ኤዸዾይታ ያሃንስ መልእክት

ኤዸዾይሰታ ሐዋርያ ያሃንስ መልአ 

 

                                                                                                                  

-

ኤዸዾይሰታ ሐዋርያ ያሓንስ መልእክት

                                                  ሳይማ                                                            ኤዸዾይታ ሐዋርያ ያሃንስ መልእክት ላማ ዋና ዋና ዓላማ ሎን፣ ኢሲን ለ ታይንብበም መዔፉጎከ ባዻ ኢየሱስ ክርስቶስልህ ለ ኢንኪኖ ያሎና ያይባራታዖናከ ታሃሞሙህ ኅብረት ታይላዮ ዺዕታ ዲራብቲ ትምህርቲኮ ሚሪሕ ዮና ያይጣንቃቆ ኪኒ፡፡ ታማይ ዋክተ ቱምቡሉወ ዲራብቲ ትምሂርቲህ ኡምነ አክታውዔ ማንጎ ያምቡሉወ ዓለምል ታከ ቲቲህ ገይቶኮ ኪንጉል፣ መዔፉጊህ ባዽ ኢየሱስ እንኪጉል ሒያውቶ ያኮ ወይ ሒያው ባህሪ ያሎ ማዺዓ ታዸሔም ቲነ፡፡ ቶይ መምሂራን ድኅነት ያናም ዓለማው ናብራኮ ጽንቀኮ ናፃ ያውዒኒም ኪኒ፤ አይ ይኒን፣ ታሃምሊህ ሞራል አቅዋም ያኮይ አኪ ሒያውቲህ ካሓኖ ያይቡሉውኒም፣ ድኅነትሊህ ኢንኪም ገይሲሳም ማለ አይ ይኒን፡፡ ጻሐፊ ታይ ትምሂርቲ አምቀወሚክ ኢየሱስ ክርስቶስ ፉጹም ሒያውቶ ኪኒ ኢየሱሱል ታሚነሚከ መዔፉጎ ኪሕናም ኡምቢህ ሲነሲነህ ያምካሖና ኤልተነ ያናማህ ይርድኢን።  ____________________________________________                                

  ማዕራፋ 1    

ሂወት ቃል    

   1. ኤዸዾይታኮ ይነጉል ሂወት ቃሊህ ዳዓባል ሲናህ ኒጽሒፈ፣ ታይ ሂወት ቃል ኖበምከ ኒኒ ኢንቲህ ኑብለም፣ ኒምልክተምከ ኒኒጋባህ ሀሳስ ኢስነም ኪኒ፡፡ 2. ታይ ሂወት ዩምቡሉወ፣ ናኑ ለ ኑብለህ፥  አምስክሪክ ናነ። አባሊህ ይነቲያከ ኖያህ ለ ይምቡሉወ ቲይ ኡማንጉሊት ሂወት ለ ሲናክ አይክ ናነ፡፡ 3. ኖሊህ ኢንኪኖ ታሎና ኑብለምከ ኖበም ኅብርት ታሎና አባከ ባዻሊህ ኢየሱስ ክርስቶልህ ኪኒ። 4. ኒኒያት ሙሉእ ያኮ ታሃም ሲናህ አጽሕፊክ ናኒኖ፡፡ 

