ማላሚ ቆሮንጦስ

 

ማላምት ሐዋሪያ ጳውሎስ መልእክት   

   ቆሮንጦስ ሒያውህ ኡላል   

     ሳይማ

    ጳውሎስ ቆሮንጦስ ሒያዋህ አካህ ይጽሕፈ ማላሚ መልእክት፤ ጳውሎስ ቆሮንጦሱል ይነ ዋክተ ሞሶ ዓረል ልይነ ካብካበል ጋደህ ጸገም ይነ ዋክተ ኪኒ፤ ውልውል ሞሶ ዓሪ አባላት ዕልስ ነቀፋታት ኤልዕደኒህ የከምህ ጳውሎስ ዕርቀ ያፍጣሮ ናባ ሳና ለም አይቡሉውክ፤ ታሃም ታከ ዋክተ ናባ ኒያት ኤድታማቦ ዽዕማም ያግሊጸ፡፡

  ካመልእክትኮ ኤድዶይታ ክፍልህ አሞል ጳውሎስ ቆሮንጦሱል ይነ ሞሶ ዓረሊህ ሊይ ይነ ርክክብ ያይራጋጋጾ ሞሶዓሪ አዳድ ናቃፋከ አምቃዋም ይትሪራየህ ይነ ዋክተ አይሚህ መልስ አካህ ዮሖወም ያይርዲኤ፤ ታሃምሊህ ይምዸበዸበህ ታይ ካተግሣጽ ንስሓከ ዕርቀድ ተን ያምሪሔም ክናም እዻህ ኤድ ዮሞበ ኒያት አካህ ያግልጸ፤ ይቅጽለህ ይሁዳል ታነ ክርስቲያን ጎሮኒሶ ሓቶ ያሓዎና ተን ያስሔሰሰበ፤ ባክቶት ምዓሪፍል ጳውሎስ እስ ሐዋርያህ  አሞል ኤልይቅርበ ክሰህ መከላከሊ ዮሖወ፤ አይሚህ ቆሮንጦሱል ሞሶ ዓሪ ውልውል ሒያው ስነ ሓቀ ለም አበኒህ  ሐዋርያት አባክ ጳውሎስ ድራብት ሐዋርያ ኪኒ ያናምሀ አይነኤስይ ይኒን፡፡

-------------------------------------------------------------------------------

     ማዕራፋ 1

   1. ፉጊ ፍቃዳህ ኢየሱስ ክርስቶሱህ ሐዋሪያ የከ ጳውሎስከ ኒሳዓል ጢሞቴዎስ፤ ቆሮንጦሱል ገይማ ፉጊ ሞሶዓረከ ታማም ባሊህ ሙሉእ አካይያል ገይማ ህዝበ ክርሰቲያን ኡምቢህ፣ 2. ናባ መዔፉጎህ፣ ኒማዳራ ኢየሱስ ክርስቶስህ ጸጋከ ሰላም ሲናህ ያኮይ፡፡

                                 ጳውሎስ መዔፉጎህ ይስቅርበ ምሰጋና

   3. መሕረት አባከ አምጻናናዕቲ ኡብህያህ አምላክ የከቲያከ ታማም ባሊህ ኒማደራ ኢየሱስ ክረስቶስህ አባ የከ አምላካህ፣ ምገሰና ታኮይ፡፡  4. ናኑ ፉጎኮ ገይና አምጻናናዓህ መከራት አሞል ታነም ኡምቢህ ናይጻናናዖ ዺዕኖ፣ ፉጊ ኖያህ ኒ መከራህ ዋክተ ኡማንጉል ኒያይፀነነዔ፡፡  5. ክርስቶስ መከራ ማንጋ ሓድልነሚህ  መጠንል፣ ታማም ባሊህ ክርስቶስ ባርካታል አምፅንናዕ ማንጎያ ገይና፡፡  6. ናኑ መከራ ጋራናጉል አቲን አምፃናናዕከ ድኅነት ገይታን፤ ናኑ ናምፀነነዔጉል ለ አቲን ናኑ ጋራይና መከራ ትዕግሥቲህ ጋራይታናህ ታምፀነነዒን፡፡ 7. ኒመከራ ታምከፈልንሚህ መጠንል ናምፀነናናዕ ለ ታምከፈልንም ናዽገም እዻህ ሲን አሞል ሊኖ ተስፋ ጽንዕት ኪኒ፡፡  8. ይሳዖሎ! እስያ ክፍልህ ሀገርል ኒነ ዋክተ ኒ ማደ መከራ ታዻጎና ጉርና፣ ታይ ኒ ማደ መከራ ናይካዖ ዽዕናምኮ አጋናል ኪይ ይነጉል ሂወቲህ ማርኖ ልይክ ኒነ ታስፋ ኡካ ተምቆሮጸህ ቲነ፡፡ 9. ኤረ ራቢ ኖል ይመፍርደም ባሊህ ኖድ ዮሞበህ ይነ፡፡ ታሃም ኡምቢህ ኒ ማደም ኒትምክሕቲ ራቦንቲት ኡጉታም  ፉጎህ ኪኒካህ ኒኃይላህ ማኪም ናዻጎ ኪኒ፡፡ 10. አማይጉል ኡሱክ ራባ ማድሳ ድንገትኮ ኒይድኂነ፤ ኒይድኅነም ለ፣ ለል ኒ ያይዳኃኖ ኒታስፋ ካያድ ኪኒ፡፡ 11. አቲን ለ ኖያ ጻሎቱህ ኒጎሮኒሶና ኤዳ፤ አይሚህ ማንጎ ጻሎቱህ ናኑ ፉጊ ጎሮን ገይናጉል፣ ማንጎ ሒያው ኒምክንያታል መዔፉጎ ያምስግኒን፡፡

         ጳውሎስ አራሕ ዕቅድ

    12 .አካህ ናምክሔ ጉዳይ ታይቲያ ኪኒ፤ ታሃም ሓቀ ኪናም ኒኅሊና ታምስኪረ፣ አኪ ሒያውኮ ባዽሳህ ሲንሊህ ሊይክ ኒነ ቲቲህ ገይቶህ ፉጎኮ ገይነ ቅድስናከ ቅንዕናህ ኒምርሔህ ኪኒ፣ ታሃም ታከም መዔፉጊህ ጸጋህ ክይይ ይኒካህ ሒያው ጠበብህ ኪይይ ማና፡፡  13. ትይንብብኒህ ታስታውዓሎና ዽዕታን ጉዳይኮ በሕህ አኪም ኢንኪም ሲናህ ማናጽሕፈ፡፡ 14. ካዶ ኒዳዓባል ኒውስነም ተዸጊንምኮ ሣራህ ሙሉኡድ ታስታውዓሎና ታሰፋ አብታ፡፡ ታይ ምክንያታህ ማደሪ ኢየሱስ ለለዕ ናኑ ሲናህ ናምክሔም ባሊህ፣ አቲን ለ ኖያህ አምክሔ ሊቲን፡፡ 15. ታይ ጉዳይ ርገጽ ኪይክ ኢነም እዻህ ላማ ዋክተ ታምጣቃሞና ኤደሔህ ሲና ኤዾዸይታል ሲን ማዶ እዕቅደህ ኢነ፡፡ 16. ሲን ማዶ እሕሲበም መቄዶኒያኮ ትላህከ ታማርከኮ ጋሓ ዋክተ ኪይይ ይነ፣ ታይ አገባብራህ ይሁዳ ቱላል አባ አራሕ ዮህ ታምርድእን ኤህ ኢሕስበህ አነ፡፡ 17. ታሃሞም አዕቅደ ዋክተ አባሚህ ሶዸህ ያምጠረጠረቲያ ኤከም ታካሊን? ወይ ታሃም እዕቅደርከህ እንኪጉል "ዮዎከ ማለ" አይክ አምጠረጠርክ ሒያው አተሐሳብስባህ አባም ታካሊኒ? 18. መዔፉጊ ያምእምነቲያ ኪኒጉል ናኑ ለ ሲናክናም "ዮዎ ማለ" ያን ያይጠረጠረ ቃል ማኪ፡፡ 19. አይሚህ ዮከ ስላስ ጢሞቴዎስ ለ ፉጊ ባዽ ኢየሱስ ክርስቶስ ሲናህ ይስብከም ዮዎ ያዽሔ ቃላህ ዲቦህ ክኒካህ "ዮዎ ማለህ" ማኪ፣ ያዽሔ ያይጠረጣጠረ ቃላህ ክይይ ማና፡፡  20. ፉጊ ኖህ ዮሖወ ታስፋ ኡምቢህ "ዮዎ" ታከም ክርስቶሱህ ኪኒ፤ ታሃማህ ኪኒ፤ መዔፉጊህ ክብረህ ክርስቶሱህ "አመን" ናዽሔም፡፡ 21. ኖያ ያኮይ አቲን ክርስቶሱህ ናፅናዖ ናበቲ ፉጎ ኪኒ፣ ኒይቅድሰቲ ካያ ኪኒ፡፡ 22. ካይም ኪኖም አካህ ናይስዺገ ማኅተም ናሞል አበቲያከ ባሶድ ኖያህ ያምሓወ ሀብተ ናፍዓዶድ መንፈስ ቁዱስ ሓቢ አበህ ኖህ ዮሐወቲ ካያ ኪኒ፡፡ 23. አኑ ቆሮንጦስ ኡላል ጋሔህ አምተዋሚህ ምክንያታል አቲን አሕስበ ዋይተኒም ባሊህ፣ ሲናህ ናኅሩራክ አኒዮ፣ ታሃማህ ፉጊ ይማስኪር ኪኒ፡፡ 24 .አቲን ሲኒ እምነቲህ ትጽንዕኒህ ክትንጉል፣ አቲን ደስ ስናህ ዮዋ እንኮህ ሥራሔሊኖካ ስን እምነቲህ ስን ማናእዝዘ፡፡

