ማላሚ ያሃንስ መልአክት

ማላሚ ሐዋርያ ያሃንስ መልእክት

ሳይማ

ማላሚ ያሃንስ መልአክት ትምጽሒፈም  "ሲማግለ ሐዋርያ ያሃንሲህ" ተከህ፣ ትምጺሒፈም "ዶሪምምተ ዓሪ ባዕላህከ ዻይሎህ" ኪኒ፡፡ ምናልባት ኢንኪ ቁምስናህ ሞሶዓሪ አባላታህ አከካህ ማራዕታ፣ ታይ ኡዹዽ መልአክት ትምጺሕፈም ሲነሲነህ ያምካሓኖና ያይሐሳሳቦከ ዲራብቲ መምሂራኒህ ሚሂሮኮ ያይጣንቃቆናኪኒ፡፡______________________________ 

ማዕራፋ 1

1.ዶሪምተ ዓሪባዕላከ ተ ዻይሎህ፣ ዮኮ ሲማጊለይታኮ ፋርቲምተ ፋሮ፣ አኑ ሓቀህ ሲን ኪኂኒዮ፣ ዮያ ዲቦህ አከ'ካህ ሓቀ ታዽገም ሙሉኡድ ሲን ኪኅኖን፡፡  2.ታይ ሓቂ ለ ኒ ፋናድ ያነቲያከ ባሶቱላል ኡማንጉሉህ ማራቲያ ኪኒ፡፡ 3.መዔፉጎ አባከ ባዺ ኢየሱስ ክርስቶሲህ ጸጋከ መሕረት ሳላም ለ ሐቀህከ ካሓኖህ  ኖሊህ  ያኮይ። 

ሐቀከ  ካሓኒ  ዳዓባል

  4. ኩ ዻይሎኮ ጋሪጋሪ፣ አባ ኒ  ይኢዚዘሚህ ሪሚዲህ ኢምነቲህ ሲክ የኒህ  ገየርከ ጋዳህ ይኒያቲሰ፡፡  5.ኦ ዓሪባዕላ! ካዶሊህ ሃየ! ኮካም ታይ ኮህ አጽሒፈም ዑሱብ ቲኢዛዝ ማካሊን፣ ካዶ ኮያል አጽሒፈም "ኒነኒነህ ናምካሓኖይ" ያዽሔ ኤዸዾይታኮ ኡጉተህ ኖሊህ ዪነ ቲኢዛዝ ኪኒ፡፡  6.ሓቂ ካሓኖ ያናም መዔፉጊህ ቲኢዛዝ ያፍጺሚኒም ኪኒ፡፡  ታይ ቲኢዛዝ ለ ኤዸዾይታኮ ቶብኒም ባሊህ ካሓኖህ ማራ ያቲያ ኪኒ። 7.ኢየሱስ ክርስቶስ ሒያውቶ የከህ ኃዶይታህ ዩምቡሉወም አምነዋይታ ማንጎ ታስገገየም ዓለሚል ኡጉተን። 8.አቲን ለ ሙሉእ ሲኒ ደመዎዝ ጋራይቶናክ ኢትጊሃ፣ ሢራሕተኒም ሲናክ ታለየክ ሰሊታ።  9.ክርስቶስ ሚሂሮህ  ሲክ የህ  ማረዋቲያከ ካኮ ሚሪሕ የህ ያዴቲያሊህ ፉጊ ኤሊህ ሚያነ፣ ክርስቶስ ትምሂርቲል ይጽኒዔህ ማራ ሒያውቶሊህ ለ አባከ ባዻ ካሊህ ያኒን፡፡  10.ሚሂሮ አብዸካህ አክናንቲ ሲን ኡላል የመተምኮ አቲን ሲኒ ዲኪድ ማጋራይና፣ ሳላምታ ኡካ አካህ ማሐይና። 11.አይሚህ ሳላምታ ያሐየ  ሕያውቲ ካ'ኡማ ሢራሕ ሐዲሊታቲያ  ያከ ።

ባክቶ ሳላምታ

12.ሲናል አጽሐፎ ጉራ ማንጎ ጉዳይ ሊክ ኢነ፣ ያኮይ ኢካህ  ኡምቢህ ደብዳበህ አግላፆ ማጉራ፣ ማንጊህ  ኒኒያት ዓዶቲያ ያኮ ሲን ኡላል ኤመተህ  ነፍ ነፊህ ቲታክ ኑብለህ ሲን ዋንሲሶ ታስፋ አባክ   አነ፡፡  13.ዶሪሚሚተ ኩሳዕላህ ዻይሎ ሳላምታ ካብ ኮህ ኢሳን።