ዮሓንስ ወንጌል

        

        ያሃንስ ይጽሕፈ ንማዳሪህ ኢየሱስ ክርስቶስህ ወንጌል

ሳይማ  [ዸ ዹ ዺ ዻ ዼ ዽ ዾ] 

   ያሃኒስ ወንገል ኢየሱስ ካብ ኢሳም ሓዶይታ ሀይሲተህ /ይልብሰህ/ ሒያው ፋናድ ገይማይ ያነ ፉጊ ቃል አበህ ኪኒ፣ ማጽሐፍ ኢሲ ዸግኃሕ ያግልጸ፣ ታይ ወንገል ይምጽሒፈም ታይነቢበም ኢየሱስ ያይድኅነቲያ የከህ አምተለ የኒም ፉጊ ባዻ ኪናም ያማኖናከ ካያህ አኪናን ምክኒያታህ ኡማንጉሊት  ሕይወት ኤሊህ ማራም ያምራዳኦና ኪኒ፡፡ (ዮሐ.20፣31) ወንገል ኤዸዾይታ ኪፍሊ ኡማንጉሉህ  የከ መዔፉጊህ ቃልከ ኢየሱስ ኢንከቶ ኪኖኑም ሳይማል ቢሶህ ካብሰምኮ ላካል፣ ኢየሱስ ያድኅነቲያ የከህ አምተለ ያናም ፉጊ ባዻ ኪናም ያይቡሉወ ኢሲሲ ታምራታት ካብ ኢሰ ለ፣ ቶሆምከ ታሃምኮ ታአምራታህ አይሚህ ፊረ ገይምተም ያይርድኤ ታሪክ አክቲለ ለ፣ ታይ ኪፍሊ ያትሪከም ውልውል  ሒያው ኢየሱስ የመኒኒህ ካተከተልቲ ኪኖኑም፣ አኪማሪ ለል አይናህ የኒህ ካያስቂሊኒሚህ ዲሮህከ ካያል ማናሚነ ያናም ኪኒ፣ ምዕራፍ 13፣17፣ ኢየሱስ ይምዺቢዸ ካሶ ኢሲ ተምሃሮሊህ አይዻ ሲክተ ማባዾ ሊይ ዪኒኒምከ ካስቅለቲህ ዲሮህ አምሳናዳውከ አይፃናናዕቲ ቃል ተን ዮይሶበም ዋንሲታን፡፡ ባክቶ ማዓሪፍ ኢየሱስ ዽብዽ ዳዓባልከ ፍርደህ ካብየም፣ ካስቅለትከ ኡጉትናኒህ ዳዓባል፣ ታማም ባሊህ ለ ኡግታቶኮ ላካል ኢሲ ተምሃሮህ አካህ ያምቡሉወም ታይዝክረም ኪኖን፡፡ አምንዝርክ ገይምተ ኑማህ ታሪክ (8፣ 1-11) ቀንፍ ዳድ ደፈይተም ማንጎ ቅዳሕከ ባሶ /ጥንት/ ቱርጉም ኤድሞሳናም ኢዻህ ጋሪ ለ አኪ ቦታድ ሳይሰዋናም ኢዻህ ኪኒ፡፡ ኤይነቢሰህ ያይቡሉወም ክርስቶስ ኡላኮ ገይማ ኡማንጉሊ ሕይወት ኪኒ፣ ታይ ሕንዲ ገይማም ኡማንጉሊ ሕይወቲህ ኤዳም ካዲ ሕይወቲል ያከጉል ታይ ሕይወቲህ ዋና ታከም ኢየሱስ አራሕህ፣ ሐቂ ሕይወት ኪናም ታየረገገጸም ያኪንጉል ኪኒ፡፡ ያሃኒስ ወንጌሊል ዲቦህ ካብታም  መንፈሳዊ ሓቀ ያይራዳኦና ተምገለ ለለዕቲ ናብራ፣ ኪናም ላየ ባሊህ፣ ኢንገራ፣ ምግበ፣ ሎየና፣ ዕዶ፣ ወይን ታክለከ ወይኒ ፊረህ  ኢግድ ጉዳይህ  ምሳለህ ይምጥቅመጉል ኪኒ።

--------------------------------------------------------------

ማዕራፋ 1

ሕይወት ቃል

    1.ቃል ኤዸዾይታህ ዪነ፣ ቃል ፉጎድ ዪድ፣  ታይ ቃል መዔፉጎ ኪይይ ዪነ፡፡ 2.ኡሱክ ኤዸዾይታህ ፉጎሊህ ዪነ፡፡ 3.ኡማን ጉዳይ ካያህ ይምፍጥረ፣ ቲምፍጥረምኮ ኡምቢህ፣ ኢንኪ ጉዳይ ካያ ሂኒም /ካማለህ/ ቲምፍጥረም ማታነ፡፡ 4.ካያድ ሕይወት ዪነ፣ ታይ ሕይወት ሒያው ኢፎይታ ኪይይ ዪነ፡፡ 5.ኢፎይቲ ዲተድ ኢፎሳ፣  ዲተ  ኢፎ   ኢንኪጉል  ማታይሲኒፈ፡፡

 6.ፉጎኮ ፋሪመ ያሃኒስ አክያን ኢንኪ ሒያውቲ ዪነ፣ 7.ካምስክርነቲህ ሒያው ኡምቢህ ታማኖ ኢፊ ዳዓባል ማስኪር የከህ የመተ፡፡ 8.ኡሱክ ኢፊ ዳዓባል ያማስካሮ የመተካህ ኡሱክ ኢሳሞህ ኢፎይታ ኪይይ ማና፡፡ 9.ታይ ኢፎይቲ ዓለሚህ ያምተቲያከ ሒያዋህ ሙሉኡድ ኢፎ ያኃየ ሓቂ ኢፎይታ ኪይይ ዪነ፡፡

   10.ኡሱክ ዓለምል ዪነ፣ ዓለም ለ ይምፍጢረም ካየህ ኪኒ፣ ዓለም ለ ማዻጊና፡፡ 11.ኢሲ ወገን ዻጋህ የመተ፣ ካወገን ለ ካማጋራይና፡፡ 12.ያከካህ ካጋራይተምከ ካሚጋዓህ ተመነም፣ መዔፉጊህ ዻይሎ ያኮና መብቲ አካህ ዮምሖወ፡፡ 13.ኢሲን መዔፉጎኮ ዮቦኪን ኢካህ ምናዳም ዳራኮ፣ ማለት ሓዶይታ ልማድኮ ያኮይ ሒያው ፍቃድኮ ማባኪ ኖን፡፡ 

    14.ቃል ለ ሐዶይታ የከ፣ ጸጋከ አሐቀህ ለ የመገህ ኖያድ ይስፊረ /ይሕዲረ/፣ ኢንኪ ባዺ ለ ኢሲ አባሊህ ኪብረ ለምባሊህ ካ ኪብረ ኑብለ፡፡        

   15.ያሃኒስ ለ "ዮኮ ላካል ያምተቲ ዮኮ ናባ፣ አይሚህ ዮኮ ባሶድ ዪነ ኤዽኄህ ሲናከቲይ ሀይከ ታይ ቲያ ኪኒ" አይክ ይምስኪረ፡፡ 16.ካጸጋህ ሚገኮ ናኑ ኡምቢክ ጸጋ ታሞል ጸጋ ጋራይነ፡፡ 17.ሕጊ ሙሴ ቱላኮ ዮመሖወ፣ ጸጋከ ሓቂ ለ ኢየሱስ ክርስቶሲህ ደፍራኮ  ዮመሖወ፡፡

  18.መዔፉጎ ዩብለቲያህ ኢንከቲ ሚያነ፣ ያከካህ መዔፉጎ ኪን አባሊህ ያነ  ኢንኪ ባዺ ጥራሕ  ይግልፀ  /ይይቡሉወ/፡፡

    ያይጥምቀ ያሃኒስ  ይምስኢክረም 

    (ማቴ.3፣1-12፤ማር.1፣1-8፤ሉቃ.3፣1- 8፡፡)

  19.አይሁድ ሢልጣት አሞይቲት ኢየሩሳለምኮ ካህናትከ ሌዋውያን ያሃኒስ ኡላል ፋረኒህ "አቱ አቲያ ኪቶ?" የኒህ ካኤሰርሲሰን ዋክተ፣ 20.ያሃኒስ አኑ መሲሕ ማኪዮ የህ ይምስኪረካህ ማክኃዲና፡፡ 

   21.ኢሲን አማይጉል "አቱ አቲያ ኪቶ?  ኤልያስ ኪቶ?" የኒህ ካኤሠረን፡፡ ኡሱክ "ማኪዮ" የህ ኤልደሄየ፡፡ ኢሲን ለ "ያማቶ ኪኒ አክያን ነቢይ ኪቶ?" አክየን፡፡ ኡሱክ "ማክዮ" የ፡፡ 

   22.ኢሲን "ኢቦል አቲያ ኪቶ? ንፋርተ ሒያዋህ መልስ ናሓዎክ፣ ኢሲ ዳዓባል አይም ኖክታ?" አክየን፡፡ 23.ኡሱክ" ለ ነቢይ ኢሳይያስ፣ የምባሊህ  አኑ መዔፉጊህ አራሕ ሪግሣ፣ አይክ ባራካድ ዓው አክ አሳ ሒያውቲ አንዻህ /ዲምጸ/ ኪዮ" አክየ፡፡

24.ሒያው ፋርምተም ፈሪሳውያንኮ ኪይይ ዪኒን።25.አማይጉል "አቱ መሲሕ ወይ ኤልያስ ወይ ያምተ አክያን ነቢይ አከካህ አይነህ ተህ አይጥምቂክ ታነ?" የኒህ ካኤሠረን።

   26.ያሃኒስ ታህ የህ ኤልይምልሰ፣ አኑ አይጥምቀም ላየህ ኪኒ፣ ያከካህ አቲን አዽገዋይታንቲ ሲን ፋናድ ሶለህ ያነ፡፡ 27.ኡሱክ ዮኮ ላካል ያምተቲያ ኪኒ፣ አኑ ካ ካበላህ ማዹዋ አንሓዎ ኡካ አካህ ኤዳቲያ ማኪዮ፡፡ 

  28.ታሃም ኡምቢህ ተከም ያሃኒስ ኤል አይጥሚቂይ ዪነ ቦታ ቢታኒያ ኪኒ፣ ቢታኒያ ዮርዳኖስ ወዓኮ ታብሶል ገይምታ ካታማ  ኪኒ፡፡

    መዔፉጊህ ዒዶይታ

   29.ኢብዻሒነ ያሃኒስ ኢየሱስ ካኡላል አምቲህ ዩብለህ ታህ የ፣ ሀይከ ዓለም ኃጢአት ያይለየ /ያድምስሰ/ መዔፉጊህ ዒዶይቲ ታይቲያ ኪኒ! 30.ይላካል ያምተቲ ዮካ ናባ፣ አይሚህ ይባሶድ ዪነ ሲናከቲ ታይቲያ ኪኒ፡፡ 31.አኑ ለ ኢነህ ካ አዽግክ ማናዮ፣ ያከካህ ኡስክ እስራኤል ሕዝበህ ያምጋለጾ /ያመባላዎ/ አኑ ላየህ አይጥምቂክ አመተ፡፡

  32.ጋባዔህ ያሃኒስ ታህ የህ ይምስኪረ፣ "መንፈስ ቁዱስ ዱጉጉለታ ባሊህ ዓራንኮ ኦበህ አክ አዕሩፊህ ኡብለ፤ 33.አኑ ኢነህ አዽጊክ ማናዮ፣ ያኮይ ኢካህ ላየህ አይጣማቆ ይፋረቲ "መንፈስ ቁዱስ ኦባከ አክ አዕሩፊህ ይምቡሉወቲ መንፈስ ቁዱሱህ ያይጥምቀቲ ካያ ኪኒ የህ ዮክ የ፡፡ 34.አኑ ለ ታሃም ኡብለህ አኒዮ፣ አማይጉል አኑ ፉጊ ባዻ ኪናም አምስኪሪክ አኒዮ፡፡"

ኤዸዾይታት ኢየሱስ ተምሃሮ

   35.ኢብዻሒነ ያሃኒስ ተምሃርቲ ላማይሊህ ማላሚኖህ ታማል ሶለህ ዪነ፣ 36.ያሃኒስ ኢየሱስ ታመል ቲላህ ዩብለህ "ሀይክ መዔፉጊህ ዒዶይቲ!" የ፡፡ 37.ላማ ያሃኒስ ተምሃራይ ያሃኒስ ታህ አይህ ዮብኒህ ኢየሱስ ይክቲሊን፡፡ 38.ኢየሱስ ኡፍኩና የህ ኤድካታህ ዩብለህ" አይም ጉርተኒህ ኪቲን?" አክየ፡፡ ኢሲን"ረቢ! ማርታም አለክቶ?" አክየን፡፡ (ረቢ ማለት መምሂሮ ማለት ኪኒ፡፡) 

  39.ኡሱክ አማይ ኡበላ አክየ፡፡ አማይጉል የደዪኒህ አልማራም ዩብሊን፡፡ ታማይ ለለዕ ካሊህ ኢንኮህ አሰን፣ ዋክቲ ታማና ሳዓቲህ አፎፉል /አካባቢል/ ኪይይ ዪነ፡፡

  40.ያሃኒስ ዋንሲተ ቃል ዮቢኒህ ኢየሱስድ ካታይተ ተምሃሮኮ ኢንከቲ ስምዖን ጰጥሮስ ሳዓል እንድርያስ ኪይይ ዪነ፡፡                    41.እንድርያስ ባሶል ኢሲ ሳዓል ስምዖኑድ የደህ "መሲሕ ኡኮ ገይነ!" አክየ፡፡ (መሲሕ ያናም ክርስቶስ ማለት ኪኒ፡፡) 42.ታሀምኮ ላካል እንድርያስ ስምዖን ኢየሱስ ዻጋህ ባሄ፡፡ ኢየሱስ ይቱኩረህ የደለለዔህ" አቱ ዮና ባዻ ስምዖን ኪቶ፣ ካምቦኮ ሳራህ ለ "ኬፋ ኮክ ዮና" ኪኒ፡፡ (ኬፋ ያናም ጰጥሮስ ወይ ኮክሔ ማለት ኪኒ)።

ኢየሱስ  ፊሊጶስከ ናተናኤል ደዔ

   43.ኢብዻሒነ ኢየሱስ ገሊላ ቱላል ያዶ ጉረ፣ ፊሊጶስ ለ ገህ" ዮድ ካታይ "አክየ፡፡ 44.ፊሊጶስ ኢንድርያስከ ጰጥሮስ ባሊህ ቤተ ሳይዳ ካታማህ ሒያውቶ ኪይይ ዪነ፡፡ 45.ፊሊጶስ ናትናኤል ገህ "ሙሴ ሕጊህ ማጻሕፍት  ነቢያት  ለ ትንቢት ማጻሕፍቲል ካዳዓባል አካህ ይጽሕፊኒም ገየ፣ ኡሱክ ለ ዮሴፍ ባዻ ናዝሬት ኢያሱስ ኪኒ" አክየ። 46.ናትናኤል ለ"ናዝሬትኮ መዔ ጉዳይ ኢንኪጉል ገይሞ ዺዕማሆ?" አክየ። ፊሊጶስ "አሞአይ ኡቡል" አክየ፡፡ 47.ኢየሱስ ናትናኤል ካኡላል አምቲህ ዩብለህ ሀይከ ቶንኮል ሂን ሓቀ ለ እስራኤል ሒያውቲ!" የህ ካዳዓባል ዋንሲተ፡፡ 48.ናትናኤል "አይናህ ተህ ተደገ" አክየ፡፡  ኢየሱስ ለ "ፊሊጶስ ኩደዓሚህ ባሶል፣ ሓዻህ ዳባል ተከህ ኩብለህ አኒዮ"የህ ኤልይምሊሰ። 49.ታማይ ዋክተ ናትናኤል"መምሂሮ!  አቱ ፉጊ ባዻ ኪቶ!" አቱ አስራኤል ኑጉሥ ኪቶ!" አክየ፡፡ 

   50.ኢየሱስ ለ ታህ የ፣" አቱ ተመነም ባላሶ ሓዻህ ዳባል ኩብለህ ኢኒዮ ኮከጉል ኪኒ?" ታሃምኮ ያይሰ ጉዳይ ገናህ ታብሎ ኪቶ፡፡51."ሓቀህ ሐቀ ኮካይክ አኒዮ፣ ዓራንቲ ማላይካ ለ ሒያውቲ ባዺህ አሞል አውዕክከ ኦባህ አብለልቲን፡፡"

ማዕራፋ 2

ኢየሱስ ገሊላ ቃናል ማረዓ ድግሲህ አሞል

  1.ማዳሒ ለለዕ ገሊላ ኪፍሊህ ባዾል ገይምታ ቃና አክያን ካታማል ማርዓ ቲነ፣ ኢየሱሰ ኢና ለ ታማል ቲነ፡፡ 2.ኢየሱስ ተምሃሮ ማርዓህ ይምዒድሚኒህ ዪኒን፡፡ 3.ማርዓ ግብዛህ አሞል ወይኒ መስ ባክተጉል ኢየሱስ ኢና ኢየሱስክ"ወይኒ መስ ማሎን  ኡኮ!" አክተ፡፡ 4.ኢየሱስ ለ! "ተኑማ!" ኮሊህ አይም ሊዮ ይዋክቲ ገና ማማድና ኡኮ" አክየ፡፡ 5.ታማይ ዋክተ ካኢና ታማል ቲነ መሳሳይቲክ ኡሱክ ሲናክ ያም አባ አክተዽሔ።           

    6.አይሁድ አይጻራይቲ /አንጻሔት/ ሠርዓት ሊይይ ዪኒኒጉል ሊሓ ዻይቲ ጋኒት ታማል ቲነ፣  ኢንኪኢንኪ ጋኒ ላማይ ወይ አዶሓ ዒትሮ ላየኮ ያብዽኒሚህ ዓቅመ ለም ኪይይ ዪኒን፣ 7.ኢየሱስ አገልገልቲክ "ጋኒት ላየህ አፍኮ አፋል ኤመጋ"አክየ፣ ኢሲን ለ አፍኮ ፋል የመጊን፡፡ 8.ታማምኮ ሳራህ ኢየሱስ አገልገልቲክ "በያይ ኡምቢህ ዹሙሳይ ድጊስ ማይሳሳያህ ኡሑዋ" አከየ፡፡ 9.ዲጊስ ኃላፊ ወይኒ መስል ቲምልውጠ ላየ ዻዓመ ዋክተ አርከኮ ተመተም ኪናም ማዻጊና፣ ላየ ዹሙሰ አገልገልቲ ለ አዽጊይ ዪኒን፡፡ አማይጉል ግብዛ ማይሳሳዪ ማርዔ ደዔህ ታህ አክየ፣  10."ሒያው ኡማንቲ ዩይሱኩሚኒህ ያስቅሪቢኒም መዔ ወይኒ መስ ኪኒ፣ ዑዱማት ታስክረጉል ተራቲም ያስቅርቢን፣ አቱ ለ መዔ ወይኒ መስ ሳራቱላክ ካዶ ፋነህ ሱጉሰህ ራዒሰ፡፡"          

    11.ኢየሱስ ታይ ታአምራት ኡምቢህ ኤዸዾይታ የከ ታአምራት ገሊላ ክፍሊህ ባዾል ቃና ካታማል አበ፣ ታይ ዓይነቲህ ኢሲ ኪብረ ይይቡሉወ፣ ካተምሃሮ ካያል የመኒን፡፡ 

  12.ታሃምኮ ላካል ኢየሱስ ኢሲ ኢናከ ኢሲ ሳዖሊህ፣ ኢሲ ተማሃሮሊህ ለ ቅፍራናሆም ኦበ፣ ታማል ዳጎ ለለዕ ዲፈየ፡፡

ኢየሱስ በተ መቅደስድ ታንግደም የየዔ      

(ማቴ.21፣12-13፤ማር.11፣15-17፤ሉቃ.19፣45-46፡፡)

   13.አይሁድ ፋስጊ ባዓል ካብየህ ይነጉል ኢየሱስ ኢየሩሳለም  የደ፣ 14.በተ መቅደስድ ለ አዉራከ ዒዶ፣  ዱጉጉለ ታብኄ ሒያው ገየ፣ ማል ታይስሪፈም ለ ማል አይልውጥክ ያኒኒሃኒህ ተንገ፡፡15.ታማይ ዋክተ ገመድ ጹርጋፍ ሢራሔህ ሒያው ኡምቢህ፣ ዒዶከ አውራ በተ መቅደስኮ የየዕ፣ ማል ታይለወወጠሚክ ማል አክ ይብቲነ፣ ጣውላታት አክ ይፍኪነ፡፡ 16.ዱጉጉለ ታቢኄ ሒያዋክ" ታሃም ኡምቢህ ቶህ በያ፣ ያባህ ዓረ ንግዲ ዓረ ማቢና" አክየ፡፡ 17.ታማይ ዋክተ ካተምሃሮ "ኩዓሪህ ዳዓባል ሊዮ ቂንአት ጊራባሊህ ይየስቀጸለ" ተህ ትምጽሒፈም ይዝክሪን፡፡

   18.ታሃምኮ ላካል አይሁድ ሢልጣን ባዒል ኢየሱሱክ አቱ ታሃም አብቶ መብቲ ሊቶሙህ አይሚህ  ታአምራት ኒታይቡሉወ አክ የን፡፡

   19.ኢየሱስ ለ "ታይ በተ መቅደስ ዒደኒምኮ አኑ ማዳሕ ለለዒል ሢራሔ ሊዮ"አክየ፡፡ 20.ኢሲን ታይ በተ መቅደስ ሢራሖና ሞሮቶምከ ሊሕ ኢጊዲያ አክባከ፣ ታጉል አቱ አዶሓ ለለዒህ አዳል ሢራሕታ?"አክየን፡፡ 21.ኢየሱስ ለ በተ መቅደስ የህ ዋንሲተም ኢሲ ሰውነቲህ ዳዓባል ኪይይ ዪነ፡፡ 22.አማይጉል ኢየሱስ ራባኮ ኡጉተ ዋክተ ተምሃሮ ታሃም ይዝኪሪን፣ ታይ ምክኒያታህ ማጽሓፋል ቲምጽሒፈም  ኢየሱስ የ ቃላል የመኒን።  

   23.ኢየሱስ ፋስጊ ባዓሊህ ዋከተ ኢየሩሳለምል ያነሃኒህ አበ ታምራት ዩብልኒህ ማንጎ ሒያው ካያል የመኒን፡፡ 24.ኢየሱስ ለ ሒያው ሙሉኡክ አዽጊይ ይነጉል ተን ማማኒና፣ 25.ኡሱክ ሒያው አፍዓዶድ ታናም ኡምቢህ አዽጊይ ይነጉል ሒያው ዳዓባል ኢንከቲ ኤሊህ ዋንሲቶ ካጉርሱሳይ ማና፡፡

  ማዕራፋ 3

  ኢየሱስከ ኒቆዲሞስ

  1.ኒቆዲሞስ አክያን ኢንኪ ሒያውቲ ዪነ፣ ኡሱክ ፈሪሳውያን ወገንኮ ኪን አይሁድ አሞባዕላ ኪይይ ዪነ፡፡ 2.ታይ ሒያውቲ ባር ኢየሱስል የመተህ "መምሂሮ!  መዔፉጊ ካሊህ የከህ ያነቲያ የከህ ማዺገይ ታይ አቱ አባታ ታኣምራት አቦ ዺዓቲይ ሚያነ፣ አማይጉል አቱ መዔፉጎኮ የመተ መምሂር ኪቶም ናዽገ" አክየ፡፡ 3.ኢየሱስ ለ"ሓቀህ ሐቀ ሲናክ አይክ አንዮ፣ ሒያውቲ ማላሚህ  አቡከዋየምኮ መዔፉጊህ ማንግሥት ያብሎ ማዽዓ?" አክየ፡፡ 4.ኒቆዲሞስ ለል "ይቦል ሒያውቲ ይሲንጊለምኮ ላካል አይናህ የህ ያባኮ ዺዓ? ማላሚህ ኢና ማህፀንድ ሳየህ ያባኮ ዺዓ?" የህ ካኤሠረ፡፡ 5.ኢየሱስ ለ ታህ የህ ይምሊሰ፣ "ሓቀህ ሐቀ ኮካይክ አኒዮ፣ ሒያውቲ ላየከ መንፈስ ቁዱስኮ አቡከ ዋየምኮ መዔፉጊህ ማንጊሥቲል ሳዎ ማዽዓ፡፡ 6.ሓዶይታኮ ዮቦከቲ ሓዶይታ ኪኒ፣ መንፈስኮ ዮቦከቲ መንፈስ ኪኒ፡፡ 7.አማይጉል ማላሚህ ያቡኪኒም ሲን ጉርሱሳ ኮከርከህ ማምዳናቂ፡፡ 8.ሐሓይቲ ጉረ ደፍራል ያቱከ፣ አንዻሕ አክታበ፣ ያከካህ አርከኮ የመተም፣ አውላል ያዲየም፣ ማታዽገ፣ መንፈስኮ ዮቦከቲ ኡምቢህ ታማህ ኪኒ፡፡" 9.ኒቆዲሞስ ታሃም አይናህ ተህ ታኮ ዽዕታ የህ ኤሠረ፡፡ 10.ኢየሱስ ለ ታህ የህ ኤልደሄየ፣ አቱ እስራኤል መምሂር ተከህ ታሃም ማታዽገ? 11.ሓቀህ ሐቀ ኮካይክ አኒዮ፣ ናዽገም ዋንሲታክ ናነ፣ ኑብለም አምስኪሪክ ናነ፣ አቲን ለ ኒማስኪር ማጋራይታን፡፡ 12.ባዾ ጉዳይ ሲናክ ያንጉል አምነዋይታም ተኪኒምኮ፣ ዓራንቲ ጉዳይ ሲናክ ያንጉል አይናህ ተኒህ ታሚኒኒ? 13.ዓራንኮ ኦበ ሒያውቲ ባዻኮ በሕህ ዓራናል የውዔቲ  ኢንከቲ ሚያነ፡፡

    14.ሙሴ ባራካል ዓሮራ ናውሰህ ታካረም  ባሊህ ሒያውቲ ባዺ ናዋ የህ ታካሪሞ ኤዳ፡፡ 15.አይሚህ ካያል ያምነቲ ኡምቢህ ኡማንጉሊ ሕይወት ገዎ ዒሎህ ኪኒ፡፡

  16.መዔፉጊ ዓለም ጋዳህ ይክኅነጉል ኢንኪ ኢሲ ባዻ አካህ ዮሖወ፣ አማይጉል ባዻል ያሚነቲ ኡምቢህ ኡማንጉሊ ሕይወት ለካህ ሚያለየ፡፡ 17.ፉጊ ኢሲ ባዻ ዓለሚህ ፋረም ዓለም ባዻህ ያድኃኖ የህ ኪኒካህ ዓለም አሞል ያፍራዶ የህ ማኪ፡፡ 18.ካያል ያመነቲያል ኤል ሚያምፊሪደ፣ ካያል አመነዋቲያል ለ ኢንከቶ ኪን ፉጊ ባዻል አሚነዋየርከህ ገና ባሶኮ ይምፊሪደ፡፡ 19.ፍርዲ ታይቲ ኪኒ፣ ኢፎይቲ ዓለም ዻጋህ የመተ፣ ሒያው ለ ተን ሢራሕ ኡማቲያ የከጉል ኢፎኮ ዲተ ዶረተ፡፡ 20.ታይ ኡማ ጉዳይ አብታም ሙሉኡክ ኢፎ ኒዒቦን፣ ኡማ ሢራሕ አክ ያምቡሉወምኮ ኢፎል ሚያሚቲን፡፡ 21.ሓቀ ኪን ጉዳይ አባቲ ለ ኢፎል ያሚተ፣ ኢፎል ያወዔም መዔፉጊህ ቲዛዚህ መሠረቲህ የከ ሢራሕ አካህ  ያምባላዎ  ኪኒ ፡፡

