪር ኪኒ። 11. አባ ኢሲ ዻይሎህ አባሚህ ዓይነቲህ ናኑ ለ ሲናህ ቲቲያህ ሲናህ አብነም ታዽጊን። 12. ኡማን ዋክተ ሲን ይይሳከ ሲን አይበረተዒክ፥ ካማንግሥቲከ ክብረ ሓዲሊቶና ሲን ደዔ አምላክ ኒያቲሳ ዒለህ ማርቶና ሓደራ ሲናክነም ታዽጊን፡፡

  13. ለል ለ ሲን ዳዓባል አስቆሮጽካህ መዔፉጎ አካህ ናይምስጊነሚህ ምንኒያት ሊኖ፥ ታሃም ኖኮ ቶቢኒህ መዔፉጊህ ቃል ጋራይተን ዋክተ፥ ሲን አማንቲህ ሢራሓህ ታይ ቃል ጋራይተ ሒያውህ ቃል ባሊህ አከካህ መዔፉጊህ ቃል ባሊህ አብተኒህ ኪኒ፥ ዓዲህ ለ ፉጊ ቃል ኪኒ፣ 14. ይሳዖሎ አቲን ለ ይሁዳ ባዾል ገይምታ ኢየሱስ ክርስቶሱህ መዔፉጊህ ሞሶዓሪት ተኪኒህ ትምግዺን፥ አይሚህ ኢሲን አይሁድ ሒያው መከራ ጋራየኒም ባሊህ ኡምቢክ፥ አቲን ለ ሲኒ ወገናታህ መከራ ጋራይተን። 15. አይሁድ ማዳሪ ኢየሱስከ ነብያት ትግዲፈም፥ ኖያ ለ ተይሰደዲኒህ ባዾኮ ተየዔም ኪኖን፥ ኢሲን መዔፉጎ ታስኅዚነምከ ሒያው ኡምቢህ ኒዒባም ኪኖን። 16. አይሚህ አረማውያን ኤድ ያድኅኒን ቃል ዋንሲናምኮ ኡካ ኒደሰን፥ ታይ ዓይነቲህ ኃጢአት ኃጢአት አሞል ኦሳክ ያዲይን፥ አማይጉል ባክቶል መዔፉጊህ ቁጡዓ ኤልተመተ፡፡

                           ጳውሎስ ተሰሎንቄ ሒያው ጋባዔህ ማዶ ሊይይ ዪነ ትምኒት 

    17. ያኮይ ኢካህ ይሳዖሎ! መንፈሲህ አከካህ ኃዶይታህ ዳጎ ዋክተ ሲንኮ ባዽስምነርከህ ሊኖ ሳና ማንጎቲያ ኪኒጉል ኢንቲህ ሲን ናብሎ ናትሚኔ። 18. ሲኑላል ናማቶ ጉርነህ ኒነ፣ ባዽሳህ ለ አኑ ጳውሎስ ሲኑላል አማቶ  ጋባዔህ ኢዕክነህ ኢኒዮ። ያከካህ ሰጣን ኒደሰ፥ 19. ይቦል ኒታስፋ ያኮይ ኒኒያት ያኮይ ኒማዳሪ ኢየሱስ ያምተ ዋክተ ካነፊል አካህ ናምኪሔ ኒ ሱባህ አክልል አቲን አከዋይተኒምኮ፥ አከቲ አይቲያ ኪኒ። 20. ዓዲህ  ኒ ክብረከ ኒኒያት  አቲን  ኪቲን፡፡

ማዕራፋ 3

ጢሞቴዎስ ተሰሎንቄ ቱላል ፋሪመ 

  1. አማይጉል ካምቦኮ ላካል ኢላልኖ ማዽዕናጉል አቴናል ዲቦህ ራዓናም መዔም ተከህ ኖህ ቱምቡሉወ። 2. ኒሳዓልከ ክርስቶስ መዔ ዋረ አይብሥርክ ኖሊህ መዔፉጊህ አገልጋሊ የከ ጢሞቴዎስ ሲናህ ፋርነ፥ ሲናህ ፋርነም ሲን  ያይፃናናዖከ ኢምነቲህ ታጣንካሮና ሲን ያምካሮ ኪኒ። 3. ታሃም ለ ሲን ማዳ ጸገሚህ ታምሄውክኒምኮ ሲን አባ፥ ታይ ጸገም ኖያህ ኖህ ይምድበ ዒደት ኪናም አቲን ሲነህ ታዺጊን። 4. ኤረ ሲንሊህ ኒነ ዋክተ መከራ ኒማደም ኖኮመህ ሲናክ ነህ ኒነ፣ ታዽግኒም ባሊህ መከራ ተመተህ ትላይተ። 5. ታሃሚህ ምክንያታል ካምቦኮ ሣራህ ቱላል ኢላሎ ዽዔዋርከህ፥ ሲን ኢምነቲህ ዳዓባል አዻጎ ጉረህ ጢሞቴዎስ ሲና ዻጋህ ፋረ፣ ካያ ፋረም ምናልባት ያፍቲነቲ ሲን ይፍቲነህ ያከ፣ ኒሢራሕ ካንቶ የከህ ራዔህ ያኔ ያናማህ ማይሲተህ ኪዮ፡፡