                                               መዔፉጊ ኢፎይታ ኪኒ

    5. ተንኮ ኖበምከ ሲናክ ናዽሔ ፋሮ"መዔፉጊ ኢፎይታ ኪኒ፣ ዲተ ለ ካያድ ማታነ"ያናም ኪኒ፣ 6. አማይጉል"ፉጎሊህ ኢንኪኖ ሊኖ"አይህ፣ ዲተድ ማርናህ ነከምኮ ዲራቢታክ ናነ፣ ኒ ቃላድ ያኮይ ኒሥራሓድ ሓቂ ሚያነ ማለት ኪኒ፡፡ 7. ያኮይ ኢካህ ኡሱክ ኢፎል ያነምባሊህ፣  ናኑ ለ ኢፎል ናኔጉል ኒነኒነህ ኢንኪኖ ሊኖ፣ ለል ለ ባዽ ኢየሱስ ኃጢአትኮ ኡምቢህ ኒያይጽሪየ (ኒያይኒጺሔ)።"ኃጢአት ማሊኖ"ናጉል ኒነ አይተለልክ ናነ። ሓቂ ና'ዳድ ሚያነ። 9. ኒኒ ኃጢአት መዔፉጎል ናምነዘዘጉል፣ ኡሱክ ያምኢምነቲያከ ጻድቅ ኪኒጉል ኒኃጢአት ኡምቢህ ኖል ኃባ፣ ኒበደልኮ ለ ሙሉኡክ ኒያጽሪየ። 10."ኃጢአት ማሢራሒኒኖ ናጉል፣ መዔፉጎ ዲራብሊ አባክ ናነ፣ ካቃል  ናዳድ ሚያነ ። 

          ማዕራፋ 2 

                                                 ክርስቶስ ንዻዉዸና ኪኒ

   1 .ኦ'ይዻይሎ! ታይ ሲናል ኢጽሒፈም ኃጢአት ሢራሕታናምኮ ኤዸሔ ኪዮ። ያኮይ ኢካህ አኪናን ሒያውቲ ኃጢአት ሥራሔምኮ አባኮ ጣባቃ ሊኖ፣ ኡሱክ ለ ጻድቅ የከ ኢየሱስ ክርስቶስ ኪኒ፡፡ 2. ኒኃጢአት ለ ያምድምሲሰም ካያህ ኪኒ፣ ኒ ኃጢአት ዲቦህ አከካህ ዓለም ሙሉእ ኃጢአት ያምድምሲሰም ካያህ ኪኒ፡፡ 3. መዔፉጊህ ትኢዛዛት ናፍጽመም ነከምኮ ካያ ናዽገም ኪኖም ዓዶሳክ ናነ። 4."መዔፉጎ አዽገ"አይክ ካ'ትኢዛዝ አፍጽመዋቲ ይኔምኮ ዲራብሊ ኪኒ፣ ሓቂ ካአዳድ ሚያነ፡፡ 5. ያኮይ ኢካህ መዔፉጊህ ቃላህ ያምኢዚዘቲ ኡምቢህ ፉጎሊህ ለ ካሓኖህ ፉጹም ኪኒ፣ ሓቀህ መዔፉጊህ ሒያው ኪኖሙህ ናምዽገም ታሃማህ ኪኒ፣ 6."መዔፉጎሊህ ማራክ አነ"ያዽሔ ሒያውቲ፣ ክርስቶስ አካህ ማረካህ ማሮ ኤልታነ።

