ማቴዎስ ወንጌል

 ማቴዎስ ይጽሕፈ ንማዳራ ኢየሱስ ክርስቶስ ወንጌል

ሳይማ            

    ማቴዎስ ወንጌል፣ ኢየሱስ ሙሙቲህ ታስፋ ዮኮመህ አካህ ዋንሲተ ኡሩሰናከ መዔፉጊህ ዳዓይና ኪን ኪዳንኮ ሕዝበህ ዮሖወ ታስፋ ቃል ያምፍጽመም ካ ካባርካታህ ኪናም ያይብሥረ በሠራታ ቃል ይብዸቲያ ኪኒ፡፡ ታይ በሠራታ ቃል ኢየሱስ ተን ፋናድ ዮቦከህ የነበም አይሁዱህ ጥራሕ አከካህ ሙሉእ ዓለም ኦሳክ ኪኒ፡፡ ማቴዎስ ወንጌል ጥንቃቀህ ዮምዞጎዶወ ማጽሐፍ ኪኒ፣ ኢየሱስ ኡብካኮ ኤዸዺሰህ ጥምቀት ዳዓባልከ ፈተና ዳዓባል የይበረረሄምኮ ሣራህ ገሊላል አበ ስብከት፣ አይማሃረከ ኡሩስናን አገልግሎት ካብኢሳ፣ ታርከኮ ካታሰህ ኢየሱስ ገሊላኮ ኢየሩሳሌም ኡላል አበ አራሕከ ካዔድመህ ባኪቶ ለግዲናል የከ ጉዳይ ያዝርዚረ፣ /ሎዋ/ ታይ ጉዳያት ካ ታካሪምናንከ ኡጉትናን ያይጠቀለለ፡፡ ታይ ወንጌል ኢየሱስ፣ ፉጊ ሕገ ያይታርጋሞ ሢልጣን ለቲያከ መዔፉጊህ ማንግሥቲህ ዳዓባል ያይምሂረ ናባ መምሂር ኪናም አበህ ካብ ኢሳ፣ ካምሂሮኮ ማንጎ ኪፍሊት ኢሲሲ ቢሶህ የምጠነከረ ኮና ኪፍሊቲል ያምዲበ፡-

1. ፉጊ ማንግሥቲህ ዘጋህ  ጠባይ፣ ሢራሕ መብትከ ባክቶ ዕዲል ያይርድኤ ኢምባ ስበከት (ማዕ.5-7)፡፡

2. ላማምከ ታማን ተምሃርቲያ ወንጌል ስብከቲህ ፋሪመን ዋክተ አካህ ቶምሖወ መምረሒ (ማዕ.10)፡፡ 

3. መዔፉጊህ ማንግሥቲህ ዳዓባህ ካብተ ኢሲሲ ምሳለታት (ማዕ.13)፡፡

4. ተምሃርቲ ትርጉም ታይርድኤ ሚሂሮ (ማዕ 18)፡፡

5. ካዲ ዳባኒህ ፍጻመከ መዔፉጊህ ማንጊሥቲህ ሙሙቲህ ባርካታል ቶምሖወ ሚሂሮ    (ማዕ.24-25 ) 

                       _____________________________

ማዕራፋ  1

ኢየሱስ  ክርስቶሲህ ማባኮ ሐረግ

(ሉቃ፣3፣23-38 )

    1. ዳዊትከ አብራሃም ዳራኮ የከ ኢየሱስ ክርስቶሲህ ማባኮህ ሐረግ ታይቲያ ኪኒ፡፡ 2. አብራሃምኮ ይስሐቅ ዮቦከ፣ ይስሐቅኮ ያዕቆብ ዮቦከ፣ ያዕቆብኮ ይሁዳከ ሳዖል ቶቦከ፡፡ 3. ይሁዳኮ ፋሬስከ ዛራሕን ትእማር አክያን ኑማኮ ዮቦኪን፣ ፋሬስኮ ሐጽሮን ዮቦከ፣ ሐጽሮንኮ ራም ዮቦከ፡፡ 4. ራምኮ አሚናዳብ ዮቦከ፣ አሚናዳብኮ ነአሶን ዮቦከ፣ ናሶንኮ ሰሎሞን ዮቦከ፣ 5. ሰሎሞንኮ ቦዔዝ ረዓብ አክያን ኑማኮ ዮቦከ። ቦዔዝኮ ኢዮቤድ ሩት አክያን ኑማኮ ዮቦከ፣ አዮቤድኮ እሴይ ዮቦከ፣ 6. እሴይኮ ንጉሥ ዳዊት ዮቦከ፣ ኑጉሥ ዳዊትኮ ሰሎሞን ኦሪዮን አክያን ኑማኮ ዮቦከ፣ 7. ሰሎሞንኮ ሮብዓም ዮቦከ፣ ሮብዓምኮ አቢያ ዮቦከ፣ አቢያኮ አሳፍ ዮቦከ፣ 8. አሳፍክኮ ኢዮሳፍጥ ዮቦከ፣ ኢዮሳፍጥኮ ኢዮራም ዮቦከ፣ ኢዮራምኮ ዖዝያን ዮቦከ፣ 9. ኦዚያንኮ ኢዮታም ዮቦከ፥ ኢዮታምኮ አካዝ ዮቦከ፣ አካዝኮ ሕዝቅያስ ዮቦከ፥ 10. ሕዝቂያስኮ ምናሴ ዮቦከ፣ ምናሴኮ አሞን ዮቦከ፥ አሞንኮ ኢዮሲያስ ዮቦከ፥ 11. ኢዮሲያስኮ እስራኤል ሕዘቢ ባቢሎን ኡላል የመረኪኒህ የደይን ዳባን ዮአኪምከ ካሳዖል ዮቦኪን።

  12. ባቢሎን ተመረከምኮ ላካል ዮአኪንኮ ሳላቲያል ዮቦከ፥ ሳላቲያልኮ ዘሩባቤን  ዮቦከ፣13. ዙሩባቤልኮ አብዩድ ዮቦከ፣ አብዩድኮ ኤልያቂም ዮቦከ፣ ኢያልቂምኮ አዞር ዮቦከ፡ 14. አዞርኮ ሳዶቅ ዮቦከ፣ ሳዶቅኮ አኪም ዮቦከ፣ አኪምኮ ኤልዩድ ዮቦከ፣ 15. ኤልዩድኮ አልአዛር ዮቦከ፣ አልዛርኮ ማታን  ዮቦከ፣ ማታንኮ ያዕቆብ ዮቦከ፣ 16. ያዕቆብኮ ዮሴፍ ዮቦከ፣ ታይ ዮሴፍ መሲሕ አክያን ኢየሱስ ዻልተ ማርያም ሉዉስ ኪይይ ይነ፡፡ 

   17. አማይጉል አብርሃምኮ ዳዊት አፋራምከ ታማን ማባኮ /ዋላዶ/። ዳዊትኮ ባቢሎን አማራክ ፋናህ አፋራምከ ታማን ማባኮ፣ ባቢሎን አማራኮ  መሲሕ ፋናህ  አፋራምክ ታማን ማባኮቲያ  ኪኒ፡፡

ኢየሱስ ክርስቶሲህ  ኡብካ

   18. ኢየሱስ አካህ ዮቦከ ዒሊ ታህ ኪኒ፣ ኢና ማርያም ዮሴፍህ ትምሊይሰህ ታነሃኒህ ቲታ ገየካህ መንፈስ ቅዱሱህ ሶኒተህ ገይምተ፡፡ 19. ተሉዉስ ዮስፍ መዔ ሒያውቶ ኪይነጉል ማርያም ሒያው ነፊል ተያይዋራዶ ማጉሪና፣ አማይጉል አይሲዽገካ ተሐቦ ይሕሰበ፡፡ 20. ታይ ጉዳይ አሕስቢክ ያነሃኒህ መዔፉጊህ መልአክ ሶኖህ አካህ ይምቡሉወህ ታህ አክየ፡፡ ዳዊት ባዻ ዮሴፎ! ኩሊሶ ማርያም ሶኒይተህ ታነም መንፈስ ቅዱሱህ ኪኒጉል ተያ ኢሲዓረህ /ኢሲ ዲኪህ/ በይቶ ማማይሲቲን፡፡ 21. ኢሲ ባዻ ዻለለ፣ ኡሱክ ሚናዳም ኃጢአትኮ ያዳኃኖ ኪኒጉል ሚጋዓህ ኢየሱስ አክየ ሊቶ፡፡ 22. ታሃም ኡምቢህ ተከም መዔፉጊ ኢሲ ነቢይህ ታህ የህ ዋንሲተም ታምፈጻሞ የህ ኪኒ፡፡ 23.“ሀይከ ድንግል ሶኒይቶ ኪኒ፣ ባዻ ዻለለ፣ ሚጋዓህ አማኑኤል አክ የኒህ ደዕምመለ፡፡"አማኑኤል ያናም መዔፉጊ ኖሊህ ኪኒ”ያናም ኪኒ፡፡ 24. ዮሴፍ ዽንኮ ኡጉተጉል መዔፉጊህ መልአክ ይኢዚዘሚህ መሠረቲህ፣ ሊይሶ ማርያም ለ ኢሲ ዲክህ በየ፡፡ 25. ያከካህ ባዻ ዻልታም ፋናህ ተማዻጊና፡፡ ዮሴፍ ዮቦከ ሕፃናክ ሚጋዓህ "ኢየሱስ"አክ የዽሔ፡፡

ማዕራፋ 2

   አይሮማሐኮ  ተመተ ሑቱክቲ መርማሮ

  1. ሄሮድስ ይሁዳ ባዾህ ኑጉሥ ኪይይ ይነ ዋክተ፣ ኢየሱስ ይሁዳ ባዾል፣ በተልሄም ካታማል ዮቦከ፡፡ አማይጉል ሑቱክቲ መርማሮ አይሮማሓኮ ኢየሩሳሌም የመቲን፡፡ 2. ታህ የኒህ ኤሠረን፣ ዮቦከ አይሁድ ንጉሥ አልኪን የኒህ ኤሠረን? ሕቱክታ አይሮማሐድ ኑብለህ አካህ ናስጋዶ ነመተ፡፡ 3. ኑጉሥ ሄሮድስ ታሃም ዮበጉል ሐንካቢተ፡፡ ኢየሩሳሌም ሒያው ኡምቢህ ካሊህ ኢንኮህ ሐንካብተኒህ ይምህውኪን። 4. ታሃማህ ሄሮድስ ካህናት አሞባዕልከ ሕዝቢ ሕጊ ሙሁራን የስከሄለህ"መሲሕ"ያቡከም አል ኪኒ?  የህ ኤሠረ፡፡

   5. ኢሲን ታህ የኒህ መልስ ዮሖዪን፣ መሲሕ ያቡከም ይሁዳ ክፍለ ሀገሪል፥ ቤተ ሊሄም ካታማል ኪኒ፣ አይሚህ ነቢይህ ታህ ያዽሔ ትንቢት ይምጽሒፈ፣ 6. ይሁዳ ክፍሊህ ሀገርል ገይመታ አቱ በተልሄሞ! ይሁዳ ባዾህ ዋና ዋና ካታማታትኮ ኢንኪሚህ ማዕንዽቶ፣ አይሚህ እስራኤልኮ ይ ሒያው ዻዉዻ መራሒ ኮኮ አውዔ ለ፡፡ 7. ታሃሚህ ላካል ሄሮድስ ቶይ ሑቱክ ታምርሚረ ሒያው ሑበኦህ (ሱዉሩህ) ደዕሲሰህ ሑቱክቲ ዩምቡሉወ ዋክተ ሰሎህ /ጥንቃቀህ/ ኤሠረህ ይምርዲኤ፡፡ 8. ታህ የህ በተልሄም ተንፋረ፡፡ አዱዋይ ሕፃን ዳዓባል ሰሊታይ ኢምርሚራ አክየ፣ ገይታንጉል አኑ ኤደህ አካህ አስጋዶክ አማይ  ዮከያ። 

   9. አሲን ኑጉሥ ቃል ዮቢኒሚህ ላካል የውዒኒህ የደዪን፣ የደይን ዋክተ ታይ አይሮማሐል ዩብሊን ሑቱክቲ ባሶድ ባሶድ አክ አዲዪክ ተን አይሚሪሕህ ጋባዔኒህ ዩብሊን፣ ታይሑቱክቲ ሕፃን ኤልያነ ቦታል የመተህ ሶለ፣ 10. ሑቱክታ ዩብልን ዋክተ ጋዳህ ኒያተን፡፡ 11. ድኪድ ሳየኒህ ሕፃን ኢሲና ማርያምሊህ የከህ ዩብልንጉል፣ ይምብርክኪኒህ አካህ ይስጊዲን፣ ሲኒ ሣፁና ፋከኒህ ዋርቀ፣ ዕጣን፣ ከርበ ገጸበረከቲህ አካህ ዮሖይን (ይስቅርቢን)፡፡

   12. ታማሚህ ላካል፣ ሄሮድስ ኡላል ጋሐናምኮ መዔፉጊ ሶኖህ ተን ሰሊሰህ፣ አኪ አራሕኮ ሲኒ ዲኪህ ጋሔን፡፡

ግብጽ ኩድናን

  13. ሑቱክቲ መርማሮ የደይኒሚህ ላካል፣ መዔፉጊህ መልአክ ዮሴፍህ ሶኖህ አካህ ዩምቡሉወህ"ሄሮድስ ሕፃን ያግዳፎ ጉራይ ያነጉል፣ ኡጉት ሕፃን ኢናሊህ ኢብዻይ ግብጸ ኩድ፣ ኮካም ፋናህ ታማል ሱግ አክየ፡፡" 

   14. ዮሴፍ ባር ኡጉተህ ሕፃን ኢናሊህ ይብዸህ ግብጸ የደ፡፡ 15. ታማል ሄሮድስ ራባም ፋናህ ሱገ፣ ታሃም ተከም መዔፉጊ ነቢይህ"ኢኒ ባዻ ግብጸኮ ደዔ''ያዽሔ ቃል ያምፋጻሞ የህ ኪኒ፡፡

ሄሮድስ   ሕጻናት ይስግዲፈ

   16. ሄሮርደስ ሑቱክቲ መርማሮ ካየይተለሊኒም የዸገ ዋክተ ጋደህ የምነደደ፣ በተልሄምከ አከባቢል ታነ ዲካል ኡምቢህያል ወተሀደር ፋረህ ላሚ ኢግዳከ ታማምኮ ጉባል ዒድመህ አኒናን ላብቲያ አኪናን ሕፃን ይስጊዲፈ፣ ታሃም አበም ሑቱክቲ ይምቡሉወ ዋክተ መርማሮኮ ኤሠረህ ይምረድኤሚህ ሪሚዲህ ኪኒ፡፡ 17. ታሃሚህ ዳዓባል ነቢይ ኤርምያስ ታህ የህ ዋንሲተ ትንቢት ይምፍጽመ፣ 18."ኃዛንከ ማንጎ ዋይታህ አንዻህ ራማል ዮሞበ፥ ራሔል ኢሲ ዻሎህ ወዕተ፥ ዻይሎ አክራብተጉል ያምፀነነዒኒም ሒንተ።"           

ግብጸኮ ጋሔኒም

   19. ሄሮድስ ራበሚህ ላካል መዔፉጊህ መልአክ ግብጺ ባዾል ዮሴፊህ ሶኖህ ዩምቡሉወ፣ 20. ሕፃን ታግዳፎ ጉራይ ቲነ ሒያው ራበኒህ ያኒኒክ ኡገታይክ ሕፃን ኢናሊህ ኢቢዻይ እስራኤል ባዾ አዱይ አክየ፡፡ 21. አማይጉል ዮሴፍ ኡጉተህ ሕፃን ኢናሊህ ይብዸህ እስራኤል ባዾ ጋሔ፡፡ 22. አማምኮ ላካል አባ የከ ሄሮድስ ኢዻህ ይሁዳ ባዾል አርኬሌዎስ ይንጊሠህ ያነም ዮበጉል ዮሴፍ ታማህ ያዳዎ ማይሲተ። ካዶሊህ ሶኖህ ጋባዔህ ሚሊኪት  መዔፉጎኮ አካህ ዮምሖወጉል ገሊላ ባዾ የደየ፡፡ 23. ታማርከ ማደጉል ኢሲ መኖሪያ ናዝሬት ካታማል አበ፣ ታሃም አካህ ተከም ነቢያታህ"ናዝራዊ የኒህ ደዕምማ"ያን ቲንቢት ያምፋጻሞ የህ ኪኒ፡፡

ማዕራፋ 3

ያይጥሚቀ ያሃኒስ ስብከት

(ማር.1፤1-8፤ሉቃ፤3፤1-18፤ዮሐ 1፤19-28)

  1. ታማይ ጊዘህ አጥማቂ ያሃኒስ የመተህ ይሁዳ ባራካል ያምሂሪኒም ኤዸዺሰ፡፡ 2 .አይምሂሪህ ለ"ሀይከ መዔፉጊህ ማንግሥት ካብ የህ ያነክ ንስሐ ሳ የህ ነቢይ እሳይያስ ወንሲተም ያሃኒስ ዳዓባል ኪይይ ይነ፡፡ 3."ማዳሪ አራሓህ ኦምሶኖዶዋ፣ ጺርጊያ ሪግ ኢሳ አይክ ባራካድ ዋዕ ያ ሒያውቲ ዲምጸ"የህ ኢሳይያስ ዋንስተም ያሃኒስ ዳዓባል ኪኒ። 4. ያሃኒስ ሳሪ ጋል ዳጋርኮ ሠራሕመህ ይነ፣ ዋለል ዓርሞ አክቲይ ይነ፣ ካምግቢ ዓወኒከ፣ ባራኪ ባስካ ኪይይ ቲነ፤ 5. ታማይ ዋክተ ኢየሩሳሌም ካታማኮ ይሁዳ ባዾ፣ ዮርዳኖስ አካባቢኮ፣ ኡማን ሒያው ያሃኒስ ዻጋህ አምቲይ ይኒን፡፡ 6.ሲኒ ኃጢአት ለ አምነዘዚክ ዮርዳኖስ ወዓድ ያሃኒስ ጋባህ አምጥምቂይ ይኒን።

   7. ያሃኒስ ማንጎ ፈሪሳውያንከ ሰዱቃዊያን ያምጣማቆና ካኡላል አምቲህ ዩብለጉል ታህ አክየ፣ አቲን ኮ'ዓሮራ ዻይሎ! ታምተ ቁጡዓኮ አካህ ታውን አራሕ ኢይ ሲናክ የ?" 8. አማይጉል ንስሓ አካህ ሳይተኒም ያምልክተ ሢራሕ ሢራሓ፡፡ 9. ናኑ አብራሃም ዻይሎ ኪኖ አይክ ማማካሕና፣ መዔፉጊ ታይ ዻይትኮ አብራሃማህ ዻይሎ አካህ ገይስሶ ዺዓ ሲናክ አይክ አነ፡፡ 10. ካዶ ሓዾዽ ሪሚዳኮ ይግሪዔህ ዒዶ ሚሳር ይይልልገህ ያነ፣ አማይጉል መዔ ፍረ ባሄ ዋይታ ሓዻ ኡምቢህ ይገሪዔህ ጊራድ ዒደለ፡፡ 11. ሀይከ አኑ ንሲሓህ ላየህ ስን አይጥምቂክ አኒዮ፣ አማም ታከያካህ ዮኮ ላካል ያምተ ቲይ መንፈስ ቅዱስከ ጊራህ ሲን አይጥሚቀ ለ፣ ኡሱክ ዮኮ ጋደህ ያይሰ፣ አኑ ካኢቢህ ካበላ አካህ አይካዖ ኡካ ኤዳቲያ ማኪዮ፡፡ 12. ኡሱክ ምሂርቲ ሐሳርኮ አካህ ባዽሳ ማስኤ ለ፣ ይጽሬሚህ ላካል ኢላው ማዕካናድ ሳይሳ፣ ሐሳር ለ ባደዋይታ ጊራህ ሓራሪሳ፡፡

ኢየሱስ አምጣማቅ

(ማቴ 1፡9-11፤ ሉቃ 3፡21-22)

  13. ታማይ ዋክተ ኢየሱስ ያሃኒስ ጋባህ ያምጣማቆ ገሊላኮ ዮርዳኖስ ወዓህ የመተ፡፡ 14. ያሃኒስ"ታሃም ማታከ፣ አኑ ኩጋባህ አምጣማቆ ዮህ ኤዳሃኒህ አይናህ ተህ ዩላል ታሚተ?"የህ ደሶ ይዕኪነ።

   15. ኢየሱስ ለ"ጽድቂ ጉዳይ ኡምቢህ ታህ ነህ ናፋጻሞ ኖህ ኤዳጉል ሓብ፣ ታሃም 'ታኮይ የህ ኤልደልሄ፡፡"ያሃኒስ ታማይ ጉዳል የምሰመመዔህ ኢየሱስ ይጥምቀ። 16. ኢየሱስ ይምጥምቀህ ላየኮ የውዔጉል አማይጉልካህ ዓራን ፋክተ፣ መዔፉጊህ መንፈስ ዱጉጉለይታህ ይምግደህ ኦበህ ኢየሱስ አሞክ አዕሩፊህ ዩብለ፡፡ 17. ታማይጉል"ኪሕኒዮ ይ'ባዺ ታይቲያ ኪኒ፣" ያ አንዻሕ ዓራንኮ የመተ።

ማዕራፋ 4

ኢይሱስ ፋታና

(ማቴ.1 ፤12-13፤ ለቃ. 4 ፤1-13)

   1. ታሃምኮ ላካል ኢየሱስ ዲያብሎሱህ ያምፋታኖ መንፈስ ቅዱስ ባራከህ ያዳዎ ካኡጉጉሰ፡፡ 2. ታማል ሞሮቶም ለለዕቲያከ ሞሮቶም ባርቲያ ዮጾመሚህ ላካል ሉወ፡፡ 3. ያፍቲነ ዲብሎስ ኢየሱሱል የመተህ"አቱ መዔፉጊህ ባዻ ተከምኮ ኢስኪ ታይ ዻይት ኢንገራ ያኮ ኢኢዚዝ"አክየ፡፡ 

    4. ኢየሱስ"ሒያው ማርታም መዔፉጊ ዋንሲታ ቃላህ ኡምቢህ ኢያህ ኪኒካ፣ ኤንጌራህ ጥራሕ ማኪ፣"የህ ይምጽሒፈህ ያነ አክየ፡፡ 5. ታሃሚህ ላካል ዲያብሎስ ኢየሱስ ቅድስት ካታማ ኢየሩሳለም ካበየ፣ በተ መቅደስ ናሕሳክ ዳራታክ ካ ሶሊሰህ፣ 6. ታህ አክየ፣"ኮያ ዻዉዾና መዔፉጊ ኢሲ ማላይካ ኮህ ያኢዚዘ፣ ኩኢቢ ዻይቲህ ጎንፎይታምኮ ሲኒ ጋባህ ይብዽኒህ ኩ ያድግፊን የህ ይምጽሕፈህ ያነ፣ አማይጉል አቱ መዔፉጊህ ባዻ ተከምኮ ኢስኪ ታርከኮ ፍዽታይ ጉባል ኦብ አክየ፡፡"

  7. ኢየሱስ ለል"መዔፉጎ ኢሲ አምላክ ማፋታኒን የህ ይመጽሒፈህ ያነ"አይክየህ ኤልደሄ፡፡ 8. ጋባዔህ ዲያብሎስ ኢየሱስ ጋዳህ ናውታ ኢምባህ አሞክ የየዔ፣ ዓለም ማንግሥታት ኡምቢህ ተንተን ኪብረሊህ ካ'ዩስቡሉወህ፣ 9.ትንብርኪከህ ዮህ ትስግደሞኮ ታሃም ኡምቢህ ኮህ አሓየ ሊዮ"አክየ። 10. ኢየሱስ ለ"ቶህ አዱይ ኮሰጣን"'ኢሲ አምላካህ መዔፉጎህ ኢስጊድ፣ 'ካያ ዲቦህ እይሚልክ' የህ ይምጽሒፈህ ያነ አክየ። 11. ታማሚህ ላካል ዲያብሎስ ኢየሱስ ሓበህ የደየ፣ መላእከት ተመተህ ኢየሱስ ይስግልግሊን።  

ኢየሱስ አይማሃርቲ ሢራሕ ገሊላል ኤዸዽሰ

(ማር 1፣14-15፤ሉቃ 4፣14-15)

   12. ኢየሱስ ያሃኒስ ዽብዾከ ማዹዋ ዮበ ዋክተ ገሊላ ቱላል የደየ፣ 13. ናዝሬት ካታማ ሓበህ ቅፍሪናሆም ኡላል የደየህ ዲፈየ። ቅፍሪናሆም ዛነሎንከ ንፍታሌም ዞባህ ባሐሪ ዳራታል ገይምታ ካታማ ኪኒ፡፡ 14. ታሃም ተከም ነቢይ ኢሳያይሳህ ታህ ያ ቃል ያምፋፃሞ የህ ኪኒ፣

  15."ባሐሩላል በያ አራሕከ ዮርዳኖስ ወዓኮ ታብሶል ገይምታ ዛብሎን ባዾ፣ ንፍታሌም ባዾ፣ አረማዊያን ገሊላ፣ 16. ታማም ባልህ ዲተድ ማራይ ይነ ሕዝብ ናባ ኢፎ ዩብለ፣ ራቢ ጺላል ኤልዒደ ባዾል ገይምታማህ ኢፊ የውዔ፡፡"17. ታማይ ዋከተኮ ኤዸዽሰህ ኢየሱስ መዔፉጊህ ማንግሥት ካብተህ ታነክ ንሲሓ ሳ"አይክ ያይምሂርኒም ኤዸዽሰ፡፡

ኢየሱስ አፋራ ዓሣ ታጽምደም ደዔ

( ማር 1፣ 16-20፤ ሉቃ.5፣1-11)

   18. ኢየሱስ ገሊላ ባሕሪህ አፍኮ ትላህ ላማ ሳዓል ዩብለ፣ ኢሲን ጴጥሮስ አክያን  ሲምዖንከ፣ ካሳዓል እንድሪያስ ኪይይ ይኒን፡፡ ዓሣ ታጸወደም ኪይይ ይንንጉል ሲኒ መርበብ ባሕራድ ዒዳይ ይኒን፡፡ 19. ኢየሱስ ለ አማ ዮድ'ካታአ፣"አኑ ሒያው ታጽሚደም ሲን አበልዮክ"አክየ፡፡ 20. ኢሲን አማይጉልካህ ሲኒ መርበብ ሓበኒህ ኤድ'ካታየን።

  21. ታማርከኮ ትላያ የህ አኪ ላማ ሳዓል ይቡለ፣ ኢሲን ዘብዴዎስ ዻይሎ ያዕቆብከ ያሃኒስ ኪይይ ይኒን፡፡ ሲኒ አባ ዘብዴዎስሊህ ዛልባክ ጋሔኒህ ሲኒ መርበብ ሢራሓይ ይኒን፡፡ ኢየሱስ ተን ደዔ፡፡ 22. ኢሲን አማይጉልካህ ዛልባከ ሲኒ አባ ሓበኒህ ካይክቲሊን፡፡

ኢየሱስ ማንጎ ሒያው ይምሂረምከ ኡሩሰም

ሉቃ( 6፣17-19)

   23. ኢየሱስ አይሁድ ጻሎት ዓርዋ ተከ ሙክራባታል አይምሂርከ መዔፉጊህ ማንግሥቲህ በሠራታ ቃል አይብሥሪክ፣ ገሊላልከ ኡማን ቱማል አምዘወወሪይ ይነ፡፡ ኢሲሲ ዓይነቲህ ዱረከ ሳክናህ ትምዽብዸ ሒያው ኡሩሳይ ይነ፡፡ 24. ካዋሪ ሶሪያ ሀገርልከ ኡማን ቱማል ዮሞበጉል፣ ሒያው ኢሲሲ ዱረከ ሳክናህ አምሰቀይቲነም ኡምቢህ ካኡላል ባሄን፣ ላሑተምህ ፋናድ ርኩሳት መናፍስት ኤድ ትሕድረም፣ ዒዳ ዱረ ልይትነምከ አካል ጉዶሎ ለም ኤድገይማይ ይኒን፣ ኢየሱስ ለ ኡምቢህ ተን ኡሩሰ፡፡ 25. ገሊላከ ታማና ካቶሙል ኢሩሰለምከ ይሁዳል፣ ዮርዳኖስ ወዒህ ታብሶኮ ተመተ ማንጎ ሒያው ኢየሱሱድ ካታይተ።

ማዕራፋ 5

           ኢየሱስ ኢምባት አሞል የከህ ይምሂረ 

ሚሂሮ (ምሳ 5-7)

  1. ኢየሱስ ማንጎ ሕዝበ ዩብለጉል እምባል የውዔህ ዲፈ፣ ካተምሃሮ ካ'ያደ ካብየን፡፡ 2. ታህ አይክ ያይምሂርንም ኤዸዽሰ፡፡

ሓቂ ኒያት

(ሉቃ 6፣20-23)

   3. መንፈሲህ ስናሞ ላትሳም፣ ማንግሥተ ሰማይ ተንቲያ ኪናም ኢዻህ ኒያቶናይ፡፡ 4. ታሕዝነሚህ፣ መዔፉጊ አምጻናናዕ አካህ አኃየለጉል ንያቶናይ፡፡ 

 5. ለዋሃት ባዾ ያውርሰንም ኢዻህ ንያቶናይ፡፡ 6. ጽድቀህ ኢላው ባሊህ አካህ ሉይታምከ ላየ ባልህ አካህ ባካርታም ጋናት ገየኒህ ሓይቶና ኪኖንጉል ንያቶናይ፡፡ 7. መሕረት አባታም፣ መሕረት ገዮና ኪኖንጉል ንያቶናይ፡፡ 8. ጽሪይ አፍአዓዶ ለም፣ መዔፉጎ ያብሎና ኪኖኑጉል  ንያቶናይ፡፡ 9. ሒያው ፋናድ ዋጋረከ ሳላም አብታም መዔፉጊህ ዻይሎ ኢስማናም ኢዻህ ንያቶናይ። 10. ጺድቀ ዮና ስደትከ መከራ ጋራይታም ማንግሥተ ሰማይ ተንቲያ ኪኒጉል  ንያቶናይ፡፡ 

  11. ዮያ ዮና ሒያው ስናህ ዋቲማከ ስን ያሰደድንጉል፣ ድራባህ ስን ሚጋዕ ለ ዓይንሳንጉል ንያታ፡፡ 12. ማንግሥተ ሰማይል ገይታን ሊሞ ናባቲያ ኪናም ኢዻህ ንያታ፣ ፍዽታ ኢዕንድራ፡፡ አይሚህ ሲን ባሶድ ትነ ነብያት ታማም ባሊህ ስደትከ መከራ ተን ማድሰኒህ ኪኖን ፡፡

ሙልሑከ እፎይቲ ዳዓባል ሚሳለ

(ማር.9፡50፤ሉቃ.14፤34-35

   13. ካታሰህ ኢየሱስ ታህ አክየ፣"አትን ባዾ ሙልሑ ክቲን፣ ያከ ኢካህ ሙልሑ ኢሲ ዻዓሞ ሓብታጉል አይናህ ኢሰህ ዻዓሞ ደሄይተህ ገይቶ ለ ዺዒታ? ኢሮህ ዒዳናምከ ሒያው ኢባህ ታምዒተምኮ ፈር ካምቦኮ ሳራህ ኢንኪሚህ ማታጥቅመ፡፡ 14. አቲን ዓለም ኢፎ ኪቲን፣ እምባክ ታነ ካታማ ሱዑቶ ማዽዕታ፡፡ 15. ኢፎይታ ኢፎሰህ ዒንኪብ ኤድጋማቲ ሚያነ። ዓሪ አዳድ ታነሚህ ኢፊሶ ዒሎህ ታምብሉወ ናውተ ቦታክ ሃን፡፡ 16. አማምባሊህ ሒያው ስን  መዔ ሢራሕ ዩብሊኒህ ዓራንቲ ሲን አባ ያይማስጋኖናክ ስን ኢፎይቲ ሒያው ነፊል ኢፎዎይ፡፡"

ሙሴ ሕጊህ ዳዓባል

   17. ለል ኢየሱስ ታህ አክየ፣"ሙሴ ሕገከ ነብያት ሚሂሮ አስዓሮ ኤህ ኤመተም ማካልና፣ አኑ ፉጹም ተናቦ ኤመተካህ ተን አስዓሮ ማማቲኒዮ፡፡ 18. ሓቀ ስናክ አይክ አኒዮ፥ ዓራነከ ባዾ ትላይታም ፋናህ ሕጊ ኡምብህ ያመፍጺመካህ ሕገኮ ኢንኪ ጽንጋፍቲ ወይ ኢንኪ ነጥቢ አክ ምያምስዒረ፡፡ 19. አማይጉል ታይ ትዛዛትኮ ዕንዻቲያ ክንቲያኮ ኢንከቶ ኡካ ያይፍርሰ ቲያከ፣ አኪ ሒያው ለ ታህ አብቶ ያይምሂረ ሒያወቲ ማንግሥተ ሰማይል ዒንዻቲያ ያከ፡፡ አማም ታከያካህ ትኢዛዛት ኡምቢህ ያፍጽመ ቲያከ፣ አኪ ሒያው ለ ታህ የኒህ ያፋጻሞና ያምሂረ ሚናዳምቲ ማንግሥተ ሰማያል ናባቲያ ያከ፡፡ 20. ስን ጽድቂ ሙሴ ሕጊህ መምሂራንከ ፈሪሳውያን ጽድቀኮ አይሰ ዋየምኮ ማንግሥተ ሰማያል ሡሩህ ሳየ ማልቲን ስናክ አይክ አኒዮ፡፡"

  21. ባሶ ዋክተ ቲነ ሒያዋክ የኒም ቶብኒህ ታኒን፣ ታሃም 'ማግዳፊን ሒያውቶ ይግድፈቲያል ኤልያምፍርደ' ያናም ኪኒ፡፡ 22. አኑ ስናካም ለ ታህ ኪኒ፣ ሒያዋል ታቁጡዔሚል ኡምብህ ኤልያምፍርደ፣ ለል ኡማን ሒያውቶክ አቱ አርብሔ ዋ ቲያ የህ ዋትመምኮ ፍርድ ዓረል ፍርድ አካህ ኤዳ፣ 'ዶንቆሮ' የህ ዋት መቲይ ኡምቢህ ጋሃናም ጊራህ ፍርደህ ኤዳቲያ ያከ፡፡ 23. አማይጉል ኢስ መባእ መስዋዕት መዔፉጎህ ኤልታስዕሪገ ቦታል ታነሃኒህ ካ ትስሕዚነ ሒያውቲ ያነም ታዝክረጉል፣ 24. ኢስ ማባዕ መስዋዕት ኤልታስዕሪገ ቦታክ ነፊል ድፈሳይ፣ አዱዋይ ባሶል ታማይ ሒያውቶሊህ ዋጋር፣ ታማሚህ ላካል አዱዋይ ታማይ መስዋዕት ካብ ኢስ፡፡ 25. ኩ ጉዳይህ ባዕሊ ኩ'ይክስሰህ ፍርድ ዓሪህ አራሓል አድክ ታነሃኒህ ጋባላዓይ ኢሲ ጉዳይህ ባዕላሊህ ኤምሰመመዕ፡፡ አማም አከ ዋይተምኮ ኩ ጉዳይህ ባዕሊ ዳኒያህ ትላሰህ ኩያሓየ፣ ዳኒያ ለ ትላሰህ ፖልሲህ ኩዮሖወህ ዋክኒ ዓረድ ሳይታ፡፡ 26. ሓቀህ ኮካይክ አኒዮ፣ ኢሲ ቅጽዓቲህ ታዕሪፋ ትክፊለህ ባክታም ፋናህ ታማርከኮ ማታውዔ።

ያማንዛሮና መዳም

   27. ጋባዔህ ኢየሱስ ታህ የ፣"ማአማንዛሪን ያናም ቶቢኒህ ታኒን።"28. አኑ ለ ታህ ሲናካይክ አኒዮ፣ 'ሳይጉደይታ የደለለዔህ ቁሉሕ የህ ይትምኔ ቲይ ኡምቢህ፣ ታማይ ዋክተ ኢስ አፍዓዶድ ተሊህ ይዙሙወም ባሊህ ሎይማ፡፡ '29. አማይጉል ሚድጊ ኢንቲ ኃጢአት ምክንያት ኮክ ተከምኮ ኤየዓይ ዒድ፣ አይሚህ ታማሚህ ምክንያታል ኩሰውነት ሙሉኡድ ጋሃነሚሳታድ ኮክ ራዓምኮ አጋናል ኢሲ አካልኮ ኢንኪ ክፍለ ዋይታጉል ኮህ ያይሰ፡፡ 30. ሚድጊ ጋባ ኃጢአት ምክንያት ኮክ ተከምኮ ኢግሪዓይ ዒድ፣ አይሚህ ሙሉእ ሰውነሊህ ጋሃናማድ ራዳምኮ ኢስ ሰውነትኮ ኢንኪ አካል ዋይታም ኮህ ያይሰ፡፡"