   ኢየሱስከ ያይጥምቀ ያሃኒስ

   22.ታሃምኮ ላካል ኢየሱስ ተምሃሮሊህ ይሁዳ ባዾል የደ፣ ታማል አይጥሚቂክ ተንሊህ ዳጎ ዋክተ ሱገ፡፡ 23.ታማይ ዋክተ ያሃኒስ ማንጎ ላየ ቲነጉል ሳሌሚህ ካብተ ሄኖን አክያን ቦታል አይጥሚቂይ ዪነ፣ ሒያው ለ ታማርከል አድክ አምጥሚቂይ ዪኒን፡፡ 24.ታማይ ዋክተ ያሃኒስ ገና ወክኒ ዓረድ ሳየህ ማና፡፡ 25.ታማይ ጊዘ ያሃኒስ ተምሃሮከ ኢንኪ አይሁዲህ ፋናድ ፅራየ  ሠርዓቲህ ዳዓባል ክርክር ኡገተ፡፡ 26.ያሃኒስ ተምሃሮ ያሃኒሲድ ካብኒህ "መምሂሮ! ቶይ ዮርዳኖስ ታብሶል ኮሊህ ይነቲ፣ አቱ ካዳዓባል አካህ ቲምስኪረቲ፣ ሀይከ ኡሱክ ለ ያይጥምቀ፣ ሒያው ኡምቢህ ካኡላል ታዲየ "አክየን፡፡ 

   27.ያሃኒስ ለ ታህ የህ ይምሊሰ፣ አኪናን ሒያውቲ መዔፉጊ አካህ ዮኆወህ ማዽገይ ኢንኪ ጉዳይ ያሎ ማዽዓ፣ 28.ካኮ ባሶድ ፋርመካህ አኑ መሲሕ ማኪዮ፣ ኤዽሔህ ሲናክ ከምባሊህ አቲን ሲናሞህ ዪ ማስኪር ኪቲን፡፡ 29.ዒብና ለ ሒያውቲ ማርዔ ኪኒ፣ ማርዔ ዓራካ ለ ማርዔ ታፋል ሶለኒህ ካያቢን ካ አንዻሕ ያቢኒህ ኒያታን፣ አማይጉል ይኒያት ካዶ ዓዶቲያ ያከ፡፡ 30.ኡሱክ ናው ናው ዮዋ፣  አኑ ለ ላት ላት ኦዋ ኤዳ፡፡

  31.አጋናኮ ያምተቲ ኡማኒሚህ አሞ ኪኒ፣ ባዾኮ የከቲ፣ ባዾ ጉዳይ ዋንሲታ፣ ዓራንኮ ያሚተቲ ኡማኒምኮ ናብቲያ ኪኒ። 32.ኡሱክ ዩብለምከ ዮበም ያምስኪረ፣ ያከካህ ካማስኪር ጋራቲ ሚያነ፡፡ 33.ካምስኪር ጋራቲ ለ መዔፉጊህ  ሓቀ ለም ኪናም ያይረገገፀ፡፡ 34.መዔፉጊ ፋረቲ መዔፉጊህ ቃል ዋንሲታ፣ መዔፉጊ ለ መንፈስ ሙሉኡክ አካህ ያሓየ፡፡ 35.አባ ባዻ ኪሒና፣ ኡማን ጉዳይ ጋባድ ካ ያይዽብዸ፡፡ 36.ባዻል ያሚነቲ ኡማንጉሊህ ሕይወት ለ፣ ባዻል አሚናዋቲ ለ መዔፉጊህ ቁጡዓ ካአሞል ማርታካህ ሕይወት መጋያ፡፡

     ማዕራፋ 4

      ኢየሱስከ ኢንኪ ሳምራዊት ሳይጉደይታ

    1.ታማይ ዋከተ ኢየሱስ ያሃኒስኮ አጋናል  ማንጎ ሒያው ተምሃሮ አባምከ ያይጥሚቀም ፈሪሳውያን ቶበ፣ 2.የከሚህ አይጥምቂይ ቲነም ካተምሃሮ ኪኒ ኢካህ ኡሱክ ኢሳሞህ አይጥሚቂይ ማና፡፡3.ካዳዓባል የኒም ፈሪሳውያን ዮቢኒም የዸገጉል፣ ኢየሱስ ይሁዳ ባዾ ሓበህ ገሊላ ቱላል የደየ፡፡ 4.ታሙላል አዲህ ለ ሳማሪያኮ ቲላዎ ኤልቲነ፡፡ 

   5.አማይጉል ሲካር አክያን ሳማሪያ ካታማል የመተ፡፡ ሲካር ያቆብ ኢሲ ባዻህ ዮሴፍህ ዮሖወ ባዾህ ባሮል ገይምታ ካታማ ኪኒ፣ 6.ታማል ያይቆብ ላየ ዔሊ ዪነ፣ ኢየሱስ አራሕ የደርከኮ ኡገተሚህ ኃዋለህ ዔሊ አፋል  ዲፈየ፣  ዋክቲ ሊሓ ሳዓቲህ አቦቱል ኪይይ ዪነ፡፡ 

   7.ታማይ ዋክተ ኢንኪ ሳማሪያት ባዾህ ኑማ "ላየ ዹሙሶ ዔላል ተመተ፣ ኢየሱስ ለ "ላየ የፈዕ አክየ!" 8.ታማይ ዋክተ ካተምሃሮ ሚግበ ዻሞና ካታማ ቱላል የደዪኒህ ዪኒን፡፡ 9.ታማይ ሳምራዊት ኑማ ኢየሱሱክ አቱ አይሁዳ ተከህ አይናህ ተህ ዮያ ሳምራዊቲክ 'ላየ የፈዕ!' ተህ ኤሠርታ?" አክተ፣ ታሃም አካህተም አይሁድ ሳምራውያንሊህ ኢንኪኖ /ኅበረት/ ሊይ ማናዎንጉል ኪኒ፡፡

   10.ኢየሱስ ለ ፉጊ ሞቶኆዎከ 'ላየ የፈዕ' ኮካይ ያነቲያ ተዸገህ ታከዶ ካያ ዻዒምቶ ኤዳይ ቲነ ቲያ ኮያ ኪኒ፣ ኡሱክ ሕይወት ላየ ኮህ አኃየ ዻዸ አክየ፡፡ 11.ኢሲ ታህ ተህ ቲይሚሊሰ፣ "ይማዳራ! አቱ ዹምሰና ማልቶ ዔሊ አዳለ፣ አማይጉል ሕይወት ላየ አርከኮ ገይታ?  12.አቱ ታይ ዔላ ኖህ ዮሖወ ናባ ኪን ያይዕቆብኮ ታይሰ? ካከ ዻይሎ፣ ካሳዒ ለ ታይ ዔላኮ ዮዖቢን፡፡ 13."ኢየሱስ ታህ የህ ኤልደሄየ፣"ታይ ላዮኮ ታዑበም ኡምቢህ ጋባዔኒህ ባካራን፣ 14.አኑ አካህ አኃየ ላዮኮ ያዑበማሪ ኡማንጉሉህ ኡካ ማባካራን፣ አይሚህ አኑ አኃየ ላየ፣ ያዑበ ሒያውቲ ኡማንጉሊ ሕይወት አክ ያውዔ ሚንፀ ያከ፡፡"15.ሳይጉደይታ "ይማዳራ! ካምቦኮ ሳራህ ላየህ ባካራምኮከ ታህ ዹሙሶ ጋሐምኮ ያዓሳያ ታይ ዓይነቲህ ላየ ዮሑይ" አክተ፡፡ 16.ኢየሱስ ለ አዱይ ኢሲ ባዕላ ደዓይ ጋኅ አክየ፡፡

  17.ኑማ ለ "ባዕላ ማልዮ" ተህ ቲይሚሊሰ፣ ታማይ ዋክተ ኢየሱስ ታህ አክየ፣ "ባዕላ ማልዮ ተዽኄርከህ ቲክክል ኪኒ፣ 18.አይሚህ  ኮና ባዕላ ሊይክ ቲኒቶ ካዶ ኮሊህ ያነቲ ኩባዕላ ማኪ፣ አማይጉል ሓቀ ዋንሲተ፡፡"

    19.ኑማ ለ ታህ ተዽኄ፣ ይማዳራ! አቱ ነቢይ ኪቶም ካዶ ኤዸገ፣ 20.ናቦብቲ ታይ ኢምባህ አሞል ይስጊዲን፣ አቲን ለ ሒያው ታስጋዶ ኤዳም ኢየሩሳለምል  ኪኒ  ታዽሒን፡፡ 21.ኢየሱስ ታህ አክ የ፣ "ተ ኑማ! ፉጊ አባ ታይ ኢምባት አሞል ያኮይ ኢየሩሳለምል ያስጊዲኒሚህ ጉዳህ ታምፂኒቂን ዋክቲ አምተለም ኢሚን፣            

   22.አቲን አዽገ ዋይታን አምላካህ ታስጊዲን፣ ናኑ ለ ድኅነት አይሁድኮ ኪናም ኢዻህ ናዽገ አምላክህ ናስጊደ፡፡ 23.ያከካህ ሓቂህ አባ ኪን ፉጎከ መንፈሲህ ሓቀህ ታስጊዲን ዋክቲ አምተለ፣ ኤረ ካዶ የመተ፣ አባ ኪን ፉጊ ለ ጉራም ታህ የህ  አካህ ያስጊደ ማራ ኪኒ፡፡       24.መዔፉጊ መንፈስ ኪኒ፣ ሓቀህ አካህ ታስጊደም ለ መንፈሲህ አካህ ያስጋዶና ኤዳ፡፡ 25.ኑማ ለ "መሲሕ አምተልም አዽገ፣ ኡሱክ ያሚተጉል ኡማን ጉዳይ ኖክ ኢየ ለ" አክተ፡፡ 26.ኢየሱስ ለ "ሀይከ ካዶ ኩዋንሲሳክ አነቲ  ዮያ ኪኒ" አክየ፡፡ 

   27.ታማይ ዋክተ ካ ተምሃሮ ኤል የደይንርከኮ ጋሔኒህ፣ ኢየሱስ ኑማሊህ ዋኒ አበርከህ ይምግሪሚን፣ ያኮይ ኢካህ" ኣይም ጉራክ ታነ ወይ ተሊህ አሚህ ዋንሲተ የህ ኤሠረቲ?” ኢንከቲ ማና፡፡

  28.ታሃምኮ ላካል ኑማ ዒትሮ ሓብተህ ካታማ ቱላል ተደየህ ሒያውክ ታህ ተ፣ 29."ሢራሔም ኡምቢህ ዮክ የ ሒያውቶ ታብሎናክ አማ ኡቡላ! ምናልባት ኡሱክ መሲሕህ ያከሆ?" 30.ሒያው ካታማኮ ተውዔህ ኢየሱስ ዻጋህ የደዪን፡፡ 31.ታማይ ዋክተ ካተምሃሮ ኢየሱስክ "መምሂሮ! ማዎበት" የኒህ ዻዒመን፡፡

    32.ኡሱክ ለ "አቲን አዽገዋይታን አኑ በታ ሚግበ ሊዮ" አክየ፡፡ 33.አማይጉል ካተምሃሮ"ሒያው ፈሎ አካህ ባህተህ ኖዋ?" ኢሲመን። 34.ይፈሎ ይፋረቲህ ፍቃድ አባናምከ ካሥራሕ ያፍፂሚኒም ኪኒ፡፡ 35.አቲን ገና አፋራ አልሲ ራዔህ ያነ፣ ታሃምኮ ላካል  ዓዱት ያከ ለ አይክ ማታኒኒ? አኑ ለ ሪገኤያይኪ አቡላ ዻገግ ዒዮ ማደም ኡቡላ ሲናክ አይክ አኒዮ፡፡ 36.ያዕዪየቲ ደሞዝ ጋራ፣ ኡማንጉሊ ሕይወቲህ ታከ ፊረ ያስከሄለ፣ አማይጉል ያድሪየቲያከ ፣ ያዕይቲያ ኢንኮህ ኒያታን፡፡ 37.ታይ ምክኒያታህ ኢንከቲይ ያድሬ፣ ማላሚ ያዕዪየ ያን ምሳለ ሓቀ ኪኒ፡፡ 38.አኑ ለ ኤድ ሐዋለ ዋይተኒም ታዓያዎና ሲን ፋረ፣ ጋሪ ሢራሕህ ኃዋላ፣ አቲን ለ ሲኒ ሢራሒህ ፊረህ ቲምጥቂሚን፡፡ 39.ኑማ ሢራሔ ጉዳይ ኡምቢህ ዮክየ ተህ ቲምስኪረሚህ መሠረቲህ ታማል ማንጎ ሒያው ተመነ። 40.አማይጉል ሰማሪያ ባዾህ ሒያው ኢየሱስ ኡላል የመቲን ዋክተ ተንሊህ ሱጎ ዻዒመን፣ ኡሱክ ለ ላማ ለለዕ ታማል ሱገ፡፡ ለ ካያል የመኒን፡፡

  41.ካቃሊህ ምክኒያታል አኪ ማንጎ ሒያው ለ ካያል ተመነ ካታማኮ ማንጎ ሒያው ተመነ፡፡ 

42.ኑማክ ለ ካምቦኮ ካያ ናሚነም አቱ ኖክተ ቃላሀ ጥራህ አከካህ፣ ናኑ ኒኒ አሞህ ኖበጉል ዓዲህ  ዓለም  ያይድኅነቲያ ኪናም ነዸገጉል ኪኖ አክየን፡፡

     ኢየሱስ ሢልጣን ባዕሊ  ባዻ ኡሩሰ

   43.ኢየሱስ ሰማሪያል ላማ ለለዕ ሱገሚህ ላካል ገሊላ ቱላል የደ፡፡ 44.ኡሱክ ኢሲ ዸግኃህ ኒቢይ ኢሲ ሒያዋህ ሚያክቢረ የህ ዋንሲተህ ዪነ፡፡ 45.ያከካህ ገሊላ የደጉል ገሊላ ሒያው መዔ ዒለህ ካጋራየን፣ አይሚህ ፋሲጊ ባዓላህ ኢየሩሳለም የደህ ዪነ ዋክተ ኡሱክ ታማል አበም ኡምቢህ ዩብሊኒህ ዪኒኒጉል ኪኒ፡፡ 

  46.ታማምኮ ላካል ኢየሱስ ላየ ወይኒ መስ ኤልበርከ፣ ገሊላ  ባዾል ገይምታ ቃና ካታማል ማላሚህ የደ፣ ታማይ ዋክተ ቅፍርናሆሙል ባዺ አክላሑተ ኢንኪ ረዳንቲ ዪነ:፡ 47.ኡሱክ ለ ኢየሱስ ይሁዳ ባዾኮ ገሊላ የመተም ዮበህ ኢየሱሱል የደ፣ ቅፍርናሆሙል ኦባህ ጋዳህ ላሑተህ ራባህ የምደረገ ባዻ አካህ ኡሩሶ ኢየሱስ ዻዒመ፡፡ 48.ኢየሱስ ለ"አቲን ኡኮ ታአምራትከ ድንቀ ኪን ጉዳይ አብለ ዋይተኒምኮ ኢንኪጉል ማታሚኒን !" አክየ፡፡ 

   49.ሱመይና ለ ይማዳራ! ይባዺ ራባሚህ ባሶል ያዓሳያ ዸህ ኦብ አክየ። 50.ኢየሱስ "ኢሲ ዲኪህ አዱይ አውክ ኡረክ" አክየ፡፡ሒያውቲ ኢየሱስ አክየ ቃል የመነህ ኢሲ ዲክህ የደ፡፡ 51.አዲይ ያነሃኒህ  ለ ካአገልገልቲ አራሓል ካገኒህ አውኪ ኡረ አክ  የን፡፡ 

   52.ኡሱክ አወክ ኡረ ሳዓት ኤሠረ፡፡ ኢሲን ለ ኩማል ማልሒና ሳዓታህ ራስኒ ካሐበ አክየን፡፡ 53.አባ ለ ኢየሱስ ኩባዺ ኡረ አክየም ታማይ ሳዓት ኪናም የዸገ፣ አማይጉል ታማይ ለለዕኮ ኤዸዺሰህ ካከ ካቤተ ሰብ ኡምቢህ ኢየሱሱል የመኒን፡፡ 54.ታይ ታአምራት ኢየሱስ ይሁዳኮ ገሊላ የመተ ዋክተ አበ ማላሚ ታአምራት ኪኒ፡፡

ማዕራፋ 5

 ኢየሱስ በተ ሳይዳል ኢንኪ ስባ ኪን ሕያውቶ ኡረሰ

   1.ታሃምኮ ላካል አይሁድ ባዓል ኪይነጉል ኢየሱስ ኢየሩሳለም ኡላላይ የደ፡፡2.ኢየሩሳለሚል ዒዶ ዳገህ ኢፈይህ አፋል ዕብራይስጥ አፋህ ቤተ ሳይዳ አክያን ኢንኪ ምንጺ ካል ዪነ፣ ታማል ኮና ቀስት አክቲላያን ኢያ ዪነ፡፡ 3.ማንጎ ዳላኪን፣ ቶዖረም፣ ሐንከስታም፣ ሲባ ተከም አክቲላያናል ዺነኒህ ዪኒን፡፡ [ላየ ታምቀሰቀሰም ፋናህ ኢላላይ ዪኒን፣ 4.ቲላላህ ማዳሪ መልአክ ካሎል ኡባህ ላየ አይነወፀፅይ ዪነ፣ ላየ ተምነወፀምኮ ላካል ባሶል ካሎድ ሳይናንቲይ ኤድ ይኅድረ አኪናን ዱረኮ ኡራይ ዪነ፡፡]  5.ታማል ሶዶምከ ባሓር ኢጊዲያ ሙሉእ ላሑተ ሒያውቲ ዪነ፡፡  6.ኢየሱስ ታይ ሒያወቲ ታማል ዺነህ ዩብለህ ማንጎ ዋክተኮ ኤዸዺሰህ ላሑተም የዸገህ "ታድኃኖ ጉርታ?" አክየ፡፡ 7.ዳልኪን ለ ኦ ይማደራ! ላየ ታምቀሰቀሰ ዋክተ ዮያ በህ ካሎድ ይሳይሳ ሒያውቲ ሚያነ፣ አኑ አዳዎ አዽኄጉል አከቲ ዮኮመህ ዮኮባ አክየ፡፡  8.ኢየሱስ ለ ኡጉት ዓራት ኡይኩዓይ አዱይ አክየ፡፡ 9.ሒያውቲ አማየጉልካህ ኡረ፣ ኢሲ ዓራት ይቱኩዔህ የደ፡፡ ታሃም ተከም ሳንባት ለለዕ ኪይይ  ዪነ፣10.አማይጉል አይሁድ ታማይ ኡረ ሒያወቶክ ካፊ ሳንባት ኪኒጉል ዓራት ታይካዖ ኮህ ማምፋቃዲና አክየን፡፡ 11.ኡሱክ ለ ይኡሩሰ ሒያውቲ ኢሲ ዓራት ኡኩዓይ አዱይ ዮክየ አክየ፡፡ 12.ኢሲን 'ለ "ዓራት ኡኩዓይ አዱይ ኮክየቲይ አይቲያ ኪኒ?" የኒህ ካኤሠረን፡፡13.ሕዝቢ ማንጊይ ይነጉልከ ኢየሱስ ለ ታማርከኮ ሚርኃ የህ የደህ ይነጉል አቲያ ኪናም አዽጊይ ማና፡፡ 14.ታማምኮ ላካል ኢየሱስ ሒያውቶ በተመቅድ ካገህ ሀይከ ካዶ ቲድኅነ! ታሃምኮ ጊድድ ጉዳይ ኩማዳክ ካምቦኮ ላካል ኃጢአት ማቢን አክየ፡፡ 15.ሒያውቲ የደህ ካይድኅነቲ ኢየሱስ ኪናም አይሁዱክ  የዽኄ፡፡ 16.ታይ ጉዳይ ሳምባታህ አበጉል አይሁድ ሒያው ኢየሱስ ያሰደዲኒም ኤዸዺሰን፡፡ 17.ኢየሱስ ለ ያባ ኡማንጉል ሢራሓ፣ አኑ ለ ሢራሖ ኪዮ አይክየህ ኤልይምልሰ፡፡ 18.ታይ ሞዽሖ አይሁድ ሢልጣናት አሞይቲት ኢየሱስ ያግዳፎና ጋዳህ ተን ኡጉጉሠ፣ አይሚህ ኡሱክ ሳንባት ይስዒረርከህ ማለት አከካህ ፉጊ ያባ ኪኒ የዽሔህ ኢሲ ዸርግኃ መዔፉጎሊህ  የስተከከለጉል ኪኒ፡፡

    መዔፉጊህ ባዺህ ሢልጣን

    19.ኢየሱስ ታህ ያህ ኤልይደሄየ፣ ሓቀ ሓቀ ሲናክ አይከ አኒዮ፣ አባ ሢራሓህ ዩብለምኮ ፈር ባዺ ኢሲ አሞህ  ሢልጣናህ ኢንኪም ማሢራሓ፡፡ አባ አባም ባዺ ለ ታማም ባሊህ አባ፡፡ 20.አይሚህ አባ ባዻ ኪኅና፣ ሢራሓም ኡምቢህ ካያይቡለወ፣ አቲን ታምዳናቆና፣ ታሃምኮ ያይሰ ሢራሕ ካያስቡሉወ፡፡ 21.አባ ራብተም ኡጉሳም ባሊህከ ሕይወት አካህ ያኀየምባሊህ፣ ባዺ ለ ታማም ባሊህ ጉረ ሒያውቶህ ሕይወት አካህ ያኃየ፡፡ 22.አባ ቲይ ኦሞል ሚያፍሪደ፣ ያከካህ ፍርዲ ሢልጣን ባዻህ ዮምሖወ፡፡ 23.ታሃም አበም ሒያው ኡምቢህ አባ ያስክብሪኒም ባሊህ፣ ታማም ባሊህ ባዻ ያስካባሮና የህ የህ ኪኒ፡፡ ባዻ አስክብረዋየቲ፣ ባዻ ፋረ አባ ለ ሚያስኪቢረ፡፡ 24.ሓቀህ ሐቀ ሲናክ አይክ አኒዮ ይቃል ያበቲያከ ይፋረቲያል ያሚነቲ ኡማንጉሊት ሕይወት ለ፣ ኡሱክ ራባኮ ሕይወቲል ታባካህ አልሚያምፊሪደ፡፡ 25.ሓቀ ሓቀ  ሲናክ አይክ አንዮ፣ ራብተ ሒያው ፉጊ ባዺህ አንዻሕ ያቢን ዋክቲ አምተለ፣ ዋክቲ ለ ካዶ ኪኒ፣ ቶበም ኡምቢህ ሕይወቲህ ማረሎን፡፡ 26.አይሚህ አባ ኢሰህ ሕይወቲህ ሪሚድ ኪናምባሊህ፣ ታማምባሊህ ባዺ ሕይወት ሚንፀ ያኮ አበ፡፡27.ሒያውቲ ባዻ ኪናም ኢዻህ ያፍራዶ ሢልጣን አካህ ዮሖወ፡፡28.ታይ ጉዳህ ማምዳናቂና! አይሚህ ማዓጊ አዳድ ታናም ኡምቢህ ካ አንዻሕ ያቢን ሳዓት አምተለ፡፡ 29.መዔም ሢራሕተም ራባኮ ኡገተህ ሕወቲህ ማረሎን፣ ኡማም አብተም ለ ራባኮ ኡጉተኒህ  ኤልአምፍረደ ለ፡፡

      ኢየሱሱል ቲምስኪረ ሒያው

   30.አኑ ኢኒ ዸግኃህ ሢልጣናህ ኢንኪም አቦ ማዺዓ፣ ያከካህ አባኮ ኦበሚህ አፍርደሊዮ፣ ይፋረቲህ ፍቃድ ኢካህ ኢኒ ፍቃድ ማባጉል ይፍርዲ ቲክኪል ኪኒ፡፡

  31.ኢኒ ዳዓባል አምስከረጉል፣ ይምስኪሪነት ሓቀ ማኪ፡፡ 32.ያከካህ  ይዳዓባል ያምስኪረቲ አከቲ ያነ፣ ኡሱክ ለ ይዳዓባል ያምስኪረ ምስክሪነት ሓቀ ኪናም ኤዸገ፡፡ 33.አቲን ያሃኒሲል ሒያው ፋርተኒህ ቲኒን፣ ኡሱክ ሓቂ ዳዓባል ይምስኪረ፡፡ 34.ታሃም አካህ ኤም ታደኃኖና ኪኒ ኢካህ ዮያ ሒያው ማስኪር ይጉርሱሰህ ማኪ፡፡ 35.ያሃኒስ ቦሎላቲያከ ያምቀጸለ ኢፎይታ ባሊህ ኪይይ ዪነ፣ አቲን ዳጎ ዋክተ ካኢፎህ ኒያቶና ጉርተን። 36.አኑ ለ ያሃኒስ አይማስካርኮ ያሰ ማስኪር ሊዮ፣ ማስኪር ያ አባ ሢራሖ ዮህ ዮሖወ ሢራሕ ኪኒ፣ ታይ ሢራሓ ሢራሕ ያባ ይፋረም ይዳዓባል ያሚስኪረ፡፡ 37.ይፋረ አባ ኢሰህ ይዳዓባል ያምስኪረ፣ አቲን ለ ካ አንዻሕ ኢንኪጉል ማብኒቲን፣ ካቢሶ /ሚስለ/ ሱሩህ አክ ማባልኒቲን፡፡ 38.ኡሱክ ፋረም ማታሚኒኒጉል ካቃል ሲናድ ማማራ፣ 39.አቲን ቁዱሳት ማጻሕፍቲል ኡማንጉሊት ሕይወት ገይታናም ታካሊኒህ ተና ታምርሚሪን፣ ኢሲን ለ ይዳዓባል ታምስኪረም ኪኖን፡፡ 40.ያኮይ ኢካህ አቲን ሕይወት ገይቶና ዩላል ታምቲኒም ማጉርታናን ።   

  41.አኑ ኪብረ ሒያውኮ ማጉራ፣ 42.አቲን መዔፉጊህ ካሓኖ ሂናም ኪቲኒም ኤዸገ፡፡ 43.አኑ ኢናባህ ሚጋዓህ ኤመተ፣ አቲን ለ ይማጋራይንቲን፣ አከቲ ኢሲ ሚጋዓህ ያምተ ቲያ ለ ጋራይታን፡፡ 44.ኢሰኢሲ ሒያውኮ ኪብረ  ጉርታን፣ ፉጎኮ ጥራህ ገይማ ኪብረ ለ ጉረዋይታማክ አቲን አይናህ ተኒህ ዮያል ታማኖና ዺዕታና? 45.አኑ ኢናባህ ነፊል ሲናህ አምስከረ ሊዮም ማከልና፣ ሲን ያክሲሰቲ ታስፋ ኤድ አብታን ሙሴ ኪኒ፡፡ 46.ሙሴል ተመኒኒህ ታኪንዶ ኡሱክ ይዳዓባል ይጽሕፈሚህ ዮያ ለ አሚነ ዻዸን፡፡ 47.ኡሱክ ይጽሒፈም አሚነ ዋይተኒምኮ ለ ይቃል አይናህ ተኒህ ታማኖና?"