   ዑሱብ ትኢዛዝ 

   7. ኦ'ይካሓንቶሊቶ! ታይ ሲናል አጽሕፈ ትኢዛዝ ኤዸዾይታኮ ኡጉተህ ታዽጊንቲያከ  ሱገ  ትኢዛዝ ኪኒ ኢካህ  ዑሱብቲያ ማኪ፣ ታይ ሱገ ቲይ ኤዸዾይታኮ ቶቢን ቃል ኪኒ። 8. ያኮይ ኢካህ ክርስቶስ ሂወትከ ሲን ሂወት፥ ሓቀ የከህ ያይምቡሉወ ዑሱብ ትኢዛዝ ሲናህ አጽሕፊክ አኒዮ። አይሚህ ዲተ ተለየህ ሓቂ ኢፎይቲ ኢፎአይ ያነ። 9."ኢፎል ማራክ አነ"አይህ ኢሲ ሳዓል ኒዒብቲይ ገናህ ዲተድ ኪኒ። 10. ኢሲ ሳዓል ኪሕንቲ ኡምቢህ ኢፎል ማራ፣ ካ ምክንያታል ሒያው ኃጢአታህ ማጎንፎይታ፡፡ 11. ኢሲ ሳዓል ኒዒብቲ ለ ዲተድ ማራ፣ ዲተድ ጋሓንጋሓ፣ ዲተ ኢንቲት አክ ታስዖረጉል ኤልያዲየርከ ሚያዽገ። .           12. ኦይዻይሎ! ሲን ኃጢአት ካሚጋዓህ ሲናል ራዔጉል ሲናህ አጽፊክ አዮ።13. ኦ'አቦቦ! ኤዸዾይታኮ ቲነም ተዸጊንጉል ሲናል አጽሕፊክ አኒዮ፣ ዒንዳነይቲቶ! ሰጣናክ ሱብተጉል ሲናል አጽሕፊክ አኒዮ። 14. ኦ'ኢሮ! አባ ተዸጊንጉል ሲናል አጽሒፊክ አኒዮ። አቦቦ! ኤዸዾይታኮ ትነም ተዺጊንጉል ሲናል አጽሕፊክ አኒዮ፡፡ ዒንዻነይቲቶ! ኃይለለም ተኪንጉል፣ ፉጊ ቃላል ትጽኒዒኒህ፣ ሰጣን ትይስኒፊን ኢርከህ ሲናህ ኢጽሕፈ፡፡ 15. ዓለም ያኮይ ዓለም ጉዳይ ማክኃኒና። ዓለም ኪኅንቲ መዔፉጎ አባ ማኪሒና። 16. አይሚህ ኃዶይታ ታቲሚኒየም፣ ኢንቲ ዒዸ፣ ናብራ ሚኪሐ ዓለምኮ ኪኒ ኢካህ ፉጊ አባኮ ማኪ፡፡17. ዓለምከ ትምኒት ቲላን። መዔፉጊህ ፊቃድ ያፊጽመቲይ ለ ኡማንጉሉህ ማራ። 

       ክርስቶስ ያምቀወመቲያኮ  ሰሊት     

    18  ኦ'ይባዻ! ታሃሚህ ባክቶት ሳዓት ካዶ ኪኒ፣"ክርስቶስ ያምቀወመቲ አምተለ አይህ ቶቢን፣ ሀይከ ካዶ ኡካ ማንጎ ክርስቶስ ታምቆወመም ኡጉተ፣፡ ታሃሚህ ምክንያታል ባክቶ ሳዓት ኪናም ናዽገ። 19. ኢሲን የውዒኒም ኒ ፋንኮ ኪኒ። ያኮይ ኢካህ ባሶኮ ለ ኒ ወገንኮ ኪይይ ማናዎን፡፡ ኒ ወገንኮ የኪኒህ ያኪንዶ ኖሊህ ሲክ የኒህ ማረ ዻዸን፡፡ ያከካህ ኡምቢህ ኒ ወገንኮ አከዋየንርከ ማኪኖኑም ያዻጎና ኒፋንኮ ባዽሲመኒህ የውዒን። 20. አቲን ለ ክርስቶስ መንፈስ ቁዱሱህ ትምቅብኢን፡፡ አማይጉል ኡምቢክ ሓቀ አዽግክ ታኒኒ። 21.ሲናህ አጽሕፈም ሓቀ ማታዺጊን ኤህ ማኪዮ፡፡ አቲን ሓቀ ታዽጊን፤ ሓቀድ ዲራብ ኤድማገይማም ታዽጊን፡፡ 

   22. አማይጉል ኢየሱስ መሲሕ ኪናም ያክሕደቲያኮ በሒህ ዲራብሊ አቲያኪኒ? አባከ ባዻ ያክሕደቲ ኡምቢህ ክርስቶስ ያምቀወመቲያ ኪኒ፡፡ 23. ባዻ ያክሕደቲ አባ ማለ። ባዻ ያምነቲ አባ ያሚነ፡፡ 24. አቲን ለ ኤዸዾይታኮ ቶቢን ቃል ሲን አፍዓዶድ ሲክ የህ ማረምኮ፣ ባዻከ አባሊህ ኢንኪኖ አለሊቲን፡፡ 25. ታሃም ለ ክርስቶስ ኖህ ዮሖወ ታስፋ፤ ኡማንጉሊ ሂወት ኪኒ፡፡ 26. ሲን ታይተለ ሒያውህ ዳዓባል ታሃም ኢጽሕፈህ አኒዮ፡፡ 27. ያከካህ ክርስቶስኮ ጋራይተን መንፈስ ሲን አዳድ ያነጉል፣ አኪ መምሂር ሲን ማጉርሱሳ፣ ኡሱክ ኡማን ጉዳይ ሲን ያምሂረ፡፡ ሲን ያምሂረም ሓቀ ኪኒ ኢካህ ዲራብ ማኪ፡፡ አማይጉል ኡሱክ ሲን ያምሂረ ሚሂሮህ ሪሚዲህ ማራ፡፡ 