ያንሑዊኒም /ያፍትሕንም/ መዳም

(ማቴ. 19፡  9፤ ማር.10፡11-12፤ሉቀ. 16፡18)

  31. ለል ኢየሱስ ታህ የ፣"አማም ባሊህ ኢሲ ኑማ ይፍትሔቲ ኡምቢህ አካህ ትምፍቲሔ ምክንያት ያይቡሉወ ጽሑፍ አካህ ያሓዎይ የህ ያነ፡፡ 32. አኑ ለ ታህ ሲናካይክ አይክ አኒዮ፣ ዝሙት ምንያታል የክህ ማዽገይ ኑማ ያፍትሔ ቲይ ኡምቢህ ታማንዛሮ ምክንያት አካህ ያከ፡፡ ትምፍቲሔ ቲያ ኦርቢሳቲይ ኡምቢህ አመንዝራ ያከ፡፡"

                                                         ዺዋ  ዳዓባል

   33. ጋባዔህ ኢየሱስ ታህ የ፣"ታማም ባልህ ባሶህ ቲነ ሒያዋክ 'ዺዋህ መዔፉጎህ ቶሖወ ቃል እፍጺም ኢካህ ዺዋ ቃል ማይፋራሲን' የህ ያነም ቶብኒህ ታኒን፡፡ 34. አኑ ለ ታህ ሲናክ አይክ አኒዮ፣ ባክቶህ ማዽውቲና፣ ዓራናህ የከሚህ ማዽውቲና፣ አይሚህ ዓረን መዔፉጊህ ዙፋን ኪኒ፡፡ 35. ባዾህ የከሚህ ማዽውቲና፣ አይሚህ ባዾ መዔ ፉጊህ ኢቢህ ማዓታ ኪኒ፣ ኢየሩሳለሚህ የከሚህ ማዽውቲና፣ አይሚህ ናባ ኑጉሢህ ካታማ ኪኒ፡፡ 36. ኢሲ ዸግኅህ ተከሚህ ማዺውቲን፣ አይሚህ ኢሲ ዸግኃህ ዳጋርቶኮ፣ ኢንከቶ ኡካ ዓዶቲያ ወይ ዳቲያ አብቶ ማዽዕታ፡፡ 37 .አማይጉል ኩዋኒታ 'ዮ' ተከመኮ 'ዮ'፣ 'ማለ ተከምኮ ማለ' ታኮይ፡፡ ታሃምኮ ቲላየ ቃል ሰጣንቲያ ኪኒ።

ቂምከ በቀል ያባዾና መዳም

(ሉቃ.6፣29-30)

   38. ጋባዔህ ኢየሱስ ታህ የ፣ ኢንቲ ኢንቲ ቲዻህ፣ ኢኮ ኢኮ ቲዻህ ያናም ቶቢኒህ ታኒን፡፡ 39. አኑ ለ ታህ ስናክ አይክ አኒዮ፣ ኡማም ስናክ አበቲያል ኤል ማምባቃልና፣ አማይጉል ሚድጊ ዑዸ ኮክ ሳበዔቲያህ ጉሪ ዑዸ ኣካህ ኦይዞር፡፡ 40. ኢንኪ ሒያውቲ ኩቃምስ ኮክ በዮ ጉረህ ኩያክሲሰጉል፣ ኢስ ዙባ ኦሳይ በዮ አካህ ሓብ፡፡ 41. ኢንኪ ሒያውቲ ዳጉ አራሕ ዮልህ አዱይ የህ ኩኃይሊሳጉል፣ አቱ ዒጽፊ አራሕ አሊህ አዱይ፡፡ 42. ኩዻዔመቲያህ አካሑይ፣ ኮክ ያላካሖ ጉረቲያ ማካልቲን፡፡                                                                                               

                                      ናዓብቶሊት ያአክሕንኒሚህ ዳዓባል

(ሉቃ. 6፣27-36)ና

    43. ኢየሱስ ጋባዔህ ታህ የ፣"ኢሲ ዶባይቶ ኢክሒን፣ ኢሲ ናዓብቶሊ ኢንዒብ ያናም ቶብኒህ ታኒን። 44. አኑ ለ ታህ ስናክ አይክ አኒዮ፣ ሲኒ ናዓብቶሊት ኢኪሒና፣ ስደትከ መከራ ሲን ማዲሳማህ ለ ጻሎት አካህ አባ። 45. ታሃም አብታንጉል ዓራናል ያነ ሲናባህ ዻይሎ አከልቲን፣ ኡሱክ ኡማ ማራህከ ቅንዒና ለማራህ አይሮይታ ያየዔ፣ አማም ባሊህ መዔ ሒያዋህከ ኃጢአት ለሚህ  ሮብ ያሓየ። 46. ሲን ኪሒን ማራ ትክሕንኒሚህ አይሚህ ሊሞ ሊቲን? ኃጢአት ለም ለ ታህ አባይ ሚያኒኒሆ? 47. ሲኒ ሳዓላህ ጥራህ ሳላምታ ታሓይኒም የከምኮ አይሚህ ፋይዳ ለ ጉዳይ አባክ ታኒን? አረማውያን ታሃም አባይ ሚያኒኒሆ? 48"አማይጉል ዓራናል ያነ ስን አባ ፍጹም ኪናም ባሊህ አቲን ለ ፍጹማን ቲካ።

ማዕራፋ 6

ምጽዋት መቶኆዎህ ዳዓባል

   1. ኢየሱስ ኢሲ ዋኒ ካታሳክ ታህ የ፣"ሒያው ኖህ ታብሎ ተኒህ መዔ ሢራሕ ሒያው ነፊል አብታናምኮ ሰልታ፡፡ ታማም ተከምኮ ዓራናል ያነ ሲኒ አባኮ ኢንኪ ሊሞ ማገይታን፡፡ 2. አማይጉል አቱ ምጽዋት ታሔ ዋክተ ጉቡዛት ኪን ሒያው ሞሳ ገዮና ያናህ ኡማን ሙክራብከ አሮሑል ያምባላዎና ያናህ አባናም ማቢና፡፡ ሓቀህ ሲናክ አይክ አኒዮ፣ ኢሲን ሊሞ ባሶድ ገን፡፡ 3. አቱ ለ ዲካህ ሓቶ ታሓየ ዋክተ ሚድጊ ጋባ ታሓየም ጉሪ ጋባ ኡካ አዽገዋይቶይ፡፡ 4. አይሚህ ምጽዋት ሱዉሩህ ያኮ ኤልታነ፣ ስዉሩህ ታከም ያብለ ኩአባ ኩመዔ ኩ'ሢራሒህ ሊሞ ኮህ ያክፊለ።

ጻሎት ዳዓባል

(ሉቃ.11,2-4)

    5. ጋባዔህ ኢየሱስ ታህ የ፣"ጻሎት አብታን ዋክተ ጉቡዛት ባሊህ ማኪና፣ ኢሲን ሒያው አካህ ታብሎ ዒሎህ ኢሲሲ ሙክራብከ አሮሑቲ ዳሮቱል ሶለኒ ጻሎት አባናም ኪሒኖን፣ ሓቀህ ሲናክ አይክ አኒዮ፣ ኢሲን ሲኒ ሊሞ ዮኮሚኒህ ገን፡፡ 6. አቱ ጻሎት አባክ ታነሃኒህ ኢሲ ድክድ ሳአይ ኢሲ ኢፈይ አልፋይ፣ ዲቦህ ሱዉሩህ ያነ አምቡሉወ ዋ ኢሲ አባል ጻሎት አብ፣ ሱዉሩህ ተከም ያብለ ኩአባ ለ ኩመዔ ሢራሒህ ሊሞ ኮህ አክፊለ ለ፡፡

   7. አቲን ጻሎት አባክ ታንንሃኒህ አረማውያን ባሊህ ካንቶ ኪን ቃላታህ ማአላፍላፍና፣ ኢሲን ላፍላፋ ማንጋህ መዔፉጊ ተን ያበም ያካልን፡፡ 8. አቲን ለ ተናባሊህ ማኪና፣ አይሚህ ሲናባ ሲን ጉርሱሳም ገናህ ካዻዒመካህ ዮኮመህ ያዽገ፡፡ 9. አማይጉል አቲን ታህ ኤያይ ጻሎት አባ፡-

                'ኦ'ዓራናል ማርታ ናባ፣

                ኩ'ሚጋዕ ያምቃዳሶይ፣

   10. ኩ'ማንግሥት ያማቶይ፣ 

              ኩፍቃድ ዓራናል የከምባልህ 

              ታማምባልህ ባዾል ያኮይ፡፡

    11. ለለዕቲት ኢንገራ ኢሲሲ ለለዕህ ኖሑይ።

    12. ናኑ ኒትብድለሚህ ቢሕላ አካህ ናምባሊህ፣

             ኒ'በደል ኖልሓብ። 

    13. ኡማምኮ ኒራዒስ /ኒእድኅን/ ኢካህ ፣ 

           ፋታንድ ኒማሃይን፣

 [ማንግሥት፣ ኃይሊ፣ ክብሪ፣ ኡማንጉሉህ ኩቲያ ኪኒ፣ አመን']

   14. ሒያው በደሊህ በሕላ ታንጉል፣ ዓራናል ያነ ሲናባ ብሒላ ሲናህ ያ፡፡ 15. ሒያው በደሊህ ቢሒላ ኢየ ዋይተኒምኮ ለ ሲን በደሊህ ዓራንቲ ሲን አባ ቢሒላ ሲናህ ሚያ፡፡

ጾምት ዳዓባል

  16. ኢየሱስ ካታየህ ታህ የ፣ ታጾሚን ዋክተ ጉቡዛት ኪን ማሪ አባም ባሊህ ኃዛን ምልክት ማይባላይና፣ ኢሲን ታጾመም ኪኖኑም ሒያው አካህ ታዻጎ ሓዛን ቢሶ ያይቡሉውን፣ ሓቀህ ሲናክ አይክ አኒዮ፣ ኢስን ሲኒ ሊሞ ዮኮሚኒህ ጋራየን፡፡ 17. አቱ ለ ታጾመ ዋክተ ኢሲ ነፍ ዓካል፣ ሱካት ኡሱኩት፡፡ 18. ታይ ዓይነቲህ ታጾመም ሱዉሩህ ኩያብለ ኩባኮ በሒህ አኪማሪ ኩምያብለ፡፡ ሱዉሩህ ሢራሒምተም ያብለ ኩባ ሊሞ  ኮህ አክፊለ ለ፡፡"

ባዾል ሀብተ ያስከሄልኒም መዳ

(ሉቃ.12፡33-34)

  19. ለል ኢየሱስ ታህ የ፣"ስኒ ሀብተ ታይ ባዾል ማስካሃሊና፣ አይሚህ ታይ ባዾል ብልዔከ ሚራት ያይለየ፣ ባዸዻ ትግዲለህ ጋርዒታ፣ 20. ናቢህ ሲናሞህ ዓራናቲ ሀብተ ኤስከሄላ፣ ታማል ያነ ሀብተ ብልዔከ ሚራት ያይላዮና ማዽዓን፣ ባዸዻ ፎተኒህ ባዽቶና ማዽዓን፡፡ 21. ኩሀብቲ አድያነድ ኩአፍዓዶ ኤድታነ፡፡"

ሰውነት ኢፎይታ

(ሉቃ. 11፣34-36

   22. ኢየሱስ ጋባዔህ ታህ የ፣"ኢንቲ ሰውነት ኢፎይታ ኪኒ፣ አማይጉል ኩኢንቲ ዓፍያት ለቲያ ተከምኮ ኩናብሲ ሙሉኡድ ኢፎ ያከ፡፡ 23. ኩኢንቲ ዓፊያት ለቲያ አከዋይተምኮ ለ ኩናብሲ ሙሉኡድ ዲተ ያከ፡፡ አማይጉል ኮያድ ያነ ኢፎይቲ ዲተ የከምኮ፣ ዲተ አይዻ ጊድድ ቲያ ታከህ ያከ፡፡"

ናብራ  ዳዓባል  ያምጻናቆና መዳም

(ሉቃ፣16፣13፤12፣22-31፤)

   24. ኢየሱስ ጋባዔህ ታህ የ፣"ኢንኪ ሚናዳምቲ ላማ ማዳሪህ ጊለዋይቶ ያኮ ማዽዓ፣ ቲያ ያክሒነ፣ ቲያ ያንዒበ፣ ቲያ ያስክቢረ፣ ቲያ ዻይታ፣ አማም ባሊህ ማል ካሓንቶሊ የከ ሒያውቲ መዔፉጊህ አገልጋሊ ያኮ ለካ ማዽዓ፡፡ 25. አማይጉል ታህ ሲናክ አይክ አነም አይም በተሊኖ? አይም አዑበሊኖ? አይም ሳሪተሊኖ? ያናማህ ሲኒ ናብራህ ማምጻናቂና፣ ምግበኮ ሂወት፣ ሣረናኮ ሰውነት ሚያይሰሆ? 26. ኢስኪ ዓራናል ታንፊረ ኪምብሮ ኡቡላየ፣ ኢሲን፣ ሚያዒዪን፣ ማዕካናድ ማሃን፣ አማም ታከያካህ ዓራናል ያነ ተን አባ ተን ያምግበ፡፡ አማምኮ አቲን ኪንቢሮኮ ጋዳህ ማታይሲንሆ? 27. ያከካህ ሲንኮ ይሕሲበህከ ይምፅኒቀህ፣ ኢሲ ዒድመድ ኢንኪ ለለዕ ኡካ ኤዶሶ ዺዓቲ አይቲያ ኪኒ? 28. ለል ሣሪ ዳዓባል አይሚህ አምጽንቂክ ታኒኒ? ባራኪ ዒምቦባ አይናህ ተህ ዓዻመዔም ኢስኪ ኡቡላየ? ኢሲን ሢራሓህ ማሓዋላን፣ ሚያፍትሊን፣ 29. ያከ ኢካህ ሰሎሞን ኡካ ቶይ ኡምቢሂያህ ኢሲ ክብረኮ ተንኮ ኢንከቲዻ፣ ታህዻ ዓዻመዔ ሣራ ማሃስቲና ሲናክ አይክ አኒዮ። 30. ኢስኪ ካፋ ትምቡሉወህ በራ ጊራ ታዳድ ራዳ ማይዳ ዓይሦ መዔፉጊ ታህ ኢሰህ ዓዻ ያስመዔህ ሣሪሳም የከም ሣራህ፣ አቲን እምነት አይሚህ ታስጉዱሊኒም፣ ሲናማ አይሚህ ያሰ ዒለህ ሲን ሃይሲሰ'ዋም? 31. አማይጉል አይም በተሊኖ? አይም አዑበሊኖ? አይም ለ ሳርተሊኖ? ተኒህ አሕስቢክ ማምፃናቂና፡፡ 32. ታሃም ገዮና አረማውያን ለ ኤል ያምፅኒቂን፣ ሲና ታሃም ኡምቢህ ሲን ጉረሱሳም ዓራንቲ ሲን አባ ያዽገ፡፡ 33. አቲን ለ ኡኩማይ መዔፉጊህ ማንግሥቲከ መዔፉጊህ ጽድቀ ዋግያ፣ አኪ ራዔ ጉዳይ ሙሉኡክ ስናህ ኦሲተ ለ፣ 34. በሪ ጸገም በራህ ሓባ፣ አማጉል በሪ ሓሳባህ ተኒህ ማምጻናቂና፣ ኢሲሲ ለለዕ ኢሲሲ አሞህ  ጸገም ለ፡፡"

ማዕራፋ 7

አኪማሪህ አሞል ያፍርድኒም መዳም

(ሉቃ.6፣37-ድ2)

  1. ኢየሱስ ጋባዔህ ታህ የ፣"ስናሞል ስናክ ያምፍሪደክ አኪ ሒያውቲህ አሞል ማፍራዲና። 2. አይሚህ አኪ ማሪህ አሞል ትፍርድኒሚህ ዓይንቲህ ስን አሞል ያምፍሪደ፣ ታማም ባሊህ አካህ ቱስፉሪን ሱፍረህ ሲናህ ያምሱፉረ፡፡ 3. ኩንትድ ያነ ጉንደ አብለካህ አይሚህ አከቲ ኢንትድ ያነ አስኩርታ አብልክ ታነ? 4. ለል ኩ'ኢንትድ ያነ ጉንደ አብለካህ አይናህ ተህ አኪ ሒያውቶክ ኩኢንቲድ ያነ አስኩርታ ኮህ አያዕዖ'አይናህ ተህ አክታ?' 5. ኮ ጉቡዝ! ኡኩማይ ኩኢንቲድ ያነ ጉንደ ኤየዕ፣ ታማሃምኮ ላካል አኪ ሒያውቲህ ኢንቲድ ያነ አስኩርታ ታያዖ ትይፅሪየህ አብለልቶ። 6. ይምቅድሰ ጉዳይ ካርዋህ ማሓይና፣ ሲኒ ኡንዹዽ ለ ሓሰማ ነፍል ማዕድና፣ አይሚህ ሓሰማታት ስን ኡንዹዹድ ኢባቢህ ኤድ'ታዒተ፣  ካርዋ ለ ጋሕተህ ኤድስናክ አርታ።"

ጻሎት  ፍረ 

(ሉቃ.11፣9-13)

  7. ጋባዔህ ኢየሱስ ታህ የ፣"ዻዕማ ስናህ አምሓወለክ፣ ዋጊያ ገልትኒክ፣ ማዕዶ ኡኩሕኩሓ ሲናህ ፋክተለክ፣ 8. አይሚህ ዻዕማ ቲያህ ኡምቢህ አካህ ያምሓወ፣ ዋጊያቲይ ገያ፣ ማዕዶ ያኩሕኩሔ ትያህ አካህ ፋክታ። 9. ስንኮ አባ የከህ ባዽ ዳቦ ዻዕማጉል ዻ አካህ ያሓየቲይ አይቲያ ኪኒ? 10. ዓሣ ዻዕማጉል ዓሮራ አካህ ያሓየ? 11. አማይጉል አትን ኡማማራ ተክኒህ ታንንሃኒህ ሲኒ ዻይሎህ መዔ ጉዳይ ያሓይንም ታዽግን፣ ይቦል ዓራናል ያነ ሲን አባማ አይናህ የህ ያይሰዒለህ መዔ ጉዳይ አካህ ምያሓየም? 12. አማይጉል ሒያው ሲናህ አብቶ ጉርታናም ኡምቢህ አትን ለ ተናህ ታማም ባሊህ አካህ አባ፣ ሙሴ ሕገከ ነብያት ሚሂሮ ታም ለ ታሃሞም ኪኒ። 

ኄውን አራሕህ ዳዓባል  

(ሉቃ. 13፣13፤24)

   13. ካታየህ  ኢየሱስ ታህ የ፣"ሔውን ኢፈይኮ ሳ፣ አይሚህ ልይድ በያቲ ፍድንቲያ ኪኒ፡፡ ታማድ ሳይታ ሒያው ማንጎም ኪኒ፡፡ 14. ሂወቲል ሳይሳ ኢፈይ ለ ሔውንቲያ ኪኒ፣ አራሕ ያጽግመቲያ ኪኒ፣ አማይጉል ታማይቲያ ገይታ ሒያው ዳጎም ኪኖን።

ሓዻ ኢሲ ፍረህ ታምዽገ

(ሉቃ.6፣43-44)

   15. ለል ኢየሱስ ታህ የ፣"ድራብልት ኪን መምሂራንኮ ሰልታ፣ ኢሲን ኢሮኮ ዒዶህ ይምግድኒህ ሲናድ አምተሎን፣ ስኒ አዳድ ለ ቡኩሳ ቶክላ ኪኖን፡፡ 16. ተና ታዽግኒም ተን ሢራሒህ ፍረህ ኪኒ፣ ከናንቲ ቆጥቃጥኮ ወይኒ ፍረ ያስኩቱይኒ? ዳራንደርኮ ባለሲ ፍረ ታምሱኩቱወ? 17. አማም ባሊህ መዔ ሓዻ ኡማንጉል መዔ ፍረ ፍሮሳ፣ ኡማ ሓዻ ለ ኡማ ፍረ ፊሮሳ፡፡ 18. መዔ ሓዻ ኡማ ፍረ ፍሮሶ ማዽዕታ፣ ኡማ ሓዻ መዔ ፍረ ፍሮሶ ለ ማዽዕታ፡፡ 19. መዔ ፍረ ፍሮሰዋይታ ሓዻ ሙሉኡክ ታግሪዔ፥ ጊራድ ለ ራዳ። 20. አማይጉል ድራብቲ መማሂራን ተን ሢራሒህ ፍረህ ተን ታዽግን። 21. ኦ'ይማዳራ! ኦ'ይማዳራ! ዮክ'ያቲ ኡምቢህ ማንግሥተ ሰማያል ማሳአ፣ ማንግሥተ ሰማያል ሳያቲይ ዓራናል ያነ ያባህ ፍቃድ ያፍጽመቲያ ኪኒ። 22. ፍርድ ለለዕ ማንጎ ማሪ ይማዳራ! ይማዳራ! ኩሚጋዓህ አጋንንቲ ማያዕኒኖሆ? ኩሚጋዓህ ታአሚራት ማብኒኖሆ? ዮክ ኢየሎን። 23. አኑ ለ ታማይ ለለዕ ሱሩህ ሲን ማዽገ! ኮ ዓመፀይናታት ዮኮ ቶህ ምርሕ ኤያ! አክ ኢየ ሊዮ።"

ኮክሔል ወይም ሖጻል ሢራሒምተ ድካህ ምሳለ

(ሉቃ.6፣47-49

    24. ኢየሱስ ጋባዔህ ታህ የ፣"ታይ ቃል ዮበህ ሢራሓድ አሲሳቲ ኡምቢህ ድክ ኮክሔክ ሢራሔ በልኄ ኪን ሒያውቶህ ኢግዳ፡፡ 25. ሮብ ራደ፣ ወዓ ወዒሰ፣ ሓሓይቲ ለ ዮቶከ ታማይ ድክ ዱፉወ፣ ያከካ ታማይ ዲክ ኮክሔክ ይምሥርተም እዻህ ማራዲና፡፡ 26. ታይ ይቃል ዮበህ ሢራሐድ አስሰዋቲ ለ ኢስ ዲክ ሖጻል ሢራሔ አፉወማሊህ ኢግዳ፡፡ 27. ሮብ ራደ፣ ወዒ ወዒሰ፣ ሓሓይቲ ለ ዮቶከ ታማይ ድክ ዱፉወ፣ ዓሪ አማይጉልካህ ራደ፣ ካ ራድራድ ጋተህ ዮመ፡፡ 28. ኢየሱስ ታይ ነገራት ዋንስተህ ባከጉል ህዝቢ ካምሂሮህ ይምድንቂን፡፡ 29. አይሚህ ኡሱክ ተን ሕጊህ መምሂራን ባሊህ አከካህ ሢልጣን ባዕላ ባሊህ ተን አይምሂሪይ ይነጉል ኪኒ። 

ማዕራፋ 8

ኢየሱስ ላምፀ ለ ሒያውቶ ኡሩሰ

(ማር.1፣40-45፤ሉቃ.5፣12-16

   1. ኢየሱስ ኮማኮ ኦበጉል ማንጎም ኤድካታይተ፡፡ 2.ታማይጉል ኢንኪ ለምፀ ለ  ሒያውቲ ኢየሱሱል የመተህ፣ ኢሲ ዳምባራህ ባዾል ጋምመህ ኦ'ይማዳራ ይታይናጻሖ  ዺዒታ አክየ፡፡ 3. ኢየሱስ ለ ኢሲ ጋባ ይዝርግኄህ ሀሳስ ኤልሰህ ጉረህ አነክ ኢጽሪይ አክየ፡፡ 4. ለምፃም አማይጉልካህ ላምፀኮ ይጽሪየ፡፡"ታማሚህ ላካል ኢየሱስ ላምፀኮ ኡረ ሒያውቶክ ታህ አክየ፣ ታይ ጉዳይ ቲያክ ሚን፣ ማዋንስቲን፣ ያከ ኢካህ ካዶ አዱዋይ ኡርተም ካህን ኡስቡሉይ፣ ኡማንቲያህ ማስኪር ያኮክ ኡርተርከህ ሙሴ መባእ መዔፉጎህ ካብ ኢስ፡፡"

ኢየሱስ ቦልት ኃለቃህ አገልጋሊ ኡሩሰ

(ሉቃ.7፣1-10) 

     5. ኢየሱስ ቅፍርናሆም ካታማል ሳየጉል ኢንኪ ሮማት ቦልቲ አሞይቲ ካያድ ካብየህ፣ 6."ኦ'ይማዳራ! ይግለዋይቲ ሲባ የከህ ጋዳህ አምሠቀይክ ዓረድ ያነ የህ ዻዒመ፡፡" 7. ኢየሱስ"አኑ ኤመተህ ኡሩሰ ሊዮ"አክየ፡፡ 8. ቦልቲ አሞ ባዕሊ ታህ የህ ኤልደሄየ፣  ኦ'ይማዳራ አቱ ይድኪድ ሳይቶ ዮህ ኤዳ ሒያውቶ ማኪዮ፣ አማይጉል ኢንኪ ቃል ጥራሕ ዋንስት ይአገልጋሊ ኡረ ለ፡፡ 9. አኑ ኢኒ ዸግኃህ ሢልጣን አሞይትቲህ ያማኢዚዘ ቲያ ኤከ  ኢኒዳባል አኢዚዘ ወተሀደራት ሊዮ፣ ተንኮ ኢንከቶክ"አዱይ! አካጉል ያድየ፣ አከቶክ  ለ 'አሞ' አከምኮ ያሚተ፣ ይግለዋይቶ ታሃም አብ አካጉል አባ።"       

   10. ኢየሱስ ታሃም ዮበ ዋክተ ይምድንቀ፣ ኤድካታይ ቲነ ሒያዋክ ታህ አክየ፣ ሓቀህ ሲናክ አካይክ አኒዮ ታሂዻ ያከ ናባ ኢምነት ለ ኢንኪ ሒያውቶ እስራኤል ባዾል ማገይኒዮ፡፡ 11. ታሃም ኢስትውዒላ፣ ማንጎ ማሪ አይሮማሓኮከ አይሮዹማኮ የመትኒህ፣ አብራሃምልህ፣ ይስሐቅልህ፣ ያዕቆብልህ የክኒህ ማንግሥተ ሰማያል ድፈሎን፡፡ 12. ታይ ማንግሥቲህ ወራሶ ታኮ አካህ ኤዳይትነም ለ ኢሮል ዲተድ ራደሎን፣ ታማል ደሮከ ኢኮክቲ አርባዖ አከለ፡፡"13. ታሃምኮ ሣራህ ኢየሱስ ቦልቲ አሞይታክ አዱይ ኩ'ኢምነት ባሊህ ኮህ ያኮይ አክየ። ካ ጊለዋይቲ  ታማይ ሳዓታህ ኡረ፡፡

ኢየሱስ ማንጎ ሒያው ተን ዱረኮ ኡሩሰ

(ማቴ.1፣29-34፤ሉቃ.4፣38-41)

  14. ኢየሱስ ጰጥሮስ ድኪድ ሳየ ዋክተ ጰጥሮስ ባሎ ዓሶ ራስኒ ተይብዸህ ላሑተህ ዽንተህ ዩብለ፡፡ 15. ጋባ ሀሳስ ኤልኢሰ ዋክተ አማይጉልካህ ራስኒ ተሓበህ ኡርተ፣ ኡጉተህ ኢየሱስ ታስጋልጋሎ ኤዸዺሰ፡፡ 16. ዲተ ሳይተጉል ማንጎ ሒያው አጋኒኒቲህ ቲምዽብዸ ማንጎ ዳላኪን ኢየሱስ ዻጋህ ባሄን፣ ኢየሱስ ኢሲ ቃላህ ርኩሳት መናፍስት አክ የየዔ፣ ላሑተም ኡምቢህ ኡሩሰ፡፡ 17. ታሃሞም አበርከህ ነብይ ኢሳይያስ ኡሱክ"ኒ'ሳክና ጋራየ፣ ኒ'ዱረ ይይኩዔ"ያ  ትንብት ይምፍጺመ።

ኢየሱስ ታክቲለምድ ታግጢመ መከራ 

(ሉቃ.9፣57-62)

   18. ኢየሱስ ማንጎ ሒያው ካባሮል የከሄልኒህ ዩብለ ዋከተ ባሕራኮ ኦዓዳል ታቦና ኢሲ ተምሃሮ ይኢዚዘ፡፡ 19. ታማምኮ ላካል ኢንኪ ሙሴ ሕጊህ መምሂር ኢየሱስ ዻጋህ የመተህ መምሂሮ! ኤልታዴ ቦታል ኡማኒል ኩአካታሎ አክየ፡፡ 20. ኢየሱስ ዋከር ሁጉማ ለ፣ አየርል ታንፊረ ክምቢሮ ኤድ ታስፍረ ክምብሮ ዓርዋ ለ፣ ሒያውቲ ባዽ ለ ኢሲ ዸግኃህ ኡካ ይጽግዔህ ኤድ'ያዕሩፈ ቦታ ማለ አክ የህ ኤልደኄየ፡፡ 21. ካተምሃሮኮ ኢንከቲ ኦ'ይማደራ! ባሱል ኤደህ ኢኒ አባ አዓጎክ ዮህ ኢፍቅድ አክየ፡፡ 22. ኢየሱስ ለ አቱ ዮያ ኢክቲል፣ ራቦንቲት ሲኒ ራቦንቲት ያዓጎ ሓብ አክየ፡፡

ኢየሱስ ማእበል ጸጥ ኢሰ

(ማር.4፣35-41፤ሉቃ.8፣22-25)

   23. ታማሚህ ላካል ኢየሱስ ኢስ ተምሃሮሊህ ዛልባህ የምሰፈረህ የደየ። 24. ኃይላለ ሓሓይቲ ሀቦባለ ባሕራል ኡጉተህ ማዕበል ዛልባ ይይቡዱደ፣ ኢየሱስ ለ ዽነህ ይነ፡፡ 25. ካተምሃሮ ኢየሱሱድ ካብየኒህ ንማዳራ! ናላዮ ሊኖክ ንኢድኅን! የኒህ ካይቅስቅሲን፡፡

  26. ኢየሱስ ለ"አቲን ኮኢምነት ማሎሊ፣ አይሚህ ማይሲታክ ታኒን? አክየ፡፡ ታማሚህ ላካል ኢየሱስ ኡገተህ ሓሓይታከ ባሕራ ይግስጸ፣ ናባ ሪጋኤታ ተከ፡፡ 27. ሒያው ጋዳህ ትምግሪመህ ሓሓይታከ ባሕራ ኡካ አካህ ታምእዚዘቲ አይናህ ኢጊድ ሒያውቶ ኪን?" የን፡፡                         

ኢየሱስ አጋኒኒቲህ ይምዽብዸ ላማ ሒያውቶ ይድኅነ

(ማረር.5፣1-20፤ሉቃ.8፣26-39)

   28. ኢየሱስ ገሊላ ባሕራኮ ታበህ ጌራሴኖን ሀገሪል የመተ። ታማል አጋኒኒት ተን ትብዸ ላማ ሒያውቲ ማዓጊ ቦታኮ የውዕኒህ ቲታ ገን፣ ኢስን ጋዳህ ዲንገት ለም ኪይይ ይኒንጉል ኢንኪ ሒያውቲ ታማይ አራሕኮ ቲላዎ ዽዓይ ማና። 29. ኢስን ለ ዲንገቲህ ታህ የኒህ ደሮና ኤዸዽሰን፣"አቱ መዔፉጊህ ባዻ! ናኑ ኮሊህ አይም ንገሲሳ? ዋክቲ ማደካህ ኒ ታይሳቃዎ ተመተ?"30. ተንኮ ዳጉሁም ሚሪሓታ ቦታል ማንጎ ሐሰማ ዱየ ኢፋርተህ ቲነ። 31. አጋኒኒቲ"ኒ'ታያዖ ተከምኮ ያዓሳያ ቶይ ሐሰማት ዱየድ ኒ'ዽዽይ!"የኒህ ዻዕ  መን።  32.ኢየሱስ ለ"አዱዋ"አክየ፣ አማይጉል የውዕኒህ የደይኒህ ሐሰማድ ሳየን፣ ሐሰማ ለ ሙሉኡክ ቦልቲ ካንፋርኮ አምቦኮኮልክ ኦበተህ ባሕሪ አዳድ ቲስጢመ፡፡ 33. ሐሰማ ሎን ኩደኒህ ካታማል ሳየኒህ የከ ጉዳይ ሙሉኡድ ዋሪሰን፡፡ አጋኒኒቲ ተን ትቢዸ ሒያዋል የከ ጉዳይ ዋንስተን፡፡ 34. ታማሚህ ላካል ካታማ ሒያው ሙሉኡክ ኢየሱስ ያብሎና የውዒን፣ ዩብሊን ዋክተ ተን  ባዾኮ የውዔህ አካህ ያዳዎ ዻዕመን።

   ማዕራፋ 9

        ኢየሱስ መጻጉ እንኪን ሒያውቶ ኡሩሰ

(ማር.2፣1-12፣ሉቃ.5፣17-32)

   1. ታማሚህ ላካል ኢየሱስ ዛልባህ የምሰፈረህ ባሕራኮ ታበህ ኢሲ ባዾህ የመተ።  2. ታማል ሒያውቶ ዓራታክ አሞክ ዽኒሰኒህ ኢንኪ አካለ ጉዶሎ ሊህ ኢየሱስ ዻጋህ የምቲን። ኢየሱስ ለ ተን ኢምነት ዩብለህ አካለ ጎዶሎክ"ይባዽ! አይዱኩመይ ኩ ኃጢአት ኮህ ይምድምስሰህ' ያነ አክየ። 3. ታይ ዋክተ ውልውል ሙሴ ሕጊህ መምሂራን 'ታይ ሒያውቲ መዔፉጊህ አሞል ዋቶ ቃል ዋንስታ!"አይክ ሲኒ አፍዓዶድ ይሕሲቢን። 4. ኢየሱስ ለ ተን ሓሳብ የዸገህ ታህ አክየ፣'አይሚህ ታይ ኡማ ጉዳይ ስኒ አፍዓዶድ አሕስብክ ታኒን። 5. ኤረ ኃጢአት ኮ'ህ ይምድምስሰህ ያነ ያናምኮከ 'ኡጉታይ አዱይ' ያናምኮ አይቲይ ሲሲካ? 6. ያኮይ ኢካህ ሒያውቲ ባዽ ባዾት አሞል ኃጢአት ያዳምሳሶ ሢልጣን ለም ታዻጎና ኤዳ"የህ ጋባ ጎዶሎ ለ ሒያውቶክ"ኡጉታይ ኢሲ ዓራት ኡቱኩዓይ ኢሲ ድኪህ አዱይ"አክየ። 7. ኡጉተህ ኢስ ድኪህ የደየ። 8. ህዘቢ ታሃም ዩብልን ዋክተ ይምግርሚን፣ ታህ ኢግድን ሢልጣን ሒያዋህ ዮሖወርከህ መዔፉጎ ይይምስግኒን።

ኢየሱስ ማትዎስ ደዔ

(ማር.2፣13-17፤ሉቃ.5፣27-32 )

    9. ኢየሱስ ታማይ ቦታኮ ኡጉተህ አድይ ያነሃኒህ ማትዎስ አክያን ቀረጽ ያግሪዔቲ፣ ቀረጽ ኤልጋራን ቦታል ድፈየህ ዩብለህ"ይክቲል"አክየ  ማትዎስ ኡጉተህ ኤድካታየ።           

   10. ኢየሱስ ማትዎስ ዓረድ ማይድል ድፈየህ ያነሃኒህ ቀረጽቲከ ኃጢአት ለም ታማል የመትኒህ ካከ ካተምሃሮሊህ ማይድል ድፈየን። 11. ፈርሳውያን ታሃም ዩብልንጉል ካ ተምሃሮክ"ሲን መምሂር ቀረጽቲከ ኃጢአት ለምሊህ አይሚህ ኢንኮህ በታ!"አክየን። 12. ኢየሱስ ታሃም ዮበህ ታህ የህ ኤልደሄየ፣"ላሑተም ኢካህ ዓፊያት ለም ሓኪም ተን ማጉርሱሳ። 13. አዱዋ አኑ ጉራም መሕረት ኪኒካህ መሥዋዕት ማኪ' ተህ ትምጽሕፈም አይም ኪናም ኢምርሚራይ እስትውዒላ። አኑ ኤመተም ኃጢአተናታት ንስሓህ ደዖ ኤህ ኪኒ ኢካህ፣ ጻድቃን ንስሓህ ደዖ ኤህ ማኪዮ። 