 ማዕራፋ 2

   1. አማይጉል ሲና አስኅዚነምኮ ኢሕስበህ ሲኑላል ጋሔህ አምተዋናሚህ ቁርጸ ኪን ውሳነ አበህ አኒዮ፡፡ 2. አኑ ሲን ኢስኅዝነህ አከ፣ እስኪ አኑ ሲን እስኅዝነሚህ ኡካ ሲንኮ በሕህ አኪ ይኒያቲሳም ኢያ ኪኒ? 3. ታሃም ሲናል እጽሕፈም ሲኑላል አምተጉል ይኒያቲሶና አካህ ኤዳ ሒያው ይያስሕዝንንምኮ ኤህ ኪዮ፣ አይሚህ ይ ኒያት ኡማንኖይህ ኒያት ኪናም ታዽጊን  ኤህ አሚነ፡፡ 4. ናባ  ኃዛንከ አፍዓዶ ጽንቀህ፣ ናባ ዺሞህ ኤከህ ሲናህ እጽሕፈም ጋዳህ ሲን ክሕዮም ታዳጎና ኤዳ ኤዸሔህ ኪዮካህ ሲን አስሓዛኖ ኤህ ማኪዮ፡፡

  ይብድለቲያህ ኅድጎት አባናም

   5. ሒያውቶ ይስኅዝነቲ አክናንቲ ይኔምኮ ይስኅዝነም ዮያ አከካህ በደል አይጋናን ዮክ አከ ዋዎይ ኢካህ አኪ አራሓህ፣ ሲንኮ ማንጎ ሒያው ያስኅዝነ፡፡ 6. ታይ ዓይነቲህ ሒያውቲ ሲንኮ ማንጎ ማሪ ኤልያፍርደ ቅጽዓት ካዺዓ፡፡ 7. አማይጉል ታይ ሒያውቲ ጋዳህ ኃዛንጎ  ኡገተሚህ ታስፋ ያቁረጸምኮ ሕድጎት አካህ አብቶናከ ታይጻናናዖና ኤዳ፡፡ 8. ታማም ባሊህ ካያ ክኅንትኒም ታይራዳኦና ሓቂ ሲኒ ካኃኖ ሢራሓህ ካኡስቡሉዋ፡፡ 9. ቶይ መልእክት ሲናህ እጽሕፈም ትንፍትንኒህ ኡማን ጉዳህ ታምኢዚዘም፣ ክትኒም አይራዳኦ አህ ኪዮ፡፡ 10. አቲን ሕድጎት አካህ አብታን ሒያውቶህ፣ አኑ ለ ሕድጎት አካህ አባክ አኒዮ፣ ቢሕላ አካህ ያን በደል የለምኮ አኑ ክርስቶስ ነፊል ሕድጎት አካህ አባም ሲና ኦዋ ኤህ ኪዮ፡፡ 11. ታሃሞም ለ አካህ አበም ሰጣን ቶንኮል ሢራሕ ናዽገም ኢዻህ፣ ሰጣን ኒያይተለለምኮ ኤህ ኪዮ፡፡

                                 ዑሱብ ኪዳኒህ አገልግልቲህ ሱባ

   12. ታሃምኮ ላካል ክርስቶስ መዔዋረ አይባሳሮ ጢሮአዳ ቱላል ኤደ ዋክተ ማዳሪ ፍዲን አገልግሎቱህ ኢፈይ ዮህ ፋከህ ዪነ፡፡ 13. ያከካህ ይሳዓል ቲቶ ገየ ዋየርከህ ይመንፈስ ማዕራፍና፣ አማይጉል ታማል ታነ ክርስቲያንኮ ኤምሰነበተህ መቄዶኒያ ኤደየ፡፡ 14. ያኮይ ኢካህ ኖያ ኡማንጉል ክርስቶሱህ ሱብታም አብተህ ኒታምርሔ መዔ ኡረ ለ ሲታ ክርስቶስል ሊኖ ኢዽጋህ እሲሲ ቦታል ኡምቢህ ማድስኖ ናብሲሳ አምላካህ ምስጋና ለም ታኮይ፡፡ 15. አይሚህ ናኑ ታድኅነሚህ ያኮይ ታለየሚህ መዔ ኡረ ለ ዕጣናህ ክርስቶሱህ ፉጎህ ካብተም ኪኖ፡፡ 16. ታለየም ያግድፈ ኡረ ኪኖ፣ ታድኅነሚህ ለ ሂወት ያሓየ ሂወት ማዓዛ ኪኖ፣ አማጉል ታይ አገልግሎቱህ ኤዳቲያ ያከቲ አይቲያ ክኒ? 17. ናኑ እኮ ፉጊ ቃል ንግዲ ኑዋይ ባሊህ ታይስሪፈ ማንጎ ማራ ባሊህ ማኪኖ፣ ያከካህ ፉጎኮ ፋርምተ ክርስቶስ አግልግልቲ ነክህ መዔፉጊህ ነፊል ቅንዕናህ ዋንሲና፡፡  

ማዕራፍ 3   

ዑሱብ ኪዳኒህ አገልገለት 

   1. ጋባዕነህ ኒናሞህ ናይማሰጋኖ ኤዸዽሳክ ና'ነ? ወይ ጋሪጋሪ አባምባሊህ ሲንኮ ወይ ተንኮ ምስጋና ደብዳበ ኒ ጉርሱሳህ ያከ? 2. ሒያው ኡምቢህ ሲን ታብለምከ ሲን ታይ ንብበ ሞሳ መልእክታት አቲን ሲነህ ኪቲን፡፡ 3. አቲን ኒ አገልግሎቱህ ተመተ ክርስቶስ ፋሮንቲት ኪቲኒም ትምዽገም ኪኒ፣ ታይ መልእክት ትምጽሕፈም ያነ መዔፉጊህ መንፈስህ ኪኒካህ ቃላማህ ማኪ፣ ታማም ባሊህ ሒያውቲ አፍዓዶ ጽላታህ ክኒካህ ዻይ ጽላታል ትምጽሕፈም ማኪ፡፡ 4. ታሃም አካህ ናም ክርስቶስ ባርካታህ መዔፉጊህ እምነት ሊኖጉል ኪኒ፡፡ 5. ኒኒ አገልግሎት ናፋጻሞ ዽዕ ኖህ ያሓየቲይ መዔፉጎ ኪኒ ኢካህ ናኑ ኒኒ ዸግኃህ ኢንኪም አብኖ ማዕና። 6. ፍደል አከካህ መንፈስ ቁዱስ ኤድያነ ዑሱብ ኪዳን ናስጋልጋሎ ኒዽዕሲሳቲ መዔፉጎ ኪኒ፣ አይሚህ ፊደል ራባ ባሃ፣  መንፈስ ቁዱስ ለ ሂወት ያሓየ፡፡

  7. ሕጊ ይምቅርፀም ዻይ ጽላታል ፍደሊህ ኪይይ ይነ፣ ሕጊ ዮምሖወ ዋክተ ፉጊ ኪብሪ የምጸበረቀህ ይምግልጸ፤ ኢንኪጉል ኡካ ሙሴ ነፊህ አሞል አይዶጎሕይ ይነ ኢፊ አለይክ  የይደየሚህ እስራኤላውያን ሙሴ ነፊል ይቱኩሪኒህ ያብሎና ማዽዕኖን፣ አማይጉል ራባ ባሄ ሕጊ ታይ ዓነቲህ ክብረህ ይምግሊጸምኮ፤ 8. እሰቲ መንፈስ ቁዱስ አራሓህ ገይማ አገልግሎት አይዻ ያይሰ ክብረ አለለ! 9 ሒያው ኤድ ትምኩኑነ አገልግሎት ታህዻ ክብረ የለምኮ፤ ሒያው አካህ ታጽድቀ አገልግሎት አይዻ ያሰ ክብረ አለለ! 10. ካድት ናባ ክብሪ ትላየ ክብረሊህ ያምወደደረጉል፣ ቲላየ ክብሪ አኔየዋቲያ የከህ ሎይማ። ለ ክብሪ ካዲ ክብረኮ ዩዑንዱወህ ገይማ፡ 11. ቶይ ማላያ ክይይ ይነ ጉዳይ ታህዻ ክብረ ሊይነህ የከምኮ፣ ኡማንጉሉህ ይጽንዔህ ማራ ጉዳይማ ያይሰ ክብረ ለ ማለት ኪኒ፡፡ 

    12.ታይ ዓይነቲህ ታስፋ ሊኖጉል፣ ማይስሂኒም ድፍረቲህ ዋንስታክ ናነ፡፡ 13. ሙሴ፣ ነፍ ያይጸበረቅኒም ሓባ ዋክተ እስራኤላውያን ያብሊኒምኮ ሲኒ ነፍ አምስፍኒይ ይኒን፡፡ ናኑ ግን ተናባሊህ ማብና፡፡ 14. ተን ልቦና ርግጺህ ትደንዚዘ፣ ካፋ ፋናህ ቡሉይ ኪዳኒህ መጻሕፍት አይንብቢክ ተን አፍዓዶ ታማይ አልፈንታድ አልፍምተህ ትመስፍነም ባሊህ ኪኒ፡፡ አይሚህ ቶይ አልፈንቲ ናው ያም ክርሰቶሱህ ጥራህ ኪኒ፡፡ 15. ካፋ ለ ኡካ የከሚህ ሙሴ ሕገ ይንብብንሚህ ሎዉል ተን አእምሮህ ኢዽጋ አልፍምተም ባሊህ ታምሲፊነ፡፡ 16. ያከካህ ሒያው ማዳሪ ኡላል ጋሕታጉል"አልፈንቲ ናው አክያ፡፡"17.ማዳሪ መንፈስ ኪኒ፣ ማደሪ መንፈስ ኤድያነድ ናፃነት ያነ፡፡ 18. አማይጉል ኡምቢክ ለ ማደሪ ክብሪ አሊፈ ዋየ ነፊል ናይጸበረቀ፣ መንፈስ የከምኮ ማዳሪ ገያ ታይ ክብረ፣ ክብሪ አሞል ክብረ ኦሳክ፣ ሊክዕ ማዳራህ ናማጋዶ ናባ፡፡