ማዕራፋ 6

ኢየሱስ ኮና ሲሕ ሕያውቲያ ይምግበ

(ማቴ.14፣13-21፤ማር.6፣30-44፤ሉቃ.9፣10-17፡፡)

   1.ታሃምኮ ላካል ኢየሱስ ጥብሪያዶስ አክያን ገሊላ ባሕሪ ታብሶል ታበ፡፡ 2.ማንጎ ሒያው ኢየሱስ ዳላክንቲ ኡሩስናናህ አባ ታአምራት ዩብልኒህ ካይክቲሊን፡፡ 3.ኢየሱስ ኢምባል የውዔህ ታማል ኢሲ ተምሃሮሊህ ዲፈ፡፡ 4.አይሁድ ፋሲጊ ባዓል ካብየህ ዪነ፡፡ 5.ታይ ዋክተ ኢየሱስ ማንጎ ሒያው ካኡላል አምቲህ ሪጋየህ ዩብለህ ፊሊጶሱክ  ታሂዾለ ሒያው ዺዓ ሚግበ  አርከኮ  ዻምኖ ዽዒና? አክየ፡፡ 6.ኢየሱስ ታሃም ዋንሲተም ፊሊጶስ ያፋታኖ የህ ኪኒ ኢካህ አባም ኢሰህ አዽጊይ ዪነ፡፡

   7.ፊሊጶስ ኢንከከቶህ ዒንዻዻ ቁራስ ኡካ  አካህ ያሓዎና ላማ ቦል ቁርስያቲያህ  ኢንገራ ማዽዕታ የህ ይምሊሰ፡፡ 

  8.ተምሃሮኮ ኢንከቲ ስምዖን ጰጥሮስ ሳዓል እንድሪያስ ታህ የ፣ 9."ኮና ሲገም ኢንገራከ ላማ ዓሣሰይቶ ዪብዸ አውክ ታል ያነ፣ ያከካህ ታሃም ታህዶለ ሕዝበህ አይም ዽዕቶ?" 10.ኢየሱስ ለ ሒያው ዲፈይቶ አባ አክየ፡፡ ታማይ ቦታል ማንጎ ዓይሶ ቲነ፣ ሒያው ዲፈይተ፣ ተን ሎይ ኮና ሲሕ ታከም ኪይ ዪኒን፡፡ 11.ታሀምኮ ላካል ኢየሱስ ኢንገራ ናው ኢሰህ ሞሳ ጻሎት ካቢሰህ  ዲፈይተ ሒያዋህ ይዕዲለ፡፡ ታማም ባሊህ ዓሣ ሓዲለህ ኡምቢህ ተን ጉረሱሳም ገን፡፡ 12.ኡምቢህ በተኒህ ሓይተኒሚህ ላካል ኢየሱስ ተምሃሮክ "ኢንኪ ነገር አምበከነዋዎይ ራዔ ተረፍ ለ ኤስከሄላ" አክየ። 13.ኢሲን ለ ሒያው በተኒህ ራዔ ተረፍኮ ኮና ሲገም ኢንገራቲያኮ ተረፍ የስከሄልኒህ  ላማምከ ተማን ሞሶብያ የመጊን፣ 14.ሒያው ለ ኢየሱስ አበ ታምራት ዩብሊን ዋክተ ዓዲህ ታይቲ ዓለሚህ የመተ ነቢይ ኪኒ የን፡፡ 15.ሒያው ለ ጊደህ  በይተህ ካያይናጋሦና ይሕሲቢኒም የደገ ዋክተ ኢየሱስ ዲቦህ ማላምኖህ ሚሪሓ የህ ሪይ ቱላል የደ፡፡

ኢየሱስ ባሕሪ አሞል ታኪሳክ  የደ

(ማቴ.14፣22-33፤ማር.6፣45-52፡፡)

  16.ዲተ ሳይተ ዋክተ ካተምሃሮ ገሊላ ባሕሪ ኡላል የደዪን፡ 17.ዛልባህ የምሰፋሪኒህ ቀፍርናሆም ይምርሒን፣ ታማይ ሳዓቲህ ዋክቲ ዲቶወህ ዪነ፣ ኢየሱስ ጋና ተኑላል አምተካህ ዪነ፡፡ 18 ኃይላለ ሓሓይቲ አቱኪይ ዪነጉል ባሕሪ የመነወጸ፡፡ 19.ተምሃሮ አፋራ ወይ ኮና ኪሎ ሜትር ታከም አቅዝፍክ የደይኒምኮ ላካል  ኢየሱስ ባሕሪ አሞል ታኪሳክ ዛልባቱላል ካብ አይህ ዩብሊኒህ ማየሲተን። 20.ኡሱክ ለ ዮያ ኪዮክ ማማይሲቲና! አክየ፡፡ 21.ኢሲን ለ ኒያታህ ጋራየኒህ ዛልባድ ሳይሰን፣ አማይጉልካህ ዛልባ ይሕሲቢን ቦታ ማደ፡፡

  ኢየሱስ ሕይወት ኢንገራ

    22.ኢብዻሕነ ባሕራኮ ታበሶል ራዕተህ ቲነ ሒያው ባሕሪ አሞል ኢንኪ ዛልባ ዲቦህ ታናመ ዩብሊን፣ ተምሃሮ ዲቦህ የደይኒምከ ተንሊህ ዛልባድ ማሳይናም የዸጊን፡፡ 23.ያከካህ አኪ ዛልቢት ጥብሪያዶስኮ ኡጉተህ ኢየሱስ ምሰጋና ጻሎት ኤልአበርከከ ሕዝቢ ኢንገራ ኤልበተ ሲፍራህ ባሮል የመቲን፡፡ 24.ሒያው ለ ኢየሱስከ ተምሃሮ ታማል ሚያኒኒም ዩብሊን ዋክተ ታማይ ዛልባታታህ የምሰፈሪኒህ ኢየሱስ ዋጊዮህ ቅፍርናሆም ኡላል የደዪን፡፡ 25.ባሕራኮ ታብሶል ካገን ዋክተ "መምሂሮ! ታል አንዳ ተመተ?" አክየን፡፡ 26.ኢየሱስ ለ ታህ የህ ኤል ይምሊሰ፣ "ሐቀ ሓቀህ ሲናካይክ አንዮ፣አቲን ይዋጊይታናም ኢንገራ በተነጉልከ ሓይተንጉል ኪኒ ኢካህ ታምራት ቱብሊን ኢርከህ ማኪ፡፡ 27.ያለየ ሚግበህ ማሢራሒና፣ ጋዳህ ሒያውቲ ባዺ ሲናህ ያኃየ፣ ኡማንጉሊ ሕይወት ያከ ሚግበህ ሢራሓ፣ አይሚህ መዔፉጊ አባ ኢሲ ባዻህ አካህ ያምረገገጸ ማኅተም ኤል ይህቲመ፡፡ 28."ሒያው"ይቦል መዔፉጊህ ሢራሕ ሢራሕኖ አይም አብኖ ኖህ ኤዳ?" አክየን፡፡            29.ኢየሱስ ለ "መዔፉጊህ ሢራሕ ኢማ ፉጊ ፋረቲያል ያሚኒኒም ኪኒ" የህ ኤልደሄየ፡፡       

   30.ኢሲን ለ ታህ አክየን፣ "ናኑ ኑብለህ ኮያል ናማኖ አይሚህ ታአሚር አብታ? አይም ለ ሢራሕታ? 31.በቶና ዓራንኮ ኢንገራ አካህ ዮሖወ የህ ይምጺሒፈም ባሊህ ናቦብቲ ባራካል መና በተን፡፡"

  32.ታማይ ዋክተ ኢየሱስ ታህ አክየ፣ ሙሴ ሲናህ ዮሖወም ዓራንኮ ኦብተ ኢንገራ ማኪ፣ ሓቂ ኢንገራ ዓራንኮ ሲናህ ያሓየቲ ያአባ ኪኒ፣ 33.አይሚህ ፉጊ ኢንገራ ዓራንኮ ኦብታቲያከ ዓለሚህ ሕይወት ታሓየቲያ ኪኒ፡፡ 34.አማይጉል ሒያው "ኒማዳራ! ታይ ዓይነቲህ  ኢንገራ ኡማን  ዋክተ ኖሑይ" አክየን፡፡

  35.ኢየሱስ ለ ታህ አክ፣ ሕይወት ኢንገራ ዮያ ኪኒ፣ ዮያል ያምተቲ ኢንኪጉል ማሉዋ፣ ዮያል ያሚነቲ ኢንኪጉል ማባካራ፣ 36.አቲን ለ ይቱብሊኒህ ዮያል ማማኒኒቲን ሲናክ አይክ አኒዮ፡፡ 37.አባ ዮህ ዮኆወም ኡምቢህ ዩላል ታሚተ፣ ዩላል ታሚተም ኢሮህ ማሀዳና፡፡ 38.አይሚህ አኑ ዓራንኮ ኦበም ይፋረቲህ ዲላይ አቦ ኪኒ ኢካህ ኢኒ ዲላይ አቦ ማኪ፡፡ 39.ይፋረቲህ ዲላይ፣ ዮህ ቶምሖወምኮ ኡምቢህ ኢንከቶ ኡካ አክ አይለየካህ ባክቶ ለለዕ ኡጉሦ ኪኒ፡፡ 40.ዮዎ፣ ያባህ ፍቃድ ባዻ ያብለቲያከ ካያል ያሚነቲ ኡምቢህ ኡማንጉሊህ ሕይወት ገዮ ኪኒ፣ አኑ ባክቶ ለለዕ ተን ኡጉሠ ሊዮ፡፡ 41.አማይጉል ኢየሱስ ዓራንኮ ኦብተ ኢንገራ ዮያ ኪኒ የዽሔርከህ አይሁድ ካአሞል ዩግሩምሩሚን፤ 42.ታህ የዽሒን፣ "ታይቲ ዮሴፍ ባዻ ኢየሱስ ማኪ? አባካ ኢና አክ ናዽገህ ማኪኖሆ? ይቦል ካዶ ኡሱክ 'ዓራንኮ ኦበ' አይናህ የህ ያ?" 

   43.ኢየሱስ ታህ የህ ኤልደሄየ፣ ሲኒሲኒ ዸግኃህ ማዕራምራምና፤ 44.ይፋረ አባ ሂርገቲያኮ በሒህ ዮ ዻጋህ ያማቶ ዽዓቲ ኢንከቲ ሚያነ፣ ዩላል ያምተቲያ ባክቶ ለለዕ ራባኮ ኡጉሠ ሊዮ፡፡ 45.ነቢያት ማጻሒፍቲ ሒያው ኡምቢህ ፉጎኮ ቲምሂረም አከሎን የህ ይምጽሒፈህ ያነ፣ አማይጉል አባኮ ቶበህ ቲምሂረም ኡምቢህ ዩላል አምተሎን፡፡ 46.ታሃም አኪህ አባ ዩብለ ሕያወቲ ያነ ማለት ማኪ፡፡ አባ ዩብለቲ ፉጎኮ የመተቲያ ጥራህ ኪኒ፡፡ 47.ሓቀህ ሐቀ ሲናክ አይክ አንዮ፣ (ዮያል) ያሚነ ሒያውቲ ኡማንጉሊህ ሕይወት ለ፡፡ 48.አኑ ሕይወት ኢንገራ ኪዮ፤ 49.ናቦብቲ ባራካድ መና በተን፣ ያከካህ  ራበን፣ 50.ዓራንኮ ኦብተ ኢንገራ ታይቲያ ኪኒ፣ ታይ ኢንገራ በታም ሱሩህ ማራብታ፡፡ 51.ዓራንኮ ኦብተህ ታነ /ሂያው/ ኢንገራ ዮያ ኪኒ፣ ታይ ኢንገራኮ በታም ኡምቢህ ኡማንጉሉህ ማራን፣ ዓለሚህ ሕይወት ያኮ አኑ አኃየ ኢንገራ ይሓዶይታ ኪኒ፡፡" 52.ታማይ ዋክተ አይሁድ "ታይ ሒያውቲ ካሓዶይታ በኖ  አይናህ የህ ኖህ ያኃዎ ዺዓ?" ያናማህ ሲነሲነህ የምከረከሪን፡፡

    53.አማይጉል ኢየሱስ ታህ አክየ፣ ሓቀህ ሐቀ ሲናክ አይክ አኒዮ ሒያውቲ ባዻ ኪን (ክርስቶስ) ሓዶይታ በተዋይተኒምኮ፣ ካቢሎ ለ አዑበ ዋይተኒምኮ ሕይወት ማልቲን፡፡ 54.ይሓዶይታ በታቲያከ ይቢሎ ያዑበቲ ኡማንጉሊ ሕይወት ለ፣ ኑ ለ ባክቶ ለለዕ ራባኮ ኡጉሠ ሊዮ፡፡ 55.ማለት ዪ ሓዶይታ ሓቂ ሚግበ ኪኒ፣ ይቢሊ ለ ሓቂ ማስተ ኪኒ፡፡ 56.ዪ ሓዶይታ በታምከ ዪ ቢሎ ታዑበም ኡምቢህ ዮያድ ማራን፣ አኑ ለ ተናድ ማራ፡፡ 57.ያነ /ሂያው/ አባ ይፋረም ባሊህ አኑ ለ ካያድ ያነቲያ ኤከጉል ታማባሊህ ዪ ሓዶይታ በታቲ ኡምቢህ ዮያድ ያንቲያ ያከ፡፡ 58.አማይጉል ዓራንኮ ኦብተ ኢንገራ ታይቲያ ኪኒ፣ ኡሱከ ለ ሲናቦብቲ በተን ዓይነት ማኪ፣ ማለት ታማይ ኢንገራ በተም ራብተ፣ ታይ ኢንገራ ባታም ለ ኡማንጉሉህ ማራን፡፡ 59.ኢየሱስ ታሃም ወንሲተም ቅፍርናሆሙል ሙክራብድ ያይምሂረሃኒህ  ኪይይ ዪነ፡፡

       ኡማንጉሊ ሕይወት ቃል

   60.ተምሃሮኮ ማንጎማሪ ታሃም ዮብንጉል ታይ ዋኒ ዒልስቲያ ኪኒ፣ ኢይ ጋራዎ ዺዓ የን፡፡ 61.ኢየሱስ ለ ካተምሃሮ ታይ ጉዳዪህ ዳዓባል  ዩግሩምሩሚኒም ኢሲ መንፈሲህ የዸገህ ታህ አክየ፣ "ታይ ጉዳይ ሲን ያሰነከለ? 62.ሒያውቲ ባዺ ክርስቶስ ኤድ ይነርከድ ጋኄህ አውዒህ ታብሊንጉል አይም ኢየሊቲን? 63.ሕይወት ያኃየቲ መዔፉጊህ መንፈስ ኪኒ፣ ሒያው ኃይሊ ለ ኢንኪም ሚያጥቂመ፣ አኑ ሲናከህ ዋንሲተ ቃል  ሕይወት ያሓየ መንፈስ ኪኒ። 64.ያከካህ ሲን ፋንኮ ጋሪጋሪ አምነዋ ማሪ ያነ፣ ኢየሱስ ታሃም ዋንሲተም ኤዸዾይታኮ ኡጉተህ አሚነዋይታም ኢያኢያ ኪኖኑምከ ቲላሰህ ያሓየቲ ኢያይቶ ኪናም አዽጊይ ዪነጉል ኪኒ፡፡ 65.ካታየህ ኢየሱስ"አባኮ አካህ ይምፍቅደቲያኮ በሒህ ዮያ ዻጋህ ያማቶ ዺዓቲ ሚያነ ሲናከም ታሃማህ ኪዮ" የ፡፡

   66.ታሃሚህ ሚክኒያታል ተምሃሮኮ ማንጎም ሳራቱላል ጋኄን፣ ታማይ ዋክተኮ ኤዸዺሰኒህ ኢየሱሱድ ካታያናም ኃበን፡፡ 67.አማይጉል ኢየሱስ ላማምከ ታማናክ "አቲንለ ለ ታዳዎና ጉራክ ታኒኒ?" አክየ፡፡ 

  68.ታማይ ዋክተ ስምዖን ጰጥሮስ ታህ የህ ይምልሰ፣ "ኦ'ይማዳራ! ኢዩላል ናዲየ አቱ ኡማንጉሊ ሕይወቲህ ቃላክ ታነ፡፡ 69.ናኑ ነመነ፣ ቁዱስ መዔፉጊህ ባዻ አቱ ኪቶም ነዸገ፡፡" 70.ኢየሱስ ለ "ሲና ላማምከ ታመናክ ሲን ዶረህ ማኪየሆ? ያኮይ ኢካህ "ሲንኮ ኢንከቲ ዲያብሎስ ኪኒ" አክየ፡፡ 71.ታሃም አክየም ሰምዖን ባዻ ኪን አሰቆሮታዊ ይሁዳህ ዳዓባል ኪይይ ዪነ፣ አይሚህ ይሁዳ ላማምከ ታማንኮ ኢንከቶ የከህ ኢየሱስ ቲላሰህ ያሓየቲ ካያ ክይይ ዪነጉል  ኪኒ፡፡

ማዕራፋ 7

ኢየሱስ ዳስቲ ባዓላህ ኢየሩሳለም ኡላል  የደ

   1.ታሃምኮ ላካል ኢየሱስ ገሊላል አምዘወወሪይ ዪነ፣ ይሁዳል ለ ያምዛዋዋሮ ማጉርና፣ አይሚህ አይሁድ ያግዳፎና ካዋጊያይ ዪኒን፡፡ 2.ታማይ ዋክተ አይሁድ ዳስቲ ባዓል ካብ የህ ዪነ፡፡ 3.አማይጉል ካሳዖል ኢየሱስድ ካብየኒህ ታህ አክየን፣ ኩተምሃሮ አብታ ሢራሕ ታብሎክ ታርከኮ ኡጉታይ ይሁዳ ባዾ አዱይ፤ 4.አይሚህ ዓዲህ ያማዻጎ ጉራ ሒያውቲህ ሢራሕ ሑብኦህ ማባ፣ አቱ ለ ታይ ጉዳይ ሙሉኡክ አባህ ኢሰ ዓለም ታይባላዎ ኩጉርሱሳ፡፡ 5.ታሃም አካህ የን ምክኒያት ካሳዖል ኪህ ካያል አሚነ ዋየንጉል ኪኒ፡፡

   6.ኢየሱስ ለ ታህ አክየ፣ ይዋክቲ ገና ማማዲና፣ ሲን ዋክቲ ለ ኡማን ዋክተህ ያምሰመመዔቲያ ኪኒ፡፡ 7.ዓለም ሲና ያንዓቦ ማዽዓ፣ ዮያ ግን ይኒዒባ፣ አይሚህ አኑ ለ ተን ሢራሕ ኡማቲያ ኪናም አክ አምስክረጉል ኪኒ፡፡ 8.አቲን ባዓላህ አዱዋ፣ አኑ ለ ይዋክቲ ገናህ ማማዲናጉል ታማይ ባዓላህ ማዲየ፡፡9.ታሃም አክ የህ ኡሱክ ገሊላል ራዔ፣ 10.ያከካህ ካሳዖል ባዓል ኡላል የደይንጉል ኡሱክ ግልጸህ አከካህ ሱዉሩህ ባዓላል የደ፡፡ 11.ባዓል አሞል ለ "አል ኪኒ?"አይክ አይሁድ ሢልጣን ባዒል ካዋጊያይ ዪኒን፡፡ 12.ሕዝቢ ካዳዓባል ሑሱክታ ዋንሲታይ ዪነ፣ ጋሪጋሪ"ኡሱክ መዔቲያ ኪኒ" አይህ፣ ውልውል ማሪ ለል ማኪ፣ "ኡሱክ ሕዝበ ያስገገየ" አይ ዪኒን፡፡"13.ያከካህ አይሁድ ማይሲተኒህ ኢንከቲ ካዳዓባል ዓዶሰህ ማዋንሲቲና፡፡

 14.ባዓል አብዻህ አሞል ኢየሱስ በተ መቅደስድ ሳየህ ያይምሂሪኒም ኤዸዺሰ፡፡ 15.አይሁድ ሢልጣን አሞይቲት ታይ ሒያውቲ አሚሂረካህ ታሃም ኡምቢህ አይናህ የህ ያዻጎ ዺዔ?" አይክ አምዲኒቂይ ዪኒን።

   16.አማይጉል ኢየሱስ ታህ የህ ኤልደሄ፣ "ዪሚሂሮ ይፋረ ያባኮ ገይምተም ኪኒ ኢካህ ዮኮ ማኪ፡፡ 17.ዪፋረቲህ ፍቃድ አባናም ጉራቲ ይኔምኮ፣ ታይ ሚሂሮ ፉጎኮ ገይምተም ኪናምከ ወይ ለ አኑ ዋንሲታም ኪናም ያዽገ፡፡ 18.ኢሰኮ ዋንሲታቲ ኢሲ ዸግኃህ ኪብረ ጉራ፣ ካፋረቲህ ኪብረ ጉራቲ ለ ሓቀ ለቲያ ኪኒ፣ ዲራብ ማለ፡፡ 19.ሙሴ ሕገ ሲናህ ዮሖወህ ሚያነ?ያከካህ ሲንኮ ሕገ ያፍጸመቲያህ ኢንከቲ ሚያነ፡፡ አቲን አይሚህ ይታግዳፎና ጉራክ ታኒን?"

   20.ሕዝቢ ለ "አቱ ጋኔን ሊቶ! ኢዪ ኩያግዳፎ ጉራ?" አክየን፡፡21.ኢየሱስ ታህ የህ ኤልይምለሰ፣ አኑ ኢንኪ ሢራሕ ሢራሔ፣ አቲን ለ ኡምቢክ ታይ ሢራሓህ አምድኒቂክ ታኒን፡፡  22.ሙሴ ግዝረት ሠርዓት ሲናህ ዮሖወ፣ ታይ ሠርዓት ገይመም አቦብኮ ኪኒ ኢካህ ሙሴኮ ማኪ፣ ኢስቲ አቲን ሳንባታህ ኡኮ ሒያው ታግርዚን፡፡ 23.አማይጉል ሙሴ ሕጊ ያምስዒረምኮ ሒያው ሳንባት ለለዕ ታምግሪዘህ ተከምኮ፣ ኢቦል አኑ ሳንባት ለለዕ ሒያው ኡማና ኡሩሰሚህ አይሚህ ያንቂፊክ ታኒን? 24.ቅንዒናህ ኢፍርዳካህ ሒያው ነፍ ቱብሊኒህ ዳልዋህ  ማፈራዲና ።                                                      መሲሕ ዳዓባል ኡጉተ ኪሪኪር 

   25.ኢየሩሳለም ሒያውኮ ጋሪጋሪ ታህ የን፣ "ያግዳፎና ጉራን ሒያውቲ ታይቲያ ማኪሆ? 26.ሀይከ ኡሱክ ዓዲክ ዋንሲታ፣ ኢሲን ኢንኪም አክ ሚኖን፣ ታይ ሒያውቲ መሲሕ ኪናም ሢልጣን ባዒል ሓቀህ የዸጊኒህ ያካኒ?"27.ኢስኪ ናኑ ታይ ሒያውቲ አርከኮ ኪናም ናዽገ፣ መሲሕ አሚቲህ ለ አውላኮ ኪናም ያዽገቲ ቲይ ሚያነ፡፡28.አማይጉል ኢየሱስ በተ መቅደስድ አይምሂሪህ አንዻሕ ናውሰህ ታህ የ፣ "ዮያ ታዽጊን፣ አውላኮ ኤመተም ታዽጊን፣ ያኮይ ኢካህ አኑ ኢኒ ሢልጣናህ ማ'ማቲኒዮ፣ ይፋረቲ ሓቀይና ኪኒ፣ አቲን ማተዽጊን፡፡ 29.አኑ ግን ካኮ ኤመተጉልከ ኡሱከ ይፋረጉል አዽገ፡፡"

  30.ታማይ ዋክተ ካያባዾና ጉረኒህ ዪኒን፣ ያከካህ ጋና ዋክቲ ማማዲናጉል ኢንከቲ ካማባዽና፡፡ 31."ያኮይ ኢካህ ሒዝበኮ ማንጎም ካይያል ተመነ፣ ታህ የን፣ መሲሕ ያሚተ ዋክተ ታይ ሒያውቲ አበ ታምራትኮ አጋናል አበለ?"

ኢየሱስ ያባዶና ወታሀደር ፋርቲምተ

  32.ሒዝቢ ኢየሱስ ዳዓባል ሑሱክሱክ የኒህ ዋንሲታህ ፈሪሳውያን ዮቢን፣ አማይጉል ካህናት አሞይቲትከ ፈሪሳውያን ኢየሱስ ያባዾና ወታሀደር ፋረን፡፡ 33. ታማይ ዋክተ ኢየሱስ ታህ የ፣ "ሲንሊህ ዳጎ ዋክተ ሱገልዮ፣ ታማምኮ ላካል ይፋረቲያ ዻጋህ አዴሊዮ፣ 34.አቲን ይዋጌሊቲን፣ ለ ይገማሊቲን፣ አኑ ኤድ አነርከድ አቲን ታማቶና ማዽዒታን፡፡ 35.አማይጉል አይሁድ ታህ ኢሲሲመን፣ ናኑ ካገይናምኮ ታይ ሒያውቲ አይናህ የህ ያዶዎ ኪኒ?" ምናልባት ግርክ ፋናድ ቲንቢቲነህ ታነ አይሁድ ዻጋህ የደህ ግሪክ ሕያው ያይማሃሮ ያከ?"36.'ይዋጌሊቲን ከካህ ይገየ ማልቲን፣ አኑ ኤድ አነርከድ አቲን ታማቶና ማዽዕታን' የም አይም ማለቲህ ኪኒ?"                                              

       ሕይወት ላየ

   37.ባዓል ባክቶህ የከ ናባ ለለዒህ ኢየሱስ ሶለህ አንዻሕ ናወሰህ  ታህ የ፣ "ላየህ ባካረቲይ ዪኔምኮ ዮያ ዻጋህ የመተህ ያዓቦይ፣ 38.ዮያል ያሚነቲ፣ ማጽሐፍ ያምባሊህ፣ ሕይወት ላየህ ሚንጪህ አዳኮ ያፍልፊለ፡፡39.ታሃም ለ ዋንሲተም ካያል ታሚነም ጋራይተ መንፈስ ቁዱስ ዳዓባል ኪኒ፡፡ አይሚህ ኢየሱስ ኤልያከቢረ ዋክቲ ማደሒነጉል፣ መንፈስ ቁዱስ ገና አካህ ዮምሖወህ ማና፡፡

    ሒዝቢ ፋናድ ባዽስ የከ

  40.አማይጉል ሕዝብኮ ጋሪጋሪ ታይ ቃል ዮብንጉል አምተለ አክያን ነቢይ ዓዲህ ታይቲያ ኪኒ የን፡፡ 41.ውልውል ማሪ ለ "ታይቲ መሲሕ ኪኒ"የን፣ ጋሪ ለ"መሲሕ ያሚተም ገሊላኮ ኪኒ?" 42.መሲሕ ዳዊት ዳራኮ  ያቡከምከ ዳዊት ካታማኮ በተ ሊሄምል ያመተም ቁዱስ ማጽሐፋል ይምጺሒፈህ ሚያነ? የን፡ 43.አማይጉል ታሃሚህ ምክንያታል ሒዝቢ ፋናድ ባዽሲ የከ፡፡ 44.ጋሪጋሪ ያባዾና ጉረኒህ  ዪኒን፣ ያከካህ ኢንከቲ ማባዽና፡፡

አይሁድ ሢልጣን ባዕሊህ  ኢምነት ዋይቲ

   45.ታሃምኮ ላካል ወታሀደር ካህናት አሞይቲትከ ፈሪሳውያናል የደዪን፣ ኢሲን "አይሚህ ባሄ ዋይተኒም?"አክየን፡፡ 46.ወታሀደር ለ"ታይ ሒያውቲ ዋንሲታሚህ ዓይነት ኢንከቲ ዋንሲተህ ሚያዽገ የኒህ ኤል ይምልሲን፡፡ 47.ፈሪሳውያውን ለ ታህ አክየን፣ አቲን ለል ተምገገዪኒ?" 48.ኢስኪ ሢልጣን ባዕልኮ ያኮይ ፈሪሳውያንኮ ካያል ተመነም ታነ? 49.ታይ ሙሴ ሕገ አዽገዋ ሒዝቢ ዓዲህ አባርምተም ኪኖን፡፡ 50.ታሃም ባሶህ ኢየሱሱል የደህ ዪነ ፈሪሳውያንኮ ኢንከቲ ኒቆዲሞስ፣ 51.ኒሕጊህ መሠረቲህ ኢንኪ ሒያውቶል ኪሲ መልሲ ዮኮመህ አማበካህ አይም አበም አምዽገካህ ኤልሚያምፍሪደ?" አክየ፡፡ 52.ኢሲን" አቱ ለ ገሊላኮ ኪቶሆ?" ነቢይ ገሊላኮ ሚያውዔም ኢምርሚራይ  ኢምርዲእ  አክ የን፡፡ 53.ሲኒሲኒ  ዲክ  የደይን፡፡