   28. አማይጉል ይዻይሎ ኡሱክ ያምቡሉወ ዋክተ ማይስታካህ ዲፍረቲህ ናብሎከ ያሚተ ለለዕ ሖላይሲናምኮ ካያድ ማርኖይ፡፡ 29. ኡሱክ ጻድቅ ኪናም ተዸጊነምኮ ጽድቀ አባቲ ኡምቢህ መዔፉጊህ ባዻ  ኪናም ታዻጎና ሲናልታነ ።                                               

                                                     ማዕራፋ 3

        መዔፉጊህ ዻይሎ    

    1."መዔፉጊህ ዻይሎ"ኖክ የኒህ ደዕምምኖ አባ አይናህ ኢግድ ካሓኖ ኖህ ዮሖወም ኡቡላ! ዓድህ መዔፉጊህ ዻይሎ ኪኖ፣ ዓለም መዔፉጎ ማዻጊናጉል ኖያ ለ ኒ'ሚያዽገ።"  2. ይካሓንቶሊቶ! ካዶ መዔፉጊህ ዻይሎ ኪኖ፣ ሳራሃ አይምታከም ገናህ ማማዻጊና፣ ያኮይ ኢካህ ክርስቶስ ያምቡልወጉል ሓቂ ካቢሶ ናበለም ኢዻህ ካያህ ኢጊዲኖም አዽጊክ ናነ።    3. ታሃም ታከም ክርስቶሱል ታስፋ አብታም ኡምቢህ ክርስቶስ ፂሪይቲያ ኪናማህ ኡሱክ ኢሰ ፂሪይቲያ አባ። 4. ኃጢአት አባቲ ኡምቢህ መዔፉጊህ ሕገ ያፊሪሰ አይሚህ ኃጢአት ያናም መዔፉጊህ ሕገ ያፍርሲኒም ኪኒ። 5. ክርስቶስ ሒያው ኃጢአት ያዳምሳሶ ዩምቡለወምከ ኡሱክ ለ ኃጢአት ማለም ታዽጊን፡፡ 6. አማይጉል ክርስቶሱድ ማራ ሒያውቲ ኃጢአት ማሢራሓ፣ ኃጢአት ሢራሓ ሒያውቲ ክርስቶስ ማብሊና ወይ ማዻጊና። 

  7. ኦ'ይዻይሎ! ኢንከቲ ሲን ያይተለለ! ክርስቶስ ጻድቅ ኪናምባሊህ ጽድቀ አባቲ ኡምቢህ ጻድቅ ኪኒ፡፡ 8. ዲያብሎስ ኤዸዾይታኮ ኡጉተህ ኃጢአት ሢራሔጉል፣ ኃጢአት ሢራሓቲ ኡምቢህ ዲያብሎስ ባዻ ኪኒ። መዔፉጊህ ባዺ ይምግሊጸም ዲያብሎስ ሢራሕኮ ዒዶ የህ ኪኒ። 9. መዔፉጊህ ባዻ ኪንቲ ኃጢአት ማሢራሓ፣ ሢራሖ ለ ማዺዓ፣ አይሚህ መዔፉጊህ ባህሪ ካአዳድ አክ ማርታጉልከ ፉጎኮ የቦከርከህ ኪኒ፡፡ 10. መዔፉጊህ ዻይሎከ ዲያብሎስ ዻይሎ ባዽሳህ ያምዺጊኒም ታሃማህ ኪኒ፣ ጽድቀ አበዋቲያከ ሳዓል አክኅነዋቲ ኡምቢህ መዔፉጊህ ባዻ  ማኪ።                      