         ማዕራፍ 4

        ጳውሎስ ታአማኒነትህ አገልግሎት      

     1. ፉጊ መሕረቲህ ታይ አገልግሎት ኖህ ዮሖወጉል፣ ታስፋ ማናቁሩጸ፡፡ 2. ሱዉርከ ሖላሰና ኪን ጉዳይ ኖህ ያይለየ፣ ቶንኮሉህ ማሥራሕና፣ ፉጊ ቃል ዲራብሊህ ማናስገለ፣ ያይሰ ሓቀ ግልፀህ ናይቡሉወ፣ ኒነህ ለ ሒያውልህ ኡምቢህ ኒኒ ኅሊና ግልጸ አባክ ፉጊ ነፊል ማርና፡፡ 3. ኒይብሥረ በሠራታ ቃል ምናልባት ሱዕተቲያ የከሚህ፣ ሱዑተም ታለየም ኪኒ፡፡  4. ኢሲን አካህ አሚነ ዋየንሚህ ምክንያታል ታይ ዓለም አምላክ የከ ሰጣን ተን አፍዓዶ ዮስዖረጉል ኪኒ፣ ፉጊ ቢሶህ ይምግሊጸም ኢዻህ ክርስቶስ ክብረ ዋንስተ፣ መዔ ዋረ አካህ ባሃ ብርሃን ያብሊኒምኮ አበቲ ካያ ኪኒ፡፡ 5. ናኑ ናይምሂረም ኢየሱስ ክርስቶስ ማደራ ኪናምከ ናኑ ለ ኒናሞህ ኢየሱስ ምክንያታል ሲን አገልገልት ኪኖሙህ ኪኒካህ ኒኒዸግኃህ ዳዓባል ማናስቢከ፡፡ 6. አይሚህ ኢፊ ዲተክ አዳድ እፎይ! የህ ዋንስተቲ ፉጊ ክርስቶስ ምስለህ፣ ኢፎሳ መዔፉጊህ ክብረ ያስዺገ ብርሃን ያሓዎ ኢፎ  ናፍዓዶድ ኢፎሰ፡፡

   7. ያከካህ ታይ ናባ ኃይል ፉጊቲያ ኪኒካህ ኒቲያ ማኪም ያማዻጎ፣ ታይ ኩቡር ጉዳይ ገባ ቡልኩዓ ሥራሕህ ኒዋይቲ ባሊህ ነከህ ንብዸ፡፡ 8. ኢሲሲ ኡላኮ መከራ ኒማዳ፣ ግን ማናምስኒፈ፣ ማንጎ ዋክተ ድንግር ኖክያ፣ ለ ታስፋ ማናቁሩጸ፡፡ 9. ናዓብቶሊት ኒታይሰደ ደ፣  ለ ካሓንቶሊት ዋይነህ ማናዽገ፣ ሳብዒምነህ ራድና፣ ለል ማራብና፡፡ 10. ኢየሱስ ሂወት ኒሰውነትድ ያምባላዎ፣ ኡማንጉል ኢየሱስ ራባ ኒኒ ሰውነትድ ኑይኩዔህ ናዞረ፡፡ 11. ካሂወቲህ ራቢ ኒሰውነትድ ያምባላዎ ነህ፣ ናኑ ካዶ ሂወቲህ ታነምክ ኡማንጉል ኢየሱስ ዳዓባል ራቢ ደንገቲህ አሞል ገይምና፡፡ 

    12. አማይጉል ናኑ ራቢ ደንገቲህ አሞል ገይማህ፣ አቲን ሂወቲህ ማርታን፡፡ 13. ያከ እካህ "ኤመነ፣ አማይጉል ዋንሲተ" የህ ይምጸሕፈ፣ ናኑ ለ ዋንሲታክ ሃይከ ኢንክ እምነት መንፈስ ሊኖጉል ናሚነ፣ አማይጉል ዋንስታክ ናነ፡፡ 14. ማደሪ ኢየሱስ ራባኮ ኡጉሠ አምላክ ኖያ ለ ኢየሱስሊህ ኒኡጉሣምከ ሲናሊህ ለ ኢሲ ነፊል ኒያስቅርበም ናዽገ፡፡ 15. ታሃም ኡምቢህ ሲን ጥቅመህ ታከ፣ ጸጋ አክራዕታም ፋናህ ማንጎ ሒያው ማዳሚህ መጠንል፣ መዔፉጎህ ክብረ ታከ ምስጋና ያይማንጎ ኪኒ፡፡

     እምነቲህ ማራናም    

   16. አማይጉል ታስፋ አቅሩጸ ዋይኖይ፣ ምንም ኡካ ኢሮ ኒሰውነት የለየሚህ፣ አዳ ኒወሰውነት ኡማን ዻሕነ ያዑሱበ፡፡ 17. ታሃም ቅልላምከ ዋክቲም ኪኒ፣ ኒመከራ ኤል ያምወደደሪኒም ሂን ጋዳህ ናባቲያ ኪኒ፣ ኡማንጉሊት ክበረ ገይሲሳ፡፡ 18. ናኑ ናክቲለም አምቡሉወ ዋ ጉዳይ ኪኒካህ ያምቡሉወቲያ ማኪ፡፡ አይሚህ ያምቡሉወ ጉዳይ ዋክቲቲያ ኪኒ፣ አምቡሉወ ዋቲ ለ ኡማንጉሊቲያ  ኪኒ፡፡

                                                       ማዕራፍ 5

                                                   ዓራንቲ ኒመኖሪያ   

  1.ታሃም ዱንካን ባሊህ ጊዛዊ ኪኒ ኃዶይታ ራዳ ሒያወቲ ጋባህ አከካህ ፉጎህ ይምሕኒጸ ዘለለዓለማው መንበሪ ዓራናል ያነም ናዽገ፡፡ 2. ዓራናል ያነ ኒኒ ሰፈርድ ሳይኖ አትምንይክ ኢላላክ ናነ፡፡ 3. ቶይ ኒኒ ሞኖሪያድ ሳይና ዋክተ ዓራዳድ ማገይምና፡፡ 4. ታይ ዱካናድ ተክ ኒኃዶይታህ አዳድ ማራህ ኖክ ይዕልሰህ ናምፂንቀ፣ ናምፂኒቀም ራቢ ሂወቲል ኖህ ያምላዋጦ ዓራንቲ መኖሪያድ ሳይኖ ጉርነህ ክኒካህ ታይ ባዶህ ኃዶይታ ባዽሲህ መንፈስህ ጥራሕ ማኪ፡፡ 5. አማይጉል ታይ ላውጠህ ኒዮይሶኖዶወቲ መዔፉጎ ኪኒ፣ ላካል ኖህ ያሓየ ጉዳይ ኡምቢህ ማባዾ ያኮ ኢሲ መንፈስ ኖህ ዮሖወቲ ካያ ኪኒ፡፡

   6. ኒመኖሪያ ባሊህ ተከ ኒኃዶይታ ኖሊህ ታነም ፋናህ፣ ኒ ማዳራኮ መርሕ ነህ ማረናም ናዽገ፣ አማይጉል ኡማንጉል ማይስማለህ ነምኤመመነህ ማረሊኖ፡፡ 7. ማርናም ለ እምነቲህ ክኒካህ ሙቡሉህ ማኪ፡፡ 8. ታርከኮ ኒኒ መኖሪያ ባሊህ ነከምኮ ኒኒ ኃዶያታኮ ባድስምነህ ማደራሊህ ማርኖ ናትሚኔ፣ አማይጉል ማይሲ ማለህ ነምኤመመነህ ማርኖይ፡፡ 9. ታይ ኒኃዶይታሊህ ነከሚህ ወይ ተኮ ባዽስምነሚህ ኒዓላማ ማዳራ ኒያቲሳናም ኪኒ፡፡ 10. አይሚህ ኢሲሲ ኃዶይታህ አበም ኡማም ያኮይ መዔም ኢሲ ሢራሕ ባሊህ ሊካሕ ጋራዎ፣ ኡምቢክ ለ ክርስቶስ ፊርድህ ወንበሪህ ነፊል ካብ ኖዋ ኖልታነ፡፡

ክርስቶስ ኡላህ ፉጊ ካሓንቶሊት ያኪኒም

   11.መዔፉጎ ማይስታናም አይም ኪናም ማናዽገም ኢዻህ፣ ሒያው ናይርድኤ፣ ናኑ አይም ኪኖም ፉጊ ያዽገ፣ 11. አቲን ለ ሲኒ አፍዓዶድ ታሃም ኪኖም ታዽጊኒም ምናባልት ታስፋ አባክ አኒዮ፡፡ 12. አፍዓዶድ ያነ ጉዳይ አከካህ ኢሮኮ ያምቡሉወ ጉዳህ ታሚክሔሚህ መልስ አካህ ታሓዎና፣ ኖያህ ታማካሖና ሲናህ ምክንያት አኪክ ናነካህ ጋባዕነህ ናኑ አይም ኪኖም ናይራዳኦ መዸዺሳና፡፡ 13. ዑቡዳት ነከሚሀ ፉጎህ ኖዋ ነህ ኪኖ፣ አእምሮ ለም ነከምህ ሲናህ ኖዋ ነህ ኪኖ፡፡ 14. ኢንኪ ዋክተ ክርስቶስ ኡማንቲያህ የከህ ራበምከ ኡምቢህ ካራባ ሓድሊታም ኪኖኑም ኒምሪድኤጉል፣ ክርስቶስ ካሓኒ ሢራሓህ ኒኡጉጉሣ፡፡ 15. ሂውቲህ ታነም ኡምቢህ፤ ተናህ ራበምከ ራባኮ ኡጉተም ማሮና ኪኒካህ ካምቦኮ ሣራህ ሲነህ ዮና ማራናምኮ ክርስቶስ ኡማንቲያህ ራበ፡፡ 