ማዕራፋ 8

አምንዚሪህ ትምዽብዸ ኑማ

    1.ታሃምኮ ላካል ኢየሱስ ደብረዘይቲ የደ፣ 2.ኢብዳሒነ ማሓል በተ መቅደሲል ጋኄህ የመተ፣ ሕዝቢ ኡምቢህ ካኡላ የመተ፣ ኡሱክ ለ ዲፈህ ያይሚሂረም ኤዸዺሰ፡፡ 3.ሙሴ ሕጊ መምሂራንከ ፈሪሳውያን፣ አምንዚሪክ ቲምዽቢዸ ኑማ ባሄኒህ ሕዝቢ ፋናል ሶሊሰን፡፡ 4.ኢየሱሱክ ታህ አክየን፣ "መምሂሮ! ሀይከ ታይ ኑማ አምንዚሪህ ትምዽብዸ፣5.ታይ ዓይዳል  ሱግተ ሳይጉደይታ ዻይቲህ ቱሙጉረህ ራብቶ ሙሴ ኒሕገህ ኒይኢዚዘ፣ አቱ ተ ዳዓባል አይምታ?"6.ታሃም አክየኒም ካአሞል ኪሲ ጉዳይ ኤደገዮና ያፋታኖና ጉረኒህ ኪይይ ዪኒን፣ ኢየሱስ ለ ዔጋ የህ ፈራህ ባዾል ያጽሒፊኒም ኤዸዽሰ፡፡ 7.የይደገገሚኒህ ካኤሠረን ዋክተ ሪጋ የህ ሲን ፋንኮ ኃጢአት ሂንቲ ኤዸዾይታህ ዻ ኤልዒዶይ አክየ፡፡ 8.ታሃምኮ ላካል ጋባዔህ ዔገህ የህ ባዾል ይጽሒፈ፡፡ 9.ኢሲን ለ ታሃም ዮቢን ዋክተ ሲማግለታትኮ ኤዸዽሰኒህ ሙሉኡክ ቲቲያህ ታማርከኮ የደዪን፣ አማይጉል ኢየሱስ ኖማሊህ ዲቦህ ራዔ፡፡ 10.ታሃምኮ ላካል ኢየሱስ ሪጋ የህ "ተኑማ ኩ ከሰስቲ አልታነ? ኮል ቲፍርደምኮ ኢንከቲ ሚያነ?' አክየ፡፡ 11.ኢሲ ለ "ይ ማዳራ! ኢንከቲ ሚያን?" አክተ፡፡ ኢየሱስ አኑ ለ ኮልማፍርደክ፣ አዱይ፣ ጋባዕተህ ኃጢአት ማሥራሒን አክየ፡፡

                         ኢየሱስ ዓለም ብረሃን /ኢፎይታ/

 12.ጋባዔህ ኢየሱስ አኑ ዓለም ኢፎይታ ኪዮ፣ ዮያ ያክቲለቲ ኡምቢህ ሕይውት ኢፎይታ ገያ፣ ዲተድ ማጋኃንጋኃ የህ ዋንሲተ፡፡ 

 13.ፈሪሳውያን "አቱ ኢሲ ዸግኃህ አምስኪሪክ ታነ፣" አቱ ታማስካሮ ሓቀ ማኪ አክየን፡፡ 

  14.ኢየሱስ ለ ታህ የህ ኤልይምለሰ፣ አኑ ኢንኪጉል ኡካ ኢኒ አሞህ  ኢሚስኪረሚህ አርከኮ ኤመተም አውላል አዲየም አዽገጉል ይምስኪሪነት ሓቀ ኪኒ፣ አቲን ግን አርከኮ አመተህ አውላል አዲይኒም ማታዺጊን፡፡15.አቲን ኃዶይታት አታሓሳሲባህ አፍሪዲክ ታኒኒ፣ አኑ ኢንከቲ አሞል ማፍሪደ። 16.ኢፍርደምኮ ለ ዪፍርዲ ሓቀ ኪኒ፣ አይሚህ አኑ ዲቦህ ማፍርደ፣ ዪፋረ ያባ ለ ዮሊህ  ኪኒ፡፡    17.ላማ ሒያውቲህ ማስኪር ሓቀ ኪኒ ያናም ሲን ሕገል ይምጺሒፈህ ያነ፡፡ 18.አማይጉል አኑ ኢኒ ዸግኃህ አምስኪረ፣ ይፋረ ያባ ለ ይዳዓባል ያምስኪረ።" 19."ኢሲን ለ ኩአባ አል ያነ?  የኒህ ካኤሠረን፡፡ ኢየሱስ ለ ዮያ ያኮይ ያባ ማታዽጊን፣ ዮያ ታዽጊኒም ያከዶ ያባ ለ አዽገ ዻዸን አይክየህ ኤልይምሊሰ፡፡ 

  20.ኢየሱስ ታይ ቃል ዋንሲተም በተ መቅደሲድ፣ ማል ኤድጋራያን ሣጹኒህ ባሮል አይምሂሪህ ኪኒ፣ ታጉል ዋክቲ ገናህ ማደካህ ዪነጉል ኢንከቲ ካማባዽና፡፡

አሚነ ዋየኒርከህ  ዳዓባል ዮምሖወ  ሰሊስናን

   21.ጋባዔህ ኢየሱስ ታህ አክየ፣ አኑ አዴየ ሊዮ፣ አቲን ለ ዮያ ዋጊዬ ሊቲን፣  ያኮይ ኢካህ ሲኒ ኃጢአትሊህ ራበልቲን፣ አኑ ኤል አዴርከል አቲን ታማቶና ማዽዒታን፡፡ 22.አይሁድ ለ "አኑ ኤል አዲየርከል አቲን ታማቶና ማዽዒታን የም ኢሰ ያግዳፎ የህ ያከ?" ኢስመን፡፡ 

   23.ካታሰህ ኢየሱስ ታህ አክየ፣ "አቲን ጉባኮ ኪቲን፣ አኑ አጋናኮ ኪዮ፣ አቲን ታይ ዓለምኮ ኪቲን፣ አኑ ታይ ዓለምኮ ማኪዮ፣ 24.ሲኒ ኃጢአትሊህ ራበልቲን ሲናከም ታሃማህ" ኪዮ፣ አይሚህ አኑ አይምቶ ኪዮም ተዸጊኒህ አሚነ ዋይተኒምኮ ሲኒ ኃጢአትሊህ ራባሊቲን፡፡"

  25.ኢሲን "አቱ አቲያ ኪቶ"አክየን፣ ኢየሱስ ለ ታህ አክየ፣ ኤዸዾይታኮ ኤዸዽሰህ ሲናከቲያ ኪዮ፤ 26.ሲን ዳዓባል ዋንሲታምከ አፍርደምኮ ማንጎ ጉዳይ ሊዮ፣ ያከካህ ይፋረቲ ሓቀይና ኪኒ፣ አኑ ዓለሚህ ዋንሲታም ካኮ ኦበም ጥራሕ ኪኒ፡፡         

 27.ኢሲን ለ አባ ዳዓባል ኤድዋንሲተም ኤድማሳይና፡፡ 28.አማይጉል ኢየሱስ ታህ አክየ፣ "ሒያውቲ ባዻ ናው ኢሰኒህ ያስቂሊን ዋክተ አኑ ያነቲያከ ማራቲያ ኪዮም አዽገሊቲን፣ ታማም ባሊህ አባ ይይምሂረም ዋንሲታም ኢካህ ኢኒ ሢልጣናህ ጥራሕ ኢንኪም ማዋንሲታም ታማይ ዋክተ አትዒዲበ ሊቲን፡፡ 29.ይፋረቲ ዮሊህ ኪኒ፣ ኡማን ዋክተ አባም ካያ ኒያቲሳም  ኪኒጉል ዲቦህ ይማኃባ፡፡" 

   30.ኢየሱስ ታሃም ዋንሲተ ዋክተ ማንጎ ሒያው ካያል የመኒን፡፡

        ኃጢአት ባርነትኮ ናፃ ያውዒኒም

  31.ኢየሱስ ካያል ተመነ አይሁዱክ ታህ አክየ፣ አቲን "ይቃላል ሱግተኒምኮ ይተምሃሮ አከልቲን፣ 32.ሓቀ አዽገሊቲን፣ ሓቂ ለ ናፃ ሲን አየዔ ለ፡፡" 

   33.ኢሲን ለ ናኑ አብራሃም ዳራ ኪኖ፣ ኢንኪማሕ ኢንከቲ ባሪያ ነከህ ማናዽገ፣ ይቦል አቱ ናፃ አውዔልቲን አይናህ ተህ" ኖክታ? 

  34.ኢየሱስ ታህ የህ ኤልደሄየ፣ ሓቀ ሓቀ ሲናክ አይክ አኒዮ፣ ኃጢአት ሢራሐቲ ኡምቢህ ኃጢአት ባሪያ ኪኒ፣ 35.ባሪያ ኡማንጉል ዓሪ አዳድ ማማራ፣ ባዺ ለል ኡማን ዋክተ ዓሪ አዳድ ማራ፡፡ 36. አማይጉል ባዺ ናፃ ሲን የየዔምኮ ዓዲህ ናፃ አከልቲን፡፡ 37.አብራሃም ዳራ ኪቲኒም ኢማ አዽገ፣ ያከካህ ይቃል ማጋራይታንጉል ይታግዳፎና ጉራክ ታኒን፡፡ 38.አኑ ኢናአባኮ ኡብለም ዋንሲታክ አንዮ፣ አቲን ለ  ሲናአባኮ ቶቢኒም አብታን፡፡ 

    39."ኢሲን  ናባ  ኢማ አብራሃም ኪኒ የኒህ ይምልሲን፡፡ 

  ኢየሱስ ለ ታህ አክየ፣"አብራሃም ዻይሎ ተኪኒህ ታኪንዶ አብራሃም ሢራሕ ሢራሔ ዻዸን፤ 40.አኑ ፉጎኮ ኦበህ ሓቀ ሲናከ፣ አቲን ለ ይታግዳፎና ጉራክ ታኒን፣ አብራሃም ታህ' ማቢና፤ 41.አማይጉል አቲን ሢራሕታናም ሲኒ አባህ ሢራሕ ኪኒ፡፡"ኢሲን ለ "ናኑ ዙሙቱህ ቶቦከ ዲቃላ ማኪኖ፣ ኢንኪ አባ  ሊኖ፣" ኡሱክ ለ መዔፉጎ ኪኒ አክየን፡፡ 

   42.ኢየሱስ ታህ አክየ፣ ፉጊ ሲን አባ የከህ ያከዶማ ዮያ አክሒነ ዻዸን፣ አይሚህ አኑ ታል አኒዮም ኢኒ መዔፉጎኮ አመተህ ኪዮ፣ ይፋረቲ ካያ ኪኒ ኢካህ አኑ ኢኒ ዸግኃህ ሢልጣናህ ማማቲኒዮ፡፡ 43.አይሚህ ይዋኒ ሲናድ ማሳይታም? ይቃል ጋራቶና ማጉርታንጉል ኪኒ፡፡ 44.አቲን ሲኒ አባህ ዲያብሎስ ዻይሎ ኪቲን፣ ሲን ዲላይ ሲኒ አባህ ቲምኒት ያፍጺሚኒም ኪኒ፣ ኡሱክ ኤዸዾይታኮ ኤዸዽሰህ ናብሰ ጋዳይ ኪይይ ዪነ፣ ሓቂ ካያድ ማናጉል ሓቀሊህ ኢንኪጉል ቲቲህ ገይቶ ማሎን፣ ኡሱክ ዲራብሊ ዲራብቲ አባ ኪንጉል ዲራብ ዋንሲታ ዋክተ ኢሲ ሓንጋልኮ የየዔህ ዋንሲታ፡፡ 45.አኑ ለ ሓቀ ዋንሲታ ቲያ ኪዮጉል ይማታሚኒን፤ 46.ኢስክ  ሲንኮ 'ኃጢአተና ኪቶ' የህ ይያውቅሰቲ አቲያ ኪኒ? ሓቀ ዋንሲታህ ኤከምኮ ኢቦል አይሚህ ያሚነዋይታናም? 47.ፉጎኮ ኪንቲ መዔፉጊህ ቃል ያበ፣ አማይጉል አቲን መዔፉጊህ ቃል አበዋይታናም መዔፉጎኮ አከኂንተንጉል ኪኒ፡፡

ኢየሱስ አብራሃምኮ ባሶድ ዪነ

   48.አይሁድ ለ "አቱ ሳምራዊ ኪቶ፣ ጋኔን ለ ሊቶ፣ ናዽሔም ሊክዕ ማኪ?" አክየን፡፡ 

   49.ኢየሱስ ለ ታህ የህ ኤልደሄየ፣ አኑ ጋኔን ማልዮ፣ ያኮይ ኢካህ ኢናባ አስኪበረ፣ አቲን ለ ይታይወረዲን፡፡ 50.ያከካህ አኑ ኢኒ ዸግኃህ ኪብረ ማጉራ፣ ይ ኪብረ ጉራቲያከ ያፍረደቲ አከቲ ያነ አክየ፡፡ 51.ሓቀህ ሐቀ ሲናክ አይክ አነ፣ ይ ቃል ዻዉዻቲ ኢንኪጉል ማራባ፡፡

   52.አይሁድ ታህ አክየን፣ ጋኔን ሊቶም ካዶ ነዸገ፣ አብራሃም ኡካ ራበ፣ ነቢያት ለ ራብተ፣ አቱ ለ ዪ ቃል ዻዉዻቲ ኢንኪማሕ ማራባ አይክታነ፣ 53.ኢስኪ አቱ ራበ ናባ አብራሃምኮ ታይሰ? ነቢያት ራብተ፣ ኢስኪ አቱ  አቲያ  ኪዮ ታ? 

  54. ኢየሱስ ለ ታህ የህ ኤልይምልሰ፣ አኑ ኢኒ አሞህ ኪብረ ጉረምኮ፣ ይኪብሪ ሊሞ ማለ፣ ዮያ ያስኪቢረቲ ያባ ኪኒ፣ ኡሱክ ለ ናአምላክ አክ ታንቲያ ኪኒ፡፡ 55.አቲን ለ ካያ ማዻጊኒቲን፣ አኑ አዸገ፣ አኑ ማዽገ አዶ፣ ሲና ባሊህ ዲራብሊ አከ ዻዻ፣ አኑ ግን አዽገ፣ ካቃል ዻዉዻ፡፡ 56.ሲና አባ አብራሃም ቲምኒት ዪ'ለለዕ ዩብለህ ኒያታናም ኪይይ ዪነ፣ ዩብለህ ለ ኒያተ፡፡"

  57.ታይ ዋክተ አይሁዳውያን"አቱ ገና ኮንቶም ኢጊዲያ ማኪኒቶ፣ ኢስኪ አይናህ ተህ አብራሃም ኡብለ አይክ ታነ?" አክየን፡፡ 

  58.ኢየሱስ ለ "ሓቀህ ሐቀ ሲናክ አይክ አንዮ፣ አብራሃም አቡከካህ አኑ ኢነ"አክየ፡፡ 59.አይሁድ ካሳባዖና ዻይት ናውሰን፣ ኢየሱስ ለ አክ ይምሲዊረህ በተ መቅደስኮ  የውዔህ  የደ፡፡

ማዕራፋ 9

ኢየሱስ ዑዉር የከህ ዮቦከ ሒያውቶ ኡሩሰ

  1.ኢየሱስ አራሓል ቲላህ ዑዉሩክ ዮቦከ ሒያውቶ ይደኅነ፡፡ 2.ካተምሃሮ ኢየሱስክ መምሂሮ! ታይ ሒያውቲ ዑዉር የክሀ ዮቦከም ኢይ ኃጢአቲህ ምክኒያታል ኪኒ? ኢሲ ኃጢአታህ ኪኒ ወይ ዻልቶይቲህ? የኒህ ካኤሠረን ፡፡ 

   3.ኢየሱስ ለ ታህ የህ ኤልይምልሰ፣ ታይቲ ዮዖረም ኢሲ ዸግኃህ ወይ ወለዲ ኃጢአቲህ ምክኒያታል ማኪ፣ ያከካህ ፉጊ ሢራሕ ካያል ያምባላዎ የህ ኪኒ፡፡ 4.ለለዕ የከህ ያነሃኒህ ይፋረቲህ ሢራሕ ሢራሖ ዮልታነ፣ ኢንኪ ሒያውቲ ሢራሖ ዺዔዋ ባር አምተለ፡፡ 5.ዓለምል አነሃኒህ አኑ ባዾት ኢፎይታ ኪዮ፡፡

   6.ታሃም ወንሲተምኮ ላካል ባዾል ቱፍ የህ ኢሲ ቱፈናህ ቡልኩዓ ዩሉሰ፣ ጽቃህ ዑዉር ኢንቲት ዩስኩተ፣ 7.አዱዋይ ሰሊሆሙል ዓካልሰናድ ዓካል አክየ፡፡ (ሰሊሆም ፋሪትመቲያ ማልት ኪኒ፡፡) አማይጉ ሒያውቲ የደህ ዓካለህ አብልክ ጋኄ፡፡ 

   8.ሑጋከ ባሶህ ዻዒማህ ካአብልይቲነ ሒያው ታይ ሒያውቲ ቶይ ዲፈህ አልሚኒይ የነቲያ ማኪሆ? የን፡፡ 9.ጋሪጋሪ ዮ ካያ ኪኒ! የን፣ ጋሪጋሪ ለል ካያህ ኢጊዳካ ካያ ማኪ! የን፣ ኡሱክ ለ ዮ ዮያ  ኪኒ የ፡፡ 10.ይቦል  ኩ ኢንቲት አይናህ ተህ  ፋክተ አክየን፡፡      

   11.ኡሱክ ለ ኢየሱስ አክያን ሒያውቲ ፂቃ ዩሉሰህ ኢንቲት ዮህ ዩስኩተህ ሰሊሆሙል አዱዋይ ዓካል ዮክየ፣ አኑ ኤደህ ዓካለህ አብሎ ዺዔ የህ ኤልደሄየ፡፡ 12.ኢሲን ለ"ሒያውቲ ካዶ አል ያነ" አክየን፣ ኡሱክ አልያነርከ አኑ ማዸገ አክየ፡፡ 

 13.ታሃምኮ ሣራህ ሒያው ዑዉር ኪይይ ዪነ ሒያውቶ ፈሪሳውያን ኡላል በን:: 14.ኢየሱስ ፂቃ ይሉሰህ ሒያውቲ ኢንቲት ኡሩሰም ሳንባት ለለዕ ኪይይ ዪነ፤ 15.ፈሪሳውያን አይናህ ተህ ታብሎ ዽዕተ? የኒህ ሒያውቶ ጋባዔኒህ ኤሠረን፣ አሱክ ለ ኢንቲቲ አሞል ፂቃ ዮክ ሃየህ ዓከለ፣ አማይጉል አብሎ ዺዔ አክየ፡፡

  16.ታማይ ዋክተ ፈሪሳውያንኮ ጋሪጋሪ ታይ ሒያውቲ ሳንባት ሚያስክብረጉል ፉጎኮ ማኪ"የን፡፡ ጋሪ ለል ኢስኪ ኃጢአተይና ኪን ሒያውቲ ታይ ታአምራት አይናህ ኢሰህ አቦ ዺዓ? የን:: ታይ  ሚክኒያታል  ተን ፋናድ ባዽስ የከ፡፡ 17. አማይጉል ዑዉር ኪይይ ዪነ ሒያውቶክ አቱ ኢንቲት ዮህ ኡሩሰ አይክ ታነጉል ታይ ሒያውቶክ አይም አክ ታዽሔ? የኒህ ጋባዔኒህ ካኤሠረን፡፡ ኡሱከ "ነቢይ ኪኒ" አክየ፡፡ 18.ታይ ሒያውቲ ዑዉር ኪይነምከ ኢንቲት ሣራህ አካህ ፋክተም ዻልቶዪት ደዔኒህ ኤሠራናም ፋናህ አይሁድ ሢልጣን አሞይቲት አሚነካህ ዪኒን፡፡19.አማይጉል ዻልቶይቲክ "ዑዉር የከህ ዮቦከ አክታን ሲን ባዺ ታይቲያ ኪኒ?" ካዶ አይናህ የህ ያብሎ ዺዔ?" የኒህ ተን  ኤሠረን፡፡

  20.ወለድ ታህ ተህ ቲምለሰ፣ ታይ ሒያውቲ ኒባዻ ኪናምከ ዑዉር የከህ ዮቦከም ናዽገ፤ 21.ያከካህ ካዶ አይናህ የህ ያብለምከ ኢንቲት ኢዪ አካህ ኡሩሰም ማናዽገ፣ ካያ ኤሠራ፣ ኡሱክ ዕደመህ ሙሉእ ኪን ሒያውቶ ኪኒጉል ኢሲ ዳዓባል ዋንሲቶ ዺዓ፡፡22.ዻልቶዪት ታሃም የኒም አይሁድ ሢልጣን አሞይቲት ማይሲተኒህ ኪኖን፣ አይሚህ ኢየሱሱክ መሲሕ ኪኒ ያዽሔ ሒያወቲ ይኔምኮ ሙክራብኮ ያያዖና አይሁድ ሢልርጣን አሞይቲትሊህ የምሰመመዒኒህ ዪኒንጉል ኪኒ። 23.አማይጉል ወለድ ኡሱክ ዒድመህ ሙሉእ ኪን ሒያወቶ ኪኒ፣ ካያ ኤሠራ የን። 24.ታይ ምክኒያታህ ዑዉር ኪይይ ዪነ ሒያውቶ ጋባዔኒህ ደዔኒህ አቱ ሓቀ ዋንሲታይ መዔፉጎ ኢስኪቢር፣ ታይ ሒያውቲ ኃጢአተይና ኪናም ናኑ ናዺገ አክየን፡25.ዑዉር ኪይይ ዪነ ሒያውቲ ኡሱክ ኃጢአት ለቲያ ኪይይ ዪነም አኑ ማዽገ፣ አኑ አዽገም ዑዉር ኪክ ኢነምከ ካዶ ያብሊኒም ዽዔም ጥራሕ ኪኒ፣ "የህ ኤልድሄየ፡፡ 26.ኢሲን ኡሱክ አይም ኮህ አበ? ኢንቲቲኮ ኩኡሩሰም አይናህ ኢሰህ ኪኒ? አክየን፡፡ 27.ኡሱከ ለ "ኡሱኩሱመህ ሲናከ፣ አቲን ለ ታቦና ማጉርታን፣ ኢስኪ አይሚህ ጋባዕተኒህ ታቦና ጉራክ ታኒኒ? "አቲን ካተምሃሮ ታኮና ጉራክ ታኒኒ? አክየ፡፡ 

   28.ኢሲን ታህ የኒህ አካህ ዋቲመን፣ ካተምሃራይ አቱ ኪቶ፣ ናኑ ለ ሙሴ ተምሃሮ ኪኖ፤ 29.መዔፉጊ ሙሴ ዋንሲሰም ናዽገ፣ ታይ ሒያውቲ ለ አርከኮ ኪናም ማናዽገ፡፡

  30.ሒያውቲ ታህ የህ ይምሊሰ፣ ታይ ሒያውቲ አርከኮ ኪናም አዽገዋይታኒርከህ ያይጊሪመ፣ ያከካህ ዪኢንቲት ኡሩሰቲ ካያ ኪኒ፡፡31.መዔፉጊ ኃጢአት ለም ተን ሚያበም ቲምድገም ኪኒ፣ ያከካህ  መዔፉጎ ማይሲታቲያከ ካፍቃድ ያፍጽመቲ ይኔምኮ ካያ ፉጊ ያበ፡፡    32.ዑዉር የከህ ዮቦከ ሒያውቲ ኢንቲትኮ ኡረ ያናም ዓለም ይምፍጢረምኮ ኤዸዽሰህ ዮሞበህ ሚያድገ፡፡ 33.ታይ ሒይውቲ መዔፉጎኮ አከዋዶ ኢንኪም አቦ ዺዔ ማዻዺና፡፡ 34.ኢሲን ለ  አቱ ኡማናህ ኃጢአታህ ቶቦከህ፣ ኖያ ታይማሃሮ ኪቶ?"የነህ ሙክራብኮ የየዕን፡፡

                                አፍዓዶህ ያዖሪኒም

  35.ሒያውቶ ሙክራብኮ የየዒኒም ኢየሱስ ዮበ፣ ገየ ዋክተ "ሒያውቲ ባዻ ኪን ክርስቶሱል ታሚነ?" አክየ፡፡ 36.ኡሱክ ለ "ይማዳራ! ኤል አማኖክ ኡሱክ አይቲያ ኪኒ" አክየ፡፡  37.ኢየሱስ "ገና ባሶህ ቱብለ፣ ካዶለ ኩዋንሲሳቲ ካያ ኪኒ" አክየ፡፡38.ኡሱክ "ኦ'ይማዳራ! አሚነ" የህ አካህ ይስጊደ፡፡ 39.ኢየሱስ ለ አብለዋይታም ታብሎ፣ ታብለም ታዓሮ፣ አኑ ታይ ዓለሚል ኤመተህ አኒዮ አክየ፡፡ 40.ታማይ ዋክተ ኢየሱስ አፋል ቲነ ፈሪሳውያን ኢስኪ"ናኑ ዑዉራን ኪኖ?" አክየን፡፡ 

  41.ኢየሱስ ለ "ዑዉራን ተኪኒህ ታኪንዶማ ኃጢአት ሲናክ አከ ማዻዺና፡፡ ካዶ ለ አብሊክ ናነ አይክ ኃጢአተናታት ተኪኒሀ ራዓክ ታኒን" አክየ፡፡

                                      ማዕራፋ 10

                              ኢየሱስ መዔ ሎይና  ኪኒ

   1.ካታሰህ ኢየሱስ ታህ  የ፣ ሓቀህ ሐቀ  ሲናክ አይክ አኒዮ፣ ዒዶድ ኢፈይኮ አከካህ አኩላኮ ሳ ሒያውቲ ባዸዻይቶከ ወንበደ ኪኒ፡፡ 2.ኢፈይኮ ዒዶድ ሳቲ ለ ዒዶሎይና ኪኒ፡፡ 3.ካያህ ኢፈይ ዻዉዻ ዋርዲያ ኢፈይ አካህ ፋካ፣ ዒዶ ካዻው ታበ፣ አሱክ ለ ኢሲ ዒዶ ተንተን ሚጎዑህ ደዓ፣ አይምሪሒክ ኢሮህ ተ ያየዔ፡፡ 4.ኢሲ ዒዶ የየዔምኮ ላካል ነፍከ ነፊል አከያዲየ፡፡ ዒዶ ለ አንዻሕ አክ ታበጉል ኤድ ካታይታ፡፡ 5.አከቲ ዻው ለ ማታዽገጉል ካኮ  ኩዳ ኢካህ ኤድ ማካታይታ፡፡ 6.ኢየሱስ ታይ ሚሳለ አክየ፣ ኢሲን ለ ዋንሲተም ማስታውዓልኖን፡፡ 

   7.አማጉል ጋባዔህ ታህ አክየ፣ ሓቀህ ሐቀ ሲናክ አይክ አንዮ፣ አኑ ዒዶት ኢፈይ ኪዮ፤ 8.ዮኮ ባሶል ተምተም ኡምቢህ ባዸዻከ ወመበደ ኪኖን፣ ዒዶ ተን ማቢና፡፡ 9.ኢፈይ ዮያ ኪኒ፣ ዩላኮ ሳቲ ያድኅነ፣ ሳ፣ ያውዔ፣ ኤል ኢፋራርከ ገያ፡፡ 10.ባዸዻይቲ ያምተም ጋረዒቶከ ያርኃዶ ሊይህ ጥራሕ ኪኒ፣ አኑ ለ አሚተም ሕይወት ገዮናከ የመገ ጎዶሎሂን ሕይወት ያሎና ኪኒ፡፡ 

  11.መዔ ሎይኒ  ዮያ ኪኒ፣ መዔ ሎይኒ ኢሲ ሕይወት ኢሲ ዱየህ ቲላሰህ ያኄ፡፡ 12.ዒዶ ካይም አከዋይታ ሎይኒ ዓስበንታ ኪኒ ኢካህ፥ ሓቂቲያ አከዋ ሎይኒ ለ፣ ቶክላ አምቲህ ያብለጉል ዒዶ ሓባህ ኩዳ፣ ቶክላ ዒዶ ያምንዚዔህ /ይንጢቀህ/ፋሕኢሳ፡፡ 13.ሎይኒ ኩዳም ዓስበንታ የከጉልከ ዒዶህ ሚያሕስበ ጉል ኪኒ፡፡ 14.መዔ ሎይኒ ዮያ ኪኒ፣ አኑ ኢኒ ዒዶ አዽገ፣ ይዒዶ ዮያ ታዽገ፤ 15.አኑ ተና አዽገም፣ ያባ ዮያ ያድገም ባሊህከ አኑ ለ ኢና አባ አዽገሚህ ዓይነቲህ  ኪኒ፣ አኑ ኢኒ ዒዶህ ኢኒ ሮሔ ቲላሰህ አኃየ፡፡ 16.ታይ ዱየህ አዳድ አከዋይታ አኪ ዒዶ ሊዮ፣ ታና ለ ባሆ ዮህ ኤዳ፣ ኢሲን ይዻው  ያቢን፣ ኢንኪ ዱየ አከሎን፣ ሎይኒ ኢንከቶ አከለ፡፡ 