   6. ካዶ ለ ጢሞቴዎስ ሲን ኡላኮ የመተህ ሲን ኢምነቲህ ዳዓባልከ ሲን ካሓኒህ ዳዓባል ኒያቲሳ ዋረ ኖክየ፣ ታማም ባሊህ አቲን ኡማንጉል መዕነህ ኒታዝክሪኒምከ ኖያ ታብሎና ኖህ ሳንታናም ኖክየ። 7. አይማጉል ይሳዖሎ! ኢንኪጉል ኡካ ናኑ ገይምናም ሔልዋይከ ጸገሚህ አዳል ነከሚህ፣ ሲን ኢምነቲህ ምክንያታል ሲናህ ናምጸነነዔ። 8. አይሚህ አቲን ማዳሪ ኢየሱሱህ ሲክ ተኒህ ማርታናም ኖያህ ኒ ሂወት ኪኒ። 9. ሀይከ ካዶ ሲን ዳዓባል ሞሳ ካብ ኢስናም፥ ሲን ምክኒያታል ካ ነፊል ናነጉል ኒያታህ መዔፉጎ አይምስግኒክ ናነ። 10. ባርከ ለለዕ ኃይላህ ጻሎት አብክ ናነም ኢንቲህ ኃዶይታህ ሲን ናብሎከ ሲን ኢምነትኮ ቱግዱለም ናማጎ ዽዕኖ ኪኒ። 11. ካዶ ለ ኢሰህ ናባ የከ አምላክከ ማዳሪ ኢየሱስ ሲኑላል ናማቶ ና'ራሕ ኖህ ያስላቶይ። 12. ናኑ ሲን ናክሓኖ ኤዳ፣ ሲነሲነህ ሊቲን ካሓኖከ አኪ ማራህ ለ ሊቲን ካሓኖ ማዳሪ ሲናህ ኦሰህ፣ ሲናህ ያይማንጎይ። 13. ታይ ዒለህ  ማደሪ ኢየሱስ ቁዱሳንሊህ ሙሉኡድ ያምተ ዋክተ ናባ የከ ናምአምላኪህ ነፊል ሲን አፍዓዶ ናቃፋ ሂኒም  ቁዱሳን ታኮና ሲን ያይበረተዔ።    