   16. አማይጉል ካምቦኮ ሣራህ አክናንቲያ የከሚህ ኃዶይታት ሙቡሉህ ማናብለ፣ ታሃምኮ ባሶህ ክርስቶስ ኑብለም ኃዶይታት ማብሎህ የከምህ ኡካ፣ ካምቦኮ ሣራህ ናብለም ታይ ዓይነቲህ ማኪ፡፡ 17. አማይጉል አኪናንቲ ክርስቶስሊህ የምሕበበረምኮ ዑሱብ ፍጥረቲ ኪኒ፣  ዳዓይና ኪን ፍጥረት ቲላየህ፣ ካቦታድ ዑሱብ ፍጥረት ይምትክኤ፡፡ 18. ታሃም ኡምቢህ ተከም ናኑ ኢሰሊህ ክርስቶስ ኢሲ አባሊህ ኒዋጋሪሰህከ ዋጋሪ አገልግሎት ኖህ ዮሖወም መዔፉጎህ ኪኒ፡፡ 19. ታሃም ፉጊ ክርስቶስ ኡላህ ሒያው ኡምቢህ እሰሊህ ዋጋሪሰ ማለት ኪኒ፣ ተን በደል ለ አክ ማሎይና፣ ኖያህ ዋጋሪ ቃል ዮሖወ፡፡ 20. መዔፉጊ ሒያው ኒ ኡላህ ደዓም ኢዻህ፣ ክርስቶስ ምጋዓህ አባሳደራት ኪኖ፣ አማይጉል ለ መዔፉጎሊህ ዋጋራ ነህ ክርስቶስ ምጋዓህ ሲን ዻዒማክ ናነ፡፡ 21. ናኑ ክርስቶስሊህ ነምሔበበረህ ፉጊ ጽድቀ ናኮ፣ መዔፉጊ ኃጢአት አለዋ ክርስቶስ ኒ ኃጢአት ያይካዖ አበ፡፡

 ማዕራፍ 6

   1. ፉጎሊህ ኢንኮህ ሢራሕናም  ኪኖሚህ  መጠንል ጋራይነ ጸጋ ካንቶህ ማረዒሲና ነህ ተን ዳዒማክ ናነ፡፡ 2. መዔፉጊ፣

             "ካዶረ ሳዓት ኦበ፣  

              ኩድኅነት ለለዕ ኩጎሮኒሰ" ያጉል፣

           "ሃይክ ዶሪምመ ሳዓት ካዶ ኪኒ፣ 

           ድኅነት ለለዕ ካዶ ኪኒ፡፡

  "3. ኒአገልግሎት ያምንቅፈምኮ ኢንኪ ጉዳያህ  ኢንኪሚህ ዒንቅፋት ማናከ፣ 4. ማንግህ መከራከ ጸገሚህ ለ ትዕግስቲ አባክ፣ መዔፉጊህ አገልገልት ክኖም ኡማን አራሓህ ናይቡሉወ፡፡ 5. መዔፉጊህ አገልገልት ኪኖም ናግሊጸም ሳብዕማክ፣ አምዱውክ፣ አምህውክክ.፣ ሢራሓህ ሓዋላክ፣ ዽንዋከ ሉዋሊህ ኪኒ፡፡ 6. ታማም ባሊህ ኒጽሕናህ፣ እዽጋህ፣ ትዕግሥቲህ፣ መዕነህ፣ መንፈስ ቁዱሱህከ ግበዝና ሂን ካሓኖህ፣ 7. ሓቂ ቃልከ ፉጊ ኃላህ ኒኒ አገልግሎት ናግሊጸ፣ አካህ ብያካናም ያኮይ አካህ  ናምከለከለ ማሣረዕያ ለ ጽድቀ ኪኒ፡፡ 8. ክብረህ ወይ ውርደቲህ ናምዋቃሶ ወይ ናማስጋኖ ቶምሶኖዶወም ኪኖ፣ ሓቀ ለም ኪህ ታይለለም ኖክየን፡፡  9. ዝና ለም ኪህ አምድገዋይታም ነከ፣ ራበን ኖካህ ታነም ነከ፤ ሳብዕምነህ ማራቢኒኖ፡፡ 10. ኃዛን ኒማደሚህ ኡማንጉል ኒያትና፣ ድካታት ነከህ ናነሃኒህ፣ ማንጎማራ ሀብታማት አባክ ናነ፣ ኢንኪም ሂናም ኪህ፣ ኡማኒም ኒም ኪኒ፡፡ 11. አቲን ቆሮንጦሱል ማርታ ሒያዎ! ሃይከ ዓዶሰነህ ሲናድ ዋንስና ኒኒ አፍዓዶ ኒይ ፍድነህ ሲናህ ፋክና፡፡ 12. አቲን ሲኒ አፍዓዶ ኖክ ተስሔውን ኢካሀ ናኑ ለ ኒኒ አፍዓዶ ሲናክ ማስሓውኒኖ፡፡ 13. ኒዻሎ ክትኒሚህ መጠንል ናኑ ኒኒ አፍዓዶ ፍዲኒህ ፋክነህ ኒነህ ኖድ ቶሞበም ሲናህ አግልፅክ ናነ፣ አቲን ሲኒ አፍዓዶ ፋክተኒህ ሲናድ ቶሞበም ኖህ ኢግሊጻ ሲናካይክ አኒዮ፡፡

   አምነዋይታ ሒያውሊህ ማምሓባባርና   

   14. አምሰመመዔ ዋይታ አጋባቢራህ አምነዋይታ ሒያውሊህ ማምጣማሪና፣ ጽድቀከ ኃጢአት አይናህ የኒህ ያምሓበባሮና ዽዓና? ኢፎከ ዲተ አይናህ የኒህ አንኮህ ማሮና ዽዓና? ክርቶስከ ዲያብሎስ አይናህ የኒህ አንኮህ ማሮና ዽዓና? ያምነቲያከ አምነ ዋ ቲያ አናህ የኒህ ያምሓባባሮና ዽዓና? 16. መዔፉጊህ በተ መቅደስ ጣዖትሊህ አይሚህ ስምምዒነት ለ? መዔፉጊ ለ፣

       "ኤልማራርከ ህዝቢ ፋናድ አበለዮ፣

        ተንሊህ ጋሔሊዮ፣

        አኑ ተን አምላክ አከሊዮ፣

        ኢሲን ለ ይህዝበ አከሎን፡፡"

የህ ዋንስተም ባሊህ ናኑ ያነ መዔፉጊህ በተ መቅደስ ኪኖ፡፡ 17. ለል ፉጊ ታህ የዽሔ፣

       "ተን ፋንኮ ባዽስማይ ኤወዓ፣

         ሩኩስ ኪን ነገር ለ ማ'ዻጊና፣

         አኑ ለ ውሳነ ጋራየ ሊዮ፣

   18. አኑ ሲን አባ አከሊዮ፣

        አቲን ላበቶከ ሳዮክ ይዻሎ አከሊቲን ያዽሔ ኃይለለ' መዔፉጊ፡፡"

ማዕራፍ 7

   1. አማይጉል ኢንሳዖሎ! ታይ ኡማን ታስፋ ቶምሖወም ኖያህ ኪኒጉል ኃዶይታከ መንፈስ ያይሪክሰ አኪናን ጉዳይኮ ኒነ ናይጻራዎይ፣ ፉጎ ማይስታክ ኒ ቅድስና ፉጹም ታኮ አብኖይ፡፡

    ጳውሎስ ኒያት 

   2. ሲኒ አፍዓዶ ፍዲኒክ ፋካይ ስፍራ ኖህ ኡሑዋ፣ ኢንከቶ ማባዳልኒኖ፣ ቲያ ማቢያኪኒኖ  ቲያ ማአባዝባኒኖ፡፡ 3. ታሃሞም አዽሔም ሲና አውቃሶ ኤህ ማኪዮ፣ አይሚህ ታሃም ባሶህ ሲናክ ነምባሊህ ኒአፍዓዶ ፍዲኒህ ሲናህ ፋክነ፣ ሂወትህ ያኮይ ራባህ ኡማንጉል ሲንሊህ ኪኖ፡፡ 4. ሲን አሞል ሊዮ ኢምነት ናባቲያ ኪኒ፣ ሲን አሞል ሊዮ ምክሓ ናባቲያ ኪኒ፣ ኒኒ መከራህ ኡምቢክ ናምጸነነዔ፣ ይኒያት ዳራት ማለ፡፡ 5. መቄዶንያ ማድነ ዋክተ ኡካ ማንጎ ኡላኮ ጸገም ኒማዳክ ኢንኪጉል ዕረፍት ማገኒኖ፣ ኢሮል ጻበ፣ አዳል ማይሲ ሊይክ ኒነ፡፡ 6. ያከካህ ኃዘን ለም ያይጸነነዔ አምላክ ቲቶ ሙሙቱህ ኒየጸነነዔ፡፡ 7. ነምጸነነዔም ለ ኡሱክ የመተርክህ ጥራህ አከካህ፣ አቲን ካያ ታይጸናናዖና ኪናም ኖበርከህ ኦሳሊህ ኪኒ፣ ይዳዓባል ሊቲን ሳናከ ኃዛን ጽንቀት ኖክየን ዋዕደ ጋዳህ ኒያትነ፡፡ 8. ኢንኪጉል ኡካ ካዶኮ ባሶህ ሲናል ኢጽሕፈ መልእክት ሲን ትስሕዚነህ ተከምህ መልእክት ኢጽሕፈርከህ ማም ጻጻቲኒዮ፣ እምጽጽተም ኤከምኮ ኡካ፣ እምጽጽተም መልእክት ዳጎ ዋክተህ ሲን ትስኅዚነርከህ ኪኒ፡፡ 9. ካዶ ለ ይኒያቲሳ፣ አካህ ኒያታም አቲን ትኅዚኒን እርከህ አከካህ ሲኒ ኃዛኒህ ምክኒያታል ኒሲሓ ሳይተኒህ ትምልውጢን ኢርከህ ኪኒ፣ አማይጉል ሲን ኃዛን ፉጊ ፍቃድ ባሊህ ኪንጉል ናኑ ኢንኪም ሲን ማባዳልኒኖ ማለት ኪኒ፡፡ 10. መዔፉጊህ ፍቃዳህ ያከ ኃዛን ድኅነት ባሃህ ኒስሓህ ገይማ ላውጠ ገይስሳም ኢዻህ ጸጸት ማለ፣ ዓለም ኃዛን ለ ራባ ባሃ፡፡ 11. ታሃም ፉጊ ፍቃድ ባሊህ ያከ ኃዛን ትግሀታህ ኤልታሕሳቦናከ በደልኮ ጺሪያም ኪቲኒም ታይራጋጋጾና ሲን አባ፣ ታማም ባሊህ ኃጢአት አሞል ስኒ ቁጡዓ ታግላጾና፣ ኃጢአት ማይስቶና፣ ዮያህ ሳንቶና፣ መንፈሳው ቅንአታህ ትክክል ታፍራዶናከ ይብድለቲያ ታቅጻዖና ሲን አበሊዮ፣ ኡማን ኡላኮ ታይ ጉዳይኮ ንጹሓን ኪቲኒም ሲን አይርድኤ ሊዮ፡፡ 