   17.ጋባዔህ ደሄህ ኪሒኒዮ ኢኒ ሕይወት ቲላሰህ አሓዎ ዲላይለቲያ ኤከጉል ያባ ዮያ ይኪሒና፡፡ 18.ኢኒ ሕይወት ኢነህ ጉረህ ቲላሰህ አኃየ ኢካህ ዮከ በያቲ ኢንከቲ ሚያነ፣ ኢኒ ሕይወት ቲላሰህ አሓዎከ ደሄየህ በዮ መብቲ ሊዮ፣ ታይ ቲእዛዝ ጋራየም ኢናባኮ ኪዮ፡፡

   19.ታይ ዋኒኮ ኡጉተጉል አይሁድ ፋናድ ጋባዔህ ባዽሲ የከ፡፡ 20.ተንኮ ማንጎማሪ "ኡሱክ ጋኔን ለ፣ ይዕቢደ፣ አይሚህ ካአብክ ታኒኒ?" የን፡፡ 21.ጋሪ "ታይ ዋኒ ጋኔን ለ ሒያውቲህ አንደንበትኮ ታውዔም ማኪ፡፡ ጋነን ቶዖረሚህ  ኢንቲት ኡሩሶ  ዺዓ?" የን፡፡

ኢየሱስ ሒያወቲ ባዻ ኪኒ

   22.ኢየሩሳለምል በተ መቅደስ ባዓል ያክብረ ዋክቲ ማደ፣ አልስት ካርማድ ኪይይ ቲነ፣ 23.ኢየሱስ በተ መቅደሲል ሰለሞን ቲላያናል ጋኃንጋኃይ ዪነ፡፡ 24.ታማይ ዋክተ አይሁድ  ካባሮሩል ይክቢቢኒህ የከሄሊኒህ አንዳ ፋናህ ጥርጣረድ ኒሱጉሳክ ታነ? "አቱ መሲሕ ኪቶም ዓዶሳይ  ኖከይ አክ የን፡፡ 

   25.ኢየሱስ ለ ታህ የህ ኤልደሄየ፣ አኑ ሲናከህ አንዮ፣ አቲን ለ ማታሚኒን፣ ኢኒ አባህ  ሚጋዓህ ሢራሓ ሢራሕ ይዳዓባል ዮያህ ያምስኪረ፡፡26.አቲን ለ ዪ ዒዶህ ዱየኮ ማኪቲንጉል ይማታሚኒን:: 27.ዪ ዒዶ ዪዻው ታበ፣ አኑ ለ ተን አዽገ፣ ኢሲ ለ ዮድ ካታይታ፡፡ 28.አኑ ኡማንጉሊ ሕይወት አካህ አሓየ፣ አማይጉል ኢንኪጉል ማታለየ፣ ይጋባኮ አንከቲ ቡኩሰህ ማበያ፡፡ 29.ተና ዮያህ ዮሖወ ያባ ኡማኒምኮ ናባ፡፡ ያባህ ጋባኮ ተና ቡኩሰህ በዮ ዺዓቲ አንከቲ ሚያነ፡፡ 30. ዮከ ያባ ኢንከቶ ኪኖ። 31.ታይ ዋክተ አይሁድ ኢየሱስ ሳባዖና ጋባዔኒህ ዻይት ናው ኢሰን፡፡ 32.ኢየሱስ ለ ያባኮ ዮህ ቶምሖወ ማንጎ መዔ ሢሮሕ ሲን ኡስቡሉወ፣ ይቦል ይሳባዕታናም አይሢራሒህ ዳዓባል ኪን?" አክየ፡፡

   33.ናኑ ኩሳባዕናም ፉጊ አሞል ዋቶ ቃል ዋንሲተጉል ኪኒ ኢካህ ኩመዔ ሢራሕህ ማኪ፣ ታማም ባሊህ አቱ ሒያውቶ ኪቶሃኒህ ኢሰ አምላክ አብተርከህ ኪኒ የነህ ኤልይምሊሲን፡፡ 34.ኢየሱስ ለ ታህ አክየ፣ ሲን ሕገህ አቲን አማልክት ኪቲን ታም ቲምጽሒፈህ ማታነ? 35.መዔፉጊህ ቃል አምስዒረ ዋቲያ ኪናም ቲምዺገም ኪኒ፣ አማይጉል ቶይ ፉጊ ቃል አካህ የመተማራህ ኡምቢህ አማልክቲ የህ ደዔ፡፡ 36.ኢስኪ አባ  ይቅደሰቲያከ ዓለሚህ ፋረቲ መዔፉጊህ ባዻ  ኪዮ ኤዽሔርከህ ፉጎክ አሞል ዋቶ ቃል ዋንሲታክ ታነ ዮካይክ ታኒኒ? 37.አኑ ያባህ ሢራሕ ሢራሔ ዋቲያ ኤከምኮ ይማማኒና፡፡ 38.ያባህ ሢራሕ ሢራሓቲያ ኤከምኮ ለ ዮያል አሚነ ዋይተኒሚህ ኡካ ይሢራሓል ኢሚና፣ ታይ ዓይነቲህ፣ አባ ዮያድ ኪናምከ አኑ አባድ ኪዮም አዽገሊቲን፡፡ 

   39.ኢሲን ጋባዔኒህ ያባዾና ጉረን፣ ኡሱከ ለ ተን ጋባኮ ሙሉሔህ  የደ። 40.ማላሚኖህ ዮርዳኖስ ታበህ ያሃኒስ ኤዸዾይታህ ኤል አይጥሚቂይ ዪነ ሲፍራል የመተ፣ ታማል ሱገ፡፡ 41.ማንጎ ሒያው ካኡላል ተመተህ ያሃኒስ ኢንኪ ታምራት ማቢና፣ ያከካህ ያሃኒስ ታይ ሒያውቲህ ዳዓባል ዋንሲተም ኡምቢህ ሓቀ ኪኒ አክ የን፡፡ 42.ታማል ማንጎ ሒያው ካያል  ተመነ፡፡

                                    ማዕራፋ 11

                                    አልአዛር ራባ

    1.ቢታንያል አልዛር አክያን ሒውያውቲ ላሑተህ ዪነ፣ ቢታኒያ ማርያምከ ሳዕላ ማርታ ኤልማራን መንደር ኪይይ ቲነ፡፡ 2.ማርያም ማዳሪ ኢባ ሲቶህ ቱስኩተቲያከ ኢሲ ዳጋራህ ቲውልውለቲያ ኪኒ፣ ላሑተ አልአዛር ተሳዓል ኪይይ ዪነ፡፡ 3.ሳዖል ለ "ማዳራክ! ኩካኃንቶሊ ላሑተህ ያነ" የኒህ ኢየሱሱድ ፋርመን፡፡ 4.ኢየሱስ ለ ታሃም ዮበ ዋክተ ታይ ዱሪ ራባ ማድሳቲያ ማኪ፣ ያከካህ መዔፉጎህ ኪብረ ያኮከ ፉጊ ባዺ  ለ ታይ ምክኒያታህ ያክባሮ ኪኒ አክየ፡፡

   5.ኢየሱስ ማርታከ ሳዕላ ማርያም ተን ሳዓል አልአዛር ለ ኪሕኒይ ዪነ፡፡ 6.ያኮይ ኢካህ አልአዛር ላሑተም ዮበ ዋክተ ኤልዪነ ቦታል ታማል ላማ ለለዕ ሱገ፡፡ 7.ታሃምኮ ላካል ኢሲ ተምሃሮክ ይሁዳ ከፍሊህ ባዾቱላል ማላሚህ ናዳዎይ"አክየ። 8.ተምሃሮ ለ "መምሂሮ! አይሁድ ሕያው ዳጎ ዋክተኮ ባሶል ኩሳባዖና ጉራይ ዪኒን፣ ይቦል ጋባዕተህ ታማህ ጋሕተህ አዲክ ታን?"አክየን፡፡ 9.ኢየሱስ ለ ታህ የህ ኤልይምሊሰ፣ ለለዕድ ያነ ሳዓት ለማምከ ታማን ማኪሆ! ለለዕ ጋሓንጋሓቲ ታይ ዓለሚህ ኢፎይታ ያብለጉል ማጎንፎይታ፡፡ 10.ያከካሀ ባር ጋሓንጋሓ ቲይ ኢፊ ሚያነጉል ጎንፎይታ፡፡ 11.ኢየሱስ ታሃም አክየምኮ ላካል ኒካኃንቶሊ ኪን አልአዛር ዑንዱጉለህ ያነ፣ አኑ ለ ዺንኮ ኡጉሦ አዴሊዮ አክየ፡፡12.ተምሃሮ ለ "ኦ'ኒማዳራ! ዑንዱጉለህ የከምኮ አካህ የሰህ ማለት ኪኒ" አክየን፡፡ 

  13.ኢየሱስ ታሃም ዋኒሰተም አልአዛር ራቢህ ዳዓባል ኪይይ ዪነ፣ ኢሲን ለ ዑንዱጉልቲ ዳዓባል ዋንሲተም የከሊን፡፡ 14.አማይጉል ኢየሱስ ዓዲህ ታህ አክየ፡፡"አልኣዛር ራበህ ኪኒ፣ 15.አቲን ታማኖና ታማል አኔ ዋየርከህ ሲን ዳዓባል ይኒያቲሳ፣ ካዶ ለ ከያ ዻጋህ ናዳዎይ፡፡"16.ታማይ ዋክተ ዲዲሞስ አክያን ቶማስ አኪ ተምሃሮክ ካሊህ ራብኖክ ናኑለ ናዳዎይ አክየ፡፡

                       ኢየሱስ ትንሣኤከ ሕይወት ኪኒ

  17.ኢየሱስ ታማርከ ማደ ዋክተ አልአዛር ይሙዑገምኮ ታህ አፋራ ለለዕ የከህ ዪነ፡፡18.ቢታኒያ ኢየሩሳለምኮ ዸዻም አዶሓ ኪሎ ሜትር ታከም ኪኒ፡፡19.ማንጎ አይሁድ ማርታከ ማርያም ሳዓሊህ ራባህ ያይጻናናዖና ተና ዻጋህ የመቲኒህ ዪኒን፡፡ 

   20.ማርታ ኢየሱስ የመተም ቶበ ዋክተ ጋራይቶ ተደየ፣ ማርያም ለ ዲኪድ ራዕተህ ቲነ፡፡ 21.ማርታ ኢየሱሱክ አቱ ታል ሱግተህ ያከዶ ይሳዓል ራበ ማዻዺና፣ 22.ያኮይ ኢካህ ካዶሊህ ዻዒምታም ኡምቢህ መዔፉጊ ኮህ ያኀየም አዽገ አክተ፡፡ 23.ኢየሱስ ለ "ኩሳዓል ራባኮ ኡጉተ ለ" አክየ፡፡ 24.ማርታ ለ "ባኪቶ ለለዒህ ኡግታቶ ዋክተ ራባኮ ኡገተለም አዽገ"አክተ፡፡ 25.ኢየሱስ ለ ኡግ'ታቶከ ሕይወት ዮያ ኪኒ፣ ዮያል ያሚነቲ ራበሚህ ኡካ ሕይወቲህ ማራ፣ 26.ሕይወቲህ ማራቲያከ ዮያል ያሚነቲ ኡምቢህ ማራባ፣ ታሃም ታሚነ አክየ፡፡ 27."ዮ ይማዳራ! አቱ ዓለም ዻጋህ የመተ መሲሕ ፉጊ ባዻ  ኪቶም አሚነ" አክተ፡፡

   28.ማርታ ታሃም ዋንሲተሚህ ላካል ተደህ ማርያምክ መምሂር የመተ፣ ኮያለ ደዓይ ያነ ተህ ሱዉሩ ደዕተ፡፡ 29.ማርያም ታሃም ቶበ ዋክተ አፍተህ ተውዔህ ካያ ዻጋህ ተደ፡፡ 30.ኢየሱስ፣ ማርታ ካያ ኤልጋራይተ ቦታል ይነካህ መንደሩላል ገና ሳየካህ ዪነ፡፡ 31.ተያ ያይጻናናዖና ዓሪ አዳድ ተሊህ ቲነ አይሁዳውያን፣ ማርያም አፍተህ አውዒህ ዩብሊንጉል፣ አልአዛር ማዓጊህ ቦታህ ተደህ ወዕቶ የከሊኒህ ኤድ ካታየን፡፡ 32.ማርያም ኢየሱስ ኤልዪነል ተመተህ ቱብለ ዋክተ ካኢቢህ ዳባል ራደህ "ኦ'ይማዳራ! አቱ ታል ቲነህ ያከዶ ይሳዓል ራበ ማዻዺና አክተ፡፡ 33.ኢየሱስ ኢሲ ወዓህከ ተሊህ ተመተ አይሁድ ወዓህ ዩብለጉል ኢሲ መንፈስኮ ይኅዚነህ ይምህዊከ፤ 34."አል ኪኒ ቶዖጊኒም!" አክየ። 

  35. ኢሲን ለ "ማዳራ! አሞ ኡቡል" አክየን፡፡ 35.ኢየሱስ ለ ዺሞ ሓዸ፡፡ 36.አማይጉል አይሁዳውያን አይዻ ካኪሒን ዪነም ኡቡላ የን፡፡ 37.ተንኮ ጋሪጋሪ ለ "ዑዉር ኢንቲት ኢፎሰቲ ታይ ሒያውቶ ራባምኮ አቦ ዽዓይ ማና?" የን፡፡

                       ኢየሱስ አልአዛር ራባኮ አጉሠ

  38.ኢየሱስ አኅዝንክ ማዐጉላል የደ፣ ዱኮ ዻህ አልፍምተህ ቲምሂቲመህ ቲነ፡፡ 39.ኢየሱስ ዻ  ናው ኢሳ አክየ፡፡ ራቦንቲ ሳዕላ ማርታ "ማዳራ! ራበምኮ ታህ አፋራ ለለዕ የከህ ኪኒ፣ ካዶ ኡረዎ ኪኒ" አክተ፡፡ 

  40.ኢየሱስ ለ "ተመነምኮ መዔፉጊህ ኪብረ አብልለቶ ኮከህ ማናዮህ?" አክየ፡፡ 41.ሒያው ዻ ናው አክ ኢሰ፣ ታሃምኮ ላካል ኢየሱስ አጋናል የይደለለዔህ "አባ! ይቶበርከህ ኩአይምስጊነ፣ 42.ኡማንጉል ይታበም አዽገ፣ ያኮይ ኢካህ ታህ ኮካይክ አንዮም ታል ሶልተህ ታነ ሒያው አቱ ይፋርተም ያማኖና ኤህ ኪዮ" አክየ፡፡ 43.ኢየሱስ ታሃም ወንሲተምኮ ላካል "አልአዛሮ! አሞ ኤወዕ!" የህ ናባ አንዻሓህ ዋዕ የ፡፡ 44.ራበ አልአዛር ጋቦብከ ኢባቢ ማክናዳህ አካህ ይምክኒደካህ ማዓጋኮ የውዔ፣ ነፍ ሓላጋህ ይምጥምጢመህ ዪነ፣ ኢየሱስ ለ "ኡንሑዋይኪ  ኃባ፣ ያዳዎይ" አክየ፡፡

       ክርስቶስ አሞል ተከ አደማ /ሴራ/

         (ማቴ.26፣1-5፤ማር.14፣1-2፤ሉቃ.22፣1-2፡፡)

  45.ማርያም ታይጻናናዖ ተመተ አይሁድኮ ማንጎም፣ አበም ዩብሊኒህ ኢየሱሱል የመኒን፡፡ 46.ጋሪጋሪ ለ ፈሪሳውያናድ የደዪኒህ ኢየሱስ አበም አክ የዽሒን፡፡ 47.አማይጉል ካህናት አሞይቲቲከ ፈሪሳውያን ባይቶት አባላት የስከሄሊኒህ አባ ጉዳዪህ ዳዓባል አይም አብናጉል ያሰ? 48.ታህ ነህ ኃብነምኮ ሒያው ኡምቢህ ካያል አምነሎን፣ ሮማውያን ለ ተመተህ በተ መቅደስከ ኒሕዝበ ሙሉኡድ አድምሲሰ  ሎን፡፡ 

  49.ያኮይ ኢካህ ተንኮ ኢንከቲ ታማይ ኢጊዳ ካህናት አሞይታ ኪይይ ዪነ ቀያፋ ታህ አክየ፣ አቲን ኢንኪም ማታዽጊን፣ 50.ሕዝቢ ኡምቢህ ያለየምኮ ኢንኪ ሒያውቲ ሕዝቢ ዋዶህ ራባም ሲናህ ታይሰም ኪናም ኢንኪጉል ማታስቲውዒሊኒ? 51.ኡሱክ ታሃም ዋንሲተም ኢሳዳኮ ኪይይ ማና፣ ያኮይ ኢካህ ታማይ ኢጊዳ ኡሱክ ሊቀ ካህናት ኪይይ ዪነጉል ኢየሱስ ሕዝቢ ዳዓባል ራቦ አካህ ኤዳም አይቡሉዊህ ታይ ቲንቢት ዋንሲተ፡፡ 52.ራባም ሕዝቢ ኢዻህ ጥራሕ አከካህ ትንቢቲነ መዔፉጊህ ዻይሎ ኢንኪል ያስካሃሎ የህ ኪኒ፡፡ 53.አማይጉል ታማይ ለለዕኮ ኤዸዽሰኒህ ኢየሱስ ያግዳፎና የመከሪን፡፡ 54.ታማምኮ ላካል ኢየሱስ አይሁድ ፋናድ ኢፋህ ማጋሓንጋሒና፣ ያከካህ ታማርከኮ የውዔህ ባራኪ ባሮል ታነ ኤፍሬም አክያን ካታማል የደ፣ ታመል ኢሲ ተምሃሮሊህ ሱገ፡፡ 

55.አይሁድ ፋሲጊ ባዓል ካብየህ ዪነ፣ ማንጎ ማሪ ለ ፋስጊ ባዓል ማዳሚህ በሶል  ሲነ ያይጻራዎና ሲኒሲኒ ዞባህ ኢየሩሳለም ኡላል የደዪን፡፡ 56.ኢሲን በተ መቅደሲል ሶለኒህ ኢየሱስ ያሚተም ኢላላይ ይኒኒጉል አይም ታኅሲቢኒ? ባዓላል ያምተም ማታካሊኒ? አይክ ሲነሲነህ ቲታ ኤሠራይ ዪኒን፡፡ 57.ጋበዔኒህ ለ ካህናት አሞይቲትከ ፈሪሳዊያን ኢየሱስ ያባዾና ዺዖና ጉረኒህ ኤልያነ ቦታ ያዺገ ሒያውቲ ዪኔምኮ አክዮዋ ሒያው ኡማንቲያ ይዚዚኒህ    ዪኒኒ ፡፡                              

 ማዕራፋ12

ኢየሱስ ስቶህ ቱስኩተ  ኑማ

(ማቴ.26፣6-13፤ማር.14፣3-9፤)

    1.አይሁድ ፋስጊ ባዓል ያስክባሮና ሊሓ ለለዕ አክራዓህ፣ ኢየሱስ ቢታኒያ የደየ፣ ቢታንያል ኢየሱስ ራባኮ ኡገሠ አልአዛር ኤልማራይ ዪነ መንደር ኪይይ ቲነ፡፡ 2.ታማል ድራር አካህ ዮይሶኖዶዊን፣ ማርታ አስግልጊሊክ ቲነ፣ አልአዛር ለ ኢየሱስሊህ ማይዲል ትንቂሪበህ ቲነምኮ ኢንከቶ ኪይይ ዪነ፡፡ 3.ታማይ ዋከተ ማርያም ሊሞ ጋደህ አክ ኪቢር ጽሪይ ናርዶስኮ ሢራሕመ ኢንኪ ቢልቃጥ ሲቶ በይተህ ኢየሱስ ኢባቢ ቱስኩተ፣ ኢሲ ዳጋራህ ቲውልውለ፣ ዓሪ ሲቶት ኡረህ የመገ፡፡ 4.ካተምሃሮኮ ኢንከቲ፣ ኢየሱስ ቲላሰህ ዮስሖወ አስቆረታዊ ይሁዳ:: 5."ታይ ሲታ አዶሓ ቦል ቁርሲያህ ቲምቢኄህ ማል ዲካታታህ አይሚህ አምሓወ ዋየም?"የ፡፡ 6.ኡሱክ ታሃም ዋነሲተም ድካታታህ ይኅዝነህ አከካህ ባዸዻይቶ ኪይይ ዪነጉል ኪኒ፣ ማል ቀረጢት ያብዸቲ ካያ ኪይይ ይነጉል ማል በያናም የገለህ ዪነ፡፡ 7.ኢየሱስ ለ ታህ አክየ፣ "አሙዑገ ለለዒህ አብተ አምሳናዳው ኪንጉል ሓባ፡፡ 8.ድካታት ኡማንጉል ሲንሊህ ያኒን፡፡ አኑ ለ ኡማንጉል ሲንሊህ ማኒዮ፡፡"

   9.ታማይ ዋክተ ማንጎ አይሁድ ሒያው ኢየሱስ ቢታኒያል ያነም የዸጊኒህ የመቲን፣ የመቲኒም ኢየሱሱህ የኒ ዲቦህ አከካህ ኢየሱስ ራባኮ ኡጉሠ አልአዛር ለ ያብሎና ኪይይ ዪነ፡፡ 10.ካህናት አሞይቲት አልአዛር ያግዳፎና የመከሪን፡፡ 11.አይሚህ ማንጎ አይሁድ፣ ሲኒ መራሕቲ ሓበኒህ ኢየሱሱል አሚኒይ ይኒኒጉል  ኪኒ፡፡

ኢየሱስ ኪብረህ ኢየሩሳለም ሳየ

 (ማቴ.21፥1-11፤ማር.11፥1-11፤ሉቃ.19፥28-40፡፡)

  12.ኢብዻሒነ ፋስጊ ባዓላህ ተመተ ማንጎ ሒያው ኢየሱስ ኢየሩሳለም ኡላል ያምቶ ኪናም ዮቢን፡፡ 13.አማይጉል ሆሳዕና /ዻዻዳይ/ ሓኮክ ይብዽኒህ ካገራዎና የመቲን፣ "ሆሳዕና! ማዳሪ ሚጋዓህ ያሚተ እስራኤል ኑጉሥ የምበረከ ቲያ ኪኒ!" አይክ ዓው ዪኒን፡፡ 14.ኢየሱስ ሔራ ዑሉይታክ ገየህ ተ አሞክ ዲፈየ፣ ታሃም ተከም፣ 15."አቱ ፂዮን ካታማ ኢየሩሳለሞ ማማይሲቲን ፣  

   ሀይከ ኩኑጉሥ ሔራ ዑሉታህ አሞክ ዲፈህ አምተ ለ" የህ ይምጽሒፈ ቲንቢያ  ያምፋጻሞ  ኪኒ፡፡"

   16.ተምሃሮህ ታይ ጉዳይ ኤዸዾይታል ኤድ ሳየካህ ዪነ፣ ለ ኢየሱስ ኪብረህ ዓራናል የውዔ ዋክተ ታይ ጉዳይ ካዳዓባል ትምጽሒፈምከ ካያህ ተከም ኪናም ይዝኪሪን፡፡

   17.ኢየሱስ አልአዛር ማዓጋኮ ደዔህ ራባኮ ኡገሠ ዋክተ ካሊህ ቲነም ኡምቢህ ኢየሱስ ዳዓባል አምስኪሪይ ዪኒን፡፡ 18.ማንጎ ሒያው ካጋራዎና የውዒኒም ታይ ታአምር አበም ዮቢኒህ ዪኒኒጉል ኪኒ፡፡ 19.ታይ ዋክተ ፈሪሳውያን"ሀይከ ሕዝቢ ሙሉኡድ ይክቲለ! ናኑ ኢንኪም አብኖ ማዽዒናም አብሊክ ታኒን?"ኢሲመን፡፡ 20.ባዓል ዋክተ ታስጋዶ ኢየሩሳለም ተደየ ሒያዊህ ፋናድ ኢንኪ ኢንኪ ግሪክቲ ኤድገዪማይ ዪኒን፡፡ 21.ኢሲን ለ ገሊላ በተ ሳይዳህ ሒያውቶ ኪን ፊልጶሱድ ካብ የኒህ "ኒማዳራ!" ኢየሱስ ናብሎ ጉራክ ናነ" አክየን፡፡ 

  22.ፊሊጶስ የደህ እንደሪያሳክ የዽሔ፣ እንድሪያስከ ፊሊጶስ ኢንኮህ የደዪኒህ ኢየሱሱክ የን፡፡ 23.ኢየሱስ ለ ታህ የህ ኤልይምሊሰ፣ ሀይከ ሒያውቲ ባዺ ኤል ያክቢረ ሳዓት ማደ፡፡ 24.ሓቀህ ሲናክ አይክ አኒዮ፣ ሲራይ ፍረይቲ ባዾል ራደህ አብስቢሰ ዋየምኮ ዲቦህ ራዓ፣ ራበምኮ ለል ማንጎም ያፍሬ፡፡ 25.ኢሲ ሕይወት ኪኅንቲ ያይለየ፣ ታይ ዓለሚል ኢሲ ሕይወት ኒዒብቲ ለ ኡማንጉሊ ሕይወት ካ ኢላላ፡፡26.ዮያ ያካታሎ ጉራቲ ይያካታሎይ፣ አኑ ኤድ አነድ ይአገልጋሊ ታማድ ያከ፣ ይያስጊልጊለ ቲያ ለ  አባ ያስክቢረ፡፡"

ኢየሱስ ካመደለ መከራከ ራባ ዋንሲተ

   27.ጋባዔህ ኢየሱስ ታህ የ፣ "ሀይከ ይናብሲ ይምጺኒቀ፣ 'አባ! ታይ ሳዓትኮ ይዲኅን ኦዋ?' ታሃም አምኮ ለ አኑ ኤመተም ታይ መከራ ሳዓታህ ኪዮ፡፡ 28.አባ! ኢሲ ሚጋዕ ኢስኪቢር፡፡ ታማምኮ ላካል ኢኒ ሚጋዕ አስክቢረ ሊዮ፣" ጋባዔህ አስክቢረ ያ አንዻሕ ዓራንኮ የመተ፡፡ 29.ታማል ሶልተህ ቲነ ሒያው ታሃም የቦንጉል አንጉድ ኪኒ! የን፣ ጋሪ መዔም ኪኒ ዋንሲተም!" የን፡፡ 

  30.ኢየሱስ ለ ታህ የህ ይምሊሰ፣ ታይ አንዻሕ የመተም ሲናህ ኪኒ ኢካህ ዮያህ ማኪ፡፡ 31.ታይ ዓለም ያምፍርደ ዋክቲ ካዶ ኪኒ፣ ታይ ዓለሚህ ገዛኢ ሰጣን ኢሮህ ራዳም ካዶ ኪኒ፡፡ 32.አኑ አጋናል ናወህ አምስቂለ ዋክተ ሕያው ኡምቢህ ኢኑላል ሂርገ ሊዮ፡፡ 33.ኢየሱስ ታህ የህ ዋንሲተም አይናህ ኢጊድ ራባህ  ራባም አይቡሉዊህ  ኪይይ ዪነ፡፡

  34.ሒያው ለ ኒሕገህ ቲምጺሒፈህ ገይናም  'መሲሕ ኡማንጉሉህ ማራ' ታም ኪኒ፣ ይቦል አቱ ሒያውቲ ባዺ አጋናል ናዋ የህ ታካሪሞ ኤልታነ አይናህ ተህ ታ? ታይ ሒያውቲ ባዺ አቲያ ኪኒ?" አክየን፡፡

  35.ኢየሱስ ታህ አክየ፣ ካዶ ዳጎ ዋክተ ሲንሊህ ኢፊ ያነ፣ ዲተ ሲን ማዳካህ ኢፎ ሊቲንጉል ጋሓንጋሓ፣ ዲተድ ጋሓንሓቲ አውላል ያዲየም ሚያዽገ፡፡ 36.ኢፊ ዻይሎ ታኮናክ ኢፊ ያነሃኒህ ኢፎታል ኢሚና፡፡ ኢየሱስ ታሃም የሚህ ላካል የደህ አክ  ይምስውረ ።

                           አይሁድ ኢምነት ዋይቲ

   37.ኢየሱስ ኢንኪጉል ኡካ ታሂዾለ ታምራት ተን ነፊል አበሚህ አይሁድ  ካያል ማማኒኖን፡፡ 38.ታሃም ለ ተከም ነቢይ ኢሳይያስ፣

               "ኦ ይማዳራ! ኒማሰኪር አይቲ የመነ?