ጾምት ዳዓባል ተመተ  ጥያቄ

(ማር.2፡18-22፤ሉቃ.5፡33-39)

   14. ታማይ ዋክተ ያሃኒስ ተምሃሮ ኢየሱስ ዻጋህ የመትኒህ 'ኖከ ፈሪሳውያን ኡማንጉል ናጾመ፣ ኩተምሃሮ ለ አጾመዋናም አይሚህ ኪኖኑ? የኒህ ካኤሠረን፡፡ 15. ኢየሱስ ታህ የህ ኤልይምልሰ፣ ማርዓየ ተንሊህ ያነሃኒህ ዓራካ ያኃዛኖና አካህ ኤዳ? አማም ታከ'ያካህ ማርዓየ ተንኮ ባዽስማ ዋክቲ አምተለ፣ ታማይ ዋከተ አጾመሎን፡፡

  16. ተምዔለ ሳረናድ ላየ ዻገዋይተ ዑሱብ ታካባ ኤድ ያትክበቲ ኢንከቲ ሚያነ፣ አይሚህ ዑሱብ ታካባ ተመዔለ ሳረና ቡኩሰህ ትስግድደህ ታይፍዲነ፡፡ 17. ታማሃም ባሊህ የምዔለ ላየ ሲባዻድ ዑሱብ ወይን መስ ሃያቲ፣ ኢንከቲ ሚያነ፣ ታሃም አባታም ቲኔምኮ ሲባዽ ቦቶዓ፣ ወይኒ መስ ሓዺታ ሲባዽ ዮምቦሎሶወህ ሊሞከ ጥቅመኮ ኢሮ ያካ፡፡ አማይጉል ዑሱብ ወይኒ መስ ዑሱብ ወይን ሲባዻድ ሳይሶና ኤዳ፣ ታይ ዓይነቲህ ላሚህ ናጋያድ ዻዉዹመኒህ ማረሎን።                

ኢያዕሮስ ባዻ'ከ ኢየሱስ  ሳረና ዻግተ ኑማ

ማር.5፣21-43፤ሉቃ.8፣40-56)

   18. ኢየሱሰ ታሃም አካይ ያነሃኒህ ኢንኪ ሙክራብ አሞባዕሊ ካኡላል  የመተ፣ ዳምባራህ ኢየሱስ ነፊል ራደህ"ሀይከ ይባዻ' ካዶ ዮክራብተ፣"ያኮይ ኢካህ አቱ ተመተህ ኢሲ ጋባ አሞል አክሃይተምኮ ኡረለ"አክየ። 19. ኢየሱስ ለ ኡጉተህ ሒያውቶ ይክቲለህ የደ፣ ካተምሃሮ ኤሊህ የደይን። 20. ሀይከ ላማምከ ታማን አግዲያ ሙሉኡድ ቢሊ ኤልሓዽታክ አምሰቀይክ ቲነ ኢንኪ ኑማ ታማይ ዋክተ ኢየሱሱክ ሳራቱላኮ ተመተህ ካሳረናህ ሐለ ኢሲ ጋባህ ዻግተ።                

   21. ታሃም ለ አብተም"ካሣረና ጥራሕ ኡካ ኢኒ ጋባህ ዻገምኮ ኡረሊዮ ተህ ትሕስበህ ኢሲ አፍዓዶድ ትነጉል ኪኒ።"22. ኢየሱስ ለ ኡፍኩና የህ አይዱኩመይ ይባዻ'! ኩኢምነት ኩሩሰክ"አክየ። ኑማ አማይጉልካህ ኡርተ። 23. ታሃምኮ ሳራህ ኢየሱስ ሙክራብ ኃላቃህ ድክ ማደጉል ኃዛን ኢምቢልታ ታቱከምከ አርድክ ደራክ ወዕታ ሒያው ዩብለ። 24. ታህ አክየ፣ ኡምቢክ ታርከኮ ኤወዓ!"አውካ ዑንዱጉልተህ ታናካ ማራቢና!"ኢስን ለ ላግጻህ ኤልዮሶሊን። 25. ሒያው ለ ተውዔምኮ ላካል ኢየሱስ አውካ ኤድ'ገይምታ ዓርድ ሳየ፣  ጋባህ ተይብዸጉል ኡጉተ። 26. ታይ ጉዳይህ ታሪክ ታማይ ባዾክ ኡማኒል ዮሞበ።          

                                         ኢየሱስ ላማ ዑዉር  ኡሩሰ

   27. ኢየሱስ ታማይ ቦታኮ ኡጉተህ አዲህ፣ ላማ ዑዉር ኤድካታየን፣ ኢስን"ዳዊት ባዻ! ያዓሳያ ኒ'ምሒር' አይክ ዋዕ የን። 28. ኢየሱስ ድኪድ ሳየ ዋክተ ኢንት ማሎሊ ካያድ ካብ የን፣ ኢየሱስ ለ አኑ ታሃም አቦ ዽዓም ታምንኒ"አክየ። ኢስን ለ"ዮዎ ኦ'ኒማዳራ! የኒህ ይምልስን። 29. ታሃምኮ ላካል ኢየሱስ ተን ኢንቲት ጋባህ ሀሳስ ኢሰህ"ስን ኢምነት ባሊህ ሲናህ ያኮይ"አክየ። 30. ተን ኢንቲት ለ ፋክተ፣ ኢየሱስ ለ"ኢንከቶክ ያናምኮ!"ጋዳህ ተን ይኢዚዘ። 31. ኢሲን ለ የደይኒህ ታማይ  ባዾል ሙሉኡል ኢየሱስ ዝናህ ዳዕባል ዋሪሰን።   

                                     ኢየሱስ ኢንኪ ዓባስ  የከ ሒውቶ ኡሩሰ

  32. ኢንቲት አካህ ፋክተ ሒያው የውዕኒህ የደይንጉል፣ አኪ ሒያው ጋኔን ኤድይኅድረ ዱዳ ኢየሱሱል ባሄን፡፡ 33. ጋነን አክ የውዔሚህ ላካል ዱዳ ኪን ሒያውቲ ዋንሲተ፣ ህዝቢ ለ"ታህ ኢግድ ጉዳይ እስራኤል ባዾል"ዩምቡሉወህ ሚያዽገ አይክ ይምድንቂን። 34. ፈሪሳውያን ለ"ኡሱክ አጋኒኒቲ ያየዔም አጋኒኒቲ ኃላቃህ አራሓህ ኪኒ"የን። 35. አማይጉል ኢየሱስ ተን ሙክራባታል አይምሂሪክ፣ መዔፉጊህ ማንግሥቲህ መዔ ዋረ አይብሥርከ፣ ሒያው ዱረከ ደዌኮ ኡምብህ ኡሩሳክ፣ ካቶምከ መንደራል ኡማንቱማል አምዘወወርይ ይነ፡፡ 36. ህዝብ ሎይና ሂን ዒዶ ባሊህ ይምጽንቀህከ ጎሮን ዋየኒህ ዩብለጉል አካህ ናኅሩረ። 37. ካተምሃሮክ ታህ አክየ፣"ዓዱት ማንጎም ኪኒ፣ ዓዱት ሢራሕታም ለ ዳጎም ኪኖን።  38. አማይጉል ኦሲታ   ሠራሕተይና ዓዱቱህ ፋሮክ ዓዱተት ማዳራ ዻዒማ።" 

ማዕራፋ 10

ላማምከ ታማን ሐዋርያቲያህ ዳዓባል

(ማር.3፣13-19፤ሉቃ.6፣12-16)

   1 .ኢየሱስ ላማምከ ታማን ተምሃርቲያ ኢስ ኡላል ደዔህ ሩኩሳት መናፍስት ያያዖና፥ ዱረከ ደውዬ ኡምቢህ ኡሩሶና ሢለጣን አካህ ዮኆወ፡፡ 2. ላማምከ ታማን ሐዋርያቲያህ ሚጎዕቲ ተራ ካታይታም ባሊህ ኪኒ፣ ኤዸዾይታህ ጰጥሮስ አክያን ስምዖንከ ካሳዓል እንድሪያስ፣ ዘብዴዎስ ዻይሎ ያዕቆብከ ያሃኒስ፣ 3. ፊሊጶስ፣ ቦርቶሎሚዮስ፣ ቶማስ፣ ቀራጺ ማትዎስ፣ እልፊዮስ ባዻ ያዕቆብ፣ ታዴዎስ፣ 4. ያምነቀነቀ ስምዖን ኢየሱስ ትላሰህ ዮሖወ  ይሁዳ፡፡    

                                           ላማምከ ታማን ሐዋሪያቲያ ያይማሃሮና  ፋሪቲመን

 (ማር.6፡7-13፤ሉቃ.9፡1-6)

   5. ኢየሱስ ታይ ላማምከ ታማን ሐዋርያቲያ ፋረ፣ ታህ የህ ተን ይኢዚዘ፣"አርማውያናድ ማዳይና፣ ሳምራውያን ካታማድ ማሳይና፣ 6. ያኮይ ኢካህ ዒዶ ባሊህ የለየ እስራኤል ህዝበል አዱዋ። 7. አዱዋይ'ማንግሥተ ሰማይ ካብ የህ'ያነ አይክ እስቢካ። 8. ዳላኪን ኡሩሳ፣ ራብተም ኡጉሣ፣ ላምፀ ለም ኢድኂና፣ አጋኒኒቲ ኤየዓ፣ አማል ገይተኒም አማል ኡሑዋ። 9. ዋርቀ ያኮይ ማል፣ ናሓስ ሲኒ ኪሲድ ማባዺና። 10. ዓሲናይቶ፣ ላማ ቃሚስ ላማ ካባላ፣ ኦሳህ አራሓህ ለ ማባዺና፣ አይሚህ ሢራሓቲያህ አካህ ኤዳ ሚግቢ ያምሓወ። 11. ኤድ ሳይታን ካታማል ያኮይ ሳሮል ሲን ጋራዎ ድላይ ለ ሒያውቲ ያነም ምያነም ኢምርሚራ፣ ታማይ ሰፈር ሓብተኒህ ታውዕኒም ፋናህ ታማይ ሒያውቶሊህ ሱጋ። 12. ሒያው ድኪድ ሳይታንጉል ሳላምታ ኡሑዋ፣ 13. ድክቲ ባዕሊ ሲን ሳላምታ ጋራየምኮ ስን ሳላምታ ካማዶይ፣ ጋራዋየምኮ ለ ስን ሳላምታ ሲናህ ጋሕቶይ። 14. ጋራየ ዋቲያከ ስን ቃል አበዋ ቲይ ይኔምኮ ታማይ ድክ ያኮይ ካታማ ሓብታንጉል ሲኒ ኢቢህ አቦራ ኡርጉፋይ አክ አዱዋ። 15. ሓቀህ ሲናክ አይክ አኒዮ ፍርድ ለለዕ ታማይ ካታማኮ አጋናል ሰዶምከ ጎሞራህ  ቅጽዓት አስሲከ ለ።"

      ማዳሪ ያምተሚህ ባሶል ስደትከ መከራ አከለ

     (ማር.13፣9-13፤ሉቃ.21፣12-17)

   16. ካታሰህ ኢየሱስ ታህ የ"፣ ሀይከ ቶክላ ባሊህ ዒዶ ፋንድ ሲን ፋራከ አነ፣ አማይጉል ዓሮራ ባሊህ ብልኄት፣ ዱጉጉለይታ ባሊህ ለዋሃት ቲካ፣ 17. ሒያው ፍርደህ ትላሰኒህ ሲን አሓየ ሎን፣ ኢሲሲ ሙክራባል ሲን ሳባዔ ሎን፣ አማይጉል ሰሊታ። 18. ይምክንያታል ገዛእቲትከ ነገሥታት ዻጋህ ፍርደህ ሲን በየሎን፣ ተንከ አረማውያንን ነፊል ይመስከርቲ አከልቲን፤ 19. ሒያው ፍርደህ ካብ ስን ኢሳንጉል ዋንሲታናም ታማይ ሳዓታህ ሲናህ አምሓወለጉል አይናህ ነህ አይም ዋንስተሊኖ? ተኒህ ሓሳባህ ማምጻናቂና። 20. አይሚህ፣ ሲናድ ይሕድረህ ዋንስታቲ ዓራንቲ ሲናባህ መንፈስ ኪኒ ኢካህ ሲነህ ማክቲን፡፡ 21 .ሒያውቲ ኢሲ ሳዓል ራባህ ትላሰህ ያሓየ፣ አማሃም ባሊህ አባ ኢሲ ባዻ ራባህ ትላሰህ ያሓየ፣ ዻይሎ ለል ሲኒ ዻልቶይቲል ናዓቦህ ኤል ኡጉተሎን፣ ራባህ ለ ትላሰኒህ ተን አሓየ ሎን፡፡ 22. አቲን ይዳዓባል ኡማን ሒያውህ ነፊል ትምንዒበም አከልቲን፣ አማም ታከያ ኢካህ አይከ ባኪቶ ፋናህ ሲክ የቲ አደኅነ ለ፡፡ 23. ኢንኪ ካታማል መከራ ሲናክ ታመንገጉል አኪ ካታማል ኩዳ፣ ሓቀህ ሲናክ አይክ አኒዮ፣ ሒያውቲ ባዽ ጋኄህ ያምተም ፋናህ እስራኤል ካቶም ሙሉኡድ ማማዳን፡፡ 24. ተምሃራይ ኢሲ መምሂርኮ ሚያይሰ፣ ያስግልግለቲ ኢሲ ማዳራኮ ሚያይሰ፡፡ 25. አማይጉል ተምሃራይ ኢሲ መምሂር ባሊህ፣ ጊለዋይቲ ኢሲ ማዳራ ባሊህ የከምኮ ካዽዓ፡፡ ዲክቲ ባዕላክ ቤልዜቡል የኒህ ደዔኒም ሳራህ በተሰብክ ታሃምኮ ጊዲድ ኡማ  ሚጋዓህ አይናህ የኒህ ደዔዋናም፡፡

ኢያ ማይስቶና ኤዳም

(ሉቃ.12፣2-7)

   26. ኢየሱስ ካታሰህ ታህ የ፣ አማይጉል ሒያው ማማይሲቲና፣ አይሚህ አልፊመቲይ ፋኪተካህ ማራዓ፣ ሱዑተ ቲይ አምዽገካህ ማራዓ፡፡ 27. አማይጉል አኑ ዲተድ ሲናከም አቲን ኢፎል ወንስታ፣ ሑሱክታህ ቶብኒም ናውተ ቦታክ ይፋህ ኢይምሂራ፡፡ 28. ሓዶይታ ያግድፊኒምኮ ቲላየኒህ ናፍሰ ታግዳፎ ዽዔዋይታ ሒያው ማማይሲቲና፣ ናፍሰከ ሓዶይታ ጋሃናማድ ዒደህ ያይላዮ ዽዓ አምላክ ማይሲታ፡፡ 29. ላማ ዱጉጉለይታ ኮና ሣንቲሚህ አምብሒይ ሚያኒኒሆ? ያኮይ ኢካህ ዓራናል ያነ ሲን አባ ጉረካህ ኢንኪ ዱጉጉልይታ ኡካ ባዾል ማራዳ። 30. ስኒም ኢማ ሲን ዸግኃህ ዳጋርቲ ኡካ ራዔካ ሎይምተም ኪኒ። 31. አማይጉል አትን ማማይሲቲና፣ አይሚህ ማንጎ ዱጉጉለኮ ታይሲን።

ኢየሱስ ዳዓባል ያምስክርኒም  ኤዳ

(ሉቃ.12፣8-9)

    32. ጋባዔህ  ኢየሱስ ታህ የ፣ ሒያው ነፊል ዮህ ያምስክረቲያህ ኡምቢህ አኑ ለ ዓራናል ያነ ያባህ ነፊል አካህ አምስክረ ሊዮ፡፡ 33. ሒያው ነፊል ይያክሕደ ቲያል ኡምቢህ አኑ ለ ዓራናል ያነ ያባህ ነፊል አክሒደ ሊዮ፡፡ 34. አኑ ኤመተህ አነም ሳላም ባዾል አብዻዎ ኤህ ማኪዮ፣ አኑ ሰይፍካ ሳላም ባሆ ማማትኒዮ፡፡ 35. አኑ ኤመተም ባዽ አባል፣ ባዻ' ኢናል፣ ዒብና ባሎል ናዓቦ ኡጉሦ ኤህ ኪዮ፡፡ 36. አማይጉል ሒያው ናዓብቶልት ተን በተሰብ አከሎን፡፡ 37. ዮኮ አጋናል ኢሲ አባ ያኮይ ኢሲና ኪሒንቲይ ይቲያ ያኮ ማዽዓ፣ ዮኮ አጋናል ላብ ኢሲ ባዻ ወይ ባዻ` ኪሒንቲ ይቲያ ያኮ መዳ፡፡ 38. ኢሲ ማስቃል ይኩዔህ ያክቲለ ዋ ሒያውቲ ይቲያ ያኮ መዳ፡፡ 39. ኢሲ ሂወት ያይዳኃኖ ጉራቲ ኡምቢህ አይለየ ለ፣ ኢሲ ሮሔ ዮያህ የህ ትልሳቲይ ለ አይድኂነ ለ። 40. ሲና ጋራያቲ ዮያ ጋራ፣ ዮያ ጋራ ቲይ ይፋረ ያባ ጋራ፡፡ 41. ነብይ ነብይ ሚጋዓህ ጋራቲ ነብይ ሊሞ ገያ፣ ጻደቅ ጻድቅ ሚጋዕህ ገራያቲ ጻድቅ ሊሞ ገያ፡፡ 42. ሓቀህ ሲናክ አይክ አኒዮ፣ ይተምሃሮ ክኖንጉል ታይ ዕንዻነይቲትኮ ኢንከቶህ ኢንኪ ብርጺቆ ዻምሒን ላየኮ ኡካ ያሓየ ሒያውቲ ኢሲ ሊሞ ማዋ። 

ማዕራፋ 11

አጥማቂ ያሃኒስኮ ፋርምተ ፋሮይቲት

(ሉቃ.7፣18.38)

   1. ኢየሱስ መምረሒ ትኢዛዛት ላማምከ ታማን ተምሃርቲያህ ዮሖየምኮ ላካል ታማይ ቦታ ሓበህ ዻየቱማል ገይምታ ካቶሙል ያስባኮከ ያይማሃሮ የደየ፡፡ 2. ያይጥምቀ ያሃኒስ ዋክኒ ዓርድ ያነሃኒህ፣ ኢየሱስ ዳዓባል ዮበ፣ አማይጉል ኢሲ ተምሃሮኮ ፋሮይቲት ኢየሱስል ፋረ፣ 3."ያምተ አክያን መስሕ ኮያ ኪኒ ወይ አከቶ ኢላልኖ?"የኒህ ኢየሱስ ካ ኤሠሮና  አበን፡፡ 4. ኢየሱስ ለል ታይህ የህ ኤልይምልሰ፣ አዱዋይ ቱብልኒም፣ ቶቢኒም ኡምቢህ ያሃኒስክ ኤያ፡፡ 5. ሀይከ ዕዉራን አብልይ ታነ፣ ሓንከስ ታም ሪግ የኒህ አዲይ ያኒን፣ ላምፀ ለም አንጽኂይ ያኒን፣ ዶንናቁር አቢይ ታነ፣ ራብተም ኡጉታይ ታነ፣ ድካታታህ በሠራታ ቃል አካይ ያነ። 6. ዮያህ አምሰነከለ ዋየቲ ይምስግነቲያ ኪኒ።"7. ያሃኒስ ፋሮይቲት የደይንሚህ ላካል ኢየሱስ ያሃኒስ ዳዓባል ታህ የህ ዋንስታናም ኤዸዺሰ፣"ኤረ አይም ታብሎና ባራካህ ተውዒኒ? ሓሓይታህ ታምውዘወዘ ሳምባቆ ታብሎና ኪኒ? 8.ለል አይም ታብሎና ተውዒኒ? መዔ ሓሪ ሳራ ሀይሲተ ሒያው ታብሎና ኪኒ? መዔ ሓሪ ሳራ ሀይስታም ኢማ ነገሥታት ድካድ ገይማን። 9. ይቦል አይሚህ ተውዒኒ? ነብይ ታብሎና ተኒህ ኪኒ? ዮዎ! ኤረ ነብይኮ ያይሰቲያ ኪኒ። 10. ኡሱክ ሀይከ ኩባሶድ ባሶድ አድክ ኩአራሕ ያይሶኖዶወ ይፋሮይታ ኮኮ ባሶድ ፋራክ አኒዮ፣"የህ አካህ ይምጽሕፈቲያ ኪኒ። 11. ሓቀህ ሲናክ አይክ አኒዮ፣ ባዾት አሞል ቶቦከ ሒያውኮ ሙሉኡድ ያይጥምቀ ያሃኒስኮ ያይሰቲ ኢንከቲ ሚያነ። ያኮይ ኢካህ መዔፉጊህ ማንግሥትል ኡማኒምኮ ዕንዻቲ አክያይሰ። 12. ያይጥምቀ ያሃኒስ ዳባንኮ ኤዸዽሰህ አይከ ካፋ ፋናህ ማንግሥተ ሰማይ ጋዳህ ዱፉዋይ ያነ፣ ኃይላህ ታንዱፉለም ለ ገይታ። 13. ሙሉእ ነብያት ሚሂሮከ ሙሴ ሕገል አይከ ያይጥምቀ ያሃኒስ ፋናህ ኤል ዋንስታክ ሱገን። 14. አማይጉል ኢስን ዋንስተኒም ጋራይቶና ጉርታናህ የከምኮ ቶይ አምተለ አክየን ኢሳይያስ፥ ሀይከ ታይ ያሃኒስ ኪኒ። 15. አማይጉል ታበ አይቲ ለቲይ ያቦይ! 16. ያኮይ ኢካህ ታይ ዳባኒህ ሒያው አይምልህ ተን አይነጸጸርክ አንዮ? አደባበያል ደፈኒህ ሲኒ ዶባ ደዓክ ታህ ያዽሔ ኢሮህ ኢጊዶን፡፡ 17. ኒያቲ ሙዚቃ ሲን ኖይሶበ፣ አቲን ለ ማጎልስንቲን፣ ኃዛን ቁዞምታ ሲን ኖይሶበ አቲን ለ ማወዕንቲን፡፡ 18. አማም ባሊህ ያይጥምቀ ያሃኒስ ኢላው በተካህ ወይኒ መስ አዑበካህ የመተርከህ ታይቲ ጋኔን ለቲያ ኪኒ አክየን፡፡ 19. ሒያውቲ ባዽ ለል በታክከ አዑብክ የመተርከህ ሀይከ ምግበከ ማስተ ኪሒንቲያ ኪኒ፣ ቀረጽቲከ ኃጢአተይናታት ካሓንቶል ኪኒ አክ የን። አማይጉል ብልሓት ትክኪል ኪናም ኢሲ ሢራሕህ ያምቡለወ።    

                                                       አምነ ዋየኒም ኢዻህ ትምውቀሰ  ካቶም

  (ሉቃ.10፣1፟-15)

   20. ካታየህ ኢየሱስ አኪ ካቶምኮ አጋናል ማንጎ ታምራት ኤልአበ ካቶም ንስሓ ሳየ ሒነንጉል ታህ የህ ተን ያውቅሲኒም ኤዸዽሰ፡፡ 21. ታብሎ ኪቶ ኮራዚኖ፣ ታብሎ ኪቶ ቤተሳይዳ፣ ሲናል የከ ታምራት ጢሮስከ ሲዶናል የከህ ያከዶ፣ ታማል ማራይቲነ ሒያው   ኃዛን ሣራ ሀይስተኒህ ጎምቦድ ሲኒ አሞል ይንስንስኒህ ገና ባሶህ ንሲሓ ሳየ ዻዸን።               22 .አማይጉል ፊርዲ ለለዕ ሲንኮ አጋናል ጢሮሰከ ሲዶናህ ቅጽዓት አሲሲከለ። 23. አቱ ቅፍሪናሆሞ አይከ ዓራን ፋናህ ናውተህ ማታነ? እስኪ ኡኮ አይከ ሴኦል ዓዘቅትድ ኦበሊቶ፣  ኮያል የከ ታምራት ሶዶሙል የከህ ያከዶ፣ ቶይ ካታማ አለየካህ አይከ ካፋ ፋናህ አኔ ዻዸ፣ 24. አማይጉል ሓቀህ ኮካይክ አነ፣ ፍርድ ለለዕ ኮኮ አጋናል ሶዶም ቅጽዓት አስሲከ  ለ።"

ክርስቶሱህ ዕረፍት ገያናም

(ሉቃ.10፣21-22)

    25. ታማይ ዋከተ ኢየሱስ ታህ የ፣ ዓራንከ ባዾህ ማዳራ ተከ አባ! ታይ ጉዳይ ብልሓት ለምከ ማዻግትኮ ሱዑሰህ ሕፃናታህ ትግልጸርከህ ኩአይምስግኒክ አነ፣ 26."ዮዎ! ኦ'አባ! ታሃም አብቶ ኩመዔ ፈቃድ የከ። 27. ያ አባ ኡማን ጉዳይ ዮህ ዮሖወ፣ አባኮ በሒህ ባዻ ያዽገቲ ኢንከቲ ሚያነ። ታማም ባሊህ ባዻኮ በሒህ አባ ያዽገቲይ ሚያነ፣ አኪናንቲይ ባዽ አካህ ያምባላዎ አካህ ይፍቅደቲያኮ በሒህ አባ ያዻጎ ማዽዓ።

   28."ዑኪ አክ ዕልስ ሩኩታማክ ኡምቢህ፣ ዮያ ዻጋህ አማ! አኑ ዕረፍቲ ሲናህ አኃየ ሊዮ፡፡ 29. ያ አርዑት ሲኒ ሱንኩክ ኢይኩዓ፣ ዮኮ ኢምሂራ፣ አኑ ለ ጋርሄንታከ ትሕቲና ለቲያ ኪዮ፣ ሲኒ ናፍሰህ ዕረፍቲ ገልቲን፡፡ 30. ያርዑት ልዝብ ቲያ ኪኒ፣ ይ ዑኪ ለ ስሲክቲያ ኪኒ።

ማዕራፋ 12

ሳንባት ዳዓባል ካብተ ኤሰሮ

(ማር.2፣23-28፤ሉቃ.6፣1-5)

   1. ታሃምኮ ላካል ሳንባት ለለዕ ኢየሱስ ሲራይ ዻገህ ፋንኮ ቲላይ ይነ፣ ካተምሃሮ ሉወኒህ ይኒንጉል ሲራይ ሱዋይ አቅጹይክ በታናም ኤዸዽሰን። 2. ፈሪሳውያን ታሃም ይብሉኒህ ኢየሱሱክ"ሀይከ ኩተምሃሮ ሳንባት ለለዕ አምፍቂደ ዋየተም"አባን! አክ የን። 3. ኢየሱስ ለ ታህ አክ የ፣"ዳዊትከ ካሊህ ቲነ ሒያው ሉወን ዋክተ ዳዊት አበም ኢንኪጉል ማይናባቢኒቲንሆ? 4. መዔፉጊህ ዓረድ ሳየኒህ ካህናትኮ በሒህ ካያህ ያኮይ ካሊህ ቲነ ሒያው በቶና አምፍቂደ ዋይተ ይምቅድሰ መባኢህ ኅብስቲ በተን።"5. ለል ካህናት ሳንባት ለለዕ በተ መቅደስ ዓረድ ሳንባት አስዒሪህ በደል የከህ አክ ማሎይምናም ሙሴ ሕገል ማይናባቢንቲኒ? 6. ያ ከካህ በተ መቅደስኮ ያይሰቲ ሀይከ ታለ ያነ ሲናክ አይክ አነ። 7. ለል ለ 'አኑ ጉራም መሕረት ክኒካህ መሥዋዕቲ ማኪ፣ 'ያዽሔ ማጽሐፍ ቃል አይም ኪናም ትስትውዕልኒህ ያከዶ በደል አለዋይታ ሒያዊህ አሞል አፍሪደ ማዻዽኒቲን። 8."አይሚሒያውቲ ባዽ ሳንባት ማዳራ ኪኒ።         

ጋባ ጎዶሎ ለ ሒያውቲ

(ማር.3፡1-6፣ሉቃ.6፣6-11)

  9. ኢየሱስ ታማይ ቦታኮ ኡጉተህ ተን ሙክራባድ ሳየ፣ 10. ታማል ኢንኪ ጋባ አክ ትስምሂለ ሒያውቲ ይነ፣ ኢየሱስ ታክሳሶ ጉርተ ውልውል ሒያው"ሳንባት ለለዕ ዳላኪን ኡሩሶና ይምፊቅደ?"የኒህ ካኤሠረን። 11. ኢየሱስ ለ ታህ የህ ኤልደሄየ፣"ሲን ፋንኮ ኢንኪ ዒዶይታ ለ ቲይ፣ ኢዳ ሳንባታህ ጉድጋዳድ አዳድ አክ ራዳጉል ሂሪገህ አየዔዋቲ ኢያይቶ ኪኒ? 12 .ኢስኪ ዒዶይታኮ አጋናል ሒያውቲ አይናህ የህ ሚያሰ? አማይጉል ሳንባታህ መዔ ጉዳይ አባናም ትምፍቅደም ኪኒ።"13. ታሃምኮ ሳራህ ኢየሱስ ጋባ ማልክ"ኢሲ ጋባ ፋሕ ኢስ"አክየ! ኡሱክ  ፋሕ ኢሰ ዋክተ ጋባ አካህ ኡረተህ ልክዕ ናጋይ ኪን ጋባ ባሊህ አካህ ተከ። 14. ፈሪሳወያን ለ ታማርከኮ የውዕኒህ ኢየሱስ አይናህ ኢሰኒህ ያግድፍኒም  የመከሪን።

መዔፉጎህ ዶርምመ አገልጋሊ

    15. ኢየሱስ ለ የመከርኒም ዮበህ ታማይ ቦታኮ እዕዽያ የ፣ ሒያው ኤድ ካታይተህ ተደየ፣ ላሑተም ኡምቢህ ኡሩሰ። 16. ካ ዳዓባል ቲይ ዋንስታምኮ ይኢዚዘ፣ 17. ታሃም ተከም ነብይ ኢሳይያሳህ ታህ የህ ይምጽሕፈ ትንብት ቃል ያምፋጻሞ የህ ኪኒ። 18."ዶረ ይአገልጋሊ ሀይከ ታይቲያ ኪኒ! ኡሱክ ለ አኑ ኪኅንዮቲያከ አካህ ኒያታ ቲያ ኪኒ፣ ኢኒ መንፈስ ካአሞል አባሊዮ፣ ኡሱክ ቁኑዕ ኪኒ ፍርደ አረማውያናህ አእውዘ ለ፡፡"19. ኡሱክ ምያምከረከረ ወይ ዋዕ ሚያ፣ ካአሮሑል አንዻሕ ምያሞበ፡፡ 20. ይቅጥቅጢን ሳምባቆ ኡካ ምያግድለ፣ ቲካ ጡዋፍ ፋትላ ምያግሪዔ፣ ታሃሞም አባም ቁኑዕ ፍርዲ ሱባም ፋናህ ኪኒ።  21. አረማዊያን ካያል ታስፋ አባን ።"                                                        

 ኢየሱስከ ብዔልዘቡል ዳዓባል

(ማር.3፣20-30፤ሉቃ.11፣14-23)

    22. ታሃምህ ላካል ሒያው ጋኔን ኤድይኅድረህ ያነ ኢንትማልከ ዱዳ ኢየሱስ ዻጋህ ባሄን፣ ኢየሱስ ኡሩሰ፣ ሒያውቲ ዋንሲቶከ ያብሎ ዺዔ፡፡ 23.ህዝቢ ኡምቢህ ይምግርምኒህ፣"ታይቲ ዳዊት ባዻ ያከ"የን። 24 .ፈሪሳውያን ለ ታሃም ዮብን ዋክተ"ኡሱክ አጋኒኒት ያየዔም 'ቤልዘቡል አክያን አጋኒኒቲ ኃለቃህ ኪኒ"የን። 25. ኢየሱስ ተን ሓሳብ ይዸገህ ታህ አክየ፣"ኢንኪ ማንግሥት ኢሰኢሰህ ባዽሲመህ ያምሄወከህ የከምኮ ታማይ ማንግሥት ራዳ፡፡ ታማሃም ባሊህ ኢንኪ ካታማ ወይ ኢንኪ በተሰብ ኢሰኢሰህ ባዽስመምኮ ሲክ የህ ማሮ ማዽዓ፡፡ 26. ሰጣን ሰጣን ያየዔህ የከምኮ፣ ኢሰኢሰህ ባዽስማ ማለት ኪኒ፣ ለል ካማንግሥት አይናህ የህ ይጽኒዔህ ማሮ ዺዓ? 27. ለል አኑ አጋኒኒቲ አየዔም ቤልዜቡሉህ ኤከምኮ ሲን ዻይሎ አይሚህ አየዔሎኑ? አማይጉል ሲን ዻይሎ ሲናል አፍርደሎን፡፡ 28. አኑ አጋኒኒቲ አየዔም መዔፉጊህ መንፈሲህ የከምኮ፣ አማይጉል መዔፉጊህ ማንግሥት ሲናህ የመተህ ያነ ማለት ኪኒ፡፡ 29. ለል ኢንኪ ሒያውቲ ዮኮመህ ኃይላ ለቲያ ባሶል አዹወካህ ኃይላለ ሒያውቲህ ኒብረት ያዝራፎ አይናህ የህ ዺዕማ? ኃይላለቲያ አክ ዩዹወምህ ላካል ለ ኒብረት ያዝራፎ ዺዓ፡፡ 30. ዮሊህ አከዋቲ ኡምቢህ ይያምቆወመ፣ ዮሊህ አከ ዋቲይ ያምብቲነ፡፡ 31. አማይጉል ሒያው አብታ ኡማን በደል ያኮይ ዋቶ ቃላት ኡምቢህ ኤልራዓ ሲናክ አይክ አኒዮ፡፡ መንፈስ ቅዱሱል ዋቶ ቃል ዋነሲተቲያል ለ ይብድለ በደል አልማራዓ፡፡ 32. ሒያውቲ ባዻል ዋቶ ዋንሰተቲያል ኡምቢህ ካበደል በሕላካ ገያ፡፡ መንፈስ ቅዱስ አሞል ዋቶ ቃል ዋንስተ ቲያል ለ ኡምቢህ ለ ታይ ዓለሚል ያኮይ ያምተ ዓለምል ካበደል ብሒላካ ማገያ።

መዔ ሓዻ ኢሲ ፍረህ  ታምዽገ

(ሉቃ.6፡43-45)

    33. ኢየሱስ ካታሰህ ታህ የ፣ ሖዽ ኡምቢህ ኢሲ ፍረህ ያምዽገ፣ መዔ ሓዻ ተለምኮ መዔ ፍረ ጋይታ፣ ኡማ ሓዻ ተለምኮ ለ ኡማ ረ ገይታ፡፡ 34. አቲን ዓሮራ ዻይሎ! ኡማ ማራ ተክኒህ መዔ ጉዳይ ዋንስቶና አይናህ ተኒህ ዽዕታና? አይሚህ ሒያውቲ አፋኮ ዋንስታም አፍዓዶድ የመገህ ራዕሰምኮ ኪኒ፡፡ 35."መዔ ሒያውቲ ኢሲ መዔ መዝገብኮ መዔ ጉዳይ ያየዔ፣ ኡማ ሒያውቲ ኢሲ ኡማ መዝገብኮ ኡማ ጉዳይ ያየዔ፡፡ 36. ሓቀህ ሲናክ አይክ አኒዮ፣ ሒያው ዋንሲታ ጥቅመ አለዋይታ ካንቶ ኪን ቃላታህ ኡምቢህ ፍርዲ ለለዕ መልስ ኤል አሓየ ሎን፡፡ 37. አይሚህ ኩቃልኮ ኡጉተሚህ ኮህ ያምፍርደ፣ ኩቃላትኮ ለ ኡጉተሚህ ኮል ያምፍርደ፡፡"

ታምራት ያብሎና ካብተ ኤሠሮ

(ማር.8፣11-12፤ሉቃ.11፣29-32)