ማዕራፋ 4

መዔፉጎ ኒያቲሳ ሂወት

    1. ራዕተሚህ ይሳዖሎ! ፉጎ ኒያቲሶና አይናህ ተኒህ ማርቶና ሲናህ ኤዳም ኖኮ ትምህሪን፣ ካዶሊህ ማርታናም ታህ ተኒህ ኪኒ፣ ማዳሪ ኢየሱስ ሚጋዓህ ሲን ዻዒምናምከ ሲን ፋይስናም ታሃምኮ ባሶህ አብተኒሚኮ ታይሰም አብቶና ነህ ኪኖ። 2. ማደሪ ኢየሱስ ሚጋዓህ አይ ዓይነቲህ መምረሒህ ሚሂሮ ሲናህ ኖሖወም ታዽጊን፤ 3. መዔፉጊህ ፍቃዳህ አቲን ታምቃዳሶናከ ዙሙትኮ ሚርሕ ቶና ኪኒ። 4. ሲንኮ ኢሲሲ ኢሲ ሰውነት ቅድስናህከ ክብረህ ዻዉዸህ ያብዸም ያዻጎይ። 5. መዔፉጎ አዽገዋታ አረማውያን ካሓኒህ ትምነት አኔዋዎይ። 6. ታይ ጉዳህ ኢንከቲ ኢሲ ሳዓል አብድለ ዋዎይ፥ ወይ አይተለለ ዋዎይ፣ ታሃምኮ ባሶህ ሲናክ ነምባሊህከ ሲን ሰልስነም ባሊህ፥ ታይ ጉዳይ አብታም ማደሪ ያቅጽዔ። 7. አይሚህ መዔፉጊ ኒደዔም ቅደስናህ ማርኖ ኪኒ ኢካህ ሩክሰትድ ማርኖ የህ ማኪ። 8. አማይጉል ታይ ፋዎ ያምቀወመቲ፥ ያምቀወመም ቁዱስ መንፈስ ያሓየ መዔፉጎ ኪኒ ኢካህ ሒያውቶ ማኪ። 9. ሲነሲነህ ቲታ ያክሒኒኒም አቲን ሲነህ መዔፉጎኮ ትምሂሪንጉል፥ ታይ ጉዳይ ኢንከቲ ሲናል ያጽሐፎ ማጉርሱሳ። 10. ኡማን መቄዶንያል ታነ ሳዖሉህ ሙሉኡድ አምክሒነ ሊቲን፣ ተከሚህ  ይሳዖሎ! ካዶ ሲን ናምክረም ያይሰ ዒለህ ታምካሓኖናከ፣ 11. ሳላማህ ማርቶና ታጽዓሮና፣ ሲኒ ዸግኃህ ጉዳህ ታሕሳቦና፣ ታሃምኮ ባሶህ ሲን ኒኢዚዘም ባሊህ ሲኒ ጋባህ ሢራሕቶና ኪኒ። 12. ታሃሚህ ዓይነቲህ አምነዋይታ ሒያውሊህ ትክበረም አከልቲን፣ አኪናንቲህ ጽግዔ ጉረካ ሲነ ዽዕተኒህ ማረሊቲን።

ታነምከ ራብተሚህ አኒናህ ማዳሪ ያሚተ ዋክተ

   13. ይሳዖሎ! ታስፋ ሂን ሒያው ባሊህ ማኅዛኒና፣ ራብተ ሒያዋህ ሓቀ ያዻጎና ኪሕኖ። 14. ኢየሱስ ራበምከ ራባኮ ኡጉተም ናሚነ፥ አማይጉል ኢየሱስ ተመነህ ራብተም ፉጊ ኢየሱስሊህ ተንባሄለ፡፡ 15. ማደራኮ ጋራይነ ቃሊህ መሠረቲህ ሲናክ ናም ታሃም ኪኒ፥ ማዳሪ ያምተ ዋክተ ፋናድ ታነም ነከህ ገይምታማከ ራብተምኮ ማናኩመ። 16. ትኢዛዛት አንዻሕ፣ መላእክት አሞይቲህ አንዻሕ፣ ፉጊ ጡሩባ ለ ታማበ፥ ማደሪ ኢሰህ ዓራንኮ ኦባ፥ ክርስቶሱል ተመነህ ራብተም ዮኮምኒህ ኡጉተሎን፡፡ 17. ታማምኮ ላካል ናኑ ኒኒ ሂወቲህ ገይምታማክ ማዳራ አየር አሞል ጋራኖ ተንሊህ ዳሩሩል አንፊረ ሊኖ፥ ኡማንጉል ማዳራሊህ አከሊኖ፡፡ 18. አማይጉል ታይ ቃላህ ሲነሲነህ  ኤመጸነነዓ፡፡