                 መዔፉጊህ ሑሉፍ ኢያይቶህ ይምቡሉወ?" 

 የህ ዋንሲተ ቃል ያመፋጻሞ የህ ኪኒ፡፡ 39.አማይጉል ያማኖና ማዽዒኖን፣ አይሚህ ነቢይ ኢሳይያስ ታህ የህ ለል ይጽሒፈጉል ኪኒ፡፡

         40."ሲኒ ኢንቲህ ዩብሊኒህከ 

               ሲኒ ፍዓዶህ ይሰትውዕሊኒህ 

              ጋሓናምኮከ  ኡራናምኮ፣ 

              መዔፉጊ ተን ኢንቲት ዮስዖረ፣

              አፍዓዶ ለ  አክ ቲዲንዚዘ /ይድንደነ?/፡፡"

     41.ኢሳይያስ ታሃም የም መሲሕ ኪብረ ዩበለህ ኪኒ፣ አማይጉል ታሃም ኢየሱስ ዳዓባል ዋንሲተ፡፡ 

   42.ታኮይ ኢካህ አይሁድ አሞይቲትኮ ማንጎማሪ ኡካ ኢየሱሱል የመኒን፣ ያከካህ ሙክራብኮ ተን ያየዒኒምኮ ፈሪሳውያን ማይሲህ ዓዶሰኒህ አካህ ማማስካሪኖን፡፡ 43.ታሃም አበኒም ለ አበኒም ፉጎኮ ገይማ ኪብረኮ አጋናል ሒያወኮ ገያን ኪብረ ይክሕኒኒጉል ኪኒ፡፡ 

   44.ኢየሱሰ አንዻሕ ናው ኢሰህ ታህ አክየ፣ "ዮያል ያሚነቲ ዮያል ጥራሕ አከካህ ይፋረቲያል ለ ያሚነ፡፡ 45.ዮያ ያብለቲ ይፋረቲያ ለ ያብለ፣ 46.ዮያል ያሚነቲ ኡምቢህ ዲተድ ማራምኮ፣ አኑ ኢፎ ኤከህ ዓለሚህ ኤመተህ አንዮ፡፡ 47.ይቃል ዮበህ ሢራሓድ አሲሰ ዋቲያ ያፍረደቲ ዮያ ማኪ፣ አይሚህ አኑ ኤመተም ዓለም አይዳኃኖ ኪኒ ኢካህ ዓለም  አሞል አፍራዶ ማኪ። 48.ዮያ ጉረዋቲያከ ይቃል ጋራየ ዋየ ሕያውቶ ያፍሪደቲ ያነ፣ አኑ ዋንሲተ ቃላህ ባክቶ ለለዕ ኤል አምፍረደለ፡፡ 49.አይሚህ አኑ ኢኒ ሢልጣናህ  ማዋንሲቲኒዮ፣ አኑ አዽሔምከ ዋንሲታማህ ቲኢዛዝ ዮህ ዮሖወቲ፣ ይፋረ አባ  ኪኒ፡፡ 50.ካቲኢዛዝ ለ ኡማንጉሊት ሕይወት ኪናም አዽገ፡፡ አማይጉል አኑ ዋንሲታም ያባ ዮክ የም  ኪኒ፡፡"

                              ማዕራፋ 13

               ኢየሱስ ኢሲ ተምሃሪህ ኢባ ዓካልሰ

  1.ሀይከና ዋክቲ አይሁድ ፋስጊህ ባዓልኮ ባሶድ ኪይይ ዪነ፣ ኢየሱስ ታይ ዓለም ሓበህ አባ ዻጋህ ያዴ ሳዓት ማደም የዸገ፡፡ ታይ ባዾል ታነ ካወገን ኪናም ኡማንጉል ተን ይክኅነህ ዪነ፣ አይከ ባክቶ ፋናህ ተን ይክኂነ፡፡ 

   2.ኢየሱስከ ተምሃሮ ዲራር በታይ ዪኒን፣ ስምዖን ባዺ አስቆሮታዊ ይሁዳ ኢየሱስ ቲላሰህ ያስሓዎ ዲያብሎስ አፍዓዶድ ኡማ ሓሳብ አክ ሳይሰ፡፡ 3.አባ ሢልጣን ኡምቢህ አካህ ዮሖወጉልከ ፉጎኮ የውዔህ የመተም፣ መዔፉጊህ ኡላል ለ ያዲያም ኢየሱስ አዽጊይ ዪነ፡፡ 4.አማይጉል ማይዲኮ ኦጉተህ ሳራ ዲፈሰ፣ ሱጋማኖ ናው ኢሰህ ዋለል ይኪቲየ፡፡ 5.ታሃምኮ ላካል ኤድ ዓካላን ሳሐናድ ላየ ሓዸህ ኢሲ ተምሃሪህ ኢባቢ ዓካልሳናም ኤዸዺሰ፣ ይክቴ ሱጋማኖህ አበህ ተን ኢባቢ ይውልውለ፡፡ 6.ኢየሱስ ስምዖን ጰጥሮሱል የመተ ዋክተ፣ ስምዖን ጰጥሮስ "ይማደራ! አቱ ይባ ዓካሊሳ?" አክየ፡፡

  7.ኢየሱስ ለ "ኡኑ አባም አቱ ካዶ ማታዽገ፥ ላካል ለ አዽገልቶ" አክየ፡፡ 8.ጰጥሮስ አቱ ይባ ሡሩህ ማዓካልሳ አክየ፡፡ ኢየሱስ "አኑ ኩኢባ ዓካልሰ ዋየምኮ ዮሊህ ኢንኪኖ ማታለ" አክየ፡፡ 

  9.ስምዖን ጰጥሮስ ለ "ይማዳራ! ታሃም የከምኮ ይባ ዲቦህ አከካህ፣ ይዸግኃለ ዮህ ዓካሊስ!"አክየ፡፡10.ኢየሱስ ለ ኢሲ አካል ዓካለቲ ኡማንርከኮ ፂርይቲያ ያከም ኢዳህ፣ ኢባ ዓካላናምኮ በሒህ አኪም ማጉርሱሳ፣ አቲን  ፂሪያም ኪቲን፣ ያከካህ ኡምቢክ ፂሪያም ማክቲን" አክየ፡፡ 11.ኢየሱስ ኡምቢክ ፂሪያም ማክቲን አክየም ቲላሰህ ያስሓየቲ አቲያ ኪናም አዽጊይ ይነጉል ኪኒ፡፡ 

   12.ኢባቢ ዓካልሰምኮ ላካል ኢሲ ሣራ ሀይሲተህ ጋኄህ ቦታል ዲፈ፣ ታህ አክየ፣ "አይም ሲናህ አበም ቲስትውዒሊኒ?" 13.አቲን መምሂርከ ማዳራ ዮካይክ ታኒኒ፣ አኑ መምሂርከ ማደራ ኤከጉል ተን ኢርከ ቲክኪል ኪኒ፡፡14.ታጉል አኑ ሲን ማደራከ መምሂር ኪህ ሲን አባቢ ዓካልሰምኮ፣ አቲን ለ ሲነሲነህ ቲቲህ አባቢ ዓካልሶና ኤዳ፡፡ 15.አኑ ሲናህ አበም ባሊህ፣ አቲን ለ አብቶና ሚሳለ ኦሖወህ አንዮ። 16.ሓቀህ ሐቀ ሲናክ አይክ አንዮ፣ ጊለዋይቲ ማደራኮ ሚያሰ፣ ፋሮንቲ ፋረቲያኮ ሚያይሰ፡፡ 17.ታይ ጉዳይ ተዸጊኒህ ሢራሐድ አሲሰኒምኮ፣ ሙስጉናት ኪቲን፡፡ 18.ታሃም ዋንሲታክ አነም ኡማንቲህ ዳዓባል ማኪዮ፣ አኑ ዶረም አዽገ፣ ያከካህ ይኢንገራ በተቲ ናዓቦህ ያሞል ኡጉተ፣ ያ ማጽሐፍ ቃል ያመፋጻሞ ኤል ታነ፡፡ 19.ታሃም ታከምኮ ባሶል ካዶ ኦኮመህ ሲናካም፣ ቲምፍጺመምኮ ላካል አኑ አይምቶ ኪዮም ታዻጎና ኤህ ኪዮ፡፡ 20.ሓቀህ ሐቀ ሲናክ አይክ አንዮ፣ አኑ ፋረቲያ ጋራቲይ ዮያ ጋራ፣ ዮያ ለ ጋራየዋየቲ ይፋረቲያለ ማጋራ፡፡"

  ኢየሱስ ቲላሰህ ያኃየቲ ኢያይቶ ኪናም ዮኮመህ ዋንሲተ (ማቴ.26፥20-25፤ማር.14፥17-21፤ሉቃ.22፥21-23፤)

    21.ኢየሱስ ታህ የምኮ ላከል ኢሲ መንፈሲህ ይምጽኒቀህ ሓቀህ ሐቀ ሲናክ አይክ አኒዮ፣ ሲንኮ ኢንከቲ ቲላሰህ ይያስሓዎ ኪኒ የህ ዓዶሰህ  ዋንሲተ፡፡

  22.ተምሃሮ ታሃም ኢይ ዳዓባል ዋንሲተም አዽገዋየኒርከህ፣ ሲነሲነህ ቲታ የይደለለዒን፡፡ 23.ኢየሱስ ኪሒኒይ ቲነ ተምሃሮኮ ኢንከቲ ኢየሱስ ማሳንጋለል ደፈህ ዪነ፡፡ 24.ስምዖን ጰጥሮስ ካያ ይጥቅሰህ ኢይ ዳዓባል ዋንሲተም ኢስኪ ኤሠረ አክየ፡፡ 25.አማይጉል ኡሱክ ኢየሱሱክ አይቲድ  ካበ የህ " ማዳራ! አቲያ ኪኒ?" የህ ኤሠረ፡፡ 

   26.ኢየሱስ ለ ኡሱክ ታይ ኢንገራ ጻብሔድ ኢጽብሔህ አስኩሉሰ ቲያ ኪኒ አክየ፡፡ ታሃም የህ ኢንገራ ጻብሔድ ይጽብሔህ አስቆሮታዊ ስምዖን ባዻ ኪን ይሁዳ ይስኩሉሰ፡፡ 27.ይሁዳ ማንዻዖ ጋራየምኮ ላካል አማይጉልካህ ሰጣን አድሳየ፣ ኢየሱስ ለ ይሁዳክ አብቶ ቲሕሲበም ጋባላዓይ አብ አክየ፡፡ 28.ኢየሱስ አይሚህ ታሃም የም ማይድል ዲፋይተምኮ ኢንከቶህ ይምርድኤህ ማና፡፡29.ይሁዳ ማል ቀረጢት አቢዽይ ዪነጉል ተምሃሮኮ ጋሪጋሪ ኢየሱስ ባዓላህ ኒጉርሱሳም ዻም ወይ ለ ዲካታታህ ምፅዋት ኡሑይ አክየም የከሊኒህ ዪኒን፡፡ 30.ይሁዳ ማንዻዖ  ጋራየካህ አማይጉልካ የውዔህ የደ፣ ዋክቲ ባር ኪይይ ዪነ፡፡

ዑሱብ ቲኢዛዝ

   31ይሁዳ የውዔህ የደምኮ ላካል ኢየሱስ ታህ የ፣ "ካዶ ሒያውቲ ባዺ ይክቢረ፣ ካ ምክንያታህ ለ መዔፉጊ ይክቢረ፡፡ 32.መዔፉጊ ለ ካምክኒያታህ ይክቢረምኮ፣ መዔፉጊ ካያለ ያስኪቢረ፣ ዓያየካህ ካያስኪቢረ። 33.ኢሮ! ሲንሊህ ማንጎ ዋክተ ሱገ ማልዮ፣ አቲን ለ ዪዋጌሊቲን አይሁድ አሞባዒሊክ አኑ ኤድ አዴርከድ አተን ታማቶና ማዽዒታን አክ ኤዽሔም ባሊህ፣ ካዶሊህ ለ ሲናክ ታህ አይክ አነ፡፡ 34.ሲነሲነህ ታምካኃኖና ዑሱብ ቲኢዛዝ ሲናህ አሓይክ አኒዮ፣ አኑ ሲን ኢኪኅነምባሊህ፣ አቲን ለ ሲነሲነህ ቲታ ኢክሒና፡፡ 35.ሲነሲነህ ተምከሔኒኒምኮ ይተምሃሮ ኪቲኒም ሒያው ኡምቢህ አዽገለ፡፡

ጰጥሮስ ካያክሕደለም ኢየሱስ ዮኮመህ ዋንሲተ

(ማቴ.26፣ 31-35፡፡ ማር.14፣ 27-31፡፡ ሉቃ.22፣31-34፡፡)

  36.ታሃሚህ ላካል ስምዖን ጰጥሮስ ኢየሱሱክ "ይማዳራ! አርከ ኪቶ ታዴም?"የህ ካኤሠረ፡፡ ኢየሱስ ለ "አኑ ኤልአዲየርከ ካዶ "ዮድካታይቶ፣" ማዽዕታ፣ ሣራህ ለ ዮድካታየ ሊቶ" አክየ፡፡            37.ጰጥሮስ ለ ኦ'ይማደራ! አይሚህ ካዶ ኮድ ካታዎ  ማዽዓም? አኑ ኢኒ ሕይወት ኡካ ኮያህ ቲላሰህ አኃየልዮ አክየ፡፡ 38.ኢየሱስ ለ "አቱ ኢሲ ሕይወት ይዳዓባል ቲላሰህ አኃየ ሊቶ?"ሓቀህ ሐቀ  ኮካይክ አነ ካፋ ዶርሆይቲ ወዳሚህ ባሶል አዶሓጉል ይአክ ሕደሊቶ?" የህ ኤልደሄየ፡፡

ማዕራፋ 14

አባ ዻጋህ  በያ አራሕ ኢየሱስ ኪን

  1.ካታየህ ኢየሱስ ታህ የ፣ አፍዓዶኮ ማምሃዋኪና መዔፉጎል ኢሚና፣ ዮያል ለ ኢሚና፡፡ 2.ያአባህ ዲክድ ማንጎ ኢድማራኒረከ /መኖሪያ ታነ፣ ታማም አከዋይታዶ ለ ኤድማርታን ሲፍራ ሲናህ አይሳናዳዎ አዲየ ሊዮ ሲናክ ኢየ ማዻዺኒዮ፡፡ 3.ኤደህ ቦታ ሲናህ ኦይሶኖዶወምኮ ላካል፣ አኑ ኤድ አነርከት ታኮና ኤመተህ ሲን በሊዮ፡፡4.አኑ ኤልአዲየሊዮ አራሕ ታዺጊን፣ 5.ቶማስ "ኦይማዳራ! አውላል ታዲየም ማናዽገ፣ ታጉል አራሕ አይናህ ነህ ናዻጎ ዺድዒና?" አክየ፡፡

   6.ኢየሱስ ለ ታህ የህ ኤልደሄየ፣ አራሕከ ሓቂ ሕይወት ዮያ  ኪኒ፣ ያራሓህ የከህ ማዺገይ ኢንከቲ ያባ ዻጋህ ያምተቲ ሚያነ፡፡ 7.ዮያ ተዸጊኒህ ታኪንዶ፣ ያባ ለ አዽገ ዻዸን፣ ካምቦኮ ሣራህ ለ አዽገሊቲን፣ ቱብሊኒህ  ለ ታኒ፡

  8.ፊሊጶስ ለ "ማዳራ! ና'ባ ኒኢቡሉይካህ ኒዺዓ" አክየ፡፡ 9.ኢየሱስ ታህ የህ ኤል ይምሊሰ፣ "ፊሊጶሶ! ታህዶለ ዋክተ ሲንሊህ ሱገህ ይማታዽገ? ዮያ ዩብለቲ አባ ዩብለ፣ ታጉል አቱ አባ ይኡይበሉይ ኤናህ ተህ ታ?" 10.አኑ አባድ አነምባሊህ አባ ለ ዮያድ ያነም ማታሚነ፣ ሲናህ ዋንሲታ ቃል ኢኒ ዸግኃህ ሢልጣናህ ማኪዮ፣ ያኮይ ኢካህ ሢራሕ ኡምቢህ ሢራሓም ዮያድ ያነ ያባህ ኪዮ፡፡ 11.አኑ አባድ አነምባሊህ፣ አባ ዮያድ ያነም ኢዽጋ፣ አማም አከዋይተምኮ ይሢራሒህ ምክንያታህ ይሚና፡፡ 12.ሓቀ ሲናክ አይክ አኒዮ፣ ዮያል ያሚነቲ አኑ ሢራሓ ሢራሕ ሢራሓ፣ ኤረ ታማምኮ ታይሰም ሢራሓ፣ አይሚህ አኑ ለ ያባ ዻጋህ አድየ ሊዮ፡፡ 13.አባ ባዺ ምክንያታህ ያክባሮ ይሚጋዓህ ዻዒምታናም ኡምቢህ ሲናህ አበሊዮ፡፡ 14.አኪናን ጉዳይ ይሚጋዓህ ዻዒምተኒምኮ አኑ አበሊዮ፡፡

                ኢየሱስ መንፈስ ቁዱስ ዳዓባል ዮኆወ ታስፋ

   15.ይክሕንቲኒህ ተኪኒምኮ ይቲኢዛዝ ዻዉዻሊቲን፣ 16.አኑ ኢና አባ ዻዒመሊዮ፣ ኡሱክ ኡማንጉሉህ ሲንሊህ ማራ አኪ ያይጸነነዔቲያ ሲናህ አሓየ ለ፡፡ 17.ታይ ያይጻነነዔቲ፣ ዩብለምከ አዽገዋማህ ዓለም ጋራዎ ዺዔዋ ሓቂ መንፈስ ኪኒ፣ አቲን ለ ታዽጊን፣ አይሚህ ኡሱክ ሲንሊህ ማራጉልከ ሲን አዳድ ያከጉል  ኪኒ፡፡

   18.ኢናከ አባ ሂን ኢሮ /ሔዎ/ አበህ ዲቦህ ሲንማሓባ፣ ጋኄህ ሲኑላል አምተሊዮ፡፡ 19.ዳጎ ዋክተኮ ላካል ዓለም ይምያብለ፣ አቲን ለ ያብለ ሊቲን፣ አኑ ማራቲያ ኪዮጉል አቲን ለ ሕይወቲህ ማረ ሊቲን፡፡ 20.አኑ አባድ አነም ባሊህ፣ አቲን ለ ዮያድ ታንኒም ባሊህ፣ አኑ ለ ሲናድ አነም ባሊህ፣ ታማይ ለለዕ አዽገሊቲን፡፡ 21.ይቲኢዛዝ ጋራቲያከ ሢራሓድ አሲሳቲ ይክሒና፣ ዮያ ኪሒንቲያ ያባ ኪሒና፣ አኑ ለ ካ ኪኅኒዮ፣ ኢናሞ ካ አይቡሉወ ሊዮ፡፡ 22.አስቆሮታዊ አከካህ አኪ ይሁዳ "ማዳራ! ኢሳሞ ዓለሚህ አከካህ ኖያህ ታግሊፀም አይናህ  ተህ ኪኒ?" 

   23.ኢየሱስ ለ ታህ የህ ኤል ኤድሄየ፣ ይክኅንቲ ይቃል ዻዉዻ፣ ያባ ለ ካ'ኪኂና፣ ናኑ ካኡላል ነመተህ ካሊህ ኢንኮህ ማረሊኖ። 24.ያክ ሒነዋቲ ይቃል ማዻዉዻ፣ ታይ ታቢን ቃል ይፋረ ያባህ ቲያ ኪኒ ኢካህ ይቲያ ማኪ፡፡ 25.ካዶ ሲንሊህ አነሃኒህ ለ ታይ ጉዳይ ሲናክ አይክ አንዮ፣ 26.አባ  ይሚጋዓህ ፋራ ያይጸነነዔ መንፈስ ቁዱስ ለ ኡማን ጉዳይ ሲን አይምሂረ ለ፣ አኑ ሲናካም ኡምቢህ ታዛካሮና ሲን አበለ፡፡

  27.ሳላም ሲናህ ሓበሊዮ፣ ኢኒ ሳላም ለ ሲናህ አሓየሊዮ፣ አኑ ሲናህ አኃየ ሳላም ዓለም ያኃየ ቢሶህ ማኪ፣ አፍዓዶ ሲናክ አምጽንቀ ዋይቶይ፣ ለል ማማይሲቲና፡፡ 28.አኑ አዴሊዮ፣ ጋሔህ ሲና ዻጋህ አምተሊዮ ሲናከም ቶቢኒህ ታኒን፣ ይኪኅንቲኒህ ያከዶ ኢኒ አባ ዻጋህ ኤደርክህ ኒያቶና ኤዳይ ዪነ፣ አይሚህ ያባ ዮኮ ያይሰ፡፡ 29.ታሃም ታከ ዋክተ ታማኖና፣ ታሃም ታከምኮ ባሶል ኦኮመህ ሲናክ አይክ አንዮ፡፡ 30.ታይ ዓለሚህ ገዛኢ ሰጣን ያምቶ ኪኒጉል ካምቦኮ ሣራህ ሲንሊህ ማንጎም ማዋንሲታ፡፡ ኡሱክ ያሞል ኢንኪም አቦ ማዽዓ፡፡ 31.ያከካህ አኑ ኢኒ አባ ኪሒኒዮም ዓለም ያዻጎ ያባ ይኢዚዘም ኡምቢህ አፍጽመ ሊዮ፡፡ "ኡጉታ ታርከኮ ናዳዎይ፡፡"

                                   ማዕራፋ 15

                         ኢየሱስ ሓቂ ወይኒ ጉንደ ኪኒ

    1.ካታሰህ ኢየሱስ ታህ የ፣ ሓቂ ወይኒ ጉንደ ዮያ  ኪኒ፣ ታክሊ ዋና ያባ ኪኒ፡፡ 2.ዮያድ ያነ ፍሮሰ ዋ ኃክ ኡምቢህ ያባ ይግሪዔህ ዒዳ፣ ያፍሬ ኃክ የይመንገህ ያፍራዎ ይግርዘህ ያካየ፡፡ 3.አቲን ለ ሲናካ ቃሊህ ምክኒያታህ ካዶ ቲጽሪዪኒህ ፂሪያም ኪቲን፡፡ 4.ዮያሊህ ማራ፣ አኑ ለ ሲንሊህ ማረሊዮክ፣ ኃከ ወይኒ ጉንዲህ አሞክ ማረዋየምኮ ኢሲ ዸግኃህ ዲቦህ ፊሮሶ ማዽዓ፣ አቲን ዮያድ ማረዋይተኒምኮ ፊሮሶና ማዺዕታን፡፡

   5.አኑ ወይኒ ጉንደ ኪዮ፣ አቲን ኃኮክ ኪቲን፣ ማንጎ ፊረ ፊሮሳቲ ዮያድ ማራቲያከ አኑ ለ ኤሊህ ማራቲያ ኪኒ፣ አይሚህ ዮያ ሂኒም ኢንኪም አብቶና ማዺዕታን፡፡ 6.ዮሊህ ማረዋቲ ኃክ ባሊህ ኢሮል ራዳህ ካፋ፣ የከሄለህ ጊራድ ራደህ ቡሎላ። 7.ዮያድ ማረ ዋይተኒሚህ፣ ይቃል ሲንሊህ የከምኮ፣ ጉርተኒም ኤሠርታንጉል ገሊቲን፡፡ 8.ማንጎ ፊረ ፊሮሳንጉል ያባ ያክቢረ፣ ታይ ዓይነቲህ  ይተምሃሮ ኪቲኒም ታይሪዲኢን /ታይሲዺጊን/፡፡ 9.ያባ ዮያ ይክሒነም ባሊህ፣ አኑ ለ ሲና አክሒነ፣ አማይጉል ይካኃኖድ ማራ፡፡ 10.አኑ ያባህ ቲኢዛዝ ኢፍጽመህ ካ ካኃኖል ማራምባሊህ፣ አቲን ለ ይቲእዛዝ ቲፍጽምኒኮ ይካኃኖድ ማርሊቲን። 11.ታይ ሲናካም ይኒያት ሲናድ ያኮከ ሲን ኒያት ፍፁም ያኮ ዒሎህ ኪኒ፡፡ 12. ዪ ትኢዛዝ አኑ ሲን ኢክኂነምባሊህ አቲን ለ ሲነሲነህ ታምካኃኖና ኪኒ፡፡ 13.ሒያውቲ ኢሲ ሮሔ /ሕይወት/ኢሲ ካኃንቶሊቲህ ቲላሰህ ያኃየምኮ ናባ ካሓኒ ሚያነ፡፡ 14.አቲን ለ አኑ ሲን አእዚዘም አብተኒምኮ ይካኃንቶሊት ኪቲን፡፡ 15.አገልጋሊ ማዳሪ አባም ሚያዽገጉል ካምቦክ ሣራህ አገልገልቲ ሲናክ ማ፣ ያኮይ ኢካህ ኢኒ አባኮ ኦበም ኡምቢህ ሲን ኢስቡሉወጉል  ይካኃንቶሊት ሲናክ አይከ አኒዮ፣ 16.አኑ ሲን ዶረካህ አቲን ይማዶሪኒት፣ ተደይኒህ ማንጎ ፊረ ፊሮሶና፣ ሲን ፊረ ማርታቲያ ታኮ ሲን ረዲሰ፣ 18.ጋባዔህ ኢየሱስ ታህ የ፣ ዓለም ሲን ይንዒበምኮ ሲንኮ ባሶል ዮያ ይንዒበም ኢዺጋ፡፡ 19.ዓለምም ታኪንዶ ዓለም ካይም ኪናም ያክኃኖ ኪይይ ዪነ፣ ያከካህ ዓለምም አከ ሒንተንጉልከ አኑ ዓለምኮ ባዽሰህ ሲን ዶረጉል፣ ዓለም ሲን አንዒበ ለ፡፡ 20.ጊለዋይቲ ማዳራኮ ሚያሰ ኤዸኄህ ሲናከም ኢዝኪራ፣ ዮያ የይሰደዲኒምኮ ሲና ለ አይሰደደ ሎን፣ ይቃል ዻዉዸኒምኮ ሲን ቃል ለ ዻዉዸ ሎን፡፡ 21.ይፋረቲያ ሚያዽግንጉል ይምክኒያታል ታሃም ኡምቢህ ሲናክ አበሎን፡፡ አኑ ኤመተህ አክ ኢየዋዶ ኃጢአት አክ አከማዻዺና፣ ካዶ ለ ሲኒ ኃጢአታህ ምክንያት አካህ ማሎን፡፡ 23.ዮያ ኒዒብቲ ያባ ለ ኒዒባ፣ 24.አኪ ሒያውቲ አበ ዋ ሢራሕ ተን ፋናድ አበዋዶ ኃጢአት አክ አከ ማዻዺና፣ ካዶ ለ ታሃም ኡምቢህ ዩብልኒምኮ ላካል ዮከ ያባ ይንዒቢን፡፡ 25.ታሃም ተከም 'ምክኒያት ማለህ ይይንዒቢን' የኒህ ተን ሕገህ ይምጽሒፈ ቃል ያምፋጻሞ ዒሎህ ኪኒ፡፡