   38. ታማይ ዋከተ ውልውል ሙሴ ሕጊህ መምሂራንከ ፈሪሳውያን ኢየሱስክ፣"መምሂሮ! አቱ ታአምራት አባህ ናብሎ ጉርና!"አክየን፡፡ 39. ኡሱክ ለ ታህ የህ ኤልደሄየ፣ ኡማማራከ ኡማ ኢምነት ለ ታይ ዳባኒ ሒያው ታአምራት ያብሎና ጉራን፣ ያከ ኢካህ ነብይ ዮናስ ታአምራትኮ በሒህ አኪ ታአሚራት አካህ ሚያምሖወ። 40. ዮናስ ዓሣ አንበሪህ ጋርቢህ አዳድ አዶሓ ለለዕከ አዶሓ ባር ትላሰም ባሊህ ታማም ባሊህ ሒያውቲ ባዽ ዱኮት አዳድ አዶሓ ለለዕከ አዶሓ ባር ትላሰ። 41. ነነዊዬ ካታማህ ሒያው ፍርድ ለለዕ ታይ ዳባኒ ሒያውሊህ ኡጉተኒህ ተናል አፈሪደሎን፣ አይምህ ነነዊዬ ሒያው ዮናስ ሲብክት ዮብኒህ ሲኒ ኃጢአታህ የነሰሒኒህ ኒሲሓ ሳየን። ኢስኪ ኡኮ ዮናስኮ ያይሰቲይ ሀይከ ታለ ያነ። 42. ደቡብ ንግሥት ፍርዲ ለለዕ ታይ ዳባኒ ሒያውልህ ኡጉተህ ተናል አፍሪደ ለ፣ አይሚህ ኢሲ ሰሎሞን ብልሓት ታቦ ባዾ መሔለድያኮ ተመተህ ታነ፣"ኡኮ ሰሎሞንኮ ያይሰቲይ ሀይከ ታለ ያነ።"

ሩኩስ መንፈስ ሒያው አዳድ ጋሔህ ሳም

(ሉቃ.11፡24-26)

   43. ጋባዔህ ኢየሱስ ታህ የ፣ ሩኩስ መንፈስ ሒያውኮ የውዔ ዋዕደ ኤድ ያዕሩፈ ቦታ ዋየህ ላየ ኤድ አኔ ዋይታ ካፊን ቦታል ያዞረ፡፡ ያከ ኢካህ ማገያ፣ 44. አማይጉል አክ ኤውዔ ዓረድ ጋሔህ አዳዎይ ያዽሔ፡፡ ጋሐጉል ዓሪ ዲቦህ የከህ ይጽሬህ ዮምሶኖዶወህ ገያ፡፡ 45. ታሃምኮ ላካል ሩኩስ መንፈስ የደየህ ካኮ ግድድ ኡማ አኪ ማልሒና ጋነን ይስከሄለህ ባሃ። ኡሱክ ባሶህ ኤድይነ ሒያውቶድ ሳየህ ኢንኮህ ማራን። አማይጉል ታይ ሒያውቲህ ባኪቶ ናብራ ኤዸዾይታ ቲያኮ ጋዳህ ግድድ ቲያ ታከ። ታይ ዳባኒት ኡማ ሒያዊህ አሞል ታከም ታህ ኢግዲን ጉዳይ ኪኒ።"

                             ኢየሱስከ ኢናከ  ሳዖል                                        

(ማር..3፣31-35፤ሉቃ.8፣19-21)     

   46. ኢየሱስ ሒያውልህ ገና ዋንስታይ ያነሃኒህ ካኢናከ ካሳዖል ካዋንሲሶና ጉረኒህ ኢሮል ሶለኒህ ይኒን፤ [47. ታማል ቲነ ሒያውኮ ኢንከቲ ኢየሱሱክ፣ ሀይከ ኩኢናከ ኩሳዖል ኩዋንሲሶና ጉረኒህ ኢሮል ሶለኒህ ያኒን አከየ፡፡] 48. ኢየሱስ ለ"ይና አይቲያ ኪኒ? ይሳዖል አልታነም ኪኖኑ?"አይክ የህ ኤልደሄየ፡፡ 49. ታሃሚህ ላካል ጋባ ይዝርግሔህ ኢሲ ተምሃሮ አይቡሉውክ ታህ የ፣"ይኢናከ ይሳዖል ሀይከ ታይማራ ኪኖን። 50. ዓራናል ያነ ያ አባህ ዲላይ አባቲ ኡምቢህ ይሳዓል፣ ይሳዕላ፣ ይኢና ለ ኡሱክ ኪኒ።"

ማዕራፋ 13

ዳሪ ምሳሌ

(ማር 4፡1-9፤ሉቃ.8፡4-8)

   1. ታማይ ለለዕ ኢየሱስ ዲኮ የውዔህ ባሕሪ ዳራታል ድፈየ፡፡ 2. ማንጎ ሒያው ካኡላል ተመተህ ተከሄለም ዩብለጉል ዛልባክ አሞክ የውዔህ ድፈየ፣ ህዝቢ ሙሉኡድ ባሕሪ ዳራታል ሶለህ ይነ፡፡ 3. ታማሚህ ላካል ማንጎ ነገራት ምሳለህ ታህ አክዮዋ ኤዸዽልሰ፣ ሀይከ ያድሪየ ጋባርቲ ያደራዎ የውዔ፡፡ 4. አድሪህ ውልውል ዳሪ አራሕ ዳራታል ረደህ ክንቢሮ ተመተህ በተ፡፡ 5. ውልውል ዳሪ ማንጎ ቡልኩዓ ኤል አኔዋይታ ፅንፃ ኪን መሬትል ራደ፣ መረት ማንጎ ቡልኩዓ ልይማናጉል ዳሪ ዸህ ቡለ፡፡ 6. ያከካህ አሮይታ ተውዔጉል ዓሙለ፣ ሪሚድ ልይማናጉል ካፈ፡፡ 7. አኪ ዳሪ ከናን ለ ቆጥቃጣክ ፋና ራደ፣ ከናን ለ ቆጥቃጣክ አዳድ ቡለጉል ይሕንቀህ ራዒሰ፡፡ 8. አኪ ዳሪ መዔ መረቲህ አሞል ራደህ ቡለህ ማንጎ ፍረ ፊሮሰ፣ ኢንከቲ ቦል፣ ኢንከቲ ላሕታም፣ ኢንከቲ ሦዶም ፊረቲያ ዮሖወ፡፡ 9. ታበ አይቲ ለቲይ ያቦይ!"

ኢየሱስ ምሳለህ  አይሚህ ዋንስታይነም

(ማር.4፡10-13፤ ሉቃ.8፡9-10)

   10. ታሃሚህ ላካል ኢየሱስ ተምሃሮ ኢየሱሱል ካብ የኒህ"አይሚህ ህዝበድ ምሳለህ  ወንስታክ ታነ?"አክየን፡፡ 11. ኡሱክ ታህ የህ ኤልደሄየ፣ ሲናህ ማንግሥተ ሰማይ ያዽግኒሚህ ምሥጢር ሲናህ ዮምሖወ፣ ተናህ ለ አካህ ማምሓዊና። 12. አይሚህ ለቲያህ አካህ ያምሓወ፣ አካህ ያመንገ፣ አለ ዋ ሒያውቶክ ለ ያው ለም ኡካ አክ በያን። 13. አብሊህ ኢንኪጉል አብለ ዋይታም፣ አቢህ አበ ዋይታም ወይ አስትውዒለ ዋይታም የክንጉል ሀይከ አኑ ሚሳለህ አካይክ አነ። 14. አማይጉል ነብይ ኢሳያሳህ ታህ ተህ ትምጽሒፈም ተን አሞል ታምፊጺመ፣"ሞቦ አብክ ታኒን፣ ያከካህ ማታስትውዒሊን፣  ሙቡል አብልክ ታኒን ያኮይ ኢካህ  አፍዓዶ ማብታን። ድ5. አይሚህ ታይ ህዝቢ ሲኒ አፍዓዶ ይድንድኒን፣ ተን አይቲት ትምድፊነ፣ ሲኒ አይቲት አልፈን፣ ሲኒ ኢንቲት ቲም ኢሰን፣ ታህ አከ ዋዶ ሲኒ ኢንቲትህ ዩብልኒህ፣ ሲኒ አይትቲህ ዮቢኒህ፣ ሲኒ አፍዓዶህ ይስቲውዕሊኒህ ዮያል ጋሔኒህ ያክዶ ተን አይዳኃኖ ኪክ ኢነ።"16. አቲን ለ ሲን ኢንቲት ሲናህ ታብለም ኢዻህ፣ ሲን አይቲት ሲናህ ታበጉል ትምዕዲለም ኪቲን፡፡ 17. ሓቀህ ሲናክ አይክ አኒዮ ማንጎ ነብያትከ ጻድቃን አቲን ታብልኒም ያብሎና ይትምኒኒህ ይኒን፣ ያካካህ ማብሊኖን፣ አቲን ታቢኒም ያአቦና ይትምኒኒህ ይኒን፣ ያካያካህ ማአቢኖን።

ኢየሱስ  ዳሪ ምሳለ  ይሪዲኤ

(ማር.4፣13-20፤ሉቃ.8፣11-15)

   18. ካታሰህ ኢየሱስ ታህ የ፣"አማይጉል አቲን ዳሪ ምሳለ አይም ኪናም ኦኮሲታይ ኦባ፡፡ 19. አራሓል ራደ ዳሪ ያምልክተም መዔፉጊህ ቃል ዮበህ አስትውዕለ ዋ ሒያወቶ ኪኒ፣ አማይጉልካህ ሰጣን የመተህ ካአፍዓዶድ ይምድሪየ ቃል አክበያ፡፡ 20. ፅንፃ ኪን መረቲህ አሞል ይመድሬቲ ያምልክተም ቃል ዸህ ዮበህ ኒያታህ ጋራ ሒያውቶ ኪኒ፡፡ 21. አማሃም ታከያካህ ዋክተህ ክኒካህ ሪሚድ ማለ፣ አማይጉል ኢሲ ቃሊህ ምክንያታል ኢንኪ ጸገም  ወይ ስደት ካማዳ ዋክተ ዸህ ያምሰነከለቲያ ኪኒ፡፡ 22. ከናን ለ ቆጥቃጢህ ፋናድ ይምድሬቲ ያይቡሉወም ቃል ጊዘህ ያበ ሒያውቶ ኪኒ፣ ያከካህ ታይ ዓለሚህ ሓሳብከ ሀብቲ ካሓኒ አፍዓዶድ አክሳየህ ቃል ካያኅንቀጉል ፍረ ማለህ ራዓቲያ ኪኒ፡፡ 23. መዔ መረቲል ራደ ዳሪ ያይምልኪተም ቃል ዮበህ ይስትውዒለህ ጋራ ሒያውቶ ኪኒ፣ ኡሱክ ፍረ ፊሮሳ፣ ኢንከቲ ቦል፣' ኢንከቲ ላሕታም፣ ኢንከቲ ሦዶም  ፍረቲያ ያኃየ፡፡"

ክርዳዲ ምሳለ

   24. ታማም ባሊህ ኢየሱስ አኪ ምሳለህ ታህ አክ የዽሔ፣ ማንግሥተ ሰማይ ኢሲ ሐሩሱል መዔ ዳራ ይድሪየ ሒያውቶህ  ኢግዳ፤ 25. ያከ ኢካህ ሒያው ኡምቢህ ትስፊረህ ታነ ዋክተ ናዓብቶሊ የመተህ ሲራይ ፋናድ ኪርዳድ ይድሬህ አክ የደየ፡፡ 26. ሲራይ ቡለህ ፍረ ማደጉል ኪርዳድ ታማይ ዋክተ ይመቡሉወ፡፡ 27. አማይጉል ዻገ ባዕሊ አገልገልቲ ካያድ የደዪኒህ ኒማዳራ! ኩዻገል መዔ ዳራ ትድሬህ ማኖይቶሆ? ኪርዳድ ቡሳ አርከኮ የመተ? አክየን፡፡ 28. ኡሱክ ታሃም አበቲ ናዓብቶሊ ኪኒ! አክየ።  አገልገለቲ ኢቦል ነደየህ ኪርዳድ አክ ናንቃሎ ጉርታ? አክየን፡፡ 29. ኡሱክ ለ ታህ የህ ይምሊሰ፣ ማለ ሚያከ፣ አይሚህ ኪርዳድ ቡኩሳህ ሲራ ለ ኤሊህ ቡኩሱማ። 30. አማይጉል ኢንኮህ ዓሮናይ፣ ዓዱት ዋክተህ ኪርዳድ ኡኩማይ ቡኩሳይ፣ ጊራህ ያምቃጻሎክ ኢሲሲ ዒትረህ ኡዹዋ፣ ሲራይ ለ ኤስከኄላይ ማዕካናድ ሳይሳ፣ ሲናክ አይክ አኒዮ፡፡"

                            ሰናፍጭ ዳሪህ ምሳለ                            

(ማር.4፣30-32፤ሉቃ.13፣18-19)

   31.አማም ባሊህ ኢየሱስ አኪ ምሳለህ ታህ የህ አክየ፣"ማንግሥተ ሰማይ ኢንኪ ሒያውቲ በየህ ይሕሩሰ ሓሩሱል ይድሬ ሰናፍጭ ዳራህ ኢግዳ፡፡ 32 ኡሱክ ኡማን ዳራኮ ዒንዻቲያ ኪኒ፣ ዓራጉል ኡማን አሕምልትኮ ያነበ፣ ሓዻ ቲዳ ያከ፣ ክምቢሮ ተመተህ ካ ሓኮኩክ አሞክ ክምቢሮ ዓርዋ ሢራሕተህ አክ ታስፊረ።

መብኮዒ ምሳለ

(ማር.4፣10-12፤ሉቃ.8፣9-10)

   33. ጋባዔህ ኢየሱስ ታይ ምሳለ አክየ፣ ማንግሥተ ሰማያል ኢንኪ ኑማ በይተህ አዶሓ መሰ ሐርድያድ ቱሉሰ መብኮዒህ ኢግዳ፣ መብኮዒ ለ ቡኩዕ ኡምቢህ ያብኩዔካህ አባ።

ኢየሱስ አይሚህ ምሳለህ ይምሂረም

(ማር.4፡33-34)

   34. ኢየሱስ ታይ ጉዳይ ኡምቢህ ምሳለህ ህዝበክ የዽሔ፣ ምሳለ ሂኒም"ኢንኪ ጉዳይ ኤድማዋሲቲና። 35. ታሃም አካህ ተከ ምክንያት ነብይህ ታህ ተህ ትምጽሒፈም ታምፋጻሞ ኪኒ፣ ኢኒ ዋኒ ምሳለህ አግልፂክ አኒዮ፣ ዓለም ይምፊጢረምኮ ኤዸዽሰህ ሱዕሱመ ጉዳይ ዋንሲታክ አኒዮ፡፡"

        ኢየሱስ ኪርዳዲ ምሳለ ይርድኤም

   36. ታሃምኮ ላካል ኢየሱስ ህዝበ ኃበህ ዓረድ ሳየ፣ ካተምሃሮ ካያድ ካብ የኒህ"ማሕራስ ኪርዳዲህ ቱርጉም ኒርዲእ"አክየን፡፡ 37. ኢየሱስ ታህ የህ ኤልደሄየ፣ መዔ ዳራ ይድሬየቲይ ሒያውቲ ባዻ ኪኒ፣ 38. ማሕራስ /ዻገግ/ ታይ ዓለም ኪኒ። መዔ ዳሪ መዔፉጊህ መንግሥተ ሰማይ ዻይሎ ኪኖን፣ ኪርዳድ ሰጣን ዻይሎ ኪኖን፣ 39. ኪርዳድ ይድሪየ ናዓብቶሊ ዲያብሎስ ኪኒ፣ ዓዱት ዋክቲ ዓለም ባክቶ ኪኒ፣ ታዒይየም መላእክት ኪኖን፣ 40. ሊኪዕ ኪርዳድ የምጸሄየህ ኒዳእቲ ባሊህ ዩምዹወህ ሓራራም ባሊህ ሙሉኡክ ዓለም ባክቶል ታማህ አከለ፡፡ 41. ታማይ ዋክተ ሒያውቲ ባዽ መላእክት ፋረ ለ፣ ኢሲን ኃጢአት ምክንያት ተከም፣ "ኡማም አብተም ኡምቢህ ካማንግሥቲኮ የስከሄልኒህ አየዔሎን።" 42. ኢቶን ጊራድ ለ ተን ዒደ ሎን፣ ታማል ደሮከ ኢኮክቲ አርባዖ አከለ። 43. ጻድቃን ለ ሲኒ አባህ ማንግሥትል አይሮይታ ባሊህ  ኢፊሰሎን፣ ታበ አይቲ ለቲይ ያቦይ!"

ሱዑተ ሀብቲህ ምሳለ

   44. ካታየህ ኢየሱስ ታህ የ፣"ማንግሥተ ሰማይ ሐሩስ አዳድ ሱዕሱመ ሀብተህ ኢግዳ፣ ኢንኪ ሒያውቲ ታይ ሀብተ ገየጉል ደኄየህ ሱዑሰ፣ ኒያቲ ማንጋኮ ኡጉተሚህ የደየህ ለም ኡምቢህ የበኄህ ታማይ ዻገ ዻመ፡፡"

    ኡንዹዽቲ ምሳለ

   45. ጋባዔህ ኢየሱስ ታህ የ፣"ለል ማንግሥተ ሰማይ መዔ ኡንዹዽ ጉረ ነጋዴህ ኢግዳ፤ 46. ነጋዴ ለ ጋዳህ ኩቡር ኪን ኡንዹዽ ገየጉል የደህ ለም ኡምቢህ የበሔህ ታማይ ኡንዹዽ ዳመ፡፡"

መርበብ ምሳለ   

   47. ኢየሱስ ካታሰህ ታህ የ፣"ታማም ባሊህ ማንግሥተ ሰማይ ባሕራድ ዒደን መርበቢህ ኢግዳ፣ ኢሲ ኢሲሲ ዓይነቲህ ዓሣ ታስከሄለቲያ ኪኒ፤ 48. ታመገጉል ዓሣ ታጽምደ ሒያው ባሕሪ ዳራታል ሂርገኒህ ያየዒን፣ ዲፈኒህ አምዒናኒምከ ዓምዒናኒም ዶረኒህ ኑዋይቲድ ዲፈሳን፣ ኡማምከ ኡማም ለ ቶህ አክ ዒዳን፡፡ 49. ዓለም ባክቶል ታማም ባሊህ ያከ፡፡ መላእክት ተመተህ ኃጢአት ለም ጻድቃንኮ ባዽሰ ሎን፡፡ 50. ኢቶኑድ ተን ዒደ ሎን፡፡ ታማይ ዋክተ ኃዛንከ ኢኮክቲ አርባዖ አከለ፡፡"

  51. ለል ኢየሱስ"ታሃም ኡምቢህ ትስተውዒሊኒ?"አክየ፣ ኢሲን ዮ አክየን፡፡ 52. ኡሱክ ለ"አማይጉል ማንግሥተ ሰማይ ምሥጢር ሰለህ ያዽገ ሕጊ መምሂር መዝገብኮ ዑሱብቲያከ ተምዔለም  አክ ያየዔ ኒብረት ባዕላ ባሊህ ኪኒ፡"አይክ ኤል'ይምሊሰ፡፡

            ኢየሱስ ናዝሬትል ካማደ ተቃውሞ

              (ማር.6፣1-6፤ሉቃ.4፣16-30)

    53. ኢየሱስ ታይ ምሳለ ዋንሲተህ ባከሚህ ላካል ታማይ ቦታ ሓበህ የደየ፡፡ 54. ኢሲ ባዾል ናዝሬት ካታማል የመተ፣ ታማል ሙክራባድ አይምሂሪይ ይነ፣ ቶበም ኡምቢህ አድናቆቱህ ታህ አይይ ይኒን፣"ታይ ሒያውቲ ታይ ጠበብከ ታይ ዲንቀ ኪን ጉዳይ  አርከኮ ባሄ? 55. ካ ኢና ማርያም ማኪሆ? ካ ሳዖል ያዕቆብከ ዮሴፍ፣ ስምዖንከ ይሁዳ ማኪኖንሆ? 56. ካ ሳዖልቲ ኡምቢህ ኖሊህ ሚያኒኒሆ? ኡቡላየ ኢስኪ ታይ ሒያውቲ ታይ ብልሓት ኡምቢህ ኢያ አርከኮ ገየ? 57. ታሃሚህ ምክምያታል የምሰነከሊኒህ ካጋራየካህ ራዔን፡፡ ኢየሱስ ለ ነብይ ዻይቲማም ኢሲ ባዾልከ ኢሲ በተሰቢህ ኪኒካ አኪ ቦታል ያክቢረ "አክየ፡፡ 58. አሚነ ዋየንርከህ ኢየሱስ ታማል ማንጎ ታአሚራት ማቢና።

ማዕራፋ 14

ያይጥምቀ ያሃኒስ ራበ

   1. ታማይ ዋክተ ገሊላ ክፍሊህ ባዾል ረዳንቶ ኪይይ ይነ ሄሮድስ፣ ኢየሱስ ዋረ ዮበ።   2. ሎን ለ"ታይቲይ ያይጥምቀ ያሃኒስ ኪኒ፣ ኡሱክ ራባኮ ኡጉተ፣ ታይ ኡምቢህ ኢያህ  ድንቀ ኪን ኃይሊ ያከም ለ ታማይጉል ኪኒ"አክየን። 

  3. ሄሮድስ ያሃኒስ ይብዸህ ዩይዹወህ ይነ፣ ታሃም አካህ አበም ካሳዓሊህ ፊልጶስ ኑማ ኪይይ ቲነ ሄሮዲያዳ ምክንያታል ኪኒ፡፡ 4. ያሃኒስ ሄሮድስክ ኢሲ ሳዓሊህ ኑማ ኦርብሶ ሕጊ ኮህ ሚያፍቅደ! አክየህ ይነ፡፡ 5. አማርከህ ሄሮድስ ያሃኒስ ያግዳፎ ጉራይ ይነ፣ ያከ ኢካህ አይሁድ ነብይህ አብልይ ይንንጉል ህዝበ ማይስተ፡፡ 6. ሄሮድስ ዮቦከ ለለዕ ይስክብረ ዋክተ ሄሮድያዳ ባዻ`ተመተህ ዕዱማት ፋናል ጎይልሳክ ቱይቡሉወ ሱንኩስናናህ ሄሮድስ ኒያትሰ፡፡  7. አማይጉል ሄሮድስ ጉርታ ጉዳይ የሠር፣ አኑ ለ ኮህ አሓየ ሊዮ አይክ የህ ዽዋህ ቃል አካህ ሳየ፡፡ 

    8. ኢሲ ኢሲናህ ትምክረ "አጥማቂ ያሃኒስ ዸግኃ ሳሐናል ሃአይ ካዶ ዮህ ኡሑይ፣"አክተ፡፡ 

   9 .ኑጉሥ ታይ ጉዳህ ይኅዝነ፣ ያኮይ ኢካህ አበ ዽዋህከ ካሊህ ማይድል ድፈይተህ ቲነ ሒያው ዮክ ዮና ኪኒ ያናማህ ያሃኒስ ዸግኃ አካህ ታምሓዎ ይኢዚዘ፡፡ 10. አማይጉል ሒያው ፋረህ ያሃኒስ ዸግኃ ዋክኒ ዓረድ ይስግሪዔ፡፡ 11. ትግሪዔ ዸግኃ ሣሓናል ባሄኒህ አውካህ ዮሖይን፣ ኢሲ ለ በይተህ ኢናህ ተሖየ፡፡ 12. ያሃኒስ ተምሃሮ የመትኒህ አስካረን በኒህ ዮዖጊን፣ የደይኒህ ታይ ጉዳይ  ኢየሱሱክ የን፡፡

ኢየሱስ ኮናሲሕ ሒያውቲያ  ይምግበ

(ማር.6፣30-44፤ሉቃ.9፣10-17፤ዮሐ.6፣1-14)

   13. ኢየሱስ ያሃኒስ ራባ ዮበጉል ኢንኪ ዲቦ ኪን ቦታል ዲቦህ ያኮ የደየ፡፡ ህዝቢ ታሃም ዮበ ዋክተ ሲኒ ካቶምኮ አውዕክ ኢባህ ኤድ ካታየን። 14. ኢየሱስ ዛልባኮ ኦበጉል ማንጎ ሒያው ዩብለህ አካህ ናሕሩረ፣ ተን ዳላኪን ለ አካህ ኡሩሰ።

  15. ዲተ ሳይተጉል ካተምሃሮ ካያድ ካብየኒህ፥"ታይ ቦታ ባራካ ኪኒ፣ ዲተ ሳይተህ ታነ፥  አማይጉል ሕዝቢ አካባቢል ያነ መንደራል የደይኒህ ሲኒ ሚግበ ዻሞናክ ተን ኤሰነበት"አክየን።

   16. ኢየሱስ ለል ታህ አክየ፣"አቲን በታናም አካህ ኡሑዋ ኢካህ ታህ የኒህ ያዳዎና መዳ" አክየ፡፡

  17. ተምሃሮ ናኑ ኮና ኢንገራከ ላማ ዓሣኮ በሕህ ታል ኢንኪም ማሊኖ፣ የኒህ ኤል'ይሚልሲን፡፡ 18. ኢየሱስ ታማም ዮያል ባሃ! አክየ። 19. ታሃምኮ ላካል ህዝቢ ዓይሦል ዲፈዎና ይኢዚዘ፣ ኮና ኢንገራከ ላማ ዓሣይቶ ዩይኩዔህ ዓራናል ይቱከረህ ምስጋና ጻሎት አበ፣ ኢንገራ ይቁሩሰህ ኢሲ ተምሃሮህ ዮሖወ፣ ተምሃሮ ሕዝበህ ይስቅርቢን፡፡ 20. ኡምቢህ በተኒህ ኃይተን፣ ራዔ ተረፍኮ ተምሃሮ፣ ላማምከ ታማን ሞሰቢያ አክ ኡጎሠን፡፡ 21. በተም ሳዮከ ሒፃናት ኤድሎይመካህ ኮና ሲሕ ታከም ኪይይ ይኒን፡፡

ኢየሱስ ባሕሪ አሞል ታኪሳክ የደ

(ማር. 6፡45-52፤ሉቃ.6፡15-21)

  22. ታሃምኮ ላካል ኢየሱስ ኢሲ ተምሃሮክ አኑ ህዝበ አይሰነበተም ፋናህ ዛልባድ ኤምሰፈራይ ኡኩማይ ቶዓዻል ታባ የህ ተን ይኢዚዘ፡፡ 23. ህዝበ የሰነበተሚህ ላካል ጻሎት ዲቦህ አቦ ኢንኪ ኢምባህ አሞል የውዔ፣ ዲተ ሳይታም ፋናህ ኢየሱስ ታማል ዲቦህ ይነ፡፡   24. ታማይ ዋክተ ዛልባ ባሕሪ ወደብኮ ማንጎም ሚሪሕ ተህ ቲነ፣ ኃይላለ ሓሓይቲ ነፍኮ ኡጉተህ ይነጉል ማዕበል ቶከ ታህ ተኢሳክ አምጎሮፆውይክ ቲነ፡፡ 25. ባርቲት ሳጋላ ሳዓትኮ ላካል ኢየሱስ ባሕራክ አሞል አዲክ ኢሲ ተምሃሮ ዻጋህ የመተ፡፡ 26. ካተምሃሮ ባሕሪ አሞል ታክሳህ ዩብሊን ዋክተ ጋዳህ ማይሲተኒህ ኃንካቢተን፣ ታሃም"ምትሃት ኪኒ!" የኒህ ደረን፡፡          

    27. ኢየሱስ አማይጉልካህ ተን ዋንሲሰህ"አይዱኩም ኤያ! ዮያ ኪዮ፣ ማማይሲቲና"! አክየ።  

   28. ታማይ ዋክተ ጰጥሮስ ይማዳራ! ኮያ የከምኮ ባሕሪ አሞል ታኪሳክ ኩላል አማቶ ዺዖ ያብ አክየ፡፡ 

   29. ኢየሱስ ለ አሞ አክየ፡፡ አማይጉል ጰጥሮስ ዛልባኮ ኢየሱስ ዻጋህ ያዳዎ ባሕሪ አሞል ታኪሳክ የደየ፡፡ 30. አማም ታከያካህ ሓሓይቲ ኃይላ ዩብለጉል ማይሲተ፣ ባሕሪ አዳድ ያማንዻዖ ካባ የጉል ይማዳራ! ይድኂን የህ ደረ፡፡ 31. ኢየሱስ አማጉል ጋባ ይዝርግኄህ ካ ይብዸህ"ኮ ኢምነት ማሊ አይሚህ ታምጠረጠረ?"አክየ፡፡ 32. ኢየሱስከ ጰጥሮስ ዛልባድ ሳየንጉል ሓሓይቲ ቀጣየ፡፡ 33. ዛልባት አዳድ ቲነም ኡምቢህ ሪጊጽህ መዔፉጊህ ባዻ ኪቶ! የኒህ ኢየሱሱህ ይስግዲን፡፡

ኢየሱስ ጌንሳሬጥል ዳላኪን ኡሩሰ

(ማር.6፣53-56)

  34. ኢየሱስከ ተምሃሮ ባሕራኮ ታበኒህ ጌንሳሬጥ ባዾ ማደን፡፡ 35. ታማይ ባዾል ቲነ ሒያው ኢየሱስ ኪናም የዸግንጉል  አከባቢል ታነ ሀገራታል ፋሮይቲት ፋረኒህ ዳላኪን ካያ ዻገህ ባሄን። 36. ዳላኪን ካሳሪህ ሓለ ዻጎና ጥራህ ዻዒመን፡፡ ዻግተም ኡምቢህ ሲኒ ዱረኮ ኡርተ፡፡ 

ማዕራፋ 15

አቦብት ዓይዳ 

(ማር.7፣1-13)

   1. ታማምኮ ላካል ኢየሩሳለምኮ ተመተ ፈሪሳውያንከ ሙሴ ሕጊህ መምሂራን ኢየሱሱድ ካብየኒህ ታህ የኒህ ካኤሠረን። 2."ኩተምሃሮ ስማግለ ዓይዳ /ባህለ/ አሚህ አይፍሪሲይ ያኒኒ? ሀይከ ምግበ በታናም ሲኒ ጋቦብ ዓካለካህ ኪኒ።"

  3. ኢየሱስ ታህ የህ ኤልደሄየ፣ አቲን ሲኒ ባህለ ዻዉዾና ተኒህ መዔፉጊህ ትኢዛዝ አይሚህ አይፍሪሲክ ታኒን? 4. አይሚህ መዔፉጊ አባከ ኢና ኢስክቢር፣'አባል ወይ ኢናት ታሞል ዋቶ ቃል ዋንሲታቲይ ራባህ ያምቅጺዔ'የህ ይኢዚዘ። 5. አቲን ለ ኢንኪ ሒያውቲ ኢሲ አባ ያኮይ ኢሲ ኢና 'ዮኮ ገይታን ጎሮን መዔፉጊህ መባእ አበህ ኢስቅሪበህ አኒዮ' አካጉል፤      6. ቶይ ሒያውቲ፣ ኢሳ አባ [ወይ ኢሲ ኢና] ያስክብሪኒም ማጉረሱሳ አይክ ታኒን፣ አማይጉል ሲኒ ዓይዳ ዻዉዾና መዔፉጊህ ሕገ አይስፍርሲክ ታኒን፤ 7. ኮጉቡዛት፣ ኢሳይያስ ሲን ዳዓባል ታህ የህ ዋንስተ ትንብት ሊክዕ ኪኒ፣

          8.'ታይ ህዝቢ አፋህ ይያስክብሪን፣ 

               አፍዓዶህ ለ ዮኮ ሚሪሕ የኒህ ኪኒ፣ 

          9. ሒያው ገባህ ሢራሕህከ ሠርዓት ሕገ ዓይዳህ አበኒህ  አይምሂሪክ  ይያምልኪን።' "

ሒያው ያይርክሰ ጉዳይ

(ማር.7፣14-23)

   10. ይቅጽለህ ኢየሱስ ህዝበ ኢሱላል ደዔህ ታህ አክየ፣"ኦባይ፣ ኢስቲውዒላ፣ 11. ሒያው ታይርክሰም አፍኮ ታውዔም ኪኒ ኢካህ አፍኮ ሳይታም ማኪ፡፡"12. ታሃምኮ ላካል ካተምሃሮ ካያድ ካብየኒህ፣"ፈሪሳውያን ታሃም ዋንሲታህ ዮቢኒህ የምሰነከሊኒም ተዸገ "የኒህ ካኤሠረን፡፡ 13. ኡሱክ ለ ታህ የህ ኤል ይምልሰ፣"ዓራንቲ ያባ አትክለ ዋየምኮ ታክሊ ሙሉኡድ ያምንቂለ፣ 14. ኢሲን ቶዖረምከ ዑዉራን መምሂራን ኪኖንጉል ተን ሓባ፣ ዑዉር ዑዉር ያምርኄጉል ላሚህ ሁጉም  አዳድ ራዳን፡፡"     

  15. ጰጥሮስ ኢየሱሱክ"ምሳለ ቱርጎም ኒ ኢይርድእ"አክየ። 16. ኢየሱስ ለ ታህ አክየ፣" አቲን ለ ገናህ ካዶ ፋናህ አስትውዒለ ዋይታም ኪቲኒ? 17. አፍኮ ሳይተም ኡምቢህ ጋርባድ ኦብታህ ኢሮህ ራዳም ማታስትውዒሊኒ? 18. አፍኮ ታወዔም ግን አፍዓዶኮ ታውዔ፣ ሒያው ታይርኪሰም ለ ካያ ኪኒ፡፡ 19. ታሃም ማለት ኡ'ማም ያሕሲቢኒም፣ ሒያው ያግድፊኒም፣ ያምንዚሪኒም፣ ዝሙት አባናም፣ ጋርዒታናም፣ ዲራባህ ዋንሲታናም፣ ሒያው ሚጋዕ ዓይኒሳናም፣ ታሃም ኡምቢህ ሒያው አፍዓዶኮ ታውዔም ኪኒ፡፡ 20. ሒያው ታይርኪሰም ታህ ኢግዲናም ኪኒ ኢካህ ዓካለ ዋይተ ጋባህ በታናም ማታይርኪሰ፡፡" 

ኢንኪ ከነዓናዊት ኑማህ ኢምነት

(ማር.7፥24-30)

  21. ኢየሱስ ታማርከኮ የውዔህ ጢሮስከ ሲዶና ባዾ የደየ፣ 22. ታሃምኮ ላካል ኢንኪ ከነዓናውት ሳይጉደይታ ኢየሱሱል ተመተህ"ዳዊት ባዻ ይማዳራ! ይባዻ' ሩኩስ መንፈሲህ ተምዺብዸህ አምሠቀይክ ታነክ ያዓሳያ ዮህ ኢርኅርኅ አክተህ  ወዕተ።  23. ኡሱክ ለ ኢንኪ ቃል ኤልደሄካህ ቲባ አክየ፣ ታማይ ዋክተ ካተምሃሮ ካባ ኤድየኒህ"ታይ ኑማ ኖድካታክ ደራይ ታነም ኢዻህ ያዓሳያ ተ ኤይሠነበት"የኒህ ካዻዒመን። 24. ኡሱክ ለ"አኑ ፋሪመም እስራኤል  ዲኮ ዒዶባሊህ ተለየሚህ  ዲቦህ ኪዮ የህ ኤልይምልሰ።

    25. ኑማ ለ ካብተህ ካኢቢህ ዳባል ትምብርኪከህ"ይማዳራ! ያዓሳያ ይጎሮኒስ"አክተ፡፡

    26. ኢየሱስ ለ"ኢሪ ኢንገራ በየኒህ ካርዋህ ያሓይኒም ኤዳም ማኪ" አክየ፡፡ 

   27. ኢሲ ለ"ይማዳራ! ዓዶም ኪኒ፣ አማም ታከያካህ ካርዋ ኡኮ ኢሲ ማዶሪህ ማይዲኮ ራደ ርፍራፍ በታ" አክተ፡፡ 

  28. ታማይ ዋክተ ኢየሱስ"ተኑማ! ኩኢምነት ናባቲያ ኪኒ፣ አማይጉል ጉርተም ባሊህ ኮህ ያኮይ!"አክየ፡፡ ኑማህ ባዻ' ታማይ ሳዓታህ  አካህ ኡርተ።

ኢየሱስ ማንጎ ዳላኪን ኡሩሰ

  29. ኢየሱስ ታማርከኮ ኡጉተህ ገሊላ ባሕሪህ አፋል የመተ፣ ኢንባት አሞል የውዔህ ታማል ዲፈየ፡፡ 30. ማንጎ ሒያው ኃንካሳት፣ ዕዉራት፣ አካል ቢያክ ለም፣ ዓባሳትከ አኪ ዳላኪን ይብዽኒህ ኢየሱስ ዻጋህ የመቲን፣ ካ ኢቢህ ዳባል ተን ዲፈሰን፡፡ 31. አማይጉል ህዝቢ ዓባሳት ዋንሲታህ፣ ሲባታት ኡራህ፣ ሓንከስ ታም ፍዽታህ፣ ዑዉራት አብሊህ፣ ዩብሊንጉል ይምድንቅኒህ እስራኤል አምላክ ይይሚስግኒን።

ኢየሱስ አፋራ ሲሕ ሒያውቲያ ይምግበ

(ማር. 8፣1-10)