 ሲነሲነህ ያምከሔኒንሚህ ዳዓባል  

  11. ኤዸዾይታኮ ቶቢን ፋሮ"ኒነኒነህ ቲታ ናክሓኖይ"ታዽሔም ኪኒ፡፡ 12. ሰጣን ወገን ኪይይ ይነ ኢሲ ሳዓል ይግድፈ ቃየል ባሊህ ያኪኒም መዳ፣ ኡሱክ ኢሲ ሳዓል አይሚህ ይግድፈ? ካሢራሕ ኡማቲያ ካሳዓሊህ ሢራሕ መዔቲያ ኪይይ ይነጉልከ ካሳዓሊህ ሢራሕ ትክክል ኪይይ ይነጉል ኪኒ።13. ይሳዖሎ! ዓለም ሲን ይንዒበምኮ ማምዳናቂና፡፡ 14. ናኑ ኒኒሳዖል ናክሒነጉል ራባኮ ሂወቲል ታብናም ናዽገ፣ ካሓኖ ሂን ሒያውቲ ራባድ ማራ፡፡ 15. ኢሲ ሳዓል ኒዕብቲ ኡምቢህ ናብሰ ገዳይ ኪኒ፣ ናብሰ ገዳይ ኡማንጉሊት ሂወት ማለም ታዽጊን፡፡ 16. ካሓኒ አይምቶ ኪናም ናዽገም ኢየሱስ ክርስቶስ ኢሲ ሂወት ቲላሰህ ኖህ ዮሖወጉል ኪኒ፣ ናኑ ለ ኒሂወት ኒኒሳዖሉህ ቲላስነህ ናሓዎ ኖህ ኤዳ፡፡ 17. ሒያውቲ ታይ ዓለሚል፣ ሀብተ ለሃኒ፣ ጸገም ለቲያ አብሊህ ናኅሩረ ዋየምኮ መዔፉጊህ ካሓኒ ካያድ አይናህ የህ ያኔ?  18. ይዻይሎ! ኒካሓኒ ሓቀከ ሢራሓህ ያምቡሉወቲያ ያኮይ ኢካህ አፋህ ያኮይ ዋኒህ ዲቦህ አከዋዎይ።                                                           

 ፉጊ ነፊል ሊኖ አምአማማን

  19. ታሃማህ ሓቀለም ኪኖምከ መዔፉጊህ ነፊል ለ ማሲማለህ ነምኤመመነህ ካብኖዋ ዺዒናም ናዽገ፡፡ 20. ኒ ኅሊና ኡማ ሢራሓህ ኒ ታውቂሰጉል፣ ፉጊ ኒ ኅልናኮ አጋናል ኪናምከ ኡማን ጉዳይ ያዽገም ርግጸይናታት ኪኖ፡፡ 21. ይሳዖሎ! ኒኅልና ኒማታውቅሰህ የከምኮ፣ መዔፉጊህ ነፊል ሙሉእ ዲፍረት አለሊኖ፡፡ 22. መዔፉጊህ ትኢዛዛት ታፍጽመምከ ካያ ኒያቲሳም ለ አብታም ናከጉል፣ ዻዒሚናም ኡምቢህ ካኮ ገያክ ናነ፡፡ 23. ፉጊ ትኢዛዝ ካ ባዻህ ኢየሱስ ክርስቶስህ ሚጋዓህ ናማኖከ፣ ክርስቶስ ኒ ይኢዚዘሚህ መሠረቲህ ኒነኒነህ ቲታ ናክሓኖ ኪኒ፡፡ 24. መዔፉጊህ ቲኢዛዝ ያፍጽመቲ ኡምቢህ፣ መዔፉጎድ ማራ፣ መዔፉጊ ለ ካያድ ማራ፣ ኡሱክ ለ መዔፉጎድ ማራ፣ መዔፉጊ ኖያድ ያነም ናዽገም ኡሱክ ኖህ ዮሖወ መንፈስህ  ኪኒ ። 