   12. አማይጉል አኑ ሲናህ ኢጽሕፈም ኒዳዓባል ሊቲን ትግሀት መዔፉጊህ ነፊል ሲናህ ግልጸ ያኮ ኤህ ኪዮካህ በደል ሥራሔጉልከ በደል ኤልይምፍፂመ ሒያውቶህ ኤህ ማኪዮ፡፡ 13. አምጸነነዔም ታሃሚህ ምክንያል ኪዮ፡፡ ናምጻናናዕኮ አጋናል ቲቶ ኒያተርከህ ምክንያታል ጋዳህ ኒያትነ፣ አይሚህ ኡምቢክ ቲቶ ተይጸነነዕንጉልከ መንፈስ አካህ ቱሰዑሩፊንጉል ኪኒ፡፡ 14. ሲናህ ሊይክ ኢነ ምክሓ ቲቶክ ኤድሔህ እኒዮ፣ አቲን ለ ይማሖላስንቲን፣ ኡማንጉል  ሓቀ ሲናክ አይክ ኣነ፣ ታሃም ሲን ዳዓባል ቲቶህ ዋንሲተ ትምክሕት ሓቀ ኪናም ተምረገገጸ፡፡ 15. ኡምቢክ ታዘዝት ኪትኒምከ ማይስህከ አዻዻዾህ ካገራይተኒም ቲቶ  ያዝክረጉል፣ ሲናህ ለ ካሓኒ ጋዳህ ማንጎቲያ የከ፡፡ 16. አኑ ለ ኡማን አራሓህ ሲናህ አምአማማኖ ዽዔርከህ ጋዳህ  ኒያታ ፡፡

ማዕራፍ 8

 ክርስቲያን ሕንዳ 

   1. ይሳዖሎ! ፉጊ መቄዶኒያል ታነ ሞሶዓረቲህ ዮሖወ ጸጋ ታዳጎና ኪሒኖ፡፡ 2. ተና ማንጎ መከራከ ፋተና ተንማደ፣ ያኮይ ኢካህ ተን ኒያት ነባቲያ ኪኒጉል ምንም ኡካ ጋዳህ ዲካታት የኪኒሚህ ናባ ሕንዳ አበን፡፡ 3. ዽዓናም ጥራሕ አከካህ ዽዓናምኮ አጋናል ሲኒ ፍቃዳ ዮሖውኒም አኑ አካህ አምስክረ፡፡ 4. ይሁዳል ታነ ክርስቲያን ጎሮን ዕድል አክ አክራዓምኮ ኃይላህ ኒዻዒመን፡፡ 5. ኢሲን አበንም ናኑ ኢላልነምኮ አጋናል ኪኒ፣ ኤዸዾታህ ሲኒ ማደራህ ዮሖውን፣ ይቅጽልኒህ መዔፉጊህ ፍቃዳህ ሲነ ኖያህ ዮሖውን፡፡ 6. ታይ ሢራሕ ዮኮመህ ኤዸዺሰቲ ቲቶ ኪይይ ይነጉል ካዶ ለ ታይ ሓቶከ ሲን ሢራሕ ፍጻመ ማድሶ ካያ ዻዒምነ፡፡ 7. አቲን እምነቲህ ያኮይ፣ ዋኒህ ያኮይ፣ ኢዽጋህ ያኮይ፣ ሒያው ጎሮኑህ ልቲን ትግሀታህ ያኮይ፣ ኖያህ ልቲን ካሓኖህ ያኮይ፣ ኡማን ጉዳህ ታይሲን፣ ታይ ጎሮንከ ሢራሓህ ታይሰኒም ያኮይ፡፡

   8 ኢስኪ ታይ ሲናካም ትእዛዛህ ማኪ፣ ያኮይ ኢካህ አክማሪህ መተሖዎህ ትግሃት ሲን ትግሃትሊህ አይወደደሪክ ስን ካሓኒ ሓቀ ኪናም ያዻጎና ኤህ ኪዮ፡፡  9. አቲን ማደራ ኢየሱስ ክርስቶስህ ናባ ሕንዳ ታዻጊን፣ ኡሱክ ኢንኪጉል ኡካ ሀብታም የካሚህ፣ኡሱክ ድካ የከም አተን ሀብታማት ታኮና ሲና ዮዋ ድካ የከ፡፡ 10. ታይ ጉዳይ ሲናህ መዔም የከህ ዮህ ያምቡሉወ ምክረ ሲናህ አሓይክ አኒዮ፣ ትላየ ኢግዳ፣ አሓዎ ዲቦህ ኤህ አከካህ ታሃም አቦ ኤዸዾይታህ ጉረም ሲናህ ኪዮ፡፡ 11. አማይጉል ያሓይኒሚህ ፍቃድ ሓሳብ ሢራሓ አሞል አሰህ ፍጻመ ማዶ ዒሎህ ልትኒሚህ መጠንል ቶይ ትሕስብኒም ካዶ አባ፡፡ 12. መተሖዎህ መዔ ድላይ ይኔምኮ፣ ሒያው ሕንዲ ጋራይሶ ገያም፣ ሊቶሚህ መጠንል ታሓዎ ኢካህ አለዋይታሚህ መጠንል ማኪ፡፡ 

  13. ታሃሞም አይህ ኡምቢክ ኢንክዻ ታኮና ክኒካህ መተሖዎህ ታምጻጋሞና አክማሪ ያዕራፎ ኤህ ማኪዮ፡፡ 14. አቲን ታምጽግሚን ዋክተ ተን ሀብቲ ሲናህ ጸገምድ አሶ፣ ካዶ ሲን ሀብቲ ተን ጸገምድ አሶይ፣ ታይ ዓይነቲህ ሲን ፋናድ ኢንኪዳ ያክኒም ታነ፡፡ 15. ታሃም፣

       "ማንጎም የስከሄለቲያህ አካህ ማራዒና፣

        ዳጎም የስከሄለቲያክ  አክማግዳሊና" የህ     

        ይምጽሕፈም ባልህ ክኒ፡፡  

     ቲቶከ ካዶባ

    16. አኑ ሲናህ አሕስበም ኢዻ ቲቶ ለ ሲናህ ያሕሳቦ አበ አምላክ ያማስጋኖይ፡፡ 17. ቲቶ ሲኑላል ያምተም ኢሲ ፍቃዳህ ኡጉተህ ኒያታህ ክኒካ ናኑ ዳዕምነርከህ ጥራክ ማኪ፡፡ 18. ወንጌል ስብከትህ ሞሶዓርትል ኡማኒል ይምስጊነ ሳዓል ካሊህ ፋራክ ናነ፡፡ 19. ታማምኮ አጋናል ታይ ሳዓል ናኑ ታይ መዔ ሢራሕ ማዳሪ ክብረህ ነህ ናፍጽመጉልከ ናስጋልጋላሎ ሊኖ መዔ ፍቃድ አግሊጺህ ኢንኮህ አድይክ ሢራሕ ታምሰተፈም ናኮ ሞሶዓረህ ዶሪምመ ቲያ ኪኒ፡፡ 20. ታይ ሓቶህ ያምሖወ ማል አይመሔደሪህ ኢንኪ ዓይነቲህ ጉድለት ኒማዳምኮ ኒምጥንቅቀ፡፡ 21. አይሚህ ኒዓላማ ማዳሪ ነፊል ጥራሕ አከካህ ሒያው ነፊል ለ  መዔ ጉዳይ አባናም ኪኒ፡፡ 22. ማንጎ ዋክተ ማንጎ አራሓህ ይምፊትነህ ቱጉህ የከህ ገይማ ኒሳዓል ቲቶ ማዓሊህ ፋርነም ታይ ምክንያታል ኪኒ፣ ኡሱከ ሲን አሞል ለ ኢምነት ናባቲያ ኪንጉል ካዶ ሲና ጎሮኒሶ ለ ትግሃት ኡማኒምኮ ናባቲያ ኪኒ፡፡ 23. ቲቶ ዳዓባል ኢዽጋ ጉርሱሰምኮ፣ ሲና ጎሮኒሶ ዮሊህ ኢንኮህ ሢራሕነህ ይሢራሕህ ዶባይቶ ኪኒ፣ ካሊህ ታምተ አኪ ይሳዖል የክኒምኮ፣ ሞሶዓርቲ ተወከልት፣ ክርስቶስ ክብረ ኪኖን፡፡ 24. አማጉል ሲኒ ካሓኖ አካህ ኢግሊጻ፣ ታይ ዓይነትህ ኒካኃኖከ ሲን አሞል ሊኖ ትምክሕት ካንቶ ማኪጉል ሞሶዓሪት ኡምቢህ አስቡሉወ ሊቲን፡፡

  ማዕራፍ 9

ክርስቲያናህ ተከ ልግስና

   1. ይሁዳል ታነ ክርስቲያናህ ያከ ስሊዒት ሲናል አጽሐፎ ማጉረሱሳ፡፡ 2. አቲን አካይያል ታነ ሒያው ጎሮኒሶና ልቲን መዔ ዲላይ አዸገርከህ አካይያ ሒያው ቦዲፋኮ ኤዸዽሰኒህ ጎሮኒሶና ተምሶኖዶወም ኪኖን ኤዸሔህ መቄዶንያ ሒያዋሊህ ኤምኤመመነህ ዋንስተህ አኒዮ፣ ኤረ ተና ጎሮኒሶና ልቲን ድላይ ማንጎ ማሪ ያምራዳኦና ተን አበ፡፡  3. ታይ ጉዳህ ሲን  አሞል ሊኖ ምክሓ ካንቶ ተከህ ራዕታምኮ ታይ ሳዖል ፋራክ አነ፣ አቲን ልክዕ አኑ ታሃም ባሶህ ሲን ፋረም ባሊህ ኦምሶኖዶይዋይ ኢላላ፡፡ 4. መቄዶንያ ሒያው ዮያሊህ ሲን ኡላል የመትኒህ አምሶኖዶወ ዋይተም ተክኒህ ሲንገያንጉል ሲናህ ኒምክሔርከህ ሖላሲና፣ አቲን ኢማ ጋዳህ ሖላሲተ ሊቲን፡፡ 5. አማይጉል ታሓዎና ቃል ሳይታናምኮ ባሶል ታምሳናዳዎና ሲን ያይዛካካሮና፣ ያናማህ ታይ ኒሳዖል ዮኮ ዮኮምኒህ ሲን ኡላል ያማቶና አባናም ጉርሱሳም ኪናማህ ገህ አኒዮ፡፡ ታይ ዓይነቲህ ናኑ ናምተ ዋክተ ሲን ሓገዝ ዮምሶኖዶወቲያ ያከ፣ አቲን ለ ታሓይኒም ጊደህ አከካህ ሲነህ ጉርተኒህ ክቲንም ያይቡሉወ፡፡ 