   32. ኢየሱስ ኢሲ ተምሃሮ ደዔህ፣ ታህ አክየ፣ ህዝቢ ዮሊህ አዶሓ ለለዕክ ዮሊህ ኪኖን በታናም ማሎንጉል አካህ ናኅሩራክ አነ፣ ኃዋልኒህ አራሓል ራዳናምኮ ኢንኪም በተካህ ተን አይሳናባቶ ማጉራ። 33. ካተምሃሮ ይቦል"አይናህ ነህ ታሂዶለ ሒያው ዽዕታ ፈሎ ታይ ባራካል ገይኖ ዺዕና?"አክየን። 34. ኢየሱስ"አይዾለ ኢንገራ ልቲኒ አክየህ?"ተን ኤሠረ፡፡ ኢሲን"ማልሒና ኢንገራከ ዳጉ ዒንዻዻ ዓሣ ሊኖ"አክየን፡፡

  35. ታማሃምኮ ላካል ኢየሱስ ህዝቢ ባዾል ዲፈዮና ይኢዚዘ፡፡ 36. ማልሒና ኢንገራከ ዓሣ ዩይኩዔህ ምስጋና ጻሎት አበ፣ ይቁሩሰህ ተምሃሮህ ዮሖየ፣ ካተምሃሮ ህዝበህ ይስቅርቢን፡፡ 37. ኡምቢህ በተኒህ ሓይተን፣ ራዕተም ተምሃሮ የስከሄልኒህ ማልሕና መሶብ  ሙሉእ ተረፍኮ ናው አክ ኢሰን። 38. በተ ሒያው አጋቦከ ሕፃናት ኤድ ሎይመካህ አፋራ ሲሕ ታከም ኪይይ ይኒን፡፡ 39. ታሃሚህ ላካል ኢየሱስ ህዝበ የይሰነበተህ ዛልባሀ የመሰፈረህ መቄዶኒያ ባዾህ የደየ፡፡  

ማዕራፋ 16

ታአምራት ያብሎና ካብተ ኤሰሮ

(ማር.8፣1-13፤ሉቃ.12፣54-56)

   1. ፈሪሳውያንከ ሰዱቃውያን ኢየሱስ ዻገህ የመቲን፣ ካያፋታኖና ጉረኒህ ዓራንኮ ታአምራት ኒስቡሉይ የኒህ ካኤሠረን፡፡ 2. ኡሱክ ለ ታህ የህ ኤልይምልሰ፣ [ዲተ ሳይማል ዓራን ዓሶወህ ያነ ኢካህ  ካፋ ሮብ ማራዳ"ታዽሒን፣ 3. ዻሒነ ማሓል ለል ዓራን ዳሩር የከህ ዓሦወህ ያኑጉል ካፋ ሮብ ራደለ ታዽኅን፣ ዓራንቲ ቢሶ ባዽሰኒህ ታዽጊን፡፡] 4. ኡማምከ ኡማ ኢምነት ለ ታይ ዳባኒህ ሒያው ምልኪት ያብሎና ጉራን፣ ያከ ኢካህ ነብይ ዮናስ ምልክትኮ በሒህ አኪ ምልኪት አካህ ሚያምሓወ፡፡"ታማምኮ ላካል ኢየሱስ ተን ኃበህ አኪ ቦታል የደየ፡፡

ፈሪሳውያንከ ሰዱቃዊያን  አራስ

(ማር.8፣14-21)

   5. ካተምሃሮ ባሕሪ ታብሶል ታበንጉል ብያስተኒህ ኢንገራ አብዸካህ ይኒን፣ 6. ኢየሱስ ተምሃሮክ"አፍዓዶ አብታ! ፈሪሳውያንከ ሰዱቃውያን አራስኮ ሰልታ"አክየ፡፡ 7. ኢሲን ለ "ታህ አካህ የም ምናልባት ኢንጌራ አብዸሒነጉል ያከ"የኒህ ሲነሲነህ ዋንሲተን፡፡  8. ኢየሱስ ለ ተን ሓሳብ የዸገህ ታህ አክየ፣"አቲን ኢምነት አክ ዩግዱለምክ፣'ኢንገራ አብዸዋይነጉል ኪኒ'ተኒህ ሲነሲነህ ዋንስታክ ታኒን? 9. ገናህ አስትውዕለ ዋይታም ኪቲኒ? ኮና ኢንገራህ ኮና ሲሕ ሒያውቲያ ዽዕተህ ራዔ ተረፍኮ አይዶለ ሞሶብ ሙሉእ አክ ኡጉሰኒም ማታስትውዕሊኒ? 10. ታማሃም ባሊህ ማልሒና ኢንገራህ አፋራ ሲሕ ሒያውኢያ ዺዒተምከ ራዔ ተረፍኮ አይዶለ ሞሶብ ሙሉእ አክ ኡጉሰኒም ማታስትውዕሊኒ? 11 .አማይጉል ፈሪሳውያንከ ሰዱቃውያን አራስኮ ሰሊታ፣ ኤዽኄህ ሲናካጉል፣ ኢንገራ ዳዓባል ማኪም ኤረ አይናህ ተኒህ ማታስትውዕሊኒ? 12. ካተምሃሮ ኢየሱስ ሰሊታ አክየም ፋሪሳውያንከ ሰዱቃውያን ሚህሮኮ ኪኒ ኢካህ ኢንገራት አራስኮ ማኪም ይምርድኢን፡፡"

ጰጥሮስ ኢምነትከ ምስክሪነት

(ማር.8፡27-30፤ሉቃ..9፡18-21)

    13. ኢየሱስ ፊሊጶስ ቂሳሪያ ባዾ ማደ ዋክተ ተምሃሮክ"ሒያው ሒያውቲ ባዻክ አቲያ አክያና?"የህ ተን ኤሠረ። 14. ኢሲን"ጋሪጋሪ ያይጥምቀ ያሃኒስ ኪኒ ያን፣ ጋሪ ኤልያስ ኪኒ ያን፣ ጋሪ ለል ኤርምያስ ወይ ነብያትኮ ኢንከቶ ኪኒ ያዽኅን"አክየን፡፡  

  15. ኢየሱስ ለ"አቲን ዮያክ አቲያ ኪኒ ዮክ ታና?"አክየ፡፡ 16. ታማይ ዋክተ ስምዖን ጰጥሮስ"አቱ ያነ መዔፉጊህ ባዻ የከ መሲሕ ኪቶ አክየህ!"ኤል ደሄየ፡፡ 

   17. ኢየሱስ ለ ታህ የህ ኤልደህየ፣ ዮና ባዻ  ስምዖኖ! የምበረከቲያ ኪቶ፣ አይሚህ ታሃም ኮህ ይግልፀቲይ ዓራናል ያነ ያባ ኪኒ ኢካህ ሒያውቶ ማኪ፡፡ 18. አኑ ታህ ኮካይክ አነ፣ ጰጥሮሶ፣ አቱ ኮክሄሔ ኪቶ፣ ታይ ኮክሕህ መሠረቲህ  አሞል ኢኒ ሞሶዓረ ሢራሔ ሊዮ፣ ታይ ሞሶዓረ ራቢ ኃይሊ ኡካ ምያስዒረ፡፡ 19. ሀይከ አኑ ኮያህ ማንግሥተ ሰማይ ቁልፍት ኮህ አሓይክ አኒዮ፣ ባዾል ቱዹወቲ ዓራናል ያምዹወቲያ ያከ፣ ባዾል ቱንኁወቲ ዓራናል ይምኑሑወቲያ ያከ፡፡ 20. ታሃምኮ ላካል ኢየሱስ ኢሲ ተምሃሮክ ኡሱክ ክርስቶስ ኪናም ቲያክ ያናምኮ ተን ይኢዚዘ፡፡

ኢየሱስ ካማዶ ኪን መከራ ኤዸዾታህ ዋንሲተ

(ማር.8፡31-33፤ሉቃ.9፡22-27)

  21. ታማይ ዋክተኮ ኤዸዽሰህ ኢየሱስ ኢሲ ተምሃሮክ ታህ አክ ያናም ኤዸዽሰ፣ "ኢየሩሳለም ኡላል አዴሊዮ፣ ታማል ስማግለታታህ፣ ካህናት አሞ ባዒሊህ፣ ሙሴህ ሕጊህ መምሂራናህ መከራ ጋራየ ሊዮ፣ ራበምኮ ላካል ማዳሒ ለለዕ ኡጉተልዮ፡፡ 22. ጰጥሮስ ለ ኢየሱስ ዲቦህ ኢስዕዽያ ኢሰህ ኦ'ይማዳራ ታሃም ሱሩህ ማታከ፣ ታይ ጉዳይ ኮያ ማደ ዋዎይ አይክ ካደሶ ኤዸዽሰ፡፡  

  23. ኢየሱስ ለ ኡፍኩና የህ ጰጥሮሱክ ዮኮ ቶህ ሚሪሔይ ኮ ሰጣን! አቱ ሒያውም ኢካህ መዔፉጊህ ጉዳይ ማታሕስበጉል ዒንቅፋት ዮዳክክ ታነ አክየ፡፡

        ኢየሱስ ያክትልንሚህ ተግባር 

         (ማር.8፡3-፤9፥1፤ሉቃ.9፣23-27)

  24. ታሃምኮ ላካል ኢየሱስ ኢሲ ተመሃሮክ ታህ አክየ፣"ዮያ ያካታሎ ጉራቲ ኢሲ ዸግኃ ያክሓዶይ፣ ኢሲ ማስቃል ያይካዖዋይ ዮድካታዎይ፡፡ 25. ኢሲ ሂወት ያዳኃኖ ጉራቲ ኡምቢህ ያይለየ፣ ኢሲ ሂወት ዮያህ የህ ያይለየቲ ለ ገያ፡፡ 26. ሒያውቲ ዓለም ሙሉኡድ ካቲያ የከህ ኢሲ ናፍሰ ለ ያይለየጉል አይም ካያጥቂመ? ወይ ሒያወቲ ኢስ ናብሲህ ኢዻህ አይሚህ ሊሞ ያክፋሎ ዺዓ? 27. ሒያውቲ ባዽ ኢሲ አባህ ክብረል የከህ ማላይካሊህ ያሚተ፣ ታማይ ዋክተ ተንተን ሢራሒህ መጠንል ሊሞ አካህ ያክፍለ።  28. ሓቀህ ሲናክ አክ አኒዮ፣ ሒያውቲ ባዽ ኢሲ ማንግሥቲህ ክብረህ አምቲህ ታብልኒም  ፋናህ፣ ታለ ሶኦልተህ ታነሚህ ፋናድ ራበዋይታ ሒያው ታነ፡፡

ማዕራፋ 17

ኢየሱስ ቢሶ ይልውጠ

(ማር.19፡ 2-13፤ሉቃ.9፡28-36)

   1. ሊሓ ለለዕኮ ላካል ኢየሱስ ጰጥሮስ፥ ያዕቆብከ ያዕቆብ ሳዓል ያሃኒስ ዲቦህ ይብዸህ ኢንኪ ናውተ ኮማህ አሞል የውዔ፡፡ 2. ተን ነፊል ካቢሲ ይምልውጠ፣ ነፍ አይሮይታ ባሊህ ኢፎሰ፣ ሣሪ ዓዶቲያ የከህ ኢፎ ባሊህ ዮይዶጎሔ፡፡ 3. ሀይከ ሙሴከ ኤልያስ ኢየሱስልህ ዋንሲታህ ዩምቡሉዊን፡፡ 4. ታማይ ዋክተ ጰጥሮስ ኢየሱሱከ ይማዳራ! ታል ማራናም ኖያህ መዔም ኪኒ፣ 'አማይጉል ጉርተመኮ ኢንከቶ ኮያህ፣ ኢንከቶ ሙሴህ፣ ኢንከቶ ኤልያሳህ ያከ አዶሓ ዳስ ሢራሖ"አክየ። 5. ጰጥሮስ ገና ታሃሞም ዋንስታይ ያነ ሃኒህ ኢፎታ ዳሩርታ ተን አልፍተ፣ ዳሩር አዳኮ አካህ ኒያታ ኪሒኒዮ ይባዽዺታይቲ ኪኒ፣ ካያ ኦባያ ያዽኄ አንዻሕ የመተ፡፡ 6. ካተምሃሮ ታይ አንዻሕ ዮብንጉል ጋዳህ ሐንካብተኒህ ዳምባራህ ባዾል ጋሚመን። 7. ኢየሱስ ለ ተናድ ካብ የህ ጋባህ ሀሳስ ተን ኢሰህ፣ ኡጉታ፣ አይዱኩመያ ማማይስቲና አክየ። 8. ኢሲን ሪጋ የኒህ ቁሉሕ የንጉል ኢየሱስኮ በሒህ ኢንከቶ ማብሊኖን።  

   9. ኢምባኮ ኦባህ ኢየሱስ"ሒያውቲ ባዽ ክርስቶስ ራበኮ ኡጉታም ፋናህ ታይ ቱብልኒም ቲያክ ሚና"የህ ኢሲ ተምሃሮ ይኢዚዘ። 10. ካተምሃሮ አይሚህ ቡሳ ሙሴ ሕጊህ መምሂራን ባሶል ያማቶ ኤዳቲ ኤልያስ ኪኒ አይሚህ ያና? የኒህ ኢየሱስ ኤሠረን፡፡   

 11. ኢየሱስ ታህ የህ ኤልደሄየ፣"ዓዶም ኪኒ፥ ኤልያስ ዮካመህ አማተለ፣ ኡማኒም  አስተከከለ ለ፡፡ 12. ያከካህ ኤልያስ ገና መዔማኅ የመተህ ኪኒ ሲናክ አይክ አኒዮ፡፡ ሒያው ለ ካማዻግና፣ አማይጉል ጉረኒም ኡምቢህ አካበን፡፡ ታማም ባሊህ ለል ሒያውቲ ባዽ ኢየሱስ ተን ጋባህ መከራ ጋራዎ ኤለታነ፡፡"                                

 13. ታማይ ዋከተ ካተምሃሮ ኢየሱስ ዋንስተም ያይጥምቀ ያሃኒስ ዳዓባል ኪናም ኤድሳይተ። 

ኢየሱስ ጋነን ኤድ ይሕዲረ አውካ ኡረሰ

(ማር.9፣14 -29፣ ሉቃ.9፣37-43)

   14. ኢየሱስከ አዶሓ ተምሃራይ ህዝበ ዻጋህ ጋሔን ዋክተ ኢንኪ ሒያውቲ ኢየሱሱል የመተህ ካኢቢህ ዳባል ይምብርክከህ ታህ አክየ። 15."ኦ'ይማዳራ! 'ያዓሳያ ይባዻህ ዮህ ናኅሩር፣ ዒዳ ጋነን ዱሪ ኡማ ዒለህ ካያይሠቀየ፣ ጊራከ ላድ ማንጎለጉል ራዳ፡፡ 16. ኩተማሃሮል ባሄህ ኢነ፣ ያከካህ ኡረሶና ማዺዒኖን፡፡ 

   17. ኢየሱስ ለ"አቲን አምነዋይታ ሑልኩሳት ኪን ሒያዋክ፣ አንዳ ፋናህ ስንሊህ ማረልዮ? አንዳ ፋናህ ስናህ ትዕግሥቲ ስናህ አበሊዮ? እሰኪ አውካ ዩላል ባሃየ!"አክየ፡፡ 18. ኢየሱስ ጋነን ይግሲፀ፣ ጋነን አውካኮ የውዔ፣ አውኪ ለ ታማይ ሳዓት ኡረ፡፡ 

   19. ታሃምኮ ላካል ካተምሃሮ ዲቦህ ኢየሱሱድ ካብ የኒህ ናኑ ጋነን ናያዖ ታነም አይሚህ ኪኒ የኒህ ካኤሠረን፡፡ 20. ኢየሱስ ለ ታህ አክየ፣ "ሲን ኢምነት ጉዶሎ የከጉል ኪኒ፣ ሓቀህ ሲናክ አይክ አኒዮ፣ ሰናፍጭ ቅንጣቲህ ኢዻ ያከ ኢምነት ኡካ ታልንዶ ታይ ኢንባክ ታርከኮ ኡጉታይ ቶል አዱይ አክታንጉል ታዴ፣ ታንታን ጉዳኮ ኢንኪም አኔማለ፡፡ [21. ታይ ዓይነቲህ ጋነን ለ ጻሎትከ ጾሙህ አከዋየምኮ ኢንኪጉል ሚያውዔ፡፡"]

      ኢየሱስ ኢሲ ራቢህ ዳዓባል ማላሚህ  ዋንሲተ 

              (ማር.9፡30-32፤ሉቃ.9፤ 43-45)

   22. ገሊላል ካተምሃሮ ተከሄለ ዋክተ ኢየሱስ ታህ አክየ፣ ሒያውቲ ባዽ ሒያው ጋባህ አስሑዋህ አምሓወለ። 23. ኢሲን አግድፈሎን ያከ ኢካህ ማዳሒ ለለዕ ራባኮ ኡጉተ ለ። ካተምሃሮ ታይጉዳህ ጋዳህ ይኅዚኒን።"

                                  በተ መቅደሲህ ግብረ ያክፍልኒም                          

  24. ኢየሱስከ ካተምሃሮ ቅፍሪናሆም ማደን ዋክተ በተ መቅደስ ግብረ ጋራይታም ጰጥሮሱድ ካብያኒህ፥"ስን መምሂር በተ መቅደስ ግብረ ያክፊለ? የኒህ ካ ኤሠረን፡፡ 25. ጰጥሮስ ለ ዮዎ፣ ያክፍለ  አክየ፡፡ ጰጥሮስ ዓረድ ሣየ ዋክተ ኢየሱስ ኤዸዾይታህ ስምዖን ጰጥሮሶ፣ አይሚህ ኮድ ኢግዳ፣ ታይ ዓለሚህ ማንግሥት ቀረፅከ ግብረ ጋራያናም ኢያኮ ኪኒ? ስኒ ህዝበኮ ኪኒ ወይ ኢሮ ሀገሪህ ሒያውኮ ኪኒ የህ ካኤሠረ፡፡ 26. ጰጥሮስ ለ ኢሮ ሀገሪህ ሒያውኮ ኪኒ የህ ኤልይምልሰ፣"አማይጉል ባዾ ህዝቢ ግብረ ያክፍልኒምኮ ናፃ ኪኖን ማለት ኪኒአ! 27. አማይጉል ኢስን ያምሰነከልኒምኮ የህ ባሕሪ ኡላል አዱዋይ ማንጠቆ ዒድ፣ ኤዸዾታህ ታውዔ ዓሣ ኢብዽ፣ አፍ አክ ፋክታጉል ላማ ቁረሰ ያከ ገንዘብ ገየልቶ፣ ታማሃም በያይ ዮከ ኩዻህ ኢክፊፍል፡፡" 

 ማዕራፋ 18  

   ኡማኒምኮ ናባቲ አቲያ ኪኒ?

   (ማር.9፣33-37፤ሉቃ.9፣46-48)

   \1. ታማይ ዋክተ ተምሃሮ ኢየሱሱድ ካብ የኒህ ኡማንቲያኮ ናባቲ አይ ቲያ ኪኒ? የኒህ ካኤሠረን። 2. ኢየሱስ ለ ኢንኪ ሕፃን ደዔህ ተን ፋናል ሶሊሰህ፤ 3. ታህ አክየ፣"ሓቀህ ሲናካይክ አኒዮ ትምልውጢኒህ ሕፃናት ባሊህ አከ ዋየተንምኮ፣ ማንግሥተ ሰማይል ሡሩህ ሣየ ማልቲን፡፡ 4. ታይ ሕፃን ባሊህ ኢሳሞ ዔግሳቲ ማንግሥተ ሰማያል ናባቲ ያከ፡፡ 5. ታግዲን ሕፃን ይምጋዓህ ጋራያቲ ዮያ ጋራ፡፡ 6. ዮያል ታምነ ታይ ዕንዻነይቲትኮ ኢንከቶ ያስገገ ሒያውቶክ ዒልስ ማዻሓን ዻ ፍላክ አክ ዩዹውኒህ አዳለ ባሕራድ ዒደኒህ ያሙዹዔም አካህ ታይሰ።

አምሓናካልቲ /ያምሰነከሊኒሚህ/ ምክንያት

(ማር.9፣42-48፤ሉቃ.17፤1 - 2)

   7. ካታሰህ ኢየሱሰ ታህ የ፣ ኃጢአት ምክንያት ያከ ጉዳህ የመገ ዓለም ኢሰህ ኢየ ዋዎይ፣ አክናንጉል ያይሰነከለ ምክንያት አምተካህ ማራዓ፣ ያከካህ! አምሳናካልቲ ምክንያት ያከ ቶይ ሒያውቲ ኢሰህ ኢየዋዎይ! 8. አማይጉል ጋባ ያኮይ ኢቢ ኃጢአት ምክንያት ኮክ የከምኮ ኢግሪዓይ አማይጉልካህ ዒድ፣ ላማ ጋባልህ ወይ ላማ ኢባ ተለህ ኡማንጉሊት ጊራድ ራዳምኮ አጋናል፣ ጉንደ ተከህ ወይ ጋባማሊ ተከህ ኡማንጉሊት ሂወቲል ሳይታም ኮህ ታይሰ፡፡ 9. ኩኢንቲ ለ"ኃጢአት ምክንያት ኮክ ተምኮ ኤየዓይ ቶህ ዒድ፣ ላማ ኢንትሊህ ጋሃናም ጊራድ ራዳምኮ ኢንኪ ኢንትሊህ ኡማንጉሊ ሂወቲል ሳይታም ኮህ ታይሰ፡፡ 10. ታይ ዒንዻ ማራኮ ኢንከቶ ዻይታናምኮ ሰሊታ፣ ዓራናል ታነ ተን መላእክት ዓራናል ያነ ያባህ ነፊል ኡማንጉል ገይማን፡፡ [11. ሒያውቲ ባዽ የመተም ተለየም ያይዳኃኖ  የህ ኪኒ፡፡"]

          ተለየ ኢዳህ ምሳለ    

(ሉቃ.15፡3-7)

   12. ኢየሱስ ይቅጽለህ ታህ የ፣ ኢስክ አይሚህ ኢግዳ? ኢንኪ ሒያውቲ ቦል ዒዶቲያ ያለጉልከ ተንኮ ኢንኪ ዒዶይታ አክታላየ ዋክተ ቦልሳግላከ ሳጋል ኮማክ ጋል ሓባህ ተለየ ኢዳህ ዋጊዮህ ሚያዲየ? 13. ገያጉል ሓቀህ ስናክ አይክ አነ፣ አለየዋተ ቦልሳግላከ ሳጋልኮ አጋናል ተለየህ ገይምተ ኢዳህ ኒያታ፡፡ 14. አማም ባሊህ ዓራናል ያነ ሲናባ ታይ ዕንዻምኮ ኢንከቲ አክ ያላዮ ማጉራ፡፡

ይብድለ ሒያውቶክ አይም አቦና ኤዳም

   15. ጋባዔህ ኢየሱስ ታህ የ፣"ኩሳዓል ኩያብድለጉል ኮከ ካያ ዲቦህ ቲካይ ካበደል አከይ፣ ኩዮበምኮ ኩሳዓል ጋባዔህ ያኮ ካአባክ ታነ። 16. ኩ አበ ዋየምኮ ለ ላማይ ያኮይ አዶሓ ሒያውቲህ ማስኪር ያጽኒዔም ኢዻህ ላማይ ወይ አዶሓ ሒያውቶ ኢብዻይ ኤድአዱይ፣ 17. ተና ማአበ ዋየምኮ ሞሶዓረክ ኤዸኅ፣ ሞሶዓረ አበዋየምኮ አረማዊ ባሊህከ የነሰሔህ ጋኄዋ ኃጢአተይናድ ሎይ፡፡

  18. ሓቀህ ሲናክ አይክ አነ፣ ባዾል ቱዹውንቲ ዓራናል ይመዹወቲያ ያከ፣ ባዾል ቱንሑይንቲ ዓራናል ይምኑሑወቲያ ያከ፡፡ 19. ለል ሲናክ አይክ አኒዮ ሲንኮ ላማይ ባዾት አሞል አኪናን ጉዳይ ዻዕሞና ጻሎቱህ የምኅበበሪኒምኮ ዓራናል ያነ ያባ አካህ ያፍጽመ፡፡ 20. አይሚህ ላማይ ያኮይ አዶሕ የኪኒህ ይምጋዓህ ኤድ ያከሄሊን ቦታል አኑ ተን ፋናድ ገይማ፡፡"

ሒድጎት አባናም /ይቅረታ ያሓይኒም/

   21. ታማይ ዋክተ ጰጥሮስ ኢየሱሱድ ካብየህ"ይማዳራ! ይሳዓል ይያብድለጉል አይዾለጉል ቢሒላ አካህ ኦዋ? ማልሕናጉል ኪኒ? የህ ካኤሠረ፡፡  

   22. ኢየሱስ ለ ታህ አክየ፣ አይከ ማልሕንቶሞን ጊዘቲያ ማልሒን ኢካህ ማልሕና ዋክተ ጥራሕ ኮክማ፣ 23. አይሚህ ማንግሥተ ሰማይ ኢሲ አገልገልትሊህ ያምሓሳሳቦ ጉረ ኑጉሡህ ኢግዳ፣ 24. ኑጉሥ ያምሓሳሳቦ ኤዸዽሰ ዋክተ ሚሊዮኑህ ሎይማ ማሊህ ዒዳህ ይምዽብዸ አንኪ አገልጋሊ ኤልየመተ። 25. ታይ አገልጋሊ ዒዳ ያክፋሎ ታነጉል ካያ፣ ካኑማ፣ ካዻሎ፣ ለ ንብረት ሙሉኡድ ይምብኄህ ዒዳ ያክፋሎ ማዳሪ ይኢዚዘ፣ 26. አገልጋሊ ግን ማዳሪ ኢባክ ዳባል ይምብርክከህ ራደህ፣ ይማዳራ! ያዓሳያ ትዕግሥቲ ዮሃብ፣ ሙሉኡክ ኮህ አክፍለ ሊዮ! የህ ካ ዻዒመ፡፡ 27. ማዳሪ አካህ ናኅሩረህ ዽዽየ፣ ዒዳ ለ አል ኃልበ፡፡ 28. ያኮይ ኢካህ ታማይ አገልጋሊ ታማርከኮ የውዔህ አድይ ያነሃኒህ ቦል ቆርሰያ ይልክሔ ካሠራሕህ ዶባይቶ ገየጉል ፍላድ ይኅንቀህ ይብዸህ ኩኢልኪሔ ማል ዮህ ኢክፍል አክየ፡፡ 29. ዶባይቲ ኢቢ ዳባል አክ ራደህ ያዓሳያ ዮህ ኢምዕግሥ አክፍለ ሊዮክ! አክየህ ዻዒመ፡፡ 30. ይልክኄቲ ለ ማዮ የ፡፡ ኤረ ይብዸህ የደህ ዒዳ ያክፍለም ፋናህ በየህ ዋክኒ ዓረድ ይይዹወ፡፡ 31. አኪ ካሢራሕህ ዶቢ ታሃም ዩብሊን ዋክተ ጋዳህ ይኅዝኒን፣ የደይኒህ ተከም ኡምቢህ ሲኒ ማዳራክ የን፡፡ 32. ማዳሪ ቶይ አገልጋሊ ደዔህ ታህ አክየ፣ ኮ ኡማ አገልጋሊ፣ ይ'ዻዕምተጉል ታሂዾለ ዒዳ ኮል ሓበ፤ 33. ኢቦል አኑ ዒዳ ኮልሓበም ባሊህ አቱ ኩዶባይቶ የከ አገልጋሊል ዒዳ ኤልኃብቶ ኮህ ኤዳይ ማና? 34. አማይጉል፣ ማዳሪ ይቁጡዔህ ዒዳ ሙሉኡድ ያክፊለም ፋናህ ታይሠቀየ ሒያዋህ ትላሰህ ዮኆወ፡፡ 35. አማይጉል አቲን ሲኒሲኒ አሞህ ሲኒ ሳዖሉህ አፍዓዶኮ ቢኅላ አካህ ኢየ ዋይተኒምኮ ዓራናል ያነ ያባ ታማህ ሲናክ አበለ፡፡    

ማዕራፋ 19

ኢየሱስ ተክሊል ዳዓባል ይምሂረ

    1. ኢየሱስ ታሃም ዋንስተህ ባከምኮ ላካል ኡጉተህ ዮርዳኖስ ወዒህ ታብሶል ታነ ይሁዳ ክፍሊህ ባዾል የደየ፣ 2. ማንጎ ሒያው ለ ካትክቲለ፣ ተና ታማል ኡሩሰ።

   3ን ታማይ ዋክተህ ፈሪሳውያን ካያድ ካብየኒህ ካ'ያፋታኖና የኒህ ሒያውቲ ኑማ አኪናን ምክንያታህ ያፍታሖ ያምፍቂደ? የኒህ ካኤሠረን።

  4. ኢየሱስ ታህ የህ ኤልይምልሰ፣ መዔፉጊ ኤዸዾይታኮ ሒያው ላብቲያከ ሳይቲያ አበህ ይፍጥረም ለካ ማይናባብንቲንሆ? 5. ጋባዔህ ታሃሚህ ምክንያታል ሒያውቲ አባከ ኢና ሓበህ ኢሲ ኑማሊህ ያምኄበበረ፣ ላሚህ ኢንኪ አካል አከስሎን የዽሔ። 6. አማይጉል ኢስን ታሃምኮ ላካል ኢንኪ አካል ኪኖን ኢካህ ላማይ ማኪኖን፡፡ መዔፉጊ ዩዹወህ ኢንከቶ አበም፣ ምናዳም ባዽሰዋይ ቶይ፡፡ 7. ፈሪሳውያን"አይሚህ ቡሳ ሙሴ ባዕሊ ባዽሲ ወረቀት አካህ ዮኆወህ ያፍታሖይ?"ያ አክየን፡፡ 8. ኡሱክ ታህ አክየ፣ ሙሴማ ሲኒ አጋቦ ታፍታሖና ስናህ ይፍቅደም ሲኒ አፍዓዶኮ ትድንድንኒህ ታይሲጊረም ተክንሚህ ምክኒያታል ኪኒ፤ ጥንተኮ ኤዸዽሰህ ለ ታማህ  ኪይይ ማና፡፡

   9. አኑ ለ ኢንኪ ሒያንቲ ዙሙት ምክንታል አከዋየምኮ ኑማ ይፍተሔህ አከቶ ኦርብሳም ያዙሙውኒም ኪኒ፡፡ [ባዕላ ትፍትኄ ኑማ ኦርቢሰ ሒያውቲ ታማባሊህ አመንዝራ ኪኒ፤] ሲናካይክ አኒዮ፡፡ 

  10. ካተምሃሮ"ባዕላከ ኑማህ ማርናን ታህ የከምኮ ኦርብሰ ዋያናም ታይሰም ኪኒ" አክየን፡፡ 11. ኢየሱስ ለ ታህ አክየ፣"ፍሉይ ኪን ተውህቦ አካህ ተምኄወሚህ ኪኒካህ ታይ ጉዳይ ኡማንቲያህ ሚያከ፡፡ 12. አይሚህ ሱሉባት ተከህ ቶቦከም ታነ፣ ሒያው ትስልበም ታነ፣ ማንግሥተ ሰማይ ዮና ሲኒ ዸግኃ ሱለሱባት ባሊህ አብታም ታነ፣ አማይጉል ታሃም ጋራዎ ዽዓቲ ጋራዎይ። 

ኢየሱስ ሕፃናት የበረከ

(ማር.10፣13-16፤ሉቃ.18፣15-17)

   13. ታማይ ዋክተ ጋባ ተን አሞል ሀየህ ጻሎት ኤላቦ ሒያው ሕፃናት ኢየሱስ ዻጋህ ባሄን፣ ካተምሃሮ ለ ሒያው ይግንሒን፡፡ 14. ኢየሱስ ለ ማንግሥተ ሰማይ ታህ ኢግድን  ማራህ ኪኒጉል ሕፃናት ተን ኃባ፣ ይኡላል ያማቶናይ፣ ተን ማደሲና አክየ፡፡ 15. ጋቦብ ለ አሞል አክህ የህ  ታማይ ቦታኮ ቲላየህ የደ፡፡

          ሀብተ ለ ጎምቢህ ኤሠሮ

            (ማር.10፣17-31፤ሉቃ.18፣18-30) 

    16. ኢንኪ ለለዕ ኢንኪ ሒያውቲ ኢየሱሱል የመተ፣ ለል"መምሂሮ! ኡማንጉሊህ ሂወት ገዮ አይሚህ መዔ ጉዳይ አቦ ይጉርሱሳ?"የህ ካኤሠረ፡፡                             

   17. ኢየሱስ ለ መዔ ጉዳይህ ዳዓባል አይሚህ የሠራክ ታነ? መዔቲ ኢንኪ አምላክ ጥራኅ ኪኒ፣ ሂወቲል ሳይቶ ጉርተምኮ ለ ትኢዛዛት ኢፍፂም አክየ፡፡                     

  18. ሒያውቲ አይትዛዛት አክየ፡፡ ኢየሱስ ለ ታህ የህ ኤልደሄየ፣"ማግዳፍን፣ ማዛማውን፣ ማጋርዒቲን፣ ድራባህ ማምማስካሪን፤ 19. አባከ ኢና እስክብር፣ ሒያው ኢሲ ደግኃ ባሊህ ኢክኂን ታዽኄ ትኢዛዛት ኪኖን"አክየ፡፡ 20. ዕንዻነይቲ ታይ ትኢዛዛት ኢማ ኢፍጽመህ አኒዮ፣ አኪም ዮክ ቱግዱለም አይም ኪን አክየ፡፡ 21. ኢየሱስ"ፉፁም ታኮ ጉርተምኮ አዱዋይ ልቶም ኢቢሓይ ዲካ ኡኁይ፣ ዓራንቲ ሀብተ ገልቶ፣ አሞአይ ይክቲል?"አክየ፡፡ 22. ዕንዻነይቲ ማንጎ ሀብተ ሊይ ይነጉል ታሃም ዮበ ዋክተ አትክዚክ የደየ፡፡ 23. ታሃምኮ ላካል ኢየሱስ ኢስ ተምሃሮክ ታህ አክየ፣"ሓቀህ ሲናክ አይክ አኒዮ ሀብተ ለ ሒያውቲ ማንግሥተ ሰማያል ሳዎ ጸገም ኪኒ፡፡ 24. ጋባዔህ ሲናካይክ አኒዮ ሀብተ ለ ሒያውቲ መዔፉጊህ ማንግሥትል ሳምኮ አገናል ጋል ኢብራት ኢንትኮ ቲላዎ ቅልላ፡፡ 25. ታሃም ዮብንጉል ጋዳህ የምግርምኒህ ታሃም የከምኮ ኢያ ቡሳ ኪን ታድኃኖ ኪናም አክየን፡፡ 26. ኢየሱስ ተናድ ቁሉሕ የህ ታይ ጉዳይ ሚናዳማል ዽዒመዋታም ኪኒ፣ መዔፉጎል ግን ኡምቢህ ዽዒምታም ኪኒ አክየ፡፡ 27. ታማይጉል ጰጥሮስ ሀይከ ናኑ ኡማን ጉዳይ ሓብነህ ኩንክትለ፣ ይቦል ገይኖ ኪኖም አይም ኪን? አክየ። 28. ኢየሱስ ለ ታህ አክየ፣ ሓቀ ሲናካይክ አኒዮ፣ ሒያውቲ ባዽ ክብረህ ዙፋናክ አሞክ ድፈያ ዑሱብ ዳባን ይ'ተከተልቲ ተከምክ አቲን ላማምከ ታማን ዙፋኒያህ አሞክ ድፈ ልቲን፣ ላማምከ ታማን እስራኤል ነገዲህ ኢያህ አሞል ረደኒህ አፍሪደ ልቲን፡፡ 29. ዮያ ዮዋ የህ ድክ፣ ወይ ሳዖል፣ ወይ ሳዖልቲ፣ ወይ አባ ወይ ኢና፣ ወይ ዻይሎ ወይ ግብረ ኡምቢህ ሓባቲ ቦል ዒፅፊያህ ጋራ፣ ኡማንጉሊ ሂወት ለ ገያ፡፡ 30. ያከ ኢካህ ካዶ ባሶ ኪን ማንጎ ማሪ ሣራማራ አከሎን፣ ሳራቲም ባሶማራ አከሎን፡፡