          ማዕራፋ 4

                                             ሓቂ መንፈከ ዲራብቲ  መንፈስ 

   1 ኦ'ይካሓንቶሊቶ! ዓለም አሞል ማንጎ ዲራብቲ ነብያት ኡጉተኒህ ያኒንጉል መንፈስል ኡምቢህ ማማኒና፣ ማንጊህ መናፍስቲ ፉጊም ኪናምከ ማኪም ኢምርሚራ፡፡ 2. መዔፉጊህ መንፈስ ባዺሰኒህ ናዽገም ታሃማህ ኪኒ፣ ኢየሱስ ክርስቶስ ሒያውቶ የከህ ኃዶይታህ ይምግልጸም ያምስኪረ መንፈስ ሙሉኡድ መዔፉጊህ መንፈስ ኪኒ። 3. ኢየሱስ ክርስቶስ ሒያውቶ የከህ ኃዶይታህ ዩምቡሉወም አምስኪረዋ መንፈስ ኡምቢህ ፉጊ መንፈስ ማኪ፣ ታይ መንፈስ፣ አምተ ለ አይህ ቶቢን ክርስቶስ ያምቀወመ መንፈስ ኪኒ፣ ኡሱክ ኡማንጉል ኡካ ዓለም አሞል ያነ፡፡ 4. ኦ'ይዻሎ! አቲን መዔፉጊህም ኪቲን፣ ሲናድ ያነ መንፈስ ዓለሚል ያነ መንፈስኮ ናባ፡፡ አማይጉል ዲራብቲ ነብያታክ ሱብታን፡፡ 5. ኢሲን ዓለምም ኪኖን፣ ዋንሲታናም ዓለም ጉዳይ ኪኒ፡፡ ዓለም ለ ተና ያበ፡፡ 6. ናኑ ፉጊም ኪኖ፣ መዔፉጎ ታዽገም ሙሉኡድ ኒታበ፣ ፉጊም አከዋታም ለ ኒሚያቢን፣ ሓቂ መንፈስከ ሓውዲ መንፈስ ናዽገም ታሃማህ ኪኒ። 7. ኦ'ይካሓንቶሊቶ! ካሓኒ ፉጎኮ ኪንጉል ኒነኒነህ ቲታ ናክሓኖይ፣ ፉጎከ ሚናዳም ኪሒንቲ ኡምቢህ ፉጊ ባዻ ኪኒ፣ ፉጎ ለ ያዽገ፡፡ 8. ፉጊ ካሓኖ ኪኒጉል፣ ሒያወቶ አክሒነዋቲ ኡምቢህ መዔፉጎ ሚያዽገ፡፡ 9. ካ ባዽህ ባርካታህ ሂወት ገይኖ መዔፉጊ ኢንኪ ባዻ ዓለሚህ ፋረ፣ ታሃማህ ለ መኤፉጊህ ካሓኒ አይዻ ኪናም  ኒያቡሉወ፡፡ 