   6. ዳጎም ይድሪየቲ፣ ዳጎ ምህርቲ ያሕፉሰ፣ ማንጎም ይድሪየቲ ማንኮ ሚህርቲ ያሰኬለ፣ ያዸሔ ቃል ኢዝክራ፡፡ 7. አማይጉል መዔፉጊ ኪኅናም ኒያታህ ታሓየ ሒያው ኪኒጉል ኢሰኢሰህ ያሓዎ ጉራቲ ኢሲ አፍዓዶኮ ጉረህ ኒያታህ ያሓዎይ ኢካ አነሰሕክ ያኮይ ይምግዲደህ አሓየዋዎይ፡፡ 8. ኡማጉል ኡማን ዋክተህ ሲን ዽዕታም ገይተኒህ መዔ ሢራሓድ ኡማንጉል አስሳናም ሲናህ ራዕቶ ፉጊ የይመገህ ኢሲ በረከትኮ ሲናህ ያሓዎ ዽዓ፤ 9. ታሃም፣"ድካታታህ ጎሮኑህ  ዮሖወ፣ ጽድቂ ኡማንጉሉህ ማራ" የህ ይምጽሕፈም ባሊህ ኪኒ፡፡  

    10. ዳራ ያደሪቲያህ ዳሪ፣ ምግበህ ኢንገራ ያሓየ አምላክ ታደሪይን ዳራ የበረከህ ያሓየ፣ ሲን ሓቲህ ፊኢረ ሲናህ ያይመንገ፡፡ 11. ሲን ጎሮን ኒደፍራህ ተን ማዳ ሒያው ኡምቢህ ፉጎ ያማሰጋኖና ዕሎህ፣ አማንጉል ያሓዎና መዔፉጊ ኡማን ጉዳይህ ሀብተ አካህ ያከ፡፡ 12. ታይ ሲን ሕንዲህ አገልግሎት ክርስቲያን ጸገምኮ ያየይየዔሚህ አሞል ሒያው ፉጎህ ማንጎ ምስጋና ያስቀራቦና ተን አባ፡፡ 13. ታይ ሲን ሓቲህ አገልግሎት፣ አቲን ክርስቲያን ወንጌል ጋራይተኒህ ታም ኢምነም ተኪኒህከ አኪ ማራህ ለ ታስግልግሊኒም ታይርድኤም ኪንጉል ኡምቢህ ለ ፉጎ ያይምስግኒን፡፡ 14. ኢሲን ለ መዔፉጊ ተናህ ዮሖወም ጋዳህ ናባ ጸጋህ ምክንያታል ሲን ክኅኖንጉል ጻሎት ሲናህ አባን፡፡

15. ሒያው ቃላታህ ሕንዳ ዋንሲቶና ማዽዕማም ኢዻህ፣ ፉጊ ይምስግነቲያ ያኮይ፡፡

ማዕራፍ 10

   ጳውሎስ አምካላካልት መልስ

    16 .አኑ ጳውሎስ ሲን ነፊል አነሃኒህ ኢንቲ ሖላሊ ዮክ ያነቲያክ፣ ሲንኮ ሚሪኅ አጉል ለ ሲን አሞል ደፋር ዮክ የንቲያክ፣ ክርስቶስ ጋርሄከ መዔነህ ሲን ዻዒማክ አኒዮ፡፡ 2. ሲን ዻዒማም ለ ሲኑላል አምተ ዋክተ ዲፍረቲህ ዋንሲቶ ያብሲሶና ኤህ ኪዮ፡፡ ኃዶይታት አታሐሳሲባህ ናም መለለሰም ባሊህ አበኒህ ኒታግምተ ውልውል ሒያዊህ ነፊል ለ ድፍረቲህ ዋንስቶ ዺዓ፡፡ 3. ኢንኪጉል ኡካ ዓለምል ኒኔሚህ፣ ናምወገኤም ዓለም ሒያው ባሊህ ማኪ፡፡  4. ኒዺባህ ማሳረዕያ መዝገብ ዒዶ ዺዓ  መለኮት ኃይላ ለም ኪኖን ኢካህ ዓለም ዺባህ ማሳሪዔያ ማሎን፡፡ 5. መዔፉጊህ አዽጋህ አሞል ትዕቢቲህ ኡጉታ ክርክርከ ካንቶ ኪን ሓሳብ ዒደልኖ፣ አእምሮህ ኡምቢህ አመረክክ ክርስቶሱህ ናምአዛዞ አባክ ናነ፡፡ 6. ሲን ታአዝዞ ፍጹም ኪናም ኒምርዲኤሚህ ላካል፣ አኪናን አምአዛዝ ዋይቲ ናቅጻዖ ሱንዱዋት  አከልኖ፡፡

  7. አቲን ታብሊኒም ኢሮ ጉዳይ ኪኒ፣ ኢንከቲ ክርስቶስ ቲያ ኪዮ የህ የምኤመመነምኮ ጋባዖዋይ ያሕሳቦይ፡፡ ናኑ ለ ካያ ባሊህ ክርስቶሲም ኪኖም ናምራዳኦይ፡፡ 8. ማዳሪ ዮሖወ ሢልጣኒህ ዳዓባል ጋዳህ ኢምክሔምኮ ማኆላሲታ፣ አይሚህ ታይ ሢልጣን ኖህ ዮምሖወም ሲና ናህናጾ ኪኒካህ ዕድኖ ማኪ፡፡ 9. ኢኒ መልእክቲህ ሲን ማይሲሳም ማካልና፡፡ 10. ምናልባት ጋሪጋሪ"ጳውሎስ መልእክታት ዕዒሊሳምከ ኃይላ ለም ኪኖን፣ አካል አክታብለጉል ለ ሩኩትያ ኪኒ፣ ካ ዋኒ ዻይታንቲያ ኪኒ"ያናህ ያከ፡፡ 11. ታሃም ታዽሔ ሒያው ናኑ ዸዽል ነከህ ኒኒ መልእክታታህ ናጽሕፈምከ ዻየርከኮ ሲንሊህ ነከህ ሢራሕናሚህ ፋናድ ኢንኪ ባዽስ ሚያነም ያምራዳኦናይ። 12. ያኮይ ኢካህ ሲነ ታይምስጊነ ውልውሊ ሒያውሊህ ኒነ ናይዋዳዳሮ ወይ ኒናሞ ናይናጻጻሮ ማናድፍረ፣ ኢሲን ለ ሲነ ሲነሊህ ያመዛዛኖናከ ሲነህ ሲኒ ደግኃ ሲነሊህ ያይወደደርን ኢርከህ ታስቲውዒለም ማኪኖን፡፡ 13. ናኑ ለ አይከ ሲና ኡካ ሲን ማድናም ፋናህ ፉጊ ኖህ ዮሖወ ሢራሒህ መደቢል ናሚኪሔካ ኢካህ ኤዳምኮ አጋናል ታምኪሔም ማኪኖ፡፡ 14. አቲን ለ ሊቲን ሢራሕህ አከባቢህ አዳል ኪቲንጉል ክርስቶስ ሥራሕህ ቃል ናይባሣሮ ሲኑላል ነመተጉል ታማይ ክልልኮ ማትላይኒኖ፡፡ 15. አማይጉል መዔፉጊ ኖያህ ይውሲነ ክልልኮ ትላይነህ አክማሪህ ሢራሓድ ኤዳምኮ አጋናል ማናምክሔ፣ ናቢህ ሲን እምነት ያናቦከ ኒሢራሕ ፉጊ ይውሲነ ክልሊህ ኒፋናድ ጋዳህ ያናቦ ታስፋ አብና፡፡ 16. አማይጉል አኪ ሒያውህ ሢራሒህ ክልልህ አዳል ሳይነህ ዮኮመህ ሢራሕመ ሢራሐህ አምክሔካህ ሲንኮ ቶህ ታነ ሀገራታል በሠራታ ቃል ናይባሣሮ ዽዕና፡፡17. ያከካ"ያምክሔቲ መዔፉጎህ ያማካሖይ፡፡" 18. አይሚህ ሒያውቶ ያማስጋኖ ካታይብቅዔም ፉጎ ያይምስግነጉል ኪኒካህ ኢሰህ ኢሲ ኢሳሞ ያምሰግነርከህ ማኪ፡፡

                                                         ማዕራፋ 11

                                              ጳውሎስከ ዲራብት ሐዋርያት

   1. ዳጎሙህ ይሶዻህ ዮህ ታምዓጋሦና ጉራክ አነ፣ ዓዲህ ዮህ ትምዕግሢን፡፡ 2. ፉጊ ሲናህ አይሲናም ባሊህ፣ አኑ ለ ሲናህ አይሲና፣ ሲናህ አይሲናም ኒጽሕት ኪን ደንግል ኢንኪ ባዻህ ትይልሰጉል ኪኒ፣ ኡሱክ ለ ክርስቶስ ኪኒ፡፡ 3. ዓሮራ ሔዋን ተንኮሉህ ተ ተይተለለም ባሊህ ምናልባት፣ ሲን ሓሳብ ለ ዮምቦሎሶወህ ክርስቶስሊህ ሊቲን ቅንዕናከ ኒፅኅና ሓባክ ታኒን ኤህ ማይሲታ፡፡ 4. አይሚህ ኢንኪ ሒያውቲ ስኑላል የመተህ ናኑ ኒስቢከም አከካህ አኪ ኢየሱስ ሲናህ ያስብከጉል፣ ጋራይተኒህ ትብተኒህ አምዕግሥክ ታኒን፡፡ 5. ያኮይ እካህ አኑ ታይ ናባ ሐዋርያትኮ ኢንኪ ጉዳህ ዕንዲዮም ማካለ፡፡ 6. መዔ ዋኒ አለዋየሚህ ኡካ እዽጋ ዮክ ማታጉዱለ፣ ታሃሞም ማንጎ ዋክተ ማንጎ አራሓህ ግልጸህ ሲን ኒርድኤህ ናኒዮ። 