ማዕራፋ 20

ወይኒ ታኪሊህ ሠራሕተይና  ምሳለ

  1. ኢየሱስ ጋባዔህ ታህ የ፣ ማንግሥተ ሰማይ ወይኒ ታክለድ ሢራሕታም ሢራሓድ ሃዎ ዻሒነ ጊሞህ የውዔ ታክሊ ዋናህ ኢግዳ፡፡ 2. ኡሱክ ናብስ ወከፊል ለለዒል ኢንኪ ቁርሰ አካህ ያክፋሎ ኤሊህ የምወዔዔህ ሠራሕተና ወይኒ ታክለህ ፋረ፡፡ 3. አዶሓ ሰዓቲህ አከባቢል የውዔህ ሢራሕ ይንሑውኒህ አዳባባል ሶልተ አኪ ሒያው ዩብለ፥ 4. አቲን ወይኒ ታክለህ አዱዋይ ሢራሓ፣ ሲናህ ኤዳ ሊሞ ሲናህ አክ ፊለ ሊዮክ አክየ፡፡ 5. ወይኒ ታክለህ የደይን፣ ለል ወይኒ ታክሊህ ዋና አሞባዕሊ ሊሓ ሳዓትከ ሳጋላ ሳዓቲህ አቦቱል የውዔህ ታማም ባሊህ አበ፡፡ 6. ኢንካንከ ታማን ሳዓቲያህ የውዔህ አኪ ሒያው ሶኦልተህ ገህ አቲን ሙሉእ ለለዕ ሢራሕ ትንሑውኒህ ታል ሶልተኒም አይሚህ ክቲኒ የህ ተን ኤሠረ፡፡ 7. ኢስ ሢራሓድ ኒሃይታ ሒያው ዋይነጉል ኪኖ አክየን፣ አማይጉል ኡሱክ ለ ወይኒ ታክለድ አዱዋይ ሢራሓ አክየ።                

  8. ዲተ ሳይተጉል ወይኒ ታክሊህ አሞባዕሊ አዛዚክ ሢራሕተም ደዓይ ላካል ባክቶል ሢራሓድ ሳይተምኮ ኤዸዺሳይ ባሶድ ቱምቁፁረም ፋናህ ተን ሢራሒህ ሊሞ አካህ ኢክፊል አክየ፡፡ 9. አማይጉል ኢንካንከ ታማን ሳዓቲያህ ሢራሓድ ሳይተም ካብተህ ናብሲ ወከፍል ኢንኪ ኢንኪ ቁርሰ ጋራየን፡፡ 10. ቶኮመህ ሢራሓድ ሳይተም ካበተ ዋክተ ታይሰም ጋራዎና የከልኒህ ይኒን፣ ያከያካህ ናብስ ወክፍል ኢንኪ ኢንኪ ቁርሰ ጋረየን፡፡ 11. ማል ጋራየኒህ ወይኒ ታክሊህ ባዕሊህ አሞል ታህ የኒህ ዑጉምጉም የን፡፡ 12. ታይ ማሪ ባክቶል ላካል የመተኒህ ሢራሔኒም ኢንኪ ሳዓት ጥራሕ ኪኒ፣ ያኮይ ኢካህ ለለዕ ሙሉኡ አይሮከ ላዕናህ ሓራራክ ሢራሓድ ሓዋላክ አስነ ኖያሊህ ኢንኪም ተን አብተ አክየን፡፡ 13. ወይኒ ታክሊህ ዋና ሢራሕተምኮ አንከቶክ ታህ አክየ፣ ኦ'ይካኃንቶሊ! ኢንኪም ኩማባዳልኒዮ፣ ነምሰመመዔም ለለዕል ኢንኪ ቁርሰ ኮህ አክፋሎ ማኪሆ? 14. አማይጉል ኩማዳም ኢብዻይ አዱይ፣ ኮያህ ኦሖወም ኢዻ ላክቲያህ አሓዎ ጉረ፡፡ 15. ኢኒ ማል ጉረም ኢሲቶ መብት ማሊዮሆ? ወይ አኑ ሒንዳተን ኤከጉል ቶንኮሉህ ያብዽክ ታነ? 16. ታሃሚህ ላከል ኢየሱስ፣ ባሶትም ሠራቲም አከለ፣ ሣራቲምቲ ለ በሶቲም አከሎን የዸኄ፡፡

ኢየሱስ ኢሲ ራብህ ዳዓባል ማዳሒ ዋክተ ዋንስተ

(ማር.10፣32-34፤ሉቃ.18፣31-34)

   17. ታሃምኮ ላካል ኢየሱስ ኢየሩሳለም አድይይ ይነ፣ አራሓል ያንንሃኒህ ላማምከ ታማን ተምሃርቲያ ዲቦህ ኢሰል ካብ ተን ኢሰህ ታህ አክየ። 18. ሀይከ ካዶ ኢየሩሳለም አድይክ ናነ፣ ታማል ሒያውቲ ባዻ ካህናት አሞይትትከ ሙሴ ሕጊህ መምሂራን ተላሰኒ አሓየ ሎን፣ ኢሲን ራቢ ፍርደ አል አፍርደሎን፡፡ 19. አረማውያናህ ትላሰኒህ አሓየሎን፣ አረማውያን ኤልአይለገጸ ሎን፣ ሳባዔሎን፣ አስቂለሎን፣ ለ ማዳሒ ዻሕነ ራባኮ ኡጉተለ፡፡

ዘብዴዎስ ኢሪህ ኢናህ ዻዕምቶ

(ማር.10፡35-45)

   20. ታሃምኮ ላካል ዘብዴዎስ ኢሪህ ኢና ኢሲ ዻይሎ ኢየሱስ ነፊል ካብ ኢሰህ ጋባ አካህ በተ፣ ኢንኪ ጉዳይ አካህ አቦ ዻዒመተ፡፡ 21. ኢየሱስ ለ"አይም ኮህ አቦ ኩርታ?"አክየ። ኢሲ ማንግሥቲል ታይ ይዻይሎህ ላማይኮ ቲይ  ኩምድጋል፣ ቲይ  ኩጉራል ድፈዮና  ዮህ አብ"አክተ።

   22. ኢየሱስ ለ"ዻዒምታናም ማታዺግን፣ አኑ ዳጎ ዋክተኮ ላካ፤ አዑበ (መክራ) ጹዋዕ ያዑቢኒም ዺዔሊቲኒ? (አኑ አምጥምቀ ጥምቀት ታምጣማቆና ዺዔ ልቲኒ?") አክየ። ኢሲን ለ"ዮዎ ዺዔ ሊኖ"የን። 23. ኢየሱስ ለ"ሪግጺህ አኑ አዑበ መከራ ፃማ አዑበ ሊቲን፣ ያኮይ ኢካህ ይሚድጋልከ ይጉራል ድፈይቶና አባቲይ ዮያ ማኪ፣ ታይ ቦታ ታምሓወም ያባ አካህ ዮይሶኖዶወ ሒያዋህ ኪኒ።" 

   24. ራዔ ታማና  ተምሃራይ ታይ ዻዒምቶ ዮቢንጉል ላማ ሳዓሊህ አሞል ይቁጡዒን። 25. ኢየሱስ ለ ኡምቢህ ኢሲ ኡላል ደዔህ ታህ አክየ፣"አረማውያን አሞባዒል ሲኒ ህዝቢህ ገዛቲ ኪኖን፣ ተን መራሕቲ ለ ተን አሞል ሢልጣን ሎኑም ታዽጊን። 26. ሲን ፋናድ ታህ ያኮ መዳ። ያኮይ ኢካህ ሲንኮ ኃለቃ ያኮ ጉራቲ፣ ሲንኮ ዳባል ጋሔህ ያስጋልጋሎይ። 27. ታማም ባሊህ ሲንኮ አሞ ያኮ ጉራቲይ ሲን አገልጋሊ ያኮይ። 28. ሒያውቲ ባዽ ለ ያስጋልጋሎከ ማንጎማራ ያይዳኃኖ ኢሰ ትላሰህ ያሓዎ የመተካህ ካያስጋልጋሎና ማማቲና።" 

        ኢየሱስ ላማ ዑዉር ኡረሰ

        (ማር.10፣46-52፤ሉቃ.18፣35-45) 

  29. ታሃምኮ ላካል ኢያሪኮኮ የውዒኒህ አድህ ማንጎ ሒያው ኢየሱስድ ካታይተ፡፡ 30. ሀይከ አራሕ ዳራታክ ዲፈየ ላማ ዑዉር  ታይ አራሕኮ ቲላይ ያነቲ ኢየሱስ ኪናም ዮቢን ዋክተ"ዳዊት ባዻ ተከ ኒማደራ፣ ያዓሳያ! ኒምሒር የኒህ ዋዕ የን፡፡ 31. ሒያው"ቲብኤያ!"የኒህ ተን ይግንሒን፣ ኢሲን ለ ዳዊት ባዻ ኪቶ ኦ'ኒማዳራ! ያዓሳያ ኒምሒር አይክ ጋባባዔኒህ ዋዕ የን፡፡ 32. ኢየሱስ ሶለህ ተን ደዔህ፣"አይም ሲናህ አቦ ጉርተኒ?"አክየ፡፡ 33.ኢሲን ኒማዳራ! ኒኢንቲት ኖህ ፋክቶ ጉራክ ናነ"አክየን። 34. ኢየሱስ ለ አካህ ናኅሩረህ ተን ኢንቲት ሀሳስ አካህ ኢሰ፣ አማይጉልካህ ኢንቲት አካህ ፋኪተ፣ ኢየሱስ ለ ይክትሊን።  

ማዕራፋ 21

ኢየሱስ  ናባ ክብረህ ኢየሩሳለም ሳየ

(ማር.11፣1-11፤ሉቃ.19፣28-40፤ዮሐ.12፣12-19)

   1. ኢየሱስከ ካተከልቲ ኢየሩሳለሚህ ካብ የን ዋክተ ደብረ ዘይቲል ገይምታ በተ ፋጊ አክያን  መንደር ማደን፡፡ ታማምኮ ላካል ኢየሱስ ተምሃሮኮ ላማይ ታህ የህ ተን ፋረ፣ 2. ሲን ነፊል ያነ መንደርል ኡኩማይ አዱዋ፣ ታማል ኢንኪ ቱምዹወ ሔራ ኢሲ ዑሉታሊህ ታዲንጉል ገልቲን፣ ኡንሑዋይ ዮህባሃ፡፡ 3. አኪናን ሒያወቲ ኢንኪ ጉዳይ ሲናክ የምኮ ማዳሪ ጉረጉህ ኪኒ አከያ:: ኡሱክ ለ ኦኮሎ አማይጉልካህ ፋረለ፡፡

4."ታሃም ተከም ነብይህ ታህ የህ ዋንስተም ታምፋፃሞ የህ ኪኒ፡፡ 

                 5."ጽዮን ካታማ አክያን ኢየሩሳለምክ፣ 

                    'ሀይከ ኩኑጉሥ የዋህ የከህ ሔራክ አሞክ ዲተፈህ፣ 

                   ዑሉይታክ አሞክ ጋሔህ ኩላል አምተለ' አከያ፡፡"                                    6. አማይጉል ካተምሃሮ የደይኒህ ሊኪዕ ኢየሱስ አክየም አበን፡፡ 7.ሔራ ለ ኢሲ ዕሉታሊህ ገየኒነህ አካህ ባሄን፣ ሒላልቶ አክ ሃየኒህ ኢየሱስ አክድፈየ፡፡ 8. ሕዝበኮ ማንጎ ማሪ ሲኒ ሣራ አራሓል ሲድሰን፣ ጋሪ ለል ሖዽቲ ዻዻይ አቅንጥብክ አራሕ አሞል አንስንስይ ይኒን፡፡ 9. በሶድ ባሶድ አድይክ ትነምከ ሣራቱላኮ ካታኣይ ቲነም"ሆሳዕና ዳዊት ባዻህ ሞሳ ታኮይ! ማዳሪ ሚጋዓህ ያምተቲ የምበረከቲያ ኪኒ! ሆሳዕና! ምስጋና ዓራናል መዔፉጎህ ታኮይ!"አይክ ዋዕ አይይ ይኒን፡፡ 10. ኢየሱስ ኢየረሳለምል ሳየ ዋክተ ካታማ ሒያው ሙሉኡድ ታይቲ አቲያ ኪኒ?"የኒህ ይምህውኪን። 11. ሒዝቢ ለ"ታይ ቲይ ገሊላ ክሀገሪል ገይምታ ናዚሬት ካታማኮ የመተ ነብይ ኢየሱስ ኪኒ"የን።   

ኢየሱስ በተ መቅደስድ

(ማር.11፥ 15-19፤ ሉቃ.19 ፥ 45-48፤ዮሐ.2፣13-22

   12. ታሃምኮ ላካል ኢየሱስ በተ መቅደስድ ሳየ፣ ታማድ አብኅይከ ዻማክ ቲነ ሒያው ኡምቢህ የየዔ፡፡ ማል አይስሪፊከ ጣውላክ ድጉጉለ አብኅይ ቲነምክ መንበር አክ ይፍኪነ፡፡ 13. ታህ አክየ፣"ይድክክ ጻሎት ዓረ አክ ያዽኅነ የህ ይምጽሒፈ፣ አቲን ለ ባዻዻ ቦሎ አብተን፡፡ 14. ኢየሱስ በተመቅደሲድ ያነሃኒህ ኢንቲ ማሎሊከ ሓንከስ ታም ካያ ዻጋህ ባሔኒህ ኡሩሰ። 15."ያኮይ ኢካ ካህናት አሞባዒልከ ሙሴ ሕጊ መምሂራን ኢየሱስ አበ ዲንቀ ኪን ጉዳይ ዩብሊን ኢርከህከ ሕፃናት በተ መቅደሲድ"ዳዊት ባዻህ ሆሳዕና! ምስጋና ታኮይ!"አይክ ዋዕ አይህ ዮቢንጉል ይቁጡዒን፡፡ 16. አማይጉል ኢየሱሱክ"ታይ ሕፃናት አይክ ታነም አብክ ታነ?"አክየን፣ ኡሱከ ለ"ዮ አብክ አነ፣ ኢሮከ ዾይታ ሕፃናቲህ አፍኮ ሞሳ ኮያህ ቶምሶኖዶወ ታም ኡኮ ማይናባብኒቲን?"አክየ፡፡ 17. ተን ሓበህ ካታማኮ የውዔህ ቢታኒያ አክያን መንደሪህ የደየ፣ ታማል ማሔ።" 

ፍረ ሂኒም  ገይምተ ባላሶ ሓዻ

(ማር.11፡12-14፣20 - 24)

   18. ኢየሱስ ዻሕነ ጊሞህ ካታማ ቱላል ጋሔህ አድህ ሉወ፡፡ 19. ኢንኪ ባላሶ ሓዻ አራሕ ዳራታል ዩብለህ ተያድ የደየ፣ ያከካህ ዻዻይኮ በሒህ ኢንኪም ኤድማገይና፡፡ አማይጉል ታሃምኮ ላካል ሡሩህ ኢንኪ ፍረ ኮኮ ገይመዋይቶይ አክየ፡፡ ሓዻ አማይጉልካህ ካፍተ። 20. ካተምሃሮ ታሃም ዩብሊን ዋክተ"ታይ ባላሶ ሓዻ ኢንኪጉል አይናህ ተህ ካፍተ! ታሃማህ ይምድንቂን፡፡ 21. ኢየሱስ ታህ የህ ኤልይምልሰ፣ ሓቀህ ሲናክ አይክ አኒዮ፣ ኢምነት ተልኒህ አምጠረጠረ ዋይተኒምኮ፣ ባላሶክ አሞል አኑ አበም ባሊህ ጥራህ አከካህ፣ ታይ ኮማክ (እምባክ) ኡካ ታርከኮ ኡጉታይ ባሕራድ ኢምውርውር! አክታንጉል ሲናህ ያከ፡፡ 22.ተመኒንህ ጻሎቱህ ዻዕምተኒም  ኡምቢህ ገልተን፡፡"                                                                               ኢየሱስ ሢልልጣን አርከኮ ኪናም

   23. ኢየሱስ በተ መቅደሲል ሳየህ አይምሂሪይ ይነ፡፡ ታማይ ዋክተ ካህናት አሞይቲትከ ሕዝቢ ሲማግለ ካብ ኤድ የኒህ፣"ታሃም ኡምቢህያ አብታም አይሚህ ሢልጣናህ ኪቶ? ታይ ሢልጣን ኮህ ዮኆወየቲ አቲያ ኪኒ?"የኒህ ካኤሠረን፡፡ 24. ኢየሱስ ታህ የህ ኤል ይምሊሰ፣ "አኑ ኢንኪ ኤሠሮ ሲን ኤሠራክ አነ፣ የኤሠሮህ መልስ ዮህ ቶሖይኒምኮ አኑ ታሃም ኡምቢህ አይሚህ ሢልጣናህ አባም ሲናክ ኢየ ሊዮ፡፡ 25. ያሃኒስ ጥምቀት አርከኮ የመተ? መዔፉጎኮ ኪይይ ይነ ወይ ሒያውኮ?"ኢሲን ሲነሲነህ ታህ የኒ የመከከሪን፣"መዔፉጎኮ ኪኒ ናጉል አይሚህ ቡሳ አምነዋይተኒም ኖክ ኢየለ፥ 26.'ሒያውኮ ኪኒ'ነምኮ ለል፥ ያሃኒስ ሒዝቢ ኡምቢህ ነቢይህ ያብለም ኢዻህ ሒዝበ ማይሲታክ ናነ።"27. አማይጉል ኢየሱሱክ ማናዽገ"የኒህ ይምሊሲን። ኡሱክ ለ አኑ አማይጉል አይሚህ ሢልጣናህ ታሃም ኡምቢህ አባም ሲናክማ አክየ፡፡"

ኢሪ ላማይህ ምሳለ

   28. ካታየህ  ኢየሱስ ታህ አክየ፣"ኢስኪ አይሚህ ሲናድ ኢግዳ? ኢንኪ ሒያውቲ ኢሪ ላማይ ሊይይ ይነ፣ ተንኮ ቲያድ ካባ የህ ይባዺ! ካፋ ወይኒ ታክለድ ተደህ ሢራሕቶ አክየ፡፡ 29 .ባዺ ማዮ ማዲየ አክየ፡፡ ያከካህ ላካል የነሰሔህ ሢራሖ የደየ፡፡ 30 .አባ ማላሚ ባዻድ የደህ ታማም ባሊህ ሢራሖ ይኢዚዘ፡፡ መዔ አባ አዴሊዮ አክየ፣ ያከካሀ ማዳይና፡፡ 31. ካዶ ታይ ላማይኮ አባ ፍቃድ ይፍጽመቲ አይቲያ ኪኒ? ኢሲን"ኤዸዾይታቲያ ኪኒ አ!"የን፡፡ ኢየሱስ ታህ አክየ፣"ሓቀህ ሲናክ አይክ አኒዮ፣ ኃጢአተይናታትከ ዘማውያን ማንግሥተ ሰማይ ሳይናናህ ሲናክ አኩመ ሎን፡፡ 32. አይሚህ ያይጥማቂ ያሃኒስ ጽድቂ አራሕ ሲን ያይባላዎ የመተህ ካማማንኒቲን፣ ኃጢአት ለምከ ዘማውያን ለ የመኒን፣ ታሃም ቱብሊኒህ ኡካ ንሲሓ ሳይተኒህ ማማንኒቲን፡፡"

ወይኒ አታክልት ታሕሩሰሚህ ምሳለ

(ማር.12፣1-12፤ሉቃ.20፣9-19)

   33. ጋባዔህ ኢየሱስ ታህ የ፣ አኪ ምሳለ ኦባ፣ ወይኒ ታክለ ይትክለ ኢንኪ ሒያውቲ ይነ፣ ኡሱክ ወይኒ ታክሊህ ዋሶን ካየህ የከየ፣ ወይኒ ኤድ ያመጹሙቀ ዱኮ ፎተህ ሢራሔ፣ ወይኒ ዻውዾህ ያስግልግለ ዸዽ ማንዳቅ ሢራሔ፣ ታማሚህ ላካል አታክልቲ ቦታ ጋባራህ የስከረየህ አኪ ባዾ የደ፡፡ 34. ፍረት አልሲት ማደጉል ካአፍቶ አካህ ጋራዎና ኢሲ አገልገልቲኮ ጋባራል ፋረ፡፡ 35. ጋባር ለ አገልግለቲኮ ኢንከቶ ይብዽኒህ ሳባዔን፥ ቲያ ይግዲፊን፥ ቲያ ለል ዻይቲህ ሳባዔን፡፡ 36. ወይኒ ታክልህ ዋና ጋባዔህ ተን ሎይ ባሶማራኮ የይመንገህ ኢኪ አገልገልቲ ጋባዔህ ፋረ፡፡ ጋባር ተን አሞል ባሶማራባሊህ ኢንኪ ሢራሕ ኤልይፍጽሚን፡፡ 37. ባክቶል ለ ወይኒ ታክሊህ ዋና ማዳሪ ይ'ባዻ ዓሲባን! ያናማህ ባዻ ጋባራድ ፋረ፡፡ 38. ጋባር ለል ባዻ ዩብሊንጉል ታይቲማ ካወራሲ ኪኒ፣ አማ ናግዳፎዋይ ካሪስተ ናውራሶይ ኢስሲመን፡፡ 39. ባዻ ይብዽኒህ ታክለኮ ኢሮል በኒህ ይግድፊኒህ ዒደን፡፡ 40. ይቦል ወይኒ ታክሊህ ዋና ያሚተ ዋክተ ታይ ጋባሪህ አሞል አይም አካባም ታካሊን? 41. ኢሲን ለ"ታይ ኡማ ሒያው፣ ርኅራኄኒም ተን ያግድፈ፣ ወይኒ ታክለ፣ ፍረ ኢሲሲ ዋክተህ ታሓየ አኪ ጋባራህ ያይከረየ"አክ የን፡፡ 42. ካታሰህ ኢየሱስ ታህ አክየ፣ ነደቅቲ ዻይተ ዻይ ኡሱክ ዋና ዒንደፍቲ ዻ የከ፣ ታሃም መዔፉጊህ ሢራሕ ኪኒ፣

ኒ'ኢንቲትህ  ዲንቀ ኪኒ፣ የህ ይጽሕፈም ለካ ማይናባብንቲኒ?"  

    43."አማይጉል ታህ ሲናክ አይክ አኒዮ፣ መዔፉጊህ ማንግሥት ሲንኮ በየኒህ ፍረ ያፍሬ ሂዝበህ አምሓወለ። [44. ታይ ዻይህ አሞል ራዳቲ ያግድለ፣ ዶንጎሊ አሞል አክራዳቲ ለ ያምጽፍሊቀ፡፡"] 45. ካህናት አሞ ባዕልከ ፈሪሳውያን ታይ ምሳለ ዮቢን ዋክተ ኢየሱስ ዋንስተም ተን አሞል ኪናም የዸጊን፡፡ 46. አማይጉል ያባዾና ጉረኒህ ይኒን፣ ያኮይ ኢካህ ሕዝቢ ነብይህ አብል ይነጉል ማይስተን።                              

ማዕራፋ 22

ማርዓ ዒድመ

(ሉቃ.14፣15-24)

    1. ጋባዔህ ለ ኢየሱስ ምሳለህ ታህ የህ ዋንስታይ ይነ፣ 2. ማንግሥተ ሰማይ ኢሲ ባዻህ ማርዓ ድጊስ አበ ኑጉሡህ ኢግዳ፡፡ 3. ኑጉሥ ደዕምምተ ሒያው ማርዓህ ያማቶና ደዖና አገልገልቲ ተናነድ ፋራ፣ ሒያው ለ ዔድመህ ያማቶና ማጉሪኖን። 

  4. ኑጉሥ አኪ አገልገልት ጋባዔህ ታህ የህ ፋረ፣ ደዕምምታ ሒያውድ አዱዋይክ፣ ሀይከ ማርዓህ ኢኒ ዲጊሲህ ኦምሶኖዶወህ አኒዮ አዉራከ ኩሉስ ገዳም ቱምሩሑደህ ታነ ኡማን ጉዳይ ዮመሶኖዶወህ ያነ፣ አማይጉል ማርዓ ዲጊሲህ አማ፣ ኤዸሓይ አካያ፡፡ 5. ኢሲን ለ ጉዳይ ዒሲሲ ኢሰኒህ ኢንከት ኢሲ ማሕራሣህ፣ አከቲ ኢሲ ኒግደህ የደይን፣ 6. ራዔ ማሪ ለል አገልገልቲ ይብዽኒህ የይወረዲኒህ ሳባዔኒህ ይግድፊን፣ 7.ታማይ ዋክተ ኑጉሥ ይቁጡዔህ ወተሀደር ፋረህ ቶይ ትግድፈም ይስጊድፈ፣ ተን ካታማ ጊራህ ያስቃጻሎና አበ፣ 8. ታማምኮ ላካል አገልገልቲክ ታህ አክየ፣ ሀይከ ማርዓ ድግስ ዮመሶኖደወ፣ ደዕምተም ግን ግብዛህ ኤዳም ማኪኖን፡፡ 9.  ኢሲሲ አዳባባያል ገይተን ሒያው ኡሙቢህ ማርዓ ዔደመህተን ደዓ፡፡ 10. አገልገልቲ ኡማን አራሑል የደይኒህ ገይናን ሒያው ኡምቢህ ኡማ ማራከ መዔማራ የስከሄሊኒህ ማርዓት አዳራስ ዑዱማታህ የመጊን፡፡ 11. ያኮይ ኢካህ ኑጉሥ ዑዹማት ያብሎ አዳራሳል ሳየጉል ማርዓ ሣራ ሀይሲተ ዋየ ኢንክ ሒያውቶ ታማል ዩብለ፡፡ 12. ታህ አክየ፣'ይካኃንቶሊ! ማርዓ ሣራ ሀይሲተካህ አይናህ ተህ ታድ ሳይተ?'ሒያውቲ ለ ቲባ የ፡፡ 13. ኑጉሥ ለ አገልገልቲክ ጋባከ ኢባ አክ ኡዹዋይ ኤየዓይ ኢሮል ታነ ዲተድ ዒዳ፣ ታማል ደሮከ ኢኮክቲ አርባዖ አከለ አክየ፡፡ 14. ጋባዔህ ኢየሱስ"አማይጉል ደዕምምተም ማንጎም ኪኒ፣ ዶሪምምተም ለ ዳጎም ኪኖን"አክየ። 

                             ግብረ ያክፍሊኒሚህ ዳዓባል ካብተ ኤሠሮ  

                               (ማር.12፣13 -17፤ሉቃ.20፣20- 26) 

   15. ታሃምኮ ላካል ፈሪሳውያን የደይኒህ አይናህ ኢሰኒህ ኢየሱስ ዋኒህ ያጽምዲኒም የመከሪን፡፡ 16. ተን ተምሃሮ ሄሮድስ ሒያውሊህ ጋሔኒህ ኢየሱስ ታህ የኒህ ኤሠሮና አበን፣ መምሂሮ! አቱ ሓቂ"መምሂር ኪቶምከ መዔፉጊህ አራሕ ሓቀህ ታይምሂረም ናዽገ፣ ሒያው ማይሲተህ አብታ ጉዳይ ማልቶ፣ አይሚህ አቱ ሒያው ማታይዶሎወ፡፡ 17. ኢስኪ ኖከየ አይሚህ ኮድ ኢጊዳ? ቄሳራህ ግብረ ያክፋሎና ኢዳም ኪኒ ወይ  ማኪ? 18. ኢየሱስ ለ ተን ኡምነ የደገህ"ኮጉቡዛት! አይሚህ ያፍትኒክ ታኒን?"19. ግብረህ ያክፊልን ማል ኢስኪ ይይቦሉዋየ"አክየ፡፡ ኢሲን ኢንኪ ቁርሰ አካህ ባሄን፡፡ 20. ኡሱክ ታይ ማሊህ አሞል ይምቅሪፀህ ያነ ቢሶከ ይምጽሒፈህ ያነ ሚጋዕ ኢይቲያ ኪኒ! የህ ተነ ኤሠረ፡፡ 21. ኢሲን ቄሳር ቲያ ኪኒ አክየን፡፡ አማይጉል"ቄሳሪም ቄሳራህ፣"ፉጊም ፉጎህ ኡሑዋ"አክየ፡፡ 22. ኢስን ታይ ዋኒህ ኃንካቢተኒህ አክ የደይን፡፡

ራብተሚህ ኡጉታቶህ

( ማር.12፣18 -17፤ሉቃ. 20፣27-40)

   23. ታማይ ለለዕ"ራቦንቲቲ ኡግታቶ ማታነ፣"ታዽኄ ሰዱቃውያን ኢየሱሱል የመቲኒህ ታህ የኒህ ኤሠረን፣ 24."ኦ'መምሂሮ! ሙሴ ኢንኪ ሒያውቲ ባዻ ዻለካህ ኢሲ ኑማኮ ራባህ ባዽሲማጉል ሳዓል ራቦንቲ ኑማ ኦርቢሰህ ዻላይ አካህ ያይታካኦይ ያዽኄ፡፡ 25. ማልሕና ሳዓል ኖሊህ ይኒን፣ ኡማንተኒህ ማናቦይቲ ኑማ ኦርብሰህ ባዻ ዻለካህ ራበ፣ አማይጉል ዒንዳ ካሳዓል ራቦንቲ ኑማ ኦርቢሰ፡፡ 26. ታማምባሊህ ማላሚ፣ ማዳሕ፣ አይከ ማላሐና ፋነህ ተራ ተራህ ኦርብሰኒህ ራበን፡፡ 27. ኡማንተንኮ ላካል ኑማ ራብተ። 28. ኢቦል አማይጉል ማልሒኒክ ለ ኡረቢሰኒ ይኒኒጉል፣"ራብተም ኡጉታ ዋክተ አይቲህ ኑማ አከለ?"

   29. ኢየሱስ ለ ታህ የህ ኤልደሄየ፣ አቲን ቁዱሳት ማጻሒፍቲከ መዔፉጊህ ኃይላ ሶዸኒርከህ አምገገይክ ታኒን፡፡ 30. አይሚህ ሒያው ራባኮ ኡጉታ ጊዘ ዓራናል ታነ መላእክቲ ባሊህ ያኪን ኢካህ ሞርቢሳን ሞርቢሲሳን፡፡ 31. ለል ራብተሚህ ኡግታቶህ ዳዓባል ፉጊ ሲናክ የም ማይናባብኒቲሆ? 32. ኡሱክ የም ታህ ኪኒ፣ አኑ አብርሃም አምላክ፣ ይስሐቅ አምላክ፣ ያዕቆብ አምላክ ኪዮ፣ አማይጉል ፉጊ ታነሚህ አምላክ ኪኒ ኢካህ ራቦንቲቲ አምላክ ማኪ፡፡ 33. ሒዝቢ ለ ታሃም ዮቢንጉል  ካምሂሮህ ይምድኒቂን።

ኡማኒምኮ ናባ  ትእዛዝ

( ማር.12፣28 34፤ሉቃ.10፣25 28)

   34. ኢየሱስ ሰዱቃውያን መልስ ተን ዋይሲሰህ ቲባ ተን ኢሰም ፈሪሳውያን ዮቢን ዋክተ ኢንኪል የከሄሊን፡፡ 35. ተንኮ ኢንከቲ ሙሴ ሕጊህ መምሂር ኢየሱስ ያፋታኖ ጉረህ ታህ የህ ካኤሠረ፤ 36.''ኦ'መምሂሮ ኡማኒምኮ ናባ ቲኢዛዝ አይቲያ ኪኒ?"37. ኢየሱስ ለ ታህ የህ ኤልይምሊሰ፣"መዒፉጎ ኢሲ አምላክ ሙሉእ ኢሲ አፍዓዶህ ሙሉእ ኢሲ ናብሰህ ሙሉእ ኢሲ ሓሳባህ ኢክኂን፡፡"38. ኡማኒምኮ ናባቲያከ ኤዸዾይታት ቲኢዛዝ ታይ ቲያ ኪኒ፡፡  39. ታይ ቲያህ ኢግድ ማላሚ ቲኢዛዝ ሒያው ኡምቢህ ኢሲ ዸግኃ ባሊህ ኢክኂን ያቲያ ኪኒ፡፡ 40.ሙሴ ሕገከ ነብያት ሚሂሮ ኡምቢህ ትምሥርተም ታይ ላማ ቲኢዛዚህ አሞል ኪኒ፡፡                                 

 መሲሕ ዳዓባል ካብተ ኤሠሮ

( ማር. 12፣35-37፤ሉቃ.20፣41-44)

   41. ፈሪሳውያን የከሄልኒህ ያኒንሃኒህ ኢየሱስ ታህ የህ ተን ኤሠረ፣ 42."መሲሕ ዳዓባል አይም ታና? ኢይ ባዻ ታካልኒ? ኢሲን ዳዊት ባዻ ኪኒ የኒህ ኤልደሄን።" 43. ኢየሱስ ለ ታህ አክየ፣"ኢቦል ዳዊት መንፈስ ቁዱሱህ ይምሪሔህ ታህ አይህ፣ ማዳራ የህ አይናህ የህ ደዓ?"44'መዔፉጊ ይማደራህ (ይመሲህ)፣ ኩናዓብቶሊት ኩሥልጣኒህ ዳባል ኮህ ዲፈሳም ፋናህ ይምድጋል ዲፈይ!'አክየ። 45. አማይጉል ዳዊት ኢሰህ'ማዳራ'የህ ደዔምኮ፣ ይቦል" መሲሕ አይናህ የህ ባዻ ያኮ ዺዓ?"ኢንኪ ቃል ኡካ ኤልደሄዮ ዺዔቲይ ኢንኪ ሒያውቲ ማና፣ ቶይ ለለዕኮ ኤዸዽሰኒህ ኤሠሮ ካብ ኤሊሶ ይድፊረቲይ ኢንከቲ  ማና።

ማዕራፋ 23

ሙሴ ሕገከ መምሂራንከ ፈሪሳውያን ኡምነህ ዳዓባል

(ማር.12፥38-39፤ሉቃ.11፥43-46፤20፣45-46)

   1. ታሃምኮ ላካል ኢየሱስ ሕዝበከ ኢሲ ተምሃሮህ ታህ የህ ዋንሲተ። 2."ሙሴ ሕጊህ መምሂራንከ ፈሪሳውያን፣ ያማሃሮና ሙሴ መንበሪክ ድፈየን፡፡ 3. አማይጉል ኢሲን ሲናክ ያናም ኡምቢህ አባ፣ ዻዉዻ፣ አይሚህ ኢሲን ወንስታናም ሢራሕድ ማሲሳን። 4. ዒልሳምከ ያጽግመ ዑካ ይዹውኒህ ሒያዋክ ያሪን፣ ሲናሞህ ለ ሊፊዕህ ኤድዻጎና ኡካ ማጉራን፡፡ 5. ሲኒ ሢራሕ ኡምቢህ አባናም ሒያው አካህ ታብሎ ያናህ ኪኒ፣ ሲኒ ኢንግዲዓ ያይፍዲኒን፣ ሲኒ ሣራ ያይዸዺን! 6. ዲጊስ ግብዛህ አሞል ክብረ ለ ቦታ፣ ሙኩራባድ ኤዸዾይታ ሲፍራ ያብዽኒም ኪኅኖን፡፡ 7. አዳባባያል ሒያው ኡምቢህ ጋባ አካበቶናከ መምሂሮ! የኒ ደዕሚሞና ጉራን፤ 8. አቲን ለ ሲን መምሂር ኢንከቶ ጥራህ ኪኒጉል ኡምቢክ ለ ሳዖል ኪቲኒም ኢዻህ 'መምሂሪህ' ማደዒሚና፡፡ 9. ለል ዓራናል ያነ ሲን አባ ኢንከቶ ኪኒጉል ባዾ ታሞል ኢንከቶ አባ ተኒህ ማደዒና፡፡ 10. ሲን ማዻጊ መሲሕ ዲቦህ ኪኒጉል ማዻጊት ተኒህ ማደዒሚና፡፡ 11. ሲን ፋናድ አሞ የከ ሢልጣን ባዕሊ ሲን አገልጋሊ ያኮይ፡፡ 12. ኢሲ ዸግኃ  ናው አሳቲ ያምወረደ፣ ኢሲሞ  ላት ኢሳቲ ናው ያ፡፡

ሙሴ ሕጊህ መምሂራንከ ፈሪሳውያን ይምወቂስን

(ማር.12፣40፡ሉቃ.11፣39-42፤44-52፤20፤47)

  13. ሒያው ማንግሥተ ሰማያል ሳይታምኮ ኢፈይ አልፍታ ኮጉቡዛት ሙሴ ሕጊ መምሂራንከ ፈሪሳውያኖ ሲነህ ሚና! አቲን ሲነህ አድማሳይታን ሳይቶ ጉርታም ሳይታምኮ ደሳን።      

   14. ታምባላዎና አብታን ዸዽ ጻሎት አይምክኒክ ማምንቲ ዓረ ታብዝቢዘምክ፣ አቲን ኮጉቡዛት ሙሴ ሕጊህ መምሂራንከ ፈሪሳውያኖ ሲነህ ታብሎና ኪቲን! አማይጉል ጊዲድ ፍርዲ  ሲን ማደ ለ፡፡ 15. አቲን ገቡዛት ሙሴ ሕጊህ መምህራንከ ፈሪሳውያኖ አብለልቲን! ኢንኪ ሒያውቶ ሲኒ ሃይምኖቱድ ሳይሶና ባሕራከ ባዾ ታዞሪን፣ ሳይሳንጉል ሲንኮ ላማ ጋባህ ዒፅፈህ ጊዲድ ጋሃናማህ  የምሶኖዶወቲያ ካአብታን፡፡           