10. ካሓኖ ያናም ታህ ኪኒ፣ ናኑ መዔፉጎ ኒክሒነሚህ አከካህ ኡሱክ ኒይክሒነርከህ ኒኃጢአት ኖህ ያምዳምሳሶ ኢሲ ባዻ ኖህ ፋረርከህ ኪኒ፡፡ 11. ይሳዖሎ! መዔፉጊ ታሂዻ ኒይክሒነምኮ፣ ናኑ ለ ኒነኒነህ ናምካሓኖ ኖህ ኤዳ፡፡ 12. ፉጎ ዩብለቲ ኢንኪ ሒያውቲ ሚያነ፡፡ ናኑ ኒነኒነህ ነምከሔነምኮ መዔፉጊ ኖሊህ ማራ፣ ካ ካሓኒ ፉጹም ያከ፡፡ 13. መዔፉጊ ኢሲ መንፈስ ኖህ ዮሖወርከህ፣ ካያድ ማርናምከ ኡሱክ ኖያድ ማራም ታሃማህ ናዽገ፡፡ 14. አባ ዓለም ያይድኂነቲያ አበህ ባዻ ፋረም ኑብለህ፣ ናምስኪረ፡፡ 15. ኢየሱስ ፉጊ ባዻ ኪናም ያምስክረ ሒያውቲህ አዳድ ሙሉኡድ ፉጊ ኤድማራ፣ ኡሱክ ለ ፉጎድ ማራ፡፡ 16. አማይጉል መዔፉጊ ኖያሊህ ለ ካሓኖ ናዺገ፣ ናሚነ፡፡ ፉጊ ካሓኖ ኪኒ፣ ካሓኖድ ማራቲ መዔፉጎሊህ ማራ፣ ፉጊ ለ ካሊህ ማራ፡፡ 17. ታይ ዓለሚል ናኑ ማርናም ሊኪዒ ክርስቶስ አካህ ማረሚህ መጠኒል፣ ኒ ካሓኒ ፉጹም ያከዶ፣ ፊርድ ለለዕ ማይሲማለህ ካ ነፊል ካብ ኖዋ ሙሉእ አምአማማን ኣለሊኖ፡፡ 18. ዓዶ ካሓኒ ማይሲ የየዔህ ዒዳ ኢካህ ካሓኖድ ማይሲ ማታነ፣ ማይሲ ቅጽዓትሊህ ተምዸበዸበ ቲያ ኪኒጉል፣ ማይሲታ ሒያውቲህ ካሓኒ ፍጹም  ማኪ፡፡ 19. ፉጊ ዮኮመህ ኒይክሒነርከህ ናኑ ለ ካ ናክሒነ፣ 20."መዔፉጎ ኪሕኒዮ"አይህ ኢሲ ሳዓል ኒዒብቲ ዲራብል ኪኒ፣ ያብለ ኢሲ ሳዓል አክሒነዋቲያ የከምኮ፣ አብለዋ ፉጎ ያክሓኖ ማዺዓ፡፡ 21. አማይጉል ክርስቶስ ኖህ ዮሖወ ቲኢዛዝ"መዔፉጎ ክሒንቲ፣ ኢሲ ሳዓል ለ ያክሓኖይ"ያናም  ኪኒ።  