  7. አኑ መዔፉጊህ ወንጌል ደሞዝ ማለህ ሲናህ ኢብሥረርከህ ሲና ለ ናውሶ ኢነ ኤይወረደርከህ ምናልባት ኃጢአታድ ዮክ ሎይመህ ያከ? 8. ሲና አስጋልጋሎ አኪ ሞሶራዓርትኮ ሓገዝ ጋራኤርከህ ተና ኢዝሪፈህ አኒዮ፡፡ 9. ሲንሊህ አነ ሃኒህ ጸገም ይማደ ዋክተ መቄደኒያኮ ተመተ ይሳዖል ይጉርሱሳ ጉዳህ ኡምቢህ ይጎሮንሳይ ይኒንጉል ኢንከቲ ዑካ ማክኒዮ። 10. ክርስቶስ ሓቂ ዮያድ ያነጉል፣ አምኪሔ ዋካህ ያባቲ አካይያ ሀገራታል ቲይ ሚያነ፡፡ 11. ምክንያት አይሚህ የኒህ ኪኒ? ተን ማክኅንዮጉል ኪኒ? ተን ክኅኒዮም መዔፉጊ ያዽገ፡፡   

   12. ቶይ አኪ ሐዋርያት ኖያ ለ ጳውሎስ ማዓል ባሊህ ሢራሔ ሊኖ አይክ ያምክሒኒሚህ  ምክንያት ዋይሲሶ ካዶ አባም ባሶቱላል ጋባዔህ አበ ሊዮ፡፡ 13. ታህ ኢጊድ ሒያው ክርስቶስ ሐዋርያታህ ያማጋዶና ሲናሞ ታይልውጠ ዲራብቲ ሐዋርያትከ ታይታለለ ሢራሕተይና ኪኖን፡፡ 14. ታሃም ያይድንቀ ጉዳይ ማኪ፣ አይሚህ ሰጣን ኡካ ኢፎይቲ መልአካህ ያማጋዶ ኢሰ ያይለውጠ፡፡"15. አማይጉል ሰጣን አገልግሎት ጽድቅ አገልግሎቱህ ያይማጋዶና ሲነ ይልውጥንሚህ  ምያይድንቀ፣ ባኪቶል ሲኒ  ሢራሕህ ሊሞ ገሎን፡፡

       ጳውሎስ ማደ መከራ

   16. አኪናን ሒያውቲ አኑ ኡፈየማል ኪዮም አካለ ዋዎይ ኤዽሔህ ጋባዔህ ዋንሲታክ አኒዮ፡፡ ሚዸ ማሊህ ሲናድ ኢምጊደሚህ ኡካ ዳጎም አማካሖ ሚዸ ማሊ ባሊህ አባይ ይሎዋ፡፡ 17. ታማም ባሊህ ሚኪሓህ ዋንሳህ፣ ዋንሲታም ማደራ ባሊህ አከካህ ሚዸ ማሊ ባሊህ ኤከህ ኪዮ። 18. ማንጎ ማሪ ኃዶይታ ጉዳህ ያምክሕንጉል አኑ ለ አምኪሔ። 19. አቲን ታስቲውዒለም ክትንሚህ መጠኒህ ምዸ ማሎሊህ ኢንኪ በቀል ሂኒም ትዕግሥቲ አብታን። 20. ታማም ባሊህ አኪናንቲ ባሪያህ ሲን አባጉል፣ አክንናንቲ ሲን ያብዝቢዘጉል አክናንቲ ሲን ዳራትኮ ሲናድ ትላያጉል፣ አክናንቲ ሲን ዻይታጉል፣ ነፍከ ዻባናል ሲናክ  ሃንጉል  ታምዕግሥን፡፡ 21. ምንም ኡካ ይሖላሳም የከምህ ሲና ባሊህ ትዕግሥትህ ኃይላ ለም  ማኪኖም ሲናህ አግልጽክ አኒዮ፡፡ ያኮይ ኢካህ ኢንከቲ ያማካሖ ይድፍረሚህ፣ አኑ ካያ ባሊህ ኢድፍረህ አምክሔ፣ ታሃም አዽሔም ካዶሊህ ምዸማል ባሊህ ኤከህ ኪዮ። 22. ኢስን ኢብራውያን ኪኖኑ? አኑ ለ እብራው ኪዮ፡፡ ኢስን እስራኤላውያን ኪኖኑ? አኑ ለ እሰራኤላው ኪዮ፣ ኢስን ለ አብርሃም ዳራ ኪኖኑ? አኑለ አብርሃም ዳራ ኪዮ፡፡ 23. ኢስን ክርስቶስ አገልገልቲ ኪኖኑ? አኑ ተንኮ ናቢህ ክርስቶስ ያስግልግለቲያ ኪዮ፣ ታሃሞም አይህ ዑቡድ ባሊህ ዋንስታክ አኒዮ፣ ማንጎ ዋክተ ሥራሓህ ሓዋለህ አኒዮ፣ ማንጎ ጊዘ ኡምዹወህ አኒዮ፣ ማንጎጉል ሳብዒመህ አኒዮ፣ ማንጎ ዋክተ ራቢ አሞል ገይመህ አኒዮ፡፡ 24. ሦዶምከ ሳጋል፣ ሦዶምከ ሳጋል ፁርጋፍያ ኮናጉል አይሁዱህ ሳብዕመህ አኒዮ፡፡ 25. አዶሓ ዋክተ ኢሎህ ኢምድብዲበ፣ ኢንኪጉል ዻይቲህ ኢምድብዲበህ አኒዮ፣ አዶሓጉል መርከብ ድንገት  ይማደ፣ ኢንኪ ባርከ ኢንኪ ለለዕ ባሕር አሞል ኢነ፡፡ 26. ያራሕህ ማንጋህ ወዓከ ወዕቲህልስፍታህ ድንገት ይማደ፣ አይሁድ ይወገንከ አረማውያናህ ድንገት ይመደ፣ ከተማከ ባራካል በሕራድ ለ ድንገት ይማደ፤ ታማም ባሊህ ድራብቲ አማንቲኮ ድንገት ይማደ፡፡ 27. ማንጎ ሢራሕከ ሓዋል ልይክ ኢነ፣ ማንጎ ዋክተ ዽን ዋየህ አኒዮ፣ ራሀብክ ላየ ባካራህ ኢምጽንቀህ አኒዮ፣ ማንጎ ዋክተ ምግቢ ዋይቶ ይማደ፣ ጋላዖከ ዓራድ ይማደ፡፡ 28. አኪሚህ ኡምቢህ አስቆረጸካህ ሞሶዓሪ ዳዓባል ኡማንጉል አሕስቢከ አምጺንቅክ ኢነ፡፡ 29. ኢንኪ ሒያውቲ ሐዋላጉል፣ አኑ ለ ኤሊህ ሐዋላክ ኢነ፣ ኢንኪ ሒያውቲ ኃጢአታህ ያምሰነከለጉል፣ አኑ ለ አምነደድከ እነ፡፡ 30. ያምክሕኒም ጉርሱሳም ያከዶ፣ አኑ አምክሔም ይኃዋል ያይቡሉወ ነገራትኮ ኪክ እነ፡፡ 31. ኡማንጉል ማራ ይምሰግነ ኒማደሪ ኢየሱስ ክርስቶስህ አባ የከ አምላክ ድራብተዋም ያዺገ፡፡ 32. ደማስቆ ካታማል ኢነ ዋክተ ኑጉሥ አሬታስ ዳባል ይነ ህዝቢ ገዛኢ ዮያ ያባዾ ጉረህ ካታማት ኢፍያፋል ዘብዔናህ ዻዉዻይ ዪነ፡፡ '33. ያኮይ ኢካህ ሒያው ማንዳቅ ሞስኮቲህ ኡላኮ ዕንክቢት ይሃየኒህ ይብዽኒህ ካጋባኮ ኤወዔ፡፡

ማዕራፋ12

 ጳውሎስ ራእይ 

   1. ኢንኪጉል ኡካ ምክሓድ ጥቅሚ ገይመ ዋሚህ፣ ምክሓ ጉርሱሰምኮ ማዳሪ ዮህ ዮሖወ ግልጸህ ወይ ሙቡሉህ አማክሔ፡፡ 2. ክርስቶስ ቲያ የከ ኢንኪ ሒያውቶ አዽገ፣ ታይ ሒያውቲ አፋራምከ ታማን ኢግዲያኮ ባሶል ዓራንኮ አሞል ያነ ዓራናል የውዔ፣ የውዔም ኢሲ ኃዶታሊህ ያኮ ወይ አከዋዎ ማዽገ፣ ፉጊ ያዽገ፡፡ 4. ያኮይ ኢካህ ታይ ሒያውቲ ጋናታል የውዔም አዽገ፣ ታማል ኡሱክ ሒያው ቃላህ ያምጋላጾ ሒያው ለ ዋንሲቶ ዺዔ ዋይታ ጉዳይ ዮበ፡፡  5. ታህ ኢግድን ሒያዋህ አምክሔ፣ ኢኒ ዳዓባል ለ ኢኒ ኃዋልኮ በሒህ አኪ አካህ አምክሔ ጉዳይ ማሊዮ፡፡  6. ኢስኪ ኢኮ አኑ ሓቀ ዋንሲተህ አማካሖ ጉራዶ ምዸማል አከ ማዸዺኒዮ፣ ያኮይ ኢካህ ያሞል ያብለምከ ይዳዓባል ታበምኮ አሞል ግሚት አሓየምኮ ኤድሔህ  ምክሓኮ ኢነ ዻዉዸ፡፡