  16. አቲን ቶዖረ መራሕቲክ ታብሎና ኪቲን! ሒያወቲ በተ መቅደሲህ ዺውታም ኢንኪም ማኪ ታን፣ በተ መቅደስከ ዋርቀህ ዽዊተምኮ ለ ዺዋህ ታምዽቢዸ አይክ ታኒን፤ 17. አቲን ኮ ኡፉወማሎሊከ ዑዉራቶ፣ ዋርቀከ ዋርቂ ኤልያምቅድሰ በተ መቅደስኮ አይቲ ያሰ? 18. ታማም ባሊህ ሒያውቲ መሥዋዕቲ ቦታህ ዺዊታም ኢንኪም ማኪ ታዽኅን፣ መስዋዕቲ አሞል ዺውታንጉል ለ ዺዋህ ሚያምዽቢዽን ታዽኂን፡፡ 19. ኮ ዑዉራን! ማባዕከ መባዕ ኤልያምቅድሰ መሥዋዕቲ ቦታኮ አይቲ ያይያሰ? 20.አማይጉል ኤል ያምስውዔርከህ ዺውታ ቲይ፣ ኤል ያምሥውዔርከህከ መሥዋዕቲ አሞል ያነ ጉዳህ ኡምቢህ ዺዊታ፡፡ 21.መቅደሰ ዓረህ ዺዊታቲ መቅደስከ መቅደስ አዳል ታነሚህ ዺዊታ፡፡ 22. ዓራናህ ዺዊታቲ መዔፉጊህ ዙፋናከ ካዙፋኒህ አሞል ታነሚህ ዺዊታ፡፡

   23 .አቲን ኮ ጉቡዛት! ሙሴ ሕጊህ መምሂራንከ ፈሪሳውያኖ አብለሊቲን! አዝሙድኮ፣ ሰሰግኮ፣ ካሙንኮ፣ አሥራት ታሓይን፣ ያኮይ ኢካህ ሕጊ አዳድ ገይማ ዋና ኪን ጉዳይ ሓባክ ታኒን፣ ኢሲን ለ ፍርደ፣ መሕረት፣ አምአማማን ኪኖን፡፡ ቶሆም ሓበካህ ታሃም አብቶና ሲናህ ኤዳይ ዪነ፡፡ 24. አቲን ቶዖረ መራሕቲ፣ ታዑብኒምኮ ኡምቢህ ኪኒኒያቲዻ ዒንዻ ጉዳይ ታየዒኒህ ዒዳን፣  ጋሊ ኢዻ ያከ ናባ ጉዳይ ለ ታንዹዒን፡፡

   25. ኮ ጉቡዛት አብለሊቲን፣ ሙሴ ሕጊህ መምሂራንከ ፈሪሳውያኖ አብለሊቲን! ብርጭቆከ ሳሕን ኢሮጋዳኮ ታይጽሪዪን፣ አዳ ግን ቡኩሶከ አምሀጋጋዋህ ተመገቲያ ኪኒ፡፡ 26. አቱ ዑዉር ፈሪሳዊ! ኡኩማይ ብርጽቆከ ሳሓን አዳ ጋዳኮ ኢይጺሪይ፣ ታማይጉል ለ ኢሮ ጋዳኮ  ጽሪቲያ ያከ፡፡ 

  27. አቲን ኮጉቡዛት ሙሴ ሕጊህ መምሂራንከ ፈሪሳውያኖ አብለሊቲን! አዳኮ ራብተ ሒያዊህ ላፎፍከ ሩኩስ ኪን ጉዳህ ሙሉኡድ ተመገሞ፣ ኢሮኮ ለ ኖራህ ይመልሚጸህ ዓዻ መዔ ማዓጊህ ማንዳቃህ ኢግድቲን፡፡ 28. ታማም ባሊህ አቲን ኢሮኮ ሒያዋህ ጻድቃናህ ትምግዲኒህ አምቡሉውክ ታኒን፣ ሲናዳድ ለ ሲንፊናከ ኡምነ ሲናክ ተመገህ ታነ፡፡

  29. አቲን ሙሴ ሕጊህ መምሂራንከ ፈሪሳውያኖ አብለሊቲን! ነብያት ማዓጋ አንድቅክ ታኒን፣ ጻድቃን ሐውልቲ ዓዻ አስመዒክ ታኒን፡፡ 30. ናቦብቲህ ዳባናህ ገይምነህ ናከዶ ነብያት ቢሎ ሓዸነህ ተንሊህ አምኄበበረ ማዻዺኒኖ ታናህ ታኪን፡፡ 31. አማይጉል ነብያት ቲግዲፈ ሒያዊህ ዻሎ ኪቲኒም ሲነህ አምስኪሪክ ታኒን፡፡ 32. ኢቦል ሲናቦብቲ ኤዸዺሰ ሢራሕ አቲን ለ ታፍጽሚኒም ኪኒአ! 33. አቲን ኮ'ዓሮር፣ ዓሮራ ዻይሎ! አቲን ጋሃናም ቅፅዓትኮ ታሳላሞና አይናህ ተኒህ ዽዒታና? 34. አማይጉል ሀይከ አኑ ነብያት፣ ቢልሓት ለም፣ መምሂራን ሲናድ ፋራክ አነ፣ ተንኮ ጋሮጋሮ አግድፈሊቲን፣ ጋሮጋሮ ለ አስቅለ ሊቲን፣ ጋሮጋሮ ተን ሙክራባል ተን ሳባዔ ሊቲን፣ ካታማኮ ካታማል አይሰደደ ሊቲን፡፡35. ታሃሚህ ምክንያታል ጻድቅ ኪን አቤል ቢሎኮ ኤዸዺሰህ ካ'መቅደስከ ኤል ያስውዒን ኢርከህ ፋናድ ትግድፊኒም አይከ ባራክዩ ባዻኮ አይከ ዘካሪያስ ቢሊህ ባዾት አሞል ሐዺተሚህ ዳዓባል ጻዲቅ ቢሊህ ቅጽዓት ሲን አሞ ማደለ፡፡ 36. ሓቀህ ሲናክ አይክ አኒዮ፣ ታሃም ኡምቢሂያህ ቂጽዓት ታይ ዳባኒ ሒያዊህ አሞል ማደለ።  

                                 ኢየሩሳለሚህ ዮሖወ  ሰሊስናን      

                                       (ሉቃ.13፥34-35 )                               

    37. ጋባዔህ ኢየሱስ ታህ የ፣"ኢየሩሳለሞ፣ ኤየሩሳለሞ አቱ ነብያት ታግዲፈቲያ! ኮያድ ፋሪምተም ዻይቲህ ታጉረቲያ! ዶርሆ ፃፁት ኢሲ መንፈሪህ ዳባድ ታስከሄለም ባሊህ፣ አኑ ኩ'ዻይሎ ኢንኮህ አስካሃሎ አይዾለ ዋክተ ጉረ፣ አቱ ለ ይማጉርኒቶ፡፡ 38. አማይጉል ሀይከ ሲን ዲክ ዖና የከህ ራዔ ለ፡፡ 39. አማይጉል ማዳሪ ሚጋዓህ ያምተቲ የምበረከቲያ ኪኒ ታናም ፋናህ ታሃምኮ ላካል ይማታብሊን ሲናካይክ አኒዮ።

ማዕራፋ 24

በተ መቅደስ ራድናኒህ  ዳዓባል ኢየሱስ ትንቢት

(ማር.13፣1-2፤ሉቃ.21፣5-6)

   1. ኢየሱስ በተ መቅደስኮ የውዔህ አድህ ካ ተምሃሮ በተ መቅደስ ሕንፃ ካያስባላዎና ካያድ ካብየን፡፡ 2. ኡሱክ ለ ታሃም ኡምቢህ አብልክ ታኒን? ሓቀ ሲናክ አይክ አኒዮ፣ ዻይ ዻይ አሞል ዮምዶሮሮበህ ረዳካህ ራዓቲ ሚያነ አክየ፡፡

ዓለም ባክቶ

(ማር.13፣3-13፤ሉቃ.21፣7-19

   3. ኢየሱስ ደብረ ዘይት ኢምባክ አሞክ ድፈህ ያነሃኒህ ካተምሃሮ ዲቦህ ካያድ ካብ የኒህ፣"ታይ ኡምብሂያህ ጉዳይ ያከም አንዳ ኪኒ? የኒህ ካኤሠረን፡፡ ሙሙትከ ዓለም ባክቶህ ምልኪት አይምቶ ኪኒ"የኒህ ካኤሠረን፡፡ 4. ኢየሱስ ታህ የህ ኤልይምሊሰ፣ "አኪናን ሒያወቲ ሲን ያይተለለክ ሰሊታ! 5. አይሚህ ማንጎ ሒያው አኑ መሲሕ ኪዮ፣ አክ ይሚጋዓህ አምተሎን፣ ማንጎ ሒያው አስገገሎን፡፡ 6. ጦርነትከ አንዻሕ ዺባ ዋረ አበሊቲን፣ ታሃም ኡምቢህ ታኮ ኤልታነጉል ማኃንካቢቲና፣ ባክቶ ለ ገና ኪኒ፡፡ 7. ሕዝብ ሕዝቢ አሞል ማንግሥት ማንግሥቲ አሞል ዺባህ ኡጉተሎን፣ ኢሲሲ ቦታል ራሃብከ ባዾት አምናዋጽ አከለ፡፡ 8. ታሃም ኡምቢህ ለ ኡላሎ ፃዕሪህ ኤዸዾይታ አከለ፡፡ 9. ታማይ ዋክተ ሒያው ጸገሚህ ቲላሰኒህ ሲን አሓየሎን፣ ሲን አግዲፈሎን፣ ይሚጋዒህ ዳዓባል ኡማን ሂዝበል ትምንዒበም አከሊቲን፡፡ 10. ታማይ ዋክተ ማንጎ ማሪ ሲኒ ሃይማኖት አክሒድክ አምሰነከለ ሎን፣ ቲይ ቲያ ቲላሰህ አሓየ ለ፣ ሒያው ሲነሲነህ አንገዔሎን፡፡ 11. ማንጎ ዲራብቲ ነብያት ኡጉተ ለ፣ ማንጎ ማራ አስገገሎን፡፡ 12. ኡምነኮ ኡጉተሚህ ማንጎ ሒያዊህ ካሓኒ ዻማኄ ለ፡፡ 13. አይከ ባክቶ ፋናህ ትዕግሥቲህ ሲክ የቲ ለ አድኂነ ለ፡፡ 14. ኡማን ሕዝበህ ማስኪር ያኮ ታይ መዔፉጊህ ማንግሥቲህ ወንጌል ሙሉኡድ ዓለምል አምሲብከ ለ፣ ታማይ ዋክተ ባክቶ አሚተለ።

ታይሢቂቀ መከራ

(ማር.13፣14-23፤ሉቃ.21፣20-24)

   15. ካታሰህ ኢየሱስ ታህ የ፣ ነብይ ዳንኤል ዋንሲተሚህ መሠረቲህ ያይረከሰ ያይጺዪፈ ጉዳይ ትምቅድሰ ሲፍራል ሶለህ አብለሊቲን፣ ታሃም ያብበቲ ያስታውዓሎይ፡፡ 16. ታማይ ዋክተ ይሁዳ ባዾል ታነም ኮማምቱላል ኩዶናይ፣ 17. ናሕሲ አሞክ ያነቲ ዓረኮ ኢንኪ ጉዳይ በዮ የህ ኦበዋዎይ፤ 18. ማሕራሳል ያነቲ ሣራ በዮ የህ ሳራቱላል ጋሔዋዎይ፣ 19. ታማይ ዋክተ ሶኒይትከ ሒፆን ዾዊሳ ኡሎል ሲነህ ኢየዋዎናይ፤ 20. ኩዲ ካርማድ ወይ ሳንባት ለለዕ ያከምኮ ጻሎት አባ፡፡ 21. ታማይ ዋክተ ዓለም ይምፊጢረምኮ ኤዸዽሰህ አይከ ካፋ ፋናህ አከዋይተም፣ ባሶድ ለ ታማህ ኢጊዳም ኢንኪማኅ ተከህ አምዺገ ዋይታ ናባ መከራ አምተለ፡፡ 22. ታይ ለለዓት አዉዹዸ ዋንዶማ ኢንኪ ሒያውቲ ያድኃኖ ዽዔ ማዻና፣ ያከካህ ዶሪምምተ ሒያው ዮዋ  ታማይ ለለዓት አዉዹዸ ሎን።

   23. ታማይ ዋክተ አኪናን ሒያውቲ መሲሕ ታል ያነ! ወይ ቶል ያነ! ሲናክ የኒሚህ ማማኒና፡፡ 24. አይሚህ ዲራብቲ መሲሓ ተከህ ዲራብቲ ነብያት ኡጉተሎን፣ ኢሲን ዺዓንዶ መዔፉጊህ ዶሮይቲት ኡካ ራዔካ ያስጋጋዮና ናባ ዲንቀ ኪን ነገራት አይቡሉወ ሎን፡፡ 

  25. አማይጉል ታሃም ኡምቢህ ኡይሱኩመህ ሲናክ አክ አኒዮ፡፡ 26. ሀይከ ባራኪ ያነ፣ ሲናክ ያንጉል ማአዳይና፣ ሀይከ ዲቦህ ቦታ ታነ ሲናክ ያንጉል ማማኒና፡፡ 27. አይሚህ ሓንካዽ ዓራናል ብልጻ ያህ አይሮማሓኮ አይሮዱማል ያምቡሉወም ባሊህ፣ ሒያውቲ ባዺህ ሙሙት ታማምባሊህ አከለ፡፡ 28. ባድኒ አል ያነ ቦታል ጉማ ኤልታከሄለ፡፡"

ሒያውቲ ባዺ ክርስቶስ ማላሚህ ያመተም

(ማር.13፣24-27፤ሉቃ.21፣25-28)

   29. ጋባዔህ ለ ኢየሱስ ታህ የ፣"ታይ መከራህ ለለዓኮ ሣራህ አማይጉልካህ አይሮይታ ዲቶወ ለ፣ አልሳ ኢሲ ኢፎ አይቡሉወ ማለ፣ ሑቱክ ዓራንኮ ራደለ፣ ዓራንቲ ኃይል አምሄወከ ለ፡፡ 30. ታሃሚህ ላካል ታይ ሒያውቲ ባዺህ ምልኪት ዓራናል አምቡሉወ ለ፣ ታማይ ዋከተ ዓለም አሞል ያነ ሕዝቢ ኡምቢህ ሲኒ አፍዓዶ ሳባዓክ ወዔ ሎን፡፡ ሒያውቲ ባዺ ኃይላህከ ናባ ኪብረህ ዳሩር አሞል የከህ አምቲህ አብለሎን፡፡ 31. ናባ ጡሩምባህ አንዻህ ታይሳበ ኢሲ መላእክት ፋረ ለ፡፡ ኢሲን አፋራ ዓለሚህ አንጎሊቲል የደይኒህ ዓራንቲ ደራትኮ አይከ ዓራንቲ ደራታል ካያህ ዶርምምተ ሒያው አስከሄለሎን፡፡"

ማዳሪ ሙሙቲህ ዋክቲህ ምሊክት

       (ማር.13፣28-31፤ሉቃ.21፥ 29-33)

   32. ኢየሱስ ካታሰህ ታህ አክየ፣"ባላሶ ሓዻህ ምሳለ ቲምሂርቲ ሲናህ ታኮይ፣ ሓኮክ ዻዻይ ይቁጥቁጠህከ ዻዻይ አንዻዾዋህ ታማይ ዋክተ ሱጉም ካብየም ታዽጊን። 33. ታማም ባሊህ ታሃም ኡምቢህ ታብሊንጉል፣ ሒያውቲ ባዺ ያሚተ ዋከቲ ካብየም ኢዽጋ፡፡ 34. ሓቀ ሲናክ አይክ አኒዮ ታሃም ኡምቢህ ታምፊፂመም ፋናህ ታይ ማባኮ ማትላይታ፡፡ 35.ዓራንከ ባዾ ቲላይታ፣ ይቃል ለ ኡማንጉሉህ ማራ።

ማዳሪ ያምተ ዻሒነ ኢንከቲ  ሚያድገ

(ማር.13 ፥ 32-37፤ሉቃ.17 ፥ 26-30፣34-36)

   36. ጋባዔህ ኢየሱስ ታህ የ፣"ታይ ለለዕከ ታይ ሳዓት ለ አባኮ በሒህ ዓራናንቲ ማላይካ የኪኒሚህ ሚያዽጊን፣ ባዺ የከሚህ፣ ኢንከቲ ያዽገቲ ሚያነ፡፡ 37. ኖኅቲ ዳባን ቲነሚህ ዓይነት ባሊህ ሒያውቲ ባዺ ያሚተም ለ ታማይ ዋክተ ባሊህ አከለ፡፡ 38. ታማይ ዳባን ላየ ሊይኮ ባሶል ኖኅ መርከብድ ሳ ለለዕ ፋናህ ሒያው በታከ አዑብክ፣ ኦርቢሳከ ኦሮባክ ዪኒን፡፡ 39. ላየ ሊይ ተመተህ ሙሉኡድ ቲጽሪገህ በይታም ፋናህ አዽገካህ ዪኒን፡፡ ሒያውቲ ባዺህ ሙሙዉት ታማም ባሊህ አከለ፡፡ 40. ታማይ ዋክተህ ላማ ሒያውቲ ማሕራሳል ኢንኮህ አሕሩሰ ሎን፣ ኢንከቶ አክበሎን፣ ማላሚ ራዔለ፡፡ 41. ላማ ኑማ ኢንኮህ አዽኅነሎን፣ ኢንከቶ አክበሎን፣ ማላሚ ራዔ ለ፡፡ 42. አማይጉል ሲን ማዳሪ አይ'ለለዕ ያሚተም ማታዽጊንጉል ኢትጊሃይህ ኢላላ፡፡ 43. ያኮይ ኢካህ ታሃም ኢዽጋ፣ ዲክቲ ባዕሊ ባር አይሳዓታህ ባዸዻይቲ ያሚተም ያዽገዶ ይንቂኄ ዻዉዸ ዻዸ፣ ዓሪ ፎቲሞ ሓበ ማዻዺና፡፡ 44. ታማምባሊህ ሒያውቲ ባዺ አሕሲበዋተን ሳዓታህ ያሚተም ኢዻህ ኦምሶኖዶዋይ ኢላላ፡፡

መዔቲያከ ኡማ አገልጋሊህ ምሳለ

(ሉቃ.12፣41-48)

   45. ካ'በተሰቢህ ምግበ ዋክተህ አካህ ያሓዎ ማዳሪ ኢሲ በተሰቢህ አሞል ረዲሳ ያምኢሚነ ብልኄ ኪን አገልጋሊ አይቲያ ኪኒ፡፡ 46. ማዳሪ ያምተ ዋክተ ታሃም አባህ ገያ ጊለዋይቲ ይምስጊነቲያ ኪኒ። 47. ሓቀ ሲናክ አይክ አነ፣ ታማይ ጊለዋይቶ ማዳሪ ኡማን ኢሲ ኒብረቲህ አሞል ረዲሳ። 48. ቶይ ኡማ ጊለዋይቲ ለ 'ማዳሪ ካዶ ሚያምተ ዓየ ለ ያህ ያሕሰበጉል፣' 49. ኢሲ ሢራሒህ ዶባ ሳባዓናም ኤዸዺሳ፣ ታስኪረምሊህ ለ በታከ አዑቢህ፤ 50. ታማይ አጊለዋይቲህ ማዳሪ አሕጽበ ዋየ ለለዕከ ሳዓታህ ያሚተ፡፡ 51. ታማይ ጊለዋይቶ ማዳሪ ማንጎም ካ'ያቅጺዔ፣ ዒደት መደብ ለ ጉቡዛትሊህ አካባ፣ ታማርከኮ ደሮከ ኢኮክቲ አርባዖ ታከ።

ማዕራፋ 25

ታማና ዲንጊሊህ  ምሳለ

   1. ጋባዔህ ኢየሱስ ታህ አክየ፣ ታማይ ዳባን ማንጊሥተ ሰማይ ሳይናኒህ አጋባቢራ ሲኒ ኢፎይታ ይብዽኒህ ማርዓዬ ጋራይቶ ተውዔ ታማና ዲንጊላህ ታሪክህ ኢግዳ፡፡ 2. ተንኮ ኮን ዱዲት፥ ኮን ብልኂት ኪይይ ይኒን፡፡ 3. ዱዲት ኪን ዲንጊላ ኢፎ ይብዽኒህ ኢፎሊህ ያከ ኤድኦሳን ዘይት አብዸካህ ይኒን፡፡ 4. ብልኂት ኪን ዲንጊላ ለ ሲኒ ኢፎሊህ ኦሲታ ዘይት ኑዋይቲድ ይብዽኒህ ይኒን፡፡ 5. ማርዓየ ዓያየጉል ኡምቢህ ዕንዱጉል አክሱበህ ዺነን፡፡  6. ባርቲ ዓዻ የከጉል ለ ሀይከ ማርዓዬ የመተ፣ ኤወዓይ ጋራ! ያን ዋዕዋዕታ ቶሞበ፡፡ 7. ታማይ ዋክተ ዲንጊላ ኡምቢህ ኡገተኒህ ሲኒሲኒ ኢፎይታ ዮይሶኖዶዊን፡፡ 8. ዱዲት ኪን ዲንጊላ ብልኄት ኪን ማራክ ኒፎይቲ ባዶ ለክ ያዓሳዲት ሲኒ ዘይትኮ ኖሑዋ አክየን፡፡ 9. ብልኅት ኪን ዲንጊላ ለ ኖከ ሲና ዺዓ ዘይት ማሊኖክ፣ አዱዋይ ሱቁኮ ሲናህ ያከ ዘይት ዻማ የኒህ ኤልይምልሲን፡፡ 10. ዱዲት ኪን ዲንጊላ ዘይት ዻሞና የውዒኒህ የደይንጉል ማርዓዬ የመተ፣ ተምሶኖዶወህ ሱገተ ዲንጊላ ማርዓየሊህ ዲጊስ አዳራሳድ ሳየን፣ ኢፈይ አልፍመ፡፡  11. ላካል ራዕተህ ቲነ ዲንጊላ ተመተህ ኒማዳራ! ያዓሳያ ኖህ ፋክ! አክ የን፡፡ 12. ኡሱክ ለ ሓቀ ሲናክ አይክ አኒዮ፣ አኑ ሲን ማዽገ! የህ ኤልደሄየ፡፡ 13. አማይጉል ለለዕከ ሳዓት ማታዽግኒም ኢዻህ ኢትጊሃይ ዻዉዻ፡፡                            

አዶሓ አገልጋሊህ ምሳለ

ሉቃ. 19፣11-27

    14. ጋባዔህ ለ ኢየሱስ ታህ የ፣"ታማይ ዋክተ ማንግሥተ ሰማይ ሳይናን አጋባብራ ታህ አከለ፡፡ አኪ ባዾ ያዴ ኢንኪ ሒያውቲ ኢሲ አገልገልቲ ደዔህ ኒብረት ተን ይርኪበ፡፡ 15. ተን ተን ዓቅመ ባሊህ ሓዲለህ፣ ቲያህ ኮና ሲሕ ቁርሲያ፣ ቲያህ ላማሲሕ ቁርሲያ፣ ኢንከቶህ ለ ኢንኪ ሲሕ ቁርሲያ፣ ዮሖወህ አኪ ባዾ የደየ፡፡ 16. ኮና ሲሕ ቁርሲያ በየቲ አማይጉልካ ዸህ ኤድ ይንጊደህ አኪ ኮና ሲሕ ቁርሲያ አክ ራዒሠ፡፡ 17. ላማ ሲሕ ቁርሲያ ገራየቲ አማም ባሊህ ይንጊደህ አኪ ላማ ሲሕ ቁርሲያ አክ ይቢዸ፣ 18. ኢንኪ ሲሕ በቲ ለ የደህ ባዾ ፎተህ ማደሪ ማል ዮዖገ፡፡

  19. ማንጎ ዋክተኮ ላካል ታማይ አገልገልቲህ ማደሪ የመተህ አገልገልቲሊህ ያምሐሳሳቦ ኤዸዽሰ፡፡ 20. ኮና ሲሕ ቁርሲያ ጋራየ ጊለዋይቲ ማደራል የመተህ አኪ ኮና ሲሕ ቁርሲያ ካብ ኢሰህ፣ ይማደራ! ኮና ሲሕ ቁርሲያ ዮህ ቶሖወህ ቲነ፣ ሀይከ አኪ ኮና ሲሕ ቁርሲያ ኦሰህ አብዸህ አኒዮ አክየ፡፡ 21 .ማዳሪ ለ መዔም አብተ፣ አቱ ኡሙንከ መዔ አገልጋሊ! ዳጎ ጉዳህ ኡሙን ተከህ ገይምተጉል ማንጎ ጉዳይህ አሞል ኩረዲሳክ አነ፣ አሞ! ኢሲ ማዳሪህ ኒያት ሓዲሊቶክ ሳይ! አክየ፡፡ 22. ላማ ሲሕ ቁርሲያ ጋራየቲ ካብየህ ይማዳራ! ላማ ሲሕ ቁርሲያ ዮህ ቶሖወህ ቲነ፣ ሀይከ አኪ ላማ ሲሕ ቁርሲያ ራዒሰህ አኒዮ አክየ። 23. ማዳሪ ለ መዔም ኪኒ፣ አቱ ያምኢሚነ መዔ አገልጋሊ ዳጎ ጉዳህ ያምኢምነቲያ ተከህ ገይምተጉል ማንጎ ጉዳህ ኩረዲሳክ አነ፣ አሞ ኢሲ ማዳሪህ ኒያት ታምካፋሎክ ሳይ! አክየ፡፡ 24  ኢንኪ ሲሕ ጋራየቲ ካብየህ ይማዳራ! አድሪየ ዋይተምኮ ታዕየ፣ አብቲነ ዋይተም ያስከሄለቲያ ፀካን ኪን ሒያውቶ ኪቶም አዽገ፣ 25. አማይጉል ማይሲተህ ኤደህ ኩገንዘብ ባዾት አዳድ ኦዖገ ኢነ፣ ሀይከ ኩማል አክየ፣ 26. ማዳሪ ለ ታህ አክየ፣ አቱ ኡማቲያከ ሰነፍ አገልጋሊ! አድሪየዋይምኮ አዒይም፥ አብትነዋየምኮ አስከሄለም ያዸገቲያ ተከምከም ሣራህ፣ 27. ይማል ባንካድ ዲፈሶ ኮልቲነ፣ አኑ ለ አሚተ ዋክተ ኢኒማል ኢሲ ዻላይሊህ በይሲተ ዻዸ፡፡ 28.ታጉል ማል አክጋራይ ታማና ሲሕ ቁርሲያ ለ ቲያህ ኡሑዋ፡፡ 29. አይሚህ ለ ሒያውቶህ ለምድ ኤድ አካህ ኦሲታ፣ አካህ ያመንገ፣ ሂንቲያኮ ለ ቶይ ለም ኡካ አክበያን፡፡ 30. ታይ አርብኄ ዋ አገልጋሊ ለ ኢሮል ታነ ዲተድ ኤየዓይኪ ዒዳ፣ ታማድ ደሮከ ኢኮክቲ አርባዖ አከለ፡፡"

ዓለም ባክቶል ያከ ፍርደ

  31. ካታሰህ ኢየሱስ ታህ የ፣ ሒያውቲ ባዺ ኢሲ መላእክቲህ ሙሉኡድ ይምዕዚበህ ክብረህ የመተህ ኢሲ ዙፋኒህ አሞክ ዲፈ ለ፡፡ 32. ሕዝቢ ሙሉኡድ ካነፊል አከሄለ ሎን፣ ሎይኒ ዒዶ አላኮ ባደሳም ባሊህ ኡሱክ ሕዝበ ለ ባዽሳ፣ 33. ዒዶ ሚድጋል፣ አላ ጉራል ሶሊሰ ለ፡፡ 34. ታማይ ዋክተ፣ ኑጉሥ ሚድጉላል ታነምክ ታህ አክ ኢየ ለ፣ አቲን ያባ የበረከምክ፣ አማ! ዓለም ይምፍጥረምኮ ኤዸዺሰህ ሲናህ የምሶኖዶወ ማንግሥቲ ኢውርሳ፣ 35. አይሚህ ሉወህ ይበቲሰን፣ ባከረህ ይተፈዒን፣ ገዸንታ ኤከህ ይጋራይተን፣ 36. ዓራደህ ይሃይሲሰን፣ ላሑተህ ይጉፍተን፣ ኡምዹወህ የሠርተን፡፡" 37. ታማይ ዋክተ ጻድቃን ታህ አየኒ ኤልደሄሎን፣ ኒማደራ! አንዳ ሉይተህ ኩኑብለህ ኩበቲስነ? አንዳ ባካርተህ ኩኑብለህ ኩነፈዔ? 38.አንዳ ገዸንታ ተክህ ኩኑብለህ ኩጋራይነ? አንዳ ዓራደህ ኩኑብለህ ኩሃይሲሲነ? 39. አንዳ ላሑተህከ ወይ ቱምዹወህ ኩኑብለህ ኩኤሠርነ? 40. ኑጉሥ ሓቀህ ሲናክ አይክ አኒዮ፣ ታይ ይሳዖልኮ ዒንዻቲያ ኪንቲያኮ ኢንከቶህ ኡካ አብተኒም ኡምቢህ ዮያህ አብተኒም ባሊህ ኪኒ የህ ኤልደሄያ፡፡ 

   41ታሃምኮ ላካል ጉራል ታነምክ ታህ አክየ ለ፣ አቲን አባርምተምክ! ዮኮ ቶህ ኢዕዺያ! ሰጣንከ ካተከተልቲ ተከ ማላይካህ ቶምሶኖደወ ኡማንጉሊ ጊራድ አዱዋ፡፡ 42. አይሚህ ሉወህ ይማበትስንቲን፣ ባካረህ ይማፋዕንቲን። 43. ገዸነታ ኤከህ ዪማጋራይንቲን፣ ዓራደህ ይማሀይስስኒት፥ ላሑተህከ ኡምዹወሀ ይመሰንኒቲን፣ 44. ኢሲን ለ ኒማደራ! ሉይተህ፣ ባካርተህ፣ ገዸንታ ተከህ፣ ወይ ዓራደህ፣ ላሑተህ፣ ወይ ቱምዹወህ፣ አንዳ ኩኑብለህ ኩጎሮንሰካህ ራዕነ? አይክ ኢየ ሎን፡፡ 45. ኑጉሥ ለ ሓቀህ ሲናክ አይክ አነ፣ ታይ ይሳዖልኮ ዒንዻቲያ ኪንቲያኮ ኢንከቶህ ኡካ አበዋይተኒም ኡምቢህ ዮያህ አበዋተኒም ባሊህ ኪኒ አክየ ለ፡፡ 46.አማይጉል ታይ ማሪ ኡማንጉሊ /ዘለዓለማዊ/ ቅጽዓታህ አዲህ፤ ጻድቃን ለ ኡማንጉሊህ  ሕይወቲል  አዴሎን፡፡

ማዕራፋ 26

ኢየሱስ  አሞል ተከ አደማ

(ማር. 14፣1-2፤ሉቃ.22፣1-2፤ዮሐ.11፣45-53)

  1. ኢየሱስ ታይ ሚሂሮ ኡምቢህ ይምሂረህ ባከጉል ኢሲ ተምሃሮክ ታህ አክየ፡፡ 2."ላማ ለለዕኮ ላካል ፋሲጊ ባዓል አከለም ታዽጊን፣ ሒያውቲ ባዺ ይምሲቂለህ ታካሪሞ ቲላሰኒህ አሓየሎን፡፡ 3. ታማይ ዋክተ ካህናተ ኃለቅቶትከ ሲማግለ ካህናት ኃለቃ ቀያፋ ጊበደ የከሄሊን፡፡ 4. ታማል ኢየሱስ ተንኮሉህ ያባዾናከ ያግዳፎና የመከሪን፡፡ 5. ያከካህ ሕዝቢ ሂውከት ኤል ኡጉሳምኮ ባዓል ለለዕ አከዋዎይ"የዽሒን።

ኢንኪ ኑማ ኢየሱስ ሱቶህ ቱስኩተ

(ማር.14፣3-9፤ዮሐ.12፣1-8)

   6. ሀይከ ኢየሱስ ቢታኒያል ለምፃም ኪይይ ይነ ስምዖን ዲኪድ ይነ፡፡ 7. ኢየሱስ ማይዲል ድፈየህ ያነሃኒህ ኢንኪ ኑማ ሊሞ ጋዳህ አክ ክብር አንኪ ሱቶህ የመገ አልባስ ጥሮስ ሚልቃጥ ቲብዸህ ካያድ ካብተ፣ ሲታ አሞል አክ ሓደ፡፡ 8. ካተምሃሮ ታሃም ዩብሊኒህ ይቁጡዒኒህ ታህ የን፣"ታይ ሲታ ካንቶህ ተለየ" 9. ሱቶ ኡኮ ክብረ ለ ሊሞህ ትምብኄህ ማል ዲካታታህ አከ ዻዸ! 10. ኢየሱስ ለ ታሃም አካህ የኒም የዸገህ ታህ አክየ፣"ታይ ኑማ አይሚህ ተ አይጽጊምክ ታኒን? ኢሲ ዮያህ መዔ ጉዳይ አብተህ ታነ፤ 11. ዲካታት ኡማን ዋክተ ሲንሊህ ያኒን፣ አኑ ለ ኡማንጉል ሲንሊህ ታል ማገይማ፡፡ 12. ኢሲ ታይ ሱቶ ያሞል ሓዸም ዮያ ማዓጋህ ታይ ታሳናዳዎ ተህ ኪኒ። 13. ሓቀ ሲናክ አይክ አኒዮ፣ ዓለሚል ሙሉኡድ ታይ ወንጌል ኤል አምሲቢኪናን ቦታል ታይ ኢሲ አብተም አምዝክርክ አካህ  ዋንሲተሎን፡፡"    

ይሁዳ ኢየሱሰ ቲላሰህ ያሓዎ የምሰመመዔ

(ማር.14፣10-11፤ሉቃ.22፣3-6)

  14. ታማይ ዋክተ ለማምከ ታማን ሐዋርያቲያኮ ኢንከቶ የከ አስቆሮታዊ ይሁዳ ካህናት አሞይቲትል የደየህ፤ 15. ኢየሱስ ቲላሰህ ሲናህ አሓየጉል አይም ዮህ አሐየሊቲኒ? አክየ፡፡ ኢሲን ሦዶም ጥረ ቁረሲቲያ አካህ ዮሖውን፡፡ 16. ኡሱክ ታማይ ለለዕኮ ኤዸዽሰህ ኢየሱስ ቲላሰህ ያሓዎ ያምሰመመዔ ዋክተ ዋግያይ ዪነ።

                         ኢየሱስ አይሁድ ፋሲጊህ ዲራር ሐዋርያትሊህ በተም

 ማር.14፥12-21፤ሉቃ.22 ፥ 7-14፤14፥ 21-23፤የሐ.13፥ 21--30)

   17. ኢንገራ ባዓሊህ ኤዸዾይታ ለለዕ ተምሃሮ ኢየሱሱድ ካብየኒህ ፋስጊ ዲራር አለ ኮህ ናይሳናዳዎ ጉርታ? የኒህ ካኤሠረን፡፡ 18. ኡሱክ ለ"ካታማል ማራ ኦህቲ ዲክድ አዱዋይ መምሂር ይዋክቲ ካብየህ ያነጉል ኢኒ ተምሃሮሊህ ፋስጊ ዲራር በታም ኩድኪድ ኪኒ የዽሔ አከያ አክየ፡፡ 19. ካተምሃሮ ኢየሱስ ተን ይኢዚዘም ባሊህ አበን፣ ፋስጊ ዲራር ዮይሶኖዶዊን፤ 20. ዲተ ሳይተ ዋክተ ኢየሱስ ላማምከ ታማንሊህ ዲራራል ዲፈ፡፡ 21. በታንሃኒህ ኢየሱስ"ሓቀህ ሲናክ አይክ አኒዮ፣ ሲንኮ ኢንከቲ ዮያ ቲላስህ አሓየ ለ"አክየ። 22. ታይ ጉዳህ ጋዳህ የኅዝኒኒህ፣ ሲነሲነህ"ዮያ ኖዋ?"አይክ ካኤሠሮና ኤዸዺሰን፡፡ 23. ኢየሱስ ታህ የህ ኤልደየ፣ ዮያ ቲላሰህ ያሓየቲ ዮያሊህ ጻሕሊ አዳድ ያጽብሔቲያ ኪኒ፤ 24. ሒያውቲ ባዺ አካህ ትምጽሒፈሚህ መሠረቲህ ራበለ፣ ያከካህ ሒያውቲ ባዻ ቲላሰህ ያሓየ ሒያውቲ ኢሰህ ኢየ ዋዎይ! ታማይ ሒያውቲ አቡከካ ራዓም አካህ አይሰዻዸ፡፡ 25. ቲላሰህ ያሓዎ ኪን ይሁዳ ለ መምሂሮ! ዮያ ያከ? አክ የዽሔ፡፡ ኢየሱስለ አቱ ታምባሊህ ኪኒ አክየ፡፡