   26.ያከካህ አባኮ ያወዔቲያከ አኑ ለ ያባኮ ሲናህ ፋራ ያይጸነነዔ ሓቂ መንፈስ የከ ያጸነነዔቲ ያምተጉል፣ ኡሱክ ዪ ዳዓባል ያምስኪረ፡፡ 27.አቲን ለ ኤዸዾይታኮ ኤዸዽሰኒህ ዮሊህ ቲኒጉል አምስከረ  ሊቲን ፡፡                        

ማዕራፋ 16

    1.ካታሰህ  ኢየሱስ ታህ የ፣ "ሀይከ ታሃም ሙሉኡድ ሲናከም፣ ሲን ኢምነት ያምሄወከምኮ ኤዽኄህ ኪዮ፡፡2.ሙክራባትኮ የየዕኒህ ሲን ሀዳነ ሎን፣ ኤረ ሲና ያግዲፈቲይ ኡምቢህ፣ መዔፉጎ ያስጊልጊለም ያካለ ዋክቲ አምተለ፡፡ 3.ታሃም አብታም ያ አባ ያኮይ ዮያ አዽገ ዋይታም ኪኒ፡፡ 4.ታሃም ሲናካም ለ ዋክቲ ማዳጉል አይም ተኒም  ታዛካሮና ኤህ  ኪዮ፡፡"

                           መንፈስ ቁዱስ ሢራሕ       

  ካታሰህ ኢየሱስ ታህ የ፣ ታሃም ኡምቢህ ታሃም ባሶህ ሲናክ ኢየዋየም፣ ሲንሊህ ኢነጉል ኪኒ፣ 5.ካዶ ለ ይፋረቲያ ዻጋህ አዳዎ ኪዮ፣ ያኮይ ኢካህ ሲንኮ አውላል ኪቶ? የህ የሠራቲ ሚያነ፡፡ 6.ያከካህ ታሃም ኡምቢህያ ሲናከጉል ሲን አፍዓዶ ሓዛናህ ተመገ፡፡ 7.አኑ ለ ሓቀህ ሐቀ ሲናክ አይክ አኒዮ፣ ይገዾ ሲናህ ጥቅመ ለ፣ አይሚህ አኑ አዴዋየምኮ ያይጸነነዔቲይ ሲናህ ሚያምተ፣ አኑ ኤደምኮ ለ ሲናህ ፋረሊዮ። 8.ኡሱክ ያሚተ ዋክተ ኃጢአት ጽድቀከ ፍርዲ ዳዓባል ሒያው አይረድኤ ለ፡፡ 9.ኃጢአት ዳዓባል ዮያል አምነዋይታማል ኪኒ፣ 10.ጽድቅ ዳዓባል ያይርድኤም አባ ዻጋህ ኤደርከህ ካምቦኮ ላካል ይማታብሊንጉል ኪኒ፣ 11.ፍርዲ ዳዓባል ያይርዲኤም ታይ ዓለሚህ ገዛኢ (ሰጣን) ይምፍርደም ኢዻህ ኪኒ፡፡ 

   12.ገና ሲናካምኮ ማንጎ ጉዳይ ያነ፣ ያኮይ ኢካህ ካዶ ሲናክ ዒሊሳ፣ 13.ሓቂ መንፈስ ያምተ ዋክተ ሓቀል ኡምቢህ ሲን ያምርኄ፣ አይሚህ ኡሱከ ዋንሲታም ዮበም ኪኒ ኢካህ ኢሲ ዸግኃሂም ማኪ፡፡ ኡሱክ ባሶል ያከ ጉዳይ ሲናክ ኢየ ለ፡፡ 14.ዪም ተከምኮ በየህ ሲናክ ያም ኢዻህ፣ ዮያ ያስክቢረ፡፡ 15.ያባሂም ኪናም ኡምቢህ ዪም ኪኒ፣ 'ዪም ተከምኮ በየህ ሲናክ ኢየለ' ሲናከም ታሃማህ  ኪኒ፡፡"

 ሲን ሓዛን ኒያታል  ቲላየ ለ

   16.ኢየሱስ ጋባዔህ ታህ የ፣ "ዳጎ ጊዘኮ ሣራህ ይማታብሊን፣ ለል ዳጎ ዋክተኮ ላካል ያብለሊቲን፡፡17.ካ'ተምሃሮኮ ጋሪጋሪ "ታይ፣ 'ዳጎ ዋክተኮ ላካል ይማታብሊን፣ ለል ደጎ ዋክተኮ ላካል ያብለሊቲን፣ ጋባዔህ ያባ ዻጋህ አዴሊዮ፣ ያ ጉዳይ አይምቶ?" ኪኒ ኢሲመን። 18."አማይጉል ታይ ዳጎ ዋክተኮ ላካል ያ ጉዳይ አይምቶ?" ኪኒ  ኢሲሲመን፣ ዋንሲታ ጉዳይ ማናዽገ" የን፡፡            19.ኢየሱስ ለ ካኤሠሮና ጉረኒም የዸገህ ታህ አከየ፣ ሲነሲነህ ቲታ ኤሠርታናም ዳጎ ዋክተኮ ሣራህ ይማታብሊን፣ ለል ለ ዳጎ ጊዘኮ ሣራህ ያብለሊቲን ሲናከጉል ኪኒ? 20.ሓቀህ ሐቀ ሲናክ አይክ አኒዮ፣ አቲን ወዔልቲን፣ ዓለም ለ ኒያተ ለ፣ አቲን አኅዚነ ሊቲን፣ ያኮይ ኢካህ ሲን ኃዛን ኒያታል ቲላየ ለ፡፡ 21.ኑማ ዻላይ ዋከተ ኡላሎ ለለዕ ተማዳጉል ታሕዚነ፣ ዻልተምኮ ላካል ለ ዓለሚል ሕፃን ዮበከርከህ ኒያትኮ ኡገተሚህ ኢሲ ጺንቀ ማታዝክረ፡፡ 22.ታማም ባሊህ አቲን ካዶ አኅዝኒክ ታኒን፣ ጋባዔህ ሲን አብለ ሊዮ፣ ሲን አፍዓዶ ለ ኒያተ ለ፣ ሲን ኒያት ሲናክ በያቲ ሚያነ፡፡

   23. ታማይ ለለዕ ዮኮ ኢንኪም ማዻዒምታን፣ ሓቀህ ሐቀ ሲናክ አይክ አኒዮ ያባ ይሚጋዓህ ዻዒምተኒምኮ ኡማን ጉዳይ ሲናህ አኄየ ለ፡፡ 24.ካዶ ፋናህ ይሚጋዓህ ኢንኪ ጉዳይ ማዻዒሚኒቲን፣ ዻዒማ ገራየ ሊቲኒክ፣ ሲን ኒያት  ፍፁም ሲናህ አከለ፡፡

   25.ካዶ ፋናህ አብነቲህ /ምሳለህ/ ሲናከ፣ ካምቦኮ ሣራህ አብነቲህ ዋንሲተ ዋ ዋክቲ አምተለ፣ ያከካህ ያባህ ዳዓባል ኡማን ጉዳይ ዓዶሰህ ሲናከህ አኒዮ፡፡ 26.ታማይ ለለዕ ይምጋዓህ ዻዕመሊቲን፣ አኑ ለ  አባ ሲናህ ዻዒመሊዮ ሲናክ ማ፡፡ 2.አይሚህ  አባ ኢሰህ ሲን ኪሕናጉል ኪኒ፣ አባ ለ ሲን ኪሒናም ዮያ ትክሒኒኒጉልከ መዔፉጎኮ የመተቲያ ኪዮኮም ተመኒኒጉል ኪኒ። 28.አባኮ ኤወዔህ ዓለሚል ኤመተህ አኒዮ፣ ጋባዔህ ታይ ዓለም ሓበህ አባ ዻጋህ  አዴ ሊዮ፡፡

    29.ካተምሃሮ ታህ  የን፣ ሀይከ ካዶ ምሳለህ አከካህ ኢፋህ ዋኒሰ፣ 30.አቱ ኡማኒም ታዺገምከ ኢንከቲ ኤሠሮ ካብ ኮሊሶ ኩማጉርሱሳም ካዶ ነዸገ፣ አማይጉል ፉጎኮ ተውዔም ናሚነ፡፡ 31.ኢየሱስ ታህ የህ ኤልይምሊሰ፣ ካዶ ተመኒን!" 32.ያኮይ ኢካህ  ሲነሲነህ ሲኒ ደፍራህ ኤል ታምበተተኒኒ ኢርከከ ዮያ ዲቦህ ይሓብታን ሳዓት አምተለ፣ ሳዓት ለ ካዶ ማደ፣ ያከካህ ያባ ዮሊህ ያነጉል ዲቦህ ማኪዮ፡፡ 33.ታሃም ሲናድ ዋንሲታም ዮሊህ ተኪኒህ ሳላም ሲንሊህ ያናዎ ኤህ ኪዮ፡፡ ዓለሚል ታኒኒሃኒህ ሔልዋይ ሊቲን፣ ያኮይ ኢካህ  አይዱኩም  ኤያ፣ አኑ ዓለምክ ሱባ፡፡

ማዕራፋ 17

ኢየሱስ ጻሎት

    1.ኢየሱስ ታሃም ዋንሲተሚህ ላካል ዓራንቲ ኡላል ሪጋየህ ታይ የህ ጻሎት አበ፣ "ኦ አባ! ሀይከ ሳዓት ማደ፣ ባዺ ኩያስካባሮክ ኢሲ ባዻ ኢሲክቢር፣ 2.ታስኪቢረም ቶሖወሚህ ኡምቢህ ኡማንጉሊት ሕይወት ያምኃዎ፣ ሒያው አሞል ሙሉእ ሢልጣን አካህ ቶሖወጉል ኪኒ፡፡ 3.ኡማንጉሊ ሕይወት ለ፣ ዲቦህ ሓቂ አምላክ ተከ ኮያከ ፋርተ ኢየሱስ ክርስቶስ ያዽጊኒም ኪኒ፡፡  4.አኑ ዮህ ቶሖወ ሢራሕ ኢፍጺመህ ባዾክ አሞል ኩኢስኪቢረ፡፡ 5.ኦያባ ዓለም ያምፍጢረምኮ ባሶል ኮሊህ ሊክ ኢነ ኪብረህ ካዶሊህ ኢሰሊህ ይስኪቢር።

    6.ዓለም አዳኮ ዶርተህ ዮህ ቶሖወ ሒያዋህ አቱ አይምቶ ኪቶም አካህ' ኢግልፀ፣ ኢሲን ኩም ኪይይ ዪኒን፣ አቱ ተና ዮያህ ቶሖወ፣ ኢሲን ኩቃል ዻዉዸን፣ 7.ዮህ ቶሖወም ኡምቢህ ኮኮ ኪናም ኢሲን ካዶ የዸጊን፡፡ 8.ዮህ ቶሖወ ቃል አካህ ኦሖወህ አንዮ፣ ኢሲን ለ ጋራየን፣ ኩላኮ ኤመተም ሓቀህ የዸጊን፣ አቱ ይፋርተም የመኒን፡፡

  9.አኑ ጻሎት አባም ተናህ ኪዮ፣ ታይ ዮህ ቶሖወም ኩም ኪኖንጉል ታናህ ጻሎት አባክ አነ፣ ዓለሚህ ጻሎት ማባ፡፡ 10.ዪም ተከም ኡምቢህ ኩም ኪኒ፣ ኩም ተከም ዪም ኪኒ፣ አኑ ለ ታናህ ኢክቢረ፡፡ 11.አኑ ካምቦኮ ሣራህ ዓለሚል ማማራ፡፡ ኢሲን ለ ዓለሚል ኪኖን፡፡ አኑ ኩላል አምቶ ኪዮ፣ ቁዱስ አባ! ታይ ዮህ ቶሖወም ኖያ ባሊህ ኢንከቶ ያኮና ዮያህ ቶሖወ ሚጋዓህ ተን ዻዉዽ፡፡ 12.አኑ ኤሊህ ኢነ ዋክተ፣ ዮህ ቶሖወ ሚጋዓህ ዻዉዸህ አኒዮ፣ አኑ ተን ዻዉዸ፣ አማይጉል ይምጽሒፈ ቲንቢት ቃል ያምፋጻሞ ታማርከኮ የለየ ሒያውቶኮ ፈር ቲይ ተንኮ ኢንከቲ ማላይና፡፡ 13.ካዶ አኑ ኩላል አምተሊዮ፣ ዓለም አሞል አነሃኒህ ታይ ዋንሲታ ይኒያት ተናህ ፍፁም ያኮ ኤህ  ኪዮ ፡፡14. አኑ ኩቃል አካህ ኦሖወህ አኒዮ፣ አኑ ዓለምኮ ማኪዮጉል ኢሲን ለ ዓለምኮ ማኪኖን፣ ታጉል ዓለም ተን ዪንዒበ፡፡ 15.ኡምነኮ ተን ዻዉዾ ኪኒካ ዓለምኮ ኢሮህ ተን በይቶ ማዺዒማ፡፡ 16.አኑ ዓለምኮ ማኪዮም ባሊህ፣ ኢሲነለ ዓለምኮ ማኪኖን፡፡ 17.ኢሲ ሓቀህ ተን ኢስቅዲስ፣ ኩቃል ሓቀ ኪኒ፡፡ 18.አቱ ዮያ ዓለሚል ፋርተም ባሊሀ፣ አኑ ለ ታና ዓለሚል ፋረህ አኒዮ፡፡ 19.ኢሲን ሓቀህ ቁዱሳን ያኮና፣ አኑ ኢኒ አሞ ተኒዻህ ቁዱስ አበ ሊዮ፡፡20. ተን ቃሊህ ኡላህ ዮያል ያምኒኒጉል ለ ዻዒማክ አነ ኢካህ ተናህ ዲቦህ ማዻዒማ፡፡ 21.አኑ ዻዕማም፣ ኡምቢህ ኢንከቶ ያኮና ኪኒ፣ ታጉል አባ! አቱ ዮያድ ታነምባሊህ፣ አኑ ለ ተናድ አነምባሊህ፣ ኢሲን ለ ኖያድ ያኮና  ኪኒ። ኢሲን አቱ ኒፋርተም ዓለም ያማኖ ኪኒ፡፡ 22.ናኑ ኢንከቶ ኪኖምባሊህ ኢሲን ለ ኢንከቶ ያኮና፣ ዮያህ ቶሖወ ኪብረ፣ አካህ ኦሖወህ አኒዮ፡፡ 23.አኑ ዻዕማም፣ አኑ ካያድ፣ ሱክ ዮያድ፣ አቱ ለ ዮያድ ታነምባሊህ፣ ኢሲን ለ ዓዲህ ኢንከቶ ያኮና ኪኒ፣ ታማምባሊህ ዮያ ፋርተምከ ዮያ ቲክኅነሚህ መጠንል ተና ለ ቲክሒነም ዓለም ያዻጎ ኪኒ፡፡ 24. "ኦ ያባ! ዓለም አምፍጢረካህ ይትክኂነጉል ዮህ ቶሖወ ይኪብረ ያብሎና፣ ታይ አቱ ዮህ ቶሖወም አኑ ኤድ አነድ ዮሊህ ማሮና ኪኂኒዮ፡፡25.ጻድቅ አባ! ዓለም ኩማዻጊና፣ አኑ ለ ኩኤዸገህ አኒዮ፣ ታይ ማሪ አቱ ይፋርተም የዸጊን፡፡ 26.አቱ ዮያ አካህ ቲክኂነ ካኃኒ ተናድ ያኮከ አኑ ለ ተናድ አኮ፣ ኢሲን ኮያ ያዻጎና አበህ አንዮ፣ ለል ለ ያዻጎና ተን አበህ አኒዮ፡፡

ማዕራፋ 18           

ኢየሱስ ናዓብቶልቲህ ዪም ዸብዸ              

(ማቴ.26፣47-43፤ማር.14፣43-50፤ሉቃ.22፣47-53፡፡)

    1.ኢየሱስ ታሃም የምኮ ካላል ኢሲ ተምሃሮሊህ ቄድሮን ወዒህ ታብሶል የደ፣ ታማል ዪነ ታክሊ ቦታድ ተምሃሮሊህ ሳየ፡፡ 2.ኢየሱስከ ካተምሃሮ ታማይ ቦታል ኡማን ዋክተ አከሄሊይ ይኒኒጉል፣ ቲላሰህ ያስሓየ ይሁዳ ቶይ ቦታ አዽጊይ ዪነ፡፡ 3.አማይጉል ይሁዳ ወታሃደር ካህናት አሞይቲትከ ፈሪሳውያንኮ ፋርመተ ሎን ይስኪቲለህ ታማይ ቦታል የመተ፣ ኢሲን ለ ፋኑሳከ ቦሎላ ሲግ፣ ውግእ ማሳረዒያ ይብዽኒህ የመቲን፡፡ 4.ኢየሱስ ካማደለም ኡምቢህ የዸገህ ተኑላል የደህ ኢያ ጉርተኒ? አክየ፡፡ 

        5. ኢሲን ለ "ናዝሬት  ኢየሱስ ጉራክ ናነ" አክየን፡፡

           ኡሱክ "ዮያ ኪኒ" አክየ፡፡

           ቲላሰህ ያኄየ ይሁዳ ለ ተንሊህ ሶለህ ዪነ፡፡

6.ኢየሱስ ለ"ዮያ ኪኒ" አክየጉል ሳራቶላል ፉሑካ የኒህ ባዾል ራደን፡፡7. ኢየሱስ ለ "ኢያ ጉራክ ታኒን" የህ ጋባዔህ ተን ኤሠረ፡፡ ናዝሬት ኢያሱስ ጉራክ ናነ የን፡፡

    8.ኢየሱስ ለ ዮያ ኪኒ ሲናክ አይክ አነ፣ አማይጉል ጉርታናም ዮያ የከምኮ ታይ ማራ ሓባ፣ ያዳዎናይ፡፡ 9.ታሃም ተከም "ኦያባ! ዮህ ቶሖወ ሒያውኮ ኢንከቶ ኡካ ማይላይኒዮ" የዽኄ ቃል ያምፋጻሞ የህ ኪኒ፡፡ 

   10.ስምዖን ጰጥሮሰ ሰይፍ ይብዸህ ይነጉል ይምዝዘህ ሊቀ ካህናት አገልጋሊ ሳባዔህ ሚድጊ አይቲ አክ ይግሪዔ፣ አገልጋሊክ ሚጋዓህ "ማልኮስ" አካይ ዪኒን፡፡ 11.ኢየሱስ ለ ጰጥሮሱክ ሰይፍ ኢሲ ዓረድ ደሄይ፣ ያባ ዮህ ዮሖወ መከራ ጻማ፣ ማዑበም ተከለ? አክየ፡፡

ኢየሱስ ሊቀ ካህናት ሀና ነፊል ካብየ

  12.ታማምኮ ላካል ወታሃደርከ ተን አዛዚ፣ አይሁድ ሎን ለ ኢየሱስ ይብዽኒህ ይዹዊን፡፡ 13.ባሶል ሀናል በን፣ ሀና ታማይ ኢጊዳ ካህናት አሞይታ ኪይይ ዪነ ቀያፋህ ባሎ ኪይይ ዪነ፣ 14.ቀያፋ ኢንኪ ሒያውቲ ሕዝቢ ኢዻህ ራባም ታይሰም ኪኒ የህ አይሁድ ሢልጣን ባዒል ይመኪረቲያ  ኪነ፡፡

                        ጰጥሮስ ኢየሱስ ይክሕደ

(ማቴ.26፣69-70፤ማር.14፣66-68፤ሉቃ.22፣55-57)

   15.ስምኦን ጰጥሮስከ አኪ ተምሃራይ ኢየሱስ ይክቲሊን፣ ቶይ አኪ ተምሃራይ ሊቀ ካህናታል ይምዽገቲያ ኪይይ ዪነ፣ አማይጉል ኢየሱስሊህ ካህናት ኃላቃህ ግበድ ሳየ፣ 16.ጰጥሮስ ለ ኢሮል ኢፈይ ባሮል ሶለህ ዪነ፣ ሊቃ ካህናታህ ይምዽገ ተምሃራይ የመተህ ዋርዲያ ኪን ዲንግልክ የህ ጰጥሮስ ሳይሰ፤ 17.ዋርዲያ ኪን ዲንግል ጰጥሮሱክ አቱ ለ ታይ ሒያውቲህ ተምሃሮኮ ኢንከቶ ማክቶህ? አክተ፡፡ ኡሱክ ለ ማኪዮ አክየ፡፡

  18.ዋክቲ ጋላዖ ሊይነጉል አገልገልቲከ ሎን ሒመት /ፋሓም/ ጊራ ቦሎሊሰኒህ ላላዓይ ዪኒን፣ ጰጥሮስ ለ ተንሊህ የከህ ሶለህ ላላዓይ ዪነ፡፡

ካህናት አሞባዕላኮ ኢየሱሱል ካብተ  ኤሠሮ  

(ማቴ.26፥59-66፤ማር.15፥55-6፤ሉቃ.22፥66-71፡፡)

   19.ታይ ዋክተ ሊቀ ካህን ኢየሱስ ተምሃሮከ ትምህርቲ ዳዓባል ኤሠረ፡፡ 20.ኢየሱስ ለ ታህ የህ ኤልደሄየ፣ አኑ ሒያዋህ ኡምቢህ ግልፀህ ዋንሲታ፣ አይሁድ ኡምቢህ ኤል የከሄሊኒል ያኮይ በተ መቅደስል ኡማን ዋክተ \ኢሚሂረ፣ ሱዕቶህ ዋንሲተ ጉዳይ ሱሩህ ሚያነ፤ 21.ኢቦል አይሚህ ዮያ ለ ኤሠራክ ታኒን?  ዋንሲታህ ይቶበም ኤሠራ፣ ዋንሲተም ኢሲን ያዽጊን።" 22.ኢየሱስ ታሃም ዋንሲተ ዋክተ ታማል ሶልተህ ቲን ሎንኮ ቲይ ሊቀ ካህናታል ደሄታ መልሲ ታይቲያ ኪኒ?  የህ ኢየሱሱክ ዻባናል አክሃየ፡፡ 23.ኢየሱስ ለ ኡማ ቃል ዋንሲተህ ኤከምኮ ዋንሲተም ኢምስኪር፣ ዋንሲተም ቲክክል የከምኮ አይሚህ ዮልሃክ ታነ አክየ፡፡ 24.ታሃምኮ ላካል ኢየሱስ ዩምዹወህ አካህ ያነካህ ካህናት አሞይታል ቀያፋል ፋረ፡፡

                        ጰጥሮስ ኢየሱስ ይክሕደ 

(ማቴ.26፥71-75፤ማር.14፥69-72፤ሉቃ.22፥58-62፡፡)

   25.ታማይ ዋክተ ስምዖን ጰጥሮስ ሶለህ ጊራ ላላዓይ ዪነ፣ ጋሪ ጰጥሮሱክ ለ አቱ ኢየሱስ ተምሃሮኮ ቲያ ማክቶህ? አከየን፡፡ኡሱክ ማኪዮ የህ ይክሒደ፡፡

   26.ጰጥሮስ አይቲ አክ ይግሪዔ ሒያውቲህ ዘመድ ሊቃ ካህናት ሎንኮ ኢንከቲ "ታክሊ ቦታል ተንሊህ ኩኡብለህ ማናዮህ?" አክየ፡፡  27.ጰጥሮስ ለ ጋባዔህ ይክሒደ፣ አማይጉልካህ ዶርሆይቲ  ወደ፡፡

ኢየሱስ ጲላጦስ ነፊል ካብየ

(ማቴ.27፥1-2፤11-14፤ማር.15፥1-5፤ሉቃ.23፥1-5፡፡)

    28.ታሃምኮ ላካላ ኢየሱሱ ቀያፋ ዲኮ ገዛኢ ጊበህ በን፣ ዋክቲ ለ ዻሒኒ ማሓ ኪይይ ዪነ፣ አይሁድ ፋስጊ ዒዶይታ በቶና ኪይይ ዪኒኒጉል ያርኪሲኒምኮ የኒህ ተን ጊቢህ አዳድ ማሳይኖን፡፡ 29.አማይጉል ጲላጦስ ተንኡላል የመተህ "ታይ ሒያውቲህ አሞል ካብ ኢሳን ኪሲ አይምቶ ኪኒ?" የህ ተን ኤሠረ፡፡

  30.ኢሲን "ታይ ሒያውቲ ኡማም አበዋቲያ አከዋዶ ኮያል ቲላስነህ ባሄ ማዻዺኒኖ" የኒህ ይምልሲን፡፡

 31.ጲላጦስ አቲን ሲነህ "በአይ ሲኒ ሕጊህ መሠረቲህ ኤልኢፍርዳ" አክየ፡፡ አይሁድ ሢልጣን ባዒል ለ "ናኑ ሒያው ናግዳፎ መብት ማልኖ" አክየን፡፡ 32.ታሃም ተከም ኢየሱስ አይሚህ ዓይነቲህ ራባህ ራባም ዋንሲተ ቃል ያምፋጻሞ  ኪኒ፡፡         33.ጲላጦስ ጋባዔህ ጋኄህ ጊበት ሳየ፣ ኢየሱስ ለ ደዔህ "አቱ አይሁድ ኑጉሥ ኪቶ?" የህ ኤሠረ፡፡

  34.ኢየሱስ"አቱ ታሃም ታም ኢሲኮ ኪቶ? ወይ አኪማሪ ይዳዓባል ኮከየኒህ ኪኒ?" አክየ፡፡

     35.ጲላጦስ ለ አኑ አይሁዳ ኪዮ ኮያ ቲላሰህ ቶሖወም ኩወገንከ ካህናት አሞይቲት ኪኖን፣ "አይም ኪን አብተም?" አክየ፡፡

   ን36.ኢየሱስ ይማንግሥቲ ታይ ዓለምኮ ማኪ፣ የከህ ያከዶ አይሁድ ሢልጣን አሞይትቲህ ጋባድ ራዳምኮ ዮያ ዻዉዻም ዮህ አምወገኤ ዻዸን፣ ይማንግሥቲ ለ ታይ ዓለምኮ ማኪ የህ ኤልደሄየ፡፡

   37.ጲላጦስ ለ ኢስቲ "አቱ ኑጉሥ ኪቶ?" አክየ፡፡ ኢየሱስ ለ "አቱ ታምባሊህ ኪዮ፣ አኑ ኦቦከምከ ዓለሚል ኤመተም ሓቀ አማስካሮ ኪኒ፣ ሓቀኮ ኪንማሪ ኡምቢህ ያንዻህ ያበ" የህ ኤልደሄየ።

   38.ጲላጦስ ለ "ሓቂ አይምቶ ኪኒ" አክየ፡፡ ታሃምኮ ሣራህ ጲላጦስ ጋባዔህ አይሁዱድ የውዔህ ታህ አክየ፣ "አኑ ኢንኪ በደል አድማገኒዮ፣" 39.ያከካህ ሲን ሊማዲህ መሠረቲህ ፋሲጊ ባዓላህ ኡማንጉል ኢንኪ ዩምዹወቲያ ሲናህ አንሑወ፣ አማይጉል አይሁድ ኑጉሥ ሲናህ አንሓዎ ጉርታና?" አክየ፡፡

   40.ኢሲን ለ"ባርባን" ኖህ ያምናሓዎይ ኢካህ ታሃም ማለ!" የኒህ ዋዕ  የን፡፡ ባርባን ለ ወንበደ ኪይይ ዪነ፡፡

ማዕራፋ 19

ወታሀደር ኢየሱሱል አል የለገፂን 

   (ማቴ.27፣27-32፤ማር.15፣15-21)

   1.ታሀምኮ  ሣራህ ጲላጦስ ኢየሱስ በየህ ሳብዒሲሰ። 2.ወተሀደር ለ ከናንቲ አክልል ዩጉንጉኒኒህ ኢየሱስ ዸግኃ ታሞክ ሃየን፣ ዓሳ ካባ ሀይሲሰን፡፡3.ካኡላል አምቲክ ላግጻህ"አይሁድ ኑጉሦ! ሳላም ኮያህ ያኮይ! አካይ" ዪኒን፣ ዻባናል አክ ሃይ ዪኒን፡፡ 4.ጲላጦስ ጋባዔህ ኢሮህ የያዔህ በደል ኤደማገይኒዮም ታዻጎና ካያ ኢሮህ ሲናህ አየዒክ አኒዮ አክየ፡፡ 5.ታሃምኮ ላካል ኢየሱስ ከናንቲ አክልል አክ ዒደኒህ ዓሳ ካባ ሀይሰተህ ኢሮህ የውዔ፣ ጲላጦስ ለ "ሀይከና ሒውያቲ"! አክየ፡፡