ማዕራፋ 5

ማዳሪ ሙሙት ኦምሶኖዶዋይ ኢላላ

   1. ይሳዖሎ! ታይ ጉዳይ ያከ ዳባንከ ዋክቲ ዳዓባል ኢንኪም ሲናህ ታምጻሐፎ ማጉርሱሳ። 2 .አይሚህ ማደሪ ለለዕ ያምተም ባዸዻይቲ ባር አካህ ያምተ ዓይነቲህ ኪናም አቲን ሲነህ መዔለህ ተኪኒህ ታዸጊን። 3. ሒያው ኡማን ጉዳይ"ሳላምከ ናጋይታ ኪኒ አይህ፣ ሶኒያ ኡላሎ ተታብዸሚህ ዓይነቲህ ሊይ ዲንገቲህ ኤድታሚተ፥ ኢንኪ ዓይነቲህ አክ ሙሉሔኒህ ሚያውዒን። 4. አቲን ለ ይሳዖሎ! ዲተክ አዳድ ማኪቲን፥ አማይጉል ለለዕ ባዸዻይቶ ባሊህ ሲናድ ሚያምተ። 5. አይሚህ ለ አቲን ኡምቢክ ኢፊ ሒያውከ፥ ለለዕቲ ሒያው ኪቲን፥ ናኑ ባርቲም ወይ ዲተ ሒያው ማኪኖ። 6. አማይጉል ናኑ ኒንቂሄህ ኒነ ናግዛኦዋይ መጠኒህ ማርኖይ ኢካህ አኪማራ ባሊህ ዑንዱጉለ ዋዎኖይ።     7. አይሚህ ዑንዱጉልታ ሒያው ባር ዑንዱጉላን ዽናን፥ ታስኪረም ባር ታስኪረ። 8. ናኑ ለ ኢፊ ሒያው ኪኖጉል ኒነ ዻዉዽኖዋይ  መጠኒህ ማርኖይ፣ ኢምነትከ ካሓኖህ፣ መዕነ ሀይሲኖይ፥ ድኅነት ታስፋ ኒኒ ዸግኃህ ባርነጣ ባሊህ ሀይሲኖይ። 9. ፉጊ ኒደዓም ቁጡዓህ አከካህ ኢየሱስ ክርስቶሲህ አራሓህ ድኅነት ገይኖ ኪኒ። 10. ክርስቶስ ኒዳዓባል ራበም ሂወቲህ ናኮይ ወይ ራብነህ ካሊህ ኢንኮህ ማርኖ ኪኒ። 11. አማይጉል ካዶ አብታን ዓይነቲህ ቲይ ቲያ አህኒፂክ ሲነሲነህ ቲታ ሓታ፡፡

ባከቶ ፋዎከ  ሳላምታ

   12. ይሳዖሎ! ሲን ፋናድ ሢራሓህ ኃዋልታም፣ ማደሪ ኢየሱሱህ ሲኒ አሞይትትከ አማካርቲ ኪንማራ ተን ታስካባሮና ሲን ዻዕማክ አነ፡፡ 13. ተን ሢራሕህ ምክንያታል ተናህ ናባ ኪብረከ ካሓኒ ሲንሊህ ያናዎይ፥ አቲን ለ ሲነሲነህ ሳላማህ ማራ፡፡ 14. ይሳዖሎ! አዳ ዳጎማራ (ሰነፋት) ኢምኪራ፥ ማይሰኒት ኤደፈፈራ፥ ሩኩታም ጎሮኒሳ፥ ሒያዋህ ኡምቢህ ትዕግሥቲ አብቶና ሲን ፋይሳክ ናነ። 15. አኪናን ሒያውቲ ኡምነ ኡመነህ ደሄያምኮ ሰሊቶይ፥ ናቢህ ሲንኮ ኢንከከቲ አከቶህ መዔም አቦ ያትጋሆይ፥ ታማም ባሊህ አኪ ሒያዋህ ኡምቢህ መዔም አብቶና ኢትጊሃ፡፡ 16 .ኡማን ዋክተ ኒያታ፥ 17. አስቆሮጸካህ ጻሎት አባ፡፡ 18. ኡማን ዓይነቲህ መዔፉጎ ኢምስጊና፥ አይሚህ ኢየሱስ ክርስቶስሊህ  ሊቲን ሂውቲህ መዔፉጊ ሲንኮ ጉራም ታሃም ኪኒ፡፡ 19. መንፈስ ቁዱስ ሢራሕ ማልፊና፡፡20. ትንብያት ጎሮን ማዻይቲና፡፡ 21. ኡማን ጉዳይ ኢዕኪና፥ መዔም አኪናኒም ኢቢዻ። 22. አኪናን ዓይነቲህ ኡማ ጉዳይኮ ሚረሔያ፡፡ 23. ኢሰህ ሳላም አምላክ ኡማን ጉዳህ ሲን ያስቃዳሶይ፥ ሲን መንፈስ፥ ሲን  ናፍሰ፥ ሲን ኃዶይታ ሙሉኡድ ማደሪ ኢየሱስ ክርስቶስ ያሚተ ለለዕ ኢንኪ ነቃፋ ሂኒም ዻዉዹምተህ ማርቶይ፡፡ 24. ሲን ደዓቲ ኡሙን ኪኒጉል ታሃም አባ። 25. ይሳዖሎ! ኖያህ ለ ጻሎት አባ። 26. ሳዖሊኒ ሲምዒቲህ ቲታ ፉጉታክ አማንቲህ ሙሉኡድ ሳላምታ ካብ ኖህ ኢሳ፡፡ 27.ታይ ፋሮ ኡማንቲያህ ሙሉኡድ ታምናባቦ ማደሪ ሚጋዓህ ሐደራ ሲናክ አይክ አኒዮ፡፡  28. ኒማዳሪህ ኢየሱስ ክርስቶሲህ ጸጋ ሲንሊህ ታኮይ፡፡