        ማዕራፋ 5

                                                     ዓልሚክ ሱባናም

   1. ኢየሱሰ መሲሕ ኪናም ያምነቲ ኡምቢህ መዔፉጊህ ባዻ ኪኒ፣ አባ ክሒንቲ ኡምቢህ ባዻ ለ ኪሒና፡፡ 2. መዔፉጊህ ዻይሎ ኪሒኖም ናዽገም፣ መዔፉጎ ናክሕነጉልከ ካትአዛዛት ናፍጽመጉል ኪኒ፡፡ 3. መዔፉጎ ያክሕኒንም ማለት ካ ትአዛዛት ያፍጽምኒም ኪኒ፣ ትአዛዛት ለ ታጽጊመም ማኪኖን።  4. አይሚህ መዔፉጊህ ባዻ የከቲ ኡምቢህ ዓለምክ ሱባ፣ ዓለምክ  ሱብናም ኒኒ ኢምነቲህ ኪኒ፡፡ 5. ዓለምክ ሱባቲ ኢየሱስ መዔፉጊህ ባዻ ኪናም ያምነቲይ ጥራህ ኪኒ።

ክርስቶስ ዳዓባል ዮምሖወ ምስክርነት

   6. ካ ጥምቀት ያይቡሉወም ላየከ ካራባ ታይምልክተሚህ ቢሎህ የመተቲ ኢየሱስ ክርስቶስ ኪኒ፡፡ ኡሱክ የመተም ላየህ ጥራህ አከካህ፣ ላየከ ቢሎህ ኪኒ፡፡ ታይ ጉዳይ ሓቀ ኪናም መንፈስ ቁዱስ ያምስኪረ፣ አይሚህ መንፈስ ቁዱስ ሓቀ ኪኒ፡፡ 7. አዶሓ ማስክር ያኒን፡፡ 8. ኢሲን"መንፈስ፣ ላየ፣ ቢሎ" ኪኖን፡፡ ታሃም አዶሒህ ማስክሪል ያምሰመመዒን፡፡ 9. ሒያው ታሓየ ማስኪር ጋራያን፣ ያከካህ መዔፉጊህ ማስክር ኡማኒምኮ ናባ፣ መዔፉጊ ኢሲ ባዽህ ምክንያታል ዮሖወ ማስኪር ታይቲያ ኪኒ፡፡ 10. ፉጊ ባዻ ያምነቲ ታይ ማስኪር ኢሲ 'አፍዓዶድ ለ፣ ፉጎ አምነዋቲ ለ መዔፉጊ ኢሲ ባዽህ ምክንያታል ዮሖወ ማስኪር አምነዋየርከህ ዲራብሊ ካአባ፡፡ 11. አይሚህ፣ ፉጊ ኡማንጉሊ ሂወት ኖህ ዮሖወምከ ታይ ሂወቲድ ባዽ ያነም ታምስኪረም ኪኒ፡፡ 12. መዔፉጊህ ባዻ ለቲይ ሂወት ለ፡፡ መዔፉጊህ ባዻ አለዋቲይ ለ ሂወት ማለ፡፡   

                                             ኡማንጉሊ ሂወት  

    13. አቲን መዔፉጊህ ባዽህ ሚጋዓል ታምነሚክ ኡምቢክ፣ ኡማንጉልት ሂወት ለም ኪትኒም ታዻጎና ታሃም ሲናህ ኢጽሕፈህ አነ፡፡ 14. አኪናን ጉዳይ ካዲላይ ባሊህ ዻዒምናጉል ኒያበም ዓዶም ኪኒ፣ አይሚህ ኡማንጉል መዔፉጊህ ነፊል ዲፍረት ሊኖ። 

15 .ዻዒምናማህ ኡምቢህ ኒያበም ነዸገመኮ፣  ካኮ ዻዒምነም ሙሉኡድ ጋራናም አዽጊክ ናነ።  

    16. አኪናን ሒያውቲ ሳዓል ራባ ማድሳ ኃጢአት ሥራሓህ ያብለጉል ጻሎት አካህ አቦይ፣ ሒያውቶ ኃጢአት ራባ ማድሳቲያ የከምኮ ፉጊ ሂወት አካህ ያሓየ፡፡ ያኮይ ኢካህ ራባ ማዲሳ ኃጢአት ያነ፣ ታይ ዓይነቲህ ኃጢአታህ ጻሎት አቦይ ማዽሔ፡፡ 17. ኡማ ሥራሕ ሙሉኡክ ኃጢአት ኪኒ፣ ያኮይ ኢካህ ራባ ማድሰ ዋ ኃጢአት ያነ። 18. መዔፉጊህ ባዻ የከቲ ኡምቢህ ኃጢአት ሢራሓናሚህ ሊማድ ማለም ናዽገ፡፡ አይሚህ መዔፉጊህ ባዽ ኢየሱስ ክርስቶስ ካዻዉዻ፣ ሰጣን ካማዻጋ፣ መዔፉጊሂም ኪኖም ናዺገ፣ ዓለም ለ ሙሉኡድ ሰጣናህ ይምግዝ ኤቲያ የከ። 20. መዔፉጊህ ባዽ የመተምከ ሓቀ ኪናም ካያ ናዻጎ ታስትውዒለ አፍዓዶ ኖህ ዮሖወም ናዽገ፣ ናኑ ለ ታሃማህ ሓቀ ኪን ኢየሱስልህ ማርና፣ ኡሱክ ሓቂ አምላከ ኡማንጉሊት ሂወት ኪኒ። 

   21. ይዻይሎ! ዲራብቲ አማልክት ያይምልክንምኮ ሲነ  ዻዉዳ፡፡