  6.ካህናት አሞይቲትከ ሎን ኢየሱስ ዩብሊን ዋክተ፣ "ታካር! ታካር!" አይክ ዋዕየን፡፡ 

  ጲላጦስ ለ "አኑ ኢኒ ወገኒህ ኢንኪ በደል ኤድማገይኒዮ፣ ጉርተኒምኮ አቲን በያይ ታካራ"አክየ።

   7.አይሁዳውያን ናኑ ሕገ ሊኖ፣ "ታይ ሒያውቲ ኢሰ ፉጊ ባዻ አበም ኢዻህ ኒሕጊህ ሪሚዲህ ራቢ አካህ ኤዳ" የን፡፡ 8.ታሃም ኡምቢህ ዮበ ዋክተ ጲላጦስ ጋዳህ ማይሲተ፡፡ 9.ጊበት ሳየህ ኢየሱሱክ "አቱ አርከኮ ኪቶ?" የህ ካኤሠረ፣።

   ኢየሱስ ለ ኢንኪም ኤልማደኂና፡፡ 10.አማይጉል ጲላጦስ ዮክማታሆ "አኑ ኩአንሓዎ ያኮይ ኩአስቃሎ ሢልጣን ሊዮም ማታዽገ?" አክየ፣

    11.ኢየሱስ ለ ፉጎኮ ሢልጣን ኮህ አምሓወዋዶ ይአሞል ኢንኪ ሢልጣን አለ ማዻዽኒቶ፣ ያከካህ ኮያል ቲላሰህ ይዮሖወቲ ጊዲድ ኃጢአት ለ አክየ።                                                                   ኢየሱሱል ራቢ ፍርዲ የከ

       (ማቴ.27፣15-31፤ማር.15፣6-20፤ሉቃ.23፣13-25፡፡)

   12.ጲላጦስ ታይ ኢየሱስ ዋኒሰም  ዮበ ዋክተ ይነሑወህ ካዽዺዮ ጉረህ ዪነ፣ አሁይድ ለ ታይ ሒያውቶ ቱንሑወምኮ ሮማ ኑጉሠ ነገሥት ቀሳር ካኃንቶሊ ማኪቶ፣ አይሚህ ኢሰ ኑጉሥ አባቲ ኡምቢህ ቄሳር ናዓብቶሊ ኪኒ! አይክ  ዋዕ  የን፡፡

    13.ጲላጦስ ታሃም ዮበ ዋክተ ኢየሱስ ኢሮህ የየዔህ ጠፍጣፋ ዻ አክያን ቦታል ፍርዲ ወንበርክ ዲፈ፣ ታይ ቦታ እብራይስጥ አፋህ "ገበታ" አክያን፡፡ 14.ፋሲጊ አምሳናዳውቲ ለለዕ ኪይይ ዪነ፣ ዋክቲ ለ ሊሓ ሳዓቲህ አቦቱል ኪይይ ዪነ፣ ታማይጉል ጲላጦስ አይሁዳውያናክ ሀይከ ሲን ኑጉሥ! አክየ፡፡

15.ኢሲን "ቶህ በይ! ቶህ በይ! ታካር !" አይክ ዋዕ የን፡፡ ጲላጦስ ለ "ሲን ኑጉሥ ታካሮ" አክየ፡፡

  ካህናት ኃለቅቶት "ቄሳርኮ በሓ አኪ ኑጉሥ ማልኖ" የኒህ ይምልሲን፡፡

  16.ታማይ ዋክተ ጲላጦስ ኢየሱስ ያምሰቃሎ ቲላሰህ ዮሖወ፡፡ ኢሲን ለ ኢየሱስ ይብደኒህ በን፡፡

ኢየሱስ ታካሪመ

(ማቴ.27፣32-44፤ማር.15፣21-32፤ሉቃ.23፣26-43፡፡)

  17.ታሃምኮ ላካል ኢየሱስ ኢሲ ማስቃል ይይኩዔህ ራስ ቂል አክያን ቦታል የውዔ፣ ታይ ቦታክ እብራይስጢ ዋኒህ ጎልጎታ አክያን፡፡

  18.ታማል ይስቅሊን፣ ኢየሱስ ፋናድ አክሃየኒህ አኪ ላማ ሕያውቶ ጉራከ ሚድጋክ አክሃይኒህ ታካረን፡፡19.ጲላጦስ ናዝሬት ኢየሱስ አይሁድ ኑጉሥ ታዽሔ ማይሳዻጋ /ማስታወቂያ/ ይጽሒፈህ ማስቃል አሞክ ታኮ አበ፡፡ 20.ኢየሱስ ኤልይምስቂለ ቦታ ካታማክ ዻል ቲነጉል ማንጎ ሒያው ማይሳዻጋ ይንቢቢን፣ ማይሳዻጋ አካህ ቲምጽሒፈ አፍ እብራይስጢህ፣ ላቲኒህከ ግሪኪህ፣ ኪይይ ቲነ፡፡ 21.አይሁድ ካህናት አሞይቲ ጲላጦሱክ አቱ አይሁድ ኑጉሥ ተህ ማጽሐፊን፣ ያኮይ ኢካህ ታይ ሒያውቲ አኑ አይሁድ ኑጉሥ ኪዮ የዽኄ አዸሓይ ኢጽሒፍ አክየን፡፡ 22.ጲላጦስ ለ ኢጽሒፈም ኢጽሒፈህ  ኪዮ የህ ኤልደሄየ፡፡ 

  23.ወታሀደር ኢየሱስ ታካረኒምኮ ላካል ካሳራ በየኒህ ኢንኪኢንኪ ወታሀደርታል ኢንኪ ሲላዕቲ ማዶ ዒሎህ አፋራል ሓዲለን፣ ቃሚስ ታማምባሊህ አበን፣ ያኮይ ኢካህ ቃሚስ አሙሩፈካህ አጋናኮ ጉባል ኢንኪ ወጥ የከህ ሢራሒመቲያ ኪይይ ዪነ፤ 24.አማይጉል ወታሀደር "ኢያ ማዳም ናብሎክ ዒደት ኤልዕድኖይ ኢካህ ዓንዽሰ ዋይኖይ" ኢስሲመን፡፡ ታሃም ተከም፣

         "ይሳራ ኃድልተን፣ 

          ይሐራይለ ቀሚሲል ዒደት ኤልዒደን፡፡" 

ያዽኄ ማጽሐፍ ቃል ያምፋጻሞ ኪኒ፣ ወታሀደር ታሃም አበን፡፡     

  25.ኢየሱስ ማስቃሊህ ባሮል ኢናከ ኢና ሳዕላ ቀሊዮጳ ኑማ ማርያምከ መግደላዊት ማርያም ሶለኒህ ዪኒን፡፡ 26.ኢየሱስ ኢናከ ኪሒን ተምሃራይ ካባሮል ሶለኒህ ዩብለ ዋክተ፣ ኢናክ "ኢና ሀይከ ኩባዺ!" አክየ ፡፡

  27.ታሃምኮ ላካል ተምሃራክ "ሀይክ ኩኢና!" አክየ፣ ታማይ ሳዓትኮ ኤዸዺሰህ ተመሃራይ ኢሲ ዲክህ በየ፡፡

ኢየሱስ ራበ

(ማቴ.27፥45-56፤ማር.15፥33-41፤ሉቃ.23፥44-49፡፡)

  28.ታሃምኮ ላካል ኢየሱስ ካዶ ኡማን ጉዳይ የከም የደገህ ማጽሐፋል ይምጽሒፈ ቃል ያምፋጻሞ "ባካረ" የ፡፡

    29.ታማል ዑረህ የመገ ኑዋይቲ ድፈህ ዪነ፣ አማይጉል ታመል ቲነ ሒያው ሚሪሪ ሚጺጻም ኤስፖኝ የመጊኒህ ቦሖይታክ ይጢልጢሊኒህ አፋድ ካብ አካህ ኤሰን፣ 30.ኢየሱስ ለ ዑረታምኮ ዻዓመሚህ ላካል "ባኪተ /ይምፍጽመ/!" የ፡፡ ዸግኃ ዔጊሲሰህ ኢሲ ናፍሰ ቲላሰህ ዮሖወ፡፡

                       ኢየሱስ  ማሳንጋለ ጦሩህ ሙዱምተ

   31.ታሃምኮ ላካል አይሁድ ሢልጣን አሞይቲት ሒያው ጺን  ይግድሊኒህ ማስቃልኮ ያብዻዎና ጲላጦስ ዻዒመን፣ ታሃም ለ አካህ አበን ምክኒያት፣ ሳንባታህ ያምሶኖዶውን ለለዕ ኪይይ ዪነጉል ሳንባት ናባ ባዓል የከርከህ  ሳንባት ለለዕ ተን ሓዶይታ ማስቃል ኦሞክ ታከምኮ የኒህ ኪይይ ዪነ፡፡32.አማይጉል ወታሀደር የደዪኒህ ኢየሱስሊህ ታካሪምተ ሒያዊህ ጺን ይግዲሊን፤ 33.ኢየሱሱል የመቲንጉል ለ ኡሱክ ዮኮመህ ራበም ዩብልኒህ ጺን አክ ማገዳሊ ኖን፡፡ 34.ያኮይ ኢካህ ወታሀደርኮ ኢንከቲ፣ ማሳንጋለ ጦሩህ አክሙደ፣ አማጉልካህ ማሳንጋለኮ ቢሎከ ላየ አክተውዔ፡፡ 35.ታሃም ዩብለቲ፥ "አቲን ታማኖና ይምስኪረ፣ ማስኪር ሓቀ ኪኒ፣ ኡሱክ ዋንሲታም ለ ሓቀ ኪኒ፣ ዋንሲታም ሓቀ ኪናም ኢሰህ ያዽገ፡፡ 36.ታሃም ተከም "ካኮ ኢንኪ ላፋ ኡካ ማታጊዲለ" ያዽኄ ቲንቢት ማጽሐፍ ቃል ያምፋጻሞ ኪኒ፡፡37.ለል ለ አኪ ቲንቢት ማጽሐፍ "ቶይ ሙደኒም  ያብሊን " ያዽኄ፡፡

ኢየሱስ  ዩሙዑገ

(ማቴ.27፣57-61፤ማር.15፣42-47፤ሉቃ.23፣50-56፡፡)

 38.አይሁድ ሢልጣን አሞይቲት ማይሲተኒህ አምቡሉወካህ ኢየሱስ ተምሃራይ ኪይይ ዪነ አርማቲያት ዮሴፍ ኢየሱስ አስካረን በዮ ጲላጦስ ዻዒመ፡፡ ጲላጦስ አካህ ይፍቂደ፡፡ አማይጉል ዮሴፍ የደህ አሰካረን በየ፡፡39.ታሃምኮ ባሶህ ባር ኢየሱሱድ የደህ ዪነ ኒቆዲሞስ ላማታናከ ኮዎን ኪሎ ግራም ታከም ከርበከ ዑረ የስገለህ የመተ፡፡ 40.ላማ ሒያውቲ ኢየሱስ ባድና በየኒህ አይሁይድ አግናዘህ ሊማድባሊህ ሱቱሊህ ሲሲሕ ሳራናህ ይክኒዲን፡፡ 41.ኢየሱስ ይምስቂለህ ኤድ ዪነ ቦታል ኢንኪ ታክሊ ሲፍራ ቲነ፣ 42.አይሁድ ሳንባታህ ያምሶኖዶዊን  ለለዕ ኪይይ ዪነጉልከ ማዓጊ ለ ዻየል አክ ይነጉል ኢየሱስ አስካረን ታማል ዮዖጊን፡፡                                                    ማዕራፋ 20                                                                   ኢየሱስ ራባኮ   ኡገተ                                         (ማቴ.28፥1-8፤ማር.16፥1-8፤ሉቃ.24፥1-12፡፡       

    1.ሳንባት ዳሒነ ማሒ ፋላሊ ገና አከካህ፥ መግደላዊት ማርያም ኢየሱስ ማዓጋህ ተደ፡ ታማርከ ማደጉል ዱኮ አካህ አልፍምተህ ቲነ ዻይ ዱኮት ኢፈይኮ ናውየህ ቱብለ። 2.አማይጉል ኢሲ ስመኦን ጰጥሮስከ ኢየሱስ ኪሒን አኪ ተምሃራይ ዻጋ ተርደህ ተደየህ "ማዳራ ማዓጋኮ የየዒኒህ በየን፣ አልሃየኒም ማዽገ" አክተ፡:

  3.ታማይ ዋክተ ጰጥሮሰከ አኪ ተምሃራይ የውዒኒህ ማዓጋህ የደዪን፡፡4.ላሚህ ኢንኮህ አርድይ ዪኒን፣ ያከካህ አኪ ተምሃራይ ጰጥሮስኮ አፊህ ዮኮምህ የርድህ ዱኮ ማደ። 5.ዔጋ የህ ዱኮክ አዳድ ቁሉሕየጉል አካህ ይምኪኒደህ ዪነ ኃላጋይቲ ታማል ዲፈየህ ዩብለ፡፡ ያኮይ ኢካህ አዳህ ማሳይና፣ 6.ስምዖን ጰጥሮስ ካታየህ የመተህ ዱኮክ አዳድ ሳየ፣ ኡሱክ ለ ማክናድ ኃላጊ ታምለ ራደህ ዩብለ፤ 7.ኢየሱስ ዸግኃክ ይምጥምጢመህ ዪነ ኃላጊ ማክናድ ሳረናሊህ አከካህ ዲቦህ አኪ ቦታል ዲቦህ ዲፈየህ ዩብለ።8.ካታየህ ቶይ ዮኮመህ ማደ ተምሃራይ ዱኮክ አዳድ ሳየህ ዩብለህ የመነ፡፡ 9.አይሚህ "ራባኮ ኡጉቶ አካህ ኤዳ" ያዽሔ ማጽሐፍ ቃል ገናህ አስቲወኢለካህ ዪኒን። 10.ታሃምኮ ላካል  ላማ ተምሃራይ ጋኄኒህ ሲኒ ዲክህ የደዪን፡፡

ኢየሱስ መግደላዊት ማርያማህ  ይምቡሉወ

  (ማቴ.28፥9-10፤ማር.16፥9-11፡፡)

    11.መደላዊት ማርያም ወዓክ ማዓጋኮ ኢሮል ሶልተህ ቲነ፣ ወዓክ ዔጋተህ ዱኮድ ተይደለለዔ፡፡ 12.ኢየሱስ አስካረን ኤድ ዪነ ቦታድ ዓዶ ሳረና ሀይሰተ ላማ መልአክ ዸግኃቱላኮ ቲይ ኢቡሎኮ ቲይ ዲፈኒህ ቱብለ፡፡ 13.ኢሲን ማርያማክ "ተኑማ! አይሚህ ወዓክ ታነ?" አክ የን፡፡ ኢሲ ለ ይማደራ በየን፣ አልሃየኒርከ ማዽገ አክተ፡፡

   14.ታሃሞም ተህ ሳራቱላል ኡፍኩና ተጉል ኢየሱስ ሶለህ ቱብለ፣ ኢየሱስ ኪናም ለ ማዻጊና፡፡ 15.ኢየሱስ "ተኑማ! አይሚህ ወዓክ ታነ፣ ኢያ ጉራክ ታነ?" አክየ፡፡

   ኢሲ ለ ታክሊባዕላ ተከለህ "ይማደራ! አቱ በይተህ ተከምኮ አልሃይተርከ ያዓሳያ ዮከይ፣ አኑ በሊዮክ" አክተ፡፡

   16.ኢየሱስ ለ "ማሪያም" አክየ፡፡ ኢስ ለ ካኡላ ኡፍኩናተህ አይሁድ አፋህ "ረቡኒ!" አክተ፣ ቱረጉም "መምሮ!" ማለት ኪኒ፡፡

    17.ኢየሱስ ገናህ ኢናአባ ዻጋህ ማውዒኒዮክ ይማባዽን፣ ያከካህ ይሳዖሉድ አዱዋይኪ አኑ ኢናባከ ሲን አባህ፣ ኢኒ አምላከ ሲን አማላክ ዻጋህ ማውዒኒዮ የዽኄ አከይ አክየ፡፡"  

  18.አማይጉል መግደላዊት ማርያም ካተምሃሮ ዻጋህ ተደህ ማዳራ ቱብለምከ አክየም አክተ፡፡ 

ኢየሱስ ኢሲ ተምሃሮህ ይምቡሉወ

(ማቴ.28፣16-20፤ማር.16፣14-18፤ሉቃ.24፣36-49፡፡)

  19.ታማይ ለለዕ ሳንባቲ ካሶ ካተምሃሮ አይሁድ ማይሲተኒህ ኢፈይ አልፈኒህ ዓሪ አዳድ የከሄሊኒህ ዪኒን፣ ኢፍአፋ አልፍምተህ ታነሃኒህ ኢየሱስ ተምሃሮ ኤድተከሄለህ ታነ ዓረድ ሳየ፣ ተን ፋናድ ሶለህ "ሳላም ሲናህ ያኮይ" አክየ፡፡ 20.ታሃሞም አክ የህ"ጋቦብከ ማሳንገል" ተን ይቡሉወ፣ ተምሃሮ ማዳራ ዩብሊንጉል ኒያተን፡፡ 21.ታሃምኮ ላካል ኢየሱስ ጋባዔህ" ሳላም ሲናህ ያኮይ፣ "አባ ዮያ ይፋረምባሊህ አኑ ለ ሲና ፋራክ አኒዮ" አክየ፡፡ 22.ታሃም የህ ፉፍ ኤልየህ መንፈስ ቁዱስ ጋራ፣ አቲን ሒያው አሞል ኃጢአት ኅድጎት አብተኒምኮ ኅድጎት ሲናህ አከለ፤ 23.አቲን ሒያው ኃጢአታህ ኅድጎት አካህ አበዋይተኒምኮ ለ ኅድጎት ገየ ማሎን አክየ፡፡

                               ኢየሱስከ ቶማስ

  24.ኢየሱስ ኢሲ ተምሃሮል የመተ ዋክተ ላማምከ ታማንኮ ኢንከቲ፣ ዲዲሞስ አክያን ቶማስ ተንሊህ ማና፡፡ 25.አማይጉል አኪ ተምሃሮ "ኒማዳራ ኑብለኮ" አክየን፡፡

  ኡሱክ ለ "ብርቲቲህ ሙዱምተ ጋቦብ አብለካህከ ፈሮር  ኤደሳይሰካህ፣ ይጋቦብ ካማሳንጋለህ ቢዮኩድ ሳይሰካህ ማሚነ" አክየ፡፡

    26.ባሐራ ለለዕኮ ላካል ካተምሃሮ ጋባዔኒህ ዲክቲ አዳድ ዪኒን፣ ቶማስ ለ ተንሊህ ዪነ፣ ኢፍአፋ አልፍምተህ ታነሃኒህ የመተህ ተን ፋናል ሶለህ "ሳላም ሲንሊህ ያኮይ!" አክየ፡: 27.ታሃምኮ ላካል ቶማሳክ፣ "ፈሮር ታህ ባሃይኪ ይጋቦብ አቡል፣ ኢሲ ጋባ ለ ባሃይ ፈሮር ይማሳንጋለህ አዳድ ሳዪስ፣ ኢሚን ኢካህ ኢምነት ማሊ ማኪን" አክየ፡፡ 

     28.ቶማስ ለ "ይማዳራ! ያአምላክ!"  የህ ይምሊሰ፡፡

  29.ኢየሱስ ለ ቶማሳክ አቱ ይቱብለጉል ተመነ፣ አብለካህ ታሚነም ለ ቲምስጊነም ኪኖን አክየ፡፡

ታይ ማጽሐፊህ ዓላማ

 30.ኢየሱስ ታይ ማጽሐፋል አምጽሒፈዋይተ ማንጎ ታምራት ኢሲ ተምሃርቲህ ነፊል አበ፤ 31.ያከካህ ኢየሱስ መሲሕ መዔፉጊህ ባዻ ኪናም ታማኖናከ፣ ተመኒኒህ ካሚጋዓህ ኡማንጉሊህ ሕይወት ገይቶና ታሃም አክ ቲምጽሒፈ፡፡

                                        ማዕራፋ 21

ኢየሱስ ማልሒና ተምሃራያህ ይምቡሉወ

    1.ታሃምኮ ላካል ኢየሱስ ጥብሪያዶስ ባሕሪ አፋል ተምሃሮህ ጋባዔህ ዩምቡሉወ፣ ዩመቡሉወም ታዒለህ ኪኒ፤ 2.ስምዖን ጰጥሮስ፣ ዲዲሞስ አክያን ቶማስ፣ ገሊላ ቃናህ ቲያ የከ ናትናኤሊህ፣ ዘብዴዎስ ዻይሎከ አኪ ላማ ተምሃራይ ኢንኮህ  ዪኒን፡፡ 3.ስምዖን ጰጥሮስ "ዓሣ አጽማዶ አዳዎ ኪዮ" አክየ፡፡

    ኢሲን ኮሊህ አዴሊኖ አክየን፡፡ የውዒኒህ የድየኒህ ዛልባድ ሳየን፣ ያከካህ ታማይ ባር ኢንከቶ ኡካ ዓሣኮ ማባዽኖን፡፡ 4.ሑገ ማሕተጉል  ኢየሱስ ባሕሪ ዳራታል ሶለ፣ ተምሃሮ ለ ኢየሱስ ኪናም ማዻጊኖን፡፡  5.ኢየሱስ ለ 'ኮኢሮ! ዓሣ ሊቲንሆ?" አክየ፡፡ 

 ኢሲን ኢንኪም ማሊኖ አክየን፡፡

 6.ኡሱክ መርበብ ዛልባኮ ሚድጋል ዒዳ ገሊቲኒክ አክየ፡፡ አማይጉል መረብ ባሕራድ ዒደን፣ ማንጎ ዓሣህ ዽብዾኮ ኡጉተሚህ መረብ ሂርጎና ታነን፡፡ 

   7.ታማይጉል ኢየሱስ ኪኂን ተምሃራይ፣ ጰጥሮሱክ "ማዳራ ኪኒ ኡኮ!" አክየ፡፡ ስምዖን ጰጥሮስ ማዳራ ኪኒኮ! ያናም ዮበጉል፣ ሢራሓህ የህ ሣራ የየዔህ ይነጉል አማይጉል ሣራ ሀይሲተህ ፍዽተህ ባሕራድ ሳየ፡፡ 8.አኪ ተመሃሮ ለ ባዾኮ ሚሪሕ የኒህ ዪኒኒም ቦል መትሮቲያ ታከም ጥራሕ ኪይይ ዪነጉል፣ ዓሣህ የመገ መርበብ ሂርጋክ ዛልባህ የመቲን፡፡ 9.ዛልባኮ ኦበን ዋክተ ዓሣ አሞል አክታነ ሒምትከ ኢንገራ ዩብሊን፡፡ 10.ኢየሱስ ለ ካዶ ተጸወዲን  ዓሣኮ ባሃ አክየ፡፡

   11.አማይጉል ስምዖን ጰጥሮስ ዛልባድ ሳየህ ቦል ኮንቶም ናናባ ዓሣህ የመገ መረብ ባዾል ቱላል ሂርገ፣ ታሂዶለ ዓሣ ይብዸሚህ መርበብ ማዓንዺዺና፡፡ 12.ታሃምኮ ላካል ኢየሱስ "አማ በታ" አክየ፡፡ ማዳራ ኢየሱስ ኪናም ኡምቢህ የዸጊኒህ ዪኒኒጉል ካተምሃሮኮ ኢንከቲ ኡካ አቱ አቲያ ኪቶ የህ፣ ኤሠሮ ይድፍረቲ ማና፡፡ 13.ኢየሱስ የመተ፣ ኢንገራከ ዓሣ ታማምባሊህ ናው ኢሰህ አካህ ዮሖወ፡፡

  14.ኢየሱስ ራባኮ ኡጉተምኮ ላካል ካተመሃሮ ቱብለም ታሃም ማዳሕ ዋክተህ ኪኒ። 

ኢየሱስከ  ጰጥሮስ

  15.በተኒምኮ ላካል ኢየሱስ ስምዖን ጰጥሮሱከ"ያሃኒስ ባዻ ስምዖኖ! ታይ ይክኅናምኮ አጋናል ፈርተህ ይክኅንቶ?"አክየ፡፡  ኡሱክ "ዮ ይማዳራ! አኑ ኩኪኅኒዮም አቱ ኢሰህ ታዸገ" የህ ኤልምሊሰ፡፡    

  16.ኢየሱስ ለ ዪለማሙ ዻዉዽ አክየ፡፡ ማላሚ ጊዘህ ለ "ዮና ባዻ ስምዖኖ! ይክኅንቶ?" አክየ። ኡሱክ "ዮ ይማዳራ! ኩክኅኒዮም አቱ ታዽገ" አክየ፡፡ ይዕዶ ዻዉዽ አክየ፡፡ 17.ማዳሒ ዋክተ "ዮና ባዻ ስምዖኖ ይክኅንቶ?"አክየ፡፡ ማዳሒ ዋክተ "ይክኅንቶ? "አክየጉል ጰጥሮሰ ይኅዝነህ "ይማዳራ! አቱ ኡማናም ታዽገ፣ አኑ ኩክኅኒዮም ለ ታዽገ" አክየ፡፡ ኢየሱስ ታህ አክያ፣ "ይዕዶ ኢፋሪሳይ ኦረቢስ" አክየ፡፡ 18.ሓቀህ ሐቀ ኮካይክ አኒዮ፣ አቱ ቡርጉዳክ ታነሃኒህ ኢሲ ራጋድ ኢሲ ጋባህ ቲክቲየህ ኢሰህ ጉርተል አዲይክ ቲነ፣ ታሲምጊለጉል ለ አቱ ጋቦብ ፋሕ ኢሰህ አኪ ሒያው ኩአስኪቴ ለ፣ ጉረዋይታል ኩበሎን፡፡ 19.ታሃሞም አክየም ጰጥሮስ አይ ዓይንቲህ ራባህ መዔፉጎ አስክብረለም አይቡሉዊህ ኪኒ፣ ታሃምኮ ላካል  ጰጥሮሱክ "ይክቲል" አክየ፡፡

ኢየሱስከ አኪ ተምሃራይ

  20.ጰጥሮስ ኡፍኩና የህ ኢየሱስ ኪሒን ተምሃራይ ካአክቲሊህ ዩብለ፣ ታይ ተምሃራይ ዲራር ዋክተ ኢየሱስ አይቲል ይጽጊዔህ "ይማዳራ! ቲላሰህ ኩያስሓየቲ አቲያ ኪኒ?" የህ ካኤሠረ፡፡ 21.ጰጥሮስ ካያ ዩብለህ "ይማዳራ ታይ ሒያውቲ አይም አከለ?" የህ ኢየሱስ ኤሠረ፡፡ 

  22.ኢየሱስ ለ አኑ አሚተም ፋናህ ማሮ ጉራጉል ኮያ አይም ኤድ ኩሃይተ፣ አቱ ይክቲል አክየ። 23.ታይ ምክኒያታህ ሳዖልቲቲ አዳድ ታይ ተምሃራይ ማራባ ያን ወሪ ይምቢቲነ፣ ያኮካይ ኢካህ ኢየሱስ አኑ አሚተምፋናህ ማሮ ጉረሚህ አቱ አይም ኤድኩሃይተ የካህ ማራባ ሚና፡፡ 24.አማይጉል ታይ ጉዳይህ ዳዓባል ኡምቢህ ይምስኪረቲያከ ታይ ጉዳያት ይጽሒፈቲ ታይ ተምሃራይ ኪኒ፣ ካማስኪር ሓቀ ኪናም ናዽገ፡፡ 

    25.ኢየሱስ አበ አኪ ማንጎ ጉዳይ ለል ያነ፡፡ አኑ አካለም ባሊህ ኡሱክ አበ ጉዳያት ኡምቢህ ኢንከከቶህ ይምጽሒፈህ ያከዶ ቲምጽሒፈ ማጻሒፍቲ  ዓለም ኢሰህ ያይካዖ ዺዔ ማዻዺና፡፡