   7. ታይ ዮህ ይምግልጸ ናባ ጉዳያኮ ኡገተሚህ አትዕብተምኮ፣ ይኃዶይታ ከናን ባሊህ ይሙዳ ሥቃይ ዮህ ዮምሖወ፣ ታሃም ሰጣን ፋሮይታ አከምኮ አምጽፍዕክ አምሠቀይ አትዕብተምኮ ያባ፡፡ 8. ታይ  ይያሠቀየ ጉዳይ ዮኮ ዮህ ያዕዻዎ ማዳራ አዶሓ ዋክተ ዻዒመ፡፡ 9. ያከካህ ኡሱክ"ይኃይሊ ያመቡሉወም ኩ'ኃዋላህ ክኒጉል ይጸጋ ኩዽዕታ" ዮክ የ፣ አማይጉል ክርስቶስ ኃይሊ ዮያሊህ ያኮ አኪናን ዋከተኮ አጋናል ኢኒ ኃዋላህ አማካሖ ኪኅኒዮ፡፡ 10. ኃይሊ ገይማም ሩኩታም ያኪን ዋክተኮ ኪኒጉል ክርስቶስ ዳዓባል ሓዋላጉል፤ ዋትምማጉል፣ አምጽግመጉል፣ አምስድደጉል፣ ዓናውናው አጉል ኒያታ፡፡

ጳውሎስ ቆሮንጦስ ሒያዋህ አምጽኒቅክ አሕስብይ ይነ

   11. ሚዸማሊ ባሊህ ዋንስተ፣ ይቦል ታሃም ዋንስቶ ያብተም ሲና ኪኒ፣ ዮያ ታይማስጋኖ ኤዳይትነም ሲና ኪይክ ይነ፣ አይሚህ ኢንኪጉል ኡካ አኑ አይምቶ ኪዮም አምዽገ ዋየሚህ  ሒያውቶ ኤከሚህ ናባ ማራ አክያን ሐዋርያትኮ ኢንኪሚህ ማዕዺዮ፡፡ 12. አኑ ሓቂ ሐዋርያ ኪዮም ታይርዲኤ ጉዳያት፣ አኑ ስን ፋናድ አነሃኒህ ትዕሥትህ ኢፍፂመ ሥሮሕ ኪኖን፣ ታይ ምልክታትከ ድንቀ ኪን ጉዳያት፣ ተአምራት ለ ኪኖን፡፡ 13. ሲን አሞል ዑካ ኤከህ ራዓምኮ ፈር፣ አኪ ሞሶዓሪትኮ ሲና ኡስዑንዹወም አይሚህ ኪኒ? ታሃም ኡምነህ ሎይተንምኮ ብሕላ ዮሃባ፡፡

    14. ሲን ኡላል አማቶ ኦምሶኖዶወም ካዲ ይማዳሕህ ኪኒ፣ አኑ ዑካ ሲናል አኮ ማጉራ፣ አይሚህ አኑ ጉራም ሲናካህ ሲን ማል ማኪ፡፡ ኢሲ ዻይሎህ ማል ታስካሎ ኤዳም ወለድ ኪኖን እካህ ዻይሎ ወለድህ ማል ምያስከሄልን፡፡ 15. ሲን ዳዓባል ኡካ ኢኒ ማል፣ ኢናሞህ  ቲላሰህ አሓዎ ደስ ዮህያ፣ ኢስኪ አኑ ታህዳ ማንጎም ሲን አክሒኒህ፣ አቲን ይክሕንቲንም ታህዻ ዳጎም ኪኒ? 16. ቶሆም ተክህ ታሃማህ ዑካ ሲናክ ማኪኒዮ፡፡ አቲን ታናምባሊህ ቶንኮልከ አይታላላህ ሲን ኢዚዘም ታካሊን፡፡ 17. ኤል ሲን ፋረል ኢንኪ ሒያውቲህ ኡላህ ኡካ ሲን ኢቢዝቢዘ? 18. ቲቶ ሲኑላል ያማቶ ዻዒመ፡፡ ቶይ ኒሳዓል ለ ካሊህ ፋረ፣ ይቦል ቲቶ ለ ሲን ይብዝብቢዘ? ዮከ ካያ ሲን ንስግልጊለም ኢንኪ መንፈሲህ ኪይይ ማና? ኒገዾ `ኢንከቶ ኪክ ማና? 19. እስክ ካዶ ታሕስብኒም ናኑ ሲን ነፊል ሲን ዳዓባል ናምከለከለም አብተኒህ ኪኒ? ናኑ ክርስቶስም ነከህ ዋንስናም ፉጊ ነፊል ኪኒ፡፡ ይሳዖሎ! ናኑ ታሃም ኡምቢህ ዋንስናም ሲና ናህናጾ ነህ ኪኖ፡፡ 20. አኑ ታማህ አምተ ዋክተ ምናልባት ታኮና ጉራም አከካህ፤ አኑ ለ አቲን ጉርታናም ባሊህ አከካሀ፣ ቲታ ገየልኖህ ያክ ኤዽሔህ ማይሲታ፣ ታማም ባሊህ ሲናድ ናዓቦ፣ ቅንአት፣ ቁጡዓ፣ አድማ፣ ሒያው ሚጋዕ ዓይኒሳናም፣ ሐሚ፣ ትዕቢት፣ ህውከት ያኔምኮ ማይሲታ፡፡ 21. ጋባዔህ ሲኑላል  አምተጉል  ይ አምላክ ምናልባት ሲን ነፊል ያይወረደ ለ ኤዽሔህ ማይስታክ አነ፣ ታሃምኮ ባሶህ ኃጢእት ሢራሔኒ፤ ታይ ሢራሔን ሲኒ ብዕልግናህከ ዙሙቱድ ሲነ ዕደኒህ ኢርከህ፤ አበን በደሊህ ኒስሓ ሳየ ዋይተ ሒያውህ ኃዛኒህ አሞል ራደ ሊዮ ኤዽሔህ ማይሲታ፡፡

ማዕራፋ 13

ባክቶ ምክረከ ሳላምታ

  1. አማይጉል ሲኑላል አምተም ታሃም ይማዳሐህ ኪኒ፣ አማጉል ኡማን ጉዳይ ያምረገገጸም ሳላማህ ወይ አዶሕቲ ማስኪሪህ ኪኒ፡፡ 2. ማላሚ ማስክሪህ ዋርሲምናናል ሲንሊህ ኢነ ዋክተ አይጣንቃቆ ዋንሰተህ ኢነ፣ ካዶሊህ ለ ዸዺል ኤከህ ታሃምኮ ባሶድ ኃጢአት ሢራሕተምከ አኪ ማራ ለ አይጣንቃቆ ዋንሲታክ አነ፣ ካዶ ሲኑላል ጋሔህ አምተ ዋክተ ቲያ ማማይሲታ፡፡ 3. ታይ ዓነትህ ዮያድ ዋንስታቲ ክርስቶስ ኪናም አምርድኤ ልቲን፣ ሲንሊህ ያምቡሉወቲ ክርስቶስ ኃይላ ክኒካህ ኃዋል ማኪ፡፡ 4. ኡሱከ ማስቃል አሞክ ይምስቂለህ ራበም ሓዋል የከሚህ፣ ካዶ መዔፉጊህ ኃይላህ ሂውቲህ ማራ፣ ናኑ ለ ካሊህ ሩኩታም ነከ፣ ሲንሊህ ሊኖ ቲቲህ ገይቶህ ለ ካሊህ መዔፉጊህ ኃይላህ ማራክ ናነ፡፡ 5. እምነቲህ ክቲኒም ታይራጋጋጾናክ ስነ ኢምርምራ፣ ስነ ኢፊቲና፣ ኢየሱስ ክርስቶስ ስን አዳድ ኪናም ማስታውዓልኒቲንሆ? አማም አከዋየምኮ ሲነ ኡቡላ፣ ኢየሱስ ክርስቶስ ሲን አዳድ ኪናም ማስታወዓሊኒቲን? አማም አከዋይትምኮ ፋታናል ራደን ማለት ኪኒ! 6. ናኑ ፋታናል ማራድኒኖም ታዻጎና ታስፋ አብክ ናነ፡፡ 7. ኢንኪጉል ኡካ ኡማ ጉዳይ አብታናምኮ ፉጎል ጻሎት አብና፣ ጻሎት አብናናህ ኢንኪጉል ኡካ ናኑ ኤዳም ነከህ አምቡሉወካህ ራዕነሚህ፣ አቲን ኡማን ዋክተ መዔም አብቶና ኪኒካህ ኒኒ ቢቅዓት ናይባላዎ ማኪ፡፡ 8. አይሚህ ናኑ ሓቂ ዳዓባል ሢራሕክ ናነካ ሓቂ ተፃይ ኪናምኮ ኢንኪ ጉዳይ ማሢራሕና፡፡ 9. ናኑ ሩኩታም አኪህ አቲን ለ ኃይለ ለም ታኪንጉል፣ ደስ ሲናህ ዮዋይ፣ ኒጻሎት አቲን ፉጾማን ታኮና ኪኒ፡፡ 10. ታይ መልእክት ሲንኮ ምርሕ ኤህ አነሃኒህ ሲናል ኢጽሕፈም ታይ ምክንያታህ ኪዮ፣ ታይ ዓይነቲህ ሲኑላል አሚተ ዋክተ ማዳሪ ዮህ ዮሖወ ሢልጣናህ ሲን ማይጽንቀ፣ አይሚህ ማዳሪ ሢልጣን ዮህ ዮሖወም ሲና አይሀናጾ ኪኒካህ ሲና አስዓናዎ ማኪ፡፡ 11. ራዕተሚህ ይሳዖሎ! ናጋይ ቲካ፣ ፉጹማን ታኮና ኢፅዒራ፣ ይምክረ ኦባአ፣ ሲነሲነህ ኤምሰመመዓ፣ ሳላማህ ማራ፣ ካሓኖከ ሰላም አምላክ ሲንሊህ ያኮይ፡፡ 12. ሳዖሊኒ ሞቦህ ቲታ ፉጉታክ ሳላምታ ትታህ ኡሑዋ፡፡ 13. ክርስቲያን ሙሉኡድ ሳላምታ ካብ ሲናህ ኢሳን፡፡ 14. ማዳሪ ኢየሱስ ክርስቶስህ ጸጋ፣ ፉጊ ካሓኒህ  መንፈስ ኅብረት ኡማን ሲናሊህ ያኮይ፡፡