ቅዱስ ቁርባን ሠርዓት (ማዳሪ ድራር)

(ማር.14፣22-26፤ሉቃ.22፣15-20፤1ቆር.11፣23-25)

    26. (ድራር) በታህ ኢየሱስ ኅብስቲ ይይኩዔህ ምሰጋናት ጻሎት አበ፣  የበረከህ የቁሩሰህ ኢሲ ተምሃሮክ"ሂና በታ ታሃም ይሐዶይታ ኪኒ"የህ አካህ ዮኆወ፡፡ 27. ጽዋዕ ይይኩዔህ ሞሳ ጻሎት አበሚህ ላካል ታህ የህ አካህ ዮሖወ፣ ኡምቢክ ታይ ጹዋዕኮ ኡዑባ፣ 28. ታሃም ማንጎ ማሪህ ኃጢአት ራዖ ሓዽታ ዑሱብ ቃል ኪዳኒህ ይቢሎ ኪኒ፡፡ 29. ኢናባህ ማንግሥቲል ዑሱብ ወይኒ ጺማቂ ፊረ ሲንሊህ አዑበ ለለዕ ማዳም ፋናህ ታሃምኮ ላካል ታይ ወይኒ ፍረህ ጺማቂኮ ማላሚህ ማዑበ ሲናክ አይክ አኒዮ፣ 30. ታሃምኮ ላካል መዝሙር ይዚሚሪኒህ ደብረ ዘይቲ ኢምባ የውዒን።         

ኢየሱስ ጰጥሮስ ካ አክሕደለም ዮኮመህ ዋንሲተ

(ማር.14፣27-31፤ሉቃ.22፣31-34፤ዮሐ.13፣36-38)

   31. ታማይ ዋክተ ኢየሱሰ ኢሲ ተምሃሮክ ታህ አክየ፣"ሎይና ሳባዔህ አግዲፈ ሊዮ፣ ዒዶ ዱየ አምብቲነ ለ፣ የህ ይምጽሕፈህ ያነጉል ታይ ባር ኡምቢክ ለ ያክኅደሊቲን፡፡ 32. ያከካህ ራባኮ ኡጉተምኮ ላካል ገሊላል ሲናክ ኦኮመህ"አድየ ሊዮ። 33. ታማይ ዋክተ ጰጥሮስ አክማሪ ኡምቢህ ኡካ ኩ'ይክሕደሚህ አኑ ፋዽም ተከሚህ ኩ'አክሕደ ማሊዮ የህ ዋንሲተ፡፡ 34. ኢየሱስ ለ ሓቀህ ኮካይክ አኒዮ፣ ካፋ ታይ ባር ዶርሆይቲ ወዳሚ ባሶል፣ አቱ አዶሓጉል ያክሒደ ሊቶ አክየ፡፡ 35. ጰጥሮስ ለ ራቢ ኡካ ጉርሱሳህ የከምኮ ኮሊህ ራበሊዮካህ ተከሚህ ኩማአክሕደ"አክየ፡፡ ራዕተ ካተምሃሮ  ኡምቢህ ታማህ አይይ ይኒን፡፡

ኢየሱስ  ጌቴሰማኒል ጻሎት አበ

(ማር.14፤32-42፤ሉቃ.22፡39-46)

  36. ታሃምኮ ላካል ኢየሱስ ተምሃሮሊህ ጌቴሰማኒ አክያን ሲፍራህ የደ፣ ታማርከ ማደንጉል፣ ኢየሱስ ኢሲ ተምሃሮክ፣ አኑ ቶል ኤደህ ጻሎት አባምፋናህ፣ አቲን ታል ሱጋ"አክየ፡፡ 37. ኢሰሊህ ጰጥሮስከ ዘብዴዎስ ዻይሎ ይብዸህ የደ፣ ያኅዝንንምከ ያምጽንቂ ኒም ኤዸዽሰ፡፡ 38. ታህ ለ አክየ፣"ራባ ማዳም ፋናህ ኢኅዚነህ አኒዮ፣ አቲን ታል ሱጋ፣ ዮሊህ ኢንቂኃ፡፡ 39. ተንኮ ዳጉሁም ሚርሓ የህ የደህ ዳምባራህ ባዾል ጋምመህ ታህ የህ ጻሎት አበ፣ ኦ'ያባ! ዽዒምታም የከምኮ ታይ መከራ ጽዋዕ ዮኮ ቶህ ቲላስ፣ ያከካህ ኩፍቃድ ባሊህ ያኮይ ኢካህ ይፍቃድ ባሊህ አከዋዎይ።

  40. ታሃምኮ ላካል አዶሓ ኢሲ ተምሃርቲህ ኡላል ጋሔ የመተ ዋክተ ዺነኒህ ተንገ፣ አማይጉል ጰጥሮሱክ ታህ አክየ፣"ዮሊህ ኢንኪ ሳዓት ኡካ ታንቃሖና ማዺዒንቲኒ?41.ፋታናድ ሳይታናክ ኢትጊሃይ ጻሎት አባ፣ ሒያውቲ መንፈስ ኡማንጉል ዮምሶኖዶወቲያ ኪኒ፣ ኃዶይታ ለ ሩኩቲያ  ኪኒ፡፡" 

   42. ጋባዔህ  ኢየሱስ ማላሚ ዋክተ ሚሪሓ የህ የደየህ ኦ'ያባ!ታይ መከራ ጽዋዕ አዑበካህ ቲላዎ ማዽዕማህ የከምኮ ኩፍቃድባሊህ ያኮይ፣ የህ ጻሎት አበ፡፡ 43. ለል ለ ኢሲ ተምሃሮል ጋኄህ የመተ ዋክተ ዑንዱጉል አክሱበህ ዽነኒህ ተንገየ፡፡ 44. ጋባዔህ ለል ተን ሓበህ የደህ ታማይ ባሶ ቃል ዋንሲታክ ማዳሒ ዋክተ ጻሎት አበ፡፡ 45. ታሃምኮ ላካል ኢሲ ተምሃሮል ጋኄህ የመተህ ታህ አክየ፣"ካዶሊህ ገናህ ዺንተኒህ ታኒኒ?"ካዶሊህ ዔረፍት አባክ ታኒኒ? ሀይከ ሳዓት ማደ፣ ሒያውቲ ባዽ ኃጢአተይናታት ጋባህ ቲላየህ አምሓወ ለ፤ 46. ኡጉታ ናዳዎይ፣ ሀይከ ቲላሰህ ይያሓየቲ ካብየ፡፡" 

ኢየሱስ ናዓበቶሊቲህ ይምዽብዸ

(ማር.14፣43-50፤ሉቃ.22፡47-53፤ ዮሐ.18፣3-12)

  47. ኢየሱስ ገና ዋንሲታይ ያነሃኒህ ሀይከ ላማምከ ታማንኮ ኢንከቶ ኪይይ ይነ ይሁዳ የመተ፣ ካሊህ ሰይፍከ ኢሎል ቲብዸ ማንጎ ሒያው ተመተ፣ ኢሲን ካህናት አሞይቲትከ ሕዝቢ ስማግለታትኮ ፋሪምተም ኪይይ ይኒን፡፡ 48. ኢየሱስ አስሑዋህ ያሓየ ይሁዳ ሒያዋክ ጉርታንቲ ኡኑ ፉጉታቲያ ኪንክ ካያ ኢብዻ የህ ተማ አካህ ዮሖወህ ይነ፡፡                 49. ይሁዳ አማይጉልካህ ሪጋ የህ የመተህ ኢየሱሱድ ካብየህ"ኦ'መምሂሮ! ሳላም ኮያህ ያኮይ"የህ ፉጉተ፡፡ 50. ኢየሱስ ለ"ይካሓንቶሊ! አማይጉል አካህ ተመተ ጉዳይ ኢፊጺም" አክየ፣ ታሃምኮ ላካል ሒያው ኢየሱሱድ ካብ የኒህ ይብዽን። 51. ታማይ ዋክተ ኢየሱስሊህ ቲነ ሒያውኮ ኢንከቲ ሰይፍ ይምዚዘህ ሊቃ ካናት አገልጋሊ ሳባዔህ አይቲ አክ ይግሪዔ፡፡ 52. ኢየሱስ ለ ታህ አክየ፣"ሰይፍ ናው ኢሳም ሰይፊህ ያለይኒክ ኢሲ ሰይፍ ቦታድ ደሄይ ሰይፍ ዓርድ ሳይስ፡፡ 53. ኦባየ ኢቦል አኑ ኢኒ አባ ዻዒማዶ ኡሱክ ማንጎ አስያሓታህ ሎይምታ ማላይካ ሠራዊት ዮህ ፋሮ ማዽዓም ተከለ? 54. ታሃም ታ'ከዶማ መከራ ጋረይቶ ኮልታነ ያዽሔ ማጽሐፍ ቁዱስ ቃል አይናህ የህ ያምፍጽመ?"55. ታማይ ሳዓት ኢየሱስ ሕዝበክ ታህ አክየ፣ ወንበደ ታብዽኒባሊህ፣ ዮያ ታባዾና ሰይፊከ ኢሎል ቲብዽኒህ ተመቲኒ? ኡማን ለለዕ በተ መቅደስድ አይምሂሪክ ሲንሊህ አነሃኒህ ይታባዾና ዺዓክ ማናይቲንሆ፡፡ 56. ያከካህ ታሃም ኡምብሂያ ተከም ነብያታህ ትምጽሕፈም ታምፋጻሞ ዒሎህ ኪኒ፡፡ ታማይ ዋክተ ካተምሃሮ ኡምቢህ ሓበኒህ ኩደን፡፡

ኢየሱስ ፍርድ ሰንጎል ካብየ

(ማር.14፣53-65፤ሉቃ.22፣54-55፤63-71፤ዮሐ.18፣13-14፣19-24)

  57. ታሃምኮ ላከል ኢየሱስ ቲቢዸ ሒያው ሊቃ ካህናት ቀያፋ ዻጋህ በን፣ ታማል ሕጊ መምሂራንከ ስማጊለታት የከሄሊኒህ ይኒን፡፡ 58. ጰጥሮስ ለ አይከ ሊቀ ካህናት ጊበ ፋናህ ኢየሱስ ዸዽ ኢርከኮ ይክቲለ፣ አዳህ ሳየህ ጉዳይ ባክቶ ያብሎ አኪ ማራሊህ ዲፈ፡፡ 59. ካህናት አሞቲትከ ሰንጎት አባለት ኡምቢህ ኢየሱስ አሞል ራቢ ፍርደ ኤልያፍራዶና ዲራብቲ መስካሮ ዋጊያይ ይኒን፡፡ 60. ኢንኪጉል ኡካ ማንጎ ዲራብቲ መስካሮ ካብ ኢሰኒሚህ፣ ራባህ ኤልያፊሪደ ማስኪር ማገኖን፣ ባክቶል ላማ ማስኪር ካብየኒህ፡፡ 61."ታይ ሒያውቲ መዔፉጊህ በተ መቅደስ ዓረ፣ ዒደህ ማዳሒ ለለዒል ሢራሖ ዺዓ የዽሔ"የኒህ ዋንሲተን፡፡ 

   62 .ካህናት አሞይቲ ኡጉተህ"ታይ ሒያው ሙሉኡክ ኮል አምስክሪክ ታነሚህ ኢንኪ መልስ ማታሓየ?"የህ ካኤሠረ፡፡ 63. ኢየሱስ ለ ቲባ አክየ፡፡ ካህናት አሞባዕሊ፣ ገባዔህ ኢየሱሱክ ያነ መዔፉጊህ ሚጋዓህ ኩብዸህ አኒዮ! መዔፉጊህ ባዻ መሲሕ ኮያ ኪቶም ኖከይ አክየ፡፡ 64. ኢየሱስ ለ ታህ የህ ኤልይምሊሰ፣ አቱ  ተምባል ኪኒ፣ ያከ ኢካህ ታሃምኮ ላካል ሒያውቲ ባዺ ኢሲ ኃይላህ ፉጊ ሚድጋል ዲፈሄ ታብሎና ኪቲን፡፡ ታማም ባሊህ ዓራንቲ ዳሩርታል የከህ አሚቲህ አብለሊቲን።"65. ታይ ዋክተ ካህናት አሞይቲ ቁጡዓህ ኢሲ ሣራ ዓንዽሰህ ታህ የ፣ ሀይከ መዔፉጊህ አሞል ዋቶ ቃል ዋንሲተ፣ አቲን ዋቶ ቶቢን፣ ታሃምኮ ሣራህ አይሚህ ማስኪር ጉርሱሳ? 66. ኢስቲ አይሚህ ሲናድ ኢግዳ?"ኢሲን ራቢ አካህ ኤዳ! የኒህ ይምሊሲን፡፡ 67. ታማይጉል ቱፈና ተፉ ኤልየን፣ ዻባን አክ ዮቶኪን፣ ዻባን አክ አቱክክ፣ 68."መሲሖ! ኢያይቶ ኪኒ ኩሳባዔቲይ ኢስኪ ኢዺገ"አካይ የን። 

ጰጥሮስ ኢየሱስ ይክሒደ

(ማር.14፥66-72፤  ሉቃ.22፣56-62፤ዮሐ.18፣15-18፣25-27)

   69. ጰጥሮስ ዲኮ ኢሮል ካህናት አሞይቲህ ጊቢህ አዳድ ዲፈህ ይነ፣ ታማይ ዋክተ ኢንኪ"ገረድ ካብተህ"አቱኮ ገሊላት ኢየሱስሊህ ቲነ"አክተ፡፡ 70. ኡሱክ ለ አቱ"ታዽኄም ማዽገ!"የህ ኡማንቲህ ነፊል ይክሒደ፤ 71. ያውዖ የህ ኢፈይል የደኩል ኢንኪ አኪ ገረድ ካ ቱብለህ ታማል ቲነ ሒያውክ"ታይ ሒያውቲ ናዝሬት ኢየሱስሊህ ይነ"ተዸኄ፡፡ 72. ጰጥሮስ ለ"ታይ አቱ ታዽሔ ሒያውቶ ማዽገ"የህ ዺዋህ ጋባዔህ ይክሒደ፡፡ 73. ዳጎ ጊዘኮ ላካል ታማል ሶልተህ ቲነ ሒያው ጰጥሮሱድ ከባ የኒህ አቱ ለ ኢሲ ዋኒኮ ታይሲዽገ ዓዲህ አቱ ካወገንኮ ኪቶ አክ የን፡፡ 74. ታማይ ዋክተ ጰጥሮስ"አኑ ታይ ሒያውቶ ማዺገ አይክ ኢሰህ አባሪማናምከ ዺዊታናም ኤዸዺሰ። ጉልከጉሉህ ዶርሆይቲ ወደ። 

  75. ጰጥሮስ"ዶርሆይቲ ወዳምኮ ባሶል አዶሓጉል ያክሒደሊቶ ያን ኢየሱስ ቃል ቲዛ አካህ የ፡፡ ኢሮል የወዔህ ኢይምሪሪሰ ወዔ፡፡ 

ማዕራፋ 27

ኢየሱስ ጲላጦስ ነፊል ፍርደህ ካብየ

(ማር.15፣1፤ ሉቃ.23፣ 1-3፤ዮሐ.18፣28-32)

    1. ዻሒነ ማሓል ካህናት አሞይቲትከ ሒዝቢ ሲማጊለታት ኡምቢህ ኢየሱስ አሞል ራቢ ፊርደ ኤልያፋራዶና የመከሪን፡፡ 2. ታሃምኮ ላካል ኢየሱስ ይዹውኒህ በየኒህ ረዳንቶ /ገዛኢ/ ኪን ጵላጦሱህ ትላሰኒህ ዮሖይን፡፡ 3. ኢየሱስ ቲላሰህ ዮኆወ ይሁዳ፣ ኢየሱሱል ይምፍርደም ዩብለጉል የነሰሔ፣ ሦዶም ጥረ ቁርስቲያ ካህናት አሞይቲቲከ ስማጊለህ ታህ የህ ደሄየህ አካህ ዮሖወ። 4. ንጹሕ ኪን ሒያውቶ ራባህ ቲላሰህ ኦሖወርከህ ኢብድለህ አኒዮ፣ ኢሲን ለ አይም ኤድኒሃይተ! ኩገዳይ ኪኒ! አክየን፡፡ 5. ኡሱክ ለ ሦዶም ጥረ ማል ኢያ፣ በተ መቅደስ አዳል ይብትነህ ሓበህ የውዔህ፣ የደህ ይምሕኒቀህ ራበ፡፡ 6. ካህናት አሞይቲት ሦዶም ጥረ ቁርሲያ ናው ኢሰኒህ፣"ታይ ማል ቢሊ ሊሞ ኪንጉል በተ መቅደስ ማባእሊህ ናስጋሎ ሚያምፍቂደ"የን። 7. አማይጉል የመከርኒምኮ ላካል፣ ገዻህ ማዓጊ ቦታህ ያኮ ካላኑዋይ ሢራሓቲህ ባዾ አካህ ዻመን፡፡ 8. ታይ ምክንያታል ታማይ"ባዾ ካፋ ፋናህ ቢሊ ባዾ"አይክ ደዕምምታ። 9. ታይ ዓይዳህ እሥራኤል ዻይሎ ትግሚተም ካሊሞህ ያከ ሦዶም ጥረ ቁርፍቲያ በየን፡፡ 10. ማዳሪ ይኢዚዘም ባሊህ ካላኑዋይ ሠራሓቲህ ባዾህ ይክፍለ የህ ነብይ ኤርምያስ ዋንስተ ትንቢት ይምፍጽመ፡፡ 

                                            ጲላጦስ ኢየሱስ ይምርምረ

              (ማር.15 ፥ 2-5፤ሉቃ.2 ፥ 3-5፤ዮሐ.18፥33-38)

   11. ታማይ ዋክተ ኢየሱስ ረዳንቶ ኪን ጲላጦስ ነፊል ካብየ፣ አማሓዳሪ  ለ"አቱ አይሁድ ንኑሥ ኪቶ?"አክየህ ካኤሠረ፡፡ ኢየሱስ ለ አቱ ታምባሊህ ኪዮ የህ ኤልደሄየ፡፡ 12. ያከካህ ካህናት አሞይቲትከ ስማጊለ ኩ አውንግሊህ ኢንኪ መልስ ኤል ማሓይኒቶ፡፡                    13. ታሃምኮ ላካል ጲላጦስ"አይዾለ ጉዳህ ኩ'አክስሲህ ማታበ?"አክየ፡፡ 14. ኢየሱስ ለ አማሓዳሪ ያምድንቀም ፋናህ ኢንኪ ቃል ኡካ ኤልማደሄና።                                     

       ኢየሱሱል ራቢ ፍርደ ኤልይፍርድን

(ማር.15፣6-15፤ሉቃ.23፣13-25፤ዮሐ.18፣39-40፤19፣1-16)

  15. ሮማት አማሓዳሪ ኡማን ኢግዳ አይሁድ ፋስጊ ባዓሊህ ዋክተ አካህ ያምናሓዎ ሕዝቢ ኤሠረ ኢንኪ ይምዹውቲያ ያንሑውኒህ ዽዽያናም ተን የስገለህ ይነ፡፡ 16. ታማይ ዋክተህ" በርባን"አክያን ኢሲ ዓማፀህ ይምዽገ ኡሱር ልይይ ይኒን፡፡ 17. ሕዝቢ የከኄለ ዋክተ ጲላጦስ"አይቲ ሲናህ ያመናሓዎ ጉርታና? በርባና ወይ መሲሕ አክያን ኢየሱስ?"የህ ተን ኤሠረ። 18. ታሃም አካህ የ ምክንያት ለ ኢየሱስ አይሲኖህ ቲላሰኒህ ዮሖውኒም አዽጊይ ይነጉል ኪኒ። 

  19. ጲላጦስ ፊርዲ ወነበሪክ ዲፈየህ ያነሃኒህ ካኑማ ካዳዓባል ካባሪ ባር ሶኖህ ማንጎም አምሠቀየህ አኒዮክ ታማይ ኑጹሕ ኪን ሒያውቲህ አሞል ኢንኪ ጉዳይ አብታ ተህ ኤድፋሪምተ፡፡

  20. ታማይ ዋክተ ካህናት አሞይቲሕከ ሲማጊለ"በርባን ያምናሓዎይ! ኢየሱስ ራቦይ!" የኒህ ኤሠሮና ሒዝበ ኢንከቶ አበን፡፡ 21. አማሓዳሪ"ላማይኮ አይቲያ ሲናህ አንሓዎ ጉረታና"አክየህ ሕዝበ ማላሚህ ኤሠረ፡፡ ኢሲን"በርባን ኖህ ታንሓዎ ጉርና"የኒህ ይምልሲን፡፡ 22. ጲላጦስ ይቦል መሲሕ አክያን ኢየሱስ አይናህ ካይሶ አክየ፡፡ ኡምቢህ "ያምሳቀሎይ!"የኒህ ይምልሲን። 23. ረዳንቲ"ኡሱክ አበ በደል አይም ኪኒ?"አክየ። ኢሲን ለ ያምሳቃሎይ አይክ የይመመንጊኒህ ዋዕ የን፡፡ 24. አማይጉል ጲላጦስ ታይ ጉዳይ ኅውከት አድኡጉሳም ኢካህ፣ አኪሚህ ኢንኪም ሞሳም ዩብለጉል፣ ላየ ባህሲሰህ፣"አኑ ታይ ሒያውቲህ ራባህ ኃላፊ ማኪዮ፣ አቲን ጉርተኒምባሊህ አቢታ"የህ ሕዝቢ ነፊል ጋባ ዓካለ፡፡ 25. ሕዝቢ ሙሉኡክ"ካራቢህ ምክናያታል ያምተ ቅጽዓት ኖከ ኒዻይሎህ አሞል ያኮይ"የን፡፡ 26. ታማይ ዋክተ ጲላጦስ በርባን ይንሑወህ አካህ ዽዽየ፣ ኢየሱስ ለ ሳብዕሲሰሚህ  ላከል ያምሳቃሎ ቲላሰህ ዮሖወ፡፡  

ወታሀደር ኢየሱሱል የለገጽን

(ማር.15፣16-20፤ዮሐ.19፣2-3)

   27. ታማይ ዋክተ ረዳንቲ ወታሃደር ረዳንቲ ጊበድ ካ በየን፣ ወተሃደራት ኡምቢህ ኢየሱስ ባሮሩል የከሄሊን፡፡ 28. ሣራ አክ ይግፍፊኒህ ዓሣ ቃሚስ ሀይሲሰን፡፡ 29. ከናንቲ አክሊል የጉነጉኒኒህ አሞክ አክ ዲፈሰን፣ ሚድጊ ጋበክ ዲጋ ካይዽብዽን፣ ነፊል አካህ አስግዲክ አይሁድ ኑጉሦ! ሳላም ኮያህ ያኮይ፣ አይክ ኤልአለገፂይ ይኒን፣ 30. ሲኒ ቱፋና ቱፍ ኤላይ ይኒን፣ ዲጋ ጋባኮ አክበኒህ ዸግኃከ ዸግኃ አክ ሳባዓይ ይኒን፡፡ 31. ኤል የለገፂኒሚህ ላካል ዓሳ ሣራ አክ የየዒኒህ ካሣራ ሀይሲሰን፣ ያስቃሎና በየን።

ኢየሱስ ይመስቅለ

(ማር.15፣21-32፤ሉቃ. 23፣25-43፤ዮሐ.19፣17-27)

   32. አማሓዳሪ ጊበኮ አውዒይ ያንንሃኒህ ስምዖን አክያን ቀረና ሒያውቶ ገየኒህ ኢየሱስ ማሰቃል ያካዖ ካ የስግድዲን፡፡ 33. ታማምኮ ሣራህ ቀራኒዮ ወይ አሞ ሓምሓም /ራስ ቅል/አይክ ደዕምምታ ቦታል ጎልጎልታ ማደን፡፡ 34. ታማል ሓሞትሊህ የይደበላቅኒህ ያኒን ወይኒ መስ ያዓቦ ኢየሱሱህ ካብ ኢሰን፣ ኡሱከ ለ ዻዓ'ማ አኪሰህ ያዓቦ ማጉሪና፡፡ 35. ኢየሱስ ታካረኒምኮ ላካል ካሣራል ዒደት ኤል ዒደኒህ ሓድሊተን፡፡ 36. ታማል ደፈኒህ ዻዉዻይ ይኒን፡፡ 37. ካገበን ታይቡሉወሚህ"ታይቲ አይሁድ ኑጉሥ ኢየሱስ ኪኒ"ያን ጹሑፍ ኢየሱስ ዸግኃክ አሞክ ካማስቃላክ ዲፈሰን፡፡ 38. ታማይ ዋክተ ላማ ወምበደ ኢንከቲ ሚድጋክ፣ ኢንከቲ ጉራክ ኢየሱስሊህ ታካሪመን፡፡ 39.ካባሮኮ ቲላይ ቲነ ሒያው አሞ አንቅንቂክ፣ 40. ኡቱ በተ መቅደስ ዒደህ ማዳሒ ለለዕል ሢራሓቲያ፣ ኢስኪ ኢሲ ዸግኃ ኢይድኂን! መዔፉጊህ ባዻ ተከምኮ ኢቦል ማስቃልኮ ኦብ! የኒህ ኤል አይለገፂይ ይኒን፡፡

   41. ታይ ዓይነቲህ ካህናት አሞባዒልከ ሙሴ ሕጊ ሙሁራንከ ሲማግለታት የኪኒህ ታህ አይክ ኤል አይለገፂይ ይኒን፡፡ 42."አክማራ ያይድኂነ፣ ኢሲ ዸግኃ ለ ያይዳኃኖ ማዽዓ፣ ኡሱክ እሥራኤል ኑጉሥ የከምኮ ካዶ ማስቃልኮ ኦቦይ፣ ናኑ አልናማኖይ፡፡ 43. ኡሱክ መዔፉጎህ ይምኢሚነ፣ ፉጊ ባዻ ኪዮ የ፣ አማይጉል መዔፉጊ ካ ኪኅናህ የከምኮ ኢስኪ ካዶ ካያዳኃኖይ!"44. ታማም ባሊህ ካሊህ ትምስቅለህ ቲነ ወምበደታት አካህ ዋቲማይ ይኒን፡

 ኢየሱስ ራበ

(ማር.15፣33-41፤ሉቃ.23፣44-49፤ ዮሐ.19፣28-30)

   45. ሊሓ ሳዓትኮ ኤዸዺሰህ አይከ ሳጋላ ሳዓት ፋናህ ባዾል ሙሉኡድ ዲተ ተከ፡፡ 46. ሳጋላ ሳዓት የከጉል ኢየሱስ"ኤሎሄ! ኤሎሄ! ላማ ሰበቅታኒ!"አይክ ናባ ኢዻሓህ ዋዕ የ፣ ቱርጉም"ይአምላኮ! ይአምላኮ! አይሚህ ይሓብተ!"ያናም ኪኒ፡፡ 47. ታማል ሶኦልተህ ቲነ ሒያውኮ ጋርጋሪ ታይቲ ኤልያስ ደዓይ ያነ የዽሒን፡፡ 48. ታማይ ዋክተ ተንኮ ኢንከቲ ስፖጅ ባሄህ ሚጺጻማህ የመገህ፣ ድጊ ኤዽዻክ ሃየህ ኢየሱስ ያፋዖ የህ ካብ አካህ ኢሰ፡፡ 49. አክማሪ ኢስኪ ኤልያስ የመተህ ካ ያይድኂነም የከምኮ ናብሎይ! የን፡፡ 50. ኢየሱስ  ናባ አንዻሓህ ዋዓ የህ ራበ፡፡ 

   51. ታማይ ዋክተ በተ መቅደስ ማጋረይዛ አጋናኮ ጉባል ዓንዽዸህ ላማል ሓድመተ፡፡ ባዾ ተምነቀነቀ፥ ኮክሕት ዓንዽዸ፡፡ 52. ማዖግ ፋክተ፣ ራብተህ ቲነምኮ ማንጎ ቅዱሳን ኪን ሒያው ራባኮ ኡጉተ፡፡ 53. ማዓጋኮ ተውዔም ኢየሱስ ራባኮ ተን ኡጉሠሚህ ላካል ቅድስት ካታማል ኢየሩሳለምል ሳየን፣ ታማል ማንጎ ሒያዋህ ይምቡሉዊን፡፡

   54. ቦልቲ አሞባዕላከ ካሊህ ኢየሱስ ዻዉዻይቲነም ባዾ ኪርድዲሞከ አኪ ጉዳይ ዩብሊን ዋክተ ጋዳህ ማይሲተን፡፡ 55. ዸዽል ተከህ ታይደለለዕ ማንጎ አጋባ ለ ታማል ይኒን፣ ኢሲን ገሊላኮ ኤዸዺሰኒህ ኢየሱስ አስግልግልክ አክቲሊክ ቲነም ኪኖን፡፡ 56. ፋናድ መግደላዊት ማርያም፣ ያዕቆብከ ዮሴፍ ኢና ማርያም፣ ዘብዴዎስ ዻይሎህ ኢና ኤድ ገይማይ ይኒን።

     ኢየሱስ ይሙዑገ

(ማር.!5፡42-47፤ሉቃ.23፤50-56፤ዮሐ.19፡38-42)

   57. ዲተ ሳይተጉል አርማቲያስ ባዾህ ሒያውቲ ዮሴፍ አክያን ሀብታም ኪን ሒያውቲ ታማል የመተ፣ ኡሱክ ለ ኢየሱስ ተምሃራይ ኪይይ ይነ፣ 58. ሒያውቲ ጲላጦሱድ የደሄየህ ኢየሱሰ ረሳ ዻዒመ፣ ጲላጦስ ለ ረሳ አካህ ታምሓዎ ይኢዚዘ። 59. አማይጉል ዮሴፍ ረሳ ይብዺየህ ጺሪይ ሣረናህ ይክኒደ። 60. ኮክሔኮ ኦሪመህ ዮምሶኖዶወ ኢሲ ዑሱብ ዱኮህ አዳድ ዮዖገ፣ ታሃምኮ ላካል ናባ ዻ ዮይቦኮኮለህ ዱኮ መልጊብ አሊፈህ የደየ።  61.መግደላዊት ማርያምከ አኪ ማርያም ታማል ማዓጋክ ነፍ ነፊል ዲፈኒህ ዪኒን፡፡

  62. ኢብዻሒነ ዒንዻ ሳምባታህ ካህናት አሞይቲትከ ፈሪሳውያን ኢንኮህ ጲላጦሱክ የደይኒህ ታህ አክየን፡፡ 63. ኒማዳራ! ቶይ ማስሑት ገና ኢሲ ሕይወቲህ ያነሃኒህ ማዳሕ  ለለዕኮ ላካል ራባኮ ኡጉተ ሊዮ የድኄም ቲዛ ኖህተ፡፡ 64. አማይጉል ካተምሃሮ የደይኒህ ጋርዒተኒህ ሕዝበክ ሀይከ ራባኮ ኡጉተ ያናምኮ ማዓጊ አዶሓ ለለዕ ፋናህ ዻውዹሞ ኢኢዚዝ፣ አማም አከዋይተምኮ ባክቶ ገጋ ባሶት ጋጋኮ ጋዳህ ጊድድቲያ አከለ፡፡ 65. ጲላጦስ ሀይከ ዻዉዻም ሲናህ ታነ፣ አዱዋይ ጉርተን ዓይነቲህ ዻዹታ አክየ፡፡ 66. አማይጉል የደይኒህ ማዓጊ መልግብ ዻ ማኅተሚህ ይእስግኒህ ማዓጋ ወተሃደሪህ ዻዉዸን፡፡                  

ማዕራፋ 28

ኢየሱስ ራባኮ ኡጉተ

(ማር.16፣1-10፤ሉቃ.24፣1-12፤ዮሐ.20፣1-10)

   1. ሳንባት ትላየምኮ ላካል ሳንባት ዻሒነ ማሓል መግደላዊት ማሪያምከ ማላሚም ማሪያም ማዓጋ ያብሎና የደይን፡፡ 2. ሀይከ ድንገቲህ ናባ ባዾ ኪርዲዲሞ ተከ፣ መዔፉጊህ መልአክ  ዓራንኮ ኦበህ ማዓጊ አካህ አልፍመህ ይነ ዻ ዮይቦኮኮለህ አሞክ አክዲቲፈ።          3. መልአክ  ነፍ ሓንካዻ በሊህ ኢፎሳይ ይነ፣ ሣሪ ባራድ ባሊህ ዓዶቲያ ኪይይ ይነ፡፡ 4. ዻዉዻም  መልአክ ማይስኮ ኡጉተሚህ አዻዾህ ባድን ባሊህ የኪን፤ 5. ማላይካ ለ ሳዮክ ታህ አክየ፣ አቲን  ማማይስቲና ታካሪመ ኢየሱስ ጉርታናም አዽገ፡፡ 6 ኡሱክ ራባኮ ኡጉቶ ኪዮ የህ ይነምባሊህ ኡጉተ፣ ታል ሚያነ፣ ኤድ ዺነህ ይነ ቦታ አማ ኡበላ፡ 7. አማይጉል ጋባላዓይ አዱዋይ ካተምሃሮክ ራባኮ ኡጉተ፣ ሀይከ ገሊላል ዮኮመህ አድየ ለ፣ ታማል ካገልቲን  አከያ፣ ሀይከ ሲናክ አከህ አኒዮ፡፡"

   8. ታሃምኮ ላካል ሳዮ ማሲከ ናባ ኒያታህ ማዓጋኮ ጋባ ላዔኒህ የደይን፣ ካተምሃሮክ ዮና የርድን፡፡ 9. ኢየሱስ አራሓል ተንገህ"ሳላም ሲናህ ያኮይ"አክየ፣ ኢሲን ካያድ ካባ የኒህ ኢባቢህ ይብዽኒህ አካህ ይስግዲን። 10. ታማይ ዋክተ ኢየሱስ"ማማይሲቲና! አዱዋይኪ ገሊላል ዮክ ያካሞናክ ይሳዖሉክ ኤዸሓ፣ ይያብሊኒም ታማል ኪኒ"አክየ። 

   11. አጋቢ አድይ ያንንሃኒህ ወታሃደርኮ ጋሪጋሪ ካታማል የደይኒህ የከ ጉዳይ ኡምቢህ ካህናት አሞባዕሊክ የዽኅን፡፡ 12 .ካህናት አሞይቲት ሲማግለሊህ የከሄሊኒህ የመከርንምኮ ላካል  ወታሀደሪህ ማንጎ ማል ዮኆይኒህ ታህ አክየን፡፡ 13."ናኑ ዺነህ ናነሃኒህ ተምሃሮ ባር የመቲኒህ ጋርዒተን ኤዸሓይ ሒዝበከ ኤያ፡፡ 14. ታይ ጉዳይ አማሓዳሪ ዮበምኮ ናኑ ጉዳይ አይርድኤ ሊኖ ሲን አሞል ጸገም አምተዋካህ አበሊኖ፡፡"15. አማይጉል ወታሀደር ማል ገራየኒህ ሊኪዕ አክየኒም ባሊህ አበን፣ ታይ ጉዳይ ካፋ ፋናህ አይሁድ አዳድ ዋንሲታን፡፡

ኢየሱስ ተምሃሮህ ይምቡሉወ

(ማር.16፥14-18፤ሉቃ.24፥36-49፤ዮሐ.20፥19-23፤ሐዋ.1፣6-8፤1ቆሮ.15፡3-8)

   16. ኢንካንከ ታማን ታምሃርቲያ ኢየሱስ ኤልያዳዎና ተን ይይቡሉወ፣ ገሊላል ገይምታ ኢምባል የደይን፡፡ 17. ካዩብሊንጉል አካህ ይስግዲን፣ ጋሪጋሪ ለ የምጠረጠሪን። 18. ካብየህ ታህ አክየ፣"ሙሉእ ሢልጣን ዓራንከ ባዾል ዮህ ዮምሖወ፣"19. አማይጉል ዓለም ሕዝበል ሙሉኡድ አዱዋ፣ አባከ ባዻህ፣ መንፈስ ቅዱስ ሚጋዓህ አይጥምቂክ ይ ተምሃሮ ተን አባ፤ 20. ሲን ኢኢዚዘም ሙሉኡድ ያፋጻሞና ተን ኢምሂራ፣ ሀይኪዮ አኑ ዓለም ባክቶ ፋናህ ኡማንጉል ሲንሊህ አኒዮ፡፡